អន្តរជាតិ - La Reine Media

Pfizer អះអាងថា «វ៉ាក់សាំងបង្កើតអង្គបដិប្រាណខ្លាំងនៅលើកុមារអាយុពី 5 ឆ្នាំ ទៅ 11 ឆ្នាំ»

(សហរដ្ឋអាម៉េរិក)-ក្រុមហ៊ុនផលិតវ៉ាក់សាំង Pfizer និង BioNTech ឱ្យដឹងថា វ៉ាក់សាំង COVID-19 មានសុវត្ថិភាព បង្កើតអង្គបដិប្រាណខ្លាំង នៅក្នុងការពិសោធលើកុមារដែលមានអាយុចាប់ពី 5 ឆ្នាំ ដល់ 11 ឆ្នាំ។

Pfizer និង BioNTech កាលពីម្សិលមិញ (20 កញ្ញា) បានប្រកាសលទ្ធផលនៃការពិសោធវ៉ាក់សាំង COVID-19 នៅលើកុមារអាយុពី 5 ឆ្នាំ ដល់ 11 ឆ្នាំ។ ពួកគេបានចាក់ 2 ដូស 10 មីលីក្រាម ស្មើនឹង 1/3 នៃបរិមាណដែលប្រើសម្រាប់ក្មេងជំទង់ និងមនុស្សពេញវ័យ ហើយការចាក់នេះមានគម្លាតពីគ្នា 3 សប្ដាហ៍។ លទ្ធផលបានបង្ហាញថា វ៉ាក់សាំងត្រូវបានរាងកាយប្រើប្រាស់បានយ៉ាងល្អ ប្រព័ន្ធភាពស៊ាំដំណើរការល្អ និងមានផលវិបាកប្រហាក់ប្រហែលនឹងលទ្ធផលនៅក្នុងការពិសោធលើមនុស្សដែលមានវ័យចាប់ពី 16 ឆ្នាំ ដល់ 25 ឆ្នាំ។

អាការនៃផលវិបាកដែលកើតឡើងដោយសារការចាក់វ៉ាក់សាំង Pfizer នៅលើក្មេងជំទង់ និងមនុស្សពេញវ័យ រួមមាន អស់កម្លាំង, ឈឺក្បាល, ឈឺសាច់ដុំ, ព្រឺរងា, ក្ដៅខ្លួន និងរកកលក្អួត នេះបើតាមនាយកដ្ឋានគ្រប់គ្រងនិងទប់ស្កាត់រោគឆ្លងរបស់ សហរដ្ឋអាម៉េរិក (CDC)។ Pfizer បានឱ្យដឹងថា ទិន្នន័យនៃការពិសោធលើកុមារចំនួន 2,200 នាក់ នឹងត្រូវបានដាក់ជូននាយកដ្ឋានគ្រប់គ្រងអាហារនិងឱសថ អាម៉េរិក (FDA) ក៏ដូចជាស្ថាប័នពាក់ព័ន្ធ នាពេលដ៏ខ្លីខាងមុខ។

Albert Bourla នាយកប្រតិបត្តិរបស់ក្រុមហ៊ុន Pfizer និយាយថា៖ «យើងរំពឹងថានឹងពង្រីកលទ្ធភាពនៃការការពាររបស់វ៉ាក់សាំងទៅដល់ពលរដ្ឋវ័យក្មេងនេះ អាស្រ័យទៅលើស្ថាប័នគ្រប់គ្រង នៅក្នុងស្ថានការណ៍ដែលវ៉ារ្យ៉ង់ Delta កំពុងរាតត្បាតខ្លាំង និងគំរាមកំហែងដល់កុមារ»។

ទិន្នន័យថ្មីត្រូវបានបញ្ចេញ នៅក្នុងគ្រាដែលអាណាព្យាបាលព្រួយបារម្ភចំពោះការចាក់វ៉ាក់សាំងឱ្យកូនៗ ក្នុងពេលដែលសាលារៀនបើកដំណើរការឡើងវិញ ចំណែកវីរុសបំប្លែងខ្លួន Delta នៅតែបន្តរាតត្បាត។ តួលេខនៃការចូលព្យាបាលក្នុងមន្ទីរពេទ្យនៅ សហរដ្ឋអាម៉េរិក កំពុងកើនឡើង ក្នុងនោះក៏មានទាំងកុមារតូចៗដែលមិនមានលក្ខខណ្ឌគ្រប់គ្រាន់សម្រាប់ទទួលការចាក់វ៉ាក់សាំងផងដែរ។

FDA បានអនុញ្ញាតឱ្យប្រើប្រាស់វ៉ាក់សាំងបង្ការ COVID-19 របស់ Pfizer/BioNTech សម្រាប់កុមារចាប់ពីអាយុ 12 ឆ្នាំឡើងទៅ រីឯវ៉ាក់សាំង Moderna និង Johnson & Johnson សម្រាប់ចាក់ឱ្យមនុស្សពេញវ័យ។ FDA គ្រោងនឹងប្រកាសលក្ខខណ្ឌសម្រាប់ការចាក់វ៉ាក់សាំង Pfizer ដូសបន្ថែមនៅក្នុងសប្ដាហ៍នេះ បន្ទាប់ពីបានផ្ដល់អនុសាសន៍ឱ្យចាក់ Pfizer ដូសបន្ថែមសម្រាប់មនុស្សដែលមានវ័យចាប់ពី 65 ឆ្នាំឡើងទៅ និងក្រុមមនុស្សដែលងាយរងគ្រោះ។ នេះបើតាមសារព័ត៌មាន CNBC។

Bourla កាលពីសប្ដាហ៍មុនបានឱ្យដឹងថា Pfizer អាចបញ្ជូនទិន្នន័យស្ដីពីកុមារអាយុចាប់ពី 5 ឆ្នាំ ដល់ 11 ឆ្នាំ ឡើងទៅកាន់ស្ថាប័នពាក់ព័ន្ធ នៅចុងខែនេះ។ ទន្ទឹមនឹងនេះ Pfizer ក៏មានគម្រោងប្រកាសលទ្ធផលនៃការចាក់វ៉ាក់សាំងពិសោធលើកុមារដែលមានអាយុចាប់ពី 6 ខែ ដល់ 5 ឆ្នាំផងដែរ នៅចុងខែតុលាខាងមុខ៕

