សុខភាព - La Reine Media

កម្ពុជា ចេញរបាយការណ៍ស្ដីពីតួលេខនៃការចាក់វ៉ាក់សាំងបង្ការ COVID-19

នាថ្ងៃទី11 ខែឧសភា ឆ្នាំ2021 នេះ កម្ពុជា បានបង្ហាញរបាយការណ៍មួយស្ដីពីតួលេខនៃអ្នកដែលបានទទួលការចាក់វ៉ាក់សាំងបង្ការវីរុសCovid-19 នៅទូទាំងប្រទេស ដោយរួមទាំងការចាក់លើកទីមួយ និងលើកទីពីរ។

វ៉ាក់សាំងដែលត្រូវបានប្រើប្រាស់នៅក្នុងប្រទេសកម្ពុជា នាបច្ចុប្បន្ន រួមមាន វ៉ាក់សាំង Sinopharm ផលិតនៅប្រទេសចិន, វ៉ាក់សាំង Covishield ផលិតនៅប្រទេសឥណ្ឌា (AstraZeneca) និងវ៉ាក់សាំង Sinovac ផលិតនៅប្រទេសចិន។

ជារួម ចំនួនពលរដ្ឋដែលបានចាក់វ៉ាក់សាំងលើកទីមួយ មាន 1,877,840នាក់ និងពលរដ្ឋដែលបានចាក់លើកទីពីរ មាន 1,123,726នាក់។ ព័ត៌មានលម្អិត សូមអានរបាយការណ៍ខាងក្រោម៖

ប្រភព៖ ក្រសួងសុខាភិបាល
ដកស្រង់៖ បុត្រា

May 11, 2021

ក្រុមហ៊ុន NOVAVAX អភិវឌ្ឍវ៉ាក់សាំងមួយប្រភេទ ដែលអាចទប់ស្កាត់ទាំងវីរុសCOVID-19 ទាំងវីរុសគ្រុនផ្ដាសាយ

ក្រុមហ៊ុនបច្ចេកវិទ្យាជីវសាស្ត្រ Novavax របស់សហរដ្ឋអាមេរិក កាលពីថ្ងៃទី10 ខែឧសភា បានឱ្យដឹងថា ការពិសោធវ៉ាក់សាំងបង្ការទាំងវីរុសCovid-19 ទាំងវីរុសផ្ដាសាយ នៅលើសត្វ បានទទួលលទ្ធផលល្អ។

យោងតាមក្រុមហ៊ុន Novavax ការស្រាវជ្រាវខាងលើបង្ហាញថា វ៉ាក់សាំងប្រភេទរួមផ្សំនេះ បង្កើតអង្គបដិប្រាណខ្លាំងក្លា អាចទប់ស្កាត់ការឆ្លងវីរុសទាំងពីរប្រភេទដែលបាននិយាយខាងដើម នៅពេលអ្នកវិទ្យាសាស្ត្រពិសោធនៅលើកណ្ដុរ និងកញ្ជ្រោង។

មន្ត្រីជាន់ខ្ពស់ម្នាក់របស់ Novavax យល់ថា ក្នុងវិបត្តិ Covid-19 បើទោះជាអត្រានៃការឆ្លងវីរុសផ្ដាសាយមានកម្រិតទាប ប៉ុន្តែនេះនៅតែជាហានិភ័យគួរឱ្យបារម្ភ សម្រាប់ប្រព័ន្ធសុខាភិបាលពិភពលោក និងតម្រូវការស្ដីពីវ៉ាក់សាំងដែលមានប្រសិទ្ធភាពខ្ពស់ជាង អាចបង្ការវីរុសច្រើនប្រភេទ ក្នុងនោះមានវីរុសផ្ដាសាយផងដែរ គឺជាប្រការសំខាន់ជាងពេលណាៗទាំងអស់។

វ៉ាក់សាំងដែលកំពុងត្រូវបានក្រុមហ៊ុន Novavax អភិវឌ្ឍនេះគឺជាប្រភេទវ៉ាក់សាំងដែលរួមផ្សំរវាងវ៉ាក់សាំងបង្ការវីរុសផ្ដាសាយ NanoFlu និងវ៉ាក់សាំងបង្ការវីរុសCovid-19។ ក្រុមអ្នកវិទ្យាសាស្ត្រ បានចាក់វ៉ាក់សាំងនេះទៅលើសត្វកណ្ដុរ ហើយក្រោយមក ឱ្យពួកវាប៉ះពាល់ Covid-19។ លទ្ធផលបានបង្ហាញថា កណ្ដុរទាំងនេះនៅតែរក្សាបាននូវទម្ងន់ដើមរបស់ពួកវា បើធៀបនឹងកណ្ដុរដែលត្រូវបានចាក់ថ្នាំ placebo (ថ្នាំដែលមិនមានសារធាតុសកម្ម)។ ពេលពិនិត្យសំណាកសួតរបស់សត្វដែលត្រូវបានចាក់វ៉ាក់សាំង ក្រុមអ្នកវិទ្យាសាស្ត្ររកឃើញថា ពួកវាមិនបានឆ្លង Covid-19 ឡើយ។

