អន្តរជាតិ - La Reine Media

ប្រទេសចិន៖ ទីក្រុងជាច្រើនប្រកាសអាសន្ន «កម្រិតក្រហម» ដោយសារជំនន់ទឹកភ្លៀង (វីដេអូ)

ទីក្រុងចំនួន 5 នៅក្នុងខេត្ត Hubei កំពុងប្រកាសអាសន្នកម្រិតខ្ពស់បំផុត បន្ទាប់ពីភ្លៀងធ្លាក់ខ្លាំង ដែលបានសម្លាប់មនុស្សចំនួន 21 នាក់ និងធ្វើឱ្យប្រជាជនជិត 6,000 នាក់ ត្រូវរត់ទៅកាន់ទីសុវត្ថិភាព។

សារព័ត៌មានរដ្ឋចិន បានចេញផ្សាយថា កម្រិតផ្ទៃទឹកនៅក្នុងបឹងចំនួន 774 កន្លែង ក្នុងខេត្ត Hubei ភាគកណ្ដាលប្រទេសនេះ បានឡើងផុតកម្រិតប្រកាសអាសន្នតាំងតែពីយប់ម្សិលមិញ ក្នុងគ្រាដែលភ្លៀងធំបានធ្វើឱ្យដាច់ចរន្តអគ្គិសនីទ្រង់ទ្រាយធំ បណ្ដាលឱ្យផ្ទះជាង 3,600 ខ្នងត្រូវខូចខាត និងបំផ្លាញដីកសិកម្មជាង 8,110 ហិកតា។

អង្គភាពប្រតិកម្មរហ័សរបស់ខេត្ត Hubei បានឱ្យដឹងថា ការខាតបង់គិតជាទឹកប្រាក់ អាចឡើងដល់ 16.7 លានដុល្លារអាមេរិក។ ទីក្រុងចំនួន 5 របស់ខេត្តនេះ បានប្រកាសអាសន្នកម្រិតក្រហម បន្ទាប់ពីជំនន់ទឹកភ្លៀងបានសម្លាប់មនុស្សអស់ 21 នាក់ នៅក្នុងទីក្រុង Suizhou ភាគខាងជើងនៃខេត្ត Hubei។

ក្រសួងគ្រប់គ្រងគ្រាអាសន្នរបស់ចិន បានប្រកាសថា កម្លាំងជួយសង្គ្រោះបន្ទាន់ កំពុងត្រូវបានត្រូវបានបញ្ជូនទៅកាន់តំបន់ដែលរងគ្រោះធ្ងន់ធ្ងរបំផុត រួមមាន ទីក្រុង Suizhou, Xiangyang និង Xiaogan។

នាយកដ្ឋានគ្រប់គ្រងអាកាសធាតុចិន បានព្រមានថា ភ្លៀងធំនឹងអូសបន្លាយរហូតដល់សប្ដាហ៍ក្រោយ បង្កជាទឹកជំនន់នៅក្នុងតំបន់ដែលស្ថិតនៅតាមបណ្ដោយទន្លេ Yangtze។ ក្រុមមន្ត្រីក៏បានព្រមានថា តំបន់ដែលនឹងជួបគ្រោះថ្នាក់ រួមមាន ខេត្ត Hubei, Henan, Anhui, Sichuan, Guizhou និងខេត្ត Zhejiang។

ក្រុមមន្ត្រីចិន កាលពីសប្ដាហ៍មុន បានឱ្យដឹងថា មនុស្សចំនួន 440,000 នាក់ បានរងផលប៉ះពាល់ដោយសារជំនន់ទឹកភ្លៀង នៅក្នុងទីក្រុងចំនួន 6 នៃខេត្ត Sichuan ក្នុងនោះមានពលរដ្ឋចំនួន 80,000 នាក់ត្រូវជម្លៀសចេញពីតំបន់គ្រោះថ្នាក់។ គ្រោះជំនន់ទឹកភ្លៀងនៅក្នុងខេត្តនេះ បានបណ្ដាលឱ្យខាតបង់ជាទឹកប្រាក់ជាង 38 លានដុល្លារអាមេរិក ខណៈផ្ទះចំនួន 45 ខ្នងត្រូវខូចទាំងស្រុង និងគម្រោងហេដ្ឋារចនាសម្ព័ន្ធចំនួន 118 កន្លែង ត្រូវខូចខាតធ្ងន់ធ្ងរ។

ខេត្ត Henan ភាគខាងត្បូងប្រទេសចិន កាលពីចុងខែមុន ក៏បានទទួលរងគ្រោះជំនន់ទឹកភ្លៀងដ៏ធ្ងន់ធ្ងរបំផុតក្នុងប្រវត្តិសាស្ត្រ ដោយភ្លៀងមួយថ្ងៃ ជិតស្មើនឹងភ្លៀងក្នុងរយៈពេលមួយឆ្នាំ។ គ្រោះធម្មជាតិនេះ បានសម្លាប់មនុស្សជាង 300 នាក់ ដែលភាគច្រើននៅក្នុងខេត្ត Zhengzhou៕

August 13, 2021

យុទ្ធនារី កូរ៉េខាងត្បូង ធ្វើអត្តឃាត ក្នុងគ្រាដែលករណីបៀតបៀនផ្លូវភេទលើរូបនាង កំពុងត្រូវបានស៊ើបអង្កេត