September 21, 2021

អាម៉េរិក ទិញវ៉ាក់សាំង 500 លានដូសបន្ថែមទៀត សម្រាប់ផ្ដល់ជាជំនួយដល់ពិភពលោក ដើម្បីប្រយុទ្ធប្រឆាំងនឹង COVID-19

អាជ្ញាធររបស់ប្រធានាធិបតី Biden កំពុងចរចាជាមួយក្រុមហ៊ុន Pfizer ដើម្បីទិញវ៉ាក់សាំង 500 លានដូសទៀត ក្នុងបំណងជួយដល់យុទ្ធនាការប្រយុទ្ធប្រឆាំងនឹង COVID-19 ដែលកំពុងបន្តរាតត្បាតទូទាំងសកលលោក។

ប្រភពព័ត៌មានបានឱ្យដឹងថា កិច្ចព្រមព្រៀងរវាងរដ្ឋាភិបាល សហរដ្ឋអាម៉េរិក និងក្រុមហ៊ុន Pfizer នឹងត្រូវបានប្រកាសនៅប៉ុន្មានថ្ងៃខាងមុខ មុនពេលកិច្ចប្រជុំកំពូលអន្តរជាតិស្ដីពី COVID-19 ដែលប្រធានាធិបតី Joe Biden ស្នើឱ្យធ្វើឡើងដំណាលគ្នានឹងមហាសន្និបាតអង្គការសហប្រជាជាតិ។

រដ្ឋាភិបាលរបស់លោក Biden សម្រេចបានកិច្ចព្រមព្រៀងមួយដែលស្ទើរតែដូចគ្នានេះកាលពីខែសីហា ហើយ Pfizer កំពុងដឹកជញ្ជូនវ៉ាក់សាំងទាំងនេះទៅឱ្យ COVAX ដែលជាយន្តការផ្គត់ផ្គង់វ៉ាក់សាំង COVID-19 ដោយមិនគិតថ្លៃសម្រាប់បណ្ដាប្រទេសក្រីក្រ។

អ្នកសម្របសម្រួលចំពោះកិច្ចការប្រឆាំង COVID-19 របស់សេតវិមាន លោក Jeffrey Zients

«ប្រធានាធិបតីបានអះអាងច្បាស់ថា យើងនឹងប្រឹងប្រែងបន្ថែមទៀតដើម្បីជួយដល់ការខិតខំក្នុងការចាក់វ៉ាក់សាំងរបស់ពិភពលោក» អ្នកសម្របសម្រួលចំពោះកិច្ចការប្រឆាំង COVID-19 របស់សេតវិមាន Jeffrey Zients បានបញ្ជាក់កាលពីថ្ងៃទី 17 កញ្ញា។

សហរដ្ឋអាម៉េរិក បច្ចុប្បន្នគឺជាប្រទេសម្ចាស់ជំនួយផ្នែកវ៉ាក់សាំងបង្ការវីរុស COVID-19 ធំជាងគេបង្អស់ក្នុងពិភពលោក ខណៈដែលប្រទេសចិន ឈរលំដាប់លេខ 2 ចំណែក ជប៉ុន និង អង់គ្លេស ឈរលេខរៀងបន្ទាប់ គិតត្រឹមថ្ងៃទី 9 កញ្ញា។ នេះបើតាមទិន្នន័យរបស់មូលនិធិកុមាររបស់អង្គការសហប្រជាជាតិ (UNICEF)៕

September 20, 2021

កំពូលកីឡាករប្រដាល់របស់ ហ្វីលីពីន ក្លាយជាបេក្ខភាពប្រធានាធិបតី

ជើងឯកប្រដាល់របស់ប្រទេសហ្វីលីពីន លោក Manny Pacquiao កាលពីម្សិលមិញ បានប្រកាសចូលរួមប្រជែងដណ្ដើមតំណែងប្រធានាធិបតី នៅក្នុងការបោះឆ្នោតឆ្នាំ 2022។

«បច្ចុប្បន្នគឺជាពេលវេលាសមស្រប។ យើងបានត្រៀមខ្លួនរួចរាល់ហើយសម្រាប់ប្រឈមនឹងឧបសគ្គនៃការដឹកនាំ» Manny Pacquiao វ័យ 42 ឆ្នាំ បាននិយាយដូច្នេះបន្ទាប់ពីយល់ព្រមតាមសំណើពីក្រុមដែលលោកដឹកនាំនៅក្នុងបក្សកាន់អំណាច PDP-Laban។

មុននេះមិនយូរប៉ុន្មាន ក្រុមគូប្រជែងរបស់ Pacquiao បានជ្រើសតាំងជំនួយការផ្ទាល់របស់ប្រធានាធិបតី Rodrigo Duterte គឺតំណាងរាស្ត្រ Christopher “Bong” Go ជាបេក្ខភាពប្រធានាធិបតី។ ក្រុមនេះក៏បានជ្រើសតាំង Duterte សម្រាប់តំណែងអនុប្រធានាធិបតីផងដែរ ដើម្បីជួយឱ្យប្រធានាធិបតី ហ្វីលីពីន រូបនេះ អាចបន្តកាន់អំណាច។

Go បានបដិសេធការជ្រើសតាំងខាងលើ ប៉ុន្តែ បញ្ហាខ្វែងគំនិតគ្នារវាងក្រុម Pacquiao និងក្រុម Duterte នៅក្នុងបក្ស នៅតែបន្តកើនឡើង។

«ខ្ញុំគឺជាអ្នកប្រយុទ្ធ ហើយខ្ញុំនឹងបន្តធ្វើជាអ្នកប្រយុទ្ធ មិនថានៅខាងក្នុង ឬខាងក្រៅ» កំពូលអ្នកប្រដាល់របស់ ហ្វីលីពីន លោក Pacquiao ប្រកាសដូច្នេះ។ លោកបានបញ្ជាក់ថា «ខ្ញុំយល់ព្រមទទួលយកការជ្រើសតាំងជាបេក្ខភាពប្រធានាធិបតីរបស់ សាធារណរដ្ឋហ្វីលីពីន»។

