សុខភាព - La Reine Media

កម្ពុជា រំពឹងថា 2 សប្ដាហ៍ទៀត នឹងសម្រេចបានគោលដៅស្ដីពីការចាក់វ៉ាក់សាំងជូនពលរដ្ឋពេញវ័យ 10 លាននាក់

ក្នុងរយៈពេលប្រមាណ 2 សប្តាហ៍ទៅមុខទៀត កម្ពុជានឹងសម្រេចគោលដៅនៃការចាក់វ៉ាក់សាំង COVID-19 ដល់ក្រុមពលរដ្ឋអាយុចាប់ពី 18 ឆ្នាំឡើងទៅ ដែលមានចំនួន 10 លាននាក់ ពោលគឺស្មើនឹង 100% នៃផែនការ ក្នុងករណីប្រជាពលរដ្ឋនៅតែបន្តទៅទទួលការចាក់វ៉ាក់សាំង រង្វង់ពី 3,000 នាក់ ទៅ 4,000 នាក់ ជារៀងរាល់ថ្ងៃ។

ខាងលើនេះគឺជាប្រសាសន៍របស់លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំង COVID-19 (គ.វ.ក១៩) ក្នុងក្របខណ្ឌទូទាំងប្រទេស ដែលបានថ្លែងនៅក្នុងឱកាសចុះបិទយុទ្ធនាការចាក់វ៉ាក់សាំងបង្ការ COVID-19 នៅខេត្តកំពត កាលពីរសៀលថ្ងៃទី 21 ខែតុលា ឆ្នាំ 2021។

លោកជំទាវ រដ្ឋលេខាធិការ ក្រសួងសុខាភិបាលរូបនេះ បានបន្ថែមថា តួលេខពលរដ្ឋពេញវ័យខាងលើ មិនបានរាប់បញ្ចូលពលរដ្ឋចំណាកស្រុកទៅក្រៅប្រទេស ឬពលរដ្ឋដែលមានបញ្ហាសុខភាពមិនអាចចាក់វ៉ាក់សាំងបាន រួមនឹងពលរដ្ឋដែលទើបតែបានជាពីជំងឺ COVID-19 នោះទេ។

គិតមកដល់បច្ចុប្បន្ន នៅមានពលរដ្ឋពេញវ័យប្រមាណតែ 4 ម៉ឺននាក់ទៀតប៉ុណ្ណោះ ដែលមិនទាន់បានទទួលការចាក់វ៉ាក់សាំង COVID-19។ ដូច្នេះ យុទ្ធនាការនៃការចាក់វ៉ាក់សាំងជូនពលរដ្ឋដែលមានវ័យចាប់ពី 18 ឆ្នាំឡើងទៅ នឹងឈានដល់ដំណាក់កាលបិទបញ្ចប់នៅពេលដ៏ខ្លីខាងមុខ។

ការចាក់វ៉ាក់សាំងនៅ កម្ពុជា គិតត្រឹមថ្ងៃទី 21 ខែតុលា ឆ្នាំ 2021 មានដូចតទៅ៖

1-សម្រាប់ក្រុមពលរដ្ឋដែលមានអាយុចាប់ពី 18 ឆ្នាំឡើងទៅ៖ ដូសទីមួយ ចាក់បានចំនួន 9,967,039 នាក់ និង ដូសទីពី ចាក់បានចំនួន 9,617,661 នាក់ ដែលស្មើនឹង 99.67% ធៀបនឹងប្រជាជនគោលដៅសរុប 10 លាននាក់។

2-សម្រាប់ក្រុមកុមារ និងយុវវ័យ អាយុចាប់ពី 12 ឆ្នាំ ដល់ក្រោម 18 ឆ្នាំ៖ ដូសទីមួយ ចាក់បានចំនួន 1,780,707 នាក់ និង ដូសទីពីរ ចាក់បានចំនួន 1,686,181 នាក់ ដែលស្មើនឹង 90.53% ធៀបនឹងក្រុមគោលដៅសរុបជិត 2 លាននាក់។

3-សម្រាប់ក្រុមកុមារ អាយុចាប់ពី 6 ឆ្នាំ ដល់ក្រោម 12 ឆ្នាំ៖ ដូសទីមួយ ចាក់បានចំនួន 1,895,669 នាក់ និង ដូសទីពីរ ចាក់បានចំនួន 1,598,420 នាក់ ដែលស្មើនឹង 99.91% ធៀបនឹងក្រុមគោលដៅសរុបជិត 1.9 លាននាក់។