នារីជាទាហានម្នាក់ដែលមានឋានន្តរស័ក្ដិជានាយទោ របស់កងទ័ពជើងទឹក កូរ៉េខាងត្បូង ត្រូវបានប្រទះឃើញថា បានស្លាប់ដោយសារការធ្វើអត្តឃាត នៅពេលការស៊ើបអង្កេតពាក់ព័ន្ធនឹងករណីដែលនាងត្រូវមិត្តរួមការងារបៀតបៀនផ្លូវភេទ កំពុងត្រូវបានធ្វើឡើង។

យុទ្ធនារីដែលមិនត្រូវបានគេឱ្យដឹងអត្តសញ្ញាណនេះ ត្រូវបានប្រទះឃើញថា បានស្លាប់កាលពីថ្ងៃទី 12 សីហា ឆ្នាំ 2021 ប៉ុន្មានថ្ងៃប៉ុណ្ណោះ បន្ទាប់ពីនាងបានរាយការណ៍អំពីករណីដែលនាងត្រូវបានបុរសជាមិត្តរួមការងារ បានបៀតបៀនផ្លូវភេទតាំងពីខែឧសភា។ រដ្ឋមន្ត្រីការពារជាតិ កូរ៉េខាងត្បូង Suh Wook ថ្ងៃនេះ (13 សីហា) បានទទួលស្គាល់អំពីព័ត៌មាននេះ និងបានធ្វើការសុំទោសអំពីហេតុការណ៍ដែលបានកើតឡើង។ រដ្ឋមន្ត្រីរូបនេះ បន្ថែមថា៖ «យើងនឹងបង្កើតក្រុមពិសេសមួយដើម្បីស៊ើបអង្កេតឱ្យបានល្អិតល្អន់ ដើម្បីមិនឱ្យមានបញ្ហាមន្ទិលណាមួយកើតឡើង»។

ខុទ្ទកាល័យប្រធានាធិបតិ កូរ៉េខាងត្បូង ក្នុងថ្ងៃដដែលក៏បានឱ្យដឹងថា ប្រធានាធិបតី Moon Jae-in ខឹងយ៉ាងខ្លាំងនៅពេលទទួលបានដំណឹងស្ដីពីការស្លាប់របស់យុទ្ធនារីរូបនេះ និងបានស្នើឱ្យកងទ័ពបើកការស៊ើបអង្កេតឱ្យបានម៉ត់ចត់ជាទីបំផុត ព្រមទាំងបានផ្ញើសារចូលរួមរំលែកទុក្ខជាមួយនឹងគ្រួសារសពផងដែរ។

គួររំលឹកថា មុននេះ កាលពីខែមិថុនា សាធារណជននៅ កូរ៉េខាងត្បូង ក៏ធ្លាប់ខឹងសម្បារនឹងករណីស្រដៀងគ្នានេះដែរ នៅពេលយុទ្ធនារីជាពលបាលទោម្នាក់នៃកងទ័ពអាកាស កូរ៉េខាងត្បូង បានធ្វើអត្តឃាត ក្រោយពីត្រូវមិត្តរួមការងារបៀតបៀនកេរ្ដិ៍ខ្មាស ប៉ុន្តែមិនត្រូវបានថ្នាក់លើជួយដោះស្រាយ។ មេបញ្ជាការកងទ័ពអាកាសរបស់ កូរ៉េខាងត្បូង លោក Lee Seong-yong បានទទួលខុសត្រូវលើករណីនេះ និងបានលាលែងពីតំណែង បន្ទាប់ពីហេតុការណ៍បានកើតឡើង។

ព័ត៌មានទាក់ទងនឹងបញ្ហាបៀតបៀនផ្លូវភេទនានា បានកើតមានឡើងបន្តបន្ទាប់ក្នុងរយៈពេលខ្លី នាំឱ្យកងទ័ព កូរ៉េខាងត្បូង ត្រូវរងការរិះគន់ពីសំណាក់ប្រជាជន ដោយសារតែមិនអាចទប់ស្កាត់បាននូវអំពើបំពារបំពានផ្លូវភេទនៅក្នុងជួរកងទ័ព៕

August 13, 2021

អាមេរិក និង អង់គ្លេស បញ្ជូនទាហានរាប់ពាន់នាក់ទៅកាន់ អាហ្វហ្គានីស្ថាន ក្នុងពេល តាលីបង់ វាយលុកជិតដល់រដ្ឋធានី

កាលពីថ្ងៃទី 12 សីហា ក្រសួងការពារជាតិ សហរដ្ឋអាមេរិក ប្រកាសថា មន្ទីរបញ្ចកោណ នឹងបញ្ជូនទាហានប្រមាណ 3,000 នាក់ ទៅកាន់ អាហ្វហ្គានីស្ថាន ដើម្បីជួយដល់ការជម្លៀសបុគ្គលិកការទូត និងពលរដ្ឋអាមេរិកាំង ចេញពីប្រទេសនេះ។

