អន្តរជាតិ - La Reine Media

ប្រធានាធិបតី ហៃទី ត្រូវរងគ្រាប់កាំភ្លើងជាង 10 គ្រាប់! អង្គរក្សរបស់ប្រធានាធិបតី នឹងត្រូវបានសួរចម្លើយឆាប់ៗនេះ

សាកសពរបស់ប្រធានាធិបតី Jovenel Moise មានស្នាមគ្រាប់កាំភ្លើងចំនួន 12 គ្រាប់ នៅត្រង់កន្លែងគ្រោះថ្នាក់ដល់ជីវិត ខណៈបន្ទប់ធ្វើការ និងបន្ទប់គេង សុទ្ធតែត្រូវឆែកឆេរ។

«យើងបានរកឃើញស្នាមគ្រាប់កាំភ្លើងចំនួន 12 កន្លែង នៅលើរាងកាយរបស់ប្រធានាធិបតី» Carl Henry Destin អនុប្រធានតុលាការ នៅ Pétion-Ville ជាយក្រុង Port-au-Prince បានប្រាប់កាសែត ហៃទី Le Nouvelliste ដូច្នេះ។ លោក Carl Henry Destin និយាយថា គ្រាប់កាំភ្លើងទាំងនេះ ត្រូវបានបាញ់ចេញពីអាវុធធុនធ្ងន់»។

«បន្ទប់ធ្វើការ និងបន្ទប់គេងរបស់ប្រធានាធិបតី ត្រូវបានគេឆែកឆេរគ្រប់កន្លែង។ យើងឃើញថា គាត់ស្លាប់ក្នុងឥរិយាបថដេកផ្ងារ ស្លៀកខោពណ៌ខៀវ អាវសាមិពណ៌សធ្លុះធ្លាយដោយគ្រាប់កាំភ្លើង និងមាត់ហាធំ» លោក Destin និយាយបន្ថែម។ គ្រាប់កាំភ្លើងមួយគ្រាប់បាញ់ចំថ្ងាស ពីរគ្រាប់ត្រង់ទ្រូងទាំងសងខាង បីគ្រាប់ត្រង់ត្រគាក និងមួយគ្រាប់ត្រង់ពោះ»។

សម្បកគ្រាប់កាំភ្លើងដែលប៉ូលិស ហៃទី បានរកឃើញ

ប្រធានាធិបតី Moise មានក្រុមអង្គរក្សដោយឡែក រួមមានសមាជិកមកពីអង្គភាពជំនាញរបស់ប៉ូលិស ហៃទី ប៉ុន្តែ ក្នុងករណីឃាតកម្មកាលពីថ្ងៃទី 7 ខែកក្កដា មានតែប្រធានាធិបតី និងភរិយារបស់លោក គឺ លោកស្រី Martine Moise ប៉ុណ្ណោះ ដែលត្រូវបានបាញ់ប្រហារ។

ដូចទៅនឹងគ្រាប់កាំភ្លើងដែលបៀមជាប់នៅក្នុងសាកសពប្រធានាធិបតី «សម្បកគ្រាប់កាំភ្លើងធុន 5.56 និង 7.62មម ជាច្រើនគ្រាប់ ត្រូវបានរកឃើញនៅកណ្ដាលខ្លោងទ្វារ និងនៅក្នុងភូមិគ្រឹះ» លោក Destin បញ្ជាក់។

អគ្គស្នងការប៉ូលិស ហៃទី លោក Leon Charles បានប្រកាសថា៖ «យើងកំពុងតាមចាប់ខ្លួនពួកវា (ក្រុមឃាតករ) ហើយយើងនឹងនៅតែបន្តតាមរក»។

ក្រុមអង្គរក្សរបស់ប្រធានាធិបតី នឹងត្រូវនាំខ្លួនទៅសួរចម្លើយ ឆាប់ៗនេះ

Bed-Ford Claude ប្រធានការិយាល័យរដ្ឋអាជ្ញានៃតុលាការរដ្ឋធានី Port-au-Prince បានឱ្យដឹងកាលពីថ្ងៃទី 8 កក្កដា ថា៖ «ខ្ញុំបានផ្ដល់សិទ្ធិដល់ប៉ូលិស ដើម្បីសួរចម្លើយរាល់បុគ្គលិកសន្តិសុខដែលជិតស្និទ្ធនឹងប្រធានាធិបតី Jovenel Moise»។

លោក Bed-Ford Claude ចោទសួរថា៖ «បើសិនអ្នកទទួលខុសត្រូវក្នុងការការពារសន្តិសុខជូនប្រធានាធិបតី តើអ្នកនៅទីណា? អ្នកបានធ្វើអ្វីខ្លះ ដើម្បីជួយឱ្យប្រធានាធិបតីរួចផុតពីការស្លាប់នេះ?»៕

