សុខភាព - La Reine Media

COVID-19! ការពិសោធរបស់ សហរដ្ឋអាម៉េរិក៖ ស្ករកៅស៊ូពិសេស ជួយកាត់បន្ថយបរិមាណវីរុស

សាកលវិទ្យាល័យមួយរបស់ សហរដ្ឋអាម៉េរិក បានធ្វើការពិសោធស្ករកៅស៊ូដែលមានផ្ទុកប្រភេទប្រូតេអ៊ីន ដែលអាចដាក់អន្ទាក់ COVID-19 ដើម្បីកាត់បន្ថយបរិមាណវីរុសដែលមាននៅក្នុងទឹកមាត់។

ប្រភេទស្ករកៅស៊ូនេះ មានផ្ទុក CTB-ACE2 ដែលជាប្រូតេអ៊ីនមួយប្រភេទត្រូវបានរកឃើញនៅលើផ្ទៃនៃកោសិកា និងត្រូវបានវីរុសប្រើប្រាស់ជាច្រក ដើម្បីចូលមកក្នុងកោសិការបស់រាងកាយមនុស្ស។ នេះបើយោងតាមលទ្ធផលនៃការស្រាវជ្រាវរបស់ក្រុមអ្នកវិទ្យាសាស្ត្រនៃសាកលវិទ្យាល័យ Pennsylvania សហរដ្ឋអាម៉េរិក ដែលបានចុះផ្សាយនៅលើទស្សនាវដ្ដីវិទ្យាសាស្ត្រ Molecular Therapy កាលពីដើមខែនេះ។

ក្នុងការពិសោធដោយប្រើប្រាស់ទឹកមាត់របស់អ្នកជំងឺ COVID-19 អ្នកវិទ្យាសាស្ត្របានរកឃើញថា វីរុសទាំងឡាយបានភ្ជាប់ខ្លួនទៅនឹងប្រូតេអ៊ីន ACE2 នៅក្នុងស្ករកៅស៊ូ ដោយឯកឯង។ ជាលទ្ធផល បរិមាណវីរុសក្នុងសំណាកទឹកមាត់បានថយចុះជាង 95%។

ក្រុមអ្នកស្រាវជ្រាវឱ្យដឹងថា ប្រភេទស្ករកៅស៊ូនេះ មានក្លិន និងរសជាតិដូចទៅនឹងប្រភេទស្ករកៅស៊ូធម្មតា ហើយធាតុ ACE2 ក្នុងនោះ មិនត្រូវបានបំផ្លាញនៅពេលទំពារ។ ជាងនេះ ពួកគេអះអាងថា ស្ករកៅស៊ូនេះ អាចរក្សាទុកបានក្នុងសីតុណ្ហភាពធម្មតា ក្នុងរយៈពេលច្រើនឆ្នាំ។

ក្រុមអ្នកវិទ្យាសាស្ត្រនេះថ្លែងថា ការប្រើប្រាស់ស្ករកៅស៊ូដើម្បីកាត់បន្ថយបរិមាណវីរុសក្នុងទឹកមាត់នឹងមានផលប្រយោជន៍ខ្លាំងនៅក្នុងបណ្ដាប្រទេសក្រីក្រ និងបណ្ដាប្រទេសដែលមិនទាន់មានប្រភពវ៉ាក់សាំងគ្រប់គ្រាន់ ដោយសារវាមានតម្លៃទាប៕

November 25, 2021

ប្រទេសម៉ាឡេស៊ី កាត់បន្ថយរយៈពេលធ្វើចត្តាឡីស័ក សម្រាប់អ្នកធ្វើដំណើរផ្នែកថែទាំសុខភាព

