សុខភាព - La Reine Media

កម្ពុជារកឃើញអ្នកឆ្លងវីរុសCovid-19 ចំនួន 277នាក់ ក្នុងថ្ងៃទី11មេសា

នាព្រឹកថ្ងៃទី 12មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 277នាក់ទៀត ក្នុងអំឡុង 24ម៉ោងនៃថ្ងៃទី 11មេសា ឆ្នាំ2021។

ក្នុងចំណោមអ្នកវិជ្ជមានថ្មីទាំង 277នាក់ខាងលើ សុទ្ធតែជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 11មេសាដដែល កម្ពុជាក៏មានអ្នកជំងឺCovid-19 ចំនួន 60នាក់ បានជាសះស្បើយ និងមានអ្នកស្លាប់ថ្មីចំនួន 1នាក់។

គិតមកដល់ព្រឹកនេះ (12មេសា) ទូទាំងប្រទេសកម្ពុជា មានអ្នកឆ្លងCovid-19 សរុបចំនួន 4,515នាក់ ក្នុងនោះមានអ្នកជាសះស្បើយសរុប 2,212នាក់, អ្នកស្លាប់ 30នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 2,268នាក់។

ប្រភព៖ ក្រសួងសុខាភិបាល
ដកស្រង់៖ បុត្រា

April 12, 2021

អាមេរិក រិះគន់ថា ចិនធ្វើឱ្យ Covid-19 កាន់តែធ្ងន់ធ្ងរជាងមុន ខណៈពិភពលោកមានអ្នកឆ្លងCovid-19 ជិត137លាននាក់

ពិភពលោកទាំងមូល បច្ចុប្បន្ន មានអ្នកឆ្លងវីរុសCovid-19 ជិត 137លាននាក់ និងជាង 2.9លាននាក់បានស្លាប់ ធ្វើឱ្យសហរដ្ឋអាមេរិក រិះគន់ចិន និងជំរុញឱ្យស្វែងរកប្រភពពិតរបស់វីរុសនេះ។

គិតមកដល់បច្ចុប្បន្ន ពិភពលោកទាំងមូលបានរកឃើញអ្នកវិជ្ជមាននឹងCovid-19 សរុបចំនួន 136,613,721នាក់ ក្នុងនោះមានអ្នកស្លាប់ 2,948,824នាក់, អ្នកជាសះស្បើយ 109,840,495នាក់ និងអ្នកកំពុងព្យាបាលមានចំនួន 23,824,402នាក់។ នេះបើតាមទំព័រ Worldometers។

ទាក់ទិននឹងបញ្ហា Covid-19 រដ្ឋមន្ត្រីការបរទេសសហរដ្ឋអាមេរិក Antony Blinken កាលពីថ្ងៃទី11មេសា បានរិះគន់ចិនថា មិនបានផ្ដល់សិទ្ធិដល់ក្រុមអ្នកជំនាញអន្តរជាតិ និងមិនព្រមចែករំលែកទិន្នន័យទៅតាមពេលវេលាទាន់ហេតុការណ៍។ «ជាលទ្ធផលគឺថា បានបាត់បង់ការគ្រប់គ្រងលើវីរុសយ៉ាងឆាប់រហ័ស និងកាន់តែធ្ងន់ធ្ងរ» លោក Antony Blinken ថ្លែងដូច្នេះ។

ការថ្លែងរបស់លោក Blinken បានសង្កត់ធ្ងន់ទៅលើការរិះគន់ពីសំណាក់ក្រុមមន្ត្រីរបស់លោក Joe Biden សំដៅលើទៅក្រុងប៉េកាំង នាពេលថ្មីៗនេះ ក្នុងនោះក៏មានការយល់ឃើញថា ចិនខ្វះតម្លាភាពក្នុងគ្រាដំបូងនៃវិបត្តិសុខភាព។

ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីថ្ងៃទី30មីនា បានឱ្យដឹងថា ទិន្នន័យជាច្រើនមិនត្រូវបានផ្ដល់ដល់ក្រុមអ្នកជំនាញរបស់ WHO នៅក្នុងដំណើរស្វែងរកប្រភពវីរុសCovid-19 នៅប្រទេសចិន ហើយថា បញ្ហាជាច្រើនទៀតត្រូវការការស្រាវជ្រាវបន្ថែម។

«ប្រការសំខាន់គឺត្រូវតែមានលទ្ធផលចុងក្រោយដែលប្រាកដប្រជាអំពីរបៀបដែលវីរុសផ្ទុះឆ្លងរាលដាល។ យើងត្រូវការធ្វើដូច្នេះដើម្បីយល់ច្បាស់អំពីអ្វីដែលបានកើតឡើង និងទប់ស្កាត់ការកើតឡើងជាថ្មី។ នោះគឺជាមូលហេតុដែលយើងត្រូវការស្វែងយល់រហូតដល់ទីបញ្ចប់» លោក BlinKen ថ្លែងដូច្នេះ និងបានបន្តថា ចិនត្រូវតែចូលរួមកែសម្រួលប្រព័ន្ធសន្តិសុខសុខាភិបាលជាសកល ដើម្បីធានានូវតម្លាភាព និងការចែករំលែកព័ត៌មានពិត។

ពលរដ្ឋអាមេរិកាំង កំពុងរង់ចាំចាក់វ៉ាក់សាំង

សហរដ្ឋអាមេរិក គឺជាសម្បុកវីរុសCovid-19 ធំជាងគេក្នុងពិភពលោក ដោយបានរកឃើញអ្នកវិជ្ជមាន 31,918,591នាក់ និងស្លាប់ 575,829នាក់។ វ៉ាក់សាំងជិត 175លានដូសត្រូវបានចាក់នៅប្រទេសនេះ រាប់ចាប់ពីដើមខែធ្នូ ឆ្នាំ2020។ ពលរដ្ឋជាង 112លាននាក់បានទទួលការចាក់វ៉ាក់សាំងយ៉ាងតិចមួយម្ជុល ស្មើនឹងជាង 1/3 នៃចំនួនប្រជាជនសរុបរបស់សហរដ្ឋអាមេរិក។

គិតមកដល់ថ្ងៃទី8មេសា ឆ្នាំ2021 ពលរដ្ឋអាមេរិកាំងជិត 20% បានចាក់វ៉ាក់សាំងបង្ការ Covid-19 រួចរាល់។ ក្រុមហ៊ុន Pfizer កាលពីថ្ងៃទី9 ខែមេសា បានឱ្យដឹងថា កំពុងសុំច្បាប់ពីរដ្ឋាភិបាលដើម្បីប្រើប្រាស់វ៉ាក់សាំង សម្រាប់កុមារចាប់ពីអាយុ12-15ឆ្នាំ ហើយក្រុមហ៊ុនក៏នឹងដាក់សំណើដូចគ្នានេះទៅកាន់ស្ថាប័នដទៃទៀតនៅទូទាំងពិភពលោក នាពេលខាងមុខ៕

ប្រភព៖ CNN
ប្រែសម្រួល៖ បុត្រា

April 12, 2021

អភិបាលរាជធានីភ្នំពេញ ប្រកាសឱ្យផ្អាកលក់គ្រឿងស្រវឹងគ្រប់ប្រភេទជាបណ្ដោះអាសន្ន

រដ្ឋបាលរាជធានីភ្នំពេញ កាលពីថ្ងៃទី10មេសា ឆ្នាំ2021 បានចេញសេចក្ដីប្រកាសណែនាំឱ្យផ្អាកការលក់គ្រឿងស្រវឹង និងហាមមិនឱ្យទទួលអតិថិជនចូលមកទទួលទានក្នុងបរិវេណអាជីវកម្មរបស់ខ្លួន ជាបណ្ដោះអាសន្ន រយៈពេល2សប្ដាហ៍។

បំរាមបណ្ដោះអាសន្នដែលត្រូវបានរដ្ឋបាលរាជធានីធ្វើឡើង មានចំនួន 3ប្រការ រួមមានដូចខាងក្រោម៖