អ្នកនាំពាក្យក្រសួងការពារជាតិអាមេរិក John Kirby បានឱ្យដឹងថា ទាហាន 3,000 នាក់នេះ នឹងត្រូវបញ្ជូនទៅកាន់ព្រលានយន្តហោះអន្តរជាតិ Hamid Karzai នៅរដ្ឋធានី កាប៊ុល នាពេលឆាប់ៗនេះ។ ក្រៅពីនេះ ទាហានបម្រុងប្រមាណពី 3,500-4,000 នាក់ផ្សេងទៀត នឹងត្រូវដាក់ពង្រាយនៅប្រទេស គុយវ៉ែត។

មុននេះ ក្រសួងការបរទេស អាមេរិក បានចេញបញ្ជាឱ្យជម្លៀសបុគ្គលិកការទូតរបស់ខ្លួន ចេញពី អាហ្វហ្គានីស្ថាន ជាបន្ទាន់ ដោយសារស្ថានភាពសន្តិសុខកាន់តែច្របូកច្របល់ ខណៈក្រុម តាលីបង់ វាយលុកជិតដល់រដ្ឋធានី។

សារព័ត៌មាន CNN បានឱ្យដឹងថា រដ្ឋមន្ត្រីការពារជាតិ សហរដ្ឋអាមេរិក Lloyd Austin និងរដ្ឋមន្ត្រីការបរទេស Antony Blinken កាលពីថ្ងៃទី 12 សីហា បានអះអាងជាមួយប្រធានាធិបតី អាហ្វហ្គានីស្ថាន Ashraf Ghani ថា «សហរដ្ឋអាមេរិក នៅតែសន្យាការពារសន្តិសុខ និងស្ថិរភាពរបស់ អាហ្វហ្គានីស្ថាន ក្នុងគ្រាដែល តាលីបង់ ប្រើអំពើហិង្សាខ្លាំងកាន់តែខ្លាំង»។

ចំណែករដ្ឋមន្ត្រីការពារជាតិ និងរដ្ឋមន្ត្រីការបរទេស អង់គ្លេស កាលពីម្សិលមិញក៏បានប្រកាសថា នឹងបញ្ជូនទាហានប្រមាណ 600 នាក់ ទៅ កាន់អាហ្វហ្គានីស្ថាន ផងដែរ ដើម្បីជួយជម្លៀសពលរដ្ឋរបស់ខ្លួនចេញពីប្រទេសនេះ។

សកម្មភាពខាងលើ ត្រូវបានធ្វើឡើង ក្រោយពីក្រុមប្រដាប់អាវុធនៃចលនាអ៊ីស្លាម តាលីបង់ ដណ្ដើមបានទីក្រុងធំចំនួនពីររបស់ អាហ្វហ្គានីស្ថាន និងដាក់រដ្ឋធានី កាប៊ុល ឱ្យនៅឯកោ។

ក្រុមប្រដាប់អាវុធ តាលីបង់ កំពុងគ្រប់គ្រងទីក្រុង Ghanzi

សារព័ត៌មានសហរដ្ឋអាមេរិក CNN និងទូរទស្សន៍រុស្ស៊ី RT បានរាយការណ៍ថា កងកម្លាំង តាលីបង់ បន្តវាយសង្គ្រុបនៅលើសមរភូមិ នៅពេលដណ្ដើមបានទីក្រុង Herat និង Ghazni ពីកងទ័ពរដ្ឋាភិបាល អាហ្វហ្គានីស្ថាន។

ដូច្នេះ ចាប់តាំងពី សហរដ្ឋអាមេរិក និង កងទ័ពសម្ព័ន្ធមិត្ត ចាប់ផ្ដើមដកកម្លាំងចេញពី អាហ្វហ្គានីស្ថាន កាលពីខែឧសភា មកដល់បច្ចុប្បន្ន កងកម្លាំង តាលីបង់ ក៏វាយយកបានខេត្ត និងក្រុងធំៗចំនួន 11 និងដណ្ដើមបានទឹកដីជិត 2/3 នៃប្រទេសនេះ។

បេសកជនពិសេសរបស់ អាមេរិក ចិន និងប្រទេសមួយចំនួនទៀត កាលពីថ្ងៃទី 12 សីហា ក៏បានអំពាវនាវឱ្យបង្កើតសន្តិភាពនៅ អាហ្វហ្គានីស្ថាន និងបញ្ឈប់រាល់ការវាយប្រហារសំដៅទីក្រុងទាំងឡាយរបស់ប្រទេសនេះ បន្ទាប់ពីមានកិច្ចពិភាក្សាមួយនៅប្រទេស កាតា ស្ដីពីស្ថានការណ៍នៅ អាហ្វហ្គានីស្ថាន។

ប្រកាសខាងលើបានបញ្ជាក់ជាថ្មីថា បណ្ដាប្រទេស នឹងមិនទទួលស្គាល់រដ្ឋាភិបាលណាទាំងអស់នៅ អាហ្វហ្គានីស្ថាន ដែលឡើងកាន់អំណាច «តាមរយៈការប្រើប្រាស់កម្លាំងទ័ព»។

ក្រុមចារកម្មរបស់ សហរដ្ឋអាមេរិក បានព្យាករថា កងកម្លាំងប្រដាប់អាវុធ តាលីបង់ អាចវាយដណ្ដើមយកបានរដ្ឋធានី កាប៊ុល ក្នុងរយៈពេល 3 ខែទៀត៕

