សុខភាព - La Reine Media

Covid-19 !! កម្ពុជា រកឃើញអ្នកឆ្លងថ្មី 938នាក់ទៀត ខណៈពិភពលោករកឃើញជាង 20,380នាក់

នាថ្ងៃទី04 ខែឧសភា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 938នាក់ និងអ្នកជាសះស្បើយចំនួន 361នាក់។

អ្នកវិជ្ជមានថ្មីទាំងអស់ សុទ្ធតែពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី03 ខែឧសភាដដែល កម្ពុជាក៏មានអ្នកជំងឺCovid-19 ចំនួន 01នាក់បានស្លាប់។

គិតមកដល់បច្ចុប្បន្ន (04 ខែឧសភា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 16,299នាក់ ក្នុងនោះមានអ្នកជាសះស្បើយសរុប 5,791នាក់, អ្នកស្លាប់សរុប 107នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 10,394នាក់។

នៅទូទាំងពិភពលោក គិតមកដល់បច្ចុប្បន្ន អ្នកវិជ្ជមាននឹង Covid-19 បានកើនឡើងដល់ 154,195,608នាក់ ក្នុងនោះមានអ្នកវិជ្ជមានថ្មីចំនួន 20,382នាក់, អ្នកស្លាប់សរុប 3,227,188នាក់, អ្នកជាសះស្បើយសរុប 132,342,830នាក់ និងកំពុងព្យាបាលសរុប 18,625,590នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

May 4, 2021

Covid-19! សហរដ្ឋអាមេរិក កំពុងប្រឈមនឹង វិបត្តិ «សល់វ៉ាក់សាំង» ក្នុងគ្រាដែលពលរដ្ឋជាង 100លាននាក់ បានចាក់រួចរាល់

ក្រុមមន្ត្រីក្រសួងសុខាភិបាលសហរដ្ឋអាមេរិក បានបែងចែកវ៉ាក់សាំងបង្ការ Covid-19 ជាច្រើនលានដូស ទៅឱ្យអាជ្ញាធរមូលដ្ឋាន ក្នុងនោះ ពលរដ្ឋជិត 105លាននាក់ បានចាក់វ៉ាក់សាំងពីរដូសរួចរាល់ហើយ។

មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងរបស់សហរដ្ឋអាមេរិក (CDC) កាលពីម្សិលមិញ (02ឧសភា) បានប្រកាសថា ប្រទេសនេះបានចាក់វ៉ាក់សាំងបង្ការវីរុសCovid-19 ដល់ពលរដ្ឋ សរុប 245,591,469នាក់ បន្ទាប់ពីបានបែងចែកវ៉ាក់សាំងចំនួន 312,509,575ដូស ទៅឱ្យអាជ្ញាធរមូលដ្ឋាន។

ក្នុងចំណោមនោះ មានពលរដ្ឋជាង 147លាននាក់ បានចាក់វ៉ាក់សាំងយ៉ាងតិចមួយដូស ចំពោះវ៉ាក់សាំងប្រភេទដែលត្រូវចាក់ពីរដូស និងជិត 104.8លាននាក់បានចាក់រួចរាល់។ បច្ចុប្បន្ន អត្រាអ្នកបានចាក់វ៉ាក់សាំងរួចរាល់នៅសហរដ្ឋអាមេរិក បានឡើងដល់ 31.5% បើធៀបនឹងប្រជាជនសរុបជាង 332,610,000នាក់។

បណ្ដាប្រភេទវ៉ាក់សាំងប្រឆាំង Covid-19 ដែលត្រូវបាន CDC របស់សហរដ្ឋអាមេរិក ជ្រើសរើសសម្រាប់ការប្រើប្រាស់ រួមមាន វ៉ាក់សាំងរបស់ក្រុមហ៊ុន Moderna និងក្រុមហ៊ុន Pfizer Inc/BioNTech ដែលត្រូវចាក់ពីរដូស រួមនឹងវ៉ាក់សាំងរបស់ក្រុមហ៊ុន Johnson & Johnson ដែលត្រូវចាក់មួយដូស។

សហរដ្ឋអាមេរិក គឺជាសម្បុកវីរុសCovid-19 ធំជាងគេក្នុងពិភពលោក ដោយមានអ្នកឆ្លងជាង 33លាននាក់ និងស្លាប់ជាង 591,000នាក់។ ក្រោយរយៈពេលនៃការឡើងកាន់តំណែងបាន 100ថ្ងៃ របស់ប្រធានាធិបតី Joe Biden សហរដ្ឋអាមេរិក ពេលនេះត្រូវប្រឈមនឹង «វិបត្តិសល់វ៉ាក់សាំង» ដោយសារតែរដ្ឋជាច្រើនប្រើប្រាស់មិនអស់ បន្ទាប់ពីបានទទួល ខណៈដែលពលរដ្ឋជាច្រើន មានការរារែកក្នុងការចាក់វ៉ាក់សាំង ព្រោះតែការទទួលបានព័ត៌មានមិនបានគ្រប់ជ្រុងជ្រោយ និងហត់នឿយផ្លូវចិត្ត ក្រោយរងគ្រោះពី «មហារោគរាតត្បាត» នេះ។

