អន្តរជាតិ - La Reine Media

ក្រុមហ៊ុនបារាំង លក់បេះដូងសិប្បនិម្មិត

ក្រុមហ៊ុន Carmat កាលពីថ្ងៃទី 19 កក្កដា បានឱ្យដឹងថា បានលក់បេះដូងសិប្បនិម្មិតទៅឱ្យអ្នកជំងឺជនជាតិអ៊ីតាលីម្នាក់ ដែលកំពុងរង់ចាំការវះកាត់។

យោងតាមសារព័ត៌មាន AFP ការវះកាត់នេះនឹងត្រូវបានធ្វើឡើងដោយក្រុមវេជ្ជបណ្ឌិត ដែលដឹកនាំដោយ Ciro Maiello នៅមន្ទីរពេទ្យ Azienda Ospedaliera dei Colli ក្នុងទីក្រុង Naples ដែលជាមជ្ឈមណ្ឌលមួយ មានបទពិសោធន៍ច្រើនជាងគេ នៅក្នុងវិស័យបេះដូងសិប្បនិម្មិត ប្រចាំប្រទេស អ៊ីតាលី។

Carmat ដែលត្រូវបានបង្កើតឡើងកាលពីឆ្នាំ 2008 មានជំនាញខាងផលិតអវយវៈសិប្បនិម្មិត សម្រាប់អ្នកជំងឺ។ ក្រុមហ៊ុននេះ ត្រូវបានទទួលស្គាល់ដោយ CE marking កាលពីឆ្នាំ 2020 ដែលអនុញ្ញាតឱ្យលក់បេះដូងសិប្បនិម្មិត Aeson របស់ពួកគេ នៅក្នុងទីផ្សារអឺរ៉ុប ដើម្បីផ្គត់ផ្គង់តាមតម្រូវការរបស់អតិថិជន។

ការទទួលស្គាល់ខាងលើគឺ យោងទៅលើការសិក្សាស្រាវជ្រាវមួយ មានឈ្មោះថា PIVOTAL ដែលត្រូវបានធ្វើឡើងតាំងពីឆ្នាំ 2016 រហូតដល់បច្ចុប្បន្ន។ នៅខែវិច្ឆិកា ឆ្នាំ 2019 លទ្ធផលពីអ្នកជំងឺ 11 នាក់ដំបូង នៅក្នុងការពិសោធ បានបង្ហាញថា 73% បានបន្តរស់ក្នុងរយៈពេល 6 ខែ ដោយមានជំនួយពីបេះដូងសិប្បនិម្មិត។

បេះដូង Aeson មានទម្ងន់ 900 ក្រាម ប្រើប្រាស់វត្ថុធាតុ និងអង្គញាណជីវសាស្ត្រ។ ជាមូលដ្ឋាន បេះដូងនេះដំណើរការដូចទៅនឹងម៉ាស៊ីនបូមដើម្បីគ្រប់គ្រងលំហូរឈាម។

យោងតាមការគណនា បច្ចុប្បន្ន មានអ្នកជំងឺបេះដូងប្រហែល 2,000 នាក់ នៅពាសពេញតំបន់អឺរ៉ុបខាងលិច កំពុងស្ថិតក្នុងបញ្ជីឈ្មោះរង់ចាំការវះកាត់។

ក្រុមហ៊ុន Carmat បានឱ្យដឹងថា ផលិតផលរបស់ពួកគេ នឹងទទួលបានចំណាប់អារម្មណ៍បន្ថែមទៀត ពីអតិថិជននៅប្រទេស បារាំង និង អាល្លឺម៉ង់ នៅចុងឆ្នាំ 2021 នេះ។

ក្រុមហ៊ុនក៏កំពុងតែស្វែងរកអ្នកជំងឺចំនួន 10 នាក់បន្ថែមទៀត ដើម្បីចូលរួមក្នុងការពិសោធមួយ ក្រោយបានទទួលការអនុញ្ញាតពី សហរដ្ឋអាមេរិក។ កាលពីថ្ងៃទី 15 កក្កដា Carmat បានប្រកាសអំពីករណីវះកាត់ដាក់បេះដូង Aeson ដំបូង ជូនអ្នកជំងឺម្នាក់នៅ អាមេរិក នៅក្នុងក្របខណ្ឌនៃការពិសោធលើមនុស្ស នៅមន្ទីរពេទ្យនៃមហាវិទ្យាល័យ Duke ដែលមានទីតាំងស្ថិតនៅក្នុងតំបន់ Durham រដ្ឋ Carolina ខាងជើង នៃ សហរដ្ឋអាមេរិក៕

