សុខភាព - La Reine Media

តួលេខសង្ខេបនៃ COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 11 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 486 នាក់, អ្នកជាចំនួន 717 នាក់ និងអ្នកស្លាប់ចំនួន 12 នាក់បន្ថែមទៀត នៅក្នុងថ្ងៃទី 10 ខែសីហា ឆ្នាំ 2021។

គិតត្រឹមព្រឹកថ្ងៃទី 11 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 83,384 នាក់ ក្នុងនោះមានអ្នកជាសះស្បើយជាង 77,750 នាក់ និងអ្នកស្លាប់ 1,614 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 204,795,680 នាក់ ត្រូវបានរកឃើញ ក្នុងនោះមានជាង 183,926,530 នាក់បានជា, 4,327,096 នាក់បានស្លាប់ និងជាង 16,542,050 នាក់ កំពុងព្យាបាល៕

August 11, 2021

គិលានុបដ្ឋាក នៅ អាល្លឺម៉ង់ បន្លំចាក់ទឹកអំបិល ជំនួសវ៉ាក់សាំង COVID-19! ពលរដ្ឋជិតម៉ឺននាក់អាចរងផលប៉ះពាល់

គិលានុបដ្ឋាកម្នាក់នៅប្រទេស អាល្លឺម៉ង់ ត្រូវបានគេសង្ស័យថាជាអ្នកបានបន្លំវ៉ាក់សាំង COVID-19 រាប់ពាន់ដប ដោយដាក់ទឹកអំបិល ជំនួស។

បុគ្គលិកសុខាភិបាលម្នាក់ ដែលធ្វើការឱ្យកាកបាទក្រហម របស់ អាល្លឺម៉ង់ ត្រូវបានគេសង្ស័យថា បានចាក់ទឹកអំបិល saline (Sodium Chloride) ឱ្យប្រជាជន ជំនួសឱ្យការចាក់វ៉ាក់សាំងបង្ការ COVID-19 នៅក្នុងមជ្ឈមណ្ឌលចាក់វ៉ាក់សាំងមួយ ក្នុងខេត្ត Friesland កាលពីដើមឆ្នាំ 2021។

Sven Ambrosy ដែលជាសមាជិកក្រុមប្រឹក្សាមូលដ្ឋាន កាលពីថ្ងៃទី 10 សីហា បានឱ្យដឹងថា មនុស្សប្រហែល 8,600 នាក់ ទំនងជាបានរងផលប៉ះពាល់ដោយសារអំពើបន្លំនេះ។ ក្រុមមន្ត្រីសុខាភិបាល កំពុងតែអំពាវនាវឱ្យពលរដ្ឋដែលរងផលប៉ះពាល់ទាំងនេះ ទៅចាក់វ៉ាក់សាំងជាថ្មី។ Sven Ambrosy និយាយថា៖ «ខ្ញុំពិតជាភ្ញាក់ផ្អើលណាស់ នៅពេលបានដឹងហេតុការណ៍នេះ»។

ធាតុរាវជាទឹកអំបិល saline (Sodium Chloride) ថ្វីបើមិនបង្កគ្រោះថ្នាក់ដល់សុខភាព ប៉ុន្តែ អ្នកដែលបានចាក់វ៉ាក់សាំងកាលពីខែមីនា និងខែមេសា ជាពេលដែលវ៉ាក់សាំងត្រូវគេបន្លំ ភាគច្រើនជាពលរដ្ឋវ័យចំណាស់ ជាក្រុមមនុស្សដែលងាយឆ្លងជំងឺ និងងាយបាត់បង់ជីវិតដោយសារ COVID-19។

មកដល់ពេលនេះ អាជ្ញាធរមិនទាន់ប្រកាសឱ្យដឹងអំពីអត្តសញ្ញាណរបស់ជនសង្ស័យដែលជាគិលានុបដ្ឋាយិកា ខាងលើនេះនៅឡើយ។ មន្ត្រីពាក់ព័ន្ធក៏មិនបានបង្ហើបឱ្យដឹងអំពីចេតនារបស់ជនសង្ស័យ ប៉ុន្តែ បុគ្គលិកពេទ្យរូបនេះ ធ្លាប់បានលើកឡើងនៅលើបណ្ដាញសង្គមអំពីការសង្ស័យ ឬការមិនទុកចិត្តរបស់ខ្លួន ចំពោះវ៉ាក់សាំងបង្ការ COVID-19។

