អន្តរជាតិ - La Reine Media

បាតុកម្មដ៏ធំ ប្រឆាំងនឹង ក្រុមហ្វាស៊ីសនិយម នៅ ប្រទេសអ៊ីតាលី

កាលពីថ្ងៃទី 16 តុលា មនុស្សរាប់សែននាក់បាននាំគ្នាចេញដើរតាមដងផ្លូវក្នុង ទីក្រុងរ៉ូម របស់ ប្រទេសអ៊ីតាលី ដើម្បីចូលរួមធ្វើបាតុកម្មប្រឆាំងនឹង ហ្វាស៊ីសនិយម និងប្រមូលផ្ដុំគ្នានៅក្រោមផ្ទាំងបដា «លែងមានលទ្ធិហ្វាស៊ីស៖ គាំទ្រការងារ ការចូលរួម និងប្រជាធិបតេយ្យ»។

ការទាមទារចម្បងរបស់ក្រុមបាតុករគឺ ការរំសាយជាបន្ទាន់នូវបក្ខពួក និងអង្គការចាត់តាំងដែលជាប់ទាក់ទិននឹងលទ្ធិហ្វាស៊ីស បើទោះជាផ្ទាល់ ឬប្រយោលក៏ដោយ។

ប្រភពព័ត៌មានពី ទីក្រុងរ៉ូម បានឱ្យដឹងថា លោក Mauricio Ladini លេខារបស់ សហព័ន្ធសហជីពទូទៅអ៊ីតាលី (CGIL) បានសង្កត់ធ្ងន់ថា៖ «យើងកំពុងនិយាយអំពីចលនាមួយដែលមិនត្រឹមតែមិនមាននិន្នាការរកបក្សណាមួយនោះទេ តែក៏ការពារផលប្រយោជន៍របស់ប្រជាជនទាំងអស់នៅ អ៊ីតាលី»។

លោក Luigi Di Maio រដ្ឋមន្ត្រីការបរទេសអ៊ីតាលី (កណ្ដាល), លោក Enrico Letta ប្រធានបក្សប្រជាធិបតេយ្យ (ឆ្វេង) និងលោក Giuseppe Conte អតីតនាយករដ្ឋមន្ត្រី និងជាមេដឹកនាំចលនាផ្កាយប្រាំ (M5S)

ដោយសារតែមានការការពារសន្តិសុខយ៉ាងតឹងរ៉ឹង ដូច្នេះពុំមានបញ្ហាហិង្សាណាមួយកើតឡើងនៅក្នុងបាតុកម្មនេះ។ យោងតាមក្រុមអ្នករៀបចំ បាតុកម្មនេះមានមនុស្សចូលរួមរហូតដល់ 200,000 នាក់ បន្ទាប់ពីការអំពាវនាវរបស់សហជីពធំៗចំនួន 3 នៅ ប្រទេសអ៊ីតាលី រួមមាន សហព័ន្ធសហជីពទូទៅអ៊ីតាលី (CGIL), សហជីពកម្មករអ៊ីតាលី (CISL) និង សម្ព័ន្ធពលកម្មអ៊ីតាលី (UIL)។

ដោយឡែក ប្រព័ន្ធផ្សព្វផ្សាយក្នុងស្រុកបានឱ្យដឹងថា បាតុកម្មនេះមានមនុស្សចូលរួមជិត 50,000 នាក់ ក្នុងនោះក៏មានលោក Luigi Di Maio រដ្ឋមន្ត្រីការបរទេសអ៊ីតាលី, លោក Enrico Letta ប្រធានបក្សប្រជាធិបតេយ្យ, លោក Giuseppe Conte អតីតនាយករដ្ឋមន្ត្រី និងជាមេដឹកនាំចលនាផ្កាយប្រាំ (M5S) ផងដែរ៕

October 18, 2021

គុយបា ពិចារណាអំពីការពិសោធវ៉ាក់សាំង COVID-19 លើ «កុមារអាយុក្រោមពីរឆ្នាំ»

ប្រទេសគុយបា កំពុងតែវាយតម្លៃលើលទ្ធភាពនៃការពិសោធវ៉ាក់សាំងប្រឆាំង COVID-19 នៅលើកុមារដែលមានអាយុក្រោម 2 ឆ្នាំ ក្រោយពីបានទទួលលទ្ធផលល្អពីយុទ្ធនាការចាក់វ៉ាក់សាំងទ្រង់ទ្រាយធំនាពេលកន្លង។

Eduardo Martinez ប្រធានក្រុមហ៊ុនឱសថជីវសាស្ត្រជាតិរបស់ប្រទេសគុយបា (BioCubaFarma) កាលពីសប្ដាហ៍មុនបានឱ្យដឹងថា ក្រុមមន្ត្រីកំពុងពិនិត្យ ពិចារណាអំពីការពិសោធលើកុមារអាយុក្រោម 2 ឆ្នាំ ដោយប្រើប្រាស់វ៉ាក់សាំង COVID-19 ក្នុងស្រុក ព្រោះតែកម្រិតសុវត្ថិភាពខ្ពស់ត្រូវបានបញ្ជាក់រួចហើយនៅក្នុងការពិសោធកន្លងមក ក៏ដូចជានៅក្នុងយុទ្ធនាការចាក់វ៉ាក់សាំងទូទាំងប្រទេស។

សារព័ត៌មានក្នុងស្រុក Prensa Latina បានរាយការណ៍ថា គុយបា គឺជាប្រទេសដំបូងគេក្នុងពិភពលោក ដែលបានចាក់វ៉ាក់សាំង COVID-19 ដល់កុមារដែលមានអាយុចាប់ពី 2-18 ឆ្នាំ ដោយប្រើប្រាស់វ៉ាក់សាំងប្រភេទ 2 ដូស Soberana 02 និងប្រភេទ 1 ដូស Soberana Plus ដែលត្រូវបានអភិវឌ្ឍដោយវិទ្យាស្ថាន Vaccine Finlay ជាមួយនឹងប្រសិទ្ធភាព 91.2%។ លទ្ធផលនៃការស្រាវជ្រាវលើការចាក់វ៉ាក់សាំងដល់កុមារ នឹងត្រូវបានបញ្ជូនទៅកាន់មជ្ឈមណ្ឌលគ្រប់គ្រងឱសថ និងសម្ភារៈសុខាភិបាលជាតិ (CECMED) ដើម្បីវាយតម្លៃនាពេលឆាប់ៗខាងមុខ។