ប្រភព៖ AFP
ប្រែសម្រួល៖ បុត្រា

July 21, 2021

ទស្សនាស្ថាបនិក Amazon ហោះទៅកាន់ជាយអវកាសដោយជោគជ័យ

យាន New Shepard ដែលរួមផ្សំរវាងរ៉ុក្កែតរុញច្រាន និងបន្ទប់ដឹកភ្ញៀវរបស់ក្រុមហ៊ុន Blue Origin បានហោះឡើងនៅវេលាម៉ោង 20 និង 11នាទី នៃថ្ងៃទី 20 កក្កដា ម៉ោងនៅភ្នំពេញ (ម៉ោង 8 និង 11នាទី នៅអាមេរិក)។

ក្រុមហ៊ុន Blue Origin បានធ្វើការហោះហើរដឹកមនុស្សលើកដំបូងរបស់ខ្លួន ចេញពីមូលដ្ឋាន Launch Site One នៅតំបន់ Van Horn ក្នុងរដ្ឋ Texas ឡើងទៅកាន់កំពស់ 107 គីឡូម៉ែត្រ ដោយជោគជ័យ។ អវកាសចរចំនួន 4 នាក់ដែលបានហោះហើរលើកដំបូងនេះ រួមមានស្ថាបនិកក្រុមហ៊ុន Blue Origin គឺ មហាសេដ្ឋី Jeff Bezos និងមនុស្សចំនួន 3 នាក់ទៀត ក្នុងនោះមានប្អូនស្រុសរបស់លោក Jeff Bezos គឺលោក Mark Bezos, លោកយាយវ័យ 82 ឆ្នាំ Wally Funk និងកំលោះជនជាតិហូឡង់ វ័យ 18 ឆ្នាំ លោក Oliver Daemen។ ការហោះហើរនេះ បានអូសបន្លាយពេលជិត 11 នាទី។

រ៉ុក្កែតស្វ័យប្រវត្តិ បាននាំបន្ទប់អវកាសចរ ឡើងទៅក្បែរជាយអវកាស មុនពេលត្រូវបានបំបែកពីគ្នា និងហោះត្រលប់មកចុះចតដោយត្រង់នៅលើផែនដី។ ប៉ុន្មាននាទីបន្ទាប់ពីបានស្ថិតនៅផ្នែកខាងលើនៃបន្ទាត់ព្រំដែន Karman ដែលខណ្ឌចែកបរិយាកាសផែនដី និងអវកាស បន្ទប់ដឹកអវកាសចរ ក៏បានត្រលប់មកកាន់ផែនដី ដោយប្រើប្រាស់ឆត្រយោង ចុះចតលើសមុទ្រខ្សាច់ Texas។

ក្រោយការហោះហើរនេះ លោក Jeff Bezos បានក្លាយជាមហាសេដ្ឋីទីពីរដែលបានហោះទៅកាន់ទីអវកាស។ កាលពីថ្ងៃទី 11 កក្កដា ស្ថាបនិកក្រុមហ៊ុន Virgin Group គឺមហាសេដ្ឋី Richard Branson បានចូលរួមហោះហើរមានមនុស្សលើកដំបូងរបស់យន្តហោះអវកាស VSS Unity ដែលអភិវឌ្ឍដោយក្រុមហ៊ុន Virgin Galactic។

ក្រុមហ៊ុន Virgin Galactic គឺជាគូប្រជែងសំខាន់របស់ Blue Origin។ តម្លៃសំបុត្រសម្រាប់កៅអីមួយកន្លែងរបស់ ក្រុមហ៊ុន Virgin Galactic គឺ 250,000 ដុល្លារ ខណៈ Blue Origin ថ្វីបើមិនទាន់បានប្រកាសអំពីតម្លៃសំបុត្រ ប៉ុន្តែ ត្រូវបានគេសន្និដ្ឋានថា ក៏ស្ថិតក្នុងតួលេខ 6 ខ្ទង់ដូចគ្នា។

ក្រុមហ៊ុនទាំងពីរខាងលើ សុទ្ធតែផ្ដល់ឱ្យអតិថិជន នូវ បទពិសោធន៍ស្ថិតក្នុងបរិស្ថានគ្មានទម្ងន់ ចាប់ពី 3 ដល់ 4 នាទី និងគយគន់ផែនដីពីចម្ងាយ។ យាន New Shepard គឺជាបន្ទប់ស្វ័យប្រវត្តិដែលត្រូវបានបាញ់បង្ហោះត្រង់ដោយរ៉ុក្កែត និងចុះចតដោយឆត្រយោង ចំណែក VSS Unity គឺជាយន្តហោះអវកាស បើកបរដោយបុគ្គលិកចំនួន 2 នាក់ និងហោះឡើងដោយពឹងលើយន្តហោះដឹកជញ្ជូន ហើយចុះចតដូចយន្តហោះដឹកអ្នកដំណើរធម្មតា។

