សុខភាព - La Reine Media

ថ្នាំព្យាបាលជំងឺ COVID-19 របស់ កូរ៉េខាងត្បូង មានប្រសិទ្ធភាព នៅក្នុងការពិសោធលើមនុស្ស ដំណាក់កាលទីបី

ប្រភពព័ត៌មានពីរដ្ឋធានី សេអ៊ូល បានឱ្យដឹងថា Celltrion Inc. ដែលជាក្រុមហ៊ុនផលិតឱសថធំមួយរបស់ កូរ៉េខាងត្បូង នាថ្ងៃទី14 ខែមិថុនានេះ បានប្រកាសលទ្ធផលនៃការពិសោធលើមនុស្ស ដំណាក់កាលទីបីនៅទូទាំងពិភពលោក ចំពោះ Rekirona ដែលជាថ្នាំព្យាបាលជំងឺ COVID-19 ដោយប្រើប្រាស់អង្គបដិប្រាណ ដែលអភិវឌ្ឍដោយក្រុមហ៊ុននេះផ្ទាល់។

ការពិសោធនេះ គឺជា ផ្នែកដ៏សំខាន់មួយ នៅក្នុងការស្រាវជ្រាវដើម្បីបញ្ជាក់អំពីសុវត្ថិភាព និងប្រសិទ្ធភាពទាំងស្រុងរបស់ថ្នាំ Rekirona។ លទ្ធផលនៃការពិសោធ បានបង្ហាញថា ថ្នាំ Rekirona នេះ បានកាត់បន្ថយពេលវេលានៃការព្យាបាល និងហានិភ័យនៃការធ្លាក់ខ្លួនឈឺធ្ងន់ របស់អ្នកជំងឺ Covid-19។

ជាក់ស្ដែង ថ្នាំ Rekirona កាត់បន្ថយហានិភ័យនៃការធ្លាក់ខ្លួនឈឺធ្ងន់រហូតដល់ 54% បើធៀបអ្នកជំងឺដែលមិនបានប្រើថ្នាំនេះ។ ចំណែករយៈពេលនៃការព្យាបាលជាសះស្បើយ ក៏ត្រូវបានកាត់បន្ថយជាមធ្យម 4.9ថ្ងៃ ចំពោះអ្នកជំងឺ Covid-19 ទាំងអស់ និង 4.7 ចំពោះអ្នកជំងឺ Covid-19 ធ្ងន់ធ្ងរ។

ថ្នាំ Rekirona ត្រូវបាននាយកដ្ឋានគ្រប់គ្រងឱសថរបស់ កូរ៉េខាងត្បូង ផ្ដល់ការអនុញ្ញាតឱ្យធ្វើចរាចរណ៍ កាលពីខែកុម្ភៈ ឆ្នាំ2021។ ប្រការនេះ នាំឱ្យ Rekirona ក្លាយជាថ្នាំព្យាបាលជំងឺ Covid-19 ដំបូង ដែលត្រូវបានផលិតនៅប្រទេស កូរ៉េខាងត្បូង។

Rekirona គឺជាអង្គបដិប្រាណម៉ូណូក្លូន (monoclonal antibodies) ដែលមានសារធាតុប្រឆាំងនឹងវីរុស Covid-19។ អង្គបដិប្រាណម៉ូណូក្លូន គឺជា ប្រូតេអ៊ីន មួយប្រភេទ ដែលត្រូវបានរាងកាយផលិតឡើង ដើម្បីជ្រៀតចូលកោសិកាដែលបានឆ្លងវីរុស។ ថ្នាំនេះ កន្លងមក ត្រូវបានអនុញ្ញាតឱ្យប្រើប្រាស់បន្ទាន់រួចហើយ នៅក្នុងប្រទេសជាច្រើនក្នុងពិភពលោក។

ក្រុមហ៊ុន Celltrion មានគម្រោងដាក់ពាក្យសុំច្បាប់ធ្វើចរាចរណ៍ថ្នាំនេះ ទៅកាន់ស្ថាប័នគ្រប់គ្រងអាហារ និងឱសថ សហរដ្ឋអាមេរិក (FDA) និងស្ថាប័នគ្រប់គ្រងឱសថ អឺរ៉ុប (EMA) នៅក្នុងឆ្នាំនេះ៕