បច្ចុប្បន្ន ក្រុមមន្ត្រីសុខាភិបាល បាននាំគ្នារិះរកវិធីដោះស្រាយបញ្ហាខាងលើ ក្នុងនោះ រួមមានទាំងការបញ្ជូនក្រុមវេជ្ជបណ្ឌិត និងក្រុមមនុស្សដែលមានឥទ្ធិពល ធ្វើយុទ្ធនាការផ្សព្វផ្សាយឱ្យពលរដ្ឋបានដឹងច្បាស់អំពីផលប្រយោជន៍នៃការចាក់វ៉ាក់សាំងប្រឆាំង Covid-19 ផងដែរ៕

May 3, 2021

Covid-19 !! កម្ពុជា រកឃើញអ្នកឆ្លងថ្មី 841នាក់ទៀត ខណៈពិភពលោក រកឃើញជាង 18,000នាក់

នាថ្ងៃទី03 ខែឧសភា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 841នាក់ និងអ្នកជាសះស្បើយចំនួន 61នាក់ទៀត និងស្លាប់ចំនួន 4នាក់ នៅក្នុងអំឡុង 24ម៉ោងនៃថ្ងៃទី 02 ខែឧសភា ឆ្នាំ2021។

អ្នកវិជ្ជមានថ្មីចំនួន 841នាក់ខាងលើនេះ សុទ្ធតែពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី02 ខែឧសភាដដែល កម្ពុជាក៏មានអ្នកជំងឺCovid-19 ចំនួន 04នាក់បានស្លាប់។

គិតមកដល់បច្ចុប្បន្ន (03 ខែឧសភា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 15,361នាក់ ក្នុងនោះមានអ្នកជាសះស្បើយសរុប 5,430នាក់, អ្នកស្លាប់សរុប 106នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 9,818នាក់។

នៅទូទាំងពិភពលោក គិតមកដល់បច្ចុប្បន្ន អ្នកវិជ្ជមាននឹង Covid-19 បានកើនឡើងដល់ 153,498,053នាក់ ក្នុងនោះមានអ្នកវិជ្ជមានថ្មីចំនួន 18,048នាក់, អ្នកស្លាប់សរុប 3,216,383នាក់, អ្នកជាសះស្បើយសរុប 130,833,944នាក់ និងកំពុងព្យាបាលសរុប 18,751,089នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

May 3, 2021

ពលរដ្ឋក្នុងខណ្ឌចំនួន4 នៃរាជធានីភ្នំពេញ នឹងមិនមានបញ្ហាខ្វះវ៉ាក់សាំងCovid-19 នោះទេ!

«ប្រជាពលរដ្ឋដែលស្ថិតក្នុងខណ្ឌពោធិ៍សែនជ័យ, ខណ្ឌមានជ័យ, ខណ្ឌដង្កោ និងខណ្ឌកំបូល សូមកុំព្រួយបារម្ភពីការខ្វះវ៉ាក់សាំង Covid-19» នេះបើតាមការអំពាវនាវរបស់ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទ។

ទូរទស្សន៍ជាតិកម្ពុជា បានឱ្យដឹងថា ឯកឧត្តម ឥត សារ៉ាត់ បានបញ្ជាក់ថា ជាគោលការណ៍ ប្រជាពលរដ្ឋ កម្មករ និយោជិកទាំងអស់ ដែលមានអាយុចាប់ពី 18ឆ្នាំឡើងទៅ និងមានទីលំនៅក្នុងខណ្ឌចំនួន 4 ខាងលើ នឹងទទួលបានការចាក់វ៉ាក់សាំងបង្ការ Covid-19 គ្រប់ៗគ្នា ពីរាជរដ្ឋាភិបាល។ ក៏ប៉ុន្តែ ដើម្បីបង្ការការឆ្លងរាលដាលនៃវីរុសនេះ ពលរដ្ឋនឹងត្រូវបានអនុញ្ញាតឱ្យចាក់មួយភូមិម្ដងៗ ទៅតាមការកំណត់របស់អាជ្ញាធរមូលដ្ឋាន។

