សុខភាព - La Reine Media

អាមេរិកគាំទ្រដល់ការលុបបំបាត់ «កម្មសិទ្ធិបញ្ញាសម្រាប់វ៉ាក់សាំង COVID-19»

រដ្ឋបាលរបស់លោក Joe Biden គាំទ្រដល់ការដកការគាំពារចំពោះកម្មសិទ្ធិបញ្ញាទាក់ទិននឹងវ៉ាក់សាំងបង្ការវីរុសCovid-19 ដែលនេះនាំមកនូវក្ដីសង្ឃឹមថ្មីដល់បណ្ដាប្រទេសក្រីក្រដែលកំពុងមានការលំបាកក្នុងការបញ្ជាទិញវ៉ាក់សាំងនេះ។

ប្រទេសឥណ្ឌា ជាទីដែល Covid-19 កំពុងរាតត្បាតខ្លាំង បាននាំមុខក្នុងការតស៊ូមតិនៅឯអង្គការពាណិជ្ជកម្មពិភពលោក (WTO) ដើម្បីអនុញ្ញាតឱ្យក្រុមហ៊ុនផលិតឱសថជាច្រើនផ្សេងទៀត អាចផលិតវ៉ាក់សាំងបង្ការវីរុសCovid-19 បានច្រើនជាងមុន ប៉ុន្តែមតិនេះត្រូវបានជំទាស់ដោយបណ្ដាក្រុមហ៊ុនផលិតឱសថធំ។

លោកស្រី Katherine Tai អ្នកតំណាងពាណិជ្ជកម្មរបស់សហរដ្ឋអាមេរិក កាលពីថ្ងៃទី5 ខែឧសភា ឆ្នាំ2021 បានប្រកាសថា បើទោះជាសិទ្ធិគ្រប់គ្រងកម្មសិទ្ធិបញ្ញាគឺជារឿងសំខាន់សម្រាប់ក្រុមហ៊ុននានា ប៉ុន្តែ ទីក្រុងវ៉ាស៊ីងតោន «គាំទ្រដល់ការដកវិធានការការពារកម្មសិទ្ធិបញ្ញា សម្រាប់វ៉ាក់សាំងCovid-19» ដើម្បីលុបបំបាត់មហារោគរាតត្បាតនេះ។

លោកស្រី Katherine Tai ថ្លែងថា៖ «នេះគឺជាវិបត្តិសុខាភិបាលសកល ហើយភាពមិនធម្មតារបស់ Covid-19 ទាមទារឱ្យមានវិធានការពិសេស»។ ការលើកឡើងនេះ កើតមានបន្ទាប់ពីលោកស្រី Katherine Tai បានជួបពិភាក្សាលើបញ្ហានេះជាមួយមេដឹកនាំរបស់ក្រុមហ៊ុនផលិតវ៉ាក់សាំងធំៗទាំងអស់របស់សហរដ្ឋអាមេរិក រួមមាន ក្រុមហ៊ុន Pfizer, Moderna និង Johnson & Johnson។

ប្រធានាធិបតី Joe Biden កំពុងទទួលរងសម្ពាធយ៉ាងធ្ងន់ នៅពេលភាគីជាច្រើន បាន និងកំពុងជំរុញឱ្យបោះបង់វិធានការការពារចំពោះក្រុមហ៊ុនផលិតវ៉ាក់សាំង ពិសេសគឺនៅក្នុងគ្រាដែលសហរដ្ឋអាមេរិក ត្រូវបានគេរិះគន់ថា រក្សាទុកវ៉ាក់សាំងCovid-19 ច្រើនហួសហេតុ ខណៈដែលបណ្ដាប្រទេសក្រីក្រ កំពុងជួបបញ្ហាអាសន្នធំ។

លោក Tedros Adhanom Ghebreyesus ប្រធានអង្គការសុខភាពពិភពលោក (WHO) បានហៅការសម្រេចរបស់សហរដ្ឋអាមេរិកថាជា «ប្រវត្តិសាស្ត្រ» និងជារបត់ថ្មីដ៏ធំសម្បើម នៅក្នុងការប្រយុទ្ធប្រឆាំងវីរុសCovid-19»។ ប៉ុន្តែ លោកស្រី Katherine Tai បានព្រមានថា ការចរចា «នឹងត្រូវចំណាយពេលយូរ ដោយសារតែ WTO ចេញសេចក្ដីសម្រេចដោយយោងទៅតាមការព្រមព្រៀង»។

ពិភពលោក បច្ចុប្បន្ន មានអ្នកជំងឺCovid-19 ជាង 3.2លាននាក់បានស្លាប់ ប៉ុន្តែ ប្រទេសអ្នកមានជាច្រើន បានទទួលជោគជ័យមួយចំនួនធំនៅក្នុងការទប់ស្កាត់វីរុសCovid-19 ដោយសារយុទ្ធនាការចាក់វ៉ាក់សាំង។ គិតមកដល់បច្ចុប្បន្ន ពិភពលោកបានចាក់វ៉ាក់សាំងជាង 1.2ពាន់លានដូស ប៉ុន្តែ ការចាក់វ៉ាក់សាំងនៅក្នុងបណ្ដាប្រទេសក្រីក្របំផុត មានមិនដល់ 1% នៅឡើយ។

