សុខភាព - La Reine Media

វ៉ាក់សាំង COVID-19! ទិន្នន័យសរុបស្ដីពីតួលេខនៃការចាក់វ៉ាក់សាំងទូទាំងពិភពលោក គិតត្រឹមថ្ងៃទី21 ឧសភា ឆ្នាំ2021

ប្រទេស និងដែនដីជាង 190 ក្នុងពិភពលោក បានធ្វើយុទ្ធនាការចាក់វ៉ាក់សាំងបង្ការវីរុសCovid-19 ក្នុងនោះ អ៊ីស្រាអែល កំពុងនាំមុខគេអំពីអត្រានៃពលរដ្ឋដែលបានចាក់វ៉ាក់សាំងយ៉ាងតិចមួយម្ជុល។

ចំនួនប្រទស និងដែនដី ដែលបានធ្វើយុទ្ធនាការចាក់វ៉ាក់សាំងប្រឆាំង Covid-19 ៖ 196
អត្រានៃការចាក់វ៉ាក់សាំងបង្ការ Covid-19 ៖ 9.24%
ចំនួនដួសនៃវ៉ាក់សាំងដែលត្រូវបានចាក់ ៖ 1.53 ពាន់លានដូស
អត្រានៃការចាក់វ៉ាក់សាំងនៃតំបន់នានាក្នុងពិភពលោក (មិនទាន់រួមបញ្ចូលប្រទេសចិន ដោយសារប្រទេសនេះមិនទាន់ប្រកាសពីចំនួនពលរដ្ឋដែលបានចាក់) ៖
1.ទ្វីបអាមេរិក ៖ 25.66% (262.42 លាននាក់)
2.ទ្វីបអាហ្វ្រិក ៖ 1.36% (18.17 លាននាក់)
3.ទ្វីបអឺរ៉ុប ៖ 27.49% (205.79 លាននាក់)
4.ទ្វីបអាស៊ី ៖ 5.02% (233.07 លាននាក់)
5.ទ្វីបអូសេអានី ៖ 1.75% (0.75 លាននាក់)
10ប្រទេសដែលមានអត្រានៃការចាក់វ៉ាក់សាំងបង្ការ Covid-19 ខ្ពស់ជាងគេក្នុងពិភពលោក ៖
1.អ៊ីស្រាអែល៖ 60%
2.អង់គ្លេស៖ 55.1%
3.បារ៉ែន៖ 52.1%
4.ហុងគ្រី៖ 49%
5.ឈីលី៖ 48.5%
6.សហរដ្ឋអាមេរិក៖ 48.2%
7.កាណាដា៖ 46.9%
8.កាតា៖ 43.1%
9.អាល្លឺម៉ង់៖ 38.2%
10.ប្រទេសបែលហ្សិក៖ 35.4%
ចំនួន (លាន) ដូស នៃវ៉ាក់សាំងដែលត្រូវបានចាក់៖
1.ប្រទេសចិន៖ 449.5
2.សហរដ្ឋអាមេរិក៖ 275.5
3.ឥណ្ឌា៖ 185.2
4.អង់គ្លេស៖ 57.4
5.ប្រេស៊ីល៖ 55.3
6.អាល្លឺម៉ង់៖ 41.2
7.បារាំង៖ 29.7
8.អ៊ីតាលី៖ 28.4
9.ទួរគី៖ 26.5
10.រុស្ស៊ី៖ 24.5
ចំនួនពលរដ្ឋ (លាននាក់) ដែលបានចាក់វ៉ាក់សាំងរួចរាល់ (មិនទាន់រួមបញ្ចូលប្រទេសចិន ដោយសារប្រទេសនេះមិនទាន់ប្រកាសពីចំនួនពលរដ្ឋដែលបានចាក់)៖
1.សហរដ្ឋអាមេរិក៖ 124.46
2.ឥណ្ឌា៖ 40.92
3.អង់គ្លេស៖ 20.55
4.ប្រេស៊ីល៖ 17.49
5.ម៉ិកស៊ិក៖ 10.65
6.រុស្ស៊ី៖ 9.93
7.អាល្លឺម៉ង់៖ 9.89
8.ឥណ្ឌូនេស៊ី៖ 9.29
9.បារាំង៖ 9.14
10.អ៊ីតាលី៖ 9.05

ទិន្នន័យខាងលើនេះ ត្រូវបានគិតត្រឹមថ្ងៃទី21 ខែឧសភា ឆ្នាំ2021។

ប្រភព៖ Our World In Data
ដកស្រង់ និងប្រែសម្រួល៖ បុត្រា

May 22, 2021

ស្ថានភាពជំងឺ Covid-19 នៅ កម្ពុជា គិតត្រឹមថ្ងៃទី21 ខែឧសភា ឆ្នាំ2021

កម្ពុជា ទើបតែបានរកឃើញអ្នកឆ្លងវីរុសCovid-19 ចំនួន 488នាក់បន្ថែមទៀត នាំឱ្យតួលេខអ្នកវិជ្ជមាននឹងវីរុសនេះ សរុបឡើងដល់ 24,645នាក់។

May 22, 2021

កាល់ស្យូម គឺជាអ្វី ហេតុម៉េចបានសំខាន់សម្រាប់កូនតូច?

