សុខភាព - La Reine Media

ពេលរលាកដោយវត្ថុក្ដៅធ្ងន់ធ្ងរ តើគួរសង្គ្រោះបឋមបែបណាល្អ?

ពេលខ្លះអ្នកមានការធ្វេសប្រហែស ធ្វើឱ្យរលាកភ្លើង ឬវត្ថុក្ដៅ។ មានប្រិយមិត្តជាច្រើនបានជ្រាបអំពីវិធីងាយៗ ក្នុងការដោះស្រាយបញ្ហារលាកភ្លើង ឬទឹកក្តៅ គឺគ្រាន់តែយកផ្នែកពណ៌សនៃស៊ុតមាន់ ទៅលាបឱ្យសព្វលើបរិវេណដែលត្រូវទឹកក្តៅរលាក ទុកចោលមួយសន្ទុះ រហូតដល់ស្ងួត ទើបលាងជម្រះដោយទឹកឱ្យស្អាតជាការស្រេច។ វិធីនេះអាចបំបាត់ស្នាមដំបៅក្រហម ឬពងបែកនៅលើស្បែកបាន ប៉ុន្តែករណីដែលរលាកខ្លាំង ហើយធ្ងន់ធ្ងរនោះ វិធីងាយមួយនេះ ក៏មិនបានហុចផលឱ្យស្បែកជាសះស្បើយទាំងស្រុងនោះទេ។ នៅពេលអ្នកជួបប្រទះនូវបញ្ហារលាកភ្លើង ឬរលាកទឹកក្ដៅខ្លាំង សូមប្រតិបត្តិតាមវិធីសាស្ត្រសង្គ្រោះបឋមមួយចំនួនដូចខាងក្រោមនេះ៖

1- សង្គ្រោះរាងកាយ
ក្នុងករណីត្រូវទឹកក្ដៅរលាកទាំងសម្លៀកបំពាក់ ចូរប្រញាប់ឆក់ ឬដោះសម្លៀកបំពាក់ចេញពីរាងកាយឱ្យបានលឿនជាទីបំផុត ឬបើមិនអាចយកចេញបានទេ ចូរប្រញាប់យកទឹកត្រជាក់មកស្រោចពីលើរាងកាយភ្លាម។ ក្នុងករណីដែលអ្នកត្រូវភ្លើងរលាក បើសម្លៀកបំពាក់ឆេះភ្លើង ត្រូវប្រញាប់យកទឹកមកជះពន្លត់ភ្លាម។ បើមិនមានទឹកនៅក្បែរនោះទេ ចូរគេងទៅលើដី ហើយប្រមៀលចុះឡើង ដើម្បីពន្លត់ភ្លើងដែលឆេះខោអាវនោះជាមុនសិន។

2- បញ្ចុះកម្ដៅដល់ស្បែក
អ្នកត្រូវបញ្ចុះកម្ដៅស្បែកត្រង់បិវេណដែលរលាក ដោយទឹកត្រជាក់ ឬទឹកកក ព្រោះបើអ្នកមិនបញ្ចុះកម្ដៅភ្លាមៗទេ ស្បែកត្រង់បរិវេណនោះវានឹងរីកពងទឹក។ ការបញ្ចុះកម្ដៅស្បែកអាចធ្វើបានដោយការស្រោចទឹកត្រជាក់ដោយផ្ទាល់ ឬយកទឹកកកខ្ចប់ក្នុងក្រណាត់ស្អាតមកស្អំពីលើស្បែកក៏បាន។ តែហាមយកអ្វីដែលត្រជាក់ ហើយមិនស្អាតមកបិទជាដាច់ខាត ព្រោះវាអាចធ្វើឱ្យមុខរបួសរលាកភ្លើងឆ្លងមេរោគបាន។

3- សម្អាតស្បែកត្រង់បរិវេណ ដែលត្រូវភ្លើង ឬទឹកក្ដៅរលាក
លាងសម្អាតដោយសាប៊ូស្រាលៗ ជាមួយនឹងទឹកស្អាត។ ចូរចងចាំថា មិនត្រូវដុសស្បែកដែលរលាកពងនោះទេ ព្រោះអាចធ្វើឱ្យឆ្លងមេរោគ ហើយប្រែទៅជាដំបៅក្លាយខូចស្បែកកាន់តែធំ។

4- រុំមុខរបួសឱ្យជិតស្អាត
ក្រោយពេលសម្អាតស្បែកត្រង់កន្លែងដែលរលាកនោះរួចហើយ ចូរប្រើបង់រុំដំបៅ ឬសំឡីស្អាតដែលសម្លាប់មេរោគរួចមកជូតស្នាមរបួសឱ្យស្អាតថ្នមៗ។ បន្ទាប់មកសឹមបិទមុខរបួសដោយបង់ដែលមិនមានមេរោគ ដើម្បីការពារស្នាមរបួសឱ្យមានអនាម័យជានិច្ច។ ក្នុងករណីស្នាមរបួសតូចតាច អ្នកគ្រាន់តែលាបថ្នាំផ្សះសម្រាប់រលាកភ្លើង ឬរលាកទឹកក្ដៅ ឬក៏អាចប្រើសាច់ប្រទាលកន្ទុយក្រពើ ដែលចិតសម្រកខាងក្រៅចេញទុកតែសាច់ខាងក្នុងថ្លាៗដូចចាហួយ និងលាងសម្អាតជ័រហើយមកបិទពីលើស្នាមរលាកក៏បាន

5- ប្រញាប់បញ្ចូនអ្នករបួសទៅមន្ទីរពេទ្យ ក្នុងករណី៖
– កើតមានអាការស្លុត ឬឆក់ខ្សែភ្លើង
– មានអាការខ្វះជាតិទឹក ក្នុងករណីរលាកភ្លើងធ្ងន់ធ្ងរ វាអាចបណ្ដាលឱ្យរាងកាយអ្នកខ្វះជាតិទឹក។
– ស្នាមរលាកមានមុខធំ ឈឺចាប់ខ្លាំង រលាកហើមប៉ោង ឬពងទឹកខ្លាំង។
– ក្ដៅខ្លួនខ្លាំងលើស38អង្សាសេ។
– រលាកលើផ្នែកសំខាន់ៗ ដូចជា ក្បាល ក មុខនិងខ្នងជាដើម។
– អ្នករលាក គឺជាមនុស្សចាស់ ឬក្មេងអាយុតិចជាង5ឆ្នាំ។
– អ្នករលាក គឺជាអ្នកជំងឺទឹកនោមផ្អែម អ្នកជំងឺបេះដូង និងអ្នកជំងឺលើសឈាមជាដើម៕

June 27, 2019

វិធីពន្យារកំណើត តាមបែបសម័យថ្មី

សម័យបច្ចុប្បន្ន ចំនួនកូនគឺមិនមែនជារឿងដែលត្រូវបណ្តោយទៅតាមធម្មជាតិដូចសម័យមុននោះទេ ហើយក៏មិនមានអ្នកណាម្នាក់អាចមកកំណត់ជីវិតរបស់អ្នកថា នឹងត្រូវមានកូនប៉ុន្មាននោះដែរ គឺមានតែអ្នក និងស្វាមីរបស់អ្នកប៉ុណ្ណោះ ដែលជាអ្នកសម្រេចចិត្តរួមគ្នាថា នៅក្នុងគ្រួសាររបស់អ្នកនឹងត្រូវមានសមាជិកចំនួនប៉ុន្មាននាក់។ នេះជារឿងពិត ហើយក៏ជារឿងដែលមនុស្សគ្រប់គ្នាអាចធ្វើបាន ព្រោះពួកគេបានធ្វើការពន្យារកំណើត។ ការពន្យារកំណើតមានច្រើនបែបច្រើនយ៉ាងណាស់សម្រាប់ឱ្យអ្នកជ្រើសរើសមានដូចជា ៖ស្រោមអនាម័យ : មានប្រសិទ្ធភាពសំខាន់ៗពីរយ៉ាងគឺ ការពារអ្នកពីការឆ្លងជំងឺកាមរោគផ្សេងៗនិងការពារមិនឱ្យមានកូន។ ស្រោមអនាម័យភាគច្រើនត្រូវបានយកមកប្រើសម្រាប់ភាគីខាងបុរស ដើម្បីទប់ស្កាត់កុំឱ្យទឹកកាមហៀរចូលទៅក្នុងស្បូនដែលជាមូលហេតុនៃការបង្កកំណើត។ ចំណែកឯស្រោមអនាម័យសម្រាប់ស្ត្រីវិញត្រូវបានប្រើសម្រាប់ការពារមិនឱ្យទឹកកាមបុរសចូលទៅក្នុងស្បូនបានដូចគ្នា ប៉ុន្តែវាហាក់ដូចជាមានការពិបាកក្នុងការប្រើបន្តិច ព្រោះវាតម្រូវឱ្យមានការដាក់បញ្ចូលទៅផ្នែកខាងក្នុងនៃប្រដាប់ភេទរបស់ស្ត្រី។

