អន្តរជាតិ - La Reine Media

ផ្លូវការ! កុមារអាយុពី 3 ឆ្នាំ ដល់ 11 ឆ្នាំ ទទួលការចាក់វ៉ាក់សាំង COVID-19 នៅ អាហ្សង់ទីន

(អាហ្សង់ទីន)-កាលពីថ្ងៃទី 12 តុលា រដ្ឋាភិបាលប្រទេសអាហ្សង់ទីន បានចាប់ផ្ដើមយុទ្ធនាការចាក់វ៉ាក់សាំងបង្ការ COVID-19 ដល់កុមារដែលមានអាយុចាប់ពី 3 ឆ្នាំ ដល់ 11 ឆ្នាំ បន្ទាប់ពីត្រូវបានអគ្គនាយកដ្ឋានគ្រប់គ្រងឱសថ ស្បៀងអាហារ និងបច្ចេកវិទ្យាសុខាភិបាល (ANMAT) ផ្ដល់ការអនុម័តកាលពីដើមខែនេះ។

ប្រភពព័ត៌មានពីរដ្ឋធានី ប៊ុយណូស៊ែ (Buenos Aires) ឱ្យដឹងថា រដ្ឋមន្ត្រីក្រសួងសុខាភិបាល Carla Vizzotii បានថ្លែងថា យុទ្ធនាការចាក់វ៉ាក់សាំងឱ្យកុមារ ត្រូវបានធ្វើឡើងក្នុងពេលតែមួយនៅទូទាំងប្រទេស ហើយនេះនឹងក្លាយជាមូលដ្ឋានដើម្បីឱ្យ អាហ្សង់ទីន ឆ្ពោះទៅសម្រេចគោលដៅចាក់វ៉ាក់សាំងដល់ពលរដ្ឋនៅចុងឆ្នាំ 2021។

ដើម្បីអនុវត្តផែនការនេះ រដ្ឋាភិបាលអាហ្សង់ទីន បានបែងចែកវ៉ាក់សាំងរបស់ក្រុមហ៊ុនចិន Sinopharm ជាង 2 លានដូស ទៅឱ្យតំបន់នៅមូលដ្ឋាន។ ក្រៅពីនេះ អាហ្សង់ទីន ក៏នៅមានវ៉ាក់សាំងប្រភេទនេះជាង 9 លានដូសទៀត សម្រាប់ចាក់ឱ្យកុមារ។

ទន្ទឹមនឹងនេះ រដ្ឋាភិបាល ក៏បែងចែកវ៉ាក់សាំងរបស់ Pfizer ចំនួន 1.6 លានដូស ដើម្បីបន្តយុទ្ធនាការចាក់វ៉ាក់សាំងដល់ក្មេងជំទង់ដែលមានវ័យចាប់ពី 12 ឆ្នាំឡើងទៅផងដែរ។

យោងតាមទិន្នន័យផ្លូវការ បច្ចុប្បន្នប្រជាជនរបស់ អាហ្សង់ទីន ប្រមាណ 23.9 លាននាក់ ស្មើនឹង 52% នៃប្រជាជនសរុប បានទទួលការចាក់វ៉ាក់សាំងបង្ការ COVID-19 រួចរាល់ និង 30.1 លាននាក់ ស្មើនឹង 66% នៃប្រជាជនសរុប បានចាក់យ៉ាងតិច 1 ដូស។

ប្រទេសអាហ្សង់ទីន មានអ្នកឆ្លងវីរុស COVID-19 សរុបជាង 5.2 លាននាក់ ក្នុងនោះមាន 115,491 នាក់ បានស្លាប់។ ប៉ុន្តែ ប៉ុន្មានខែកន្លងមកនេះ តួលេខនៃការឆ្លងវីរុស បានថយចុះគួរឱ្យកត់សម្គាល់ ដោយមានជាមធ្យម 1,000 នាក់/ថ្ងៃ៕

October 13, 2021

រុស្ស៊ី ពិសោធវ៉ាក់សាំងបង្ការ COVID-19 ប្រភេទបាញ់ចូលតាមរន្ធច្រមុះ

ប្រទេសរុស្ស៊ី នឹងធ្វើការពិសោធវ៉ាក់សាំងបង្ការ COVID-19 ឈ្មោះ Sputnik V ប្រភេទបាញ់ចូលតាមរន្ធច្រមុះ នៅលើអ្នកស្ម័គ្រចិត្តពេញវ័យ ដើម្បីរួមចំណែកគ្រប់គ្រងករណីឆ្លង និងស្លាប់ដោយសារវីរុសនេះ។

យោងតាមឯកសារចុះបញ្ជីដែលបានប្រកាសកាលពីថ្ងៃទី 12 តុលា វ៉ាក់សាំងបង្ការ COVID-19 ឈ្មោះ Sputnik V ប្រភេទបាញ់ច្រមុះនឹងត្រូវបានពិសោធជាពីរដូស នៅលើអ្នកស្ម័គ្រចិត្តពេញវ័យ នៅឯមន្ទីរពេទ្យមួយក្នុងទីក្រុង St. Petersburg។ ឯកសារនេះមិនបានបង្ហើបឱ្យដឹងអំពីពេលវេលានៃការពិសោធនេះនោះទេ។

ប្រទេសរុស្ស៊ី បានចាប់ផ្ដើមអភិវឌ្ឍវ៉ាក់សាំង Sputnik V យ៉ាងឆាប់រហ័ស បន្ទាប់ពី COVID-19 ផ្ដើមផ្ទុះឆ្លងរាលដាលកាលពីឆ្នាំមុន ប៉ុន្តែ យុទ្ធនាការនៃការចាក់វ៉ាក់សាំងត្រូវបានធ្វើឡើងយឺតៗ ដោយសារតែពលរដ្ឋប្រទេសនេះមានការរារែកចំពោះផលិតផលសុខាភិបាលថ្មី។

ប្រធានាធិបតីរុស្ស៊ី លោក Vladimir Putin កាលពីថ្ងៃទី 12 តុលា បានឱ្យដឹងថា៖ «ការចាក់វ៉ាក់សាំង ជួយការពារពលរដ្ឋពីការឆ្លងជំងឺ និងរោគសញ្ញាធ្ងន់ធ្ងរ។ យើងត្រូវការបង្កើនល្បឿននៃការចាក់វ៉ាក់សាំង»។

