អន្តរជាតិ - La Reine Media

មហាសេដ្ឋី Bill Gates ព្យាករអំពីដំណាក់កាលបញ្ចប់របស់ជំងឺរាតត្បាតសកលកូវីដ-១៩

មហាសេដ្ឋីអាម៉េរិក លោក Bill Gates បានធ្វើការព្យាករអំពីដំណាក់កាលដែលជំងឺរាតត្បាតសកលកូវីដ-១៩ ត្រូវបានបញ្ចប់ នៅក្នុងគ្រាដែលពិភពលោកកំពុងព្រួយបារម្ភចំពោះវត្តមានរបស់ កូវីដ-១៩ ប្រភេទ អូមីក្រុង (Omicron)។

យោងតាមទូរទស្សន៍ RT (រុស្ស៊ី) នៅលើទំព័រប្លក់ផ្ទាល់ខ្លួន មហាសេដ្ឋី Bill Gates ព្យាករថា «ដំណាក់កាលស្រួចស្រាវ» របស់ជំងឺរាតត្បាតសកលកូវីដ-១៩ នឹងបញ្ចប់នៅក្នុងឆ្នាំ ២០២។

លោក Bill Gates ទទួលស្គាល់ថា បើទោះជាវ៉ាក់សាំងបង្ការជំងឺកូវីដ-១៩ ត្រូវបានផ្គត់ផ្គង់ពាសពេញពិភពលោក ប៉ុន្តែ ឆ្នាំ ២០២១ នៅតែមានអ្នកស្លាប់ច្រើនជាងឆ្នាំ ២០២។ លោកបន្តថា ជំងឺរាតត្បាតសកលនេះមិនបានបញ្ចប់ក្នុងរយៈពេលខ្លីដូចលោកបានរំពឹងកាលពីដំបូង ដោយសារតែវត្តមានរបស់ វ៉ារ្យ៉ង់ដេលតា (Delta) និងការដែលប្រទេសជាច្រើនបានបរាជ័យក្នុងការបញ្ចុះបញ្ចូលឱ្យពលរដ្ឋទៅចាក់វ៉ាក់សាំង។

មហាសេដ្ឋីរូបនេះរៀបរាប់ថា៖ «ខ្ញុំបានវាយតម្លៃទាបទៅលើឧបសគ្គក្នុងការបញ្ចុះបញ្ចូលឱ្យគ្រប់គ្នាទៅទទួលការចាក់វ៉ាក់សាំង និងបន្តពាក់ម៉ាស»។

លោក Gates បានវាយតម្លៃទៅលើវីរុសបំប្លែងខ្លួនថ្មី អូមីក្រុង ថា «គួរឱ្យព្រួយបារម្ភ» ប៉ុន្តែ លោកបានឱ្យដឹងថា ពិភពលោក «ត្រៀមខ្លួនបានល្អជាង ធៀបនឹងពេលកន្លង នៅក្នុងការទប់ទល់នឹង វ៉ារ្យ៉ង់ ថ្មីនានា នៅអនគត ដែលបង្កប់ដោយហានិភ័យ។ ជាមួយនឹងល្បឿននៃការរកឃើញ វ៉ារ្យ៉ង់ ថ្មី ដូចបច្ចុប្បន្ន រួមនឹងការអភិវឌ្ឍវ៉ាក់សាំង និងថ្នាំព្យាបាល លោក Gates សង្ឃឹមថា «ជំងឺរាតត្បាតសកល» កូវីដ-១៩ នឹងក្លាយជា «ជំងឺរាតត្បាតតាមតំបន់» នៅក្នុងឆ្នាំ ២០២។

លោកក៏បានបន្ថែមថា ក្រុមអ្នកវិទ្យាសាស្ត្រ ក្នុងនោះមានទាំងក្រុមស្រាវជ្រាវដែលទទួលបានជំនួយរបស់មូលនិធិ Bill & Melinda Gates ក៏កំពុងប្រឹងប្រែងវិភាគលើ វ៉ារ្យ៉ង់អូមីក្រុង ហើយបើគម្រោង ពួកគេនឹងរកឃើញព័ត៌មានជាច្រើនបន្ថែមទៀតស្ដីពីវីរុសបំប្លែងខ្លួនថ្មីមួយនេះ៕

December 9, 2021

ធ្លាក់ឧទ្ធម្ភាគចក្រយោធានៅ ប្រទេសប៉េរូ! មនុស្ស ៥ នាក់ ត្រូវបាត់បង់ជីវិត

កាលពីថ្ងៃទី ៨ ធ្នូ ក្រសួងការពារជាតិប៉េរូ បានបញ្ជាក់ថា មានមនុស្សចំនួន ៥ នាក់ បានស្លាប់ បន្ទាប់ពីឧទ្ធម្ភាគចក្រមួយគ្រឿងរបស់ទ័ពអាកាសប្រទេសនេះ បានធ្លាក់នៅពេលកំពុងបំពេញបេសកកម្មមនុស្សធម៌។