Blue Origin កំពុងមានគម្រោងដឹកមនុស្សទៅកាន់ទីអវកាសចំនួន 2 លើកទៀតនៅក្នុងឆ្នាំនេះ។ ដោយឡែក Virgin Galactic វិញ ក៏មានផែនការហោះហើរសាកល្បងច្រើនលើកទៀតនៅក្នុងរដូវស្លឹកឈើជ្រុះឆ្នាំនេះ បន្ទាប់មក នឹងធ្វើសកម្មភាពពាណិជ្ជកម្ម ចាប់ពីដើមឆ្នាំ 2022។ ក្រុមហ៊ុនទាំងនេះ ក៏សុទ្ធតែមានគម្រោងបង្កើនការហោះហើរទៅតាមពេលវេលា ដើម្បីកាត់បន្ថយការចំណាយ និងពង្រីកប្រភេទអតិថិជនគោលដៅ៕

ប្រភព៖ Space
ប្រែសម្រួល៖ បុត្រា

July 21, 2021

ហុងកុង គំរាមកាត់ទោស អ្នកដែលបានចាក់វ៉ាក់សាំង 4 ដូស

អាជ្ញាធម៌ក្រុងហុងកុង អាចដាក់ពាក្យប្ដឹង ដើម្បីឱ្យតុលាការកាត់ទោសបុរសម្នាក់ ដែលបានទទួលការចាក់វ៉ាក់សាំងបង្ការ COVID-19 រហូតដល់ 4 ម្ជុល ព្រមទាំងបានថ្កោលទោសចំពោះទង្វើ «អាត្មានិយម» របស់បុគ្គលរូបនេះផងដែរ។

សារព័ត៌មាន SCMP បានឱ្យដឹងថា បុរសវ័យ 30 ឆ្នាំនេះ បានទទួលការចាក់វ៉ាក់សាំង Moderna នៅ សិង្ហបុរី ចំនួន 2 ដូសរួចហើយ។ ប៉ុន្តែ ពេលត្រលប់ទៅធ្វើការនៅហុងកុង បុរសនេះក៏បន្តទទួលការចាក់វ៉ាក់សាំង Pfizer ចំនួន 2 ដូសទៀត។ បុរសនេះបានបកស្រាយថា មូលហេតុគឺ ដើម្បីទទួលបានប័ណ្ណបញ្ជាក់ការចាក់វ៉ាក់សាំង ដែលអនុញ្ញាតឱ្យលោកមានសិទ្ធិចូលបារនានានៅក្នុងទីក្រុងនេះ។

អាជ្ញាធរក្រុងហុងកុង កាលពីយប់ថ្ងៃទី 19 កក្កដា បានប្រកាសថា ទង្វើរបស់បុរសនេះ មិនត្រឹមតែអាចបង្កផលប៉ះពាល់ដល់សុខភាពខ្លួនឯងនោះទេ តែក៏នាំឱ្យបុគ្គលិកចាក់វ៉ាក់សាំងមួយចំនួន ត្រូវជាប់ទាក់ទងនឹងបញ្ហា ក៏ដូចជាការខ្ជះខ្ជាយវ៉ាក់សាំងរបស់ទីក្រុង។

«ទង្វើនេះ អាចទាក់ទងនឹងការផ្ដល់ព័ត៌មានមិនត្រឹមត្រូវ និងកេងយកផលប្រយោជន៍មិនស្របច្បាប់ បង្កជាទោសព្រហ្មទណ្ឌ។ អាជ្ញាធរនឹងធ្វើការស៊ើបអង្កេត ដើម្បីអនុវត្តច្បាប់។ បើសិនជាចាំបាច់ យើងនឹងដាក់ពាក្យប្ដឹងអ្នកដែលជាប់ពាក់ព័ន្ធ» នេះបើតាមអ្នកនាំពាក្យរបស់អាជ្ញាធរក្រុងហុងកុង។

ទីប្រឹក្សាផ្នែក COVID-19 របស់អាជ្ញាធរហុងកុង សាស្ត្រាចារ្យ David Hui Shu-cheong បានឱ្យដឹងថា ការចាក់វ៉ាក់សាំង COVID-19 រហូតដល់ 4 ដូស មិនមានប្រយោជន៍ដល់សុខភាពនោះឡើយ ប៉ុន្តែ វាអាចបណ្ដាលឱ្យអ្នកទទួលការចាក់វ៉ាក់សាំង ជួបហានិភ័យច្រើន ទាក់ទិននឹងផលប៉ះពាល់ ដូចជា ក្ដៅខ្លួន ឈឺក្បាល ឬឈឺសាច់ដុំដៃជាដើម។

សាស្ត្រាចារ្យ Leung Chi-chiu បញ្ជាក់ថា «គ្រប់គ្នាមិនគួរចាក់វ៉ាក់សាំង COVID-19 រហូតដល់ 4 ដូស ព្រោះវាអាចប៉ះពាល់ដល់ប្រព័ន្ធភាពស៊ាំរបស់រាងកាយ»។

