សុខភាព - La Reine Media

ជំនឿ 5យ៉ាងក្នុងរឿងអាហារការហូបចុក របស់ស្ត្រីមានគភ៌

មានជំនឿជាច្រើន ពាក់ព័ន្ធនឹងរឿងអាហារការហូបចុក ក្នុងអំឡុងពេលមានគភ៌ថា ញ៉ាំអានេះទៅ វានឹងល្អ ឬញ៉ាំអានោះទៅ ណឹងធ្វើឱ្យកូនខ្ពស់ កូនឆ្លាត កូនងាយកើត ឬស្រួលកើត ជាដើម-ល- តែជំនឿខ្លះ មិនមែនចេះតែត្រូវទាំងអស់នោះទេ ដូច្នេះថ្ងៃនេះ យើងនាំគ្នាមកពិនិត្យមើលថា តើរឿង ដែលយើងជឿទាំងអស់នោះ វាជាការពិត ឬយ៉ាងណា?

ជំនឿថា ញ៉ាំហឹរពេក នឹងធ្វើឱ្យកូន មិនសូវមានសក់…

ការពិត៖ សក់របស់កូនតិច ឬច្រើននោះ វាស្ថិតនៅលើពូជ ឬហ្ស៊ែន របស់មនុស្សម្នាក់ៗ ចំណែកឯជំនឿ រឿងហាមញ៉ាំហឹរនេះ ប្រហែលជាមកពីខ្លាចស្ត្រីមានគភ៌ ឈឺពោះ ពិបាកបន្ទោបង់ ឬមិនទេ ក៏ខ្លាចរាករូស ដែលនាំឱ្យមានផលប៉ះពាល់ដល់សុខភាពរបស់ស្ត្រីមានគភ៌ទៅវិញទេ ព្រោះនៅក្នុងអំឡុងពេលមានគភ៌ ប្រព័ន្ធរំលាយអាហារនឹងខុសពីពេលមុនមានគភ៌ ដោយសារតែអ័រម៉ូនប្រែប្រួល ដែលអាចនឹងធ្វើឱ្យមានបញ្ហាក្នុងការបន្ទោបង់ ឬអាចធ្វើឱ្យកើតអាការឆ្អល់ពោះ និងរាករូសបានហ្នឹងឯង។

ជំនឿថា ញ៉ាំទឹកដូងច្រើន នឹងជួយឱ្យកូនមានសាច់ស្អាត និងលាងជម្រះជាតិខ្លាញ់តាមដងខ្លួន…

ការពិត៖ ការពិតទៅ ការដែលមានខ្លាញ់ ជាប់នៅតាមដងខ្លួនទារកនោះ នឹងធ្វើឱ្យងាយស្រួលប្រសូត ព្រោះវាប្រៀបដូចជា ជាតិខ្លាញ់រំអិលស្រោបពីលើខ្លួនទារក ខណៈពេលប្រសូតចេញមកដូច្នោះដែរ។ ជាតិខ្លាញ់មួយនេះ ផលិតឡើងដោយកោសិកាស្បែករបស់ទារក និងក្រពេញជាតិខ្លាញ់នៅខាងក្រោមស្បែក ពេលអាយុគភ៌ រឹតតែច្រើនឡើង ជាតិខ្លាញ់នោះ ក៏នឹងកើតឡើងច្រើនតាមនោះដែរ។ ក្រៅពីនេះ ក្រោយពេលប្រសូតហើយថ្មីៗ ជាតិខ្លាញ់ដែលស្រោបខ្លួនប្រាណទារកនោះ នឹងជួយគ្រប់គ្រងសីតុណ្ហភាពរបស់កូនតូច មិនឱ្យធ្លាក់ចុះទាបជ្រុលពេកបានទៀតផង ដូច្នេះហើយទើបគ្រូពេទ្យបណ្តោយឱ្យជាតិខ្លាញ់ទាំងនោះ នៅជាប់នឹងខ្លួនទារកមួយរយៈសិន មុននឹងលាងចេញ នៅពេលប្រាកដក្នុងចិត្តហើយថា ទារកចាប់ផ្តើមគ្រប់គ្រងសីតុណ្ហភាពដោយខ្លួនឯងបានហើយ។ ការប្រញាប់លាងជាតិខ្លាញ់នោះចេញពេក អាចនឹងធ្វើឱ្យខ្លួនប្រាណកូនតូច ត្រជាក់ខុសធម្មតា និងអាចបង្កឱ្យមានបញ្ហាបាន។

ចំណែកឯទឹកដូងវិញ មានជាតិស្ករ និងសារធាតុអាស៊ីតខ្លាញ់កកច្រើន ពេលស្ត្រីមានគភ៌ញ៉ាំច្រើន អាចធ្វើឱ្យកូនមានមាឌធំ តែមិនសូវរឹងមាំ ហើយអ្នកម្តាយខ្លួនឯង ក៏កាន់តែមានភាពប្រឈមនឹងការកើតមានខ្លាញ់ញ៉ុកណែនក្នុងសរសៃឈាមខ្លាំងដែរ ដូច្នេះបើទម្ងន់ខ្លួន កើនឡើងច្រើនហើយ គួរតែតមញ៉ាំទឹកដូងមួយរយៈ។

