អន្តរជាតិ - La Reine Media

ផ្ទុះគ្រាប់រំសេវនៅក្នុងមូលដ្ឋានយោធារបស់ រុស្ស៊ី បណ្ដាលឱ្យទាហានច្រើននាក់ស្លាប់ និងរងរបួស

ហេតុការណ៍ផ្ទុះក្នុងឃ្លាំងរំសេវកើតឡើងក្នុងមូលដ្ឋានទ័ពនៅ Khabarovsk នៃតំបន់ចុងបូព៌ារបស់ រុស្ស៊ី បណ្ដាលឱ្យទាហានម្នាក់ស្លាប់ និង ៧ នាក់ទៀត រងរបួស។

ក្រសួងសុខាភិបាលរុស្ស៊ី ថ្ងៃនេះ ឱ្យដឹងថា បានប្រើប្រាស់ឧទ្ធម្ភាគចក្រដើម្បីដឹកទាហាន ២ នាក់ ដែលរលាកខ្លួនធ្ងន់ធ្ងរ ពីមូលដ្ឋានទ័ពក្នុងទីប្រជុំជន Teysin នៃតំបន់ Khabarovsk នៅចុងបូព៌ារបស់ ប្រទេសរុស្ស៊ី។

សារព័ត៌មាន TASS បានឱ្យដឹងថា ក្នុងករណីខាងលើ មានមនុស្សម្នាក់បានស្លាប់ និង ៧ នាក់ទៀតរងរបួស។ ប្រភពព័ត៌មានមួយផ្សេងទៀតឱ្យដឹងថា ករណីផ្ទុះនេះកើតឡើងនៅក្នុងឃ្លាំងរំសេវរបស់មូលដ្ឋានទ័ព ក្នុងពេលកំពុងលើកដាក់គ្រឿងផ្ទុះ។

មូលហេតុពិតប្រាកដនឹងត្រូវបានរកឃើញនៅក្នុងដំណាក់កាលស៊ើបអង្កេត នេះបើតាមប្រភពព័ត៌មានច្បាស់ការណ៍។

តំបន់ Teysin មានចម្ងាយពីទីក្រុង Komsomolsk-on-Amur នៅតំបន់ចុងបូព៌ា ប្រហែល ៨២ គីឡូម៉ែត្រទៅទិសអាគ្នេយ៍។ តំបន់នេះមានចំណត់រថភ្លើងមួយ និងមូលដ្ឋានទ័ពមួយផងដែរ៕

May 12, 2022

ប្រធានាធិបតីហ្វាំងឡង់ យល់ព្រមចូលជាសមាជិករបស់ ណាតូ (NATO)

ប្រធានាធិបតី Niinisto ថ្ងៃនេះបានយល់ព្រមឱ្យ ប្រទេសហ្វាំងឡង់ ចូលជាសមាជិករបស់ ណាតូ (NATO) ដែលនេះគឺជាការសម្រេចចិត្តដ៏ធំមួយក្នុងគោលនយោបាយសន្តិសុខរបស់ប្រទេសនេះ។

«ហ្វាំងឡង់ ត្រូវតែដាក់ពាក្យស្នើសុំចូលជាសមាជិករបស់ ណាតូ ជាបន្ទាន់» ប្រធានាធិបតី Sauli Niinisto និងនាយករដ្ឋមន្ត្រី Sanna Marin ឱ្យដឹងនៅថ្ងៃនេះដូច្នេះ។ ក្រោយពីមានការសម្រេចចិត្តខាងលើ រដ្ឋាភិបាល និងសភាហ្វាំងឡង់ គ្រោងនឹងអនុម័តលើការស្នើសុំនេះ។

