សុខភាព - La Reine Media

រដ្ឋបាលខណ្ឌទួលគោក ជូនដំណឹងស្ដីពីការបើកយុទ្ធនាការចាក់វ៉ាក់សាំង COVID-19 ដូសទីមួយ នៅមូលដ្ឋាន

រដ្ឋបាលខណ្ឌទួលគោក បានឱ្យដឹងថា ពលរដ្ឋនៅក្នុងសង្កាត់ទឹកល្អក់1, សង្កាត់បឹងកក់1 និងសង្កាត់បឹងកក់2 ដែលមិនទាន់បានចាក់វ៉ាក់សាំងបង្ការវីរុសCovid-19 ដូសទីមួយ សូមទៅចុះឈ្មោះ ដើម្បីទទួលបានការចាក់វ៉ាក់សាំងគ្រប់ៗគ្នា។

យុទ្ធនាការចាក់វ៉ាក់សាំងជូនប្រជាពលរដ្ឋក្នុងមូលដ្ឋានខាងលើ នឹងត្រូវបន្តរហូតដល់ថ្ងៃទី5 ខែមិថុនា ឆ្នាំ2021។ នេះបើតាមការបញ្ជាក់ពីរដ្ឋបាលខណ្ឌទួលគោក តាមរយៈទំព័របណ្ដាញសង្គម Facebook នាល្ងាចថ្ងៃទី1 ខែមិថុនា ឆ្នាំ2021។

សម្រាប់ព័ត៌មានបន្ថែម សូមអានសេចក្ដីជូនដំណឹងខាងក្រោម៖
ប្រភព៖ សាលាខណ្ឌទួលគោក
ដកស្រង់៖ បុត្រា

June 1, 2021

រដ្ឋបាលខណ្ឌច្បារអំពៅ៖ យុទ្ធនាការចាក់វ៉ាក់សាំង Sinovac បង្ការ Covid-19 ដូសទីមួយ នៅសល់ 7ថ្ងៃទៀតប៉ុណ្ណោះ!

នាល្ងាចថ្ងៃទី1 ខែមិថុនា ឆ្នាំ2021នេះ រដ្ឋបាលខណ្ឌច្បារអំពៅ បានចេញសេចក្ដីជូនដំណឹងមួយស្ដីពីយុទ្ធនាការចាក់វ៉ាក់សាំងនៅក្នុងមូលដ្ឋាននៃខណ្ឌនេះ។

សេចក្ដីជូនដំណឹង បានឱ្យដឹងថា យុទ្ធនាការចាក់វ៉ាក់សាំង Sinovac បង្ការវីរុសCovid-19 ដូសទីមួយរបស់ខណ្ឌច្បារអំពៅ នឹងត្រូវបញ្ចប់នៅថ្ងៃទី7 ខែមិថុនា ឆ្នាំ2021 ក្រោយពីបានផ្ដើមចាក់ជូនពលរដ្ឋ ចាប់ពីថ្ងៃទី25 ខែឧសភា ឆ្នាំ2021។

ព័ត៌មានលម្អិត សូមអានសេចក្ដីជូនដំណឹងរបស់រដ្ឋបាលខណ្ឌច្បារអំពៅ ដែលមានដូចខាងក្រោម៖

ប្រភព៖ សាលាខណ្ឌច្បារអំពៅ
ដកស្រង់៖ បុត្រា

June 1, 2021

បែកធ្លាយព័ត៌មានស្ដីពី «អ្នកជំងឺទី 0» ដែលឆ្លង COVID-19 ដំបូងគេក្នុងពិភពលោក

មន្ត្រីជាន់ខ្ពស់មួយរូបរបស់ប្រទេសចិន ប្រហែលជាបានបង្ហើបឱ្យដឹងអំពីឈ្មោះ អាសយដ្ឋាន និងព័ត៌មានលម្អិត ទាក់ទងនឹងមនុស្សម្នាក់ ក្នុងចំណោមមនុស្សដំបូងៗ ដែលបានឆ្លងវីរុសCovid-19 នៅទីក្រុង Wuhan រយៈពេល 3ខែ មុនពេលអាជ្ញាធរប្រទេសនេះ ប្រកាសអំពីករណីឆ្លងវីរុសCovid-19 ដំបូងគេបង្អស់។

យោងតាមសារព័ត៌មាន Daily Mail (អង់គ្លេស) កំហុសឆ្គងដ៏គួរឱ្យភ្ញាក់ផ្អើលនេះ បានបង្ហើបឱ្យដឹងនៅក្នុងរូបភាពថតអេក្រង់ ដែលត្រូវបានផ្ញើទៅកាន់ទស្សនាវដ្ដីវេជ្ជសាស្ត្រចិន។ រូបភាពនេះ បានបង្ហាញអំពីស្ត្រីម្នាក់ មានវ័យ 61ឆ្នាំ ដែលត្រូវបានគេហៅថា «អ្នកជំងឺ Su» មានទីលំនៅដែលមានចម្ងាយប្រមាណ ប្រមាណ 1.6គីឡូម៉ែត្រ ពីទីតាំងស្រាវជ្រាវវីរុសសំខាន់មួយរបស់ទីក្រុង Wuhan។