កុមារនៅក្នុងអាយុ 1 – 3ឆ្នាំ គឺជាវ័យមួយដែលមានការប្រែប្រួល និងការវិវឌ្ឍខាងរាងកាយខ្លាំងណាស់ អ្វីដែលយើងច្រើនសង្កេតឃើញបានយ៉ាងច្បាស់នោះគឺ ការវិវឌ្ឍខាងផ្នែកការធ្វើចលនា តាំងពីការវារ ឈរ ដើរ រហូតទៅដល់អាចរត់បានយ៉ាងស្ទាត់ជំនាញ ហើយនិងការប្រែប្រួលខាងការញ៉ាំ ដែលការវិវឌ្ឍខាងការទំពាលេប ក៏ជាអ្វីមួយដែលកូនតូច ត្រូវធ្វើជាប្រចាំក្នុង 1ថ្ងៃៗដែរ។ គ្រោងសាងរាងកាយ ដែលមានចំណែកសំខាន់ក្នុងការបង្កើនដល់ការធ្វើចលនា និងការទំពាលេបរបស់កូន ឱ្យធ្វើការបានយ៉ាងមានប្រសិទ្ធភាពនោះគឺ អវយវៈមួយ ដែលមានឈ្មោះថា “ឆ្អឹង” និង “ធ្មេញ” ដូច្នេះដើម្បីជួយឱ្យកូនតូច មានគ្រោងសាងរបស់ឆ្អឹង និងធ្មេញដែលរឹងមាំនោះ ទើបសារធាតុអាហារចាំបាច់ដូចជា “កាល់ស្យូម” មានតួនាទីយ៉ាងសំខាន់ ចំពោះរាងកាយខ្លាំងសម្បើមណាស់។

“កាល់ស្យូម” គឺជាសារធាតុអាហារ ប្រភេទអំបិលរ៉ែ 1ប្រភេទ ដែលមាននៅក្នុងរាងកាយច្រើនបំផុត ជាពិសេសនៅក្នុងឆ្អឹង និងធ្មេញ អាចនិយាយបានថា ជាកន្លែងប្រមូលសន្សំកាល់ស្យូម ដែលធំជាងគេបំផុតនៅក្នុងរាងកាយ។ មុខនាទីសំខាន់របស់កាល់ស្យូមគឺ នាំយកមកប្រើប្រាស់ក្នុងការសាង និងជួសជុលចំណែកដែលសឹករេចរឹលរបស់ឆ្អឹង និងធ្មេញ ក្រចកដៃ-ជើង និងសសៃសក់ឱ្យរឹងមាំ ក្រៅពីនេះ នៅមានចំណែកជួយគ្រប់គ្រងការធ្វើការងាររបស់សាច់ដុំ ប្រព័ន្ធប្រសាទ ការពង្រឹងខ្លួនរបស់ឈាម ចង្វាក់របស់បេះដូង ការធ្វើការងាររបស់ប្រព័ន្ធទឹករំលាយអាហារ ការបឺតជញ្ជក់យកវីតាមីន និងជំរុញការបញ្ចេញរបស់អ័រម៉ូន។

តើនឹងទៅជាយ៉ាងណា…នៅពេលកូនតូចខ្វះជាតិកាល់ស្យូម?

កុមារដែលទទួលបានជាតិកាល់ស្យូម មិនគ្រប់គ្រាន់តាមតម្រូវការរបស់រាងកាយ នឹងមានផលប៉ះពាល់ដល់ភាពរឹង និងកម្រាស់ របស់ឆ្អឹងទាំងមូល ធ្វើឱ្យកើតជំងឺទន់ឆ្អឹង ឬឆ្អឹងកោង-ង ការវិវឌ្ឍខាងផ្នែករាងកាយ ដូចជាការអង្គុយ វារ ដើរ នឹងដំណើរការលូតលាស់ទៅមុខ យ៉ាងយឺតយ៉ាវ។ ក្រៅពីនេះ គ្រោងសាងឆ្អឹងដែលទន់ខ្សោយ នឹងបង្កឱ្យកើតមានភាពខុសប្រក្រតី ខាងរាងកាយបានដូចជា ក្លាយជាកុមារជើងកោង-ង និងខ្លួនទាបតឿខុសប្រក្រតីជាដើម។

តើកាល់ស្យូមនៅឯណា…រកញ៉ាំបាននៅទីណា?