នេះគឺជាសេចក្ដីសម្រេចចិត្តដែលត្រូវបានគេព្យាករមុនរួចមកហើយ។ ក្នុងកិច្ចប្រជុំកាលពីម្សិលមិញ ប្រធានាធិបតីហ្វាំងឡង់ បាននិយាយថា «ការចូលជាសមាជិករបស់ ណាតូ គឺមិនប្រឆាំងនឹងនរណាមួយឡើយ» បើទោះជា រុស្ស៊ី ធ្លាប់បានព្រមានថា ទីក្រុងហែលស៊ិនគី (Helsinki) នឹងត្រូវ «រងផលវិបាក» បើសិនរកវិធីក្លាយជាសមាជិករបស់សម្ព័ន្ធយោធានេះ។

ក្រោយពី រុស្ស៊ី លើកទ័ពចូលលុកលុយ អ៊ុយក្រែន ប្រទេសហ្វាំងឡង់ និង ស៊ុយអែត បានសម្រេចចិត្តពិនិត្យលទ្ធភាពចូលជាសមាជិករបស់ ណាតូ ដោយបោះបង់គោលនយោបាយគ្មានសម្ព័ន្ធយោធា ដែលប្រទេសទាំងពីរនេះបានអនុវត្តអស់ជាច្រើនទសវត្សរ៍មកហើយ។

នៅឯ ប្រទេសស៊ុយអែត ថ្ងៃទី ១៥ ឧសភាខាងមុខ បក្សកាន់អំណាចគ្រោងនឹងធ្វើការពិចារណាថា តើគួរបញ្ចប់និន្នាការប្រឆាំងនឹងការសុំចូលជាសមាជិក ណាតូ ដែលត្រូវបានរក្សារហូតមកដល់បច្ចុប្បន្ន ឬអត់។ ឥរិយាបថនេះត្រូវបានវាយតម្លៃថា ប្រាកដណាស់ថា ស៊ុយអែត នឹងដាក់ពាក្យសុំចូលជាសមាជិករបស់ ណាតូ។

ចំណែកអគ្គលេខាធិការរបស់ ណាតូ Jens Stoltenberg បានឱ្យដឹងថា សម្ព័ន្ធមិត្តយោធានេះអាចអនុញ្ញាតឱ្យ ហ្វាំងឡង់ និង ស៊ុយអែត ចូលជាសមាជិកបានយ៉ាងឆាប់រហ័ស។

May 12, 2022

កម្ពុជា មិនជ្រើសរើសមហាអំណាចមួយ ដើម្បីប្រឆាំងនឹងមហាអំណាចមួយឡើយ ខណៈ ទីក្រុងហាណូយ ស្នើឱ្យ អាម៉េរិក បង្កើត «ក្រុមតំណាងរាស្ត្រស្និទ្ធនឹងវៀតណាម»

សម្តេចតេជោ ហ៊ុន សែន ចាត់ទុកប្រទេសទាំងអស់នៅទូទាំងពិភពលោកជាមិត្តដ៏ល្អ ដោយមិនជ្រើសរើសចិន ប្រឆាំងអាមេរិក ឬជ្រើសអាមេរិក ប្រឆាំងចិនឡើយ។

ក្របខណ្ឌគោលការណ៍នយោបាយរបស់កម្ពុជា គឺធ្វើឡើងដើម្បីបំរើសន្តិភាព និងការអភិវឌ្ឍ មិនប្រឆាំងប្រទេសដទៃ ដោយគោរពឯករាជ្យភាពរបស់ អាស៊ាន នេះបើតាមប្រសាសន៍របស់ សម្ដេច ហ៊ុន សែន ដែលបានថ្លែងនៅក្នុងពិធីជួបសំណេះសំណាលជាមួយបងប្អូនប្រជាពលរដ្ឋខ្មែររស់នៅ សហរដ្ឋអាមេរិក និងកាណាដាប្រមាណ នៅ រដ្ឋធានីវ៉ាស៊ីនតោន សហរដ្ឋាអាមេរិក នាថ្ងៃទី ១២ ឧសភា ២០២២ ក្នុងឱកាសចូលរួមកិច្ចប្រជុំពិសេសរវាង អាស៊ាន និង សហរដ្ឋអាម៉េរិក ដែលបាន និងកំពុងធ្វើឡើងនៅ រដ្ឋធានីវ៉ាស៊ីនតោន។