ទីក្រុងហុងកុង កាលពីថ្ងៃទី 19 កក្កដា មិនមានអ្នកវិជ្ជមាននឹង COVID-19 នោះទេ ដូច្នេះ វាគឺជាថ្ងៃទី 42 ហើយ ដែលទីក្រុងនេះមិនមានករណីឆ្លងក្នុងសហគមន៍។ គិតមកដល់បច្ចុប្បន្ន ទីក្រុងនេះ បានរកឃើញអ្នកវិជ្ជមានសរុបចំនួនជាង 11,900 នាក់ ក្នុងនោះមានជាង 200 នាក់ បានបាត់បង់ជីវិត៕

ប្រភព៖ SCMP
ប្រែសម្រួល៖ បុត្រា

July 20, 2021

ចិន ទទួលជោគជ័យ ក្នុងការធ្វើតេស្តយន្តហោះអវកាស

ប្រទេសចិន បានបាញ់បង្ហោះសាកល្បង យានដែលហោះឡើង និងចុះចតត្រង់ និងអាចប្រើប្រាស់ឡើងវិញច្រើនដង កាលពីថ្ងៃទី 16 កក្កដា នៅឯសមុទ្រខ្សាច់ Gobi។

យន្តហោះសម្រាប់ហោះទៅក្បែរគន្លងគោចររបស់ផែនដី និងអាចប្រើប្រាស់ឡើងវិញបានច្រើនដង ត្រូវបានបាញ់បង្ហោះឡើង និងចុះចតត្រង់ ប្រកបដោយស្ថិរភាព នៅលើព្រលានយន្តហោះនៅឯទីរួមស្រុក Alashan Meng នៃតំបន់ស្វយ័តម៉ុងហ្គោលីក្នុង (Inner Mongolia Autonomous Region) នៅភាគខាងជើងប្រទេសចិន។ ការធ្វើតេស្តនេះ ស្ថិតក្នុងគម្រោងត្រួតពិនិត្យ និងទទួលស្គាល់បច្ចេកវិទ្យា និងជាការហោះហើរសាកល្បងដំបូងដែលទទួលបានជោគជ័យគ្រប់ជ្រុងជ្រោយ។ យន្តហោះនេះ ត្រូវបានបញ្ជាឱ្យហោះឡើងពីមជ្ឈមណ្ឌលបាញ់បង្ហោះផ្កាយរណប Jiuquan នៅលើសមុទ្រខ្សាច់ Gobi ភាគពាយព្យនៃប្រទេសចិន។

យានខាងលើត្រូវបានអភិវឌ្ឍដោយក្រុមហ៊ុនវិទ្យាសាស្ត្រនិងបច្ចេកវិទ្យាអាកាសចរណ៍អវកាសចិន (CASC)។ នេះគឺជាជោគជ័យដ៏សំខាន់នៅក្នុងការអភិវឌ្ឍយន្តហោះអវកាសល្បឿនលឿន ដែលអាចប្រើឡើងវិញច្រើនដង របស់ ចិន។

CASC បានប្រកាសគម្រោងអភិវឌ្ឍប្រព័ន្ធដឹកជញ្ជូនអវកាស ដែលអាចប្រើប្រាស់ឡើងវិញ កាលពីឆ្នាំមុន។ គម្រោងនេះ រួមមានទាំងការអភិវឌ្ឍយានដែលអាចហោះឡើង និងចុះចតដោយត្រង់ ដូចទៅនឹងយន្តហោះធម្មតា ប៉ុន្តែ អាចហោះទៅដល់គ្រប់ទីកន្លែងនៅលើផែនដី ដោយចំណាយពេលត្រឹមតែមួយម៉ោង ពោលគឺលឿនជាងល្បឿនសំឡេងរហូតដល់ 5 ដងឯណោះ។ បណ្ដាញយន្តហោះប្រភេទនេះ នឹងជួយកាត់បន្ថយការចំណាយបានយ៉ាងច្រើន បើធៀបនឹងរ៉ុក្កែតធម្មតា ព្រោះវាងាយស្រួលសម្រាប់ការថែទាំ និងចំណាយពេលតិចក្នុងការរៀបចំសម្រាប់ជើងហោះហើរនីមួយ។

កម្មវិធីរបស់ចិនខាងលើនេះ កំពុងឈានទៅរកការអភិវឌ្ឍដោយជោគជ័យ នូវយន្តហោះអវកាស នាឆ្នាំ 2045 ប៉ុន្តែ ដំណាក់កាលដំបូងនៃគម្រោងនេះគឺការអភិវឌ្ឍយានដែលអាចហោះឡើង និងចុះចតដោយត្រង់ ដំណើរការដោយពឹងលើរ៉ុក្កែត។