យោងតាមអនុសាសន៍របស់នាយករដ្ឋមន្ត្រីនៃប្រទេសម៉ាឡេស៊ី នាថ្ងៃទី ១៥ ខែតុលា ឆ្នាំ ២០២១ ស្តីពីការកែសម្រួលលក្ខខណ្ឌធ្វើដំណើរ ការអនុវត្តវិធានការសុខាភិបាល និងការធ្វើចត្តាឡីស័កសម្រាប់ អ្នកដំណើរចូលប្រទេសម៉ាឡេស៊ី។ សម្រាប់អ្នកដំណើរ ដែលបានចាក់វ៉ាក់សាំងការពារជំងឺកូវីដ-១៩ គ្រប់ចំនួនដូស ហើយធ្វើដំណើរមកប្រទេសម៉ាឡេស៊ីក្នុងគោលបំណងព្យាបាល និងថែទាំសុខភាព ការធ្វើចត្តាឡីស័កត្រូវកាត់បន្ថយរយៈពេលមកត្រឹម ៧ ថ្ងៃប៉ុណ្ណោះ ដែលច្បាប់នេះមានប្រសិទ្ធភាពនិងអនុវត្តចាប់ពីថ្ងៃទី ១៨ ខែតុលា ឆ្នាំ ២០២១ តទៅ។

អ្នកដំណើរដែលបានចាក់វ៉ាក់សាំងការពារជំងឺកូវីដ-១៩ គ្រប់ចំនួនដូស តម្រូវឱ្យធ្វើតេស្តដោយម៉ាស៊ីន PCR នៅថ្ងៃទី១ និងថ្ងៃទី ៥ នៃរយៈពេលធ្វើចត្តាឡីស័ក។ ចំពោះអ្នកដំណើរដែលមិនទាន់បានចាក់វ៉ាក់សាំង ឬចាក់វ៉ាក់សាំងមិនទាន់គ្រប់ចំនួនដូស នឹងត្រូវធ្វើចត្តាឡីស័ករយៈពេល ១០ ថ្ងៃ និងតម្រូវឱ្យធ្វើតេស្តរកមេរោគកូវីដ- ១៩ ដោយម៉ាស៊ីន PCR នៅថ្ងៃទី១ និងថ្ងៃទី៨ នៃរយៈពេលធ្វើចត្តាឡីស័ក។ សម្រាប់អ្នកដំណើរដែលស្វែងរកសេវាកម្មផ្សេងៗដូចជាការបង្កកំណើតក្រៅស្បូន (IVF) ព្យាបាលសុខភាពមាត់ធ្មេញ និងភ្នែក ជាដើម អាចធ្វើចត្តាឡីស័កនៅក្នុងសណ្ឋាគារ និងតម្រូវឱ្យមានការអនុញ្ញាតពីសំណាក់ក្រុមគ្រូពេទ្យដែលកំពុងព្យាបាល។ ទាំងអស់នេះគឺដើម្បីធានាបាននូវសុវត្ថិភាពរបស់អ្នកដំណើរក៏ដូចជាអ្នកជំងឺ និងប្រជាជាតិទាំងមូលក្នុងបរិបទនេះផងដែរ។

លោកវេជ្ជបណ្ឌិត Mohd Daud Mohd Arif ដែលជានាយកប្រតិបត្តិនៃក្រុមប្រឹក្សាទេសចរណ៍ថែទាំសុខភាពម៉ាឡេស៊ី (MHTC) បានមានប្រសាសន៍ថា “ប្រទេសម៉ាឡេស៊ីបានត្រៀមរួចជាស្រេច ក្នុងការផ្ដល់សេវាកម្មផ្នែកថែទាំសុខភាព ដែលធានានូវសុវត្ថិភាព និងជាទីទុកចិត្តបំផុត”។

លោកបានបន្តទៀតថា “ទេសចរណ៍សុខភាពម៉ាឡេស៊ី (MHTC) ពួកយើងផ្ដោតសំខាន់ទៅលើសុវត្ថិភាពរបស់អ្នកជំងឺ និងសុខុមាលភាពក្នុងសហគមន៍ជាចំបង តាមរយៈការពង្រឹងនូវកិច្ចសហការណ៍ដ៏រឹងមាំរវាងបណ្តាស្ថាប័នរដ្ឋ និងក្រុមហ៊ុនឯកជនផ្សេងៗគឺចាំបាច់បំផុត។

ចំពោះវិធានការសុខាភិបាលថ្មី ដែលអ្នកដំណើរចូលប្រទេសម៉ាឡេស៊ី ត្រូវអនុវត្តតាំងពីមុនការធ្វើដំណើរ កំឡុងពេលព្យាបាល ថែទាំសុខភាព និងបញ្ចប់ការព្យាបាលមានដូចជា៖

