សុខភាព - La Reine Media

ប្រយ័ត្ន!! ជំងឺគ្រោះថ្នាក់អាក្រក់ កើតចំពោះបុគ្គលិកធ្វើការក្នុងការិយាល័យ

តើជំងឺកើតមានចំពោះបុគ្គលិកធ្វើការក្នុងការិយាល័យ (Office Syndrome) ជាអ្វី? បើតាមការបញ្ជាក់របស់គ្រូពេទ្យជំនាញសុខភាពពិភពលោកបានប្រាប់ថា ក្រុមអាការរោគអូសហ្វីសស៊ីនដ្រូន (Office syndrome) គឺជាអាការដែលកើតឡើងពីចំពោះមនុស្សពេញវ័យកំពុងធ្វើការងារ ដែលកំពុងតែអង្គុយធ្វើការងារនៅក្នុងការិយាល័យពេញមួយថ្ងៃ ដោយមិនមានការហាត់ប្រាណជាប្រចាំថ្ងៃ និងមានសភាពបរិស្ថានជុំវិញកន្លែងធ្វើការងារពោរពេញដោយបរិយាកាសអាប់អួរ និងចំហាយផ្សែងពុលពីគ្រឿងម៉ាស៊ីនដែលអ្នកមិនអាចមើលឃើញនឹងភ្នែកទទេ ធ្វើឱ្យកើតមានអាការឈឺក្នុងខ្លួនខុសប្រក្រតីផ្សេងៗជាដើម។

អាការនៃជំងឺអូសហ្វីសស៊ីនដ្រូន (Office syndrome) រួមមានដូចជា ៖
1. ប្រតិកម្មសាច់ដុំដៃ និងឈឺចុកចាប់តាមអវយវៈផ្សេងៗ។

2. ឈឺខ្នង ឬចុករោយតាមបរិវេណផ្នែកខាងក្រោយនៃរាងកាយជាញឹកញាប់ ដោយសារអង្គុយធ្វើការពេញមួយថ្ងៃ 8ម៉ោង ធ្វើឱ្យសាច់ដុំដើមក ស្មា និងចង្កេះ ឡើងរឹងជាប់នៅពេលវេលាយូរ។

3. ខ្យល់អាកាសចេញចូលក្នុងការិយាល័យមិនគ្រប់គ្រាន់ ខួរក្បាលបានទទួលអុកស៊ីហ្សែ៊នមិនគ្រប់គ្រាន់ បណ្ដាលឱ្យមានអាការឈឺភ្នែក ស្ពឹកភ្នែក និងមុខស្លក់ឡើងខ្មៅជាដើម។

4. អាការអាចធ្ងន់ធ្ងរឡើង និងអាចហុចផលអាក្រក់ដល់សភាពរាងកាយខ្លាំងឡើងដូចជា ធ្វើឱ្យឈឺក្បាល កើតប្រកាំង រលាកសន្លាក់ឆ្អឹងកងខ្នង ប៉ះពាល់ដល់ប្រព័ន្ធប្រសាទធ្ងន់ធ្ងរ និងអាចវង្វេងស្មារតីក៏មានដែរ។

5. កើតមានអាការចាញ់អាកាសធាតុ ងាយទទួលជំងឺឱកាសនិយម និងពិបាកដកដង្ហើម រហូតឈានដល់រលាកផ្លូវដង្ហើម។

វិធីការពារ និងព្យាបាល
លោកគ្រូពេទ្យជំនាញបានបញ្ជាក់ពីវិធីការពារជំងឺអូសហ្វីសស៊ីនដ្រូននេះថា ការការពារដែលអាចធ្វើទៅបាននោះគឺ ការផ្លាស់ប្ដូរឥរិយាបទរស់នៅ ដោយការមានអនាម័យ និងការទទួលយកអុកស៊ីហ្សែ៊នឱ្យដល់ខួរក្បាលបានយ៉ាងគ្រប់គ្រាន់។ ប្រសិនបើអាការមិនប្រសើរឡើងទេនោះ គឺចាំបាច់ត្រូវប្រើថ្នាំដើម្បីបន្ថយអាការដែលកើតឡើង និងត្រូវទទួលការវះកាត់ក៏មានដែរពោលគឺអាស្រ័យទៅលើស្ថានភាពរបស់អ្នកជំងឺ។ នាពេលបច្ចុប្បន្ននេះ ខាងមន្ទីរពេទ្យ បានធ្វើការអប់រំណែនាំចំពោះអ្នកជំងឺពីក្រុមអ្នកធ្វើការងារច្រើនម៉ោង ឱ្យមានទម្លាប់ហាត់ប្រាណនាពេលព្រឹកព្រលឹម មុនពេលចូលធ្វើការរយៈពេល15-20នាទី និងពេលចេញពីធ្វើការ 20នាទី ស្ថិតក្នុងបរិវេណការិយាល័យ៕

September 28, 2018

អស់បញ្ហារឿងគេងលក់មិនគ្រប់គ្រាន់ ជាមួយ15វិធីជួយឱ្យឆាប់គេងលក់

ដូចដែលយើងបានដឹងច្បាស់ហើយថា ការគេងលក់គឺជាចំណែក 1ភាគ3នៃជីវិតប្រចាំថ្ងៃរបស់យើង ដូច្នេះហើយទើបយើងត្រូវតែគេងលក់សម្រាកឱ្យបានមួយថ្ងៃពី6 – 8ម៉ោង ទើបហុចផលល្អដល់រាងកាយ តែបើអ្នកមានបញ្ហាក្នុងការគេង ដូចជា គេងមិនសូវលក់ ឬពិបាកក្នុងការគេងលក់ ចូរសាកល្បងធ្វើតាម “វិធីធ្វើឱ្យគេងលក់‟ របស់យើងលមើល៍ ធានាថាអ្នកនឹងលង់លក់សប្បាយយ៉ាងពិតប្រាកដ។

1. ហាត់ប្រាណជាប្រចាំ ឬមួយសប្ដាហ៍ 3ដងម្ដងៗយ៉ាងតិចកន្លះម៉ោង តែមិនគួរហាត់ប្រាណមុនពេលគេងឡើយ។

2. មិនគួរគេងលក់នៅពេលថ្ងៃ ឬពេលល្ងាចនោះទេ ព្រោះនឹងធ្វើឱ្យខួរក្បាលយល់ច្រឡំថា រាងកាយបានគេងលក់រួចហើយ លុះដល់ពេលត្រូវគេងមែនទែន ក៏នឹងធ្វើឱ្យពិបាកគេងលក់ តែបើចង់គេងសម្រាកពេលថ្ងៃខ្លាំងមែនទែននោះ ចូរគេងមួយស្រឡេតមិនឱ្យលើសកន្លះម៉ោងបានហើយ។

3. តមភេសជ្ជៈ តែ កាហ្វេ សូកូឡា និងភេសជ្ជៈដែលមានជាតិកាហ្វេអីុន និងបារី។

4. តមអាហារពេលយប់ជ្រៅ និងមិនគួរញ៉ាំទឹកច្រើននៅពេលព្រលប់ទេ ព្រោះជាប្រក្រតីរាងកាយមិនបញ្ចេញទឹករំលាយអាហារនៅពេលយប់ឡើយ។

5. មិនគួរធ្វើកិច្ចការងារណាដែលធ្វើឱ្យផ្លូវចិត្តបានទទួលការជំរុញមុនពេលគេង ដូចជា មើលកុន អានសៀវភៅ ជជែកគ្នា រឿងដែលធ្វើឱ្យអារម្មណ៍តឹងតែង ជំរុញផ្លូវចិត្តឱ្យរំភើបញាប់ញ័រខំប្រឹង និងធុញថប់ឡើយ។

6. តមលេងឧបករណ៍អេឡិចត្រូនិក ទូរស័ព្ទស្មាតហ្វូនមុនពេលចូលគេង ព្រោះឧបករណ៍ទាំងនោះមានផលធ្វើឱ្យពិបាកគេងលក់ ដោយសារតែពន្លឺពណ៌ផ្ទៃមេឃក្នុងអេក្រង់ ធ្វើឱ្យរាងកាយបានដឹងថា មិនទាន់ងងឹត និងបញ្ចេញសារធាតុ មេឡាតូនីន ធ្វើឱ្យពិបាកគេងលក់ ហើយយើងថែមទាំងទទួលបានព័ត៌មានចូលមកជាប់ជានិច្ច ធ្វើឱ្យខួរក្បាលមិនបានសម្រាក និងគេងលក់មិនបានពេញលេញ រលកខួរក្បាលមិនស្រឡះ ធ្វើឱ្យគេងលក់មិនស្កប់។

7. ព្យាយាមរៀបចំពេលវេលាសម្រាប់ការសម្រាក ដើម្បីបន្ធូររាងកាយ និងខួរក្បាលឱ្យស្រឡះមុនចូលគេង ដូចជា ស្ដាប់បទភ្លេងដែលជួយសម្រួលឱ្យគេងលក់បានកាន់តែស្រួលឡើង ឬអង្គុយតាំងសមាធិ សូត្រមន្តឱ្យផ្លូវចិត្តបានស្ងប់សប្បាយ ធូរស្រាល ឬនឹកដល់ធម្មជាតិ។

8. សម្រួលបន្ទប់គេងឱ្យស័ក្តិសមទាំងសីតុណ្ហភាព ពន្លឺ និងភាពស្រទន់ស្រួលខ្លួន។

9. គ្រែមានទុកសម្រាប់គេង មិនគួរធ្វើកិច្ចការងារផ្សេងៗលើគ្រែ ដូចជាទូរស័ព្ទ ញ៉ាំអាហារ ឬអានសៀវភៅឡើយ។