លោក Martinez ឱ្យដឹងថា កុមារ និងក្មេងជំទង់ដែលមានអាយុចាប់ពី 2 ដល់ 18 ឆ្នាំ បានទទួលការចាក់វ៉ាក់សាំង Soberana 02 យ៉ាងតិច 1 ដូស។ រដ្ឋមន្ត្រីក្រសួងសុខាភិបាល Jose Angel Portal Miranda បញ្ជាក់ថា តួលេខនេះស្មើនឹង 92% នៃចំនួនកុមារ និងក្មេងជំទង់សរុបនៅប្រទេសនេះ ខណៈ 8% ទៀតគឺជាកុមារអាយុក្រោម 2 ឆ្នាំ។ រដ្ឋមន្ត្រីរូបនេះសង្កត់ធ្ងន់ថា គុយបា នឹងក្លាយជាប្រទេសដំបូងគេក្នុងពិភពលោក ដែលបើកដំណើរការសាលារៀនដែលបង្រៀនដោយផ្ទាល់ឡើងវិញ នៅពេលសិស្សានុសិស្សបានចាក់វ៉ាក់សាំងគ្រប់ៗគ្នា នៅក្នុងខែវិច្ឆិកា។

គុយបា គឺជាប្រទេសដំបូងគេនៅ អាម៉េរិកឡាទិន ដែលបានអភិវឌ្ឍវ៉ាក់សាំង COVID-19 ដោយប្រើប្រាស់បច្ចេកវិទ្យាបណ្តុំប្រូតេអ៊ីន ដែលជាវ៉ាក់សាំងមិនទាមទារឱ្យរក្សាទុកក្នុងសីតុណ្ហភាពត្រជាក់ខ្លាំង ដែលផ្ទុយពីវ៉ាក់សាំងបច្ចេកវិទ្យា mRNA ដែលប្រើប្រាស់កំណែចម្លងរបស់ម៉ូលេគុល RNA ព័ត៌មាន ដើម្បីបង្កើតភាពស៊ាំក្នុងរាងកាយ ដែលត្រូវបានអនុញ្ញាតឱ្យប្រើប្រាស់បន្ទាន់រួចហើយ៕

October 18, 2021

ករណីចាក់សម្លាប់តំណាងរាស្ត្រម្នាក់នៅ ប្រទេសអង់គ្លេស សមត្ថកិច្ចថាជាអំពើភេរវកម្ម

ជនសង្ស័យ អាយុ 25 ឆ្នាំ ជាពលរដ្ឋអង់គ្លេស ដើមកំណើតសូម៉ាលី បានសម្រុកយ៉ាងលឿនចូលក្នុងវិហារដែលតំណាងរាស្ត្រ David Amess កំពុងជួបជាមួយម្ចាស់ឆ្នោត ហើយដកកាំបិត ចាក់ប្រហារ បណ្ដាលឱ្យតំណាងរាស្ត្ររូបនេះដួលទៅលើដី។

នៅឯវិហារ Belfairs នាទីរួមស្រុក Leigh-on-Sea ក្នុងតំបន់ Essex ក្រុមម្ចាស់ឆ្នោតដែលកំពុងសប្បាយរីករាយ បានប្រែទៅជាតក់ស្លុត នៅពេលបានឃើញហេតុការណ៍នេះ។ ពួកគេបានទូរស័ព្ទហៅប៉ូលិសនៅវេលាម៉ោង 12 និង 05 នាទី។ តំណាងរាស្ត្រ David Amess ត្រូវបានគេបញ្ជាក់ថា បានស្លាប់នៅវេលាម៉ោង 15 នៃថ្ងៃទី 15 តុលា។

ប៉ូលិស Essex បានចាប់ខ្លួនជនដៃដល់នៅកន្លែងកើតហេតុ និងដកហូតអាវុធដែលជននេះបានប្រើប្រាស់។ ជនសង្ស័យត្រូវបានគេស្គាល់អត្តសញ្ញាណថាជាពលរដ្ឋអង់គ្លេស ដើមកំណើតសូម៉ាលី។ សមត្ថកិច្ចបានហៅករណីនេះថាជាអំពើភេរវកម្មដែលមានអង្គការចាត់តាំង ទាក់ទិននឹងលទ្ធិអ៊ីស្លាមជ្រុលនិយម។

តំណាងរាស្ត្ររបស់ អង់គ្លេស លោក David Amess

តំណាងរាស្ត្រ David Amess ជាអ្នកដែលមានគំនិតប្រឆាំងនឹងអាពាហ៍ពិពាហ៍រវាងមនុស្សភេទដូចគ្នា និងការរំលូតកូន ត្រូវបានគេមើលឃើញថា មានទឹកមុខសប្បាយរីករាយ និងសើចក្អាកក្អាយជាមួយនឹងមនុស្សនៅជុំវិញប្រហែល 15 នាទី មុនពេលត្រូវគេចាក់ប្រហារ។

តំណាងរាស្ត្រ Amess អាយុ 69 ឆ្នាំ បានក្លាយជាសមាជិកសភាជាតិ តំណាងឱ្យទីក្រុង Basildon កាលពីឆ្នាំ 1983។ ចាប់ពីឆ្នាំ 1997 លោកគឺជាតំណាងរាស្ត្រនៃមណ្ឌលបោះឆ្នោត Southend West របស់តំបន់ Essex។

កាលពីដើមឆ្នាំនេះ លោក Amess ធ្លាប់បានថ្លែងរិះគន់ដល់អំពើប្រឆាំងសង្គម និងករណីល្មើសច្បាប់ដែលមានការប្រើប្រាស់កាំបិត៕

October 16, 2021

ចិន បាញ់បង្ហោះយានអវកាសទីពីរដែលដឹកអវកាសចរទៅសាងសង់ស្ថានីយអវកាស

វេលាទៀបភ្លឺនៃថ្ងៃ 16 តុលា (យប់ថ្ងៃទី 15 តុលា នៅភ្នំពេញ) ប្រទេសចិន បានបាញ់បង្ហោះយានអវកាស Shenzhou 13 ដែលដឹកអវកាសចរ 3 នាក់ ក្នុងនោះក៏មានស្ត្រីម្នាក់ផងដែរ ឡើងទៅកាន់បន្ទប់ស្នូលរបស់ស្ថានីយអវកាស Tiangong ដើម្បីបំពេញភារកិច្ច។

យានអវកាស Shenzhou 13 ត្រូវបាននាំទៅកាន់គន្លងគោចរផែនដី ដោយរ៉ុក្កែត Long March 2F ដែលហោះឡើងពីមជ្ឈមណ្ឌលបាញ់បង្ហោះផ្កាយរណប Jiuquan នៃខេត្ត Gansu នៅភាគពាយព្យនៃ ប្រទេសចិន។ បេសកកម្មរបស់អ្នកអវកាសទាំងនេះគឺរស់នៅ និងធ្វើការរយៈពេល 6 ខែ នៅលើមេឃ។

នេះគឺជាយានអវកាសទីពីរ នៅក្នុងការបាញ់បង្ហោះ 4 លើក ទៅតាមគម្រោងនាំអ្នកអវកាសឡើងទៅសាងសង់ស្ថានីយអវកាស Tiengong របស់ ប្រទេសចិន ដែលគ្រោងនឹងធ្វើរួចរាល់ជាស្ថាពរនៅចុងឆ្នាំ 2022៕