ប្រភព៖ Reuters
ប្រែសម្រួល៖ បុត្រា

June 14, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី12 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី12 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 638នាក់, អ្នកជាចំនួន 605នាក់ និងអ្នកស្លាប់ថ្មីចំនួន 9នាក់បន្ថែមទៀត នៅក្នុងថ្ងៃទី11 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 37,959នាក់ ក្នុងនោះមាន 320នាក់បានបាត់បង់ជីវិត,

31,222នាក់បានជា និងប្រមាណ 6,390នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 176,043,397នាក់ត្រូវបានរកឃើញ ក្នុងនោះមាន 159,609,343នាក់បានជា, 3,800,625នាក់បានស្លាប់ និង 12,633,429នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 12, 2021

តើប្រទេសនីមួយៗនៅ G7 បានសន្យាផ្ដល់វ៉ាក់សាំង COVID-19 ប៉ុន្មានដូស និងតាមយន្តការអ្វីខ្លះ ដល់ពិភពលោក?

ដោយសារតែបាត់បង់តុល្យភាពក្នុងការបែងចែកវ៉ាក់សាំង យុទ្ធនាការទប់ទល់នឹង Covid-19 ជាសកល បាន និងកំពុងជួបឧបសគ្គ ដូច្នេះ គំនិតផ្ដួចផ្ដើមដែលមានឈ្មោះថា COVAX ដែលជាកម្មវិធីចែករំលែកវ៉ាក់សាំងដែលគាំទ្រដោយអង្គការសហប្រជាជាតិ បានកំណត់គោលដៅ ផ្ដល់វ៉ាក់សាំងចំនួន 2ពាន់លានដុល្លារ ដល់បណ្ដាប្រទេសក្រីក្រ នៅក្នុងឆ្នាំ2021នេះ។ ក្នុងនោះ មេដឹកនាំបណ្ដាប្រទេសឧស្សាហកម្មជឿនលឿនទាំង 7 (G7) ថ្មីៗនេះ ក៏បានសន្យាផ្ដល់វ៉ាក់សាំងបង្ការ Covid-19 រាប់រយលានដូស ដល់បណ្ដាប្រទេសក្រីក្រ។

មុនពេល សហរដ្ឋអាមេរិក និងអង់គ្លេស ប្រកាសឱ្យដឹងអំពីកញ្ចប់ជំនួយជាវ៉ាក់សាំងថ្មីបំផុតរបស់ខ្លួន កម្មវិធី COVAX ទើបតែទទួលបានជំនួយជាវ៉ាក់សាំងពីបណ្ដាប្រទេស ប្រហែល 150លានដូសប៉ុណ្ណោះ ដែលនេះ ទាបជាងឆ្ងាយបើធៀបនឹងតម្រូវការ 250លានដូស នៅចុងខែកញ្ញា។ ខាងក្រោមនេះគឺជាការសន្យារបស់បណ្ដាប្រទេសក្នុងសម្ព័ន្ធ G7។

សហរដ្ឋអាមេរិក ៖ ប្រធានាធិបតី Joe Biden កាលពីថ្ងៃទី10 ខែមិថុនា បានប្រកាសអំពីគម្រោងទិញវ៉ាក់សាំង Pfizer ចំនួន 500លានដូស ដើម្បីផ្ដល់ឱ្យប្រទេសចំនួន 92 ដែលមានចំណូលទាប និងសហភាពអាហ្វ្រិក (African Union)។ យន្តការផ្ដល់ជំនួយនេះ នឹងត្រូវធ្វើឡើងតាមកម្មវិធី COVAX ដោយ 200លានដូសសម្រាប់ឆ្នាំ2021 និង 300លានដូសសម្រាប់ឆ្នាំ2022។

អង់គ្លេស ៖ នាយករដ្ឋមន្ត្រី Boris Johnson អះអាងថា G7 សន្យាផ្ដល់វ៉ាក់សាំងប្រហែល 1ពាន់លានដូសដល់ពិភពលោក នៅចុងឆ្នាំ2022។ អង់គ្លេសក៏សន្យាថា នឹងរួមចំណែកយ៉ាងតិច 100លានដូស ដោយចាប់ផ្ដើមពីពេលនេះ ដល់ឆ្នាំ2022។

