អន្តរជាតិ - La Reine Media

ធ្លាយព័ត៌មាន «នាវាមុជទឹកសហរដ្ឋអាមេរិក ប្រទះឃើញ UFO ហោះហើរ និងមុជទឹកក្រោមទឹកសមុទ្រ ក្នុងល្បឿនមហាលឿន

អ្នកយកព័ត៌មានមួយរូបរបស់ទស្សនាវដ្ដី Washington Examiner ទើបតែបានបង្ហើបឱ្យដឹងថា កងទ័ពជើងទឹកសហរដ្ឋអាមេរិក បានប្រទះឃើញវត្ថុចម្លែកមួយចំនួនដែលផ្លាស់ទីក្នុងល្បឿនយ៉ាងលឿននៅខាងក្រោមផ្ទៃទឹកសមុទ្រ សង្ស័យថាជា យានអវកាសរបស់មនុស្សពិភពផ្កាយ។

យោងតាមសារព័ត៌មាន Sputnik អ្នកកែសែតឈ្មោះ Tom Rogan ដែលធ្វើការឱ្យទស្សនាវដ្ដី Washington Examiner បានចែករំលែកឱ្យដឹងពីហេតុការណ៍ខាងលើ ជាមួយនឹងពិធីករ Tucker Carlson របស់ទូរទស្សន៍ Fox News ក្នុងពេលកំពុងជជែកគ្នាអំពីវីដេអូខ្លីមួយដែលត្រូវបានថតពីនាវាចម្បាំង USS Omaha កាលពីខែកក្កដា ឆ្នាំ2019។ វីដេអូខ្លីមួយនេះ បង្ហាញពីវត្ថុចម្លែកមួយដែលមានរូបរាងតូច និងសណ្ឋានមូល ហោះក្បែរផ្ទៃទឹកសមុទ្រ រួចក៏មុជចូលក្នុងទឹក។

អ្នកសារព័ត៌មាន Rogan និយាយថា ក្រៅពីវីដេអូបង្ហាញពីវត្ថុហោះ និងមុជទឹកដ៏ចម្លែក ដែលត្រូវបានគេសង្ស័យថាមកពីពិភពខាងក្រៅ នាវាមុជទឹកវាយប្រហារ និងនាវាមុជទឹកនុយក្លេអែរ របស់សហរដ្ឋអាមេរិក ក៏ចាប់បានរលកសញ្ញារបស់វត្ថុចម្លែកមួយចំនួន ដែលផ្លាស់ទីក្នុងល្បឿនរាប់រយ knot (1 knot ប្រហែលនឹង 1.85 គីឡូម៉ែត្រ/ម៉ោង) ក្រោមទឹកសមុទ្រផងដែរ។

Rogan ថ្លែងថា លោកទទួលបានព័ត៌មាននេះ ពីប្រភពមួយចំនួនដ៏គួរជាទីទុកចិត្ត និងបានអះអាងថា កងទ័ពជើងទឹករបស់ សហរដ្ឋអាមេរិក ក៏មានទិន្នន័យទាក់ទិននឹងហេតុការណ៍នេះដែរ។

ទូរទស្សន៍ RT របស់រុស្ស៊ី បានឱ្យដឹងថា នៅក្នុងអំឡុងពេលដែលវីដេអូខាងលើត្រូវបានថតកាលពីខែកក្កដា ឆ្នាំ2019 មាននាវាចម្បាំងសហរដ្ឋអាមេរិក ចំនួន 3គ្រឿង រួមមាន USS Kidd, USS Rafael Peralta និង USS John Finn ដែលកំពុងបំពេញបេសកកម្មនៅក្នុងតំបន់ San Diego ត្រូវបានយានហោះហើរចម្លែកចំនួន 6គ្រឿង ហោះមកក្បែរ ក្នុងល្បឿន 64គម/ម៉ោង អស់រយៈពេលជាច្រើនថ្ងៃ។ យានចម្លែកទាំងនេះ ត្រូវបានគេជឿថា មានសមត្ថភាពអស្ចារ្យជាងយន្តហោះគ្មានមនុស្សបើក របស់កងទ័ពជើងទឹកសហរដ្ឋអាមេរិកទៅទៀត៕

ប្រភព៖ Fox News, Sputnik
ប្រែសម្រួល៖ បុត្រា

May 27, 2021

រដ្ឋនៅឥណ្ឌា ផ្ដល់ឱសថបុរាណរបស់អាចារ្យសាសនា ដល់អ្នកជំងឺCOVID-19

ក្រុមប្រឹក្សាភិបាលនៃរដ្ឋ Haryana សម្រេចផ្ដល់ឱសថបុរាណរបស់លោកអាចារ្យម្នាក់ ជូនដល់អ្នកជំងឺCovid-19 ប៉ុន្តែ ត្រូវបានក្រុមវេជ្ជបណ្ឌិត ប្រតិកម្មជំទាស់យ៉ាងខ្លាំងក្លា។