សហរដ្ឋអាមេរិក មិនខ្វះវ៉ាក់សាំងដូចឥណ្ឌា និងបណ្ដាប្រទេសដទៃទៀតនោះទេ។ ពួកគេនឹងទទួលបានវ៉ាក់សាំងចំនួន 300លានដូសបន្ថែមទៀតនាពេលដ៏ខ្លីខាងមុខ ដែលតួលេខនៃវ៉ាក់សាំងនេះ ប្រហាក់ប្រហែលនឹងចំនួនប្រជាជនសរុបរបស់ប្រទេសនេះ។

ចំណែកនៅប្រទេសឥណ្ឌាវិញ បញ្ហាខ្វះវ៉ាក់សាំង កំពុងតែរារាំងកិច្ចប្រឹងប្រែងក្នុងការចាក់វ៉ាក់សាំងរបស់ប្រទេសនេះ។ កាលពីសប្ដាហ៍មុន រដ្ឋាភិបាលឥណ្ឌា បានប្រកាសអនុញ្ញាតឱ្យចាក់វ៉ាក់សាំងដល់ពលរដ្ឋដែលមានអាយុចាប់ពី 18ឆ្នាំឡើងទៅ ប៉ុន្តែ មានរដ្ឋចំនួន12 ប៉ុណ្ណោះ នៅក្នុងចំណោមរដ្ឋ និងដែនដីទាំង 36របស់ឥណ្ឌា មានវ៉ាក់សាំងគ្រប់គ្រាន់ដើម្បីចាក់៕

ប្រភព៖ AFP
ប្រែសម្រួល៖ បុត្រា

May 6, 2021

រដ្ឋបាលរាជធានីភ្នំពេញ ជូនដំណឹងស្ដីពី «លិខិតអនុញ្ញាតធ្វើដំណើរឆ្លងកាត់ «តំបន់ក្រហម» និង «តំបន់លឿងទុំ»

«លិខិតអនុញ្ញាតធ្វើដំណើរឆ្លងកាត់តំបន់ក្រហម និងលឿងទុំ បានអស់សុពលភាពចាប់ពីថ្ងៃទី6 ខែឧសភា ឆ្នាំ2021» នេះបើតាមសេចក្ដីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី5 ខែឧសភា ឆ្នាំ2021។

រដ្ឋបាលរាជធានីភ្នំពេញ បានបញ្ជាក់ថា ម្ចាស់ក្រុមហ៊ុនដែលត្រូវការចាំបាច់នូវលិខិតធ្វើដំណើរឆ្លងកាត់ «តំបន់ក្រហម» និង «តំបន់លឿងទុំ» អាចដាក់ពាក្យស្នើសុំ នៅរដ្ឋបាលរាជធានី និងរដ្ឋបាលខណ្ឌទាំង14 ចាប់ពីថ្ងសទី6 ខែឧសភា ឆ្នាំ2021 តទៅ។

ព័ត៌មានលម្អិត សូមអានសេចក្ដីជូនដំណឹងរបស់រដ្ឋបាលរាជធានីភ្នំពេញ ដែលមាននៅខាងក្រោម៖
ប្រភព៖ រដ្ឋបាលរាជធានីភ្នំពេញ
ដកស្រង់៖ បុត្រា

May 6, 2021

វ៉ាក់សាំងCovid-19 នៅកម្ពុជា! តួលេខពលរដ្ឋដែលបានចាក់រួចរាល់ នឹងកើនដល់ជាង2លាននាក់ បន្ទាប់ពីបញ្ចប់ការចាក់នៅតំបន់ក្រហម

នៅពេលដែលយុទ្ធនាការចាក់វ៉ាក់សាំងបង្ការ Covid-19 នៅតំបន់ក្រហមត្រូវបានបញ្ចប់ នោះតួលេខនៃពលរដ្ឋដែលបានចាក់វ៉ាក់សាំងរួចរាល់ នឹងកើនដល់ជាង 2លាននាក់ ស្មើនឹងជាង 20% នៃពលរដ្ឋចំនួន 10លាននាក់ដែលគ្រោងនឹងទទួលបានការចាក់វ៉ាក់សាំង។

នៅព្រឹកថ្ងៃទី05 ខែឧសភា ឆ្នាំ2021 សម្ដេច ហ៊ុន សែន ប្រមុខរដ្ឋាភិបាលកម្ពុជា បានមានប្រសាសន៍ថា យុទ្ធនាការចាក់វ៉ាក់សាំងនៅក្នុងតំបន់ក្រហម ប្រព្រឹត្តិទៅបានយ៉ាងល្អប្រសើរ និងនាំឱ្យតួលេខអ្នកបានទទួលការចាក់វ៉ាក់សាំងសរុបទូទាំងប្រទេស កើនឡើងដល់ជាង 1.5លាននាក់ ស្មើនឹងជាង 15% នៃចំនួនប្រជាជនដែលត្រូវចាក់។