ស្ត្រីនេះក៏រស់នៅក្បែរចំណតរថភ្លើង តាមបណ្ដោយផ្លូវដែកល្បឿនលឿន ដែលជាផ្លូវដ៏មានឥទ្ធិពលក្នុងការចម្លងវីរុសដល់ទីក្រុងដែលមានប្រជាជនជាង 11លាននាក់នេះផងដែរ។

ការរកឃើញថ្មីបំផុតនេះ ត្រូវបានបង្ហើបឱ្យដឹង តាមរយៈកិច្ចសម្ភាសមួយរបស់ទស្សនាវដ្ដីវេជ្ជសាស្ត្រ ជាមួយនឹងអ្នកវិទ្យាសាស្ត្រដែលទទួលខុសត្រូវក្នុងការប្រមូលទិន្នន័យផ្លូវការរបស់ប្រទេសចិន ទាក់ទងនឹងអ្នកជំងឺ។

នៅក្នុងកិច្ចសម្ភាសជាមួយនឹង Health Times លោក Yu Chuanhua សាស្ត្រាចារ្យផ្នែកស្ថិតិជីវសាស្ត្រប្រចាំសាកលវិទ្យាល័យ Wuhan ឱ្យដឹងថា មាន 47,000ករណី នៅក្នុងទិន្នន័យជាតិ ត្រូវបានបញ្ជាក់ និងសង្ស័យថា បានឆ្លង Covid-19 គិតត្រឹមចុងខែកុម្ភៈ ឆ្នាំ2020។ ក្នុងចំណោមនោះ មានករណីស្លាប់ 1នាក់ កាលពីចុងខែកញ្ញា ឆ្នាំ2019។

លោក Yu Chuanhua និយាយថា៖ «មានទិន្នន័យស្ដីពីអ្នកជំងឺម្នាក់ ដែលបានឈឺកាលពីថ្ងៃទី29 ខែកញ្ញា (2019)។ ទិន្នន័យបង្ហាញថា អ្នកជំងឺនេះមិនត្រូវបានគេធ្វើតេស្ត nucleic និងធ្វើរោគវិនិច្ឆ័យ។ នេះ ទំនងជាករណីឆ្លង Covid-19។ អ្នកជំងឺនេះ បានបាត់បង់ជីវិត។ ទិន្នន័យនេះក៏មិនទាន់ត្រូវបានផ្ទៀងផ្ទាត់នៅឡើយ»។

ទិន្នន័យក៏បង្ហាញអំពីករណីសង្ស័យឆ្លង Covid-19 ចំនួន 2នាក់ ផ្សេងទៀត ដែលត្រូវបានរាយការណ៍ដល់ក្រុមវេជ្ជបណ្ឌិត នៅ Wuhan កាលពីថ្ងៃទី14 និង 21 ខែវិច្ឆិកា ឆ្នាំ2019 រួមជាមួយនឹងករណីមួយចំនួនទៀត មុនថ្ងៃទី8 ខែធ្នូ 2019 ជាពេលដែលចិន រាយការណ៍ទៅកាន់អង្គការសុខភាពពិភពលោក អំពីពីករណីឆ្លងជំងឺCovid-19 ដំបូង។

អត្ថបទរបស់ Health Times ដែលបានបង្ហាញអំពីរូបភាពថតអេក្រង់ព័ត៌មានរបស់អ្នកជំងឺ Covid-19 2ករណីដំបូង នៅក្នុងខែវិច្ឆិកា ឆ្នាំ2019 ដែលបានមកពីមូលដ្ឋានទិន្នន័យរបស់សាស្ត្រាចារ្យ Yu Chuanhua បើទោះត្រូវបានធ្វើឱ្យស្រអាប់ ប៉ុន្តែ នៅតែមើលឃើញព័ត៌មានខ្លះៗ រួមទាំងឈ្មោះមន្ទីរពេទ្យ និងអាសយដ្ឋានរបស់អ្នកជំងឺផងដែរ។

ព័ត៌មានបង្ហាញថា អ្នកជំងឺ Su បានទទួលការព្យាបាលនៅមន្ទីរពេទ្យ Rongjun នាទីក្រុង Wuhan។ ចំណែកអាសយដ្ឋានទីលំនៅ និងមន្ទីរពេទ្យរបស់អ្នកជំងឺនេះគឺ សុទ្ធតែស្ថិតក្នុងខណ្ឌ Hongshan នៃទីក្រុង Wuhan ជាកន្លែងដែលមានបន្ទប់ពិសោធន៍ជាច្រើន ដែលស្រាវជ្រាវអំពីវីរុស SARS-CoV-2 ទាក់ទងនឹងសត្វប្រចៀវ។

តំបន់មន្ទីរពិសោធន៍ផ្នែកវីរុសសាស្ត្រ នៅទីក្រុង Wuhan ប្រទេសចិន

តំបន់ដែលអ្នកជំងឺ Su រស់នៅ និងព្យាបាល មានចម្ងាយជាង 20គីឡូម៉ែត្រ ពីផ្សារបោះដុំគ្រឿងសមុទ្រ Huanan (Huanan Seafood Wholesale Market) ជាកន្លែងដែលទីក្រុងប៉េកាំងចាត់ទុកថាជា ប្រភពចម្លង Covid-19 ដំបូងគេ។ អ្នកជំងឺទីពីរ ដែលត្រូវបានរកឃើញឆ្លងវីរុសក្នុងខែវិច្ឆិកា ឆ្នាំ2019 គឺជាបុរសវ័យ 62ឆ្នាំ ឈ្មោះ Wang ទទួលការព្យាបាលនៅមន្ទីរពេទ្យ Hanyang។

