អន្តរជាតិ - La Reine Media

អ៊ុយក្រែន កាត់ផ្ដាច់ទំនាក់ទំនងការទូតជាមួយ កូរ៉េខាងជើង

កាលពីថ្ងៃទី ១៣ កក្កដា សារព័ត៌មានរដ្ឋរុស្ស៊ី បានរាយការណ៍ថា អ៊ុយក្រែន បានសម្រេចចិត្តផ្ដាច់ទំនាក់ទំនងការទូតជាមួយ កូរ៉េខាងជើង បន្ទាប់ពី ទីក្រុងព្យុងយ៉ាង ទទួលស្គាល់ក្រុមផ្ដាច់ខ្លួននៅតំបន់ Donbass។

យោងតាម Sputnik អ៊ុយក្រែន បានកាត់ផ្ដាច់ទំនាក់ទំនងជាមួយ កូរ៉េខាងជើង ប៉ុន្មានម៉ោងក្រោយពី ទីក្រុងព្យុងយ៉ាង បានប្រកាសទទួលស្គាល់ក្រុមដែលហៅខ្លួនឯងថា សាធារណរដ្ឋប្រជាមានិត Donetsk និង សាធារណរដ្ឋប្រជាមានិត Lugansk នៅតំបន់ Donbass ភាគខាងកើតនៃ ប្រទេសអ៊ុយក្រែន។

ក្នុងប្រកាស ក្រសួងការបរទេសអ៊ុយក្រែន បានបញ្ជាក់ថា «យើងចាត់ទុកការសម្រេចចិត្តនេះថាជាការប្រឹងប្រែងរបស់ ទីក្រុងព្យុងយ៉ាង ក្នុងបំណងបំផ្លិចបំផ្លាញអធិបេយ្យភាព និងបូរណភាពទឹកដីរបស់ អ៊ុយក្រែន រំលោភយ៉ាងធ្ងន់ធ្ងរលើ រដ្ឋធម្មរុញ្ញអ៊ុយក្រែន ធម្មនុញ្ញអង្គការសហប្រជាជាតិ និងគោលការណ៍ ក៏ដូចជាមូលដ្ឋានគ្រឹះនៃច្បាប់អន្តរជាតិ»។

ទីក្រុងកៀវ សង្កត់ធ្ងន់ថា ប្រទេសនេះចាត់ទុក ការដែល សាធារណរដ្ឋប្រជាធិបតេយ្យប្រជាមានិតកូរ៉េ (DPRK) ទទួលស្គាល់ក្រុមផ្ដាច់ខ្លួននៅ Donbass ថា «មិនមានប្រសិទ្ធភាព និងមិនមានតម្លៃ»។ ក្រសួងការបរទេសអ៊ុយក្រែន ប្រកាសថា «ដើម្បីឆ្លើយតបនឹងសកម្មភាពមិនស្និទ្ធស្នាលបែបនេះ អ៊ុយក្រែន ប្រកាសកាត់ផ្ដាច់ទំនាក់ទំនងការទូតជាមួយ DPRK»។

រដ្ឋមន្ត្រីការបរទេសអ៊ុយក្រែន លោក Dmytro Kuleba បានរិះគន់ ទីក្រុងមូស្គូ ដោយចោទថា រុស្ស៊ី គឺជាអ្នកជំរុញឱ្យ កូរ៉េខាងជើង សម្រេចចិត្តបែបនេះ។

មុននោះ មេដឹកនាំតំបន់ Donetsk លោក Denis Pushilin បានប្រកាសថា កូរ៉េខាងជើង កាលពីថ្ងៃទី ១៣ កក្កដា បានទទួលស្គាល់ សាធារណរដ្ឋ Lugansk និង Donetsk នៅ ភាគខាងកើតអ៊ុយក្រែន។ ស្ថានទូតកូរ៉េខាងជើង នៅ មូស្គូ ក៏បានបញ្ជាក់អំពីព័ត៌មាននេះ៕

July 14, 2022

ខ្មាន់កាំភ្លើងបាញ់ប្រហារលើទីតាំងសាសនា មុនពេលលួចធ្វើឃាតលោក ស្ហ៊ីនហ្សូ អាបេ

ជនសង្ស័យ Yamagami បានបាញ់សាកល្បងទៅលើទីតាំងសាសនាដែលជននេះស្អប់ មួយថ្ងៃមុនការធ្វើឃាត អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបេ។

«ខ្ញុំបានបាញ់ទៅលើទីតាំងសាសនាមួយនៅក្នុងខេត្ត Nara កាលពីវេលាទាបភ្លើង ថ្ងៃទី ៧ កក្កដា» ជនសង្ស័យ Tetsuya Yamagami អាយុ ៤១ ឆ្នាំ បានសារភាពប្រាប់ក្រុមអ្នកស៊ើបអង្កេត និងប៉ូលិសខេត្ត Nara កាលពីថ្ងៃទី ១១ កក្កដាដូច្នេះ។