10. ពេលផ្ដេកខ្លួនគេងហើយ ចូរឈប់គិតរឿងដែលតានតឹង មិនសប្បាយចិត្ត ដូច្នេះមុនពេលគេង ចូរសរសេរកត់ត្រាអ្វីដែលមិនសប្បាយចិត្តចូលទៅក្នុងក្រដាសថា អ្វីដែលយើងកែខៃបាន និងអ្វីដែលយើងកែខៃមិនបាន ព្រោះការសរសេរដែលច្បាស់លាស់នឹងធ្វើឱ្យខួរក្បាលស្រឡះឡើង ផ្លូវចិត្តសប្បាយឡើង។

11. មិនគួរញ៉ាំទឹកច្រើនក្រោយពេលបាយល្ងាច ព្រោះនឹងធ្វើឱ្យភ្ញាក់ឡើងបត់ជើងតូច និងដាច់ចង្វាក់ការកំពុងគេងលក់ស្រួលដូច្នេះមុននឹងចូលគេងគួរចូលបន្ទប់ទឹកឱ្យរួចរាល់ ឬបើចាំបាច់ត្រូវភ្ញាក់ឡើងចូលបន្ទប់ទឹកក៏មិនចាំបាច់កង្វល់ដែរ ចូរត្រឡប់មកគេងវិញយ៉ាងមានអារម្មណ៍ធូរស្រាល។

12. មិនគួរមានអារម្មណ៍កង្វល់ ឬតានតឹងនៅពេលគេងមិនលក់នោះទេ បើការចូលគេងកន្លងទៅ 30នាទីហើយនៅតែមិនទាន់លក់ទៀត ចូររកកិច្ចការងារបន្ធូរអារម្មណ៍ធ្វើ រហូតទាល់តែមានអារម្មណ៍ថាងងុយ សឹមចូលទៅគេងវិញម្ដងទៀត។

13. កុំវិតក្កកង្វល់ ហើយមើលនាឡិកាញឹកញាប់ ព្រោះវានឹងក្លាយជាការដាក់សម្ពាធលើខ្លួនឯង ធ្វើឱ្យមានអារម្មណ៍តានតឹង និងគេងមិនលក់នៅទីបំផុត។

14. បើអ្នកគេងជាមួយលោកអ្នកជាមនុស្សគេងស្រមុក និងធ្វើឱ្យលោកអ្នកពិបាកនឹងគេងលក់ ចូរលោកអ្នករកអ្វីមកបិទត្រចៀកនិងនាំដៃគូរបស់អ្នកទៅជួបគ្រូពេទ្យ ដើម្បីព្យាបាលអាការគេងស្រមុក តែបើលោកអ្នកនៅតែគេងមិនលក់ទៀត ចូរចែកគ្រែគ្នាគេងបណ្ដោះអាសន្ន ដើម្បីឱ្យលោកអ្នកបានគេងលក់សម្រាកយ៉ាងគ្រប់គ្រាន់។

15. គួរភ្ញាក់ពីដំណេកឱ្យទៀងពេលវេលារៀងរាល់ថ្ងៃ ទោះជាលោកអ្នកចូលគេងនៅម៉ោងប៉ុន្មានក៏ដោយ ព្រោះនឹងធ្វើឱ្យចរន្តការគេងលក់របស់លោកអ្នកមានតុល្យភាព និងមិនគួរភ្ញាក់ពីដំណេកក្រោយម៉ោង 8ព្រឹកឡើយព្រោះរាងកាយមនុស្សមានសម្ព័ន្ធជាមួយព្រះអាទិត្យរះ និងលិច៕

September 28, 2018

5ចំណុចហាមធ្វើ បើមិនចង់ឱ្យអវយវៈភេទឆ្លងរោគ

ប្រសិនបើជារឿងរបស់អវយវៈភេទហើយ មិនថាបុរស ឬក៏នារីនោះទេ េក៏មានភាពអៀនខ្មាសនៅក្នុងការនិយាយចេញមកក្រៅ និងធ្វើឱ្យពិបាកចិត្តនៅពេលដែលនិយាយអំពីរឿងនេះ ឬក៏ពិបាកពិគ្រោះជាមួយអ្នកដទៃអំពីបញ្ហានេះ។ ដូច្នេះហើយខណៈដែលមានអាការចម្លែកៗ ដូចជា អាការ “ឆ្លងរោគ” កើតឡើង មនុស្សជាច្រើនបានប្រើការព្យាយាមអំណត់ ខ្លះរកផ្លូវព្យាបាលដោយខ្លួនឯងយ៉ាងមិនត្រឹមត្រូវ ខ្លះព្យាបាលតាមការស្រាវជ្រាវមួយចំនួន រហូតដល់ចុងក្រោយមានការហុចផលមិនល្អដល់រាងកាយលើសដើមទៀត។ ដូច្នេះ ដំណោះស្រាយដែលត្រឹមត្រូវនោះគឺ ការមើលថែរក្សាអនាម័យរបស់អវយវៈភេទឱ្យបានល្អប្រសើរ កុំឱ្យមានការប្រឡាក់ប្រឡូក ដែលជាហេតុបង្កឱ្យឆ្លងរោគដល់ខ្លួនអ្នកផ្ទាល់។ ទស្សនាវដ្តី ឡារ៉ែន សូមណែនាំនូវចំណុចទាំង5 ដូចខាងក្រោមនេះ៖

1. ហាមស្លៀកខោក្នុងដដែលៗ
បរិវេណអវយវៈភេទ គឺមានក្រពេញញើសដូចជាបរិវេណផ្សេងៗទៀតនៃសារពាង្គកាយដែរ ដែលមានរន្ធរោម ថែមទាំងមានកន្លុកកន្លៀតដែលបានបិទបាំងដោយសម្លៀកបំពាក់ផងដែរ។ ការបិទមុខរន្ធញើស ជាកត្តាដែលនាំឱ្យកើតមានក្លិនមិនល្អជាប់នឹងស្បែក និងសម្លៀកបំពាក់ ហើយបាក់តេរីក៏អាចចម្រើនលូតលាស់បានយ៉ាងលឿនទៀតផង។ អ្នកគួរតែធ្វើការផ្លាស់ប្ដូរខោក្នុងឱ្យបានជារៀងរាល់ថ្ងៃដើម្បីថែរក្សាអនាម័យនៅក្នុងចំណុចដែលបានលាក់បាំងនេះ។ អ្នកគួរតែធ្វើការផ្លាស់ឈុតខោក្នុង មួយថ្ងៃឱ្យបាន2ដងទើបជាការប្រសើរ ពោលគឺនៅពេលព្រឹក និងមុនពេលចូលគេង។ ប្រញាប់ធ្វើការសម្អាតអវយវៈភេទភ្លាម នៅពេលដែលអ្នកមានអារម្មណ៍ថា ធំុក្លិន អាប់អួរ ឬក៏ក្រោយពេលដែលអ្នកធ្វើការហាត់ប្រាណរួច។

2. ហាមលាងសម្អាតទ្វារមាសផ្នែកខាងក្នុង
ស្ត្រីខ្លះ ចង់សម្អាតផ្នែកខាងក្នុងនៃទ្វារមាស ទើបខំព្យាយាមប្រើម្រាមដៃស៊កចូលទៅសម្អាតខាងក្នុង ដោយសាប៊ូ ឬផលិតផលសម្រាប់សម្អាតអនាម័យស្ត្រីផ្សេងៗដែលមានលក់នៅតាមផ្សារ។ ក៏ប៉ុន្ដែ តាមការពិតទៅការធ្វើការសម្អាតចូលទៅខាងក្នុងទ្វារមាស គឺមានផលប៉ះពាល់រាងកាយលើសដើម ព្រោះសាប៊ូមានកម្រិត pH ខ្ពស់ជាងទ្វារមាស ហើយធាតុផ្សំនៃក្លិនប្រអូបរបស់សាប៊ូ អាចធ្វើឱ្យទ្វារមាសរលាក ឡើងក្រហម និងមានអាការរមាស់ ហើយក្រៅពីនេះ វាក៏មិនបានសម្លាប់បាក់តេរីចេញពីរាងកាយនោះទេ។ ប្រសិនបើអ្នកចង់ធ្វើការសម្អាតអនាម័យខាងក្នុងទ្វារមាស អ្នកគួរតែជ្រើសរើសប្រើទឹកស្អាត ធ្វើទឹកអនាម័យដែលមានកម្រិត pH ទាបសម្រាប់សម្អាត ឬគ្រាន់តែសម្អាតផ្នែកខាងក្រៅ មិនឱ្យលើសពីមួយថ្ងៃម្ដងក៏បាន។