យ៉ាងនេះក្ដី សាស្ត្រាចារ្យ Yu Chuanhua បានស្នើឱ្យដកអត្ថបទដែលបានចុះផ្សាយនៅលើទំព័រទស្សនាវដ្ដី ដោយបញ្ជាក់ថា ពេលវេលាដែលបានសរសេរក្នុងអត្ថបទ មានកំហុសឆ្គង ហើយករណីសង្ស័យផ្សេងទៀត នៅមុនថ្ងៃទី8 ខែធ្នូ ឆ្នាំ2019 ត្រូវការផ្ទៀងផ្ទាត់បន្ថែម។

សេចក្ដីលម្អិត ត្រូវបានរកឃើញដោយ Gilles Demaneuf សមាជិកម្នាក់របស់ក្រុមសកម្មជនឌីជីថល Drastic ដែលបានរកឃើញការពិតជាច្រើនដែលត្រូវបានចាត់ទុកថា ផ្ទុយទៅនឹងសម្មតិកម្មរបស់រដ្ឋាភិបាលចិន ដែលថា Covid-19 ជាជំងឺឆ្លងពីសត្វ។

ក៏ប៉ុន្តែ ចិន បានទាត់ចោលព័ត៌មានខាងលើទាំងស្រុង ដោយអះអាងទៅតាមក្រុមស្រាវជ្រាវរបស់ WHO ដែលបានសន្និដ្ឋានថា លទ្ធភាពដែលវីរុស លេចធ្លាយចេញពីបន្ទប់ពិសោធន៍ គឺពិតជា «ពិបាកកើតឡើង»៕

ប្រភព៖ Daily Mail
ប្រែសម្រួល៖ បុត្រា

June 1, 2021

តួលេខ COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី1 ខែមិថុនា ឆ្នាំ2021

រហូតមកដល់ព្រឹកថ្ងៃទី1 ខែមិថុនានេះ កម្ពុជា បានរកឃើញអ្នកឆ្លងវីរុសCovid-19 សរុបចំនួន ជាង 30,700នាក់ ខណៈពិភពលោក រកឃើញជាង 171,468,000នាក់។

នៅ កម្ពុជា ក្នុងអំឡុងថ្ងៃទី31 ខែឧសភា ក្រសួងសុខាភិបាល បានរកឃើញករណីឆ្លងថ្មីចំនួន 616នាក់ និងករណីស្លាប់ថ្មីចំនួន 6នាក់ ធ្វើឱ្យអ្នកវិជ្ជមាននឹង Covid-19 សរុប ឡើងដល់ 30,710នាក់ និងស្លាប់សរុបចំនួន 220នាក់។ ព័ត៌មានបន្ថែម សូមអានរបាយការណ៍របស់ក្រសួងសុខាភិបាល ដែលមាននៅខាងក្រោម។

គិតមកដល់បច្ចុប្បន្ន នៅទូទាំងសកលលោក មានអ្នកឆ្លង Covid-19 សរុបចំនួន 171,468,758នាក់ ក្នុងនោះមានអ្នកស្លាប់ 3,565,021នាក់ និងជាចំនួន 153,766,652នាក់ ខណៈអ្នកជំងឺ 14,137,085នាក់ កំពុងទទួលការព្យាបាល។

June 1, 2021

WHO ដាក់ឈ្មោះបែបថ្មី ឱ្យបណ្ដាវីរុសCOVID-19 ដែលបានក្លាយពូជថ្មី

អង្គការសុខភាពពិភពលោក (WHO) ប្រកាសដាក់ឈ្មោះឱ្យបណ្ដាវីរុស Covid-19 ក្លាយពូជថ្មី ទៅតាមអក្ខរក្រមភាសាក្រិក ជំនួសឱ្យការហៅឈ្មោះទៅតាមទីកន្លែងដែលពួកវាបង្ហាញវត្តមានជាលើកដំបូង។

ពិភពលោកទាំងមូល គិតមកដល់ថ្ងៃទី1 ខែមិថុនា ឆ្នាំ2021 បានរកឃើញអ្នកឆ្លងវីរុសCovid-19 សរុបចំនួន 171,464,349នាក់ ក្នុងនោះមានអ្នកស្លាប់ 3,564,976នាក់, អ្នកជាសះស្បើយចំនួន 153,743,106នាក់ និងអ្នកកំពុងសម្រាកព្យាបាលសរុបចំនួន 14,156,267នាក់។ នេះបើតាមទំព័រ័រ Worldometers។