– ទឹកដោះ និងផលិតផលដែលធ្វើអំពីទឹកដោះ ដូចជា ឈីស ប៊័ររឹង ប៊័រស្រស់ យ៉ាអួ អៃស្គ្រីម -ល- ព្រោះទឹកដោះស្រស់ គឺជាប្រភពអាហារដ៏កំពូល ដែលមានកាល់ស្យូមច្រើនបំផុត ដូច្នេះទើបចាំបាច់ខ្លាំងណាស់ ដែលកុមារត្រូវតែញ៉ាំទឹកដោះស្រស់ ឱ្យបានយ៉ាងហោចណាស់ 1ថ្ងៃ 2 កែវ។

– គ្រាប់ធញ្ញជាតិ គ្រាប់សណ្តែកស្ងួត និងផលិតផល ដែលធ្វើពីគ្រាប់សណ្តែក ដូចជា តៅហ៊ូ ទឹកសណ្តែកលឿង សៀង គ្រាប់ល្ង-ស ខ្មៅ គ្រាប់សណ្តែកក្រហម-ខៀវ គ្រាប់អាល់ម៉ុន គ្រាប់ឈូក និងគ្រាប់ផ្កាឈូករត្នជាដើម។

– សាច់សត្វដែលញ៉ាំទាំងមូល ឬទាំងឆ្អឹង ដូចជា ត្រីតូចៗ កម្ពិស បង្គា បង្គាក្រៀម ត្រីខកំប៉ុង។ល។

– បន្លែស្លឹកបៃតង ដូចជា ខាត់ណា ស្ពៃចង្កឹះ ប្រូកខូលី ស្លឹកបាស ផ្លែប្រពាយ សណ្តែកហោឡាន់តាវ ត្រប់ពុតលំញង។ល។

នៅពេលបានដឹងបែបនេះហើយ សមាជិកនៅក្នុងគ្រួសារទាំងអស់ សូមកុំភ្លេចបន្ថែមជាតិកាល់ស្យូម ឱ្យបានគ្រប់គ្រាន់តាមតម្រូវការរបស់រាងកាយ ឱ្យបានជាប់ជានិច្ច ព្រោះមិនថា ស្ថិតក្នុងវ័យណាក៏ដោយ ក៏កាល់ស្យូមនៅតែជាសារធាតុរ៉ែដ៏សំខាន់មួយ ដែលទាំងកុមារ និងមនុស្សចាស់នៅតែចាំបាច់ត្រូវតែទទួលបាន ជារៀងរាល់ថ្ងៃ៕

May 22, 2021

អ្នកវិជ្ជមាននឹង COVID-19 នៅកម្ពុជា កើនដល់ជាង 24,000នាក់ ខណៈពិភពលោក កើនដល់ជាង 165លាននាក់

គិតមកដល់ថ្ងៃទី21 ខែឧសភា ឆ្នាំ2021 នេះ កម្ពុជា បានរកឃើញអ្នកឆ្លងវីរុសCovid-19 សរុបចំនួន 24,157នាក់ ដែលនេះគឺជាតួលេខពីក្រសួងសុខាភិបាល។

នាព្រឹកនេះ ក្រសួងបានប្រកាស បានរកឃើញអ្នកជំងឺCovid-19 ថ្មី ចំនួន 460នាក់, ករណីស្លាប់ថ្មីចំនួន 1នាក់ និងអ្នកជំងឺCovid-19 ចំនួន 826នាក់ បានជាសះស្បើយ នៅក្នុងអំឡុង 24ម៉ោង នៃថ្ងៃទី20 ខែឧសភា។

នៅទូទាំងពិភពលោក បច្ចុប្បន្ន អ្នកវិជ្ជមាននឹង Covid-19 បានកើនឡើងដល់ 165,857,655នាក់ ក្នុងនោះមានអ្នកស្លាប់ 3,444,901នាក់, ជាសះស្បើយចំនួន 146,539,738នាក់ និងកំពុងព្យាបាលចំនួន 15,873,016នាក់៕
ប្រភព៖ ក្រសួងសុខាភិបាល, worldometers
ដកស្រង់៖ បុត្រា

May 21, 2021

តើអាហារផ្អែមបែបណា ដែលស័ក្តិសមនឹងស្ត្រីមានផ្ទៃពោះ

អាហារដែលមានរសជាតិផ្អែម ជាអាហារដែលត្រូវមាត់មនុស្សជាច្រើន និងរសជាតិផ្អែម ជួយជំរុញភាពឃ្លានអាហារបានយ៉ាងល្អ ហើយមនុស្សភាគច្រើន ក៏និយមអាហាររសជាតិផ្អែម រហូតដល់លើសពីតម្រូវការរបស់រាងកាយ ដែលជាមូលហេតុបណ្តាលឱ្យកើតជំងឺផ្សេងៗបាន ដូច្នេះយើងនាំគ្នាមកស្គាល់ពីអាហាររសជាតិផ្អែមថា តើគួរបរិភោគប៉ុនណាទើបសមរម្យសម្រាប់ស្ត្រីដែលកំពុងមានគភ៌។