ទីមួយ៖ គ្រប់ផ្សាររដ្ឋ ផ្សារទំនើប ផ្សារម៉ាត ភោជនីយដ្ឋាន អាហារដ្ឋាន តូចអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានផ្នែកអាហារ-ភេសជ្ជៈគ្រប់ប្រភេទ ត្រូវផ្អាកជាបណ្ដោះអាសន្ននូវការលក់គ្រឿងស្រវឹងគ្រប់ប្រភេទ រយៈពេល 2សប្ដាហ៍ រាប់ចាប់ពីថ្ងៃទី11មេសា ឆ្នាំ2021 ដល់ថ្ងៃទី24មេសា ឆ្នាំ2021។

ទីពីរ៖ ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានផ្នែកអាហារ-ភេសជ្ជៈគ្រប់ប្រភេទ ត្រូវផ្អាកបណ្ដោះអាសន្នចំពោះការទទួលអតិថិជនចូលមកទទួលទានក្នុងបរិវេណអាជីវកម្មដ្ឋានរបស់ខ្លួន ប៉ុន្តែ អាចប្រកបអាជីវកម្មលក់ដូរជាលក្ខណៈវេចខ្ចប់បាន។

ទីបី៖ ដើម្បីធានាឱ្យសេចក្ដីណែនាំខាងលើ ត្រូវបានអនុវត្តពេញលេញ រដ្ឋបាលរាជធានីបានស្នើឱ្យមន្ទីរពាណិជ្ជកម្មរាជធានីភ្នំពេញ មន្ទីរទេសចរណ៍រាជធានីភ្នំពេញ និងអាជ្ញាធរគ្រប់ជាន់ថ្នាក់ សហការគ្នាដើម្បីត្រួតពិនិត្យ និងអនុវត្តតាមការណែនាំនេះ។ ប្រសិនមានករណីមិនព្រមធ្វើតាមបំរាម សមត្ថកិច្ចនឹងធ្វើកិច្ចសន្យាណែនាំលើកទីមួយ ប៉ុន្តែ នឹងចាត់វិធានការរដ្ឋបាលទៅតាមច្បាប់ បើសិននៅតែបំពានជាលើកទីពីរ។ នេះបើតាមខ្លឹមសារនៃសេចក្ដីណែនាំរបស់ ឯកឧត្ដម ឃួង ស្រេង អភិបាលរាជធានីភ្នំពេញ ដែលបានចុះថ្ងៃទី10មេសា ឆ្នាំ2021៕

ប្រភព៖ សាលាក្រុងភ្នំពេញ
ដកស្រង់ដោយ៖ បុត្រា

April 11, 2021

បញ្ជីឈ្មោះអ្នកជំងឺCovid-19 ថ្មី ចំនួន56នាក់ ដែលក្រុមគ្រូពេទ្យពុំទាន់រកឃើញទីតាំង

រដ្ឋបាលរាជធានីភ្នំពេញ កាលពីយប់ថ្ងៃទី10 ខែមេសា ឆ្នាំ2021 បានចេញផ្សាយបញ្ជីឈ្មោះមួយដែលបង្ហាញអំពីអត្តសញ្ញាណអ្នកជំងឺCovid-19 ថ្មីចំនួន56នាក់ ដែលក្រុមគ្រូពេទ្យពុំទាន់រកឃើញទីកន្លែងស្នាក់នៅរបស់ពួកគេនៅឡើយ។

ការបង្ហាញអត្តសញ្ញាណនេះ ត្រូវបានរដ្ឋបាលរាជធានីភ្នំពេញ អះអាងថា គឺដើម្បីផ្តល់ជាព័ត៌មានដល់អ្នកដែលពាក់ព័ន្ធផ្ទាល់ ឬប្រយោល អាចទៅធ្វើតេស្តរកវីរុសCovid-19 និងធ្វើចត្តាឡីស័កទាន់ពេលវេលា។ ប្រការនេះក៏ដើម្បីបង្ការការចម្លងវីរុសដល់អ្នកដទៃដោយអចេតនា និងចៀសវាងបញ្ហាសុខភាពផ្ទាល់ខ្លួនធ្ងន់ធ្ងរដែលអាចបាត់បង់ជីវិត។