ប្រភព៖ NY Post, AFP
ប្រែសម្រួល៖ បុត្រា

July 9, 2021

សកម្មភាពក្រុមប្រដាប់អាវុធ ឆ្មក់ចូលធ្វើឃាតប្រធានាធិបតី ហៃទី នៅកណ្ដាលរាត្រី

ស្នូរគ្រាប់កាំភ្លើងដំបូង បានលាន់ឡើងនៅវេលាម៉ោងប្រហែល 1 ទៀបភ្លឺ នៃថ្ងៃទី 7 កក្កដា បានធ្វើឱ្យភាពស្ងប់ស្ងាត់ក្នុងរាត្រីនៅក្នុងតំបន់ដែលមានភូមិគ្រឹះរបស់ប្រធានាធិបតី ហៃទី លោក Jovenel Moise។

នៅពេលឮសំឡេងផ្ទុះនៅពេលកំពុងគេង ប្រជាជនដែលរស់នៅក្បែរនោះ សុទ្ធតែគិតថាជាព្រឹត្តិការណ៍គួរឱ្យភ័យខ្លាច ដែលពួកគេជួបជាញឹកញាប់ នោះគឺ អំពើហិង្សារវាងក្រុមសង្គមងងឹត និងគ្រោះរញ្ជួយដី។ ប៉ុន្តែ នៅពេលថ្ងៃរះ ទើបការពិតត្រូវបានលាតត្រដាង ៖ «ប្រធានាធិបតី ត្រូវបានគេធ្វើឃាត»។

«ជនបរទេស» មួយក្រុម ដែលនិយាយភាសាអង់គ្លេស និងភាសាអេស្ប៉ាញ បានសម្រុកចូលផ្ទះរបស់ប្រធានាធិបតី Moise នៅតំបន់ Pelerin 5 នៃរដ្ឋធានី Port-au-Prince វេលាម៉ោង 1 ទៀបភ្លឺ។ នេះបើតាមប្រកាសរបស់ការិយាល័យនាយករដ្ឋមន្ត្រី ហៃទី Claude Joseph។

វីដេអូដែលត្រូវបានថតដោយសាក្សីម្នាក់ បានបង្ហាញថា ក្បួនរថយន្ត SUV ដែលដឹកក្រុមប្រដាប់អាវុធ បានបរយ៉ាងលឿនចូលទៅចតខាងមុខខ្លោងទ្វារនៃភូមិគ្រឹះប្រធានាធិបតី។ មនុស្សម្នាក់ដែលមានសំឡេងដូចជនជាតិអាមេរិក ក្នុងក្រុមប្រដាប់អាវុធ បាននិយាយតាមឧបករណ៍បំពងសំឡេងថា៖ «នេះជាយុទ្ធនាការរបស់កងកម្លាំងប្រឆាំងគ្រឿងញៀនសហរដ្ឋអាមេរិក (DEA)។ គ្រប់គ្នាថយក្រោយ ចាកចេញពីទីតាំង»។

ក្រុមប្រដាប់អាវុធនោះ បន្ទាប់មកក៏បានសម្រុកចូលភូមិគ្រឹះរបស់ប្រធានាធិបតី Moise។ ក្រោយមកទៀតក៏ស្រាប់តែឮសំឡេងគ្រាប់កាំភ្លើង។

ប្រធានាធិបតីវ័យ 53 ឆ្នាំ ត្រូវបានបាញ់សម្លាប់នៅនឹងកន្លែង ក្នុងគ្រាដែលភរិយារបស់លោក គឺលោកស្រី Martine វ័យ 47 ឆ្នាំ រងរបួសធ្ងន់។ លោកស្រី Martine ត្រូវបានបញ្ជូនទៅកាន់ Miami សហរដ្ឋអាមេរិក ដើម្បីព្យាបាល។ នាយករដ្ឋមន្ត្រី Joseph បានហៅករណីឃាតកម្មនេះថាជា «សកម្មភាពគួរឱ្យស្អប់ខ្ពើម អមនុស្សធម៌ និងគួរឱ្យខ្លាច»។

អនុរដ្ឋមន្ត្រីសារព័ត៌មាន Frantz Exantus បានប្រកាសថា ក្រុមឃាតករដែលបានបាញ់សម្លាប់ប្រធានាធិបតី ត្រូវបានចាប់ខ្លួនរួចហើយ។ ឯកអគ្គរដ្ឋទូត ហៃទី ប្រចាំ សហរដ្ឋអាមេរិក Bocchit Edmond បានឱ្យដឹងថា ឃាតករទាំងនេះ គឺជា ទាហានស៊ីឈ្នួល ដែលបន្លំខ្លួនជាកងកម្លាំងពិសេសរបស់អាមេរិក (DEA)។ អង្គភាពប្រឆាំងគ្រឿងញៀនរបស់ សហរដ្ឋអាមេរិក មានការិយាល័យមួយនៅរដ្ឋធានីរបស់ ហៃទី ដើម្បីជួយគាំទ្រដល់រដ្ឋាភិបាលប្រទេសនេះ ក្នុងការប្រយុទ្ធប្រឆាំងនឹងគ្រឿងញៀន។