October 22, 2021

ចាប់ពីពេលនេះតទៅ «ពេលមានការឆ្លង COVID-19 នឹងមិនមានការបិទសាលារៀន ផ្សារ រោងចក្រ នឹងកន្លែងផ្សេងៗទៀតទេ

នាព្រឹកថ្ងៃទី 22 ខែតុលា ឆ្នាំ 2021 នៅវិមានសន្តិភាព គណៈរដ្ឋមន្ត្រីបានបើកសម័យប្រជុំពេញអង្គ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន ដើម្បីពិនិត្យ ពិភាក្សា និងអនុម័តទៅលើរបៀបវារៈសំខាន់ៗមួយចំនួន។

របៀបវារៈសំខាន់ៗនៃសម័យប្រជុំពេញអង្គនេះរួមមាន៖

1- សេចក្តីព្រាងច្បាប់ ស្តីពីហិរញ្ញវត្ថុសម្រាប់ការ គ្រប់គ្រងឆ្នាំ 2022។

2- សេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២។

3- បញ្ហាផ្សេងៗ សំណើរសុំការយោគយល់ពីគណៈរដ្ឋមន្ត្រី ដើម្បីសុំការអនុម័តពីស្ថាប័ននីតិប្បញ្ញត្តិ លើសេចក្តីព្រាងច្បាប់ ស្តីពីការអនុម័តយល់ព្រមលើពិធីសារអាស៊ាន ស្តីពីការពង្រឹងយន្តការដោះស្រាយវិវាទ។

នៅក្នុងកិច្ចប្រជុំពេញអង្គនេះ ប្រមុខរដ្ឋាភិបាលកម្ពុជា ក៏បានបញ្ជាក់បន្ថែមថា ចាប់ពីពេលនេះទៅ នៅពេលមានការឆ្លង COVID-19 នឹងមិនមានការបិទសាលារៀន ផ្សារ រោងចក្រ នឹងកន្លែងផ្សេងៗទៀតទេ ទោះបីមានការឆ្លងក្នុង សាលារៀន ផ្សារ រោងចក្រ និងកន្លែងផ្សេងៗ ក៏ដោយ។

សម្តេចតេជោ បានបញ្ជាក់ថា ក្នុងករណីមានការឆ្លងក្នុង សាលារៀន ផ្សារ រោងចក្រ និងកន្លែងផ្សេងៗ ត្រូវយកអ្នកជំងឺដែលឆ្លងទៅព្យាបាលនៅមន្ទីរពេទ្យ៕

October 22, 2021

ស្ថិតិស្ដីពី COVID-19 នៅ កម្ពុជា និងទូទាំងពិភពលោក សម្រាប់ថ្ងៃទី 22 ខែតុលា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 21 តុលា 2021 រួមមាន៖

– ឆ្លងថ្មី = 148 នាក់
– ជាសះស្បើយថ្មី = 327 នាក់
– ស្លាប់ថ្មី = 11 នាក់។

ក្នុងចំណោមអ្នកឆ្លងថ្មីទាំង 148 នាក់ មាន៖

– ករណីឆ្លងសហគមន៍ 126 នាក់
– អ្នកដំណើរពីបរទេស 22 នាក់

គិតត្រឹមព្រឹកថ្ងៃទី 22 ខែតុលា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖

– អ្នកឆ្លងសរុប= 117,500 នាក់
– អ្នកជាសះស្បើយ= 112,383 នាក់
– អ្នកស្លាប់= 2,715 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុប = 243,273,600 នាក់
– អ្នកជាសះស្បើយសរុប = 220,470,200 នាក់
– អ្នកស្លាប់សរុប = 4,945,287 នាក់
– អ្នកកំពុងព្យាបាលសរុប = 17,858,000 នាក់

October 22, 2021

រុស្ស៊ី រកឃើញករណីឆ្លង «COVID-19 ប្រភេទថ្មី» ដែលគ្រោះថ្នាក់ជាង Delta ទៅទៀត!