រុស្ស៊ី គឺជាសម្បុកវីរុស COVID-19 ធំជាងគេលំដាប់ទី 5 ក្នុងពិភពលោក ដោយមានអ្នកឆ្លងសរុបជាង 7.8 លាននាក់ និងស្លាប់ជាង 218,000 នាក់៕

October 13, 2021

ប្រទេសថៃ បើកទ្វារព្រំដែនទទួលភ្ញៀវទេសចរណ៍បរទេស

ប្រទេសថៃ នឹងបើកទ្វារទទួលភ្ញៀវទេសចរណ៍ដែលបានចាក់វ៉ាក់សាំងបង្ការ COVID-19 រួចរាល់ ពីបណ្ដាប្រទេសដែលមាន «ហានិភ័យទាប» ហើយថា អ្នកទេសចរណ៍នឹងបានដើរហើរដោយសេរី បើសិនលទ្ធផលនៃការធ្វើតេស្ត អវិជ្ជមាន។

នាយករដ្ឋមន្ត្រីថៃ លោក Prayuth Chan-ocha កាលពីម្សិលមិញ បានប្រកាសគម្រោងបើកទ្វារប្រទេសឡើងវិញដើម្បីទទួលភ្ញៀវទេសចរណ៍ពីបរទេស តាមផ្លូវអាកាស ចាប់ពីថ្ងៃទី 01 ខែវិច្ឆិកា ក្នុងគ្រាដែលវិស័យទេសចរណ៍របស់ប្រទេសនេះ ត្រូវរងផលប៉ះពាល់យ៉ាងធ្ងន់ធ្ងរដោយសារវិធានការទប់ស្កាត់ COVID-19។

«ប្រទេសថៃ នឹងបើកទ្វារសម្រាប់ភ្ញៀវទេសចរណ៍បរទេសដែលបានចាក់វ៉ាក់សាំង និងធ្វើដំណើរតាមផ្លូវអាកាសពី 10 ប្រទេសដែលមានហានិភ័យទាប។ ពួកគេត្រូវមានលទ្ធផលតេស្តអវិជ្ជមាន មុននឹងធ្វើដំណើរមក ហើយត្រូវធ្វើតេស្តម្ដងទៀត នៅពេលចូលមកដល់ប្រទេស។ បើសិនមានលទ្ធផលអវិជ្ជមាន ពួកគេអាចដើរហើរដោយសេរី ដូចទៅនឹងពលរដ្ឋថៃ» នាយករដ្ឋមន្ត្រី Prayuth ថ្លែងដូច្នេះ។

មេដឹកនាំប្រទេសថៃ រូបនេះ ក៏បានឱ្យដឹងថា ក្នុងចំណោមប្រទេសទាំង 10 ដែល ថៃ ចាត់ទុកថា មានហានិភ័យទាប ក៏មានទាំង សហរដ្ឋអាម៉េរិក, អង់គ្លេស, អាល្លឺម៉ង់ និង សិង្ហបុរី ផងដែរ។ លោក Prayuth បញ្ជាក់ថា នៅខែធ្នូខាងមុខ នឹងមានប្រទេសជាច្រើនទៀត ត្រូវបានបន្ថែមទៅក្នុងបញ្ជីឈ្មោះប្រទេសដែលមានហានិភ័យទាប។

ទិដ្ឋភាពស្ងប់ស្ងាត់នៃដងផ្លូវមួយក្នុងទីក្រុង

កាលពីមុនការផ្ទុះឆ្លងរាលដាល COVID-19 ប្រទេសថៃ ទាក់ទាញភ្ញៀវទេសចរណ៍ជិត 40 លាននាក់ជារៀងរាល់ឆ្នាំ។ វិស័យទេសចរណ៍កាន់កាប់ប្រហែល 20% នៃផលិតផលក្នុងស្រុកសរុបរបស់ប្រទេសនេះ។ វិធានការទប់ស្កាត់ COVID-19 បានបណ្ដាលឱ្យវិស័យទេសចរណ៍ និងសេដ្ឋកិច្ចទាំងមូលរបស់ ថៃ រងផលប៉ះពាល់ធ្ងន់ធ្ងរ ដោយបាត់បង់ប្រាក់ចំណូលប្រហែល 50 ពាន់លានដុល្លារអាម៉េរិក នៅពេលតួលេខភ្ញៀវបរទេសធ្លាក់ចុះ 83% ក្នុងឆ្នាំ 2020 មកនៅត្រឹម 6.7 លាននាក់ប៉ុណ្ណោះ។

បច្ចុប្បន្ន ប្រជាជនថៃ ប្រមាណ 48% បានចាក់វ៉ាក់សាំងយ៉ាងតិចមួយដូស និង 30% បានចាក់រួចរាល់ (ពីរដូស)។

បច្ចុប្បន្ន ប្រទេសថៃ នៅតែមានអ្នកឆ្លងប្រហែល 10,000 នាក់ ជារៀងរាល់ថ្ងៃ ក្នុងនោះ ភាគច្រើនគឺករណីឆ្លងវ៉ារ្យ៉ង់ Delta។ ប្រទេសនេះ បានរកឃើញអ្នកឆ្លង COVID-19 សរុបជាង 1.7 លាននាក់ ក្នុងនោះមានជិត 18,000 នាក់ បានបាត់បង់ជីវិត៕

October 12, 2021

ភ័ស្ដុតាងថ្មី បង្ហាញថា វីរុស COVID-19 មិនមែនមានប្រភពពីល្អាងប្រច្រៀវនៅ ប្រទេសចិន

អ្នកវិទ្យាសាស្ត្រមួយក្រុមមកពី ប្រទេសបារាំង បានរកឃើញភ័ស្ដុតាងបង្ហាញថា វីរុស SARS-CoV-2 (COVID-19) មិនមានប្រភពចេញពីល្អាងភ្នំនៅក្នុងខេត្ត Yunnan ប្រទេសចិន។