រដ្ឋ Haryana នៅភាគខាងជើងប្រទេសឥណ្ឌា ដែលត្រូវបានគ្រប់គ្រងដោយគណៈបក្ស Bharatiya Janata របស់នាយករដ្ឋមន្ត្រី Narendra Modi ក្នុងសប្ដាហ៍នេះ បានប្រកាសថា នឹងចែកឱសថបុរាណ Coronil ដល់អ្នកជំងឺCovid-19។ ឱសថនេះ ត្រូវបានក្រុមហ៊ុន Patanjali Ayurved របស់អាចារ្យ Baba Ramdev ឧទ្ទេសនាមកាលពីឆ្នាំទៅ និងត្រូវបានឃោសនាយ៉ាងគគ្រឹកគគ្រេងថាជា «ឱសថព្យាបាលជំងឺCovid-19»។

ក្រោយមក អាជ្ញាធរបានប្រកាសថា Ramdev ដែលជាសហស្ថាបនិករបស់ក្រុមហ៊ុនខាងលើ មិនត្រូវបានអនុញ្ញាតឱ្យឃោសនាថាជា ថ្នាំព្យាបាលជំងឺនោះទេ តែអាចឃោសនាថាជា ថ្នាំបង្កើនកម្លាំងដល់ប្រព័ន្ធភាពស៊ាំប៉ុណ្ណោះ។

សេចក្ដីសម្រេចចែកថ្នាំ Coronil របស់រដ្ឋ Haryana នេះ បានជួបនឹងការរិះគន់យ៉ាងខ្លាំងក្លាពីសំណាក់សហគមន៍អ្នកវេជ្ជសាស្ត្រឥណ្ឌា។ ពួកគេក៏បានរិះគន់ Ramdev ផងដែរ ព្រោះតែអាចារ្យរូបនេះ ធ្លាប់បានប្រកាសថា វេជ្ជសាស្ត្រទំនើប បណ្ដាលឱ្យជនជាតិឥណ្ឌាជាច្រើនត្រូវស្លាប់ដោយសារ Covid-19។

«បើសិនជាអាជ្ញាធរ Haryana សម្រេចចែកថ្នាំនេះពិតមែន នោះនឹងជាបរាជ័យរបស់ពួកគេ» នេះបើតាមសម្ដីរបស់ Ajay Khanna ប្រធានសមាគមវេជ្ជសាស្ត្រឥណ្ឌា (IMA) ប្រចាំរដ្ឋ Uttarakhand ដែលបានព្រមានកាលពីថ្ងៃទី26 ខែឧសភា។

Uttarakhand គឺជាទីដែលក្រុមហ៊ុន Patanjali របស់អាចារ្យ Ramdev តាំងនៅ។ Khanna យល់ថា ពុំមានមូលដ្ឋានផ្នែកវិទ្យាសាស្ត្រណាមួយបញ្ជាក់អំពីការប្រើប្រាស់ថ្នាំ Coronil នៅក្នុងការព្យាបាលជំងឺCovid-19 នោះឡើយ។ IMA ក៏បានដាក់ពាក្យបណ្ដឹង ប្រឆាំងនឹងអាចារ្យ Ramdev ផងដែរ ព្រោះតែបុគ្គលនេះបានប្រកាសថា ការព្យាបាល Covid-19 ដោយផ្អែកលើវិទ្យាសាស្ត្រ បានបណ្ដាលឱ្យអ្នកជំងឺCovid-19 រាប់ពាន់នាក់ត្រូវស្លាប់។

គិតមកដល់ថ្ងៃទី27 ខែឧសភានេះ ប្រទេសឥណ្ឌា បានរកឃើញអ្នកវិជ្ជមាននឹង Covid-19 សរុបចំនួន 169,097,775នាក់ ក្នុងនោះមាន 3,512,593នាក់បានស្លាប់, 7150,734,575 បានជាសះស្បើយ និង 14,850,607នាក់ កំពុងទទួលការព្យាបាល៕

ប្រភព៖ Reuters
ប្រែសម្រួល៖ បុត្រា

May 27, 2021

តួលេខអ្នកឆ្លង COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី27 ខែឧសភា ឆ្នាំ2021

ក្រសួងសុខាភិបាលកម្ពុជា ព្រឹកនេះ (27 ឧសភា) បានប្រកាសឱ្យដឹងថា បានរកឃើញអ្នកវិជ្ជមាននឹង Covid-19 ថ្មី ចំនួន 649នាក់បន្ថែមទៀត ក្នុងអំឡុង 24ម៉ោងនៃថ្ងៃទី26 ខែឧសភា ឆ្នាំ2021។

គិតមកដល់បច្ចុប្បន្ន កម្ពុជា មានអ្នកឆ្លងវីរុសCovid-19 សរុប ចំនួន 27,638នាក់។ ព័ត៌មានបន្ថែម សូមអានរវាយការណ៍សង្ខេបខាងក្រោម។

នៅទូទាំងពិភពលោក គិតមកដល់ពេលនេះ មានអ្នកឆ្លង Covid-19 សរុបចំនួ 169,093,368 នាក់ ក្នុងនោះមាន 3,512,497នាក់បានស្លាប់, 150,722,266នាក់បានជាសះស្បើយ និង 14,858,605នាក់ កំពុងទទួលការព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

