អន្តរជាតិ - La Reine Media

អង់គ្លេស ឱ្យ កូរ៉េខាងត្បូង ខ្ចីវ៉ាក់សាំង COVID-19 មួយលានដូស

ប្រទេសអង់គ្លេស បានសម្រេចចិត្តឱ្យ កូរ៉េខាងត្បូង ខ្ចីវ៉ាក់សាំង Pfizer ចំនួន 1 លានដូស ទៅតាមកិច្ចព្រមព្រៀងដោះដូរ ហើយ ទីក្រុងសេអ៊ូល នឹងសងវិញនៅចុងឆ្នាំ។

«ដោយវិធីសាស្ត្រសហការយ៉ាងជិតស្និទ្ធជាមួយនឹងមិត្ត កូរ៉េខាងត្បូង ការសម្រេចចិត្តដោះដូរវ៉ាក់សាំងនឹងគ្នានេះ នឹងជួយបង្កើនល្បឿននៃយុទ្ធនាការចាក់វ៉ាក់សាំងរបស់ ប្រទេសកូរ៉េខាងត្បូង ព្រមទាំងមិនប៉ះពាល់ដល់យុទ្ធនាការចាក់វ៉ាក់សាំងរបស់ អង់គ្លេស ផងដែរ» រដ្ឋមន្ត្រីក្រសួងសុខាភិបាល អង់គ្លេស Sajid Javid ប្រកាសដូច្នេះកាលពីថ្ងៃទី 22 កញ្ញា។

រដ្ឋាភិបាលអង់គ្លេស បានឱ្យដឹងថា នេះគឺជាវ៉ាក់សាំង Pfizer ចំនួន 1 លានដូស ដែលប្រទេសនេះមិនទាន់ត្រូវការប្រើប្រាស់ភ្លាមៗ ហើយអាចត្រូវបានប្រើប្រាស់លឿនជាងនៅ កូរ៉េខាងត្បូង។

នាយកដ្ឋានសុខាភិបាលនិងថែទាំសង្គម (DHSC) របស់ ប្រទេសអង់គ្លេស បានឱ្យដឹងថា កូរ៉េខាងត្បូង នឹងសងមកវិញទាំងអស់នៅចុងឆ្នាំ 2021។

DHSC បន្ថែមថា ការព្រមព្រៀងនេះនឹងជួយឱ្យ កូរ៉េខាងត្បូង សម្រេចបានគោលដៅ 70% នៃការចាក់វ៉ាក់សាំងជូនពលរដ្ឋសរុប នៅចុងខែតុលា។ ឈុតវ៉ាក់សាំងដំបូងនឹងត្រូវបាន អង់គ្លេស ដឹកទៅដល់ កូរ៉េខាងត្បូង នៅប៉ុន្មានសប្ដាហ៍ខាងមុខ។

នៅក្នុងខែនេះដែរ អង់គ្លេស និងអូស្ត្រាលី ក៏បានព្រមព្រៀងដោះដូរវ៉ាក់សាំង COVID-19 ដូចគ្នានេះដែរ។ អង់គ្លេស បានដឹកវ៉ាក់សាំង Pfizer ចំនួន 4 លានដូស ទៅឱ្យ អូស្ត្រាលី រួចហើយ។

កាលពីខែកក្កដា កូរ៉េខាងត្បូង ក៏ទទួលបានវ៉ាក់សាំង Pfizer ចំនួន 700,000 ដូស ជិតផុតកាលកំណត់ ដែល អ៊ីស្រាអែល មិនទាន់ត្រូវការប្រើ។ អ៊ីស្រាអែល នឹងទទួលបានវ៉ាក់សាំង Pfizer ដែល កូរ៉េខាងត្បូង នឹងសងនៅខែកញ្ញា និងតុលា៕

September 23, 2021

វ៉ាក់សាំងប្រភេទ «ខ្យល់» របស់ក្រុមហ៊ុនចិន អាចនឹងត្រូវបានអនុម័តឱ្យប្រើប្រាស់ឆាប់ៗនេះ

ក្រុមហ៊ុនអភិវឌ្ឍវ៉ាក់សាំងបង្ការ COVID-19 «ប្រភេទខ្យល់សម្រាប់ស្រូបតាមផ្លូវដង្ហើម» ដំបូងគេក្នុងពិភពលោក បានឱ្យដឹងថា Ad5-nCoV មានសុវត្ថិភាព និងអាចត្រូវបានអាជ្ញាធរចិនអនុម័តឱ្យប្រើប្រាស់បន្ទាន់នាពេលដ៏ខ្លីខាងមុខ។

ក្រុមហ៊ុន CanSinoBIO របស់ចិន កាលពីថ្ងៃទី 22 កញ្ញា បានឱ្យដឹងថា វ៉ាក់សាំង Ad5-nCoV ប្រភេទខ្យល់សម្រាប់ហិត ឬស្រូប កំពុងមានភាពជឿនលឿន ឆ្ពោះទៅកាន់គោលដៅទទួលបានការអនុញ្ញាតិឱ្យប្រើប្រាស់បន្ទាន់ និងឆាប់ត្រូវបានដាក់ឱ្យប្រើប្រាស់ ដោយសារតែសុវត្ថិភាព ឆ្លើយតបនឹងប្រព័ន្ធភាពស៊ាំបានខ្លាំងក្លា និងប្រសិទ្ធភាពខ្ពស់ដូចទៅនឹងដូសជំរុញ។

Ad5-nCoV អាចបង្កើតប្រតិកម្មសម្រាប់ប្រព័ន្ធភាពស៊ាំខ្លាំងក្លា ប្រហាក់ប្រហែលនឹងការចាក់នៅលើសាច់ដុំដៃ។ នៅពេលប្រើប្រាស់ Ad5-nCoV ធ្វើជាដូសជំរុញ ឬដូសបន្ថែម អង្គបដិប្រាណ IgG កើនឡើងច្រើនជាង ពី 7-8 ដង ធៀបនឹងប្រភេទវ៉ាក់សាំងវីរុសអសកម្មធម្មតា។