3. ហាមលាបប្រេង ឬជែលរលោងផ្សេងៗ
ដើម្បីឱ្យមានភាពងាយក្នុងការរួមដំណេកជាមួយគូស្នេហ៍ អ្នកខ្លះអាចប្រើប្រាស់គ្រឿងជំនួយដូចជា ជែលទឹករំអិល ឬប្រេងរំអិលដែលមានក្លិនក្រអូប ដើម្បីឱ្យការរួមដំណេកមានភាពរលូន និងជួយជំរុញអារម្មណ៍ឱ្យកាន់តែខិតទៅដល់ចំណុចកំពូល។ មិនថាជាផលិតផលបែបណា យីហោណា ឬមានការបញ្ជាក់ថាគ្មានគ្រោះថ្នាក់បែបណាក៏ដោយ ខណៈដែលបានប្រើលាបពីលើស្បែក តែខុសពីភាពរំអិលដែលផលិតចេញមកពីខាងក្នុងនៃចំណុចលាក់បាំង វាអាចហុចផលអាក្រក់ប៉ះពាល់ដល់រាងកាយស្ត្រីបាន។ ដោយសារតែនៅពេលដែលរួមដំណេកហើយ ធ្វើឱ្យពិបាកនៅក្នុងការលាងសម្អាត និងធ្វើឱ្យកើតស្នាមប្រឡាក់ស្អិតជាប់នឹងអវយវៈភេទ បង្កឱ្យកើតមានបាក់តេរីចម្លងមេរោគជាដើម។ ប្រសិនបើចង់ឱ្យអវយវៈភេទមានភាពស្រស់ស្អាត និងមានអនាម័យ ខណៈដែលរួមដំណេក អ្នកគួរប្រើទឹករំអិលបែបធម្មជាតិតែប៉ុណ្ណោះ។

4. ហាមចោះ ឬចាក់សាក់
នៅពេលដែលអវយវៈភេទជាចំណុចលាក់បាំង ដែលទន់ស្ដើង សើមផ្អាប់ ផ្អាប់ញើស និងក្អែល ហើយងាយឆ្លងរោគនោះ ប្រសិនបើអ្នកធ្វើការចោះក្រវិល ឬចាក់សាក់ ដែលធ្វើឱ្យស្បែកនៅបរិវេណអវយវៈភេទមានស្នាមផ្លែរហូតដល់មានគ្រោះថ្នាក់ពីការឆ្លងមេរោគទៀតផង។ ទោះជាយ៉ាងនេះក្ដី យើងសូមណែនាំមិនឱ្យអ្នកធ្វើការចោះ ឬសាក់នៅបរិវេណនោះឡើយ តែបើអ្នកបានចោះរួចហើយនោះ សូមណែនាំឱ្យដោះក្រវិល ឬឧបករណ៍ផ្សេងៗចេញវិញ ដើម្បីឱ្យស្បែកនៅបរិវាណអវយវៈភេទត្រឡប់មករកសភាពដើមវិញ។ ប្រសិនបើអ្នកបានសាក់នៅបរិវេណនោះរួចហើយ សូមអ្នកកុំព្យាយាមលុបស្នាមសាក់ ឬសាក់បន្ថែមពីលើទៀតឱ្យសោះ។

5. ហាមស៊ករបស់ចម្លែកៗចូលទៅខាងក្នុង
មិនថាជា បន្លែ ផ្លែឈើ ឬឧបករណ៍ផ្សេងៗ គឺមិនគួរស៊កចូលទៅក្នុងទា្វរមាសរបស់អ្នកនោះទេ ព្រោះភាពកខ្វក់របស់វត្ថុទាំងអស់នោះ គឺមានគ្រោះថ្នាក់ដល់អវយវៈភេទរបស់អ្នកខ្លាំងណាស់ ដែលធ្វើឱ្យឆ្លងរោគបានយ៉ាងងាយ។ វត្ថុទាំងនោះអាចជាប់មានសារធាតុថ្នាំសម្លាប់សត្វល្អិត លម្អងធូលី និងកម្ទេចកម្ទីផ្សេងៗ ជាប់នូវបាក់តេរីជាច្រើនប្រភេទ ដែលអ្នកមើលមិនឃើញ ហើយឧបករណ៍សិច ក៏មានហានិភ័យនៃការឆ្លងមេរោគចូលទៅក្នុងទ្វារមាសផងដែរ ប្រសិនបើរបស់នោះមិនមានអនាម័យល្អគ្រប់គ្រាន់៕

September 17, 2018

កុំមើលរំលងបន្លែស្លឹកបាស មានគុណប្រយោជន៍ច្រើនចំពោះសុខភាព

ស្លឹកបាស ជាបន្លែម្យ៉ាងសម្រាប់ចម្អិនធ្វើជាម្ហូបអាហារ និងមានផលប្រយោជន៍ផ្នែកសុខភាពជាខ្លាំង។ ស្លឹកបាសមិនត្រឹមតែជាបន្លែដ៏ពេញនិយមបំផុតសម្រាប់អាហារប្រចាំថ្ងៃនោះទេ ប៉ុន្តែវាបានផ្តល់នូវអត្ថប្រយោជន៍ដល់សុខភាពទូទៅរបស់មនុស្សយើងផងដែរ។ លើសពីនេះទៅទៀត ស្លឹកបាសក៏ត្រូវបានបណ្តាប្រទេសមួយចំនួនប្រើជាឱសថធម្មជាតិក្នុងការព្យាបាលជំងឺមួយចំនួនទៀតផង។ ទាំងនេះក៏ព្រោះតែស្លឹកបាសមានផ្ទុកទៅដោយសារធាតុបំប៉ន និងសារធាតុសំខាន់ៗជាច្រើនដែលរាងកាយត្រូវការ។ ខាងក្រោមនេះ គឺជាផលប្រយោជន៍មួយចំនួនជួយឱ្យរាងកាយមានសុខភាពល្អ និងជួយបំបាត់អាការជំងឺផ្សេងៗដូចជា ៖

1. ជំនួយភ្នែក
នៅក្នុងស្លឹកបាស មានវីតាមីន A ចំនួនច្រើនគួរសម ដែលយើងងាយស្រួលរកបាន ហើយក្រៅពីវីតាមីន A ហើយនោះ បេតាខេរ៉ូទីន (Beta Carotene) ដែលមាននៅក្នុងស្លឹកបាស គឺជាសារធាតុរ៉ាឌីកាល់សេរីដែលអាចបំលែងខ្លួនឱ្យទៅជាវីតាមីន A បានថែមទៀតផង។ ដូច្នេះ ស្លឹកបាស ជាបន្លែដែលជួយដល់ភ្នែកមួយប្រភេទ ដែលអ្នកងាយរកទទួលទាន។

2. បង្កើនប្រព័ន្ធភាពស៊ាំ
ដូចបានដឹងថា ស្លឹកបាសមានវីតាមីន A និង បេតាខេរ៉ូទីន ដែលជាសារធាតុបង្កបង្កើតវីតាមីន A កម្រិតខ្ពស់នៅក្នុងរាងកាយ។ ដោយឡែក វាក៏បានជួយបង្កើនប្រព័ន្ធភាពស៊ាំបន្ថែមឱ្យអ្នក ធ្វើឱ្យអ្នកមិនងាយឈឺថ្កាត់ផ្តេសផ្ដាស។ ជាពិសេស អាចការពារជំងឺគ្រុនផ្ដាសាយ ទើបប្រសិនបើរាងកាយរបស់អ្នកខ្វះខាតវីតាមីន A នោះនឹងមានឱកាសឈឺ ឬគ្រុនបានដោយងាយបំផុត។

3. ស្លឹកបាសព្យាបាលទឹកនោមផ្អែម
បើតាមអ្នកជំនាញខាងសុខភាព និងមហាវិទ្យាល័យស្រាវជ្រាវសុខាភិបាលពិភពលោក បានអះអាងថា នៅក្នុងស្លឹកបាសមានសារធាតុប្រឆាំងរ៉ាឌីកាល់សេរី ដូចជា Flavonoid ច្រើនគួរសម អាចជួយព្យាបាល និងការពារជំងឺផ្សេងៗបាន ទាំងជំងឺទឹកនោមផ្អែមផងដែរ។ ក្រៅពីបានធ្វើការស្រាវជ្រាវរកឃើញថា ស្លឹកបាស មានចំណែកជួយកាត់បន្ថយជាតិស្ករនៅក្នុងឈាម ហើយនៅក្នុងស្លឹកបាសមានសារធាតុប្រឆាំងរ៉ាឌីកាល់សេរីជាច្រើនទៀត ដែលជួយការពារការកកើតជំងឺមហារីកផងដែរ។

4. ជួយថែរក្សាសុខភាពឆ្អឹង
ការរួមផ្សំនៃជាតិកាល់ស្យូម និងជាតិដែក ដែលត្រូវបានរកឃើញនៅក្នុងស្លឹកបាស ជាហេតុផលដែលអាចជួយដល់សុខភាពឆ្អឹងរបស់អ្នកយ៉ាងល្អ។ លើសពីនេះទៅទៀតស្លឹកបាសក៏ត្រូវបានគេណែនាំដល់ស្ត្រីមានផ្ទៃពោះឱ្យទទួលទានផងដែរ ដើម្បីបង្កើនប្រសិទ្ធភាពក្នុងការលូតលាស់របស់គភ៌ និងទារកក្នុងផ្ទៃ។ ចំពោះអ្នកដែលមានអាការចាញ់ទឹកដោះគោ ឬពិសាទឹកដោះគោហើយបណ្ដាលឱ្យរាក អ្នកអាចងាកមកទទួលទានស្លឹកបាសជំនួសវិញ។

5. ព្យាបាលអាការរមាស់ដោយសារសត្វល្អិតខាំ
ស្លឹកបាស មានធាតុត្រជាក់ ជួយបន្សាពិសក្ដៅចេញពីសត្វល្អិតបានក្នុងមួយកម្រិត ដោយអ្នកធ្វើការលាងសាច់របួសដោយទឹកស្អាតឱ្យបានស្អាត រួចយកស្លឹកបាសចាស់ មកទំពាឱ្យល្អិត ហើយញីពីលើស្នាមរបួសដែលសត្វល្អិតខាំ។ បន្ទាប់មក បិទកម្ទេចស្លឹកបាសដែលបានទំពាឱ្យល្អិតមួយសន្ទុះ នោះអាការរមាស់នឹងមានភាពសះស្បើយប្រសើរឡើងវិញ។

