អ្នកវិជ្ជមានថ្មីទាំងអស់ចំនួន ១០ នាក់នេះ សុទ្ធតែផ្ទុកវីរុសប្រភេទ អូមីក្រុង។ ក្នុងថ្ងៃទី ១៣ មករា ក្រៅពីករណីវិជ្ជមានថ្មី កម្ពុជា ក៏មានអ្នកជាសះស្បើយចំនួន ១៥ នាក់ថែមទៀត និងពុំមានអ្នកណាម្នាក់ ស្លាប់ដោយសារកូវីដ-១៩ នោះទេ។
ថ្ងៃទី ១៤ មករា នេះ អង្គការសុខភាពពិភពលោក (WHO) បានអនុម័តវិធីសាស្ត្រថ្មីចំនួន ២ សម្រាប់ការព្យាបាលអ្នកជំងឺកូវីដ-១៩ ដែលនេះគឺជាការបន្ថែម «អាវុធ» សំខាន់ ទន្ទឹមនឹងវ៉ាក់សាំងដែលកំពុងមាន នៅក្នុងការទប់ស្កាត់ហានិភ័យជំងឺវិវត្តទៅជាធ្ងន់ធ្ងរ និងស្លាប់ ចំពោះអ្នកជំងឺកូវីដ-១។
វិធីសាស្ត្រថ្មីទាំង ២ នេះ រួមមាន ការប្រើប្រាស់ថ្នាំព្យាបាលជំងឺរលាកសន្លាក់ ដែលមានសមាសធាតុ baricitinib និងការប្រើប្រាស់អង្គបដិប្រាណសំយោគ Sotrovimab។
នៅក្នុងអនុសាសន៍របស់ WHO ដែលបានចុះផ្សាយលើទស្សនវដ្ដីវេជ្ជសាស្ត្ររបស់អង់គ្លេស BMJ ក្រុមអ្នកជំនាញរបស់ WHO បានលើកឡើងយ៉ាងច្បាស់ថា សមាសធាតុ baricitinib ដែលប្រើរួមជាមួយនឹង corticosteroid មានសមត្ថភាពជួយបង្កើនអត្រានៃការរស់ និងបន្ថយហានិភ័យត្រូវប្រើម៉ាស៊ីនជំនួយដង្ហើមចំពោះអ្នកជំងឺកូវីដ-១៩ ដែលមានអាការធ្ងន់ធ្ងរ។
ទន្ទឹមនឹងនេះ WHO ក៏បានណែនាំឱ្យប្រើអង្គបដិប្រាណ Sotrovimab សម្រាប់ អ្នកវិជ្ជមាននឹងកូវីដ-១៩ ដែលមានរោគសញ្ញាស្រាល ប៉ុន្តែមានហានិភ័យត្រូវចូលពេទ្យខ្ពស់បំផុត មានដូចជា មនុស្សចាស់ អ្នកមានប្រព័ន្ធភាពស៊ាំខ្សោយ ឬអ្នកដែលមានជំងឺរ៉ាំរ៉ៃ ដូចជា ជំងឺទឹកនោមផ្អែមជាដើម។
មុននោះ កាលពីខែកក្កដា ២០២១ WHO ក៏បានអនុម័តឱ្យប្រើប្រាស់ថ្នាំព្យាបាលបញ្ហារលាកសន្លាក់ដែលមានសមាសធាតុ tocilizumab និង sarilumab បូកជាមួយនឹង corticosteroid ដើម្បីទប់ស្កាត់ហានិភ័យប្រព័ន្ធភាពស៊ាំរបស់អ្នកជំងឺកូវីដ-១៩ ប្រតិកម្មជ្រុលនៅចំពោះមុខ SARS-CoV-2។ កាលពីខែកញ្ញា ២០២១ WHO ក៏បានបន្តអនុម័តឱ្យប្រើប្រាស់វិធីព្យាបាលអ្នកជំងឺកូវីដ-១៩ ដោយអង្គបដិប្រាណសំយោគ Regeneron ផងដែរ។