១-កំណត់ថ្ងៃណាត់ពិគ្រោះនិងព្យាបាល ជាមួយមន្ទីរពេទ្យឯកជនដែលជាដៃគូរបស់ MHTC ហើយសុំលិខិតបញ្ជាក់ពីពេទ្យ

២-ផ្ញើឯកសារទៅកាន់មន្ទីរពេទ្យដែលអ្នកបានជ្រើសរើស និងដាក់ពាក្យស្នើសុំចូលប្រទេសម៉ាឡេស៊ី ដើម្បីព្យាបាលជំងឺ

៣- MHTCនឹងដាក់ពាក្យស្នើសុំទៅកាន់មន្ទីរពេទ្យដែលអ្នកបានជ្រើសរើស

៤-នៅពេលពាក្យស្នើសុំបានជោគជ័យ ខាងមន្ទីរពេទ្យនឹងផ្ញើជូនអ្នកនូវលិខិតអនុញ្ញាត ដែលចេញដោយ MHTC

៥- ដាក់ស្នើសុំទិដ្ឋាកា Visa (បើចាំបាច់) អ្នកគួរតែរៀបចំឯកសារចាំបាច់នានាទុកជាមុន ដើម្បីត្រៀមសម្រាប់ការធ្វើដំណើរតាមយន្តហោះ។

៦-បីថ្ងៃ មុនកាលបរិច្ឆេទមកដល់ប្រទេសម៉ាឡេស៊ី អ្នកធ្វើដំណើរទាំងអស់ តម្រូវឱ្យធ្វើតេស្តរកមេរោគកូវីដ-១៩ លើកទី១ ដោយម៉ាស៊ីន PCR នៅតាមមជ្ឈមណ្ឌលដែលទទួលស្គាល់ដោយ MHTC ។

អ្នកធ្វើដំណើរផ្នែកថែទាំសុខភាពអាចស្វែងរកមន្ទីរពេទ្យដែលជាដៃគូ ទេសចរណ៍សុខភាពម៉ាឡេស៊ី (MHTC) មានដូចជា មន្ទីរពេទ្យ Pantai Kuala Lumpur មជ្ឈមណ្ឌលសុខភាព Ara Damansara មជ្ឈមណ្ឌលសុខភាព Subang Jaya មជ្ឈមណ្ឌលសុខភាព Sunway និងមន្ទីរពេទ្យ Island ជាដើម។

ប្រទេសម៉ាឡេស៊ីជាទិសដៅជាទីពេញចិត្តសម្រាប់អ្នកធ្វើដំណើរផ្នែកថែទាំសុខភាពនៅជុំវិញពិភពលោក ដោយបានប្រមូលផ្តុំអ្នកធ្វើដំណើរផ្នែកថែទាំសុខភាពសរុបចំនួន ១,២២០,០០០ នាក់ ក្នុងឆ្នាំ ២០១៩ និងតិចបំផុត ៦៤៣, ០០០នាក់ក្នុងឆ្នាំ២០១។

ប្រទេសម៉ាឡេស៊ីបានក្លាយជាទិសដៅដ៏ពេញនិយមកាន់តែខ្លាំងឡើង សម្រាប់អ្នកធ្វើដំណើរពីប្រទេសកម្ពុជាដើម្បីស្វែងរកការព្យាបាល និងថែទាំសុខភាព ដោយសារវប្បធម៌ស្រដៀងគ្នា បូករួមទាំងគុណភាព សេវាកម្មដ៏ល្អ ព្រមទាំងតម្លៃសមរម្យ។

ប័ណ្ណសរសើរនិងពានរង្វាន់ដែលទទួលបាន :

International Medical Travel Journal – Medical Travel Awards (2015-2020)
Asia Pacific Healthcare & Medical Tourism Awards (2017 – 2020)
World’s Best Hospitals for Medical Tourists by the Medical Travel Quality Alliance (2013, 2014, 2017-2019)