យោងតាមប៉ូលិស កាមេរ៉ាសន្តិសុខថតបានរូបភាពរថយន្តមួយគ្រឿងដែលដូចទៅនឹងរថយន្តរបស់ជនសង្ស័យដែលសមត្ថកិច្ចឃាត់បាន កាលពីព្រឹកថ្ងៃទី ៧ កក្កដា។ ប៉ូលិសជឿថា Yamagami ពេលនោះកំពុងតែពិសោធកាំភ្លើងដែលខ្លួនបានកែច្នៃ។

Yamagami សារភាពថា ខ្លួនស្អប់ក្រុមសាសនាមួយនោះ ហើយមានបំណងធ្វើឃាតលោក អាបេ ដោយសារតែមានទំនាក់ទំនងជាមួយក្រុមសាសនានោះ។

ប្រជាជនរស់នៅក្បែរទីតាំងសាសនាមួយនោះ ដែលស្ថិតក្នុងទីក្រុង Nara និយាយថា ពួកគេឮសំឡេងផ្ទុះនៅវេលាម៉ោងប្រហែល ៤ ថ្ងៃទី ៧ កក្កដា។

ទីតាំងសាសនានោះស្ថិតនៅចម្ងាយប្រហែល ១ គីឡូម៉ែត្រពីផ្ទះរបស់ជនសង្ស័យ។ ប៉ូលិសបានរកឃើញវត្ថុតាំងមួយចំនួននៅក្នុងរថយន្តរបស់ Yamagami។ នៅពេលត្រូវបានសួរ ជនសង្ស័យឆ្លើយថា វត្ថុទាំងនោះត្រូវបានប្រើប្រាស់ដើម្បីធ្វើតេស្តកាំភ្លើង។

ជនសង្ស័យ Yamagami អតីតសមាជិកនៃកងកម្លាំងការពារដែនសមុទ្រជប៉ុន បានធ្វើឃាត អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបី កាលពីថ្ងៃទី ៨ កក្កដា។ ជននេះនិយាយថា ម្ដាយរបស់ខ្លួនបានចូលរួមជាមួយអង្គការសាសនាដែលខ្លួនស្អប់ និងត្រូវបានពួកគេធ្វើឱ្យអស់ទ្រព្យសម្បត្តិ។

សាច់ញាតិបានប្រាប់ថា Yamagami «ចងគំនុំជាយូរមកហើយ» ចំពោះអង្គការសាសនានោះ។ ប្រភពព័ត៌មានមួយចំនួននិយាយថា ដំបូងឡើយ ជនសង្ស័យមានបំណងធ្វើឃាតមេដឹកនាំសាសនានោះ ប៉ុន្តែ បានបោះបង់ទៅវិញដោយសារ «ពិបាក»។

សមត្ថកិច្ចមិនទាន់បញ្ជាក់ថា អង្គការសាសនានោះគឺជាអ្វី ប៉ុន្តែ សារព័ត៌មានមួយចំនួនសុទ្ធតែផ្ដោតទៅលើ Unification Church។ នេះគឺជាក្រុមគ្រីស្ទសាសនិកដ៏ល្បីឈ្មោះ ទាក់ទងនឹងពិធីរៀបការជាក្រុម និងតែងតែប្រឹងប្រែងដើម្បីកសាងទំនាក់ទំនងជាមួយបណ្ដាបក្សនយោបាយអភិរក្សនិយមនៅលើពិភពលោក។

ប្រធានអង្គការ Unification Church សាខានៅ ជប៉ុន លោក Tomihiro Tanaka កាលពីថ្ងៃទី ១១ កក្កដា បានបញ្ជាក់ថា ម្ដាយរបស់ជនសង្ស័យគឺជា «សមាជិកយូរឆ្នាំ» របស់អង្គការនេះ។ លោក Tanaka ថ្លែងថា Yamagami មិនមែនជាសមាជិករបស់ក្រុមសាសនានេះ ហើយ Unification Church ក៏មិនមានទំនាក់ទំនងអ្វីជាមួយ អតីតនាយករដ្ឋមន្ត្រី អាបេ នោះដែរ។

សមត្ថកិច្ចជឿថា Yamagami បានរៀបផែនការធ្វើឃាតលោក អាបេ យ៉ាងហោចក៏តាំងតែពីជាង ១ ឆ្នាំមុន ព្រោះជននេះបានប្រាប់ក្រុមអ្នកស៊ើបអង្កេតថា ខ្លួនចាប់ផ្ដើមកែច្នៃអាវុធកាលពីរដូវផ្ការីកឆ្នាំ ២០២១។ អ្នកជិតខាងម្នាក់របស់ជនសង្ស័យបាននិយាយថា ធ្លាប់បានឮសំឡេងដូចទៅនឹងការកែច្នៃឈើ ចេញពីបន្ទប់របស់ Yamagami នៅពេលយប់៕