កំពូលអ្នកប្រដាល់របស់ ហ្វីលីពីន លោក Pacquiao (ស្ដាំ)

Pacquiao គឺជាអ្នកប្រដាល់ដ៏អស្ចារ្យបំផុត និងជាមនុស្សតែម្នាក់គត់ដែលដណ្ដើមបានខ្សែក្រវាត់ពិភពលោកចំនួន 8 ក្នុងប្រភេទទម្ងន់ផ្សេងៗគ្នា។

ទោះជាល្បីឈ្មោះ ប៉ុន្តែ Pacquiao នៅតែមិនអាចឈរលើកំពូលតារាងក្នុងការស្ទង់មតិនាពេលកន្លង។ Sara Duterte-Carpio កូនស្រីរបស់ប្រធានាធិបតី Duterte គឺជាអ្នកស្ថិតនៅលើកំពូលតារាងនេះ។

កាលពីខែកក្កដា គណបក្ស PDP-Laban បានបោះឆ្នោតទម្លាក់ Pacquiao ពីតំណែងប្រធានបក្ស ក្រោយពីលោកបានរិះគន់ប្រធានាធិបតី Duterte ទាក់ទិននឹងបញ្ហាជាមួយប្រទេសចិន និងសង្គ្រាមប្រឆាំងអំពើពុករលួយ។ ប៉ុន្តែ ការសម្រេចនេះត្រូវបានក្រុមអ្នកនយោបាយដែលដឹកនាំដោយ Pacquiao នៅក្នុងបក្ស ច្រានចោល។

កំពូលអ្នកប្រដាប់រូបនេះ បានចូលប្រលូកក្នុងវិស័យនយោបាយចាប់ពីឆ្នាំ 2010 ក្នុងនាមជាតំណាងរាស្ត្រម្នាក់ មុននឹងត្រូវបានបោះឆ្នោតជាសមាជិកសភាជាន់ខ្ពស់។ លោកទទួលបានការចូលចិត្តខ្លាំងនៅ ហ្វីលីពីន ដោយសារតែចិត្តទូលាយ និងការប្រឹងប្រែរើខ្លួនចេញពីភាពក្រីក្រ ដើម្បីក្លាយជាអ្នកប្រដាល់ម្នាក់ក្នុងចំណោមអ្នកប្រកដាល់ដែលមានទ្រព្យច្រើនជាងគេ។

ក្រុមអ្នកវិភាគអះអាងថា ជោគជ័យក្នុងវិស័យប្រដាល់ រួមនឹងគោលដៅប្រឆាំងភាពក្រីក្រ និងអំពើពុករលួយ អាចជាប្រធានបទសំខាន់នៅក្នុង «យុទ្ធនាការដណ្ដើមសំឡេងឆ្នោត» របស់ Manny Pacquiao៕

September 20, 2021

ធ្លាក់យន្តហោះយោធារបស់ អាម៉េរិក 1 គ្រឿង! អ្នកបើកបរត្រូវជាប់លើខ្សែភ្លើង

អ្នកបើកបរយន្តហោះចំនួន 2 នាក់ត្រូវបញ្ជូនទៅកាន់មន្ទីរពេទ្យ ខណៈមនុស្ស 3 នាក់ទៀតរងរបួសស្រាល នៅពេលយន្តហោះសម្រាប់ហ្វឹកហាត់ 1 គ្រឿងរបស់កងទ័ព សហរដ្ឋអាម៉េរិក បានធ្លាក់នៅឯទីក្រុង Lake Worth រដ្ឋ Texas កាលពីថ្ងៃទី 19 កញ្ញា។

អ្នកបើកបរទាំង 2 នាក់ សុទ្ធតែបានរំដោះខ្លួនដោយការបាញ់បង្ហោះឆត្រយោងចេញពីបន្ទប់បើកបរ មុនពេលយន្តហោះប្រតិកម្មសម្រាប់ហ្វឹកហាត់ T-45C របស់កងទ័ពជើងទឹក បានធ្លាក់ដល់ដី។ ក្នុងចំណោមអ្នកបើកបរ មានម្នាក់ជាប់លើខ្សែភ្លើង ចំណែកម្នាក់ទៀតរងរបួសនៅពេលធ្លាក់ដល់ដី។ ពួកគេគឺជាគ្រូបង្វឹក និងសិក្ខាកាម។

បច្ចុប្បន្ន សុខភាពរបស់គ្រូបង្វឹកបានត្រលប់មករកសភាពដើម ប៉ុន្តែ កូនសិស្សរបស់គាត់កំពុងទទួលការព្យាបាលនៅឡើយ។

យន្តហោះដែលធ្លាក់នោះ ស្ថិតក្នុងអង្គភាពហ្វឹកហ្វឺនទ័ពអាកាសលេខ 2 នៅឯមូលដ្ឋានទ័ពជើងទឹក និងអាកាស Kingsville។ ពួកគេកំពុង ហ្វឹកហាត់ដោយហោះពីព្រលានយន្តហោះអន្តរជាតិ Corpus Christi។

មូលហេតុនៃគ្រោះថ្នាក់ធ្លាក់យន្តហោះនេះមិនទាន់ត្រូវបានរកឃើញនៅឡើយ ប៉ុន្តែអ្នកជំនាញមួយក្រុមកំពុងតែវាយតម្លៃការខូចខាតនៅកន្លែងកើតហេតុ។ យន្តហោះនេះបានធ្លាក់នៅតំបន់មួយដែលមានចម្ងាយពីបន្ទាយ Fort Worth ប្រហែល 1.6 គីឡូម៉ែត្រទៅទិសខាងជើង។

យន្តហោះ T-45C បានធ្លាក់ចំទីលានខាងក្រោយរបស់ផ្ទះ 3 ខ្នង បណ្ដាលឱ្យពលរដ្ឋ 3 នាក់រងរបួសស្រាល។ នេះបើតាមនាយករដ្ឋពន្លត់អគ្គិភ័យ Fort Worth៕

September 20, 2021

(វីដេអូ)-ទិដ្ឋភាពអ្នកអវកាសចិន ចាកចេញពីយាន បន្ទាប់ពីចុះចតដោយសុវត្ថិភាពកាលពីម្សិលមិញ