6. បង្កើនប្រសិទ្ធភាពប្រព័ន្ធរំលាយអាហារ
ស្លឹកបាសក៏ជាប្រភពនៃវីតាមីន B1 ឬជាតិ Thiamine ដែលមានតួនាទីក្នុងការស្រូបយកសារធាតុចិញ្ចឹម និងបង្កើនថាមពលជំនួសឱ្យកោសិកាខ្លាញ់ដែលរាងកាយមិនត្រូវការផងដែរ។ លើសពីនេះទៅទៀត ស្លឹកបាសក៏ជួយចែកចាយអុកស៊ីហែ្ស៊ន និងសារធាតុចិញ្ចឹមដល់រាងកាយបានល្អប្រសើរទៀតផង។ មិនតែប៉ុណ្ណោះ ស្លឹកបាស មានអង់ស៊ីម អាម៉ាយលែសជាច្រើន ដែលជួយជំរុញដល់ការរំលាយអាហារ ដែលការពាររាល់ជំងឺតឹងពោះ ចុកសៀតណែន និងល្អសម្រាប់អ្នកនិយមបរិភោគអាហារម្សៅ។

7. ជួយការពារភាពធាត់ហួសកំណត់
អ្នកត្រូវដឹងថា ការធាត់ហួសកំណត់មិនមែនបណ្តាលមកពីការទទួលទានច្រើនពេកទាំងស្រុងនោះទេ វាអាចបណ្តាលមកពីការរំលាយអាហារមិនបានល្អ ឬកត្តាផ្សេងៗមួយចំនួនទៀត។ ហេតុនេះស្លឹកបាសអាចជួយអ្នកក្នុងការការពារបញ្ហាធាត់ហួសកំណត់តាមរយៈការជំរុញល្បឿនរំលាយអាហារ៕

September 17, 2018

ការការពារស្បែកជើងមិនឱ្យភាយក្លិនក្នុងរដូវភ្លៀង

ពេលដោះស្បែកជើង តើអ្នកមានធុំក្លិនស្អុយដែរឬទេ? ប្រសិនបើមានមែននោះ វាគឺជាសញ្ញាមួយដែលប្រាកដណាស់ថា ជើងរបស់អ្នកមានក្លិនដូចជាសំរាមដែលផ្អាប់ទុកយូរអុីចឹង។ អ្នកពិតជាពិបាកចិត្តចំពោះបញ្ហាធុំក្លិនជើង ហើយជាពិសេសនៅក្នុងរដូវភ្លៀងនេះ ស្បែកជើងមិនស្ងួត និងធុំក្លិនជើងភាយក្លិនអាក្រក់រំខានដល់អ្នកនៅក្បែរខ្លួន គឺពិតជាធ្វើឱ្យអ្នកអាម៉ាសមុខណាស់មែនទេ? តោះមកយល់ដឹងពីដំណោះស្រាយចំពោះបញ្ហានេះទាំងអស់គ្នា។

តើធ្វើដូចម្តេចដើម្បីយកក្លិនអាក្រក់នេះចេញពីស្បែកជើងរបស់អ្នកបាន? ដំបូងអ្នកត្រូវរកមើល និងលុបបំបាត់មូលហេតុរបស់វាជាមុនសិន។ ប្រសិនបើស្បែកជើងមានលក្ខណៈតឹងពេក ហើយមិនមានខ្យល់ចេញចូលនោះ វាពិតជាងាយបង្កឱ្យមានក្លិនអាក្រក់ ដោយសារភាពហប់ណែនពេក។ ជាធម្មតាស្បែកនៅបាតដៃ ឬបាតជើង ជាកន្លែងដែលមានក្រពេញបញ្ចេញញើសច្រើនជាងកន្លែងដទៃទៀត។ ញើសដែលបញ្ចេញនៅបាតដៃ នឹងត្រូវបានខ្យល់បរិយាកាសសម្ងួតអស់ តែបើញើសនៅបាតជើងវិញ នឹងត្រូវផ្អាប់ទុកដោយស្បែកជើង និងស្រោមជើងដែលហប់ ឬសើម។ ការផ្អាប់ទុកនេះ នឹងផ្ដល់ឱកាសឱ្យបាក់តេរីមួយចំនួនរីកដុះដាល ហើយបង្កជាក្លិនស្អុយដល់ជើង ស្បែកជើង និងស្រោមជើង។ បើអ្នកកំពុងតែប្រឈមនឹងបញ្ហានេះ សូមកុំទាន់បារម្ភ ទស្សនាវដ្តី ឡារ៉ែន កំពុងយកចិត្តទុកដាក់ចំពោះអ្នក ដើម្បីដោះស្រាយបញ្ហាមួយនេះ ដូចខាងក្រោម ៖

1. ធ្វើការប្តូរស្រោមជើង : ស្រោមជើងត្រូវបោកសម្អាតជានិច្ចជារៀងរាល់ថ្ងៃ ហើយមិនត្រូវពាក់ស្បែកជើងដដែលៗរាល់ថ្ងៃនោះទេ ដោយចាំបាច់ត្រូវហាលស្បែកជើងដែលពាក់រួច ឱ្យត្រូវខ្យល់24ម៉ោង ដើម្បីឱ្យញើសដែលជាប់នៅនឹងស្បែកជើងស្ងួតល្អ។

2. ប្ដូរស្បែកជើង : នៅក្នុងរដូវភ្លៀង អ្នកគួរជ្រើសរើសប្រភេទស្បែកជើងណាដែលអាចឱ្យខ្យល់ចេញចូលបានល្អ ប្រសិនបើអ្នកជាអ្នកធ្វើការ សូមជ្រើសរើសយកប្រភេទស្រោមជើងណាដែលផលិតចេញពីក្រណាត់យឺតធ្វើអំពីកប្បាស ទើបមិនរឹបជិត។

3. សម្លាប់បាក់តេរី : ចូរប្រើប្រាស់សាប៊ូប្រភេទកម្ចាត់មេរោគ និងជូតជើងឱ្យស្ងួត ជាពិសេសនៅចន្លោះម្រាមជើងម្យ៉ាងទៀត ត្រូវឧស្សាហ៍ត្រាំជើងក្នុងទឹកឱ្យបានយ៉ាងតិច30នាទី ព្រោះសារធាតុអាស៊ីតតានីកដែលមាននៅក្នុងទឹក អាចសម្លាប់មេរោគនៅនឹងជើងរបស់អ្នកបាន។ លាងសម្អាតក្រពេញញើសនៅបាតជើងរបស់អ្នក ដែលវាបានផលិតញើសដែលមានជាតិទឹក សូដ្យូម ក្លរ ជាតិខ្លាញ់ សារធាតុខនិច និងពពួកអាស៊ីតជាច្រើន។ ពេលមានបាក់តេរីមួយចំនួន វានឹងធ្វើឱ្យញើសទៅជាមានក្លិនអាក្រក់។ ការលាងសម្អាតជើងឱ្យអស់បាក់តេរីជាមួយសាប៊ូបំបាត់ក្លិន និងសម្ងួតវាឱ្យបានល្អ អាចកាត់បន្ថយក្លិនជើងរបស់អ្នកបានយ៉ាងល្អ។

4. ត្រាំទឹកអំបិល : សម្រាប់ជើងដែលមានបែកញើសច្រើន សូមលាយអំបិលកន្លះពែងក្នុងទឹក ហើយត្រាំជើងរបស់អ្នកក្នុងទឹកនោះ។ បន្ទាប់ពីត្រាំហើយ សូមកុំលាងជើងរបស់អ្នក គ្រាន់តែទុកឱ្យវាស្ងួតល្អគឺបានហើយ។

5. ព្យាយាមសម្ងួតស្បែកជើង : សូមឱ្យមានខ្យល់ចេញពីស្បែកជើងនៅពេលអ្នកឈប់ពាក់។ ប្រសិនបើអ្នកអាចធ្វើបាន ចូរដូរស្បែកជើងជារៀងរាល់ថ្ងៃ ហើយអ្នកមិនគួរពាក់ស្បែកជើងតែមួយគូដូចគ្នារយៈពេលពីរថ្ងៃនោះទេ។ ហើយត្រូវបន្ធូរខ្សែស្បែកជើងផង ពេលដែលអ្នកពាក់ស្បែកជើងប៉ាតា បន្ទាប់ពីពាក់រួច អ្នកត្រូវព្យួរស្បែកជើងរបស់អ្នកឱ្យត្រូវពន្លឺថ្ងៃ ដើម្បីសម្លាប់មេរោគ និងបំបាត់ក្លិនមិនល្អ៕

September 15, 2018

ពិនិត្យខ្លួនឯងទៅមើល៍… តើអ្នកគួរទទួលទានវីតាមីនបន្ថែម ឬទេ?