ដោយឡែក ប្រទេសជិតខាងរបស់ កម្ពុជា គឺ វៀតណាម វិញ ក្នុងឱកាសចូលរួមកិច្ចប្រជុំពិសេសរវាង អាស៊ាន និង សហរដ្ឋអាម៉េរិក ខាងលើ នាយករដ្ឋមន្ត្រីវៀតណាម Pham Minh Chinh នាំពាក្យរបស់ ប្រធានរដ្ឋសភាវៀតណាម Vuong Dinh Hue បានស្នើឱ្យប្រធានសភាជាន់ខ្ពស់អាម៉េរិក Patrick Leanhy និងសហការី ជំរុញការបង្កើត «ក្រុមតំណាងរាស្ត្រដែលស្និទ្ធិនឹង វៀតណាម» និងបង្កើនសកម្មភាពដោះដូរ និងការសន្ទនា រវាងសភាទាំងពីរប្រទេស៕

May 12, 2022

វៀតណាម ស្នើឱ្យ អាម៉េរិក បង្កើតក្រុមតំណាងរាស្ត្រដែល «ស្និទ្ធិ» នឹង ទីក្រុងហាណូយ

ប្រធានសភាវៀតណាម Vuong Dinh Hue តំណាងដោយនាយករដ្ឋមន្ត្រី Pham Minh Chinh ស្នើឱ្យ សហរដ្ឋអាម៉េរិក បង្កើតក្រុមតំណាងរាស្ត្រដែលស្និទ្ធនឹង តំណាងរាស្ត្រវៀតណាម។

នាយករដ្ឋមន្ត្រី Pham Minh Chinh កាលពីថ្ងៃទី ១១ ឧសភា បានជួបពិភក្សាជាមួយប្រធានសភាជាន់ខ្ពស់ Patrick Leanhy និងតំណាងរាស្ត្រមួយចំនួននៅសភាជាន់ខ្ពស់អាម៉េរិក ក្នុងឱកាសចូលរួមកិច្ចប្រជុំពិសេសរវាង អាស៊ាន និង សហរដ្ឋអាម៉េរិក ដែលបាន និងកំពុងធ្វើឡើងនៅ សហរដ្ឋអាម៉េរិក។

ក្នុងឱកាសនោះ នាយករដ្ឋមន្ត្រីវៀតណាម បាននាំពាក្យរបស់ ប្រធានរដ្ឋសភាវៀតណាម Vuong Dinh Hue ស្នើឱ្យលោក Leahy និងសហការី ជំរុញការបង្កើតក្រុមតំណាងរាស្ត្រដែលស្និទ្ធិនឹង វៀតណាម និងបង្កើនសកម្មភាពដោះដូរ និងការសន្ទនា រវាងសភាទាំងពីរប្រទេស។

នាយករដ្ឋមន្ត្រីវៀតណាម រំពឹងថា ប្រធានសភា Leahy នឹងបន្តជាចលករ ដើម្បីឱ្យតំណាងរាស្ត្រជំនាន់បន្តបន្ទាប់របស់ អាម៉េរិក បន្តការងារដោះស្រាយផលវិបាក និងបញ្ហានានានៅក្រោយសង្គ្រាមវៀតណាម។

លោក Leahy អះអាងថា សភាអាម៉េរិក តែងតែមានសមាជិកដែលគាំទ្រដល់ទំនាក់ទំនងជាមួយ វៀតណាម ហើយក្រុមតំណាងរាស្ត្រផ្សេងទៀតរបស់សភាជាន់ខ្ពស់អាម៉េរិក ដែលមានវត្តមានក្នុងជំនួបនេះសុទ្ធតែសម្ដែងការគាំទ្រដល់ វៀតណាម។