October 16, 2021

បាតុកម្មផ្ទុះឡើង ក្រោយពីបទបញ្ជាប្រើប្រាស់ប័ណ្ណបៃតងវ៉ាក់សាំងប្រឆាំង COVID-19 ចាប់ផ្ដើមមានសុពលភាព

(អ៊ីតាលី)-បាតុកម្មជាច្រើនបានផ្ទុះឡើងនៅពាសពេញទឹកដី អ៊ីតាលី នៅពេលវិធានការទប់ស្កាត់ COVID-19 ប្រកបដោយភាពតឹងរ៉ឹងបំផុតនៅ អឺរ៉ុប ចាប់ផ្ដើមមានសុពលភាព ដោយសារវាតម្រូវឱ្យបុគ្គលិកទាំងអស់ តាំងពីចៅក្រម រហូតដល់កូនឈ្នួល ត្រូវបង្ហាញប័ណ្ណបៃតង ទើបអាចធ្វើការបាន។

កាលពីថ្ងៃទី 15 តុលា ក្រុមប៉ូលិស អ៊ីតាលី ត្រូវបានដាក់ពង្រាយ សាលារៀនមួយចំនួនត្រូវបិទទ្វារបន្ទាន់ ខណៈដែលស្ថានទូតនានាព្រមានថា បាតុកម្មប្រឆាំងប័ណ្ណបៃតង (ប័ណ្ណបញ្ជាក់អំពីការចាក់វាក់សាំង ឬមានអង់ទីក័រប្រឆាំង COVID-19) អាចក្លាយជាអំពើហិង្សា។

ប៉ុន្តែ នៅដំណាច់ថ្ងៃដដែល បាតុកម្មភាគច្រើនត្រូវបានធ្វើឡើងដោយសន្តិវិធី។ ទីតាំងបាតុកម្មខ្លះ ក្រុមបាតុករបានសម្ដែងសញ្ញាសន្តិភាពដោយការជូនផ្កាដល់កងកម្លាំងប៉ូលិស។

«យើងមកទីនេះមិនមែនដើម្បីបង្កអំពើហិង្សា ឬបញ្ហាស្រដៀងនេះ យើងមកទីនេះក៏ព្រោះតែពួកគេដកហូតសិទ្ធិរបស់យើង។ យើងមិនអាចទៅធ្វើការបានទៀត» បាតុករម្នាក់ឈ្មោះ Elena Campisi ត្អូញត្អែរប្រាប់អ្នកយកព័ត៌មាន។

«ប័ណ្ណបៃតង» (Green Pass) គឺជាភ័ស្ដុតាងដែលទទួលស្គាល់ថា ម្ចាស់វាបានចាក់វ៉ាក់សាំង លទ្ធផលតេស្តអវិជ្ជមានថ្មីៗ ឬបានជាសះស្បើយពីជំងឺ COVID-19 ក្នុងរង្វង់ 6 ខែ។

អ៊ីតាលី តម្រូវឱ្យពលរដ្ឋគ្រប់រូប បង្ហាញប័ណ្ណបៃតង មុនពេលចូលទៅក្នុងអគារ រួមទាំងភោជនីយដ្ឋាន, សារមន្ទីរ, សាលមហោស្រព, រថភ្លើង។ល។ ប៉ុន្តែ ការតម្រូវឱ្យបង្ហាញប័ណ្ណបៃតងទើបអាចចូលធ្វើការបាននាពេលថ្មីៗនេះ បាននាំឱ្យមានមតិប្រឆាំងយ៉ាងខ្លាំងក្លានៅប្រទេសនេះ។

បាតុករម្នាក់ឈ្មោះ Loris Mazzarato ប្រកាសថា៖ «ថ្ងៃនេះពួកគេកំពុងជាន់ឈ្លីរដ្ឋធម្មនុញ្ញរបស់យើង។ ខ្ញុំនិយាយថា ទេ ចំពោះការរើសអើងនេះ»។

Loris Mazzarato ស្ថិតក្នុងចំណោមបាតុកររាប់រយនាក់នៅ Trieste ជាទីដែលការតវ៉ារបស់ពលករកំពង់ផែ កំពុងជះឥទ្ធិពលរបស់សកម្មភាពពាណិជ្ជកម្ម។

បទបញ្ជាថ្មីរបស់ អ៊ីតាលី នេះ ត្រូវបានគេយល់ថា ជាការដាក់សម្ពាធទៅលើពលករ និងអ្នកប្រើប្រាស់ពលករ។ ម៉ាស៊ីនស្កេនកូដ QR លើ Green Pass ត្រូវបានអាជ្ញាធរដំឡើងនៅក្នុងបណ្ដាទីតាំងធ្វើការធំៗ មានដូចជា ការិយាល័យនាយករដ្ឋមន្ត្រី Mario Draghi ឬការិយាល័យកណ្ដាលរបស់ក្រុមហ៊ុនផ្លូវដែករដ្ឋ Trenitalia ។ល។

ចំណែកនៅទីកន្លែងធ្វើការដែលមានទំហំតូច ចាប់ពីភោជនីយដ្ឋាន ដល់ក្លឹបកីឡាវាយកូនបាល់ (tennis) អ្នកប្រើប្រាស់កម្លាំងពលកម្មត្រូវតែទាញយកកម្មវិធីមួយដែលអាចស្កេនកូដ QR។ បើទោះជាមិនដឹងច្បាស់ថា អ៊ីតាលី នឹងអនុវត្តបទបញ្ជានេះតឹងរ៉ឹងកម្រិតណា ប៉ុន្តែការព្រួយបារម្ភអំពីការដែលត្រូវត្រួតពិនិត្យនៅនឹងកន្លែង បានធ្វើឱ្យក្រុមហ៊ុននានាត្រូវបង្ខំចិត្តគោរពតាម។

ការពិន័យជាប្រាក់ចំពោះអ្នកប្រើប្រាស់កម្លាំងពលកម្មដែលមិនបានពិនិត្យប័ណ្ណបៃតងរបស់បុគ្គលិកគឺចាប់ពី 400 ដល់ 1,000 អឺរ៉ូ។ បុគ្គលិកម្នាក់ដែលមិនបានបង្ហាញប័ណ្ណបៃតងនៅកន្លែងធ្វើការ ត្រូវបានចាត់ទុកថាអវត្តមានដោយមិនមានមូលហេតុសមហេតុផល ហើយបើសិនបង្ហាញខ្លួនដោយមិនមានប័ណ្ណបៃតងស្របច្បាប់ ពួកគេអាចត្រូវបានពិន័យជាប្រាក់ចាប់ពី 600 ដល់ 1,500 អឺរ៉ូ។