August 13, 2021

ម៉ាឡេស៊ី អំពាវនាវដល់ស្ត្រីមានផ្ទៃពោះ ទៅទទួលការចាក់វ៉ាក់សាំង COVID-19

ក្នុងកាលៈទេសៈដែលតួលេខនៃស្ត្រីមានផ្ទៃពោះស្លាប់ដោយសារ COVID-19 ចេះតែកើនឡើង ក្រសួងសុខាភិបាលប្រទេស ម៉ាឡេស៊ី បានអំពាវនាវដល់ក្រុមគោលដៅនេះ ទៅទទួលការចាក់វ៉ាក់សាំង ដើម្បីការពារអាយុជីវិតផ្ទាល់ខ្លួន និងកូនក្នុងផ្ទៃ។

វេជ្ជបណ្ឌិត Noor Hisham Abdullah ដែលជាមន្ត្រីជាន់ខ្ពស់នៃក្រសួងសុខាភិបាល បានឱ្យដឹងថា ស្ត្រីមានផ្ទៃពោះប្រមាណជា 40% បានចុះឈ្មោះចាក់វ៉ាក់សាំងតាមរយៈកម្មវិធីទូរស័ព្ទ MySejahtera។ លោក Noor សង្កត់ធ្ងន់ថា អត្រានេះ នៅតែទាប ដូច្នេះ ស្ត្រីមានផ្ទៃពោះជាច្រើននៅតែមានហានិភ័យឆ្លង COVID-19។

លោក Noor ក៏បានស្នើឱ្យស្ត្រីមានផ្ទៃពោះ ទៅចាក់វ៉ាក់សាំងឱ្យបានរួចរាល់ មុនពេលឈាមចូលដល់ដំណាក់កាលចុងក្រោយនៃវដ្ដរបស់គភ៌។

ចាប់តាំងពីការផ្ទុះឆ្លងរាលដាលរបស់ COVID-19 ប្រទេសម៉ាឡេស៊ី មានស្ត្រីពពោះចំនួន 70 នាក់ បានស្លាប់ដោយសារឆ្លងវីរុសនេះ។ ក្នុងនោះមាន 17 នាក់ បានស្លាប់នៅក្នុងខែមិថុនា ហើយក្នុងនោះក៏មាន 15 ករណីមិនទាន់បានចាក់វ៉ាក់សាំង និង 2 ករណីទើបតែបានចាក់ដូសទីមួយ។

ទិន្នន័យរបស់ក្រសួងសុខាភិបាលនៃប្រទេសម៉ាឡេស៊ី បានឱ្យដឹងថា ចាប់ពីខែមីនា ឆ្នាំ 2020 ដល់ខែមិថុនា ឆ្នាំ 2021 ស្ត្រីមានផ្ទៃពោះចំនួន 3,396 នាក់ បានឆ្លង COVID-19។

យោងតាមអង្គការសុខភាពពិភពលោក ស្ត្រីមានផ្ទៃពោះ មានហានិភ័យឆ្លង COVID-19 ធ្ងន់ធ្ងរ និងត្រូវការចូលមន្ទីរពេទ្យ ព្យាបាលទៅតាមស្ដង់ដាពិសេស ហើយអត្រានៃការប្រើប្រាស់ម៉ាស៊ីនជំនួយដង្ហើម ក៏ខ្ពស់ជាង ធៀបនឹងស្ត្រីមិនមានផ្ទៃពោះ។

នៅ សហរដ្ឋអាមេរិក ក្រុមមន្ត្រីសុខាភិបាល ក៏បានអំពាវនាវ និងជំរុញឱ្យស្ត្រីមានផ្ទៃពោះ ទៅទទួលការចាក់វ៉ាក់សាំងបង្ការ COVID-19 ដោយបញ្ជាក់ថា ទិន្នន័យនៃការស្រាវជ្រាវនានាបង្ហាញថា វ៉ាក់សាំង COVID-19 មិនធ្វើឱ្យហានិភ័យនៃបញ្ហារលូតកូន កើនឡើងនោះទេ។

Rochelle Walensky ប្រធានមជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ សហរដ្ឋអាមេរិក កាលពីថ្ងៃទី 11 សីហា បានឱ្យដឹងថា ស្ថាប័ននេះ «លើកទឹកចិត្តដល់ស្ត្រីដែលកំពុងមានផ្ទៃពោះ ស្ត្រីកំពុងគិតដល់ការមានផ្ទៃពោះ និងស្ត្រីកំពុងបំបៅដោះកូនទាំងអស់ អញ្ជើញទៅចាក់វ៉ាក់សាំង ដើម្បីការពារខ្លួនពីវីរុស COVID-19»៕

August 12, 2021

ទស្សនារបៀបដែលសាលារៀននៅ កូរ៉េខាងជើង ទប់ស្កាត់ COVID-19

សាកលវិទ្យាល័យពាណិជ្ជកម្ម Jang Chol Gu នៅរដ្ឋធានី ព្យុងយ៉ាង ប្រទេស កូរ៉េខាងជើង បាន និងកំពុងអនុវត្តវិធានការយ៉ាងតឹងរ៉ឹង ដើម្បីប្រយុទ្ធប្រឆាំងនឹង COVID-19។

ទីភ្នាក់ងារសារព័ត៌មានបារាំង AFP បានធ្វើបទយកការណ៍ខ្លីមួយ ស្ដីពីយុទ្ធនាការទប់ស្កាត់ COVID-19 នៅក្នុងសាកលវិទ្យាល័យពាណិជ្ជកម្ម Jang Chol Gu។