អគ្គស្នងការនគរបាលជាតិ ហៃទី លោក Leon Charles បានប្រកាសថា ទាហានស៊ីឈ្នួលចំនួន 4 នាក់ ដែលបានធ្វើឃាតប្រធានាធិបតី Moise ត្រូវបានសម្លាប់ និង 2 នាក់ទៀត ត្រូវបានចាប់ខ្លួន ខណៈជនសង្ស័យមួយចំនួនផ្សេងទៀត កំពុងត្រូវបានតាមប្រមាញ់។ ក៏ប៉ុន្តែ សមត្ថកិច្ច មិនទាន់បង្ហើបឱ្យដឹងអំពីអត្តសញ្ញាណរបស់ជនសង្ស័យ ក៏ដូចជាមិនទាន់បង្ហាញភ័ស្ដុតាង បញ្ជាក់អំពីទំនាក់ទំនងរវាងក្រុមជនសង្ស័យ ជាមួយនឹងករណីឃាតកម្មនេះ។

មកដល់បច្ចុប្បន្ន គេមិនទាន់ដឹងច្បាស់ថា ក្រុមប្រដាប់អាវុធ បានប្រើប្រាស់មធ្យោបាយអ្វី ដើម្បីឆ្លងផុតកងកម្លាំងការពារខាងក្រៅរបស់ភូមិគ្រឹះប្រធានាធិបតីនៅឡើយ។

លោក Moise ធ្លាប់បានប្រាប់កាសែត អេស្ប៉ាញ ថា «មានមនុស្សរាប់លាននាក់» ចង់សម្លាប់លោក «ព្រោះតែគោលនយោបាយរបស់លោក ឬកំណែទម្រង់ដែលលោកកំពុងអនុវត្ត» នេះបើតាមអគ្គរដ្ឋទូត Edmond៕

ប្រភព៖ Mirror, NYTimes, Washington Post
ប្រែសម្រួល៖ បុត្រា

July 8, 2021

ប្រធានាធិបតី ហៃទី ត្រូវគេធ្វើឃាត! អ្នកត្រូវស្នងតំណែង ក៏បានស្លាប់ដោយសារ Covid-19

ប្រធានតុលាការកំពូលរបស់ប្រទេស ហៃទី នឹងត្រូវឡើងកាន់តំណែងជាប្រធានាធិបតី ជំនួសលោក Moise ដែលទើបត្រូវបានគេធ្វើឃាត ប៉ុន្តែមន្ត្រីរូបនេះ បានទទួលមរណភាពរួចហើយ ដោយសារតែឆ្លង Covid-19។

ប្រធានតុលាការកំពូលរបស់ប្រទេស ហៃទី លោក Haiti René Sylvestre បានស្លាប់ដោយសារ Covid-19 កាលពីថ្ងៃទី 23 ខែឧសភា ឆ្នាំ 2021។

យោងតាមរដ្ឋធម្មនុញរបស់ ហៃទី ប្រធានតុលាការកំពូល នឹងឡើងកាន់តំណែងប្រធានាធិបតី នៅក្នុងករណីចាំបាច់បន្ទាន់។ Jean Wilner Morin ប្រធានសមាគមជាតិចៅក្រមរបស់ ហៃទី បានឱ្យដឹងថា បច្ចុប្បន្ន មិនទាន់ដឹងច្បាស់ថា អ្នកណានឹងត្រូវឡើងកាន់តំណែងជំនួសប្រធានាធិបតី Jovenel Moise ដែលទើបត្រូវបានគេធ្វើឃាតកាលពីព្រឹក ថ្ងៃទី 7 ខែកក្កដា នៅឡើយ។

លោក Morin និយាយថា នាយករដ្ឋមន្ត្រីបណ្ដោះអាសន្ន Claude Joseph ត្រូវការសភាអនុម័ត ទើបអាចឡើងកាន់តំណែងប្រធានាធិបតីបាន។ ប៉ុន្តែដោយសារតែមិនមានការបោះឆ្នោតនាពេលកន្លង សភាប្រទេសនេះ លែងនៅជាធរមានទៀតហើយ «ដូច្នេះ បើផ្អែកតាមរដ្ឋធម្មនុញ គាត់មិនអាចជំនួសប្រធានាធិបតី» បានឡើយ។

Morin បានឱ្យដឹងថា មានករណីផ្សេងមួយ កាលពីឆ្នាំ 2015 នៅពេលប្រធានសភា ក្លាយជាប្រធានាធិបតី។ ប៉ុន្តែ បច្ចុប្បន្ន ពុំមានអ្នកណាកាន់កាប់តួនាទីនេះ។ Morin មានយោបល់ថា 1/3 នៃសមាជិកសភាជាន់ខ្ពស់ នៅតែមានសុពលភាព ដូច្នេះ ប្រធានសភាពជាន់ខ្ពស់ Joseph Lambert អាចជាជម្រើសមួយ។

សូមរំលឹកថា ប្រធានាធិបតី ហៃទី លោក Jovenel Moise អាយុ 53 ឆ្នាំ ត្រូវបានខ្មាន់កាំភ្លើងមួយក្រុម លួចធ្វើឃាតនៅឯផ្ទះរបស់លោក ស្ថិតក្នុងរដ្ឋធានីPort-au-Prince។ ភរិយារបស់លោក គឺ លោកស្រី Martine Moise កំពុងស្ថិតក្នុងស្ថានភាពគ្រោះថ្នាក់ដល់ជីវិត និងត្រូវបានបញ្ជូនទៅកាន់ សហរដ្ឋអាមេរិក ដើម្បីព្យបាលរបួស។