ពលរដ្ឋដែលត្រូវបានអនុញ្ញាតឱ្យទៅចាក់វ៉ាក់សាំងគឺ ត្រូវបំពេញទម្រង់ឯកសាររបស់ក្រសួងការពារជាតិ និងត្រូវមានអត្តសញ្ញាណប័ណ្ណ ឬសំបុត្រកំណើត ឬបណ្ណ ប.ស.ស។ នាយឧត្តមសេនីយ៍ ឥត សារ៉ាត់ បានអំពាវនាវឱ្យពលរដ្ឋទាំងអស់នៅក្នុងខណ្ឌពោធិ៍សែនជ័យ, ខណ្ឌមានជ័យ, ខណ្ឌដង្កោ និងខណ្ឌកំបូល សូមកុំមានការព្រួយបារម្ភអំពីបញ្ហាខ្វះវ៉ាក់សាំង ព្រោះថា រាជរដ្ឋាភិបាល បានផ្ដល់វ៉ាក់សាំងគ្រប់គ្រាន់ដល់ខណ្ឌទាំងនេះរួចហើយ។

យ៉ាងនេះក្ដី ឯកឧត្តម បានបញ្ជាក់ថា ពលរដ្ឋដែលបានចុះឈ្មោះរួចហើយ ត្រូវរង់ចាំដល់វេនរបស់ខ្លួន និងត្រូវទៅចាក់វ៉ាក់សាំងឱ្យទាន់ពេលវេលា ដែលអាជ្ញាធរបានកំណត់។

គិតមកដល់បច្ចុប្បន្ន កម្ពុជាមានអ្នកឆ្លង Covid-19 សរុបចំនួន 14,520នាក់ ក្នុងនោះមានអ្នកជាសះស្បើយសរុប 5,369នាក់, អ្នកស្លាប់សរុប 103នាក់ និងកំពុងព្យាបាលសរុប 9,040នាក់។ ក្នុងរយៈពេល 24ម៉ោងនៃថ្ងៃទី1 ខែឧសភា នៅទូទាំងប្រទេស មានអ្នកវិជ្ជមានថ្មីចំនួន 730នាក់ និងស្លាប់ថ្មីចំនួន 6នាក់៕

ប្រភព៖ ទទក, ក្រសួងសុខាភិបាល
ដកស្រង់៖ បុត្រា

May 3, 2021

ប្រយោជន៍ល្អៗ និងថ្មីៗទៀតរបស់អាល់កុលសម្លាប់មេរោគ ដែលបងៗស្ត្រីមេផ្ទះគួរដឹង

វិធីសម្អាតរបស់របរប្រើប្រាស់ក្នុងផ្ទះដោយទឹកអាល់កុលលាងរបួស។ យើងនាំគ្នាមកមើលពីប្រយោជន៍របស់អាល់កុលដែលយើងតែងតែយកមកលាងសម្អាតមុខរបួស ឬដំបៅផ្សេងលើរាងកាយនោះ ជាមួយនឹងការងារផ្ទះ ដែលបងៗស្ត្រីមេផ្ទះអាចយកទៅជូតសម្អាតរបស់របរប្រើប្រាស់ក្នុងបានយ៉ាងល្អទៀតផង។

1 . ធ្វើជាស្ប្រៃយ៍ជូតកញ្ចក់បង្អួច

បើមិនចង់មួម៉ៅដោយសារតែទេសភាពស្អាតៗនៅខាងក្រៅត្រូវបិទបាំងដោយកម្ទេចល្អងធូលី និងស្នាមបាតដៃនៅលើកញ្ចក់បង្អួចនោះ បងៗស្ត្រីមេផ្ទះអាចចាប់ផ្តើមដោយប្រើទឹកលាងសម្អាតស្នាមកខ្វក់នៅលើបង្អួចផ្នែកខាងក្រៅចេញសិន រួចលាយអាល់កុលជាមួយទឹកក្នុងបរិមាណស្មើគ្នា កូរឱ្យចូលគ្នាសព្វរួចសឹមយកទៅជូតសម្អាត។

2 . ធ្វើជាស្ប្រៃយ៍ជូតកញ្ចក់ឆ្លុះមុខ

ចង់ឱ្យកញ្ចក់ឆ្លុះមុខភ្លឺថ្លាច្បាស់ ចូរផ្សំអាល់កុល 2ស្លាបព្រាបាយ ទឹកខ្មេះ 2ស្លាបព្របាយ ម្សៅពោត(អាចរកទិញបាននៅក្នុងផ្សារទំនើបទូទៅ) 1ស្លាបព្របាយ និងទឹកស្អាត 1ពែងកន្លះ ចាក់ចូលទៅក្នុងដបស្ប្រៃយ៍ ក្រឡុកបន្តិចមុននឹងយកទៅបាញ់លើកញ្ចក់ បន្ទាប់មកប្រើក្រដាសកាសែតជូតចេញ 1 – 2 ដងរហូតទាល់តែស្នាមប្រឡាក់ផ្សេងៗទាំងនោះរលុបបាត់អស់។