Novavax អះអាងថា វ៉ាក់សាំងទប់ស្កាត់ Covid-19 ឈ្មោះ NVX-CoV2373 របស់ពួកគេ មានប្រសិទ្ធភាព 100% ក្នុងការទប់ស្កាត់មិនឱ្យមានករណីឈឺធ្ងន់ ក្នុងដំណាក់កាលទីបីនៃការពិសោធលើមនុស្សនៅអង់គ្លេស និងមានប្រសិទ្ធភាពទូទៅក្នុងកម្រិត 89.7%។ ចំណែក NanoFlu វិញគឺជាវ៉ាក់សាំងបង្ការវីរុសផ្ដាសាយ ដែលត្រូវបានអភិវឌ្ឍដោយក្រុមហ៊ុន Novavax ដូចគ្នា។ វ៉ាក់សាំងទាំងពីរនេះ សុទ្ធតែកំពុងត្រូវបានពិសោធដាច់ដោយឡែក នៅលើមនុស្ស ក្នុងដំណាក់កាលចុងក្រោយ និងមិនទាន់ត្រូវបានរដ្ឋាភិបាលអនុម័តនៅឡើយ៕

ប្រភព៖ AFP, France24
ប្រែសម្រួល៖ បុត្រា

May 11, 2021

ទម្លាប់ល្អៗ 5យ៉ាងដែលអ្នកគួរធ្វើ ដើម្បីសុខភាពល្អ

ការបានសាកល្បងកែសម្រួលទង្វើក្នុងជីវិតប្រចាំថ្ងៃ ក៏អាចធ្វើឱ្យយើង មានសុខភាពល្អបានដែរ ថ្ងៃនេះឡារ៉ែន មានទម្លាប់ និងទង្វើល្អៗ ដែលលោកអ្នកគួរតែធ្វើឱ្យបានរៀងរាល់ថ្ងៃ មកជម្រាបជូនដូចតទៅ៖

ទទួលទានអាហារពេលព្រឹក ដែលសម្បូរដោយប្រូតេអ៊ីន ក្នុងអំឡុងពេល 30នាទី ក្រោយភ្ញាក់ពីដំណេក

ទាំងអស់គ្នាប្រហែលជាបានដឹងច្បាស់ហើយថា អាហារពេលព្រឹក គឺជាអាហារដ៏សំខាន់បំផុតសម្រាប់ថ្ងៃថ្មីនេះ ហើយអាហារ ដែលមានប្រូតេអ៊ីនខ្ពស់ នឹងបង្កើនការដុតបំផ្លាញកាន់ខ្ពស់ឡើងដែរ បើប្រៀបធៀបនឹងអាហារពេលព្រឹក បែបខាបូហាយដ្រេតខ្ពស់នោះ។

បង្កើនភាពយឺតតឹង

យើងតែងតែភ្ញាក់ឡើងដោយរាងកាយដែលរឹងស្ពឹក ព្រោះគេងក្នុងឥរិយាបថតែមួយ ពេញ 1យប់មកហើយ ដូច្នេះការពន្យឺតសាច់ដុំបែបស្រាលៗ តាមរយ:ការហាត់ប្រាណតិចៗ នឹងជួយសម្រាលសាច់ដុំ បង្កើនភាពស្វាហាប់ និងបន្ថយអាការចុករួយសាច់ដុំបានក្នុងរយ:ពេលវែង ដូចគ្នានឹងមុនពេលគេងដែរ។ ការពន្យឺតសាច់ដុំ ក៏ជួយដល់ប្រព័ន្ធឈាមរត់ និងជួយឱ្យរាងកាយមានភាពធូរស្រាលទៀតផង។

ចេញទៅខាងក្រៅផ្ទះ យ៉ាងហោចណាស់ 1ថ្ងៃ 30នាទី

ការបានទទួលពន្លឺថ្ងៃស្រទន់ៗនៅពេលព្រឹក នឹងធ្វើឱ្យរាងកាយបានផលិតវិតាមីនD ដែលយើងមិនអាចរកបានពីអាហារ ដែលសំខាន់ចំពោះសុខភាពឆ្អឹង រោគបេះដូង និងមហារីកប្រភេទខ្លះទៀតផង។ សាកល្បងរកពេលវេលាចេញទៅខាងក្រៅផ្ទះ ឱ្យបានយ៉ាងហោចណាស់ 1ថ្ងៃ 30នាទី ដើម្បីទទួលយកពន្លឺថ្ងៃ និងបានស្រូបយកធាតុអាកាសបរិសុទ្ធផង។

រកកន្លែងនៅស្ងាត់ៗតែម្នាក់ឯង

សាកល្បងរកពេលវេលា និងទីកន្លែងស្ងាត់ៗ ដើម្បីនៅតែម្នាក់ឯង តែ 5 ឬ 10នាទីក៏បាន ដោយការបិទទូរស័ព្ទ បិទភ្នែក និងបន្ធូរអារម្មណ៍ ដោយការតាំងសមាធិ ជាមួយនឹងការដកដង្ហើម ឈប់គិត និងឈប់កង្វល់ពីអ្វីៗ មួយរយ:ខ្លីសិន។ ការនៅស្ងាត់ៗតែឯង និងការតាំងសមាធិនេះ ជួយកាត់បន្ថយភាពតានតឹងក្នុងអារម្មណ៍ បង្កើនសេចក្តីសុខ បង្កើនភាពប្រឆាំងជំងឺ និងកាត់បន្ថយភាពប្រថុយរបស់រោគបេះដូងផង។