កន្លងមក វ៉ាក់សាំងចំនួន 9សែនដូសហើយដែលត្រូវបានគណៈកម្មការចំពោះកិច្ច បញ្ជូនទៅឱ្យកងទ័ព ដើម្បីចូលរួមជួយចាក់វ៉ាក់សាំងដល់ពលរដ្ឋនៅក្នុងតំបន់ក្រហម។ ក៏ប៉ុន្តែ ពលរដ្ឋដែលត្រូវការចាក់វ៉ាក់សាំងគឺមានរហូតទៅដល់ជាង 5.2សែននាក់ ខណៈរដ្ឋាភិបាលមានតែ 9សែនដូសប៉ុណ្ណោះ ក្នុងនោះពលរដ្ឋម្នាក់ត្រូវចាក់ពីរដូស។

យ៉ាងនេះក្ដី ប្រមុខរដ្ឋាភិបាល បានថ្លែងបញ្ជាក់ថា នៅក្នុងតំបន់ក្រហមនេះ ដរាបណាការចាក់វ៉ាក់សាំងជូនពលរដ្ឋមិនទាន់គ្រប់គ្រាន់ រដ្ឋាភិបាលនឹងមិនដើរចេញចោលប្រជាជនណាម្នាក់នោះទេ។ នេះបើតាមប្រសាសន៍របស់ សម្ដេចតេជោ ហ៊ុន សែន៕

ប្រភព៖ AKP
ដកស្រង់៖ បុត្រា

May 5, 2021

វ៉ាក់សាំងបង្ការ Covid-19 ចំនួន 1លានដូសទៀត នឹងមកដល់កម្ពុជា នៅសប្ដាហ៍ក្រោយ

យុទ្ធការចាក់វ៉ាក់សាំងទូទាំងរាជធានីភ្នំពេញ និងខេត្តកណ្តាល នឹងត្រូវបានដំណើរការ បន្ទាប់ពីយុទ្ធនាការចាក់វ៉ាក់សាំងនៅក្នុងតំបន់ក្រហម ដើម្បីកាត់ផ្ដាច់ជំងឺCovid-19 នៅពេលវ៉ាក់សាំង 1លានដូសមកដល់កម្ពុជានៅសប្ដាហ៍ក្រោយ។

នៅព្រឹកថ្ងៃទី5 ខែឧសភានេះ ប្រមុខរដ្ឋាភិបាលកម្ពុជា សម្ដេចតេជោ ហ៊ុន សែន មានប្រសាសន៍ថា បន្ទាប់ពីការចាក់វ៉ាក់សាំងក្នុងតំបន់ក្រហមរួចហើយ រាជរដ្ឋាភិបាលនឹងបន្តចាក់វ៉ាក់សាំង នៅទូទាំងរាជធានីភ្នំពេញ និងខេត្តកណ្ដាល ក្នុងបំណងឱ្យពលរដ្ឋក្នុងតំបន់នេះ បានចាក់វ៉ាក់សាំងគ្រប់គ្នា។

វ៉ាក់សាំងបង្ការ Covid-19 ចំនួន 1លានដូសទៀតនឹងមកដល់កម្ពុជា នាពេលដ៏ខ្លីខាងមុខ ក្នុងនោះមាន 5សែនដូស នឹងមកដល់នៅថ្ងៃទី11 ខែឧសភា និង 5សែនដូសទៀត មកដល់នៅថ្ងៃទី15 ខែឧសភា ដូច្នេះ កម្ពុជា នឹងមិនខ្វះវ៉ាក់សាំងនោះទេ។ នេះបើតាមការឱ្យដឹងពីប្រមុខរដ្ឋាភិបាល។

សម្ដេច ហ៊ុន សែន តាមរយៈសារជាសំឡេង បានមានប្រសាសន៍ថា៖ «យើងនឹងស្រោចទីក្រុងភ្នំពេញនិងខេត្តកណ្តាលឱ្យជន់លិចទៅដោយវ៉ាក់សាំង ប៉ុន្តែដំបូងនេះ យើងធ្វើនៅក្នុងក្របខណ្ឌតំបន់ក្រហម ហើយគ្រាន់តែតំបន់ក្រហមនេះ ប្រជាជនមានទៅដល់ជាង 50ម៉ឺននាក់រួចទៅហើយ ដូច្នេះវាមិនយូរប៉ុន្មាន ទីក្រុងភ្នំពេញ និងខេត្តកណ្តាល នឹងជោគជាំទៅដោយវ៉ាក់សាំង ដែលយើងខិតខំរក ហើយដែលមានការជួយផ្គត់ផ្គង់ពីសាធារណៈរដ្ឋប្រជាមានិតចិន ដែលជាប្រភពផ្តល់ជំនួយមិនចេះរីងស្ងួតសម្រាប់យើង ទាំងជំនួយក៏ដូចជាការផ្គត់ផ្គង់តាមរយៈការទិញរបស់យើងផងដែរ»៕