លោកគ្រូពេទ្យបានណែនាំឱ្យស្ត្រីមានផ្ទៃពោះ គ្រប់គ្រងការបរិភោគអាហារ ដែលមានរសជាតិផ្អែម ឱ្យស្ថិតនៅក្នុងកម្រិតសមល្មម គឺកុំបរិភោគតាមចិត្តចង់ កាត់បន្ថយអាហារដែលមានរសជាតិផ្អែម ឱ្យបានច្រើនបំផុត និងគ្រប់គ្រងការបរិភោគជាតិស្ករ ឬបង្អែមដូចខាងក្រោមនេះ៖

-ផឹកទឹកផ្លែឈើស្រស់ ដែលមិនដាក់ស្ករ ជំនួសភេសជ្ជៈកំប៉ុង។

-កាត់បន្ថយស្ករ ក្នុងការផ្សំគ្រឿងម្ហូបអាហារ ចំនួនពាក់កណ្តាល ពីទម្លាប់ដើម។

-បរិភោគផ្លែឈើស្រស់ និងបន្លែឱ្យបានច្រើន នឹងធ្វើឱ្យរាងកាយទទួលបានជាតិស្ករយ៉ាងគ្រប់គ្រាន់។

-ចៀសវាងអាហារកញ្ចប់ ឬកំប៉ុងផ្សេងៗ តែបើចាំបាច់ត្រូវបរិភោគ គួរមើលគ្រឿងផ្សំទាំងនោះថា តើមានជាតិស្ករតិច ច្រើនប៉ុនណា?។

-ខ្ពុរមាត់ ឬដុសធ្មេញក្រោយពេលបាយ ឬក្រោយពេលបរិភោគបង្អែមរួច និងគួរប្រើខ្សែអំបោះខាត់សម្អាតធ្មេញ យ៉ាងហោចណាស់ 1ថ្ងៃ ម្តង ដើម្បីកុំឱ្យមានកម្ទេចអាហារ នៅជាប់សេសសល់តាមប្រឡោះធ្មេញ។

-បើសិនត្រូវប្រើស្ករ គួរជ្រើសរើសប្រើស្ករអំពៅ ជំនួសស្ករ-ស។

-មិនគួរបរិភោគស្ករ-សលើសពី 3ស្លាបព្រាបាយ ក្នុង 1ថ្ងែឡើយ (សម្រាប់មនុស្សដែលមានរាងកាយមាំមួន)។

-ជាធម្មតា ពេលយើងបរិភោគបាយ បន្លែ ផ្លែឈើនោះ គឺយើងបានទទួលជាតិស្ករគ្រប់គ្រាន់តាមតម្រូវការរបស់រាងកាយ ស្រេចទៅហើយ។

តើយើងបានទទួលរសជាតិផ្អែម ដោយវិធីណា?

មនុស្សយើង ឆាប់ទទួលយករសជាតិផ្អែមខ្លាំងបំផុត ព្រោះនៅលើអណ្តាតមានក្រពេញទទួលរសជាតិផ្អែម ច្រើនជាងរសជាតិផ្សេងៗ ដូច្នេះបើយើងបរិភោគអាហារ ដែលមានរសជាតិផ្អែមញឹកញាប់ នឹងធ្វើឱ្យយើងញៀនរសជាតិផ្អែម ជាពិសេសការបរិភោគស្ករ ដែលយើងដាក់នៅក្នុងអាហារផ្សេងៗ ធ្វើឱ្យរាងកាយយើងទទួលបានជាតិស្ករច្រើនជ្រុលដោយមិនដឹងខ្លួន ទាំងដែលអាហារពីធម្មជាតិ ក៏មានជាតិស្ករស្រាប់ទៅហើយនោះ មានដូចជា៖

*ខាបូហាយដ្រេត ពេលឆ្លងកាត់កម្មវិធីរំលាយអាហារហើយ នឹងក្លាយទៅជាជាតិស្ករគ្លុយខូស ហើយនឹងត្រូវបានបឺតជ្រាប ចូលទៅក្នុងខ្សែលោហឹតជាបន្ត ទៅធ្វើជាថាមពលការងារឱ្យកោសិកាអវយវៈផ្សេង។

*ផ្លែឈើស្ទើរតែគ្រប់ប្រភេទ មានជាតិស្ករជាចំណែកផ្សំដោយធម្មជាតិស្រាប់ទៅហើយ រាងកាយអាចយកទៅប្រើប្រាស់បានភ្លាមតែម្តង។