សាកលវិទ្យាល័យ Jang Chol Gu នារដ្ឋធានីព្យុងយ៉ាង បាន និងកំពុងតែអនុវត្តគ្រប់វិធានការ ដើម្បីប្រយុទ្ធប្រឆាំង និងទប់ស្កាត់ការឆ្លងរាលដាលរបស់វីរុស COVID-19។

https://www.youtube.com/watch?v=tJzWPnGRMWo

ចំនួនអ្នកឆ្លង COVID-19 នៅទូទាំងពិភពលោក បានកើនឡើងដល់ជាង 200 លាននាក់ ក្នុងនោះមានអ្នកស្លាប់ជាង 4 លាននាក់។ An Jong Choi ជាអ្នកត្រួតពិនិត្យលើការបាញ់ថ្នាំសម្លាប់វីរុសនៅក្នុងសាលាសាកលវិទ្យាល័យ Jang Chol Gu បាននិយាយថា៖ «ក្នុងគ្រានេះ ខ្ញុំគិតថា ការគំរាមកំហែងធំបំផុត នោះគឺការមើលស្រាលបញ្ហា ការមិនយកចិត្តទុកដាក់ ភាពធូររលុងនៅក្នុងយុទ្ធនាការប្រឆាំងរោគរាតត្បាត»។

និស្សិតដែលសិក្សានៅសាកលវិទ្យាល័យនេះ សុទ្ធតែគាំទ្រ និងអនុវត្តតាមវិធានការទប់ស្កាត់ COVID-19 របស់សាលា។ និស្សិតម្នាក់ឈ្មោះ Cha Jin Myong បានប្រាប់ AFP ថា៖ «យើងគ្រប់គ្នាសុទ្ធតែត្រូវយល់ច្បាស់អំពីសារប្រយោជន៍នៃការវាស់កំដៅរាងកាយ ការលាងសម្អាតដៃ និងការចូលរួមធ្វើយុទ្ធនាការទប់ស្កាត់វីរុស»។

គិតមកដល់បច្ចុប្បន្ន ប្រទេសកូរ៉េខាងជើង មិនទាន់មានករណីវិជ្ជមាននឹង COVID-19 ណាមួយ ដែលត្រូវបានរកឃើញនៅឡើយ៕

August 12, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 12 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 455 នាក់, អ្នកជាចំនួន 677 នាក់ និងអ្នកស្លាប់ចំនួន 20 នាក់បន្ថែមទៀត នៅក្នុងថ្ងៃទី 11 ខែសីហា ឆ្នាំ 2021 ក្នុងនោះ ករណីឆ្លងសហគមន៍ មាន 374 នាក់ និងករណីនាំចូល មាន 81 នាក់។

គិតត្រឹមព្រឹកថ្ងៃទី 12 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 83,839 នាក់ ក្នុងនោះមានអ្នកជាសះស្បើយជាង 78,431 នាក់ និងអ្នកស្លាប់ 1,634 នាក់។

ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 12 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 81.16% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 20.52%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 53.25%។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 205,534,960 នាក់ ត្រូវបានរកឃើញ ក្នុងនោះមានជាង 184,497,820 នាក់បានជា, ជាង 4,337,520 នាក់បានស្លាប់ និងជាង 16,699,610 នាក់ កំពុងព្យាបាល៕

August 12, 2021

សហរដ្ឋអាមេរិក ជំរុញឱ្យស្ត្រីមានផ្ទៃពោះ ទៅចាក់វ៉ាក់សាំង COVID-19

ក្រុមមន្ត្រី សហរដ្ឋអាមេរិក អំពាវនាវ និងជំរុញឱ្យស្ត្រីមានផ្ទៃពោះ ទៅទទួលការចាក់វ៉ាក់សាំងបង្ការ COVID-19 ដោយបញ្ជាក់ថា ទិន្នន័យនៃការស្រាវជ្រាវនានាបង្ហាញថា វ៉ាក់សាំង COVID-19 មិនធ្វើឱ្យហានិភ័យនៃបញ្ហារលូតកូន កើនឡើងនោះទេ។

Rochelle Walensky ប្រធានមជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ សហរដ្ឋអាមេរិក កាលពីថ្ងៃទី 11 សីហា បានឱ្យដឹងថា ស្ថាប័ននេះ «លើកទឹកចិត្តដល់ស្ត្រីដែលកំពុងមានផ្ទៃពោះ ស្ត្រីកំពុងគិតដល់ការមានផ្ទៃពោះ និងស្ត្រីកំពុងបំបៅដោះកូនទាំងអស់ អញ្ជើញទៅចាក់វ៉ាក់សាំង ដើម្បីការពារខ្លួនពីវីរុស COVID-19»។

«វ៉ាក់សាំងសុទ្ធតែមានសុវត្ថិភាព និងប្រសិទ្ធភាព។ ការបង្កើនការចាក់វ៉ាក់សាំង បានក្លាយជារឿងចាំបាច់ជាងពេលណាៗទាំងអស់ នៅពេលដែលយើងកំពុងប្រឈមនឹងវ៉ារ្យ៉ង់ Delta ដែលមានលទ្ធភាពឆ្លងរាលដាលខ្ពស់ និងប៉ះពាល់ធ្ងន់ធ្ងរដល់ស្ត្រីមានផ្ទៃពោះដែលមិនបានចាក់វ៉ាក់សាំង» Walensky ថ្លែងដូច្នេះ។