ក្រោកចេញពីតុធ្វើការម្តងម្កាលផង

ក្រោកឈរឡើង ហើយដើរចេញទៅនេះ ទៅនោះខ្លះផង ដើម្បីការពារភាពតានតឹងខាងខ្សែភ្នែក និងឱ្យសាច់ដុំបានសម្រាកផង។ ការអង្គុយតែមួយកន្លែងយូរជ្រុលពេក អាចធ្វើឱ្យមានកម្លាំងសង្កត់ទៅលើសាច់ដុំខ្នងផ្នែកខាងក្រោម ដែលអាចបណ្តាលឱ្យឈឺខ្នងយូអង្វែងបាន៕

May 11, 2021

អាហារមួយចំនួន ដែលមិនគួរញ៉ាំជាមួយគ្នា ព្រោះនាំឱ្យមានគ្រោះថ្នាក់ដល់រាងកាយ និងអាយុជីវិត (ពិត ឬមិនពិត កុំសាកល្បង)

អាហារដែលយើងញ៉ាំចូលទៅរាល់ថ្ងៃនេះ អាហារខ្លះមានប្រយោជន៍ តែអាហារខ្លះទៀត ក៏គ្មានប្រយោជន៍ដែរ តែ

លោកអ្នកដឹងទេថា មានអាហារមួយចំនួន មិនអាចញ៉ាំរួមគ្នាបានទេ ព្រោះវាអាចបណ្តាលឱ្យមានគ្រោះថ្នាក់ដល់សុខភាព និងជីវិតបាន ដូច្នេះថ្ងៃនេះ យើងមានអាហារ និងបន្លែផ្លែឈើមួយចំនួន ដែលមិនគួរទទួលទានរួមគ្នា មកជម្រាបជូនមិត្តអ្នកអាន

ដែលជាស្ត្រីមេផ្ទះ គ្រាន់ទុកជាចំណេះដឹង សម្រាប់ការពារក្រុមគ្រួសារ ដូចខាងក្រោមនេះ៖

1- ស្រា-ស ជាមួយផ្លែទន្លាប់ ហាមទទួលទានជាមួយគ្នា ព្រោះវានឹងធ្វើឱ្យពុល។

2- មើមឆៃថាវ ជាមួយផ្សឹតត្រចៀកកណ្តុរ ហាមទទួលទានរួមគ្នា ព្រោះនឹងធ្វើឱ្យកើតរោគសើស្បែក។

3- តៅហ៊ូ ជាមួយទឹកឃ្មុំ ញ៉ាំរួមគ្នាហើយ នឹងធ្វើឱ្យថ្លង់ ស្តាប់អ្វីលែងឮ។

4- ដំឡូងបារាំង ជាមួយនឹងចេកគ្រប់ប្រភេទ ហាមញ៉ាំរួមគ្នា ព្រោះវានឹងធ្វើឱ្យជាំមុខ។

5- ចេក ជាមួយមើមត្រាវ ពេលញ៉ាំជាមួយគ្នាហើយ នឹងធ្វើឱ្យឆ្អល់ពោះ។

6- គ្រាប់សណ្តែកដី ជាមួយផ្លែល្ពៅ ពេលញ៉ាំចូលគ្នាហើយ នឹងធ្វើឱ្យរាងកាយចុះខ្សោយ និងរលាកពោះវៀន។

7- ដំឡូងជ្វា និងផ្លែទន្លាប់ ហាមទទួលទានរួមគ្នា ព្រោះនឹងធ្វើឱ្យក្រពះមានបញ្ហា។

8- ដំឡូងបារាំង ជាមួយផ្លែទន្លាប់ ក៏ហាមទទួលទានជាមួយគ្នាដែរ ព្រោះនឹងធ្វើឱ្យមានបញ្ហាប្លោកនោម។

9- មើមឆៃថាវ ជាមួយផ្លែឈើគ្រប់ប្រភេទ កុំទទួលទានរួមគ្នា ព្រោះវាអាចធ្វើឱ្យពក-កបាន។

10- ទឹកតៅហ៊ូ ទឹកដោះគោឆៅ ហាមដាក់ពងមាន់ ព្រោះនឹងធ្វើឱ្យឆ្អល់ពោះ និងស្ទះសរសៃឈាម។

11- ផ្លែចេក ល្ហុង និងឪឡឹក ហាមទទួលទានជាមួយគ្នា ព្រោះវានឹងធ្វើឱ្យកើតជំងឺក្រលៀន និងទឹកនោមផ្អែម។

12- ក្រូចពោធិ៍សាត់ និងក្រូចឆ្មារ ហាមទទួលទានជាមួយគ្នា ព្រោះវានឹងធ្វើឱ្យធ្លុះក្រពះ។

13- ស្រា-ស ជាមួយប៊ីយែ ហាមទទួលទានរួមគ្នា ព្រោះវានឹងធ្វើឱ្យបែកសរសៃឈាម ក្នុងខួរក្បាល។