3 . ជូតសម្អាតកៅអីសាឡុង

បើត្រឡប់មកផ្ទះវិញ ហើយឃើញមានស្នាមប៊ិចក្រវេមក្រវាមជាស្នាដៃរបស់កូនតូចដែលគូសវាសលេងនៅលើកៅអីសាឡុងដែលក្រាលដោយក្រណាត់ម៉ៃក្រូហ្វៃប៊ើរនោះ មិនបាច់កង្វល់ទេ ព្រោះគ្រាន់តែចាក់អាល់កុលចូលទៅក្នុងដបស្ប្រៃយ៍ ហើយយកទៅបាញ់លើស្នាមប្រឡាក់នោះឱ្យសើម ទុកចោលមួយស្របក់ រួចយកអេប៉ុងពណ៌សមកជូតប្តិតៗ តែប៉ុណ្ណឹងស្នាមទឹកប៊ិចក្រវេមក្រវាមទាំងនោះនឹងជ្រាបចូលមកក្នុងអេប៉ុងព្រមជាមួយអាល់កុលអស់ និងធ្វើឱ្យកៅអីសាឡុងស្អាតដូចដើមវិញមិនខាន។

4 . រូបមន្តដុសខាត់សម្អាតអាងលាងចានកម្ចាត់មេរោគ

អាងលាងចានពេញទៅដោយមេរោគ បន្ទាប់ពីលាងសម្អាតដោយទឹកស្អាតហើយ ចូរយកក្រណាត់ស្អាតជ្រលក់អាល់កុលជូតសម្អាតឱ្យសព្វអាងលាងចាននោះម្តងទៀត វានឹងជួយកាត់បន្ថយការប្រមូលសន្សំរបស់បណ្តាមេរោគទាំងឡាយ ដើម្បីសុខភាពអនាម័យរបស់សមាជិកទាំងអស់ក្នុងគ្រួសារ។

5 . ធ្វើជាស្ប្រែយ៍កម្ចាត់ក្លិនក្នុងស្បែកជើង

ការបំបាត់ក្លិនស្បែកជើងក៏មិនពិបាកដែរ គ្រាន់តែចាក់អាល់កុលដាក់ចូលដបស្ប្រៃយ៍តូចមួយប្រមាណជាកន្លះដប តាមដោយទឹកស្អាតបន្តិច និងប្រេងក្រអូបហើរក្លិនដែលបងៗស្ត្រីមេផ្ទះចូលចិត្តប្រមាណជា 10 ដំណក់ ក្រឡុកឱ្យចូលគ្នា ហើយដាក់តាមខ្លួនទុកបាញ់ដាក់ក្នុងស្បែកជើងពេលណាដែលវាមានក្លិនមិនល្អ តែប៉ុណ្ណឹងជាការស្រេច។

6 . ធ្វើជាស្ប្រៃយ៍បាញ់បំបាត់ក្លិនបង្គន់

បើមិនចង់ត្រូវរំខានដោយក្លិនស្អុយពីចានបង្គន់នោះ ចូរលាយអាល់កុល 1ស្លាបព្រាបាយ ទឹកប្រេងក្រអូបហើរក្លិនដែលចូលចិត្តប្រមាណជា 30 – 40ដំណក់ និងទឹកស្អាត ហើយចាក់ចូលដបស្ប្រៃយ៍ និងមុននឹងនាំយកទៅប្រើ ចូរក្រឡុកដបជាមុនសិន រួចសឹមបាញ់ចូលទៅក្នុងចានបង្គន់ក្រោយពេលបន្ទោបង់រួច និងចុចទឹកបង្ហូរចោល 1- 2ដង។

7 . ទឹកថ្នាំសម្លាប់មេរោគលើច្រាសដុសធ្មេញ

ច្រាសដុសធ្មេញដែលដាក់ចូលមាត់យើងរាល់ថ្ងៃពោរពេញទៅដោយមេរោគដ៏ច្រើន តែយើងអាចកម្ចាត់វាបានដោយរំលាយម្សៅបេកឃីងសូដា(មានលក់នៅតាមផ្សារទំនើប) 2ស្លាបព្រាកាហ្វេ ទឹកស្អាតកន្លះពែង អាល់កុល 1 ស្លាបព្រាកាហ្វេ និងប្រេងក្រអូបហើរក្លិន 1 – 2 ដណក់លាយបញ្ចូលគ្នា រួចយកច្រាសដុសធ្មេញមកដាក់ត្រាំក្នុងទឹកល្បាយនោះចោលមួយសន្ទុះ ហើយលាងសម្អាតចេញឱ្យស្អាត តែប៉ុណ្ណឹងមេរោគចង្រៃទាំងឡាយនឹងស្លាប់បាត់អស់មួយចំនួនធំមិនខាន៕