កងដាក់ដៃ : ជាការដាក់បញ្ចូលបំពង់ទន់តូចៗនៅផ្នែកខាងក្រោមនៃស្បែកដើមដៃរបស់ស្ត្រី។ បំពង់អស់ទាំងនេះមាននាទីជាអ្នកធ្វើឱ្យទឹករំអិលមាត់ស្បូនឡើងខាប់ ការពារមិនឱ្យមេជីវិតឈ្មោលជ្រាបចូលមកក្នុងស្បូនបាន។

កងដាក់ក្នុងស្បូន : ជាការពន្យារកំណើតដោយការដាក់ឧបករណ៍ទន់តូចមួយដែលអាចបត់បានចូលទៅក្នុងស្បូន ដើម្បីរារាំងការជ្រាបចូលនៃមេជីវិតឈ្មោលទៅក្នុងស្បូន។ថ្នាំពន្យារកំណើត : ធ្វើឱ្យទឹករំអិលមាត់ស្បូនឡើងខាប់ ដើម្បីរារាំងកុំឱ្យទឹកកាមបុរសអាចជ្រាបចូលទៅក្នុងស្បូនបាន។ ការលេបថ្នាំពន្យារកំណើតត្រូវធ្វើឱ្យបានទៀងទាត់ និងត្រឹមត្រូវទៅតាមការកំណត់ដែលបានបង្ហាញនៅលើសម្បកថ្នាំ ទើបមានប្រសិទ្ធភាពខ្ពស់។

ថ្នាំចាក់ : ជាការចាក់ថ្នាំរៀងរាល់3ខែម្តង។ តួនាទីរបស់ថ្នាំចាក់ក៏មិនខុសអីពីការពន្យារកំណើតផ្សេងៗទៀតដែរ ប៉ុន្តែតម្រូវឱ្យអ្នកចងចាំឱ្យបានល្អពីពេលវេលាដែលត្រូវចាក់ជាថ្មីម្តងទៀត។ចំពោះវិធីពន្យារកំណើតតាមបែបសម័យថ្មីនេះ អ្នកត្រូវចាំថា៖
– គ្រប់វិធីនៃការពន្យារកំណើតគឺសុទ្ធតែត្រូវការពឹងពាក់លើគ្រូពេទ្យជំនាញ ទើបមានសុវត្ថិភាព និងមានប្រសិទ្ធភាព។
– ជ្រើសរើសវិធីពន្យារកំណើតណាមួយដែលអាចផ្តល់នូវភាពងាយស្រួល មានសុវត្ថិភាព និងមានប្រសិទ្ធភាពបំផុតចំពោះរូបអ្នក។
– សាកសួរព័ត៌មានឱ្យបានច្បាស់ពីវិធីប្រើប្រាស់ពីអ្នកជំនាញ (ថ្នាំពន្យារកំណើតតែងតែប្រាប់ពីរបៀបប្រើប្រាស់នៅលើសម្បកកញ្ចប់ ប៉ុន្តែបើអ្នកនៅតែមិនទាន់យល់ច្បាស់ពីរបៀបប្រើប្រាស់ទេនោះ សូមកុំខ្ចិលច្រអូសក្នុងការទៅជួបគ្រូពេទ្យជាថ្មីម្តងទៀត ដើម្បីសាកសួរពីវិធីប្រើឱ្យបានច្បាស់។
-សូមចាំថា ការពន្យារកំណើតអាចមានប្រសិទ្ធភាពពិតប្រាកដលុះត្រាតែអ្នកប្រើវាបានត្រឹមត្រូវ។
– ស្រោមអនាម័យមានសមត្ថភាពពីរយ៉ាងគឺ ការពារមិនឱ្យមានកូន និងការពារខ្លួនអ្នកពីការឆ្លងជំងឺមួយចំនួនដូចជា កាមរោគ និងជំងឺអេដស៍ជាដើម ប៉ុន្តែមិនមែនមានន័យថា វិធីនៃការពន្យារកំណើតផ្សេងទៀតសុទ្ធតែអាចធ្វើបានដូចគ្នានោះទេ។ ដូច្នេះការការពារខ្លួនពីការឆ្លង ឬចម្លងជំងឺផ្សេងៗគឺជារឿងមួយផ្សេងទៀតដែលអ្នកត្រូវដឹង។
– មានស្ត្រីមួយចំនួនបាននិយាយថា គាត់មិនអាចពន្យារកំណើតបានទេ ព្រោះរាល់ពេលពន្យារកំណើតតែងធ្វើឱ្យគាត់មិនស្រួលក្នុងខ្លួនទាល់តែសោះ។ រឿងបែបនេះវាអាចកើតមាននៅក្នុងរយៈពេល1 ឬ2ខែដំបូង ហើយក៏បាត់់ទៅវិញ ដូច្នេះសូមកុំអាលរាថយ ហើយបោះបង់ចោលការពន្យារកំណើតឱ្យសោះ ព្រោះការពន្យារកំណើតមានច្រើនបែបច្រើនយ៉ាងអាចឱ្យអ្នកយកទៅសាកល្បង វិធីមួយនេះអាចមិនសមជាមួយអ្នក តែវិធីផ្សេងអាចនឹងផ្តល់នូវភាពងាយស្រួលដល់អ្នកក៏ថាបានដែរ។ សូមកុំបារម្ភទោះជាអ្នកជ្រើសប្រើវិធីពន្យារកំណើតបែបណាក៏ដោយ ព្រោះគ្រូពេទ្យជំនាញតែងតែប្រាប់អ្នកថា គ្រប់វិធីនៃការពន្យារកំណើតគឺមិនធ្វើឱ្យប៉ះពាល់ដល់សុខភាពនោះទេ៕

June 26, 2019

ត្រីប្រាកំពូលត្រីទឹកសាប មានអាស៊ីតខ្លាញ់អូមេហ្កា 3ខ្ពស់ ល្អចំពោះសុខភាព

ត្រីទឹកសាបក៏មានសារធាតុអូមេហ្កា 3 ខ្ពស់ដែរ ជាពិសេសនោះគឺ ត្រីប្រា ត្រីរ៉ស់ និងត្រីឆ្ពុងសតែម្ដង ដោយមិនចាំបាច់ចំណាយថវិកាច្រើនទៅទិញត្រីសមុទ្រដែលមានតម្លៃថ្លៃៗមកទទួលទាន ដើម្បីទទួលបានសារធាតុអាស៊ីតខ្លាញ់ អូមេហ្កា 3 ច្រើននោះទេ។ភាគច្រើនឱ្យតែឮពាក្យថា “អូមេហ្កា-3” យើងច្រើនតែនឹកទៅដល់អាស៊ីតខ្លាញ់ដែលមាននៅក្នុងសាច់ត្រីសមុទ្រ ដូចជា ត្រីសាលម៉ុន ត្រីេ្រថៅត៍ ត្រីសាឌីន ត្រីធូណា ត្រីមែកខារេល ដែលជាត្រីនាំចូលមកពីបរទេស និងមានតម្លៃថ្លៃៗ ដោយមិនសូវមានអ្នកគិតដល់ត្រីទឹកសាបដែលមានអាស៊ីតខ្លាញ់អូមេហ្កា3នេះខ្ពស់នៅក្នុងស្រុកឡើយ គឺមានខ្ពស់មិនចាញ់ត្រីសមុទ្រស្រុកក្រៅឡើយ ជាពិសេសគឺ “ត្រីប្រា” របស់ខ្មែរយើងតែម្ដង គឺជាត្រីទឹកសាបដែលមានអូមេហ្កា3ខ្ពស់បំផុតដល់ទៅ 2,570 មិល្លីក្រាមក្នុង 100 ក្រាម ច្រើនជាងត្រីសមុទ្រខ្លះដូចជា “ត្រីសាលម៉ុន” ទៅទៀត ព្រោះត្រីសាលម៉ុនមានអូមេហ្កា3 ប្រមាណត្រឹមតែ 1,000 – 1,700 មិល្លីក្រាមក្នុង 100 ក្រាមប៉ុណ្ណោះ។ ចំណែក “ត្រីរ៉ស់” ក៏មានអូមេហ្កា3 ខ្ពស់ដែរ គឺមានដល់ទៅ 870 មិល្លីក្រាមក្នុង 100 ក្រាមឯណោះ។ បន្ទាប់មកទៀតគឺ “ត្រីឆ្ពុង” ដោយមានអូមេហ្កា3 ប្រមាណជា 310 មិល្លីក្រាមក្នុង 100ក្រាម។ ហើយប្រភេទត្រីទឹកសាបកម្ពុជាអស់ទាំងនេះ មិនពិបាកឱ្យយើងរកទិញឡើយ និងថែមទាំងមានតម្លៃថោកជាងត្រីសមុទ្រទឹកប្រៃទៅទៀត។