July 13, 2022

ក្រុមផ្ដាច់ខ្លួនថា អ៊ុយក្រែន វាយប្រហារអង្គភាពការពារដែនអាកាសនៅ Lugansk

តំណាងរបស់ក្រុមផ្ដាច់ខ្លួនបានឱ្យដឹងថា កងទ័ពអ៊ុយក្រែន បានវាយប្រហារទៅលើអង្គភាពការពារដែនអាកាសនៃទីក្រុង Lugansk ក្នុងនោះ មានទីតាំងមួយត្រូវរងគ្រាប់រ៉ុក្កែត។

«កងកម្លាំងអ៊ុយក្រែន បើកការវាយប្រហារធំសំដៅលើអង្គភាពការពារដែនអាកាសដែលការពារសន្តិសុខសម្រាប់ទីក្រុង Lugansk» Andrei Marochko ដែលជាមន្ត្រីមួយរូបរបស់កងកម្លាំងការពារប្រជាជននៃក្រុមដែលហៅខ្លួនឯងថា សាធារណរដ្ឋប្រជាមានិត Lugansk (LPR) កាលពីថ្ងៃទី ១២ កក្កាដា បានប្រកាសដូច្នេះ។

លោក Marochko ឱ្យដឹងថា រ៉ុក្កែតមួយចំនួនរបស់ អ៊ុយក្រែន បានបាញ់ចំគោលដៅ ប៉ុន្តែអះអាងថា កងកម្លាំងបម្រុងរបស់ក្រុមផ្ដាច់ខ្លួននៅតែជាអ្នកគ្រប់គ្រងដែនអាកាស Lugansk។

ផ្សែងបាញ់ចេញពីអគ្គិភ័យនៅ Lugansk ដែលក្រុមផ្ដាច់ខ្លួនថាជាការវាយប្រហាររបស់ អ៊ុយក្រែន នៅក្នុងវីដេអូមួយដែលផ្សាយកាលពីថ្ងៃទី ១៣ កក្កាដា

ភាគីខាងអ៊ុយក្រែន មិនទាន់មានប្រតិកម្មអ្វីទៅនឹងការអះអាងរបស់ក្រុមផ្ដាច់ខ្លួននៅ Lugansk នៅឡើយ។ ចំណែក រុស្ស៊ី ក៏មិនទាន់មានការអធិប្បាយអ្វីដែរទាក់ទិននឹងបញ្ហានេះ។

ក្រុមមន្ត្រីអ៊ុយក្រែន យល់ថា រុស្ស៊ី និងក្រុមផ្ដាច់ខ្លួន កំពុងប្រមូលកម្លាំងដ៏ធំ ពិសេសគឺនៅជុំវិញស្រុក Bakhmut, Sieversk, Sloviansk និង Kramatorsk ក្នុងខេត្ត Donetsk។

ការវាយប្រហារខាងលើរបស់ អ៊ុយក្រែន ត្រូវបានធ្វើឡើងបន្ទាប់ពី ទីក្រុងកៀវ បានប្រកាសថានឹងវាយយកទឹកដីដែល រុស្ស៊ី និងក្រុមផ្ដាច់ខ្លួនបានដណ្ដើមកាន់កាប់ បន្ទាប់ពីទទួលបានអាវុធទំនើបៗពី សហរដ្ឋអាម៉េរិក និងបណ្ដាប្រទេសនៅ អឺរ៉ុប៕

July 13, 2022

ប្រធានាធិបតីស្រីលង្កា «ចាកចោលប្រទេស» តាមយន្តហោះយោធា

ប្រធានាធិបតីស្រីលង្កា បានចាកចោលប្រទេសតាមយន្តហោះយោធា និងបានទៅដល់ ម៉ាល់ឌីវ (Maldives) នាព្រឹកនេះ បន្ទាប់ពីបាតុករសម្រុកចូលភូមិគ្រឹះរបស់លោកកាលពីប៉ុន្មានថ្ងៃមុន។

ប្រធានាធិបតីស្រីលង្កា លោក Gotabaya Rajapaksa អាយុ ៧៣ ឆ្នាំ រួមនឹងភរិយា និងអង្គរក្ស ២ នាក់ គឺជាអ្នកដំណើរនៅលើយន្តហោះយោធា Antonov-32 ដែលហោះឡើងពីព្រលានយន្តហោះអន្តរជាតិរបស់ ស្រីលង្កា ឆ្ពោះទៅកាន់ រដ្ឋធានីម៉ាល របស់ ម៉ាល់ឌីវ នេះបើតាមមន្ត្រីអន្តោប្រវេសន៍មួយរូបសុំមិនបញ្ចេញឈ្មោះ។