អង្គការសុខភាពពិភពលោក កាលពីថ្ងៃទី31 ខែឧសភា បានប្រកាសអំពីវិធីដាក់ឈ្មោះថ្មី សម្រាប់បណ្ដាវីរុសCovid-19 ដែលបានបំប្លែងខ្លួន ដោយការប្រើប្រាស់អក្ខរក្រមរបស់ភាសាក្រិក ជំនួសឱ្យការហៅទៅតាមទីតាំងដែលពួកវាបានបង្ហាញវត្តមានដំបូង។ «មិនមានប្រទេសណាមួយ ដែលត្រូវរងការរើសអើង ដោយសារតែបានរកឃើញ និងរាយការណ៍អំពីវីរុសក្លាយពូជថ្មីនោះឡើយ» Maria Van Kerkhove ប្រធានក្រុមអ្នកបច្ចេកទេសរបស់ WHO ទទួលបន្ទុក Covid-19 បានបង្ហោះសារដូច្នេះនៅលើទំព័រ Twitters។

យោងតាមរបៀបដាក់ឈ្មោះថ្មី វីរុសក្លាយពូជថ្មី ឬបំប្លែងខ្លួន ដែលកើតមាននៅប្រទេសអង់គ្លេស (B.1.1.7) ត្រូវបានហៅថា «Alpha», Covid-19 បំប្លែងខ្លួនថ្មីនៅប្រទេសអាហ្វ្រិកខាងត្បូង (B.1.351) ត្រូវហៅថា «Beta», Covid-19 ក្លាយពូជថ្មីនៅ ប្រេស៊ីវីរុស (P1) ត្រូវហៅថា «Gamma»,

B.1.617.2 នៅ ឥណ្ឌា ហៅថា «Delta»។ ចំណែកបណ្ដាវីរុសCovid-19 ក្លាយពូជថ្មីដែលគួរឱ្យយកចិត្តទុកដាក់ផ្សេងទៀត នឹងត្រូវបានដាក់ឈ្មោះចាប់ពី «Epsilon» រហូតដល់ «Kappa»។

ក្រុមប្រឹក្សាជំនាញរបស់ WHO បានឱ្យដឹងថា វីធីសាស្ត្រដាក់ឈ្មោះតាមបែបថ្មីនេះ មានភាពងាយស្រួលក្នុងការហៅ និងជាក់ស្ដែងជាង សម្រាប់អ្នកដែលមិនធ្វើការនៅក្នុងវិស័យវិទ្យាសាស្ត្រ។ WHO បានបញ្ជាក់ថា វិធីដាក់ឈ្មោះបែបថ្មីនេះ ក៏មិនជំនួសឱ្យឈ្មោះដែលដាក់តាមបែបវិទ្យាសាស្ត្រនោះឡើយ និងបានឱ្យដឹងថា ឈ្មោះតាមបែបវិទ្យាសាស្ត្រ «នឹងនៅតែបន្តប្រើប្រាស់នៅក្នុងកិច្ចការសិក្សាស្រាវជ្រាវដដែល»។

នៅក្នុងពិធីបិទសន្និបាតនៃក្រុមប្រឹក្សាសុខភាពពិភពលោក លើកទី74 កាលពីថ្ងៃទី31 ខែឧសភា ប្រធាន WHO លោក Tedros Adhanom Ghebreyesus បានឱ្យដឹងថា មានកិច្ចការជាច្រើនដែលត្រូវធ្វើ ដើម្បីបញ្ចប់មហារោគរាតត្បាត Covid-19 ព្រមទាំងបានព្រមានឱ្យមានការប្រុងប្រយ័ត្នខ្ពស់ផងដែរ។

«យើងមានអារម្មណ៍ថា ត្រូវបានលើកទឹកចិត្ត នៅពេលដែលករណីឆ្លង និងស្លាប់ថ្មី លើពិភពលោក បន្តថយចុះ ប៉ុន្តែ នឹងជារឿងខុសឆ្គងធំ បើសិនប្រទេសណាមួយ គិតថា គ្រោះអាសន្នបានកន្លងផុតទៅហើយ» លោក Tedros បានថ្លែងដូច្នេះ៕

ប្រភព៖ CNN, Worldometers
ប្រែសម្រួល៖ បុត្រា

June 1, 2021

សំណួរ – ចម្លើយ ដែលយើងគួរដឹងអំពីសុខភាពមាត់ – ធ្មេញ

មិនថាថ្ងៃណាៗឡើយ រៀងរាល់ព្រឹកនៃការចាប់ផ្តើមភារកិច្ច រហូតដល់អំឡុងពេលចុងក្រោយ មុនពេលចូលគេងសម្រាករឿងសុខភាពក្នុងប្រអប់មាត់ អញ្ចាញ និងធ្មេញ នៅតែជារឿងសំខាន់ ដែលយើងត្រូវតែយកចិត្តទុកដាក់ មើលថែទាំយ៉ាងជាប់ជានិច្ច ដើម្បីការពារទុកជាមុន មុននឹងកើតរោគភ័យផ្សេង។ ខាងក្រោមនេះ គឺជាសំណួរ-ចម្លើយ ដែលយើងគួរតែដឹង អំពីសុខភាពមាត់-ធ្មេញ ដែលមានចំណុចខ្លះ យើងអាចនៅមិនទាន់ដឹងនៅឡើយ…។

-ធ្មេញពីធម្មជាតិរបស់មនុស្ស មានប៉ុន្មានឈុត?