ប្រភព៖ ទទក
ដកស្រង់៖ បុត្រា

May 5, 2021

ភូមិសាស្ត្រដែលត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព

ភូមិសាស្ត្រខេត្តតាកែវ ខេត្តកំពង់ចាម និងខេត្តកំពង់ស្ពឺ ត្រូវបានកំណត់ជាតំបន់ដែលរងការឆ្លងរាលដាលនៃវីរុសCovid-19 ទាក់ទិននឹងព្រឹត្តិការណ៍20កុម្ភៈ ដែលនេះគឺជាសេចក្ដីជូនដំណឹងរបស់រដ្ឋមន្ត្រីក្រសួងសុខាភិបាល។

ព័ត៌មានលម្អិតទាក់ទិននឹងកាតព្វកិច្ចពាក់ម៉ាស និងរក្សាគម្លាតសុវត្ថិភាព សូមអានសេចក្ដីជូនដំណឹងខាងក្រោម៖

May 5, 2021

Covid-19 !! កម្ពុជា រកឃើញអ្នកឆ្លងថ្មី 672នាក់ទៀត

ក្រសួងសុខាភិបាលកម្ពុជា នាព្រឹកថ្ងៃទី5 ឧសភានេះ បានឱ្យដឹងថា បានរកឃើញអ្នកវិជ្ជមាននឹង Covid-19 ចំនួន 672នាក់ទៀត នៅក្នុងអំឡុងថ្ងៃទី4 ខែឧសភា ឆ្នាំ2021។

ខាងក្រោមនេះគឺជាសេចក្ដីជូនដំណឹងសង្ខេបអំពីស្ថានភាព Covid-19 នៅកម្ពុជា សម្រាប់ថ្ងៃនេះ៖

May 5, 2021

ញ៉ាំចេក…មិនមែនជារឿងងាយៗដូចបកចេកទេ!

អ្នកណាៗក៏ប្រាប់ឱ្យញ៉ាំចេក ដើម្បីឱ្យរាងកាយបានរឹងមាំដែរ តែចេកមានឡើងច្រើនប្រភេទ ច្រើនយ៉ាង តើត្រូវជ្រើសរើសយកចេកមួយណាមកញ៉ាំល្អទៅ?

«ចេក» ផ្លែឈើដែលជនជាតិខ្មែរយើងស្គាល់ច្បាស់ និងនិយមទទួលទានមកយូរហើយ មនុស្សជាច្រើនយល់ឃើញថា ចេកជាផ្លែឈើដ៏អស្ចារ្យ ញ៉ាំធ្វើជាថ្នាំព្យាបាល និងការពាររោគបានទៀតផង។ អ្នកខ្លះញ៉ាំតែចេកដើម្បីសម្រកទម្ងន់ក៏មាន តែការពិតទៅ ការញ៉ាំតែចេក និងញ៉ាំច្រើនៗ ក៏មិនមែនជាការញ៉ាំដែលត្រឹមត្រូវដែរ។

លោកគ្រូពេទ្យជំនាញផ្នែកភោជនាហារ និងសុខភាព បានប្រាប់ថា ការពិតទៅ ផ្លែចេក ក៏ដូចជាផ្លែឈើទូទៅឯទៀតដែលមាន ទាំងប្រូតេអ៊ីន សារធាតុខ្លាញ់ និងកាបូហៃដ្រេតបន្តិចដែរ តែមានគុណប្រយោជន៍ខាងភោជនាហារខ្ពស់ សម្បូរទៅដោយសារធាតុរ៉ែ និងវិតាមីនជាច្រើនប្រភេទ ។

ច្រើនយ៉ាង តែមិនច្រើនជ្រុល

បើប្រៀបធៀបគុណប្រយោជន៍ខាងសារធាតុអាហាររបស់ផ្លែចេកទុំ ជាមួយនឹងផ្លែឈើផ្សេងទៀត ដូចជា ក្រូច ក្នុងបរិមាណប៉ុនគ្នានោះ យើងនឹងបានឃើញថា ការពិត បរិមាណសារធាតុរ៉ែ និងវិតាមីននៅក្នុងផ្លែចេកមិនបានទៅច្រើនអីណាស់ណាឡើយ មានចេកតែប៉ុន្មានមុខប៉ុណ្ណោះដែលលេចធ្លោជាងគេនោះ ដូច្នេះការនិយមញ៉ាំចេក ប្រហែលជាមកពីចេកជាផ្លែឈើដែលងាយរកបាន និងមានតម្លៃថោកហ្នឹងឯង។

ក្រៅពីនេះ ចូរ «កុំគិតថា ញ៉ាំចេកហើយស្គមនោះ» លោកគ្រូពេទ្យបានប្រាប់ថា ចេក គឺជាផ្លែឈើដែលមានជាតិស្ករច្រើន ទាំងហ្វ្រាក់ថូស គ្លុយកូស និងស៊ូខ្រូស ទោះជាមានរាងតិចមែនក៏ដោយ តែក៏អាចនិយាយបានថាមានដែរ បើទទួលទានក្នុងបរិមាណច្រើន នឹងទទួលបានថាមពលច្រើន យ៉ាងណាៗ ក៏ទម្ងន់ខ្លួនមិនថយចុះដែរ។