សហភាពអឺរ៉ុប (EU) ៖ ប្រធានគណៈកម្មករអឺរ៉ុប Ursula von der Leyen បានប្រកាសថា EU រួមចំណែក ផ្ដល់វ៉ាក់សាំងយ៉ាងតិច 100លានដូស ដល់បណ្ដាប្រទេសដែលមានចំណូលមធ្យម និងទាប គិតត្រឹមចុងឆ្នាំនេះ។ ក្នុងនោះ បារាំង នឹងផ្ដល់ 30លានដូស, អាល្លឺម៉ង់ 30លានដូស និង អ៊ីតាលី 15លានដូស។ បារាំង មុននេះ បានផ្ដល់វ៉ាក់សាំង AstraZeneca ចំនួន 184,000ដូស ដល់ប្រទស សេណេហ្គាល តាមរយៈ COVAX។

ជប៉ុន ៖ រដ្ឋាភិបាលរបស់នាយករដ្ឋមន្ត្រី Yoshihide Suga អះអាងថា នឹងរួមចំណែក ផ្ដល់វ៉ាក់សាំង ដល់កម្មវិធី COVAX ចំនួន 30លានដូស។ កាលពីសប្ដាហ៍មុន ជប៉ុន បានប្រគល់វ៉ាក់សាំង AstraZeneca ចំនួន 1.24លានដូស ដល់កោះតៃវ៉ាន់។

កាណាដា ៖ កាណាដា កំពុងពិភាក្សាជាមួយនឹងដៃគូសហការ ដើម្បីចែករំលែកវ៉ាក់សាំងដែលនៅសល់របស់ខ្លួន ដល់បណ្ដាប្រទេស តាមរយៈកម្មវិធី COVAX។ ប៉ុន្តែ កាណាដា មិនទាន់ប្រកាសអំពីគម្រោងផ្ដល់ជំនួយជាវ៉ាក់សាំងណាមួយនៅឡើយ៕

ប្រភព៖ Al Jazeera
ប្រែសម្រួល៖ បុត្រា

June 12, 2021

ឥណ្ឌា៖ អ្នកជំងឺCovid-19 ជាច្រើននាក់ ធ្វើចត្តាឡីស័កលើដើមឈើ ដូចក្នុងរឿង Tarzan

ដោយសារតែផ្ទះចង្អៀតពេក ទើបពលរដ្ឋជាច្រើននៅប្រទេស ឥណ្ឌា ត្រូវនឹករកវិធីសាស្ត្រធ្វើចត្តាឡីស័កចម្លែកជាងគេ ដើម្បីបង្ការការឆ្លងរាលដាលនៃ Covid-19។

ថ្មីៗនេះ សារព័ត៌មាន ឥណ្ឌា បានរាយការណ៍ថា កំលោះវ័យ 18ឆ្នាំម្នាក់ មានឈ្មោះថា Shiva រស់នៅក្នុងភូមិ Telangana បានឆ្លងកាត់ការរស់នៅរយៈពេល 11ថ្ងៃ នៅលើដើមឈើ ដើម្បីចៀសវាងការចម្លងវីរុសCovid-19 ដល់គ្រួសារ បន្ទាប់ពីខ្លួនវិជ្ជមាននឹងវីរុសនេះ។

នៅពេលប្រទេសឥណ្ឌា ដាក់បម្រាមគោចរទូទាំងប្រទេសកាលពីឆ្នាំទៅ ពលករចំណាកស្រុកជាច្រើន បានត្រលប់ទៅស្រុកកំណើត ព្រោះតែកន្លែងធ្វើការត្រូវគេបិទទ្វារ។ ពេលនោះ មានមនុស្សជាច្រើនត្រូវបង្ខំចិត្តធ្វើចត្តាឡីស័កតាមវិធីផ្សេងៗ ដែលអាចធ្វើទៅបាន។