May 27, 2021

បាញ់រះដោយកាំភ្លើង លើមនុស្ស 80នាក់ ក្នុងចំណតរថភ្លើងមួយ នៅ សហរដ្ឋអាមេរិក! 9នាក់បានស្លាប់

សហរដ្ឋអាមេរិក៖ បុគ្គលិកផ្នែកដឹកជញ្ជូនម្នាក់ បានយកកាំភ្លើងបាញ់រះ សម្លាប់មិត្តរួមការងារចំនួន 8នាក់ មុនពេលធ្វើអត្តឃាត នៅឯចំណតរថភ្លើងមួយកន្លែងក្នុងរដ្ឋ California កាលពីថ្ងៃទី26 ខែឧសភា 2021។

ក្រុមមន្ត្រីសហរដ្ឋអាមេរិក នៅមូលដ្ឋាន បានឱ្យដឹងថា ករណីបាញ់រះនេះកើតឡើងនៅវេលាម៉ោង 6និង30នាទី នៃថ្ងៃទី26 ខែឧសភា ឆ្នាំ2021 (ម៉ោងនៅភ្នំពេញ) នៅក្នុងកិច្ចប្រជុំមួយដែលមានវត្តមានមនុស្សយ៉ាងតិច 80នាក់។ ជនរងគ្រោះ 8នាក់ដែលត្រូវបានបាញ់សម្លាប់ និងម្នាក់រួចផុតពីការស្លាប់ក្នុងស្ថានភាពអាចគ្រោះថ្នាក់ដល់ជីវិត សុទ្ធតែជាបុគ្គលិករបស់ស្ថាប័នដឹកជញ្ជូនមួយ ដែលមានទីតាំងនៅក្បែរព្រលានយន្តហោះនៃទីក្រុង San Jose ភាគខាងត្បូងទីក្រុង San Francisco នៃរដ្ឋ California។

«ក្រៅពីនេះ ហេតុការណ៍ក៏មានជនរងគ្រោះជាច្រើននាក់ត្រូវរងរបួសផងដែរ។ ភ្លាមៗនៅពេលករណីបាញ់រះកំពុងកើតឡើង ក្រុមប៉ូលិសក៏បានទៅដល់កន្លែងកើតហេតុ» នេះបើតាម Russell Davis ស្នងការរងប៉ូលិសប្រចាំតំបន់ Santa Clara។

Laurie Smith ស្នងការប៉ូលិសតំបន់ Santa Clara និយាយថា «ខ្ញុំជឿជាក់ថា នៅពេលដឹងថា កម្លាំងប៉ូលិសបានទៅដល់ ជននោះក៏បានធ្វើអត្តឃាត។ កងកម្លាំងរបស់យើង បានទៅដល់កន្លែងកើតហេតុភ្លាម»។

ក្រុមដោះគ្រាប់បែក ត្រូវបានបញ្ជូនទៅកាន់កន្លែងកើតហេតុ ក្នុងនោះ សុនកជំនាញ បានរកឃើញ «វត្ថុធាតុនៃគ្រឿងផ្ទុះមួយចំនួននៅក្នុងកន្លែងកើតហេតុ» និងកំពុងបន្តស្វែងរកនៅបរិវេណជុំវិញចំណតរថភ្លើង កាលពីល្ងាចថ្ងៃទី26 ខែឧសភា។

ជនដៃដល់ត្រូវបានគេដឹងថា ឈ្មោះ Samuel Cassidy ជាបុគ្គលិកនៅស្ថាប័នដឹកជញ្ជូនក្នុងតំបន់ Santa Clara ជាក្រុមហ៊ុនផ្គត់ផ្គង់សេវាកម្មរថយន្តដឹកអ្នកដំណើរ និងរថភ្លើងសម្រាប់តំបន់ San Jose។

Laurie Smith ស្នងការប៉ូលិសតំបន់ Santa Clara

ករណីខាងលើនេះ ក៏មានវត្តមានរបស់ក្រុមប៉ូលិស FBI និងក្រុមហ៊ុនពន្លត់អគ្គិភ័យផងដែរ។ ប៉ូលិសក៏ស៊ើបអង្កេតលើករណីអគ្គិភ័យមួយដែលត្រូវបានគេជឿថា ជាប់ទាក់ទិននឹងជនដៃដល់ក្នុងករណីបាញ់រះនេះ។

ថ្មីៗនេះ អំពើបាញ់ប្រហារនៅសហរដ្ឋអាមេរិក បាន និងកំពុងកើតមានជាបន្តបន្ទាប់។ ករណីជាច្រើនបានកើតឡើងនៅឯករិយាល័យនៃក្រុមហ៊ុនដឹកជញ្ជូន FedEx នៅតំបន់ Indianapolis, អគារករិយាល័យមួយនៅ California, ហាងទំនិញមួយនៅ Colorado និងហាងម៉ាស្សាមួយចំនួននៅ Atlanta។

