សុខភាព - La Reine Media

វិធីសាស្ត្រដែល តៃវ៉ាន់ ប្រើ និងទទួលបានជោគជ័យ នៅក្នុងការប្រែត្រលប់ស្ថានការណ៍ COVID-19

នៅក្នុងពាក់កណ្ដាលខែឧសភា ជីវភាពសុខសាន្តរបស់ប្រជាជននៅកោះ តៃវ៉ាន់ ស្រាប់តែត្រូវក្រឡាប់ចក្រ ដោយសារតែរលកនៃការឆ្លងរាលដាល COVID-19 ដ៏ធ្ងន់ធ្ងរ ប៉ុន្តែ បច្ចុប្បន្ន កោះនេះបែរជាគ្រប់គ្រងស្ថានការណ៍បានទាំងស្រុង។

កោះតៃវ៉ាន់ ធ្លាប់ត្រូវបានគេចាត់ទុកថាជា ដែនដីគំរូក្នុងការប្រយុទ្ធប្រឆាំងនឹង COVID-19 របស់ពិភពលោក។ ក្នុងគ្រាដែលតំបន់ផ្សេងៗ ជួបនឹងបញ្ហា COVID-19 សកម្មភាពសេដ្ឋកិច្ចរបស់កោះនេះ នៅតែដំណើរការក្នុងរយៈពេលភាគច្រើននៃវិបត្តិសុខភាព។ សាលារៀន នៅតែបើកទ្វារ រោងភាពយន្ត ភោជនីយដ្ឋានពេញដោយមនុស្ស សេដ្ឋកិច្ចរីកចម្រើនខ្លាំង។

ភាពសុខសាន្តខាងលើក៏ត្រូវបានបញ្ចប់កាលពីពាក់កណ្ដាលខែឧសភា ព្រោះតែការរាតត្បាតយ៉ាងធ្ងន់ធ្ងរពីវីរុស COVID-19។ ក្នុងរយៈពេលតែកន្លះខែ តួលេខអ្នកឆ្លងវីរុសនៅ តៃវ៉ាន់ បានកើនពីជាង 1,500 ឡើងដល់ជិត 9,000 នាក់។ តួលេខអ្នកឆ្លងសរុប និងអ្នកស្លាប់សរុប កើនជាបន្តបន្ទាប់គឺ ជាង 15,700 នាក់ និងជាង 790 នាក់ ច្រើនជាងឆ្ងាយធៀបនឹងតួលេខនៃការស្លាប់ 12 នាក់ ក្នុងអំឡុងមុនពេលការឆ្លងរាលដាលផ្ទុះឡើង។

ប៉ុន្តែ ស្ថានភាពនោះ ត្រូវបានកែលម្អឡើងវិញហើយ នាប៉ុន្មានថ្ងៃចុងក្រោយនេះ។ កាលពីថ្ងៃទី 17 ឧសភា ចំនួនអ្នកឆ្លងថ្មីនៅ តៃវ៉ាន់ គឺ 535 នាក់ ខណៈដែលមធ្យមភាគក្នុងអំឡុង 7 ថ្ងៃ នៃសប្ដាហ៍មុន មានមិនដល់ 20 ករណី។ ថ្ងៃទី 26 កក្កដា តៃវ៉ាន់ បានរាយការណ៍ថា អ្នកឆ្លងក្នុងសហគមន៍ មានតែ 10 នាក់ប៉ុណ្ណោះ។

យោងតាមការអធិប្បាយរបស់ Wayne Soon មកពីសារព័ត៌មាន Diplomat វីធីសាស្ត្រសំខាន់ដំបូងដែលជួយឱ្យ តៃវ៉ាន់ គ្រប់គ្រងបាននូវការឆ្លងរាលដាល នោះគឺ ការបង្កើនការអនុវត្តយុទ្ធសាស្ត្រដែលកោះនេះ បានធ្វើតាំងពីមុនមក រួមមាន ការពាក់ម៉ាស ការធ្វើចត្តាឡីស័ក និងការតាមរកអ្នកពាក់ព័ន្ធ។ តាំងពីខែមេសា ឆ្នាំ 2020 តៃវ៉ាន់ បានចាប់ផ្ដើមបង្គាប់ឱ្យពាក់ម៉ាសនៅលើមធ្យោបាយធ្វើដំណើរសាធារណៈ។ ក្រោយមក អាជ្ញាធរក៏ពង្រីកវិសាលភាពនៃការកំណត់ និងចេញបទបញ្ជាឱ្យពាក់ម៉ាស នៅពេលចេញពីផ្ទះ។