ក្នុងថ្ងៃដដែល នាយករដ្ឋមន្ត្រីវៀតណាម ក៏បានជួបពិភាក្សាជាមួយ នាយករដ្ឋមន្ត្រីកម្ពុជា សម្ដេច ហ៊ុន សែន ផងដែរ។ ក្នុងជំនួបនេះ មេដឹកនាំទាំងពីរ បានឯកភាពគ្នាក្នុងការជំរុញទំនាក់ទំនងល្អ មិត្តភាពជាប្រពៃណី សហប្រតិបត្តិការគ្រប់ជ្រុងជ្រោយ និងនិរន្តភាពយូរអង្វែង៕

May 12, 2022

(វីដេអូ)-យន្តហោះរបស់ ចិន ជួបគ្រោះថ្នាក់ និងឆាបឆេះយ៉ាងសន្ធោសន្ធៅ

យន្តហោះដឹកអ្នកដំណើររបស់ក្រុមហ៊ុនអាកាសចរណ៍ Tibet Airlines បានបរហួសផ្លូវរត់ និងឆាបឆេះយ៉ាងសន្ធោសន្ធៅ នៅក្នុងព្រលានយន្តហោះ Chongqing នាព្រឹកនេះ បណ្ដាលឱ្យមនុស្សច្រើននាក់រងរបួស។

«យន្តហោះមួយគ្រឿងចេញដំណើរពី Chongqing ទៅកាន់ទីក្រុង Lhasa របស់ ទីបេ បានជ្រុលធ្លាក់ពីផ្លូវរត និងឆាបឆេះនៅក្នុង ព្រលានយន្តហោះអន្តរជាតិ Chongqing Jiangbei» នេះបើតាមទូរទស្សន៍ចិន CCTV។

យោងតាមប្រកាសផ្លូវការរបស់ Tibet Airlines ក្រុមហោះហើរដឹងថា «មានអ្វីមិនប្រក្រតី» ក្នុងពេលត្រៀមហោះឡើង ទើបសម្រេចមិនធ្វើការហោះហើរ។ ក្រោយមក យន្តហោះនេះក៏បានប្ដូរទិសចេញពីផ្លូវរត់។

«អ្នកដំណើរទាំង ១១៣ នាក់ និងបុគ្គលិកហោះហើរ ៩ នាក់ ត្រូវបានឈ្លៀសចេញពីយន្តហោះ មនុស្សមួយចំនួនរងរបួសស្រាល និងត្រូវបានបញ្ជូនទៅកាន់មន្ទីរពេទ្យដើម្បីព្យាបាល» ប្រកាសរបស់ក្រុមហ៊ុនខាងលើ ឱ្យដឹងដូច្នេះ ប៉ុន្តែមិនទាន់និយាយលម្អិតអំពីហេតុការណ៍នេះនៅឡើយ។

ហេតុការណ៍ខាងលើបានកើតឡើងក្រោយពីករណីយន្តហោះមួយគ្រឿងរបស់ក្រុមហ៊ុន China Eastern ហោះពី Kunming ទៅកាន់ Guangzhou ធ្លាក់ដាំក្បាលចុះលើខ្នងភ្នំកាលពីខែមីនា ២០២២ បណ្ដាលឱ្យមនុស្សទាំង ១៣២ នាក់នៅលើយន្តហោះ បាត់បង់ជីវិត ដោយមិនទាន់រកឃើញមូលហេតុច្បាស់លាស់នៅឡើយ។

May 12, 2022

កូរ៉េខាងជើង រកឃើញករណីឆ្លងជំងឺកូវីដ-១៩ ដំបូងបង្អស់

កូរ៉េខាងជើង ប្រកាសថា បានរកឃើញករណីវិជ្ជមាននឹង វីរុសកូវីដ-១៩ ដំបូងបង្អស់របស់ប្រទេសនេះ ក្រោយរយៈពេលជាង ២ ឆ្នាំ ដែលបានបិទព្រំដែនដើម្បីទប់ស្កាត់ជំងឺរាតត្បាតសកល។