យោងតាមប្រភពព័ត៌មានរបស់ ANews អ្នកនាំពាក្យរបស់ក្រសួងការពារជាតិប៉េរូ ឱ្យដឹងថា កម្លាំងជួយសង្គ្រោះបន្ទាន់បានទៅដល់កន្លែងកើតហេតុ ក្រោយពីបានរកឃើញឧទ្ធម្ភាគចក្រដែលត្រូវបានគេរាយការណ៍ថា បានបាត់ខ្លួនមុននោះមួយថ្ងៃ។ អ្នកនាំពាក្យរូបនេះបន្តថា មន្ត្រីយោធាចំនួន ៥ រូប ក្នុងនោះមានទាំងមេបញ្ជាការម្នាក់ និងប្រធានក្រុមហោះហើរ ២ នាក់ នៃកងទ័ពអាកាសរបស់ ប្រទេសប៉េរូ បានបាត់បង់ជីវិត។

ឧទ្ធម្ភាគចក្រ MI-171SH ដែលផលិតដោយ រុស្ស៊ី ត្រូវបានរាយការណ៍ថា បានបាត់ខ្លួន មួយម៉ោងក្រោយពីការហោះហើរពីរដ្ឋធានី លីម៉ា (Lima) ក្នុងបេសកកម្មដឹកជំនួយផ្នែកមនុស្សធម៌ទៅកាន់តំបន់ព្រៃជ្រៅ។

ឧទ្ធម្ភាគចក្រនេះ ក្រោយមកក៏ត្រូវបានរកឃើញនៅក្នុងតំបន់ ហួរ៉ូជីរី (Huarochiri) ដែលមានចម្ងាយ ពី លីម៉ា ជិត ២០០ គីឡូម៉ែត្រ ទៅទិសខាងកើត។

គិតចាប់ពីដើមឆ្នាំដល់បច្ចុប្បន្ន ករណីធ្លាក់ឧទ្ធម្ភាគចក្រយោធានៅ ប្រទេសប៉េរូ កើតមានចំនួន ៣ ករណីមកហើយ ក្នុងនោះមាន ១ ករណីនៅក្នុងខែមេសា ដែលបានបណ្ដាលឱ្យទាហាន ៧ នាក់ស្លាប់ និង ១ ករណីនៅក្នុងខែឧសភា បានសម្លាប់មនុស្ស ៥ នាក់៕

December 9, 2021

(វីដេអូ)-ធ្លាក់ឧទ្ធម្ភាគចក្រនៅ ឥណ្ឌា! អគ្គមេបញ្ជាការកងទ័ព និងភរិយា បាត់បង់ជីវិត

ប្រជាជនជាច្រើននាក់នៅក្នុងរដ្ឋ Tamil Nadu មានការភ្ញាក់ផ្អើលជាខ្លាំងនៅពេលបានឃើញឧទ្ធម្ភាគចក្រដឹកមន្ត្រីជាន់ខ្ពស់យោធារបស់ ឥណ្ឌា ហោះទៅបុកដើមឈើពេញមួយទំហឹង បណ្ដាលឱ្យឆេះយ៉ាងសន្ធោសន្ធៅ។

«ដំបូង ខ្ញុំឮសំឡេងផ្ទុះយ៉ាងធំ។ ពេលរត់ទៅមើល ទើបឃើញថា ឧទ្ធម្ភាគចក្រមួយគ្រឿងបានបុកដើមឈើ។ ហេតុការណ៍នេះបង្កើតបានជាដុំភ្លើងដ៏ធំ ហើយឧទ្ធម្ភាគចក្រក៏បន្តហោះទៅបុកដើមឈើមួយដើមផ្សេងទៀត។ ខ្ញុំឃើញមនុស្សពី ២ ទៅ ៣ នាក់ ស្ទុះចេញពីឧទ្ធម្ភាគចក្រ ខ្លួនពួកគេរលាកភ្លើងយ៉ាងធ្ងន់ធ្ងរ ហើយក៏ដួលទៅលើដី» ពលរដ្ឋម្នាក់នៅក្បែរកន្លែងកើតហេតុ រៀបរាប់ដូច្នេះ។

ពលរដ្ឋម្នាក់ទៀតនិយាយថា ក្នុងពេលមានហេតុការណ៍ ផ្ទៃមេឃងងឹត ប្រហែលជាដោយសារផ្សែងបាញ់ចេញពីឧទ្ធម្ភាគចក្រដែលបានធ្លាក់។ គាត់បានទៅដល់កន្លែងកើតហេតុ ហើយឃើញថា ឧទ្ធម្ភាគចក្រត្រូវដាំក្បាលចុះ និងកំពុងឆាបឆេះ។

អគ្គមេបញ្ជាការកងទ័ពជាតិឥណ្ឌា លោក Bipin Rawat

«ខ្ញុំបានជួយដល់ក្រុមពន្លត់អគ្គិស័យ។ ក្រៅពីមនុស្សម្នាក់ អ្នកផ្សេងទៀតទំនងជាត្រូវបានរំដោះចេញមកក្រៅក្នុងស្ថានភាពបាត់បង់ជីវិត។ អ្នកដែលនៅរស់ ក៏ត្រូវបានបញ្ជូនទៅកាន់មន្ទីរពេទ្យជាបន្ទាន់» Prakash ដែលជាពលរដ្ឋម្នាក់នៅក្នុងភូមិ Burliyar បានរៀបរាប់អំពីស្ថានភាពនៃឧបទ្ទវហេតុដែលមានចម្ងាយប្រហែល ២០០ ម៉ែត្រ ពីផ្ទះរបស់គាត់។