យោងតាមសារព័ត៌មាន Sputnik (រុស្ស៊ី) កាលពីឆ្នាំមុន អ្នកស្រាវជ្រាវមួយក្រុមរបស់ ឥណ្ឌា បានចេញផ្សាយរបាយការណ៍មួយនិយាយថា ល្អាង Mojiang នៅភាគនិរតីនៃ ប្រទេសចិន ដែលមានចម្ងាយ 1,500 គីឡូម៉ែត្រពីទីក្រុង Wuhan អាចជាកន្លែងដែលមានសម្បុករបស់វីរុស Corona ថ្មី។ ការស្រាវជ្រាវនេះឱ្យដឹងថា វីរុសមួយប្រភេទដែលប្រហាក់ប្រហែលនឹង COVID-19 ត្រូវបានរកឃើញនៅក្នុងខណ្ឌ Mojiang កាលពីឆ្នាំ 2012។

កាលណោះ កម្មករអណ្ដូងរ៉ែ Mojiang ចំនួន 6 នាក់ បានឆ្លងជំងឺផ្លូវដង្ហើមយ៉ាងធ្ងន់ធ្ងរ បន្ទាប់ពីបានបោសសម្អាតលាមកសត្វប្រចៀវក្នុងល្អាង ដើម្បីរុករកលោហធាតុស្ពាន់។ បុរសជាកម្មករទាំងនេះ ត្រូវបានបញ្ជូនចូលមន្ទីរពេទ្យនៅក្នុងទីក្រុង Kunming នៃខេត្ត Yunnan ប្រទេសចិន ដោយសារមានអាការក្អកខ្លាំង ក្ដៅខ្លួន ឈឺក្បាល ឈឺទ្រូង និងពិបាកដកដង្ហើម។ 3 នាក់ ក្នុងចំណោមពួកគេ បានស្លាប់ដោយសាររោគនេះ។

ការធ្វើតេស្តក្រោយមក ក៏បានបង្ហាញថា កម្មករទាំងនេះបានឆ្លងវីរុស Corona មួយប្រភេទ ដែលត្រូវបានគេដាក់ឈ្មោះថា RaTG13។ សំណាកវីរុសនេះត្រូវបានប្រមូលយកដោយវិទ្យាស្ថានវីរុសសាស្ត្រ Wuhan។ ក្រុមអ្នកវិទ្យាសាស្ត្រ ឥណ្ឌា យល់ថា RaTG13 គឺជាអម្បូរជិតរបស់ COVID-19។ ក៏ប៉ុន្តែ ក្រុមអ្នកវិទ្យាសាស្ត្រ ជនជាតិបារាំង ថ្មីៗនេះ បានប្រកាសផ្ទុយពីនេះ។

យោងតាមការស្រាវជ្រាវបឋម ដែលគ្រោងនឹងត្រូវបានប្រកាសនៅឆ្នាំក្រោយ ក្រុមកម្មកររុករករ៉ែខាងលើដែលបានឆ្លងវីរុស RaTG13 មានអាការរោគខុសពីអ្នកជំងឺ COVID-19។ ក្រុមអ្នកវិទ្យាសាស្ត្ររបស់ បារាំង បានដាក់ជាសំណួរថា «ហេតុអ្វី ក្រុមវេជ្ជបណ្ឌិត និងអ្នកដែលបានប៉ះពាល់ផ្ទាល់នឹងកម្មករទាំងនោះ មិនឆ្លងរោគ?»។

ប្រជាជនចិន នៅតំបន់ផ្សារសត្វព្រៃ ក្នុងទីក្រុង Wuhan កាលពីខែកុម្ភៈ ឆ្នាំ 2021

ក្រោយការពិនិត្យឯកសារពេទ្យរបស់ក្រុមកម្មករអណ្ដូងរ៉ែនេះ អ្នកវិទ្យាសាស្ត្របានរកឃើញថា អ្នកជំងឺ RaTG13 មានអាការក្អកធ្លាក់ឈាម និងធ្លាក់ទឹករងៃ។ រូបភាពស្កេន CT បង្ហាញថា កម្មករទាំងនេះមិនមានបញ្ហារបួសសួតដូចអ្នកជំងឺ COVID-19 នោះទេ។

សំណួរផ្សេងមួយទៀត សួរថា «ហេតុអ្វី វីរុសមួយប្រភេទដែលបានសម្លាប់មនុស្សជាង 5 លាននាក់ និងឆ្លងទៅមនុស្សជាង 200 លាននាក់ ក្នុងរយៈពេល 18 ខែ បែរជាមិនបានឆ្លងទៅមនុស្សសូម្បីតែម្នាក់ នៅក្នុងអំឡុង 7 ឆ្នាំ ចាប់ពីឆ្នាំ 2012 ដល់ឆ្នាំ 2019?»។

ក្រុមអ្នកវិទ្យាសាស្ត្រ បារាំង យល់ថា លទ្ធផលនៃការស្រាវជ្រាវរបស់ពួកគេ បានច្រានចោលសម្មតិកម្មកន្លងមកដែលគិតថា វីរុសបង្កជំងឺរាតត្បាត COVID-19 លេចធ្លាយចេញពីបន្ទប់ពិសោធន៍។

«ការច្រានចោលសម្មតិកម្មដែលថា វីរុសមានប្រភពពីអណ្ដូងរ៉ែ Mojiang ក៏មានន័យថា ពុំមានមូលដ្ឋានវិទ្យាសាស្ត្រណាមួយបង្ហាញថា វីរុសលេចធ្លាយចេញពីបន្ទប់ពិសោធន៍។ សម្មតិកម្មមុននោះគ្រាន់តែជាការយល់ឃើញប៉ុណ្ណោះ» ក្រុមអ្នកស្រាវជ្រាវរបស់ បារាំង បានសរសេរដូច្នេះ។

ទោះជាយ៉ាងនេះក៏ដោយ ការស្រាវជ្រាវរបស់ បារាំង ខាងលើនេះ ក៏នៅតែត្រូវបានអ្នកវិទ្យាសាស្ត្រជាច្រើន មានមន្ទិលសង្ស័យ។ សាស្ត្រាចារ្យ Lawrence Young អ្នកឯកទេសផ្នែកវីរុសសាស្ត្រនៃសាកលវិទ្យា Warwick យល់ថា សម្មតិកម្មដែលថា វីរុសលេចធ្លាយចេញពីបន្ទប់ពិសោធន៍ នៅតែ «មិនអាចត្រូវបានលុបចោល»។