តៃវ៉ាន់ ក៏បន្ថែមមជ្ឈមណ្ឌលចត្តាឡីស័ក សម្រាប់អ្នកជំងឺ COVID-19 ក្នុងនោះមានទាំងសណ្ឋាគារ និងទីតាំងដែលគ្រប់គ្រងដោយរដ្ឋ។ ប្រការនេះ បានជួយកាត់បន្ថយការឆ្លងរាលដាលក្នុងគ្រួសារ និងសហគមន៍។

Wayne Soon វាយតម្លៃថា កត្តាសំខាន់ទីពីរ ដែលនាំមកនូវជោគជ័យឱ្យ តៃវ៉ាន់ នោះគឺ អាជ្ញាធរចេះស្ដាប់យោបល់ និងការប្ដូរផ្លាស់គោលនយោបាយ។ ដំបូងឡើយ ពួកគេរារែកក្នុងការហាមបរិយោគអាហារក្នុងភោជនីយដ្ឋាន ព្រោះតែវិធីសាស្ត្ររក្សាគម្លាតសង្គម និងការដំឡើងកញ្ចក់ការពារ ត្រូវបានគេវាយតម្លៃថាអាចទប់ស្កាត់ការឆ្លងរាលដាល។ ប៉ុន្តែ នៅចំពោះមុខការអំពាវនាវឱ្យមានការហាមធ្វើសកម្មភាពក្នុងផ្ទះ ក្នុងបន្ទប់បិទជិត អាជ្ញាធរមូលដ្ឋានជាច្រើន ក៏យល់ព្រមធ្វើតាម។

បច្ចុប្បន្ន អាជ្ញាធរតំបន់មួយចំនួន នៅតែរក្សាបម្រាមខាងលើ ព្រោះតែខ្លាចរងការរិះគន់ និងខ្លាចការផ្ទុះឆ្លងរាលដាលជាថ្មី បើទោះជាថ្មីៗនេះ តៃវ៉ាន់ បានដកវិធានការនេះរួចហើយ នៅពេលតួលេខនៃការឆ្លង បានថយចុះ។

កាលពីដើមខែមិថុនា ចំនួនពលរដ្ឋដែលបានទទួលការចាក់វ៉ាក់សាំង COVID-19 មានមិនដល់ 2% ផង នៅក្នុងចំណោមពលរដ្ឋសរុបជាង 23 លាននាក់ ដោយសារតែប្រភពផ្គត់ផ្គង់មានកំណត់ ហើយអាជ្ញាធរ តៃវ៉ាន់ នៅតែបែរខ្នងដាក់វ៉ាក់សាំងរបស់ ចិនដីគោក ដែលបានស្នើផ្ដល់ជំនួយ។

ប៉ុន្តែ ចុងក្រោយ បក្សប្រជាធិបតេយ្យជឿនលឿន ដែលកំពុងកាន់អំណាច ក៏បានគាំទ្រឱ្យទិញវ៉ាក់សាំងរបស់ Pfizer-BioNTech ពីប្រទេស អាល្លឺម៉ង់ តាមរយៈក្រុមហ៊ុនមួយនៅ ចិនដីគោក។

បណ្ដាញសារព័ត៌មាន ក៏ត្រូវបានគេមើលឃើញថា បានចូលរួមចំណែកក្នុងការទប់ស្កាត់ COVID-19 ដោយពួកគេប្រណាំងប្រជែងក្នុងការផ្ដល់ព័ត៌មានថ្មីៗបំផុតទាក់ទងនឹងបញ្ហា COVID-19 បើទោះជាវិធីផ្ដល់ព័តមានរបស់សារព័ត៌មានមួយចំនួនតូច បាននាំឱ្យប្រជាជនមានការព្រួយបារម្ភចំពោះការចាក់វ៉ាក់សាំង។

Wayne Soon បន្ថែមថា តៃវ៉ាន់ ក៏ទទួលបានផលប្រយោជន៍ពីទង្វើល្អរបស់ខ្លួន ដែលបានធ្វើកាលពីដំណាក់កាលដំបូងនៃវិបត្តិ COVID-19។ កាលពីឆ្នាំទៅ តៃវ៉ាន់ បានផ្ដល់ជំនួយជាម៉ាស ជាង 51 លានបន្ទះ ដល់ដៃគូជាច្រើនក្នុងពិភពលោក។

