សុខភាព - La Reine Media

គន្លឹះថែទាំសុខភាពឱ្យល្អ ដើម្បីអាចដើរលេងយ៉ាងរីករាយក្នុងរដូវក្ដៅ

នៅក្នុងឆ្នាំនេះ មេឃអាចនឹងក្តៅខ្លាំង អាចឡើងដល់លើស40អង្សារសេឯណោះ។ បើក្តៅម្ល៉ឹងៗ អាចធ្វើឱ្យអ្នកដែលនៅក្រោមកម្ដៅថ្ងៃពេលដើរលេង ឬទៅណាមកណាខ្យល់គ និងអាចគ្រោះថ្នាក់ដល់ជីវិតបាន។ អ្នកខ្លះប្រហែលកំពុងត្រៀមរៀបចំកាបូបធ្វើដំណើរទៅដើរលេងកម្សាន្ដនៅតាមទីរួមខេត្តផ្សេងៗហើយមែនទេ? តែមុននឹងទៅ ឡារ៉ែន ចង់ឱ្យមិត្តអ្នកអានត្រៀមខ្លួនមើលថែទាំសុខភាពខ្លួនឯងបន្តិចសិន ដើម្បីឱ្យដំណើរកម្សាន្តរបស់អ្នកប្រព្រឹត្តទៅយ៉ាងរីករាយ មិនឈឺថ្កាត់ក្នុងពេលធ្វើដំណើរ ឬក៏វេចរោគគ្រុនផ្តាសាយត្រឡប់មកវិញហ្នឹងឯង។ ខាងក្រោមនេះ គឺជាពាក្យណែនាំរបស់លោកគ្រូពេទ្យជំនាញ ដែលបានផ្តល់ដំបូន្មានដ៏គួរឱ្យចាប់អារម្មណ៍ដូចខាងក្រោមនេះ។

1- ព្យាយាមនៅក្នុងកន្លែងម្លប់ឱ្យបានច្រើន
កំពុងស្ថិតនៅក្នុងខែក្ដៅខ្លាំងបែបនេះ ហើយនៅតាមកន្លែងដើរលេងកម្សាន្ដគឺមិនមានម៉ាស៊ីនត្រជាក់នោះទេ មានតែខ្យល់កាសត្រជាក់បក់មកតាមបែបធម្មជាតិ។ បើក្ដៅខ្លាំង អ្នកត្រូវជ្រកនៅក្នុងម្លប់ឱ្យបានច្រើន អាចជួយការពារអ្នកពីជំងឺផ្សេងៗដែលកើតឡើងនៅខែក្តៅ។

2- ប្រើរបស់ត្រជាក់ៗ
មានផលិតផលត្រជាក់ៗមួយចំនួន ដែលអ្នកអាចរកបាននៅតាមទីផ្សារ ដូចជា កន្សែងត្រជាក់ ម៉ាសបិទមុខ និងកន្សែងរុំកជាដើម គឺសុទ្ធតែអាចជួយទប់ទល់នឹងកម្ដៅថ្ងៃបានទាំងអស់។

3- ទទួលទានភេសជ្ជៈត្រជាក់ៗ
ចូលដល់ខែក្តៅ បានទទួលទានភេសជ្ជៈត្រជាក់ៗជារឿងសប្បាយចិត្តបំផុត។ ហើយការដែលបានទទួលទានភេសជ្ជៈត្រជាក់ៗ អាចជួយឱ្យអ្នកអាចទប់ទល់ជាមួយនឹងកម្ដៅថ្ងៃជាបណ្ដោះអាសន្នបាន។

4- ហែលទឹក
ទៅដើរលេងនៅកន្លែងដែលមានទឹកអាចហែលលេងបាន គឺជាវិធីដ៏ល្អបំផុតសម្រាប់អនុវត្តនៅខែក្ដៅ តែដើម្បីការពារសុខភាពរបស់អ្នក អ្នកមិនគួរហែលទឹកនៅក្រោមកម្ដៅថ្ងៃខ្លាំងនោះទេ។

5- ប្រើកង្ហា
កង្ហាអ្នកអាចយកវាតាមខ្លួនបាន វាអាចផ្ដល់នូវភាពត្រជាក់ដល់អ្នកបានលឿន នៅពេលដែលអ្នកមានអារម្មណ៍ថាក្ដៅស្អុះស្អាប់។ ហើយយកល្អអ្នកអាចយកកង្ហាសាកថ្មតាមខ្លួនក៏បាន ព្រោះវាមានភាពងាយស្រួល និងមានរូបរាងតូចស្រួលដាក់តាមខ្លួន នៅក្នុងដំណើរកម្សាន្ត។

6- ជ្រើសរើសស្លៀកសម្លៀកបំពាក់ស្រាលៗ រលុងៗ
សម្រាប់ខែក្ដៅអុីចឹង ពេលចេញទៅខាងក្រៅអ្នកគួរស្លៀកពាក់បែបរលុងៗ និងជ្រើសរើសយកសម្លៀកបំពាក់ណាដែលមានសាច់ក្រណាត់ស្រាលៗ ស្តើងៗបានហើយ អាចជួយឱ្យខ្យល់ចេញចូលបានល្អ ងាយស្រួលដកដង្ហើម។ សម្លៀកបំពាក់ដែលស័ក្តិសមសម្រាប់រដូវក្តៅ គឺធ្វើឡើងពីកប្បាស សាច់កំណាត់ និងសូត្រជាដើម។ក្នុងករណីមានសំណួរ ឬមន្ទិលសង្ស័យជុំវិញរឿងសុខភាពរបស់អ្នក ជម្រើសដ៏ល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ មុនពេលសម្រេចចិត្តចេញទៅដើរលេងកម្សាន្ដនៅទីឆ្ងាយ៕

June 11, 2019

ទទួលទានប្រេងដូងល្អចំពោះសុខភាពដែរឬទេ?

ប្រិយមិត្តអ្នកអានប្រហែលជាបានជ្រាបខ្លះហើយថា ការទទួលទានប្រេងដូងផ្ដល់នូវសុខភាពល្អ ប៉ុន្តែប្រេងដូងជាទូទៅមិនត្រូវបានណែនាំសម្រាប់អ្នកមានបញ្ហាសុខភាពបេះដូងនោះទេ។ សារធាតុដែលធ្វើឱ្យប៉ះពាល់ដល់សុខភាពនោះ គឺជាតិខ្លាញ់ឆ្អែត។ ប្រេងដូង 82% គឺមានជាតិខ្លាញ់ឆ្អែត 1 ស្លាបព្រា មានខ្លាញ់ឆ្អែត 12ក្រាម (14 ក្រាមជាតិខ្លាញ់សរុប)។ នៅពេលកូឡេស្តេរ៉ូលខ្ពស់ អាចធ្វើឱ្យអ្នកប្រឈមនឹងជំងឺបេះដូង។ ដើម្បីកាត់បន្ថយកូឡេស្តេរ៉ូលដ៏អាក្រក់នេះ អ្នកគួរតែកំណត់កម្រិតនៃការទទួលទានជាតិខ្លាញ់ឆ្អែតក្នុងប្រមាណតិចជាង 6% នៃកាឡូរី ក្នុងរបបអាហារប្រចាំថ្ងៃរបស់អ្នក ឬអាចប្រមាណជា12ក្រាមនៃជាតិខ្លាញ់ឆ្អែតក្នុងមួយថ្ងៃ (របបអាហារ 1800កាឡូរី)។

ប្រេងដូងតាំងពីដើមមក ត្រូវបានស្ត្រីជាច្រើននិយមចូលចិត្តប្រើ ទាំងក្នុងការថែទាំសម្ផស្ស និងចម្អិនម្ហូបអាហារ ប៉ុន្តែការស្រាវជ្រាវថ្មីៗនេះ បែរជាបង្ហាញថា ប្រភេទប្រេងនេះមិនល្អចំពោះសុខភាពនោះទេ។ អ្នកស្រាវជ្រាវរបស់អាមេរិកថ្មីៗនេះ បានឱ្យដឹងអំពីគ្រោះថ្នាក់របស់ប្រេងដូងចំពោះសុខភាពជាច្រើន។ ជាតិខ្លាញ់ក្នុងអាហារ និងជំងឺបេះដូងបានវាស់អត្រាជាតិខ្លាញ់ឆ្អែតក្នុងពពួកប្រេង។ តាមរយៈការស្រាវជ្រាវបង្ហាញថា ប្រេងដូងធ្វើឱ្យកើនអត្រា កូឡេស្តេរ៉ូលក្នុងឈាម ។ ជាក់ស្តែង ជាតិខ្លាញ់ឆ្អែតមាននៅក្នុងប្រេងដូង 82% គឺខ្ពស់ជាង បើប្រៀបធៀបនឹងផ្លែប៊័រ ដែលមានខ្លាញ់ឆ្អែត 63% សាច់គោមានខ្លាញ់ឆ្អែត 50% និងខ្លាញ់ជ្រូកមានជាតិខ្លាញ់ឆ្អែត 39%។