ដោយ អ្នកគ្រូ ឆវី

May 1, 2021

ឥណ្ឌាវិបត្តិកាន់តែធ្ងន់! បងប្អូនអ្នកជំងឺកូវីដ រោមវាយគ្រូពេទ្យ មូលហេតុអ្នកជំងឺស្លាប់ពេលកំពុងរង់ចាំការព្យាបាល

ទីភ្នាក់ងារព័ត៌មាន abplive បានរាយការណ៍ថា មានស្ត្រីឆ្លងមេរោគកូវីដ វ័យ 62ឆ្នាំម្នាក់ បានចូលព្យាបាលនៅឯមន្ទីរពេទ្យ ប៉ូលឡូ ក្នុងទីក្រុងសារិតាហារ ក៏ប៉ុន្តែ គាត់បែរជាដាច់ខ្យល់ស្លាប់ មុនទៅដល់ដៃគ្រូពេទ្យ ជាហេតុបណ្ដាលឱ្យក្រុមសាច់ញាតិអ្នកជំងឺ បាននាំគ្នាចោមរោមវាយក្រុមគ្រូពេទ្យ និងភ្នាក់ងារសន្តិសុខ ដោយក្ដីខឹងសម្បា និងសម្ដែងការមិនពេញចិត្តយ៉ាងខ្លាំង បន្ទាប់ពីសាច់ញាត់របស់ពួកគេ បានស្លាប់ក្នុងអំឡុងការរង់ចាំការព្យាបាល។

«អ្នកជំងឺ ត្រូវបាននាំមកព្យាបាល និងមានភាពចាំបាច់ក្នុងការត្រូវប្រើបន្ទប់សង្គ្រោះបន្ទាន់ តែស្ថានការណ៍នៅពេលនោះ ហាក់ដូចជាយ៉ាប់យ៉ឺនខ្លាំងណាស់ យើងមិនមានគ្រែគ្រប់គ្រាន់ សម្រាប់អ្នកជំងឺ តែយើង បានធ្វើការព្យាបាលដំណាក់កាលដំបូង និងដាក់ខ្យល់អុកស៊ីហ្ស៊ែនឱ្យអ្នកជំងឺហើយ តែមិនយូរប៉ុន្មាន អ្នកជំងឺក៏ស្លាប់ ហើយសាច់ញាតិរបស់អ្នកស្លាប់ ក៏ចោមរោមវាយមន្ត្រីរបស់យើងភ្លាមតែម្ដង» អ្នកនាំពាក្យរបស់មន្ទីរពេទ្យប៉ូលឡូ បានថែ្លងបែបនេះ។

ប្រព័ន្ធសុខភាពសាធារណៈរបស់ប្រទេសឥណ្ឌា បានចូលដល់ដំណាក់កាលវិបត្តិធ្ងន់ តាំងពីមានការឆ្លងរាតត្បាតរលកទី2 ក្នុងអំឡុងខែកន្លងមក ដោយសារតែមេរោគវីរុសពូជឥណ្ឌា ឬ B.1.617 អាចចម្លងបានងាយជាមុន និងឆាប់រហ័សទៀតផង។

មន្ទីរពេទ្យជាច្រើនកន្លែងក្នុងប្រទេសឥណ្ឌា នៅតែជួបបញ្ហាខ្វះខាតខ្យល់អុកស៊ីហ្ស៊ែនយ៉ាងធ្ងន់ធ្ងរដដែល ធ្វើឱ្យអុកស៊ីហ្ស៊ែន មានតម្លៃកាន់តែខ្ពស់ឡើងទ្វេដងនៅក្នុងទីផ្សារងងឹត។ ក្នុងរបាយការណ៍ ចំនួនអ្នកឆ្លងមេរោគថ្មី បានកើនឡើងជាង 3សែននាក់ក្នុង 1ថ្ងៃ ជាប់ៗគ្នាច្រើនថ្ងៃមកហើយ និងមានចំនួនអ្នកស្លាប់សរុបច្រើនជាង 3,200នាក់ ក្នុង 1ថ្ងៃ៕

