សុខភាព - La Reine Media

ក្រុមហ៊ុន ជប៉ុន សុំច្បាប់ ធ្វើចរាចរណ៍ថ្នាំពិសេស ព្យាបាល COVID-19

ក្រុមហ៊ុនអភិវឌ្ឍ និងផលិតឱសថ Shionogi របស់ប្រទេសជប៉ុន នឹងស្នើសុំច្បាប់សម្រាប់ធ្វើចរាចរណ៍ឱសថព្យាបាលជំងឺ COVID-19 ប្រភេទគ្រាប់សម្រាប់លេប នាពេលដ៏ខ្លីខាងមុខ ដែលនេះនឹងផ្ដល់ជម្រើសបន្ថែមក្នុងការព្យាបាលនៅតាមផ្ទះ និងកាត់បន្ថយសម្ពាធនៅតាមមន្ទីរពេទ្យ។

ប្រភពព័ត៌មានពីក្រុមហ៊ុន Shionogi ដែលមានទីស្នាក់ការនៅទីក្រុង Osaka ប្រទេសជប៉ុន កាលពីថ្ងៃទី 06 សីហា បានឱ្យដឹងថា ថ្នាំព្យាបាលជំងឺ COVID-19 នេះ ត្រូវបានពិសោធលើមនុស្សចាប់តាំងពីខែកក្កដា ឆ្នាំ 2021 ហើយថា នឹងស្នើសុំអាជ្ញាប័ណ្ណនៅចុងឆ្នាំនេះ។ ឱសថនេះ ត្រូវបានអភិវឌ្ឍឡើងដើម្បីព្យាបាលជំងឺ COVID-19 កម្រិតស្រាល និងមធ្យម ដោយជួយទប់ស្កាត់មិនឱ្យជំងឺវិវឌ្ឍទៅជាធ្ងន់ធ្ងរ។

បើសិនជាទទួលបានច្បាប់អនុញ្ញាតឱ្យដាក់លក់ នោះវានឹងជាថ្នាំលេបដំបូងគេបង្អស់ សម្រាប់ព្យាបាលជំងឺ COVID-19 កម្រិតស្រាល និងមធ្យមនៅប្រទេសជប៉ុន។ បច្ចុប្បន្ន មានតែថ្នាំចាក់មួយប្រភេទប៉ុណ្ណោះ សម្រាប់ព្យាបាលអ្នកជំងឺ COVID-19 កម្រិតស្រាល នៅក្នុងប្រទេសនេះ ហើយថ្នាំនេះ ក៏ត្រូវការចាក់នៅតាមមន្ទីរពេទ្យ។

លោក Isao Teshirogi ជាប្រធាន និងជានាយកប្រតិបត្តិនៃក្រុមហ៊ុន ជប៉ុន Shionogi & Co.,

ប្រភពព័ត៌មានពីក្រុមហ៊ុនខាងលើ ក៏បានឱ្យដឹងថា ក្រុមហ៊ុននេះក៏កំពុងពិនិត្យទៅលើលទ្ធភាពផ្គត់ផ្គង់ទៅកាន់ប្រទេសដទៃផងដែរ។ Shionogi កំពុងពិភាក្សាអំពីគម្រោងនាំចេញឱសថនេះ ជាមួយនាយកដ្ឋានស្រាវជ្រាវនិងអភិវឌ្ឍជីវឱសថកម្រិតខ្ពស់ របស់ សហរដ្ឋអាមេរិក (Biomedical Advanced Research and Development Authority / BARDA)។

ក្រុមហ៊ុន Shionogi មានផែនការស្នើសុំច្បាប់បន្ទាន់ពីក្រសួងសុខាភិបាល ជប៉ុន ដែលប្រការនេះនឹងជួយឱ្យក្រុមហ៊ុនមិនចាំបាច់បំពេញការពិសោធលើមនុស្ស មុនពេលដាក់លក់នៅក្នុងទីផ្សារ ដោយគ្រាន់តែធ្វើការសិក្សាស្រាវជ្រាវចាំបាច់នាពេលបន្ទាប់។

ក្រុមហ៊ុន Shionogi ក៏សង្ឃឹមថា នឹងអាចផ្គត់ផ្គង់ថ្នាំនេះ ដល់អ្នកជំងឺចាប់ពី 1 លាន ទៅ 2 លាននាក់ ក្នុងប្រទេសជប៉ុន នៅចុងឆ្នាំ 2021៕