ប្រេងដែលល្អបំផុតសម្រាប់សុខភាពបេះដូងរបស់អ្នក គឺប្រភេទប្រេង Monounsaturated និងប្រេង polyunsaturated អ្នកអាចប្រើប្រេងអូលីវសុទ្ធបន្ថែម (EVOO)ក៏បាន។ ការសិក្សាមួយចំនួនលើរបបអាហារបានបង្ហាញពីអត្ថប្រយោជន៍របស់ប្រេងទាំងពីរនេះចំពោះសុខភាពបេះដូង។ដើម្បីបង្កើនតម្លៃអាហារូបត្ថម្ភ និងអត្ថប្រយោជន៍នៃវីតាមីនចូរចៀសវាងការចម្អិនប្រេងនៅក្នុងសីតុណ្ហភាពខ្ពស់ លើសពី 375 អង្សាសេ។ ប្រេងចម្រាញ់មានជាច្រើនទៀតដូចជា ប្រេងសណ្តែកដី និងប្រេងផ្កាឈូករ័ត្ន ក៏អាចប្រើបានដែរ ប្រសិនបើអ្នកត្រូវការចម្អិនក្នុងកម្ដៅខ្ពស់។ ការអនុវត្តតាមគន្លឹះទាំងប៉ន្មានខាងលើនេះនឹងជួយអ្នកឱ្យទទួលបាននូវសារៈប្រយោជន៍ពីប្រភេទប្រេង ដើម្បីផ្ដល់ឱ្យបេះដូងរបស់អ្នកមានសុខភាពល្អ៕

June 11, 2019

ហេតុអីបានជាយើងចាក់ក្រឡេកខ្លួនឯងមិនរសើប?

ធ្លាប់នឹកឆ្ងល់ដែរ ឬទេថា ហេតុអីបានពេលយើងប៉ះខ្លួនឯង មានអារម្មណ៍មិនដូចអ្នកផ្សេងគេប៉ះយើង? នេះជាមូលហេតុមួយដែលធ្វើឱ្យយើងមានអារម្មណ៍សប្បាយស្រួលខ្លួននៅពេលមានអ្នកមកធ្វើម៉ាស្សាច្របាច់ឱ្យយើង និងជាមូលហេតុដែលធ្វើឱ្យយើងមិនអាចរសើបដោយខ្លួនឯងបាន។

Rebecca Bohme អ្នកប្រព័ន្ធប្រសាទវិទ្យានៃមហាវិទ្យាល័យ Linkoping ក្នុងប្រទេសស៊ុយអែដ បានបញ្ជាក់ថា “នៅពេលយើងប៉ះពាល់ខ្លួនឯង អវយវៈជាច្រើនផ្នែករបស់រាងកាយយើងនឹងបន្ថយកិច្ចការងារផ្សេងៗដែលកំពុងធ្វើ”។
ខណៈពេលជាមួយគ្នា ការប៉ះពាល់ពីអ្នកដទៃជាការធ្វើឱ្យខួរក្បាលរបស់យើងជំរុញប្រព័ន្ធប្រសាទប៉ះពាល់របស់យើងខ្លាំងជាង។
ការប៉ះពាល់ពីអ្នកដទៃ ប្រៀបដូចជាការទំនាក់ទំនងគ្នារវាងយើងជាមួយអ្នកម្ខាងទៀត មិនថាការទាមទារចំណាប់អារម្មណ៍ ផ្ដល់ការគាំទ្រ ឬជាការបង្ហាញសេចក្ដីស្រឡាញ់នោះទេ ការប៉ះពាល់នីមួយៗសុទ្ធតែមានភាពពិសេស ដែលប្រព័ន្ធប្រសាទប៉ះពាល់របស់យើងអាចញែកបានយ៉ាងលម្អិត ដូច្នេះហើយទើបខួរក្បាលរបស់យើងអាចកាត់បន្ថយការផ្ដល់ភាពសំខាន់ជាមួយការប៉ះពាល់ពីយើងខ្លួនឯងបាននោះ។
“ទោះបីជាមានការប៉ះពាល់ពីអ្នកដទៃនៅក្នុងចំណុចតែមួយ ក្នុងលក្ខណៈដូចគ្នា តែខួរក្បាលអាចញែកដាច់បានយ៉ាងលម្អិតថា ការប៉ះពាល់នីមួយៗខុសប្លែកពីគ្នា ឬការប៉ះពាល់ណាសំខាន់ជាង ដោយខួរក្បាលនឹងផ្ដល់ភាពសំខាន់ជាមួយការប៉ះពាល់ពីអ្នកដទៃខ្លាំងជាងការប៉ះពាល់ពីខ្លួនឯង”។
ខួរក្បាល និងការចាក់ក្រឡេកខ្លួនឯង
ខណៈពេលជាមួយគ្នា នៅពេលខួរក្បាលជាអ្នកបញ្ជាថា ការប៉ះពាល់ណាដែលសំខាន់តិច សំខាន់ខ្លាំងនោះ តើពេលខួរក្បាលមិនប្រក្រតី ដូចជាអ្នកកើតជំងឺវិកលចរិត(ឆ្កួត) តើគេអាចចាក់ក្រឡេកខ្លួនឯងឱ្យរសើបបានសម្រេចឬទេ? តាមរយៈរបាយការណ៍សិក្សាស្រាវជ្រាវជាច្រើនបានរកឃើញថា អ្នកជំងឺដែលមានបញ្ហាខាងការធ្វើការងាររបស់ខួរក្បាល(ឆ្កួត ឬឡប់ស្មារតី) អាចចាក់ក្រឡេកខ្លួនឯងឱ្យរសើបបាន ព្រោះខួរក្បាលមិនអាចញែកភាពសំខាន់របស់ការប៉ះពាល់ម្ដងៗនោះបានឡើយ រួមទាំងរូបភាពស្រមើស្រមៃផ្សេងៗដែលអ្នកជំងឺវិកលចរិតបានឃើញ បានដឹង រហូតដល់មិនអាចញែកដាច់រវាងរឿងដែលនឹកឡើងដោយឯកឯង និងរឿងដែលកើតឡើងពិតបានទៀតផង។
ទោះជាយើងមិនអាចចាក់ក្រឡេកខ្លួនឯងឱ្យរសើបបានក៏ដោយ តែយើងអាចបានទទួលការប៉ះពាល់ពីអ្នកដទៃបាន និងមានអារម្មណ៍ពិសេសខ្លាំងជាងការប៉ះពាល់ខ្លួនឯងទៅទៀត មិនថាតែការចាប់ដៃ ឱប អង្អែលក្បាលឡើយ… ដូច្នេះ កុំភ្លេចផ្ដល់ការប៉ះពាល់ដ៏សែនពិសេសទាំងនេះទៅមនុស្សដែលអ្នកស្រឡាញ់ផងណា៎៕

June 5, 2019

ទទួលទានទឹកក្រូចស្រស់លើសបរិមាណ អាចនាំទុក្ខទោសដល់សុខភាព

ដូចដែលបានជ្រាបហើយថា ទឹកក្រូចច្របាច់ជាជម្រើសនៃភេសជ្ជៈដ៏ល្អបំផុតសម្រាប់ទទួលទានជាមួយអាហារពេលព្រឹក ព្រោះរាល់ប្រភេទនៃទឹកក្រូចច្របាច់1កែវ មានផ្ទុកនូវកាឡូរីជាង100កាឡូរី។ ដោយសារតែផ្លែឈើនេះមានប្រយោជន៍ដល់សុខភាព បច្ចុប្បន្នគេសង្កេតឃើញថា របរលក់ផ្លែក្រូចពោធិ៍សាត់ និងទឹកក្រូចច្របាច់ស្រស់ៗ ត្រូវបានលក់នៅតាមផ្លូវ ឬតាមទីសាធារណៈជាច្រើន។