ចំណាត់ការខាងលើនេះគឺក្នុងបំណងជំរុញកំណើននៃការចាក់វ៉ាក់សាំងនៅ ប្រទេសអ៊ីតាលី ដែលបច្ចុប្បន្នបានកើនដល់ជាង 81% ធៀបនឹងចំនួនប្រជាជនដែលមានវ័យចាប់ពី 12 ឆ្នាំ។ ក៏ប៉ុន្តែ សម្រាប់អ្នកដែលមិនអាច ឬមិនចង់ចាក់វ៉ាក់សាំង បទបញ្ជាខាងលើ តម្រូវឱ្យពួកគេធ្វើតេស្ត 48 ម៉ោង/ម្ដង ដើម្បីអាចចូលធ្វើការបាន។ ចំណែកអ្នកដែលត្រូវបានបញ្ជាក់ថា មិនអាចចាក់វ៉ាក់សាំងបាន ទទួលបានការលើកលែងពីបទបញ្ជានេះ៕

October 16, 2021

(វីដេអូ)-ទាហានពិសេសរបស់ កូរ៉េខាងជើង បង្ហាញសមត្ថភាពលំដាប់កំពូល នៅចំពោះមុខមេដឹកនាំប្រទេស

ក្រុមទាហានពិសេសរបស់ ប្រទេសកូរ៉េខាងជើង ដោះអាវ សម្ដែងបង្ហាញកម្លាំង និងសមត្ថភាពនៃក្បាច់គុន ក៏ដូចជាការស៊ូទ្រាំជាមួយភាពលំបាកកម្រិតកំពូល នៅក្នុងពិព័រណ៍របស់ប្រទេសនេះ។

សកម្មភាពបង្ហាញសមត្ថភាពពិសេសនេះ ត្រូវបានធ្វើឡើងនៅចំពោះមុខមេដឹកនាំ Kim Jong-un និងថ្នាក់ដឹកនាំជាច្រើនរូបផ្សេងទៀត។ ក្រុមទាហានពិសេស បង្ហាញសមត្ថភាពកម្រិតកំពូលនេះ នៅក្នុងព្រឹត្តិការណ៍ពិព័រណ៍វិស័យការពារជាតិ នៅ រដ្ឋធានីព្យុងយ៉ាង។

ការបង្ហាញកម្លាំងនេះត្រូវបានផ្សាយជាសាធារណៈ បន្ទាប់ពីសុន្ទរកថារបស់មេដឹកនាំ កូរ៉េខាងជើង លោក Kim Jong-un ស្ដីពីសក្ដានុពលក្នុងវិស័យការពារជាតិរបស់ កូរ៉េខាងជើង។

October 14, 2021

តារាវ័យ 90 ឆ្នាំ នៃខ្សែភាពយន្តអវកាស Star Trek ពេលនេះបានហោះទៅកាន់ទីអវកាសពិតៗ

(សហរដ្ឋអាម៉េរិក)-William Shatner ដែលជាតារាសម្ដែងមួយរូបនៅក្នុងខ្សែភាពយន្តវិទ្យាសាស្ត្ររឿង Star Trek បានក្លាយជាមនុស្សដែលមានវ័យចំណាស់ជាងគេ ហោះទៅកាន់ទីអវកាស នៅក្នុងដំណើរហោះហើរនៃយានរបស់មហាសេដ្ឋី Jeff Bezos។

«ពិតជាមិនគួរឱ្យជឿ» Shatner អ្នកសម្ដែងវ័យ 90 ឆ្នាំ ជនជាតិកាណាដា និយាយដោយរំភើបរហូតដល់ស្រក់ទឹកភ្នែក បន្ទាប់ពីបានបញ្ចប់ការហោះហើរឡើងទៅកាន់ជាយអវកាសក្នុងរយៈពេល 11 នាទី និងត្រលប់មកកាន់ផែនដី កាលពីយប់ថ្ងៃទី 13 តុលា។

រ៉ុក្កែត New Shepard របស់ក្រុមហ៊ុនអាកាសចរណ៍អវកាស Blue Origin របស់មហាសេដ្ឋី Jeff Bezos បានហោះឡើងនៅវេលាម៉ោង 9៖49 នាទី (ម៉ោង 21៖49 នាទី នៅ ភ្នំពេញ)។ នាយិកាក្រុមហ៊ុន Blue Origin លោកស្រី Audrey Power, សហស្ថាបនិកនៃក្រុមហ៊ុន Planet Labs លោក Chris Boshuizen និង សហស្ថាបនិកក្រុមហ៊ុន Medidata Solutions លោក Glen de Vries ក៏មានវត្តមាននៅក្នុងបន្ទប់អ្នកដំណើររបស់យានអវកាស New Shepard ផងដែរ។

មហាសេដ្ឋី Jeff Bozos បានមកទទួលស្វាគមន៍សមាជិកក្រុមហោះហើរដែលបានត្រលប់មកផែនដីវិញ អមជាមួយនឹងស្នូរទះដៃ និងស្រាសាំប៉ាញ។

ក្រុមអ្នកហោះហើរ បានចំណាយពេលច្រើននាទីក្នុងស្ថានភាពគ្មានទម្ងន់ ពេលយានអវកាសបានហោះឡើងដល់កម្ពស់ 106 គីឡូម៉ែត្រ ខ្ពស់ជាង 6 គីឡូម៉ែត្រ ធៀបនឹង Karman ដែលជាព្រំដែនអវកាសមួយត្រូវបានអន្តរជាតិទទួលស្គាល់។

មិនខុសពីអ្នកអវកាសប្រហែល 600 នាក់ដែលធ្លាប់បានហោះឡើងដល់លើមេឃ លោក Shatner ក៏មានការភ្ញាក់ផ្អើលខ្លាំងនៅពេលស្ថិតក្នុងស្ថានភាពគ្មានទម្ងន់ និងបានគយគន់សម្រស់ដ៏ស្រស់ស្អាតរបស់ពិភពផែនដី ពីលើមេឃ។

«អ្វីដែលអ្នកបានផ្ដល់ឱ្យខ្ញុំ នោះគឺការទទួលបទពិសោធន៍ដ៏អស្ចារ្យបំផុតដែលខ្ញុំនឹកស្មានមិនដល់។ ខ្ញុំពិតជារំភើបចំពោះអ្វីដែលបានកើតឡើង» Shatner និយាយជាមួយ Jeff Bezos។

កាលពីខែកក្កដា Blue Origin បានបង្កើតជើងហោះហើរដឹកអ្នកដំណើរដំបូងរបស់ខ្លួន ហោះទៅកាន់ទីអវកាស។ ក្នុងជើងហោះហើរនោះមានវត្តមានរបស់លោក Jeff Bezos, ប្អូនប្រុសរបស់លោក Jeff Bezos គឺលោក Mark Bezos, អ្នកបើកបរ Wally Funk និង Oliver Daemen រួមនឹងអតិថិជនវ័យ 18 ឆ្នាំម្នាក់ ដែលមិនបញ្ចេញឈ្មោះ មកពី ប្រទេសហូឡង់។