ទីភ្នាក់ងារសារព័ត៌មានរដ្ឋ KCNA ថ្ងៃនេះបានប្រកាសថា ករណីកូវីដ-១៩ ដំបូងនៅប្រទេសនេះ ត្រូវបានរកឃើញនៅ រដ្ឋធានីព្យុងយ៉ាង និងបានហៅករណីនេះថាជា «ស្ថានការណ៍អាសន្នថ្នាក់ជាតិដ៏ធ្ងន់ធ្ងរ»។ KCNA បន្ថែមថា ករណីនេះគឺជាវ៉ារ្យ៉ង់ អូមីក្រុង ប្រភេទ BA.២ ប៉ុន្តែមិនបានបង្ហើបឱ្យដឹងសេចក្ដីលម្អិតឡើយ។

មេដឹកនាំកូរ៉េខាងជើង លោក គីម ជុងអុន ដែលដឹកនាំកិច្ចប្រជុំរបស់ការិយាល័យនយោបាយនៃគណៈកម្មាធិការមជ្ឈិមបក្សពលករកូរ៉េ បានប្រកាសបើកដំណើរការប្រព័ន្ធគ្រប់គ្រងការបិទខ្ទប់ «ក្នុងកម្រិតប្រកាសអាសន្នខ្ពស់បំផុត» និងបានអះអាងថា ប្រទេសនេះនឹងឆ្លងផុត កូវីដ-១៩។

លោក គីម ជុងអុន បានស្នើឱ្យរឹតបន្តឹងព្រំដែន និងអំពាវនាវឱ្យប្រជាជនសាមគ្គីគ្នាទប់ស្កាត់ការឆ្លងរាលដាលរបស់ វីរុស ដោយការបិទខ្ទប់តំបន់របស់ខ្លួន។ «គោលដៅគឺការលុបបំបាត់អាសន្នរោគដោយប្រើពេលខ្លីបំផុត» KCNA ដកស្រង់សម្ដីរបស់លោក គីម ជុងអុន ដែលបានថ្លែងនៅក្នុងកិច្ចប្រជុំខាងលើ។

អង្គការសុខភាពពិភពលោក (WHO) កាលពីចុងឆ្នាំកន្លង បានប្រកាសដឹកជញ្ជូនបរិក្ខាពេទ្យសំខាន់ៗសម្រាប់ទប់ទល់នឹង កូវីដ-១៩ «ក្នុងបំណងរក្សាទុកជារបស់បង្ការយុទ្ធសាស្ត្រ» ទៅកាន់ កូរ៉េខាងជើង តាមរយៈកំពង់ផែ Dalian របស់ ប្រទេសចិន នេះបើតាម KCNA៕

May 12, 2022

ថ្ងៃទី ៧៧ នៃសង្គ្រាមនៅ អ៊ុយក្រែន៖ ទីក្រុងកៀវ ប្រកាសថា បានវាយរុញច្រាន កងទ័ពរុស្ស៊ី នៅ Kharkov

ប្រធានាធិបតីអ៊ុយក្រែន និយាយថា កងកម្លាំងរុស្ស៊ី កំពុងត្រូវបានវាយរុញច្រានចេញពីទីក្រុងភាគឦសាន Kharkov ក្នុងគ្រាដែល អ៊ុយក្រែន បង្កើនការវាយបកនៅក្បែរព្រំដែនជាប់នឹង រុស្ស៊ី។

ការប្រយុទ្ធគ្នារវាង រុស្ស៊ី និង អ៊ុយក្រែន ក្នុងថ្ងៃទី ៧៧ នៃសង្គ្រាម កំពុងបន្តតានតឹងនៅ Kharkov ក្នុងតំបន់ភាគឦសានរបស់ អ៊ុយក្រែន ដែលស្ថិតនៅជាប់នឹងព្រំដែនជាមួយតំបន់ Belgorod របស់ រុស្ស៊ី ចម្ងាយប្រហែល ៣៩ គីឡូម៉ែត្រ។