ប្រទេសរុស្ស៊ី បានរាយការណ៍អំពី «ករណីឆ្លង COVID-19 ប្រភេទថ្មី» នោះគឺវីរុសបំប្លែងខ្លួន AY.4.2 ដែលជាសាខាមួយរបស់វ៉ារ្យ៉ង់ Delta Plus ហើយត្រូវបានគេជឿថា ងាយឆ្លងជាង បើធៀបនឹង វ៉ារ្យ៉ង់ Delta ដំបូង។

អ្នកស្រាវជ្រាវ ជនជាតិរុស្ស៊ី Kamil Khafizov ថ្ងៃនេះបានឱ្យដឹងថា COVID-19 បំប្លែងខ្លួនថ្មី ឈ្មោះ AY.4.2 ងាយឆ្លងជាងប្រហែល 10% ធៀបនឹង វ៉ារ្យ៉ង់ Delta ដំបូង នាំឱ្យករណីឆ្លង និងស្លាប់ប្រចាំថ្ងៃនៅ ប្រទេសរុស្ស៊ី កើនឡើងខ្ពស់បំផុត។ Kamil Khafizov បញ្ជាក់ថា AY.4.2 អាចចូលមកជំនួស Delta ប៉ុន្តែ នេះគឺជាដំណើរការដែលអាចកើតឡើងយឺត។

លោក Kamil Khafizov អះអាងថា AY.4.2 អាចជ្រែកចូលទៅក្នុងកោសិកាឈាម។ លោកបន្ថែមថា «វ៉ាក់សាំងបច្ចុប្បន្ន មានប្រសិទ្ធភាពគ្រប់គ្រាន់ក្នុងការប្រឆាំងនឹងវីរុសបំប្លែងខ្លួនថ្មីនេះ»។

AY.4.2 ក៏កំពុងមាននិន្នាការកើនឡើងជាបន្តបន្ទាប់នៅ ប្រទេសអង់គ្លេស ដោយវាមានប្រហែល 6% ធៀបនឹងករណីឆ្លងសរុបក្នុងមួយសប្ដាហ៍ រាប់ចាប់ពីថ្ងៃទី 27 កញ្ញា នេះបើតាមរបាយការណ៍របស់ស្ថាប័នសុវត្ថិភាពសុខាភិបាល អង់គ្លេស ដែលបានប្រកាសកាលពីថ្ងៃទី 15 តុលា។ ក៏ប៉ុន្តែ រដ្ឋលេខាធិការក្រសួងសុខាភិបាលអង់គ្លេស លោក Sajid Javid កាលពីថ្ងៃទី 20 តុលា បានអះអាងថា ពុំមានមូលហេតុណាមួយដែលអាចឱ្យជឿបានថា AY.4.2 នឹងបង្កការគំរាមកំហែងធ្ងន់ធ្ងរជាង Delta នោះទេ។

Nikolay Kryuchkov អ្នកឯកទេសផ្នែកប្រព័ន្ធភាពស៊ាំរបស់ ប្រទេសរុស្ស៊ី ថ្លែងថា Delta និងវីរុសបំប្លែងខ្លួនថ្មីរបស់វា នឹងនៅតែមានឥទ្ធិពលជាងគេ ហើយក្នុងអនាគត ពួកវាអាចសម្របខ្លួនជាមួយនឹងវ៉ាក់សាំង ពិសេសនៅពេលអត្រាការចាក់វ៉ាក់សាំង ក្រោម ឬប្រហាក់ប្រហែលនឹង 50%។

ទាក់ទងនឹងព័ត៌មានខាងលើនេះ ក្រសួងសុខាភិបាលរុស្ស៊ី មិនទាន់បញ្ចេញមតិអ្វីនៅឡើយ៕

October 22, 2021

WHO ព្រមានអំពីមូលហេតុដែល COVID-19 អាចអូសបន្លាយពេលដល់ឆ្នាំ 2022

អង្គការសុខភាពពិភពលោក (WHO) ឱ្យដឹងថា មហារោគរាតត្បាត COVID-19 នឹងបន្តអូសបន្លាយពេលរហូតដល់ឆ្នាំក្រោយ ដោយសារតែបណ្ដាប្រទេសក្រីក្រមិនទទួលបានវ៉ាក់សាំងក្នុងបរិមាណដែលចាំបាច់។