ប្រភព៖ news.abplive
ប្រែសម្រួលដោយ តាវ៉ែនតា

May 1, 2021

ក្រសួងសុខាភិបាល៖ អ្នកស្ម័គ្រចិត្ដចាក់វ៉ាក់សាំងបង្ការ Covid-19 ជាង 64,000នាក់ ត្រូវបានបដិសេធ ព្រោះបញ្ហាសុខភាព

នាព្រឹកថ្ងៃទី1 ខែឧសភា ឆ្នាំ2021នេះ ក្រសួងសុខាភិបាលកម្ពុជា បានប្រកាសឱ្យដឹងថា ពលរដ្ឋជាង 64,000នាក់ ក្នុងចំណោមអ្នកស្ម័គ្រចិត្តជាង 1,105,600នាក់ ត្រូវបានក្រុមគ្រូពេទ្យ មិនអនុញ្ញាតឱ្យទទួលការចាក់វ៉ាក់សាំងបង្ការវីរុសCovid-19 គិតត្រឹមថ្ងៃទី30 ខែមេសា ឆ្នាំ2021។

រាប់ចាប់ពីថ្ងៃទី10 ខែកុម្ភៈ ឆ្នាំ2021 ដល់ថ្ងៃទី30 ខែមេសា ឆ្នាំ2021 កម្ពុជា មានអ្នកស្ម័គ្រចិត្តមកចាក់វ៉ាក់សាំងសរុបចំនួន 1,105,633នាក់ ក្នុងនោះមានស្ត្រីចំនួន 493,663នាក់។

អ្នកស្ម័គ្រចិត្ត ដែលបានចាក់វ៉ាក់សាំងលើកទីមួយរួច មានចំនួន 1,045,023នាក់ ក្នុងនោះមាន 463,647នាក់ជាស្ត្រី។ ចំណែកអ្នកដែលបានចាក់វ៉ាក់សាំងលើកទីពីររួច មានចំនួន 694,334នាក់ ក្នុងនោះមានស្ត្រីចំនួន 280,170នាក់។ រីឯអ្នកដែលត្រូវបានក្រុមគ្រូពេទ្យបដិសេធការចាក់វ៉ាក់សាំង ព្រោះតែបញ្ហាសុខភាព មានចំនួន 64,441នាក់ ក្នុងនោះមានស្ត្រីចំនួន 34,056នាក់។

គិតមកដល់ថ្ងៃទី30 ខែមេសា ឆ្នាំ2021 នៅទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 13,402នាក់ ក្នុងនោះមានអ្នកជាសះស្បើយសរុប 5,152នាក់, អ្នកស្លាប់សរុប 93នាក់ និងអ្នកជំងឺកំពុងព្យាបាលនៅមន្ទីរពេទ្យ មានចំនួន 8,150នាក់៕

ប្រភព៖ ក្រសួងសុខាភិបាល
ដកស្រង់៖ បុត្រា

May 1, 2021

WHO សម្រេចឱ្យ Moderna ក្លាយជាវ៉ាក់សាំងបង្ការ Covid-19 ដែលត្រូវប្រើប្រាស់បន្ទាន់! អាមេរិក និងអឺរ៉ុប ជាអ្នកបញ្ជាទិញច្រើនជាងគេ

កាលពីថ្ងៃទី30 ខែមេសា (ម៉ោងនៅអឺរ៉ុប) អង្គការសុខភាពពិភពលោក (WHO) បានបញ្ចូលឈ្មោះ Moderna ទៅក្នុងបញ្ជីវ៉ាក់សាំងដែលត្រូវប្រើប្រាស់បន្ទាន់ ដើម្បីទប់ស្កាត់ Covid-19 ក្នុងគ្រាដែលប្រទេសជាច្រើនក្នុងពិភពលោក កំពុងរងការវាយលុកពីវីរុសនេះយ៉ាងធ្ងន់ធ្ងរ។

យោងតាមសារព័ត៌មាន Reuters អង្គការសុខភាពពិភពលោក បានអនុម័តឱ្យប្រើប្រាស់បន្ទាន់នូវវ៉ាក់សាំង Moderna របស់សហរដ្ឋអាមេរិក ដែលអភិវឌ្ឍដោយក្រុមហ៊ុន Moderna. Inc ដើម្បីប្រយុទ្ធប្រឆាំងនឹងវីរុសCovid-19 បន្ទាប់ពីបានវាយតម្លៃអំពីសុវត្ថិភាព និងប្រសិទ្ធភាព។

ក្រោយសេចក្ដីសម្រេចខាងលើ វ៉ាក់សាំងបង្ការវីរុសCovid-19 ឈ្មោះ Moderna នេះ បានក្លាយជាវ៉ាក់សាំងទី5 ដែលត្រូវបាន WHO អនុម័ត និងលើកទឹកចិត្តឱ្យប្រើប្រាស់ ដើម្បីចាក់ជូនពលរដ្ឋ។