ភាគច្រើននៃគុណសម្បត្តិរបស់ទឹកក្រូចច្របាច់ចំពោះសុខភាព គឺដោយសារតែវាមានផ្ទុកនូវកម្រិតដ៏ខ្ពស់នៃវីតាមីនC។ វីតាមីននេះ គឺល្អចំពោះការបង្កើតឡើងនូវជាតិកូឡាជែន ដែលជាប្រូតេអុីនម្យ៉ាងដែលរាងកាយយើងត្រូវការដើម្បីបង្កើតសរសៃចំណងឆ្អឹង សរសៃឈាម ស្បែក និងសរសៃពួរសាច់ដុំ។ វាក៏ជួយផងដែរ ក្នុងការបង្ការនូវការបំផ្លាញរបស់កោសិកាសេរី ដែលអាចធ្វើឱ្យយើងចាស់មុនអាយុ ប្រឈមនឹងជំងឺមហារីកជាក់លាក់មួយចំនួន និងការពារនូវជំងឺសរសៃឈាមបេះដូងបានផងដែរ។ ក៏ប៉ុន្ដែ ការទទួលទានទឹកភេសជ្ជៈនេះជារៀងរាល់ថ្ងៃ និងលើសបរិមាណដែលរាងកាយទទួលយកបាននោះ វាបានប្រែក្លាយទៅជានាំទុក្ខទោសដល់សុខភាពរបស់យើងទៅវិញទេ។
គេហទំព័រសុខភាពមួយបានផ្សាយថា ម្លាប់នៃការទទួលទានទឹកក្រូចច្របាច់ប្រចាំថ្ងៃ គឺបានបន្ថែមនូវថាមពលដល់រាងកាយ តែបើលោកអ្នកតែងតែមើលរំលង និងមិនបានជ្រាបថា ភេសជ្ជ:ប្រភេទនេះងាយប្រឈមនឹងរោគរលាកសន្លាក់និងគួរតែប្រុងប្រយ័ត្នក្នុងកម្រិតណានោះ អ្នកនឹងធ្លាក់ខ្លួនឈឺ មិនស្រួលខ្លួនដោយមិនដឹងពីមូលហេតុទៅវិញ។ លទ្ធផលពិសោធបានឱ្យដឹងថា អ្នកទទួលទានទឹកក្រូចច្របាច់1កែវក្នុង1ថ្ងៃ អាចមានអត្រាប្រឈមនឹងរោគរលាកសន្លាក់ដល់ទៅ41%ឯណោះ។
បើទោះបីជាទឹកក្រូចច្របាច់ គឺពិតជាជំនួយដល់កម្លាំង និងបំប៉នស្បែកក្តី ក៏ប៉ុន្តែវាក៏សម្បូរទៅដោយជាតិស្ករ ដែលចូលទៅសន្សំទុកនៅក្នុងរាងកាយរបស់អ្នក ហើយវានឹងបំលែងទៅជាអាស៊ីតយូរិក ទៅបំផ្លាញគ្រាប់ឈាម ដែលរត់ទៅចិញ្ចឹមសន្លាក់ឆ្អឹង នឹងជាចុងក្រោយ អាចបណ្តាលឱ្យហើមឬរលាកសន្លាក់ឆ្អឹងបានយ៉ាងងាយ។ ចំពោះទឹកក្រូចកំប៉ុង ឬដបវិញ ក៏បណ្តាលឱ្យឆាប់ប្រឈមនឹងរោគខាងលើនេះបំផុតផងដែរ ព្រោះនៅក្នុងភេសជ្ជៈប្រភេទនេះ មានជាតិស្ករកម្រិតខ្ពស់ និងមានអាស៊ីតកាត់ក្រពះទៀតផង។ គួរបញ្ជាក់ផងដែរថា អ្នកទទួលទានទឹកក្រូចច្របាច់ជារៀងរាល់ថ្ងៃ អត្រាប្រឈមនឹងរោគរលាកសន្លាក់មានរហូតដល់ទៅ70%ឯណោះ៕

June 5, 2019

អាការប្រតិកម្មចាញ់ញើស និងវិធីការពារហានិភ័យនៃជំងឺស្បែក

អាការប្រតិកម្មចាញ់ញើស គឺជាអាការជំងឺនៃរោគសើស្បែក ដែលបានបង្ហាញរោគសញ្ញាចេញមកឱ្យឃើញនៅក្នុងសភាពដូចជា ឡើងកន្ទួល ពងបែក រមាស់ និងមានផ្ទាំងកន្ទួលក្រហមដូចនៅលើរាងកាយ។ វាកើតឡើងបានដោយសារបញ្ហានៃការហាត់ប្រាណ ការធ្វើការក្រោមកម្ដៅថ្ងៃខ្លាំង ដែលបង្កឱ្យកើតមានបញ្ហានៅលើស្បែកនៅពេលដែលរាងកាយរបស់អ្នកបែកញើសខ្លាំង។

បើតាមគ្រូពេទ្យជំនាញបានឱ្យដឹងថា អាការប្រតិកម្មចាញ់ញើស គឺជាអាការរោគសើស្បែកមួយប្រភេទ ដែលអាចកើតចេញពីបញ្ហាតំណពូជ និងពាក់ព័ន្ធជាមួយប្រព័ន្ធភាពស៊ាំនៃរាងកាយ ដែលហុចផលឱ្យរាងកាយមានសភាពខុសប្រក្រតី ដូចជា ក្ដៅខ្លួនខណៈពេលដែលញើសបញ្ចេញមកច្រើន ធ្វើឱ្យក្រពេញញើសងាយបញ្ចេញញើសមកក្រៅ ធ្វើឱ្យបរិវេណរន្ធញើសបញ្ចេញញើសច្រើន និងកើតអាការរមាស់ ពងបែក និងឡើងកន្ទួល ឬមានកន្ទួលជាបន្ទះពណ៌ក្រហមជាដើម។ អ្នកជំងឺដែលកើតអាការរោគប្រភេទនេះ អាចនឹងមានរោគសញ្ញាគួរឱ្យកត់សម្គាល់មួយចំនួន ដែលកើតឡើងនៅក្នុងជីវភាពប្រចាំថ្ងៃ ឬឆ្លងពីសមាជិកក្នុងគ្រួសារដែលមានរោគសញ្ញាពីជំងឺដូចជា គ្រុនផ្ដាសាយធំ គ្រុនប្រតិកម្មទឹកភ្លៀង ឬលំអងទឹកភ្លៀង ជំងឺហឺត រហូតធ្វើឱ្យអ្នកជំងឺកើតមានបញ្ហាផ្នែកបន្ទោបង់ មានប្រតិកម្មស្បែកនៅពេលហាត់ប្រាណ និងធ្វើការក្រោមកម្ដៅថ្ងៃខ្លាំង។
គ្រូពេទ្យជំនាញបានប្រាប់បន្ដទៀតថា អាការប្រតិកម្មចាញ់ញើស ក៏មានរោគសញ្ញាដែលអាចកត់សម្គាល់បានយ៉ាងងាយបំផុតមួយទៀតគឺ ស្បែកឡើងកន្ទួលរមាស់ពេញរាងកាយ។
ចំពោះកុមារអាយុពី2ខែ ទៅ2ឆ្នាំ តែងកើតមានកន្ទួលរមាស់លើស្បែកផ្នែកបរិវេណថ្ពាល់ ស្បែកមុខ ដែលជាបរិវេណស្បែកមានសភាពខ្ចី ហើយធ្វើឱ្យស្បែកកុមារឡើងក្រហមតែម្ដង។ កុមារ ឬទារកខ្លះ មានស្នាមពងគ្រាប់ពណ៌សជាខ្សែៗ ដាមនៅលើស្បែកត្រង់បរិវេណក្បែរប្រអប់មាត់ ដែលភាគច្រើនហៅថា “ចាញ់ទឹកដោះ ឬស្រែងទឹកដោះ”។ចៀសវាងការព្យាបាលដោយខ្លួនឯង ឬប្រើវិធីសាស្ត្រតាមទំនៀមទំលាប់នៅផ្ទះ ព្រោះអាចកាន់តែហុចផលអាក្រក់ដល់ក្មេងថែមទៀត។ គប្បីនាំកុមារទៅមន្ទីរពេទ្យ ដើម្បីធ្វើការព្យាបាលឱ្យបានត្រឹមត្រូវ។
ចំពោះកុមារអាយុ 4ឆ្នាំ ទៅ10ឆ្នាំ តែងកើតមានស្នាមរលាកនៅតាមបរិវេណគន្លាក់ដៃជើងនិងកែងដៃ ព្រមទាំងជង្គង់ ដែលខ្លះមានសភាពជាលក្ខណៈរោលរមាស់ ខ្លះឡើងបន្ទះកន្ទួលៗ និងមានពងបែក។ អាការបែបនេះ បានធ្វើឱ្យស្បែកកុមាររមាស់ខ្លះ ហើយកាលណាកាន់តែកេះ ឬអេះវា នោះវាកាន់តែធ្វើឱ្យស្បែករោលរលាកកាន់តែខ្លាំងឡើង។ អ្នកគួរតែនាំកូនទៅពិគ្រោះជាមួយគ្រូពេទ្យសើស្បែក ដើម្បីព្យាបាលឱ្យបានត្រឹមត្រូវ និងបានទាន់ពេលវេលា។ ចំពោះកុមារអាយុ12ឆ្នាំឡើងទៅ ភាគច្រើនគឺមានអាការស្បែកស្ងួត រលាក ហើយរមាស់ មានកន្ទួលនៅលើរន្ធរោម ឡើងគ្រាប់ៗពណ៌ខ្មៅលើរន្ធរោមដែលមិនរមាស់ តែក្រហាយស្បែក ហើយស្បែកភាយកម្ដៅតិចៗ។ អាការទាំងអស់នេះអាចព្យាបាលជាសះស្បើយ និងមិនឆ្លងទៅកាន់មនុស្សធំបានឡើយ តែអាចចម្លងទៅកាន់ទារក ឬក្មេងដូចគ្នាបាន។
បើទោះជាយ៉ាងណាក៏ដោយ យើងអាចការពារស្បែក និងកាត់បន្ថយភាពគ្រោះថ្នាក់នៃជំងឺនេះបាន ដោយអនុវត្តតាមវិធីសាស្ដ្រមួយចំនួនដូចខាងក្រោមនេះ៖
1. ចៀសវាងពីអាកាសធាតុ ឬបរិយាកាសដែលមានសីតុណ្ហភាពក្ដៅ អ្នកអាចកាត់បន្ថយកម្តៅ និងការបែកញើសដោយងូតទឹក ឬនៅក្នុងបន្ទប់ ហើយបើកម៉ាស៊ីនត្រជាក់ឱ្យត្រជាក់ខ្លាំង។
2. មិនគួរគិតច្រើន ដែលបណ្ដាលឱ្យសម្រាកមិនគ្រប់គ្រាន់ ជាហេតុធ្វើឱ្យស្បែកងាយប្រតិកម្មខុសប្រក្រតី។
3. សម្អាតកន្លែងគេ និងសម្ភារប្រើប្រាស់ប្រចាំថ្ងៃ ដូចជា ភួយ ខ្នើយ កន្ទេល ពូក ម៉ុង ដោយការសម្លាប់មេរោគ។
4. ឧស្សាហ៍ងូតទឹកសម្អាតរាងកាយជាប្រចាំ ខណៈពេលដែលបែកញើសខ្លាំង ឬប្រើកន្សែងស្អាតជ្រលក់ទឹកជូតខ្លួនសម្អាតញើសចេញពីរាងកាយជាដើម។
5. លាបថ្នាំព្យាបាលអាការរមាស់ តាមវេជ្ជបញ្ជាឱ្យបានទៀងពេល ឬទៅព្យាបាលនៅមន្ទីរពេទ្យសើស្បែក។ ប្រសិនបើមានអាការរមាស់ខ្លាំងមិនត្រូវប្រើប្រាស់ថ្នាំដោយខ្លួនឯងនោះទេ ជាពិសេស នៅពេលសម្គាល់ឃើញថា ស្បែកមានប្រតិកម្មជាមួយថ្នាំ ត្រូវប្រញាប់សួរគ្រូពេទ្យ ដើម្បីប្ដូរថ្នាំជាបន្ទាន់៕