នៅក្នុងឆ្នាំ 2020 កន្លងទៅ ប្រទេសចិន ក៏បានប្រកាសថា បានទទួលជោគជ័យក្នុងការសាកល្បងយន្តហោះអវកាសមួយផ្សេងទៀត ដែលរុញច្រានដោយរ៉ុក្កែត និងបានហោះទៅក្នុងគន្លងតារាវិថីរយៈពេល 2 ថ្ងៃ ហើយក្រោយមកក៏បានត្រលប់មកកាន់ផែនដី។ យន្តហោះអវកាសនេះ ត្រូវបានគេយល់ឃើញថា មានចំណុចច្រើនដែលដូចទៅនឹង X-37B ជាយន្តហោះស្វ័យប្រវត្តិដែលហោះជុំវិញគន្លងគោចរផែនដី របស់ទ័ពអាកាស សហរដ្ឋអាមេរិក៕

ប្រភព៖ SCMP
ប្រែសម្រួល៖ បុត្រា

July 20, 2021

យាន Blue Origin របស់មហាសេដ្ឋី Jeff Bezos នឹងដឹកមនុស្សទៅកាន់ទីអវកាស នាថ្ងៃនេះ

សហរដ្ឋអាមេរិក៖ Blue Origin ដែលជាក្រុមហ៊ុនអវកាសរបស់មហាសេដ្ឋី Jeff Bezos បានត្រៀមខ្លួនរួចរាល់ សម្រាប់ដំណើរហោះហើរដឹកមនុស្សដំបូងរបស់ខ្លួន ទៅកាន់ទីអវកាស បន្ទាប់ពីបានវាយតម្លៃលើកចុងក្រោយ។

Jeff Bezos និងអតិថិជនចំនួន 3 នាក់ផ្សេងទៀត នឹងហោះទៅកាន់ទីអវកាសក្បែរគន្លងតារាវិថីផែនដី តាមរយៈយាន New Shepard របស់ក្រុមហ៊ុន Blue Origin។ បេសកកម្មនេះ នឹងត្រូវធ្វើឡើងនៅវេលាម៉ោង 20 នៃថ្ងៃទី 20 កក្កដា ឆ្នាំ 2021 (ម៉ោងនៅភ្នំពេញ) ដែលត្រូវនឹងខួបទី 52 ឆ្នាំ ដែលយានអវកាស Apollo 11 បានចុះចតលើឋានព្រះចន្ទ។ លទ្ធផលនៃការវាយតម្លៃថ្មីៗនេះ បានបង្ហាញថា ពុំមានបញ្ហាអ្វីដែលអាចប្ដូរផ្លាស់កាលបរិច្ឆេទនៃការហោះហើរនេះនោះទេ រួមទាំងកត្តាអាកាសធាតុ។

New Shepard ជាយានអាចប្រើប្រាស់ឡើងវិញ ដែលមានការរួមផ្សំរវាងរ៉ុក្កែត និងបន្ទប់សម្រាប់អ្នកអវកាស ត្រូវបានរចនាឡើងដើម្បីដឹកមនុស្ស និងទំនិញ ទៅកាន់ទីអវកាសក្បែរគន្លងតារាវិថិផែនដី។ កន្លងមក យាន New Shepard ផ្សេងគ្នាចំនួន 4 បានហោះហើរសាកល្បងចំនួន 15 ជើងរួចមកហើយ ប៉ុន្តែថ្ងៃនេះគឺជាលើកដំបូងដែលយានត្រូវដឹកមនុស្ស។

ក្រុមអវកាសចរដែលហោះហើរទៅកាន់ទីអវកាសនាថ្ងៃនេះ រួមមាន មហាសេដ្ឋី Jeff Bezos ដែលជាស្ថាបនិករបស់ Blue Origin, ប្អូនប្រុសរបស់លោក Jeff Bezos គឺលោក Mark Bezos, អ្នកបើកបរវ័យ 82 ឆ្នាំ អ្នកស្រី Wally Funk និងនិស្សិតវ័យ 18 ឆ្នាំ Oliver Daemen ជាភ្ញៀវដែលបានទិញសំបុត្រដំបូងគេរបស់ក្រុមហ៊ុន។

«យើងបានត្រួតពិនិត្យរាល់ប្រព័ន្ធរបស់យាន រួមមានផ្នែកទន់ ផ្នែករឹង ពេលវេលា និងកម្រិតនៃការត្រៀមខ្លួនរបស់ក្រុមអ្នកអវកាស» Steve Lanius នាយកផ្នែកហោះហើររបស់ Blue Origin បាននិយាយកាលពីថ្ងៃទី 18 កក្កដា។