ព័ត៌មានលម្អិតអំពីអត្តសញ្ញាណរបស់អ្នកជំងឺថ្មីទាំង56នាក់នេះ សូមបន្តអានបញ្ជីឈ្មោះខាងក្រោម៖

ប្រភព៖ រដ្ឋបាលរាជធានីភ្នំពេញ
ដកស្រង់ដោយ៖ បុត្រា

April 11, 2021

ខ្លឹមសារសំខាន់មួយចំនួននៃការថ្លែងសារពិសេសរបស់ប្រមុខរដ្ឋាភិបាល ដែលថ្លែងនាព្រឹកថ្ងៃទី10មេសានេះ

នាព្រឹកថ្ងៃទី10 ខែមេសា ឆ្នាំ2021នេះ ពីភូមិគ្រឹះក្នុងក្រុងតាខ្មៅ ខេត្តកណ្តាល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញថ្លែងសារពិសេស ពាក់ព័ន្ធនឹងស្ថានភាពជំងឺCovid-19 នៅកម្ពុជា។

នៅក្នុងការថ្លែងសារពិសេសនេះ ប្រមុខរដ្ឋាភិបាលកម្ពុជា បានមានប្រសាសន៍អំពីចំណុចសំខាន់មួយចំនួន មានដូចខាងក្រោម៖

*អ្នកដើរលេងទាំងឡាយណាដែលធ្វើដំណើរដោយរំលោភលើបទបញ្ជាបំរាមគោចរ យានជំនិះរបស់ពួកគេនឹងត្រូវបានឃាត់ទុករយៈពេល14ថ្ងៃ និងអនុញ្ញាតឱ្យត្រលប់ទៅធ្វើចត្តាឡីស័កនៅឯផ្ទះ។ នៅពេលបានធ្វើចត្តាឡីស័កគ្រប់14ថ្ងៃ អ្នកដែលបានរំលោភលើបំរាមគោចរ អាចទៅយកយានជំនិះវិញបាន។

*សម្ដេចតេជោ បានបញ្ជាក់ថា ពលរដ្ឋដែលស្ថិតក្នុងតំបន់ត្រូវធ្វើចត្តាឡីស័ក ដោយការបិទខ្ទប់ នឹងមិនត្រូវបានទុកចោលនោះឡើយ ពោលគឺនឹងទទួលបានជំនួយសមស្រប៖ ពលរដ្ឋទាំងឡាយដែលស្ថិតក្នុងតំបន់កំពុងធ្វើចត្តាឡីស័ក នឹងទទួលបានប្រាក់ឧបត្ថម្ភជាកញ្ចប់ ចំនួន300,000រៀល។ សម្រាប់តំបន់ដែលត្រូវធ្វើចត្តាឡីស័ក នឹងទទួលបានកញ្ចប់ថវិកាជំនួយសរុប ចំនួន 5000,000,000រៀល។ ចំណែកគ្រួសារដែលត្រូវធ្វើចត្តាឡីស័ក រដ្ឋនឹងលើកលែងថ្លៃទឹក និងថ្លៃភ្លើង រយៈពេល2ខែពេញ។