Ad5-nCoV ឬហៅថា វ៉ាក់សាំង Adenovirus គឺជាបេក្ខភាពវ៉ាក់សាំងបង្ការ COVID-19 ដំបូងរបស់ប្រទេសចិន ដែលត្រូវបានពិសោធលើមនុស្សកាលពីខែមីនា ឆ្នាំ 2020។ វ៉ាក់សាំងនេះ ត្រូវបានអភិវឌ្ឍដោយក្រុមហ៊ុន CanSinoBIO សហការជាមួយបណ្ឌិត្យសភាវិទ្យាសាស្ត្រវេជ្ជសាស្ត្រយោធាចិន។ ក្រុមអ្នកជំនាញផ្ដល់អនុសាសន៍ថា វ៉ាក់សាំងប្រភេទសម្រាប់ស្រូបតាមផ្លូវដង្ហើមនេះគឺជាបេក្ខភាពដែលមានសក្ដានុពល សម្រាប់ប្រើជាដូសជំរុញ ក្រោយការចាក់វ៉ាក់សាំងប្រភេទវីរុសអសកម្មរួចហើយ។

ការពិសោធលើមនុស្សដំណាក់កាលដំបូងបានបង្ហាញថា ការប្រើប្រាស់វ៉ាក់សាំង Ad5-nCoV ធ្វើជាដូសជំរុញ ក្រោយពេលចាក់វ៉ាក់សាំងត្រង់សាច់ដុំដៃបាន 28 ថ្ងៃ «បង្កើតបានអង្គបដិប្រាណ NAbs (Neutralizing Antibodies) និង IgG (Immunoglobulin G) កម្រិតខ្ពស់» នេះបើតាមរបាយការណ៍ដែលបានចុះផ្សាយនៅលើទស្សនាវដ្ដី Lancet កាលពីថ្ងៃទី 20 កញ្ញា។

អ្នកស្ម័គ្រចិត្ត កំពុងស្រូបវ៉ាក់សាំងប្រភេទខ្យល់ Ad5-nCoV

ការពិសោធក៏បានបង្ហាញថា វ៉ាក់សាំង Ad5-nCoV ប្រភេទខ្យល់ ដំណើរការល្អនៅក្នុងរាងកាយ ដោយមិនបង្កផលប៉ះពាល់ធ្ងន់ធ្ងរណាមួយឡើយ។ ក្រុមអ្នកអភិវឌ្ឍបានអះអាងថា ការប្រើប្រាស់វ៉ាក់សាំងប្រភេទវីរុសអសកម្ម (ដូចជា Sinopharm) រួមផ្សំជាមួយនឹង Ad5-nCoV នាំមកនូវអង្គប្រដិប្រាណ NAbs កម្រិតខ្ពស់សម្រាប់ទប់ទល់នឹង COVID-19 ទម្រង់ដើម ក៏ដូចជាវ៉ារ្យ៉ង់ Alpha, Beta, Gamma និង Delta។

ការពិសោធលើសត្វបង្ហាញថា ការប្រើប្រាស់ Ad5-nCoV ធ្វើជាដូសជំរុញ បន្ទាប់ពីបានចាក់វ៉ាក់សាំងប្រភេទវីរុសអសកម្ម (inactivated vaccine) បាន 2 ដូស ផ្ដល់ផលល្អជាង បើធៀបនឹងការចាក់វ៉ាក់សាំងបច្ចេកវិទ្យា mRNA (ដូចជា Pfizer) ធ្វើជាដូសជំរុញ។ ប្រភេទវ៉ាក់សាំងវីរុសអសកម្ម និងវ៉ាក់សាំងប្រភេទ Subunit vaccine មានប្រសិទ្ធភាពទាបជាង នៅពេលប្រើជាដូសរំលឹក បើធៀបនឹង Ad5-nCoV និង mRNA ដោយបរិមាណអង្គបដិប្រាណខុសគ្នាជិត 10 ដង។

លទ្ធផលនៃការពិសោធថ្មីបំផុតបង្ហាញថា ក្មេងចាប់ពីអាយុ 6-17 ឆ្នាំ ប្រើប្រាស់ Ad5-nCoV ក្នុងបរិមាណទាប មានសុវត្ថិភាពខ្ពស់ អត្រាបង្កផលប៉ះពាល់ទាបជាង ធៀបនឹងមនុស្សពេញវ័យ។

បើសិនវ៉ាក់សាំងប្រភេទខ្យល់ Ad5-nCoV ទទួលបានការអនុម័តឱ្យប្រើប្រាស់បន្ទាន់ នោះវានឹងក្លាយជាវ៉ាក់សាំងដំបូងគេលើពិភពលោក ដែលមានប្រសិទ្ធភាពបង្ការវីរុស COVID-19 ក្នុងទម្រង់ចំនួន 3 នៅលើរាងកាយមនុស្ស គឺ ទម្រង់រាវ ទម្រង់កោសិកា និងទម្រង់ភ្នាស។ នេះបើតាម Tao Lina អ្នកឯកទេសក្នុងវិស័យវ៉ាក់សាំង នៅទីក្រុងសៀងហៃ ប្រទេសចិន។

វ៉ាក់សាំងប្រភេទសម្រាប់ស្រូបតាមផ្លូវដង្ហើមនេះ អាចជំរុញប្រព័ន្ធភាពស៊ាំនៅក្នុងស្រទាប់ភ្នាសទឹករំអិលនៃប្រព័ន្ធផ្លូវដង្ហើមធ្វើការប្រតិកម្មបញ្ចេញអង្គបដិប្រាណ ជួយបន្ថយការឈឺចាប់ និងងាយប្រើប្រាស់ ពិសេសចំពោះកុមារ និងមនុស្សដែលងាយរងរបួស ព្រោះវាមិនបង្កឱ្យហើម និងឈឺចាប់ដូចការចាក់ដោយម្ជុលនោះទេ។ ក្រៅពីនេះ បរិមាណនៃវ៉ាក់សាំងប្រភេទខ្យល់របស់ CanSinoBIO ស្មើនឹង 1/5 ប៉ុណ្ណោះ ធៀបនឹងប្រភេទចាក់ ដែលនេះនឹងជួយសន្សំសំច័យវ៉ាក់សាំង ក៏ដូចជាកាត់បន្ថយសម្ពាធ និងការចំណាយសម្រាប់ការផលិតផងដែរ៕