ការពិតទៅ នៅលើអ្នកជំងឺទឹកនោមផ្អែម ចេកទុំ គឺជាផ្លែឈើដែលត្រូវប្រយ័ត្ន ក្នុងការទទួលទានទៅវិញទេ តែបើតម ឬបញ្ឈប់ការញ៉ាំចេកតែម្តងនោះ ក៏មិនល្អដែរ។ ការញ៉ាំផ្លែឈើឱ្យទទួលបានប្រយោជន៍ច្រើនបំផុតនោះ ត្រូវញ៉ាំឱ្យបានច្រើនយ៉ាង និងញ៉ាំផ្លាស់ប្តូរ វិលជុំគ្នា ម្តងផ្លែនេះ ម្តងផ្លែនោះ ជារឿយៗទើបជាការប្រសើរ។

ចេកពងមាន់

មានវិតាមីន A និងបេតាឃែរ៉ូធីនខ្ពស់ អ្នកណាដែលមានបញ្ហាពាក់ព័ន្ធនឹងភ្នែក ដូចជា អង្គុយសម្លឹងអេក្រង់កុំព្យូទ័រ ទូរស័ព្ទដៃ ឬធេប្លិតពេញ 1ថ្ងៃៗនោះ ហាមខកខានជាដាច់ខាត។

ចេកណាំវ៉ា

កាកសរសៃអាហារ ដែលមានហាក់ដូចជាច្រើននោះ នឹងជួយបឺតជញ្ជក់យកជាតិខ្លាញ់ ស្ករ និងសារជាតិពុលផ្សេងៗ ជួយឱ្យបន្ទោបង់បានស្រួល ចំណែកវិតាមីន B3 ដែលមាននៅក្នុងចេកណាំវ៉ា ក៏ជួយកាត់បន្ថយការរលាកស្រទាប់ស្បែក ថែទាំប្រព័ន្ធប្រសាទនិងបន្ថយអាការនឿយល្វើយ។

ចេកអំបូង

ផូស្វ័រដែលមានច្រើន នឹងជួយការពារមិនឱ្យឆ្អឹងស្រួយ ចំណែកវិតាមីន C ក៏នឹងជួយប្រឆាំងសារធាតុរ៉ាឌីកាល់សេរី និងបំប៉នសរសៃឈាមឱ្យរឹងមាំ។

ចេកស្នាប់មុខ

មានសារធាតុអាហារលេចធ្លោជាងចេកឯទៀតៗ ទាំងកាល់ស្យូម និងផូស្វ័រដែលមានច្រើននោះ នឹងទៅជួយបំប៉នគ្រោងសាងរបស់ឆ្អឹងឱ្យរឹងមាំ សារធាតុដែកជួយការពាររោគកង្វះឈាមក្រហម វិតាមីន B1 ការពាររោគស្ពឹកស្រពន់ និងវិតាមីន B2 ការពាររោគមហារីកបំពង់អាហារ៕

May 5, 2021

សហរដ្ឋអាមេរិក ផ្ដល់ប្រាក់រង្វាន់មិនមានដែនកំណត់ ដល់អ្នកនាំមនុស្សមកចាក់វ៉ាក់សាំង Covid-19

កន្លងមក មានពេលខ្លះ ការទទួលបានការណាត់ចាក់វ៉ាក់សាំងបង្ការ Covid-19 នៅសហរដ្ឋអាមេរិក មិនខុសពីការត្រូវឆ្នោតនោះឡើយ ក៏ប៉ុន្តែ បច្ចុប្បន្ន បញ្ហានេះ ផ្ទុយស្រឡះបាត់ទៅហើយ ដោយអាជ្ញាធររបស់រដ្ឋជាច្រើននៅសហរដ្ឋអាមេរិក កំពុងស្វែងរកវិធីសាស្ត្រល្អៗ ហើយពេលខ្លះក៏ប្លែកៗ ដើម្បីទាក់ទាញពលរដ្ឋមកចាក់វ៉ាក់សាំងបង្ការវីរុសCovid-19 ព្រោះពលរដ្ឋមានការរារែក។

Larry Hogan អភិបាលរដ្ឋ Maryland បានថ្លែងកាលពីថ្ងៃទី3 ខែឧសភាថា៖ «វ៉ាក់សាំង មានសុវត្ថិភាព និងប្រសិទ្ធភាពទាំងស្រុង ហើយវាសុទ្ធតែមិនគិតថ្លៃ និងនៅមានជានិច្ច បើទោះអ្នកបានចុះឈ្មោះមុន ឬអត់» Larry Hogan បានអំពាវនាវឱ្យក្រុមហ៊ុននានា ផ្ដល់អត្ថប្រយោជន៍ផ្សេងៗដល់បុគ្គលិកដែលបានចាក់វ៉ាក់សាំង។

យុទ្ធសាស្ត្រនេះ ត្រូវបានលើកឡើងក្នុងគ្រាដែលក្រុមអ្នកជំនាញផ្នែកសុខាភិបាលសាធារណៈ ទទួលស្គាល់ថា សហរដ្ឋអាមេរិក ពិបាកសម្រេចបានគោលដៅដែលបានកំណត់លើការចាក់វ៉ាក់សាំងបង្ការ Covid-19 ដោយសារបញ្ហាសេរីភាព និងការសង្ស័យលើសុវត្ថិភាពរបស់វ៉ាក់សាំង។