កាលពីខែមុន ប្រធានាធិបតីអាមេរិក បានហៅអំពើបាញ់ប្រហារដោយកាំភ្លើងនៅសហរដ្ឋអាមេរិក ថាជា «ជំងឺឆ្លង» និងជា «អំពើគួរឱ្យអៀនខ្មាសនៅចំពោះមុខពិភពលោក»។ កាលពីឆ្នាំ2020 ករណីបាញ់ប្រហារដោយកាំភ្លើងនានានៅសហរដ្ឋអាមេរិក បានសម្លាប់មនុស្សជាង 43,000នាក់៕

ប្រភព៖ Reuters
ប្រែសម្រួល៖ បុត្រា

May 27, 2021

វ៉ាក់សាំង COVID-19! ពលរដ្ឋពេញវ័យចំនួនពាក់កណ្ដាលនៅសហរដ្ឋអាមេរិក បានចាក់វ៉ាក់សាំងរួចរាល់

សេតវិមានបានប្រកាសថា ប្រជាជនពេញវ័យនៅសហរដ្ឋអាមេរិកចំនួនពាក់កណ្ដាល បានទទួលការចាក់វ៉ាក់សាំងបង្ការវីរុសCovid-19 រួចរាល់ហើយ ដែលនេះគឺជារបត់សំខាន់ថ្មីនៅក្នុងការប្រយុទ្ធប្រឆាំង Covid-19 របស់ប្រទេសនេះ។

ព័ត៌មានខាងលើនេះ ត្រូវបានលើកឡើងកាលពីថ្ងៃទី25 ខែឧសភា ឆ្នាំ2021 នៅលើ Twitter របស់ Cyrus Shahpar នាយកផ្នែកទិន្នន័យ Covid-19 របស់សេតវិមាន។ ដូច្នេះ ពលរដ្ឋពេញវ័យចំនួន 50% នៅសហរដ្ឋ អាមេរិក បានទទួលការចាក់វ៉ាក់សាំងបង្ការ Covid-19 ដូសទីពីររបស់ Moderna និង Pfizer-BioNTech ឬ មួយដូសរបស់ Johnson & Johnson (វ៉ាក់សាំង Johnson & Johnson តម្រូវឱ្យចាក់តែមួយដូសគឺរួចរាល់)។

សហរដ្ឋអាមេរិក បច្ចុប្បន្នមានអ្នកឆ្លងវីរុសCovid-19 សរុបចំនួន 33,947,189នាក់ ក្នុងនោះមានអ្នកស្លាប់សរុបចំនួន 605,208នាក់, អ្នកជាសះស្បើយចំនួន 27,606,442នាក់ ខណៈអ្នកជំងឺកំពុងព្យាបាល មានចំនួន 5,735,539នាក់។

បើទោះបានក្លាយជាសម្បុកវីរុសCovid-19 ធំជាងគេបង្អស់ក្នុងពិភពលោក ប៉ុន្តែ បច្ចុប្បន្ន សហរដ្ឋអាមេរិក កំពុងនាំមុខគេនៅក្នុងការចាក់វ៉ាក់សាំង ជាមួយនឹងពលរដ្ឋ ចំនួន 50% ក្នុងចំណោមពលរដ្ឋសរុបជាង 332 លាននាក់ បានចាក់វ៉ាក់សាំងយ៉ាងតិចមួយដូស។

ប្រធានាធិបតី Joe Biden បានកំណត់គោលដៅ ចាក់វ៉ាក់សាំងយ៉ាងតិចមួយដូស ជូនពលរដ្ឋពេញវ័យឱ្យបាន 70% ត្រឹមថ្ងៃទី4 ខែកក្កដា ឆ្នាំ2021។ បច្ចុប្បន្ន តួលេខនេះ បានកើនដល់ជិត 62% ទៅហើយ។ ក៏ប៉ុន្តែ យុទ្ធនាការចាក់វ៉ាក់សាំង កំពុងជួបឧបសគ្គ ដោយសារតែពលរដ្ឋខ្លះ មានការរារែកក្នុងការទៅទទួលការចាក់វ៉ាក់សាំង។

«ស្ថានភាពសុខភាពរបស់សហគមន៍នានា ត្រូវបានកែលម្អ ដែលនេះ បានផ្ដល់ថាមពលដល់សេដ្ឋកិច្ចសហរដ្ឋអាមេរិក ឱ្យងើបក្បាលឡើងបាន 90% បើធៀបនឹងដំណាក់កាលមុនវិបត្តិ Covid-19» នេះបើតាមក្រុមហ៊ុន Moody’s Analytics។ ស្ថានភាពខ្វះកម្លាំងពលកម្មនៅតំបន់មួយចំនួនគឺជាភស្ដុតាងបង្ហាញពីល្បឿននៃការរីកចម្រើនរបស់សេដ្ឋកិច្ចសហរដ្ឋអាមេរិក ហើយក៏ជាសញ្ញាមួយបង្ហាញថា អត្រាខ្វះការងារធ្វើនឹងត្រូវថយចុះក្នុងពេលឆាប់ៗនេះ។