ប្រជាពលរដ្ឋជាគោលដៅនៅ រាជធានីភ្នំពេញ នឹងទទួលបានការចាក់វ៉ាល់សាំងបង្ការជំងឺកូវីដ-១៩ ដូសទី ៤ ចាប់ពីថ្ងៃទី ១៤ ខែមករា ឆ្នាំ ២០២២។
-ករណីឆ្លងថ្មី ៣៤ នាក់ (លទ្ធផលបញ្ជាក់ដោយ PCR)
-ករណីជាសះស្បើយ ១៤ នាក់
-ករណីស្លាប់ ០ នាក់
ការសិក្សាស្រាវជ្រាវមួយនាពេលថ្មីៗនេះ ដែលបានធ្វើឡើងចំពោះអ្នកជំងឺកូវីដ-១៩ ជិត ៧០,០០០ នាក់ នៅ រដ្ឋ California សហរដ្ឋអាម៉េរិក បានបង្ហាញថា អូមីក្រុង បង្កជំងឺធ្ងន់ធ្ងរទាបជាងបណ្ដា វីរុសបំប្លែងខ្លួនថ្មីនានារបស់ កូវីដ-១។
លទ្ធផលនៃការស្រាវជ្រាវខាងលើនេះ ស៊ីចង្វាក់គ្នាជាមួយនឹងការរកឃើញរបស់ក្រុមអ្នកវិទ្យាសាស្ត្រនៅ អាហ្វ្រិកខាងត្បូង អង់គ្លេស និង ដាណឺម៉ាក ក៏ដូចជាការពិសោធជាច្រើននៅលើសត្វនាពេលកន្លង។
ក្នុងប៉ុន្មានសប្ដាហ៍កន្លងទៅថ្មីៗនេះ ប្រទេសអង់គ្លេស និងប្រទេសមួយចំនួនទៀតបានរាយការណ៍ថា អូមីក្រុង បង្កហានិភ័យឱ្យអ្នកជំងឺត្រូវចូលពេទ្យ មានកម្រិតទាបជាង វ៉ារ្យ៉ង់ ដទៃ។ នៅពេល អូមីក្រុង បានឆ្លងដល់ សហរដ្ឋអាម៉េរិក វេជ្ជបណ្ឌិត Lewnard នៃសាកលវិទ្យាល័យ California និងក្រុមអ្នកវិទ្យាសាស្ត្រជាច្រើនទៀត បានចាប់ផ្ដើមវិភាគទិន្នន័យសុខាភិបាល ដែលបានប្រមូលដោយប្រព័ន្ធសុខាភិបាល Kaiser Permanente នៅ រដ្ឋ California ខាងត្បូង។
ពួកគេបានវិភាគទិន្នន័យនៃអ្នកជំងឺចំនួន ៦៩,២៧៩ នាក់ ដែលមានរោគសញ្ញា និងមានលទ្ធផលវិជ្ជមាននឹង កូវីដ-១៩ ចាប់ពីថ្ងៃទី ៣០ វិច្ឆិកា ២០២១ ដល់ថ្ងៃទី ១ មករា ២០២២។ ក្នុងនោះ សំណាកចំនួន ៧៥% វិជ្ជមាននឹង អូមីក្រុង ក្រៅពីនេះគឺវិជ្ជមាននឹង ដេលតា។
ក្រោយមក ក្រុមអ្នកស្រាវជ្រាវក៏បានតាមដានក្រុមមនុស្សដែលវិជ្ជមាននឹង កូវីដ-១៩ ដើម្បីឱ្យដឹងថា ពួកគេត្រូវចូលព្យាបាលនៅមន្ទីរពេទ្យ ឬអត់។ លទ្ធផលបានបង្ហាញថា ធៀបនឹង ដេលតា ហានិភ័យនៃការធ្វើឱ្យអ្នកជំងឺត្រូវចូលពេទ្យដោយសារ អូមីក្រុង ថយចុះ ៥០% ហើយអ្នកជំងឺដែលវិជ្ជមាននឹង វ៉ារ្យ៉ង់ អូមីក្រុង ត្រូវសម្រាកក្នុងពេទ្យក្នុងរយៈពេលខ្លីជាង ធៀបនឹងអ្នកជំងឺ ដេលតា ផងដែរ។