ខាងក្រោមនេះ គឺជាអត្ថប្រយោជន៍របស់ “អូមេហ្កា3” ដោយ ឡារ៉ែន ជឿថា ពេលលោកអ្នកបានអានហើយ មុខជាចង់ទៅទិញយកមកទទួលទានជាក់ជាមិនខាន ៖* ការពារជំងឺបេះដូង និងសរសៃឈាម ព្រោះអូមេហ្កា3 នឹងជួយការពារការប្រមូលផ្ដុំសារជាតិខ្លាញ់បង្កកខ្លួន ឬខូលេស្តេរ៉ូល ដែលជាមូលហេតុធ្វើឱ្យសរសៃឈាមញ៉ុកណែន។
* បំប៉នខួរក្បាល ព្រោះអាស៊ីតខ្លាញ់ DHAដែលមានក្នុងអូមេហ្កា3 នឹងជួយបង្កើនប្រសិទ្ធភាពក្នុងការចងចាំ ការស្វែងយល់សមត្ថភាពក្នុងការគិតវិភាគ អារម្មណ៍ និងផ្នែកផ្សេងៗជាច្រើនទៀត រហូតដល់បណ្ដាលឱ្យកើតមានជាពាក្យមួយឃ្លាថា “ញ៉ាំត្រីច្រើនឆ្លាត” រហូតមកដល់សព្វថ្ងៃទៀតផង។
* បំប៉នប្រព័ន្ធប្រសាទ និងភ្នែក ព្រោះអូមេហ្កា3 ជាអាស៊ីតខ្លាញ់ដែលចាំបាច់ដល់ការសាងជញ្ជាំងកោសិកា។
* អាស៊ីត EPA នៅក្នុងខ្លាញ់ត្រី មានតួនាទីសំខាន់ក្នុងការព្យាបាលជំងឺសោកសៅ អារម្មណ៍មិនស្ងប់ ឬគេងមិនលក់។
* ជួយកាត់បន្ថយភាពប្រថុយក្នុងការកើតរោគមហារីកប្រភេទផ្សេងៗមួយចំនួន។តែបើអ្នកជាមនុស្សដែលមិនចូលចិត្តទទួលទានសាច់ត្រី ឬពិបាករកត្រីមកទទួលទាននោះក៏នៅមានអាហារប្រភេទផ្សេងៗជាច្រើនទៀតដែលមានអាស៊ីតខ្លាញ់អូមេហ្កា3 ខ្ពស់ ដែលអាចឱ្យអ្នកមានភាពងាយស្រួលក្នុងការទទួលទាន ដោយ ឡារ៉ែន នឹងលើកយកមកបង្ហាញប្រិយមិត្តអ្នកអាននៅលេខក្រោយទៀត ដូច្នេះសូមកុំភ្លេចរង់ចាំតាមដានណា៎៕

June 26, 2019

ចូលដល់វ័យចំណាស់ហើយ តើគួរហាត់ប្រាណដែរឬទេ?

ថ្មីៗនេះសមាគមន៍ជំងឺបេះដូងអាមេរិកបានអះអាងថា ការលើកដុំដែកទម្ងន់តូចៗ អាចជួយឱ្យមនុស្ស ចាស់ និងអ្នកជំងឺបេះដូងឱ្យមានសុខភាពរឹងមាំជាងមុន។ គេកត់សម្គាល់ឃើញថា មនុស្សចាស់ភាគច្រើនមានម៉ាសសាច់ដុំថយចុះនៅពេលដែលមានអាយុកាន់តែច្រើន។ ការឈានចូលវ័យ40ឆ្នាំឡើងទៅ មនុស្សយើងបានបាត់បង់3% ទៅ5%នៃម៉ាសសាច់ដុំក្នុងរយៈពេល10ឆ្នាំម្តង ហើយការថយចុះនោះបានកើនឡើងពី1%ទៅ 2%ក្នុងមួយឆ្នាំៗក្រោយពីអាយុ50ឆ្នាំ។

សាច់ដុំជួយឱ្យយើងមានភាពរឹងមាំ វាមានតួនាទីជួយដុតកាឡូរី និងជួយឱ្យយើងអាចរក្សាទម្ងន់ ហើយវាក៏ជាកត្តាលីករដ៏សំខាន់ ដើម្បីជួយទប់លំនឹងរបស់យើង និងផ្តល់នូវភាពរឹងមាំដល់រាងកាយផងដែរ។ មិនមានម៉ាសសាច់ដុំ យើងអាចបាត់បង់ភាពឯករាជ្យ និងចលនារបស់យើង។ ម៉ាសសាច់ដុំអាចកើនឡើងគ្រប់វ័យ ដោយឆ្លើយតបទៅនឹងការធ្វើលំហាត់ប្រាណ។ នៅក្នុងការស្រាវជ្រាវនៃការលើកដុំដែក មនុស្ស100នាក់ដែលមានអាយុពី72ឆ្នាំ ទៅ98ឆ្នាំ ដែលជាមធ្យមមានអាយុ87ឆ្នាំ បានធ្វើការលើកដុំដែក3ដងក្នុងមួយសប្តាហ៍ ក្នុងរយៈពេល10សប្តាហ៍។ នៅពេលបញ្ចប់នៃការស្រាវជ្រាវ គេទទួលបានការកើនឡើងម៉ាសភ្លៅ 2.7% ល្បឿននៃការដើរកើនឡើង12% និងភាពរឹងមាំនៃជើងបានកើនឡើង13%។ នៅក្នុងការស្រាវជ្រាវស្រដៀងគ្នាដែលទៅលើមនុស្សដែលមានអាយុចន្លោះពី65ឆ្នាំ ទៅ79ឆ្នាំ អ្នកដែលលើកដុំដែក3ដងក្នុងមួយសប្តាហ៍ក្នុងរយៈពេល3ខែ បានកើនឡើងការដើរដល់ទៅ38% ដោយមិនមានការកើនឡើងនៃម៉ាសដែលគួរឱ្យកត់សម្គាល់នោះទេ។
សមាគមន៍អ្នកជំងឺបេះដូង បានអះអាងទៀតថា ដូចនេះ មនុស្សចាស់ដែលមានអាយុជាមធ្យម87ឆ្នាំ ដែលលើកដុំទម្ងន់ រកឃើញថា ពួកគាត់មានសាច់ដុំរឹងមាំ ដោយអាចឡើងកាំជណ្តើរបានច្រើនកាំ ខណៈដែលការសិក្សាលើស្រ្តីវ័យចំណាស់ ដែលមានជំងឺបេះដូង រយៈពេល10សប្តាហ៍ក៏បង្ហាញថា កម្លាំងសាច់ដុំបានកើតឡើង43% ហើយអាចដើរបានចម្ងាយកើនឡើង46% ក្នុងអំឡុងពេលដើរ6នាទី។ អ្នកជំងឺបេះដូងអាចលើដុំទម្ងន់ចាប់ពី0.5គីឡូក្រាម ទៅ2គីឡូក្រាមបាន។ យ៉ាងណាមិញអ្នកឯកទេសវេជ្ជសាស្ត្រថែទាំជំងឺមនុស្សចាស់ បានផ្តល់នូវគនឹ្លះខ្លះៗដល់មនុស្សចាស់ ដែលចង់រស់នៅប្រកបដោយសុខភាពល្អថា សេចក្តីផ្តើមនៃការហាត់ប្រាណគឺ ដើម្បីស្ថាបនាឆ្អឹង និងសាច់ដុំ កាត់បន្ថយសម្ពាធឈាមខ្ពស់និងកាត់បន្ថយឧបទ្ទវហេតុនៃជំងឺបេះដូង ទឹកនោមផ្អែម ព្រមទាំងមហារីកពោះវៀនធំ និងធ្វើឱ្យធូរស្រាលការឈឺចាប់ដែលបណ្តាលមកពីជំងឺរលាកសន្លាក់ផងដែរ។ ការហាត់ប្រាណធ្វើឱ្យប្រសើរដល់ដំណេក និងអារម្មណ៍ផងដែរ។ ការសិក្សាជាច្រើនបានបង្ហាញថា ការហាត់ប្រាណនាំទៅដល់អាយុវែង។ ដូចនេះតើអ្នករង់ចាំអ្វីទៀត? ការហាត់ប្រាណក្នុងរបៀបរស់នៅ ការស្វែងរកឱកាសដើម្បីឱ្យនៅតែសកម្មរាងកាយក្នុងការងារប្រចាំថ្ងៃរបស់អ្នកអាចជាអ្វីដែលអ្នកត្រូវធ្វើ ដើម្បីទទួលបានការជំរុញនូវអ្វីដែលអ្នកកំពុងស្វែងរក។ អ្នកជំនាញសុខភាពជាច្រើនបានយល់ស្របគ្នាថា អ្នកដែលអង្គុយតែមួយកន្លែង (អ្នកធ្វើការការិយាល័យជាដើម) ដែលមានបំណងចង់ឱ្យមានភាពសកម្មរាងកាយនោះ ត្រូវការពេលវេលាតែ30នាទីប៉ុណ្ណោះក្នុងមួយថ្ងៃ ដើម្បីផលប្រយោជន៍ចំពោះសុខភាព។ នោះមានន័យថា អ្នកអាចដើរទៅចំណតរថយន្តក្រុង10នាទី បន្ទាប់មកពេលថ្ងៃអ្នកអាចដើរ20នាទីទៀត ឬដើរធ្វើការងារផ្ទះដូចជា ប្រើម៉ាស៊ីនប៊ូមធូលីនៅលើកម្រាលឥដ្ឋ20នាទីទៀត នោះអ្នកនឹងអាចក្លាយជាមនុស្សដែលមានភាពសកម្មរាងកាយហើយ។ ប៉ុន្តែត្រូវចាំថា អ្នកត្រូវធ្វើបែបនេះជាប្រចាំរៀងរាល់ថ្ងៃ។