August 7, 2021

ក្រសួងសុខាភិបាល៖ ការចាក់វ៉ាក់សាំង AstraZeneca ដូសជំរុញ ឬដូសទី 3 នឹងធ្វើឡើងចាប់ពីថ្ងៃទី 08 សីហា

ក្រសួងសុខាភិបាល នាព្រឹកនេះ (07 សីហា 2021) បានចេញសេចក្ដីជូនដំណឹងមួយ ស្ដីពីការចាក់វ៉ាក់សាំងបង្ការ COVID-19 ដូសទី 3 ឬហៅថា ដូសជំរុញ ជូនដល់អ្នកដែលបានចាក់វ៉ាក់សាំង Sinopharm ឬ Sinovac ដោយប្រើប្រាស់វ៉ាក់សាំង AstraZeneca។

ក្រុមគោលដៅដែលស្ថិតក្នុងអាទិភាពនៃការចាក់វ៉ាក់សាំងដូសជំរុញនេះ រួមមាន ក្រុមគ្រូពេទ្យជួរមុខ មន្ត្រីរាជការ ទាហាន គ្រួសារទាហាន នគរបាល និងអតីតយុទ្ធជនផងដែរ។

ការចាក់វ៉ាក់សាំងដូសទី 3 ឬ ដូសជំរុញ ដែលនឹងប្រព្រឹតទៅចាប់ពីថ្ងៃទី 08 សីហា 2021 នេះ ត្រូវបានក្រសួងបញ្ជាក់ថា គឺដើម្បីទប់ស្កាត់ការឆ្លងរាលដាលទ្រង់ទ្រាយធំរបស់ COVID-19 ប្រភេទ Delta។ ព័ត៌មានបន្ថែម សូមអានសេចក្ដីជូនដំណឹងខាងក្រោម។

គិតត្រឹមយប់ថ្ងៃទី 06 ខែសីហា ឆ្នាំ 2021 ក្រសួងសុខាភិបាល និងក្រសួងការពារជាតិ បានចាក់ វ៉ាក់សាំងបង្ការ COVID-19 ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេស សរុបចំនួន 7,927,745 នាក់៕

August 7, 2021

ការចាក់វ៉ាក់សាំងលាយឆ្លាស់គ្នា ជាជម្រើសមានសក្ដានុពលក្នុងការប្រឆាំង COVID-19

ការចាក់វ៉ាក់សាំងលាយឡំគ្នា ដើម្បីបង្ការការឆ្លងវីរុស COVID-19 កំពុងក្លាយជាដំណោះស្រាយដែលមានសក្តានុពល នៅពេលវីរុសបំប្លែងខ្លួនថ្មីប្រកបដោយគ្រោះថ្នាក់ កំពុងគំរាមកំហែងដល់យុទ្ធនាការប្រយុទ្ធប្រឆាំងនឹងវិបត្តិសុខភាពនៅទូទាំងសកលលោក។

អង្គការសុខភាពពិភពលោក (WHO) កាលពីថ្ងៃទី 12 កក្កដា បានលើកឡើងថា បណ្ដាប្រទេសពុំគួរប្រញាប់ចាក់វ៉ាក់សាំងលាយឡំគ្នានោះទេ ដោយសារតែទិន្នន័យនៃការសិក្សាស្រាវជ្រាវស្ដីពីប្រសិទ្ធភាព និងផលប៉ះពាល់ដល់សុខភាព នៅមានកំណត់។ ប៉ុន្តែ បញ្ហាយឺតយ៉ាវនៃប្រភពផ្គត់ផ្គង់វ៉ាក់សាំង រួមនឹងការឆ្លងរាលដាលខ្លាំងរបស់វីរុសបំប្លែងខ្លួនថ្មីនៅក្នុងមួយរយៈពេលចុងក្រោយនេះ ធ្វើឱ្យបណ្ដាប្រទេសត្រូវគិតគូរអំពីការប្ដូរយុទ្ធសាស្ត្រក្នុងការចាក់វ៉ាក់សាំង។