សាស្ត្រាចារ្យ David Livemore អ្នកជំនាញផ្នែកអតិសុខុមសាស្ត្រ មកពីសាកលវិទ្យាល័យ East Anglia ថ្លែងថា បើទោះជាលោកជឿថា សម្មតិកម្មដែលថា វីរុសលេចធ្លាយចេញពីបន្ទប់ពិសោធន៍ មិនប្រាកដថាជាប្រភពរបស់ COVID-19 ក្ដី ប៉ុន្តែ នៅតែមាន «ចំណុចចៃដន្យមួយចំនួនដ៏គួរឱ្យយកចិត្តទុកដាក់»។

មកដល់បច្ចុប្បន្ន COVID-19 បានសម្លាប់មនុស្សរាប់លាននាក់ទៅហើយ

«មហារោគរាតត្បាតបានចាប់ផ្ដើមកើតមានដំបូងនៅទីក្រុង Wuhan ជាទីដែលនៅឆ្ងាយពីល្អាងសត្វប្រចៀវនៅភាគខាងត្បូងនៃ ប្រទេសចិន និងជាទីដែលមានវិទ្យាស្ថានវីរុសសាស្ត្រ ដែលជាស្ថាប័នធ្វើការស្រាវជ្រាវម៉ូលិគុល រួមមានទាំងភារកិច្ចបង្កើនមុខងារនៅលើវីរុស Corona ផងដែរ» លោក David Livemore បញ្ជាក់ដូច្នេះ។

ពិភពលោក បច្ចុប្បន្ន បានឈានចូលដល់ឆ្នាំទីពីររបស់ COVID-19 ប៉ុន្តែ ប្រភពរបស់វីរុសនេះ មិនទាន់ត្រូវបានរកឃើញនៅឡើយ។ ក្រុមអ្នកវិទ្យាសាស្ត្រ បានលើកឡើងការបកស្រាយខុសៗគ្នា។

កាលពី COVID-19 ទើបតែបានចាប់ផ្ដើម សហគមន៍អ្នកស្រាវជ្រាវយល់ថា វីរុសនេះមានប្រភពពីសត្វប្រចៀវ។ ពួកវាបានឆ្លងទៅសត្វព្រៃ មុននឹងឆ្លងមកមនុស្ស។ ប៉ុន្តែ ក្រោយមក មនុស្សមួយចំនួនជឿថា វីរុស COVID-19 បានលេចធ្លាយចេញពីបន្ទប់ពិសោធន៍នៅទីក្រុង Wuhan ប្រទេសចិន ជាទីដែលករណីឆ្លងដំបូងត្រូវបានរាយការណ៍ ឬថា វីរុសនេះត្រូវបានមនុស្សបង្កើតឡើង។ សម្មតិកម្មទាំងពីរនេះ សុទ្ធតែត្រូវបានច្រានចោល។ អង្គការសុខភាពពិភពលោក (WHO) ប្រកាសថា «មនុស្សពិតជាពិបាកក្នុងការបង្កើត COVID-19»។

កាលពីខែសីហា ឆ្នាំ 2021 របាយការណ៍ស៊ើបការណ៍មួយដែលត្រូវបានបង្ហើបដោយសារព័ត៌មាន Wall Street Journal ឱ្យដឹងថា អ្នកវិទ្យាសាស្ត្រ 3 រូប នៅវិទ្យាស្ថានស្រាវជ្រាវវីរុសសាស្ត្រ Wuhan បានចូលព្យាបាលជំងឺនៅមន្ទីរពេត្យ ដោយសារមានអាការដូចអ្នកជំងឺ COVID-19 កាលពីខែវិច្ឆិកា ឆ្នាំ 2019 ពោលគឺ 3 សប្ដាហ៍មុនពេល ចិន រាយការណ៍ករណីឆ្លង COVID-19 ដំបូង នៅទីក្រុងនេះ។ របាយការណ៍របស់ ប្រទេសចិន បាននាំឱ្យមានការស្រាវជ្រាវមួយដែលត្រូវបានធ្វើឡើងដោយអាជ្ញាធររបស់ប្រធានាធិបតី អាម៉េរិក លោក Joe Biden។ ក៏ប៉ុន្តែ សកម្មភាពនេះនៅតែមិនអាចសន្មតបានអំពីប្រភពរបស់ COVID-19 ដដែល៕

October 11, 2021

តាលីបង់ ការពារគំនរបាក់បែកនៃព្រះពុទ្ធប្បដិមាអាយុកាលជាង 1,500 ឆ្នាំ ដែលពួកគេបានកម្ទេចចោលកាលពីម្ភៃឆ្នាំមុន

(អាហ្វហ្គានីស្ថាន)-សមាជិកនៃក្រុម តាលីបង់ ត្រូវបានបញ្ជាឱ្យឈរយាមល្បាតក្រោមសំណល់នៃគំនរបាក់បែកដ៏ធំចំនួនពីរ ជាកន្លែងដែលរូបសំណាកព្រះពុទ្ធត្រូវបានក្រុមនេះកម្ទេចចោលកាលពីម្ភៃឆ្នាំមុន។

Saifurrahman Mohammadi ជាសមាជិកវ័យក្មេងមួយរូបរបស់ តាលីបង់ កាន់កាំភ្លើង AK ដើរចុះឡើង នៅក្រោមជញ្ជាំងថ្មដែលធ្លាប់ជាទីគង់នៅរបស់រូបសំណាកព្រះពុទ្ធដ៏ធំចំនួនពីរអង្គ នៅក្នុងខេត្ត Bamiyan នៃ ប្រទេសអាហ្វហ្គានីស្ថាន។ ព្រះពុទ្ធប្បដិមាទាំងពីរអង្គនេះ ធ្លាប់ស្ថិតនៅយ៉ាងរឹងមាំអស់រយៈពេល 1,500 ឆ្នាំ ប៉ុន្តែ ចុងក្រោយត្រូវបានក្រុម តាលីបង់ ដាក់គ្រាប់ផ្ទុះកម្ទេចចោលកាលពីឆ្នាំ 2001 ដោយលើកមូលហេតុថា រូបសំណាកទាំងនេះ «ផ្ទុយពីទ្រឹស្ដីរបស់អ៊ីស្លាមសាសនា»។

កាលណោះ សមាជិករបស់ក្រុម តាលីបង់ រាប់រយនាក់ មកពីគ្រប់ទិសទីក្នុង ប្រទេសអាហ្វហ្គានីស្ថាន បានចំណាយពេល 3 សប្ដាហ៍ដើម្បីបំផ្លាញរូបសំណាកព្រះពុទ្ធដែលមានកម្ពស់រាប់សិបម៉ែត្រ និងធ្លាក់ជាប់នឹងជញ្ជាំងថ្ម ធ្វើឱ្យមានប្រតិកម្មយ៉ាងខ្លាំងក្លានៅពាសពេញពិភពលោក។