ការហ្វឹកហាត់ខ្លាំងក្លាក្នុងការហាត់ប្រាណច្រើនបែបនោះគឺ អ្នកបង្កើនថាមពលសាច់ដុំរបស់អ្នករយៈពេលយូរជាបន្តបន្ទាប់។ ជាឧទាហរណ៍អ្នកអាចហាត់ប្រាណលើកដុំដែក និងបង្កើនទម្ងន់ដុំដែកជាបន្តបន្ទាប់បន្តិចម្តងៗ។ ការហ្វឹកហាត់ខ្លាំងក្លាបែបនេះ វាជួយកាត់បន្ថយការស្វិតសាច់ដុំ និងការបាត់បង់ឆ្អឹង (Bone Loss) ដែលកើតមាននៅពេលមនុស្សមានវ័យកាន់តែចាស់។ ការកាត់បន្ថយភាពខ្លាំងក្លានៃការហាត់បែបនេះ ក៏ជាការចាំបាច់ជាពិសេសផងដែរ នៅពេលវាបានបង្កើតកម្លាំងតុល្យភាព និងម៉ាសឆ្អឹង (Bone mass) គ្រប់គ្រាន់ល្មម។ ការធ្វើបែបនេះ ដើម្បីជាការការពារការបាក់ឆ្អឹង ពិសេសឆ្អឹងត្រគាកដែលជាមូលហេតុចម្បងបំផុតនៃពិការភាពរាងកាយលើមនុស្សចាស់។ ការហាត់ប្រាណ អាអេរ៉ូប៊ិក (Aerobic exercise) ជាប្រភេទនៃសកម្មភាពហាត់ប្រាណដែលយើងតែងគិតដល់ នៅពេលយើងគិតពីការហាត់ប្រាណ។ វាផ្តល់លទ្ធផលដោយបង្កើនចង្វាក់បេះដូង។ ការហាត់ប្រាណបែបនេះ រួមមានការរត់ត្រឹកៗ ការហែលទឹក លោតខ្សែ ហើយសូម្បីការដើរ ការជិះកង់ និងរាំក៏អាចត្រូវបានចាត់ទុកក្នុងប្រភេទហាត់ប្រាណនេះដែរ៕

June 25, 2019

ស្វែងយល់ពីអាការប្រតិកម្មចាញ់ញើសខ្លួនឯង

អាការជំងឺចាញ់ញើសខ្លួនឯង គឺជាជំងឺដែលត្រូវបានគេចាត់ទុកថា ជាជំងឺចាញ់មួយប្រភេទ ដែលតែងកើតឡើងចំពោះក្រុមមនុស្សងាយនឹងកើតមានអាការអាលែកហ្ស៊ីខ្លាំង ជាពិសេសគឺចំពោះអ្នកដែលមានជំងឺសើរស្បែក ដោយវាកើតឡើងនៅលើស្បែក ហើយមានអាការដូចជា ឡើងកន្ទួលក្រហម រោលដូចច្រែងថ្ងៃ និងអុចៗក្រហមនៅលើស្បែក ហើយរមាស់ជាដើម។

កំណត់សម្គាល់អាការជំងឺចាញ់ញើសខ្លួនឯងដូចម្ដេចខ្លះ?
ភាគច្រើនគេប្រទះឃើញនៅជុំបរិវេណ-ក ដើមទ្រូង មុខ ស្បែកខ្នង ស្បែកដៃ និងជើង ។ វាមានអាការរមាស់ ឡើងកន្ទួលក្រហមភ្លាមៗ បន្ទាប់ពីអ្នកបែកញើសខ្លាំង។ បន្ទះកន្ទួលក្រហមៗ អាចមានសណ្ឋានដូចជា គ្រាប់កាំភ្លើងអុចៗ បន្ទះកន្ទួលៗ និងជារង្វង់ ហើយមានអាការរមាស់ និងក្រហល់ក្រហាយលើស្បែក។

មូលហេតុអ្វីបណ្ដាលឱ្យកើតមានអាការចាញ់ញើស
វាកើតឡើងពីកម្ដៅ ដែលមានដូចជា ការធ្វើការងាររក្រោមកម្ដៅថ្ងៃ រាងកាយឡើងក្ដៅ ងូតទឹកក្ដៅ ឬនៅក្នុងបន្ទប់ស្ទីមសូណាជាដើម ឬការស្លៀកពាក់ខោអាវតឹងណែន ដែលបណ្ដាលឱ្យស្អុះស្អាប់ ការទទួលទានអាហារដែលមានរសជាតិហឹរខ្លាំង ការហាត់ប្រាណខ្លាំងពេកទាំងមិនសម្អាតខ្លួនឱ្យបានស្អាត ដែលទង្វើទាំងអស់នេះហើយដែលបណ្ដាលឱ្យរាងកាយរបស់អ្នកបញ្ចេញញើសមកខាងក្រៅ ហើយស្បែករបស់អ្នកក៏ចាប់ផ្ដើមប្រតិកម្មចាញ់ជាមួយញើស ដោយសារកង្វះអនាម័យខ្លួនប្រាណ ទើបធ្វើឱ្យអ្នកមានអាការរមាស់ភ្លាមៗនិងរោលពេញខ្លួន។

តើគួរព្យាបាលដោយវិធីណា?
1. ការការពារទុកជាមុន : ចៀសវាងទង្វើដែលធ្វើឱ្យអ្នកបែកញើសខ្លាំង ឬបើបែកញើសហើយ ត្រូវប្រញាប់សម្អាតខ្លួនឱ្យបានស្អាតភ្លាមៗជាមួយនឹងសាប៊ូដុសខ្លួន។2 . ចៀសវាងកន្លែងហាត់ប្រាណដែលមិនមានខ្យល់បរិសុទ្ធចេញចូលបានល្អ :ប្រសិនបើអ្នកដឹងខ្លួនថា ស្បែករបស់អ្នកងាយកើតប្រតិកម្មចាញ់ញើសនោះ អ្នកគួរចៀសវាងកន្លែងហាត់ប្រាណណាដែលហប់ៗ បិទជិត មិនមានខ្យល់ចេញចូលល្អ។ជាពិសេសពេលហាត់ប្រាណរួច ចៀសវាងការងូតទឹកក្ដៅ ឬចូលស្ទីមសូណាជាដើម។ បើមិនដូច្នោះទេ ស្បែករបស់អ្នកក៏កាន់តែធ្វើឱ្យអ្នកក្ដីវិតក្កកង្វល់លើសដើម ហើយចំណាយប្រាក់កាន់តែច្រើនក្នុងការព្យាបាល។
3. ទទួលទានអាហារដែលត្រឹមត្រូវ : អ្នកគួរចៀសវាងអាហារដែលមានរសជាតិហឹរខ្លាំង ប្រៃខ្លាំង ឬក៏អ្នកអាចបន្ថយបរិមាណនៃការទទួលទានក៏បាន។ ចៀសវាងទទួលទានភេសជ្ជៈក្ដៅៗ កាត់បន្ថយការទទួលទានគ្រឿងស្រវឹង និងទទួលទានបន្លែផ្លែឈើឱ្យបានច្រើន៕