*ឆ្លើយ៖ មាន 2ឈុត គឺធ្មេញទឹកដោះ និងធ្មេញពិតប្រាកដ

-ធ្មេញទឹកដោះ ចាប់ផ្តើមដុះឡើង ពេលអាយុប៉ុន្មាន?

*ឆ្លើយ៖ ពេលអាយុបាន 2ខួប ឬ 2ខួបកន្លះ

-ធ្មេញទឹកដោះ មានប៉ុន្មានគ្រាប់?

*ឆ្លើយ៖ 20គ្រាប់

-ហេតុអី ទើបត្រូវមើលថែទាំធ្មេញទឹកដោះ ឱ្យល្អ?

*ឆ្លើយ៖ ព្រោះវាប្រៀបដូចជាធ្មេញនាំមុខអ៊ីចឹង បើមើលថែទាំបានល្អ ធ្មេញពិតប្រាកដ ដែលដុះឡើងមកជំនួសនោះ នឹងមានភាពល្អឥតខ្ចោះ និងស្ថិតក្នុងសភាពល្អដូចគ្នា

-ធ្មេញពិតប្រាកដមានប៉ុន្មានគ្រាប់?

*ឆ្លើយ៖ 32គ្រាប់

-ធ្មេញថ្គាម 4គ្រាប់ចុងក្រោយ នឹងចាប់ផ្តើមដុះឡើងពេលណា?

*ឆ្លើយ៖ ពេលអាយុបានប្រមាណ 18ឆ្នាំឡើងទៅ

-ធ្មេញពិតប្រាកដ នឹងនៅបានយូរប៉ុនណា?

*ឆ្លើយ៖ បើមើលថែទាំបានល្អ ធ្មេញពិតប្រាកដ អាចនៅជាមួយយើង អស់មួយជីវិត

-អ្វីគឺមូលហេតុរបស់ជំងឺធ្មេញ និងអញ្ចាញ?

*ឆ្លើយ៖ កំណកអតិសុខុមប្រាណ

-កំណកអតិសុខុមប្រាណ គឺអ្វី?

*ឆ្លើយ៖ កំណកអតិសុខុមប្រាណ កើតពីមេរោគ រួមជាមួយស្ករ និងប្រូតេអ៊ីន នៅក្នុងស្ករ ច្រើនតែតោងជាប់ស្អិតនៅលើស្រទាប់ធ្មេញ

-វិធីកម្ចាត់កំណកអតិសុខុមប្រាណដែលល្អបំផុតគឺ…

*ឆ្លើយ៖ ការដុសសម្អាតធ្មេញ គួបផ្សំជាមួយការប្រើខ្សែអំបោះខាត់ធ្មេញ

-បើកម្ចាត់កំណកអតិសុខុមប្រាណមិនអស់ តើនឹងមានលទ្ធផលយ៉ាងណា?

*ឆ្លើយ៖ នឹងកើតការប្រមូលសន្សំ និងក្លាយជាកំណកកំបោរ នៅជាប់ណែននឹងធ្មេញ

-វិធីកម្ចាត់កំណកកំបោរ ដែលល្អបំផុត គឺធ្វើយ៉ាងណា?

*ឆ្លើយ៖ ទៅជួបគ្រូពេទ្យធ្មេញ (ទន្តពេទ្យ) ដើម្បីកោសកំណកកំបោរទាំងនោះចេញ

-តើត្រូវទទួលទានយ៉ាងណា ដើម្បីឱ្យសុខភាពធ្មេញល្អ?

*ឆ្លើយ៖

1.កាត់បន្ថយចំណីកំប៉ិកកំប៉ុក

2.ជ្រើសរើសទទួលទានសណ្តែក និងផ្លែឈើជំនួសម្សៅ និងស្ករ ក្នុងអាហារពេលទំនេរ

3.កាត់បន្ថយបរិមាណ និងភាពញឹកញាប់ក្នុងការទទួលទានអាហារ ដែលមានស្ករ ទឹកតែ និងកាហ្វេ។

4.ដុសសម្អាតធ្មេញ គ្រប់ពេលញ៉ាំអាហាររួច

-សារធាតុរ៉ែ ដែលជួយបង្កើនឆ្អឹង និងធ្មេញមានអ្វីខ្លះ?

*ឆ្លើយ៖ កាល់ស្យូម និងផូស្វ័រ

-អាហារដែលមានកាល់ស្យូមខ្ពស់ មានអ្វីខ្លះ?

*ឆ្លើយ៖ ទឹកដោះ ប៊័រ ស៊ុតក្រហម ត្រីតូចៗ បង្គាក្រៀម គ្រាប់ល្ងខ្មៅ បន្លែស្លឹកបៃតង ជាដើម-ល-

-ការញ៉ាំទឹកផ្លែឈើមានផលប៉ះពាល់ដល់ធ្មេញដែរឬទេ?

*ឆ្លើយ៖ ទឹកផ្លែឈើ ធ្វើឱ្យធ្មេញសឹករឹលបាន ព្រោះក្នុងទឹកផ្លែឈើមានអាស៊ីត ស៊ីទ្រិក អាចរំលាយកាល់ស្យូមក្នុងស្រទាប់ស្រោបធ្មេញបាន ដូច្នេះពេលញ៉ាំទឹកផ្លែឈើហើយ គួរញ៉ាំទឹកតាមក្រោយ ឬខ្ពុរមាត់គ្រប់ពេល។

(នៅមានត)

May 31, 2021

បរិភោគផ្លែឈើនៅពេលណាទើបល្អ?