ជំនឿថា ហាមញ៉ាំបន្លែពពួកវល្លិ៍ៗ ឬបន្លែឡើងទ្រើង ព្រោះនឹងធ្វើឱ្យពិបាកប្រសូត…

ការពិតវិញ៖ វាជាជំនឿកាលពីបុរាណ ដែលថា បន្លែទាំងនោះមានលក្ខណះជាខ្សែសរសៃ រឹតចងតោង ធ្វើឱ្យទារកពិបាកកើតចេញមក។ តែការពិតទៅ ស្ត្រីមានគភ៌ អាចទទួលទានបានទាំងអស់ មិនកំណត់ប្រភេទបន្លែឡើយ ជាពិសេសពពួកបន្លែស្លឹកបៃតងផ្សេងៗ ដូចជាត្រកួន ស្លឹកបាស សណ្តែកកួរ ល្ពៅ ប៉េងប៉ោះ ខាត់ណា ជាដើម។ បើបានទទួលទានបន្លែទាំងអស់នោះហើយ នឹងមានប្រយោជន៍ខ្លាំងណាស់ ព្រោះនឹងធ្វើឱ្យស្ត្រីមានគភ៌ខ្លួនឯង ទទួលបានវិតាមីនដែលចាំបាច់ និងសំខាន់ដល់ការរីកធំធាត់របស់ភ្នាសស្តើងៗ នៃកែវភ្នែក និងក្រពេញការធ្វើការងាររបស់គ្រាប់ភ្នែក។

ជំនឿដែលថា ហាមញ៉ាំទឹកតែ កាហ្វេ ព្រោះអាចធ្វើឱ្យរលូតបុត្រ…

តែការពិតវិញ…មានការសិក្សាវិភាគពីការញ៉ាំកាហ្វេ ឬភេសជ្ជៈដែលមានជាតិកាហ្វេអ៊ីនរបស់ស្ត្រីមានគភ៌ ចំនួន 1,063នាក់ បានរកឃើញថា ស្ត្រីមានផ្ទៃពោះ ដែលទទួលទានបរិមាណកាហ្វេអ៊ីន លើសពី 200មីល្លីក្រាមក្នុង 1ថ្ងៃ (ប្រមាណ 2ពែង ក្នុង 1ថ្ងៃ) អាចនឹងបណ្ដាលឱ្យកើតការរលូតបុត្របាន ដល់ទៅ 25ភាគរយ តែក៏មិនមែនមានន័យថា ហាមមិនឱ្យញ៉ាំនោះដែរ គ្រាន់តែត្រូវកំណត់ មិនឱ្យលើសពី 1កែវ ក្នុងរយៈពេល 2-3ថ្ងៃឡើយ អាចគ្រាន់តែក្រេបចឹបៗ ឱ្យបាត់ចង់បានហើយ។ ការញ៉ាំទឹកតែ ឬកាហ្វេ ច្រើនជ្រុលពេក នឹងធ្វើឱ្យគេងមិនលក់ សំរាកមិនបានគ្រប់គ្រាន់ ឬអ្នកខ្លះអាចធ្វើឱ្យឆ្អល់ពោះ ដែលនឹងមានផលប៉ះពាល់ដល់សុខភាពរបស់ស្ត្រីមានគភ៌ខ្លួនឯង និងប៉ះពាល់ដល់ការរីកចម្រើនធំធាត់ និងការវិវឌ្ឍរបស់ទារកនៅក្នុងផ្ទៃបានទៀតផង។

ជំនឿថា ញ៉ាំថ្នាំខ្លាញ់ត្រី ប្រភេទគ្រាប់ នឹងធ្វើឱ្យឈាមបង្កកខ្លួនយឺត…

ការពិតវិញ៖ ខ្លាញ់ត្រី ឬ Fish Oil នេះ មិនដូចខ្លាញ់ថ្លើមត្រីទេ តែជាខ្លាញ់របស់ត្រី ដែលមានអាស៊ីតជាតិខ្លាញ់មិនកក ដែលចាំបាច់ចំពោះរាងកាយ គឺអាស៊ីតខ្លាញ់នៅក្នុងក្រុមអូមេហ្កា3 ដែលជាចំណែកសំខាន់មួយ របស់កោសិកា ឬសាច់ភ្នាសរបស់រាងកាយ រួមទាំងខួរក្បាល គ្រាប់ឈាមប្រភេទផ្សេងៗ និងការបង្កើតភាពស៊ាំ ប្រឆាំងនឹងជំងឺរបស់រាងកាយ និងថែមទាំងជួយកាត់បន្ថយអាការរលាករបស់សន្លាក់ឆ្អឹង ដែលអ្នកមានគភ៌ច្រើនតែជួបប្រទះទៀតផង តែស្ត្រីមានផ្ទៃពោះ ក៏មិនគួរទទួលទានថ្នាំខ្លាញ់ត្រីប្រភេទគ្រាប់នេះ ច្រើនពេកដែរ តែគួរទទួលទានខ្លាញ់ត្រី ដែលមាននៅក្នុងសាច់ត្រីផ្សេងៗ ដូចជា សាច់ត្រីសាល់ម៉ុន ត្រីធូណា ត្រីឆ្ពុងក្រហម ជាដើមជំនួសវិញ ទើបជាការល្អ។