*នៅក្នុងការថ្លែងសារនេះដែរ ប្រមុខរដ្ឋាភិបាលក៏បានផ្ដល់អនុសាសន៍ដល់ថ្នាក់ដឹកនាំខេត្ត និងស្ថាប័នពាក់ព័ន្ធ ចាត់វិធានការលើបញ្ហាមួយចំនួនដើម្បីទប់កាត់ និងកាត់ផ្ដាច់ការឆ្លងរាលដាលពីតំបន់មួយទៅតំបន់មួយ និងពីខេត្តមួយទៅខេត្តមួយ ដោយការបិទខ្ទប់ ឬដាក់បំរាមគោចរ។ សម្ដេច បញ្ជាក់ថា ពលរដ្ឋក្នុងតំបន់ ឬភូមិដែលត្រូវបិទខ្ទប់ដើម្បីធ្វើចត្តាឡីស័ក អាចចេញ-ចូលតំបន់នោះបាន ប៉ុន្តែត្រូវមានមូលហេតុសមស្រប ក្នុងនោះមានដូចជា ការទៅកាន់មន្ទីរពេទ្យជាដើម។

*កម្មវិធីជួបជុំ មានដូចជា ពិធីមង្គលការ ពិធីជប់លៀង ឬពិធីបុណ្យជាដើម ក៏ត្រូវហាមឃាត់ជាបណ្ដោះអាសន្នផងដែរ។

*សម្ដេច ក៏បានរំលឹកឱ្យគោរពវិធានបង្ការវីរុសCovid-19៖ «3ការពារ (ពាក់ម៉ាស, លាងដៃ, រក្សាគម្លាតសុវត្ថិភាពសង្គម/បុគ្គល)» និង «3កុំ (កុំទៅកន្លែងបិទជិត គ្មានខ្យល់ចេញចូល, កុំទៅកន្លែងមានមនុស្សច្រើន, កុំប៉ះពាល់គ្នា)»៕

ប្រភព៖ ទទក
ដកស្រង់ដោយ៖ បុត្រា

April 10, 2021

អ្នកជំងឺCovid-19 ដំបូងគេដែលត្រូវបានវះកាត់ប្ដូរសួតពីស្វាមី និងកូន

ជប៉ុន៖ ស្ត្រីម្នាក់នៅតំបន់ Kansai ដែលទើបត្រូវបានវះកាត់ដាក់សួតរបស់ស្វាមី និងកូនប្រុស បានក្លាយជាអ្នកជំងឺCovid-19 ដំបូងគេក្នុងពិភពលោក ដែលត្រូវបានប្ដូរសួតពីអ្នកបរិច្ចាគដែលនៅរស់។

មន្ទីរពេទ្យនៃសាកលវិទ្យាល័យវេជ្ជសាស្ត្រ Kyoto កាលពីថ្ងៃទី8 ខែមេសា បានប្រកាសថា បានទទួលជោគជ័យក្នុងការវះកាត់ប្ដូរ និងភ្ជាប់សួតជូនអ្នកជំងឺCovid-19 ម្នាក់។ ការវះកាត់នេះត្រូវចំណាយពេលអស់11ម៉ោង និងមានការចូលរួមពីវេជ្ជបណ្ឌិត និងក្រុមគ្រូពេទ្យរហូតដល់ 30នាក់។

ការវះកាត់ខាងលើ ត្រូវបានធ្វើឡើងកាលពីថ្ងៃទី7មេសា ហើយអ្នកជំងឺនេះត្រូវបានវះកាត់ភ្ជាប់សួតដែលបានមកពីស្វាមី និងកូនប្រុសរបស់គាត់។ មន្ទីរពេទ្យខាងលើបានអះអាងថា នេះគឺជាអ្នកជំងឺCovid-19 ដំបូងគេក្នុងពិភពលោកដែលត្រូវបានប្ដូរសួតពីមនុស្សនៅរស់។

វេជ្ជបណ្ឌិត Hiroshi Date ដែលជាអ្នកទទួលខុសត្រូវលើការវះកាត់ បានឱ្យដឹងថា ជោគជ័យនេះបាននាំមកនូវក្ដីសង្ឃឹមសម្រាប់អ្នកជំងឺដែលរងរបួសសួតធ្ងន់ធ្ងរដោយសារ Covid-19។