លោក William Shatner មានឈ្មោះល្បី នៅក្នុងតួអង្គប្រធានក្រុមនាវិក Kirk របស់យានអវកាស USS Enterprise ក្នុងខ្សែភាពយន្តវិទ្យាសាស្ត្រ Star Trek។ ដំណើរហោះហើរឆ្លងកាត់កាឡាក់ស៊ី របស់យាន USS Enterprise បានទាក់ទាញចំណាប់អារម្មណ៍ពី ពលរដ្ឋអាម៉េរិក ចំពោះវិស័យអវកាស នៅពេលប្រទេសនេះចាប់ផ្ដើមបន្តកម្មវិធីអវកាសខ្លួន៕

October 14, 2021

យន្តហោះចម្បាំងរបស់ អ៊ីស្រាអែល បន្តបាញ់កម្ទេចមូលដ្ឋាននានារបស់ អ៊ីរ៉ង់ នៅ ស៊ីរី

កងទ័ពរបស់ អ៊ីស្រាអែល បានបាញ់ប្រហារតាមអាកាស លើទីតាំងជាច្រើននៅក្នុងទីក្រុង ប៉ាលម៉ៃរ៉ា (Palmyra) បណ្ដាលឱ្យទាហានរបស់ រដ្ឋាភិបាលស៊ីរី ម្នាក់ បានស្លាប់ និងទាហានស្និទ្ធនឹង អ៊ីរ៉ង់ 3 នាក់ បាត់បង់ជីវិត។

សារព័ត៌មានរដ្ឋ ស៊ីរី SANA បានរាយការណ៍ថា ករណីវាយប្រហារនេះត្រូវបានធ្វើឡើងកាលពីយប់មិញ នៅពេល អ៊ីស្រាអែល បាញ់រ៉ុក្កែត ច្រើនគ្រាប់សំដៅលើប៉មទំនាក់ទំនងមួយ និងគោលដៅជាច្រើននៅជុំវិញនោះ នាទីក្រុង ប៉ាលម៉ៃរ៉ា ស្ថិតក្នុងភាគកណ្ដាលនៃ ប្រទេសស៊ីរី។ «ទាហានម្នាក់បានស្លាប់ និង 3 នាក់រងរបួស» SANA ដកស្រង់ប្រភពព័ត៌មានពីកងទ័ព ឱ្យដឹងដូច្នេះ។

អង្គការសិទ្ធិមនុស្សស៊ីរី (SOHR) ដែលមានមូលដ្ឋាននៅ ប្រទេសអង់គ្លេស បានឱ្យដឹងថា ទាហានរដ្ឋាភិបាលម្នាក់ និងខ្មាន់កាំភ្លើង 3 នាក់ បានស្លាប់ ខណៈមនុស្ស 7 នាក់ផ្សេងទៀតរងរបួស នៅក្នុងការវាយប្រហារពីយន្តហោះចម្បាំងរបស់កងទ័ព អ៊ីស្រាអែល។ SOHR បន្ថែមថា គោលដៅរបស់ អ៊ីស្រាអែល គឺទីតាំងរបស់កងជីវពលស្និទ្ធនឹង អ៊ីរ៉ង់ ដែលស្ថិតនៅក្បែរមូលដ្ឋានទ័ពអាកាស T4 ជាទីដែលធ្លាប់បានរងការវាយប្រហារពីរ៉ុក្កែតរបស់ អ៊ីស្រាអែល កាលពីដើមសប្ដាហ៍នេះ។

ទាក់ទងនឹងព័ត៌មានស្ដីពីករណីវាយប្រហារថ្មីនេះ កងទ័ពអ៊ីស្រាអែល មិនទាន់បានអធិប្បាយអ្វីនៅឡើយ។

អ៊ីស្រាអែល វាយប្រហារតាមផ្លូវអាកាសសំដៅទីតាំងជាច្រើននៅក្នុងទឹកដីរបស់ ស៊ីរី ក្នុងនោះក៏មានទាំងរដ្ឋធានី ដាម៉ាស (Damascus) ផងដែរ។ គោលដៅនៃការវាយប្រហាររបស់ អ៊ីស្រាអែល ភាគច្រើនគឺជាកងកម្លាំងដែលស្និទ្ធនឹង រដ្ឋាភិបាលអ៊ីរ៉ង់ និងក្រុម ហេស្បូឡា (Hezbollah) របស់ ប្រទេសលីបង់ ប៉ុន្តែ ពេលខ្លះ អ៊ីស្រាអែល ក៏បានវាយប្រហារលើ កងទ័ពស៊ីរី ផងដែរ។

កងជីវពល ហេស្បូឡា និងទីប្រឹក្សានានានៃ កងទ័ពបដិវដ្ដន៍អ៊ីស្លាមអ៊ីរ៉ង់ គឺជាសម្ព័ន្ធមិត្តសំខាន់របស់ កងទ័ពរដ្ឋាភិបាលស៊ីរី នៅក្នុងសង្គ្រាមប្រឆាំងនឹង ក្រុមឧទ្ទាមអ៊ីស្លាម។ ប៉ុន្តែ អ៊ីស្រាអែល បានចោទ ហេស្បូឡា ថា កំពុងប្រើប្រាស់មូលដ្ឋាននៅ ស៊ីរី ដើម្បីធ្វើជាឈ្នាន់សម្រាប់ការវាយប្រហារលើតំបន់ខ្ពង់រាប ហ្គោឡាន (Golan) ដែលគ្រប់គ្រងដោយ រដ្ឋធានី ហ៊្សេរុយសាឡិម (ហ៊្សេរុយសាឡិមជារដ្ឋធានីដែលអន្តរជាតិទទួលស្គាល់ ខណៈ អ៊ីស្រាអែល ហៅទីក្រុង តេលអាវីវ/Tel Aviv ថាជា រដ្ឋធានីរបស់ខ្លួន)។

អ៊ីស្រាអែល កម្រនឹងទទួលស្គាល់ការវាយប្រហារតាមផ្លូវអាកាសលើទឹកដី ស៊ីរី។ កងទ័ពប្រទេសនេះ ធ្លាប់បានឱ្យដឹងថា បានវាយប្រហារតាមអាកាស តម្រង់គោលដៅប្រហែល 50 នៅ ស៊ីរី ក្នុងឆ្នាំ 2020 ប៉ុន្តែ មិនបានបង្ហើបឱ្យដឹងអំពីសេចក្ដីលម្អិតនោះទេ៕

October 14, 2021

វិស្វកររបស់ អាម៉េរិក ញាត់ «ឯកសារមហាសម្ងាត់នៃនាវាមុជទឹកនុយក្លេអែរ» ក្នុងនំ ដើម្បីលក់ឱ្យបរទេស

(សហរដ្ឋអាម៉េរិក)-ក្ដាប់បានអាថ៌កំបាំងនៃបច្ចេកវិទ្យាម៉ាស៊ីននាវាមុជទឹកនុយក្លេអែរ របស់ សហរដ្ឋអាម៉េរិក Jonathan Toebbe ចម្លងដាក់ក្នុងអង្គចងចាំ ហើយញាត់វាចូលក្នុងនំពុម្ភ ដើម្បីលក់ឱ្យ «កម្លាំងពិសេសរបស់បរទេស»។