«លិខិតឆ្លងដែនរបស់ពួកគេត្រូវបានបោះត្រា ហើយពួកគេឡើងយន្តហោះរបស់កងទ័ពអាកាសពិសេស» មន្ត្រីខាងលើឱ្យដឹងដូច្នេះ។

យោងតាមក្រុមមន្ត្រីនៅអាកាសយានដ្ឋាន យន្តហោះខាងលើត្រូវបានឃាត់ប្រហែល ១ ម៉ោង នៅលើផ្លូវរត់ ព្រោះតែច្រឡំទាក់ទងនឹងការអនុញ្ញាតឱ្យចុះចតនៅ ម៉ាល់ឌីវ។ នៅពេលទៅដល់ ម៉ាល់ឌីវ ពួកគេត្រូវបាននាំទៅកាន់ទីតាំងដែលមិនត្រូវបានបង្ហើបឱ្យដឹង ក្រោមការការពារពីប៉ូលិស។

បច្ចុប្បន្ន មិនទាន់មានព័ត៌មានផ្លូវការណាមួយពីការិយាល័យប្រធានាធិបតីស្ដីពីទីតាំងរបស់លោក Rajapaksa នៅឡើយ ប៉ុន្តែ លោកនៅតែជាមេបញ្ជាការកងទ័ពរបស់ ស្រីលង្កា។

ប្រធានាធិបតី Rajapaksa ត្រូវបានគេជឿថា ស្វែងរកវិធីទៅបរទេសដើម្បីចៀសវាងការចាប់ខ្លួន បន្ទាប់ពីលោកបានសន្យាថា នឹងលាលែងពីតំណែងក្នុងថ្ងៃទី ១៣ កក្កដានេះ ដើម្បីបើកផ្លូវឱ្យមានការ «ប្រគល់អំណាចដោយសន្តិវិធី» ដោយសារតែបាតុកម្មផ្ទុះឡើងកាន់តែធំ។ សភាស្រីលង្កា គ្រោងនឹងបើកកិច្ចប្រជុំនៅថ្ងៃទី ១៥ កក្កដា ហើយប្រធានាធិបតីថ្មីនឹងត្រូវបានជ្រើសតាំងនៅថ្ងៃទី ២០ កក្កដា។

លោក Rajapaksa កាលពីថ្ងៃទី ១១ កក្កដា បានទៅកាន់ព្រលានយន្តហោះអន្តរជាតិ Bandaranaike នៅ រដ្ឋធានីកូឡុំបូ ដើម្បីធ្វើដំណើរទៅកាន់ ឌូបៃ (Dubai) របស់ អាមីរ៉ាតអារ៉ាប់រួម (UAE) ប៉ុន្តែត្រូវបានបុគ្គលិកអន្តោប្រវេសន៍បដិសេធការបោះត្រាលើលិខិតឆ្លងដែន។ លោកក៏បានសម្រាកមួយយប់នៅក្នុងមូលដ្ឋានទ័ពមួយនៅក្បែរនោះ។

កាលពីថ្ងៃទី ៩ កក្កដា ប្រធានាធិបតីស្រីលង្កា បានភៀសខ្លួនចេញពីភូមិគ្រឹះនៅ រដ្ឋធានីកូឡុំបូ មុនពេលបាតុករសម្រុកចូលមកដល់។ កងទ័ពស្រីលង្កា ក្រោយមកក៏បានយកនាវាចម្បាំងមួយគ្រឿង នាំប្រធានាធិបតី និងជំនួយការទៅកាន់ទីក្រុង Trincomalee ហើយក៏បានឡើងឧទ្ធម្ភាគចក្រត្រលប់ទៅកាន់ព្រលានយន្តហោះអន្តរជាតិ Bandaranaike បំណងទៅកាន់ UAE ប៉ុន្តែមិនបានសម្រេច។

ស្រីលង្កា បានប្រកាសក្ស័យធនកាលពីខែមេសា ហើយកំពុងតែចរចាជាមួយ មូលនិធិរូបិយវត្ថុអន្តរជាតិ ដើម្បីសុំជំនួយ។ បន្ទាប់ពីការកាន់អំណាចបានជិត ២ ទសវត្សរ៍ របស់ត្រកូល Rajapaksa ប្រទេសកោះមួយនេះក៏បានធ្លាក់ទៅក្នុងភាពវឹកវរ ដោយមានបញ្ហាជាច្រើនកើតឡើង។ ប្រទេសនេះត្រូវអស់ឥន្ធនៈប្រើប្រាស់ ខ្វះស្បៀងអាហារ ថ្នាំសង្កូវ បណ្ដាលឱ្យជីវភាពរបស់ប្រជាជនជួបការលំបាកខ្លាំង៕

July 13, 2022

ទិដ្ឋភាពជុំវិញពិធីបុណ្យសពរបស់ អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបេ

ពិធីបុណ្យសពរបស់លោក ស្ហ៊ីនហ្សូ អាបេ (Shinzo Abe) អតីតនាយករដ្ឋមន្ត្រីដែលធ្លាប់កាន់តំណែងយូរជាងគេនៅ ជប៉ុន បានចាប់ផ្ដើមនៅវេលាម៉ោង ១១ ថ្ងៃទី ១២ កក្កដា (ម៉ោងនៅ កម្ពុជា) នៅឯវិហារ Zojoji ក្នុង រាជធានីតូក្យូ។

អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ ( Shinzo Abe ) បានទទួលមរណភាពបន្ទាប់ពីត្រូវបានបុរសជាជនសង្ស័យម្នាក់លួចធ្វើឃាតកាលពីព្រឹកថ្ងៃទី ៨ កក្កដា នៅពេលលោកកំពុងថ្លែងសុន្ទរកថារកសំឡេងឆ្នោតជូនសមាជិកបក្សប្រជាធិបតេយ្យសេរី (LDP) នៅចំពោះមុខប្រជាពលរដ្ឋជាច្រើនសិបនាក់ នៅក្នុងទីក្រុង Nara ភាគខាងលិចប្រទេសជប៉ុន។

យោងតាមប្រភពព័ត៌មានពី តួក្យូ នៅថ្ងៃទី ៨ កក្កដា Tetsuya Yamagami ដែលជាជនសង្ស័យក្នុងករណីឃាតកម្មលើ អតីតនាយករដ្ឋមន្ត្រីជប៉ុន បានសារភាពថា ខ្លួនជាមេគំនិត។

ទូរទស្សន៍ NHK ដកស្រង់ប្រភពព័ត៌មានពីប៉ូលិស បានឱ្យដឹងថា ជនសង្ស័យបានសារភាពថា ខ្លួនមិនពេញចិត្តនឹង អតីតនាយករដ្ឋមន្ត្រី Abe និងមានបំណងធ្វើឃាតអ្នកនយោបាយនេះ។ សមត្ថកិច្ចប្រមូលបានកាំភ្លើងមួយដើមនៅកន្លែងកើតហេតុ ដែលហាក់ជាកាំភ្លើងកែច្នៃដោយខ្លួនឯង។

NHK ឱ្យដឹងថា ជនសង្ស័យធ្លាប់បម្រើការនៅក្នុងជួរកងទ័ពជប៉ុន ក្នុងរយៈពេល ៣ ឆ្នាំ ហើយបច្ចុប្បន្នរស់នៅក្នុងទីក្រុង Nara។

ខាងក្រោមនេះគឺជារូបថតមួយចំនួនជុំវិញពិធីបុណ្យសពរបស់ អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបេ៖

July 12, 2022

ប្រធានាធិបតីអាម៉េរិក បញ្ចេញរូបថត «ជ្រៅបំផុត» របស់អវកាសដែលមនុស្សធ្លាប់បានឃើញ

ប្រធានាធិបតី ចូ បៃដិន បានបញ្ចេញរូបថតមួយសន្លឹកក្នុងចំណោមកម្រងរូបថតដំបូងរបស់ តេឡេស្កុបអវកាស James Webb ហើយនេះគឺជារូបថតជ្រៅបំផុតរបស់ទីអវកាសដែលមនុស្សជាតិថតបាន។

រូបថតដែលបង្ហាញអំពី SMACS 0723 ជាបណ្ដុំនៃកាឡាក់ស៊ី ដែលនៅក្នុងទីអវកាសដ៏សែនឆ្ងាយនេះត្រូវបានប្រកាសបង្ហាញនៅ សេតវិមាន ក្នុងព្រឹត្តិការណ៍មួយដែលមានការចូលរួមរបស់ ប្រធានអង្គការណាសា លោក Bill Nelson។

លោក Bill Nelson បានថ្លែងថា «នេះគឺជារូបថតដែលជ្រៅបំផុតរបស់ទីអវកាសដែលយើងថតបាន»។

កាឡាក់ស៊ី និងកញ្ចុំផ្កាយមួយចំនួនដែលស្ថិតនៅសែនឆ្ងាយនៅក្នុងរូបនេះ មិនធ្លាប់ត្រូវបានសង្កេតមើលនៅឡើយគិតមកដល់បច្ចុប្បន្ន។ បណ្ដុំកាឡាក់ស៊ីដែលត្រូវបានបង្ហាញនេះ ទំនងជាបានកកើតឡើងតាំងពី ៤.៦ ពាន់លានឆ្នាំមុន។

រូបថតខាងលើត្រូវបានថតដោយកាមេរ៉ាក្បែរអ៊ីនហ្វ្រារ៉េដ (Near-Infrared Camera) របស់ តេឡេស្កុបអវកាស James Webb។ បណ្ដារូបថតមានកម្រិតភាពច្បាស់ខ្ពស់ដែលនៅសល់នឹងត្រូវបានប្រកាសនៅថ្ងៃទី ១២ កក្កាដា (ម៉ោងនៅ សហរដ្ឋអាម៉េរិក)។