ថ្មីៗនេះ ការសិក្សាស្រាវជ្រាវមួយ បានបង្ហាញថា ក្នុងចំណោមស្ត្រីមានផ្ទៃពោះ 4 នាក់ គឺមានតែ 1 នាក់ប៉ុណ្ណោះដែលបានចាក់វ៉ាក់សាំង COVID-19 យ៉ាងតិច 1 ដូស។ CDC របស់ សហរដ្ឋអាមេរិក ឱ្យដឹងថា ហានិភ័យនៃបញ្ហារលូតកូនមិនបានកើនឡើងនោះទេ ចំពោះស្ត្រីមានផ្ទៃពោះជិត 2,500 នាក់ ដែលបានចាក់វ៉ាក់សាំងប្រភេទ mRNA (Pfizer ឬ Moderna) នៅ សហរដ្ឋអាមេរិក មុនសប្ដាហ៍ទី 20 នៃវដ្ដរបស់គភ៌។

ពួកគេបានឱ្យដឹងថា អត្រានៃបញ្ហារលូតកូនចំពោះស្ត្រីដែលបានចាក់វ៉ាក់សាំង COVID-19 គឺ 13% ពោលគឺប្រហាក់ប្រហែលនឹងអត្រារលូតកូនធម្មតា (11-16%)។ «ការចាក់វ៉ាក់សាំងបង្ការ COVID-19 សម្រាប់ស្ត្រីមានផ្ទៃពោះគឺមានផលប្រយោជន៍ច្រើនជាងហានិភ័យទាំងឡាយដែលត្រូវបានគេដឹងកន្លងមក» CDC អាមេរិក សង្កត់ធ្ងន់យ៉ាងដូច្នេះ។

សហរដ្ឋអាមេរិក ដែលជាសម្បុកវីរុស COVID-19 ធំជាងគេបង្អស់ក្នុងពិភពលោក បានរកឃើញអ្នកវិជ្ជមានសរុបចំនួនជាង 37 លានករណី ចំណែកអ្នកស្លាប់ដោយសារឆ្លងវីរុសនេះ មានចំនួនជាង 635,000 ករណី។ បច្ចុប្បន្ន ប្រទេសនេះ មានអ្នកជំងឺ COVID-19 ជាង 6,414,000 កំពុងទទួលការព្យាបាល៕

August 12, 2021

WHO កំពុងពិសោធថ្នាំ 3 ប្រភេទ សម្រាប់ព្យាបាល COVID-19

អង្គការសុខភាពពិភពលោក (WHO) បានប្រកាសថា កំពុងធ្វើការពិសោធលក្ខណៈអន្តរជាតិ ចំពោះថ្នាំចំនួន 3 ប្រភេទ សម្រាប់ព្យាបាលជំងឺ COVID-19 ដើម្បីស្វែងយល់ឱ្យដឹងថា តើវាអាចជួយព្យាបាលអ្នកជំងឺបានកម្រិតណា។

ថ្នាំទាំង 3 ប្រភេទ ដែលរួមមាន artesunate, imatinib និង infliximab នេះ នឹងត្រូវបានធ្វើតេស្តលើអ្នកជំងឺ COVID-19 នៅឯមន្ទីរពេទ្យជាង 600 កន្លែង ក្នុងប្រទេសចំនួន 52។ នេះបើតាមសេចក្ដីប្រកាសកាលពីថ្ងៃទី 11 សីហា របស់ WHO។

ប្រធាន WHO លោក Tedros Adhanom Ghebreyesus បានថ្លែងថា៖ «ការស្វែងរកថ្នាំព្យាបាលដែលមានប្រសិទ្ធភាព និងងាយស្រួលប្រើប្រាស់សម្រាប់អ្នកជំងឺ COVID-19 នៅតែជាតម្រូវការសំខាន់»។

Artesunate គឺជាថ្នាំព្យាបាលជំងឺគ្រុនចាញ់ ចំណែក imatinib គឺជាថ្នាំប្រើសម្រាប់អ្នកជំងឺមហារីកមួយចំនួន ខណៈដែល infliximab វិញ គឺជាថ្នាំព្យាបាលបញ្ហាច្របូកច្របល់នៃអង់ទីករ ដូចជាជំងឺ Crohn (រលាកពោះវៀនរ៉ាំរ៉ៃ) ឬរលាកសន្លាក់រ៉ាំរ៉ៃ។

ថ្នាំចំនួន 3 ប្រភេទនេះ ត្រូវបានក្រុមអ្នកផលិតបរិច្ចាគដល់ WHO ដើម្បីធ្វើការពិសោធ និងកំពុងត្រូវបានបញ្ជូនទៅកាន់បណ្ដាមន្ទីរពេទ្យដែលបានកំណត់។