ក្រៅពីនេះ ស្ត្រីមានគភ៌ គួរឈប់ទទួលទានអាហារបំប៉ន ប្រភេទថ្នាំខ្លាញ់ត្រីបែបគ្រាប់ ពេលមានផ្ទៃពោះបាន 6-7ខែ ព្រោះទោះជាវាជួយមិនឱ្យកើតមានភាពញ៉ុកណែនក្នុងសរសៃឈាមមែន តែវាអាចធ្វើឱ្យឈាម ក្របង្កកខ្លួននៅពេលកើតមានរបួសស្នាម ឬពេលវះកាត់ជាដើម។

បន្ទាប់ពីបានដឹងការពិតរបស់ជំនឿ ក្នុងរឿងអាហារការហូបចុក ដែលយើងបាននាំយកមកជម្រាបជូនហើយនោះ ស្ត្រីមានគភ៌ទាំងឡាយប្រហែលជាបានយល់ និងអាចជ្រើសរើសទទួលទានអាហារ បានយ៉ាងសប្បាយចិត្ត ដើម្បីសុវត្ថិភាពទាំងខ្លួនអ្នក និងកូននៅក្នុងផ្ទៃជាមិនខាន៕

June 19, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី19 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី19 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 471នាក់, អ្នកជាចំនួន 928នាក់ និងអ្នកស្លាប់ថ្មីចំនួន 20នាក់បន្ថែមទៀត នៅក្នុងថ្ងៃទី18 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 42,052នាក់ ក្នុងនោះមាន 414នាក់បានបាត់បង់ជីវិត,

36,868នាក់បានជា និងប្រមាណជា 5,460នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 178,603,212នាក់ត្រូវបានរកឃើញ ក្នុងនោះមាន 163,123,858នាក់បានជា, 3,866,947នាក់បានស្លាប់ និង 11,612,407នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 19, 2021

ស្ត្រីមានគភ៌ ត្រូវប្រយ័ត្ន…គ្រោះថ្នាក់ បែបនឹកស្មានមិនដល់!!

រឿងដែលនឹកស្មានមិនដល់ តែងតែកើតឡើងគ្រប់ពេលវេលា…ដូច្នេះស្ត្រីមានគភ៌ គួរតែមានការប្រុងប្រយ័ត្នជាប់ជានិច្ច ព្រោះធ្លាប់បានឃើញឧទាហរណ៍ជាច្រើនរួចមកហើយ ដូចជា មានមិត្តភក្តិជិតដិតម្នាក់ នាងមានផ្ទៃពោះ 5ខែទៅហើយ តែក៏នៅតែចូលចិត្តធ្វើការងារប្រចាំថ្ងៃ ដូចមនុស្សទូទៅធម្មតាអ៊ីចឹង រហូតមកដល់ថ្ងៃមួយ ទើបដឹងថា…រឿងដែលនឹកស្មានមិនដល់ និងធ្លាប់តែធ្វើជាប្រចាំនោះ បានហុចផលមិនល្អដល់ខ្លួន ហើយថែមទាំងមានផលអាក្រក់ទៅដល់កូននៅក្នុងផ្ទៃទៀតផង រឿងទាំងនោះគឺ៖

គ្រាន់តែការទំពាអាហារសោះ…

ដឹងទេថា រឿងដ៏តូចតាចមួយនេះ បើស្ត្រីមានគភ៌យើងមើលរំលង រឿងនេះអាចនាំមកនូវផលអាក្រក់ជាច្រើនដល់ខ្លួនអ្នកម្តាយ និងកូនតូចបាន។ ស្ត្រីមានគភ៌ ដែលទទួលទានអាហារបែបប្រញាប់ៗ ទំពាអាហារតែមួយភ្លែត ហើយលេបនោះ ផលអាក្រក់ដែលតាមមកគឺ អាហារដែលយើងលេបចូលទៅក្នុងក្រពះនោះ នឹងមិនរំលាយ ធ្វើឱ្យមានអាការណែនឆ្អល់ក្នុងពោះ អាចបណ្តាលឱ្យការទទួលទានអាហារលើកក្រោយថយចុះ កូនតូចនៅក្នុងផ្ទៃក៏ទទួលរងផលប៉ះពាល់នេះតាមដែរ។ ដូច្នេះក្នុងការទទួលទានអាហារ ទោះជាពេលណាក៏ដោយ សូមស្ត្រីមានគភ៌យើង នឹកក្នុងចិត្តជាប់ជានិច្ចថា ត្រូវទទួលទានឱ្យបានទៀងទាត់ពេលវេលា ហើយត្រូវទំពាអាហារឱ្យបានល្អិត ព្រោះនេះ គឺជារឿងល្អមួយ ដើម្បីឱ្យកូនតូចរបស់អ្នក បានទទួលសារធាតុអាហារបានពេញលេញតាមនោះដែរ។