ក្នុងចំណោមអ្នកជំងឺដែលវិជ្ជមាននឹង អូមីក្រុង ចំនួនជាង ៥២,០០០ នាក់ ក្រុមអ្នកស្រាវជ្រាវរកឃើញថា ពុំមានអ្នកជំងឺណាម្នាក់ត្រូវដកដង្ហើមដោយមានជំនួយពីម៉ាស៊ីននោះទេ នៅក្នុងអំឡុងពេលខាងលើ។ អ្នកជំងឺដែលវិជ្ជមាននឹង ដេលតា ចំនួន ១៤ នាក់ បានបាត់បង់ជីវិត ខណៈដែលតួលេខនេះនៅលើអ្នកជំងឺដែលវិជ្ជមាននឹង អូមីក្រុង មានត្រឹមតែ ១ នាក់ប៉ុណ្ណោះ។
វេជ្ជបណ្ឌិត Lewnard ក៏បានបញ្ជាក់ថា វ៉ាក់សាំងពិតជាបានជួយឱ្យអ្នកជំងឺ មានហានិភ័យត្រូវចូលពេទ្យទាបជាងចាប់ពី ៦៤% ដល់ ៧៣% បើធៀបនឹងអ្នកដែលមិនបានចាក់វ៉ាក់សាំង។ ប៉ុន្តែ សម្រាប់ អូមីក្រុង សូម្បីតែអ្នកដែលមិនបានចាក់វ៉ាក់សាំង ក៏វាបង្កហានិភ័យត្រូវចូលពេទ្យទាបជាង ធៀបនឹងងផដែរ ធៀបនឹង ដេលតា។
មូលហេតុដែលបណ្ដាមន្ទីរពេទ្យនៅ សហរដ្ឋអាម៉េរិក ត្រូវរងសម្ពាធដោយសារមានអ្នកជំងឺកូវីដ-១៩ ច្រើន ត្រូវបានវេជ្ជបណ្ឌិត Lewnard បកស្រាយនេះ គឺមកពី អូមីក្រុង ងាយឆ្លងរាលដាល ធ្វើចំនួនអ្នកជំងឺកើនឡើងខ្ពស់៕
(ហ្វាំងឡង់)-ក្រុមអ្នកវិទ្យាសាស្ត្រនៅសាកលវិទ្យាល័យ Helsinki បង្កើតបានថ្នាំបាញ់តាមរន្ធច្រមុះថ្មីមួយដែលអាចការពារមនុស្សប្រកបដោយប្រសិទ្ធភាព នៅចំពោះមុខ កូវីដ-១៩ រួមទាំង វ៉ារ្យ៉ង់ អូមីក្រុង ផងដែរ។
ក្នុងការសិក្សាស្រាវជ្រាវទៅលើកោសិកសត្វកណ្ដុរ កាលពីពេលថ្មីៗនេះ បង្ហាញថា ថ្នាំបាញ់ច្រមុះអាចទប់ស្កាត់ការឆ្លងរបស់វីរុសទៅក្នុងកោសិកា បានរយៈពេលរហូតដល់ ៨ ម៉ោង បន្ទាប់ពីបាញ់ ១ ដូស។ ប៉ុន្តែ ក្រុមអ្នកវិទ្យាសាស្ត្រនឹងត្រូវពិសោធបន្ថែមទៀត មុននឹងអាចប្រើប្រាស់នៅលើមនុស្ស។
ថ្នាំបាញ់ច្រមុះប្រឆាំងការឆ្លង កូវីដ-១៩ នេះ ត្រូវពិសោធដោយក្រុមអ្នកវិទ្យាសាស្ត្ររបស់សាកលវិទ្យាល័យ Helsinki នៃប្រទេសហ្វាំងឡង់។
ទោះជាយ៉ាងណាក៏ដោយ Kalle Saksela ដែលជាអ្នកស្រាវជ្រាវរបស់ក្រុមខាងលើថ្លែងថា ថ្នាំបាញ់ច្រមុះដែលត្រូវបានប្រកាសឱ្យដឹងកាលពីខែធ្នូ ២០២១ នេះ មិនមែនជាវ៉ាក់សាំង ហើយក៏មិនមែនជាដំណោះស្រាយជំនួសវ៉ាក់សាំង ប៉ុន្តែ វាដូចទៅនឹងជំនួយការវ៉ាក់សាំង ដើម្បីបង្កើនសមត្ថភាពការពារដល់អ្នកដែលបានទទួលការចាក់វ៉ាក់សាំង ពិសេសគឺអ្នកដែលមានអង្គបដិប្រាណខ្សោយ។