September 23, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 23 ខែកញ្ញា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 22 កញ្ញា 2021 រួមមាន៖

– ឆ្លងថ្មី = 638 នាក់

– ជាសះស្បើយថ្មី = 479 នាក់

– ស្លាប់ថ្មី = 22 នាក់។

ក្នុងចំណោមអ្នកឆ្លងថ្មីទាំង 638 នាក់ មាន៖

– ករណីឆ្លងសហគមន៍ 525 នាក់

– អ្នកដំណើរពីបរទេស 113 នាក់

គិតត្រឹមព្រឹកថ្ងៃទី 23 ខែកញ្ញា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖

– អ្នកឆ្លងសរុប=106,619 នាក់

– អ្នកជាសះស្បើយ=99,134 នាក់

– អ្នកស្លាប់=2,176 នាក់

តួលេខ COVID-19 នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុប = 230,882,741 នាក់

– អ្នកជាសះស្បើយ = 207,590,922 នាក់

– អ្នកស្លាប់ = 4,732,838 នាក់

– អ្នកកំពុងព្យាបាល = 18,558,981 នាក់

September 23, 2021

អាជ្ញាធរថៃ ចាប់ខ្លួនមន្ត្រីប៉ូលិសថ្នាក់វរសេនីយ៍ឯកម្នាក់ ដែលមានរថយន្តទំនើបជាង 40 គ្រឿង

ក្រោយពីបានចាប់ខ្លួនវរសេនីយ៍ឯក Thitisan Utthanaphon ដោយជាប់ទាក់ទិននឹងការធ្វើទារុណកម្មលើជនសង្ស័យ ក្រុមមន្ត្រីថៃ ក៏បានរកឃើញថា មន្ត្រីប៉ូលិសរូបនេះ មានរថយន្តទំនើបរហូតដល់ 42 គ្រឿង។

Thitisan Utthanaphon អាយុ 41 ឆ្នាំ ជាអតីតស្នងការប៉ូលិស នៅទីក្រុង Nakhon Sawan ដែលស្ថិតនៅភាគកណ្ដាលប្រទេសថៃ កាលពីថ្ងៃទី 11 កញ្ញា ត្រូវបានចោទប្រកាន់ពីបទសម្លាប់មនុស្ស រំលោភអំណាច រួមនឹងបទចោទប្រកាន់ជាច្រើនផ្សេងទៀត។ Thitisan Utthanaphon ត្រូវបានគេជឿថា បានធ្វើទារុណកម្ម បណ្ដាលឱ្យជនសង្ស័យទាក់ទងនឹងគ្រឿងញៀនម្នាក់ស្លាប់ដោយសារថប់ដង្ហើម ព្រោះតែត្រូវបានគេរុំក្បាលនឹងថង់ប្លាស្ទិក 6 ជាន់ កាលពីខែសីហា។ នេះបើតាមសារព័ត៌មាន AFP។

ករណីស្លាប់ខាងលើត្រូវបានការិយាល័យស្នងការប៉ូលិសរបស់ Thitisan Utthanaphon បិទបាំង និងកត់ត្រាចូលកំណត់ហេតុថា ស្លាប់ដោយសារប្រតិកម្មថ្នាំ។ ក៏ប៉ុន្តែ មេធាវីម្នាក់បានបង្ហើបឱ្យដឹងពីមូលហេតុនៃការស្លាប់របស់ជនសង្ស័យនៅលើបណ្ដាញសង្គម។ បន្ទាប់មក Thitisan ក៏ត្រូវបានផ្ទេរទៅខេត្តក្បែរខាង ដោយសារតែអន្តរាគមន៍ពីឪពុកមិត្តស្រី។

មេធាវីមួយរូបទៀតក៏បានបន្តបញ្ចេញវីដេអូដែលថ្នាក់ក្រោមម្នាក់របស់ Thitisan ថតបាន ដែលបង្ហាញថា Thitisan ច្របាច់កជនសង្ស័យដែលកំពុងជាប់ខ្លោះ ខណៈអ្នកផ្សេងចាប់ដៃជើង។ វីដេអូនេះត្រូវបានគេចែករំលែកពេញបណ្ដាញសង្គម ធ្វើឱ្យប៉ូលិសត្រូវចាប់ Thitisan រួមនឹងមន្ត្រីមួយចំនួន។ Thitisan បានបដិសេធរាល់ការចោទប្រកាន់។

មេធាវី Sittra Biabungkerd ដែលជាអ្នកបង្ហោះវីដេអូខាងលើ បានឱ្យដឹងថា ធ្វើដូច្នេះគឺដើម្បីទាប់ស្កាត់ប៉ូលិស «ជួយគ្នាឯងឱ្យរួចពីទោសមនុស្សឃាត»។

«មនុស្សជាច្រើនអាចយល់ឃើញថា ការប្រើប្រាស់ថង់ប្លាស្ទិកដើម្បីសួរចម្លើយជនសង្ស័យ លែងមានទៀតហើយ ព្រោះតែសម័យកាលបានប្ដូរផ្លាស់។ ប៉ុន្តែ តាមពិត វានៅតែកើតមានឡើងដោយសម្ងាត់» មេធាវីខាងលើបន្ថែម។

ក្រោយពី Thitisan ត្រូវបានចាប់ខ្លួន សារព័ត៌មាននានានាំគ្នាបើកកកាយអំពីការរស់នៅប្រកបដោយភាពហ៊ឺហា និងមានទំនាក់ទំនងជាមួយក្រុមមនុស្សល្បីឈ្មោះរបស់ជងនេះ។ ក្រុមអ្នកស៊ើបអង្កេតក៏បានរកឃើញថា Thitisan មានភូមិគ្រឹះប្រណិតមួយនៅ បាងកក, រថយន្តទំនើប 42 គ្រឿង ក្នុងនោះក៏មាន Lamborghini Aventador 1 គ្រឿង តម្លៃ 1.5 លានដុល្លារ និងទ្រព្យសម្បត្តិប្រមាណ 18 លានដុល្លារ បើទោះប្រាក់ខែរបស់ជននេះត្រឹមប្រហែល 40,000 បាត/ខែ (ជិត 1,200 ដុល្លារ)។