នៅក្នុងផ្លែឈើ មានទាំងសារធាតុ Fiber(កាកសរសៃ) ប៉ូតាស្យូម វីតាមីនC និងហ្វូលេត ជាច្រើន តែការបរិភោគ ដែលមិនត្រូវក្បួន ក៏អាចធ្វើឱ្យប្រព័ន្ធការរំលាយអាហារ មានបញ្ហាដែរ ដូច្នេះដើម្បីឱ្យទទួលបានប្រយោជន៏ ពីផ្លែឈើយ៉ាងពេញទំហឹងនោះ យើងគួរដឹងពីការបរិភោគផ្លែឈើយ៉ាងត្រូវតាមក្បួន ទើបជាការប្រសើរ។

ទោះជាការញ៉ាំផ្លែឈើតែ 1ប្រភេទ ឬញ៉ាំបែបរួមគ្នាច្រើនយ៉ាង គួរញ៉ាំនៅពេលពោះទំនេរ៖

ព្រោះពេលបរិភោគចូលទៅហើយ កម្មវិធីរំលាយអាហារ នឹងធ្វើការយ៉ាងឆាប់រហ័ស ដោយរាងកាយនឹងផលិតអេនហ្សៃម៍ពិសេសម៉្យាង ចេញមកសម្រាប់ការកិនរំលាយផ្លែឈើ ធ្វើឱ្យរាងកាយអាចបឺតជ្រាបយកជាតិស្ករ និងសារធាតុអាហារបានយ៉ាងពេញទំហឹង។

បរិភោគនៅចន្លោះពេលបាយចម្បងៗ៖

ជាប្រក្រតីមនុស្សយើងតែងបរិភោគអាហារ 3ពេលក្នុង 1ថ្ងៃ ឯអំឡុងពេលចន្លោះពេលបាយនីមួយៗវិញ គឺជាពេលរបស់ផ្លែឈើ ដោយជាប្រក្រតី គឺបន្ទាប់ពីពេលបាយ ប្រមាណជា 1–2ម៉ោង តែបើសិនជាអាហារ ដែលត្រូវការប្រើពេលរំលាយយូរ ដូចជា នំបឺហ្គ៊ើរ ឬដុំសាច់ ជាដើម គួរទុកចន្លោះពេលប្រមាណ 3–4ម៉ោង សឹមបរិភោគផ្លែឈើ។

ល្អបំផុត គឺការបរិភោគផ្លែឈើ ជាអាហារដំបូងនៃថ្ងៃនីមួយៗ(ពេលព្រឹក) ពេលពោះនៅទំនេរ ឬចន្លោះរវាងពេលបាយព្រឹក និងពេលបាយថ្ងៃ៖

បើអាចជ្រើសរើសអាហារពេលព្រឹកបាន អ្នកគួរជ្រើសរើសបរិភោគមុខម្ហូប ធ្វើពីផ្លែឈើ រួមជាមួយគ្នាតែម្តង ដូចជា ហ្វ្រ៊ុតសាលាដ ផ្លែប៉ោម ឬក៏ទឹកផ្លែឈើកិន ហើយគួរចៀសវាងការញ៉ាំផ្លែឈើមុនពេលចូលគេង ព្រោះជាតិស្ករដែលបានពីផ្លែឈើ មានថាមពលខ្លាំង ធ្វើឱ្យរាងកាយស្វាហាប់រហូតអាចធ្វើឱ្យអ្នកគេងមិនលក់។

បរិភោគក្នុងរូបភាពជាទឹកផ្លែឈើកិន៖

ទឹកសណ្តែកលឿង ណាត់មៀលគ៍ ទឹកដូង ឬយ៉ាអួ គឺជាជម្រើសដ៏ល្អ សម្រាប់កិនលាយជាមួយផ្លែឈើ ព្រោះមិនធ្វើឱ្យលំបាកដល់ប្រព័ន្ធកិនរំលាយអាហារ ក្រៅពីនោះ អ្នកគួរជ្រើសរើសទទួលទានផ្លែឈើ ដែលមានជាតិស្ករតិច ដូចជាផ្លែប៉ោមពណ៌បៃតង ជាដើម វានឹងល្អចំពោះសុខភាពយើងខ្លាំងជាង។

ឬបរិភោគក្នុងរូបភាពជាផ្លែឈើក្រៀម៖

តែមិនគួរបរិភោគផ្លែឈើក្រៀមណា ដែលមានជាតិផ្អែមខ្លាំង និងក្នុងបរិមាណច្រើនជ្រុលពេកឡើយ គួរកំណត់បរិមាណក្នុងការបរិភោគ ឬជ្រើសរើសទទួលទានតែក្នុងឱកាសណាពិសេសៗបានហើយ៕

May 31, 2021

លទ្ធផលនៃការចាក់វ៉ាក់សាំងបង្ការ COVID-19 នៅកម្ពុជា គិតត្រឹមថ្ងៃទី30 ខែឧសភា ឆ្នាំ2021