នៅពេលត្រូវបានសួរថា តើគួរបំផ្លាញរូបសំណាកព្រះពុទ្ធទាំងនេះឬទេ Mohammadi ដែលទើបត្រូវបានតែងតាំងជាមន្ត្រីមួយរូបនៅក្នុងការិយាល័យទទួលបន្ទុកបញ្ហាវប្បធម៌របស់ខេត្ត Bamiyan ក៏បានបង្ហាញភាពស្ទាក់ស្ទើរ។ «ខ្ញុំពិតជាមិនអាចអធិប្បាយបាន។ ពេលនោះខ្ញុំនៅតូចណាស់»។

«បើសិនជាពួកគេ (តាលីបង់) ធ្វើដូច្នេះ ប្រាកដណាស់ថា អេមីរ៉ាតអ៊ីស្លាមនៃអាហ្វហ្កានីស្ថាន (Islamic Emirate of Afghanistan) មានមូលហេតុដោយឡែក» Mohammadi និយាយដូច្នេះ និងបន្ថែមថា៖ «ពេលនេះ ប្រការដែលប្រាកដ នោះគឺ យើងសន្យាថា ការពារទីតាំងប្រវត្តិសាស្ត្ររបស់ប្រទេសជាតិ។ នេះគឺជាការទទួលខុសត្រូវរបស់យើង»។

បដាស្ពាន់មួយផ្ទាំងដែលមានសរសេរថា «រូបសំណាកព្រះពុទ្ធដែលត្រូវអាជ្ញាធរតាលីបង់ កម្ទេចកាលពីឆ្នាំ 2021» ត្រូវបានដាក់តាំងនៅត្រង់គំនរបាក់បែក។ ទង់ពណ៌សរបស់ តាលីបង់ ក៏ត្រូវបានដោតនៅឯខ្លោងទ្វារក្បែរនោះ។

Mohammadi ឱ្យដឹងថា ថ្មីៗនេះ តាលីបង់ បានជជែកជាមួយក្រុមមន្ត្រីរបស់ UNESCO ដោយស្នើឱ្យពួកគេត្រលប់មកវិញ និងបានសន្យាថា ការពារសុវត្ថិភាព។

អាជ្ញាធរ និងក្រុមមន្ត្រីរបស់ UNESCO ក្នុងតំបន់ ឱ្យដឹងថា វត្ថុបុរាណប្រហែល 1,000 ដុំ ដែលត្រូវបានរក្សាទុកក្នុងឃ្លាំងក្បែរគំនរបាក់បែក ត្រូវបានគេលួច ឬកម្ទេចចោល បន្ទាប់ពី តាលីបង់ ចូលមកកាន់អំណាច។

«ខ្ញុំទទួលស្គាល់ថា មានអំពើលួចប្លន់ ប៉ុន្តែ គ្រប់យ៉ាងបានកើតឡើងមុនពេលយើងមកដល់» Mohammadi បកស្រាយអំពីករណីលួចវត្ថុបុរាណនៅទីតាំងប្រវត្តិសាស្ត្រ។ «យើងកំពុងស្រាវជ្រាវ និងប្រមូលត្រលប់មកវិញ»។

ជ្រលងភ្នំ Bamiya ស្ថិតនៅក្នុងតំបន់កណ្ដាលនៃជួរភ្នំ Hindu Kush ជាចំណុចខាងលិចបង្អស់នៃឥទ្ធិពលរបស់ពុទ្ធសាសនា។ តំបន់នេះទទួលរងឥទ្ធិពលវប្បធម៌ពី អាណាចក្រពើស៊ី (Persia (អ៊ីរ៉ង់ បច្ចុប្បន្ន)), តួកគី, ចិន និង ក្រិក ដោយមានបន្សល់សំណង់ប្រវត្តិសាស្ត្រជាច្រើនដែលមិនទាន់ត្រូវបានស្រាវជ្រាវ។

រូបសំណាកព្រះពុទ្ធចំនួនពីរអង្គនៅទីនេះ ធ្លាប់គង់នៅយ៉ាងរឹងមាំ ក្រោយពីការវាយប្រហាររបស់ស្ដេច Mughal Aurangzeb កាលពីសតវត្សរ៍ទី 17 និងការបាញ់កម្ទេចដោយកាំភ្លើងធំរបស់ស្ដេច Nader Shah នៃអាណាចក្រពើស៊ី។

ក៏ប៉ុន្តែ ដោយការប្រើប្រាស់គ្រាប់រំសេវ តាលីបង់ បានធ្វើឱ្យព្រះពុទ្ធប្បដិមាទាំងពីរអង្គនេះ ក្លាយជាគំនរបាក់បែក ស្ថិតនៅរាយប៉ាយក្រោមជញ្ជាំងភ្នំ។ ប៉ុន្តែ ថ្មីៗនេះ តាលីបង់ អះអាងថា ចង់ការពារបេតិកភណ្ឌបុរាណវិទ្យា បើទោះពួកគេធ្លាប់បានបំផ្លាញកាលពីមុន។ Philippe Marquis ប្រធានប្រតិភូបុរាណវិទ្យារបស់ បារាំង ប្រចាំ អាហ្វហ្គានីស្ថាន ឱ្យដឹងថា តាលីបង់ ដឹងច្បាស់ថា ការការពារបេតិកភណ្ឌ នឹងនាំមកនូវប្រាក់ចំណូលជាប្រចាំដល់ពួកគេ ក្នុងគ្រាសេដ្ឋកិច្ចរបស់ប្រទេសអាស៊ីកណ្ដាលមួយនេះ ជួបវិបត្តិ៕

October 9, 2021

Moderna ប្រកាសផ្គត់ផ្គង់វ៉ាក់សាំង COVID-19 ចំនួន 1 ពាន់លានដូស ដល់បណ្ដាប្រទេសក្រីក្រ