កងទ័ពរុស្ស៊ី កំពុងត្រូវបានវាយរុញច្រានចេញពី Kharkov ដែលជាទីក្រុងធំទី ២ របស់ អ៊ុយក្រែន នេះបើតាមប្រធានាធិបតី ហ្សេឡែនស្គី ប្រកាសកាលពីថ្ងៃទី ១០ ឧសភា។ អភិបាលក្រុង Kharkov លោក Oleg Synegubov ក៏បានបញ្ជាក់ថា អ៊ុយក្រែន ដណ្ដើមបានភូមិមួយចំនួននៅភាគឦសានទីក្រុង Kharkov ហើយថា កងកម្លាំងរុស្ស៊ី មានឱកាសតិចតួចក្នុងការវាយប្រហារទៅលើតំបន់កណ្ដាលក្រុង។

ប្រភពព័ត៌មានពីកងទ័ពរបស់ អ៊ុយក្រែន ឱ្យដឹងថា ក្រោយពីបានវាយសម្រុកទៅកាន់ភាគខាងជើង និងភាគខាងកើត Kharkov បច្ចុប្បន្ន កងកម្លាំងអ៊ុយក្រែន កំពុងស្ថិតនៅចម្ងាយតែប៉ុន្មានគីឡូម៉ែត្រទៀតប៉ុណ្ណោះ ពីព្រះដែន រុស្ស៊ី គិតត្រឹមព្រឹកថ្ងៃទី ១១ ឧសភា។ មុននោះ កងកម្លាំងរបស់ រុស្ស៊ី ស្ថិតនៅជាយក្រុង Kharkov ដែលមានចម្ងាយ ៤០ គីឡូម៉ែត្រ ពីព្រំដែន។

មកដល់ពេលនេះ សង្គ្រាមនៅ អ៊ុយក្រែន បានចូលដល់ថ្ងៃទី ៧៧ និងកំពុងឈានទៅរកថ្ងៃទី ៧៨ ហើយ។ ក្រុមមន្ត្រីអាម៉េរិក និង ណាតូ កំពុងសម្ដែងការព្រួយបារម្ភថា សង្គ្រាមនេះនឹងបន្តជាប្រភពនៃអស្ថិរភាពក្នុងតំបន់ និងនៅទូទាំងសកលលោកក្នុងរយៈពេលច្រើនខែ ឬច្រើនឆ្នាំទៀត ខណៈដែលពុំទាន់មានសញ្ញាបង្ហាញថា ភាគីមួយណាជាអ្នកឈ្នះ និងមិនទាន់មានដំណោះស្រាយសមស្រប។

May 12, 2022

សភាជាន់ទាបអាម៉េរិក បានអនុម័តកញ្ចប់ថវិកាផ្ដល់ជំនួយចំនួន ៤០ ពាន់លានដុល្លារ ដល់ ប្រទេសអ៊ុយក្រែន

សារព័ត៌មាន TASS បានឱ្យដឹងថា នៅថ្ងៃទី ១១ ឧសភានេះ (ម៉ោងនៅ កម្ពុជា) សភាជាន់ទាបអាម៉េរិក បានអនុម័តច្បាប់បែងចែកថវិកាបន្ថែម ៤០ ពាន់លានដុល្លារ ឱ្យ រដ្ឋាភិបាលអ៊ុយក្រែន។

យោងតាមលទ្ធផលនៃការបោះឆ្នោតដែលត្រូវបានផ្សាយផ្ទាល់លើគេហទំព័ររបស់ សភាជាន់ទាប សេចក្ដីព្រាងច្បាប់នេះទទួលបានសំឡេងគាំទ្រគ្រប់គ្រាន់ អាចបញ្ជូនបន្តទៅកាន់សភាជាន់ខ្ពស់ដើម្បីធ្វើការអនុម័តបន្ត។ បើសិនឆ្លងផុតសភាជាន់ខ្ពស់ សេចក្ដីព្រាងច្បាប់នេះនឹងត្រូវបានបញ្ជូនទៅកាន់ ប្រធានាធិបតីអាម៉េរិក លោក ចូ បៃដិន ដើម្បីចុះហត្ថលេខា និងអនុវត្ត។