ជាលទ្ធផល បណ្ដាប្រទេសដែលទទួលបានជំនួយពី តៃវ៉ាន់ ក៏បានជួយជាវ៉ាក់សាំងដល់កោះនេះ។ ក្នុងរយៈពេល 2 ខែកន្លងទៅ ជប៉ុន បានផ្ដល់ជំនួយជាវ៉ាក់សាំង AstraZeneca ជាង 3.3 លានដូស ខណៈដែល សហរដ្ឋអាមេរិក ក៏បានផ្ដល់វ៉ាក់សាំង Moderna ចំនួន 2.5 លានដូស ដល់កោះនេះ។ ប្រទេស លីទុយអានី ស្លូវ៉ាគី និងសាធារណរដ្ឋឆែក ក៏បានសន្យាផ្ដល់វ៉ាក់សាំងរាប់ម៉ឺនដូស ដល់ តៃវ៉ាន់ផងដែរ។

ក្រោយទទួលបានជំនួយជាវ៉ាក់សាំង ពីកម្មវិធី COVAX របស់អង្គការសុខភាពពិភពលោក និង សហរដ្ឋអាមេរិក បច្ចុប្បន្ន តៃវ៉ាន់ បានចាក់យ៉ាងតិច 1 ដូស ដល់ប្រជាជនចំនួន 28% ច្រើនជាងឆ្ងាយ ធៀបនឹង 1% កាលពីមុនការផ្ទះឆ្លង។

ជោគជ័យរបស់ តៃវ៉ាន់ ទំនងជាមិនអាចគង់នៅបានយូរអង្វែងនោះទេ ដោយសារតែ COVID-19 ប្រភេទ Delta។ ក៏ប៉ុន្តែ បទពិសោធន៍របស់កោះនេះ ត្រូវបានគេវាយតម្លៃថា នឹងមានសមត្ថភាពគ្រប់គ្រាន់ អាចជួយឱ្យពួកគេគ្រប់គ្រងស្ថានការណ៍បានល្អ ទៅលើរលកនៃការឆ្លងរាលដាលនាពេលខាងមុខ៕

August 5, 2021

កម្ពុជា៖ ក្រុមហ៊ុនចំនួន 10 បានចុះបញ្ជីនាំចូលវ៉ាក់សាំង ខណៈអត្រាឆ្លង COVID-19 ជិត 4,700 នាក់/1 លាននាក់

ការចាក់វ៉ាក់សាំងសរុបទូទាំងប្រទេស ធៀបនឹងប្រជាជនសរុប 16 លាននាក់ បច្ចុប្បន្ន សម្រេចបាន 48.16% ហើយ ខណៈដែលក្រុមហ៊ុនជាច្រើន បាន និងកំពុងចុះបញ្ជិកា ដើម្បីនាំចូលវ៉ាក់សាំងបង្ការវីរុស COVID-19។

កំណើនអត្រានៃការចាក់វ៉ាក់សាំងបង្ការវីរុស COVID-19 នៅ កម្ពុជា គិតត្រឹមព្រឹកព្រលឹមថ្ងៃទី 05 ខែសីហា ឆ្នាំ 2021 រួមមាន៖ ពលរដ្ឋពេញវ័យជាគោលដៅ 10 លាននាក់ សម្រេចបាន 75.42% , កុមារ និងក្មេងជំទង់ វ័យចាប់ពី 12 ដល់ 17 ឆ្នាំ ជាគោលដៅជិត 2 លាននាក់ សម្រេចបាន 8.29%។ ចំណែកការចាក់វ៉ាក់សាំងសរុបទូទាំងប្រទេស ធៀបនឹងប្រជាជនសរុប 16 លាននាក់ បច្ចុប្បន្ន សម្រេចបាន 48.16%។

យោងតាមទំព័រ Worldometers អត្រានៃការឆ្លង COVID-19 នៅ កម្ពុជា បច្ចុប្បន្នស្មើនឹង 4,692 នាក់/1 លាននាក់។ រីឯអត្រានៃការស្លាប់ដោយសារ COVID-19 វិញ ស្មើនឹង 88 នាក់/1 លាននាក់។ អត្រានៃការធ្វើតេស្តរកវីរុស COVID-19 សម្រេចបាន 107,431លើក/1 លាននាក់។