លោក Jeff Bezos នឹងក្លាយជាមហាសេដ្ឋីទីពីរ ដែលហោះទៅកាន់ទីអវកាស នៅក្នុងអំឡុងពេលមិនដល់ 2 សប្ដាហ៍ចុងក្រោយនេះ។ កាលពីថ្ងៃទី 11 កក្កដា ស្ថាបនិកក្រុមហ៊ុន Virgin Group គឺមហាសេដ្ឋី Richard Branson បានហោះទៅកាន់ព្រំដែនរវាងបរិយាកាសផែនដី និងអវកាស នៅក្នុងជើងហោះហើរដឹកភ្ញៀវដំបូងរបស់យន្តហោះ VSS Unity ដែលអភិវឌ្ឍដោយក្រុមហ៊ុន Virgin Galactic។ Virgin Galactic និង Blue Origin គឺជាគូប្រជែងសំខាន់នៅក្នុងវិស័យទេសចរណ៍អវកាសក្បែរគន្លងគោចរផែនដី។

យន្តហោះ VSS Unity អាចចាប់ផ្ដើមដំណើរការសកម្មភាពពាណិជ្ជកម្មរបស់ខ្លួន នៅដើមឆ្នាំក្រោយ បើសិនជាការហោះហើរសាកល្បងមួយចំនួននាពេលខាងមុខ ដំណើរការដោយរលូន។ ចំណែក Blue Origin ក៏កំពុងតែមានគម្រោងដឹកអ្នកដំណើរច្រើនរូបទៅកាន់ទីអវកាស នៅក្នុងអំឡុងពេល ចាប់ពីខែកញ្ញា ដល់ខែតុលា ឆ្នាំ 2021៕

ប្រភព៖ Space
ប្រែសម្រួល៖ បុត្រា

July 20, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 19 ខែកក្កដា ឆ្នាំ 2021

ក្រសួងសុខាភិបាល បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 790 នាក់, អ្នកជាចំនួន 1,087 នាក់ និងអ្នកស្លាប់ចំនួន 22 នាក់បន្ថែមទៀត នៅក្នុងថ្ងៃទី 18 ខែកក្កដា ឆ្នាំ 2021។

គិតត្រឹមព្រឹក ថ្ងៃទី 19 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 67,971 នាក់ ក្នុងនោះមាន អ្នកជាសះស្បើយ 60,017 នាក់ និង អ្នកស្លាប់ 1,128 នាក់ ខណៈអ្នកជំងឺកំពុងព្យាបាល មានចំនួនប្រហែល 7,000។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 191,229,700 នាក់ ត្រូវបានរកឃើញ ក្នុងនោះមានជាង 174,181,900 នាក់ បានជា, ជាង 4,105,820 នាក់ បានស្លាប់ និងជាង 12,941,970 នាក់ កំពុងព្យាបាល។

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 19, 2021

ពលរដ្ឋថៃរាប់ពាន់នាក់ ធ្វើបាតុកម្ម ក្នុងគ្រា COVID-19 កំពុងឆ្លងរាលដាលខ្លាំង

ប្រជាជនថៃ ជាង 1,000 នាក់ កាលពីថ្ងៃទី 18 កក្កដា បាននាំគ្នាចេញធ្វើបាតុកម្ម ស្នើឱ្យនាយករដ្ឋមន្ត្រី ចុះចេញពីតំណែង នៅពេលរលក COVID-19 កំពុងតែវាយប្រហារប្រទេសនេះយ៉ាងធ្ងន់ធ្ងរ។

សមត្ថកិច្ច ត្រូវប្រើប្រាស់ផ្សែងបង្ហូរទឹកភ្នែក រថយន្តបាញ់ទឹក និងគ្រាប់កាំភ្លើងជ័រ ដើម្បីរំសាយក្រុមបាតុករ ដែលហែក្បួនទៅកាន់ការិយាល័យនាយករដ្ឋមន្ត្រី Prayuth Chan-ocha។ បាតុករជាច្រើន ថែមទាំងនាំយកថង់ដាក់សាកសពក្លែងក្លាយទៅជាមួយ ដើម្បីជាតំណាងឱ្យអ្នកស្លាប់ដោយសារ COVID-19។ ក្រុមបាតុករ បានទម្លាក់កំហុសលើរដ្ឋាភិបាលរបស់លោក Pryuth ដែលធ្វើការមិនបានល្អក្នុងការប្រយុទ្ធប្រឆាំងនឹង COVID-19 បណ្ដាលឱ្យមានការឆ្លងរាលដាលខ្លាំង។

បាតុករម្នាក់ ឈ្មោះ Kanyaporn Veeratat វ័យ 34 ឆ្នាំ បានឱ្យដឹងថា «រដ្ឋាភិបាល គ្រប់គ្រងស្ថានការណ៍មិនបានល្អ ហើយបើសិនជាយើងមិនធ្វើអ្វីសោះ នោះនឹងមិនមានការប្ដូរផ្លាស់ណាមួយឡើយ»។