ឧទ្ធម្ភាគចក្រប្រភេទ Mi-17V5 បានជួបគ្រោះថ្នាក់នៅពេលកំពុងហោះហើរពីមូលដ្ឋានទ័ពអាកាស Sulur ស្ថិតនៅក្នុងស្រុក Coimbatore ឆ្ពោះទៅកាន់ការិយាល័យការពារជាតិនៅក្នុងទីរួមស្រុក Wellington របស់ស្រុក Nilgiris។

ឧត្តមសេនីយផ្កាយមាស ៤ របស់ ឥណ្ឌា លោក Bipin Singh Rawat និងភរិយា លោកស្រី Madhulika Rawat

គ្រោះថ្នាក់នេះបានបណ្ដាលឱ្យអគ្គមេបញ្ជាការកងទ័ពជាតិឥណ្ឌា លោក Bipin Rawat និងភរិយារបស់លោក រួមនឹងមន្ត្រីយោធា ១១ នាក់ផ្សេងទៀត បាត់បង់ជីវិត។

យោងតាមព័ត៌មានបឋម គ្រោះថ្នាក់ធ្លាក់ឧទ្ធម្ភាគចក្រនេះ កើតឡើងដោយសារមេឃចុះអ័ព្ទខ្លាំង និងកំពុងត្រូវបានបន្តស៊ើបអង្កេត។

December 9, 2021

កំពូលស្ត្រីមួយចំនួន នៅក្នុងបញ្ជីឈ្មោះ «ស្ត្រីដែលមានអំណាចបំផុតក្នុងពិភពលោក នាឆ្នាំ ២០២១»

កាលពីថ្ងៃទី ៧ ធ្នូ ទស្សនាវដ្ដី Forbes របស់ សហរដ្ឋអាម៉េរិក បានប្រកាសបង្ហាញបញ្ជីឈ្មោះប្រចាំឆ្នាំស្ដីពីស្ត្រី ១០០ រូប ដែលមានអំណាចបំផុតលើពិភពលោក។ ក្នុងបញ្ជីឈ្មោះនោះ រួមមានទាំង CEO, អ្នកជំនួញ, ថ្នាក់ដឹកនាំប្រទេស, សប្បុរសជន។ល។

មហាសេដ្ឋិនី MacKenzie Scott បានចូលមកគ្រប់គ្រង «តំណែង» ស្ត្រីដែលមានអំណាចជាងគេក្នុងពិភពលោក ជំនួសអតីតអធិការបតីអាល្លឺម៉ង់ លោកស្រី Angela Merkel នៅក្នុងបញ្ជីរបស់ទស្សនាវដ្ដី Forbes។ ខាងក្រោមនេះគឺជាបញ្ជីឈ្មោះស្ត្រីមួយចំនួនដែលមានអំណាចបំផុតក្នុងពិភពលោក និងត្រូវបានគេស្គាល់ច្រើន៖

១-លោកស្រី MacKenzie Scott

-អតីតភរិយារបស់ស្ថាបនិកក្រុមហ៊ុន Amazon លោក Jeff Bezos
-ទ្រព្យបច្ចុប្បន្ន៖ ៥៩.២ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ១

២-លោកស្រី Melinda French Gates

-សហប្រធាននៃមូលនិធិ Bill & Melinda Gates Foundation
-ទ្រព្យបច្ចុប្បន្ន៖ ៦.១ ពាន់លានដុល្លារ
-ចំណាត់ថ្នាក់ក្នុងបញ្ជី៖ ៥

៣-លោកស្រី Abigail Johnson

-CEO របស់ Fidelity Investments
-ទ្រព្យបច្ចុប្បន្ន៖ ២៥ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ៦

៤-លោកស្រី Safra Catz

-CEO របស់ Oracle
-ទ្រព្យបច្ចុប្បន្ន៖ ១.៧ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ១៩

៥-លោកស្រី Oprah Winfrey

-ផលិតការិនីទូរទស្សន៍
-ទ្រព្យបច្ចុប្បន្ន៖ ២.៦ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ២៣

៦-លោកស្រី Laurence Powell Jobs

-ស្ថាបនិក និងជាប្រធានក្រុមហ៊ុន Emerson Collective
-ទ្រព្យបច្ចុប្បន្ន៖ ១៧.១ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ៣២

៧-លោកស្រី Sheryl Sandberg

-COO របស់ Facebook
-ទ្រព្យបច្ចុប្បន្ន៖ ១.៨ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ៣៦

៨-លោកស្រី Gina Rinehart

-ប្រធានក្រុមហ៊ុន Hancock Prospecting
-ទ្រព្យបច្ចុប្បន្ន៖ 2២១.៦ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ៤៤

៩-លោកស្រី Judy Faulkner

-ស្ថាបនិក និងជា CEO របស់ Epic Systems
-ទ្រព្យបច្ចុប្បន្ន៖ ៦.៤ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ៦៤

១០-តារាចម្រៀង Rihanna (Robyn Fenty)

-ស្ថាបនិករបស់ Fenty Beauty
-ទ្រព្យបច្ចុប្បន្ន៖ ១.៧ ពាន់លានដុល្លារអាម៉េរិក
-ចំណាត់ថ្នាក់ក្នុងបញ្ជី៖ ៦៨

December 8, 2021

ឆ្នាំ ២០២១ នេះ តើស្ត្រីរូបណាដែលជាមហាសេដ្ឋិនីមានអំណាចបំផុតក្នុងពិភពលោក?