14- ត្រីគ្រប់ប្រភេទ ហាមស្ងោរជាមួយស្ពៃជ្រក់ ព្រោះបើទទួលទានញឹកញាប់ពេក វានឹងបង្កឱ្យកើតរោគមហារីក។

15- ខ្ញីជ្រក់ ហាមយកដាក់ក្នុងទូទឹកកក ព្រោះពេលយកមកញ៉ាំ អាចបង្កឱ្យកើតរោគមហារីកបាន។

16- ទឹកតៅហ៊ូ ហាមដាក់ស្ករក្រហមចូល ព្រោះនឹងធ្វើឱ្យបាត់វីតាមីនអស់។

17- ទឹកបាយ ហាមលាយជាមួយទឹកដោះ ព្រោះវានឹងធ្វើឱ្យបាត់វីតាមីនអស់។

18- ទឹកឃ្មុំ ហាមឆុងដោយទឹកក្តៅខ្លាំង ព្រោះនឹងធ្វើឱ្យបាត់បង់វីតាមីន។

19- ផ្លែននោង សឺកួយ មើមឆៃថាវ ហាមទទួលទានក្នុងថ្ងៃតែមួយ ព្រោះនឹងធ្វើឱ្យកើតរោគទឹកនោមផ្អែម និងធ្វើ

ឱ្យទឹកមេជីវិតចុះខ្សោយ មិនរឹងប៉ឹង។

20- ផ្លែមង្ឃុត ជាមួយស្ករ-ស ញ៉ាំរួមគ្នាហើយ ព្រោះនឹងធ្វើឱ្យពុលស្លាប់៕

May 11, 2021

ស្ថានភាពវីរុស Covid-19 នៅបណ្ដាប្រទេសក្បែរខាងកម្ពុជា

ក្រសួងសុខាភិបាលកម្ពុជា នាព្រឹកថ្ងៃទី11 ខែឧសភា ឆ្នាំ2021 នេះ ឱ្យដឹងថា បានរកឃើញអ្នកវិជ្ជមានថ្មីចំនួន 480នាក់, ស្លាប់ 5នាក់ និងជាសះស្បើយចំនួន 350នាក់ នៅក្នុងអំឡុងថ្ងៃទី10 ខែឧសភា ឆ្នាំ2021។

គិតមកដល់ថ្ងៃទី11 ខែឧសភានេះ កម្ពុជា មានអ្នកវិជ្ជមាននឹងវីរុសCovid-19 សរុបចំនួន 20,223នាក់ ក្នុងនោះមានអ្នកស្លាប់សរុប 131នាក់ និង 11,922នាក់ កំពុងទទួលការព្យាបាល។

ដោយឡែក ប្រទេសជិតខាងរបស់កម្ពុជា គឺ ប្រទេសវៀតណាម បច្ចុប្បន្នមានអ្នកឆ្លងសរុប 3,489នាក់ ក្នុងនោះ មានអ្នកស្លាប់សរុបចំនួន 35នាក់ និងកំពុងព្យាបាល 836នាក់។ ប្រទេសនេះក៏ទើបរកឃើញអ្នកវិជ្ជមានថ្មីចំនួន 28នាក់។

ប្រទេសថៃ ដែលនៅជាប់នឹងកម្ពុជាដែរនោះ បច្ចុប្បន្ន អ្នកវិជ្ជមាននឹង Covid-19 សរុប កើនឡើងដល់ 86,924នាក់ ក្នុងនោះក៏មានអ្នកស្លាប់ចំនួន 452នាក់ និងកំពុងព្យាបាល 29,435នាក់។ ប្រទេសថៃ ក៏ទើបតែរកឃើញករណីឆ្លងថ្មីចំនួន 1,919នាក់។

ចំណែកប្រទេសឡាវវិញ មានអ្នកវិជ្ជមានសរុប 1,327នាក់ ក្នុងនោះមានអ្នកស្លាប់តែ 1នាក់គត់ និងកំពុងព្យាបាលចំនួន 1,088នាក់។ ករណីឆ្លងថ្មីនៅប្រទេសឡាវ ក្នុងអំឡុង 24ម៉ោងនៃថ្ងៃទី10 ខែឧសភា មិនទាន់ត្រូវបានប្រកាសឱ្យដឹងនៅឡើយ៕

ប្រភព៖ ក្រសួងសុខាភិបាល, Worldometers
ដកស្រង់ និងប្រែសម្រួល៖ បុត្រា

May 11, 2021

សាកសពមនុស្សរាប់សិបនាក់ ដែលសង្ស័យថាជា អ្នកជំងឺ Covid-19 អណ្ដែតដេរដាសលើផ្ទៃទន្លេនៅឥណ្ឌា

ឥណ្ឌា៖ សាកសពយ៉ាងតិច ចំនួន 40នាក់ ដែលបានអណ្ដែតចូលក្បែរឆ្នេរទន្លេគង្គា ស្ថិតនៅកណ្ដាលរដ្ឋ Biha និងរដ្ឋ Uttar Pradesh ត្រូវបានក្រុមមន្ត្រីសង្ស័យថា គឺជាអ្នកជំងឺ Covid-19 ដែលមិនបានបូជា។