«ជាមនុស្ស យើងតែងតែប្រតិកម្មវិជ្ជមានទៅលើមើមការ៉ុតច្រើនជាងដំបង» បណ្ឌិត Megan Ranney មកពីសាកលវិទ្យាល័យ Brown នៅ Rhode Island ថ្លែងកាលពីថ្ងៃទី3 ខែឧសភា។

បើតាមអ្នកស្រី យុទ្ធនាការចាក់វ៉ាក់សាំង តែងមានប្រសិទ្ធភាពជាង នៅពេលគេប្រើពាក្យពេចន៍ដែលមិនកង្កប់ការបង្ខិតបង្ខំលើពលរដ្ឋ។ ការបញ្ជូនសារ «វ៉ាក់សាំងបានត្រៀមខ្លួនជាស្រេចសម្រាប់អ្នក» គឺជាឃ្លាដ៏ល្អ ដើម្បីទាក់ទាញពលរដ្ឋមកចាក់វ៉ាក់សាំង។

នៅក្នុងរដ្ឋ New Jersey អភិបាល Phil Murphy ឱ្យដឹងថា រាល់បុគ្គលដែលមានអាយុចាប់ពី 21ឆ្នាំ និងបានចាក់វ៉ាក់សាំងយ៉ាងតិចមួយដូស នឹងទទួលបានស្រាបៀរដោយមិនគិតថ្លៃ នៅទីតាំងលក់ស្រាបៀរដែលបានចូលរួមក្នុងកម្មវិធីរបស់រដ្ឋ។

រដ្ឋ Connecticut ក៏មានកម្មវិធីស្រដៀងនេះដែរ ក្នុងនោះ ពលរដ្ឋដែលបានចាក់វ៉ាក់សាំងយ៉ាងតិចមួយដូស នឹងទទួលបានភេសជ្ជៈមានអាល់កុល ឬមិនមានអាល់កុល នៅតាមហាងដែលបានសហការជាមួយអាជ្ញាធរ សម្រាប់ខែឧសភានេះ។

ការចាក់វ៉ាក់សាំងនៅតំបន់ Pittsburgh នៃរដ្ឋ Pennsylvania

នៅទីក្រុង Detroit កាលពីសប្ដាហ៍មុន បានប្រកាសថា នឹងផ្ដល់ប័ណ្ណអំណោយដែលមានតម្លៃ 50ដុល្លារ ទៅឱ្យបុគ្គលទាំងឡាយណាដែលបាននាំមនុស្សម្នាក់មកកាន់មណ្ឌលចាក់វ៉ាក់សាំង។ មិនមានការកំណត់លើចំនួនទឹកប្រាក់ដែលបុគ្គលម្នាក់ទទួលបាននោះទេ ប៉ុន្តែ បើទទួលបានលើសពី 600ដុល្លារ នឹងត្រូវបង់ពន្ធលើប្រាក់ចំណូល។

ដើម្បីជាការលើកទឹកចិត្តឱ្យបុគ្គលិករដ្ឋមកចាក់វ៉ាក់សាំង អាជ្ញាធររដ្ឋ Maryland កំពុងស្នើឱ្យផ្ដល់ប្រាក់រង្វាន់ 100ដុល្លារ បើសិនជាពួកគេយល់ព្រមចាក់វ៉ាក់សាំងCovid-19។

Jim Justice ដែលជាអភិបាលរដ្ឋ Virginia ខាងលិច កាលពីសប្ដាហ៍មុន បានឱ្យដឹងដែរថា រដ្ឋនេះនឹងផ្ដល់មូលបត្របំណុលសន្សំរបស់រដ្ឋ (Savings Bonds) ដែលមានតម្លៃស្មើ 100ដុល្លារ ដល់ពលរដ្ឋទាំងឡាយដែលមានអាយុចាប់ពី 16 ដល់ 35ឆ្នាំ និងបានចាក់វ៉ាក់សាំង Covid-19។ ប៉ុន្តែ កាលពីថ្ងៃទី3 ខែឧសភា លោកបាននិយាយថា នឹងពិនិត្យរកវិធីសាស្ត្រលើកទឹកចិត្តផ្សេងវិញ ដោយសារពិបាកបង្កើតកម្មវិធីនេះ។

នៅ Los Angeles នៃរដ្ឋ California សមាជិកម្នាក់នៃក្រុមប្រឹក្សាភិបាលក្រុង និងមជ្ឈមណ្ឌលវប្បធម៌ពហុជំនឿ កាលពីថ្ងៃទី30 ខែមេសា បានដំណើរការកម្មវិធីជូនអំណោយដល់បុគ្គលទាំងឡាយដែលបានមកកាន់កន្លែងចាក់វ៉ាក់សាំងដោយមិនគិតថ្លៃរបស់ពួកគេ។