បច្ចុប្បន្ន មិនទាន់ច្បាស់ថា ស្ត្រីជាប់សង្ស័យនេះ ត្រូវបានចាប់ខ្លួន ឬត្រូវបានចោទប្រកាន់ហើយ ឬនៅ។ ករណីនេះ ត្រូវបានប្រគល់ឱ្យអង្គភាពពិសេស ដែលជំនាញខាងស៊ើបអង្កេតករណីពាក់ព័ន្ធនឹងចេតនានយោបាយ។ ប៉ូលិសក្នុងតំបន់ ក៏មិនទាន់មានការអធិប្បាយអ្វីចំពោះព័ត៌មាននេះនៅឡើយនោះដែរ៕

August 11, 2021

Delta កំពុងក្លាយជាវ៉ារ្យ៉ង់ស្នូល ក្នុងការឆ្លងរាលដាល COVID-19 នៅប្រទេសថៃ

វីរុសបំប្លែងថ្មី Delta របស់ COVID-19 កំពុងតែក្លាយជាវ៉ារ្យ៉ង់ចម្បងនៅប្រទេសថៃ ដោយមានអ្នកជំងឺ COVID-19 ជាង 90% វិជ្ជមាននឹងវ៉ារ្យ៉ង់នេះ។

ប្រធានានាយកដ្ឋានវិទ្យាសាស្ត្រសុខាភិបាល វេជ្ជបណ្ឌិត Supphakit Siriluck ថ្ងៃទី 10 សីហា បានឱ្យដឹងថា ក្នុងចំណោមសំណាកចំនួន 1,632 ដែលត្រូវបានស្រង់ស្ថិតិកាលពីសប្ដាហ៍មុន មាន 1,499 សំណាក (ប្រហែល 91.9%) ផ្ទុកវីរុសបំប្លែងថ្មី Delta (វ៉ារ្យ៉ង់ដែលរកឃើញដំបូងនៅប្រទេសឥណ្ឌា), 129 សំណាក (7.9%) ផ្ទុក Alpha (រកឃើញដំបូងនៅ អង់គ្លេស), និង 4 សំណាក (0.2%) ផ្ទុក Beta (រកឃើញដំបូងនៅ អាហ្វ្រិកខាងត្បូង)។ ក្រៅពីវ៉ារ្យ៉ង់ចំនួន 3 ខាងលើនេះ មិនទាន់មានវ៉ារ្យ៉ង់ណាផ្សេងទៀតត្រូវបានរកឃើញនៅប្រទេសថៃនៅឡើយ។

ក្នុងចំណោមសំណាកចំនួន 1,632 ខាងលើ មាន 1,157 សំណាកត្រូវបានយកពីទីក្រុងបាងកក ក្នុងនោះ មាន 95.4% ផ្ទុកវ៉ារ្យ៉ង់ Delta ខណៈក្រៅពីនេះគឺវ៉ារ្យ៉ង់ Alpha។ សំណាកចំនួន 475 ដែលយកពីបណ្ដាខេត្តគឺ មាន 83.2% មានផ្ទុក Delta និង 16% ផ្ទុក Alpha។

វេជ្ជបណ្ឌិត Supphakit និយាយថា និន្នាការនៃការឆ្លង COVID-19 នៅប្រទេសថៃ បង្ហាញថា វ៉ារ្យ៉ង់ Delta កំពុងក្លាយជាវីរុសបំប្លែងថ្មីចម្បងជាងគេ ដោយឆ្លងយ៉ាងឆាប់រហ័សជាងគេ ខណៈ Alpha អាចនឹងលែងមានតទៅទៀត។ ចំណែក Beta វិញ នឹងនៅតែមាននៅភាគខាងត្បូងប្រទេសនេះ។ វ៉ារ្យ៉ង់ Beta ឆ្លងរាលដាលយឺតជាងវ៉ារ្យ៉ង់ Delta ដូច្នេះ ងាយស្រួលក្នុងការគ្រប់គ្រង។