ថ្ងៃមួយនៃខែសីហា ឆ្នាំ 2020 Jonathan Toebbe ដែលជាវិស្វករម្នាក់ ធ្លាប់បានបម្រើការនៅក្នុងជួរកងទ័ពជើងទឹក សហរដ្ឋអាម៉េរិក បានធ្វើដំណើរទៅដល់ទីតាំងណាត់ជួប នៅក្នុងស្រុក Jefferson នៃរដ្ឋ Virginia ហើយនៅក្បែរនោះគឺជាប្រពន្ធរបស់គាត់ ឈ្មោះ Diana កំពុងចាំមើលផ្លូវដោយប្រុងប្រយ័ត្ន។ Jonathan បានទុកនំពុម្ភមួយកំណត់ត្រង់កន្លែងណាត់ជួប រួចក៏ចាកចេញទៅយ៉ាងលឿន។

រាល់សកម្មភាពរបស់ប្ដី-ប្រពន្ធ Toebbe សុទ្ធតែស្ថិតក្នុងការគ្រប់គ្រងរបស់ការិយាល័យស៊ើបអង្កេតសហព័ន្ធ (FBI) របស់ សហរដ្ឋអាម៉េរក។ នៅខាងក្នុងនំពុម្ភនេះគឺជាអង្គចងចាំទំហំ 16 GB ដែលត្រូវបានរុំក្នុងថង់ប្លាស្ទិក និងផ្ទុកឯកសាររាប់ពាន់សន្លឹក ទាក់ទងនឹងម៉ាស៊ីនប្រតិកម្មនុយក្លេអែរដ៏មហាអាថ៌កំបាំង នៅក្នុងនាវាមុជទឹក អាម៉េរិក។

នេះគឺជាការជួញដូរដំបូងក្នុងចំណោមការជជែកគ្នាចំនួន 3 លើក ដែលនាំឱ្យមានករណីចាប់ខ្លួនប្ដី-ប្រពន្ធ Toebbe កាលពីចុងសប្ដាហ៍មុន។ ប្រកាសរបស់ FBI ស្ដីពីករណីនេះ ធ្វើឱ្យអ្នកក្បែរខាង និងមិត្តរួមការងាររបស់ Toebbe មានការភ្ញាក់ផ្អើលជាខ្លាំង ដោយសារតែ Toebbe ដែលរស់នៅជាយក្រុង Annapolis ក្នុងរដ្ឋ Maryland ខុសឆ្ងាយពីរូបភាពនៃ «ចារជនគ្មានជំនាញ» ដែល FBI បានបរិយាយ។ FBI ចោទប្ដី-ប្រពន្ធនេះថា បានស្វែងរកវិធីលក់ព័ត៌មានសម្ងាត់ស្ដីពីបច្ចេកវិទ្យាម៉ាស៊ីននៃនាវាមុជទឹកនុយក្លេអែរ របស់ សហរដ្ឋអាម៉េរិក ឱ្យបរទេស។

Jonathan Toebbe ត្រូវបានអ្នកស្គាល់អះអាងថាជាមនុស្សឧស្សាហ៍ព្យាយាម និងធ្វើការដោយមានរបៀប។ លោក Jonathan Toebbe បញ្ចប់ការសិក្សាផ្នែករូបវិទ្យានុយក្លេអែរ ធ្វើការឱ្យរដ្ឋាភិបាលអាម៉េរិក តាំងពីឆ្នាំ 2012 ដោយបម្រើការជាមន្ត្រីយោធា និងអ្នកជំនាញខាងម៉ាស៊ីនរុញច្រានសម្រាប់នាវាមុជទឹក។ ការងារនេះជួយឱ្យ Jonathan Toebbe មានឱកាសមើលឯកសារសម្ងាត់ជាន់ខ្ពស់ទាក់ទងនឹងបច្ចេកវិទ្យានាវាមុជទឹករបស់ សហរដ្ឋអាម៉េរិក។

ក្រោយការចាកចេញពីជួរកងទ័ពជើងទឹកក្នុងឆ្នាំ 2017 លោក Jonathan បន្តសហការជាមួយកងកម្លាំងនេះក្នុងនាមជាវិស្វករស៊ីវិល។

ភរិយារបស់ Jonathan អ្នកស្រី Diana គឺជាគ្រូបង្រៀននៃសាលា Key នៅទីក្រុង Annapolis។ «អ្នកនឹងបានឃើញយ៉ាងឆាប់ថា អ្នកគ្រូ Diana គឺជាមនុស្សឆ្លាតវៃខ្លាំង» Craig Martien អាយុ 20 ជាអតីតសិស្សសាលា Key ដែលបានបញ្ចប់ការសិក្សានៅឆ្នាំ 2019 បានរៀបរាប់អំពីអ្នកគ្រូ Diana ដ៏គួរឱ្យចង់រាប់អាន។

អ្នកស្រី Diana ធ្លាប់បានប្រាប់សិស្សរបស់គាត់ថា មានបំណងទៅរស់នៅក្នុង ប្រទេសអូស្ត្រាលី។ «គាត់ធ្លាប់និយាយថា មិនអាចទ្រាំបាននឹងស្ថានការណ៍នយោបាយនៅ សហរដ្ឋអាម៉េរិក ហើយថា បានរកឃើញឱកាសការងារមួយចំនួននៅប្រទេសផ្សេង» Martien បន្ថែមដូច្នេះ។ Luke Koerschner អតីតសិស្សម្នាក់ទៀតនៅសាលា Key ក៏បាននិយាយស្រដៀងគ្នានេះដែរ អំពីអ្នកស្រី Diana Toebbe។

ចំណែកឯការចោទប្រកាន់របស់ FBI បង្ហាញថា ប្ដី-ប្រពន្ធ Toebbe មានលក្ខណៈផ្ទុយពីនេះ។ FBI ឱ្យដឹងថា ប្ដី-ប្រពន្ធ Toebbe បានប្រគល់ឯកសារសម្ងាត់របស់កងទ័ពជើងទឹក អាម៉េរិក ឱ្យបរទេស និងស្នើបង្កើតទំនាក់ទំនងសម្ងាត់។ ពួកគេព្យាយាមលក់ព័ត៌មានសម្ងាត់អំពីបច្ចេកវិទ្យានាវាមុជទឹកនុយក្លេអែរ ក្នុងរយៈពេលជិតមួយឆ្នាំកន្លង និងរកបានប្រាក់រាប់សែនដុល្លារអាម៉េរិក ក្រោមទម្រង់ជាប្រាក់ឌីជីថលដែលមានឈ្មោះថា Monero។