យានអវកាស Shenzhou-12 បាននាំក្រុមអ្នកអវកាសត្រលប់មកពីអវកាសកម្ពស់ 393 គីឡូម៉ែត្រ និងទម្លាក់ខ្លួនចុះមកកាន់ផែនដីក្នុងល្បឿន 7.9 គីឡូម៉ែត្រ/វិនាទី។

អវកាសចរ 3 នាក់របស់ប្រទេសចិន ដែលត្រូវបានបញ្ជូនទៅបំពេញបេសកកម្មនៅលើស្ថានីយអវកាសចិន Tiangong បានត្រលប់មកផែនដីវិញហើយ កាលពីម្សិលមិញ ដោយប្រើប្រាស់យានអវកាស Shenzhou-12 ចុះចតនៅតំបន់ ម៉ុងហ្គោលីខាងក្នុង (Inner Mongolia) កាលពីវេលាម៉ោង 12 និង 34 នាទី ថ្ងៃទី 17 កញ្ញា (ម៉ោងនៅកម្ពុជា)។

យានអវកាស Shenzhou-12 បាននាំក្រុមអ្នកអវកាសត្រលប់មកកម្ពស់ 393 គីឡូម៉ែត្រ ទម្លាក់ខ្លួនចុះមកកាន់ផែនដីក្នុងល្បឿន 7.9 គីឡូម៉ែត្រ/វិនាទី។ បេសកកម្មរបស់ពួកគេគឺជារបត់ថ្មីនៅក្នុងកម្មវិធីអវកាសប្រកបដោយមហិច្ឆតារបស់ប្រទេសចិន។

អ្នកអវកាសចំនួន 3 រូបគឺ Nie Haisheng, Liu Boming និង Tang Hongbo បានបញ្ចប់បេសកកម្ម 90 ថ្ងៃរបស់ពួកគេនៅក្នុងទីអវកាស។ ពួកគេចាកចេញពីយានអវកាសក្នុងស្ថានភាពសុខភាពល្អធម្មតា បន្ទាប់ពីបានចុះចតដោយយានដែលប្រើប្រាស់ឆត្រយោងខ្នាតយក្ស។

Liu Boming សមាជិកក្រុមហោះហើររបស់យានអវកាស Shenzhou-12 ថ្លែងថា៖ «សូមអរគុណការយកចិត្តទុកដាក់ និងការជូនពររបស់គ្រប់គ្នា។ ខ្ញុំនឹងមិនភ្លេចខួបកំណើតនេះ។ អវកាសពិតជាធំទូលាយ ស្រស់ស្អាត និងអស្ចារ្យជាទីបំផុត។ ខ្ញុំពិតជាមានសំណាង និងមានសុភមង្គល នៅពេលមានឱកាសឡើងទៅកាន់ទីអវកាសម្ដងទៀត និងបានបំពេញភារកិច្ចដើរដោយថ្មើរជើងនៅខាងក្រៅស្ថានីយអវកាសរបស់យើង។ ខ្ញុំមានអារម្មណ៍ថា អស្ចារ្យណាស់ពេលត្រលប់មកវិញ ការដែលបានហោះហើរនៅទីអវកាសក៏ពិតជាអស្ចារ្យ»។

ចំណែក Tang Hongbo សមាជិកក្រុមហោះហើរ និយាយថា៖ «ពេលនេះ ខ្ញុំមានអារម្មណ៍ថា នឹកគ្រួសារ និងមិត្តភក្ដិ។ ខ្ញុំចង់ប្រាប់ឪពុក ម្ដាយនៅឯស្រុកកំណើត ខេត្ត Hunan ថា៖ ពុក ម្ដាយ កូនត្រលប់មកវិញហើយ ពិតជាសុវត្ថិភាព និងសុខភាពមាំមួន»។

Nie Haisheng ប្រធានក្រុមហោះហើរនៃយានអវកាស Shenzhou-12 និយាយថា៖ «ខ្ញុំជឿថា ដោយការរីកចម្រើនមិនឈប់ឈរនៃកម្លាំងទូទាំងរបស់ប្រទេសចិន និងចំណេះដឹងផ្នែកវិទ្យាសាស្ត្រជាតិ នឹងមានអ្នកអវកាសជាច្រើនទៀត បង្កើតបានកំណត់ត្រាថ្មីៗ ហើយជួយឱ្យសកម្មភាពរបស់ចិន ក្នុងវិស័យអវកាស ឡើងខ្ពស់ថែមមួយកម្រិតទៀត។

ក្រុមអវកាសចរនេះ រួមនឹងយានអវកាស Shenzhou-12 ត្រូវបានដឹកទៅកាន់រដ្ឋធានីប៉េកាំង៕

September 18, 2021

សំណើចាក់វ៉ាក់សាំងដូសជំរុញរបស់ Pfizer ត្រូវបាន «ទាត់ចោល» ដោយ ក្រុមប្រឹក្សាវេជ្ជសាស្ត្ររបស់ FDA អាម៉េរិក

ក្រុមអ្នកវិទ្យាសាស្ត្រនៃក្រុមប្រឹក្សាពិគ្រោះយោបល់របស់ FDA អាម៉េរិក បានច្រានចោលសំណើស្ដីពីការចាក់វ៉ាក់សាំង Pfizer ដូសជំរុញ ដល់ពលរដ្ឋ អាម៉េរិក ទាំងអស់ដែលមានអាយុចាប់ពី 16 ឆ្នាំឡើងទៅ ដោយគ្រាន់តែយល់ព្រមឱ្យចាក់បន្ទាន់សម្រាប់មនុស្សចាស់។

ក្រុមប្រឹក្សាពិគ្រោះយោបល់ ដែលរួមមានក្រុមអ្នកជំនាញផ្នែកសុខាភិបាលកំពូលៗរបស់ សហរដ្ឋអាម៉េរិក ត្រូវបានស្ថាប័នគ្រប់គ្រងអាហារ និងឱសថ (FDA) កោះប្រជុំនៅថ្ងៃទី 18 ខែកញ្ញា។ នេះបើតាម NBC News។