កាលពីថ្ងៃទី 8 តុលា ក្រុមហ៊ុនផលិតឱសថ Moderna របស់ សហរដ្ឋអាម៉េរិក បានប្រកាសថា នឹងផ្គត់ផ្គង់វ៉ាក់សាំងបង្ការ COVID-19 ចំនួន 1 ពាន់លានដូសបន្ថែមទៀត ដល់បណ្ដាប្រទេសដែលមានប្រាក់ចំណូលទាបនៅឆ្នាំ 2022 ទន្ទឹមនឹងវ៉ាក់សាំងរាប់រយលានដូស ដែលក្រុមហ៊ុននេះបានសន្យាជាមួយកម្មវិធី COVAX។

ក្នុងសេចក្ដីប្រកាសមួយ Moderna បានឱ្យដឹងថា វ៉ាក់សាំងដែលក្រុមហ៊ុននេះគ្រោងនឹងផ្គត់ផ្គង់ដល់បណ្ដាប្រទេសដែលមានប្រាក់ចំណូលទាបគឺជាផ្នែកមួយក្នុងចំណោមវ៉ាក់សាំងពី 2-3 ពាន់លានដូសដែលគ្រោងនឹងត្រូវបានផលិតនៅឆ្នាំ 2022។

គិតមកដល់បច្ចុប្បន្ន មនុស្សជាង 250 លាននាក់នៅលើពិភពលោក បានទទួលការចាក់វ៉ាក់សាំងរបស់ Moderna។ ប៉ុន្តែ ការទទួលបានវ៉ាក់សាំងប្រឆាំង COVID-19 មកដល់ពេលនេះ នៅតែមានឧបសគ្គធំសម្រាប់ប្រទេសជាច្រើន ពិសេសគឺបណ្ដាប្រទេសក្រីក្រ។

កាលពីខែឧសភា Moderna បានសន្យាថា នឹងផ្ដល់វ៉ាក់សាំង COVID-19 ចំនួន 500 លានដូស ដល់កម្មវិធី COVAX សម្រាប់ដំណាក់កាលពីត្រីមាសទីបួន ឆ្នាំ 2021 ដល់ឆ្នាំ 2022។ COVAX (COVID-19 Vaccines Global Access) គឺជាគំនិតផ្ដួចផ្ដើមសកល ក្នុងបំណងជួយឱ្យបណ្ដាប្រទេសអាចទទួលបានវ៉ាក់សាំងបង្ការ COVID-19 ប្រកបដោយសមធម៌ ដែលដឹកនាំដោយ សម្ព័ន្ធវ៉ាក់សាំង Gavi, សម្ព័ន្ធភាពដើម្បីភាពច្នៃប្រឌិតត្រៀមបង្ការរោគរាតត្បាត (CEPI) និងអង្គការសុខភាពពិភពលោក (WHO)៕

October 9, 2021

អ្នកកាសែតពីររូប ទទួលបានពានរង្វាន់ Nobel សន្តិភាព ឆ្នាំ 2021

ពានរង្វាន់ Nobel សន្តិភាពឆ្នាំនេះ បានទៅលើ Maria Ressa និង Dmitry Muratov ដែលជាអ្នកកាសែតជនជាតិ ហ្វ៊ីលីពីន និង រុស្ស៊ី ព្រោះតែបាន «ប្រឹងប្រែងការពារសេរីភាពក្នុងការបញ្ចេញមតិ»។

សេរីភាពនៃការបញ្ចេញមតិ «គឺជាលក្ខខណ្ឌចម្បងបង្អស់សម្រាប់ប្រជាធិបតេយ្យ និងសន្តិភាពយូរអង្វែង» គណៈកម្មការ Nobel របស់ ន័រវែស បានប្រកាសនាថ្ងៃនេះ នៅពេលសម្រេចប្រគល់ពានរង្វាន់ Nobel សន្តិភាពជូនដល់អ្នកកាសែត ហ្វ៊ីលីពីន Maria Ressa និងអ្នកកាសែត រុស្ស៊ី Dmitry Muratov។

Maria Ressa និង Dmitry Muratov ទទួលបានពានរង្វាន់នេះក៏ដោយសារតែ «ភាពអង់អាចក្នុងការតស៊ូដើម្បីសេរីភាពបញ្ចេញមតិនៅ ប្រទេសហ្វ៊ីលីពីន និង រុស្ស៊ី។ ទន្ទឹមនឹងនេះ ពួកគេក៏ជាតំណាងរបស់អ្នកសារព័ត៌មានគ្រប់រូបដែលក្រោកឈរឡើងដើម្បីឧត្តមគតិនេះ នៅក្នុងពិភពលោកដែលប្រជាធិបតេយ្យ និងសេរីភាពសារព័ត៌មានត្រូវប្រឈមនឹងលក្ខខណ្ឌមិនអំណោយផលកាន់តែច្រើន» ប្រធានគណៈកម្មការ Nobel ន័រវែស លោកស្រី Berit Reiss-Andersen ថ្លែងនៅក្នុងសន្និសីទសារព័ត៌មាននៅ Oslo ដូច្នេះ។

អ្នកស្រី Maria Ressa គឺជាសហស្ថាបនិកនៃទីភ្នាក់ងារសារព័ត៌មាន Rappler ដែលមានជំនាញខាងស៊ើបអង្កេត។ អ្នកស្រីទទួលបានការលើកសរសើរថា ជាមនុស្សដែលធ្វើការមិនចេះហត់ក្នុងការប្រយុទ្ធប្រឆាំងនឹងអំពើពុករលួយ និងអំពើរំលោភអំណាចនៅ ហ្វ៊ីលីពីន។ ចំណែកលោក Dmitry Muratov វិញ គឺជាសហស្ថាបនិកនៃសារព័ត៌មាន Novaya Gazeta នៅ រុស្ស៊ី។ លោកមានឈ្មោះថាជាអ្នកតស៊ូដើម្បីសេរីភាពបញ្ចេញមតិ និងការពារអ្នកកាសែត។

ពានរង្វាន់ Nobel សន្តិភាពនេះនឹងប្រគល់ជូនអ្នកឈ្នះនៅថ្ងៃទី 10 ធ្នូ ដែលជាថ្ងៃខួបមរណភាពរបស់ Alfred Nobel។ នេះគឺជាលើកដំបូងហើយដែលអ្នកកាសែតទទួលបានពានរង្វាន់ថ្លៃថ្លាបែបនេះ រាប់ចាប់ពីឆ្នាំ 1935 ដែលកាលណោះបានទៅលើអ្នកកាសែត អាល្លឺម៉ង់ Carl von Ossietzky ដោយបានបង្ហើបឱ្យដឹងអំពីកម្មវិធីបង្កើតកងប្រដាប់អាវុធសម្ងាត់របស់ប្រទេសនេះ ក្រោយសង្គ្រាមលោក៕