រហ័សទាន់ចិត្ត ភ្លែតៗ ដល់ណាដល់ហ្នឹងដែរ…

ស្ត្រីមានគភ៌ខ្លះ ច្រើនតែភ្លេចថា ខ្លួនឯងកំពុងពពោះ ធ្វើឱ្យការដើរ ក្រោក អង្គុយ រត់ រួមទាំងការធ្វើចលនាផ្សេងៗ ប្រព្រឹត្តទៅតាមធម្មតា។ ចំពោះរឿងនេះ សូមជម្រាបថា បើស្ត្រីដែលមានអាយុគភ៌នៅតិច អាចគ្មានគ្រោះថ្នាក់អ្វីធ្ងន់ធ្ងរទេ តែបើជាស្ត្រីដែលអាយុគភ៌ ស្ថិតក្នុងអំឡុងខែចុងក្រោយៗ ហើយមានការធ្វើចលនា ដូចជា ក្រោក ដើរ រត់ បែបរហ័សៗនោះ ប្រាកដណាស់ ពិតជាមានផលប៉ះពាល់ដល់កូនតូច ដែលនៅក្នុងផ្ទៃមិនខាន។ អាចដល់ថ្នាក់ មានកាបុកប៉ះនឹងសាច់ជញ្ជាំងស្បូនក្នុងពោះ ទៅជំរុញឱ្យស្បូនបង្រួញខ្លួន ធ្វើឱ្យអ្នកម្តាយមានអារម្មណ៍ឈឺពោះ និងបើសិនជាស្បូនកើតការបង្រួញខ្លួនខ្លាំងៗផងនោះ កូនអាចនឹងប្រសូតចេញមក មុនពេលកំណត់បាន។ ដូច្នេះស្ត្រីមានគភ៌ ត្រូវធ្វើចលនាឱ្យយឺតៗ ដើម្បីឱ្យកូនតូចក្នុងផ្ទៃមានសុវត្ថិភាព មិនដូច្នោះទេ បេះដូងនឹងធ្វើការខ្លាំង អុកស៊ីហ្ស៊ែន ដែលត្រូវបញ្ជូនទៅកូនតូច នឹងត្រូវថយចុះ តែផលអាក្រក់ ដែលខ្លាំងជាងហ្នឹងទៅទៀតនោះគឺ កូនតូចនៅក្នុងគភ៌អាចនឹងមិនសូវរឺងមាំ និងធំធាត់យឺត។

សត្វចិញ្ចឹមគួរឱ្យស្រឡាញ់…

ជាពិសេសឆ្កែ និងឆ្មា ស្ត្រីមានគភ៌ខ្លះ កើតរោគប្រតិកម្មចាញ់ជាមួយរោមសត្វ ល្អងធូលី កេសរផ្កា តែក៏នៅតែចូលចិត្តចិញ្ចឹមសត្វ នៅក្នុងផ្ទះ និងចូលចិត្តលេងជាមួយពួកវា ដោយមិនបានគិតដល់សត្វចៃ ដែលនឹងនាំមេរោគចូលមករកទាំងខ្លួនឯង និងកូនក្នុងផ្ទៃ ដោយមិនបានដឹងខ្លួនឡើយ។ ដូច្នេះស្ត្រីមានគភ៌ គួរមើលថែទាំ សម្អាតសត្វចិញ្ចឹម ដែលក្នុងផ្ទះឱ្យបានកាន់តែខ្លាំងឡើង ដើម្បីសុខភាព និងអនាម័យដ៏ល្អរបស់អ្នក និងកូនក្នុងផ្ទៃ។

ធ្មេញពុក…

ស្ត្រីមានគភ៌មួយចំនួន អាចគិតថាជារឿងតូចតាច រហូតបណ្តោយឱ្យកើតអាការអញ្ចាញធ្មេញឡើងហើម មានខ្ទុះ ឬមិនព្រមព្យាបាល ព្រោះគិតថា អនាម័យ និងភាពស្អាតក្នុងប្រអប់មាត់ មិនចាំបាច់យកចិត្តទុកដាក់ខ្លាំងពេកទេ រហូតធ្វើឱ្យកើតមានមេរោគបាក់តេរី កើនឡើងច្រើន រាលដាលទៅដល់ឫសធ្មេញ ធ្វើឱ្យអញ្ចាញក្លាយជាដំបៅឡើងខ្ទុះជាដើម។ ពេលនោះ រឿងតូចតាច ក៏ក្លាយជារឿងធំឡើង ផលប៉ះពាល់ដែលតាមមក គឺមេរោគឆ្លងចូលទៅក្នុងក្រសែឈាម ហើយឆ្ពោះទៅរកកូនតូច រហូតដល់ថ្នាក់អាចធ្វើឱ្យបាត់បង់ជីវិតបានទៀតផង។ ដូច្នេះស្ត្រីមានគភ៌ ត្រូវតែថែរក្សាអនាម័យ និងភាពស្អាតក្នុងប្រអប់មាត់ឱ្យបានល្អជាប់ជានិច្ច ព្រោះនេះ គឺជារឿងតូចតាច ដែលអាចធ្វើឱ្យកើតទៅជារឿងធំបាន។

យួរ ឬលើករបស់ធ្ងន់…

ស្ត្រីមានគភ៌ ត្រូវប្រុងប្រយ័ត្នជាប់ជានិច្ចថា ខ្លួនអ្នកកំពុងតែមានផ្ទៃពោះ!! ចូរកុំលើករបស់ធ្ងន់ៗជាដាច់ខាត តែមានពេលខ្លះ ស្ត្រីមួយចំនួនអាចភ្លេចខ្លួនពេលទៅដើរទិញឥវ៉ាន់ ដែលត្រូវយួររបស់របរឡើងជ្រែកដៃ ពេលនោះសាច់ដុំខ្នង សាច់ដុំជើង និងសន្លាក់ផ្សេងៗ ត្រូវធ្វើការធ្ងន់ទាំងអស់ រហូតជំរុញឱ្យកើតរោគផ្សេងៗឡើង ដូចជាសម្ពាធលោហិតឡើងខ្ពស់ ដោយសារតែបេះដូងខំធ្វើការខ្លាំងពេក ឈឺខ្នង ឈឺស្មា និងសន្លាក់ជាដើម។

