អន្តរជាតិ - La Reine Media

តួលេខអ្នកឆ្លង COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី 16 ខែកក្កដា ឆ្នាំ 2021

ក្រសួងសុខាភិបាល បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 889 នាក់, អ្នកជាចំនួន 849 នាក់ និងអ្នកស្លាប់ចំនួន 27 នាក់បន្ថែមទៀត នៅក្នុងថ្ងៃទី 15 ខែកក្កដា ឆ្នាំ 2021។

គិតត្រឹមព្រឹក ថ្ងៃទី 16 ខែកក្កដា ឆ្នាំ 2021 កម្ពុជា មានអ្នកឆ្លងសរុប 65,500 នាក់ ក្នុងនោះមាន អ្នកជាសះស្បើយ 57,027 នាក់ និង អ្នកស្លាប់ 1,052 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 189,745,510 នាក់ ត្រូវបានរកឃើញ ក្នុងនោះមានជាង 173,162,320 នាក់ បានជា, ជាង 4,083,190 នាក់ បានស្លាប់ និងជាង 12,499,990 នាក់ កំពុងព្យាបាល។

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 16, 2021

WHO ព្រមានអំពី COVID-19 វ៉ារ្យ៉ង់ ថ្មី ដ៏គ្រោះថ្នាក់ អាចឆ្លងរាលដាលទូទាំងសកលលោក

អង្គការសុខភាពពិភពលោក (WHO) បានព្រមានអំពីលទ្ធភាពដែលក្រុមវីរុស COVID-19 បំប្លែងខ្លួនថ្មី ប្រកបដោយគ្រោះថ្នាក់ជាង និងងាយឆ្លងជាង នឹងអាចបង្ហាញខ្លួន នៅពាសពេញពិភពលោក បណ្ដាលឱ្យការទប់ស្កាត់ កាន់តែជួបការលំបាក។

«មហារោគរាតត្បាត មិនទាន់អាចបញ្ចប់» គណៈកម្មការគ្រាអាសន្នរបស់អង្គការសុខភាពពិភពលោក កាលពីថ្ងៃទី 15 កក្កដា បានព្រមានដូច្នេះ បន្ទាប់ពីកិច្ចប្រជុំមួយនៅមុននោះមួយថ្ងៃ។

Didier Houssin ប្រធានគណៈកម្មការខាងលើបានទទួលស្គាល់ថា «របត់ថ្មី ក្នុងមួយរយៈពេលចុងក្រោយនេះ ពិតជាគួរឱ្យព្រួយបារម្ភ»។ លោក Didier Houssin និយាយថា មួយឆ្នាំកន្លះ បន្ទាប់ពី WHO បានប្រកាសគ្រាអាសន្នដំបូងអំពីសុខភាពសាធារណៈ និងកម្រិតនៃភាពអាសន្ន «យើងនៅតែរត់តាមវីរុសនេះ ហើយវីរុសនេះក៏កំពុងតែរត់តាមយើង»។

បច្ចុប្បន្ន វ៉ារ្យ៉ង់ (វីរុសបំប្លែងខ្លួនថ្មី) ចំនួន 4 របស់ COVID-19 កំពុងតែគ្រប់គ្រងវិបត្តិសុខភាពនៅទូទាំងសកលលោក រួមមាន Alpha, Beta, Gamma និងពិសេសគឺវ៉ារ្យ៉ង់ Delta ដែលកំពុងឆ្លងរាលដាលយ៉ាងឆាប់រហ័ស។ ក៏ប៉ុន្តែ គណៈកម្មការខាងលើ បានព្រមានថា បញ្ហាអាក្រក់ជាងបច្ចុប្បន្ន អាចនៅខាងមុខនៅឡើយ ដោយលើកឡើងអំពី «លទ្ធភាពខ្ពស់ដែល វីរុសបំប្លែងខ្លួនថ្មី អាចបង្ហាញខ្លួន និងឆ្លងរាលដាលពេញពិភពលោក» ហើយបង្កើតបានជាឧបសគ្គធំធេងសម្រាប់ការប្រយុទ្ធប្រឆាំងរបស់មនុស្ស។

WHO ប្រកាសថា បណ្ដាវីរុសបំប្លែងខ្លួន ដែល «គួរឱ្យបារម្ភ» គឺនៅពេលពួកវាត្រូវបានគេចាត់ទុកថា ងាយឆ្លងជាងវីរុសធម្មតា និងបង្កការស្លាប់ច្រើនជាងមុន ឬមានលទ្ធភាពទប់ទល់នឹងវ៉ាក់សាំង។

WHO និយាយថា «ការពាក់ម៉ាស់ ការរក្សាគម្លាត រក្សាអនាម័យ និងកែលម្អប្រព័ន្ធបន្សុទ្ធខ្យល់ក្នុងផ្ទះ នៅតែជាគន្លឹះសំខាន់ក្នុងការកាត់បន្ថយការឆ្លងរាលដាល»។ អង្គការនេះក៏បានសង្កត់ធ្ងន់ថា ត្រូវការចាក់វ៉ាក់សាំងឱ្យបានយ៉ាងតិច 10% នៃចំនួនប្រជាជនសរុបរបស់ប្រទេសនីមួយៗ នៅត្រឹមខែកញ្ញាខាងមុខ រួមនឹងការចែករំលែកវ៉ាក់សាំង រវាងប្រទេសអ្នកមាន និងប្រទេសអ្នកក្រ។