ក្នុងរយៈពេល 24 ម៉ោង ប្រទេសថៃ បានរកឃើញអ្នកជំងឺថ្មីចំនួនជិត 20,000 នាក់ និង 235 នាក់បានស្លាប់ដោយសារ COVID-19។ បច្ចុប្បន្ន ប្រទេសថៃ បានរកឃើញអ្នកជំងឺ COVID-19 សរុបចំនួនជាង 795.900 នាក់ ក្នុងនោះមានអ្នកស្លាប់ជិត 6,600 នាក់៕

August 10, 2021

វៀតណាម ជោគជ័យជំហានដំបូង ក្នុងការអភិវឌ្ឍថ្នាំព្យាបាល COVID-19

ថ្នាំផ្សំឡើងពីឱសថបុរាណ ដែល វៀតណាម ទើបតែបានប្រកាសថា ជោគជ័យជំហានដំបូង និងមានសមត្ថភាពទប់ស្កាត់ការកើនឡើងនៃបរិមាណវីរុស COVID-19 នៅក្នុងកោសិកា នេះ កំពុងរង់ចាំការអនុញ្ញាតពីក្រសួងសុខាភិបាល ដើម្បីធ្វើការពិសោធលើអ្នកជំងឺ។

ព្រឹកថ្ងៃទី 10 សីហា នេះ បណ្ឌិត្យសភាវិទ្យាសាស្ត្រនិងបច្ចេកវិទ្យា វៀតណាម បានប្រកាសបង្ហាញឱសថឈ្មោះ Vipdervir ដែលប្រើសម្រាប់បង្ការ និងព្យាបាលជំងឺដែលកើតដោយសារវីរុស RNA (ribonucleic acid) ពិសេសគឺ COVID-19។ លទ្ធផលនៃការស្រាវជ្រាវនេះ ទទួលបានការយល់ព្រមពីក្រុមប្រឹក្សាជាតិស្តីពីក្រមសីលធម៌ក្នុងការស្រាវជ្រាវជីវសាស្ត្រ នៃក្រសួងសុខាភិបាល ក្នុងការដាក់សំណើសុំពិសោធលើមនុស្ស ដើម្បីវាយតម្លៃប្រសិទ្ធភាពលើការព្យាបាល COVID-19។

«Vipdervir ត្រូវបានផលិតឡើងពីឱសថបុរាណ មានផ្ទុកសមាសធាតុដែលអាចគ្រប់គ្រងម៉ូលេគុលគោលដៅដែលទាក់ទិននឹងដំណើរការនៃការលុកលុយ និងការកកើតកូនចៅរបស់ COVID-19។ ទន្ទឹមនឹងនេះ ឱសថនេះក៏មានសមាសធាតុដែលជួយរំញោចទៅលើបណ្ដាកោសិកានៃប្រព័ន្ធការពាររាងកាយ ជួយបង្កើនសមត្ថភាពប្រឆាំងនឹងវីរុសរបស់អ្នកជំងឺ» នេះបើតាមវេជ្ជបណ្ឌិត Le Quang Huan សាស្ត្រាចារ្យរង និងជាប្រធានក្រុមស្រាវជ្រាវ។

លោក Quang អនុប្រធាននាយកដ្ឋានវិទ្យាសាស្ត្រ បច្ចេកវិទ្យា និងបណ្ដុះបណ្ដាល នៃក្រសួងសុខាភិបាល វៀតណាម បាននិយាយថា៖ «ក្រសួងសុខាភិបាលសង្ឃឹមថា ចាប់ពីពេលនេះដល់ចុងឆ្នាំ ការពិសោធលើមនុស្សនឹងត្រូវបានធ្វើឡើងរួចរាល់។

បច្ចុប្បន្ន Vipdervir ត្រូវបានផលិតឡើងជាទម្រង់គ្រាប់រឹង។ ក្រុមស្រាវជ្រាវនឹងអាចចាប់ផ្ដើមពិសោធលើអ្នកជំងឺ COVID-19 ក្នុងពេលឆាប់ៗនេះ ដោយសារវាជាថ្នាំរុក្ខជាតិ។ លោក Quang និយាយថា៖ «តាមផែនការ នៅចុងឆ្នាំ 2021 អាចផ្ដល់ការអនុញ្ញាតឱ្យចរាចរណ៍ថ្នាំ នេះ បន្ទាប់ពីលទ្ធផលនៃការពិសោធលើមនុស្សទទួលបានជោគជ័យ»។