ស្ត្រីអ្នកជំងឺ មិនត្រូវបានគេឱ្យដឹងអំពីអត្តសញ្ញាណនោះទេ ប៉ុន្តែ ជាពលរដ្ឋរស់នៅក្នុងតំបន់ Kansai ភាគខាងលិចប្រទេសជប៉ុន។ សួតរបស់អ្នកជំងឺនេះ ត្រូវខូចខាតយ៉ាងធ្ងន់ធ្ងរ បន្ទាប់ពីបានឆ្លងវីរុសCovid-19 កាលពីចុងឆ្នាំ2020 និងត្រូវតែវះកាត់ប្ដូរសួតដើម្បីរក្សាជីវិត។

ស្វាមី និងកូនប្រុសរបស់អ្នកជំងឺ សុទ្ធតែកំពុងស្ថិតក្នុងស្ថានភាពសុខភាពល្អបន្ទាប់ពីបានបរិច្ចាគសួត។ ភាគីខាងមន្ទីរពេទ្យឱ្យដឹងថា ស្ត្រីជាអ្នកជំងឺនេះ នឹងអាចចាកចេញពីពេទ្យ ក្រោយរយៈពេលប្រហែលពីរខែទៀត៕

ប្រភព៖ CNN
ប្រែសម្រួល៖ បុត្រា

April 9, 2021

អ្នកជំងឺCovid-19 ថ្មី រហូតដល់ 576នាក់ នៅកម្ពុជា ត្រូវបានរកឃើញកាលពីម្សិលមិញ

នាព្រឹកថ្ងៃទី 9មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 576នាក់ទៀត ក្នុងអំឡុង 24ម៉ោងនៃថ្ងៃទី 8មេសា ឆ្នាំ2021។

ក្នុងចំណោមអ្នកវិជ្ជមានថ្មីទាំង 576នាក់ខាងលើ សុទ្ធតែជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 8មេសាដដែល កម្ពុជាក៏មានអ្នកជំងឺCovid-19 ចំនួន 70នាក់ បានជាសះស្បើយ និងមិនមានអ្នកស្លាប់នោះទេ។

គិតមកដល់ព្រឹកនេះ (9មេសា) ទូទាំងប្រទេសកម្ពុជា មានអ្នកឆ្លងCovid-19 សរុបចំនួន 3,604នាក់ ក្នុងនោះមានអ្នកជាសះស្បើយសរុប 1,984នាក់, អ្នកស្លាប់ 24នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 1,591នាក់។

April 9, 2021

ពលរដ្ឋអាមេរិក ជិត20% បានចាក់វ៉ាក់សាំងបង្ការ Covid-19 រួចរាល់ហើយ

យោងតាមសារព័ត៌មានក្នុងស្រុក សហរដ្ឋអាមេរិក បច្ចុប្បន្ន បានចាក់វ៉ាក់សាំងបង្ការវីរុសCovid-19 ជូនដល់ពលរដ្ឋរបស់ខ្លួនប្រមាណ 66លាននាក់រួចហើយ ខណៈដែលអ្នកជំងឺចំនួន 573,849នាក់បានស្លាប់ដោយសារវីរុសនេះ។

គិតមកដល់ថ្ងៃទី8មេសា ពលរដ្ឋជិត20% នៅសហរដ្ឋអាមេរិក បានទទួលការចាក់វ៉ាក់សាំងបង្ការ Covid-19 រួចរាល់ ដែលនេះបាននាំមកនូវ «ខែលការពារ» ដល់មនុស្សប្រមាណ 66លាននាក់ ក្នុងចំណោមប្រជាជនសរុបជាង 331,002,600នាក់។

កម្មវិធីចាក់វ៉ាក់សាំងបង្ការ Covid-19 របស់សហរដ្ឋអាមេរិក ត្រូវបានជំរុញយ៉ាងខ្លាំងក្លា ដោយនៅក្នុងនោះ មានវ៉ាក់សាំងជិត 175លានដូស ត្រូវបានប្រើប្រាស់ចាប់តាំងពីខែធ្នូ ឆ្នាំមុន។ ពលរដ្ឋអាមេរិកាំងជាង 112លាននាក់ ពោលគឺជាង 1/3 នៃប្រជាជនសរុប បានចាក់វ៉ាក់សាំងបង្ការ Covid-19 យ៉ាងតិចចំនួន 1ដូសរួចរាល់ហើយ។ នេះបើតាមមជ្ឈមណ្ឌលគ្រប់គ្រង និងទប់ស្កាត់រោគឆ្លង (CDC) របស់សហរដ្ឋអាមេរិក។