សម្រាប់ពត៌មានលម្អិត សូមចូលទៅកាន់ www.malaysiahealthcare.org/

November 24, 2021

COVID-19! ករណីឆ្លងថ្មីនៅ កម្ពុជា ថយចុះមកត្រឹម 34 នាក់ ធៀបនឹងម្សិលមិញ

រកឃើញអ្នកឆ្លងថ្មី 34 (PCR) នាក់, ជាសះស្បើយ 37 នាក់ និងស្លាប់ 05 នាក់ (03 នាក់ មិនបានចាក់វ៉ាក់សាំង) ក្នុងអំឡុង 24 ម៉ោងនៃថ្ងៃទី 23 វិច្ឆិកា 2021 នៅ កម្ពុជា ក្នុងនោះមាន៖

– ករណីឆ្លងសហគមន៍ 28 នាក់
– អ្នកដំណើរពីបរទេស 06 នាក់

ករណី COVID-19 សរុបនៅ កម្ពុជា គិតមកដល់ថ្ងៃទី 24 វិច្ឆិកា 2021 រួមមាន៖
– អ្នកឆ្លងសរុប= 119,977 នាក់
– អ្នកជាសះស្បើយ= 116,357 នាក់
– អ្នកស្លាប់= 2,914 នាក់

ទិន្នន័យបន្ថែម សូមអានសេចក្ដីជូនព័ត៌មានដូចខាងក្រោម៖

នៅទូទាំងពិភពលោក ករណី COVID-19 មានដូចខាងក្រោម៖

-ឆ្លងថ្មី ៖ 26,878 នាក់
-ឆ្លងសរុប ៖ 259,031,226 នាក់
-ស្លាប់សរុប ៖ 5,183,550 នាក់
-ជាសះស្បើយសរុប ៖ 234,382,667 នាក់
-កំពុងព្យាបាល៖ 19,465,009 នាក់

November 24, 2021

COVID-19! ករណីឆ្លងថ្មីនៅ កម្ពុជា កើនឡើង ធៀបនឹង 37 នាក់ កាលពីម្សិលមិញ

កម្ពុជា បានរកឃើញករណីស្លាប់ថ្មី 4 នាក់ និងឆ្លងថ្មី 39 នាក់ កាលពីអំឡុង 24 ម៉ោងនៃថ្ងៃទី 22 វិច្ឆិកា ឆ្នាំ 2021។

ទិន្នន័យបន្ថែម សូមអានសេចក្ដីជូនព័ត៌មានដូចខាងក្រោម៖

នៅទូទាំងពិភពលោក ករណី COVID-19 មានដូចខាងក្រោម៖

-ឆ្លងថ្មី ៖ 26,878 នាក់
-ឆ្លងសរុប ៖ 258,441,075 នាក់
-ស្លាប់សរុប ៖ 5,174,847 នាក់
-ជាសះស្បើយសរុប ៖ 233,913,010 នាក់

November 23, 2021

ហាងកាហ្វេមួយ ទទួល និងបណ្ដុះបណ្ដាលបុគ្គលិកវ័យចំណាស់ ដើម្បីជួយទប់ទល់នឹងបញ្ហាភ្លេចភ្លាំង

«ហាងកាហ្វេនៃការចងចាំ» (Memory Café) នៅទីក្រុងសៀងហៃ ប្រទេសចិន កំពុងតែនាំមុខគេក្នុងការទប់ទល់នឹងបញ្ហាភ្លេចភ្លាំងនៅលើមនុស្សចាស់ ដោយធ្វើការបណ្ដុះបណ្ដាលពួកគាត់ឱ្យក្លាយជាអ្នកទទួលភ្ញៀវ ឬ អ្នកឆុងកាហ្វេ ដើម្បីមានឱកាសច្រើនក្នុងការសំណេះសំណាលជាមួយភ្ញៀវ។

សារព័ត៌មាន Global Times ថ្មីៗនេះបានចុះផ្សាយវីដេអូមួយស្ដីពីហាងកាហ្វេ Memory Café ដែលជ្រើសរើស និងបណ្ដុះបណ្ដាលបុគ្គលិកវ័យចំណាស់។