June 5, 2019

ទទួលទានស្ករសូកូឡា ដើម្បីសុខភាពបេះដូងរឹងមាំ

ក្រុមអ្នកវិទ្យាសាស្ដ្រជាច្រើនបានអះអាងថា ការទទួលទានស្ករសូកូឡាអាចជួយកាត់បន្ថយជំងឺបេះដូង និងជួយឱ្យប្រព័ន្ធខួរក្បាលដំណើរការបានល្អ។ បើយោងតាមទិន្នន័យសុខភាពនៅតំបន់ប្រទេសដែលមានអាកាសធាតុត្រជាក់ ទទួលបានពីការស្រាវជ្រាវទៅលើអ្នកជំងឺបេះដូងមួយក្រុមបង្ហាញថា ការទទួលទានស្ករសូកូឡាអាចជួយកាត់បន្ថយការប្រឈមមុខនឹងជំងឺបេះដូង និងបញ្ហាប្រព័ន្ធខួរក្បាលប្រហែលជា70%។ តាមមាត្រដ្ឋានស្ករសូកូឡា100 ក្រាមមានសារធាតុកាកាវ 70% – 85% ជួយធ្វើឱ្យសម្ពាធឈាមមានលក្ខណៈធម្មតា ប្រឆាំងនឹងការរលាក និងឈាមកកបាន។

យ៉ាងណាមិញលទ្ធផលពិសោធក៏បានបង្ហាញទៀតថា អ្នកដែលបានទទួលទានស្ករសូកូឡាមួយប្រអប់អាចកាត់បន្ថយការប្រឈមមុខនឹងជំងឺបេះដូងបាន37% និងបញ្ហាប្រព័ន្ធខួរក្បាលបាន29% បើប្រៀបធៀបទៅនឹងអ្នកទទួលទានស្ករសូកូឡាចំនួនតិចតួចបំផុត និងអ្នកដែលមិនបានទទួលទានសោះ។ អ្នកជំនាញខាងបញ្ហាសុខភាពបេះដូងពិភពលោកបានអះអាងថា “យើងត្រូវតែបន្តការស្រាវជ្រាវបន្ថែមទៀត ដើម្បីបញ្ជាក់ឱ្យបានកាន់តែច្បាស់ពីប្រសិទ្ធភាពនៃការការពាររបស់ស្ករសូកូឡាចំពោះសុខភាពរបស់មនុស្ស។ ក្នុងការពិសោធនោះដែរ ក្រុមវិទ្យាសាស្ត្របានឱ្យអ្នកមានបញ្ហាចង្វាក់បេះដូងដើរញាប់ និងមិនទៀងទាត់ ឱ្យទទួលទានស្ករសូកូឡាពណ៌ខ្មៅ ដើម្បីសង្កេតពីការជួយពង្រឹងចលនាសម្ពាធឈាមក្នុងបេះដូង។ ជាលទ្ធផលគេទទួលបានប្រសិទ្ធភាពរបស់ស្ករសូកូឡាក្នុងជួយការពារជំងឺបេះដូងបានពិតមែន។ ទោះបីជាវាអាចជួយសុខភាពបានពិតប្រាកដមែនក៏ដោយ ប៉ុន្តែលោកអ្នកមិនគួរទទួលទានវាក្នុងចំនួនដ៏ច្រើនលើសលប់ពេកនោះទេ ពីព្រោះវាអាចបង្កឱ្យមានបញ្ហាផ្សេងៗបាន។ ក្រុមអ្នកវិទ្យាសាស្ត្រ បានបញ្ជាក់ថា អ្នកអាចទទួលទានសូកូឡាក្នុងបរិមាណ 30ក្រាមក្នុងមួយថ្ងៃ និងមួយប្រអប់ក្នុងរយៈពេលមួយសប្ដាហ៍តែប៉ុណ្ណោះ។ ហើយចំពោះក្រុមអ្នកជំងឺបេះដូងដែលមានអាយុចន្លោះពី50ឆ្នាំ ទៅ60ឆ្នាំ មិនត្រូវបានអនុញ្ញាតិឱ្យទទួលទានក្នុងបរិមាណច្រើននោះទេ។មួយវិញទៀត ស្ករសូកូឡាក៏មានផ្ទុកនូវសារធាតុសរីរាង្គជាច្រើន ដែលតួនាទីជាសារធាតុប្រឆាំងអុកស៊ីតកម្មផងដែរ។ មិនតែប៉ុណ្ណោះមានរួមបញ្ចូលទាំងសារធាតុ Polyphenols ,សារធាតុFlavonoids, សារធាតុ Catechins ក្នុងនោះទៀតផង។ សារធាតុប្រឆាំងអុកស៊ីតកម្ម Flavonoids នៅក្នុងស្ករសូកូឡាអាចជំរុញ endothelium ដែលជាស្រទាប់ខាងក្នុង នៃសរសៃឈាមអាទែរ ដើម្បីផលិត Nitric Oxide (NO) ដែលជាឧស្ម័នម្យ៉ាង។មុខងារនៃ NO គឺបញ្ជូនព័ត៌មានទៅក្នុងសរសៃឈាមដែលទប់ទល់ និងចលនារបស់ឈាមកុំឱ្យដើរលឿនហួសកម្រិត និងជួយកាត់បន្ថយសម្ពាធឈាម។ដូច្នេះហើយបានជា ស្ករសូកូឡាមានផ្ទុកទៅដោយសារធាតុចិញ្ចឹម ដែលអាចជួយឱ្យអ្នកមានសុខភាពល្អ បើមានការទទួលទានបានត្រឹមត្រូវ។ព្រោះបានផលិតចេញពីគ្រាប់ធញ្ញជាតិរបស់ដើមកាកាវ ហើយមានផ្ទុកនូវជាតិស្ករតិចបំផុត ដែលអាចជួយបំប៉នដល់សុខភាពរបស់អ្នក និងកាត់បន្ថយដល់ការកើតមាននូវជំងឺបេះដូងបានយ៉ាងពិតប្រាកដ៕

June 5, 2019

ចេះតែអស់កម្លាំងល្ហិតល្ហៃតើអ្នកបានបណ្ដេញជាតិពុលពីក្នុងខ្លួនហើយឬនៅ?