June 25, 2019

មូលហេតុដែលធ្វើឱ្យអ្នកក្លាយជាអ្នកជំងឺមហារីកស្បូន

ស្បូនជាផ្នែកមួយដ៏សំខាន់បំផុតសម្រាប់មនុស្សស្រីយើង វាជាទីតាំងបង្កកំណើតដែលអាចឱ្យស្ត្រីយើងរក្សាទារកក្នុងផ្ទៃឱ្យលូតលាស់ធំធាត់ពីមួយថ្ងៃទៅមួយថ្ងៃ ប៉ុន្តែប្រសិនបើស្បូនមានបញ្ហានោះ ឱកាសនៃការធ្វើជាអ្នកម្តាយ ដែលស្ត្រីភាគច្រើនតែងប្រាថ្នាចង់បាននោះ ក៏នឹងត្រូវរលាយបាត់ទៅវិញដែរ។ ហេតុដូច្នេះហើយទើបការមើលថែទាំស្បូនឱ្យគេចផុតពីជំងឺមហារីកគឺជារឿងចាំបាច់បំផុតដែលស្ត្រីគ្រប់រូបមិនគួរមើលរំលង។ ជំងឺមហារីកស្បូនមានច្រើនប្រភេទច្រើនយ៉ាង ហើយអ្នកក៏មិនអាចដឹងដោយខ្លួនឯងបានដែរថា តើអ្នកកំពុងប្រឈមនឹងជំងឺប្រភេទនេះដែរ ឬអត់។ មហារីកស្បូនមិនមែនចេះតែកើតមានចំពោះស្ត្រីគ្រប់គ្នានោះទេ គឺវាអាចកើតឡើងតាមរយៈលក្ខខណ្ឌផ្សេងៗគ្នា ហើយខាងក្រោមនេះគឺជាមូលហេតុតូចៗដែលអាចរួមផ្សំចូលគ្នា ហើយបង្កឱ្យក្លាយជាជំងឺមហារីកដែលស្ត្រីគ្រប់រូបគួរប្រុងប្រយ័ត្ន ៖1. ធាត់ខ្លាំង មានជាតិខ្លាញ់លើសកំណត់
2. ជំងឺទឹកនោមផ្អែម
3. លើសឈាម
4. ស្ត្រីដែលមានរដូវមិនទៀងទាត់(ម្តងមានម្តងរាំង)
5. ឆាប់មានរដូវពេក ហើយក៏ឆាប់បាត់រដូវពេក
6. ស្ត្រីអារ(ស្ត្រីដែលមិនអាចមានកូន)
7. ស្ថានភាពអូវ៉ែអ្នកជំងឺមានពកច្រើន
8. អ្នកមានជំងឺមហារីកអូវ៉ែ
9. ស្ត្រីដែលប្រើប្រាស់ Estrogen

អ្នកជំនាញតែងណែនាំឱ្យអ្នកទៅពិនិត្យតាមដានរកជំងឺនេះរាល់12ខែម្តង។ ដូច្នេះបើទោះជាអ្នកធ្លាប់បានពិនិត្យម្តង ឬពីរដងរួចទៅហើយក្តីនិងទទួលបាននូវលទ្ធផលល្អជាធម្មតាក៏មិនមែនមានន័យថា អ្នកអាចគេចផុតពីជំងឺនេះមួយជីវិតដែរ។ ដូច្នេះការទៅជួបគ្រូពេទ្យ ដើម្បីពិនិត្យរកមើលជំងឺមហារីកស្បូនរៀងរាល់12ខែម្តង គឺគួរតែអនុវត្តឱ្យបានទៀងទាត់ ហើយបើអ្នកក៏ជាមនុស្សម្នាក់ដែលមានផ្ទុកនូវចំណុចមួយចំនួនដូចរៀបរាប់ខាងលើទៀតនោះគឺរឹតតែត្រូវប្រុងប្រយ័ត្នទៅទៀត៕

June 25, 2019

ត្រូវតែដឹង… អាការឈឺពោះផ្នែកខាងស្ដាំបញ្ជាក់ប្រាប់ពីជំងឺអ្វីខ្លះ?

នរណាៗក៏ដឹងដែរថា អាការឈឺពោះនេះ នៅពេលដែលវាកើតឡើងហើយ តែងតែសាងនូវក្ដីលំបាកដល់រាងកាយរបស់យើងខ្លាំងណាស់ មិនថាតែឈឺពោះផ្នែកខាងឆ្វេង ឬផ្នែកខាងស្ដាំឡើយ។ បើសិនជាអាការឈឺក្នុងលក្ខណៈនោះកើតឡើងចំពោះយើងញឹកញាប់ នោះវាអាចជាសញ្ញាមួយដែលប្រាប់ឱ្យយើងដឹងអំពីបញ្ហាសុខភាពដែលកំពុងជិតមកដល់ ដូច្នេះសូមឱ្យនឹកឃើញជាប់ជានិច្ចថា ក្នុងរៀងរាល់អាការឈឺពោះ ច្បាស់ជាមានដើមហេតុរបស់វាទាំងអស់។ នៅពេលនេះ យើងនាំគ្នាមកយល់ដឹងអំពីសញ្ញាអាក្រក់ដែលកើតឡើងនៅពេលឈឺពោះផ្នែកខាងស្ដាំ ដែលបើសិនជាវាកើតអាការឈឺញឹកញាប់ជាបន្តបន្ទាប់ក្នុងលក្ខណៈផ្សេងៗនោះ មានន័យថារាងកាយរបស់យើងកំពុងបញ្ជូនសញ្ញាប្រាប់អំពីជំងឺអាក្រក់ណាមួយហើយ…។

អាការឈឺពោះផ្នែកខាងស្ដាំលើ(ម្ដុំៗក្រោមឆ្អឹងជំនីខាងស្ដាំ)នៅពេលលោកអ្នកកើតមានអាការឈឺពោះផ្នែកខាងស្ដាំលើ ហើយអាការឈឺនោះច្រើនតែកើតឡើងក្រោយពេលទទួលទានអាហារដែលមានជាតិខ្លាញ់ច្រើន នោះអាចមានន័យថា លោកអ្នកកំពុងមានភាពប្រថុយប្រថានក្នុងការកើតជំងឺក្រួសក្នុងថង់ទឹកប្រមាត់ រួមទាំងជំងឺថ្លើមផងដែរ។ ចំណុចសង្កេតសំខាន់ដែលនឹងជួយបញ្ជាក់បានថា អាចជាជំងឺទាំងនោះគឺ ពេលយកដៃទៅចុចសង្កត់លើបរិវេណដែលមានអាការឈឺនោះ អាចនឹងប៉ះនឹងដុំសាច់រឹងៗ ចំណែកអាការដែលតាមមកនោះគឺ មានអាការខ្លួនប្រាណឡើងលឿង និងភ្នែកលឿង។

អាការឈឺពោះផ្នែកខាងស្ដាំក្រោមពេលកើតមានអាការឈឺពោះផ្នែកខាងស្ដាំក្រោម ចាប់ផ្ដើមតាំងពីម្ដុំជុំវិញរន្ធផ្ចិតរហូតទៅដល់ក្រោមពោះផ្នែកខាងក្រោមស្ដាំ។ ពេលយកដៃទៅស្ទាបលើបរិវេណដែលមានអាការឈឺនោះ នឹងមានប៉ះនឹងដុំសាច់ សង្កត់ពីលើ ហើយមានអាការឈឺ ប្រកបនឹងការឈឺចុកសៀតគ្រប់ពេលវេលា បើមានសភាពបែបនេះ ចូរសន្និដ្ឋានទុកជាបឋមថា អាចជារោគសញ្ញារលាកខ្នែងពោះវៀនហើយ តែបើមានអាការឈឺស្រដៀងមានខ្យល់នៅក្នុងពោះ មានអាការរមូរៗពោះរួមជាមួយផងនោះ អាចបណ្ដាលមកពីការធ្វើការងារខុសប្រក្រតីរបស់ពោះវៀនធំ។

អាការឈឺពោះផ្នែកខាងស្ដាំក្រោមបំផុតអាការឈឺពោះផ្នែកខាងស្ដាំក្រោមបំផុតនេះ នឹងមានអាការឈឺឡើងរឹងកើតឡើងជាដំណាក់ៗ មានអាការឈឺផ្នែកខាងក្រោមពោះបំផុតផ្នែកខាងស្ដាំរាលដាលទៅដល់ដើមភ្លៅ ដែលបង្ហាញឱ្យដឹងថា អាចមានបញ្ហាសុខភាពកើតឡើងនៅម្ដុំតម្រងនោម តែបើសិនមានអាការគ្រុនក្ដៅខ្លាំង មានអារម្មណ៍រងាញាក់ ហើយថែមទាំងមានធ្លាក់ស(ចំពោះស្រ្តី) រួមជាមួយផងនោះ អាការក្នុងលក្ខណៈបែបនេះ គឺជាសញ្ញារបស់ជំងឺរលាកដៃស្បូន ដែលបើសិនជាយើងយកដៃស្ទាបត្រង់កន្លែងដែលឈឺ នឹងប៉ះដុំសាច់ទៀតផង។