លោកយាយវ័យ 80 ឆ្នាំ ឈ្មោះ Guo Luli ដែលជាបុគ្គលិកស្ម័គ្រចិត្តមួយរូបរបស់ហាងកាហ្វេ Memory Café បានឱ្យដឹងថា៖ «ខ្ញុំបានធ្វើជាបុគ្គលិកស្ម័គ្រចិត្តនៅហាងកាហ្វេនេះជិតមួយឆ្នាំហើយ។ ការងារនេះបានជួយដល់ពួកយើងច្រើនណាស់។ យើងបានរៀនអ្វីៗជាច្រើនអំពីមុខរបរឆុងកាហ្វេ។ យើងទទួលបានការបណ្ដុះបណ្ដាល និងអនុវត្តជារៀងរាល់សប្ដាហ៍។ ការងារនេះជួយប្រយុទ្ធប្រឆាំងនឹងអាការនៃជំងឺភ្លេចភ្លាំង។ ខ្ញុំត្រូវចងចាំនូវលំដាប់លំដោយនៃការឆុងកាហ្វេ និងអនុវត្តវា។ ខ្ញុំត្រូវកត់ត្រាកិច្ចការទាំងនេះ។ ការងារនេះមានអត្ថប្រយោជន៍ណាស់»។

ចំណែកលោកយាយជាបុគ្គលិកស្ម័គ្រចិត្តម្នាក់ទៀត ឈ្មោះ Peng Mingxiang បានប្រាប់ថា៖ «ដើម្បីមានអារម្មណ៍ដូចយុវវ័យ យើងត្រូវការការយល់ចិត្ត ការសន្ទនាគ្នាដោយសេរីជាមួយពួកគេ។ ពួកគេប្រព្រឹត្តល្អ និងគោរពពួកយើង។ យើងក៏មានភាពជឿជាក់»។

ហាងកាហ្វេ Memory ស្ថិតនៅក្នុងខណ្ឌ Pudong នៃទីក្រុងសៀងហៃ បានរកឃើញវិធីសាស្ត្រដោយឡែកដើម្បីជួយដល់មនុស្សវ័យចំណាស់ ក្នុងការទប់ទល់នឹងភាពចាស់ជរា ដោយការបង្កើតសកម្មភាពអន្តរកម្មជាក្រុម ក្នុងនោះ លោកយាយ និងលោកតា មានឱកាសហ្វឹកហាត់ការចងចាំ។

បុគ្គលិកស្ម័គ្រចិត្តវ័យចំណាស់នៅក្នុងហាងនេះ ត្រូវបានបណ្ដុះបណ្ដាលឱ្យក្លាយជាអ្នកទទួលភ្ញៀវ អ្នកគិតលុយ និងអ្នកឆុងកាហ្វេជាដើម។

សកម្មភាពនៅហាងកាហ្វេនេះ ជួយឱ្យពួកគាត់មានទំនាក់ទំនងសង្គមច្រើនជាងមុន និងធ្វើឱ្យវ័យចំណាស់របស់ពួកគាត់មានភាពស្រស់ស្រាយជាងមុន។

យោងតាមស្ថិតិថ្មីបំផុត ទីក្រុងសៀងហៃ បច្ចុប្បន្ន មានមនុស្សចាស់អាយុចាប់ពី 60 ឆ្នាំឡើង ចំនួន 23.5% ធៀបនឹងប្រជាជនសរុបរបស់ទីក្រុងនេះ។ ការលើកកម្ពស់គុណភាពជីវិតរបស់ក្រុមមនុស្សវ័យចំណាស់គឺជាឧបសគ្គមួយសម្រាប់អាជ្ញាធរមូលដ្ឋាន៕

November 23, 2021

Pfizer និយាយថា វ៉ាក់សាំងរបស់ខ្លួនមានប្រសិទ្ធភាព 100% ចំពោះក្មេងជំទង់ ក្រោយការចាក់ដូសទីពីរបាន 4 ខែ

ក្រុមហ៊ុន Pfizer បានប្រកាសឱ្យដឹងថា វ៉ាក់សាំងបង្ការជំងឺ COVID-19 របស់ពួកគេ ធានាប្រសិទ្ធភាព 100% នៅលើក្មេងអាយុចាប់ពី 12 ឆ្នាំ ដល់ 15 ឆ្នាំ បន្ទាប់ពីការចាក់ដូសទីពីរបាន 4 ខែ ដែលនេះគឺជាលទ្ធផលនៃការពិសោធលើមនុស្សជាង 2,000 នាក់។