ការអនុម័តនេះរបស់ WHO ក៏ជួយឱ្យបណ្ដាប្រទេសដែលមិនអាចផលិតវ៉ាក់សាំងបង្ការ Covid-19 ដោយខ្លួនឯង មានជម្រើសបន្ថែម នៅក្នុងការបញ្ជាទិញ។ Moderna ក៏នឹងត្រូវបានផ្គត់ផ្គង់ដល់ប្រទេសក្រីក្រ តាមរយៈ COVAX ដែលជាកម្មវិធីបែងចែកវ៉ាក់សាំងប្រកបដោយសមភាពជាសកល នៃអង្គការសុខភាពពិភពលោក។

វ៉ាក់សាំង Moderna ដែលត្រូវបានអភិវឌ្ឍដោយប្រើបច្ចេកវិទ្យា mNRA ត្រូវបានស្ថាប័នជំនាញ SAGE វាយតម្លៃថា មានប្រសិទ្ធភាព 94.1% បន្ទាប់ពីដំណើរការតាមដានអស់រយៈពេលប្រហែល 2ខែ។

យោងតាមទ្រឹស្ដី វ៉ាក់សាំង Moderna ត្រូវបានរក្សាទុកជាទម្រង់កក ច្រើនដូស នៅក្នុងដបតូចៗ ជាមួយនឹងសីតុណ្ហភាពចាប់ពី 25 ដល់ 15អង្សាសេ តែក៏អាចរក្សាទុកក្នុងទូទឹកកក រយៈពេល 30ថ្ងៃ ក្នុងសីតុណ្ហភាពចាប់ពី 2 ដល់ 8អង្សា។

កាលពីថ្ងៃទី19 ខែធ្នូ ឆ្នាំ2020 វ៉ាក់សាំង Moderna ត្រូវបានសហរដ្ឋអាមេរិក អនុញ្ញាតឱ្យប្រើប្រាស់បន្ទាន់ ដើម្បីទប់ទល់នឹងវីរុសCovid-19។ ជាមួយនឹងការសម្រេចនេះ វ៉ាក់សាំង Moderna ប្រមាណជា 6លានដូស នឹងត្រូវបានដឹកទៅកាន់មូលដ្ឋាននានារបស់សហរដ្ឋអាមេរិក ដើម្បីចាក់ជូនពលរដ្ឋ។

នៅសហរដ្ឋអាមេរិក រដ្ឋាភិបាល បានយល់ព្រមទិញវ៉ាក់សាំង Moderna តម្លៃ 15ដុល្លារ/ដូស ដើម្បីទទួលបានសិទ្ធិបញ្ជាទិញ 100លានដូស ដោយមិនមានឧបសគ្គ។

ចំណែកគណៈកម្មអឺរ៉ុប (EC) ក៏បានបញ្ជាទិញវ៉ាក់សាំងនេះ ចំនួន 80លានដូសបន្ថែមទៀត ដូច្នេះ ជាសរុប គិតមកដល់បច្ចុប្បន្ន EC បានបញ្ជាទិញវ៉ាក់សាំង Moderna នេះ ចំនួន 160លានដូស។ រីឯប្រទេសអង់គ្លេសវិញ ក៏បានបញ្ជាទិញវ៉ាក់សាំង Moderna ចំនួន 10លានដូសបន្ថែមទៀតដែរ ខណៈដែលប្រទេសបារាំង ក៏បាន «បើកភ្លើងខៀវ» ឱ្យ Moderna កាលពីពេលថ្មីៗនេះ៕

ប្រភព៖ Reuters
ប្រែសម្រួល៖ បុត្រា

May 1, 2021

Covid-19 !! កម្ពុជា ទើបតែរកឃើញអ្នកវិជ្ជមានថ្មី 761នាក់ ខណៈពិភពលោករកឃើញ 93,328នាក់ ក្នុងថ្ងៃទី29 ខែមេសា

នាថ្ងៃទី 30មេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 761នាក់ និងអ្នកជាសះស្បើយចំនួន 166នាក់ទៀត ក្នុងអំឡុង 24ម៉ោងនៃថ្ងៃទី 29 ខែមេសា ឆ្នាំ2021។

អ្នកវិជ្ជមានថ្មីចំនួន 761នាក់ខាងលើនេះ មាន 1នាក់ជាករណីធ្វើដំណើរពីបរទេស និងឆ្លងបន្តក្នុងស្រុក និង 760នាក់ ជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 29 ខែមេសាដដែល កម្ពុជាក៏មានអ្នកជំងឺCovid-19 ចំនួន 2នាក់បានស្លាប់។