បើកសំឡេងបទភ្លេងឮខ្លាំងៗពេក…

ក្នុងចំណុចនេះចង់បានន័យថា ស្ត្រីមានគភ៌រូបណា ដែលចូលចិត្តបើកបទចម្រៀង ឮៗខ្លាំងជាងប្រក្រតី ព្រោះតែយល់ច្រឡំថា កូនតូចនៅក្នុងផ្ទៃ នឹងបានឮច្បាស់នោះ ការពិតទៅ នេះជាគ្រោះថ្នាក់សម្រាប់កូនតូចទៅវិញទេ ព្រោះជាការរុកកួនរំខានកូនតូចនៅក្នុងផ្ទៃដោយផ្ទាល់តែម្តង ដោយសារតែសរសៃប្រសាទត្រចៀករបស់កូន មិនទាន់វិវឌ្ឍបានពេញទំហឹងនៅឡើយទេ។ អាចធ្វើឱ្យកូនតូច កើតក្តីធុញថប់មួម៉ៅ មានផលប៉ះពាល់ធ្វើឱ្យការវិវឌ្ឍរបស់កូនថមថយចុះបាន។ ការបើកបទចម្រៀង ដើម្បីជួយជំរុញវិវឌ្ឍនាការរបស់កូនតូចនៅក្នុងផ្ទៃនោះ គ្រាន់តែចាក់បទភ្លេង ដែលមានចង្វាក់ស្រាលៗ ពីរោះៗ ដូចជាបទភ្លេងក្លាស៊ីក ឬក៏បទចម្រៀងធម្មតាទូទៅណា ដែលមានចង្វាក់ និងទំនុកភ្លេងងាយស្រួលស្តាប់ មានទំនុកច្រៀង និងអត្ថន័យល្អៗ តែប៉ុណ្ណឹងក៏គ្រប់គ្រាន់ណាស់ទៅហើយ៕

June 17, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី17 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី17 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 625នាក់, អ្នកជាចំនួន 705នាក់ និងអ្នកស្លាប់ថ្មីចំនួន 12នាក់បន្ថែមទៀត នៅក្នុងថ្ងៃទី16 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 40.782នាក់ ក្នុងនោះមាន 380នាក់បានបាត់បង់ជីវិត, 35.030នាក់បានជា និងប្រមាណជា 5,460នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 177,815,072នាក់ត្រូវបានរកឃើញ ក្នុងនោះមាន 162,322,203នាក់បានជា, 3,848,922នាក់បានស្លាប់ និង 11,643,947នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 17, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី16 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី16 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 693នាក់, អ្នកជាចំនួន 754នាក់ និងអ្នកស្លាប់ថ្មីចំនួន 7នាក់បន្ថែមទៀត នៅក្នុងថ្ងៃទី15 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 40,157នាក់ ក្នុងនោះមាន 368នាក់បានបាត់បង់ជីវិត,

34,325នាក់បានជា និងប្រមាណជា 5,500នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 177,414,471នាក់ត្រូវបានរកឃើញ ក្នុងនោះមាន 161,859,168នាក់បានជា, 3,838,506នាក់បានស្លាប់ និង 11,716,797នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 16, 2021

សម្រាប់អ្នកធ្វើការក្នុង Office…ខាងក្រោមនេះ គឺអាហារដាស់ខួរក្បាល នាពេលរសៀល គិតកាងារអី ក៏អូខេ!

ធ្លាក់ដល់ពេលរសៀល រាងកាយមនុស្សជាច្រើនចាប់ផ្តើមល្វើយ ចាប់ផ្ដើមស្ងាប ងងុយគេង អង្គុយធ្វើការយូរទៅ ក៏គិតរកនឹកអៃឌៀការងារល្អៗអី មិនឃើញសោះ។ ចេញអាការបែបនេះមក ប្រហែលជាត្រូវរកមើលជំនួយការ មកជួយដាស់ខួរក្បាល ឱ្យស្រស់ថ្លាឡើងវិញភ្លាមៗហើយ ដូច្នេះអាហារខាងក្រោមនេះ គឺជាជំនួយការ ដែលនឹងជួយបំបាត់អាការងងុយគេង ល្វើយទន់ដៃទន់ជើងបានយ៉ាងល្អ។ អ្នកណាដែលចេះតែងងុយគេង គិតអ្វីលែងចេញនៅពេលថ្ងៃរសៀលនោះ គួរប្រញាប់ទៅរកយកមកទទួលទាន ដើម្បីបន្ថែមថាមពលដល់រាងកាយជាបន្ទាន់ហើយ!។