មកដល់បច្ចុប្បន្ន មានប្រទេសជាច្រើនកំពុងពិចារណាទៅលើការចាក់វ៉ាក់សាំងលាយឡំគ្នា សម្រាប់ដូសទីពីរ ឬដូសបន្ថែមដើម្បីធានាលើការការពារពលរដ្ឋរបស់ខ្លួន។ នៅ កម្ពុជា កាលពីថ្ងៃទី 01 សីហា ប្រមុខរដ្ឋាភិបាល បានមានប្រសាសន៍ថា អ្នកដែលបានចាក់វ៉ាក់សាំង Sinopharm ឬ Sinovac រួចរាល់ នឹងត្រូវបានចាក់វ៉ាក់សាំង AstraZeneca 1 ម្ជុលបន្ថែមទៀត ខណៈដែលអ្នកចាក់ AstraZeneca រួចរាល់ នឹងត្រូវចាក់រំលឹកមួយម្ជុលទៀត ដោយប្រើវ៉ាក់សាំង Sinovac វិញម្ដង។

ប្រទេសថៃ ឯណោះវិញ កាលពីថ្ងៃទី 12 កក្កដា ក៏បានឱ្យដឹងថា ប្រទេសនេះចាក់ AstraZeneca ចំនួន 2 ដូស ចំពោះអ្នកដែលបានចាក់ Sinovac ចំនួន 1 ដូសរួចហើយ។

វេជ្ជបណ្ឌិត Vinod RMT Balasubramaniam សាស្ត្រាចារ្យនៃសាកលវិទ្យាល័យ Monash ប្រទេសម៉ាឡេស៊ី បានឱ្យដឹងថា៖ «ការចាក់វ៉ាក់សាំងលាយឆ្លាស់គ្នានេះ ត្រូវបានយកចិត្តទុកដាក់កាន់តែច្រើនឡើង។ ទិន្នន័យដែលត្រូវបានប្រកាសចុងក្រោយនេះ បានបង្ហាញអំពីប្រសិទ្ធភាព និងសមត្ថភាពនៃការការពារខ្ពស់ នៅចំពោះមុខវ៉ារ្យ៉ង់នានារបស់ COVID-19»។

វិទ្យាស្ថានសេរ៉ូមរបស់ ដាណឺម៉ាក កាលពីថ្ងៃទី 02 សីហា ក៏បានបង្ហើបឱ្យដឹងថា ការចាក់ Pfizer ឬ Moderna បន្ទាប់ពីបានចាក់ AstraZeneca បង្កើតបានជាស្រទាប់ការពារដែលល្អជាង សម្រាប់មនុស្ស។ ក្រុមអ្នកវិទ្យាសាស្ត្របានរកឃើញថា រយៈពេល 14 ថ្ងៃ បន្ទាប់ពីបានចាក់លាយឆ្លាស់គ្នា ហានិភ័យនៃការឆ្លង COVID-19 បានថយចុះ 88% ប្រើធៀបនឹងអ្នកដែលមិនទាន់បានចាក់។

ការស្រាវជ្រាវមួយរបស់ប្រទេស កូរ៉េខាងត្បូង កាលពីខែកក្កដា បានឱ្យដឹងថា ការចាក់ Pfizer ចំនួន 2 ដូស ក្រោយពីចាក់ AstraZeneca 1 ដូស ជួយបង្កើនកម្លាំងការពាររាងកាយខ្ពស់ជាង 6 ដង ធៀបនឹងការចាក់តែ AstraZeneca 2 ដូស។

សាកលវិទ្យាល័យ Oxford របស់ប្រទេសអង់គ្លេស កាលពីដើមឆ្នាំនេះ ក៏បានបញ្ជាក់ថា ការចាក់លាយ Pfizer ជាមួយនឹង AstraZeneca ក៏មានប្រយោជន៍ច្រើនដល់អង្គបដិប្រាណ។

ចំណែកលទ្ធផលនៃការសិក្សាស្រាវជ្រាវមួយរបស់មូលនិធិវិនិយោគផ្ទាល់ នៃប្រទេស រុស្ស៊ី (RDIF) ដែលបានប្រកាសកាលពីថ្ងៃទី 30 កក្កដា 2021 ក៏បានឱ្យដឹងថា ការសាកល្បងចាក់វ៉ាក់សាំង Sputnik V និង AstraZeneca លាយឆ្លាស់គ្នា បានបង្ហាញថា ពុំមានផលប៉ះពាល់ធ្ងន់ធ្ងរ និងមិនបានរកឃើញករណីឆ្លងនោះទេ នៅក្នុងចំណោមអ្នកស្ម័គ្រចិត្ត។