Thitisan Utthanaphon ត្រូវបានគេជឿថា បានធ្វើទារុណកម្ម បណ្ដាលឱ្យជនសង្ស័យទាក់ទងនឹងគ្រឿងញៀនម្នាក់ស្លាប់

«មនុស្សម្នាក់ដែលមានប្រាក់ខែកម្រិតនេះ បែរជាអាចទិញរថយន្តបានជាង 40 គ្រឿង បូករួមទាំងរថយន្តធុនថ្លៃ» Srisuwan Janya ដែលជាសកម្មជនប្រឆាំងអំពើពុករលួយ បញ្ចេញមតិដូច្នេះ និងបានឱ្យដឹងថា អង្គភាពប្រឆាំងអំពើលាងលុយកខ្វក់ត្រូវបានស្នើឱ្យស្រាវជ្រាវលើទ្រព្យសម្បត្តិរបស់ Thitisan។

មួយផ្នែកនៃទ្រព្យរបស់ Thitisan គឺបានមកពីការដេញថ្លៃរថយន្តទំនើបនាំចូលរាប់រយគ្រឿងដែលត្រូវបានស្ថាប័នគយរបស់ប្រទេសថៃ រឹបអូស។ ក្រុមមន្ត្រីស៊ើបអង្កេតគ្រោងនឹងបញ្ជូនសំណុំរឿងទៅកាន់អង្គភាពប្រឆាំងអំពើពុករលួយថ្នាក់ជាតិ នៅថ្ងៃទី 24 កញ្ញា មុនពេលសម្រេចស្នើតុលាការកាត់ទោស៕

September 23, 2021

តួលេខវិជ្ជមាននឹង COVID-19 ថយចុះទាបខ្លាំងនៅទូទាំងពិភពលោក កាលពីសប្ដាហ៍មុន

WHO បានឱ្យដឹងថា តួលេខនៃករណីឆ្លង COVID-19 ទូទាំងសកលលោកកាលពីសប្ដាហ៍មុន បានថយចុះប្រហែល 400,000 នាក់ ធៀបនឹងមួយសប្ដាហ៍មុននោះ ដែលនេះគឺជាការថយចុះដំបូងនៅក្នុងរយៈពេល 2 ខែ។

អង្គការសុខភាពិភពលោក (WHO) បានឱ្យដឹងថា ពិភពលោកបានរកឃើញអ្នកវិជ្ជមានថ្មីចំនួន 3.6 លាននាក់ នៅក្នុង 1 សប្ដាហ៍កន្លងទៅ ពោលគឺថយចុះ 400,000 នាក់ ធៀបនឹងតួលេខអ្នកវិជ្ជមាន 4 លាននាក់ កាលពី 1 សប្ដាហ៍មុននោះ។ តំបន់ចំនួន 2 ដែលត្រូវបានរាយការណ៍ថា ថយចុះច្រើនជាងគេគឺ មជ្ឈិមបូព៌ា (22%) និង អាស៊ីអាគ្នេយ៍ (16%)។ ករណីវិជ្ជមានថ្មីស្ទើរតែទាំងអស់ស្ថិតនៅ សហរដ្ឋអាម៉េរិក, ឥណ្ឌា, អង់គ្លេស, តួកគី និង ហ្វីលីពីន។ វីរុស COVID-19 ប្រភេទ ឌែលតា (Delta) បានបង្ហាញវត្តមាននៅក្នុងប្រទេសចំនួន 185 និងក្លាយជាវ៉ារ្យ៉ង់ដែលលេចធ្លោជាងគេនៅទូទាំងពិភពលោក។

ចំណែកតួលេខអ្នកស្លាប់ដោយសារ COVID-19 នៅទូទាំងពិភពលោក ក៏ថយចុះ 7% នៅក្នុងសប្ដាហ៍កន្លង ដោយមានអ្នកជំងឺ 60,000 នាក់បានស្លាប់។ អាស៊ីអាគ្នេយ៍ គឺជាតំបន់ដែលមានករណីស្លាប់ថយចុះច្រើនជាងគេ (30%)។

ពិភពលោកបានរកឃើញអ្នកវិជ្ជមាននឹង COVID-19 សរុបចំនួន 230,868,745 នាក់ ក្នុងនោះមានអ្នកស្លាប់ 4,732,669 នាក់, ជាសះស្បើយ 207,561,828 នាក់ និង កំពុងព្យាបាលចំនួន 18,574,248 នាក់។

គិតមកដល់បច្ចុប្បន្ន វ៉ាក់សាំង COVID-19 ជាង 6 ពាន់លានដូស ត្រូវបានប្រើប្រាស់នៅទូទាំងសកលលោក ក្នុងនោះ ពលរដ្ឋចំនួន 43.7% បានចាក់យ៉ាងតិច 1 ដូស ប៉ុន្តែ នៅក្នុងបណ្ដាប្រទេសដែលមានប្រាក់ចំណូលទាប អត្រានេះមានត្រឹមតែ 2% ប៉ុណ្ណោះ៕

September 23, 2021

មេដឹកនាំក្រុមអង្គរក្សផ្ទាល់របស់ ប៊ីន ឡាដែន ក្លាយជាមេបញ្ជាការកងទ័ពរបស់ តាលីបង់

ហាក មូចាហ៊ីដ (Haq Mujahid) មេបញ្ជាការរបស់ក្រុម «អង្គរក្សឈុតខ្មៅ» របស់មេភេរវករ អូសាម៉ា ប៊ីន ឡាដែន (Osama bin Laden) ត្រូវបាន តាលីបង់ តែងតាំងជាមេបញ្ជាការនៃទាហានមួយក្រុមនៅ អាហ្វហ្គានីស្ថាន។