ឆ្នាំនេះ មហាសេដ្ឋិនី MacKenzie Scott បានចូលមកគ្រប់គ្រង «តំណែង» ស្ត្រីដែលមានអំណាចជាងគេក្នុងពិភពលោក ជំនួសអតីតអធិការបតីអាល្លឺម៉ង់ លោកស្រី Angela Merkel នៅក្នុងបញ្ជីរបស់ទស្សនាវដ្ដី Forbes។

កាលពីថ្ងៃទី ៧ ខែធ្នូ ឆ្នាំ ២០២១ Forbes បានប្រកាសបង្ហាញបញ្ជីឈ្មោះប្រចាំឆ្នាំស្ដីពីស្ត្រី ១០០ រូប ដែលមានអំណាចបំផុតលើពិភពលោក។ ក្នុងបញ្ជីឈ្មោះនោះ រួមមានទាំង CEO, អ្នកជំនួញ, ថ្នាក់ដឹកនាំប្រទេស, សប្បុរសជន។ល។

លោកស្រី MacKenzie Scott ដែលជាអតីតភរិយារបស់ស្ថាបនិកក្រុមហ៊ុន Amazon លោក Jeff Bezos បាននាំមុខគេនៅក្នុងបញ្ជីនេះ។ លោកស្រីបានបរិច្ចាគប្រាក់របស់ខ្លួនចំនួន ៨.៦ ពាន់លានដុល្លារ ក្នុងនោះមាន ២.៧ ពាន់លានដុល្លារត្រូវបានបរិច្ចាគក្នុងឆ្នាំ ២០២១។ បច្ចុប្បន្ន លោកស្រីមានទ្រព្យសរុបចំនួន ៥៩.២ ពាន់លានដុល្លារអាម៉េរិក។ នេះបើតាមស្ថិតិរបស់ទស្សនាវដ្ដី Forbes។

មូលហេតុដែលបាននាំឱ្យលោកស្រី Scott ត្រូវបានចាត់ទុកជាស្ត្រីដែលមានអំណាចបំផុតក្នុងពិភពលោក ត្រូវបាននិពន្ធនាយិការបស់ក្រុម ForbesWomen ពន្យល់ថា៖ «លោកស្រី MacKenzie Scott បានចំណាយទ្រព្យដ៏ច្រើនរបស់លោកស្រី ដើម្បីជួយដល់បណ្ដាអង្គការមិនស្វែងរកប្រាក់កម្រៃ។ ពុំមាននរណាម្នាក់ក្នុងលោក មានសិទ្ធិម្ចាស់ការលើខ្លួនឯង ឬលើប្រាក់កាសច្រើនជាង និងបង្កើតបានជាឥទ្ធិពលយូរអង្វែងដល់ថ្នាក់នេះ។ វិធីដែលលោកស្រីចំណាយប្រាក់ ក៏កំពុងតែបង្កើតឱ្យមានបដិវត្តន៍នៅក្នុងវិស័យមនុស្សធម៌ផងដែរ»៕

December 8, 2021

WHO និយាយថា អូមីក្រុង មានការពិបាកខ្លាំងក្នុងការគេចផុតទាំងស្រុងពីប្រសិទ្ធភាពរបស់វ៉ាក់សាំង

អង្គការសុខភាពពិភពលោក (WHO) បានឱ្យដឹងថា វ៉ារ្យ៉ង់អូមីក្រុង ទំនងជាមិនបង្កឱ្យមានសភាពធ្ងន់ធ្ងរជាង ធៀបនឹងបណ្ដា វ៉ារ្យ៉ង់ មុនៗ ហើយ «ពិបាកនឹងមានលទ្ធភាព» គេចចេញបានទាំងស្រុងពីប្រព័ន្ធការពាររាងកាយដែលបង្កើតឡើងដោយវ៉ាក់សាំង។

«ទិន្នន័យបឋមមិនបានបង្ហាញថា វ៉ារ្យ៉ង់ នេះ នឹងបង្កសភាពធ្ងន់ធ្ងរជាង។ ជាក់ស្ដែង ទិន្នន័យក៏បានបង្ហាញថា វាបង្កសភាពធ្ងន់ធ្ងរតិចជាង» Michael Ryan ប្រធានផ្នែកប្រតិកម្មបន្ទាន់របស់ WHO ឱ្យដឹងដូច្នេះនៅក្នុងកិច្ចសម្ភាសកាលពីថ្ងៃទី ៧ នៅទីក្រុងហ្សឺណែវ ប្រទេសស្វ៊ីស។

ក៏ប៉ុន្តែ លោកបញ្ជាក់ថា នេះទើបតែជាទិន្នន័យដំបូង ហើយ «យើងត្រូវតែមានការប្រុងប្រយ័ត្ននៅបកស្រាយអំពីសញ្ញានោះ» និងត្រូវការស្រាវជ្រាវបន្ថែមទៀតអំពី អូមីក្រុង។