«យើងកំពុងដើរខុសទិសដៅ។ យើងពិតជាត្រូវការជំរុញល្បឿននៃយុទ្ធនាការបែងចែកវ៉ាក់សាំង មិនដូច្នេះទេ ជំងឺរាតត្បាតនឹងបន្តកើតឡើងមួយឆ្នាំទៀត» វេជ្ជបណ្ឌិត Bruce Aylward ទីប្រឹក្សានៃប្រធានអង្គការសុខភាពពិភពលោក កាលពីថ្ងៃទី 20 តុលា បានព្រមានអំពីការដែល COVID-19 អាចបន្តអូសបន្លាយពេលយូរជាងនេះ។

ការព្រមាននេះត្រូវបានធ្វើឡើងនៅក្នុងគ្រាដែលបណ្ដាប្រទេសក្រីក្រមិនទាន់ទទួលបានបរិមាណវ៉ាក់សាំងគ្រប់គ្រាន់តាមការចាំបាច់របស់ពួកគេ។ ប្រជាជននៅក្នុង ទ្វីបអាហ្វ្រិក មិនដល់ 5% នៅឡើយដែលបានទទួលការចាក់វ៉ាក់សាំង ខណៈដែលអត្រានេះនៅក្នុងបណ្ដាទ្វីបផ្សេងៗ មានចំនួនចាប់ពី 40% ឡើងទៅ។

បណ្ឌិត Aylward បានអំពាវនាវដល់បណ្ដាប្រទេសអ្នកមាន ទុកលទ្ធភាពឱ្យបណ្ដាក្រុមហ៊ុនផ្គត់ផ្គង់វ៉ាក់សាំង អាចផ្ដល់អាទិភាពនៃការបញ្ជាទិញវ៉ាក់សាំងដល់បណ្ដាប្រទេសដែលមានចំណូលទាប។

បណ្ដាប្រទេសអភិវឌ្ឍ គួរស្រង់ស្ថិតិឡើងវិញដើម្បីឱ្យដឹងថា ពួកគេកំពុងអនុវត្តដល់ណាហើយទាក់ទងនឹងការសន្យាស្ដីពីការផ្ដល់ជំនួយជាវ៉ាក់សាំងដល់ពិភពលោក ដែលពួកគេបានលើកឡើងនៅក្នុងសន្និសីទកំពូលនានា ដូចជា G7 នៅ St Eives នៃ ប្រទេសអង់គ្លេស។

People’s Vaccine ដែលជាសម្ព័ន្ធអង្គការមនុស្សធម៌មួយ បានបញ្ជាក់ថា គិតមកដល់បច្ចុប្បន្ន វ៉ាក់សាំងចំនួនត្រឹមតែ 1/7 ប៉ុណ្ណោះដែលត្រូវបានបញ្ជូនទៅដល់បណ្ដាប្រទេសក្រីក្រ នៅក្នុងចំណោមវ៉ាក់សាំងដែលបណ្ដាក្រុមហ៊ុនឱសថ និងបណ្ដាប្រទេសអ្នកមានបានសន្យាផ្ដល់ឱ្យ។

វ៉ាក់សាំងភាគច្រើនត្រូវបានប្រើប្រាស់នៅក្នុងបណ្ដាប្រទេសដែលមានចំណូលខ្ពស់ ឬមធ្យម ខណៈដែលវ៉ាក់សាំងដែលត្រូវបានបញ្ជូនទៅដល់ ទ្វីបអាហ្វ្រិក មានត្រឹមតែ 2.6% ប៉ុណ្ណោះ ធៀបនឹងពិភពលោកទាំងមូល។

គំនិតផ្ដួចផ្ដើមដែលហៅថា COVAX ត្រូវបានបង្កើតឡើងដើម្បីជួយដល់បណ្ដាប្រទេសក្រីក្រទទួលបានការផ្គត់ផ្គង់វ៉ាក់សាំងដោយស្មើភាពគ្នានឹងបណ្ដាប្រទេសអ្នកមាន។ COVAX ដំបូងឡើយបានកំណត់គោលដៅផ្គត់ផ្គង់វ៉ាក់សាំងឱ្យបាន 2 ពាន់លានដូសក្នុងឆ្នាំ 2021 ប៉ុន្តែ មកដល់បច្ចុប្បន្ន ទើបតែផ្គត់ផ្គង់បាន 371 លានដូសបណ្ណោះ៕