October 8, 2021

មនុស្សបីជំនាន់ បានកែប្រែសមុទ្រខ្សាច់ ទៅជា «សួតបៃតងស្រស់» សម្រាប់ការពារ រដ្ឋធានីប៉េកាំង (វីដេអូ)

(ប្រទេសចិន)-មនុស្សបីជំនាន់ដែលបាននាំគ្នាដាំដើមឈើ និងកែប្រែសមុទ្រខ្សាច់ Saihanba ទៅជាព្រៃឈើដែលមានទំហំ 700 គីឡូម៉ែត្រក្រឡា និងស្រូបយកឧស្ម័ន CO2 ប្រហែល 860,000 តោន ជារៀងរាល់ឆ្នាំ។

តំបន់ព្រៃពណ៌បៃតងស្រស់នៅ ប្រទេសចិន នេះ ធ្លាប់ជាសមុទ្រខ្សាច់ដ៏សែនសោះកក្រោះ។ ប៉ុន្តែ បច្ចុប្បន្ន វាគឺជាព្រៃបង្កើតឡើងដោយស្នាដៃមនុស្ស ធំជាងគេក្នុងពិភពលោក។ កសិដ្ឋានដាំព្រៃឈើ Saihanba គ្របដណ្ដប់ផ្ទៃដីជាង 700 គីឡូម៉ែត្រក្រឡា។ ព្រៃនេះធំជាងផ្ទៃដីសរុបរបស់ ប្រទេសសិង្ហបុរី។ មានចម្ងាយ 450 គីឡូម៉ែត្រពីរដ្ឋធានី ព្រៃ Saihanba ត្រូវបានគេហៅថា «សួតបៃតងរបស់ ទីក្រុងប៉េកាំង» នៃ ប្រទេសចិន។

ទិដ្ឋភាពដើមឈើមួយដើម កំពុងស្ថិតនៅកណ្ដាលសមុទ្រខ្សាច់តែឯង ដែលថតបាន ក្នុងគ្រាក្រុមអ្នកជំនាញកសិកម្មកំពុងស្រាវជ្រាវភូមិសាស្ត្រ កាលពីឆ្នាំ 1961 (Xinhua)

Fu Lihua អ្នកស្រាវជ្រាវនៃកសិដ្ឋានដាំព្រៃ Saihaba និយាយថា៖ «យើងត្រូវដោះស្រាយបញ្ហាលំបាកជាច្រើន រួមទាំងព្យុះខ្សាច់ធំៗ កម្ពស់ និងសីតុណ្ហភាពទាបខ្លាំង។ វិធីសាស្ត្របង្កើតពណ៌បៃតងដែលយើងបានសិក្សា ត្រូវការសម្រួលទៅតាមបរិស្ថានដោយឡែកនេះ»។

យុទ្ធនាការដាំដើមឈើនៅទីនេះ បានចាប់ផ្ដើមតាំងពីឆ្នាំ 1962 ដើម្បីបង្កើតជាខែលការពារបែបបរិស្ថានវិទ្យាសម្រាប់ រដ្ឋធានីប៉េកាំង និងតំបន់ជុំវិញ។ មនុស្សបីជំនាន់ បានកសាងតំបន់ព្រៃនេះពីបាតដៃទទេ។

Chen Yanxian ដែលជាមន្ត្រីការពារព្រៃឈើនៃកសិដ្ឋាន Saihanba និយាយថា៖ «នៅពេលបានឃើញដើមឈើលូតលាស់ យើងមានអារម្មណ៍ថា បញ្ហាលំបាកទាំងឡាយនៅជុំវិញ លែងមានន័យទៀតហើយ។ យើងអរគុណដល់ស្រទាប់មនុស្សជំនាន់ដំបូងដែលសម្រេចបានភារកិច្ច។ យើងបង្កើតបានព្រៃឈើនេះដោយញើស ឈាម និងទឹកភ្នែក រួមនឹងការប្រឹងប្រែងមិនឈប់ឈរ។ យើងចាត់ទុកឈើមួយដើមជាកូនចៅបង្កើតមួយនាក់របស់យើង។ ពួកវាលូតលាស់ពីគ្រាប់ពូជទៅជាដើមឈើខ្ពស់»។

ព្រៃបៃតង Saihanba នេះ ស្រូបយកឧស្ម័ន កាបូនឌីអ៊ុកស៊ីត បានប្រមាណ 860,000 តោន ជារៀងរាល់ឆ្នាំ៕

October 8, 2021

ម៉ាឡេស៊ី ចូលរួមដណ្ដើមទិញថ្នាំគ្រាប់ molnupiravir សម្រាប់ព្យាបាលជំងឺ COVID-19

ក្រសួងសុខាភិបាលនៃ ប្រទេសម៉ាឡេស៊ី ប្រកាសថា បានចុះកិច្ចព្រមព្រៀងជាមួយក្រុមហ៊ុនផលិតឱសថ Merck ដើម្បីទិញថ្នាំ molnupiravir ចំនួន 150,000 ដូស សម្រាប់ព្យាបាលជំងឺ COVID-19។

«ការសម្រេចនេះត្រូវបានធ្វើឡើងនៅពេលយើងត្រៀមចូលដល់ដំណាក់កាលថ្មីដែលត្រូវចាត់ទុក COVID-19 ជាជំងឺពិសេស និងនៅពេលដែលយើងអាចរស់នៅជាមួយវីរុស ដោយការបន្ថែមវិធីសាស្ត្រព្យាបាលប្រកបដោយភាពច្នៃប្រឌិតថ្មី សម្រាប់ជាអាវុធប្រឆាំងនឹង COVID-19 ទន្ទឹមនឹងការចាក់វ៉ាក់សាំង រួមនឹងវិធានការសុខាភិបាលសាធារណៈផ្សេងទៀត» រដ្ឋមន្ត្រីក្រសួងសុខាភិបាលម៉ាឡេស៊ី Khairy Jamaluddin ប្រកាសកាលពីថ្ងៃទី 7 តុលា ស្ដីអំពីកិច្ចព្រមព្រៀងទិញថ្នាំ molnupiravir ពីក្រុមហ៊ុនឱសថ Merck របស់ សហរដ្ឋអាម៉េរិក។