គិតមកដល់ព្រឹកថ្ងៃទី 16 ខែកក្កដា ឆ្នាំ 2021 ពិភពលោកទាំងមូល បានរកឃើញអ្នកឆ្លងវីរុស COVID-19 សរុបចំនួន 189,702,247 នាក់ ក្នុងនោះមាន 4,082,637 នាក់បានស្លាប់, 173,130,284 នាក់ បានជាសះស្បើយ និង 12,489,326 នាក់ កំពុងព្យាបាល ហើយក្នុងចំណោមនេះដែរ ក៏មានអ្នកជំងឺជាង 79,220 នាក់ កំពុងប្រឈមនឹងការបាត់បង់ជីវិត ដោយសារតែអាការធ្ងន់ធ្ងរ៕

ប្រភព៖ CNN, AFP, Worldometers,
ប្រែសម្រួល៖ បុត្រា

July 16, 2021

COVID-19 នៅ វៀតណាម ៖ វិជ្ជមានជាង 1,400 នាក់ ក្នុងមួយថ្ងៃ

នាព្រឹកថ្ងៃទី 16 កក្កដានេះ ក្រសួងសុខាភិបាល វៀតណាម បានឱ្យដឹងថា ទើបរកឃើញអ្នកវិជ្ជមាននឹង COVID-19 ថ្មី ចំនួន 1,438 នាក់ បន្ថែមទៀត ក្នុងរយៈពេល 24 ម៉ោងនៃថ្ងៃទី 15 ខែកក្កដា។

ក្នុងចំណោមអ្នកវិជ្ជមានថ្មីទាំង 1,438 នាក់ខាងលើ គឺមាន 1,071 នាក់ នៅទី ក្រុងហូជីមិញ ខណៈនៅរដ្ឋធានី ហាណូយ មានត្រឹមតែ 3 ករណីប៉ុណ្ណោះ។ ទីក្រុង ហូជីមិញ មានអ្នកឆ្លង COVID-19 សរុបចំនួន 22,564 នាក់ ចំណែក រដ្ឋធានី ហាណូយ មានចំនួន 567 នាក់។

មកដល់បច្ចុប្បន្ន វៀតណាម បានរកឃើញអ្នកវិជ្ជមានសរុប ទូទាំងប្រទេស ចំនួន 38,675 នាក់ ក្នុងនោះមានជាង 20,000 នាក់កំពុងព្យាបាល, ជាង 200 នាក់ បានស្លាប់ និងជាង 8,000 នាក់ បានជាសះស្បើយ។

គិតមកដល់ព្រឹកនេះ វៀតណាម ចាក់វ៉ាក់សាំងជូនពលរដ្ឋបានចំនួន 4,185,623 ដូស ក្នុងនោះ ពលរដ្ឋដែលបានទទួលការចាក់វ៉ាក់សាំង 1 ដូស មានចំនួន 3,890,947 នាក់ និងអ្នកដែលបានចាក់រួចរាល់ មានចំនួន 294,6767 នាក់៕

ប្រភព៖ VNexpress
ប្រែសម្រួល៖ បុត្រា

July 16, 2021

ប្រធានាធិបតីប្រេស៊ីល ត្រូវចូលពេទ្យវះកាត់បន្ទាន់ ព្រោះតែត្អើកជាង 10 ថ្ងៃ

ប្រធានាធិបតីរបស់ ប្រេស៊ីល លោក Jair Bolsonaro ត្រូវចូលសម្រាកព្យាបាលនៅមន្ទីរពេទ្យ បន្ទាប់ពីមានអាការត្អើកជាបន្តបន្ទាប់រយៈពេល 10 ថ្ងៃ ហើយអាចត្រូវធ្វើការវះកាត់ជាបន្ទាន់។

សារព័ត៌មាន RT (រុស្ស៊ី) កាលពីថ្ងៃទី 14 កក្កដា បានចេញផ្សាយថា ការិយាល័យរបស់លោក Bolsonaro បានបញ្ជាក់ថា ប្រធានាធិបតីរូបនេះ ត្រូវបានបញ្ជូនទៅកាន់មន្ទីរពេទ្យមួយនៅ Brasilia ក្នុងថ្ងៃដដែលនោះ។ នៅទីនោះ លោកនឹងត្រូវបានតាមដានសុខភាពចាប់ពី 24 ដល់ 48 ម៉ោង។ ក្នុងប្រកាសថ្មី ការិយាល័យប្រធានាធិបតី ឱ្យដឹងថា លោក Bolsonaro ត្រូវបានបញ្ជូនទៅកាន់ Sao Paulo ដើម្បីវាយតម្លៃសម្រាប់ការវះកាត់បន្ទាន់។

សារព័ត៌មាននៃប្រទេសប្រេស៊ីល បានផ្សាយដែរថា លោក Bolsonaro មានអាការឈឺពោះ និងត្អើក នៅពេលបង្ហាញខ្លួននៅចំពោះមុខសាធារណជន។ ប្រធានាធិបតីរូបនេះ ធ្លាប់បាននិយាយថា អាការត្អើកនេះ គឺមកពីថ្នាំដែលលោកត្រូវលេប នៅក្នុងការវះកាត់ព្យាបាលធ្មេញ កាលពីមួយខែមុន។