លោក Ryan ទទួលស្គាល់ថា វ៉ាក់សាំងមួយចំនួន អាចមានប្រសិទ្ធភាពទាបចំពោះ វ៉ារ្យ៉ង់អូមីក្រុង ដែលមានបំរែបំរួលជាង ៣០ ចំណុច នៅលើប្រូតេអ៊ីនបន្លារបស់វា ប៉ុន្តែ ពុំមានសញ្ញាណាមួយបង្ហាញថា អូមីក្រុង អាចគេចបានទាំងស្រុងពីសមត្ថភាពការពាររាងកាយមនុស្សដែលបង្កើតឡើងដោយវ៉ាក់សាំង។

មន្ត្រីរបស់អង្គការសុខភាពពិភពលោករូបនេះ ក៏បានសង្កត់ធ្ងន់ថា ក្នុងសង្គ្រាមប្រឆាំងរាល់វីរុសបំប្លែងខ្លួនរបស់កូវីដ-១៩ «អាវុធដែលល្អបំផុតរបស់យើង នោះគឺយុទ្ធនាការចាក់វ៉ាក់សាំង»។

វីរុសកូវីដ-១៩ ប្រភេទ អូមីក្រុង ត្រូវបានរកឃើញដំបូងនៅក្នុង ប្រទេសបុតស្វាណា កាលពីថ្ងៃទី ១១ វិច្ឆិកា ២០២១ និងត្រូវបាន ប្រទេសអាហ្វ្រិកខាងត្បូង រាយការណ៍ជូនអង្គការសុខភាពពិភពលោក (WHO) កាលពីថ្ងៃទី ២៤ វិច្ឆិកា ២០។ ថ្វីបើ WHO បានដាក់បញ្ចូល វ៉ារ្យ៉ង់អូមីក្រុង ទៅក្នុងបញ្ជីឈ្មោះនៃក្រុម វ៉ារ្យ៉ង់ ដែលគួរឱ្យព្រួយបារម្ភ ក៏ដោយ មកដល់បច្ចុប្បន្ន ពុំទាន់មានទិន្នន័យច្បាស់លាស់ណាមួយនិយាយអំពីកម្រិតនៃការឆ្លងរាលដាល ឬសភាពធ្ងន់ធ្ងរដែលបង្កឡើងដោយ វ៉ារ្យ៉ង នេះនៅឡើយ៕

December 8, 2021

សម្លាប់ប្រពន្ធ និងកូនៗ ព្រោះតែត្រូវគេដឹងថា បានធ្វើប័ណ្ណបញ្ជាក់ការចាក់វ៉ាក់សាំងក្លែងក្លាយ

(អាល្លឺម៉ង់)-Devid R បានសម្លាប់ភរិយា និងកូនស្រី ៣ នាក់ រួចហើយក៏សម្លាប់ខ្លួន បន្ទាប់ពីត្រូវបានគេដឹងថា បានក្លែងបន្លំប័ណ្ណបញ្ជាក់ការចាក់វ៉ាក់សាំងបង្ការជំងឺកូវីដ-១។

សាកសពរបស់ Devid R ត្រូវបានរកឃើញរួមជាមួយសាកសពភរិយា និងកូនស្រី ៣ នាក់ ដែលមានអាយុ ៤ ឆ្នាំ, ៨ ឆ្នាំ និង ១១ ឆ្នាំ នៅឯផ្ទះរបស់ពួកគេក្នុងតំបន់ Koenigs Wushterhausen ភាគខាងត្បូងទីក្រុងបែរឡាំង ប្រទេសអាល្លឺម៉ង់ កាលពីចុងសប្ដាហ៍កន្លង។

ចៅក្រមតុលាការរបស់ អាល្លឺម៉ង់ កាលពីថ្ងៃទី ៧ ធ្នូ បានឱ្យដឹងថា បុរសជាជនដៃដល់ មានអាយុ ៤០ ឆ្នាំ បានទុកសំបុត្រអត្តឃាត សារភាពថា បានធ្វើប័ណ្ណក្លែងក្លាយបញ្ជាក់ការចាក់វ៉ាក់សាំងឱ្យភរិយា ប៉ុន្តែ ត្រូវបានថ្នាក់លើរបស់នាងដឹង និងគំរាមថានឹងរាយការណ៍ប្រាប់សមត្ថកិច្ច។ ដោយសារតែខ្លាចត្រូវគេចាប់ខ្លួន និងបាត់បង់សិទ្ធិចិញ្ចឹមកូន Devid ក៏បានសម្រេចចិត្តបាញ់សម្លាប់ប្រពន្ធ និងកូនៗ រួចហើយក៏ធ្វើអត្តឃាត។

ភរិយារបស់ Devid ធ្វើការនៅឯសាកលវិទ្យាល័យបច្ចេកទេស Wildau ចំណែក Devid វិញ មិនដឹងថាមានមុខរបរអ្វីទេ។ អាជ្ញាធរក្នុងតំបន់ ឱ្យដឹងថា ពួកគេបានរកឃើញករណីឃាតកម្ម និងអត្តឃាតក្នុងគ្រួសារ Devid បន្ទាប់ពីអ្នកជិតខាងមើលឃើញសាកសពតាមបង្អួច។