នៅពេលអាយុកើនច្រើនឡើង ការមើលថែទាំសុខភាពក៏ត្រូវតែកើនច្រើនឡើងទៅតាមនោះដែរ។ មនុស្សជាច្រើនអាចមានអារម្មណ៍ថា ខ្លួនមិនបានរឹងប៉ឹងស្វាហាប់ដូចកាលពីវ័យនៅរៀន ឬអំឡុងពេលវ័យជំទង់ឡើយ ព្រោះធ្វើការបានមួយរយៈមក ក៏ចាប់ផ្ដើមមានរោគាជំងឺដង្កាត់សួររកមុខបែបមិនធ្លាប់ដូច្នោះពីមុនមកឡើយ មិនថាតែឈឺក្បាលម៉ៃក្រេន ចុកស្មា ឈឺសន្លាក់កដៃ ជំងឺក្រពះ រហូតទៅដល់ជំងឺខ្លាញ់រុំថ្លើម ឬ Cysts ជាដើម។

ក្រៅពីជំងឺដង្កាត់ហើយ បញ្ហាដែលមកព្រមជាមួយវ័យដែលមានដូចជា ជ្រុះសក់ កើតស្លាកស្នាម សាច់ស្បែកលែងស្រស់ថ្លា ភ្នែកស្រវាំងស្រអាប់ ឬមានភាពធុញថប់តានតឹងប្រមូលសន្សំច្រើនឡើងរហូតដល់គេងមិនលក់ក៏ចាប់ផ្ដើមកើតឡើងដែរ ដូច្នេះមុននឹងទិញវីតាមីនបន្ថែមមកទទួលទាន យើងនាំគ្នាមកមើលសិនថា តើយើងមានបញ្ហាទាំងអស់នេះឬទេ? បើមាន តើត្រូវទទួលទានវីតាមីនមួយណា?

សាច់ស្បែកស្ងួតក្រៀម មានស្លាកស្នាម មិនតឹងណែនរលោង
វីតាមីនបន្ថែមដែលណែនាំ : វីតាមីន C ខូឡាជេន វីតាមីន A អូមេហ្កា3 និងសារធាតុដែក។

ជ្រុះសក់ ក្រចកដៃ-ជើងស្ដើងស្រួយ
វីតាមីនបន្ថែមដែលណែនាំ : វីតាមីន B2 និងជាតិស័ង្កសី។

មិនស្រួលខ្លួន គ្រុនផ្ដាសាយញឹកញាប់
វីតាមីនបន្ថែមដែលណែនាំ : វីតាមីន C វីតាមីន B និងសារធាតុដែក។

សម្រាកមិនបានគ្រប់គ្រាន់ ប្រើខួរក្បាលច្រើន
វីតាមីនបន្ថែមដែលណែនាំ : វីតាមីន B និងអូមេហ្កា3។

ឆ្អឹង និងសន្លាក់នៅក្នុងរាងកាយចាប់ផ្ដើមចុករួយ
វីតាមីនបន្ថែមដែលណែនាំ : វីតាមីន D, A, K, កាល់ស្យូម និងផូស្វ័រ។

រួយភ្នែក និងស្រវាំងមើលលែងសូវច្បាស់
វីតាមីនបន្ថែមដែលណែនាំ : វីតាមីន A និង វីតាមីន B2។

ភាពធុញថប់ តានតឹងក្នុងអារម្មណ៍កើតឡើងច្រើន
វីតាមីនបន្ថែមដែលណែនាំ : វីតាមីន B រួម វីតាមីន C និងម៉ាញេស្យូម។

តើចាំបាច់ត្រូវទទួលទានវីតាមីនបន្ថែមឬទេ?
ជាសំណួរដ៏ល្បីល្បាញមួយដែលមនុស្ស ជាច្រើនលួចគិតនៅក្នុងចិត្ត… វីតាមីនមួយប្រអប់ តម្លៃមិនមែនធម្មតាៗទេ តើយើងចាំបាច់ត្រូវតែទទួលទានវីតាមីនបន្ថែមមែន ឬយ៉ាងណា? ចម្លើយក៏គឺ មិនចាំបាច់ទេ វីតាមីនបន្ថែមគ្រាន់តែជាជំនួយការសម្រាប់អ្នកដែលដឹងច្បាស់ថា ខ្លួនឯងមានភាពប្រថុយប្រថានក្នុងការបានទទួលសារធាតុអាហារមិនគ្រប់គ្រាន់ ឬមិនសូវមានពេលមើលថែទាំខ្លួនឯងច្រើន អាចហៅបានថា ជាជំនួយការរបស់អ្នកទីក្រុងដែលត្រូវធ្វើការធ្ងន់ រហូតមិនអាចរៀបចំចំណីអាហារ និងបែងចែកពេលវេលាសម្រាប់ហាត់ប្រាណតាមតម្រូវការបាន។

តែនឹងក្លាយជារឿងល្អខ្លាំងណាស់ បើយើងអាចទទួលបានវីតាមីនទាំងអស់តាមរយៈអាហារដែលចម្អិនស្រស់ៗថ្មីៗ និងមានគុណប្រយោជន៍ខាងសារធាតុអាហារ គ្រប់ទាំង5ប្រភេទក្រុម ហាត់ប្រាណយ៉ាងជាប់លាប់ សម្រាកឱ្យគ្រប់គ្រាន់ និងរកពេលវេលាបន្ធូរអារម្មណ៍តានតឹងធុញថប់ដោយកិច្ចការងារដែលខ្លួនឯងចូលចិត្ត តែប៉ុណ្ណឹងលោកអ្នកមិនចាំាបាច់ចំណាយប្រាក់ជាមួយវីតាមីនតម្លៃច្រើនពាន់ច្រើនម៉ឺនបានបាត់ទៅហើយ។

តែបើមានអាការធ្ងន់ធ្ងរដល់ថ្នាក់ត្រូវទៅជួបគ្រូពេទ្យវិញនោះ វីតាមីនបន្ថែមក៏អាចជាជម្រើសមួយទៀតក្នុងការជួយជីវិតលោកអ្នកបានដូចគ្នា ដូច្នេះត្រូវពិនិត្យមើលខ្លួនឯងថា តើមានភាពចាំបាច់ក្នុងការទទួលទានវីតាមីនបន្ថែមច្រើនតិចប៉ុនណា។

ចំណុចមិនល្អរបស់ការទទួលទានវីតាមីនបន្ថែម
បើយើងទទួលទានវីតាមីនបន្ថែមជាប់ៗគ្នាក្នុងរយៈពេលយូរជ្រុលពេក អាចធ្វើឱ្យរាងកាយបានទទួលវីតាមីនមួយនោះច្រើនលើសតម្រូវការថ្លើម និងក្រលៀនត្រូវធ្វើការខ្លាំង ដើម្បីចម្រាញ់សារធាតុអាហារដែលត្រូវប្រើ និងត្រូវចោល ហើយការបានទទួលវីតាមីនបន្ថែមច្រើនជ្រុលពេក នៅអាចធ្វើឱ្យកើតជំងឺច្រើនឡើងបានដូចគ្នា ដូចជា បើសិនជាទទួលទានកាល់ស្យូមច្រើនជ្រុលពេក អាចប្រថុយនឹងការកើតក្រួសក្នុងក្រលៀន ឬឈាមហូរមិនឈប់ ឬពិបាកនឹងបញ្ឈប់(ពេលមានរបួស) បើសិនជាទទួល-ទានខ្លាញ់ត្រីច្រើនជ្រុលពេកជាដើម។

ដូច្នេះ មុននឹងទទួលទានអាហារបន្ថែម គួរសិក្សាពីវិធី និងបរិមាណដែលគួរទទួលទាន ព្រមទាំងចងចាំចំណុចគួរប្រយ័ត្នផង ដើម្បីឱ្យបានទទួលមកតែគុណប្រយោជន៍របស់វីតាមីនបន្ថែមដូចដែលចិត្តយើងត្រូវការ៕

September 15, 2018

ព្រមាន…! ក្នុងមួយរាត្រី បុរសមិនត្រូវរួមសិចលើស2ដងនោះទេ

សម្រាប់អ្នកដែលធ្លាប់ឆ្លងកាត់ជីវិតជាដៃគូ នៅពេលនិយាយពីរឿងសិចគេជឿថា នឹងមានមនុស្សជាច្រើននឹកភ្នកចង់អនុវត្តភា្លមៗតែម្ដង ជាពិសេសនៅពេលដែលខ្លួនបាននៅជិតមនុស្សដែលខ្លួនពេញចិត្ត និងស្រឡាញ់ ខណៈដែលគេក៏ធ្លាប់បានដឹងខ្លះៗមកថា ការអនុវត្តសិច ក៏មានផលវិជ្ជមានចំពោះសម្រស់ និងសុខភាពផងដែរនោះ។ យ៉ាងណាក៏ដោយ អ្នកជំនាញបានបង្ហាញពីក្ដីព្រួយបារម្ភ និងធ្វើការព្រមានយ៉ាងដូច្នេះ ថ្វីដ្បិតតែសិចអាចផ្តល់ផលល្អចំពោះសុខភាពពិតមែន ប៉ុន្តែលោកអ្នកមិនគួរងប់ងុល ឬអនុវត្តឱ្យលើសពីចំនួន2ដងក្នុងមួយយប់នោះទេ បើមិនដូច្នោះទេ លោកអ្នកនឹងជួបបញ្ហាប្រឈមជាច្រើន ឬអាចដល់អាយុជីវិតក៏អាចថាបាន ជាពិសេសចំពោះបុរសតែម្ដង។ ផលប៉ះពាល់ទាំងនោះរួមមានដូចជា ៖

1. ប៉ះពាល់ក្រពេញប្រូស្តាត ៖ នៅពេលដែលអ្នកធ្វើការរួមភេទច្រើនដងក្នុងមួយយប់នោះវានឹងធ្វើប្រដាប់ភេទ(លិង្គ)របស់អ្នកបញ្ចញទឹកច្រើន ដែលបណ្តាលឱ្យមានការរំញោចកន្ត្រាក់នៃសាច់ដុំលិង្គ។ កត្តាទាំងនេះវាអាចធ្វើឱ្យមានការកកស្ទះលំហូរគ្រីស្តាល់ ដែលជាមូលហេតុបង្កឱ្យកើតជំងឺបុរសផ្សេងៗ ជាពិសេសគឺជំងឺក្រពេញប្រូស្តាតតែម្ដង។