អនុរដ្ឋមន្ត្រីសារព័ត៌មាន Frantz Exantus បានប្រកាសថា ក្រុមឃាតករដែលបានបាញ់សម្លាប់ប្រធានាធិបតី ត្រូវបានចាប់ខ្លួនរួចហើយ។ ឯកអគ្គរដ្ឋទូត ហៃទី ប្រចាំ សហរដ្ឋអាមេរិក Bocchit Edmond បានឱ្យដឹងថា ឃាតករទាំងនេះ គឺជា ទាហានស៊ីឈ្នួល ដែលបន្លំខ្លួនជាកងកម្លាំងពិសេសរបស់អាមេរិក៕

ប្រភព៖ CNN
ប្រែសម្រួល៖ បុត្រា

July 8, 2021

នាវាផ្ទុកយន្តហោះចម្បាំងទីបីរបស់ ចិន ស្ថិតក្នុងដំណាក់កាលដំឡើងបញ្ជាការដ្ឋាន

នាវាផ្ទុកយន្តហោះ Type-003 កំពុងត្រូវបានដំឡើងទីបញ្ជាការ ហើយវាមានទំហំតូចជាងបន្តិច បើធៀបនឹងនាវាផ្ទុកយន្តហោះចម្បាំងថ្នាក់ Ford របស់ សហរដ្ឋអាមេរិក។

រូបថតស្ដីអំពី Type-003 របស់ប្រទេសចិន នៅក្នុងរោងចក្រ Jiangnan Shipyard ដែលត្រូវបានបង្ហោះលើបណ្ដាញសង្គមកាលពីថ្ងៃទី 6 កក្កដា បង្ហាញថា នាវាផ្ទុកយន្តហោះចម្បាំងនេះ កំពុងត្រូវបានដំឡើងបញ្ជាការដ្ឋាន។ Type-003 គឺជានាវាផ្ទុកយន្តហោះចម្បាំងធំជាងគេលំដាប់ទីពីរក្នុងពិភពលោក បន្ទាប់ពី Ford របស់កងទ័ពជើងទឹក សហរដ្ឋអាមេរិក។

រូបភាពដែលថតបានដោយផ្កាយរណប Kompsat កាលពីថ្ងៃទី 22 ខែមិថុនា បង្ហាញថា Type-003 មានបណ្ដោយប្រវែងប្រហែល 320 ម៉ែត្រ ខ្លីជាង 13 ម៉ែត្រ ធៀបនឹងនាវាថ្នាក់ Ford របស់ អាមេរិក។

ទីលានសម្រាប់យន្តហោះចុះចតនៅលើ Type-003 មានទទឹងប្រហែល 73 ម៉ែត្រ ខ្លីជាងនាវាថ្នាក់ Ford និងប្រហាក់ប្រហែលនឹងនាវា Liaoning និង Shandong របស់ចិន។

តាមផែនការ Type-003 នឹងត្រូវបានបំពាក់ប្រព័ន្ធម៉ាស៊ីនបាញ់បង្ហោះ (EMALS) ដែលអនុញ្ញាតឱ្យយន្តហោះចម្បាំងដែលហោះចេញពីនាវានេះ នាំយកអាវុធ និងឥន្ធនៈច្រើនជាងការប្រើប្រាស់ស្ពានសម្រាប់ហោះឡើងដូចនៅលើនាវា Liaoning និង Shandong។ Type-003 នឹងមានប្រព័ន្ធ EMALS ចំនួនពីរនៅផ្នែកខាងមុខ និងមួយទៀតនៅកណ្ដាលនាវា ដែលចំនួននេះ តិចជាងមួយប្រព័ន្ធ បើធៀបនឹងនាវាថ្នាក់ Ford និង Nimitz។

ផ្ទៃក្រឡានៃទីលានចុះចតរបស់នាវាផ្ទុកយន្តហោះ Type-003 ប្រហាក់ប្រហែលនឹង 19,500 ម៉ែត្រការ៉េ ធំជាងបន្តិច ធៀបនឹងប្រព័ន្ធរបស់ Ford នៃសហរដ្ឋអាមេរិក។

បញ្ជាការដ្ឋានរបស់ Type-003 ទំនងជាទាបជាងបន្តិច បើធៀបនឹងនាវា Liaoning និង Shandong។ ទីបញ្ជាការរបស់ Type-003 ត្រូវបានដាក់នៅកណ្ដាលនាវា ខុសពីនាវាផ្ទុកយន្តហោះថ្នាក់ Ford ដែលត្រូវបានដាក់នៅផ្នែកខាងក្រោយបន្តិច៕