*អាហារកញ្ចប់ និងអាហារកំប៉ុងផ្សេងៗ ដូចជា ទឹកញាំសាឡាដ ទឹកដោះគោ យ៉ាអួ(ទឹកដោះគោជូរ) នំខេក ឬសូម្បីតែទឹកស៊ីអ៊ីវ ក៏មានស្ករជាចំណែកផ្សំដែរ៕

May 21, 2021

ទឹកផ្លែឈើ បង្កើនការចងចាំ សម្រាប់មនុស្សវ័យចំណាស់

ផ្លែឈើរសជាតិជូរអែម ដូចជាផ្លែទំពាំងបាយជូរ និងផ្លែប្ល៊ូប៊ើរី គឺជាប្រភពនៃវិតាមីនC ដែលជួយធ្វើឱ្យរាងកាយរបស់យើងស្រស់ថ្លា ស្វាហាប់ តែគុណប្រយោជន៍របស់ផ្លែឈើទាំង 2ប្រភេទនេះ មិនមែនមានតែត្រឹមប៉ុណ្ណឹងទេ ព្រោះតាមរយៈការសិក្សាស្រាវជ្រាវ ដោយក្រុមអ្នកវិភាគនៃមហាវិទ្យាល័យ ស៊ិនស៊ិនណេទិ សហរដ្ឋអាមេរិក បានរកឃើញថា ផ្លែទំពាំងបាយជូរ ពូជខុងខត និងផ្លែប្ល៊ូប៊ើរីព្រៃ អាចជួយធ្វើឱ្យការចងចាំរបស់មនុស្ស កាន់តែល្អប្រសើរឡើងបានទៀតផង។

ក្រុមអ្នកវិភាគស្រាវជ្រាវ បានធ្វើការសិក្សាលើមនុស្សចំណាស់ 2ក្រុម ដែលមានបញ្ហារឿងការចងចាំតាមអាយុ ដោយបានរកឃើញថា ក្រុមមនុស្សវ័យចំណាស់ 12នាក់ ដែលបានទទួលទានទឹកផ្លែទំពាំងបាយជូរខុងខតជាប់ជាប្រចាំ រយៈពេល 3ខែ ចាប់ផ្តើមមានការចងចាំល្អប្រសើរឡើង ព្រោះទឹកផ្លែទំពាំងបាយជូរខុងខត មានផលល្អដល់ការបញ្ជូនសញ្ញានៃប្រព័ន្ធប្រសាទ ជំរុញការចងចាំ រួមទាំងមានសារធាតុផូលីហ្វ៊ីណុល ដែលមានគុណសម្បត្តិជួយប្រឆាំងសារធាតុរ៉ាឌីកាល់សេរី និងប្រឆាំងនឹងការក្លាយរោគបានទៀតផង។

ឯក្រុមមនុស្សវ័យចំណាស់ 9នាក់ ដែលបានទទួលទានទឹកផ្លែប្ល៊ូប៊ើរី ជាប់ៗគ្នារយៈពេល 3ខែដែរនោះ ក្រុមអ្នកស្រាវជ្រាវ រកឃើញថា ការចងចាំ ចាប់ផ្តើមប្រែប្រួលទៅក្នុងផ្លូវវិជ្ជមាន ព្រោះសារធាតុអ៊ែនថូសៃយ៉ានីន នៅក្នុងផ្លែប្ល៊ូប៊ើរីព្រៃ បានទៅជួយបង្កើនសញ្ញាសរសៃប្រសាទបរិវេណខួរក្បាលផ្នែកកណ្តាល និងកាត់បន្ថយអត្រានៃការចុះខ្សោយរបស់សរសៃប្រសាទផងដែរ។ តាមរយៈការងារស្រាវជ្រាវវិភាគទាំង 2រឿងនេះ ធ្វើឱ្យទទួលបានចំណុចសរុបមួយថា ទឹកផ្លែទំពាំងបាយជូរ និងទឹកផ្លែប្ល៊ូប៊ើរី មិនមែនគ្រាន់តែទទួលទាន ដើម្បីឱ្យបាត់ស្រេកទឹកប៉ុណ្ណោះទេ តែនៅបានជួយរឿងខួរក្បាល និងការចងចាំបានទៀតផង៕

May 21, 2021

ស្ថានភាព COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី20 ខែឧសភា ឆ្នាំ2021

នាព្រឹកថ្ងៃទី20 ខែឧសភានេះ ក្រសួងសុខាភិបាលកម្ពុជា បានប្រកាសថា បានរកឃើញ្អ្នកឆ្លងវីរុសCovid-19 ថ្មី ចំនួន 415នាក់បន្ថែមទៀត ខណៈពិភពលោក រកឃើញអ្នកជំងឺថ្មី ចំនួន 21,310នាក់។