ខណៈនេះដែរ នៅទូទាំងពិភពលោក គិតមកដល់ពេលនេះ មានអ្នកឆ្លងវីរុសCovid-19 សរុបចំនួន 168,535,322នាក់ ក្នុងនោះមាន 3,500,047នាក់បានស្លាប់, 150,077,015នាក់បានជាសះស្បើយ និង 14,958,260នាក់ កំពុងទទួលការព្យាបាល៕

ប្រភព៖ Worldometers, AFP, Reuters
ប្រែសម្រួល៖ បុត្រា

May 26, 2021

ស្ថានភាពជំងឺ COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី26 ខែឧសភា ឆ្នាំ2021

អ្នកជំងឺ Covid-19 ថ្មី ចំនួន 660នាក់ ត្រូវបានរកឃើញកាលពីម្សិលមិញ (25 ឧសភា) នាំឱ្យតួលេខអ្នកឆ្លងវីរុសនេះសរុប ឡើងដល់ 26,989នាក់។

កាលពីម្សិលមិញ កម្ពុជា ក៏មានអ្នកជំងឺCovid-19 ចំនួន 7នាក់ បានបាត់បង់ជីវិត ដូច្នេះ អ្នកស្លាប់សរុបដោយសារវីរុសនេះ ក៏បានកើនដល់ 190នាក់។ ព័ត៌មានបន្ថែម សូមអានរបាយការណ៍សង្កេបរបស់ក្រសួងសុខាភិបាល ដែលមានដូចខាងក្រោម។

នៅទូទាំងពិភពលោក គិតមកដល់ពេលនេះ មានអ្នកឆ្លង Covid-19 សរុបចំនួ 168,528,040នាក់ ក្នុងនោះមាន 3,499,712នាក់បានស្លាប់, 150,052,550នាក់បានជាសះស្បើយ និង 14,975,778នាក់ កំពុងទទួលការព្យាបាល៕ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

May 26, 2021

(វីដេអូ)-ទាហានសហរដ្ឋអាមេរិក មានបំពាក់កែវយឹតពិសេស «មើលពេលយប់ ឃើញដូចពេលថ្ងៃ»

ទាហានសហរដ្ឋអាមេរិក ប្រើប្រាស់កែវយឹតរាត្រី ENVG-B បង្ហាញវត្ថុនានាដែលស្ថិតក្នុងទីងងឹត ឱ្យមើលឃើញច្បាស់ ជាមួយនឹងខ្សែរស្មីព័ទ្ធជុំវិញរូបភាព យ៉ាងលម្អិត ប្រៀបដូចនៅក្នុងហ្គេមអេឡិចត្រូនិក។

សារព័ត៌អាមេរិក កាលពីថ្ងៃទី24 ខែឧសភា ឆ្នាំ 2021 បានចុះផ្សាយវីដេអូ ដែលមានប្រភពពីកងទ័ព បង្ហាញពីក្រុមទាហានប្រទេសនេះ ប្រើប្រាស់កែវយឹតសម្រាប់មើលពេលយប់ជំនាក់ថ្មី ដែលមានឈ្មោះថា ENVG-B។ តាមរយៈ ENVG-B គេអាចមើលឃើញរូបភាពក្នុងស្បៃរាត្រី បានយ៉ាងច្បាស់ ដោយមានជំនួយពីខ្សែពន្លឺដ៏ភ្លឺ ដែលជាស៊ុមព័ទ្ធជុំវិញរូបភាព នៅលើផ្ទៃទិដ្ឋភាពពណ៌ក្រហម-ប្រផេះ។

នៅក្នុងវីដេអូនេះ ក្រុមទាហានអាមេរិក និងទិដ្ឋភាពនានា ត្រូវបានបង្ហាញយ៉ាងច្បាស់ ដោយកែវយឹត ENVG-B បើទោះជាពួកគេកំពុងបញ្ចូលគ្រាប់កាំភ្លើងធំ M777 នៅក្នុងទីងងឹត។ គ្រាប់កាំភ្លើងដែលបានបាញ់ចេញ ត្រូវបានមើលឃើញច្បាស់ ដោយវាបង្ហាញពន្លឺពណ៌ខៀវ-ប្រផេះ។

ក្រុមមន្ត្រីការពារជាតិ បានឱ្យដឹងថា ENVG-B គឺជាផលិតផលនៃកម្មវិធីទំនើបកម្មសព្វាវុធ ដែលត្រូវបានអភិវឌ្ឍអស់ជាច្រើនឆ្នាំមកហើយ ដោយក្រុមហ៊ុន Elbit Systems of America។ ENVG-B អាចត្រូវបានបំពាក់លើមួកសុវត្ថិភាពរបស់ទាហាន។

ENVG-B គឺជាកំណែថ្មីនៃកែវយឹតរាត្រីជំនាក់មុនរបស់កងទ័ពអាមេរិក ដោយវាត្រូវបានបំពាក់ប្រព័ន្ធស្កេនកំដៅរូបភាព (Thermal imaging systems) និងប្រព័ន្ធបង្កើនភាពជាក់ស្ដែង (Augmented reality) ដែលច្នៃឡើងដោយប្រើប្រាស់មូលដ្ឋាននៃបច្ចេកវិទ្យានៅលើទូរស័ព្ទ និងម៉ាស៊ីនលេងហ្គេម។