ធាតុពិតអ្នកចង់ឱ្យរាងកាយគ្មានជាតិពុល ប៉ុន្តែភ័យខ្លាចមិនដឹងថា ត្រូវកម្ចាត់ជាតិពុលពីក្នុងរាងកាយបានដោយវិធីណា ទាំងបានដឹងខ្លួនហើយថា រវល់ជាមួយការងារច្រើនសឹងតែរកពេលទំនេរគ្មានសោះ។ ក្រៅពីការហាត់ប្រាណ មានអ្នកខ្លះព្យាយាមក្នុងការទទួលទានទឹកភេសជ្ជៈ ឬទឹកផ្លែឈើ ដែលខ្លួនគិតថា វាអាចជួយបណ្ដេញជាតិពុលចេញពីក្នុងខ្លួន តែអ្នកភ្លេចគិតថា វាអាចបណ្ដាលឱ្យប៉ះពាល់ដល់ប្រព័ន្ធរំលាយអាហារ ជាពិសេសគឺ ក្រពះ និងពោះវៀន។

មនុស្សស្ទើរគ្រប់រូប សុទ្ធតែមានផ្ទុកនូវជាតិពុលក្នុងខ្លួន ជាតិពុលដែលមាននៅក្នុងអាហារ និងគ្រឿងស្រវឹងទាំងនោះ បណ្តាលមកពីកត្តាមួយចំនួន ដែលតែងតែមើលរំលងដូចជា ទឹក ចំណីអាហារសម្រេច ឬអាហារកំប៉ុង និងបរិស្ថាននៅជុំវិញខ្លួនផងដែរ។ ការប្រើប្រាស់សារធាតុគីមី ដើម្បីថែរក្សាចំណីអាហារទុកបានយូរ ឬឆាប់ទទួលបានផល ក៏ធ្វើឱ្យប៉ះពាល់ដល់សុខភាព និងបង្កជាតិពុលនៅក្នុងរាងកាយផងដែរ។ បញ្ហាទាំងនេះ គឺជាកង្វល់ដ៏សំខាន់មួយសម្រាប់ប្រជាពលរដ្ឋរស់នៅលើពិភពលោក ដែលកំពុងតែជួបប្រទះ វាបណ្តាលឱ្យប៉ះពាល់ដល់សុខភាពរាងកាយមនុស្ស ធ្វើឱ្យសុខភាពចុះខ្សោយ ឆាប់ឈឺ និងមានសុខភាពមិនល្អ។ នៅក្នុងថ្ងៃនេះ ទស្សនាវដ្ដី ឡារ៉ែន សូមណែនាំអ្នកឱ្យសាកល្បងវិធីសាស្រ្តងាយៗមួយចំនួន ដែលមានប្រសិទ្ធភាពក្នុងការការពារ ព្យាបាល និងកម្ចាត់ជាតិពុលចេញពីក្នុងខ្លួនមនុស្ស បានយ៉ាងឆាប់រហ័ស។

1. ខ្ពុរមាត់ជាមួយប្រេង
ស្ដាប់មើលទៅដូចជារាងប្លែកបន្តិច ប៉ុន្តែការពិតនោះគឺថា ការខ្ពុរមាត់ជាមួយនឹងប្រេង ដូចជា ប្រេងល្ង ប្រេងដូង ឬប្រេងអូលីវជាដើម អាចជួយរុញច្រាន ឬបណ្ដេញពពួកបាក់តេរីចេញពីក្នុងប្រអប់មាត់របស់អ្នក ដែលអ្នកកំពុងជួបបញ្ហាក្លិនមាត់មិនល្អ។ ក្នុងអំទ្បុងពេលអ្នកក្រោកពីដំណេក សូមប្រើប្រេងខ្ពុរមាត់ចំនួនមួយស្លាបព្រាបាយដាក់ចូលទៅក្នុងមាត់ បន្ទាប់មកសឹមដុសសម្អាតធ្មេញតាមធម្មតា វាមិនត្រឹមតែជួយសម្អាតកំណកកំបោរ និងបាក់តេរីនៅលើធ្មេញប៉ុណ្ណោះទេ ប៉ុន្តែវាថែមទាំងជួយឱ្យអ្នកមានខ្យល់ដង្ហើមស្រស់ថ្លាទៀតផង។

2. ទម្លាប់ល្អរបស់ជនជាតិចិន
តាមការសិក្សាស្រាវជ្រាវបានរកឃើញថា ការទទួលទានទឹកតែ ដែលជាប្រពៃណីដ៏ពេញនិយមរបស់ជនជាតិចិន ដូចជា ប្រភេទតែបៃតង តែអ៊ូឡុង ឬតែទឹកឃ្មុំក្រូចថ្លុងជាដើម អាចជួយកាត់បន្ថយភាពតានតឹង និងបង្កើនផលិតភាពបាន។ មិនត្រឹមតែប៉ុណ្ណោះ ការទទួលទានទឹកតែក្ដៅឧណ្ហៗ ក៏បានជួយជំរុញជាតិពុលចេញពីក្នុងខ្លួនផងដែរ ដោយការជួយសម្រួលដល់ដំណើរការប្រព័ន្ធបន្ទោរបង់បានយ៉ាងល្អ។ ហើយមានតែប្រភេទខ្លះទៀត ត្រូវបានជនជាតិចិនឱ្យតម្លៃថា ជាឱសថបុរាណចិនដ៏មានប្រសិទ្ធភាពបំផុតក្នុងការលាងគ្រាប់ឈាម ហើយជំនួយដល់សុខភាពបានយ៉ាងល្អ។

3. ការងូតទឹកក្ដៅ ឬត្រាំទឹកក្ដៅ
អ្នកប្រហែលជាគិតថា ជាតិពុលមានតែផ្នែកខាងក្នុងខ្លួនតែប៉ុណ្ណោះ ប៉ុន្តែធាតុពិតវិញផ្នែកខាងក្រៅនៃរាងកាយក៏មានជាតិពុលដូចគ្នាដែរ។ ហេតុដូចនេះ នៅពេលដែលអ្នកងូតទឹក អ្នកគួរប្រើស្បៃដុសខ្លួនជាមួយនឹងសាប៊ូក្នុងការសម្អាត និងម៉ាស្សាជាចលនារាងរង្វង់ 2 ឬ3ដងក្នុងមួយសប្តាហ៍ ដើម្បីជួយឱ្យចរន្តឈាមរត់បានស្រួល និងជំរុញជាតិពុលឱ្យចេញពីក្នុងខ្លួន និងជួយកម្ចាត់បាក់តេរីដែលតោងជាប់នឹងស្បែកផងដែរ។

4. ការទទួលទានទឹកក្ដៅជំនួសទឹកកក
អ្នកគប្បីដឹងថា ទឹកកកដែលផលិតឡើង និងដាក់លក់នៅតាមទីផ្សារ ក៏មានប្រើប្រាស់សារធាតុគីមីដែលជួយឱ្យត្រជាក់ ហើយកកបានយូរ។ ក៏ដូចគ្នាដែរ ការទទួលទានទឹកកកច្រើន វាបណ្ដាលឱ្យអ្នកមានសាច់ក្បាលពោះធំដោយមិនដឹងខ្លួន។ កត្តាដែលល្អសម្រាប់សុខភាព អ្នកគួរតែទទួលទានទឹកក្តៅ 1កែវ លាយជាមួយនឹងទឹកក្រូចឆ្មារ 1ផ្លែ រួចកូរចូលគ្នាឱ្យសព្វ ទទួលទានវាជារៀងរាល់ថ្ងៃ រាល់ព្រឹក រហូតដល់អ្នកមានសុខភាពល្អប្រសើរឡើងវិញ មិនសូវមានអារម្មណ៍នឿយហត់ខ្លាំង ឬកើតអាការខ្យល់ក្នុងខ្លួន។

5. អំបិលលាងជាតិពុលក្នុងរាងកាយ
អ្នកអាចយកអំបិល 2កែវកាហ្វេ លាយទៅក្នុងធុង ឬអាងទឹក រួចចាក់ទឹកក្តៅឧណ្ហៗចូល បន្ទាប់មកត្រាំខ្លួនរបស់អ្នកនៅក្នុងអាងទឹកនោះ រយៈពេល15នាទីជាការស្រេច។ អ្នកគួរតែធ្វើបែបនេះឱ្យបាន3ដង ក្នុង1សប្តាហ៍។ តែអ្នកក៏ត្រូវដឹងថា វិធីនេះមិនបានអនុញ្ញាតចំពោះមនុស្សដែលមានជំងឺលើសឈាម និងអ្នកជំងឺបេះដូងឡើយ៕

June 5, 2019

4ទង្វើ បំផ្លាញ “ខួរក្បាល” ដោយមិនដឹងខ្លួន

ខួរក្បាល ជាអវយវៈមួយផ្នែកដែលសំខាន់ចំពោះរាងកាយខ្លាំងណាស់ ព្រោះក្រៅពីពេញទៅដោយខ្សែសរសៃប្រសាទដែលមានភាពស្មុគស្មាញរាប់លានសរសៃហើយនោះ បើខួរក្បាលធ្វើការខុសប្រក្រតី នឹងហុចផលប៉ះពាល់ទៅដល់អវយវៈផ្នែកផ្សេងៗក្នុងរាងកាយ និងមិនអាចរកខួរក្បាលថ្មីមកផ្លាស់ប្ដូរ ឬដូច្នេះបានឡើយ។ខួរក្បាល អាចរាប់បានថាជាអវយវៈដ៏សំខាន់របស់រាងកាយ ដោយមានតួនាទីជាមជ្ឈមណ្ឌលកណ្ដាលគ្រប់គ្រងកម្មវិធីផ្សេងៗដែលកើតឡើងក្នុងរាងកាយមនុស្ស មិនថាតែការលោតរបស់បេះដូង ការធ្វើចលនាផ្សេងៗ ឬការដកដង្ហើមជាដើម ដោយខួរក្បាលនឹងគ្រប់គ្រង និងបញ្ជារាងកាយឱ្យធ្វើការតាមការគិត ដើម្បីឱ្យមនុស្សអាចបំពេញការងារក្នុងជីវិតប្រចាំថ្ងៃបានយ៉ាងប្រក្រតី។ ខួរក្បាលធ្វើការងារគ្រប់ពេលវេលា ដូច្នេះហើយទើបការយកចិត្តទុកដាក់លើទង្វើដែលគួរប្រតិបត្តិ ដើម្បីឱ្យខួរក្បាលធ្វើការបានល្អ គឺជារឿងដែលមនុស្សគ្រប់គ្នាគួរផ្ដល់ភាពសំខាន់ ដើម្បីសុខភាពដ៏ល្អរបស់ខួរក្បាល និងចៀសវាងពីទង្វើអាក្រក់ៗដែលអាចបំផ្លាញខួរក្បាលបាន។