ដោយឡែក ក្រុមមន្ត្រីនៅ New York បានឱ្យដឹងថា អាជ្ញាធរនៃរដ្ឋនេះនឹងផ្ដល់ជំនួយជាទឹកប្រាក់រហូតដល់ 15,600ដុល្លារ ដល់ពលករគ្មានលិខិតស្នាមទាំងឡាយដែលរងផលប៉ះពាល់ដោយសារ Covid-19។ កាយវិការនេះអាចនាំមកនូវផលប្រយោជន៍ដល់មនុស្សជិត 300,000នាក់ នៅក្នុងរដ្ឋ New York។

គិតមកដល់បច្ចុប្បន្ន សហរដ្ឋអាមេរិកបានរកឃើញអ្នកឆ្លងCovid-19 សរុបចំនួន 31,716,672នាក់ ក្នុងនោះមាន 573,849នាក់បានស្លាប់ និង 24,271,887នាក់បានជាសះស្បើយ ខណៈអ្នកជំងឺ 6,870,936នាក់កំពុងព្យាបាល។ ក្នុងអំឡុង24ម៉ោងកន្លងទៅ សហរដ្ឋអាមេរិក ក៏បានរកឃើញអ្នកវិជ្ជមានថ្មីចំនួន 79,429នាក់ និងអ្នកស្លាប់ថ្មីចំនួន 1,002នាក់ផងដែរ៕

ប្រភព៖ CNN, Washington Post, Worldometers
ប្រែសម្រួល៖ បុត្រា

April 9, 2021

កម្ពុជារកឃើញករណីឆ្លងCovid-19 ថ្មី 91នាក់បន្ថែមទៀត នាំឱ្យតួលេខសរុបកើនដល់ជាង 2,900នាក់

នាព្រឹកថ្ងៃទី 7មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា អ្នកជំងឺCovid-19 ថ្មី ចំនួន 91នាក់ទៀត ត្រូវបានរកឃើញក្នុងអំឡុង 24ម៉ោងនៃថ្ងៃទី 6មេសា ឆ្នាំ2021 ទន្ទឹមនឹងមានអ្នកជំងឺ 30នាក់បានជាសះស្បើយ។

ក្នុងចំណោមអ្នកវិជ្ជមានថ្មីទាំង 91នាក់ខាងលើ មាន 1នាក់ជាករណីនាំចូល និង90នាក់ជាករណីពាក់ព័ន្ធនឹងព្រឹត្តិការណ៍20កុម្ភៈ ដែលភាគច្រើនគឺជាជនជាតិខ្មែរ។ ក្នុងថ្ងៃទី 6មេសា កម្ពុជាមិនមានអ្នកជំងឺស្លាប់ដោយសារ Covid-19 នោះទេ។

គិតមកដល់ព្រឹកនេះ (7មេសា) កម្ពុជាមានអ្នកឆ្លងCovid-19 សរុបចំនួន 2,915នាក់ ក្នុងនោះមានអ្នកជាសះស្បើយសរុប 1,824នាក់, អ្នកស្លាប់ 22នាក់, អ្នកកំពុងព្យាបាលចំនួន 1,064នាក់។

April 7, 2021

WHO មិនទាន់យល់ស្របនឹងលិខិតឆ្លងដែនCovid-19 ខណៈជាង133លាននាក់បានឆ្លងCovid-19 នៅទូទាំងពិភពលោក