គិតមកដល់បច្ចុប្បន្ន នៅកម្ពុជា អ្នកវិជ្ជមាននឹង Covid-19 សរុប បានកើនដល់ 23,697នាក់ ក្នុងនោះមានអ្នកស្លាប់សរុប 164នាក់, អ្នកជាសះស្បើយ សរុប 15,700នាក់។ ក្នុងថ្ងៃទី19 កន្លងទៅ កម្ពុជា ក៏មានអ្នកជំងឺCovid-19 ចំនួន 5នាក់បានស្លាប់។

ដូច្នេះ បើយោងតាមទិន្នន័យនៃរបាយការណ៍របស់ក្រសួងសុខាភិបាល បច្ចុប្បន្ន កម្ពុជា នៅមានអ្នកជំងឺCovid-19 ប្រមាណជាង 7,000នាក់ទៀត កំពុងទទួលការព្យាបាលនៅមន្ទីរពេទ្យ។

នៅទូទាំងពិភពលោក អ្នកវិជ្ជមាននឹង Covid-19 សរុប បានកើនដល់ 165,568,854នាក់ ក្នុងនោះមានអ្នកស្លាប់ 3,431,786នាក់, អ្នកជាសះស្បើយ 144,589,029នាក់ និងអ្នកកំពុងព្យាបាលចំនួន 17,548,039នាក់៕

ប្រភព៖ ក្រសួងព័ត៌មាន, worldometers
ដកស្រង់៖ បុត្រា

May 20, 2021

ស្ថានភាព COVID-19 នៅកម្ពុជា និងពិភពលោក គិតមកដល់ថ្ងៃទី19 ខែឧសភា ឆ្នាំ2021

ក្រសួងសុខាភិបាលកម្ពុជា ឱ្យដឹងថា អ្នកជំងឺCovid-19 ថ្មី ចំនួន 393នាក់ ត្រូវបានរកឃើញកាលពីថ្ងៃទី18 ខែឧសភា នាំឱ្យតួលេខអ្នកឆ្លងសរុបនៅកម្ពុជា កើនដល់ 23,282នាក់។

ចំណែកនៅទូទាំងពិភពលោកវិញ អ្នកវិជ្ជមាននឹង Covid-19 សរុប កើនដល់ 164,901,667នាក់ ក្នុងនោះមានអ្នកស្លាប់ 3,418,730នាក់, ជាសះស្បើយ 143,862,822នាក់ និងកំពុងព្យាបាលចំនួន 17,620,115នាក់។

May 19, 2021

ក្រុមអ្នកវិទ្យាសាស្ត្រ រកឃើញ “វិធីកម្ចាត់វីរុសCOVID-19” ក្នុងសួត បានរហូតដល់ 99.9%

ក្រុមអ្នកវិទ្យាសាស្ត្ររបស់អូស្ត្រាលី និងសហរដ្ឋអាមេរិក អភិវឌ្ឍវិធីសាស្ត្រថ្មី ប្រឆាំងនឹងវីរុស ដែលជួយកម្ចាត់ Covid-19 នៅក្នុងសត្វកណ្ដុរ បានរហូតដល់ 99.9% ដែលនេះជាការបើកផ្លូវសម្រាប់ការព្យាបាលជំងឺCovid-19 នៅលើមនុស្ស ប្រកបដោយប្រសិទ្ធភាព។

ក្រុមអ្នកវិទ្យាសាស្ត្រនៃវិទ្យាស្ថានសុខាភិបាល Menzies ក្នុងរដ្ឋ Queensland នៃប្រទេសអូស្ត្រាលី និងវិទ្យាស្ថានស្រាវជ្រាវ City of Hope របស់សហរដ្ឋអាមេរិក បានសហការគ្នា ស្រាវជ្រាវ និងអភិវឌ្ឍវិធីសាស្ត្រព្យាបាលនេះ ចាប់ពីខែមេសា ឆ្នាំ2020។

Nigel McMillan សាស្ត្រាចារ្យប្រចាំសាកលវិទ្យាល័យ Griffith របស់អូស្ត្រាលី និងជាប្រធានក្រុមស្រាវជ្រាវ បានហៅវិធីសាស្ត្រដែលពួកគេកំពុងអភិវឌ្ឍនេះថាជា «ភារកិច្ចស្វែងរក និងកម្ចាត់» ពោលគឺ វាយប្រហារផ្ទាល់ទៅលើ Covid-19។ នេះបើតាមសារព័ត៌មានអូស្ត្រាលី ដែលបានចុះផ្សាយកាលពីដើមសប្ដាហ៍នេះ។