«អានវ៉ារ អ៊ុល ហាក មូចាហ៊ីដ (Anwar ul Haq Mujahid) បានត្រលប់មកវិញ ដោយមានការអមការពារពីយានជំនិះរាប់រយគ្រឿង និងមនុស្សរាប់ពាន់នាក់ទទួលស្វាគមន៍នៅតំបន់ ចាឡាឡាបាដ (Jalalabad)» អតីតមន្ត្រីចារកម្មជាន់ខ្ពស់ម្នាក់របស់រដ្ឋាភិបាល អាហ្វហ្គានីស្ថាន ចាស់ បានឱ្យដឹងនៅសប្ដាហ៍នេះ។

អតីតមន្ត្រីខាងលើបន្ថែមថា ហាក មូចាហ៊ីដ ត្រលប់មកវិញជាមួយនឹងក្រុមមនុស្សដែលធ្លាប់បានសហការយ៉ាងជិតស្និទ្ធជាមួយនឹងអង្គការភេរវកម្ម អាល់កៃដា កាលពីឆ្នាំ 2001។ ហាក មូចាហ៊ីដ ត្រូវបានគេជឿថា កំពុងដឹកនាំទាហានមួយក្រុមរបស់ តាលីបង់ និងទាហានស៊ី បរទេសមួយក្រុម នៅភាគខាងកើតនៃប្រទេស អាហ្វហ្គានីស្ថាន។ នេះបើតាមសារព័ត៌មាន Daily Mail។

ហ្វីលីពប៉ូ រ៉ូស្ស៊ី (Filippo Rossi) និងមន្ត្រីជាន់ខ្ពស់មួយរូបរបស់អង្គការសហប្រជាជាតិ ក៏បានបញ្ជាក់អំពីព័ត៌មានដែលថា ហាក មូចាហ៊ីដ ត្រូវបាន តាលីបង់ តែងតាំងជាមេបញ្ជាការកងទ័ព។

អានវ៉ារ អ៊ុល ហាក មូចាហ៊ីដ (Anwar ul Haq Mujahid)

ហាក មូចាហ៊ីដ គឺជាមេដឹកនាំក្រុម «អង្គរក្សឈុតខ្មៅ» (Black Guards) របស់មេភេរវករ អូសាម៉ា ប៊ិន ឡាដែន។ ហាក មូចាហ៊ីដ ធ្លាប់បានជួយឱ្យ ប៊ិន ឡាដែន គេចផុតពីការតាមប្រមាញ់របស់កងទ័ព សហរដ្ឋអាម៉េរិក នៅ អាហ្វហ្គានីស្ថាន កាលពីឆ្នាំ 2001។

តាលីបង់ មិនទាន់ប្រតិកម្មអ្វីទៅនឹងព័ត៌មានខាងលើនៅឡើយ។ កន្លងមក តាលីបង់ ធ្លាប់បានបដិសេធអំពីទំនាក់ទំនងជាសម្ព័ន្ធមិត្តជាមួយនឹងក្រុម អាល់កៃដា បើទោះជាអតីតអគ្គរដ្ឋទូតរបស់ អាម៉េរិក ប្រចាំ អាហ្វហ្គានីស្ថាន លោក រ៉ូណាលដ៍ នូម៉ាន់ (Ronald Neumann) ប្រកាសថា អាល់កៃដា នៅតែមានវត្តមានក្នុងប្រទេសអាហ្វហ្គានីស្ថាន និងទាក់ទងយ៉ាងជិតស្និទ្ធជាមួយ តាលីបង់។

អ្នកនាំពាក្យរបស់ តាលីបង់ លោក ហ្សាប៊ីលហ៊ុល្លា មូចាហ៊ីដ (Zabihullah Mujahid) កាលពីខែមុនបានប្រកាសថា ពុំមានភ័ស្ដុតាងណាមួយបញ្ជាក់ថា អូសាម៉ា ប៊ីន ឡាដែន គឺជាមេខ្លោងនៃអំពើភេរវកម្មនៅ សហរដ្ឋអាម៉េរិក កាលពីថ្ងៃទី 11 កញ្ញានោះឡើយ បើទោះជា ប៊ីន ឡាដែន ធ្លាប់បានទទួលស្គាល់នៅក្នុងខ្សែអាត់សំឡេង៕

September 22, 2021

ឥណ្ឌា ចាប់បានថ្នាំញៀន ហេរ៉ូអ៊ីន ជិត 3 តោន ពី អាហ្វហ្គានីស្ថាន

អាជ្ញាធរឥណ្ឌា បានរឹបអូស ហេរ៉ូអ៊ីន ជាង 2.9 តោន ដែលមានតម្លៃ 2.72 ពាន់លានដុល្លារពីប្រទេសអាហ្វហ្គានីស្ថាន ក្រោយ តាលីបង់ ឡើងកាន់អំណាចនៅប្រទេសនេះបាន 1 ខែ។

មន្ត្រីម្នាក់នៅក្នុងរដ្ឋ Gujarat របស់ប្រទេសឥណ្ឌា កាលពីថ្ងៃទី 21 កញ្ញា បានឱ្យដឹងថា នាយកដ្ឋានស៊ើបការណ៍ផ្នែកប្រាក់ចំណូល (DRI) ជាស្ថាប័នប្រឆាំងអំពើគេចពន្ធកំពូលរបស់ ឥណ្ឌា កាលពីសប្ដាហ៍មុន បានត្រួតពិនិត្យកុងតឺន័រចំនួន 2 នៅឯកំពង់ផែ Mundra ក្រោយពីទទួលបានព័ត៌មានអំពីសកម្មភាពដឹកជញ្ជូនគ្រឿងញៀន។

ក្រុមហ៊ុនមួយនៅក្នុងទីក្រុង Vijayawada នៅភាគខាងត្បូងនៃប្រទេសឥណ្ឌា គឺជាអ្នកនាំចូលកុងតឺន័រទាំងនេះ។ ពេលត្រួតពិនិត្យ អាជ្ញាធរបានរកឃើញថ្នាំញៀនប្រភេទ ហេរ៉ូអ៊ីន ទម្ងន់ 2,989 គីឡូក្រាម ដែលមានប្រភពពីប្រទេសអាហ្វហ្គានីស្ថាន។ ប៉ូលិសបានចាប់ខ្លួនមនុស្ស 2 នាក់ដែលជាប់ទាក់ទិននឹងការដឹកជញ្ជូន ហើយកំពុងសួរចម្លើយពលរដ្ឋអាហ្វហ្គានីស្ថាន ជាច្រើននាក់ផ្សេងទៀតដែលជាប់ទាក់ទង។