អង្គការសុខភាពពិភពលោក (WHO) មិនទាន់គាំទ្រការធ្វើដំណើរដោយប្រើប្រាស់លិខិតឆ្លងដែនCovid-19 ឬលិខិតឆ្លងដែនវ៉ាក់សាំងនៅឡើយ ដោយសារតែនៅមានមូលហេតុច្រើនយ៉ាង ខណៈពិភពលោករកឃើញមនុស្សជិត 133លាននាក់បានឆ្លងវីរុសCovid-19 ក្នុងនោះមានអ្នកជំងឺជិត 2.9លាននាក់បានស្លាប់។

Margaret Harris អ្នកនាំពាក្យរបស់អង្គការសុខភាពពិភពលោក (WHO) កាលពីថ្ងៃទី 6មេសា បានឱ្យដឹងថា នៅក្នុងកាលៈទេសៈបច្ចុប្បន្ន WHO «មិនចង់ឃើញលិខិតឆ្លងដែនវ៉ាក់សាំង ក្លាយជាតម្រូវការចាំបាច់សម្រាប់ការធ្វើដំណើរចេញ-ចូលប្រទេសនោះទេ ព្រោះថា បច្ចុប្បន្នមិនទាន់ប្រាកដថា វ៉ាក់សាំងនឹងអាចទប់ស្កាត់ការឆ្លងរាលដាលបាននៅឡើយ»។ លោកស្រី Margaret Harris បន្ថែមថា ទន្ទឹមនឹងនោះគឺជា «ការព្រួយបារម្ភអំពីបញ្ហាសមាសភាព»។

មតិរបស់ WHO ត្រូវបានលើកឡើងក្នុងគ្រាដែល សិង្ហបុរី ក្លាយជាប្រទេសដំបូងគេដែលទទួលយកលិខិតឆ្លងដែនអេឡិចត្រូនិករបស់សមាគមដឹកជញ្ជូនតាមផ្លូវអាកាសអន្តរជាតិ (International Air Transport Association) រួមមានការទទួលស្គាល់ចំពោះការធ្វើតេស្ត និងការចាក់វ៉ាក់សាំងបង្ការCovid-19។ អ្នកដំណើរអាចចូលទឹកដីសិង្ហបុរីបាន ដោយគ្រាន់តែរាយការណ៍អំពីកម្មវិធីទូរស័ព្ទដែលមានផ្ទុកទិន្នន័យទាក់ទងនឹងCovid-19 របស់ខ្លួន ដែលមានការបញ្ជាក់ពីមន្ទីរពិសោធន៍នានាដែលគួរជាទីទុកចិត្ត។

ក្រុមហ៊ុនអាកាសចរណ៍នានាកំពុងតែសង្ឃឹមថា ប្រទេសជាច្រើននឹងទទួលស្គាល់លិខិតឆ្លងដែនអេឡិចត្រូនិកនៅលើទូរស័ព្ទឆ្លាតវៃ ដើម្បីអនុញ្ញាតឱ្យការធ្វើដំណើរត្រូវបានស្ដារឡើងវិញឆាប់រហ័ស និងចៀសវាងការបំពេញ និងត្រួតពិនិត្យបែបបទដ៏ស្មុគស្មាញ និងយឺតយ៉ាវនៅឯព្រលានយន្តហោះ។

គិតមកដល់បច្ចុប្បន្ន ពិភពលោកទាំងមូលបានរកឃើញអ្នកវិជ្ជមាននឹងCovid-19 សរុបចំនួន 133,009,551នាក់ ក្នុងនោះមាន 2,885,279នាក់បានស្លាប់, 107,255,216នាក់ជាសះស្បើយ និង 22,869,852នាក់កំពុងព្យាបាល។ ក្នុងអំឡុង 24ម៉ោងនៃថ្ងៃទី 6មេសា ពិភពលោកក៏បានរកឃើញអ្នកជំងឺCovid-19 ថ្មី ចំនួន 574,753នាក់ និងអ្នកស្លាប់ថ្មីដោយសារវីរុសនេះ ចំនួន 11,779នាក់ផងដែរ៕

ប្រភព៖ Reuters, AFP, Worldometers
ប្រែសម្រួល៖ បុត្រា

April 7, 2021

Category: សុខភាព