Shiva គឹជានិស្សិតម្នាក់ កំពុងសិក្សានៅទីក្រុង Hyderabad នៃរដ្ឋ Telangana។ នៅពេល Covid-19 ឆ្លងរាលដាលខ្លាំងនៅទីក្រុង កំលោះ Shiva ក៏ត្រលប់មកស្រុកវិញ។ Shiva ត្រូវបានគេធ្វើតេស្តឃើញថា វិជ្ជមាននឹង Covid-19 កាលពីថ្ងៃទី04 ខែឧសភា ឆ្នាំ2021 ហើយក៏ត្រូវក្រុមគ្រូពេទ្យស្នើឱ្យនៅដាច់ដោយឡែកពីគ្រួសារ។

ក៏ប៉ុន្តែ ដោយសារផ្ទះចង្អៀតពេក Shiva ក៏នឹកឃើញវិធីចម្លែកមួយ៖ Shiva យកដើមឫស្សី ចងភ្ជាប់នឹងមែកឈើ ដើម្បីបង្កើតជាកន្លែងស្នាក់នៅប្រចាំថ្ងៃរបស់ខ្លួន។ កំលោះនេះក៏បង្កើតប្រព័ន្ធខ្សែរូត និងឧបករណ៍ចាំបាច់សម្រាប់ប្រើប្រាស់ ក៏ដូចជាសម្រាប់ទទួលអាហារពីគ្រួសារ។

Shiva និយាយថា៖ «ពុំមានអ្នកណាម្នាក់នៅក្នុងភូមិ ហ៊ានមកជួបខ្ញុំទេ ព្រោះខ្លាច Covid-19។ ប៉ុន្តែ ខ្ញុំគិតថា មិនចាំបាច់ភ័យខ្លាចពេកទេ អ្នកអាចយកឈ្នះលើវា ដោយការគិតប្រកបដោយវិជ្ជមាន»។ Shiva ឱ្យដឹងថា ក្នុងពេលសម្រាកលើដើមឈើ គាត់អានសៀវភៅ ស្ដាប់ចម្រៀង និងនិយាយគ្នាលេងជាមួយមិត្តភ័ក្ដិ។

រហូតដល់ពេលអ្នកយកព័ត៌មានបានដឹងអំពីហេតុការណ៍នេះ Shiva ពេលនោះក៏ធ្វើចត្តាឡីស័កបាន 11ថ្ងៃរួចហើយ។ ភូមិដែល Shiva រស់នៅ មានគ្រួសារប្រមាណ 350គ្រួ ប៉ុន្តែ មណ្ឌលសុខភាពនៅឆ្ងាយពីនោះ 5គម ខណៈមន្ទីរពេទ្យដែលនៅក្បែរបំផុត ក៏មានចម្ងាយរហូតដល់ 30គម។

បើទោះជាមណ្ឌលធ្វើចត្តាឡីស័កថ្មី ត្រូវបានបង្កើតឡើងនៅក្នុងទីរួមស្រុក កាលពីថ្ងៃទី13 ខែឧសភា ប៉ុន្តែ មនុស្សតិចតួចណាស់ដែលបានដឹង ដូច្នេះ ពួកគេត្រូវរកវិធីធ្វើចត្តាឡីស័កផ្ទាល់ខ្លួន។ ក្រៅពី Shiva ពលរដ្ឋជាច្រើនក្នុងភូមិ ក៏ត្រូវធ្វើចត្តាឡីស័កដោយឡែកនៅក្នុងបន្ទប់ទឹក ខ្ទម ឬតង់។ល។

ប្រភព៖ Indiatoday
ប្រែសម្រួល៖ បុត្រា

June 11, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី11 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី11 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 655នាក់, អ្នកជាចំនួន 810នាក់ និងអ្នកស្លាប់ថ្មីចំនួន 11នាក់បន្ថែមទៀត នៅក្នុងថ្ងៃទី10 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 37,321នាក់ ក្នុងនោះមាន 311នាក់បានបាត់បង់ជីវិត,

20,617នាក់បានជា និងប្រមាណ 6.393នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 175,622,445នាក់ត្រូវបានរកឃើញ ក្នុងនោះមាន 159,171,963នាក់បានជា, 3,788,723នាក់បានស្លាប់ និង 12,661,759នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 11, 2021