ក៏ប៉ុន្តែ Arthur Caplan សាស្ត្រាចារ្យផ្នែកក្រមសីលធម៌វេជ្ជសាស្ត្រ មកពីសាលាវេជ្ជសាស្ត្រ Grossman នៃសាកលវិទ្យាល័យ New York បានព្រមានអំពីប្រសិទ្ធភាពរបស់កម្មវិធីលើកទឹកចិត្តការចាក់វ៉ាក់សាំងខាងលើ។

«ខ្ញុំគិតថា អារម្មណ៍រារែក និងការពន្យារពេល កំពុងចាក់ឫសជ្រៅ ហើយអ្នកពិតជាពិបាកដោះស្រាយដោយការប្រើប្រាស់អំណោយជាប្រាក់ 100ដុល្លារ ឬអំណោយប្រហាក់ប្រហែលនេះ» លោក Arthur Caplan ថ្លែងដូច្នេះ។

គិតមកដល់បច្ចុប្បន្ន សហរដ្ឋអាមេរិក បានប្រើប្រាស់វ៉ាក់សាំងចំនួន 247លានដូស ក្នុងនោះ អ្នកដែលបានទទួលការចាក់វ៉ាក់សាំងរួចរាល់ មានចំនួន 106លាននាក់ ស្មើនឹង 32.1%៕

ប្រភព៖ NYTimes
ប្រែសម្រួល៖ បុត្រា

May 5, 2021

ចាប់ផ្ដើមរកលែងបាន! ប្រេស៊ីល ជួបបញ្ហាខ្វះខាតវ៉ាក់សាំងកូវី-19 ត្រូវផ្អាកចាក់ដូសទី2

បញ្ហាខ្វះខាតវ៉ាក់សាំងកូវីដ-19 បានបង្ខំឱ្យទីក្រុងធំៗជាច្រើននៅក្នុងប្រទេសប្រេស៊ីល ត្រូវផ្អាកចាក់ដូសទី2 ជាបណ្ដោះអាសន្ន។ នេះបើតាមការឱ្យដឹងពីមន្ត្រី និងរបាយការណ៍ព័ត៌មានរបស់ប្រព័ន្ធផ្សព្វផ្សាយ កាលពីថ្ងៃចន្ទ ទី3 ឧសភា។ ហេតុការណ៍ផ្អាកចាក់វ៉ាក់សាំងប្រឆាំងជំងឺកូវីដ-19 យ៉ាងបន្ទាន់ចុងក្រោយនេះ បានកើតឡើងក្រោមស្ថានការណ៍ឆ្លងរាលដាលដ៏អាក្រក់។

ទីក្រុងធំៗ ចំនួន7 ក្នុងចំណោម 26រដ្ឋ របស់ប្រទេសប្រេស៊ីល ត្រូវបញ្ឈប់ការចាក់វ៉ាក់សាំងរបស់ CoronaVac ដែលអភិវឌ្ឍដោយប្រទេសចិន ដោយសារតែការផ្គត់ផ្គង់ មិនគ្រប់គ្រាន់។ នេះបើតាមរបាយការណ៍របស់វេបសាយព័ត៌មាន G1។

រីអូ ដឺ ចានេរ៉ូ ទីក្រុងធំបំផុត លំដាប់លេខ2 របស់ប្រទេសប្រេស៊ីល បានថ្លែងផ្អាកចាក់វ៉ាក់សាំងដូសទី2 រយៈពេល 10ថ្ងៃ នៅថ្ងៃសៅរ៍ ទី1 ឧសភា មុននឹងកែសម្រួលកាលវិភាគការចាក់វ៉ាក់សាំងជាថ្មី ដោយបែរមកចាក់ដូសជំរុញការប្រឆាំងមេរោគតាមក្រុមអាយុមនុស្សវិញម្ដង ទោះជាដំណើរការទៅយ៉ាងយឺតៗក៏ដោយ។

ទីក្រុងដែលមានប្រជាជនចំនួនជាង 6.7លាននាក់មួយនេះ បានវិលមកដំណើរការចាក់វ៉ាក់សាំងដូសទី2 កាលពីថ្ងៃចន្ទ ទី3 ឧសភា ម្សិលមិញ ចំពោះតែមនុស្សចាស់ វ័យ 70ឆ្នាំឡើងទៅ ចំណែកមនុស្សដែលអាយុតិចជាង 60ឆ្នាំ ក្នុងនោះរួមទាំងមន្ត្រីសុខាភាពសាធារណៈផងនោះ តាមកាលវិភាគចាក់វ៉ាក់សាំងថ្មីរបស់ទីក្រុងនេះ ពួកគេអាចនឹងត្រូវរង់ចាំយូរដល់ទៅ 2 ទៅ 12ថ្ងៃ តាមរយៈការណែនាំឱ្យចាក់វ៉ាក់សាំងក្នុង 1ដូសៗ ឆ្ងាយពីគ្នា 28ថ្ងៃ។

ចំណែកទីក្រុងធំៗផ្សេងទៀត ដែលផ្អាកការចាក់វ៉ាក់សាំងដូសទី2 ដែរនោះ រួមមាន ទីក្រុងធំ ដូចជា បូឡូ ហូរីសុនតេ និងប៉ូទូអា លេក្រេ ដែលមានប្រជាជនប្រមាណ 2.5លាននាក់ និង 1.5នាក់ តាមលំដាប់។