នៅទូទាំងសកលលោក បច្ចុប្បន្ន វ៉ាក់សាំងបង្ការ COVID-19 ប្រមាណ 4.54 ពាន់លានដូស ត្រូវបានចាក់ ក្នុងនោះ ជាមធ្យម វ៉ាក់សាំងចំនួន 36.66 លានដូស ត្រូវបានប្រើប្រាស់ជារៀងរាល់ថ្ងៃ។ ក្នុងចំណោមប្រជាជនសរុបនៅទូទាំងពិភពលោក មាន 30.4% ទទួលបានការចាក់វ៉ាក់សាំងយ៉ាងតិច 1 ដូស និង 15.8% បានចាក់រួចរាល់៕

August 12, 2021

ទ័ពថ្មើរជើង ឥណ្ឌូនេស៊ី លុបចោលការធ្វើតេស្តព្រហ្មចារី

មេបញ្ជាការកងទ័ព ឥណ្ឌូនេស៊ី បានប្រកាសថា ការពិនិត្យព្រហ្មចារីចំពោះនារីជាទាហានថ្មី នឹងត្រូវបានលុបចោល បន្ទាប់ពីវាបានបង្កឱ្យមានភាពចម្រូងចម្រាស ទាក់ទិននឹងសិទ្ធិមនុស្ស។

ការធ្វើតេស្តព្រហ្មចារី នៅប្រទេស ឥណ្ឌូនេស៊ី តែងត្រូវបានគេហៅថា «ការពិនិត្យដោយម្រាមដៃពីរ» ដោយសារថា នៅក្នុងការធ្វើតេស្តនោះ ក្រុមវេជ្ជបណ្ឌិត នឹងប្រើម្រាមដៃចំនួនពីរ លូកចូលក្នុងប្រដាប់បន្តពូជរបស់នារីជាបេក្ខភាពទាហានថ្មី ដើម្បីពិនិត្យមើលឱ្យដឹងថា តើនៅមានព្រហ្មចារី ឬអត់។ បេក្ខនារីដែលត្រូវបានគេយល់ថា «អស់ព្រហ្មចារី» នឹងត្រូវបានគេឱ្យធ្លាក់ពីការប្រលង។ គូដណ្ដឹងស្រីរបស់ទាហាននៃប្រទេសនេះ ជួនកាលក៏ត្រូវឆ្លងកាត់ការធ្វើតេស្តនេះដែរ។

មេបញ្ជាការកងទ័ពជើងគោក ឥណ្ឌូនេស៊ី ឧត្ដមសេនីយ៍ Andika Perkasa កាលពីម្សិលមិញ បានប្រកាសថា ការធ្វើតេស្តបែបនេះនឹងលែងត្រូវបានអនុវត្តទៀតហើយ នៅក្នុងជួរកងទ័ពជើងគោក។ កាលពីខែមុន លោក Andika Perkasa ក៏ធ្លាប់បានសង្កត់ធ្ងន់ថា ដំណើរការនៃការជ្រើសរើសទាហានថ្មីទាំងពីរភេទ ត្រូវតែមានភាពស្មើគ្នា។ ចំណែកអ្នកនាំពាក្យរបស់កងទ័ពជើងទឹក និងកងទ័ពអាកាស របស់ ឥណ្ឌូនេស៊ី ក៏បាននិយាយថា ស្ថាប័នរបស់ពួកគេ ពុំមានការធ្វើតេស្តព្រហ្មចារីនោះទេ។

កន្លងមក ការធ្វើតេស្តនេះ បានបណ្ដាលឱ្យមានបញ្ហាជជែកវែកញែកជាច្រើន។ WHO ធ្លាប់បាននិយាយថា វា «ពុំមានតម្លៃផ្នែកវិទ្យាសាស្ត្រ» និងវាជារឿង «រំលោភសិទ្ធិមនុស្ស»។ អង្គការតាមដានសិទ្ធិមនុស្ស (Human Right Watch / HRW) បានឱ្យដឹងថា សកម្មភាពនេះគឺ ប្រហាក់ប្រហែលនឹង «អំពើហិង្សាលើមូលដ្ឋានភេទ»។ ក្រុមការពារសិទ្ធិមនុស្ស បានអបអរចំពោះការប្រកាសរបស់កងទ័ពជើងគោក។ Andreas Harsono មកពី HRW បានហៅការសម្រេចខាងលើនេះថាជា «ប្រការត្រឹមត្រូវដែលត្រូវធ្វើ»៕

August 12, 2021

COVID-19 ប្រភេទ Delta ឆ្លងលឿន និងសាហាវកម្រិតណា បានជាគ្រប់គ្នាភ័យខ្លាច?

វ៉ារ្យ៉ង់ Delta នៃវីរុស COVID-19 ឆ្លងរាលដាលលឿនជាង ហើយកំហាប់ ឬបរិមាណរបស់វីរុសនៅក្នុងបំពង់ក និងមាត់របស់អ្នកជំងឺ មានកម្រិតខ្ពស់ជាង បើធៀបនឹង COVID-19 ប្រភេទដំបូង ដូច្នេះ មានន័យថា គោលការណ៍សុវត្ថិភាពមុននេះ លែងសមស្របទៀតហើយ។

យោងតាមការសិក្សាស្រាវជ្រាវនានា កាលពីដំបូង វីរុស COVID-19 ត្រូវការប្រហែល 15 នាទី ដើម្បីឆ្លងពីមនុស្សម្នាក់ ទៅមនុស្សម្នាក់ នៅពេលមនុស្សនៅក្បែរគ្នា។ បច្ចុប្បន្ន រយៈពេលនេះត្រូវបានកាត់បន្ថយយ៉ាងច្រើន ធ្វើឱ្យមនុស្សមានការភ័យខ្លាច។