ក្រុមអ្នកវិទ្យាសាស្ត្រ ប្រើប្រាស់វិធីសាស្ត្រ វីរុស «ជំនាន់បន្ទាប់» ជាមួយនឹងបច្ចេកវិទ្យាអសកម្មហ្សែន RNA (Ribonucleic acid) ដើម្បីវាយប្រហារផ្ទាល់ទៅលើប្រព័ន្ធហ្សែនរបស់វីរុស ធ្វើឱ្យពួកវាមិនអាចឆ្លងរាលដាលបាន។ «វាបំផ្លាញប្រព័ន្ធហ្សែន និងធ្វើឱ្យវីរុស មិនអាចរីកចម្រើនបាន» McMillan អធិប្បាយដូច្នេះ និងបន្ថែមថា នេះគឺជាលើកទីមួយហើយ ដែលពួកគេបានអភិវឌ្ឍដោយជោគជ័យនូវគ្រាប់ nano និងបញ្ចូលទៅក្នុងរាងកាយតាមរយៈសរសៃឈាម ដើម្បីឱ្យពួកវា វាយប្រហារវីរុស។

លោក McMillan និយាយថា៖ «ពួកវា (គ្រាប់ nano) ស្វែងរក និងកម្ចាត់វីរុស ដូចទៅនឹងយន្តការនៃមីស៊ីលស្វែងរកកម្ដៅ (heat-seeking missile/Infrared homing)»។

«គ្រាប់ nano ធ្វើដំណើរទៅកាន់សួត ហើយចូលទៅកាន់កោសិកាទាំងអស់របស់សួត ប៉ុន្តែ ពួកវាកម្ចាត់តែវីរុសដែលមាននៅក្នុងកោសិកាប៉ុណ្ណោះ។ ចំណែកកោសិកាដែលធម្មតា (មិនមានវីរុស) នឹងមិនរងផលប៉ះពាល់ពីវិធីព្យាបាលនេះឡើយ» លោក McMillan បញ្ជាក់។

សាស្ត្រាចារ្យ McMillan បន្តថា៖ «បើទោះមិនមែនជាវិធីព្យាបាល ប៉ុន្តែវិធីសាស្ត្រនេះ អាចជួយកម្ចាត់វីរុសក្នុងសួតបានរហូតដល់ 99.9% ឯណោះ។ ដូច្នេះ វាមានប្រសិទ្ធភាពស្ទើរដូចទៅនឹងវិធីព្យាបាល និងសម្រាប់អ្នកជំងឺដែលកំពុងស្ថិតក្នុងបន្ទាប់សង្គ្រោះបន្ទាន់ (ICU) ក្នុងករណីហួសពេលក្នុងការចាក់វ៉ាក់សាំង»។

«នេះពិតជាវិធីសាស្ត្រាដំបូងបង្អស់មួយ ទាក់ទងនឹងការព្យាបាលផ្ទាល់ ដូច្នេះហើយ យើងពិតជាមានការត្រេកអរណាស់» លោកសាស្ត្រាចារ្យថ្លែងដូច្នេះ។

យោងតាមវិធីសាស្ត្រថ្មីនេះ អ្នកជំងឺCovid-19 ដែលកំពុងស្ថិតក្នុងបន្ទាប់ ICU នឹងត្រូវបានចាក់ 1ម្ជុលជារៀងរាល់ថ្ងៃ ក្នុងរង្វង់ពី 4-5ថ្ងៃ ឬតែ 1ម្ជុលគត់ សម្រាប់អ្នកដែលទើបតែឆ្លង Covid-19។ លោក McMillan ឱ្យដឹងថា វិធីសាស្ត្រនេះ អាចបង្ហាញខ្លួនជាផ្លូវការយ៉ាងឆាប់បំផុតត្រឹមឆ្នាំ2023 អាស្រ័យទៅលើលទ្ធផលនៃដំណាក់កាលពិសោធលើមនុស្ស។

«សូមចងចាំថា វីរុសនេះ (Covid-19) នឹងមិនបាត់ទៅណាឡើយ។ យើងនឹងត្រូវរស់នៅជាមួយពួកវា ជារៀងរហូត» នេះបើតាមការបញ្ជាក់បន្ថែមពីសាស្ត្រាចារ្យ McMillan៕

ប្រភព៖ ABC
ប្រែសម្រួល៖ បុត្រា

May 19, 2021

ចំណុចហាមធ្វើ 6យ៉ាង ពេលកើតមុន!

“មុន” នរណាៗក៏មិនចង់កើតដែរ ហើយយើងតែងនាំគ្នា រិះរកវិធីគ្រប់យ៉ាងមកថែទាំស្បែក ដើម្បីកុំឱ្យកើតមុនទៀតផង។ តែបើពេលកើតមុនហើយ មានតែប្រញាប់ៗព្យាបាល ឱ្យវាឆាប់ជាបាត់ពីលើផ្ទៃមុខយើង ឱ្យបានលឿនបំផុតប៉ុណ្ណោះ។ ខាងក្រោមនេះ គឺដំបូន្មានល្អៗ ក្នុងការព្យាបាលមុន ដើម្បីឱ្យវាឆាប់បាត់ទៅវិញ។