ក្រោយពីបានពិនិត្យឯកសាររបស់ Pfizer ក្រុមប្រឹក្សានេះបានបោះឆ្នោតប្រឆាំងនឹងសំណើចាក់វ៉ាក់សាំងដូសបន្ថែមសម្រាប់ពលរដ្ឋដែលមានអាយុចាប់ពី 16 ឆ្នាំឡើងទៅ បើទោះជាសំណើរបស់ Pfizer ទទួលបានការគាំទ្រពីរដ្ឋបាលរបស់លោក Joe Biden។

ការពិសោធលើមនុស្សចំពោះការវាក់សាំងដូសជំរុញរបស់ Pfizer ត្រូវបានធ្វើឡើងលើមនុស្សចំនួន 300 នាក់។ ក្រុមប្រឹក្សាខាងលើយល់ថា តួលេខនៃការពិសោធនេះតិចពេក មិនអាចនាំទៅរកការសន្និដ្ឋានច្បាស់លាស់អំពីកម្រិតនៃសុវត្ថិភាព។

ការសម្រេចរបស់ FDA តែងតែយោងទៅតាមយោបល់របស់ក្រុមប្រឹក្សាពិគ្រោះយោបល់

«ខ្ញុំគិតថា លទ្ធផលនេះបានបង្ហាញថា សមាជិកនានារបស់ក្រុមប្រឹក្សានេះ មានភាពឯករាជ្យពី FDA ហើយការពិត យើងបានបញ្ចេញមតិអំពីបញ្ហាចាក់វ៉ាក់សាំងដូសបន្ថែមនេះរួចហើយ» Archana Chatterjee នាយកសាលាសាកលវិទ្យាល័យវេជ្ជសាស្ត្រ Chicago ថ្លែងដូច្នេះ ខណៈមនុស្សជាច្រើនក៏មិនយល់ស្របចំពោះការចាក់វ៉ាក់សាំងដូសជំរុញផងដែរ។

ក្រោយមក ក្រុមហ៊ុន Pfizer ក៏បានដាក់សំណើផ្សេងមួយទៀត ដោយស្នើសុំអនុម័តបន្ទាន់ក្នុងការចាក់វ៉ាក់សាំងដូសបន្ថែមដល់មនុស្សចាស់ចាប់ពីវ័យ 65 ឆ្នាំឡើងទៅ និងអ្នកដែលប្រឈមនឹងហានិភ័យឆ្លង COVID-19 កម្រិតខ្ពស់។ ក្រុមប្រឹក្សាពិគ្រោះយោបល់របស់ FDA ក៏បានបោះឆ្នោតគាំទ្រសំណើនេះ។

លទ្ធផលនៃការបោះឆ្នោតរបស់ក្រុមប្រឹក្សាខាងលើនឹងត្រូវបាន FDA ពិនិត្យ និងយកមកធ្វើជាមូលដ្ឋានសម្រាប់ការសម្រេចចិត្ត។ ថ្វីបើលទ្ធផលនៃការបោះឆ្នោតនេះមិនមែនជាការតម្រូវឱ្យ FDA គោរពតាម ប៉ុន្តែ ការសម្រេចរបស់ FDA តែងតែយោងទៅលើយោបល់របស់ក្រុមប្រឹក្សានេះ៕

September 18, 2021

សហរដ្ឋអាម៉េរិក បើកកិច្ចប្រជុំកំពូលពិភពលោកស្ដីពី COVID-19 នៅសប្ដាហ៍ក្រោយ

កាលពីថ្ងៃទី 17 កញ្ញា សេតវិមាន បានប្រកាសថានឹងបើកកិច្ចប្រជុំកំពូលទូទាំងសកលលោក ស្ដីពី COVID-19 នៅសប្ដាហ៍ក្រោយ ដើម្បីស្វែងរកវិធីជំរុញការចាក់វ៉ាក់សាំងដល់ប្រជាជនក្នុងពិភពលោក។

ប្រភពព័ត៌មានពី សហរដ្ឋអាម៉េរិក បានឱ្យដឹងថា កិច្ចប្រជុំកំពូលនឹងត្រូវបានធ្វើឡើងក្រោមរូបភាពអនឡាញ នៅថ្ងៃទី 22 ខែកញ្ញា ឆ្នាំ 2021 ដំណាលគ្នានឹង មហាសន្និបាតអង្គការសហប្រជាជាតិ។

Jen Psaki ដែលជាជំនួយការផ្នែកសារព័ត៌មានរបស់ សេតវិមាន បានប្រាប់ថា ក្នុងកិច្ចប្រជុំ សហរដ្ឋអាម៉េរិក នឹងអំពាវនាវដល់បណ្ដាប្រទេស លើកឡើងនូវ «មហិច្ឆតាធំជាងបច្ចុប្បន្ន» អំពីប្រធានបទមួយចំនួន ដូចជា ការប្រឹងប្រែងចាក់វ៉ាក់សាំងដល់ពិភពលោក ការបង្កើនប្រភពផ្គត់ផ្គង់អុកស៊ីសែន និងឧបករណ៍ការពារសុវត្ថិភាពផ្នែកសុខាភិបាលជាដើម។

សារព័ត៌មាន Washington Post បានផ្សាយថា រដ្ឋាភិបាលរបស់ប្រធានាធិបតី Joe Biden កំពុងមានគម្រោងទិញវ៉ាក់សាំង COVID-19 បន្ថែមចំនួនរាប់រយលានដូសទៀត សម្រាប់ផ្ដល់ជាជំនួយដល់បណ្ដាប្រទេស ហើយក្នុងកិច្ចប្រជុំនាសប្ដាហ៍ក្រោយ អាចនឹងមានការជំរុញឱ្យប្រទេសនានា ធ្វើដូច សហរដ្ឋអាមេរិក។

ព័ត៌មានខាងលើត្រូវបានចុះផ្សាយ ក្នុងគ្រាដែល សហរដ្ឋអាម៉េរិក កំពុងរងសម្ពាធដែលបង្ខំឱ្យពន្លឿនការចាក់វ៉ាក់សាំងទូទាំងសកលលោក។ គិតមកដល់បច្ចុប្បន្ន អាម៉េរិក បានផ្ដល់ជំនួយជាវ៉ាក់សាំងចំនួន 140 លានដូសរួចហើយ ដល់បណ្ដាប្រទេស ហើយនឹងអាចផ្ដល់ជំនួយបន្ថែមប្រហែល 500 លានដូសទៀត ចាប់ពីពេលនេះដល់ឆ្នាំក្រោយ។