អាការឈឺពោះផ្នែកខាងស្ដាំក្រោមឆ្អឹងជំនី ពេលមានអាការឈឺពោះផ្នែកខាងស្ដាំ ឈឺបែបក្រហាយៗនៅក្រោមឆ្អឹងជំនី ដោយចំពោះអ្នកខ្លះអាចមានអាការឈឺចុកសៀត និងចុកពោះរួមជាមួយផង នោះមានន័យថា អាចជាការធ្វើការខុសប្រក្រតីរបស់ពោះវៀនតូច។ មានមូលហេតុមកពីការកើតប្រតិកម្មចាញ់ប្រូតេអុីនគ្លុយតេន ហុចផលប៉ះពាល់ធ្វើឱ្យពោះវៀនមិនអាចបឺតជ្រាបអាហារបានល្អដូចប្រក្រតី ធ្វើឱ្យកើតអាការឈឺពោះ។ បើសិនបណ្ដោយទុកមិនធ្វើការព្យាបាលរយៈពេលយូរ អាការទាំងនេះនឹងប្រមូលសន្សំរហូតកើតជាសភាវរាករូសរ៉ាំរ៉ៃ ហើមពោះ ហើយថែមទាំងអាចវិវឌ្ឍទៅជាជំងឺរលាកពោះវៀនតូចបានទៀតផង។

អាការឈឺពោះផ្នែកខាងស្ដាំកណ្ដាល(ចង្កេះខាងស្ដាំ)បើសិនមានអាការឈឺពោះផ្នែកខាងស្ដាំកណ្ដាល រួមទាំងបន្ទោបង់មកមានឈាម ឬប្រព័ន្ធបន្ទោបង់មានភាពខុសប្រក្រតីនោះ អាចជាសញ្ញាដាស់តឿនថា អ្នកកំពុងជិតកើតជំងឺរលាកពោះវៀនធំហើយ ដែលបើសិនជាពិនិត្យទៅឃើញមានដុំសាច់ផងនោះ ក៏អាចជាការបង្ហាញឱ្យឃើញថា អ្នកអាចនឹងកើតរោគដុះសាច់ក្នុងពោះវៀនធំ។ តែបើសិនជាមានអាការឈឺពោះផ្នែកខាងស្ដាំ ចាប់ផ្ដើមពីចង្កេះរាលដាលទៅដល់គល់ភ្លៅវិញនោះ អាចនឹងមានភាពប្រថុយប្រថានក្នុងការកើតដុំក្រួសនៅក្នុងក្រលៀន ឬបើមានអាការឈឺចង្កេះខាងស្ដាំ ព្រមទាំងមានគ្រុនក្ដៅរងា រួមទាំងមានទឹកមូត្រពណ៌កករល្អក់ផង ក៏អាចជាសញ្ញាមួយប្រាប់ថា អ្នកអាចនឹងកើតជំងឺរលាកបំពង់តម្រងនោម។

អាការឈឺពោះខាងស្ដាំពេលមានគភ៌ត្រូវតែសុំប្រាប់ស្រ្តីដែលកំពុងមានគភ៌នៅពេលនេះថា អាការឈឺពោះខាងស្ដាំដែលកើតឡើងក្នុងខណៈដែលយើងកំពុងជិតមានកូនតូចនោះ មិនមែនជារឿងដែលត្រូវកង្វល់នោះទេ ព្រោះបើមានអាការឈឺពោះ មិនថាតែខាងស្ដាំ ឬខាងឆ្វេងនោះទេ បើសិនជាការឈឺនោះជាការឈឺបែបស្រាលៗ នោះគឺដោយសារតែតួជីវិតចាប់ផ្ដើមបង្កប់ខ្លួនទៅក្នុងស្បូន។ អាការបន្តដែលស្រ្តីមានផ្ទៃពោះនឹងត្រូវជួប គឺអាការឈឺក្នុងស្បូន ព្រោះស្បូននឹងចាប់ផ្ដើមរីកធំឡើងជាបណ្ដើរ ដែលពេលនោះស្រ្តីមានគភ៌នឹងមានអារម្មណ៍ឈឺនៅក្នុងពោះផ្នែកខាងក្រោម(ថ្ងាសក្រោម)ជាពិសេស។
ក្រៅពីនោះ បើសិនស្រ្តីមានគភ៌មានភេទសម្ព័ន្ធញឹកញាប់ ដើរច្រើន ឡើងចុះជណ្ដើរញឹកញាប់ ឬហាត់ប្រាណប្រចាំ ក៏អាចធ្វើឱ្យកើតមានអាការឈឺពោះម្ដុំផ្នែកខាងក្រោមដែរ ដោយសារតែការប្រើសាច់ដុំនៅត្រង់ផ្នែកនោះ។ បើសិនជាមានអារម្មណ៍ថាឈឺពោះផ្នែកខាងស្ដាំខ្លាំងៗរហូតមានអារម្មណ៍ថាទ្រាំលែងបាន យើងសូមណែនាំឱ្យប្រញាប់ទៅជួបគ្រូពេទ្យជាបន្ទាន់ ដើម្បីបានប្រញាប់ពិនិត្យវិនិច្ឆ័យយ៉ាងលម្អិត និងចាប់ផ្ដើមព្យាបាលតាមអាការរហូតទាល់តែជា គឺជារឿងដែលចាំបាច់ត្រូវធ្វើខ្លាំងបំផុត៕

June 24, 2019

មូលហេតុធម្មតាៗដែលធ្វើឱ្យក្រពះពិបាករំលាយអាហារ

តើអ្នកធ្លាប់មានបទពិសោធហាក់ដូចជាមានអាការឆ្អល់ តឹងណែន មិនស្រួលពោះ បន្ទាប់ពីទទួលទានអាហាររួចដែរឬទេ? ទាំងនេះគឺអាចបណ្តាលមកពីការរំលាយអាហារដោយពិបាក ដែលជាទូទៅត្រូវបានគេដឹងថា ជាការមិនរំលាយអាហារនេះឯង។ ការមិនរំលាយអាហារស្ទើរតែបានក្លាយជាបញ្ហាទូទៅមួយហើយនាពេលបច្ចុប្បន្ននេះ ហើយវាបានធ្វើឱ្យប៉ះពាល់ដល់មនុស្សគ្រប់វ័យ។ ការយល់ដឹងអំពីមូលហេតុដែលនាំឱ្យកើតមានអាការមិនរំលាយអាហារ អាចជួយអ្នកក្នុងការការពារខ្លួនពីសភាពបែបនេះបាន។ ខាងក្រោមនេះគឺជាមូលហេតុសាមញ្ញមួយចំនួនដែលបណ្តាលឱ្យមានការពិបាកក្នុងការរំលាយអាហារ ៖

ទម្លាប់មិនល្អក្នុងការទទួលទានអាហារមានទម្លាប់មិនល្អក្នុងការទទួលទានអាហារមួយចំនួនដែលបណ្តាលឱ្យការរំលាយអាហារមានបញ្ហា ទម្លាប់មិនល្អទាំងនោះមានដូចជា ទទួលទានលឿនពេក ដោយមិនបានទំពាអាហារឱ្យបានម៉ដ្ឋល្អ, ទទួលទានអាហារច្រើនពេក, ទទួលទានអាហារខ្លាញ់ ឬហឹរច្រើនពេក។ ដូច្នេះបើចង់ឱ្យក្រពះអ្នកអាចធ្វើការងារបានល្អនោះ សូមចៀសចេញទម្លាប់មិនល្អខាងលើនេះ។

ទទួលទានជាតិអាល់កុលជាតិអាល់កុលធ្វើឱ្យកោសិកាបាត់បង់ជាតិទឹក ស្ងួត និងទទួលរងនូវការបំផ្លាញ។ នេះជាកត្តាមួយផ្សេងទៀតដែលនាំទៅរកការពិបាកក្នុងការរំលាយអាហារ ដូច្នេះប្រសិនអ្នកជាមនុស្សម្នាក់ដែលតែងតែទទួលទានស្រាជាញឹកញាប់នោះ អ្នកគួរតែកំណត់ឱ្យស្ថិតក្នុងចំណុះតិចបំផុត ដើម្បីកុំឱ្យក្រពះពិបាកក្នុងការរំលាយអាហារ។

បារីបារីនឹងធ្វើឱ្យចំណង់អាហារធ្លាក់ចុះ ដោយការចូលទៅបំផ្លាញអង់ហ្សីមនៃការរំលាយអាហាររបស់អ្នក ហើយវានឹងធ្វើឱ្យប្រព័ន្ធរំលាយអាហារទទួលរងនូវការបំផ្លាញ ជាមូលហេតុបណ្តាលឱ្យប្រឈមនឹងបញ្ហាមិនរំលាយអាហារ។

កាហ្វេអុីនតែ កាហ្វេ សូកូឡា ភេសជ្ជៈប៉ូវកម្លាំង និងអាហារមួយចំនួនទៀតដែលមានផ្ទុកនូវជាតិកាហ្វេអុីន ក៏អាចបណ្តាលឱ្យមានបញ្ហាក្នុងការរំលាយអាហារ ដោយការធ្វើឱ្យជាតិអាស៊ីតកើនឡើង។ ដូច្នេះដើម្បីជួយសម្រួលដល់ការរំលាយអាហារ អ្នកគួរកំណត់ជាតិកាហ្វេអីុនឱ្យមកនៅត្រឹមតែ1 ឬ2ពែងក្នុងមួយថ្ងៃបានហើយ។