លោក Bolsonaro ធ្លាប់បានចូលពេទ្យសង្គ្រោះបន្ទាន់ជាច្រើនលើក ដោយសារតែត្រូវគេចាក់នឹងកាំបិត ការឆ្លង COVID-19 និងត្រូវសត្វព្រៃវាយប្រហារ។

កាលពីឆ្នាំ 2018 ក្នុងពេលកំពុងធ្វើយុទ្ធនាការឃោសនារកសំឡេងឆ្នោត លោក Bolsonaro ត្រូវគេចាក់ចាំពោះ និងក្រោយមកក៏ត្រូវវះកាត់ជាច្រើនលើក។

លោក Bolsonaro ត្រូវគេរកឃើញថា វិជ្ជមាននឹង COVID-19 ជាច្រើនលើក កាលពីរដូវក្ដៅឆ្នាំមុន។ នៅពេលត្រូវធ្វើចត្តាឡីស័ក ប្រធានាធិបតីរូបនេះ ក៏ត្រូវសត្វអូទ្រិសធំមួយក្បាល ខាំផងដែរ។

ការចូលពេទ្យលើកនេះ ទំនងជាមានសភាពធ្ងន់ធ្ងរជាងមុន។ ក្រុមវេជ្ជបណ្ឌិត បានប្រាប់សារព័ត៌មាន ប្រេស៊ីល ថា អាការត្អើកជាបន្តបន្ទាប់របស់លោកប្រធានាធិបតី Bolsonaro អាចជារោគសញ្ញាធ្ងន់ធ្ងរជាងផលប៉ះពាល់ពីការវះកាត់ព្យាបាលធ្មេញ៕

ប្រភព៖ BBC
ប្រែសម្រួល៖ បុត្រា

July 15, 2021

ពលរដ្ឋ 19,000 នាក់ ធ្វើបាតុកម្មក្នុងថ្ងៃបុណ្យឯករាជ្យរបស់ បារាំង

បារាំង៖ មនុស្សប្រហែល 19,000 នាក់ បានចូលរួមធ្វើបាតុកម្មនៅក្នុងថ្ងៃបុណ្យឯករាជ្យរបស់ បារាំង នៅពាសពេញផ្ទៃប្រទេស ដើម្បីប្រឆាំងនឹងការរឹតបន្តឹងថ្មីក្នុងបំណងគ្រប់គ្រងស្ថានការណ៍ COVID-19 របស់រដ្ឋាភិបាល។

បាតុកម្មដាច់ដោយឡែកជាច្រើនក្រុម ត្រូវបានធ្វើឡើងកាលពីថ្ងៃទី 14 ខែកក្កដា នៅពាសពេញផ្ទៃប្រទេស ក្នុងនោះក៏មាន ទីក្រុង Paris, Toulouse, Bordeaux, Montpelier, Nantes រួមនឹងតំបន់ផ្សេងៗមួយចំនួនទៀត។ ក្រុមមន្ត្រីរដ្ឋាភិបាល បារាំង ឱ្យដឹងថា មនុស្សប្រមាណ 19,000 នាក់ បានចូលរួមធ្វើបាតុកម្ម។ ក្រសួងមហាផ្ទៃ បារាំង បានប្រកាសថា បាតុកម្មតូច-ធំ ចំនួន 53 ត្រូវបានធ្វើឡើងនៅតំបន់សំខាន់ៗនៃប្រទេសនេះ។

បាតុកម្មមួយចំនួននៅ Paris បានចាប់ផ្ដើមនៅព្រឹកថ្ងៃទី 14 ខែកក្កដា ក្នុងគ្រាដែលក្បួនព្យុហយាត្រាប្រចាំឆ្នាំ អបអរថ្ងៃបុណ្យឯករាជ្យបារាំង ត្រូវបានធ្វើឡើងតាមបណ្ដោយមហាវិថី Champs-Elysees ក្រោមអធិបតីភាពរបស់ប្រធានាធិបតី Emmanuel Macron។

មូលហេតុនៃបាតុកម្មនេះ កើតឡើងដោយសារក្រុមបាតុករមិនពេញចិត្តនឹងសេចក្ដីសម្រេចមួយដែលបានប្រកាសកាលពីថ្ងៃទី 12 កក្កដា ស្ដីពីការបង្ខំឱ្យបុគ្គលិកសុខាភិបាល ទទួលការចាក់វ៉ាក់សាំង ក៏ដូចជាការតម្រូវឱ្យពលរដ្ឋត្រូវបង្ហាញប័ណ្ណចាក់វ៉ាក់សាំង ទើបអាចចេញ-ចូលទីសាធារណៈ ឬតម្រូវឱ្យពលរដ្ឋដែលមិនទាន់បានចាក់វ៉ាក់សាំង ត្រូវបង្ហាញលទ្ធផលអវិជ្ជមាន ទើបអាចចូលភោជនីយដ្ឋានបាន។