ក្រុមអ្នកវិទ្យាសាស្ត្រ វៀតណាម បានចាប់ផ្ដើមស្រាវជ្រាវលើឱសថបុរាណដែលអាចជួយព្យាបាល COVID-19 តាំងពីដើមឆ្នាំ 2020 ដោយយោងទៅលើបទពិសោធន៍នៃការស្រាវជ្រាវ និងការផ្សំឱសថបុរាណព្យាបាលជំងឺមហារីក រួមនឹងថ្នាំជួយព្យាបាលជំងឺច្រើនមុខផ្សេងទៀត។ លទ្ធផលនៃការពិសោធន៍លើសត្វកន្លងមក បានបង្ហាញថា Vipdervir មានសុវត្ថិភាព។

លោក Quang បានឱ្យដឹងថា ក្រុមស្រាវជ្រាវកំពុងរង់ចាំការអនុញ្ញាតពីក្រសួងសុខាភិបាល ដើម្បីអាចពិសោធថ្នាំនេះនៅលើអ្នកជំងឺ COVID-19។ តាមគម្រោង ក្រោយពីទទួលបានការអនុញ្ញាត ឱសថនេះនឹងត្រូវបានយកទៅពិសោធនៅក្នុងមន្ទីរពេទ្យ National Hospital of Tropical Diseases នារដ្ឋធានីហាណូយ៕

August 10, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 10 ខែសីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 499 នាក់, អ្នកជាចំនួន 882 នាក់ និងអ្នកស្លាប់ចំនួន 17 នាក់បន្ថែមទៀត នៅក្នុងថ្ងៃទី 09 ខែសីហា ឆ្នាំ 2021។

គិតត្រឹមព្រឹកថ្ងៃទី 10 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 82,898 នាក់ ក្នុងនោះមានអ្នកជាសះស្បើយជាង 77,030 នាក់ និងអ្នកស្លាប់ 1,602 នាក់។

ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 10 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 79.54% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 16.04%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 51.69%។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 204,151,650 នាក់ ត្រូវបានរកឃើញ ក្នុងនោះមានជាង 183,346,470 នាក់បានជា, 4,316,303 នាក់បានស្លាប់ និងជាង 16,488,870 នាក់ កំពុងព្យាបាល៕

August 10, 2021

អ្នកបានចាក់វ៉ាក់សាំង COVID-19 រួចរាល់ មិនចាំបាច់ចាក់ដូសបន្ថែមក្នុងអំឡុងមួយឆ្នាំ

អ្នកជំនាញកម្រិតកំពូលម្នាក់របស់មជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) នៃប្រទេសចិន ទើបតែបានឱ្យដឹងថា អ្នកដែលបានចាក់វ៉ាក់សាំង COVID-19 រួចរាល់ហើយ មិនចាំបាច់ចាក់ដូសបន្ថែមនោះទេ ក្នុងរយៈពេលមួយឆ្នាំ។

ប្រការខាងលើនេះ ត្រូវបានលើកឡើងនៅក្នុងគ្រាដែលសាធារណជនមានការព្រួយបារម្ភចំពោះការផ្ទុះឆ្លងរាលដាលជាថ្មីចាប់តាំងពីពាក់កណ្ដាលខែកក្កដា ពិសេសគឺ COVID-19 ប្រភេទបំប្លែងខ្លួនថ្មី ឬហៅថា វ៉ារ្យ៉ង់ Delta ដែលត្រូវបានចាត់ទុកថា មានលទ្ធភាពឆ្លងរាលដាលខ្លាំងក្លាជាងប្រភេទដំបូង។

ឆ្លើយនឹងសំណួររបស់ទូរទស្សន៍ចិន CCTV កាលពីថ្ងៃទី 08 សីហា លោក Shao Yiming ដែលជាវេជ្ជបណ្ឌិតលំដាប់កំពូល និងជាអ្នកឯកទេសផ្នែកជំងឺឆ្លងរបស់ CDC ចិន បាននិយាយថា កំហាប់នៃ អង់ទីហ្សែន ក្នុងរាងកាយមនុស្ស ថយចុះទៅតាមពេលវេលា បន្ទាប់ពីបានចាក់វ៉ាក់សាំង។ ប៉ុន្តែ អង់ទីហ្សែន នេះ នៅតែអាចជំរុញការប្រតិកម្មខ្លាំងក្លា ដើម្បីបង្កើនបរិមាណនៃអង្គបដិប្រាណក្នុងរយៈពេលខ្លីបាន។