រូបថត «ជ្រៅបំផុត» របស់អវកាសដែលមនុស្សធ្លាប់បានឃើញ

តេឡេស្កុប James Webb ដែលចាប់ផ្ដើមដំណើរការពីខែធ្នូ អាចសង្កេតមើលទៅខាងក្នុងតំបន់ដែលអាចមានភពក្រៅប្រព័ន្ធព្រះអាទិត្យ និងកាឡាក់ស៊ីដំបូងៗបន្ទាប់ពីអវកាសបានកកើតភ្លាម ដោយការមើលទៅលើកាំរស្មីអ៊ីនហ្វ្រារ៉េដ ដែលភ្នែកមនុស្សមិនអាចមើលឃើញ។

ណាសា (NASA) បានប្រកាសបង្ហាញគោលដៅដំបូងៗរបស់ តេឡេស្កុប James Webb កាលពីថ្ងៃទី ៨ កក្កដា នៅពេលបង្ហើបឱ្យដឹងអំពីអ្វីដែលនឹងត្រូវបានប្រកាសនៅក្នុងថ្ងៃទី ១២ កក្កដា ដែលរួមមាន ណេប៊ូឡា Carina, ភពឧស្ម័ន WASP-96b, ណេប៊ូឡា Southern និងបណ្ដុំកាឡាក់ស៊ី Stephan’s Quintet៕

July 12, 2022

អង្គការសហប្រជាជាតិ៖ ប្រជាជនសរុបក្នុងពិភពលោកនឹងឡើងដល់ ៨ ពាន់លាននាក់ ក្នុងឆ្នាំនេះ

ពិភពលោកអាចនឹងទទួលប្រជាពលរដ្ឋទី ៨ ពាន់លាននាក់នៅថ្ងៃទី ១៥ វិច្ឆិកាខាងមុខ ហើយ ឥណ្ឌា នឹង «យកឈ្នះចិន» ក្លាយជាប្រទេសដែលមានប្រជាជនច្រើនជាងគេបង្អស់ក្នុងពិភពលោកនៅឆ្នាំ ២០២៣។

ខាងលើនេះគឺជាការព្យាកររបស់ អង្គការសហប្រជាជាតិ (UN) ដែលបានលើកឡើងកាលពីថ្ងៃទី ១១ កក្កដា ឆ្នាំ ២០២២ នៅក្នុងទិវាប្រជាជនពិភពលោក (១១ កក្កដា)។

ការព្យាកររបស់ ស្ថាប័នសេដ្ឋកិច្ច និងសង្គម នៃ អង្គការសហប្រជាជាតិ បានឱ្យដឹងថា ល្បឿននៃកំណើនប្រជាជនពិភពលោក កំពុងស្ថិតក្នុងកម្រិតយឺតបំផុតរាប់ចាប់ពីឆ្នាំ ១៩៥០។ ចំនួនប្រជាជនពិភពលោកអាចកើនឡើងដល់ ៨.៥ ពាន់លាននាក់នៅឆ្នាំ ២០៣០, ៩.៧ ពាន់លាននាក់នៅឆ្នាំ ២០៥០ និងឡើងដល់ ១០.៤ ពាន់លាននាក់នៅឆ្នាំ ២០៨០ មុនពេលមានស្ថិរភាពក្នុងកម្រិតនេះរហូតដល់ឆ្នាំ ២១០០។

ការព្យាករបានអះអាងថា ក្នុងគ្រាដែលអត្រាចាប់កំណើតនៅក្នុងបណ្ដាប្រទេសកំពុងអភិវឌ្ឍត្រូវថយចុះ កំណើននៃប្រជាជននឹងកើនឡើងនៅក្នុង ៨ ប្រទេស រួមមាន សាធារណរដ្ឋប្រជាធិបតេយ្យកុងហ្គោ, អេហ្ស៊ីប, អេត្យូពី, ឥណ្ឌា, នីហ្សេរីយ៉ា, ប៉ាគិស្ថាន, ហ្វ៊ីលីពីន និង តង់សានី៕

July 11, 2022

សហរដ្ឋអាម៉េរិក៖ បាញ់ប្រហារនៅក្នុងពិធីជប់លៀងគ្រួសារ សម្លាប់មនុស្សជាច្រើននាក់

សារព័ត៌មានក្នុងស្រុកដងស្រង់ប្រភពព័ត៌មានពី ប៉ូលិសអាម៉េរិក បានឱ្យដឹងថា មនុស្ស ៣ នាក់បានស្លាប់ និង ២ នាក់រងរបួសកាលពីព្រឹកថ្ងៃទី ១០ កក្កដា ក្នុងហេតុការណ៍បាញ់ប្រហារនៅក្នុងពិធីជប់លៀងគ្រួសារមួយនៅតំបន់ Antelope Valley ក្នុងរដ្ឋ California។