-ស្ករសូកូឡាខ្មៅ

សូកូឡាខ្មៅ ឬដាកសូកូឡា(Dark Chocolate) គឺជាជំនួយការដ៏អស្ចារ្យ ក្នុងការស្តារថាមពលខួរក្បាលឱ្យល្អឡើងវិញ ដោយសារវាមាន “ហ្វ្លាវ៉ូណយដ៍” សារធាតុដែលចូលទៅជួយបញ្ជូនឈាម ឱ្យហូរទៅចិញ្ចឹមខួរក្បាលបានកាន់តែច្រើនឡើង និងរហ័សទៀតផង ធ្វើឱ្យលោកអ្នក មានអារម្មណ៍ស្វាហាប់ឡើង ក្នុងរយៈពេលដ៏ខ្លី និងថែមទាំងជួយបង្កើនប្រសិទ្ធភាពក្នុងការធ្វើការងារពិបាកៗបានទៀតផង។ សូមជម្រាបថា ព័ត៌មានទាំងនេះ មិនមែនចេះតែនិយាយខ្លួនឯងទេ តែជាលទ្ធផល ដែលបានមកពីការស្រាវជ្រាវសិក្សារបស់ប្រទេសអង់គ្លេស។

-ផ្លែឈើដែលមានរសជាតិជូរខ្លាំង

ពេលទទួលទានអ្វី ដែលមានរសជាតិជូរៗ នឹងធ្វើឱ្យយើងមានអារម្មណ៍ ភ្លឺភ្នែកភ្លាមឡើងតែម្តង ព្រោះផ្លែឈើដែលមានរសជាតិជូរ ដូចជា ស្វាយខ្ចី ក្រូច ម្នាស់ ជាដើមនោះ មានវិតាមីនC ដែលអាចជួយប្រឆាំងភាពនឿយល្វើយ ដែលបណ្តាលមកពីភាពតានតឹងធុញថប់ និងក្តីកង្វល់បាន។ ក្រៅពីនេះ នៅក្នុងផ្លែឈើរសជាតិជូរ នៅមានសារធាតុរ៉ែជាច្រើន ដែលនឹងចូលទៅជួយឱ្យឈាមនៅក្នុងខួរក្បាល ហូរវិលបានកាន់តែល្អឡើង ជំរុញឱ្យរាងកាយស្វាហាប់បែបទាន់ចិត្តភ្លាមៗទៀតផង។ បើនៅសុខៗ ខួរក្បាលឡើងស្ពឹក គិតអ្វីមិនចេញនោះ ចូរប្រញាប់រត់ទៅរកផ្លែឈើជូរៗ មកញ៉ាំភ្លាមឡើង កុំបង្អង់យូរ។

-ទឹកពិសាបរិសុទ្ធ

គ្រាន់តែទឹកពិសាបរិសុទ្ធ ក៏អាចជួយបង្កើនថាមពលខួរក្បាលបានដែរ មែនឬ? មែនហើយ! ព្រោះដូចយើងបានដឹងស្រាប់ហើយថា រាងកាយមនុស្សយើង មានជាតិទឹកដល់ទៅ 70% ឯណោះ ចុះបើយើងមិនញ៉ាំទឹក ឬញ៉ាំទឹកតិចនោះ តើអវយវៈផ្សេងៗ នឹងអាចធ្វើការយ៉ាងមានប្រសិទ្ធភាពយ៉ាងម៉េចនឹងបានទៅ?…ខួរក្បាលមនុស្សយើងក៏ដូចគ្នាដែរ មានការសិក្សាស្រាវជ្រាវមួយ បានរកឃើញថា បើក្នុង 1ថ្ងៃៗ យើងញ៉ាំទឹកមិនបានគ្រប់គ្រាន់ វានឹងធ្វើឱ្យយើងមានសមាធិកាន់តែតិច ថែមទាំងមានការចងចាំអន់ខ្សោយទៀតផង ដូច្នេះ គួរដាក់ដបទឹក ឬកែវទឹកនៅជិតតុធ្វើការជានិច្ច ហើយឧស្សាហ៍លើកយកមកក្រេបឱ្យបានញឹកញាប់ ដើម្បីកុំឱ្យខួរក្បាលខ្វះជាតិទឹក ដែលនាំឱ្យមានផលប៉ះពាល់ ធ្វើឱ្យរាងកាយស្ពឹកស្រពន់ហ្នឹងឯង ។

-កាហ្វេ ឬតែ

ដល់ពេលរសៀលៗម្តងណា ច្រើនតែឃើញមិត្តភក្តិរួមការងារក្នុងអូហ្វីស ក្រោកទៅឆុងកាហ្វេ ឆុងតែ ញ៉ាំបំបាត់ក្តីងោគងងុយគេងជាច្រើននាក់ នេះ គឺជាវិធីកែបញ្ហាងងុយគេងយ៉ាងមានប្រសិទ្ធភាព តែក៏ត្រូវប្រយ័ត្នបន្តិចដែរ ព្រោះបើញ៉ាំកាហ្វេច្រើនជ្រុលពេក វាអាចនឹងធ្វើឱ្យលោកអ្នក គេងមិនលក់ សម្រាន្តមិនបានគ្រប់គ្រាន់ ជាហេតុនាំឱ្យកើតអាការឈឺក្បាលបាន។

សរុបទៅ បើរកអាហារប្រភេទផ្សេងៗទៀត មកដាស់ខួរក្បាលលែងបានហើយនោះ សឹមក្រោកទៅឆុងកាហ្វេ ក្រេបបន្តិចៗបានហើយ៕

