ក្រុមមន្ត្រីថៃ បានរកឃើញតំបន់ឆ្លង វីរុសកូវីដ-១៩ ប្រភេទ អូមីក្រុង រាប់រយករណី ដែលមានប្រភពចម្លងពីទេសចរជនជាតិបែលហ្សិក ២ នាក់ និងបានព្រមានអំពីហានិភ័យនៃការឆ្លងរាលដាលទ្រង់ទ្រាយធំនាពេលខាងមុខ។
អាជ្ញាធរថៃ បានហៅសម្បុករបស់ អូមីក្រុង ដំបូងនៅប្រទេសនេះថាជា «ព្រឹត្តិការណ៍មហាចម្លង» ដែលត្រូវបានរកឃើញនៅក្នុងខេត្ត Kalasi តាំងពីយប់ថ្ងៃទី ២៤ ធ្នូ។
«ព្រឹត្តិការណ៍មហាចម្លង» នៅក្នុងខេត្តនៃតំបន់ភាគឦសានរបស់ប្រទេស ថៃ នេះ ត្រូវបានបញ្ជាក់ថា មានប្រភពពីអ្នកដំណើរជនជាតិ បែលហ្សិក ២ នាក់ មានផ្ទុកវីរុសកូវីដ-១៩ ដែលបានមកកាន់ទីនេះនៅក្នុងរដូវបុណ្យណូអែល និងបានចូលបៀរហ្គាឌិន សាលប្រគំតន្ត្រី និងផ្សារមួយចំនួន។
ក្រុមមន្ត្រីសុខាភិបាលជាន់ខ្ពស់របស់ ថៃ បានឱ្យដឹងថា មនុស្សរាប់រយនាក់បានឆ្លងរោគពីសម្បុកវីរុសនេះ។ វីរុសពីតំបន់នេះក៏បានឆ្លងទៅខេត្តចំនួន ១១ ផ្សេងទៀតផងដែរ។
ប្រធាននាយកដ្ឋានគ្រប់គ្រងជំងឺឆ្លងរបស់ ថៃ លោក Opas Karnkawinpong បញ្ជាក់ថា ទេសចរជនជាតិបែលហ្សិក ២ នាក់ខាងលើ បានចូលទទួលសេវាកម្មនៅក្នុងបៀរហ្គាឌិនមួយដែលមិនមានខ្យល់ចេញចូលល្អ ព្រមទាំងមានមនុស្សច្រើន នៅក្នុងចំណោមកន្លែងជាច្រើនដែលអ្នកទាំង ២ បានចូល។
លោក Opas Karnkawinpong ថ្លែងថា «ក្នុងរដូវបុណ្យចូលឆ្នាំថ្មី បើសិនអ្នកទៅកាន់ទីណាដែលអ្នកមានអារម្មណ៍ថា គ្មានសុវត្ថិភាព ល្អបំផុតគឺកុំចូលឱ្យសោះ»។
នៅប្រទេស ថៃ បច្ចុប្បន្ន មានអ្នកឆ្លង កូវីដ-១៩ ចំនួនប្រហែល ២,៥០០ នាក់ ជារៀងរាល់ថ្ងៃ ក្នុងសប្ដាហ៍កន្លង។ ក្រសួងសុខាភិបាលថៃ ព្រមានថា តួលេខនេះនឹងកើនដល់ ៣០,០០០ នាក់ និងស្លាប់ជាង ១៦០ ក្នុង ១ ថ្ងៃៗ នៅក្នុងខែមីនា ឆ្នាំ ២០២២ បើសិនមិនមានវិធានការបន្ទាន់ដូចជា ការបង្កើនល្បឿននៃការចាក់វ៉ាក់សាំង ការធ្វើតេស្ត និងការរក្សាគម្លាតសង្គមទ្រង់ទ្រាយធំជាងបច្ចុប្បន្ន៕