ហាត់ប្រាណភ្លាមៗបន្ទាប់ពីទទួលទានអាហាររួចវាជារឿងសំខាន់ដែលថាត្រូវទទួលទានអ្វីបន្តិចសិនមុនធ្វើការហាត់ប្រាណបញ្ចេញថាមពលរាងកាយ ប៉ុន្តែអ្នកក៏ត្រូវការពេលវេលាខ្លះដើម្បីសម្រាកឱ្យស្រកពោះសិនដែរ ដូច្នេះចន្លោះនៃការហាត់ប្រាណ បន្ទាប់ពីទទួលទានអាហាររួច អ្នកគួរសម្រាករយៈពេល30ទៅ60នាទីជាមុនសិនចាំចាប់ផ្តើមហាត់ប្រាណ។ បន្ទាប់ពីទទួលទានអាហារ ឈាមធ្វើចលនានៅជុំវិញប្រព័ន្ធរំលាយអាហារ តែប្រសិនបើអ្នកធ្វើការហាត់ប្រាណភ្លាមៗ នោះ ចលនានៃការហាត់ប្រាណនឹងទាញយកឈាមទាំងនោះចេញដែលជាការរំខានដល់ការរំលាយអាហារ។
ដឹងហើយមែនទេថារឿងសាមញ្ញៗ ដែលអ្នកបានធ្វើរាល់ថ្ងៃនេះគឺជាមូលហេតុនាំឱ្យប៉ះពាល់ដល់ការរំលាយអាហារ ដូច្នេះសង្ឃឹមថា ចាប់ពីពេលនេះទៅអ្នកនឹងមិនធ្វើអ្វីដែលនាំឱ្យប៉ះពាល់ដល់ការរំលាយអាហារទៀតនោះទេ៕

June 24, 2019

វិធីសម្អាតធ្មេញសម្រាប់អ្នកពត់ធ្មេញ

ធ្មេញស្អាតជាបំណងប្រាថ្នារបស់មនុស្សគ្រប់គ្នា ហេតុនេះហើយបានជាមនុស្សមួយចំនួនដែលមានធ្មេញមិនត្រង់ស្អាតបានចំណាយពេល និងប្រាក់កាស ដើម្បីធ្វើការព្យាបាលធ្មេញឱ្យមកត្រង់ស្អាតវិញ តាមរយៈការពត់ធ្មេញ។ បន្ទាប់ពីបានធ្វើការពត់ធ្មេញ លោកអ្នកប្រាកដជាមានអារម្មណ៍ថា ធ្មេញរបស់អ្នកមានភាពល្អប្រសើរជាងមុន ប៉ុន្តែនៅក្នុងអំឡុងពេលនៃការពុតធ្មេញ យើងក៏ជឿដែរថា មានប្រិយមិត្តមិនតិចទេដែលរអ៊ូរទាំរឿងការពិបាកក្នុងការសម្អាតធ្មេញ។ បានហើយ! ឈប់បារម្ភទៀតទៅ ហើយងាកមកសាកល្បងធ្វើការសម្អាតធ្មេញតាមរយៈការណែនាំមួយចំនួនដូចតទៅនេះ ៖

– ដំបូងត្រូវប្រាកដក្នុងចិត្តថា អ្នកពិតជាបានដុសសម្អាតធ្មេញរាល់ពេលបន្ទាប់ពីទទួលទានអាហាររួច។
– មុនពេលចាប់ផ្តើមដុសធ្មេញ ត្រូវខ្ពុរមាត់ជាមួយទឹកខ្ពុរមាត់ឱ្យបានសព្វ ដើម្បីជួយបន្ធូរកម្ទេចអាហារដែលមាននៅក្នុងមាត់កុំឱ្យតោងជាប់ខ្លាំងពេក។

ពេលដុសធ្មេញ : ការដុសធ្មេញសម្រាប់អ្នកដែលកំពុងពត់ធ្មេញត្រូវអនុវត្តតាមការណែនាំដូចតទៅ ៖
1. ធ្មេញមុខ : ចាប់ផ្តើមដុសផ្នែកខាងមុខនៃធ្មេញពីលើចុះមកក្រោម រួចក៏បន្តទៅដុសផ្នែកខាងក្នុងវិញម្តង។
2. ធ្មេញក្រោម : ត្រូវដុសក្នុងទិសដៅពីក្រោមឡើងទៅលើ រួចក៏សំដៅទៅដល់ផ្នែកខាងក្នុងដូចមុនដែរ។

– បន្តទៅកន្លែងផ្សេងៗទៀតនៃធ្មេញរបស់អ្នកដូចជា ធ្មេញថ្គាម ទាំងផ្នែកខាងលើ ខាងក្រៅ និងខាងក្នុង ប៉ុន្តែសូមចងចាំថា រាល់ពេលដុសធ្មេញ ជាពិសេសធ្មេញមុខទាំងលើទាំងក្រោម អ្នកត្រូវប្រយ័ត្នកុំឱ្យប៉ះខ្សែពត់ធ្មេញញឹកញាប់ពេក ហើយអ្នកគួរតែប្រើជំនួយពីអណ្តាត ដើម្បីទប់ថ្នាំដុសធ្មេញឱ្យជាប់នឹងធ្មេញ ហើយក៏ដើម្បីការពារការជ្រុះធ្លាក់នៃខ្សែពត់ធ្មេញដែលនៅលើធ្មេញរបស់អ្នកផងដែរ។
– ខ្ពុរសម្អាតមាត់ធ្មេញរបស់អ្នកម្តងទៀតជាមួយទឹកខ្ពុរមាត់ឱ្យបានត្រឹមត្រូវ បន្ទាប់ពីដុសធ្មេញរួច។
– បើទោះជាក្នុងពេលពត់ធ្មេញក៏ដោយ ក៏ការទាក់សម្អាតធ្មេញដោយខ្សែសម្អាតធ្មេញនៅតែមានភាពសំខាន់ក្នុងការជួយឱ្យធ្មេញស្អាតបានយ៉ាងល្អដែរ ដូច្នេះសូមបន្តធ្វើវាទៀតចុះ។អ្នកជំនាញបានធ្វើការណែនាំឱ្យសម្អាតធ្មេញរយៈពេលយ៉ាងតិច2នាទី ប៉ុន្តែសម្រាប់អ្នកដែលកំពុងពត់ធ្មេញ គួរតែចំណាយពេលឱ្យច្រើនជាងនេះបន្តិចក្នុងការដុសធ្មេញ ដើម្បីទទួលបានលទ្ធផលដែលប្រសើរជាងមុន៕

June 24, 2019

ម្ទេសក្រៅពីហឹរហើយ នៅមាន20ចំណុចដែលល្អសម្រាប់សុខភាពដែលអ្នកគួរដឹង

អាហារដែលមានរសជាតិហឹរ គឺជាទីពេញនិយមសម្រាប់មនុស្សនាបច្ចុប្បន្ននេះ ពោលគឺ កាន់តែហឹរ នោះកាន់តែមានរសជាតិឆ្ងាញ់ រហូតដល់មនុស្សមួយចំនួន បើទទួលទានអាហារមិនមានម្ទេសគឺមិនបានទេ។ ប្រិយមិត្តអ្នកអានមួយចំនួនបានជ្រាបមកហើយថា ម្ទេស ក្រៅពីមានរសជាតិហឹរហើយ វាក៏មានគុណប្រយោជន៍សម្រាប់សុខភាពផងដែរ។ ជាក់ស្ដែង ថ្ងៃនេះទស្សនាវដ្តី ឡារ៉ែន សូមជម្រាបជូននូវគុណប្រយោជន៍របស់ផ្លែម្ទេសសម្រាប់សុខភាពអ្នក។