យោងតាមការស្រាវជ្រាវមួយរបស់ Elabe ដែលបានប្រកាសកាលពីថ្ងៃទី 13 កក្កដា វិធានការថ្មីខាងលើនេះ ទទួលបានការគាំទ្រច្រើនពីសំណាក់ពលរដ្ឋបារាំង។ ពលរដ្ឋប្រមាណ 35.5 លាននាក់ (ជាងពាក់កណ្ដាលនៃចំនួនប្រជាជនសរុបរបស់បារាំង) បានចាក់វ៉ាក់សាំង COVID-19 យ៉ាងតិច 1 ដូសរួចហើយ។

គិតមកដល់បច្ចុប្បន្ន បារាំង បានរកឃើញអ្នកឆ្លង COVID-19 សរុបចំនួន 5,829,724 នាក់ ក្នុងនោះក៏មានករណីស្លាប់ 111,413 នាក់, ជាសះស្បើយ 5,162,757 នាក់ និងកំពុងព្យាបាលចំនួន 555,554 នាក់៕

ប្រភព៖ AFP
ប្រែសម្រួល៖ បុត្រា

July 15, 2021

ប្រទេសថៃ ផ្ដល់ជំនួយជិត 1.3 ពាន់លានដុល្លារ ដល់ពលរដ្ឋ និងអាជីវករ ដែលរងគ្រោះដោយសារបម្រាមគោចរ

គណៈរដ្ឋមន្ត្រីថៃ ទើបតែបានប្រកាសអំពីកញ្ចប់ជំនួយផ្នែកហិរញ្ញវត្ថុដែលមានតម្លៃ 42 ពាន់លានបាត (ជិត 1.3 ពាន់លានដុល្លារអាមេរិក) សម្រាប់ប្រជាជន និងក្រុមហ៊ុន ដែលរងគ្រោះដោយសារការដាក់បម្រាមគោចរតាមដំណាក់កាល ដែលត្រូវបានធ្វើឡើងកាលពីដើមសប្ដាហ៍នេះ នៅទីរាជធានីបាងកក និងខេត្តចំនួន 9 ផ្សេងទៀត។

យោងតាមសារព័ត៌មាននានានៅទីក្រុងបាងកក កញ្ចប់ជំនួយខាងលើនេះ ត្រូវបានអនុម័ត បន្ទាប់រាជរដ្ឋាភិបាលថៃ អនុវត្តវិធានការតឹងរ៉ឹង ដើម្បីគ្រប់គ្រង COVID-19 ក្នុងនោះមានទាំងបម្រាមគោចរនៅពេលយប់ ចាប់ពីម៉ោង 21 ថ្ងៃមុន រហូតដល់ម៉ោង 4 ទៀបភ្លឺនៃថ្ងៃបន្ទាប់ នៅរាជធានីបាងកក និងខេត្តក្បែរខាងមួយចំនួន រួមមាន ខេត្ត Nakhon Pathom, Nonthaburi, Pathum Thani, Samut Prakan, Samut Sakhon និង 4 ខេត្តផ្សេងទៀតដែលស្ថិតនៅភាគខាងត្បូងប្រទេសនេះ រួមមាន ខេត្ត Narathiwat, Pattani, Yala និង ខេត្ត Songkhla។

នាយករដ្ឋមន្ត្រីថៃ លោក Prayut Chan-o-cha បានបង្ហោះសារនៅលើទំព័រ Facebook ផ្ទាល់ខ្លួនថា គណៈរដ្ឋមន្ត្រីប្រទេសនេះ បានអនុម័តលើវិធានការសង្គ្រោះថ្មី ដែលលើកឡើងដោយក្រុមអ្នកសេដ្ឋកិច្ចរបស់រដ្ឋាភិបាល ក្នុងបំណងប៉ះប៉ូវច្រើនបំផុតតាមដែលអាចធ្វើទៅបាន សម្រាប់ពលរដ្ឋទាំងឡាយណាដែលរងផលប៉ះពាល់ដោយសារបម្រាមគោចរ។

ជំនួយផ្នែកហិរញ្ញវត្ថុនេះ នឹងផ្ដល់ឱ្យទាំងអ្នកគ្រប់គ្រងអាជីវកម្ម ទាំងបុគ្គលិកស៊ីឈ្នួល នៅក្នុងរដ្ឋធានី និងខេត្តដែលរងផលប៉ះពាល់។ វិស័យជំនួញដែលមានឈ្មោះនៅក្នុងបញ្ជីត្រូវទទួលបានរបបខាងលើ រួមមាន វិស័យសំណង់ សណ្ឋាគារ សេវាកម្មហូបចុក សិល្បៈ និងកម្សាន្ត។

ពលរដ្ឋ ថៃ ក៏នឹងទទួលបានការបញ្ចុះតម្លៃអគ្គិសនី និងទឹកប្រើប្រាស់សម្រាប់ខែកក្កដា និងសីហា។ ជាងនេះ រដ្ឋាភិបាលថៃ ក៏សម្រេចបញ្ចុះតម្លៃសិក្សា និងខ្ទង់ចំណាយផ្សេងៗសម្រាប់ឆមាសដំបូងនៃឆ្នាំសិក្សានេះ ព្រមទាំងបានស្នើឱ្យធនាគារជាតិ ធនាគារពាណិជ្ជ និងស្ថាប័នហិរញ្ញវត្ថុនានា បន្ធូរបន្ថយការកំណត់នៅក្នុងការទូទាត់បំណុលផងដែរ។