វ៉ារ្យ៉ង់ Delta កំពុងតែនាំឱ្យក្រុមមន្ត្រីសុខាភិបាលសាធារណៈ ត្រូវធ្វើការប្ដូរផ្លាស់លើការណែនាំស្ដីពីសុវត្ថិភាព។ មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងរបស់ សហរដ្ឋអាមេរិក (CDC) កាលពីចុងខែកក្កដា បានឱ្យដឹងថា អ្នកដែលបានចាក់វ៉ាក់សាំងរួចរាល់ គួរតែបន្តពាក់ម៉ាស នៅទីដែលបិទជិត ក្នុងតំបន់ដែលមានអត្រានៃការឆ្លងរាលដាលខ្ពស់។

ប្រធាន CDC អាមេរិក លោកស្រី Rochelle Walensky និយាយថា Delta អាចឆ្លងទៅអ្នកដែលបានចាក់វ៉ាក់សាំងរួចរាល់ ហើយវាមិនមានរោគសញ្ញានោះទេ បើទោះវីរុសមានបរិមាណច្រើន ប្រហាក់ប្រហែលនឹងអ្នកមិនទាន់បានចាក់វ៉ាក់សាំង។

ក្រុមអ្នកជំនាញបានគណនាឃើញថា Delta មានលទ្ធភាពឆ្លងរាលដាលខ្ពស់ជាងប្រហែល 50% ធៀបនឹង Alpha។ ចំណែក Alpha ក៏មានសមត្ថភាពឆ្លងខ្ពស់ជាង COVID-19 ដែលរកឃើញដំបូងនៅ Wuhan ប្រហែល 50%។

Delta ធ្វើឱ្យមនុស្សកាន់តែភ័យខ្លាចអំពីការស្លាប់

ក្នុងការស្រាវជ្រាវកាលពីដើមខែកក្កដា ក្រុមអ្នកវិទ្យាសាស្ត្រចិន បានរកឃើញថា អ្នកដែលវិជ្ជមាននឹង Delta មានផ្ទុកវីរុសក្នុងផ្លូវដង្ហើមច្រើនជាង 1,000 ដង ធៀបនឹង COVID-19 ដំបូង។ សាស្ត្រាចារ្យនៅមហាវិទ្យាល័យរដ្ឋ Colorado ក្នុងក្រុង Fort Collins សហរដ្ឋអាមេរិក បានអះអាងថា៖ «Delta ជ្រែកចូលកោសិកានៃរាងកាយមនុស្សបានងាយជាង» វីរុសដំបូង។

បច្ចុប្បន្ន អ្នកវិទ្យាសាស្ត្រមិនទាន់គណនាដឹងបានអំពីបរិមាណជាក់លាក់នៃវីរុស Delta ដែលបញ្ចេញពីបំពង់ករបស់អ្នកជំងឺនៅឡើយ។ ប៉ុន្តែ កំហាប់វីរុស Delta ដែលមានកម្រិតខ្ពស់បែបនេះ មានន័យថា អ្នកជំងឺក៏បញ្ចេញវីរុសមកក្រៅបានច្រើនជាង COVID-19 ដំបូងផងដែរ។ នេះបើតាមសាស្ត្រាចារ្យ Linsey Marr នៃសាលា Virginia Tech។

យោងតាមសហគមន៍អ្នកវេជ្ជសាស្ត្រ ការចាក់វ៉ាក់សាំងគឺជាវីធីល្អបំផុតដើម្បីកាត់បន្ថយការឆ្លងរាលដាលនៃវីរុស។ ប៉ុន្តែ វ៉ាក់សាំងនឹងមានប្រសិទ្ធភាពទាប នៅពេលប្រឈមនឹងវ៉ារ្យ៉ង់ Delta។ យ៉ាងនេះក្ដី វ៉ាក់សាំងនៅតែអាចការពារមិនឱ្យជំងឺវីវឌ្ឍទៅជាធ្ងន់ធ្ងរ រហូតដល់ស្លាប់។

វេជ្ជបណ្ឌិត Marr និយាយថា Delta មានលទ្ធភាពគ្រប់គ្រាន់ក្នុងការឆ្លងទៅកាន់មនុស្សដែលមិនទាន់បានចាក់វ៉ាក់សាំង នៅពេលនៅក្បែរអ្នកវិជ្ជមានក្នុងរយៈពេលខ្លី ដូចជា 1 នាទីនៅក្នុងជណ្ដើរប្រអប់ជាដើម។

«ដើមឡើយ អ្នកត្រូវនៅក្នុងបន្ទប់បិទជិតជាមួយអ្នកជំងឺរហូតដល់ 15 នាទី ទើបអាចឆ្លងវីរុស។ ប៉ុន្តេ បច្ចុប្បន្ន ល្បឿននេះលឿនជាងមុន 1,000 ដង។ 15 នាទី មកនៅត្រឹមប៉ុន្មានវិនាទីប៉ុណ្ណោះ» នេះបើតាមវេជ្ជបណ្ឌិត Marr៕

August 11, 2021

Category: អន្តរជាតិ