ក្រុមមន្ត្រីសុខាភិបាលរបស់ អាល្លឺម៉ង់ កាលពីថ្ងៃទី 2 សីហា បានប្រាប់ថា ប្រទេសនេះ មានគម្រោងប្រើប្រាស់ Pfizer និង Moderna ដើម្បីចាក់ដូសបន្ថែម សម្រាប់ពលរដ្ឋវ័យចំណាស់ និងមានប្រព័ន្ធការពាររាងកាយខ្សោយ ចាប់ពីខែកញ្ញា ដោយមិនខ្វល់ថា មុននេះ ពលរដ្ឋបានចាក់វ៉ាក់សាំងប្រភេទណានោះទេ។

មកដល់បច្ចុប្បន្ន មនុស្សជាង 200 លាននាក់ បានឆ្លង COVID-19 និងជាង 4 លាននាក់បានស្លាប់ដោយសារវីរុសនេះ រាប់ចាប់ពីវាបានបង្ហាញខ្លួនដំបូងនៅទីក្រុង Wuhan ប្រទេសចិន កាលពីចុងឆ្នាំ 2019។ វ៉ាក់សាំងចំនួន 4.36 ពាន់លានដូស ត្រូវបានចាក់នៅទូទាំងសកលលោក ដោយជាមធ្យម ចាក់បាន 40.31លានដូសក្នុង 1 ថ្ងៃ។ ប្រជាជនចំនួន 29.6% របស់ពិភពលោក បានចាក់យ៉ាងតិច 1 ដូស និង 15.2% បានចាក់រួចរាល់។ ដោយឡែក នៅក្នុងបណ្ដាប្រទេសអ្នកមាន ពលរដ្ឋរបស់ពួកគេ ប្រមាណ ពី 60-80% បានចាក់យ៉ាងតិច 1 ដូស ខណៈដែលនៅក្នុងបណ្ដាប្រទេសក្រីក្រ អត្រានេះប្រហាក់ប្រហែលនឹង 1.1% ប៉ុណ្ណោះ។ នេះបើតាម Our World in Data។

ទោះជាយ៉ាងណាក៏ដោយ ក្រុមអ្នកវិទ្យាសាស្ត្របានព្រមានថា សូម្បីតែវ៉ាក់សាំងដែលមានប្រសិទ្ធភាពបំផុត ក៏មិនល្អគ្រប់ដប់នោះដែរ នៅពេលដែលអត្រានៃការឆ្លងបានកើនឡើងខ្ពស់ខ្លាំង បើទោះមិនមានហានិភ័យខ្ពស់ដល់ថ្នាក់ចូលពេទ្យ ឬស្លាប់។ ដូច្នេះ វិធានការរក្សាគម្លាតសង្គម ការរឹងបន្តឹងការជួបជុំ នៅតែត្រូវបានគេចាត់ទុកថាជារឿងសំខាន់នៅក្នុងការប្រយុទ្ធប្រឆាំងនឹង COVID-19 ពិសេសគឺនៅពេលត្រូវប្រឈមមុខនឹង វ៉ារ្យ៉ង់ Delta៕

August 7, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 06 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 588 នាក់, អ្នកជាចំនួន 624 នាក់ និងអ្នកស្លាប់ចំនួន 19 នាក់បន្ថែមទៀត នៅក្នុងថ្ងៃទី 05 ខែសីហា ឆ្នាំ 2021។

គិតត្រឹមព្រឹកថ្ងៃទី 06 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 80,813 នាក់ ក្នុងនោះមានអ្នកជាសះស្បើយជាង 74,045 នាក់ និង អ្នកស្លាប់ 1,526 នាក់ ខណៈអ្នកជំងឺកំពុងព្យាបាល មានចំនួន ប្រមាណ 5,000 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 201,712,180 នាក់ ត្រូវបានរកឃើញ ក្នុងនោះមានជាង 181,469,854 នាក់បានជា, 4,280,563 នាក់បានស្លាប់ និងជាង 15,961,770 នាក់ កំពុងព្យាបាល៕