ប៉ុន្មានថ្ងៃមកនេះ លោក បៃដិន បានប្រឹងប្រែងជំរុញឱ្យសភា អនុម័តកញ្ចប់ថវិកាជំនួយថ្មីនេះ និងបានព្រមានថា បើមិនឆ្លងផុតសភាទេ នោះ ទីក្រុងវ៉ាស៊ីងតោន នឹងត្រូវផ្អាកជំនួយដល់ ទីក្រុងកៀវ ព្រោះថា ធនធានដែលសភាបានបែងចែកកន្លងមក បានអស់ទៅហើយ។

បើសិនកញ្ចប់ជំនួយត្រូវបានអនុម័តដូចការគ្រោងទុក ការចំណាយសរុបរបស់ អាម៉េរិក សម្រាប់បង្កើនសមត្ថភាពការពារទឹកដីរបស់ អ៊ុយក្រែន ក៏ដូចជាការដោះស្រាយវិបត្តិមនុស្សធម៌ នឹងកើនដល់ប្រហែល ៥៤ ពាន់លានដុល្លារអាម៉េរិក។

សកម្មភាពរបស់ រដ្ឋាភិបាល និងសភាអាម៉េរិក ខាងលើ ត្រូវបានធ្វើឡើងក្នុងគ្រាដែលមន្ត្រីជាន់ខ្ពស់របស់ សហរដ្ឋអាម៉េរិក បានព្រមានថា ប្រធានាធិបតីរុស្ស៊ី លោក ពូទីន កំពុងត្រៀមសម្រាប់សង្គ្រាមយូរអង្វែង និងអាចឆ្លងផុតពីតំបន់ភាគខាងកើតរបស់ អ៊ុយក្រែន៕

May 11, 2022

ប្រធានាធិបតីដំបូងរបស់ អ៊ុយក្រែន បានទទួលមរណភាព

លោក Leonid Kravchuk ដែលជាប្រធានាធិបតីដំបូងរបស់ អ៊ុយក្រែន ក្រោយពីប្រទេសនេះបានផ្ដាច់ចេញពីសហភាពសូវៀត បានទទួលមរណភាពក្នុងវ័យ ៨៨ ឆ្នាំ។

«នេះគឺជាដំណឹងដ៏ក្រៀមក្រំ និងជាការបាត់បង់ដ៏ធំធេង» ជំនួយការប្រធានាធិបតីអ៊ុយក្រែន Andriy Yermak បង្ហោះសារនៅលើ Telegram ប្រកាសអំពីការលាចាកលោករបស់ អតីតប្រធានាធិបតី Leonid Kravchuk កាលពីថ្ងៃទី ១០ ឧសភា ២០២២។

ប្រធានាធិបតីអ៊ុយក្រែន វ៉ូឡូឌីមៀ ហ្សេឡែនស្គី បានហៅលោក Kravchuk ថាជាតួអង្គប្រវត្តិសាស្ត្រ និងលើកសរសើរអំពីតួនាទីរបស់លោកនៅពេលដឹកនាំប្រទេសជាតិឆ្លងកាត់ដំណាក់កាលលំបាក ក្រោយពី សូវៀត បានដួលរលំ។

លោក Kravchuk ចាប់កំណើតក្នុងឆ្នាំ ១៩៣៤ ក្នុងគ្រួសារកសិករមួយ។ លោកកាន់តំណែងប្រធានាធិបតីអ៊ុយក្រែន ចន្លោះឆ្នាំ ១៩៩១ ដល់ ១៩៩៤ និងបានយល់ព្រមប្រគល់អាវុធនុយក្លេអែររបស់ សូវៀត ដែលនៅសល់លើទឹកដី អ៊ុយក្រែន ឱ្យ រុស្ស៊ី ទៅតាមកិច្ចព្រមព្រៀងមួយដែលទទួលបានការគាំទ្រពី សហរដ្ឋអាម៉េរិក។