យ៉ាងនេះក្ដី ក្រុមអ្នកជំនាញចង់ឃើញរដ្ឋាភិបាលលោក Biden មិនត្រឹមតែជំរុញការផ្ដល់ជំនួយជាវ៉ាក់សាំង COVID-19 នោះទេ ប៉ុន្តែពួកគេចង់ឃើញមហាអំណាចពិភពលោកមួយនេះ បង្កើនការផលិតវ៉ាក់សាំងនៅលើពិភពលោកផងដែរ៕

September 18, 2021

វៀតណាម៖ អ្នកមិនព្រមចាក់វ៉ាក់សាំង COVID-19 នឹងត្រូវជាប់ពន្ធនាគារ បើសិនឆ្លង និងចម្លងដល់គេឯង

«អ្នកដែលមិនព្រមទទួលការចាក់វ៉ាក់សាំងបង្ការ COVID-19 ហើយនាំឱ្យឆ្លង និងចម្លងវីរុសដល់អ្នកផ្សេង នឹងអាចត្រូវបានចោទប្រកាន់ពីបទព្រហ្មទណ្ឌ (អាចត្រូវបង់ប្រាក់ពិន័យ ឬត្រូវជាប់ពន្ធនាគារ)» នេះបើតាមអ្នកច្បាប់ នៅប្រទេសវៀតណាម។

ក្រុមប្រឹក្សាសង្កាត់ Hoang Liet, ខណ្ឌ Hoang Mai, រដ្ឋធានីហាណូយ ថ្មីៗនេះបានស្នើឱ្យពលរដ្ឋក្នុងតំបន់របស់ខ្លួន ចុះកិច្ចសន្យាជាលាយលក្ខណ៍អក្សរ បើសិនបដិសេធការចាក់វ៉ាក់សាំងបង្ការ COVID-19 ហើយក៏នឹងត្រូវទទួលខុសត្រូវចំពោះមុខច្បាប់។

ក្នុងឯកសារខាងលើរបស់សង្កាត់ Hoang Liet បានសរសេរថា៖ «ចំពោះករណីស្ថិតក្នុងវ័យដែលត្រូវចាក់វ៉ាក់សាំង ប៉ុន្តែ បដិសេធការចាក់ ពលរដ្ឋក្នុងករណីនោះនឹងត្រូវបានស្នើឱ្យចុះហត្ថលេខាលើកិច្ចសន្យាមួយជាមួយនឹងក្រុមប្រឹក្សាសង្កាត់ និងត្រូវបញ្ជាក់អំពីមូលហេតុ រួមនឹងការត្រូវទទួលខុសត្រូវចំពោះមុខច្បាប់ បើសិនបានក្លាយជាអ្នកចម្លងវីរុសនៅក្នុងសហគមន៍»។

ទិដ្ឋភាពនៅទីក្រុងហាណូយ ក្នុងផ្ទុះឆ្លងរាលដាលខ្លាំង

អ្នកជំនាញក្នុងផ្នែកចាក់វ៉ាក់សាំង បានឱ្យដឹងថា ច្បាប់ទប់ស្កាត់ជំងឺឆ្លងរបស់ វៀតណាម កំណត់ថា ស្ថាប័នមានសមត្ថកិច្ចមានសិទ្ធិតម្រូវឱ្យអ្នកស្ថិតក្នុងក្រុមគោលដៅដែលត្រូវចាក់វ៉ាក់សាំង ទៅទទួលការចាក់ ពិសេសគឺនៅក្នុងតំបន់សម្បុកវីរុស។ ក៏ប៉ុន្តែ ក្នុងការអនុវត្តជាក់ស្ដែង អាជ្ញាធរគ្រាន់តែលើកទឹកចិត្តឱ្យពលរដ្ឋទៅទទួលការចាក់ដើម្បីការពារសុខភាពផ្ទាល់ខ្លួន ពុំទាន់មានការពិន័យចំពោះអ្នកដែលបដិសេធការចាក់នៅឡើយ។

មេធាវី Trinh Thi Viet Kieu មកពីរដ្ឋធានីហាណូយ បានប្រាប់សារព័ត៌មានក្នុងស្រុកថា «ក្នុងករណីត្រូវចាក់វ៉ាក់សាំង ប៉ុន្តែមិនព្រមចាក់ នៅពេលឆ្លងវីរុស និងចម្លងដល់អ្នកផ្សេង ពិតណាស់គឺត្រូវទទួលខុសត្រូវចំពោះមុខច្បាប់។ ការចុះហត្ថលេខាលើកិច្ចសន្យា ឬមិនចុះ ក៏មិនប៉ះពាល់ដល់ការដែលត្រូវទទួលខុសត្រូវនោះឡើយ»។

មេធាវីខាងលើនិយាយថា បច្ចុប្បន្ន វៀតណាម មិនទាន់មានសេចក្ដីសម្រេចណាមួយដែលតម្រូវឱ្យពលរដ្ឋត្រូវតែទទួលការចាក់វ៉ាក់សាំង COVID-19 នៅឡើយ។ បច្ចុប្បន្ន ស្ថាប័ននានាកំពុងលើកទឹកចិត្តឱ្យពលរដ្ឋទៅចាក់វ៉ាក់សាំងដើម្បីការពារសុខភាព។

ទិដ្ឋភាពនៅក្រុងព្រៃនគរ (ហូជីមីញ ឬសៃហ្គន)

នៅក្នុងច្បាប់ព្រហ្មទណ្ឌឆ្នាំ 2015 របស់ វៀតណាម បានចែងថា ចំពោះទោស «ធ្វើឱ្យឆ្លងរាលដាលជំងឺដែលគ្រោះថ្នាក់ដល់មនុស្ស» ក្នុងកម្រិតស្រាលនឹងត្រូវពិន័យជាប្រាក់ចាប់ពី 50 លានដុង ដល់ 200 លានដុង ចំណែកទោសធ្ងន់ជាងនេះនឹងអាចត្រូវជាប់ពន្ធនាគារចាប់ពី 1 ឆ្នាំ ដល់ 5 ឆ្នាំ។