កាលពីម្សិលមិញ (22 វិច្ឆិកា 2021) Pfizer បានបញ្ចេញទិន្នន័យស្ដីពីការពិសោធដែលប្រមូលបានពីអ្នកស្ម័គ្រចិត្តចំនួន 2,228 នាក់ បង្ហាញថា វ៉ាក់សាំងរបស់ក្រុមហ៊ុនពុំបានបង្កផលប៉ះពាល់គួរឱ្យព្រួយបារម្ភណាមួយទេ នៅលើក្រុមអ្នកស្ម័គ្រចិត្តដែលត្រូវបានតាមដានយ៉ាងតិច 6 ខែ បន្ទាប់ពីបានចាក់ដូសទីពីរ។

ក្នុងចំណោមក្មេងជំទង់អាយុពី 12 ឆ្នាំ ដល់ 15 ឆ្នាំ រាប់ពាន់នាក់ដែលបានចូលរួមការពិសោធ មាន 30 ករណីឆ្លង COVID-19 ដែលមានរោគសញ្ញា ប៉ុន្តែ ពួកគេសុទ្ធតែជាអ្នកប្រើប្រាស់ថ្នាំបញ្ឆោត (placebo)។ Pfizer យល់ថា ប្រការនេះមានន័យថា វ៉ាក់សាំងមានប្រសិទ្ធភាព 100% នៅលើមនុស្សគ្រប់ភេទ គ្រប់ជាតិសាសន៍ គ្រប់កម្រិតនៃភាពធាត់និងមានជំងឺប្រចាំកាយ។

ការព្រួយបារម្ភតែមួយគត់ចំពោះក្មេងដែលមានវ័យចាប់ពី 12 ដល់ 15 ឆ្នាំ នោះគឺហានិភ័យនៃបញ្ហារលាកសាច់ដុំបេះដូងនៅក្មេងប្រុសបន្ទាប់ពីបានចាក់វ៉ាក់សាំង។ ក៏ប៉ុន្តែ ទិន្នន័យបានបង្ហាញថា នេះគឺជាបញ្ហាកម្របំផុត ហើយអត្ថប្រយោជន៍នៃការចាក់វ៉ាក់សាំងធំធេងជាងហានិភ័យ។ វីរុស COVID-19 ក៏បង្កឱ្យមានបញ្ហារលាកសាច់ដុំបេះដូងក្នុងអត្រាខ្ពស់ជាង និងធ្ងន់ធ្ងរជាង។

នាយកប្រតិបត្តិរបស់ Pfizer លោក Albert Bourla បានអះអាងថា លទ្ធផលនៃការពិសោធខាងលើនឹងជួយឱ្យវ៉ាក់សាំង Pfizer ទទួលបានការអនុញ្ញាតឱ្យប្រើប្រាស់ពេញលេញនៅ សហរដ្ឋអាម៉េរិក និងនៅទូទាំងសកលលោក។ បច្ចុប្បន្ន វ៉ាក់សាំង Pfizer ទើបតែទទួលបានការអនុញ្ញាតឱ្យប្រើប្រាស់ពេញលេញសម្រាប់មនុស្សអាយុចាប់ពី 16 ឆ្នាំឡើងប៉ុណ្ណោះ៕

November 23, 2021

COVID-19! ករណីឆ្លងថ្មីនៅ កម្ពុជា ធ្លាក់ចុះមកត្រឹម 37 នាក់ ខណៈនៅ ទូទាំងពិភពលោក រកឃើញករណីថ្មីជាង 13,000 នាក់

ទន្ទឹមនឹងករណីជាសះស្បើយថ្មី 40 នាក់ និងករណីស្លាប់ថ្មី 5 នាក់ កាលពីអំឡុង 24 ម៉ោងនៃថ្ងៃទី 21 វិច្ឆិកា ឆ្នាំ 2021 កម្ពុជា ក៏បានរកឃើញអ្នកឆ្លងថ្មីចំនួន 37 នាក់ផងដែរ។