ក្រុមប៉ូលិស ក៏បានចាត់វិធានការក្ដៅ បន្ទាប់ពីបាតុករមួយចំនួន ព្យាយាមដោះរបងបន្លាលួស ដែលសមត្ថកិច្ចដាក់ពង្រាយដើម្បីបិទផ្លូវពីរូបសំណាកប្រជាធិបតេយ្យ ទៅកាន់វិមានរដ្ឋាភិបាល ជាកន្លែងធ្វើការរបស់នាយករដ្ឋមន្ត្រី។

ប៉ូលិស បានស្នើពលរដ្ឋ កុំចូលរួមធ្វើបាតុកម្ម ក្នុងបំណងទប់ស្កាត់ការឆ្លងរាលដាលកាន់តែខ្លាំង នៃវីរូស COVID-19 ព្រមទាំងបានព្រមានថា នឹងដាក់ទោសជនទាំងឡាយណាដែលបង្កចលាច័លទៀតផង។

គិតមកដល់បច្ចុប្បន្ន ប្រទេសថៃ បានរកឃើញអ្នកវិជ្ជមាននឹង COVID-19 សរុបចំនួន 415,170 នាក់ ក្នុងនោះមាន 3,422 នាក់បានស្លាប់, 289,651 នាក់បានជា និង 122,097 នាក់កំពុងព្យាបាល។

រាជធានី បាងកក និងខេត្តចំនួន 12 ផ្សេងទៀតរបស់ប្រទេសថៃ បានរឹតបន្តឹងវិធានការទប់ទល់នឹង COVID-19 ក្នុងនោះក៏មានការកាត់បន្ថយការធ្វើដំណើរ បិទមជ្ឈមណ្ឌលពាណិជ្ជកម្ម និងបម្រាមគោចរពេលយប់ផងដែរ៕

ប្រភព៖ Reuters
ប្រែសម្រួល៖ បុត្រា

July 19, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 17 ខែកក្កដា ឆ្នាំ 2021

ក្រសួងសុខាភិបាល បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 836 នាក់, អ្នកជាចំនួន 928 នាក់ និងអ្នកស្លាប់ចំនួន 24 នាក់បន្ថែមទៀត នៅក្នុងថ្ងៃទី 16 ខែកក្កដា ឆ្នាំ 2021។

គិតត្រឹមព្រឹក ថ្ងៃទី 17 ខែកក្កដា ឆ្នាំ 2021 កម្ពុជា មានអ្នកឆ្លងសរុប 66,336 នាក់ ក្នុងនោះមាន អ្នកជាសះស្បើយ 57,955 នាក់ និង អ្នកស្លាប់ 1,076 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 190,310,300 នាក់ ត្រូវបានរកឃើញ ក្នុងនោះមានជាង 173,509,970 នាក់ បានជា, ជាង 4,092,030 នាក់ បានស្លាប់ និងជាង 12,708,360 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 17, 2021

តួលេខអ្នកឆ្លង COVID-19 នៅ វៀតណាម កំពុងកើនឡើងយ៉ាងឆាប់រហ័ស

នាព្រឹកថ្ងៃទី 17 កក្កដា នេះ ក្រសួងសុខាភិបាល វៀតណាម បានឱ្យដឹងថា អ្នកផ្ទុកវីរុស COVID-19 ចំនួន 2,106 នាក់ ក្នុងនោះមាន 2,105 នាក់ ជាករណីឆ្លងក្នុងស្រុក ត្រូវបានរកឃើញ កាលពីម្សិលមិញ។

តួលេខអ្នកវិជ្ជមានថ្មីដែលត្រូវបានប្រកាសនៅព្រឹកនេះ ច្រើនជាងជិតទ្វេដង ធៀបនឹងថ្ងៃម្សិលមិញ ដែលមានតែជាង 1,438 នាក់។

ក្នុងចំណោមអ្នកវិជ្ជមានថ្មីខាងលើ មាន 1,769 នាក់ នៅទីក្រុង ហូជីមិញ, 124 នាក់ នៅខេត្ត ប៊ិញហ្សឿង ខណៈ 2 ករណីនៅរដ្ឋធានី ហាណូយ។ល។

ករណីឆ្លងថ្មីនេះ ធ្វើឱ្យតួលេខសរុបនៃអ្នកវិជ្ជមាន នៅទីក្រុង ហូជីមិញ កើនឡើងដល់ 25,682 នាក់ ខណៈ រដ្ឋធានី ហាណូយ កើនដល់ 572 នាក់។

មកដល់ព្រឹកនេះ វៀតណាម បានរកឃើញអ្នកវិជ្ជមាននឹង COVID-19 សរុប ចំនួនជាង 42,600 នាក់។ ខេត្តចំនួន 58 ក្នុងចំណោមខេត្តទាំង 63 របស់ប្រទេសនេះ ត្រូវបានរកឃើញថា មានករណីឆ្លងវីរុស៕