ប្រភព៖ Naval News
ប្រែសម្រួល៖ បុត្រា

July 7, 2021

ស្ថានភាព Covid-19 នៅ កម្ពុជា និងពិភពលោក គិតត្រឹមល្ងាចថ្ងៃទី 7 កក្កដា 2021

ក្រសួងសុខាភិបាល នាថ្ងៃទី 7 កក្កដា ឆ្នាំ 2021 នេះ បានឱ្យដឹងថា «អ្នកបានឆ្លងវីរុសCovid-19 សរុប នៅ កម្ពុជា បានកើនដល់ជាង 57,000 នាក់» ក្នុងពេលដែលតួលេខនេះ បានកើនដល់ជាង 185,393,000 នាក់ នៅទូទាំងសកលលោក។

មកដល់បច្ចុប្បន្ន កម្ពុជា បានរកឃើញអ្នកឆ្លងវីរុសសរុបចំនួន 57,103 នាក់ ក្នុងនោះមានអ្នកស្លាប់សរុប 798 នាក់, អ្នកជាសះស្បើយសរុប 48,974 នាក់។ ក្នុងថ្ងៃទី 6 កក្កដា មានអ្នកជំងឺថ្មីចំនួន 981 នាក់ និង អ្នកស្លាប់ថ្មីចំនួន 19 នាក់។ ក្នុងចំណោមអ្នកវិជ្ជមានសរុប មានអ្នកជំងឺជិត 4,000 នាក់ ជាករណីនាំចូលពីបរទេស។

ដោយឡែក នៅទូទាំងសកលលោក បច្ចុប្បន្នបានរកឃើញអ្នកជំងឺCovid-19 សរុបចំនួន ជាង 185,393,000 នាក់, អ្នកស្លាប់ជាង 4,009,000 នាក់, អ្នកជាជិត 169,737,000 នាក់។ ក្នុងចំណោមអ្នកជំងឺសរុប មាន 11,647,503 នាក់ កំពុងប្រឈមនឹងគ្រោះថ្នាក់ដល់ជីវិត ព្រោះតែអាការធ្ងន់ធ្ងរ៕

ប្រភព៖ ក្រសួងសុខាភិបាល, Worldometers
ដកស្រង់ និងប្រែសម្រួល៖ បុត្រា

July 7, 2021

ការសាកល្បងធ្វើការ តែ 4 ថ្ងៃ ក្នុង 1 សប្ដាហ៍ នៅ អ៊ីស្លង់ ទទួលបានជោគជ័យ!

ក្រុមអ្នកស្រាវជ្រាវបានបញ្ជាក់ថា «រូបមន្តធ្វើការ 4 ថ្ងៃ ក្នុង 1 សប្ដាហ៍ នៅប្រទេស អ៊ីស្លង់ ទទួលបាន «ជោគជ័យយ៉ាងត្រចះត្រចង់» ក្រោយការសាកល្បងរយៈពេល 4 ឆ្នាំ។

ការសិក្សាស្រាវជ្រាវរបស់ក្រុមអ្នកវិទ្យាសាស្ត្រនៃសមាគមដើម្បីប្រជាធិបតេយ្យប្រកបដោយនិរន្តរភាព (Association for Sustainability and Democracy / Alda) ប្រចាំប្រទេស អ៊ីស្លង់ និងអង្គការប្រឹក្សាគោលនយោបាយ Autonomy របស់ អង់គ្លេស នេះ ត្រូវបានធ្វើឡើងចាប់ពីឆ្នាំ 2015 ដល់ឆ្នាំ 2019។

កម្មវិធីសាកល្បងខាងលើ ត្រូវបានធ្វើឡើងចំពោះពលករ / កម្មករ ចំនួន 2.500 នាក់ ដែលប្រហាក់ប្រហែលនឹង 1% បើធៀបនឹងចំនួនប្រជាជនពេញវ័យសរុបនៅប្រទេស អ៊ីស្លង់។ ក្នុងកម្មវិធីនេះ ពលករត្រូវបានអនុញ្ញាតឱ្យធ្វើការតែ 4 ថ្ងៃប៉ុណ្ណោះ ក្នុង 1 សប្ដាហ៍ តែទទួលបានប្រាក់ខែពេញលេញដដែល។

នៅក្នុងសេចក្ដីប្រកាសកាលពីថ្ងៃទី 4 ខែកក្កដា Will Strong ដែលជានាយកផ្នែកស្រាវជ្រាវ របស់ Autonomy បានឱ្យដឹងថា ៖ «ការសិក្សាបានបង្ហាញថា វិស័យការងារសាធារណៈ (ការងាររដ្ឋ) មានលក្ខណៈសម្បត្តិគ្រប់គ្រាន់ ដែលអាចនាំមុខគេ នៅក្នុងការធ្វើការ 4 ថ្ងៃ ក្នុង 1 សប្ដាហ៍»។