បុគ្គលិកក្រុមហ៊ុននៅ ប្រទេសអាល្លឺម៉ង់ ចាប់ពីខែមុន ត្រូវបានស្នើឱ្យបង្ហាញលិខិតបញ្ជាក់អំពីការចាក់វ៉ាក់សាំងបង្ការជំងឺកូវីដ-១៩ ឬលិខិតបញ្ជាក់ថាអវិជ្ជមាននឹងវីរុស ដល់ថ្នាក់លើរបស់ពួកគេ។ អាជ្ញាធរអាល្លឺម៉ង់ កាលពីសប្ដាហ៍មុនក៏បានចាប់ផ្ដើមរឹតបន្តឹងវិធានការដើម្បីទប់ស្កាត់ការឆ្លងរាលដាលកូវីដ-១៩ ដោយបានហាមអ្នកដែលមិនទាន់បានទទួលការចាក់វ៉ាក់សាំង ចូលទៅក្នុងក្រុមហ៊ុន ឬទីតាំងអាជីវកម្មទាំងឡាយណាដែលផ្គត់ផ្គង់ទំនិញ ឬសេវាកម្មមិនចាំបាច់។

https://www.youtube.com/watch?v=EshaKDeWUkM

រដ្ឋាភិបាលអាល្លឺម៉ង់ ក៏កំពុងតែរៀបចំផែនការចាក់វ៉ាក់សាំងដោយបង្ខំ ចំពោះបុគ្គលិកនៅក្នុងវិស័យមួយចំនួន។ គិតមកដល់បច្ចុប្បន្ន ប្រទេសនេះបានរកឃើញអ្នកវិជ្ជមាននឹងកូវីដ-១៩ សរុបជាង ៦.២ លាននាក់ ក្នុងនោះមានជាង ១០០,០០០ នាក់បានស្លាប់។ ប្រទេសអាល្លឺម៉ង់ បានចាក់វ៉ាក់សាំងជូនពលរដ្ឋជាង ៧១% ហើយ បើធៀបនឹងប្រជាជនសរុប៕

December 8, 2021

ទីប្រឹក្សារបស់ សេតវិមាន ថ្លែងថា អូមីក្រុង (Omicron) «ទំនងជាមិនធ្ងន់ធ្ងរជាង ដេលតា (Delta)»

ទីប្រឹក្សារបស់ សេតវិមាន លោក Anthony Fauci បានថ្លែងថា សញ្ញាបឋមបានបង្ហាញថា វ៉ារ្យ៉ង់អូមីក្រុង អាចឆ្លងរាលដាលខ្ពស់ជាង ធៀបនឹង វ៉ារ្យ៉ង់ដេលតា ប៉ុន្តែ «ស្ទើរតែប្រាកដថា» វាមិនបង្កភាពធ្ងន់ធ្ងរជាង ដេលតា។

«មានសញ្ញាមួយចំនួនបង្ហាញថា វីរុសបំប្លែកខ្លួន អូមីក្រុង អាចមិនបង្កសភាពធ្ងន់ធ្ងរជាង ដេលតា។ នៅពេលមើលទៅលើក្រុមមួយចំនួនដែលកំពុងត្រូវបានតាមដាននៅ អាហ្វ្រិកខាងត្បូង អត្រារវាងករណីចូលពេទ្យលើករណីឆ្លង ហាក់ទាបជាង បើធៀបនឹង វ៉ារ្យ៉ង់ដេលតា» លោក Anthony Fauci ប្រធានវិទ្យាស្ថានជាតិគ្រប់គ្រងជំងឺឆ្លង (NIAID) របស់ សហរដ្ឋអាម៉េរិក និងជាទីប្រឹក្សាផ្នែកសុខាភិបាលរបស់ សេតវិមាន នៃ សហរដ្ឋអាម៉េរិក បានថ្លែងដូច្នេះកាលពីថ្ងៃទី ៧ ធ្នូ។

មុននោះ ខេត្ត Gauteng ដែលជាចំណុចក្ដៅនៃបញ្ហា កូវីដ-១៩ នៅ អាហ្វ្រិកខាងត្បូង បានបញ្ចេញទិន្នន័យដែលបង្ហាញថា មានតែ ៨% ប៉ុណ្ណោះដែលត្រូវចូលពេទ្យដោយសារ កូវីដ-១៩ ហើយបច្ចុប្បន្នត្រូវព្យាបាលជាពិសេស តួលេខនេះទាបជាងច្រើន ធៀបនឹង ២៣% នៅក្នុងរលកនៃការឆ្លងរាលដាលរបស់ វ៉ារ្យ៉ង់ដេលតា។ អត្រានៃអ្នកជំងឺត្រូវប្រើប្រាស់ម៉ាស៊ីនជំនួយដង្ហើមក៏ទាបជាង ពោលគឺ អូមីក្រុង ២% ទល់នឹង ដេលតា ១១%។

លោក Fauci សង្កត់ធ្ងន់ថា មិនគួរបំប៉ោងទិន្នន័យនេះឡើយ ព្រោះថា ក្រុមអ្នកជំងឺដែលត្រូវបាន ប្រទេសអាហ្វ្រិកខាងត្បូង តាមដាន ភាគច្រើនគឺជាពលរដ្ឋវ័យនៅក្មេង ដែលតែងតែប្រឈមនឹងហានិភ័យត្រូវចូលពេទ្យក្នុងកម្រិតទាប។ ក្រៅពីនេះ អ្នកជំងឺដែលឆ្លង វ៉ារ្យ៉ង់អូមីក្រុង ក៏អាចត្រូវចំណាយពេលច្រើនសប្ដាហ៍ ទើបមានអាការធ្ងន់ធ្ងរ។