បច្ចុប្បន្ន Kalle Saksela មិនទាន់ដឹងច្បាស់ថា ថ្នាំបាញ់ច្រមុះនេះនឹងទទួលបានការអនុម័តឱ្យពិសោធលើមនុស្ស ក៏ដូចជាការចរាចរលើទីផ្សារនៅពេលណានៅឡើយ៕
បើទោះបច្ចុប្បន្ន កូវីដ-១៩ គឺជាជំងឺរាតត្បាតសកល ប៉ុន្តែ ការឆ្លងរាលដាលរបស់ អូមីក្រុង កំពុងប្រែក្លាយ កូវីដ-១៩ ឱ្យទៅជាជំងឺរាតត្បាតអសកល ឬជំងឺរាតត្បាតតាមតំបន់ដែលមនុស្សអាចរស់នៅជាមួយបាន។
លោក Marco Cavaleri អ្នកទទួលខុសត្រូវលើយុទ្ធសាស្ត្រវ៉ាក់សាំងរបស់ EMA ថ្លែងថា ពុំមាននរណាម្នាក់ដឹងច្បាស់អំពីពេលវេលាដែលជំងឺរាតត្បាតសកលកូវីដ-១៩ នឹងត្រូវបានបញ្ចប់ ប៉ុន្តែ លោកជឿជាក់ថា បណ្ដាប្រទេសនឹងដើរដល់ចំណុចនោះ។
ដោយមានការឆ្លងរាលដាលក្នុងសហគមន៍កាន់តែច្រើនឡើង រួមនឹងវត្តមានរបស់ អូមីក្រុង ភាពស៊ាំតាមធម្មជាតិ និងភាពស៊ាំដែលកើតឡើងដោយសារវ៉ាក់សាំង នឹងជួយឱ្យពិភពលោកដើរដល់សេណារីយោ «កូវីដ-១៩ ជាជំងឺរាតត្បាតអសកល» បានឆាប់ជាងបច្ចុប្បន្ន។ នេះបើតាមការអះអាងរបស់លោក Marco Cavaleri កាលពីថ្ងៃទី ១១ មករា។
ចំណែកឯមន្ត្រីសុខាភិបាលជាន់ខ្ពស់របស់ សហរដ្ឋអាម៉េរិក លោក Anthony Fauci វិញ យល់ថា សហរដ្ឋអាម៉េរិក កំពុងឆ្ពោះទៅកាន់ដំណាក់កាលរួមរស់ជាមួយ កូវីដ-១៩ ដោយវានឹងក្លាយជាជំងឺដែលអាចគ្រប់គ្រងបាននាពេលខាងមុខ។
លោក Anthony Fauci អះអាងថា សហរដ្ឋអាម៉េរិក នឹងអាចឈានចូលដល់ដំណាក់កាលថ្មី ជាដំណាក់កាលដែលសហគមន៍មានភាពស៊ាំ ក៏ដូចជាមានថ្នាំព្យាបាលគ្រប់គ្រាន់ ដើម្បីអនុញ្ញាតឱ្យអ្នកជំងឺ រួមនឹងក្រុមដែលប្រឈមនឹងហានិភ័យខ្ពស់ ទទួលបានការព្យាបាលដោយងាយស្រួល។ លោកយល់ថា បច្ចុប្បន្ន សហរដ្ឋអាម៉េរិក ទំនងជាបានស្ថិតនៅក្បែរ «ច្រក» នៃដំណាក់កាលនោះ៕
ក្នុងចំណោមអ្នកវិជ្ជមានថ្មីនឹង កូវីដ-១៩ ទាំង ១៤ នាក់ ដែលទើបត្រូវបានរកឃើញ មានករណីឆ្លងក្នុងសហគមន៍ ២ នាក់ និងអ្នកដំណើរពីបរទេស ១២ នាក់។
អាជ្ញាធរគ្រប់គ្រងឱសថរបស់ សហភាពអឺរ៉ុប បានព្រមានថា ការចាក់វ៉ាក់សាំងបង្ការ ជំងឺកូវីដ-១៩ រំលឹកឡើងវិញ ៤ ខែ/ម្ដង អាចជះឥទ្ធិពលអាក្រក់ដល់ប្រព័ន្ធការពាររាងកាយ។