សហរដ្ឋអាមេរិក មានគម្រោងផ្ដល់វ៉ាក់សាំង Covid-19 ចំនួន 500លានដូស ដល់បណ្ដាប្រទេស

ប្រធានាធិបតី Joe Biden នឹងប្រកាសជាផ្លូវការនូវគម្រោងទិញវ៉ាក់សាំងបង្ការវីរុសCovid-19 ចំនួន 500លានដូស ដើម្បីចែកឱ្យបណ្ដាប្រទេសដែលរងផលប៉ះពាល់ពីវិបត្តិសុខភាព នៅក្នុងកិច្ចប្រជុំរបស់ក្រុមប្រទេស G7។

សារព័ត៌មាននៅ សហរដ្ឋអាមេរិក ដកស្រង់ប្រភពព័ត៌មាននានា កាលពីថ្ងៃទី9 ខែមិថុនា ឱ្យដឹងថា អាជ្ញាធររបស់លោក Biden មានគម្រោងទិញវ៉ាក់សាំង Covid-19 ចំនួន 500លានដូស ពីក្រុមហ៊ុន Pfizer-BioNTech ដើម្បីចែកឱ្យប្រទេសផ្សេងៗក្នុងពិភពលោក។

ប្រធានាធិបតីសហរដ្ឋអាមេរិក នឹងប្រកាសជាផ្លូវការអំពីគម្រោងខាងលើនេះ នៅក្នុងកិច្ចប្រជុំរបស់ក្រុមប្រទេសឧស្សាហកម្មរីកចម្រើនជាងគេក្នុងពិភពលោក (G7) ដែលនឹងត្រូវធ្វើឡើងនៅក្នុងប្រទេសអង់គ្លេស នាពេលដ៏ខ្លីខាងមុខ។ នេះបើតាមសារព័ត៌មាន Washington Post និង New York Times។

ប្រធានាធិបតី Biden ក៏បាននិយាយដល់បញ្ហានេះ នៅពេលឆ្លើយនឹងសំណួររបស់ក្រុមអ្នកសារព័ត៌មាន មុនពេលលោកធ្វើដំណើរទៅកាន់ទ្វីបអឺរ៉ុប។ លោកបញ្ជាក់ថា៖ «ខ្ញុំមានផែនការ ហើយនឹងប្រកាសឆាប់ៗនេះ»។

ចំណែកសារព័ត៌មាន Times បានឱ្យដឹងថា លោក Biden រួមនឹងនាយកប្រតិបត្តិនៃក្រុមហ៊ុន Pfizer លោក Albert Bourla នឹងចូលរួមសន្និសីទសារព័ត៌មានមួយ ដើម្បីប្រកាសអំពីគម្រោងខាងលើ។

យោងតាមសារព័ត៌មាន Times កិច្ចព្រមព្រៀងនេះនឹងអនុញ្ញាតឱ្យ សហរដ្ឋអាមេរិក មិនត្រូវបង់ថ្លៃដែលរួមទាំងខ្ទង់ចំណេញសម្រាប់វ៉ាក់សាំងដែលបានបញ្ជាទិញ ជាមួយនឹងគម្រោងទទួលបាន 200លានដូស ក្នុងឆ្នាំនេះ និង 300លានដូសក្នុងឆ្នាំ2022។

បច្ចុប្បន្ន សហរដ្ឋអាមេរិក បានចាក់វ៉ាក់សាំងបង្ការ Covid-19 រួចរាល់ ជូនដល់ពលរដ្ឋជាងពាក់កណ្ដាល នៃប្រទេសនេះ និងបានឱ្យដឹងថា អត្រានៃករណីឆ្លង បានថយចុះក្នុងរយៈពេលកន្លង៕

ប្រភព៖ Reuters
ប្រែសម្រួល៖ បុត្រា

June 10, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី10 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី10 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 426នាក់, អ្នកជាចំនួន 760នាក់ និងអ្នកស្លាប់ថ្មីចំនួន 11នាក់បន្ថែមទៀត នៅក្នុងថ្ងៃទី9 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 36,666នាក់ ក្នុងនោះមាន 300នាក់បានបាត់បង់ជីវិត,