ទិន្នន័យបន្ថែម សូមអានសេចក្ដីជូនព័ត៌មានដូចខាងក្រោម៖

នៅទូទាំងពិភពលោក ករណី COVID-19 មានដូចខាងក្រោម៖

-ឆ្លងថ្មី ៖ 13,470 នាក់
-ឆ្លងសរុប ៖ 257,832,881 នាក់
-ស្លាប់សរុប ៖ 5,168,069 នាក់
-ជាសះស្បើយសរុប ៖ 232,756,149 នាក់

November 22, 2021

កម្ពុជា រកឃើញអ្នកឆ្លងថ្មី COVID-19 ចំនួន 51 នាក់ទៀត ខណៈពិភពលោករកឃើញជិត 30,000 នាក់

តួលេខនៃករណី COVID-19 ថ្មីនៅ កម្ពុជា ក្នុងអំឡុង 24 ម៉ោងនៃថ្ងៃទី 16 វិច្ឆិកា 2021៖
– ករណីឆ្លងថ្មី = 51 នាក់
– ករណីជាសះស្បើយ = 48 នាក់
– ករណីស្លាប់ = 5 នាក់

ក្នុងចំណោមករណីឆ្លងថ្មីទាំង 51 នាក់ រួមមាន៖
– ករណីឆ្លងសហគមន៍ 46 នាក់
– អ្នកដំណើរពីបរទេស 05 នាក់

គិតត្រឹមព្រឹក ថ្ងៃទី 17 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖
– អ្នកឆ្លងសរុប= 119,687 នាក់
– អ្នកជាសះស្បើយ= 116,072 នាក់
– អ្នកស្លាប់= 2,881 នាក់

នៅទូទាំងពិភពលោក ករណី COVID-19 សរុប រួមមាន៖
– អ្នកឆ្លងសរុប= 255,099,507 នាក់
– អ្នកជាសះស្បើយ= 230,610,447 នាក់
– អ្នកស្លាប់= 5,129,835 នាក់
– កំពុងព្យាបាល = 19,359,225

November 17, 2021

ប្រទេសចំនួន 95 នឹងមានសិទ្ធិផលិតឱសថព្យាបាលជំងឺ COVID-19 របស់ Pfizer

ក្រុមហ៊ុនផលិតឱសថរបស់ អាម៉េរិក Pfizer បានប្រកាសថា នឹងផ្ដល់ការអនុញ្ញាតឱ្យប្រទេសកំពុងអភិវឌ្ឍចំនួន 95 ផលិតថ្នាំព្យាបាលជំងឺ COVID-19 ដែលក្រុមហ៊ុនកំពុងរង់ចាំការអនុម័តពី អាជ្ញាធរគ្រប់គ្រងអាហារនិងឱសថ (FDA) របស់ សហរដ្ឋអាម៉េរិក។

ការសម្រេចនេះត្រូវបានធ្វើឡើងតាមរយៈកិច្ចព្រមព្រៀងកាលពីម្សិលមិញ រវាង Pfizer និងអង្គការប៉ាតង់ឱសថ MPP (Medicines Patent Pool) ដែលជាអង្គការអន្តរជាតិត្រូវបានគាំទ្រដោយអង្គការសហប្រជាជាតិ។ កិច្ចព្រមព្រៀងនេះនឹងអនុញ្ញាតឱ្យ MPP ផ្ដល់សិទ្ធិក្នុងការផលិតឱសថដល់បណ្ដាក្រុមហ៊ុនដែលមានលក្ខខណ្ឌគ្រប់គ្រាន់ នៅក្នុងប្រទេសចំនួន 95 ក្នុងពិភពលោក ដើម្បីឱ្យពួកគេផលិតថ្នាំព្យាបាលជំងឺ COVID-19 របស់ Pfizer ដោយខ្លួនឯង។

តាមគម្រោង Pfizer នឹងលក់ថ្នាំព្យាបាលជំងឺ COVID-19 ដែលមានឈ្មោះថា Paxlovid។ នេះគឺជាឱសថមួយប្រភេទដែលអាចទប់ស្កាត់ការកើតកូនចៅរបស់វីរុស។ លទ្ធផលនៃការវិភាគបឋមបង្ហាញថា ឱសថ Paxlovid របស់ Pfizer អាចកាត់បន្ថយហានិភ័យនៃការត្រូវចូលពេទ្យ ឬស្លាប់បានរហូតដល់ 89%។