Molnupiravir នឹងក្លាយជាថ្នាំគ្រាប់សម្រាប់ព្យាបាលជំងឺ COVID-19 ដំបូងគេ បើសិនជាទទួលបានការអនុម័តពីស្ថាប័នសុខាភិបាល។ ទិន្នន័យនៃការពិសោធបានបង្ហាញថា ថ្នាំនេះជួយកាត់បន្ថយរហូតដល់ពាក់កណ្ដាលនៃហានិភ័យស្លាប់ ឬចូលពេទ្យ ដោយសារ COVID-19។

បណ្ដាប្រទេសនៅ អាស៊ី កំពុងតែចាប់អារម្មណ៍ខ្លាំងលើថ្នាំ molnupiravir។ ប្រទេសកូរ៉េខាងខាងត្បូង និងសិង្ហបុរី សុទ្ធតែបានប្រកាសថា បានចុះកិច្ចព្រមព្រៀងទិញថ្នាំនេះ។ ចំណែក ប្រទេសថៃ និង កោះតៃវ៉ាន់ វិញ ក៏កំពុងតែចរចាជាមួយក្រុមហ៊ុន Merck ដើម្បីទិញថ្នាំនេះដែរ។

ក្រុមហ៊ុន Merck គ្រោងនឹងផលិតថ្នាំ molnupiravir ចំនួន 10 លានដូស មុនឆ្នាំ 2022។ ក្រុមហ៊ុននេះ ទទួលបានការបញ្ជាទិញចំនួន 1.7 លានដូស ពីរដ្ឋាភិបាលសហរដ្ឋអាម៉េរិក ក្នុងតម្លៃ 700 ដុល្លារ/ឈុត (ព្យាបាលមួយជា)។ តាមគម្រោង Merck នឹងប្រើប្រាស់វិធីគណនាតម្លៃថ្នាំទៅតាមកម្រិតផ្សេងៗគ្នា ដោយយោងទៅលើប្រាក់ចំណូលរបស់ប្រទេសនីមួយ៕

October 8, 2021

ប្រសិទ្ធភាពរបស់ «ថ្នាំគ្រាប់ព្យាបាល COVID-19» ធ្វើឱ្យ ទីប្រឹក្សារបស់ Joe Biden «ពេញចិត្ត»

វេជ្ជបណ្ឌិត Fauci និយាយថា ថ្នាំគ្រាប់សម្រាប់ព្យាបាលជំងឺ COVID-19 ឈ្មោះ molnupiravir ផ្ដល់លទ្ធផលល្អ គួរជាទីពេញចិត្ត នៅក្នុងការពិសោធលើមនុស្ស បើទោះជាការអនុម័តឱ្យប្រើប្រាស់អាចត្រូវចំណាយពេលយូរ។

ក្រុមហ៊ុនផលិតឱសថ Merck កាលពីម្សិលមិញ (01 តុលា) បានប្រកាសលទ្ធផលនៃការពិសោធលើមនុស្សរបស់ថ្នាំគ្រាប់ molnupiravir ដែលអភិវឌ្ឍដោយក្រុមហ៊ុន Merck និងក្រុមហ៊ុន Ridgeback Biotherapeutics។ Merck ឱ្យដឹងថា ថ្នាំនេះជួយកាត់បន្ថយហានិភ័យនៃការចូលពេទ្យ ឬស្លាប់ នៅពេលប្រើប្រាស់សម្រាប់អ្នកជំងឺ COVID-19 ពេញវ័យ ដែលមានអាការស្រាល និងមធ្យម។

ក្រុមហ៊ុនបានឱ្យដឹងថា ការពិសោធក្រោយរយៈពេល 29 ថ្ងៃ បង្ហាញថា ពុំមានអ្នកជំងឺណាម្នាក់ក្នុងចំណោម 385 នាក់ដែលប្រើប្រាស់ថ្នាំនេះ ស្លាប់នោះទេ ហើយមានតែ 28 នាក់ប៉ុណ្ណោះ ដែលត្រូវចូលពេទ្យ តួលេខនេះស្មើនឹងពាក់កណ្ដាល បើធៀបនឹងក្រុមដែលប្រើថ្នាំបញ្ឆោត (placebo)។

ក្នុងសន្និសីទសារព័ត៌មាននៅសេតវិមាន កាលពីថ្ងៃទី 1 តុលា វេជ្ជបណ្ឌិត Anthony Fauci ទីប្រឹក្សាកំពូលផ្នែកសុខាភិបាលរបស់ប្រធានាធិបតី Joe Biden ថ្លែងថា លោកទទួលបានការជូនដំណឹងយ៉ាងល្អពី Merck។ Merck នឹងបញ្ជូនទិន្នន័យឱ្យនាយកដ្ឋានគ្រប់គ្រងអាហារនិងភេសជ្ជៈ (FDA) ដើម្បីសុំការអនុម័តបន្ទាន់។

«ទិន្នន័យពិតជាគួរឱ្យពេញចិត្ត» លោក Fauci និយាយដូច្នេះ បើទោះជាលោកព្រមានថា ដំណើរការនៃការអនុម័តឱ្យប្រើប្រាស់ពី FDA អាចនឹងត្រូវចំណាយពេលយូរ។

រដ្ឋាភិបាលអាម៉េរិក បានបញ្ជាទិញ ថ្នាំ molnupiravir នេះ ចំនួន 1.7 លានកញ្ចប់ (1 កញ្ចប់សម្រាប់ព្យាបាលមួយជា) ក្នុងតម្លៃ 1.2 ពាន់លានដុល្លារ។ នេះបើតាម Jeff Zient អ្នកចាត់ចែងយុទ្ធនាការប្រឆាំងរោគរាតត្បាតរបស់ សេតវិមាន។

បើទោះជាមានដំណឹងល្អពីក្រុមហ៊ុន Merck ប៉ុន្តែ ក្រុមមន្ត្រីសុខាភិបាលសាធារណៈ នៅតែលើកឡើងថា ការចាក់វ៉ាក់សាំងគឺជាដំណោះស្រាយល្អបំផុតសម្រាប់ការប្រយុទ្ធប្រឆាំងនឹង COVID-19៕

October 2, 2021

Category: អន្តរជាតិ