ទីប្រឹក្សាសេតវិមាន វាយតម្លៃថា អូមីក្រុង «ច្បាស់ណាស់ មានសមត្ថភាពបង្កការឆ្លងរាលដាលខ្ពស់» និងអាចខ្ពស់ជាង ដេលតា។ ប៉ុន្តែ លោកឱ្យដឹងថា វ៉ារ្យ៉ង់ ដែលងាយឆ្លងរាលដាលជាង និងបង្កភាពធ្ងន់ធ្ងរទាបជាង នឹងមិនអាចបង្កើនតួលេខនៃករណីចូលពេទ្យ និងស្លាប់» ដែលនេះគឺជា «ស្ថានភាពល្អបំផុត»។

វីរុសកូវីដ-១៩ ប្រភេទ អូមីក្រុង ត្រូវបានរកឃើញដំបូងនៅក្នុង ប្រទេសបុតស្វាណា កាលពីថ្ងៃទី ១១ វិច្ឆិកា ២០២១ និងត្រូវបាន ប្រទេសអាហ្វ្រិកខាងត្បូង រាយការណ៍ជូនអង្គការសុខភាពពិភពលោក (WHO) កាលពីថ្ងៃទី ២៤ វិច្ឆិកា ២០២។ ថ្វីបើ WHO បានដាក់បញ្ចូល វ៉ារ្យ៉ង់អូមីក្រុង ទៅក្នុងបញ្ជីឈ្មោះនៃក្រុម វ៉ារ្យ៉ង់ ដែលគួរឱ្យព្រួយបារម្ភ ក៏ដោយ មកដល់បច្ចុប្បន្ន ពុំទាន់មានទិន្នន័យច្បាស់លាស់ណាមួយនិយាយអំពីកម្រិតនៃការឆ្លងរាលដាល ឬសភាពធ្ងន់ធ្ងរដែលបង្កឡើងដោយ វ៉ារ្យ៉ង នេះនៅឡើយ៕

December 8, 2021

ក្មេងតូចពីរនាក់ អាយុទើបតែប៉ុន្មានខែប៉ុណ្ណោះ ត្រូវពេទ្យចាក់ច្រឡំវ៉ាក់សាំងបង្ការជំងឺកូវីដ-១៩

(ប្រេស៊ីល)-កុមារពីរនាក់ដែលមានអាយុទើបតែប៉ុន្មានខែប៉ុណ្ណោះ ត្រូវបានបញ្ជូនទៅកាន់មន្ទីរពេទ្យ បន្ទាប់ពីបុគ្គលិកពេទ្យចាក់ច្រឡំចំវ៉ាក់សាំងបង្កើតជំងឺកូវីដ-១។

យោងតាមទូរទស្សន៍ (រុស្ស៊ី) ហេតុការណ៍ដែលកើតឡើងនៅទីក្រុង Sorocaba ក្នុងរដ្ឋ Sao Paulo ខាងលើនេះ ត្រូវបានទទួលស្គាល់ដោយក្រុមមន្ត្រីនៃ ប្រទេសប្រេស៊ីល។

កុមារអាយុ ៤ ខែម្នាក់ និងកុមារីអាយុ ២ ខែម្នាក់ បានទៅកាន់មជ្ឈមណ្ឌលសុខាភិបាលក្នុងតំបន់ កាលពីថ្ងៃទី ១ ខែធ្នូ ដើម្បីទទួលការចាក់វ៉ាក់សាំងចម្រុះបង្ការជំងឺក្អកមាន់ រលាកថ្លើម និង ខាន់ស្លាក់។ល។

ប៉ុន្តែ ក្រោយការចាក់វ៉ាក់សាំង កុមារទាំងពីរខាងលើមានអាការក្ដៅខ្លួនខ្លាំង ក្អួតចង្អោរ និងមិនព្រមបៅទឹកដោះ។ បើទោះជាបានលេបថ្នាំ តែអាការនៅតែមិនធូរស្បើយ។

អាណាព្យាបាលរបស់កុមារទាំងនេះក៏បានទាក់ទងទៅកាន់ប្រធានមន្ទីរសុខាភិបាល នៃក្រុង Sorocaba ហើយក៏ត្រូវបានជូនដំណឹងថា មានកំហុសឆ្គងកើតឡើង ដោយកុមារទាំងនេះត្រូវបានចាក់ច្រឡំវ៉ាក់សាំងបង្ការកូវីដ-១។

ក្រោយការចាក់វ៉ាក់សាំងបានមួយថ្ងៃ បុគ្គលិកសុខាភិបាលបានរកឃើញថា កុមារមួយចំនួនត្រូវបានចាក់ច្រឡំវ៉ាក់សាំង នៅពេលពួកគេត្រួតពិនិត្យឃ្លាំងវ៉ាក់សាំង។ បុគ្គលិកពេទ្យដែលទទួលខុសត្រូវ បានទទួលស្គាល់ថា បានចាក់ច្រឡំវ៉ាក់សាំងពីរប្រភេទ ព្រោះតែពួកវាមានរូបរាងដូចគ្នាពេក។ បុគ្គលិកសុខាភិបាលរូបនេះ បច្ចុប្បន្នត្រូវបានផ្អាកពីការងារ និងកំពុងត្រូវបានស៊ើបអង្កេត។