2. ខ្សោយផ្លូវភេទ ៖ ដើម្បីបង្កើនសមត្ថភាពផ្លូវភេទ អាចធ្វើសកម្មភាពសិចបានច្រើនដងរៀងរាល់យប់ មានបុរសមួយចំនួនបានព្យាយាមប្រើថ្នាំជំនួយ ដើម្បីបង្កើនភាពរឹងមាំនៃលិង្គក៏ដូចជាបង្កើនអារម្មណ៍ផ្លូវភេទរបស់ពួកគេ។ ទោះជាយ៉ាងណា ប្រសិនបើអ្នកទម្លាប់ប្រើថ្នាំជំនួយទាំងនោះនៅគ្រប់ពេលដែលចង់រួមភេទវានឹងបណ្តាលឱ្យអ្នកក្លាយជាមនុស្សម្នាក់ដែលគ្មានសមត្ថភាពពិតប្រាកដ ហើយពឹងផ្អែកតែពពួកថ្នាំជំនួយទាំងស្រុង។ តាមការសិក្សា និងកត់ចំណាំរបស់អ្នកជំនាញបានបង្ហាញថា មានមនុស្សជាច្រើន បន្ទាប់ពីបានប្រើប្រាស់ថ្នាំជំនួយទាំងនេះរួច គឺមិនមានពេលណាមួយដែលអាចធ្វើឱ្យពួកគេអាចធ្វើជាម្ចាស់ការលើខ្លួនឯងបាននោះទេ ដូចទៅនឹងពាក្យគេដំណាលថា “កាលពីមុនអាច្រម៉ក់ចេះតែខឹង លុះពេលឥឡូវបែរជាខឹងអាច្រម៉ក់ទៅវិញ”។

3. ប៉ះពាល់ផ្លូវចិត្ត ៖ ការរួមសិចច្រើនដងក្នុងមួយយប់ កម្រិតដែលអាចឈានដល់ចំណុចកំពូលសម្រាប់លើកដំបូង គឺអាចស្របតាមចិត្តដែលលោកអ្នកចង់បាន ប៉ុន្តែចាប់ពីទឹកទី2 វាចាប់ផ្តើមថមថយកម្រិតសុខស្រួលតិចទៅៗរហូតប៉ះពាល់ដល់អារម្មណ៍ក៏មាន។ ដូច្នេះហើយទើបមានមនុស្សជាច្រើនតែងគិតថា ពួកគេផ្តើមកើតមានបញ្ហាអសមត្ថភាពផ្លូវភេទ ដែលនឹងក្លាយជាដើមចមនៃបញ្ហាផ្លូវចិត្តធ្ងន់ធ្ងរ។

4. រាងកាយទ្រុឌទ្រោម ៖ ចំពោះបុរសនៅពេលដែលរួមភេទ ការប្រើប្រាស់ជាតិកាឡូរីស្មើនឹងការធ្វើលំហាត់ប្រាណនៃការដើរចម្ងាយល្បឿនលឿនក្នុងរយៈពេលយូរ។ ដូច្នេះប្រសិនបើអ្នករក្សាបាននូវភាពទៀងទាត់នៃការរួមភេទច្រើនដងក្នុងមួយថ្ងៃ សួរថា តើវានឹងធ្វើឱ្យសុខភាពរបស់អ្នកមានភាពប្រសើរឡើង ដូចការហាត់ប្រាណ មែនទេ? ចម្លើយ គឺមិនមែនដូចគ្នាទេផ្ទុយទៅវិញ វាគឺជាការលំបាកណាស់ក្នុងការទូទាត់សងជាតិកាឡូរីដែលបាត់បង់ បើយើងធ្វើការសមាមាត្រជាមួយនឹងអាហារដែលបានទទួលទានប្រចាំថ្ងៃ។ ការហាត់ប្រាណ វាបានបញ្ចេញសារជាតិពុលចេញពីរាងកាយ ប៉ុន្តែសម្រាប់ការរួមសិច វាបានបញ្ចេញកម្រិតអ័រម៉ូនបុរសយ៉ាងច្រើន ដែលជាមូលហេតុបណ្ដាលឱ្យរាងកាយទ្រុឌទ្រោម និងចុះខ្សោយ។

ជូនជាគំនិត បើទោះជាលោកអ្នកមានសុខភាពល្អ រាងកាយមាំមួនយ៉ាងណា ការរួមភេទក៏ត្រូវតែមានកម្រិត ចៀសវាងអនុវត្តតាមចំណូលចិត្តនឹកចង់ បើមិនដូច្នេះ សមត្ថភាពផ្លូវភេទរបស់អ្នកនឹងស្លាប់មុនអាយុជាក់ជាមិនខាន៕

September 12, 2018

ស្រា និង បារី មួយណាហុចគុណវិបត្តិដល់មនុស្សខ្លាំងជាង?

ស្រា និង បារី មួយណាហុចគុណវិបត្តិដល់មនុស្សខ្លាំងជាង?
បើឱ្យអង្គុយប្រកែកគ្នាម្នាក់មួយចំណុច ប្រហែលជាប្រកែកមិនចប់ឡើយ ព្រោះវាជាប្រ-ធានបទដែលបើសិនយើងទៅសួរអ្នកដែលជក់បារី ប្រាកដណាស់ ញ៉ាំស្រាត្រូវតែយ៉ាប់យ៉ឺនខ្លាំងជាងមិនខាន ទាំងស្រវឹងអួទីនួ ញ៉ាំច្រើន ថ្លើមនឹងក្រិន ថែមទាំងអាចជួបគ្រោះថ្នាក់ចរា-ចរណ៍ទៀតផង។ ដល់ទៅសួរអ្នកដែលញ៉ាំស្រាប្រាកដណាស់ នឹងនិយាយថាអ្នកជក់បារីត្រូវតែយ៉ាប់យ៉ឺនជាង ព្រោះវានឹងបំផ្លាញទាំងខ្លួនឯង
ប្រថុយនឹងការកើតសភាវមហារីកសួត ហើយថែមទាំងសាងជាតិពុលខាងខ្យល់អាកាសដល់មនុស្សជុំវិញខ្លួនទៀតផង។ ប្រកែកគ្នាមិនចប់នោះទេ…។

គិតទៅគិតមក ជាតិអាល់កុល និងបារីនេះគឺជាសារធាតុញៀនដូចគ្នាទាំងពីរ តែញៀនម្នាក់មួយបែប និងញៀនម្នាក់មួយកម្រិត។ អ្នកខ្លះញ៉ាំស្រាតែនៅពេលជប់លៀងកម្សាន្តសប្បាយចូលរួមសង្គម តែអ្នកខ្លះញៀនរហូតដល់ថ្នាក់ត្រូវញ៉ាំរាល់ថ្ងៃ។ ឯអ្នកដែលញៀនបារីក៏ដូចគ្នាដែរ អ្នកខ្លះជក់តែពេលណាមានអារម្មណ៍តានតឹង ឬពេលចូលរួមសង្គម តែក៏មានអ្នកដែលត្រូវតែជក់រៀងរាល់ថ្ងៃ មួយថ្ងៃៗច្រើនដើម ព្រោះ
តែញៀនផងដែរ។

បើសួរពីគុណវិបត្តិរបស់ទាំងបារី និងស្រា (ជាតិអាល់កុល) ក៏ត្រូវប្រាប់ថា ទាំងពីរយ៉ាងនេះផ្ដល់គុណវិបត្តិបែប “សន្សឹមៗ ម្ដងបន្តិចៗ” សន្សំពិន្ទុម្ដងបន្តិចៗ រង់ចាំថ្ងៃផ្ទុះឡើងនៅក្នុងខ្លួនពេលវាប្រមូលសន្សំច្រើនដល់ចំណុចមួយ។ ដូច្នេះសូមតាមដានដូចតទៅ៖

មនុស្សយើងមិនបានស្រវឹងលេងៗទេ…
យើងតែងតែបានឮថា ញ៉ាំស្រាធ្វើឱ្យកើតរោគក្រិនថ្លើម តែវាមិនមែនអស់ត្រឹមប៉ុណ្ណឹងឯណា វានៅមានឱកាសកើតជំងឺពាក់ព័ន្ធនឹងប្រព័ន្ធប្រសាទ សរសៃឈាម និងបេះដូង មហារីក និងជំងឺជាច្រើនរាប់សិបមុខទៀតយ៉ាងសន្ធឹកសន្ធាប់ ដែលនឹងកើតឡើង រួមទាំងស្រានៅធ្វើឱ្យមនុស្សបាត់បង់សតិស្មារតីរហូតដល់អាចកើតបញ្ហា និងគ្រោះថ្នាក់ធ្វើឱ្យបាត់បង់ទាំងទ្រព្យសម្បត្តិ និងអាយុជីវិតទៀតផង។

ស្ថិតិក៏មានឱ្យយើងឃើញ (កើនឡើងរាល់ឆ្នាំ) ជាមួយគ្រោះថ្នាក់ចរាចរណ៍នៅលើផ្លូវថ្នល់ដែលបណ្ដាលមកពីការស្រវឹងហើយបើកបរ។ បើមានមនុស្សស្លាប់ដោយសារគ្រោះថ្នាក់ចរាចរណ៍ 100នាក់ នឹងបង្ហាញថា មានមូលហេតុមកពីការញ៉ាំស្រាស្រវឹង 50នាក់បាត់ទៅហើយ ហើយថែមទាំងការឈ្លោះទាស់ទែងរហូតដល់កាប់សម្លាប់គ្នា ដែលមានមូលហេតុមកពីការស្រវឹងស្រាទៀតផង។
ហើយបើអីុចឹង តើយើងគួរតែញ៉ាំស្រាបន្តទៀតឬយ៉ាងណា?