យោងតាមវេជ្ជបណ្ឌិត Shao Yiming ក្រុមអ្នកវិទ្យាសាស្ត្រទូទាំងសកលលោក កំពុងស្រាវជ្រាវរកវិធីដើម្បីបង្កើនថាមពលឱ្យកងការពាររាងកាយ។ បច្ចុប្បន្ន មិនទាន់មានភស្ដុតាងគ្រប់គ្រាន់ដែលបញ្ជាក់ថា គួរចាក់វ៉ាក់សាំងដូសទី 3 ដល់គ្រប់គ្នា ឬអត់នៅឡើយ។ យោងតាមការស្រាវជ្រាវបឋម អ្នកដែលបានចាក់វ៉ាក់សាំងរួចរាល់ស្ទើរតែទាំងអស់ មិនចាំបាច់ចាក់ដូសទី 3 នោះទេ។

ទោះជាយ៉ាងនេះក្ដី លោក Shao Yiming ក៏បានឱ្យដឹងថា ប្រទេសចិន កំពុងតែសិក្សាស្រាវជ្រាវបន្ថែម ដើម្បីឱ្យប្រាកដថា គួរចាក់រំលឹកឡើងវិញដែរ ឬយ៉ាងណា ចំពោះមនុស្សវ័យចំណាស់ដែលមានប្រព័ន្ធការពាររាងកាយខ្សោយ និងអ្នកមានជំងឺប្រចាំកាយដែលបានចាក់វ៉ាក់សាំងរួចរាល់ចាប់ពី 6-12 ខែ ក៏ដូចជាពលរដ្ឋដែលធ្វើការក្នុងតំបន់ដែលមានហានិភ័យឆ្លង COVID-19 ខ្ពស់។ ពេលវេលាជាក់លាក់ដើម្បីអាចចាក់ដូសទី 3 ឬដូសបន្ថែម ក៏កំពុងត្រូវបានសិក្សា។

ក្រុមអ្នកជំនាញបានឱ្យដឹងថា បើទោះជាការស្រាវជ្រាវបញ្ជាក់ថា ការចាក់វ៉ាក់សាំងគឺជាវិធីដែលមានប្រសិទ្ធភាពបំផុតដើម្បីបង្ការការឆ្លង COVID-19 ប៉ុន្តែ អ្នកដែលបានចាក់វ៉ាក់សាំងរួចរាល់ នៅតែត្រូវការអនុវត្តវិធានការការពារខ្លួនជាប្រចាំ ដើម្បីប៉ះប៉ូវឱ្យការថមថយទៅតាមពេលវេលានៃប្រសិទ្ធភាពរបស់វ៉ាក់សាំង៕

August 10, 2021

ក្រសួងសុខាភិបាល ជូនដំណឹងស្ដីពីការព្យាបាលអ្នកវិជ្ជមាននឹង COVID-19 ប្រភេទ Delta

នាព្រឹកថ្ងៃទី 10 សីហា នេះ ក្រសួងសុខាភិបាល បានចេញសេចក្ដីជូនដំណឹងមួយស្ដីពីលក្ខខណ្ឌនៃការបញ្ចប់ការព្យាបាលជំងឺ COVID-19 ប្រភេទ Delta ចំពោះអ្នកជំងឺដែលត្រូវបានបញ្ជាក់ពីមន្ទីរពិសោធន៍ ឬស្ថិតក្នុងករណីសង្ស័យ។

ក្នុងសេចក្ដីប្រកាសនេះ ក្រសួងសុខាភិបាល ក៏បានឱ្យដឹងថា អ្នកជំងឺដែលវិជ្ជមាននឹង COVID-19 ប្រភេទ Delta ទាំងអស់ នឹងមិនត្រូវបានអនុញ្ញាតឱ្យព្យាបាលនៅតាមផ្ទះនោះទេ ពោលគឺត្រូវមកព្យាបាលនៅមន្ទីរពេទ្យ ឬមណ្ឌលព្យាបាល COVID-19 ដែលរដ្ឋបានកំណត់។