ប្រទេសថៃ នាថ្ងៃទី 14 កក្កដា ឆ្នាំ 2021 នេះ ប្រកាសថា បានរកឃើញករណីវិជ្ជមានថ្មីចំនួន 9,317 នាក់ និងស្លាប់ចំនួន 87 នាក់ដោយសារ COVID-19។ គិតមកដល់បច្ចុប្បន្ន ប្រទេសនេះ បានរកឃើញអ្នកឆ្លងវីរុសសរុប 363,029 នាក់ ក្នុងនោះមាន 3,934 នាក់បានស្លាប់៕

ប្រភព៖ bangkokpost
ប្រែសម្រួល៖ បុត្រា

July 14, 2021

អ៊ីស្រាអែល សម្រេចចាក់វ៉ាក់សាំង COVID-19 ដូសទី 3 ជូនពលរដ្ឋ

អ៊ីស្រាអែល បានក្លាយជាប្រទេសដំបូងគេក្នុងពិភពលោក ដែលបានអនុញ្ញាតឱ្យពលរដ្ឋពេញវ័យដែលមានជំងឺប្រចាំកាយធ្ងន់ធ្ងរ ទទួលការចាក់វ៉ាក់សាំង Pfizer ជាដូសទីបី។

ក្រសួងសុខាភិបាល អ៊ីស្រាអែល នាសប្ដាហ៍នេះ បានឱ្យដឹងថា នឹងចាក់វ៉ាក់សាំងបង្ការវីរុស COVID-19 ម្ជុលទីបី សម្រាប់ពលរដ្ឋពេញវ័យដែលត្រូវបានគេចាត់ទុកថា មានហានិភ័យឆ្លង COVID-19 ពិសេសគឺក្រុមមនុស្សដែលមានអង់ទីក័រខ្សោយ ឬទើបឆ្លងកាត់ការវះកាត់។

សេចក្ដីសម្រេចរបស់រដ្ឋាភិបាល អ៊ីស្រាអែល ត្រូវបានធ្វើឡើងនៅក្នុងគ្រាដែលករណីវិជ្ជមាននឹង COVID-19 នៅប្រទេសនេះ កើនឡើងយ៉ាងឆាប់រហ័ស ដោយសារវ៉ារ្យ៉ង់ (វីរុសបំប្លែងខ្លួន) Delta។ មុននេះ អ៊ីស្រាអែល ត្រូវបានគេលើកសរសើរ ព្រោះតែបានធ្វើយុទ្ធនាការចាក់វ៉ាក់សាំងបានលឿនជាងគេក្នុងពិភពលោក ដោយពលរដ្ឋជាង 5 លាននាក់ក្នុងចំណោម 9 លាននាក់របស់ប្រទេសនេះ បានទទួលការចាក់វ៉ាក់សាំងម្ជុលទីពីរ។ បច្ចុប្បន្ន ករណីវិជ្ជមានថ្មីប្រចាំថ្ងៃនៅ អ៊ីស្រាអែល បានកើនលើស 400 នាក់/ថ្ងៃ។

ទន្ទឹមនឹងនេះ ការជជែកអំពីការចាក់វ៉ាក់សាំងម្ជុលទីបី នៅតែកើតមាន។ មន្ត្រីសុខាភិបាល អាមេរិក យល់ថា ការចាក់ដូសទីបី គឺជារឿងមិនចាំបាច់។ ចំណែកក្រុមហ៊ុន Pfizer វិញ ក៏បានឱ្យដឹងថា នឹងស្នើដល់ស្ថាប័នគ្រប់គ្រង អនុម័តលើការចាក់វ៉ាក់សាំងម្ជុលទីបី។ ប្រទេសមួយចំនួន មានដូចជា បារ៉ែន និង អារ៉ាប់រួម (UAE) ជាដើម កំពុងចាក់វ៉ាក់សាំង Pfizer ចំនួន 1 ដូសទៀត សម្រាប់ពលរដ្ឋដែលបានចាក់វ៉ាក់សាំង Sinopharm របស់ ចិន គ្រប់ 2 ដូស៕

ប្រភព៖ CNBC
ប្រែសម្រួល៖ បុត្រា

July 14, 2021

វៀតណាម ទទួលបានការធានាផ្គត់ផ្គង់វ៉ាក់សាំង COVID-19 ចំនួន 105 លានដូស រួចហើយ

វៀតណាម បានកំណត់គោលដៅ ទិញវ៉ាក់សាំង COVID-19 ចំនួន 150 លានដូស ដើម្បីចាក់ជូនពលរដ្ឋឱ្យមាន 70% ហើយមកដល់បច្ចុប្បន្ន វ៉ាក់សាំងប្រមាណ 105 លានដូស ត្រូវបានចុះកិច្ចសន្យារួចរាល់។