August 6, 2021

វ៉ាក់សាំងបង្ការ COVID-19 ជាជំនួយផ្ទាល់ ជំហានទីពីររបស់ ជប៉ុន នឹងមកដល់ កម្ពុជា នៅយប់នេះ

នៅយប់ថ្ងៃទី 06 ខែសីហា នេះ វ៉ាក់សាំងបង្ការ COVID-19 ប្រភេទ AstraZeneca ចំនួន 668,000 ដូស ដែលជាជំនួយទ្វេភាគីរបស់ រាជរដ្ឋាភិបាលជប៉ុន ជំហានទីពីរ នឹងដឹកមកដល់កម្ពុជា។ នេះបើតាមលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល។

វ៉ាក់សាំងបង្ការ COVID-19 ប្រភេទ AstraZeneca ចំនួន 668,000 ដូសនេះ ស្ថិតក្នុងចំណោមជំនួញទ្វេភាគីជាវ៉ាក់សាំងចំនួន 1000,000 ដូស ដែល ជប៉ុន បានសន្យាផ្ដល់ឱ្យ កម្ពុជា នាពេលកន្លង។ មុននេះ ជំនួយជាវ៉ាក់សាំង AstraZeneca របស់ ជប៉ុន ជំហានទីមួយ ចំនួន 332,000 ដូស ត្រូវបាន ជប៉ុន ប្រគល់ឱ្យ កម្ពុជា រួចហើយ កាលពីថ្ងៃទី 23 កក្កដា ឆ្នាំ 2021។

គិតមកដល់បច្ចុប្បន្ន រាជរដ្ឋាភិបាលជប៉ុន បានផ្ដល់ជំនួយដល់ កម្ពុជា សរុបជាទឹកប្រាក់ ប្រមាណ 50 លានដុល្លារអាមេរិក ដើម្បីទប់ទល់នឹងបញ្ហា COVID-19។ ជប៉ុន ក៏បានផ្ដល់ប្រាក់កម្ចីប្រមាណ 227 លានដុល្លារអាមេរិក មកឱ្យ កម្ពុជា សម្រាប់ប្រើប្រាស់ក្នុងកម្មវិធីឧបត្ថម្ភប្រាក់ដល់ប្រជាជនដែលរងផលប៉ះពាល់ដោយសារ COVID-19 និងការស្ដារប្រព័ន្ធសុខាភិបាល។

គិតត្រឹមថ្ងៃទី 05 ខែសីហា ឆ្នាំ 2021 កំណើនអត្រានៃការចាក់វ៉ាក់សាំងបង្ការ COVID-19 នៅ កម្ពុជា មានដូចខាងក្រោម៖

ជាសរុប កម្ពុជា បានចាក់វ៉ាក់សាំងបង្ការ COVID-19 ជូនពលរដ្ឋទូទាំងប្រទេស បានចំនួន 7,810,469 នាក់ ក្នុងនោះមាន៖
-ប្រជាជនពេញវ័យជាគោលដៅចំនួន 10 លាននាក់ ចាក់វ៉ាក់សាំងបាន 76.13%។
-ពលរដ្ឋជាកុមារ-យុវវ័យអាយុចាប់ពី 12 ឆ្នាំ ដល់ក្រោម 18 ឆ្នាំ ជាគោលដៅ ចំនួន 1,966,931នាក់ ចាក់បាន 10.06%។
-ពលរដ្ឋទូទាំងប្រទេស (16 លាននាក់) ចាក់បាន 48.82%។

August 6, 2021

វ៉ាក់សាំង COVID-19 ជាជំនួយទ្វេភាគីពី អង់គ្លេស ដែលទើបមកដល់ កម្ពុជា ត្រូវបានសម្ដេច អញ្ជើញទទួលដោយផ្ទាល់

តាមរយៈវ៉ាក់សាំង ចំនួន 415,000 ដូស នេះ អង់គ្លេស បានក្លាយជាប្រទេសទីបីហើយ ដែលផ្ដល់ជំនួយជាវ៉ាក់សាំងប្រឆាំង COVID-19 លក្ខណៈទ្វេភាគីមកដល់ កម្ពុជា បន្ទាប់ពី ចិន និង ជប៉ុន។