ប្រភព៖ ក្រសួងសុខាភិបាលវៀតណាម
ប្រែសម្រួល៖ បុត្រា

July 17, 2021

រុស្ស៊ី គ្រោងសាងសង់រោងចក្រអគ្គិសនីនុយក្លេអែរ នៅលើភពអង្គារ

ទីភ្នាក់ងារអវកាស រុស្ស៊ី (Roscosmos) ដាក់សំណើសាងសង់រោងចក្រអគ្គិសនី ដើរដោយថាមពលនុយក្លេអែរ នៅលើពិភពព្រះអង្គារ ក្នុងកិច្ចខិតខំ ដើម្បីប្រកួតប្រជែងនៅទីអវកាស ជាមួយនឹង សហរដ្ឋអាមេរិក និង ចិន។

ការសាងសង់រោងចក្រអគ្គិសនីនុយក្លេអែរ នៅលើភពព្រះអង្គារនេះ ត្រូវបានស្នើឡើងដោយសាខាមួយរបស់ Roscosmos គឺការិយាល័យ Arsenal មានជំនាញខាងផលិតយានអវកាស ផ្កាយរណប និងឧបករណ៍បច្ចេកវិទ្យាដទៃទៀត ដែលមានទីស្នាក់ការកណ្ដាលនៅតំបន់ St. Petersburg។ នេះបើតាមទីភ្នាក់ងារសារព័ត៌មានរុស្ស៊ី Sputnik។

ក្រុមវិស្វាកររបស់ Arsenal បង្ហើបឱ្យដឹងថា រោងចក្រនេះ នឹងត្រូវបាននាំទៅកាន់ភពអង្គារ តាមរយៈ Zeus ជាយានអូសអវកាស ដើរដោយនុយក្លេអែរ ដែលគ្រោងនឹងចាប់ផ្ដើមហោះហើរសាកល្បងនៅឆ្នាំ 2030។

ក្រោយពីត្រូវបានដំឡើង រោងចក្រនេះនឹងត្រូវដំណើរការ ដើម្បីផ្គត់ផ្គង់ថាមពលអគ្គិសនី ដល់មូលដ្ឋានរបស់រុស្ស៊ី ដែលស្ថិតនៅលើដីភពអង្គារ។

សារព័ត៌មាន Sputnik សង្កត់ធ្ងន់ថា «យោងតាមសំណើរបស់ Arsenal រោងចក្រនុយក្លេអែរ នេះ នឹងត្រូវបានបញ្ជូនទៅកាន់ភពក្រហម ដោយយានអវកាស Zeus ហើយត្រូវទម្លាក់ចុះទៅកាន់ភពនេះដោយប្រព័ន្ធឆត្រយោង។ ក្រោយពីត្រូវបានដំឡើង រោងចក្រនេះនឹងត្រូវដំណើរការ ដើម្បីផ្គត់ផ្គង់ថាមពលអគ្គិសនី ដល់មូលដ្ឋានរបស់រុស្ស៊ី ដែលស្ថិតនៅលើដីភពអង្គារ។

នាយកប្រតិបត្តិនៃកម្មវិធីអភិវឌ្ឍបច្ចេកវិទ្យា និងវិទ្យាសាស្ត្រប្រចាំ Roscosmos លោក Alexander Bloshenko ឱ្យដឹងថា ពួកគេក៏មានផែនការនាំយកយានអវកាស Zeus ទៅកាន់ឋានព្រះចន្ទ ភពព្រហស្បតិ៍ និងភពសុក្រផងដែរ។

បើទោះជាត្រូវបានកត់ត្រាថា មានផ្កាយរណប មនុស្ស ស្ថានីយអវកាស ការចុះចតលើឋានព្រះចន្ទ និងភពអង្គារដំបូងគេក្នុងពិភពលោក ប៉ុន្តែ រុស្ស៊ី ចំណាយប្រាក់ត្រឹមតែ 3.58 ពាន់លានដុល្លារប៉ុណ្ណោះ សម្រាប់កម្មវិធីអវកាស នៅក្នុងឆ្នាំ 2020។ តួលេខនេះ ច្រើនជាង ជប៉ុន (260 លានដុល្លារ) ប៉ុន្តែ តិចជាងឆ្ងាយ បើធៀបនឹង បារាំង (4.04 ពាន់លានដុល្លារ) ចិន (8.85 ពាន់លានដុល្លារ) និង សហរដ្ឋអាមេរិក (47.69 ពាន់លានដុល្លារ) ក្នុងដំណាក់កាលដូចគ្នា៕

ប្រភព៖ Sputnik, Sun
ប្រែសម្រួល៖ បុត្រា

July 16, 2021

Category: អន្តរជាតិ