កន្លងមក កែវយឹតរាត្រីបុរាណរបស់កងទ័ពអាមេរិក បង្ហាញរូបភាពនៅលើផ្ទៃពណ៌បៃតង ដែលនេះអាចធ្វើឱ្យចុករោយភ្នែក និងអស់កម្លាំង បើសិនប្រើប្រាស់យូរ។ ចំណែក ENVG-B ផ្ដល់រូបភាពច្បាស់ជាង និងជួយឱ្យទាហានមានភាពងាយស្រួលក្នុងការមើលឃើញសត្រូវនៅខាងក្រោយផ្សែង និងក្នុងស្ថានភាពអាកាសធាតុមិនល្អ។

ENVG-B ថែមទាំងមានមុខងារបង្ហាញផែនទី ប្រព័ន្ធនាំផ្លូវ និងតំណភ្ជាប់ឥតខ្សែ ជួយឱ្យក្រុមទាហាន ងាយស្រួលចែករំលែកទីតាំងរបស់សត្រូវដែលពួកគេបានឃើញ។

«ជាមួយនឹងកំណែមុនរបស់ ENVG-B អ្នកស្ទើរតែមិនអាចមើលឃើញអ្វី នៅពេលមានគ្រាប់បែកផ្ទុះ ឬមានពន្លឺដ៏ខ្លាំងអ្វីមួយបង្ហាញខ្លួន។ ចំណែក ENVG-B វិញ មានបំពាក់ប្រព័ន្ធលៃពន្លឺ ដូច្នេះ អ្នកអាចប្រើវាបានក្នុងពេលមានពន្លឺខ្លាំងកំពុងជះមក» នេះបើតាម Daniel Mathews មន្ត្រីយោធាមួយរូប ទទួលបន្ទុកផ្នែកព័ត៌មានរបស់កងពលតូចថ្មើរជើងលេខ2 នៃកងពលធំថ្មើរជើងលេខ2 របស់កងទ័ពជើងគោកសហរដ្ឋអាមេរិក។

ក្រុមហ៊ុន Elbit បានចុះកិច្ចព្រមព្រៀង ផ្គត់ផ្គង់កែវយឹតរាត្រី ENVG-B ដែលមានតម្លៃសរុប 442លានដុល្លារ ទៅឱ្យកងទ័ពសហរដ្ឋអាមេរិក និងបានផ្ដើមប្រគល់ផលិតផល ចាប់ពីឆ្នាំ2020៕

ប្រភព៖ Washington Post
ប្រែសម្រួល៖ បុត្រា

May 25, 2021

COVID-19! ជិត 200នាក់លោតចូលទន្លេដើម្បីគេចពីវ៉ាក់សាំង៖ ឥណ្ឌាពន្លឿនការយល់ដឹងពីអត្ថប្រយោជន៍នៃការចាក់វ៉ាក់សាំងបង្ការវីរុស

ពលរដ្ឋជិត 200នាក់ នៅក្នុងរដ្ឋ Uttar Pradesh នៃប្រទេស ឥណ្ឌា បាននាំគ្នារត់ពួន ក្នុងនោះមានអ្នកខ្លះលោតចូលទឹកទន្លេ នៅពេលក្រុមមន្ត្រីសុខាភិបាលមកចាក់វ៉ាក់សាំងបង្ការវីរុសCovid-19។

ដើម្បីអាចគ្រប់គ្រងបញ្ហាឆ្លង Covid-19 អាជ្ញាធររដ្ឋឥណ្ឌា បានអំពាវនាវជាបន្តបន្ទាប់ ឱ្យពលរដ្ឋដែលមានអាយុចាប់ពី 18ឆ្នាំ ទៅចាក់វ៉ាក់សាំងឱ្យបានលឿនបំផុតតាមដែលអាចធ្វើទៅបាន ចាប់ពីថ្ងៃទី1 ខែឧសភា ឆ្នាំ2021។

ប៉ុន្តែ យោងតាមសារព័ត៌មាន Sputnik កាលពីចុងសប្ដាហ៍កន្លង នៅក្នុងភូមិ Sisaunda (រដ្ឋ Uttar Pradesh) មានហេតុការណ៍ដ៏ធំមួយបានកើតឡើង នៅពេលប្រជាជនជិត 200នាក់ បានរត់ចេញពីផ្ទះសម្បែង ហើយមានអ្នកខ្លះថែមទាំងលោតចូលទឹកទន្លេទៀតផង នៅពេលក្រុមបុគ្គលិកសុខាភិបាលមកចាក់វ៉ាក់សាំង។ មូលហេតុដែលត្រូវបានពលរដ្ឋទាំងនោះលើកឡើង នោះគឺថា ពួកគេមិនចង់ត្រូវគេចាក់ «សារធាតុពុល» ចូលក្នុងខ្លួន ដែលនេះគឺសំដៅលើវ៉ាក់សាំងបង្ការ Covid-19។