ជនរងគ្រោះនៅក្នុងហេតុការណ៍ខាងលើរួមមាន បុរស ៤ នាក់ និងស្ត្រីម្នាក់ ក្នុងនោះមានបុរស ៣ នាក់បានស្លាប់នៅនឹងកន្លែង។ អ្នករងរបួសត្រូវបានបញ្ជូនទៅកាន់មន្ទីរពេទ្យ។ បច្ចុប្បន្នមិនទាន់ដឹងច្បាស់អំពីស្ថានការណ៍ ក៏ដូចជាមូលហេតុនៃករណីបាញ់ប្រហារនេះនៅឡើយ។

នេះគឺជាករណីបាញ់ប្រហារថ្មីបំផុតនៅ សហរដ្ឋអាម៉េរិក។ មុននោះ កាលពីថ្ងៃទី ២៤ ឧសភា នៅ សហរដ្ឋអាម៉េរិក បានកើតមានហេតុការណ៍បាញ់ប្រហារមួយនៅសាលាបឋមសិក្សា Robb ក្នុងទីក្រុង Uvalde រដ្ឋ Texas បណ្ដាលឱ្យក្មេងចំនួន ១៩ នាក់ និងមនុស្សពេញវ័យ ២ នាក់បាត់បង់ជីវិត។

កាលពីថ្ងៃទី ៤ កក្កដា នៅក្នុងថ្ងៃឈប់សម្រាកនៃទិវាបុណ្យឯករាជ្យជាតិអាម៉េរិក ក៏កើតមានហេតុការណ៍បាញ់ប្រហារជាច្រើន បណ្ដាលឱ្យមនុស្សយ៉ាងតិច ២២០ នាក់ស្លាប់ និងជិត ៥៧០ នាក់រងរបួស។

ទិន្នន័យរបស់ Gun Violence Archive ដែលជាអង្គការតាមដានអំពើហិង្សាដែលមានប្រើប្រាស់កាំភ្លើងនៅ សហរដ្ឋអាម៉េរិក បានបង្ហាញថា ក្នុងរដូវបុណ្យឯករាជ្យអាម៉េរិកខាងលើ រដ្ឋស្ទើរតែទាំងអស់នៅ សហរដ្ឋអាម៉េរិក មានហេតុការណ៍បាញ់ប្រហារជាង ៥០០ ករណី ក្នុងនោះមានយ៉ាងហោច ១១ ករណី ជាអំពើបាញ់ប្រហារលើហ្វូងមនុស្ស៕

July 11, 2022

បក្សរបស់លោក ស៊ីនហ្សូ អាបេ (Shinzo Abe) ទទួលបានជ័យជម្នះក្នុងការបោះឆ្នោតសភាជាន់ខ្ពស់ជប៉ុន

គណបក្សរបស់ អតីតនាយករដ្ឋមន្ត្រីជប៉ុន លោក អាបេ ទទួលបានកៅអីភាគច្រើននៅ សភាជាន់ខ្ពស់ជប៉ុន នៅពេលការបោះឆ្នោតត្រូវបានធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីលោកត្រូវបានគេធ្វើឃាត។

គណបក្សប្រជាធិបិបតេយ្យសេរី (LDP) ដែលកំពុងកាន់អំណាច និងសម្ព័ន្ធមិត្ត Komeito ដណ្ដើមបានកៅអីចំនួន ៧៥ ក្នុងចំណោម ១២៥ កៅអីដែលត្រូវបានបោះឆ្នោតនៅ សភាជាន់ខ្ពស់ជប៉ុន និងកាន់កាប់សំឡេងភាគច្រើនក្រោយការបោះឆ្នោតកាលពីថ្ងៃទី ១០ កក្កដា។

LDP និង Komeito គឺជាក្រុមដែលត្រៀមខ្លួនរួចរាល់ក្នុងការធ្វើវិសោធនកម្មរដ្ឋធម្មនុញទៅតាមលទ្ធិសន្តិភាព ពួកគេអាចលើកកម្ពស់តួនាទីរបស់ កងទ័ពជប៉ុន នៅលើពិភពលោក ហើយនេះគឺជាគោលដៅដែលលោក អាបេ ធ្លាប់បានតាមចាប់នាពេលកន្លង។

ការបោះឆ្នោតសភាជាន់ខ្ពស់របស់ ជប៉ុន ត្រូវបានធ្វើឡើង ២ ថ្ងៃបន្ទាប់ពីលោក អាបេ ត្រូវបានខ្មាន់កាំភ្លើងធ្វើឃាត នៅពេលលោកកំពុងឃោសនារកសំឡេងឆ្នោតនៅក្នុងខេត្ត Nara។ ករណីឃាតកម្មនេះ ត្រូវបានគេអះអាងថា មានឥទ្ធិពលលើការបោះឆ្នោត បើទោះជានៅមុនការបោះឆ្នោត LDP និង Komeito ត្រូវបានព្យាករថា នឹងរកបានសំឡេងភាគច្រើននៅសភាជាន់ខ្ពស់។