«ហេតុការណ៍នេះបានកើតឡើងនៅឯទន្លេគង្គា ក្នុងស្រុក Buxar ក្បែរបន្ទាត់ខណ្ឌចែករដ្ឋ Bihar និង Uttar Pradesh។ យើងបានស្នើឱ្យអាជ្ញាធរ ដោះស្រាយបញ្ហានេះ ដោយការបូជាភ្លើង និងបញ្ចុះ» Ashok Kumar ជាមន្ត្រីនៅមូលដ្ឋាន បាននិយាយដូច្នេះ កាលពីថ្ងៃទី10 ខែឧសភា។

ប្រភពព័ត៌មានពីស្រុក Buxar បានឱ្យដឹងថា ចំនួនសាកសពដែលអណ្ដែតមកក្បែរច្រាំងទន្លេ អាចឡើងដល់ 100នាក់ ក្នុងនោះសាកសពជាច្រើនកំពុងស្អុយរលួយ និងប្រហែលជាបានស្ថិតនៅក្រោមទឹកទន្លេអស់ជាច្រើនថ្ងៃមកហើយ។ មន្ត្រីមួយចំនួនបានសំដែងការព្រួយបារម្ភខ្លាំង ដោយសង្ស័យថា សាកសពទាំងនោះអាចជាអ្នកដែលបានស្លាប់ដោយសារ Covid-19។

អ្នកស្រុកជឿថា សាកសពអាចត្រូវបានគេបណ្ដែតចូលទន្លេ ព្រោះតែទីតាំងបូជាសពកំពុងពេញណែន ឬគ្រួសារសពមិនមានប្រាក់គ្រប់គ្រាន់ដើម្បីទិញឧស។ Kameshwar Pandey ដែលជាអ្នករស់នៅក្បែរទន្លេ បាននិយាយថា៖ «នេះគឺជាអ្វីដែលធ្វើឱ្យយើងរន្ធត់ខ្លាំង»។

មហារោគ Covid-19 នៅតែរាតត្បាតប្រទេសឥណ្ឌា និងកំពុងឆ្លងរាលដាលយ៉ាងលឿនក្នុងតំបន់ជនបទដ៏ធំរបស់ប្រទេសនេះ បណ្ដាលឱ្យប្រព័ន្ធសុខាភិបាល ក៏ដូចជាទីតាំងបូជាសព និងទីបញ្ចុះសព ត្រូវលើសចំណុះ។ រដ្ឋ Bihar និង រដ្ឋ Uttar Pradesh ស្ថិតក្នុងចំណោមរដ្ឋដែលក្រីក្របំផុតរបស់ប្រទេសឥណ្ឌា។

យោងតាមស្ថិតិរបស់រដ្ឋាភិបាលឥណ្ឌា អ្នកជំងឺ Covid-19 ប្រមាណ 4,000នាក់ បានស្លាប់ជារៀងរាល់ថ្ងៃ ក្នុងគ្រាដែលករណីស្លាប់សរុប បានកើនដល់ជាង 250,000នាក់ នៅក្នុងចំណោមអ្នកវិជ្ជមាននឹងវីរុសCovid-19 ជិត 23លាននាក់។ ប៉ុន្តែ ក្រុមអ្នកជំនាញ ជឿថា តួលេខពិតអាចខ្ពស់ជាងនេះច្រើនដង។

រលកទីពីររបស់ Covid-19 បានរុញច្រានប្រព័ន្ធសុខាភិបាលឥណ្ឌា ឱ្យប្រឈមនឹងការដួលរលំ បណ្ដាលឱ្យអ្នកជំងឺត្រូវស្លាប់ដោយសារខ្វះអុកស៊ីសែន មិនបានចូលព្យាបាលនៅមន្ទីរពេទ្យ និងខ្វះថ្នាំសង្កូវ៕

ប្រភព៖ AFP
ប្រែសម្រួល៖ បុត្រា

May 11, 2021

ត្រូវចាក់វ៉ាក់សាំង Covid-19 «ច្រឡំ» រហូតដល់ 6ដូស នារីម្នាក់នៅអ៊ីតាលី ត្រូវចូលពេទ្យ

អ៊ីតាលី៖ នារីវ័យ23ឆ្នាំម្នាក់ ត្រូវចូលតាមដានសុខភាពនៅមន្ទីរពេទ្យមួយក្នុងតំបន់ Tuscany បន្ទាប់ពីត្រូវបានចាក់វ៉ាក់សាំងបង្ការវីរុស Covid-19 របស់ Pfizer រហូតដល់ 6ដូស ព្រោះតែការច្រឡំ។

ហេតុការណ៍នេះបានកើតឡើងនៅឯមន្ទីរពេទ្យមួយនៅក្នុងតំបន់ Tuscany ភាគកណ្ដាលនៃប្រទេសអ៊ីតាលី កាលពីថ្ងៃទី9 ខែឧសភា នៅពេលដែលគិលានុបដ្ឋាក បានចាក់វ៉ាក់សាំងអស់មួយម្ជុល ដែលស្មើនឹង 6ដូស ទៅឱ្យនារីម្នាក់ដែលមានអាយុ 23ឆ្នាំ។ បច្ចុប្បន្ន សុខភាពអ្នកជំងឺ កំពុងស្ថិតក្នុងស្ថានភាពល្អ បន្ទាប់ពីបានបញ្ចូលសេរ៉ូម និងលេបថ្នាំ paracetamol។