ក្នុងចំណោមវ៉ាក់សាំងបង្ការវីរុស COVID-19 ចំនួន 105 លានដូស ដែល វៀតណាម បានធានាថានឹងទទួលបាន មាន 38.9 លានដូសស្ថិតក្នុងកម្មវិធី ជំនួយ COVAX របស់អង្គការសុខភាពពិភពលោក, 30 លានដូសជា AstraZeneca ផ្គត់ផ្គង់ដោយក្រុមហ៊ុនវៀតណាម VNVC, 31 លានដូស ជា វ៉ាក់សាំង Pfizer ដែលចុះហត្ថលេខាជាមួយរដ្ឋាភិបាល និង 5 លានដូស Moderna ប្រគល់សិទ្ធិឱ្យក្រុមហ៊ុន Zuellig Pharma Viet Nam ជាអ្នកចាត់ចែង។ នេះបើតាមប្រកាសរបស់ក្រសួងការបរទេស វៀតណាម។

ទន្ទឹមនឹងនេះ វៀតណាម ក៏កំពុងចរចាទិញវ៉ាក់សាំងបន្ថែមចំនួន 55 លានដូសទៀត រួមមាន 40 លានដូស ជាវ៉ាក់សាំង Sputnik V របស់ រុស្ស៊ី និង 15 លានដូសជាវ៉ាក់សាំង Covaxin របស់ ឥណ្ឌា។

គិមត្រឹមថ្ងៃទី 12 ខែកក្កដា វៀតណាម បានទទួលវ៉ាក់សាំងបង្ការ COVID-19 ប្រមាណ 8 លានដូសរួចហើយ។ នាពេលខាងមុខ ពោលគឺក្នុងអំឡុងចាប់ពីខែកក្កដា ដល់ខែកញ្ញា វៀតណាម នឹងបានទទួលវ៉ាក់សាំង Pfizer-BioNTech ចំនួនជាង 1 លានដូសទៀត ពីកម្មវិធី COVAX បន្ថែមពីលើប្រហែល 4.5 លានដូស ដែលកម្មវិធីនេះបានប្រគល់ឱ្យ វៀតណាម កាលពីមុននេះ។ កន្លងមក សហរដ្ឋអាមេរិក ក៏បានសម្រេចផ្ដល់ជំនួយជាវ៉ាក់សាំង Moderna ចំនួន 2 លានដូស ទៅឱ្យ វៀតណាម តាមរយៈកម្មវិធី COVAX។

បន្ទាប់ពីបានផ្ដល់ជំនួយជាវ៉ាក់សាំង AstraZeneca ចំនួន 2 លានដូស ដល់វៀតណាម ប្រទេស ជប៉ុន ក៏សន្យាថានឹងផ្ដល់ជំនួនបន្ថែម 1 លានដូសទៀតនៅថ្ងៃទី 16 ខែកក្កដា។

ជាងនេះ នៅក្នុងបញ្ជីឈ្មោះវ៉ាក់សាំង ដែល វៀតណាម បានទទួល ក៏នៅមានវ៉ាក់សាំង Vero Cell របស់ក្រុមហ៊ុន ចិន Sinopharm ចំនួន 500,000 ដូស និង Sputnik V របស់ រុស្ស៊ី ចំនួន 1,000 ដូសផងដែរ។

អូស្ត្រាលី បានសន្យាផ្ដល់ជំនួយជាវ៉ាក់សាំង AstraZeneca ចំនួន 1.5 លានដូស ចាប់ពីពេលនេះ រហូតដល់ចុងឆ្នាំ និងជំនួយជាប្រាក់ចំនួន 13.5 លានដុល្លារអូស្ត្រាលី (ជាង 10 លានដុល្លារអាមេរិក) ដល់ប្រទេសអាស៊ីអាគ្នេយ៍មួយនេះ ដើម្បីទិញវ៉ាក់សាំង COVID-19 តាមរយៈមូលនិធិកុមារនៃអង្គការសហប្រជាជាតិ (UNICEF)។

ចំណែកប្រទេស អង់គ្លេស វិញ ក៏បានសន្យាផ្ដល់ជំនួយជាវ៉ាក់សាំងបង្ការ COVID-19 មួយចំនួនដល់ វៀតណាម ផងដែរ តាមរយៈកម្មវិធី COVAX និងទ្វេភាគី៕

ប្រភព៖ VNexpress
ប្រែសម្រួល៖ បុត្រា

July 14, 2021

Novavax វ៉ាក់សាំងកូវីដ-19 ប្រសិទ្ធភាពមិនធម្មតា!

ក្រៅពី Pfizer និង Moderna ដែលមនុស្សភាគច្រើន ផ្ដល់ការចាប់អារម្មណ៍ហើយនោះ នៅមានវ៉ាក់សាំង 1ប្រភេទទៀតគឺ Novavax ឬណូវ៉ាវ៉េកស៍ ដែលមានប្រសិទ្ធភាពល្អ មិនចាញ់គ្នាប៉ុន្មានឡើយ ទោះជាកំពុងស្ថិតក្នុងការសាកល្បង និងប្រមូលទិន្នន័យ និងមិនទាន់ទទួលបានការធានារ៉ាប់រងពី WHO ក៏ដោយ តែដោយតិចណូឡូជីក្នុងការផលិតបែប Protein-based ដែលហាក់ដូចជាវិធីបែបបុរាណនោះ ទើបធ្វើឱ្យ ក្លាយជាវ៉ាក់សាំងដែលមានសុវត្ថិភាព មានផលប៉ះពាល់តិចតួច និងមានតម្លៃមិនថ្លៃ។