បុរសជនជាតិអាហ្វហ្គានីស្ថានម្នាក់ កំពុងប្រមូលផ្កាអាភៀន នៅក្នុងខេត្ត Jalalabad កាលពីឆ្នាំ 2014

ក្រុមមន្ត្រីឱ្យដឹងថា កុងតឺន័រ ទាំង 2 ខាងលើ ដែលត្រូវបានប្រកាសថា ផ្ទុកថ្ម talc ជាធាតុរ៉ែមួយប្រភេទដែលត្រូវបានប្រើប្រាស់ច្រើននៅក្នុងវិស័យឧស្សាហកម្មគីមី និងសេរ៉ាមិច គឺមកពីប្រទេសអាហ្វហ្កានីស្ថាន។

កុងតឺន័រទាំងនេះត្រូវបានដឹកពីកំពង់ផែ Bandar Abbas របស់ប្រទេសអ៊ីរ៉ង់ ទៅកាន់កំពង់ផែ Gujarat Mundra ប្រទេសឥណ្ឌា។

អាហ្វហ្គានីស្ថាន គឺជាប្រទេសមួយក្នុងចំណោមប្រទេសដែលផ្គត់ផ្គង់អាភៀនធំជាងគេក្នុងពិភពលោក។ ក្រោយពីបានឡើងកាន់អំណាចនៅ អាហ្វហ្គានីស្ថាន តាលីបង់ បានប្រកាសថា នឹងហាមឃាត់សកម្មភាពជួញដូរថ្នាំញៀន ប៉ុន្តែ មិនទាន់ឱ្យដឹងសេចក្ដីលម្អិត ក៏ដូចជាវិធីសាស្ត្រក្នុងការអនុវត្តរបស់ពួកគេនៅឡើយ៕

September 22, 2021

រដ្ឋប្រហារយោធានៅប្រទេសស៊ូដង់ ទទួលបរាជ័យ»

មន្ត្រីយោធានៃប្រទេសស៊ូដង់ ប្រហែល 40 នាក់ ត្រូវបានចាប់ខ្លួន បន្ទាប់ពីព្យាយាមដណ្ដើមកាន់កាប់ស្ថានីយទូរទស្សន៍ជាតិ និងបញ្ជាការដ្ឋានកងទ័ព នៅក្នុងផែនការរដ្ឋប្រហារដែលមិនបានសម្រេច។

«កងទ័ពបានរាំងខ្ទប់ផែនការធ្វើរដ្ឋប្រហារ ហើយស្ថានការណ៍ត្រូវបានគ្រប់គ្រងទាំងស្រុង» ទីប្រឹក្សាផ្នែកសារព័ត៌មានរបស់ឧត្តមសេនីយ៍ Abdelfattah al-Burhan និងប្រធានក្រុមប្រឹក្សាអធិបតេយ្យ ស៊ូដង់ បានប្រាប់សារព័ត៌មានកាលពីម្សិលមិញដូច្នេះ។

យោងតាមប្រភពព័ត៌មានពីមន្ត្រីជាន់ខ្ពស់ដែលសុំមិនបញ្ចេញឈ្មោះ ទាហានប្រហែល 40 នាក់ ត្រូវបានចាប់ខ្លួនក្នុងពេលកំពុងព្យាយាមដណ្ដើមកាន់កាប់អគារនានារបស់ស្ថានីយទូរទស្សន៍ជាតិ និងបញ្ជាការដ្ឋានកងទ័ព។ អាជ្ញាធររដ្ឋាភិបាលនៃប្រទេសស៊ូដង់ បានចោទប្រកាន់កងកម្លាំងដែលបានចូលរួមធ្វើរដ្ឋប្រហារនេះថា ជាប់ទាក់ទិននឹងអតីតប្រធានាធិបតី Omar al-Bashir ដែលត្រូវបានផ្ដួលរំលំកាលពីឆ្នាំ 2019។

«យើងធានាចំពោះប្រជាពលរដ្ឋនៃប្រទេសស៊ូដង់ ថា ស្ថានការណ៍ត្រូវបានគ្រប់គ្រងទាំងស្រុង។ សមាជិកកងទ័ព និងកម្លាំងស៊ីវិលដែលចូលរួមធ្វើរដ្ឋប្រហារ ត្រូវបានចាប់ខ្លួន និងកំពុងត្រូវបានសួរចម្លើយ» Hamza Balol អ្នកនាំពាក្យរបស់រដ្ឋាភិបាលស៊ូដង់ ប្រកាសលើទូរទស្សន៍ដូច្នេះ និងបន្ថែមថា ពួកគេកំពុងបន្តស្វែងរកក្រុមមនុស្សស្មោះស្ម័គ្រនឹង Bashir ដែលបានចូលរួមធ្វើរដ្ឋប្រហារនេះ។

Abdalla Hamdok គឺជានាយករដ្ឋមន្ត្រីបណ្ដោះអាសន្ននៅ ស៊ូដង់ ក្រោយរដ្ឋប្រហារទម្លាក់ប្រធានាធិបតី Omar al-Bashir កាលពីឆ្នាំ 2019

អតីតប្រធានាធិបតី Omar al-Bashir បច្ចុប្បន្នត្រូវបានឃុំខ្លួននៅក្នុងពន្ធនាគារមួយក្នុងតំបន់ Khartoum និងប្រឈមនឹងការចោទប្រកាន់ជាច្រើន។ ក្រុមប្រឹក្សាអធិបតេយ្យស៊ូដង់ កំពុងរ៉ាប់រងលើការដឹកនាំប្រទេស ដោយយោងទៅតាមកិច្ចព្រមព្រៀងចែករំលែកអំណាចរវាងកងទ័ព និងកងកម្លាំងស៊ីវិល ចាប់តាំងពី Bashir ត្រូវបានផ្ដួលរំលំ។ ការបោះឆ្នោតនានា តាមគម្រោងនឹងត្រូវធ្វើឡើងនៅក្នុងឆ្នាំ 2024។