October 21, 2021

ស្ថិតិស្ដីពីករណី COVID-19 នៅកម្ពុជា និងពិភពលោក សម្រាប់ព្រឹកថ្ងៃទី 21 ខែតុលា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 20 តុលា 2021 រួមមាន៖

– ឆ្លងថ្មី = 151 នាក់
– ជាសះស្បើយថ្មី = 366 នាក់
– ស្លាប់ថ្មី = 11 នាក់។

ក្នុងចំណោមអ្នកឆ្លងថ្មីទាំង 151 នាក់ (7 នាក់ មិនបានចាក់វ៉ាក់សាំង) រួមមាន៖

– ករណីឆ្លងសហគមន៍ 130 នាក់
– អ្នកដំណើរពីបរទេស 21 នាក់

គិតត្រឹមព្រឹកថ្ងៃទី 21 ខែតុលា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖

– អ្នកឆ្លងសរុប= 117,352 នាក់
– អ្នកជាសះស្បើយ= 112,056 នាក់
– អ្នកស្លាប់= 2,704 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 242,810,000 នាក់
– អ្នកជាសះស្បើយសរុបជាង = 220,099,200 នាក់
– អ្នកស្លាប់សរុបជាង = 4,937,660 នាក់
– អ្នកកំពុងព្យាបាលសរុបជាង = 17,773,160 នាក់

October 21, 2021

អង់គ្លេស បញ្ជាទិញថ្នាំគ្រាប់ព្យាបាល COVID-19 រាប់សែនឈុត ដើម្បីត្រៀមសម្រាប់រដូវរងា

ប្រទេសអង់គ្លេស បានបញ្ជាទិញថ្នាំប្រឆាំងវីរុស ព្យាបាលជំងឺ COVID-19 ចំនួនរាប់សែនឈុត ដើម្បីត្រៀមសម្រាប់រដូវរងាខាងមុខ។

អាជ្ញាធរអង់គ្លេស សម្រេចបានកិច្ចព្រមព្រៀងទិញថ្នាំ molnupiravir ចំនួន 480,000 ឈុត ពីក្រុមហ៊ុន អាម៉េរិក Merck។ Molnupiravir គឺជាថ្នាំប្រឆាំងវីរុស ដែលត្រូវបានបញ្ជាក់ថា អាចកាត់បន្ថយហានិភ័យនៃការចូលពេទ្យ និងស្លាប់របស់អ្នកជំងឺ COVID-19។ កិច្ចព្រមព្រៀងទីពីរគឺថ្នាំ PF-07321332/ritonavir របស់ Pfizer ចំនួន 250,000 ឈុត។ ថ្នាំ ritonavir ផ្សំជាមួយនឹងថ្នាំគ្រាប់ប្រឆាំងវីរុសមួយប្រភេទទៀង តែងត្រូវបានគេប្រើសម្រាប់ព្យាបាលអ្នកជំងឺ អេដស៍ (AIDS) ឬអ្នកផ្ទុកវីរុស HIV។

បច្ចុប្បន្ន ពុំទាន់មានថ្នាំប្រភេទណាមួយដែលត្រូវបានស្ថាប័នគ្រប់គ្រងឱសថ និងផលិតថែទាំសុខភាព (MHRA) របស់ អង់គ្លេស ធ្វើការអនុម័តនៅឡើយ។ ថ្នាំ PF-07321332/ritonavir របស់ Pfizer ដែលកំពុងស្ថិតក្នុងដំណាក់កាលពិសោធន៍នៅឡើយ ប្រហែលជាត្រូវរង់ចាំរហូតដល់ដើមឆ្នាំ 2022 ខណៈដែល ថ្នាំ molnupiravir តាមគម្រោងនឹងត្រូវបានដឹកទៅដល់ អង់គ្លេស នៅក្នុងខែវិច្ឆិកា។

ក្រុមមន្ត្រីអង់គ្លេស បានឱ្យដឹងថា កិច្ចព្រមព្រៀងខាងលើនេះត្រូវបានធ្វើឡើងដើម្បីទប់ទល់នឹងរលកនៃការឆ្លងរាលដាលខ្លាំងថ្មីដែលអាចកើតឡើងនៅក្នុងរដូវរងាខាងមុខ។