29,807នាក់បានជា និងប្រមាណ 6,900នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 175,181,016នាក់ត្រូវបានរកឃើញ ក្នុងនោះមាន 158,698,660នាក់បានជា, 3,777,167នាក់បានស្លាប់ និង 12,705,189នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 10, 2021

រាជធានីភ្នំពេញ កំណត់ផ្នែកខ្លះនៃខណ្ឌពោធិ៍សែនជ័យ ជា «តំបន់លឿងទុំ»

រដ្ឋបានរាជធានីភ្នំពេញ កំណត់ផ្នែកខ្លះនៅតាម មូលដ្ឋានសង្កាត់ចោមចៅទី2 និងសង្កាត់ចោមចៅទី3 ខណ្ឌពោធិ៍សែនជ័យ ជា «តំបន់លឿងទុំ» រយៈពេល 2សប្តាហ៍ ដើម្បីទប់ស្កាត់ជំងឺCovid-19។ នេះបើតាមសេចក្ដីសម្រេច របស់ អភិបាលរាជធានីភ្នំពេញ។

(ភ្នំពេញ)៖ អភិបាលរាជធានីភ្នំពេញលោក ឃួង ស្រេង នៅថ្ងៃទី9 ខែមិថុនា ឆ្នាំ2021នេះ បានសម្រេចកំណត់ផ្នែកខ្លះនៃភូមិចោមចៅ3 ក្នុងសង្កាត់ចោមចៅទី2 និងផ្នែកខ្លះនៃភូមិត្រពាំងពោធិ៍ ផ្នែកខ្លះនៃភូមិព្រៃព្រីងខាងជើង2 និងផ្នែកខ្លះ នៃភូមិជម្ពូវ័ន2 នៃសង្កាត់ចោមចៅទី3 របស់ខណ្ឌពោធិ៍សែនជ័យ ជា «តំបន់លឿងទុំ» រយៈពេល 14ថ្ងៃ គិតចាប់ពីថ្ងៃទី1០ ខែមិថុនា រហូតដល់ថ្ងៃទី23 ខែមិថុនា ឆ្នាំ2021 ដើម្បីទប់ស្កាត់ការឆ្លងរាលដាលនៃវីរុសCovid-19។

ព័ត៌មានលម្អិត សូមអានសេចក្ដីសម្រេចរបស់អភិបាល រាជធានីភ្នំពេញ ដែលមាននៅខាងក្រោម៖
ប្រភព៖ រដ្ឋបាលរាជធានីភ្នំពេញ
ដកស្រង់៖ បុត្រា

June 9, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី9 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី9 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 729នាក់និងអ្នកស្លាប់ថ្មីចំនួន 11នាក់បន្ថែមទៀត នៅក្នុងថ្ងៃទី8 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 36,240នាក់ ក្នុងនោះមាន 289នាក់បានបាត់បង់ជីវិត,

29,047នាក់បានជា និង 6,584នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។
នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 174,749,068នាក់ត្រូវបានរកឃើញ ក្នុងនោះមាន 158,157,982នាក់បានជា, 3,762,883នាក់បានស្លាប់ និង 12,828,203នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 9, 2021

COVID-19 បំប្លែងខ្លួន B.1.617.2 ពី ឥណ្ឌា កំពុងរាតត្បាត សិង្ហបុរី

ការកំណត់ទិន្នន័យហ្ស៊ែន ឬឌីអិនអេ (DNA) របស់វីរុសCovid-19 (genomic sequencing) បានបង្ហាញថា វីរុសបំប្លែងខ្លួនឈ្មោះ Delta ដែលមានប្រភពពីប្រទេសឥណ្ឌា កំពុងបង្ហាញវត្តមានភាគច្រើននៅក្នុងចំណោមករណីឆ្លង Covid-19 នៅ សិង្ហបុរី ដែលនេះគឺជាភ័ស្ដុតាងបញ្ជាក់អំពីកម្រិតនៃការឆ្លងរាលដាលយ៉ាងឆាប់រហ័សរបស់វីរុសក្លាយពូជថ្មី។