បារី ជក់ម្នាក់ឯង តែអូសអ្នកដទៃឱ្យស្លាប់ជាមួយដែរ…
ហាក់ដូចជាកម្មវិធីប្រូម៉ូស្សិនចែកថែមអ្វីម្យ៉ាងដែលយើងមិនចង់បាន។ ពេលជក់បារី ដូចដែលយើងតែងឃើញស្រាប់ហើយថា អ្វីដែលផ្លុំចេញមកតាំងពីចាប់ផ្ដើមអុច គឺជាផ្សែងពុលដែលហុយសាយភាយពេញអាកាស អាចបំផ្លាញមនុស្សជុំវិញនោះបាន។

ពេលយើងនឹកដល់គុណវិបត្តិរបស់បារីនោះ គឺមានតែថង់ខ្យល់នៅក្នុងសួតហើមប៉ោង និងមហារីកសួត តែមានឯណា! យើងមិនដឹងឡើយថា គុណវិបត្តិរបស់បារីនៅមានទៀតមួយគំនរ…។

ចាប់ផ្ដើមពីកម្រិតស្រាលៗ ដូចជា ពុកធ្មេញធ្មេញខ្មៅ ឆាប់ចាស់ រហូតទៅដល់ជំងឺពាក់ព័ន្ធនឹងបេះដូង និងសម្ពាធឈាមជាដើម។

វាជារឿងមួយដែលគួរឱ្យសោកសៅបំផុតដែលមនុស្សមិនជក់បារីផង តែត្រូវធុំក្លិនផ្សែងបារី ព្រោះតែនៅក្នុងគ្រួសារមានអ្នកជក់បារី ឬអ្នករួមដំណើរដែលជក់បារីតាមផ្លូវ ក៏ធ្វើឱ្យអ្នកដែលមិនជក់បារីមានឱកាសកើតជំងឺចង្រៃទាំងនោះមិនខុសពីអ្នកជក់បារីដែរ។

ទោះជាការជក់បារីមិនបានធ្វើឱ្យយើងស្រវឹងបាត់បង់សតិស្មារតី ឬបើកឡានទៅបុកនរណាមែន តែលទ្ធផលដែលនឹងកើតឡើងក្នុងអំឡុងពេលច្រើនឆ្នាំខាងមុខទៀតនោះ អាចបំផ្លាញ យើង និងមនុស្សជុំវិញខ្លួន ឱ្យរ៉ាំរ៉ៃរហូតវេទនាមិនចាញ់គ្នាប៉ុន្មានឡើយ។ ដូច្នេះ អានមកដល់ត្រឹមនេះហើយ សឹងតែមិនចាំបាច់គិតថា តើគួរឈប់មួយណាមុន?… គឺឈប់ដំណាលគ្នាទាំងអស់តែម្ដង! ព្រោះផលល្អដែលបានមកពីការជក់បារី និងញ៉ាំស្រាដែលនឹងធ្វើឱ្យយើងរីករាយសប្បាយ បាត់ភាពធុញថប់តានតឹងនោះ វាជាការដូរដោះគ្នាដែលមិនរួចខ្លួនទាល់តែសោះ សូម្បីតែបន្តិចពាក់ព័ន្ធនឹងអ្វីដែលនឹងកើតឡើងនៅពេលខាងមុខ មិនថាតែបញ្ហាសុខភាព ឬឧប្បត្តិហេតុក៏ដោយ។

ប្រាកដណាស់! គ្មានអ្វីងាយស្រួលនោះទេក្នុងការបញ្ឈប់ការញៀននឹងអ្វីម្យ៉ាងហើយនោះ…តែចុងក្រោយទៅ យើងត្រូវតែចាប់ផ្ដើម និងស៊ូទ្រាំ។ ស្វែងរកកម្លាំងជំរុញចិត្តអ្វីម្យ៉ាងដើម្បីបញ្ឈប់ការញៀនស្រា និងបារី ធ្វើឱ្យជីវិត និងសុខភាពរបស់ខ្លួនយើងល្អឡើង។ អ្នកខ្លះបានកម្លាំងជំរុញចិត្តពីការដែលខ្លួនឯងមានកូន ទើបធ្វើឱ្យតាំងចិត្តឈប់ជក់បារី ឈប់ញ៉ាំស្រា ដើម្បីកុំឱ្យប៉ះពាល់ដល់ក្រុមគ្រួសារ នេះគឺជាគំរូដ៏ល្អមួយ ដែលធ្វើឱ្យអាចចាប់ផ្ដើមធ្វើរឿងអ្វីមួយបានកាន់តែងាយឡើង៕

September 12, 2018

បញ្ឈប់ទម្លាប់ខាំក្រចកដៃភ្លាម បើមិនចង់ឱ្យកើតបញ្ហាទាំងនេះ

ចូរក្រឡេកមកមើលទម្លាប់អាក្រក់របស់អ្នកនិយមខាំក្រចកដៃ។ តើអ្នកដឹងទេថា ក្រចក ជាកន្លែងជ្រកនៃបាក់តេរីជាច្រើនប្រភេទដែលអ្នកមិនអាចមើលឃើញនឹងភ្នែកទទេបាន។ នៅពេលក្រចកដៃមិនស្អាត មិនមានអនាម័យ ងាយប្រឡាក់ប្រលូកជាមួយវត្ថុកខ្វក់ ឬងាយចាប់កាន់វត្ថុនានានោះខណៈដែលអ្នកខាំក្រចកដៃលេង អាចធ្វើឱ្យឆ្លងបាក់តេរីចូលទៅក្នុងមាត់ និងស្បែកបាន ប្រសិនបើមានការដាច់រលាត់ស្បែក។ ការខាំក្រចកដៃមានផលប៉ះពាល់អាក្រក់ចំពោះសុខភាពរបស់អ្នកយ៉ាងខ្លាំង។ ចូរមកមើលផលប៉ះពាល់ដែលកើតឡើងចំពោះសុខភាពដូចខាងក្រោមនេះ។

1. ផលប៉ះពាល់លើស្បែកក្រចក
ទម្លាប់ខាំក្រចកក៏អាចបង្កទៅជាដំបៅបានដែរ ប្រសិនបើអ្នកខាំវាជាញឹកញាប់ជាពិសេសគឺនៅពេលអ្នកខាំរហូតដល់ដាច់សាច់ជុំវិញក្រចក។ នៅពេលអ្នកខាំក្រចក ពពួកបាក់តេរី និងមេរោគតូចៗដទៃទៀត នឹងចូលទៅក្នុងសាច់ក្រចកខាងក្នុងតាមកន្លែងដែលដាច់រលាត់ពីការខាំ បណ្ដាលឱ្យហើម ឈឺចាប់ និងឈានទៅបង្កជាខ្ទុះផងក៏មាន។ នៅពេលស្ថានភាពធ្ងន់ធ្ងរ ទាល់តែវះកាត់បង្ហូរខ្ទុះនោះចេញ ទើបជាសះស្បើយឡើងវិញ។

2. ផលប៉ះពាល់ដល់មាត់
ជំងឺដុះឫសសាច់លើម្រាមដៃ ដែលខ្មែរយើងនិយមហៅថាដុះផ្លែសាច់ បង្កឡើងដោយវីរុសម្យ៉ាងឈ្មោះថា Papillomavirus (HPV) បណ្ដាលមកពីការខាំក្រចកជាប្រចាំ។ការខាំក្រចកដៃមិនត្រឹមតែបង្កជាជំងឺនៅលើម្រាមដៃប៉ុណ្ណោះទេ វាថែមទាំងអាចរីករាលដាលឆ្លងទៅមាត់ បង្កជាជំងឺពងបែកមាត់ថែមទៀតផង។ ជាទូទៅ អ្នកមានជំងឺពងបែកមាត់ តែងគិតថាបណ្ដាលមកពីក្ដៅក្នុង តែធាតុពិតវាបង្កមកពីមេរោគឆ្លងនេះឯង។

3. ផលប៉ះពាល់ដល់ធ្មេញ
ការខាំក្រចកមិនត្រឹមតែអាចបង្កជាជំងឺប៉ុណ្ណោះទេ ប៉ុន្តែវាថែមទាំងបង្កើតជាបញ្ហាដល់ធ្មេញរបស់អ្នកទៀតផង។ ពេលខាំក្រចកញឹកញាប់ ធ្មេញរបស់អ្នកនឹងរំកិលខុសទីតាំង ខូចរូបរាង ឬលែងស្មើជួរជាដើម។ ការខាំក្រចក ធ្វើឱ្យធ្មេញខាងលើ និងខាងក្រោមប៉ះគ្នាញឹកញាប់ និងកកិតគ្នា បណ្ដាលឱ្យសឹករិចរិលហើយចុះខ្សោយប្រសិនបើអ្នកនៅតែមានទម្លាប់ខាំក្រចកញឹកញាប់។

4. ការចម្លងបាក់តេរីបង្ករោគ
ក្រចកដៃ គឺជាកន្លែងដែលប៉ះពាល់ដោយផ្ទាល់ជាមួយមេរោគ និងជាជម្រករបស់មេរោគជាច្រើនប្រភេទ។ នៅពេលអ្នកខាំក្រចក មេរោគទាំងនោះនឹងឆ្លងចូលទៅក្នុងខ្លួនតាមរយៈមាត់ ដែលអាចបង្កជាជំងឺផ្សេងៗ។ ក្រចកមានភាពកខ្វក់ជាងម្រាមដៃដល់ទៅ2ដងឯណោះ ព្រោះវាមានគន្លិកគន្លាក់ច្រើន ដែលជាទីតាំងអាចមេរោគរស់នៅយ៉ាងសុខស្រួល និងពិបាកក្នុងការសម្អាត។