សារព័ត៌មាន Folha de Sao Paulo បានរាយការណ៍ថា ក្នុងបណ្ដាទីក្រុងធំៗរបស់រដ្ឋផ្សេងៗទូទាំងប្រទេសប្រេស៊ីល បច្ចុប្បន្ន ច្រើនជាងពាក់កណ្ដាល មិនមានវ៉ាក់សាំងគ្រប់គ្រាន់ សម្រាប់ការចាក់ដូសទី2 ឱ្យប្រជាជនគ្រប់គ្នា ដែលបានទទួលវ៉ាក់សាំងដូសទី1 រួចហើយនោះទេ។

កូវីដ-19 បានសម្លាប់ជីវិតមនុស្សនៅក្នុងប្រទេសប្រេស៊ីលរួចហើយ អស់ជាង 400,000នាក់ ខ្ពស់បំផុតលំដាប់លេខ2 របស់ពិភពលោក បន្ទាប់ពីសហរដ្ឋអាមេរិក តែពេលនេះ ពួកគេកំពុងជួបនឹងបញ្ហាក្នុងការស្វែងរកវ៉ាក់សាំង ចាក់ឱ្យប្រជាជនចំនួន 212លាននាក់។

កន្លងមកលោក ឆាអ៊ី បូលសូណេរ៉ូ ប្រធានាធិបតីស្ដាំនិយមរបស់ប្រទេសប្រេស៊ីល បានរងការរិះគន់យ៉ាងខ្លាំង ចំពោះការមើលស្រាលជំងឺរាតត្បាតដ៏ធំនេះ និងធ្វើព្រងើយកន្តើយ ចំពោះការណែនាំរបស់បណ្ដាអ្នកជំនាញការ ក្នុងវិធានការគ្រប់គ្រងការឆ្លងរាលដាលរបស់វីរុសកូរ៉ូណាប្រភេទថ្មីនេះ។

រហូតមកដល់ពេលនេះ មានប្រជាជនប្រេស៊ីល បានទទួលវ៉ាក់សាំងដូសបំបូងរួចហើយប្រមាណ 15% និងមាន 7.5% ដែលបានទទួលវ៉ាក់សាំងគ្រប់ទាំង 2ដូស៕

ប្រភព៖ ទីភ្នាក់ងារព័ត៌មាន AFP
ប្រែសម្រួលដោយ តាវ៉ែនតា

May 4, 2021

Covid-19! អ្នកធ្លាប់បានទៅទិញថ្នាំពីឱសថស្ថានមួយនៅ «ច្បារអំពៅ» សូមដាក់ខ្លួននៅដោយឡែក!

ប្រជាពលរដ្ឋ ដែលធ្លាប់បានទៅទិញថ្នាំនៅឱសថស្ថាន សួស្ដី ដែលស្ថិតនៅផ្ទះលេខ 153 ផ្លូវលេខ 369 (ក្បែរគល់ស្ពានច្បារអំពៅថ្មី) សូមដាក់ខ្លួន ដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល 14ថ្ងៃ បន្ទាប់ពីថ្ងៃដែលបានប៉ះពាល់ ឬបានទៅទីកន្លែងមានហានិភ័យមួយនេះ។

ខាងលើនេះគឺជាសេចក្ដីអំពាវនាវរបស់អនុគណៈកម្មការស្រាវជ្រាវជំងឺCovid-19 នៃក្រសួងសុខាភិបាល ដែលបានប្រកាសកាលពីវេលាម៉ោង 4ល្ងាច ថ្ងៃទី4 ខែឧសភា ឆ្នាំ2021។

ចំពោះមូលហេតុ ត្រូវបានអនុគណៈកម្មការនេះបញ្ជាក់ថា នៅព្រឹក ថ្ងៃទី3 ខែឧសភា ឆ្នាំ2021 មានអ្នកជំងឺCovid-19 ម្នាក់ ដែលរស់នៅភូមិដើមចាន់ សង្កាត់ច្បារអំពៅទី2 បានទៅទិញថ្នាំ នៅទីតាំងខាងលើនេះ។

អនុគណៈកម្មការខាងលើក៏បានស្នើ សូមឱ្យបងប្អូនប្រជាពលរដ្ឋ ដែលរស់នៅក្នុង «ភូមិដើមចាន់ សង្កាត់ច្បារអំពៅទី2 ខណ្ឌច្បារអំពៅ», «ភូមិកណ្តាល សង្កាត់ច្បារអំពៅទី2 ខណ្ឌច្បារអំពៅ» និង ភូមិដើមស្លែង សង្កាត់ច្បារអំពៅទី2 ខណ្ឌច្បារអំពៅ» រាជធានីភ្នំពេញ កុំចេញពីផ្ទះ ប្រសិនបើមិនមានកិច្ចការចាំបាច់៕

ប្រភព៖ អនុគណៈកម្មការស្រាវជ្រាវជំងឺCovid-19
ដកស្រង់៖ បុត្រា

May 4, 2021

Category: សុខភាព