ក្រុមប្រជាពលរដ្ឋនៅក្នុងភូមិ Sisaunda បានស្នើឱ្យក្រុមបុគ្គលិកសុខាភិបាល ចាកចេញពីភូមិរបស់ពួកគេ។ ក្រុមបុគ្គលិកសុខាភិបាល បាននាំគ្នាពន្យល់ ណែនាំ និងបញ្ចុះបញ្ចូល ប៉ុន្តែប្រការនេះបានធ្វើឱ្យមានបញ្ហាច្របូកច្របល់។ ពលរដ្ឋជាច្រើននាំគ្នារត់គេច និងលោតចូលទន្លេ Sarayu ដែលនៅក្បែរភូមិ ក្នុងបំណងគេចពីការចាក់វ៉ាក់សាំង។

ភូមិ Sisaunda នៃទីរួមស្រុក Ramngar ក្នុងស្រុក Sisaunda បច្ចុប្បន្នមានពលរដ្ឋរស់នៅប្រមាណ 1,700នាក់ ដែលភាគច្រើនមិនចេះអក្សរ។ ពួកគេមានការសង្ស័យលើការចាក់វ៉ាក់សាំង។ មន្ត្រីមួយរូបប្រចាំតំបន់ Ramnagar បានប្រាប់ទីភ្នាក់ងារសារព័ត៌មាន Sputnik កាលពីថ្ងៃទី24 ខែឧសភាថា៖ «យើងមិនអាចចាប់ខ្លួន ឬឃុំខ្លួនពួកគេ ព្រោះតែការខ្លាចវ៉ាក់សាំង។ យើងនឹងបង្កើនការអប់រំ ដើម្បីឱ្យមានការយល់ដឹងពីអត្ថប្រយោជន៍នៃការចាក់វ៉ាក់សាំង»។

បច្ចុប្បន្ន ឥណ្ឌា មានអ្នកស្លាប់ជាង 307,240នាក់ ដោយសារ Covid-19

Gulshan Kumar ដែលជានិស្សិតមួយរូបកំពុងសិក្សាផ្នែកចក្ខុវិញ្ញាណនៅ Ramnagar និយាយថា ក្នុងភូមិខាងលើ មិនទាន់មានករណីឆ្លង Covid-19 ណាមួយនៅឡើយ។ «ពលរដ្ឋយល់ថា មានតែអ្នកបានឆ្លងវីរុសប៉ុណ្ណោះ ទើបគួរត្រូវចាក់វ៉ាក់សាំង។ អ្នកភូមិមិនយល់សោះថា ហេតុអ្វីបុគ្គលមិនឆ្លងក៏ត្រូវចាក់វ៉ាក់សាំង»។

ទន្ទឹមនឹងនេះ ព័ត៌មានដែលនិយាយពីមាត់មួយ ទៅមាត់មួយ នៅក្នុងភូមិគឺវា «លឿនជាងល្បឿនពន្លឺទៅទៀត»។ និស្សិតវ័យ 22ឆ្នាំរូបនេះពន្យល់ថា៖ «នៅក្នុងភូមិ និងទីរួមស្រុកដែលនៅក្បែរខាង មានករណីឆ្លងវីរុសក្រោយពេលបានចាក់វ៉ាក់សាំង ហើយជាងនេះក៏មានករណីស្លាប់ជាហូរហែនៅពាសពេញផ្ទៃប្រទេស បន្ទាប់ពីបានចាក់វ៉ាក់សាំង Covid-19។ ពលរដ្ឋបានយកដំណឹងនេះ និយាយប្រាប់តៗគ្នា ធ្វើឱ្យកើតមានបញ្ហា «ក្បែកមួយជាក្អែកដប់» ដែលនេះគឺជាមូលហេតុនាំឱ្យប្រជាជនក្នុងភូមិខ្លាចវ៉ាក់សាំងដល់ថ្នាក់នេះ»។

នៅពេលឃើញប្រជាជននាំគ្នាលោតចូលទឹកទន្លេ ដោយសារតែខ្លាចវ៉ាក់សាំង Rajiv Kumar Shukla ដែលជាមន្ត្រីមួយរូបនៅតំបន់ Ramnagar ក៏បានទៅដល់មាត់ទន្លេ និងពន្យល់ លើកទឹកចិត្ត។ ក្រោយមក ក៏មានពលរដ្ឋចំនួន 18នាក់ បានស្ម័គ្រចិត្តចុះឈ្មោះទទួលយកការចាក់វ៉ាក់សាំង។

យោងតាមក្រសួងសុខាភិបាលឥណ្ឌា ក្នុងអំឡុង 24ម៉ោងនៃថ្ងៃទី24 ខែឧសភា ប្រទេសនេះបានរកឃើញអ្នកវិជ្ជមាននឹងវីរុសCovid-19 ជាង 222,000នាក់ទៀត នាំឱ្យតួលេខអ្នកឆ្លងសរុប មកដល់ថ្ងៃទី25 ខែឧសភានេះ បានកើនឡើងដល់ជាង 26.9លាននាក់ ក្នុងនោះមាន 307,249នាក់បានស្លាប់, 24,054,861 នាក់ បានជាសះស្បើយ និង 2,586,764នាក់ កំពុងទទួលការព្យាបាល៕