អីលូវយើងនាំគ្នាមកស្គាល់ “ណូវ៉ាវ៉េកស៍” (Novavax) ដូចតទៅ៖

ឈ្មោះផ្លូវការ៖ វ៉ាក់សាំង NVX-CoV2373

ផលិតដោយ៖ ក្រុមហ៊ុន Novavax រដ្ឋ Maryland ប្រទេសសហរដ្ឋអាមេរិក

ប្រភេទរបស់វ៉ាក់សាំង៖ Protein-based ផលិតដោយបង្កើតប្រូតេអ៊ីនរបស់មេរោគវីរុស ដោយប្រព័ន្ធ cell culture, yeast, baculovirus ជាដើម ហើយនាំយកមកផ្សំជាមួយសារធាតុជំរុញប្រព័ន្ធភាពស៊ាំ។ នៅពេលចាក់ចូលទៅក្នុងរាងកាយមនុស្ស នឹងជំរុញឱ្យរាងកាយបង្កើតអង់ទីគ័រ ប្រឆាំងប្រូតេអ៊ីនស្ប៉ៃខ៍ របស់វីរុសជំងឺកូវីដ-19 ដោយតិចណូឡូជីនេះ ត្រូវបានប្រើប្រាស់ក្នុងការផលិតវ៉ាក់សាំងជាច្រើនប្រភេទ ដូចជា វ៉ាក់សាំងការពារជំងឺគ្រុនផ្ដាសាយធំ វ៉ាក់សាំងការពារវីរុសរលាកថ្លើម ប្រភេទB ជាដើម។

អាយុដែលអាចចាក់បាន៖ ចាប់ពី 18ឆ្នាំឡើងទៅ តែកំពុងសាកល្បងជាមួយអាយុ 14-17ឆ្នាំ។

ចំនួនដែលត្រូវចាក់៖ 2ម្ជុល ដោយឆ្ងាយពីគ្នាប្រមាណ 3សប្ដាហ៍។

ផលប៉ះពាល់ដែលជួបប្រទះ៖ មិនទាន់រកឃើញអាការបន្ទាប់បន្សំដែលធ្ងន់ធ្ងរនៅឡើយ ជួបតែអាការបន្ទាប់បន្សំដូចវ៉ាក់សាំងទូទៅដែរ ដូចជា ឈឺ និងហើមកន្លែងចាក់ គ្រុនក្ដៅខ្លួន អស់កម្លាំង ឈឺក្បាល ជាដើម។

ប្រសិទ្ធភាពក្នុងការការពារការឆ្លងមេរោគវីរុស៖ ការពារកូវីដ-19 ប្រភេទចាស់ បាន 96.4%, ប្រភេទអាល់ហ្វា 86% និងប្រភេទបេតា ការពារបាន 55% និងដោយសារតែអាចការពារកូវីដ-19 បានច្រើនប្រភេទនេះហើយ ទើបក្លាយជាវ៉ាក់សាំងមួយ ដែលមនុស្សទូទាំងពិភពលោកកំពុងចាប់អារម្មណ៍។

ប្រសិទ្ធភាពក្នុងការកាត់បន្ថយអាការធ្ងន់ធ្ងរដល់ជីវិត៖ 100%

ប្រសិទ្ធភាពក្នុងការកាត់បន្ថយការចម្លងមេរោគ៖ មិនមានទិន្នន័យ

ប្រទេសដែលចាក់៖ មិនទាន់បានទទួលការអនុញ្ញាតឱ្យប្រើជាផ្លូវការ នៅក្នុងប្រទេសណាមួយនៅឡើយ ដោយសារតែកំពុងស្ថិតក្នុងដំណាក់កាលសាកល្បង តែមានការសាកល្បងប្រើជាមួយអ្នកជំងឺនៅក្នុងប្រទេសជាច្រើនរួចមកហើយ ដូចជា សហរដ្ឋអាមេរិក អូស្ត្រាលី ឥណ្ឌា ចក្រភពអង់គ្លេស អាហ្វ្រិកខាងត្បូង មិកស៊ិក និងពើតូរីកូ ជាដើម។

ឋានៈការធានារ៉ាប់រងដោយ WHO៖ មិនទាន់បានទទួលការចុះបញ្ជី ឱ្យក្លាយជាវ៉ាក់សាំង ដែលប្រើបានក្នុងករណីអាសន្នដោយ WHO នៅឡើយ។