ប្រទេសវៀតណាម បច្ចុប្បន្នមានអ្នកឆ្លង COVID-19 ជាង 656,000 នាក់ ក្នុងនោះមានអ្នកស្លាប់ 16,425 នាក់, ជាសះស្បើយ 423,551 នាក់ និងកំពុងព្យាបាលជាង 216,000 នាក់។ ប្រជាជនសរុបរបស់ វៀតណាម គិតត្រឹមថ្ងៃទី 17 កញ្ញា 2021 មានចំនួន 98,396,006 នាក់ នេះបើយោងតាមទិន្នន័យថ្មីបំផុតរបស់អង្គការសហប្រជាជាតិ ដែលត្រូវបានចុះផ្សាយដោយគេហទំព័រ Worldometer៕

September 17, 2021

មេធាវីល្បីឈ្មោះ «ជួលឃាតករមកសម្លាប់ខ្លួនឯង» ដើម្បីឱ្យកូនបានក្លាយជាអ្នកមាន

សហរដ្ឋអាមេរិក៖ មេធាវីល្បីឈ្មោះ និងជាជនជាតិអាម៉េរិក ម្នាក់ ត្រូវបានចោទប្រកាន់ពីបទក្លែងបន្លំ បន្ទាប់ពីបង្កើតហេតុការណ៍ឃាតកម្មលើខ្លួនឯង ដើម្បីឱ្យកូនប្រុសទទួលបានប្រាក់ធានារ៉ាប់រង។

Alex Murdaugh ជាមេធាវីម្នាក់ មានអាយុ 53 ឆ្នាំ កាលពីថ្ងៃទី 4 កញ្ញា បានជួលឈ្មោះ Curtis Smith ឱ្យរៀបគម្រោងសម្លាប់លោក នៅលើដងផ្លូវមួយនៅតំបន់ជនបទរបស់រដ្ឋ ការ៉ូលីណាខាងត្បូង (South Carolina) នៃ សហរដ្ឋអាម៉េរិក។ Smith បានបាញ់ចំក្បាលមេធាវីរូបនេះ ប៉ុន្តែ គ្រាប់កាំភ្លើងបានប្លាតចំតែលលាដ៍ក្បាល។ Smith គឺជាអតីតកូនក្ដីរបស់ Murdaugh និងធ្លាប់ផ្គត់ផ្គង់ opioid ជាថ្នាំបំបាត់ការឈឺចាប់ប្រភេទញៀន ទៅឱ្យមេធាវីរូបនេះ។

Murdaugh ក្រោយមកក៏បានចេញសារភាព ហើយនៅថ្ងៃទី 16 ខែកញ្ញា លោកក៏ត្រូវបានតុលាការចោទប្រកាន់ពីបទក្លែងបន្លំទាក់ទិននឹងធានារ៉ាប់រង និងភូតកុហក ព្រោះតែបានជួលមនុស្សមកសម្លាប់ខ្លួនឯង ដើម្បីឱ្យកូនប្រុសទទួលបានប្រាក់សំណង 10 លានដុល្លារ ពីក្រុមហ៊ុនធានារ៉ាប់រងអាយុជីវិត។

Curtis Smith ឡើងតុលាការ កាលពីថ្ងៃទី 16 កញ្ញា

ល្បិចកលត្រូវបានធ្វើឡើងមួយថ្ងៃបន្ទាប់ពី Murdaugh ត្រូវបានបង្ខំឱ្យឈប់ធ្វើការនៅក្នុងក្រុមហ៊ុនច្បាប់ ដោយសារបញ្ហាអំពើពុករលួយ។ ប៉ូលិសកំពុងស្រាវជ្រាវលើ Murdaugh ទាក់ទិននឹងទោសកិបកេងមូលនិធិសាធារណៈ។

មេធាវីរូបនេះ ត្រូវបានអនុញ្ញាតឱ្យបង់ប្រាក់ 20,000 ដុល្លារ ដើម្បីបាននៅក្រៅឃុំ និងព្យាបាលរបួសនៅមន្ទីរពេទ្យ។ មេធាវីរបស់ Murdaugh បានឱ្យដឹង កូនក្ដីរបស់ខ្លួនមានអាការ «ញៀននឹងថ្នាំ opiod យ៉ាងធ្ងន់ធ្ងរ»។

មេធាវី Attorney Alex Murdaugh (ឆ្វេង) និង Curtis Smith (ស្ដាំ)

មេធាវីរបស់ Murdaugh បន្ថែមថា បញ្ហាហិរញ្ញវត្ថុ រួមនឹងបញ្ហានៃការស្លាប់របស់ភរិយា និងកូន កាលពីខែមិថុនា បាននាំឱ្យកូនក្ដីរបស់លោក ធ្លាក់ទៅក្នុងស្ថានភាពនេះ។

Maggie អាយុ 52 ឆ្នាំ ជាភរិយារបស់ Murdaugh និងកូនប្រុសឈ្មោះ Paul អាយុ 22 ឆ្នាំ ជានិស្សិត ត្រូវបានគេបាញ់សម្លាប់កាលពីថ្ងៃទី 7 ខែមិថុនា នៅឯតំបន់ Islandton ភាគនិរតីរបស់រដ្ឋការូលីណាខាងត្បូង។ ពុំទាន់មានជនសង្ស័យណាម្នាក់ត្រូវបានចាប់ខ្លួននៅឡើយ។ អំឡុងមុនពេលនោះ Paul កំពុងរង់ចាំការកាត់ទោសពីបទបង្កគ្រោះថ្នាក់ចរាចរណ៍ទូក កាលពីឆ្នាំ 2019 ដែលបានធ្វើឱ្យនារីវ័យ 19 ឆ្នាំម្នាក់បាត់បង់ជីវិត។

ប៉ូលិស កាលពីថ្ងៃទី 15 ខែកញ្ញា ក៏បានបើកការស៊ើបអង្កេតលើករណីស្លាប់កាលពីឆ្នាំ 2018 របស់ Gloria Satterfield អាយុ 57 ឆ្នាំ ដែលជាអ្នកគ្រប់គ្រងផ្ទះឱ្យគ្រួសាររបស់ Murdaugh។ អ្នកស្រី Gloria ត្រូវបានគេជឿថា បានស្លាប់ដោយសារដួល។ គ្រួសាររបស់ Murdaugh មានឈ្មោះល្បីល្បាញនៅក្នុងចំណោមក្រុមអ្នកច្បាប់នៅ ការូលីណាខាងត្បូង។ ឪពុក ជីតាខាងឪពុក និងទួតរបស់ Murdaugh សុទ្ធតែជារដ្ឋអាជ្ញាក្នុងតំបន់៕