ទាំង Jonathan ទាំង Diana ពុំមានឧបាយកលដើម្បីបានប្រយោជន៍ផ្ទាល់ខ្លួននោះទេ ព្រោះថា ពួកគេមិនជួបការលំបាកណាមួយទាក់ទងនឹងបញ្ហាប្រាក់កាសក្នុងរយៈពេលកន្លង នេះបើតាមទិន្នន័យសាធារណៈ។ ប៉ុន្តែ ការស្រាវជ្រាវរបស់ FBI បង្ហាញថា Jonathan តែងនិយាយថា ត្រូវការជំនួយ។

«ថ្ងៃណាមួយ នៅពេលបញ្ចប់កិច្ចការ ប្រហែលជាយើងនឹងមានឱកាសជួបគ្នានៅក្នុងហាងកាហ្វេ ផឹកស្រាមួយដប និងរំលឹកអំពីរឿងរ៉ាវដែលបានឆ្លងកាត់។ ទោះជាយើងបានជួបគ្នា ឬអត់ ខ្ញុំក៏នៅតែចងចាំអំពីភាពក្លាហានរបស់អ្នកក្នុងការបម្រើជាតិ និងប្ដេជ្ញាជួយដល់ខ្ញុំ» Jonathan សរសេរនៅក្នុងសារអ៊ីមេលមួយដែលបានបំប្លែងជាកូដ ផ្ញើទៅកាន់ដៃគូដែលទិញព័ត៌មានសម្ងាត់ ប៉ុន្តែ Jonathan មិនដឹងថានេះគឺជាភ្នាក់ងារ FBI បន្លំខ្លួនសោះឡើយ។

យោងតាមឯកសារ FBI ដែលបានបញ្ជូនទៅកាន់តុលាការ បើទោះជាបានទាក់ទងទៅកាន់ប្រទេសទីបី ដើម្បីជជែកអំពីការលក់ព័ត៌មានសម្ងាត់ស្ដីពីនាវាមុជទឹកនុយក្លេអែរ របស់ អាម៉េរិក ប៉ុន្តែ ប្ដី-ប្រពន្ធ Toebbe នៅតែមិនចង់ជួបមុខភ្នាក់ងារសម្ងាត់បរទេសដោយផ្ទាល់។ ពួកគេដំបូងឡើយ ធ្វើសកម្មភាពយ៉ាងប្រុងប្រយ័ត្ន ដោយបានបដិសេធការស្នើជួបមុខផ្ទាល់ ឬប្រគល់ឯកសារផ្ទាល់ដៃនៅទីតាំងណាត់ជួបដែលជ្រើសរើសដោយភាគីអ្នកទិញ។

ដោយប្រើប្រាស់ឈ្មោះក្លែងក្លាយ Alice ប្ដី-ប្រពន្ធ Toebbe បញ្ជាក់ថា ការជួបមុខនៅទីតាំងប្រគល់ទំនិញដែលកំណត់ដោយអ្នកទិញគឺពិតជាមានហានិភ័យ ហើយពួកគេចង់ឱ្យភាគីអ្នកទិញបង្ហាញអំពីសុឆន្ទៈ។ ពួកគេទទួលស្គាល់ថា ខ្លួនមិនមានលទ្ធភាពដឹងថា មានមនុស្សតាមដានដែរ ឬអត់ ព្រោះប្ដី-ប្រពន្ធនេះមិនមែនជាចារជនជំនាញ និងមិនមានក្រុមជំនួយ។

«ខ្ញុំសុំទោសចំពោះការចចេស និងការសង្ស័យរបស់ខ្ញុំ ប៉ុន្តែ មិនអាចទទួលយកការដែលអ្នកជ្រើសរើសទីតាំងប្រគល់ទំនិញ។ ខ្ញុំត្រូវពិចារណាពីលទ្ធភាពដែលថា ខ្ញុំកំពុងទាក់ទងនឹងភាគីសត្រូវ ដែលប្រហែលជាបានលួចមើលសារដំបូងពីខ្ញុំ ហើយកំពុងស្រាវជ្រាវវែករកមុខខ្ញុំ» Toebbe សរសេរនៅក្នុងការទាក់ទងមួយជាមួយនឹងភ្នាក់ងារ FBI ដែលបន្លំខ្លួនជាអ្នកទិញ។

ប្ដី-ប្រពន្ធ Toebbe ក្រោយមក ថែមទាំងស្នើឱ្យប្រទេសដែលចង់ទិញព័ត៌មានសម្ងាត់នេះ បញ្ចេញ «សញ្ញាធានា» មួយ ពីស្ថានទូតប្រចាំទីក្រុងវ៉ាស៊ីងតោន នៅក្នុងទិវាចងចាំ Memorial Day នៅចុងខែឧសភា ឆ្នាំ 2020។

នាវាមុជទឹកនុយក្លេអែរ របស់ សហរដ្ឋអាម៉េរិក

ក្រោយមក ប្ដី-ប្រពន្ធ Toebbe ក៏ទទួលបាន «សញ្ញាធានា» នេះ ហើយយល់ព្រមប្រគល់ទំនិញនៅទីតាំងដែលភាគីអ្នកទិញបានជ្រើសរើស។ បច្ចុប្បន្ន មិនទាន់ដឹងថា សញ្ញាធានានេះគឺជាអ្វី ហើយត្រូវបានផ្សាយចេញពីស្ថានទូតណាមួយនៅ វ៉ាស៊ីងតោន នៅឡើយ។

យោងតាម Michael Atkinson អតីតអគ្គស្នងការដ្ឋានសហគមន៍ចារកម្ម (Inspector General of the Intelligence Community ) របស់ អាម៉េរិក កម្រមានប្រទេសណាអនុញ្ញាតឱ្យ FBI ប្រើប្រាស់ស្ថានទូត ឬទីតាំងការទូតរបស់ពួកគេ ដើម្បីធ្វើជាទីតាំងផ្ញើ «សញ្ញាធានា» ចំពោះប្ដី-ប្រពន្ធ Toebbe។ ប្រការនេះបង្ហាញថា ប្រទេសទីបីដែលត្រូវបានប្ដី-ប្រពន្ធនេះទាក់ទងលក់ឯកសារសម្ងាត់ បានចេញមកសហការជាមួយ អាម៉េរិក តាំងតែពីដំបូង។

សារព័ត៌មានរបស់ អាម៉េរិក អះអាងថា ប្រទេសដែលត្រូវបាន Toebbe ទាក់ទងលក់ព័ត៌មានសម្ងាត់ អាចជាដៃគូសហការ ឬសម្ព័ន្ធមិត្តរបស់ សហរដ្ឋអាម៉េរក។ ព័ត៌មានដែល FBI បានបញ្ជូនទៅតុលាការបង្ហាញថា ភាគីអ្នកទិញបានសហការជាមួយសមត្ថកិច្ចនៃ សហរដ្ឋអាម៉េរិក ក្នុងការរៀបចំអន្ទាក់ដើម្បីចាប់ខ្លួនប្ដី-ប្រពន្ធនេះ។ អ្នកជំនាញមួយចំនួនអះអាងថា បារាំង អាចជាប្រទេសដែលជាប់ទាក់ទងនឹងការស៊ើបអង្កេត ប៉ុន្តែ ទីក្រុងប៉ារីស បានបដិសេធ។