សុខភាពរបស់លោក Kravchuk ថ្មីៗបានប្រែជាអាក្រក់ទៅៗ ហើយលោកក៏ត្រូវឆ្លងកាត់ការវះកាត់បេះដូងម្ដងរួចហើយកាលពីឆ្នាំ ២០២១៕

May 11, 2022

ករណីជះទឹកថ្នាំលាបលើឯកអគ្គរដ្ឋទូតរុស្ស៊ី! រដ្ឋមន្ត្រីមហាផ្ទៃប៉ូឡូញ ថា អាចយល់បាននូវអារម្មណ៍របស់បាតុករ

ខណៈដែលរដ្ឋមន្ត្រីក្រសួងការបរទេសប៉ូឡូញ រិះគន់លើករណីបាតុករជះទឹកថ្នាំលាបលើឯកអគ្គរដ្ឋទូតរុស្ស៊ី Andreev រដ្ឋមន្ត្រីក្រសួងមហាផ្ទៃប៉ូឡូញ ឯណោះវិញ បែរជានិយាយថា គេអាចយល់បាននូវអារម្មណ៍របស់ក្រុមបាតុករនាពេលនោះ។

«ក្រុមអ្នកការទូតត្រូវតែទទួលបាននូវការការពារពិសេស បើទោះជាគោលនយោបាយដែលរដ្ឋាភិបាលរបស់ពួកគេកំពុងអនុវត្តបែបណាក៏ដោយ» រដ្ឋមន្ត្រីការបរទេសប៉ូឡូញ Zbigniew Rau លើកឡើងដូច្នេះ បន្ទាប់ពីមានករណីក្រុមបាតុករជះទឹកថ្នាំលាបលើ ឯកអគ្គរដ្ឋទូតរុស្ស៊ី លោក Sergei Andreev នៅ រដ្ឋធានា Warsaw កាលពីថ្ងៃទី ៩ ឧសភា។ រដ្ឋមន្ត្រីការបរទេសប៉ូឡូញ បានហៅទង្វើនេះថាជាហេតុការណ៍ «អាក្រក់ជាទីបំផុត»។

ក៏ប៉ុន្តែ អ្នកនាំពាក្យរបស់រដ្ឋាភិបាលប៉ូឡូញ លោក Lan Piotr Muller កាលពីថ្ងៃទី ១០ ឧសភា បានឱ្យដឹងថា «អាចយល់បាន» នូវការផ្ទុះកំហឹងរបស់ក្រុមបាតុករដែលបានជះទឹកថ្នាំលាបលើ ឯកអគ្គរដ្ឋទូតរុស្ស៊ី Andreev ហើយថា «មិនមានមូលហេតុណាមួយដែលគួររិះគន់ទង្វើរបស់ពួកគេឡើយ»។

រដ្ឋមន្ត្រីក្រសួងមហាផ្ទៃរបស់ ប៉ូឡូញ លោក Mariusz Kaminski ក៏បានបង្ហោះសារនៅលើ Twitter ថា «ការប្រមូលផ្ដុំរបស់ក្រុមប្រឆាំងយុទ្ធនាការយោធារបស់ រុស្ស៊ី នៅ អ៊ុយក្រែន គឺជារឿងស្របច្បាប់ទាំងស្រុង។ អារម្មណ៍របស់ក្រុម ស្ត្រីអ៊ុយក្រែន ដែលបានចូលរួមធ្វើបាតុកម្ម ជាអ្នកដែលមានស្វាមីកំពុងប្រយុទ្ធដើម្បីការពារទឹកដី គឺជាប្រការដែលងាយយល់»។

May 11, 2022

Category: អន្តរជាតិ