មូលហេតុដែលមានការកំណត់ខាងលើ ត្រូវបានក្រសួងសុខាភិបាល បញ្ជាក់ថា គឺដើម្បីគ្រប់គ្រងការព្យាបាល និងយោងទៅតាមលទ្ធផលនៃការសិក្សាស្រាវជ្រាវផ្នែកវិទ្យាសាស្ត្រ លើការឆ្លងរាលដាលរបស់ វីរុសបំប្លែងខ្លួនថ្មី របស់ COVID-19 ពិសេសគឺវ៉ារ្យ៉ង់ Delta ដែលកំពុងរាតត្បាតពិភពលោក។

សម្រាប់ការបញ្ចប់ការព្យាបាលជំងឺ COVID-19 ប្រភេទ Delta ចំពោះអ្នកជំងឺដែលត្រូវបានបញ្ជាក់ពីមន្ទីរពិសោធន៍ ឬស្ថិតក្នុងករណីសង្ស័យ សូមអានសេចក្ដីជូនដំណឹង និងលក្ខខណ្ឌខាងក្រោម៖

August 10, 2021

តួលេខអ្នកឆ្លង និងការចាក់វ៉ាក់សាំង COVID-19 នៅកម្ពុជា គិតត្រឹមព្រឹកថ្ងៃទី 09 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 508 នាក់, អ្នកជាចំនួន 660 នាក់ និងអ្នកស្លាប់ចំនួន 23 នាក់បន្ថែមទៀត នៅក្នុងថ្ងៃទី 08 ខែសីហា ឆ្នាំ 2021។

គិតត្រឹមព្រឹកថ្ងៃទី 09 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 82,399 នាក់ ក្នុងនោះមានអ្នកជាសះស្បើយជាង 76,155 នាក់ និងអ្នកស្លាប់ 1,585 នាក់ ខណៈអ្នកជំងឺកំពុងព្យាបាល មានចំនួនប្រមាណជាង 4,000 នាក់។

ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 09 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 78.73% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 14.19%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 50.95%។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 203,454,300 នាក់ ត្រូវបានរកឃើញ ក្នុងនោះមានជាង 182,770,290 នាក់បានជា, 4,307,445 នាក់បានស្លាប់ និងជាង 16,376,560 នាក់ កំពុងព្យាបាល៕

August 9, 2021

WHO ប្រុងដាក់ឈ្មោះវ៉ារ្យ៉ង់ថ្មីរបស់ COVID-19 ទៅតាមឈ្មោះនៃកញ្ចុំផ្កាយ

អ្នកជំនាញរបស់អង្គការសុខភាពពិភពលោក (WHO) បានឱ្យដឹងថា អង្គការនេះអាចដាក់ឈ្មោះវីរុសបំប្លែងថ្មីរបស់ COVID-19 ទៅតាមឈ្មោះនៃកញ្ចុំផ្កាយនៅលើមេឃ ក្នុងករណីបានប្រើប្រាស់អស់អក្ខរក្រមនៃអក្សរក្រិក។

Maria Van Kerkhove ប្រធានក្រុមបច្ចេកទេសក្នុងការទប់ទល់នឹង COVID-19 របស់ WHO កាលពីថ្ងៃទី 08 សីហា បាននិយាយថា អង្គការនេះកំពុងពិចារណាក្នុងការប្រើប្រាស់ឈ្មោះនៃបណ្ដាកញ្ចុំផ្កាយ ដូចជា Orion, Leo, Gemini និង Aries ជាដើម ដើម្បីដាក់ឈ្មោះឱ្យវ៉ារ្យ៉ង់ថ្មីរបស់ COVID-19 បើសិនជាអក្ខរក្រមនៃអក្សរក្រិក ត្រូវបានប្រើប្រាស់អស់។

លោកស្រី Kerkhove បន្ថែមថា៖ «WHO កំពុងសិក្សាស្រាវជ្រាវលើសំណើនានា ដើម្បីធានាថា ពុំមានអ្នកណាម្នាក់ពិបាកទ្រាំជាមួយនឹងឈ្មោះទាំងនេះ»។