គិតមកដល់បច្ចុប្បន្ន (30 ខែមេសា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 13,402នាក់ ក្នុងនោះមានអ្នកជាសះស្បើយសរុប 5,152នាក់, អ្នកស្លាប់សរុប 93នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 8,150នាក់។

នៅទូទាំងពិភពលោក គិតមកដល់បច្ចុប្បន្ន អ្នកវិជ្ជមាននឹង Covid-19 បានកើនឡើងដល់ 151,213,669នាក់ ក្នុងនោះមានអ្នកស្លាប់សរុប 3,181,737នាក់, អ្នកជាសះស្បើយ 128,630,152នាក់ និងកំពុងព្យាបាល 19,401,780នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

April 30, 2021

ញ៉ាំចេកហើយ កុំចោលសម្បក ព្រោះវាមានប្រយោជន៍ច្រើនណាស់!

យើងគ្រប់គ្នាដឹងច្បាស់ណាស់ អំពីគុណប្រយោជន៍ ដែលមានចំពោះសុខភាពរបស់ផ្លែចេកទុំ សម្បករបស់វា នៅមានសារធាតុអាហារ ដែលសំខាន់ច្រើនណាស់។ មានមនុស្សដ៏ច្រើននៅក្នុងប្រទេសខ្លះ ដូចជា មនុស្សនៅក្នុងប្រទេសឥណ្ឌា ជាដើម បានប្រើប្រាស់ប្រយោជន៍អំពីសម្បកចេកទុំនេះមកជាយូរយារច្រើនទសវត្សរ៍មកហើយ ដូច្នេះ អ្វីដែលយើងត្រូវធ្វើនោះគឺ ញែកយកសម្បកខាងក្រៅរបស់វាចេញ ដោយយកស្លាបព្រាកោស ដែលវានឹងធ្វើឱ្យយើងអាចប្រើប្រាស់ប្រយោជន៍អំពីវត្ថុនេះបានយ៉ាងពេញទំហឹង។

សម្បកចេកជួយសម្រាលអាការចុកចាប់បានល្អ

ដោយការយកសម្បកចេកទុំ ទៅត្រដុសនៅលើរាងកាយ ត្រង់កន្លែងដែលយើងមានអារម្មណ៍ថា ឈឺចុករួយ ដើម្បីសម្រាលអាការទាំងនោះ។

ស្នាមមុន និងសន្លាកស្នាម

ចេក គឺជាផ្លែឈើដ៏អស្ចារ្យមួយប្រភេទ ដែលអាចផ្តល់សំណើម ភាពស្រស់បស់ និងថែបំប៉នស្បែកបានយ៉ាងល្អ ដោយសារតែនៅក្នុងសម្បកចេក មានសារធាតុប្រឆាំងរ៉ាឌីកាល់សេរី ចំនួនដ៏ច្រើន ដែលវាមានគុណសម្បត្តិក្នុងការប្រឆាំងនឹងការកើតស្លាកស្នាម និងមុន។ យើងអាចធ្វើបានដោយការយកសម្បកផ្លែចេក មកលាបលើបរិវេណដែលកើតមានស្លាកស្នាមទាំងនោះ និងទុកចោលប្រមាណជាកន្លះម៉ោង មុននឹងលាងសម្អាតដោយទឹកស្អាត។

ព្យាបាលរោគភ្លឺ នៅលើស្បែក និងធ្វើឱ្យធ្មេញស

សម្បករបស់ផ្លែចេក នៅអាចព្យាបាលរោគភ្លឺនៅលើស្បែកបាន និងថែមទាំងយកមកដុសលើធ្មេញ ធ្វើឱ្យធ្មេញសឡើងបានទៀតផង ដោយគ្រាន់តែអ្នកយកសម្បកផ្លែចេក មកដុសនៅលើស្បែកត្រង់កន្លែងដែលមានកើតរោគភ្លឺ និងដុសនៅលើធ្មេញរយៈពេល 15ថ្ងៃជាប់ៗគ្នា វានឹងធ្វើឱ្យស្បែកលោកអ្នកប្រក្រតីឡើងវិញ និងធ្មេញរបស់អ្នកសស្អាតឡើងបាន។

កម្ចាត់រោគឫសនៅលើស្បែក

សម្បកចេកទុំ នៅអាចជួយកំចាត់រោគឫស ដែលកើតនៅលើស្បែករបស់អ្នកបាន និងថែមទាំងអាចការពារមិនឱ្យវាកើតឡើងបានទៀតផង៕

April 30, 2021

Category: សុខភាព