អតីតនាយករដ្ឋមន្ត្រីជប៉ុន លោក Shinzo Abe ត្រូវបានបុរសជាជនសង្ស័យម្នាក់បាញ់ប្រហារដោយប្រើប្រាស់កាំភ្លើងកែច្នៃកាលពីព្រឹកថ្ងៃទី ៨ កក្កដានេះ នៅពេលលោកកំពុងថ្លែងសុន្ទរកសំឡេងឆ្នោតជូនសមាជិកបក្សប្រជាធិបតេយ្យសេរី (LDP) នៅចំពោះមុខប្រជាពលរដ្ឋជាច្រើនសិបនាក់។

យោងតាមប្រភពព័ត៌មានពី តួក្យូ នៅថ្ងៃទី ៨ កក្កដានេះ Tetsuya Yamagami ដែលជាជនសង្ស័យក្នុងករណីឃាតកម្មលើ អតីតនាយករដ្ឋមន្ត្រីជប៉ុន នៅទីក្រុង Nara ភាគខាងលិចប្រទេសជប៉ុន បានសារភាពថា ខ្លួនជាមេគំនិត។

ទូរទស្សន៍ NHK ដកស្រង់ប្រភពព័ត៌មានពីប៉ូលិស បានឱ្យដឹងថា ជនសង្ស័យបានសារភាពថា ខ្លួនមិនពេញចិត្តនឹង អតីតនាយករដ្ឋមន្ត្រី Abe និងមានបំណងធ្វើឃាតអ្នកនយោបាយនេះ។ សមត្ថកិច្ចប្រមូលបានកាំភ្លើងមួយដើមនៅកន្លែងកើតហេតុ ដែលហាក់ជាកាំភ្លើងកែច្នៃដោយខ្លួនឯង។

NHK ឱ្យដឹងថា ជនសង្ស័យធ្លាប់បម្រើការនៅក្នុងជួរកងទ័ពជប៉ុន ក្នុងរយៈពេល ៣ ឆ្នាំ ហើយបច្ចុប្បន្នរស់នៅក្នុងទីក្រុង Nara៕

July 11, 2022

អ៊ុយក្រែន ប្រកាសឱ្យទាហានខ្ទង់លាននាក់ វាយដណ្ដើមយកភាគខាងត្បូងមកវិញ

ប្រធានាធិបតី ហ្សេឡែនស្គី បានចេញបញ្ជាឱ្យកងទ័ពប្រទេសនេះ ប្រមូលកម្លាំង ១ លាននាក់ ដើម្បីវាយដណ្ដើមយកតំបន់ភាគខាងត្បូងប្រទេសដែលបច្ចុប្បន្នត្រូវបានកាន់កាប់ដោយ រុស្ស៊ី។

អនុវត្តបទបញ្ជារបស់ប្រធានាធិបតីអ៊ុយក្រែន កងទ័ពប្រទេសនេះបានប្រមូលកម្លាំងដើម្បីដណ្ដើមយកតំបន់ទាំងឡាយនៅភាគខាងត្បូង នេះបើតាម រដ្ឋមន្ត្រីក្រសួងការពារជាតិអ៊ុយក្រែន Alexey Reznikov ដែលបានប្រាប់សារព័ត៌មាន Times របស់ អង់គ្លេស កាលពីថ្ងៃទី ១០ កក្កដា។

«យើងមានទាហានប្រហែល ៧០០,០០០ នាក់ ក្នុងជួរកងទ័ព ហើយបើបូករួមទាំងឆ្មាំការពារជាតិ ប៉ូលិស កម្លាំងការពារព្រំដែន យើងនឹងមានប្រហែល ១ លាននាក់» លោក Reznikov ឱ្យដឹងដូច្នេះ ។

បច្ចុប្បន្ន មិនទាន់ដឹងច្បាស់ថា អ៊ុយក្រែន អាចប្រមូលកម្លាំងដ៏ធំសម្បើមបែបនេះបានដែរ ឬយ៉ាងណានៅឡើយ ដោយសារតែកងទ័ពប្រទេសនេះបានរងការខូចខាតយ៉ាងដំណំរួចទៅហើយ។

កងទ័ពរុស្ស៊ី បច្ចុប្បន្នកំពុងវាយសម្រុកយ៉ាងខ្លាំងក្លានៅ Donetsk បន្ទាប់ពីបានប្រកាសថា គ្រប់គ្រង Lugansk បានទាំងស្រុង ដើម្បីឆ្ពោះទៅរកគោលដៅ «រំដោះ» តំបន់ Donbass។

July 11, 2022

Category: អន្តរជាតិ