នេះមិនមែនជាលើកដំបូងដែលរដ្ឋាភិបាលបណ្ដោះអាសន្នរបស់ប្រទេសស៊ូដង់ ត្រូវប្រឈមនឹងឧបសគ្គ។ ពួកគេបានឱ្យដឹងថា កន្លងមកក៏ធ្លាប់មានការព្យាយាមធ្វើរដ្ឋប្រហារជាច្រើនលើក ដែលជាប់ទាក់ទិននឹងក្រុមគាំទ្ររបស់លោក Bashir ប៉ុន្តែ ត្រូវបានបែកធ្លាយជាព័ត៌មាន ឬត្រូវបានកម្ចាត់។ កាលពីឆ្នាំមុន នាយករដ្ឋមន្ត្រី ស៊ូដង់ Abdalla Hamdok បានរួចពីការស្លាប់ នៅពេលត្រូវគេលួចធ្វើឃាតនៅឯ Khmartoum។

ស៊ូដង់ ជាប្រទេសមួយដែលមានប្រវត្តិរដ្ឋប្រហារជាច្រើនលើក និងយូរអង្វែង។ Bashir បានក្លាយជាប្រធានាធិបតី ក្រោយពីរដ្ឋប្រហារដែលគាំទ្រដោយសាសនិកអ៊ីស្លាម កាលពីឆ្នាំ 1989។ លោក Bashir គឺជាប្រធានាធិបតីមួយរូបក្នុងចំណោមប្រធានាធិបតីច្រើនរូបដែលកាន់អំណាចយូរជាងគេនៅ ស៊ូដង់ (ជិត 30 ឆ្នាំ) និងត្រូវបានតុលាការព្រហ្មទណ្ឌអន្តរជាតិ តាមចាប់ខ្លួនពីបទប្រល័យពូជសាសន៍ និងឧក្រិដ្ឋកម្មសង្គ្រាម។

លោក Bashir ត្រូវបានចាប់ខ្លួនកាលពីខែមេសា ឆ្នាំ 2019 នៅក្នុងរដ្ឋប្រហារយោធា ក្រោយពលរដ្ឋចេញធ្វើបាតុកម្មអស់រយៈពេល 4 ខែ ដើម្បីទាមទារឱ្យលោកលាលែងពីតំណែង៕

September 22, 2021

(វីដេអូ)-កម្អែភ្នំភ្លើង លេបត្របាក់ភូមិឋាន! រាប់ពាន់នាក់ត្រូវជម្លៀសខ្លួន

អេស្ប៉ាញ៖ កម្អែភ្នំភ្លើងក្រហមឆ្អៅហូរដូចគេចាក់បបរនៅលើខ្នងភ្នំ និងហូរកាត់ចូលក្នុងតំបន់ភូមិឋានរបស់ប្រជាជននៅលើប្រជុំកោះ Canary បន្ទាប់ពីមានបន្ទុះភ្នំភ្លើងកើតឡើង។

ការផ្ទុះភ្នំភ្លើងនៅលើកោះ Canary កាលពីថ្ងៃទី 19 កញ្ញា គឺជាបន្ទុះភ្នំភ្លើងលើកទីមួយ ក្រោយរយៈពេល 50 ឆ្នាំកន្លងទៅ។ បន្ទុះភ្នំភ្លើងនេះ បាញ់កម្អែឡើងទៅលើអាកាសកម្ពស់រាប់រយម៉ែត្រ និងបានពន្លិចតំបន់ព្រៃស្ទើរតែទាំងស្រុង។ វីដេអូនានាបានបង្ហាញថា កម្អែភ្នំភ្លើងកំពុងហូរតាមជម្រាលភ្នំ ឆ្ពោះទៅកាន់សមុទ្រ។

កម្អែរបស់ភ្នំភ្លើងក៏បានហូរចូលក្នុងភូមិរបស់ប្រជាជននៅលើកោះ La Palma ដែលជាកោះមួយនៅភាគពាយព្យរបស់ប្រជុំកោះ Canary។ សាក្សីម្នាក់និយាយថា កម្អែភ្នំភ្លើង ហូរនៅលើផ្លូវ និងចាក់ចូលក្នុងផ្ទះរបស់ប្រជាជន ធ្វើឱ្យគ្រប់យ៉ាងត្រូវរលាយគ្មានសល់។

ផ្ទះប្រហែល 100 ខ្នង ត្រូវបានបំផ្លាញទាំងស្រុង ខណៈមនុស្សជាង 5,500 នាក់ ត្រូវជម្លៀសចេញពីតំបន់កើតហេតុ។ ប៉ុន្តែ ពុំទាន់មានករណីស្លាប់ ឬរបួសណាមួយត្រូវបានរាយការណ៍នៅឡើយ។

ផ្លូវចំនួន 6 ខ្សែដែលនៅលើកោះ ត្រូវបានបិទ។ ក្រុមមន្ត្រីបានស្នើឱ្យពលរដ្ឋកុំស្លន់ស្លោខ្លាំងពេក ហើយត្រូវជម្លៀសទៅតាមការណែនាំរបស់អាជ្ញាធរ។

Miguel Angel Morcuende អ្នកចាត់ចែងកិច្ចការបន្ទាន់ក្នុងតំបន់ បានឱ្យដឹងថា កម្អែភ្នំភ្លើងនេះផ្លាស់ទីយឺតជាងការព្យាករ និងកំពុងឆ្ពោះទៅកាន់សមុទ្រ។

នាយករដ្ឋមន្ត្រី Pedro Sanchez កាលពីថ្ងៃទី 20 កញ្ញា បានទៅពិនិត្យតំបន់ដែលរងផលប៉ះពាល់ និងបានសរសើរដល់កងកម្លាំងសង្គ្រោះបន្ទាន់នៅទីនោះ។

នាយកដ្ឋានអាកាសចរណ៍ស៊ីវិល Enaire ឱ្យដឹងថា ដែនអាកាសជុំវិញប្រជុំកោះ Canary នៅតែបើកដំណើរការ ដោយសារធូលី និងផ្សែងរបស់ភ្នំភ្លើង មិនទាន់បង្កការលំបាកដល់ការហោះហើរនៅឡើយ៕