ក្រុមអ្នកឯកទេសផ្នែករោគឆ្លងនៅ ប្រទេសអង់គ្លេស បានស្នើឱ្យរដ្ឋាភិបាលរឹតបន្តឹងសកម្មភាពមួយចំនួនរបស់ពលរដ្ឋដើម្បីទប់ស្កាត់ COVID-19 នៅពេលដែលករណីឆ្លង និងករណីចូលពេទ្យ កើនឡើងខ្ពស់ រួមនឹងការបង្ហាញខ្លួនរបស់វីរុស COVID-19 បំប្លែងខ្លួនថ្មី AY.4.2 ដែលជា «កូនចៅ» របស់ Delta។ ក្រុមវេជ្ជបណ្ឌិតបានព្រមានថា ប្រទេសអង់គ្លេស អាចប្រឈមនឹង «វិបត្តិរដូវរងា» បើសិនជាមិនចាត់វិធានការទប់ស្កាត់ជាមុន។

គិតមកដល់បច្ចុប្បន្ន អង់គ្លេស មានអ្នកឆ្លងវីរុស COVID-19 សរុបចំនួនជិត 8.59 លាននាក់ និងជាង 139,000 នាក់ បានបាត់បង់ជីវិត។ កាលពីម្សិលមិញ ប្រទេសនេះបានរាយការណ៍ថា មានករណីឆ្លងថ្មីចំនួន 49,139 នាក់ និងករណីស្លាប់ថ្មីចំនួន 179 នាក់។

រដ្ឋលេខាធិការក្រសួងសុខាភិបាលអង់គ្លេស លោក Sajid Javid បានព្រមានថា ចំនួនអ្នកឆ្លងប្រចាំថ្ងៃនៅ អង់គ្លេស អាចឡើងដល់ខ្ទង់សែន និងបានអំពាវនាវឱ្យពលរដ្ឋប្រញាប់ទៅទទួលការចាក់វ៉ាក់សាំង៕

October 21, 2021

ខេត្ដកំពង់ធំ ផ្អាកជាបណ្ដោះអាសន្ន ការលក់គ្រឿងស្រវឹង និងក្លឹបកម្សាន្ត ខារ៉ាអូខ ឬម៉ាស្សា ជាបន្តទៀត

(កំពង់ធំ)៖ រដ្ឋបាលខេត្ដកំពង់ធំ បានចេញសេចក្តីសម្រេចបន្តផ្អាកជាបណ្ដោះអាសន្ន ការលក់គ្រឿងស្រវឹងគ្រប់ប្រភេទ ការជួបជុំគ្នាពិសារគ្រឿងស្រវឹង និងសកម្មភាពមុខរបរក្លឹបកម្សាន្ត ខារ៉ាអូខ រង្គសាល ឌីស្កូតក បៀហ្គាឌិន និងហាងម៉ាស្សា រយៈពេល 2 សបា្តហ៍បន្ថែមទៀត រាប់ចាប់ពីថ្ងៃទី 20 ខែតុលា ដល់ថ្ងៃទី 02 ខែវិច្ឆិកា ឆ្នាំ 2021 ដើម្បីទប់ស្កាត់ការឆ្លងរាលដាលនៃជំងឺ COVID-19។

ទន្ទឹមនឹងនេះ រដ្ឋបាលខេត្ដ ក៏ផ្អាកជាបណ្តោះអាសន្នការលក់គ្រឿងស្រវឹងគ្រប់ប្រភេទ នៅតាមផ្សារម៉ាត ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាងភេសជ្ជៈ អាជីវកម្មផ្នែកអាហារ-ភេសជ្ជៈ និងដេប៉ូចែកចាយគ្រឿងស្រវឹងនៅទូទាំងខេត្តនេះ។

ជាងនេះ រដ្ឋបាលខេត្តកំពង់ធំ ក៏ផ្អាកជាបណ្តោះអាសន្ននូវការប្រមូលផ្ដុំ ឬការជួបជុំគ្នាទទួលទានគ្រឿងស្រវឹងគ្រប់ប្រភេទ និងការប្រមូលផ្តុំ ឬការជួបជុំគ្នាច្រៀង ឬរាំកម្សាន្ដផងដែរ។

October 20, 2021

សម្រាប់អ្នកអសមត្ថភាពបន្តពូជ៖ «តើការបង្កកំណើតដោយប្រើឧបករណ៍វិទ្យាសាស្ត្រ បែប IVF គឺជាអ្វី?»