អ្នកនាំពាក្យរបស់ក្រសួងសុខាភិបាលសិង្ហបុរី កាលពីម្សិលមិញ បានឱ្យដឹងថា នៅក្នុងចំណោមករណីវិជ្ជមាននឹង Covid-19 នៅប្រទេសនេះ មាន 449ករណីត្រូវបានរកឃើញថា មានផ្ទុកវីរុសបំប្លែងខ្លួនដ៏គួរឱ្យព្រួយបារម្ភ ក្នុងនោះមាន 428នាក់ ឆ្លងវីរុសបំប្លែងខ្លួន Delta ដែលមានប្រភពពីប្រទេសឥណ្ឌា។ សិង្ហបុរី បច្ចុប្បន្ន បានរកឃើញអ្នកវិជ្ជមាននឹង Covid-19 សរុបចំនួន 62,219ករណី ក្នុងនោះមាន 34នាក់បានស្លាប់។ សិង្ហបុរី គឺជាប្រទេសមួយក្នុងចំណោមប្រទេសដ៏តិចតួច ដែលធ្វើការកំណត់ហ្ស៊ែន លើករណីវិជ្ជមាននឹង Covid-19 ទាំងអស់ដែលបានរកឃើញ។

អ្នកនាំពាក្យខាងលើ ឱ្យដឹងថា យោងតាមការវិភាគបច្ចុប្បន្ន វីរុសបំប្លែងខ្លួនថ្មីមួយចំនួនរបស់ Covid-19 ក្នុងនោះមានទាំង Delta ផងដែរ គឺ «ងាយឆ្លងពីមនុស្សម្នាក់ ទៅមនុស្សម្នាក់»។

វីរុសCovid-19 ប្រភេទ Delta ឬហៅថា B.1.617.2 ត្រូវបានរកឃើញនៅក្នុងប្រទេសជាង 60 ក្នុងរយៈពេល 6ខែកន្លងទៅនេះ ចាប់តាំងពីវាត្រូវបានរកឃើញដំបូងនៅប្រទេសឥណ្ឌាកាលពីឆ្នាំ2020។ B.1.617.2 គឺជាប្រភេទវីរុសបំប្លែងខ្លួនចេញពីប្រភេទ B.1.617។ B.1.617 មានវ៉ារ្យ៉ងរងចំនួន 3ប្រភេទគឺ B.1.617.1, B.1.617.2 និង B.1.617.3។ WHO បានចាត់វីរុសបំប្លែងខ្លួនប្រភេទ B.1.617 នេះ ទៅក្នុងក្រុម «បំប្លែងខ្លួន ដែលគួរយកចិត្តទុកដាក់» ព្រោះថា ពួកវាបង្កឱ្យមានការឆ្លងរាលដាលលឿន ឬបង្កគ្រោះថ្នាក់ធ្ងន់ធ្ងរ ដល់អ្នកដែលបានឆ្លងវីរុសប្រភេទនេះ។ Covid-19 បំប្លែងខ្លួនប្រភេទ B.1.617 ដែលត្រូវបានរកឃើញដំបូងនៅប្រទេស ឥណ្ឌា គឺជាវីរុសក្លាយពូជថ្មី ដែលបំប្លែងខ្លួនចេញពី Covid-19 ប្រភេទ B.1.1.7 របស់ អង់គ្លេស។

សិង្ហបុរី បាន និងកំពុងប្រតិកម្មខ្លាំងក្លាទៅនឹងការរកឃើញខាងលើ ដោយបានហាមអ្នកដំណើរពីប្រទេសឥណ្ឌា កាលពីខែមេសា ទន្ទឹមនឹងការដាក់បម្រាមគោចរមួយចំនួនដែលកំណត់ដោយរដ្ឋាភិបាល។ ពលរដ្ឋសិង្ហបុរី ក៏ត្រូវបានកាត់បន្ថយការជួបជុំ បិទទ្វារសាលារៀន និងហាមការទទួលទានអាហារនៅក្នុងកន្លែងបិទជិតផងដែរ ដើម្បីអាចគ្រប់គ្រងស្ថានការណ៍បានល្អ៕

ប្រភព៖ Reuters, Newscientist
ប្រែសម្រួល៖ បុត្រា

June 9, 2021

Category: សុខភាព