បណ្ដាប្រទេសគួរតែបង្កើនរយៈពេលនៃគន្លាតរវាងយុទ្ធនាការចាក់ដូសជំរុញ ហើយភ្ជាប់វាទៅនឹងរដូវរងា ដូចទៅនឹងផែនការយុទ្ធសាស្ត្រចាក់វ៉ាក់សាំងបង្ការជំងឺផ្ដាសាយ។ ការចាក់វ៉ាក់សាំងបង្ការ ជំងឺកូវីដ-១៩ រំលឹកឡើងវិញ ៤ ខែ/ម្ដង អាចធ្វើឱ្យប្រព័ន្ធការពាររាងកាយចុះខ្សោយ បណ្ដាលឱ្យអ្នកដែលបានទទួលការចាក់អស់កម្លាំង។ នេះបើតាមអាជ្ញាធរគ្រប់គ្រងឱសថអឺរ៉ុប (EMA) នៃ សហភាពអឺរ៉ុប (EU) ដែលបានឱ្យដឹងកាលពីថ្ងៃទី ១១ មករា។
Marco Cavaleri មេដឹកនាំស្ថាប័នគ្រប់គ្រងហានិភ័យគំរាមដល់សុខភាព និងយុទ្ធសាស្ត្រវ៉ាក់សាំងរបស់ EMA បានថ្លែងក្នុងសន្និសីទសារព័ត៌មាន ថា៖ «អាចចាក់ដូសជំរុញ ១ ឬ ២ ដង ប៉ុន្តែ នោះមិនមែនជាប្រការដែលយើងយល់ថា គួរតែធ្វើជាញឹកញាប់ឡើយ»។
អនុសាសន៍របស់ EMA ត្រូវបានលើកឡើងនៅក្នុងគ្រាដែលប្រទេសមួយចំនួនបាន និងកំពុងចាក់ ឬកំពុងពិចារណាអំពីការចាក់ដូសជំរុញទី ២ ដើម្បីទប់ទល់នឹង អូមីក្រុង។
អ៊ីស្រាអែល កាលពីដើមខែមករា បានចាប់ផ្ដើមយុទ្ធនាការចាក់វ៉ាក់សាំងដូសជំរុញទី ២ សម្រាប់ពលរដ្ឋវ័យចាប់ពី ៦០ ឆ្នាំឡើងទៅ។ កម្ពុជា ក៏បានចាប់ផ្ដើមយុទ្ធនាការចាក់ដូសវ៉ាក់សាំងដូសទី ៤ កាលពីពេលថ្មីៗនេះ។ ចំណែក អង់គ្លេស វិញ ឱ្យដឹងថា ដូសជំរុញទី ១ មានប្រសិទ្ធភាពខ្ពស់ និងមិនទាន់ត្រូវការដូសជំរុញទី ២ ប៉ុន្តែ នឹងធ្វើការពិនិត្យនៅពេលមានទិន្នន័យបន្ថែម។
EMA ឱ្យដឹងថា ថ្នាំប្រឆាំង វីរុស ប្រភេទគ្រាប់សម្រាប់លេប និងថ្នាំសម្រាប់ចាក់ ដូចជា Paxlovid និង Remdesivir ជាដើម រក្សាប្រសិទ្ធភាពក្នុងការប្រឆាំងនឹង អូមីក្រុង។
អាជ្ញាធរគ្រប់គ្រងឱសថអឺរ៉ុប ក៏បានបង្ហើបឱ្យដឹងថា ខែមេសា គឺជាពេលវេលាឆាប់បំផុតដែលពួកគេអាចផ្ដល់ការអនុញាត់ឱ្យប្រើប្រាស់វ៉ាក់សាំងថ្មីមួយដែលសំដៅលើការទប់ស្កាត់ វ៉ារ្យ៉ង់ ជាក់លាក់របស់ កូវីដ-១៩៕
ក្នុងចំណោម ៣៤ នាក់នោះ មានករណីឆ្លងក្នុងសហគមន៍ចំនួន ១០ នាក់ និងអ្នកដំណើរពីបរទេសចំនួន ២៤ នាក់។