កម្លាំងពលកម្មដែលបានចូលរួមក្នុងការសាកល្បងខាងលើ ធ្វើការចាប់ពី 35 ដល់ 36 ម៉ោង ក្នុង 1 សប្ដាហ៍។ Alda បានអះអាងថា ជីវភាពរស់នៅរបស់ពលករ ត្រូវបានកែលម្អមួយភាគធំ នៅគ្រប់ស្ថានភាព រាប់ចាប់ពីការប្រឈមនឹងសម្ពាធនានា រហូតដល់សុខភាព ការហត់នឿយ និងតុល្យភាពរវាងការងារ និងជីវិតប្រចាំថ្ងៃ ខណៈដែលការងារដែលជាតួនាទីរបស់ពួកគេ នៅតែត្រូវបានធានាដដែល ហើយក៏មានការរីកចម្រើនខ្លាំងនៅក្នុងបរិស្ថាននៃការងារមួយចំនួនផងដែរ។

កម្មវិធីសាកល្បងដែលមានរយៈពេល 5 ឆ្នាំនេះ ត្រូវបានផ្ដួចផ្ដើមដោយក្រុមប្រឹក្សាភិបាលនៃទីក្រុង Reykjavik និងរដ្ឋាភិបាល អ៊ីស្លង់ បន្ទាប់ពីមានការអំពាវនាវពីសំណាក់ក្រុមសហជីព និងបណ្ដាអង្គការសង្គមស៊ីវិល។

របាយការណ៍របស់ Alda និង Autonomy បានរៀបរាប់ថា លទ្ធផលនៃការសិក្សាស្រាវជ្រាវរយៈពេលច្រើនឆ្នាំកន្លងទៅនេះ គឺជា «គំរូ» សម្រាប់ការសាកល្បងផ្សេងៗទៀតនាពេលខាងមុខ៕

ប្រភព ៖ CBS
ប្រែសម្រួល ៖ បុត្រា

July 7, 2021

ទិដ្ឋភាពនៃឧបទ្ទវហេតុ “ធ្លាក់យន្តហោះ” របស់កងទ័ព ហ្វីលីពីន កាលពីយប់ថ្ងៃទី4 កក្កដា

សាកសពរបស់យន្តហោះដឹកទំនិញ C-130H របស់កងទ័ព ហ្វីលីពីន ឆាបឆេះយ៉ាងសន្ធោសន្ធៅអស់ជាច្រើនម៉ោង បន្ទាប់ពីបានធ្លាក់ ខណៈដែលកម្លាំងជួយសង្គ្រោះ រួមនឹងប្រជាជនក្នុងតំបន់ នាំគ្នារកវិធីចូលទៅជួយជនរងគ្រោះ។

អណ្ដាតភ្លើងឆាបឆេះចេញពីយន្តហោះដឹកទំនិញ C-130H ដែលមានស្លាកលេខ 5125 របស់ទ័ពអាកាសនៃប្រទេស ហ្វីលីពីន ក្រោយពីបានធ្លាក់នៅលើកោះ Jojo នៃខេត្ត Sulu កាលពីថ្ងៃទី4 ខែកក្កដា។

ក្នុងចំណោមជនរងគ្រោះចំនួន 96នាក់នៅលើយន្តហោះ ភាគច្រើនគឺជាទាហានដែលទើបបញ្ចប់វគ្គបណ្ដុះបណ្ដាលថ្នាក់មូលដ្ឋាន និងត្រូវបញ្ជូនទៅកាន់កោះខាងលើ ដើម្បីចូលរួមជាមួយកងកម្លាំងប្រឆាំងភេរវកម្មនៅទីនោះ។

ផ្សែងខ្មៅខ្មួល ហុយទ្រលោមចេញពីទីតាំងដែលយន្តហោះ C-130H ធ្លាក់ ស្ថិតនៅក្បែរផ្ទះជាច្រើនខ្នង ក្នុងភូមិមួយ នៃទីរួមស្រុក Patikul លើកោះ Jojo។

សាក្សីម្នាក់ ឈ្មោះ Almar Hajiraini Aki បានឱ្យដឹងថា យន្តហោះនេះបានធ្លាក់ក្បែរផ្ទះ ចម្ងាយប្រហែល 20ម៉ែត្រ។ Almar Hajiraini Aki និងមិត្តភក្ដិ បាននាំគ្នាទៅកាន់កន្លែងកើតហេតុ ប៉ុន្តែ មិនអាចចូលទៅក្បែរបាន ដោយសារតែគ្រាប់រំសេវក្នុងយន្តហោះ ផ្ទុះជាបន្តបន្ទាប់ ខណៈភ្លើងកំពុងឆាបឆេះ។

ក្រុមទាហានរបស់ ហ្វីលីពីន ក៏បានបង្ហាញវត្តមាននៅកន្លែងកើតហេតុ ដើម្បីចូលរួមស្វែងរក ជួយសង្គ្រោះ និងការពារសន្តិសុខ។

អ្នកស្រុក កំពុងជួយសង្គ្រោះជនរងគ្រោះនៃឧបទ្ទវហេតុធ្លាក់យន្តហោះ C-130H។

កងកម្លាំងពិសេស Sulu (JTFS) នៃកងទ័ព ហ្វីលីពីន ឱ្យដឹងថា «ទាហានជាច្រើនរូប បានលោតចេញពីយន្តហោះ មុនពេលវាដាំក្បាលចុះដី» ប៉ុន្តែ មិនទាន់ដឹងច្បាស់ថា ពួកគេនៅមានជីវិត ឬយ៉ាងណានៅឡើយ។