ការបង្កកំណើតក្នុងមន្ទីរពិសោធន៍ ឬឧបករណ៍វិទ្យាសាស្ត្រ ដោយប្រើប្រាស់វិធីសាស្ត្រ IVF ដែលគេអាចហៅបានថា «ការបង្កកំណើតដោយវិធីពាក់កណ្ដាលវិទ្យាសាស្ត្រ» ច្រើនធ្វើឡើងនៅពេលស្ត្រីមានជំងឺប្រចាំកាយ ឬក្រោយការព្យាបាលជំងឺហើយនាំឱ្យស្ត្រីបាត់បង់សមត្ថភាពបន្តពូជ ឬមួយស្ត្រីអស់រដូវនៅពេលឈានដល់វ័យចំណាស់។

ស្ត្រីមួយចំនួនដែលជួបបញ្ហាខាងលើ ប៉ុន្តែនៅតែចង់មានផ្ទៃពោះគឺត្រូវជ្រើសរើសវិធីសាស្ត្រ IVF (In Vitro Fertilization) ដោយត្រូវឆ្លងកាត់ដំណាក់កាលបង្កកពងមេជីវិតញី ដើម្បីទុកសម្រាប់បង្កកំណើតជាមួយមេជីវិតឈ្មោល នៅពេលណាដែលសមស្រប។

វដ្តនៃការបង្កកំណើតដោយវិធីសាស្ត្រ IVF ដែលចាប់ផ្តើមពីការបង្កកពងមេជីវិតញី មានដូចខាងក្រោម៖

1– ពងមេជីវិតញីដែលត្រូវបានយកមកបង្កកទុក នឹងត្រូវយកទៅរំលាយឱ្យត្រលប់ទៅរកសភាពដើម

2– ពងដែលអ្នកជំនាញយល់ថាអាចប្រើបាន និងត្រូវយកទៅបង្កកំណើតជាមួយមេជីវិតឈ្មោល

3– ពងមេជីវិតញី ក្រោយពីត្រូវបានរំលាយឱ្យត្រលប់ទៅរកសភាពដើម ហើយបានបង្កកំណើតដោយជោគជ័យនឹងចាប់ផ្តើមវិវឌ្ឍទៅជាអំប្រ៊ីយ៉ុង (embryo)

4– ក្នុងចំណោមអំប្រ៊ីយ៉ុងទាំងអស់អាចមានមួយទៅពីរ ឬអាចបី (សម្រាប់មនុស្សស្រីដែលមានអាយុច្រើនជាង 40 ឆ្នាំ) នឹងត្រូវបានបញ្ចូលទៅក្នុងស្បូន ដើម្បីចាប់ផ្ដើមដំណាក់កាលរីកចម្រើនទៅតាមលក្ខណៈធម្មជាតិ។

October 20, 2021

ស្ថិតិស្ដីពីករណី COVID-19 នៅកម្ពុជា និងពិភពលោក សម្រាប់ព្រឹកថ្ងៃទី 20 ខែតុលា 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 19 តុលា 2021 រួមមាន៖

– ឆ្លងថ្មី = 166 នាក់
– ជាសះស្បើយថ្មី = 270 នាក់
– ស្លាប់ថ្មី = 12 នាក់។

ក្នុងចំណោមអ្នកឆ្លងថ្មីទាំង 166 នាក់ មាន៖

– ករណីឆ្លងសហគមន៍ 135 នាក់
– អ្នកដំណើរពីបរទេស 31 នាក់

គិតត្រឹមព្រឹកថ្ងៃទី 20 ខែតុលា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖

– អ្នកឆ្លងសរុប= 117,201 នាក់
– អ្នកជាសះស្បើយ= 111,690 នាក់
– អ្នកស្លាប់= 2,693 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 242,335,600 នាក់
– អ្នកជាសះស្បើយសរុបជាង = 219,683,200 នាក់
– អ្នកស្លាប់សរុបជាង = 4,928,900 នាក់
– អ្នកកំពុងព្យាបាលសរុបជាង = 17,723,400 នាក់

October 20, 2021

Category: សុខភាព