ក្រៅពីនេះ ការខាំក្រចកក៏អាចបង្កផលប៉ះពាល់មួយចំនួនទៀតដូចជា ធ្វើឱ្យអ្នកមានភាពសោកសៅ មានអារម្មណ៍ថាឯកាផ្ដាច់ខ្លួនពីអ្នកដទៃ និងបាត់អស់ភាពរីករាយក្នុងជីវិត។ លើសពីនេះ ការសិក្សាដែលចុះផ្សាយលើគេហទំព័រ Mercola បានបង្ហាញផងដែរថា ការខាំក្រចកថែមទាំងធ្វើឱ្យសុខភាពចុះខ្សោយទៀតផង។ ទាំងនេះគឺជាហេតុផលចម្បង ដែលអ្នកគួរបញ្ឈប់ទម្លាប់អាក្រក់នេះ ព្រោះវានឹងបង្កផលប៉ះពាល់នៅថ្ងៃណាមួយ ប្រសិនបើនៅតែបន្តធ្វើវា៕

September 7, 2018

គុណប្រយោជន៍នៃការជិះកង់ ដើម្បីសុខភាព

ប្រាកដណាស់ ការជិះកង់នឹងធ្វើឱ្យអ្នកមានសុខភាពល្អ រីករាយ និងមានសេរីភាព ហើយក៏មិនចាំបាច់ឱ្យអ្នកត្រូវចំណាយអ្វីច្រើននោះទេ។ អ្នកអាចរីករាយជាមួយមជ្ឈដ្ឋានខាងក្រៅ និងអាចកម្សាន្ដជាមួយនឹងជីវិតរបស់អ្នកបានយ៉ាងពេញទំហឹង។ ការជិះកងមិនត្រឹមតែជាការធ្វើលំហាត់ប្រាណនោះទេ វាថែមទាំងអាចជួយឱ្យអ្នកធ្វើដំណើរបានយ៉ាងសប្បាយ រក្សារូបរាងកាយឱ្យសមសួន និងជួយដល់បរិស្ថានបានទៀតផង។ ការធាក់កង់គឺជាវិធីដ៏ប្រសើរបំផុត ក្នុងការជួយឱ្យអ្នកមានសុខភាពល្អ ដោយមិនចាំបាច់ត្រូវចំណាយលុយអ្វីទាំងអស់ ក្រៅពីការកម្សាន្តសប្បាយ និងការស្រូបយកខ្យល់អាកាសបរិសុទ្ធ។

នៅថ្ងៃនេះ ទស្សនាវដ្ដី ឡារ៉ែន សូមជម្រាបជូនពីគុណសម្បត្តិទាំង5យ៉ាង ដែលអ្នកនឹងទទួលបានពីការជិះកង់៖

1. បញ្ចេញជាតិពុលក្នុងរាងកាយ
ជាការហាត់ប្រាណបែប Aerobic Exercise ដែលល្អនោះគឺ ការទាញយកអុកស៊ីហ្សែនទៅដុតបំផ្លាញសារធាតុខ្លាញ់ ដើម្បីកសាងថាមពលក្នុងការបញ្ចេញកម្លាំងរបស់រាងកាយ។ បើនិយាយឱ្យស្រួលយល់គឺ ជាផ្នែកមួយនៅក្នុងជម្រើសហាត់ប្រាណងាយៗ ក្នុងការបញ្ចេញជាតិពុលក្នុងខ្លួន និងជួយសម្រកទម្ងន់បានយ៉ាងល្អ។

2. សម្រួលផ្លូវដង្ហើម
ជាផ្នែកមួយនៃការជួយជំរុញឈាមឱ្យហូរវិលបានយ៉ាងស្រួល ដែលវាបានជួយសម្រួលដល់បេះដូង និងផ្លូវដង្ហើមឱ្យប្រសើរឡើងខ្លាំង។ ឈាមអាចនាំយកអុកស៊ីហ្សែ៊នបញ្ចូនទៅផ្នែកផ្សេងៗនៃរាងកាយបានយ៉ាងច្រើន។ ការហាត់-ប្រាណដោយជិះកង់ ជួយជំរុញដោយការរំលាយអាហារ និងបញ្ចូនកាកសំណល់អាហារមិនល្អចេញពីរាងកាយតាមរយៈដំណើរការបញ្ចេញចោលយ៉ាងស្រួល។

3. កាត់បន្ថយអារម្មណ៍តានតឹង
តើអ្នកធ្លាប់បានធ្វើសកម្មភាពអ្វីខ្លះ នៅពេលដែលអ្នកកំពុងតែមានអារម្មណ៍ស្មុគស្មាញនោះ? តើអ្នកមានចេញទៅរត់ នៅក្នុងសួនច្បារដែរទេ? តើអ្នកមានបានសម្គាល់ទេថា តើអ្នកអាចរក្សានូវការអនុវត្តទម្លាប់នេះបានប៉ុន្មានដង?ការធាក់កង់គឺជា វិធីងាយៗ ដែលអាចឱ្យអ្នកមានភាពរីករាយនឹងបន្តធ្វើវា ហើយវាក៏ជាអ្នកជួយបន្ធូរនូវអារម្មណ៍តានតឹងរបស់អ្នកបានយ៉ាងល្អផងដែរ។ សុខភាពផ្លូវចិត្តល្អ គឺដើរតួនាទីយ៉ាងសំខាន់នៅក្នុងជីវិតប្រចាំថ្ងៃរបស់អ្នក។ ហើយអ្វីដែលជាការប្រសើរនោះគឺ អ្នកគួរកំណត់យកការជិះកង់ ជាផ្នែកមួយនៃទម្លាប់ជាប្រចាំថ្ងៃរបស់អ្នក។

4. ជួយឱ្យឆាប់គេងលក់ស្រួល
បន្ទាប់ពីធ្វើការងារហើយ ខួរក្បាលរបស់អ្នកត្រូវការសម្រាក ក៏ប៉ុន្ដែសម័យថ្មីនេះ មនុស្សជាច្រើននិយមប្រើប្រាស់ទូរស័ព្ទជាប់ខ្លួនជានិច្ចដោយមិនចាប់អារម្មណ៍ពីផលប៉ះពាល់ដល់សុខភាពនោះទេ។ បញ្ហានេះ ពេលខ្លះអាចធ្វើឱ្យអ្នកគេងមិនលក់ និងមិនងាយគេង ក៏ព្រោះតែខួរក្បាលនៅតែដំណើរការជាប់រហូត គឺរហូតគិតខុសថា ពេលយប់ទៅជាពេលថ្ងៃ ពេលថ្ងៃទៅជាពេលយប់។ នៅពេលធាក់កង់ គឺអ្នកកំពុងតែពង្រឹងសាច់ដុំទាំងអស់របស់អ្នក ប្រព័ន្ធគ្រោងឆ្អឹង ខួរឆ្អឹងខ្នង សន្លាក់ ប្រព័ន្ធឈាមរត់ និងប្រព័ន្ធភាពសាំរបស់អ្នក។ នៅពេលដែលប្រព័ន្ធឈាមរបស់អ្នករត់បានស្រួល និងមានការបញ្ចេញកម្លាំងច្រើនទៀតនោះ ពិតប្រាកដណាស់ វាធ្វើឱ្យអ្នកនឿយហត់បន្ដិចមែន តែវាក៏ហុចផលឱ្យអ្នកឆាប់គេងលក់ស្រួលបានផងដែរ។

5. ហុចផលល្អចំពោះបរិស្ថាន
យើងដឹងហើយថា ការប្រើយាន្តជំនិះផ្សេងៗទៀត ដូចជា ឡាន ម៉ូតូ រថភ្លើង និងគ្រឿងយន្តផ្សេងៗទៀតគឺ សុទ្ធតែបានបំពុលខ្យល់អាកាស។ ការបំពុលដោយគ្មានសំលេង និងបន្សល់នូវសារជាតិកាបូនជាច្រើនសន្ធឹកនៅក្នុងបរិយាកាសជុំវិញខ្លួនយើង វាបានបំផ្លាញសុខភាពយើងពីមួយថ្ងៃទៅមួយថ្ងៃ។ ការធាក់កង់ គឺមិនបានបន្សល់នូវកាកសំណល់កាបូនអ្វីនោះទេព្រោះកង់មិនចាំបាច់ត្រូវការប្រេងសាំង ហើយវាក៏មិនបានបញ្ចេញនូវឧស្ម័នពុលអ្វីនោះដែរ។ ការកាត់បន្ថយនូវការប្រើគ្រឿងយន្តដែលមានផ្សែង ហើយងាកមកប្រើកង់ជំនួសវិញ គឺអាចជួយកាត់បន្ថយនូវកម្រិតជាតិពុល ដែលនឹងអាចផ្តល់ឱ្យយើងរាល់គ្នានូវខ្យល់ដង្ហើមដ៏បរិសុទ្ធ។ កត្តានេះនឹងជម្រុញឱ្យមានអត្ថប្រយោជន៍ចំពោះមនុស្សជាតិ នៅក្នុងរយៈពេលយូរនាពេលអនាគត ព្រមទាំងមានប្រយោជន៍ដល់សុខភាពជាខ្លាំងថែមទៀតផង៕

August 8, 2018

Category: សុខភាព