ឧត្តមសេនី Cirilito Sobejana អគ្គមេបញ្ជាកងទ័ពរបស់ ហ្វីលីពីន បានឱ្យដឹងថា C-130H ត្រៀមចុះចតលើកោះ Jojo ហើយក៏បានហោះខុសផ្លូវចុះចត។ អ្នកបើកបរ បានព្យាយាមបង្កើនល្បឿនហោះហើរ ប៉ុន្តែ មិនបានសម្រេច។

C-130H ដែលមានស្លាកលេខសម្គាល់ 5125 បានហោះហើរលើកដំបូងកាលពីឆ្នាំ 1988។ នេះគឺជាយន្តហោះមួយគ្រឿង ក្នុងចំណោម 2គ្រឿង ដែលសហរដ្ឋអាមេរិក បានប្រគល់ឱ្យ ហ្វីលីពីន កាលពីដើមឆ្នាំ 2021 នេះ៕

ប្រភព៖ Reuters, Rappler
ប្រែសម្រួល៖ បុត្រា

July 5, 2021

“ព្រះចន្ទយក្ស” លើកចុងក្រោយ នៃឆ្នាំ2021 នឹងបង្ហាញខ្លួននៅថ្ងៃសុក្រ សប្ដាហ៍នេះ

អ្នកចូលចិត្តវិស័យតារាសាស្ត្រ នឹងមានឱកាសទស្សនា «ព្រះចន្ទយក្ស» (ព្រះចន្ទធំជាងធម្មតា) ទីបី និងជាបាតុភូតព្រះចន្ទយក្សចុងក្រោយ នៃឆ្នាំ2021 ដែលនឹងកើតឡើងនៅវេលាទៀបភ្លឺ ថ្ងៃទី25 ខែមិថុនាខាងមុខ។

យោងតាមក្រុមអ្នកវិទ្យាសាស្ត្រ ព្រះចន្ទពេញវង់ កើតឡើងដំណាលគ្នានឹងបាតុភូត «ព្រះចន្ទយក្ស» នឹងធ្វើឱ្យពន្លឺរបស់វា ភ្លឺខ្លាំងបំផុតនៅវេលាម៉ោងប្រហែល 1និង34នាទី ទៀបភ្លឺ ថ្ងៃទី25 ខែមិថុនា (ម៉ោងនៅភ្នំពេញ)។ ព្រះចន្ទពេញវង់លើកនេះ នឹងមានរយៈពេលប្រហែល 3ថ្ងៃ ចាប់ពីថ្ងៃទី24 មិថុនា ដល់ថ្ងៃទី26 មិថុនាឆ្នាំ2021។ ក្រោយព្រឹត្តិការណ៍ «ព្រះចន្ទយក្ស» លើកនេះ អ្នកចូលចិត្តវិស័យតារាសាស្ត្រ នឹងត្រូវរង់ចាំដល់ឆ្នាំ2022 ទើបមានឱកាសគយគន់ «ព្រះចន្ទយក្ស»បន្ទាប់។

បាតុភូតព្រះចន្ទពេញវង់ កើតឡើងនៅពេលព្រះចន្ទ និងផែនដី ស្ថិតនៅក្នុងទីតាំងដែលបែរទៅរកព្រះអាទិត្យ នាំឱ្យផ្ទៃរបស់ព្រះចន្ទ ទទួលបានពន្លឺច្រើនបំផុតពីព្រះអាទិត្យ។ ចំណែក បាតុភូត «ព្រះចន្ទយក្ស» វិញ គឺ កើតឡើងនៅពេលព្រះចន្ទពេញវង់ ស្ថិតក្នុងគន្លងគោចរដែលជិតផែនដីបំផុត។ នៅលើផ្ទៃមេឃ «ព្រះចន្ទយក្ស» នឹងមានរូបរាងធំជាង និងភ្លឺជាងបន្តិច បើធៀបនឹងព្រះចន្ទពេញវង់ធម្មតាម។

មុននេះ អ្នកស្រលាញ់វិស័យតារាសាស្ត្រ មានឱកាសគយគន់បាតុភូត «ព្រះចន្ទលោហិតយក្ស» កាលពីថ្ងៃទី26 ខែឧសភា ដែលជាបាតុភូត «ព្រះចន្ទយក្ស» ទីពីរ និងជាបាតុភូតចម្លែក គួរចាប់អារម្មណ៍ជាងគេក្នុងឆ្នាំ2021។ បាតុភូតនេះ កើតឡើងដំណាលគ្នានឹងបាតុភូតចន្ទគ្រាសទាំងស្រុង នាំឱ្យព្រះចន្ទ មិនត្រឹមតែធំជាងធម្មតា 14% នោះទេ តែក៏ប្រែទៅជាពណ៌ក្រហមទុំដូចឈាម ទើបគេហៅថា «ព្រះចន្ទលោហិត»។ ចំណែក បាតុភូត «ព្រះចន្ទយក្ស» លើកទីមួយ នៃឆ្នាំ2021 បានកើតឡើងកាលពីថ្ងៃទី26 ខែមេសា៕