September 17, 2021

WHO ព្រមានថា ទ្វីបអាហ្វ្រិក នឹងក្លាយជា «ទូភ្ញាស់» វីរុស COVID-19 ប្រភេទបំប្លែងខ្លួនថ្មី

តំបន់នានានៅក្នុងទ្វីបអាហ្វ្រិក ប្រឈមនឹងហានិភ័យក្លាយជាទីចាប់កំណើតរបស់បណ្ដាវ៉ារ្យ៉ង់ថ្មីនៃវីរុស COVID-19 ដែលអាចស៊ូទ្រាំបានជាមួយនឹងវ៉ាក់សាំង ដោយសារតែអត្រានៃការចាក់វ៉ាក់សាំងទាបដែលកើតឡើងពីបញ្ហាកង្វះប្រភពផ្គត់ផ្គង់។

«បញ្ហាសមភាពដ៏គួរឱ្យព្រួយបារម្ភ និងភាពយឺតយ៉ាវនៅក្នុងការផ្គត់ផ្គង់វ៉ាក់សាំង អាចធ្វើឱ្យតំបន់នានារបស់ទ្វីបអាហ្វ្រិក ក្លាយជាសម្បុកនៃវ៉ារ្យ៉ង់ដែលមានសមត្ថភាពទប់ទល់នឹងវ៉ាក់សាំង។ ស្ថានភាពនេះអាចនាំពិភពលោកត្រលប់ទៅកាន់ចំនុចចាប់ផ្ដើមដំបូង» Matshidiso Moeti ប្រធានអង្គការសុខភាពពិភពលោក (WHO) ប្រចាំទ្វីបអាហ្វ្រិក ថ្លែងនៅក្នុងកិច្ចប្រជុំប្រចាំសប្ដាហ៍នៅ Brazzaville នៃសាធារណរដ្ឋកុងហ្គោ កាលពីថ្ងៃទី 16 កញ្ញា។

ដោយសារតែបញ្ហាកង្វះវ៉ាក់សាំងនៅទូទាំងសកលលោក យន្តការ COVAX នឹងដឹកជញ្ជូនវ៉ាក់សាំង COVID-19 ប្រហែល 150 លានដូសតែប៉ុណ្ណោះ ទៅឱ្យទ្វីបអាហ្វ្រិក ដែលតួលេខនេះតិចជាងផែនការដំបូង។ ការិយាល័យតំបន់របស់ WHO បានឱ្យដឹងថា ទ្វីបអាហ្វ្រិក នឹងខ្វះវ៉ាក់សាំងប្រហែល 470 លានដូស ក្នុងឆ្នាំនេះ ដូច្នេះប្រជាជនចំនួនតែ 17% ប៉ុណ្ណោះ ដែលនឹងទទួលបានការការពារ ទាបជាងគោលដៅ 40% ដែល WHO បានកំណត់។

លោកស្រី Matshidiso Moeti ប្រធានអង្គការសុខភាពពិភពលោក (WHO) ប្រចាំទ្វីបអាហ្វ្រិក

«បើសិនជាបណ្ដាប្រទេសអ្នកមាន នៅតែរារាំង COVAX ពីទីផ្សារវ៉ាក់សាំង នោះគោលដៅនៃការចាក់វ៉ាក់សាំងនៅទ្វីបអាហ្វ្រិក នឹងត្រូវខកខាន» ប្រធានអង្គការសុខភាពពិភពលោក (WHO) ប្រចាំទ្វីបអាហ្វ្រិក បញ្ជាក់ដូច្នេះ។

បញ្ហាកង្វះវ៉ាក់សាំង បានកើតឡើងក្នុងគ្រាដែលអ្នកវិជ្ជមាននឹង COVID-19 នៅទ្វីបអាហ្វ្រិក ក្នុងសប្ដាហ៍នេះ បានកើនឡើងដល់ជាង 8 លាននាក់។ វ៉ាក់សាំងប្រហែល 95 លានដូស គួរណាស់តែត្រូវបានដឹកទៅឱ្យទ្វីបអាហ្វ្រិក តាមរយៈយន្តការ COVAX នៅក្នុងខែកញ្ញា។ យោងតាម WHO «ទ្វីបអាហ្វ្រិក ទើបតែអាចចាក់វ៉ាក់សាំងដល់មនុស្សចំនួន 50 លាននាក់ ប្រហាក់ប្រហែលនឹង 3.6% នៃប្រជាជនសរុបរបស់ទ្វីបនេះ»។

COVAX ជាយន្តការផ្ដល់ជំនួយវ៉ាក់សាំង COVID-19 ដែលត្រូវបានគេជឿថា នឹងជួយឱ្យប្រទេស និងដែនដីក្រីក្រចំនួន 92 ក្នុងពិភពលោក ទទួលបានវ៉ាក់សាំងដោយមិនគិតថ្លៃពីបណ្ដាប្រទេសអ្នកមាន។ កាលពីសប្ដាហ៍មុន កម្មវិធីខាងលើបានឱ្យដឹងថា បរិមាណវ៉ាក់សាំងដែលគ្រោងនឹងត្រូវបានគេផ្ដល់ជាជំនួយ នឹងត្រូវថយចុះ ដោយសារតែ «បទបញ្ជាហាមនាំចេញ ដើម្បីផ្ដល់អាទិភាពដល់កិច្ចព្រមព្រៀងទ្វេភាគីរវាងបណ្ដាក្រុមហ៊ុនផលិតវ៉ាក់សាំង និងបណ្ដាប្រទេស រួមនឹងបញ្ហាយឺតយ៉ាវក្នុងការស្នើសុំការអនុម័តសម្រាប់ការប្រើប្រាស់វ៉ាក់សាំង» ព្រមទាំងកត្តាជាច្រើនផ្សេងទៀត៕

September 17, 2021

Category: អន្តរជាតិ