ប្ដីប្រពន្ធ Toebbe កាលពីថ្ងៃទី 12 តុលា បានបង្ហាញខ្លួននៅតុលាការក្នុងតំបន់ Martinsburg នៃរដ្ឋ Virginia ខាងលិច។ ពួកគេប្រឈមនឹងទោសលក់ឯកសារសម្ងាត់ឱ្យបរទេស ហើយអាចត្រូវជាប់ពន្ធនាគារអស់មួយជីវិត៕

October 13, 2021

ជប៉ុន និងឧបទ្វីបកូរ៉េ «តឹងសរសៃកដាក់គ្នា» ដោយសារម្ហូបមួយចានដែលមានប្រភពពីឧបទ្វីបឥណ្ឌា

ភោជនីយដ្ឋានមួយនៅ ប្រទេសជប៉ុន ចម្អិតអាហារការីគ្រឿងសមុទ្រដែលមានដោតទង់ជាតិ ជប៉ុន នៅលើ «ប្រជុំកោះ Takeshima» ធ្វើឱ្យសហគមន៍អ្នកសារព័ត៌មានរបស់ឧបទ្វីបកូរ៉េ ប្រតិកម្មយ៉ាងខ្លាំងក្លាទៅនឹងមុខម្ហូបបែបឧបទ្វីបឥណ្ឌាមួយនេះ។

«មុខម្ហូបការីសាមញ្ញមួយចាន បានក្លាយជាមេនាំភ្លើង ធ្វើឱ្យមានការឈ្លោះប្រកែកគ្នាថ្មីបំផុត ទាក់ទិននឹងជម្លោះដណ្ដើមទឹកដីដ៏យូរអង្វែង រវាង ប្រទេសជប៉ុន និងឧបទ្វីបកូរ៉េ នេះបើតាមសារព័ត៌មាន The Guardian ចុះផ្សាយកាលពីថ្ងៃទី 12 តុលា។

ជាក់ស្ដែង សារព័ត៌មានរបស់ កូរ៉េខាងត្បូង និង កូរ៉េខាងជើង បានខឹងយ៉ាងខ្លាំង បន្ទាប់ពីមានរូបថតស្ដីពីម្ហូបការីគ្រឿងសមុទ្រមួយមុខ ត្រូវបានដាក់លក់នៅ ប្រទេសជប៉ុន។

ក្នុងរូបថតស្ដីពីម្ហូបការីមួយចានដែលត្រូវបានទីភ្នាក់ងារសារព័ត៌មាននានាចុះផ្សាយ គេឃើញបាយសត្រូវបានតម្រៀបជារូបរាងប្រជុំកោះ Liancourt Rocks (ជប៉ុនហៅថា Takeshima ចំណែក កូរ៉េ ហៅថា Dokdo)។ នៅលើបាយសនេះ មានដោតទង់ជាតិរបស់ ជប៉ុន និងព័ទ្ធជុំវិញដោយ «សមុទ្រ» ទឹកការី។

ការីគ្រឿងសមុទ្រ មានរូបរាងដូចប្រជុំកោះ Liancourt Rocks (Takeshima/Dokdo) ដោតទង់ជាតិ ជប៉ុន

អាហារមួយមុខនេះ មាននៅក្នុងភោជនីយដ្ឋានមួយនៅលើកោះ Okinoshima ក្នុងខេត្ត Shimane នៃ ប្រទេសជប៉ុន ដែលស្ថិតនៅមិនឆ្ងាយពីប្រជុំកោះ Takeshima/Dokdo។ អាហារនេះ ហូបជាមួយស៊ុប និងជ្រក់ជូរ។

Takeshima/Dokdo គឺជាប្រជុំកោះដែលស្ថិតនៅរយៈចម្ងាយស្មើគ្នា រវាង ប្រទេសកូរ៉េខាងត្បូង និង ប្រទេសជប៉ុន។ បច្ចុប្បន្ន កូរ៉េខាងត្បូង គឺជាប្រទេសដែលកំពុងកាន់កាប់ជាក់ស្ដែងចំពោះប្រជុំកោះនេះ។ ប៉ុន្តែ ភាគីខាង ជប៉ុន អះអាងថា Takeshima/Dokdo គឺជាផ្នែកមួយនៃទឹកដីរបស់ខ្លួន។

កន្លងមក ទំនាក់ទំនងរវាង ជប៉ុន និង កូរ៉េខាងត្បូង បានប្រែជាតានតឹង ដោយសារបញ្ហាប្រវត្តិសាស្ត្រ។ ការដណ្ដើមទឹកដី ក៏បាន និងកំពុងធ្វើឱ្យទំនាក់ទំនងរវាងប្រទេសទាំងពីរ «ល្អក់កករ» ផងដែរ។

សារព័ត៌មាន Uriminzokkiri របស់ កូរ៉េខាងជើង បានបញ្ចេញមតិថា ម្ហូបការីមួយចាន បានបង្ហាញអំពីមហិច្ឆតារបស់ ជប៉ុន ដែលចង់ «លេប» ប្រជុំកោះ Takeshima/Dokdo។

ប្រជុំកោះ Liancourt Rocks (Takeshima/Dokdo)

សារព័ត៌មានរបស់ កូរ៉េខាងត្បូង វិញ ក៏បានចេញផ្សាយអត្ថបទស្ដីពីអាហារការីខាងលើ។ សាស្ត្រាចារ្យម្នាក់ នៃសាកលវិទ្យាល័យមួយ បាននិយាយប្រាប់សារព័ត៌មាន Dong-A-Ilbo ថា ជប៉ុន បានប្រើប្រាស់ «កលល្បិចធូរថ្លៃដែលលេចធ្លោ» ដើម្បីជំរុញការទាមទាររបស់ពួកគេ ចំពោះប្រជុំកោះនេះ។

នេះគឺជាលើកដំបូងបង្អស់ ដែលអាហារបានបង្កឱ្យមានជម្លោះតឹងសរសៃក ទាក់ទិននឹងប្រជុំកោះ Takeshima/Dokdo។ កាលពីឆ្នាំ 2017 ក្រុមមន្ត្រីរបស់ ជប៉ុន បានសម្ដែងការប្រឆាំង បន្ទាប់ពីបង្កងដែលត្រូវបាននេសាទនៅតំបន់សមុទ្រក្បែរប្រជុំកោះ Dokdo បង្ហាញខ្លួនក្នុងបញ្ជីមុខម្ហូប នៅឯពិធីជប់លៀងមួយ ក្នុងដំណើរទស្សនកិច្ចផ្លូវរដ្ឋមកកាន់ កូរ៉េខាងត្បូង របស់ ប្រធានាធិបតីសហរដ្ឋអាម៉េរិក ដែលកាលណោះគឺលោក Donald Trump៕

October 13, 2021

Category: អន្តរជាតិ