អត្តសញ្ញាណរបស់នារីរងគ្រោះ រួមនឹងមន្ទីរពេទ្យខាងលើ មិនទាន់ត្រូវបានបង្ហើបឱ្យដឹងនៅឡើយ ប៉ុន្តែ ហេតុការណ៍នេះត្រូវបានរាយការណ៍ដល់ស្ថាប័នគ្រប់គ្រងឱសថរបស់ប្រទេសអ៊ីតាលី រួចហើយ។

សារព័ត៌មានអ៊ីតាលី បានឱ្យដឹងថា ការពិសោធនានាទៅលើការចាក់វ៉ាក់សាំង Covid-19 លើសចំណុះកន្លងមក ត្រូវបានគេធ្វើឡើងត្រឹមតែ 4ដូសប៉ុណ្ណោះ ក្នុងនោះបានបង្ហាញថា ពុំមានផលវិបាកប្រកបដោយគ្រោះថ្នាក់ណាមួយកើតឡើងដល់អ្នកត្រូវបានចាក់នោះទេ។ គិតមកដល់បច្ចុប្បន្ន ករណីចាក់លើសចំណុះ បានកើតឡើងនៅក្នុងប្រទេសមួយចំនួន ក្នុងនោះមាន សហរដ្ឋអាមេរិក, អូស្ត្រាលី, អាល្លឺម៉ង់ និងអ៊ីស្រាអែលផងដែរ៕

ប្រភព៖ AFP
ប្រែសម្រួល៖ បុត្រា

May 11, 2021

សហរដ្ឋអាមេរិក «មើលឃើញពន្លឺនៅខាងចុងផ្លូវរូងរបស់ Covid-19 រួចហើយ!

សហរដ្ឋអាមេរិក កំពុងឈរនៅចំពោះមុខរបត់ថ្មីមួយដ៏ធំ នៅក្នុងការប្រយុទ្ធប្រឆាំងនឹង Covid-19 នៅពេលដែលចំនួនអ្នកវិជ្ជមានថ្មី និងអ្នកចូលពេទ្យ បានថយចុះយ៉ាងច្រើន ដែលនេះត្រូវបានគេជឿថាជា ជោគជ័យបានមកពីយុទ្ធនាការចាក់វ៉ាក់សាំង។

«យើងកំពុងកែប្រែស្ថានការណ៍» Jeffrey Zients អ្នកសម្របសម្រួលចំពោះកិច្ចការប្រឆាំងនឹង Covid-19 របស់សេតវិមាន បាននិយាយដូច្នេះ។

ដោយសារការចាក់វ៉ាក់សាំងយ៉ាងតិច 1ដូស ដល់មនុស្សពេញវ័យបានចំនួន 58% និងប្រហែល 113លាននាក់ (34%) បានចាក់រួចរាល់ សហរដ្ឋអាមេរិក កំពុងស្ថិតក្នុងផ្លូវទៅរកគោលដៅ ដែលប្រធានាធិបតី Joe Biden បានកំណត់ ក្នុងនោះបានចែងថា ពលរដ្ឋចំនួន 70% នឹងទទួលបានការចាក់វ៉ាក់សាំងយ៉ាងតិច 1ដូស ឱ្យបានមុនថ្ងៃទី4 ខែកក្កដា ឆ្នាំ2021។

«យើងគិតថា គ្រប់គ្នាសុទ្ធតែហត់នឿយ ហើយការពាក់ម៉ាស អាចជាប្រការដ៏រំខាន។ ប៉ុន្តែ យើងកំពុងធ្វើដំណើរជិតដល់គោលដៅ ហើយពន្លឺនៅខាងមុខ ក៏កាន់តែច្បាស់ឡើងៗហើយដែរ» Zients ថ្លែងដូច្នេះ។

លោក Anthony Fauci អ្នកជំនាញលំដាប់កំពូលខាងរោគឆ្លងរបស់សហរដ្ឋអាមេរិក

Anthony Fauci ដែលជាអ្នកជំនាញលំដាប់កំពូលខាងរោគឆ្លងរបស់សហរដ្ឋអាមេរិក ក៏បានលើកឡើងស្រដៀងនេះដែរ។ លោកនិយាយថា ដល់ពេលដែលត្រូវបន្ធូរបន្ថយវិធានការទាក់ស្កាត់ Covid-19 និងអនុញ្ញាតឱ្យជនជាតិអាមេរិកាំង ទទួលបទពិសោធន៍ល្អដែលបានមកពីយុទ្ធនាការចាក់វ៉ាក់សាំង។

«យើងត្រូវការចាប់ផ្ដើមសេរីភាពច្រើនជាងមុន នៅពេលដែលមានពលរដ្ឋកាន់តែច្រើន បានទទួលការចាក់វ៉ាក់សាំង» លោក Anthony Fauci ថ្លែងបែបនេះ។ ប៉ុន្តែ លោកក៏បានបញ្ជាក់ថា សង្គ្រាមនេះនៅតែត្រូវធ្វើបន្ត ដើម្បីសម្រេចបានគោលដៅ ព្រោះថា ប្រការនេះមានន័យថា «វីរុសនឹងលែងមានកន្លែងសម្រាប់ជ្រោកកោន»។