ប្រភព៖ Sun
ប្រែសម្រួល៖ បុត្រា

June 23, 2021

ជីវភាពរស់នៅ របស់អ្នកអវកាសចិន នៅលើស្ថានីយអវកាស Tiangong

បន្ទប់ស្នូល Tianhe ត្រូវបានរចនាឡើង ដើម្បីនាំមកនូវផាសុកភាពជាអតិបរមា សម្រាប់ក្រុមអ្នកអវកាស ដែលរស់នៅ និងធ្វើការរយៈពេល 3ខែ។

បន្ទប់ស្នូល Tianhe របស់ស្ថានីយអវកាស Tiangong មានកន្លែងសម្រាប់រស់នៅដែលមានទំហំ 110 ម៉ែត្រគូប ធំជាងឆ្ងាយបើធៀបនឹងបន្ទប់ពិសោធន៍អវកាស Tiangong 1 របស់ចិន (ឈប់ដំណើរការកាលពីឆ្នាំ2018) ដែលមានទំហំត្រឹមតែ 15 ម៉ែត្រគូប។

យោងតាម People’s Daily បន្ទប់ស្នូល Tianhe មានបន្ទប់គេងចំនួន3 និងបន្ទប់ងូតទឹកចំនួន1 រួមនឹងម៉ាស៊ីនដើរហាត់ប្រាណមួយគ្រឿង និងកង់មួយគ្រឿង សម្រាប់ពង្រឹងសុខភាពរបស់អ្នកអវកាស។ ចំណែកបន្ទប់ហូបចុកវិញ រួមមាន ចង្ក្រាន ទូយោទឹក ឧបករណ៍សម្រាប់កម្ដៅ និងក្លាសេអាហារ ក៏ដូចជាតុអាហារ។ ក្នុងបន្ទប់ហូបចុកនេះ មានអាហារជាង 120 មុខ ដែលអាចទុកបានយូរ។

អវកាសចរម្នាក់ៗ មានឧបករណ៍បញ្ជាមួយក្នុងដៃ ដែលមានអមដោយកម្មវិធីគ្រប់គ្រងអំពូលភ្លើងក្នុងបន្ទប់ស្នូលទាំងមូល។ នៅពេលងូតទឹក អ្នកអវកាសនឹងប្រើក្បាលទូយោបាញ់ទឹកដែលមានកម្លាំងខ្លាំង។ ដើម្បីដេក ពួកគេត្រូវប្រើថង់សម្រាប់ដេក ដែលអាចដេកដូចមនុស្សនៅលើផែនដី ជំនួសការដេកបែបឈរ បែបជាអ្នកអវកាស។

ក្រៅពីបេសកកម្មអវកាស ពួកគេត្រូវហ្វឹកហាត់ក្នុងការកាត់សក់ឱ្យគ្នាផងដែរ។ ដោយសារសរសៃសក់ អណ្ដែតពាសពេញក្នុងបន្ទប់នៃស្ថានីយអវកាស ព្រោះតែស្ថិតក្នុងស្ថានភាពមិនមានទំនាញ ដូច្នេះ ពួកគេប្រើប្រាស់ឧបករណ៍ស្រូបពិសេស ដើម្បីប្រមូលយកសក់មកដាក់មួយកន្លែង។

បន្ទប់ស្នូលក្នុងស្ថានីយអវកាសនេះ មានបំពាក់ឧបករណ៍បញ្ចេញរលក Wi-Fi ដើម្បីជួយឱ្យក្រុមអ្នកអវកាស រក្សាទំនាក់ទំនងនឹងគ្នាបានគ្រប់ពេល។ ពួកគេក៏ប្រើប្រាស់កាស ដើម្បីទាក់ទងគ្នា ទាំងនៅក្នុងស្ថានីយអវកាស ទាំងការទាក់ទងមកកាន់ទីបញ្ជាការនៅលើផែនដី។ អ្នកអវកាសក៏មានប៉ូស្តិ៍ដោយឡែកផ្ទាល់ខ្លួន ដើម្បីហៅទៅកាន់គ្រួសាររបស់ពួកគេផងដែរ៕

ប្រភព៖ SCMP
ប្រែសម្រួល៖ បុត្រា

June 22, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី22 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី22 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 678នាក់, អ្នកជាចំនួន 763នាក់ និងអ្នកស្លាប់ថ្មីចំនួន 18នាក់បន្ថែមទៀត នៅក្នុងថ្ងៃទី21 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 44.124នាក់ ក្នុងនោះមាន 459នាក់បានបាត់បង់ជីវិត, 38.766នាក់បានជា និងប្រមាណជា 4,899នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 179,553,288នាក់ត្រូវបានរកឃើញ ក្នុងនោះមាន 164,259,162នាក់បានជា, 3,888,842នាក់បានស្លាប់ និង 11,405,284នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 22, 2021

Category: អន្តរជាតិ