1. ការជក់បារី

ក្រៅពីនាំឱ្យកើតមហារីកសួត រោគបេះដូង និងធ្វើឱ្យស្បែកឆាប់ជ្រីវជ្រួញហើយនោះ ការជក់បារីនៅធ្វើឱ្យសរសៃឈាមតូចៗ នៅក្រោមស្បែកបង្រួញខ្លួន ធ្វើឱ្យអុកស៊ីហ្ស៊ែនដែលចិញ្ចិមកោសិកាស្បែក ត្រូវថយចុះ ធ្វើឱ្យស្បែកទទួលសារធាតុអាហារមិនគ្រប់គ្រាន់ ស្បែកឡើងស្រអាប់ខ្មៅ ឆាប់ជ្រួញយារ នាំឱ្យមុនមិនងាយជាបាត់ទៅវិញឡើយ។

2. ការប្រើថ្នាំ ដែលមានចំណែកផ្សំរបស់ ស្ទៀរ៉យដ៍ (Steroid)

ក្នុងអំឡុងពេលកើតមុន គួរឈប់ប្រើថ្នាំលាបទាំងអស់ណា ដែលមានចំណែកផ្សំរបស់សារធាតុ ស្ទៀរ៉យដ៍ ព្រោះអាចនឹងធ្វើឱ្យការកើតមុននៅលើផ្ទៃមុខ របស់លោកអ្នក រឹតតែយ៉ាប់យ៉ឺនយូរឡើង។

3. ការញ៉ាំថ្នាំសម្លាប់មេរោគ

ការលេបថ្នាំសម្លាប់មេរោគជាប្រចាំ ដើម្បីព្យាបាលអាការកើតមុន មិនមែនជាមធ្យោបាយដែលល្អនោះទេ ព្រោះវានឹងហុចផលមិនល្អដល់ស្បែក និងមុននៅលើផ្ទៃមុខរបស់អ្នក និងថែមទាំងបំផ្លាញប្រព័ន្ធផ្ទៃក្នុងរាងកាយទៀតផង។

4. កោររោមលើផ្ទៃមុខ ដោយកាំបិតកោរ ដែលមានផ្លែច្រើនជាន់

កាំបិតកោរ ប្រភេទមានផ្លែច្រើនជាន់ (3 – 4ជាន់) មានគុណសម្បត្តិល្អ គឺកោរបានរលីងស្អាត តែវាក្លាយជាគុណវិបត្តិចំពោះស្បែកដែលកំពុងកើតមុនរបស់អ្នកទៅវិញ។ ជាពិសេសមុនដែលកំពុងទុំ ឬជិតក្លាយ ព្រោះវានឹងកកិតលើស្បែកធ្វើឱ្យស្បែកមុខ កាន់តែឡើងក្រហម ឬក្លាយជាដំបៅតែម្តង។ បើត្រូវការកោររោមមុខ ក្នុងអំឡុងពេលកើតមុន ចូរជ្រើសរើសប្រើកាំបិតកោរ ដែលមានផ្លែតែ១ ជាការប្រសើរបំផុត។

5. ច្របាច់ កេះ អេះ ញេច

មិនថាយ៉ាងណាក៏ដោយ ក៏មិនត្រូវច្របាច់ កេះ អេះ ញេច ឬប៉ះពាល់កន្លែងកើតមុនជាដាច់ខាត ទោះជាអ្នកមានអារម្មណ៍ថា វាគួរឱ្យចង់ញេច និងពេលញេចហើយ ប្រហែលជាឆាប់ជា យ៉ាងណាក៏ដោយ។ វិធីដែលល្អ គឺទុកដៃនៅឱ្យស្ងៀម ហើយទុកឱ្យលោកគ្រូពេទ្យព្យាបាលមុន ចាត់ការឱ្យវិញ ទើបប្រសើរជាង។

6. ញ៉ាំវិតាមីនA ច្រើនជ្រុលពេក

វិតាមីនA ពីប្រភពធម្មជាតិ ដូចជានៅក្នុងបន្លែផ្លែឈើផ្សេងៗនោះ មានចំណែកជួយក្នុងកម្មវិធីព្យាបាលខ្លួនឯងរបស់ស្បែក បានយ៉ាងល្អប្រសើរ តែទោះជាដឹងថា វិតាមីនA ល្អចំពោះស្បែកក៏ដោយ ក៏អ្នកមិនចាំបាច់ ត្រូវសង្កត់ធ្ងន់លើការញ៉ាំវិតាមីនA បំប៉ន ក្នុងអំឡុងពេលកើតមុនដែរ។

នាំគ្នាព្យាបាលមុនយ៉ាងត្រឹមត្រូវ តាមចំណុចហាមឃាត់ 6យ៉ាងខាងលើនេះជាប់ជានិច្ច នឹងធ្វើឱ្យមុនឆាប់ជាទៅវិញ និងមានស្បែកស្រស់ស្អាតបានយូរទៀតផង៕

May 19, 2021

Category: សុខភាព