June 15, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី15 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី15 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន -495នាក់, អ្នកជាចំនួន 604នាក់ និងអ្នកស្លាប់ថ្មីចំនួន 13នាក់បន្ថែមទៀត នៅក្នុងថ្ងៃទី14 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 39,464នាក់ ក្នុងនោះមាន 361នាក់បានបាត់បង់ជីវិត,33,571នាក់បានជា និងប្រមាណជា 5,600នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 177,033,919នាក់ត្រូវបានរកឃើញ ក្នុងនោះមាន 161,226,410នាក់បានជា, 3,827,748នាក់បានស្លាប់ និង 11,979,761នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 15, 2021

រោគសញ្ញានៃ Covid-19 ប្រភេទ Delta (ឥណ្ឌា) អាចច្រឡំនឹងជំងឺផ្ដាសាយ

ក្រុមអ្នកស្រាវជ្រាវនៅប្រទេស អង់គ្លេស បានព្រមានថា អ្នកដែលបានឆ្លងវីរុសCovid-19 បំប្លែងខ្លួនប្រភេទ SARS-CoV-2 Delta (B.1.617) ដែលរកឃើញដំបូងនៅប្រទេស ឥណ្ឌា អាចធ្វើឱ្យគេច្រឡំនឹងរោគសញ្ញានៃជំងឺគ្រុនផ្ដាសាយ។

សារព័ត៌មានរបស់ អង់គ្លេស Guardian បានចេញផ្សាយថា ការឈឺក្បាល ក្រហាយបំពង់ក និងហៀរសម្បោរ គឺជារោគសញ្ញាដែលគេជួបប្រទះច្រើនបំផុត ទាក់ទងនឹងវីរុសក្លាយពូជថ្មីប្រភេទ Delta។

សាស្ត្រាចារ្យ Tim Spector មកពីសាកលវិទ្យាល័យ King’s College London ដែលជាប្រធានក្រុមស្រាវជ្រាវ បានឱ្យដឹងថា យោងទៅតាមទិន្នន័យប្រមូលបាន អ្នកដែលបានឆ្លង Covid-19 ប្រភេទ Delta នឹងមានអារម្មណ៍ថា ដូចកំពុងមានជំងឺផ្ដាសាយ។

«គ្រប់គ្នាគិតថា ខ្លួនគេគ្រាន់តែផ្ដាសាយតាមរដូវ ដូច្នេះ ពួកគេនៅតែទៅជប់លៀង។ ប្រការនេះនឹងនាំឱ្យមានបញ្ហាច្រើន។ អាការចម្បងជាងគេបង្អស់ នោះគឺ ឈឺក្បាល បន្ទាប់មកគឺក្រហាយបំពង់ក ក្រោយមកទៀតគឺ ហៀរសម្បោរ និងក្ដៅខ្លួន» សាស្ត្រាចារ្យ Tim Spector បន្ថែម។

សាស្ត្រាចារ្យ Tim Spector ផ្ដល់យោបល់ថា៖ «បើសិនជា អ្នកនៅក្មេង និងមានរោគសញ្ញាស្រាល ដូចជាផ្ដាសាយ ល្អបំផុតគឺគួរតែនៅផ្ទះ និងធ្វើតេស្ត Covid-19»។

យោងតាមក្រសួងសុខាភិបាល អង់គ្លេស (NHS) រោគសញ្ញាសំខាន់ៗរបស់ Covid-19 គឺ ក្ដៅខ្លួន ក្អក និងបាត់បង់រសជាតិ។ ចំណែកសាស្ត្រាចារ្យ Spector និយាយថា នៅពេលឆ្លង Delta អាការបាត់បង់រសជាតិ មិនស្ថិតក្នុងក្រុមរោគសញ្ញាចម្បងទាំង10 របស់អ្នកជំងឺនោះឡើយ។

ទិន្នន័យរបស់ អង់គ្លេស និយាយថា វីរុសបំប្លែងខ្លួន Delta (B.1.617) ដែលរកឃើញដំបូងនៅ ឥណ្ឌា ធ្វើឱ្យអ្នកជំងឺត្រូវចូលពេទ្យក្នុងអត្រាខ្ពស់ជាងច្រើន បើធៀបនឹងវីរុសបំប្លែងខ្លួន Alpha (B.1.1.7) ដែលត្រូវបានគេរកឃើញដំបូងនៅប្រទេស អង់គ្លេស។

សារព័ត៌មាន Guardian កាលពីថ្ងៃទី14 ខែមិថុនា បានរាយការណ៍ថា Covid-19 ប្រភេទ Delta បច្ចុប្បន្ន បានឆ្លងរាលដាលដល់ប្រទេសចំនួន 74 ក្នុងពិភពលោក៕

ប្រភព៖ Guardian
ប្រែសម្រួល៖ បុត្រា

June 15, 2021

រដ្ឋធានីរបស់ រុស្ស៊ី ត្រៀមរង្វាន់ធំៗជាច្រើន ដើម្បីលើកទឹកចិត្តឱ្យប្រជាជនទៅចាក់វ៉ាក់សាំងCovid-19