ទាក់ទងនឹងបញ្ហាវ៉ាក់សាំងបង្ការ COVID-19 នេះដែរ លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់សារព័ត៌មានអន្តរជាតិ កាលពីថ្ងៃពុធកន្លងទៅនេះថា ក្រុមហ៊ុនប្រមាណជា 10 បានចុះបញ្ជី ដើម្បីនាំចូលវ៉ាក់សាំង COVID-19 មក កម្ពុជា។ លោកឧកញ៉ា រូបនេះ បន្ថែមថា បណ្ដាក្រុមហ៊ុនឯកជននៅ កម្ពុជា នឹងនាំចូលវ៉ាក់សាំងច្រើនប្រភេទ ក្នុងពេលឆាប់ៗនេះ ហើយវ៉ាក់សាំងទាំងនោះ នឹងអាចចាក់បានទៅលើកុមារចាប់ពីអាយុ 12 ឆ្នាំ ឡើងទៅ។

ការចុះបញ្ជិកាដើម្បីនាំចូលវ៉ាក់សាំងពីសំណាក់ក្រុមហ៊ុនឯកជនខាងលើនេះ ត្រូវបានធ្វើឡើងបន្ទាប់ពីក្រសួងសុខាភិបាល កាលពីថ្ងៃទី 27 ខែកក្កដា កន្លងទៅ បានអនុញ្ញាតឱ្យគ្រឹះស្ថានអាហរ័ណ នីហរ័ណឱសថ ដែលទទួលបានការអនុញ្ញាតពីក្រសួងសុខាភិបាល ធ្វើការស្នើសុំនាំចូលវ៉ាក់សាំង COVID-19 ទាំងឡាយណា ដែលបានទទួលស្គាល់ដោយអង្គការសុខភាពពិភពលោក (WHO)។

វ៉ាក់សាំងដែលនាំចូលដោយក្រុមហ៊ុនឯកជន អាចចែកចាយ និងចាក់តាមទីតាំងផ្ដល់សេវាសុខាភិបាលឯកជនស្របច្បាប់ក្នុងក្របខណ្ឌទូទាំងប្រទេស។ ប៉ុន្តែ ដំណើរការខាងលើនេះ ត្រូវតែធានាឱ្យបាននូវសុវត្ថិភាព និងប្រសិទ្ធភាពខ្ពស់៕

August 5, 2021

កម្ពុជា ប្រកាសមិនគិតថ្លៃលើការធ្វើតេស្តរហ័ស រក COVID-19 នៅតាមមន្ទីរពេទ្យរដ្ឋ

(ភ្នំពេញ)៖ «ប្រជាពលរដ្ឋដែលមកទទួលសេវាធ្វើតេស្ដរហ័ស រកវីរុស COVID-19 (Rapid Test) នៅតាមមូលដ្ឋានសុខាភិបាលសាធារណៈ នឹងមិនត្រូវបានគិតថ្លៃនោះឡើយ» នេះបើតាមលិខិតណែនាំរបស់ក្រសួងសុខាភិបាល ជូនដល់បណ្ដាអង្គភាព និងបុគ្គលិកសុខាភិបាលក្រោមឱវាទ។

លិខិតរបស់ក្រសួងសុខាភិបាល ដែលត្រូវបានប្រកាសនៅព្រឹកថ្ងៃទី 04 ខែសីហា ឆ្នាំ 2021 នេះ បានឱ្យដឹងទៀតថា ការសម្រេចខាងលើគឺ យោងទៅតាមអនុសាសន៍ដ៏ខ្ពង់ខ្ពស់បំផុតរបស់ ប្រមុខរដ្ឋាភិបាល កម្ពុជា នាឱកាសអញ្ជើញបើកយុទ្ធនាការចាក់វ៉ាក់សាំងបង្ការ COVID-19 ដល់កុមារ និងយុវវ័យដែលមានអាយុចាប់ពី 12 ដល់ 17 ឆ្នាំ កាលពីថ្ងៃទី 01 ខែសីហា ឆ្នាំ 2021។

ព័ត៌មានបន្ថែម សូមអានលិខិតណែនាំរបស់លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺ COVID-19៖

August 4, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 04 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 583 នាក់, អ្នកជាចំនួន 658 នាក់ និងអ្នកស្លាប់ចំនួន 17 នាក់បន្ថែមទៀត នៅក្នុងថ្ងៃទី 03 ខែសីហា ឆ្នាំ 2021។

គិតត្រឹមព្រឹកថ្ងៃទី 04 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 79,634 នាក់ ក្នុងនោះមានអ្នកជាសះស្បើយជាង 72,803 នាក់ និង អ្នកស្លាប់ 1,488 នាក់។ ក្នុងចំណោមអ្នកវិជ្ជមាននឹង COVID-19 សរុប ក៏មាន 260 នាក់ វិជ្ជមាននឹងវ៉ារ្យ៉ង់ Delta ផងដែរ ក្នុងនោះមាន 36 ករណី ត្រូវបានរកឃើញក្នុងថ្ងៃទី 03 សីហា។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 200,280,632 នាក់ ត្រូវបានរកឃើញ ក្នុងនោះមានជាង 180,544,399 នាក់បានជា, 4,258,927 នាក់បានស្លាប់ និងជាង 15,477,306 នាក់ កំពុងព្យាបាល៕

August 4, 2021

វៀតណាម៖ ករណីវិជ្ជមាននឹងវីរុស COVID-19 កើនដល់ជាង 17 ម៉ឺននាក់

ក្រសួងសុខាភិបាល វៀតណាម នាព្រឹកនេះ (04 សីហា) បានឱ្យដឹងថា បានរកឃើញអ្នកវិជ្ជមាននឹង COVID-19 ចំនួន 4,271 នាក់បន្ថែមទៀត ក្នុងនោះមាន 1,044 នាក់ គឺជាករណីឆ្លងក្នុងសហគមន៍ នៅក្នុងថ្ងៃទី 03 ខែកក្កដា។

ទីក្រុងហូជីមិញ (សៃហ្គន) មានអ្នកវិជ្ជមានថ្មីច្រើនជាងគេ (2,365 នាក់) ខណៈខេត្តប៊ិញហ្សឿងជាប់លំដាប់លេខ 2 ដោយមានអ្នកឆ្លងថ្មី 1,032 នាក់។ ដូច្នេះ តួលេខនៃករណីឆ្លងថ្មី កើន 704 នាក់ បើធៀបនឹងម្សិលមិញ។

អ្នកវិជ្ជមានសរុបនៅទីក្រុងហូជីមិញ បានកើនឡើងដល់ 105,095 នាក់ ក្នុងគ្រាដែលខេត្តប៊ិញហ្សឿន ដែលនៅជាប់នឹងទីក្រុងហូជីមិញ មានចំនួន 20,445 នាក់។ ដោយឡែក រដ្ឋធានីហាណូយ វិញ មានអ្នកវិជ្ជមានសរុប ត្រឹមតែ 1,975 នាក់ប៉ុណ្ណោះ។

តួលេខសរុបនៃអ្នកវិជ្ជមាននឹង COVID-19 នៅ វៀតណាម គិតមកដល់បច្ចុប្បន្ន មានចំនួន 174,461 នាក់ ក្នុងនោះអ្នកបានជាសះស្បើយ មានចំនួន 50,831 នាក់, អ្នកស្លាប់ចំនួន 2,071 នាក់ និងអ្នកកំពុងព្យាបាល មានចំនួន 121,555 នាក់៕

August 4, 2021

តួលេខនៃការចាក់វ៉ាក់សាំង COVID-19 នៅ កម្ពុជា គិតត្រឹមព្រឹកថ្ងៃទី 04 សីហា 2021

(ភ្នំពេញ)៖ នៅ កម្ពុជា ការចាក់វ៉ាក់សាំងបង្ការវីរុស COVID-19 ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេស បានចំនួន 7,607,884 នាក់ គិតត្រឹមព្រឹកព្រលឹម ថ្ងៃទី 04 ខែសីហា ឆ្នាំ 2021។

ក្នុងចំណោមអ្នកដែលបានទទួលការចាក់វ៉ាក់សាំងសរុប ក៏មានកុមារ និងក្មេងជំទង់ ដែលមានអាយុចាប់ពី 12 ដល់ 17 ឆ្នាំ ចំនួន 124,157 នាក់ផងដែរ ក្រោយពីបានចាប់ផ្ដើមយុទ្ធនាការចាក់វ៉ាក់សាំងជូនពួកគេបាន 3 ថ្ងៃ។