September 21, 2021

តួលេខនៃការស្លាប់ដោយសារវីរុស COVID-19 នាបច្ចុប្បន្ន និង H1N1 កាលពីឆ្នាំ 1918 នៅ សហរដ្ឋអាម៉េរិក

ចំនួនមនុស្សដែលបានស្លាប់ដោយសារវីរុស COVID-19 នៅ សហរដ្ឋអាម៉េរិក បានកើនលើសពី 675,000 នាក់ ដែលជាតួលេខអ្នកស្លាប់ដោយសារវីរុស H1N1 នៅប្រទេសនេះ ក្នុងសោកនាដកម្មដែលបង្កឡើងដោយរោគរាតត្បាតសកល កាលពីឆ្នាំ 1918។

ទិន្នន័យរបស់សាកលវិទ្យាល័យ Johns Hopkins បានឱ្យដឹងថា គិតត្រឹមថ្ងៃទី 17 កញ្ញា សហរដ្ឋអាម៉េរិក មានអ្នកស្លាប់ចំនួន 675,722 នាក់ដោយសារឆ្លង COVID-19។ ក្រោយពីបានសម្លាប់មនុស្សជាង 675,000 នាក់នៅ សហរដ្ឋអាម៉េរិក កាលពីឆ្នាំ 1918 វីរុស H1N1 ក៏បានបំប្លែងខ្លួនទៅជាវីរុសផ្ដាសាយតាមរដូវ ដែលបច្ចុប្បន្នគេហៅថា A H1N1 និងបង្កផលប៉ះពាល់តិចតួច។

តួលេខនៃការស្លាប់ខាងលើបានកើតឡើងនៅពេល សហរដ្ឋអាម៉េរិក កំពុងប្រឈមនឹងរលកនៃការរាតត្បាតថ្មីដែលទាក់ទិននឹងវ៉ារ្យ៉ង់ Delta ក្នុងនោះ អត្រានៃការចាក់វ៉ាក់សាំងបានតិចគឺជាមូលហេតុចម្បងដែលនាំឱ្យមានករណីស្លាប់ច្រើន។

រោគរាតត្បាតសកលកាលពីឆ្នាំ 1918 បានបណ្ដាលឱ្យមនុស្សប្រហែល 50 លាននាក់នៅទូទាំងពិភពលោក បានស្លាប់ ចន្លោះឆ្នាំ 1918-1920 ច្រើនជាងឆ្ងាយបើធៀបនឹងចំនួនអ្នកស្លាប់ដោយសារ COVID-19 នាបច្ចុប្បន្ន ដែលមានត្រឹមជាង 4.7 លាននាក់។

តួលេខអ្នកស្លាប់ដោយសារ COVID-19 នៅ សហរដ្ឋអាម៉េរិក មានប្រហែល 14% ធៀបនឹងតួលេខសរុបរបស់ពិភពលោក ខណៈដែលចំនួនប្រជាជនរបស់ប្រទេសនេះមានត្រឹមតែ 5%។ ចំនួនប្រជាជនរបស់ អាម៉េរិក កាលពីឆ្នាំ 1918 មានមិនដល់ 1/3 ធៀបនឹងបច្ចុប្បន្ន ដូច្នេះ ចំនួនអ្នកស្លាប់នៅក្នុងវិបត្តិរោគរាតត្បាតសកលនៅដើមសតវត្សរ៍ទី 20 គឺ ប្រហាក់ប្រហែលនឹងអ្នកស្លាប់ 2.2 លាននាក់នាបច្ចុប្បន្ន។

មិនដូចទៅនឹង COVID-19 ដែលបង្កផលប៉ះពាល់ធ្ងន់ធ្ងរទៅលើក្មេងតូច និងមនុស្សចាស់ H1N1 ឆ្នាំ 1918 បានសម្លាប់មនុស្សវ័យក្មេងក្នុងអត្រាខ្ពស់។ មជ្ឈមណ្ឌលគ្រប់គ្រងនិងទប់ស្កាត់រោគឆ្លង (CDC) របស់ អាម៉េរិក ឱ្យដឹងថា ការដែលមិនមានថ្នាំ និងវ៉ាក់សាំង បានធ្វើឱ្យការប្រឹងប្រែងក្នុងការគ្រប់គ្រងជំងឺរាតត្បាតកាលពីឆ្នាំ 1918 ត្រូវជួបបញ្ហាធំ។

បច្ចុប្បន្ន វ៉ាក់សាំង COVID-19 ជាច្រើនប្រភេទដែលមានសុវត្ថិភាព និងប្រសិទ្ធភាពខ្ពស់ ត្រូវបានគេអភិវឌ្ឍ និងពិសោធដោយប្រើពេលខ្លីបំផុត។ ប៉ុន្តែ មនុស្សពេញវ័យប្រហែល 24% នៅ សហរដ្ឋអាម៉េរិក ដែលជិតស្មើនឹង 60 លាននាក់ នៅតែមិនទាន់បានចាក់វ៉ាក់សាំងណាមួយនៅឡើយ។ ក្រុមអ្នកជំនាញយល់ថា មូលហេតុដែលនាំឱ្យមានការរារែកក្នុងការទទួលការចាក់វ៉ាក់សាំងគឺមកពីវិបត្តិនៃការយល់ដឹង និងព័ត៌មានមិនពិត។

ក្រៅពីវ៉ាក់សាំង បណ្ដាវិធីសាស្ត្រព្យាបាល COVID-19 ផ្សេងទៀត ត្រូវបានអភិវឌ្ឍ ក្នុងនោះមានដូចជា ការប្រើអង្គបដិបក្ខ Monoclonal, ម៉ាស៊ីនជំនួយដង្ហើមទាន់សម័យ និងក្រុមថ្នាំប្រឆាំងបញ្ហារលាក corticoid ដើម្បីកាត់បន្ថយការប្រតិកម្មខ្លាំងក្លានៃប្រព័ន្ធភាពស៊ាំ ចំពោះអ្នកជំងឺដែលមានអាការធ្ងន់ធ្ងរ៕

September 21, 2021

Category: អន្តរជាតិ