វ៉ាក់សាំងដែលទើបដឹកមកដល់ កម្ពុជា នៅថ្ងៃនេះ កំពុងស្ថិតក្នុងពិធីប្រគល់និងទទួលវ៉ាក់សាំង ដែលកំពុងប្រព្រឹត្តទៅនៅពេល ក្រោមអធិបតីភាពរបស់ប្រមុខរដ្ឋាភិបាល កម្ពុជា សម្ដេច ហ៊ុន សែន។ កន្លងមក សម្តេចតេជោ ប្រមុខរដ្ឋាភិបាល ធ្លាប់មានប្រសាសន៍ថា រាល់ជំនួយវ៉ាក់សាំងទ្វេភាគី សម្តេចនឹងចេញទទួលដោយផ្ទាល់។

គិតមកដល់បច្ចុប្បន្ន កម្ពុជា ទទួលបានជំនួយជាវ៉ាក់សាំងបង្ការវីរុស COVID-19 សរុបចំនួន 5,999,100 ដូស ក្នុងនោះមានជំនួយលក្ខណៈទ្វេភាគីចំនួន 4,615,000 ដូស និងជំនួយពីយន្តការ COVAX របស់អង្គការសុខភាពពិភពលោក ចំនួន 1,384,100 ដូស។

August 5, 2021

បិទខ្ទប់ផ្សារទួលសង្កែ នៅ រាជធានីភ្នំពេញ ដើម្បីកាត់ផ្ដាច់វ៉ារ្យ៉ង់ Delta

រដ្ឋបាលរាជធានីភ្នំពេញ បានឱ្យដឹងថា ការសម្រេចបិទខ្ទប់នេះត្រូវបានធ្វើឡើងបន្ទាប់ពីមានការឆ្លងរាលដាលនៃវីរុស COVID-19 ប្រភេទ Delta ដែលជាវ៉ារ្យ៉ងនៃ COVID-19 មួយ ត្រូវបានរកឃើញដំបូងនៅប្រទេសឥណ្ឌា និងកំពុងរាតត្បាតក្នុងពិភពលោក។

ផ្សារទួលសង្កែ ដែលមានទីតាំងស្ថិតនៅភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ត្រូវបានសម្រេចបិទខ្ទប់រយៈពេល 14 ថ្ងៃ គិតចាប់ពីថ្ងៃទី 05 រហូតដល់ថ្ងៃទី 18 ខែសីហា ឆ្នាំ 2021 ដើម្បីទប់ស្កាត់ និងកាត់ផ្ដាច់ការឆ្លងរាលដាលនៅក្នុងសហគមន៍ នៃវ៉ារ្យ៉ង់ថ្មីរបស់វីរុស COVID-19 ដែលមានឈ្មោះថា Delta។

ព័ត៌មានបន្ថែម សូមបន្តអានសេចក្ដីសម្រេចរបស់រដ្ឋបាលរាជធានីភ្នំពេញ ដែលមានដូចខាងក្រោម៖

August 5, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 05 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 591 នាក់, អ្នកជាចំនួន 618 នាក់ និងអ្នកស្លាប់ចំនួន 19 នាក់បន្ថែមទៀត នៅក្នុងថ្ងៃទី 04 ខែសីហា ឆ្នាំ 2021។

គិតត្រឹមព្រឹកថ្ងៃទី 05 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 80,225 នាក់ ក្នុងនោះមានអ្នកជាសះស្បើយជាង 73,421 នាក់ និង អ្នកស្លាប់ 1,507 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 0201,008,820 នាក់ ត្រូវបានរកឃើញ ក្នុងនោះមានជាង 181,015,550 នាក់បានជា, 4,270,245 នាក់បានស្លាប់ និងជាង 15,723,030 នាក់ កំពុងព្យាបាល៕

August 5, 2021

BREAKING៖ សម្រេចបិទខ្ទប់ (Lockdown) កំណាត់ផ្លូវមួយ នៅសង្កាត់បឹងព្រលឹត ខណ្ឌ៧មករា ដោយសារ Delta

កំណាត់ផ្លូវលេខ 113 ចន្លោះផ្លូវលេខ 232 និងផ្លូវលេខ 242 ដែលស្ថិតនៅភូមិ២ សង្កាត់បឹងព្រលឹត ខណ្ឌ៧មករា រាជធានីភ្នំពេញ ត្រូវបានបិទខ្ទប់មិនឱ្យមានការចេញ-ចូល ដោយសារតែមានការឆ្លងរាលដាលនៃវីរុស COVID-19 ប្រភេទ Delta។