ក្រសួងសុខាភិបាលកម្ពុជា នាយប់ថ្ងៃទី30 ខែឧសភា បានឱ្យដឹងថា អត្រានៃពលរដ្ឋដែលបានទទួលការចាក់វ៉ាក់សាំងបង្ការវីរុសCovid-19 បានកើនដល់ 25.67% បើធៀបនឹងពលរដ្ឋគោលដៅចំនួន 10លាននាក់ ដែលរាជរដ្ឋាភិបាលបានកំណត់។

ក្នុងចំណោមពលរដ្ឋដែលបានទទួលការចាក់វ៉ាក់សាំង Covid-19 មាន 2,567,493នាក់ បានចាក់ម្ជុល (ដូស) ទីមួយ និង 1,961,346 បានចាក់ម្ជុលទីពីរ (រួចរាល់)។

កម្ពុជា បានផ្ដើមយុទ្ធនាការចាក់វ៉ាក់សាំងបង្ការវីរុសCovid-19 ចាប់ពីថ្ងៃទី10 ខែកុម្ភៈ ឆ្នាំ2021 ដោយប្រើប្រាស់វ៉ាក់សាំងចំនួន 3ប្រភេទ រួមមាន វ៉ាក់សាំង Sinopharm របស់ក្រុមហ៊ុនរដ្ឋចិន China National Pharmaceutical Group Corporation (ហៅកាត់ថា Sinopharm) ផលិតនៅប្រទេសចិន, វ៉ាក់សាំងឥណ្ឌា Covishield ប្រើរូបមន្តរបស់ក្រុមហ៊ុនអង់គ្លេស AstraZeneca និងវ៉ាក់សាំង Sinovac (CoronaVac) របស់ក្រុមហ៊ុនចិន Sinovac Biotech ផលិតនៅប្រទេសចិន។

ព័ត៌មានលម្អិត សូមអានរបាយការណ៍របស់ អនុគណៈកម្មការតាមដាននិងវាយតម្លៃ នៃគណៈកម្មការចំពោះកិច្ចចាក់វ៉ាក់សាំង Covid-19 ក្របខណ្ឌទូទាំងប្រទេស (គ.វ.ក-១៩) ដែលមានដូចខាងក្រោម៖
ប្រភព៖ ក្រសួងសុខាភិបាល
ដកស្រង់៖ បុត្រា

May 31, 2021

វ៉ាក់សាំង COVID-19 របស់ចិន មានផលប៉ះពាល់តិច និងមិនទាន់មានករណីស្លាប់

ក្រុមហ៊ុន Sinopharm ប្រកាសលទ្ធផលនៃការសាកល្បងប្រើប្រាស់ដំណាក់កាលទីបី ក្រោយពីវ៉ាក់សាំង Covid-19 ចំនួន 200លានដូស របស់ក្រុមហ៊ុនចិនមួយនេះ ត្រូវបានចាក់នៅជុំវិញពិភពលោក។

យោងតាមលទ្ធផលនៃការស្រាវជ្រាវដែលត្រូវបានចុះផ្សាយកាលពីថ្ងៃទី26 ខែឧសភា នៅលើទស្សនាវដ្ដីសមាគមវេជ្ជសាស្ត្រអាមេរិក វ៉ាក់សាំង Covid-19 របស់ក្រុមហ៊ុន Sinopharm ដែលផលិតនៅទីក្រុងប៉េកាំង មានប្រសិទ្ធភាព 78.1%។ វ៉ាក់សាំង Covid-19 របស់ Sinopharm មុននោះ ក៏ត្រូវបានអង្គការសុខភាពពិភពលោក (WHO) អនុម័តឱ្យប្រើប្រាស់បន្ទាន់រួចហើយដែរ។

ចំណែកវ៉ាក់សាំងមួយប្រភេទទៀតរបស់ Sinopharm ផលិតដោយក្រុមហ៊ុនបុត្រសម្ព័ន្ធនៅទីក្រុង Wuhan ប្រទេសចិន មានប្រសិទ្ធភាព 72.8%។ វ៉ាក់សាំងនេះ កំពុងស្ថិតក្នុងដំណាក់កាលស្នើ WHO ផ្ដល់សិទ្ធឱ្យធ្វើចរាចរណ៍បន្ទាន់ និងត្រូវបានអនុម័តដោយមានលក្ខខណ្ឌអមនៅប្រទេសចិន។

លទ្ធផលដែលទទួលបានពីការសាកល្បងប្រើប្រាស់លើកទីបីរបស់ Sinopharm ត្រូវបានធ្វើឡើងដោយយោងទៅលើទិន្នន័យដែលប្រមូលបានពីអ្នកស្ម័គ្រចិត្តចំនួន 40,411នាក់ នៅ UAE និងបារ៉ែន ដែលបានទទួលការចាក់វ៉ាក់សាំងនេះ កាលពីឆ្នាំ2020។ អ្នកស្ម័គ្រចិត្ត ភាគច្រើនមានសុខភាពល្អ និងមានវ័យចាប់ពី 18-59ឆ្នាំ ប៉ុន្តែក៏មានប្រហែល 600នាក់ មានអាយុលើសពី 60ឆ្នាំផងដែរ។