កុមារខាងលើ កាលពីថ្ងៃទី ២ ខែធ្នូ ត្រូវបានបញ្ជូនទៅកាន់មន្ទីរពេទ្យដើម្បីព្យាបាល។ ស្ថានភាពសុខភាពរបស់ពួកគេបានប្រសើរឡើង ប៉ុន្តែ ត្រូវការតាមដានច្រើនថ្ងៃតទៅទៀត។ ភាគីខាងក្រុមហ៊ុន Pfizer បានឱ្យដឹងថា ត្រូវតាមដានករណីនេះឱ្យបានពី ១០ ទៅ ១៥ ថ្ងៃទៀត។

គិតមកដល់បច្ចុប្បន្ន កុមារទាំងពីរនាក់ខាងលើ មិនមានបញ្ហាសុខភាពធ្ងន់ធ្ងរណាមួយកើតឡើងដោយសារការចាក់ច្រឡំវ៉ាក់សាំងកូវីដ-១៩ នេះទេ៕

December 7, 2021

បុគ្គលិកពេទ្យផ្នែក ICU ជិត ៧០នាក់ បានឆ្លងវីរុសកូវីដ-១៩ បន្ទាប់ពីពិធីជប់លៀងបុណ្យណូអែល

(អេស្ប៉ាញ)-បុគ្គលិកពេទ្យផ្នែក ICU ចំនួន ៦៨ នាក់ ក្នុងនោះមានទាំងវេជ្ជបណ្ឌិតផងដែរ បានឆ្លងវីរុសកូវីដ-១៩ បន្ទាប់ពីបានចូលរួមពិធីជប់លៀងបុណ្យណូអែលកាលពីដើមខែធ្នូ។

មន្ទីរសុខាភិបាលតំបន់ អានដាលូស៊ី (Andalusia) នៅភាគខាងត្បូងនៃ ប្រទេសអេស្ប៉ាញ ថ្ងៃនេះ បានប្រកាសឱ្យដឹងថា តួលេខអ្នកជំងឺក្នុង «សម្បុកវីរុសកូវីដ-១៩» នៅឯមន្ទីរពេទ្យសាកលវិទ្យាល័យតំបន់ ម៉ាឡាហ្គា (Malaga) បានកើនពី ២២ នាក់ ឡើងដល់ ៦៨ នាក់។ ភាគច្រើននៃអ្នកជំងឺគឺជាបុគ្គលិកសុខាភិបាលនៃបន្ទប់ព្យាបាលពិសេស (ICU)។

អ្នកជំងឺទាំងអស់ខាងលើ សុទ្ធតែបានចូលរួមពិធីជប់លៀងបុណ្យណូអែល កាលពីថ្ងៃទី១ ធ្នូ ជាមួយនឹងបុគ្គលិកជំនាញក្នុងផ្នែក ICU ចំនួន ១៧៣ នាក់។ ពួកគេធ្លាប់ទទួលបានលទ្ធផលអវិជ្ជមាន ឬបានចាក់វ៉ាក់សាំងដូសជំរុញ មុនពេលទៅចូលរួមពិធីជប់លៀង។ អ្នកជំងឺទាំងនេះមានរោគសញ្ញាស្រាល និងកំពុងធ្វើចត្តាឡីស័កដោយខ្លួនឯង។

ក្រុមមន្ត្រីសុខាភិបាលក្នុងតំបន់បានសង្កត់ធ្ងន់ថា ប្រភពចម្លងមួយផ្សេងទៀតអាចជាពិធីជប់លៀងរួមសម្រាប់បុគ្គលិកសុខាភិបាលរបស់មន្ទីរពេទ្យ និងបានស្នើឱ្យបុគ្គលិកនៅមន្ទីរពេទ្យនានា កុំទៅចូលរួមពិធីជប់លៀងបុណ្យណូអែលណាមួយនាពេលខាងមុខ។

អភិបាលក្រុង ំាឡាហ្គា លោក ហ្វ្រានស៊ីស្កូ ដេ ឡា តូររ៉េ (Francisco de la Torre) កាលពីថ្ងៃទី ៥ ធ្នូ បានព្រមានថា ករណីឆ្លងវីរុសនៅទីក្រុងនេះ កំពុងតែមានកំណើនយ៉ាងឆាប់រហ័ស។ អត្រានៃអ្នកវិជ្ជមានថ្មីក្នុងអំឡុង ១៤ ថ្ងៃ នៅទីក្រុងនេះ គិតត្រឹមថ្ងៃទី ៣ ធ្នូ មាន ១២៧ ករណី/ពលរដ្ឋ ១០០,០០០ នាក់ ដែលនេះគឺជិតស្មើនឹងទ្វេដង ធៀបនឹងកាលពីពាក់កណ្ដាលខែវិច្ឆិកា។ «បើសិនជាអត្រានៃការឆ្លងនៅតែបន្តកើនឡើងទៀត រហូតដល់ចុងខែធ្នូ យើងអាចមានអ្នកឆ្លងជាង ៤០០ ករណី/ពលរដ្ឋ ១០០,០០០ នាក់» លោក ហ្វ្រានស៊ីស្កូ បន្ថែមដូច្នេះ៕

December 7, 2021

Category: អន្តរជាតិ