រដ្ឋបាលរាជធានីភ្នំពេញ បានបញ្ជាក់ថា ការបិទខ្ទប់នេះ ត្រូវធ្វើឡើងរយៈពេល 14 ថ្ងៃ ចាប់ពីថ្ងៃទី 05 ខែសីហា ដល់ថ្ងៃទី 18 ខែសីហា ឆ្នាំ 2021។ ព័ត៌មានបន្ថែម សូមអានសេចក្ដីសម្រេចខាងក្រោម៖

August 5, 2021

ការស្រាវជ្រាវ៖ អ្នកបានចាក់វ៉ាក់សាំង មានហានិភ័យឆ្លង COVID-19 ទាបជាងច្រើនដង ធៀបនឹងអ្នកមិនទាន់ចាក់

ការសិក្សាស្រាវជ្រាវថ្មីរបស់ប្រទេស អង់គ្លេស បានបង្ហាញថា អ្នកដែលបានទទួលការចាក់វ៉ាក់សាំងគ្រប់ចំនួនពីរដូស មានហានិភ័យឆ្លងវីរុស COVID-19 ទាបជាង 3 ដងឯណោះ បើធៀបជាមួយនឹងក្រុមមនុស្សដែលមិនទាន់បានចាក់។

ការសិក្សាស្រាវជ្រាវរបស់កម្មវិធីតាមដាន COVID-19 ដែលមានឈ្មោះថា REACT-1 ដឹកនាំដោយមហាវិទ្យាល័យអធិរាជទីក្រុងឡុងដ៍ (Imperial College London) និងក្រុមហ៊ុន Ipsos MORI នេះ គឺយោងទៅតាមលទ្ធផលនៃការធ្វើតេស្តរបស់មនុស្សជាង 98,000 នាក់ ចាប់ពីថ្ងៃទី 24 មិថុនា ដល់ 12 កក្កដា។ លទ្ធផលបានបង្ហាញថា អ្នកដែលមិនទាន់បានចាក់វ៉ាក់សាំង COVID-19 មានហានិភ័យឆ្លងវីរុស ក្នុងអត្រា 1.21% គឺខ្ពស់ជាង 3 ដង ធៀបនឹងអ្នកបានចាក់រួចរាល់ ដែលមានអត្រាឆ្លងត្រឹមតែ 0.4%។

ការស្រាវជ្រាវក៏បានឱ្យដឹងថា បើសិនអ្នកបានចាក់វ៉ាក់សាំងរួចរាល់ ឆ្លង COVID-19 ពួកគេក៏មានហានិភ័យចម្លងវីរុសទៅអ្នកដទៃ ទាបជាងផងដែរ ដោយសារតែបរិមាណវីរុសក្នុងរាងកាយមានចំនួនតិច។

សាស្ត្រាចារ្យ Paul Elliott មកពីសាលាសុខាភិបាលសាធារណៈ របស់មហាវិទ្យាល័យ Imperial College London និយាយថា៖ «ការរកឃើញបង្ហាញថា វ៉ាក់សាំងចំនួន 2 ដូស បានផ្ដល់ស្រទាប់ការពារបានល្អ នៅចំពោះមុខហានិភ័យនៃការឆ្លងវីរុស»។

នៅក្នុងចំណោមសំណាកជាង 98,000 ករណី ក្រុមអ្នកវិទ្យាសាស្ត្របានរកឃើញ 527 សំណាក មានផ្ទុកវីរុស ដែលនេះគឺប្រហាក់ប្រហែលនឹងអត្រា 0.63%។ តួលេខនេះ កើន 4 ដង បើធៀបនឹងអត្រា 0.15% នៅក្នុងរបាយការណ៍ដែលបានប្រកាសកាលពីថ្ងៃទី 17 មិថុនា ស្រាវជ្រាវចាប់ពីថ្ងៃទី 20 ឧសភា ដល់ថ្ងៃទី 07 មិថុនា។ ចំណែកអត្រាឆ្លងខ្ពស់បំផុតដែលត្រូវបានកត់ត្រានៅទីក្រុងឡុងដ៍ គឺ 0.94%៕

August 5, 2021

Category: សុខភាព