4ទង្វើបំផ្លាញខួរក្បាល
1. ភាពធុញថប់តានតឹង : ជាផលអាក្រក់ដល់ស្ថានភាពផ្លូវចិត្ត និងហុចផលប៉ះពាល់ដល់ខួរក្បាល ធ្វើឱ្យខូចសមាធិ ឬអ្នកខ្លះអាចឈានទៅរកសភាវសោកសៅ និងមានបញ្ហាផ្លូវចិត្តបានទៀតផង។
2. បរិស្ថានដែលមានខ្យល់អាកាសមិនល្អ :ការស្ថិតនៅក្នុងខ្យល់អាកាសដែលល្អ នឹងធ្វើឱ្យខួរក្បាលបានទទួលអុកស៊ីហ៊ែ្សនគ្រប់គ្រាន់ ដូច្នេះគួរចៀសវាងការស្នាក់អាស្រ័យនៅក្នុងទីកន្លែងដែលខ្យល់អាកាសមិនបរិសុទ្ធ ឬពេញទៅដោយពិសពុលខាងអាកាសគ្រប់ពេលវេលា។
3. ជក់បារី : អ្នកដែលជក់បារីជាប់ជាប្រចាំ ក្រៅពីធ្វើឱ្យកើតរោគមហារីកសួតហើយ នៅធ្វើឱ្យរាងកាយ និងខួរក្បាលបានទទួលអុកស៊ីហ៊ែ្សនកាន់តែតិច និងជាមូលហេតុរបស់ជំងឺសរសៃឈាមខួរក្បាល។
4. ជំងឺប្រចាំកាយប្រភេទខ្លះ : ដូចជាទឹកនោមផ្អែម លើសឈាម ខ្លាញ់ក្នុងឈាមខ្ពស់ ជាបច្ច័យប្រថុយប្រថានរបស់ជំងឺខួរក្បាលជាច្រើនដូច្នេះ បើរកឃើញថាខ្លួនឯងមានជំងឺប្រចាំកាយ គួរព្យាបាលតាំងពីដំបូងៗ ដើម្បីការពារមិនឱ្យកើតផលអាក្រក់ ព្រោះការព្យាបាលនៅពេលកើតការបំផ្លាញខួរក្បាលហើយ នឹងមិនអាចធ្វើឱ្យខួរក្បាលត្រឡប់មកធ្វើការបានពេញលេញដូចប្រក្រតីបានឡើយ ហើយផ្លូវចិត្តក៏នឹងធ្វើការខុសប្រក្រតីដែរ។

5វិធីបំប៉នខួរក្បាល
វេជ្ជបណ្ឌិតជំនាញខាងប្រព័ន្ធប្រសាទវិទ្យាបាននិយាយថា ខួរក្បាលមានភាពពាក់ព័ន្ធជាមួយអារម្មណ៍ និងការរៀនយល់ដឹង ដូច្នេះហើយទើបទាំងអស់នេះ មនុស្សគួរបែរមកយកចិត្តទុកដាក់លើទង្វើអភិវឌ្ឍខួរក្បាល ដែលមានទង្វើល្អៗ 5យ៉ាងដូចខាងក្រោម៖
1. បរិភោគល្អ គឺទទួលទានអាហារដែលមានប្រយោជន៍គ្រប់ទាំង 5ប្រភេទក្រុមកាត់បន្ថយចំណីអាហារប្រភេទខ្លះ ជាពិសេសអាហារដែលមានស្ករច្រើនដែលអាចនឹងប្រថុយប្រថានក្នុងការកើតជំងឺទឹកនោមផ្អែម និងជំងឺសរសៃឈាមខួរក្បាល។
2. ហាត់ប្រាណល្អ ការហាត់ប្រាណនឹងធ្វើឱ្យរាងកាយជារួម និងសរសៃឈាមរឹងមាំ គ្មានសភាវលើសទម្ងន់។

3. គេងសម្រាកល្អ ការគេងសម្រាកឱ្យបានគ្រប់គ្រាន់នឹងជួយឱ្យរាងកាយមានពេលសម្រាកដើម្បីជួសជុលខ្លួនឯង ដូច្នេះគួរមានពេលវេលាសម្រាក គេងលក់ឱ្យបានយ៉ាងតិច 6-8ម៉ោងក្នុងមួយថ្ងៃ។
4. គិតល្អ ការហ្វឹកហាត់គិត ហ្វឹកហាត់ចាប់ផ្ដើមធ្វើ នឹងជួយឱ្យខួរក្បាលកើតការរៀនយល់ដឹងនិងអភិវឌ្ឍកម្មវិធីការគិតឱ្យកាន់តែលឿនឡើង។
5. សន្ទនាល្អ ការហ្វឹកហាត់សន្ទនា ជជែកនិយាយជាមួយអ្នកដទៃជាប្រចាំ និងជាប់លាប់ នឹងជួយឱ្យខួរក្បាលមានការហ្វឹកហាត់ក្នុងការចេះកែបញ្ហាល្អ។ ចំណែកឯអ្នកដែលសម្ងំនៅតែឯង មិនចូលចិត្តជួបមនុស្សម្នា គេរកឃើញថា ខួរក្បាលមានកម្មវិធីការធ្វើការលើការកែបញ្ហាផ្សេងៗយឺតយ៉ាវ៕

June 4, 2019

ជំងឺផ្លូវចិត្ត ឬជំងឺសោកសៅ (Depression Disorder)

នរណាដែលមិនធ្លាប់សោកសៅខ្លះ? ប្រហែលជាគ្មានទេ ព្រោះអារម្មណ៍សោកសៅជាអារម្មណ៍ដែលមាននៅក្នុងខ្លួនមនុស្សគ្រប់រូប និងក្នុងមួយថ្ងៃៗកម្រិតរបស់អារម្មណ៍ក៏មានឡើង មានចុះ និងមានច្រើនបែប ផ្លាស់ប្ដូរគ្រប់ពេលវេលាតាមរឿងរ៉ាវដែលចូលមកប៉ះពាល់អារម្មណ៍ និងការដឹងឮរបស់មនុស្សម្នាក់ៗ។

សោកសៅគឺជាអ្វី?
“សោកសៅ” ខាងវេជ្ជសាស្ត្រហៅថា ClinicalDepression មានន័យពីសភាវសោកសៅដែលមានខ្លាំងជាងអារម្មណ៍កម្សត់ ជាសភាវម្យ៉ាងដែលប្រទះឃើញនៅក្នុងជំងឺផ្លូវចិត្តជាច្រើន ជាពិសេសជំងឺខាងអារម្មណ៍ ជំងឺសោកសៅ ជំងឺ Bipolar Disorder និងសារធាតុថ្នាំមួយចំនួនក៏អាចធ្វើឱ្យកើតអាការសោកសៅយ៉ាងធ្ងន់ធ្ងរបានដែរ។

មូលហេតុនៃជំងឺសោកសៅ
ជំងឺសោកសៅ អាចរាប់បានថាជាជំងឺខាងផ្នែកផ្លូវចិត្តដែលប្រទះឃើញច្រើនក្នុងលំដាប់មុខៗគេរបស់ពិភពលោក បណ្ដាលមកពីមូល-ហេតុចម្បងៗ 2យ៉ាងគឺ បច្ច័យខាងសរីរៈ ឬពូជអម្បូរ និងបច្ច័យផ្នែកផ្លូវចិត្ត ឬបរិស្ថានជុំវិញ។
បច្ច័យខាងសរីរៈ ឬពូជអម្បូរ ដោយសារតែមានការប្រែប្រួលរបស់សារធាតុទំនាក់ទំនងប្រព័ន្ធប្រសាទក្នុងខួរក្បាល ឬភាពច្របូកច្របល់របស់កម្រិតអ័រម៉ូនដែលសំខាន់។
ចំណែកបច្ច័យផ្នែកផ្លូវចិត្ត ឬបរិស្ថានជុំវិញដែលហៅថាបច្ច័យខាងអារម្មណ៍ ជាលទ្ធផលបណ្ដាលមកពីស្ថានការណ៍ភាពតានតឹងខាងអារម្មណ៍ ដូចជា បើជាសភាវសោកសៅក្នុងវ័យកុមារ អាចមានមូលហេតុពីភាពតានតឹងក្នុងគ្រួសារ ហេតុការណ៍រំជួលចិត្តយ៉ាងធ្ងន់ធ្ងរ សភាវសោកសៅក្នុងជំងឺសរសៃប្រសាទ ដែលអាចរកឃើញតម្រុយថា ត្រូវបានកៀបសង្កត់យ៉ាងខ្លាំងក្លាកាលនៅក្មេង ហើយផ្ទុះចេញមកក្នុងអំឡុងជីវិតនៅពេលក្រោយ។ សភាវសោក-សៅព្រោះតែភាពចាស់ជរា មានជីវិតឯកោ និងសភាវរំជួលចិត្តក្រោយចូលនិវត្តន៍(បាត់បង់គុណតម្លៃលើខ្លួនឯង អត់ការងារធ្វើ មានអា-រម្មណ៍ថា គ្មានសមត្ថភាព)ជាដើម។