ក្រុមមន្ត្រីរដ្ឋាភិបាល និងក្រុមអ្នកវិទ្យាសាស្ត្រអាមេរិក មានមូលដ្ឋានដែលអាចឱ្យពួកគេមានក្ដីសង្ឃឹមក្នុងការរួចផុតពីមហារោគរាតត្បាត ដោយសារការចាក់វ៉ាក់សាំង។ តួលេខនៃករណីវិជ្ជមានថ្មីប្រចាំថ្ងៃនៅសហរដ្ឋអាមេរិក គិតជាមធ្យមក្នុងរយៈពេល 7ថ្ងៃ ដោយគិតត្រឹមថ្ងៃទី8 ខែឧសភា មានចំនួន 42,000នាក់ ថយចុះច្រើនបើធៀបនឹង 260,000នាក់ កាលពីខែមករា។ អត្រានៃករណីចូលពេទ្យ ជាមធ្យម ក្នុងរយៈពេល 7ថ្ងៃ គិតដល់ថ្ងៃទី7 ខែឧសភា គឺជាង 39,300នាក់ ថយចុះជាង 70% បើធៀបនឹង 137,600 កាលពីដើមខែមករា។ ចំណេកអត្រានៃការស្លាប់ ក៏បានថយចុះច្រើន ពោលគឺ ជាមធ្យម ក្នុងរយៈពេល 7ថ្ងៃ គិតត្រឹមថ្ងៃទី8 ខែឧសភា គឺមាន 675ករណី ថយចុះជិត 80% បើធៀបនឹងមធ្យមភាគ 3,352ករណី កាលពីពាក់កណ្ដាលខែមករា។

ក្រុមអ្នកជំនាញ បានអះអាងថា លទ្ធផលដ៏ល្អនេះគឺបានមកពីជោគជ័យនៃយុទ្ធនាការចាក់វ៉ាក់សាំងរបស់សហរដ្ឋអាមេរិក។ ប្រទេសនេះបានចាក់វ៉ាក់សាំងបង្ការ Covid-19 ជូនពលរដ្ឋជាង 257លានដូស ឈរលំដាប់ទីពីរ បើធៀបនឹង 318លានដូសរបស់ប្រទេសចិន (យោងតាមទិន្នន័យរបស់ Our World in Data)។ សហរដ្ឋអាមេរិក ក៏ស្ថិតក្នុងចំណោមប្រទេសចំនួន 5 ដែលចាក់វ៉ាក់សាំងជូនពលរដ្ឋយ៉ាងតិច1ដូស បានច្រើនជាងគេផងដែរ រួមមាន ប្រទេសទាំងដែនកោះ ស៊ីសែល (Seychelles), ប្រទេសអ៊ីស្រាអែល, អង់គ្លេស, និងប្រទេសបារ៉ែន។ សហរដ្ឋអាមេរិក ជាប្រទេសឈរលំដាប់ទី 4 ដែលមានអត្រានៃការចាក់វ៉ាក់សាំងរួចរាល់បានច្រើនជាងគេ បន្ទាប់ពីប្រទេសស៊ីសែល (60.7%), ប្រទេសអ៊ីស្រាអែល (58.6%) និងប្រទេសស៊ីលី (37%)។

ក្រុមអ្នកជំនាញក៏បានបញ្ជាក់ថា ការអនុវត្តយុទ្ធនាការចាក់វ៉ាក់សាំងបានលឿន និងប្រសិទ្ធភាព ក៏អាស្រ័យទៅលើប្រសិទ្ធភាពរបស់ប្រភេទវ៉ាក់សាំងផងដែរ។ វ៉ាក់សាំងចំនួន 3ប្រភេទ ដែលត្រូវបានសហរដ្ឋអាមេរិកអនុម័តឱ្យប្រើប្រាស់ រួមមាន Pfizer, Moderna និង Johnson & Johnson។ យោងតាមទស្សនាវដ្ដី Yale Medicine វ៉ាក់សាំងទាំងនេះ មានប្រសិទ្ធភាពខ្ពស់៕

ប្រភព៖ Guardian, NYTimes, WSJ, AP
ប្រែសម្រួល៖ បុត្រា

May 10, 2021

បច្ចុប្បន្នភាព Covid-19 នៅកម្ពុជា និងពិភពលោក គិតត្រឹមព្រឹកថ្ងៃទី10 ខែឧសភា ឆ្នាំ2021

កម្ពុជា បានរកឃើញអ្នកវិជ្ជមានថ្មីចំនួន 506នាក់ទៀត និងស្លាប់ 6នាក់ទៀត នៅក្នុងអំឡុង 24ម៉ោងនៃថ្ងៃទី9 ខែឧសភា ឆ្នាំ2021 ធ្វើឱ្យតួលេខអ្នកឆ្លង Covid-19 សរុប នៅកម្ពុជា កើនឡើងដល់ 19,743នាក់ និងអ្នកស្លាប់សរុបឡើងដល់ 126នាក់។