ចំណុចល្អ៖ ដោយសារតិចណូឡូជីក្នុងការផលិត បែប Protein-based ជា តិចណូឡូជី ដែលអ្នកស្រាវជ្រាវ និងគ្រូពេទ្យធ្លាប់ស្គាល់ស្រាប់មកហើយនោះ ទើបហាក់ដូចជាមានសុវត្ថិភាព មានប៉ះពាល់តិចតួច ហើយលទ្ធផលសាកល្បង ដែលចេញមក រហូតដល់បច្ចុប្បន្ន(ថ្ងៃ13 កក្កដា 2021) នៅតែស្ថិតក្នុងកម្រិតគួរឱ្យពេញចិត្ត ព្រោះជាប្រូតេអ៊ីនបន្លា ដែលចាក់ចូលទៅក្នុងរាងកាយដោយផ្ទាល់ មិនចាំបាច់ឆ្លងកាត់តួផ្សំកណ្ដាល ឬកម្មវិធីបង្កើតប្រព័ន្ធភាពស៊ាំរបស់រាងកាយឡើយ។ ក្រៅពីនេះ តម្លៃថែមទាំងធូរថ្លៃទៀតផង ដោយ 2ដូស(ឬ 2ម្ជុល) តម្លៃត្រឹមតែ 16ដុល្លារអាមេរិក ឬប្រមាណតែជាង 60,000រៀលប៉ុណ្ណោះ។

ចំណុចគួរប្រយ័ត្ន៖ នៅត្រូវរង់ចាំលទ្ធផលសរុប នៃការសាកល្បងក្នុងដំណាក់កាលចុងក្រោយសិន រួមទាំងរង់ចាំការទទួលស្គាល់ និងចុះបញ្ជី ជាវ៉ាក់សាំង ដែលប្រើក្នុងករណីអាសន្នបាន ពី WHO ម្ដងទៀត៕

ប្រែសម្រួលដោយអ្នកគ្រូ ឆវី

July 14, 2021

ឥណ្ឌូនេស៊ី «យកឈ្នះ» ឥណ្ឌា ក្លាយជាទីដែលមានករណីវិជ្ជមានប្រចាំថ្ងៃ ច្រើនជាងគេនៅ អាស៊ី

ឥណ្ឌូនេស៊ី រកឃើញករណីវិជ្ជមាននឹង COVID-19 ប្រចាំថ្ងៃ លើសពី 40,000 នាក់ រយៈពេល 2 ថ្ងៃជាប់ៗគ្នា ដែលតួលេខនេះ ខ្ពស់ជាង ឥណ្ឌា ទៅទៀត នាំឱ្យ ឥណ្ឌូនេស៊ី ក្លាយជាសម្បុក COVID-19 ថ្មី នៅក្នុងទ្វីបអាស៊ី។

សម្បុកវីរុស COVID-19 ធំជាងគេនៅក្នុងតំបន់ អាស៊ីអាគ្នេយ៍ (ឥណ្ឌូនេស៊ី) កាលពីម្សិលមិញ បានរាយការណ៍ថា បានរកឃើញករណីវិជ្ជមាននឹង COVID-19 ថ្មី ចំនួន 47,899 នាក់ ខ្ពស់ជាងឆ្ងាយបើធៀបនឹង 40,427 នាក់ក្នុងមួយថ្ងៃ កាលពីមួយថ្ងៃមុននោះ។ ចំណែក តួលេខនៃអ្នកជំងឺថ្មីនៅប្រទេស ឥណ្ឌា វិញ គឺមាន 32,906 នាក់ (កាលពីថ្ងៃទី 13 កក្កដា) ថយចុះបន្តិចធៀបនឹង 37,154 នាក់ កាលពីថ្ងៃទី 12 កក្កដា។

ប្រការដែលគួរឱ្យប្រកាសអាសន្ន នោះគឺ តួលេខអ្នកជំងឺថ្មីប្រចាំថ្ងៃនៅ ឥណ្ឌូនេស៊ី ខ្ពស់ជាង ឥណ្ឌា បើទោះជាចំនួនប្រជាជនសរុបរបស់ប្រទេសនេះ ស្មើនឹង 1/5 ប៉ុណ្ណោះ ធៀបនឹងចំនួនប្រជាជនសរុបរបស់ ឥណ្ឌា។ យោងតាមទំព័រ Our World in Data ឥណ្ឌូនេស៊ី បច្ចុប្បន្ន រកឃើញប្រហែល 132 ករណីក្នុងចំណោមពលរដ្ឋ 1 លាននាក់ ខណៈដែលអត្រានេះនៅ ឥណ្ឌា មានត្រឹមតែ 26 ករណីប៉ុណ្ណោះ គិតត្រឹមថ្ងៃទី 11 ខែកក្កដា។

អត្រានៃការស្លាប់ដោយសារ COVID-19 ជាមធ្យមនៅ ឥណ្ឌូនេស៊ី គឺចំនួន 3 នាក់ ក្នុងចំណោមពលរដ្ឋ 1 លាននាក់ ស្របពេលដែល ឥណ្ឌា មានមិនដល់ 1 នាក់/លាននាក់។

ជាសរុប ឥណ្ឌា នៅតែជាសម្បុកវីរុសធំជាងគេនៅក្នុងទ្វីបអាស៊ី ដោយមានអ្នកឆ្លងសរុប ជាង 30.9 លាននាក់ ក្នុងនោះមានអ្នកស្លាប់ 410,784 នាក់។ ឥណ្ឌូនេស៊ី ឈរលំដាប់លេខ 2 ដោយមានអ្នកឆ្លងសរុប ជាង 2.6 លាននាក់ ក្នុងនោះមាន 68,219 នាក់បានស្លាប់៕

ប្រភព៖ Nikkei
ប្រែសម្រួល៖ បុត្រា

July 14, 2021

Category: អន្តរជាតិ