សង្កេតអាការ
នៅពេលមនុស្សក្នុងក្រុមគ្រួសារ ឬអ្នកជិតដិតណាម្នាក់ហាក់ដូចជាសោកសៅ គោល-ការណ៍សង្កេតងាយៗ គឺសង្កេតមើលទង្វើដូចតទៅនេះ៖
1. ទង្វើដែលកើតពីការផ្លាស់ប្ដូរខាងការគិត គឺច្រើនតែមានការគិតទៅខាង Negative Thinking ឬការគិតដែលអវិជ្ជមានគ្រប់ពេលវេលា។ ច្រើនតែមានអារម្មណ៍អស់សង្ឃឹម មើលឃើញជុំវិញខ្លួនសុទ្ធតែរឿងអាក្រក់មានអារម្មណ៍ថាខុស ថាខ្លួនឯងគ្មានតម្លៃ គ្មានន័យ និងគិតថាគ្មានថ្នាំព្យាបាលឱ្យជា ទីបំផុតក៏គិតចង់បំផ្លាញខ្លួនឯង នឹកឃើញតែរឿងស្លាប់ និងព្យាយាមសម្លាប់ខ្លួន។
2. ទង្វើដែលកើតចេញពីការប្រែប្រួលខាងការរៀនយល់ដឹង ឬការធ្វើការងារ មិនខ្វល់នឹងអ្វីៗជុំវិញខ្លួន មានអារម្មណ៍នឿយល្វើយ ធ្វើការងារយឺតយ៉ាវ ការងារចុះខ្សោយ គ្មានសមាធិ ការចងចាំចុះខ្សោយ ការសម្រេចចិត្តក៏យ៉ាប់យ៉ឺន។
3. ទង្វើដែលកើតចេញពីការផ្លាស់ប្ដូរខាងអារម្មណ៍ គឺច្រើនតែមានអារម្មណ៍សោកសៅ កង្វល់គ្រប់ពេលវេលា ច្រើនតែមួម៉ៅឆេវឆាវ ឆាប់ខឹង នៅមិនសុខ រសាប់រសល់ ជាដើម។
4. ទង្វើដែលប្រែប្រួលយ៉ាងមើលឃើញច្បាស់ ដូចជា គេងមិនលក់ ឆាប់ភ្ញាក់ ឬអ្នកខ្លះគេងលក់ខ្លាំងជ្រុលពេក អ្នកខ្លះធុញទ្រាន់ចំណីអាហារ ធ្វើឱ្យស្រកទម្ងន់។ មានអាការខាងរាងកាយ ព្យាបាលដោយថ្នាំធម្មតាមិនបាត់ ដូចជា អាការឈឺក្បាល ណែនក្នុងពោះ ឈឺរ៉ាំរ៉ៃ សម្ព័ន្ធភាពជាមួយអ្នកដទៃកាន់តែមិនល្អ។

ការមើលថែទាំខ្លួនឯងពេលកើតជំងឺសោកសៅ
1. កុំតាំងគោលដៅក្នុងការធ្វើការងារ កុំប្រតិបត្តិខ្លួនដែលធ្វើឱ្យលំបាកខ្លាំងជ្រុល ឬទទួលខុសត្រូវច្រើនជ្រុល។
2. ញែកបំបែកបញ្ហាធំៗឱ្យទៅជាផ្នែកតូចៗ ព្រមទាំងចាត់រៀងតាមលំដាប់ភាពសំខាន់មុនក្រោយ និងចាប់ផ្ដើមធ្វើតាមដែលអាចធ្វើទៅបាន។
3. ព្យាយាមធ្វើកិច្ចការងារផ្សេងៗរួមជាមួយបុគ្គលដទៃ ប្រសើរជាងនៅតែម្នាក់ឯង។
4. ជ្រើសរើសធ្វើកិច្ចការងារណាដែលសាងនូវអារម្មណ៍ល្អៗ ឬជក់ចិត្ត និងមិនធ្ងន់ធ្ងរខ្លាំងពេក ដូចជា មើលកុន ហាត់ប្រាណស្រាលៗ និងការចូលរួមធ្វើកិច្ចការងារក្នុងសង្គម ជាដើម។
5. កុំសម្រេចចិត្តក្នុងរឿងដែលសំខាន់ចំពោះជីវិតច្រើនពេក ដូចជា ការសុំឈប់ពីការងារ ការរៀបការ ឬការលែងលះ ដោយមិនបានប្រឹក្សាជាមួយមនុស្សជិតដិតដែលស្គាល់គ្នាច្បាស់ និងត្រូវតែបុគ្គលដែលអាចពិចារណាហេតុការណ៍នោះយ៉ាងទៀងត្រង់ មានភាពជាកណ្ដាល និងប្រាសចាកការអគតិដែលកើតពីអារម្មណ៍មកបិទបាំង។ បើអាចទៅរួច និងល្អបំផុតនោះគឺលើកពេលសម្រេចចិត្តទៅថ្ងៃក្រោយ រហូតទាល់តែសភាវសោកសៅរលាយបាត់ ឬល្អប្រសើរឡើងច្រើនហើយ។
6. មិនគួរទិតៀន ឬដាក់ទោសខ្លួនឯងដែលមិនអាចធ្វើបានដូចដែលត្រូវការ ព្រោះមិនមែនជាកំហុសរបស់ខ្លួនឯងទេ និងគួរធ្វើតាមដែលខ្លួនឯងអាចធ្វើបាន។

ការមើលថែទាំអ្នកកើតជំងឺសោកសៅ
1. យល់ចិត្ត : ការយល់ដឹងពីជំងឺដែលអ្នកជំងឺកំពុងជួបប្រទះ អាចជួយឱ្យសាច់ញាតិកាត់បន្ថយសេចក្ដីរំពឹង ភាពមួម៉ៅក្ដៅក្រហាយ និងភាពទើសទាល់ក្នុងចិត្តចំពោះអ្នកជំងឺបាន។
2. ទទួលស្ដាប់ : ការស្ដាប់អ្នកជំងឺដោយការយល់ចិត្ត យកចិត្តទុកដាក់ និងមិនប្រកាន់ នឹងជួយឱ្យអារម្មណ៍របស់អ្នកជំងឺល្អប្រសើរឡើង។
3. ទម្លាយអារម្មណ៍ : នៅពេលអ្នកជំងឺបានទម្លាយគំនិត និងអារម្មណ៍ដែលមិនល្អផ្សេងៗចេញមក ជាពិសេសគំនិតចង់ធ្វើអត្តឃាតនោះ នឹងជួយបន្ធូរបន្ថយភាពធុញថប់តានតឹងនៅក្នុងចិត្តបាន។
4. ហាត់ប្រាណ : ការហាត់ប្រាណ ជួយឱ្យរាងកាយរបស់អ្នកជំងឺរឹងមាំ ចិត្តគំនិតស្រស់ថ្លា។ បើសិនបានហាត់ប្រាណរួមជាមួយអ្នកដទៃផងនោះ នឹងរឹតតែជួយបង្កើនការចូលក្នុងសង្គមមនុស្ស និងមិនមានអារម្មណ៍ថាឯកោ។
5. ផ្លាស់ប្ដូរបរិយាកាស : គួរនាំអ្នកជំងឺទៅដើរកម្សាន្តដើម្បីផ្លាស់ប្ដូរបរិយាកាស នឹងជួយឱ្យចិត្តគំនិតរបស់អ្នកជំងឺស្រស់ថ្លាឡើងមួយកម្រិតដែរ។
6. ការពារការធ្វើបាបខ្លួនឯង : សាច់ញាតិត្រូវប្រយ័ត្នអ្នកជំងឺធ្វើបាបខ្លួនឯង ដោយត្រូវប្រមូលទុកដាក់ឧបករណ៍ដែលអ្នកជំងឺអាចយកមកធ្វើបាបខ្លួនឯងឱ្យនៅឆ្ងាយពីអ្នកជំងឺ។
7. សង្កេតមើលអាការ : ឧស្សាហ៍សង្កេតមើលអាការអ្នកជំងឺថា តើមានរឿងសោកសៅ ធុញថប់ ឬគិតប្រុងធ្វើបាបខ្លួនឯងដែរឬទេ? បើនិយាយណែនាំហើយមិនល្អប្រសើរឡើងនោះ គួរប្រញាប់នាំទៅជួបគ្រូពេទ្យដើម្បីប្រឹក្សាពីអាការ។
8. មើលថែទាំកិច្ចការងារប្រចាំថ្ងៃ តាមដានការញ៉ាំថ្នាំ : សាច់ញាតិគួរជួយមើលថែទាំកិច្ចការងារប្រចាំថ្ងៃរបស់អ្នកជំងឺ ដូចជា ញ៉ាំអាហារឱ្យបានសមរម្យ ភ្ញាក់ និងគេងឱ្យបានទៀងពេល រួមទាំងតាមដានការញ៉ាំថ្នាំឱ្យត្រឹមត្រូវតាមវេជ្ជបញ្ជា និងស៊ូទ្រាំ ព្រោះការព្យាបាលឱ្យទទួលបានលទ្ធផលល្អ ត្រូវប្រើពេលវេលាយូរ៕