លទ្ធផលនៃការចាក់វ៉ាក់សាំងជូនពលរដ្ឋពេញវ័យទូទាំងប្រទេសគឺ ស្មើនឹង 74.84% ធៀបនឹងគោលដៅ 10 លាននាក់ ដែលរាជរដ្ឋាភិបាលបានកំណត់។ ចំណែក តួលេខនៃការចាក់វ៉ាក់សាំងជូនកុមារ និងក្មេងជំទង់គឺ ស្មើនឹង 6.31% ធៀបនឹងគោលដៅ 1,966,931 នាក់។ រីឯលទ្ធផលនៃការចាក់វ៉ាក់សាំងជូនប្រជាជនសរុបទូទាំងប្រទេស (16 លាននាក់) គឺ ស្មើនឹង 47.55%។

August 4, 2021

ផ្អាកដំណើរការផ្សារសិនជូរីផ្លាហ្សា ព្រោះទាក់ទិននឹង COVID-19 ប្រភេទ Delta

រដ្ឋបាលខណ្ឌពោធិ៍សែនជ័យ នៃ រាជធានីភ្នំពេញ បានសម្រេចបិទបណ្ដោះអាសន្នចំពោះផ្សារបណ្ដោះអាសន្នសិនជូរីផ្លាហ្សា បន្ទាប់ពីសង្ស័យថា អាជីវកររបស់ផ្សារនេះ មានផ្ទុកវីរុស COVID-19 ប្រភេទ Delta។

ព័ត៌មាននេះគឺយោងទៅតាមខ្លឹមសារដែលត្រូវបានបង្ហោះនៅលើទំព័រ Facebook របស់រដ្ឋបាលខណ្ឌពោធិ៍សែនជ័យ កាលពីម៉ោងប្រមាណ 11 ព្រឹក ថ្ងៃទី 03 ខែកក្កដា ឆ្នាំ 2021។

ផ្សារបណ្ដោះអាសន្នសិនជូរីផ្លាហ្សា មានទីតាំងស្ថិតនៅតាមបណ្តោយមហាវិថីសហព័ន្ធរុស្ស៊ី និងនៅក្បែរសួនកុមារពោធិ៍តុន ចម្ងាយ 1.5 គីឡូម៉ែត្រពីអាកាសយាន្តដ្ឋានអន្តរជាតិ ភ្នំពេញ។ ព័ត៌មានលម្អិត មិនទាន់ត្រូវបានរដ្ឋបាលខណ្ឌពោធិ៍សែនជ័យ បង្ហើបឱ្យដឹងនៅឡើយ។

August 3, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 03 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 577 នាក់, អ្នកជាចំនួន 628 នាក់ និងអ្នកស្លាប់ចំនួន 29 នាក់បន្ថែមទៀត នៅក្នុងថ្ងៃទី 02 ខែសីហា ឆ្នាំ 2021។

គិតត្រឹមព្រឹកថ្ងៃទី 03 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 79,051 នាក់ ក្នុងនោះមានអ្នកជាសះស្បើយជាង 72,145 នាក់ និងអ្នកស្លាប់ 1,471 នាក់។

កំណើនអត្រាចាក់វ៉ាក់សាំង COVID-19 នៅកម្ពុជា គិតត្រឹមថ្ងៃទី 02 ខែសីហា ឆ្នាំ 2021 មាន 74.18% ធៀបជាមួយចំនួនប្រជាជនគោលដៅ 10លាននាក់ និងលើកុមារ-យុវវ័យអាយុពី 12 ឆ្នាំ ទៅក្រោម 18 ឆ្នាំ មាន 4.05% ធៀបជាមួយនឹងប្រជាជនគោលដៅ 1,966,931 នាក់។

អត្រានៃការស្លាប់ដោយសារ COVID-19 នៅកម្ពុជា ស្មើនឹង 85នាក់/1លាននាក់ ខណៈអត្រានៃការឆ្លង ស្មើនឹង 4,624នាក់/1លាននាក់ បើធៀបនឹងចំនួនប្រជាជនសរុបជិត 17 លាននាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 199,611,790 នាក់ ត្រូវបានរកឃើញ ក្នុងនោះមានជាង 180,101,720 នាក់បានជា, 4,249,322 នាក់បានស្លាប់ និងជាង 15,260,750 នាក់ កំពុងព្យាបាល៕