អភិបាលក្រុង មូស្គូ លោក Sergei Sobyanin កាលពីថ្ងៃទី13 ខែមិថុនា បានប្រកាសថា ពលរដ្ឋនៃរដ្ឋធានី ដែលបានចាក់វ៉ាក់សាំងបង្ការវីរុស Covid-19 ម្ជុលទីមួយ នឹងមានឱកាសត្រូវឆ្នោតដែលមានរង្វាន់ធំៗជាច្រើន ក្នុងនោះក៏មានរថយន្តច្រើនគ្រឿងផងដែរ។

សារព័ត៌មានបារាំង AFP បានចេញផ្សាយថា ប្រកាសខាងលើត្រូវបានលើកឡើងក្នុងគ្រាដែលអាជ្ញាធរ មានបំណងបង្កើនល្បឿននៃយុទ្ធនាការចាក់វ៉ាក់សាំង Covid-19 ខណៈដែលករណីឆ្លងវីរុសនៅរដ្ឋធានីមូស្គូ និងទូទាំងប្រទេស កំពុងកើនឡើង។

«ចាប់ពីថ្ងៃទី14 ខែមិថុនា ដល់ថ្ងៃទី11 ខែកក្កដា ពលរដ្ឋដែលបានចាក់វ៉ាក់សាំងដូសទីមួយ នឹងបានចូលរួមកម្មវិធីចាប់ឆ្នោតឈ្នះរង្វាន់រថយន្ត» លោក Sergei Sobyanin ប្រកាសនៅលើគេហទំព័ររបស់ខ្លួនដូច្នេះ។

លោក Sergei Sobyanin បញ្ជាក់ថា អ្នកទាំងឡាយដែលបានទទួលការចាក់វ៉ាក់សាំង មានឱកាសឈ្នះរង្វាន់រថយន្ត រហូតដល់ 5គ្រឿង ជារៀងរាល់សប្ដាហ៍ ហើយក្នុង 1គ្រឿងៗ មានតម្លៃ 1លានរូបរុស្ស៊ី (ស្មើនឹង 13,884 ដុល្លារអាមេរិក)។

«ក៏ប៉ុន្តែ ពិតណាស់ ផលប្រយោជន៍ចម្បងដែលពលរដ្ឋទទួលបានពីការចាក់វ៉ាក់សាំង គឺមិនអាចប្រៀបប្រដូចជាមួយនឹងរថយន្តទាំងនេះបានឡើយ នោះគឺសុខភាព និងទំនុកចិត្តរបស់ពួកគេ» អភិបាលក្រុងមូស្គូ រៀបរាប់។

លោក Sobyanin ឱ្យដឹងថា លោកបានទទួលការចាក់វ៉ាក់សាំង Sputnik V របស់ រុស្ស៊ី កាលពីឆ្នាំទៅ និងបានចាក់រំលឹកឡើងវិញ កាលពី 2ថ្ងៃមុន។ លោក Sobyanin បន្ថែមថា លោកមានមានអារម្មណ៍ថា មានសុខភាពល្អណាស់។

កាលពីថ្ងៃទី13 ខែមិថុនា អាជ្ញាធរក្រុងមូស្គូ ក៏បានប្រកាសថា នឹងចាប់ឆ្នោតដែលមានរង្វាន់ជាផ្ទះ 1ខ្នង មានបន្ទប់គេងចំនួន3 សម្រាប់ក្រុមពលរដ្ឋដែលបានចាក់វ៉ាក់សាំងម្ជុលដំបូង ចាប់ពីថ្ងៃទី15 ខែមិថុនា ដល់ថ្ងៃទី25 ខែមិថុនា។

ប្រទេសរុស្ស៊ី មកដល់បច្ចុប្បន្ន ចាក់វ៉ាក់សាំងយ៉ាងតិច 1ដូស ជូនពលរដ្ឋបានប្រមាណ 12% នៃប្រជាជនសរុប ខណៈដែលការស្ទង់មតិនានា បានបង្ហាញថា ពលរដ្ឋភាគច្រើន មិនមានបំណងចាក់វ៉ាក់សាំង។

នៅទូទាំងប្រទេសរុស្ស៊ី គិតមកដល់ព្រឹកថ្ងៃទី14 ខែមិថុនា ឆ្នាំ2021 នេះ បានរកឃើញអ្នកឆ្លងវីរុស Covid-19 សរុបចំនួន 5,208,687នាក់ ក្នុងនោះមានអ្នកស្លាប់ចំនួន 126,430នាក់, អ្នកជាចំនួន 4,801,335នាក់ និងអ្នកកំពុងព្យាបាលចំនួន 280,922នាក់៕

ប្រភព៖ Reuters
ប្រែសម្រួល៖ បុត្រា

June 14, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី14 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី14 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 542នាក់, អ្នកជាចំនួន 1,109នាក់ និងអ្នកស្លាប់ថ្មីចំនួន 13នាក់បន្ថែមទៀត នៅក្នុងថ្ងៃទី13 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 38,969នាក់ ក្នុងនោះមាន 348នាក់បានបាត់បង់ជីវិត,

32,967នាក់បានជា និងប្រមាណជា 6,000នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 176,722,290នាក់ត្រូវបានរកឃើញ ក្នុងនោះមាន 160,767,466នាក់បានជា, 3,819,621នាក់បានស្លាប់ និង 12,135,203នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 14, 2021

Category: សុខភាព