ប្រភព៖ Sputnik
ប្រែសម្រួល៖ បុត្រា

May 25, 2021

ស្ថានភាពជំងឺCOVID-19 នៅ កម្ពុជា និងពិភពលោក គិតត្រឹមថ្ងៃទី25 ខែឧសភា ឆ្នាំ2021

អ្នកបានឆ្លងវីរុសCovid-19 នៅ កម្ពុជា បច្ចុប្បន្ន បានកើនដល់ 26,329នាក់ ក្រោយការរកឃើញអ្នកវិជ្ជមានថ្មីចំនួន 568នាក់ កាលពីថ្ងៃទី24 ខែឧសភា កន្លងទៅ។

កាលពីម្សិលមិញ កម្ពុជា ក៏មានអ្នកជំងឺចំនួន 4នាក់ បានបាត់បង់ជីវិតដោយសារ Covid-19 ផងដែរ ដែលនេះនាំឱ្យតួលេខអ្នកស្លាប់សរុប ឡើងដល់ 183នាក់។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ពេលនេះ មានអ្នកឆ្លងវីរុស Covid-19 សរុបចំនួ 167,988,054នាក់ ក្នុងនោះមាន 3,487,062នាក់បានស្លាប់, 149,309,514នាក់បានជាសះស្បើយ និង 15,505,463នាក់ កំពុងទទួលការព្យាបាល៕ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

May 25, 2021

រថភ្លើងល្បឿនលឿនពីរគ្រឿង ប៉ះគ្នានៅ ម៉ាឡេស៊ី! ជាង 200នាក់ ត្រូវរងរបួស

អ្នកដំណើរនៅរាជធានី គូឡាឡាំពួ នៃប្រទេសម៉ាឡេស៊ី ជាង 200នាក់ បានរងរបួស នៅក្នុងហេតុការណ៍ប៉ះគ្នារវាងរថភ្លើងល្បឿនលឿនស្វ័យប្រវត្ត (LRT) ពីរគ្រឿង ដែលមួយគ្រឿងមានស្លាកលេខ40 និងមួយទៀតលេខ81 នៅត្រង់ចំណុចផ្លូវរូងក្រោមដី កាលពីយប់ថ្ងៃទី24 ខែឧសភា ឆ្នាំ2021។

យោងតាមប្រភពព័ត៌មានពីប្រទេស ម៉ាឡេស៊ី ករណីនេះបានកើតឡើង បន្ទាប់ពីរថភ្លើងលេខ40 ដែលដឹកអ្នកដំណើរពីចំណត Ampang បានប៉ះទង្គិចជាមួយនឹងរថភ្លើងលេខ81 ដែលមិនមានអ្នកដំណើរ បណ្ដាលឱ្យអ្នកដំណើរទាំងអស់នៅលើរថភ្លើងលេខ40 ត្រូវខ្ទាតចេញពីកន្លែងអង្គុយ ហើយមនុស្សជាច្រើនក៏ត្រូវរងរបួស ក្នុងនោះមាន 47នាក់ រងរបួសធ្ងន់។ មុនពេលប៉ះគ្នា រថភ្លើងទាំងនេះធ្វើដំណើរក្នុងល្បឿនយឺត ពោលគឺមួយគ្រឿងមានល្បឿន 20គម/ម៉ោង និងមួយគ្រឿងទៀតមានល្បឿន 40គម/ម៉ោង។

Azhar Ghazali ដែលជាតំណាងរបស់ក្រុមហ៊ុនដឹកជញ្ជូន LRT បានឱ្យដឹងថា សមត្ថកិច្ចកំពុងញាប់ដៃ-ញាប់ជើង ជួយសង្គ្រោះអ្នកដំណើរក្នុងហេតុការណ៍នេះ។ មូលហេតុនៃគ្រោះថ្នាក់ ត្រូវបានគេជឿថា បណ្ដាលមកពីការភាន់ច្រឡំនៅក្នុងផ្នែកដោះស្រាយព័ត៌មាន។

មន្ត្រីនៃប្រទេស ម៉ាឡេស៊ី បានបញ្ជាក់ថា នេះគឺជាលើកដំបូងហើយដែលប្រព័ន្ធ LRT ជួបបញ្ហាគ្រោះថ្នាក់ដូច្នេះ ក្រោយដំណើរការបាន 23ឆ្នាំ។ នាយករដ្ឋមន្ត្រី ម៉ាឡេស៊ី លោក Muhyiddin Yassin បានស្នើឱ្យក្រសួងដឹកជញ្ជូន ស៊ើបអង្កេតលើករណីគ្រោះថ្នាក់នេះ និងជួយសង្គ្រោះជនរងគ្រោះឱ្យទាន់ពេលវេលា៕

ប្រភព៖ Reuters, CNN
ប្រែសម្រួល៖ បុត្រា

May 25, 2021

Category: អន្តរជាតិ