លទ្ធផលខាងលើ បានបង្ហាញថា អ្នកដែលបានជួបផលប៉ះពាល់មានចំនួន 201ករណី ក្នុងនោះមាន 2ករណីមានសភាពធ្ងន់ធ្ងរបំផុត ទាក់ទិននឹងវ៉ាក់សាំងរបស់ Sinopharm ដែលផលិតនៅទីក្រុងប៉េកាំង។ នោះគឺបុរសវ័យ 30ឆ្នាំ ដែលត្រូវបានពិនិត្យឃើញថា អាចប៉ះពាល់ដល់សរសៃវិញ្ញាណ និងស្ត្រីវ័យ 35ឆ្នាំ មានអាការក្អួតចង្អោរខ្លាំង និងត្រូវបញ្ជូនទៅកាន់មន្ទីរពេទ្យ។

ទស្សនាវដ្ដី សមាគមវេជ្ជសាស្ត្រអាមេរិក ក៏បានបញ្ជាក់ថា ការពិសោធដំណាក់កាលទីបីរបស់ Sinopharm ត្រូវបានធ្វើឡើងភាគច្រើនទៅលើក្រុមមនុស្សដែលមានវ័យនៅក្មេង មិនអាចបញ្ជាក់អំពីប្រសិទ្ធភាពចំពោះអ្នកដែលមានជំងឺប្រចាំកាយ ស្ត្រី និងមនុស្សវ័យចំណាស់។

យោងតាមទិន្នន័យកាលពីដើមខែនេះ វ៉ាក់សាំង Sinopharm ប្រមាណ 200លានដូស ត្រូវបានប្រើប្រាស់នៅក្នុងប្រទេស និងដែនដីចំនួន 42 លើពិភពលោក ឈរពីក្រោយ AstraZeneca, Pfizer-BioNTech និង Moderna។

វ៉ាក់សាំង Sinopharm កន្លងមក ធ្លាប់ធ្វើឱ្យមានការសង្ស័យច្រើនពីសំណាក់ក្រុមអ្នកវិទ្យាសាស្ត្រ ដោយសារតែមានទិន្នន័យតិចតួចស្ដីពីការពិសោធន៍លើមនុស្សដំណាក់កាលចុងក្រោយ ដែលត្រូវបានប្រកាសដោយរដ្ឋាភិបាលចិន ក៏ដូចជាការបង្ហើបពីក្រុមហ៊ុននេះ៕

ប្រភព៖ SCMP
ប្រែសម្រួល៖ បុត្រា

May 29, 2021

ពលរដ្ឋឥណ្ឌា គោរពបូជា អាទិទេព CORONA ដើម្បីការពារមនុស្សពី COVID-19

ឥណ្ឌា៖ សាសនិកហិណ្ឌូជាច្រើន បាននាំគ្នាមកបួងសួងជារៀងរាល់ថ្ងៃ នៅវិហារមួយដែលស្ថិតក្នុងរដ្ឋ Tamil Nadu ជាកន្លែងដែលមានរូបសំណាកអាទិទេពថ្មីមួយទៀតរបស់ពួកគេ នោះគឺ Corona។

ទីភ្នាក់ងារសារព័ត៌មានបារាំង AFP បានឱ្យដឹងថា រូបសំណាកអាទិទេព Corona មួយអង្គ បានបង្ហាញខ្លួននៅក្នុងទីក្រុង Coimbatore ក្នុងគ្រាប្រទេសឥណ្ឌាជួបបញ្ហាលំបាកខ្លាំង ដោយសារតែរលកនៃការវាយប្រហារលើកទីពីររបស់វីរុសCovid-19។

វិហារ Kamatchipuri Adhinam ត្រូវបានបិទទ្វារក្នុងពេល Covid-19 ឆ្លងរាលដាលខ្លាំងនៅទីក្រុង Coimbatore ប៉ុន្តែ អ្នកកាន់សាសនាហិណ្ឌូជាច្រើន នៅតែមកកាន់ទីនេះដើម្បីបួងសួងនៅចំពោះមុខរូបសំណាកអាទិទេព Corona។ នៅខាងមុខរូបសំណាកអាទិទេព Corona ក៏មានរូបសំណាកវីរុសCorona ចំនួនពីរផងដែរ ក្នុងនោះមាន មួយធ្វើអំពីថ្ម និងមួយទៀតធ្វើអំពីឈើក្រអូប។

មូលហេតុដែលនាំឱ្យសាសនិកហិណ្ឌូ គោរពអាទិទេព Corona នេះ ត្រូវបានគេជឿថា ដើម្បីបួងសួងសុំបញ្ចប់មហារោគរាតត្បាត Covid-19 ឱ្យបានឆាប់រហ័ស។

គិតមកដល់ព្រឹកថ្ងៃទី29 ខែឧសភា ឥណ្ឌា បានរកឃើញអ្នកឆ្លងវីរូសCovid-19 សរុបចំនួន 27,719,431នាក់ ក្នុងនោះមាន 322,384នាក់បានស្លាប់, 25,170,952នាក់ បានជា និង 2,226,095នាក់ កំពុងទទួលការព្យាបាល៕

ប្រភព៖ AFP,
ប្រែសម្រួល៖ បុត្រា

May 29, 2021

Category: សុខភាព