អង្គការ WHO បានដាក់ឈ្មោះឱ្យបណ្ដាវ៉ារ្យ៉ង់ថ្មីរបស់ COVID-19 ទៅតាមអក្ខរក្រមនៃអក្សរក្រិក ចាប់តាំងពីខែឧសភា ឆ្នាំ 2021។ មកដល់បច្ចុប្បន្ន វីរុសបំប្លែងថ្មីរបស់ COVID-19 ចំនួន 11 ប្រភេទ ត្រូវបានដាក់ឈ្មោះទៅតាមវិធីនេះ ក្នុងនោះមាន Alpha, Beta, Delta និងថ្មីៗនេះគឺ Lambda។ល។

មុននោះ បណ្ដាវ៉ារ្យ៉ង់ថ្មី តែងត្រូវបានដាក់ឈ្មោះទៅតាមទីតាំងដែលវាត្រូវបានរកឃើញជាលើកដំបូង។ មូលហេតុដែលវិធីដាក់ឈ្មោះនេះ ត្រូវបានគេប្ដូរ នោះគឺមកពីវាអាចនាំឱ្យមាន «ការរើសអើងចំពោះប្រទេសមួយ ឬទីតាំងមួយ» នេះបើតាមលោកស្រី Kerkhove។

Kerkhove បានព្រមានថា វត្តមានរបស់បណ្ដាវ៉ារ្យ៉ង់ថ្មីៗនៃវីរុស COVID-19 ដែលមានសមត្ថភាពគេចពីវ៉ាក់សាំង គឺជា «ការគំរាមកំហែងពិត»។ នេះគឺជាមូលហេតុសំខាន់ដែលប្រទេសនានា មិនត្រូវរំពឹងលើវ៉ាក់សាំងតែម្យ៉ាងនោះទេ ប៉ុន្តែ ត្រូវធ្វើគ្រប់យ៉ាងដើម្បីកាត់បន្ថយការឆ្លងរាលដាល»។

មន្ត្រីរូបនេះក៏បានព្រមានថា វ៉ារ្យ៉ង់ថ្មីមួយប្រភេទដែលប្រកបដោយគ្រោះថ្នាក់ អាចបង្ហាញខ្លួននៅតំបន់ដែល COVID-19 ឆ្លងរាលដាលខ្លាំង ឬតំបន់ដែលមានអត្រានៃការចាក់វ៉ាក់សាំងខ្ពស់ ប៉ុន្តែ COVID-19 នៅតែរាតត្បាត។

ការព្រមានរបស់ Kerkhove នេះ ត្រូវបានលើកឡើងបន្ទាប់ពីស្ថាប័នសុខាភិបាលសាធារណៈរបស់ អង់គ្លេស បានប្រកាសលទ្ធផលនៃការវិភាគបឋមមួយ បង្ហាញថា បរិមាណវីរុស COVID-19 នៅលើអ្នកវិជ្ជមាននឹងវ៉ារ្យ៉ង់ Delta គឺខ្ពស់ដូចគ្នា បើទោះជាអ្នកជំងឺបានចាក់វ៉ាក់សាំងរួចរាល់ ឬមិនទាន់បានចាក់ក៏ដោយ៕

August 9, 2021

តួលេខ COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 07 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 522 នាក់, អ្នកជាចំនួន 700 នាក់ និងអ្នកស្លាប់ចំនួន 11 នាក់បន្ថែមទៀត នៅក្នុងថ្ងៃទី 06 ខែសីហា ឆ្នាំ 2021។

គិតត្រឹមព្រឹកថ្ងៃទី 07 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 81,335 នាក់ ក្នុងនោះមានអ្នកជាសះស្បើយជាង 74,740 នាក់ និងអ្នកស្លាប់ 1,537 នាក់ ខណៈអ្នកជំងឺកំពុងព្យាបាល មានចំនួនប្រមាណ 5,000 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 202,421,800 នាក់ ត្រូវបានរកឃើញ ក្នុងនោះមានជាង 181,926,970 នាក់បានជា, 4,290,677 នាក់បានស្លាប់ និងជាង 16,204,140 នាក់ កំពុងព្យាបាល៕

August 7, 2021

Category: សុខភាព