August 3, 2021

បិទផ្សារលើធំថ្មី នៅ សៀមរាប បន្តទៀត ដើម្បីទប់ស្កាត់ការឆ្លងរាលដាលនៃ COVID-19

រដ្ឋបាលខេត្តសៀមរាប សម្រេចបិទផ្សារលើធំថ្មី ដែលស្ថិតនៅភូមិដកពោធិ៍ សង្កាត់ស្លក្រាម ក្រុងសៀមរាប រយៈពេលពីរសប្តាហ៍បន្ថែមទៀត ដើម្បីទប់ស្កាត់ការរីករាលដាលនៃវីរុស COVID-19។

នៅក្នុងសេចក្ដីប្រកាសចុះថ្ងៃទី 02 ខែសីហា ឆ្នាំ 2021 រដ្ឋបាលខេត្តសៀមរាប បានសម្រេចបិទផ្សារខាងលើ ចាប់ពីថ្ងៃទី 02 ទៅដល់ថ្ងៃទី15 ខែសីហា ឆ្នាំ 2021។

គិតត្រឹមព្រឹកថ្ងៃទី 02 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 78,474 នាក់ ក្នុងនោះមានអ្នកជាសះស្បើយជាង 71,517 នាក់ និង អ្នកស្លាប់ 1,442 នាក់។

August 3, 2021

ក្រសួងសុខាភិបាលថា កម្ពុជា កំពុងរងការវាយប្រហារពី វ៉ារ្យ៉ង់ Delta ខណៈប្រមុខរដ្ឋាភិបាល សម្រេចឱ្យចាក់ដូសទីបី

គិតត្រឹមថ្ងៃទី 01 ខែសីហា ឆ្នាំ 2021 កម្ពុជា បានរកឃើញអ្នកផ្ទុកវីរុស COVID-19 ប្រភេទ Delta សរុបចំនួន 223 ករណី ក្នុងនោះមាន 5 ករណី នៅ ភ្នំពេញ។

ទាក់ទិននឹងរលកនៃការឆ្លងរាលដាលរបស់ COVID-19 ពិសេសគឺប្រភេទ Delta ប្រមុខរដ្ឋាភិបាល កម្ពុជា សម្ដេច ហ៊ុន សែន កាលពីថ្ងៃទី 01 ខែសីហា បានសម្រេចឱ្យចាក់វ៉ាក់សាំងបង្ការ COVID-19 ដូសទី 3 ដើម្បីបង្កើនប្រសិទ្ធភាពក្នុងការទប់ស្កាត់ការឆ្លងវីរុសនេះ។ វ៉ាក់សាំង AstraZeneca ដែលអភិវឌ្ឍដោយ អង់គ្លេស នឹងត្រូវបានប្រើប្រាស់សម្រាប់អ្នកដែលបានចាក់វ៉ាក់សាំងរបស់ ចិន ប្រភេទ Sinopharm ឬ Sinovac។

ចំណែកអ្នកដែលបានទទួលការចាក់វ៉ាក់សាំង AstraZeneca រួចហើយ នឹងអាចត្រូវបានចាក់ដូសទី 3 ដោយប្រើប្រាស់វ៉ាក់សាំង Sinopharm ឬ Sinovac វិញម្តង។

ការចាក់ដូសទី 3 នេះ គឺផ្ដល់អាទិភាពសម្រាប់បណ្ដាខេត្តជាប់ព្រំដែន ដោយសារពួកគេកំពុងប្រឈមនឹងហានិភ័យខ្ពស់ក្នុងការឆ្លង COVID-19 ប្រភេទ Delta ដែលជាវ៉ារ្យ៉ង់មួយត្រូវបានរកឃើញដំបូងនៅប្រទេស ឥណ្ឌា។ នេះបើតាម ប្រមុខរដ្ឋាភិបាល។

ប្រភពព័ត៌មានពីមន្ទីរពេទ្យហ្លួងម៉ែ ដែលគ្រប់គ្រងដោយកងទ័ព បានឱ្យដឹងថា ការចាក់វ៉ាក់សាំងដូសទី 3 នេះ ក៏នឹងផ្ដល់អាទិភាពចំពោះបុគ្គលិកសុខាភិបាល និងក្រុមមន្ត្រីប្រយុទ្ធប្រឆាំងនឹង COVID-19 នៅជួរមុខផង ដែរ៕

August 2, 2021

Category: សុខភាព