June 4, 2019

ស្គម តែដុះក្បាលពោះ…អាចកែបានដោយទង្វើខាងក្រោម

តើអ្នកណាមានសភាវរាងកាយបែបហ្នឹងខ្លះ? ពេលថ្លឹង អាចនឹងមានទម្ងន់ខ្លួនទាបជាងកម្រិតស្តង់ដារ តែហេតុអីបានមានក្បាលពោះ? ការពិតទៅ អ្នកអាចត្រូវបានចាត់ទៅក្នុងក្រុមមនុស្ស “Skinny Fat” គឺមនុស្សមានទម្ងន់ខ្លួនតិច ឬប្រក្រតី តែបែរជាមានសាច់ដុំតិច ខ្លាញ់ច្រើន មើលរូបរាងខាងក្រៅទៅ មិនមែនជាមនុស្សធាត់ទេ តែមានដុះក្បាលពោះ?

មូលហេតុរបស់ការស្គម តែមានក្បាលពោះ បណ្ដាលពីបច្ច័យជាច្រើន ដូចជា ៖

1. ការអត់អាហារ ឬការទទួលទានអាហារតិចជ្រុលពេក
ដោយសារតែការទទួលទានអាហារតិចជ្រុលពេក នឹងធ្វើឱ្យរាងកាយខ្វះសារធាតុអាហារ ទើបបឺតយកជាតិខ្លាញ់មកប្រើ តែនៅពេលដល់កំណត់ រាងកាយក៏នឹងប្ដូរទៅទាញសាច់ដុំមកប្រើជំនួសវិញ ហើយនៅពេលសាច់ដុំថយចុះ នឹងធ្វើឱ្យប្រព័ន្ធការដុតបំផ្លាញធ្លាក់ចុះទាបទៅតាមនោះដែរ។

វិធីកែគឺ ទទួលទានអាហារឱ្យច្រើនឡើង ជាពិសេសអាហារដែលផ្ដល់កម្លាំងថាមពល និងត្រូវហាត់ប្រាណរួមជាមួយផង ដើម្បីបន្ថយខ្លាញ់ដែលប្រមូលសន្សំច្រើន។

2. ហាត់ប្រាណខុសវិធី ឬហាត់ប្រាណបែប Cardio ច្រើនជ្រុលពេក
ទោះជាការហាត់ប្រាណបែប Cardio ដូចជា ការរត់ ធាក់កង់ វាយបុក រាំអ៊ែរ៉ូប៊ិក ការរាំ-ល-មានផលល្អចំពោះរាងកាយក៏ពិតមែន តែបើធ្វើច្រើនរហូតជ្រុលពេក ក៏អាចកើតផលអាក្រក់ដល់រាងកាយបានដែរ ព្រោះការហាត់ប្រាណបែប Cardio ច្រើនជ្រុលពេកនឹងក្លាយជាការបង្ខំដុតបំផ្លាញកម្លាំងថាមពល ហើយបើយើងទទួលទានអាហារតិចទៀតផងនោះ នឹងធ្វើឱ្យរាងកាយនាំសាច់ដុំទៅប្រើជាកម្លាំងថាមពលជំនួសវិញ និងនៅពេលរាងកាយបាត់បង់បណ្ដុំសាច់ដុំ ប្រព័ន្ធដុតបំផ្លាញក៏នឹងថយចុះ ធ្វើឱ្យជាតិខ្លាញ់កាន់តែប្រមូលសន្សំច្រើនឡើង ហេតុនេះទើបជាមូលហេតុធ្វើឱ្យមានរូបរាងស្គម តែទៅជាមានក្បាលពោះនោះ។

វិធីកែគឺ ចូរងាកមកហាត់ប្រាណដោយការលេង Weight Training, Body Weight ឬការហាត់ប្រាណបែប HIIT (High Intensive Interval Training) គួបផ្សំទៅជាមួយផង ព្រោះការហាត់ប្រាណដោយវិធីនេះ នឹងទៅជួយបង្កើនបណ្ដុំសាច់ដុំ ធ្វើឱ្យប្រព័ន្ធការដុតបំផ្លាញធ្វើការខ្លាំងឡើង ហើយខ្លាញ់ដែលប្រមូលសន្សំនោះ ក៏នឹងថយចុះទៅតាមនោះដែរ។

3. ញ៉ាំស្រាក៏មានចំណែករួមដែរ
មានការសិក្សាស្រាវជ្រាវជាច្រើនដែលបានរកឃើញថា គ្រឿងភេសជ្ជៈអាល់កុល ដូចជា ស្រាបៀរ ស្រាវីស្គី វ៉ុដកា ខក់ថេល ឬវ៉ាញ សុទ្ធតែហុចផលឱ្យមានជាតិខ្លាញ់ប្រមូលសន្សំនៅត្រង់ប្រអប់ពោះច្រើនជាពិសេសទាំងអស់។ រឹតតែយើងញ៉ាំច្រើនប៉ុនណា ឱកាសដែលខ្លាញ់នឹងចូលទៅប្រមូលផ្ដុំនៅត្រង់បរិវេណចង្កេះ ក៏រឹតតែមានច្រើនឡើងដូចគ្នាដែរ។

4. ញ៉ាំអាហារគ្មានប្រយោជន៍ជាប្រចាំ
ទោះជាយើងគ្រប់គ្រង់លើការហូបអាហារហើយក្ដី តែការដែលយើងនៅតែចូលចិត្តញ៉ាំនំ ឬបង្អែម ឬអាហារដែលមានជាតិខ្លាញ់ច្រើន ឧទាហរណ៍ដូចជា នំឃុកគី នំខេក ដូណាត់ ភីហ្សា ការ៉េម-ល- ក៏ធ្វើឱ្យដុះក្បាលពោះបានដែរ ព្រោះអាហារទាំងអស់នេះច្រើនតែមានខ្លាញ់្រថានស៍(Trans) ច្រើនណាស់ ហើយជាតិខ្លាញ់មួយនេះឯងដែលហុចផលឱ្យក្បាលពោះវាមិនបាត់ទៅណានោះ។
មានការសិក្សាស្រាវជ្រាវមួយបានរកឃើញថា ការទទួលទានខ្លាញ់ត្រានស៍ជាប្រចាំ នឹងហុចផលឱ្យជាតិខ្លាញ់ប្រមូលសន្សំនៅត្រង់ក្បាលពោះច្រើនឡើង ទោះជាបរិមាណកាឡូរីជារួម មិនបានខ្ពស់ក៏ដោយ។

វិធីបញ្ចុះក្បាលពោះ
– ផ្លាស់ប្ដូរទង្វើការហូបចុក ចៀសវាងការទទួលទានអាហារផ្អែម អាហារហ្វាសត៍ហ្វូ៊ដ ដោយជ្រើសរើសទទួលទានអាហារដែលមានប្រយោជន៍ មានគុណតម្លៃខាងភោជនាហារខ្ពស់ តែផ្ដល់កម្លាំងថាមពលទាប។ សង្កត់ធ្ងន់លើអាហារដែលមានប្រូតេអុីនជាចម្បង ដើម្បីជួយបង្កើនសាច់ដុំ។ ទទួលទានបន្លែ និងផ្លែឈើ បន្ថយបរិមាណខាបូហាយដ្រេតចុះពាក់កណ្ដាល ដោយបែរមកជ្រើសរើសទទួលទាន បាយអង្ករសម្រូប ឬនំប៉័ងហូលវីត ជាដើម និងទទួលទានខ្លាញ់ល្អ ដូចជា ប្រេងម្កាក់ អាវ៉ូខាដូ សណ្ដែក ត្រីសាល់ម៉ុនជាដើម ក្នុងចំណែកដែលសមរម្យដែលរាងកាយគួរបានទទួលរៀងរាល់ថ្ងៃ។

– បង្កើនការសាងសាច់ដុំ ដោយការហាត់ប្រាណ ដូចជា ការលេង Weight Training,Body Weight ឬការហាត់ប្រាណបែប HIIT (High Intensive Interval Training) ព្រោះវានឹងជួយឱ្យរាងកាយដុតបំផ្លាញជាតិខ្លាញ់បានច្រើនឡើង៕

June 4, 2019

Category: សុខភាព