គិតមកដល់បច្ចុប្បន្ន ពិភពលោកទាំងមូល មានអ្នកឆ្លងវីរុសCovid-19 សរុបចំនួន 158,970,290នាក់ ក្នុងនោះមានអ្នកស្លាប់ 3,306,746នាក់, អ្នកជាសះស្បើយ 136,517,897នាក់ និងកំពុងព្យាបាលចំនួន 19,145,647នាក់៕

ប្រភព៖ ក្រសួងព័ត៌មាន
ដកស្រង់៖ បុត្រា

May 10, 2021

ចិនខណ្ឌចែកកំពូលភ្នំ Everest ដើម្បីទប់ស្កាត់ Covid-19

ប្រទេសចិន ខណ្ឌចែកកំពូលភ្នំអេវើរ៉េស (Everest) ដើម្បីទប់ស្កាត់ហានិភ័យនៃការចម្លង Covid-19 ពីក្រុមអ្នកឡើងភ្នំ ដែលមកពីប្រទេសនេប៉ាល់ មកឱ្យប្រជាជននៅតំបន់ទីបេ (Tibet)។

មគ្គទេសន៍ដែលនាំផ្លូវឡើងភ្នំមួយក្រុមមកពីតំបន់ទីបេ នឹងឡើងលើកំពូលភ្នំ អេវើរ៉េស និងធ្វើការខណ្ឌចែកតំបន់ ដើម្បីទប់ស្កាត់សកម្មភាពជួបជុំរវាងក្រុមអ្នកផ្សងព្រេងរបស់ភាគីមកពីប្រទេសចិន និងភាគីមកពីប្រទេសនេប៉ាល់។ នេះបើតាមសារព័ត៌មាន Xinhua ចុះផ្សាយកាលពីថ្ងៃទី9 ខែឧសភា ឆ្នាំ2021 ដោយដកស្រង់សម្ដីរបស់ប្រធានមន្ទីរកីឡានៃតំបន់ទីបី។

ក្រុមខាងលើដែលមានសមាជិកជាជនជាតិចិនចំនួន 21នាក់ កំពុងធ្វើដំណើរមកកាន់កំពូលភ្នំអេវើរ៉េស ដើម្បីបំពេញបេសកកម្មនេះ។ ប៉ុន្តែ សារព័ត៌មានចិន មិនបានអធិប្បាយអំពីរបៀបខណ្ឌចែក ដែលក្រុមនេះនឹងធ្វើនោះទេ។

ទីតាំងបោះជំរំលើកពូលភ្នំអេវើរ៉េស នៅលើទឹកដីប្រទេសនេប៉ាល់ ត្រូវ Covid-19 រាតត្បាតចាប់ពីចុងខែមេសា ឆ្នាំ2021 រហូតដល់បច្ចុប្បន្ន។ រដ្ឋាភិបាលនេប៉ាល់ ដែលជាប្រទេសពឹងផ្អែកច្រើនទៅលើចំណូលដែលបានមកពីវិស័យទេសចរណ៍ នៅតែមិនទាន់លុបចោលរដូវឡើងភ្នំ ដែលចាប់ផ្ដើមពីខែមេសា ដល់ខែមិថុនា រៀងរាល់ឆ្នាំ មុនពេលតំបន់នេះឈានចូលដល់រដូវវង្សា។

កំពូលភ្នំអេវើរ៉េស ស្ថិតនៅកម្ពស់ 8,848ម៉ែត្រ គឺជាតំបន់ធ្លាក់ព្រឹលតូចមួយដែលមានផ្ទៃដី អាចឱ្យអ្នកឡើងភ្នំ និងអ្នកនាំផ្លូវ ឈរក្នុងពេលតែមួយ ត្រឹមតែប៉ុន្មាននាក់ប៉ុណ្ណោះ។

ប្រទេសចិន បានហាមអ្នកឡើងភ្នំទាំងដែលមានបំណងឡើងទៅកាន់កំពូលភ្នំអេវើរ៉េស ពីទឹកដីនៃតំបន់ទីបេ របស់ចិន ចាប់តាំងពី Covid-19 បានផ្ទុះឡើងកាលពីឆ្នាំមុន។ ទេសចរដែលមកទស្សនាទេសភាពកំពូលភ្នំអេវើរ៉េស ក៏ត្រូវបានហាមឃាត់ទៅកាន់កន្លែងបោះជំរំលើទឹកដីទីបេផងដែរ។

ប្រទេសចិន កាលពីថ្ងៃទី9 ខែឧសភា បានរកឃើញអ្នកឆ្លង Covid-19 ចំនួន 11ករណី នាំឱ្យតួលេខអ្នកវិជ្ជមានសរុបឡើងដល់ 90,796នាក់ ក្នុងនោះមាន 4,637នាក់បានស្លាប់។ ចំណែកប្រទេសនេប៉ាល់ កាលពីថ្ងៃទី9 ខែឧសភា ក៏បានប្រកាសថា រកឃើញអ្នកវិជ្ជមានថ្មី ចំនួន 8,777នាក់ ធ្វើឱ្យតួលេខអ្នកឆ្លងវីរុសនេះកើនឡើងដល់ជាង 394,000នាក់ ក្នុងនោះមាន 3,720នាក់បានបាត់បង់ជីវិត៕

ប្រភព៖ Reuters
ប្រែសម្រួល៖ បុត្រា

May 10, 2021

Category: សុខភាព