ក្រុមហ៊ុនផលិតឱសថរបស់ អាម៉េរិក Pfizer កាលពីថ្ងៃទី 16 វិច្ឆិកា ឱ្យដឹងថា ពួកគេបានដាក់ពាក្យរួចហើយដើម្បីស្នើសុំការអនុម័តឱ្យប្រើប្រាស់បន្ទាន់នូវថ្នាំ Paxlovid ទៅកាន់អាជ្ញាធរគ្រប់គ្រងអាហារនិងឱសថ (FDA) របស់ សហរដ្ឋអាម៉េរិក។

FDA នឹងចេញសេចក្ដីសម្រេចចុងក្រោយស្ដីពីក្រុមគោលដៅដែលអាចប្រើប្រាស់ថ្នាំ ក៏ដូចជាវិធីនៃការប្រើប្រាស់។

ថ្នាំ Paxlovid របស់ Pfizer គ្រោងនឹងត្រូវបានលក់ក្នុងតម្លៃប្រហាក់ប្រហែលនឹងថ្នាំប្រឆាំង COVID-19 molnupiravir របស់ Merck៕

November 17, 2021

ក្រុមហ៊ុនផលិតឱសថអាម៉េរិក Pfizer ដាក់ពាក្យសុំអនុម័តថ្នាំព្យាបាលជំងឺ COVID-19

ក្រុមហ៊ុន Pfizer បានដាក់ពាក្យសុំការអនុម័តឱ្យប្រើប្រាស់ថ្នាំព្យាបាលជំងឺ COVID-19 ឡើងទៅកាន់ FDA បន្ទាប់ពីឱសថរបស់ពួកគេត្រូវបានបញ្ជាក់ថា អាចកាត់បន្ថយហានិភ័យត្រូវចូលពេទ្យ ឬស្លាប់រហូតដល់ 89%។

ក្រុមហ៊ុនផលិតឱសថរបស់ អាម៉េរិក Pfizer កាលពីថ្ងៃទី 16 វិច្ឆិកា ឱ្យដឹងថា ពួកគេបានដាក់ពាក្យរួចហើយដើម្បីស្នើសុំការអនុម័តឱ្យប្រើប្រាស់បន្ទាន់នូវថ្នាំ Paxlovid ដែលមានប្រសិទ្ធភាពប្រឆាំងវីរុស ជួយព្យាបាលជំងឺ COVID-19 ឡើងទៅកាន់អាជ្ញាធរគ្រប់គ្រងអាហារនិងឱសថ (FDA) របស់ សហរដ្ឋអាម៉េរិក។

បច្ចុប្បន្ន មិនទាន់ដឹងច្បាស់ថា ពេលណាទើប FDA នឹងចេញសេចក្ដីសម្រេចចំពោះសំណើរបស់ Pfizer នៅឡើយ។ កាលពីថ្ងៃទី 11 តុលា ក្រុមហ៊ុន Merck និងដៃគូ Ridgeback Biotherapeutics ក៏បានដាក់ពាក្យស្នើសុំការអនុម័តចំពោះថ្នាំ molnupiravir ដែលជាផលិតផលប្រកួតប្រជែងនឹង Paxlovid។

FDA នឹងចេញសេចក្ដីសម្រេចចុងក្រោយស្ដីពីក្រុមគោលដៅដែលអាចប្រើប្រាស់ថ្នាំ ក៏ដូចជាវិធីនៃការប្រើប្រាស់។

ក្រៅពីសហរដ្ឋអាម៉េរិក ក្រុមហ៊ុន Pfizer ក៏កំពុងពន្លឿនដំណើរការនៃការសុំច្បាប់លក់ថ្នាំព្យាបាល COVID-19 នៅក្នុងប្រទេសមួយចំនួនផងដែរ រួមមាន អង់គ្លេស អូស្ត្រាលី នូវែលសេឡង់ និង កូរ៉េខាងត្បូង។

ថ្នាំ Paxlovid របស់ Pfizer គ្រោងនឹងត្រូវបានលក់ក្នុងតម្លៃប្រហាក់ប្រហែលនឹងថ្នាំប្រឆាំង COVID-19 molnupiravir របស់ Merck៕

November 17, 2021

Category: សុខភាព