តើម្ទេសមានប្រភពមកពីណា?
ម្ទេស ត្រូវបានរកឃើញដំបូងនៅសហរដ្ឋអាមេរិកភាគកណ្ដាល និងខាងត្បូង តាំងពី7000ឆ្នាំមុន ដោយលោក Christopher Columbus។ បន្ទាប់មក គេក៏បាននាំយកពូជម្ទេសមកដាំ និងបណ្ដុះនៅតាមតំបន់អ៊ឺរ៉ុប រហូតដល់ដុះពាស-ពេញពិភពលោកតែម្ដង។ ពូជរបស់ផ្លែម្ទេសមានប្រមាណជាជាង831ប្រភេទខុសៗគ្នា ដែលគេអាចបែងចែកជា3ក្រុមធំៗគឺ ម្ទេសដៃនាង ម្ទេសអាចម៍ចាប និងម្ទេសផ្លោក។
ម្ទេសដូចជា ម្ទេសប្លោក ម្ទេសខ្មាំង ម្ទេសចង្អុលមេឃ មានសារធាតុ Capsaicin។ ភាពហឹរនៃម្ទេសនេះហើយដែលមានថាមពលនៃ Vegamine យ៉ាងពេញលេញ មានសារធាតុការ៉ូទីណយជិត40ប្រភេទ និងសារធាតុ Polyphenol ដែលជួយការពារកោសិកាផ្សេងៗ ហើយក៏នៅមានវីតាមីនC ប៉ូតាស្យូម និងកាល់ស្យូមយ៉ាងច្រើនផងដែរ។ គុណសម្បត្តិរបស់ម្ទេស គឺការពារអាការឈឺសាច់ដុំ ប្រគ្រីវកាច់ ឈឺធ្មេញ ជួយសម្លាប់បាក់តេរី និងមេរោគផ្សិត រំញោចដល់ការទទួលទានអាហារ និងជួយរំលាយអាហារ និងមានសារធាតុអង់ទីអុកស៊ីដង់យ៉ាងច្រើន។ ភាពហឹរនៃម្ទេសមិនមានគ្រោះថ្នាក់ទៅដល់ក្រពះអាហារនោះទេ ប៉ុន្តែវាជួយឱ្យភ្នាសក្រពះមានកម្លាំងទប់ទល់នឹងជំងឺបាន។
ការវាស់ជាតិហឹររបស់ម្ទេស ត្រូវបានគិតជាខ្នាត Scoville ដែលម្ទេសនៅក្នុងតំបន់អាស៊ីយើង មានកម្រិតជាតិហឹរមួយផ្លែចាប់ពី50,000-100,000 Scoville ច្រើនជាងម្ទេសនៅតំបន់អ៊ឺរ៉ុប និងត្រូវបានកត់ត្រាចូលក្នុងបញ្ជីឯកត្តកម្មពិភពលោកផងដែរ។
ខាងក្រោមនេះ គឺជាគុណប្រយោជន៍ទាំង 8ចំណុចរបស់ផ្លែម្ទេស និងស្លឹកដែលជាជំនួយដល់សុខភាពរបស់អ្នក៖
1. ព្យាបាលជំងឺរលាកឆ្លឹង និងរលាកសន្លាក់: ជំងឺរលាកសន្លាក់ និងឆ្អឹង ភាគច្រើនកើតនៅលើមនុស្សវ័យចំណាស់ ហើយមានអាការដូចជាហើម ឬរឹងនៅក្នុងសន្លាក់ ដែលធ្វើឱ្យពិបាកក្នុងការធ្វើចលនាជាដើម។ ប៉ុន្តែប្រសិនជាអ្នកទទួលទានស្លឹកម្ទេសឱ្យបានទៀងទាត់នោះ អាការរលាកសន្លាក់ឆ្អឹងរបស់អ្នក ប្រាកដជាបានធូរស្រាលជាមិនខាន ដោយសារតែសារធាតុប្រឆាំងនឹងការរលាកដែលមាននៅក្នុងស្លឹកម្ទេស ឬផ្លែម្ទេសនេះឯង។

2. ព្យាបាលជំងឺរើម : យើងបានដឹងរួចមកហើយថា ជំងឺរើម ជាជំងឺសើស្បែក ដែលបណ្តាលមកពិវីរុសបាក់តេរីមួយចំនួន។ ការប្រើប្រាស់ផ្លែម្ទេសក្នុងរបបអាហារអាចជួយកាត់បន្ថយ និងព្យាបាលជំងឺមួយនេះបានផងដែរ។

3. បណ្តេញ និងសម្អាតជាតិពុលចេញពីក្នុងរាងកាយ : ម្ទេសមានសមត្ថភាពអាចជួយបណ្តេញ និងសម្អាតជាតិពុលចេញពីរាងកាយបានយ៉ាងល្អ មិនថាជាជាតិពុលនៅក្នុងម្ហូបអាហារដែលមិនស្អាត ឬអាការពុលចំណីអាហារផ្សេងៗនោះទេ សូម្បីតែរោគសើស្បែកដូចជា ជំងឺផ្សិត ស្រែង និងរបួសផ្សេងៗលើស្បែក ក៏ស្លឹកម្ទេសអាចជួយធ្វើឱ្យអ្នកឆាប់ជាសះស្បើយបានដែរ។

4. ជួយដល់ការសម្រកទម្ងន់ : ផ្លែម្ទេសត្រូវបានគេដឹងថា មានជាតិខ្លាញ់ និងកាឡូរីទាប ដែលស័ក្តិសមមានឈ្មោះជាប្រភេទអាហារសុខភាពបំផុត។ អ្នកអាចប្រើប្រាស់ផ្លែម្ទេសជារបបអាហារសម្រាប់សម្រកទម្ងន់បាន ដោយការទទួលទានវាជាទៀងទាត់។ វិធីម្យ៉ាងទៀតសម្រាប់ធ្វើការសម្រកទម្ងន់នោះ គឺ គ្រាន់តែអ្នកយកស្លឹកម្ទេសទៅហាលថ្ងៃឱ្យស្ងួត បន្ទាប់មកយកទៅដាំជាមួយទឹកឱ្យពុះជាការស្រេច។ បន្ទាប់មកអ្នកអាចទទួលទានទឹកតែស្លឹកម្ទេសនេះរាល់ពេលព្រឹកព្រលឹម ពេលមិនទាន់ទទួលទានអ្វីសោះ(ពោះទទេ) ដោយអ្នកអាចបន្ថែមទឹកក្រូចឆ្មារ ឬក្រូចឆ្មារសម្បកលឿងបន្ថែមក៏បាន ដើម្បីបង្កើនរសជាតិអាហារ។

5. ជួយកាត់បន្ថយកម្រិតកូឡេស្តេរ៉ល : កូឡេស្តេរ៉លមិនល្អ ឬកូឡេស្តេរ៉លជាតិខ្លាញ់ឡើងខ្ពស់ អាចធ្វើឱ្យអ្នកប្រឈមមុខនឹងការកើតជំងឺគាំងបេះដូង។ ជាសំណាងល្អ ស្លឹកម្ទេសមានជាតិខ្លាញ់ កាឡូរីទាប និងសារធាតុសំខាន់ៗជាច្រើនមុខ ដែលអាចជួយកាត់បន្ថយកូឡេស្តេរ៉លមិនល្អនៅក្នុងរាងកាយបាន។

6. ជួយធ្វើឱ្យប្រព័ន្ធភាពស៊ាំរឹងមាំ : សារធាតុ Phytochemcials និងអាស៊ីត Phenolic(Phenolic acids) នៅក្នុងផ្លែម្ទេស អាចជួយធ្វើឱ្យប្រព័ន្ធភាពស៊ាំនៅក្នុងរាងកាយកាន់តែរឹងមាំ មានលទ្ធភាពការពារអ្នកពីជំងឺផ្សេងៗ និងជំងឺឆ្លង ដូចជា ជំងឺផ្តាសាយជាដើម។

7. មានសារធាតុប្រឆាំងអុកស៊ីតកម្ម : ផ្លែម្ទេសផ្ទុកទៅដោយសារធាតុប្រឆាំងនឹងអុកស៊ីតកម្ម ដែលអាចធ្វើការសម្លាប់ និងរារាំងរ៉ាឌីកាល់សេរី ដែលបង្កមេរោគ និងជំងឺផ្សេងៗជាច្រើននៅក្នុងរាងកាយ។ ការទទួលទានផ្លែម្ទេសជាប្រចាំអាចមានលទ្ធភាពទប់ស្កាត់រាងកាយអ្នកពីជំងឺមហារីក ជំងឺភ្នែកឡើងបាយ ជំងឺគាំងបេះដួង ជំងឺដាច់សសៃឈាមបេះដូង និងជំងឺកាចសាហាវជាច្រើនមុខទៀត។

8. ជួយផលិតអាំងស៊ុយលីនសម្រាប់អ្នកកើតជំងឺទឹកនោមផ្អែម : ផ្លែម្ទេស មានសារធាតុសំខាន់ៗជាច្រើន ដែលអាចជួយបង្កើនការផលិតអាំងស៊ុយលីននៅក្នុងរាងកាយ។ ដោយអ័រម៉ូនអាំងស៊ុយលីនមួយនេះ ពិតជាមានប្រយោជន៍ខ្លាំងណាស់សម្រាប់អ្នកដែលកើតមានជំងឺទឹកនោមផ្អែមប្រភេទទី1។ ដូច្នេះអ្នកគួរតែទទួលទានផ្លែម្ទេសជារបបអាហារប្រចាំថ្ងៃ ដើម្បីជួយកាត់បន្ថយផលប៉ះពាល់នៃជំងឺទឹកនោមផ្អែម ហើយថែមទាំងជួយកាត់បន្ថយកម្រិតកូឡេស្តេរ៉លក្នុងរាងកាយថែមទៀតផង។

9. ជំនួយ និងព្យាបាលប្រព័ន្ធរំលាយអាហារ : អ្នកដែលមានប្រព័ន្ធរំលាយអាហារខ្សោយ ឬក្រពះពិបាកនឹងធ្វើការរំលាយអាហារ អ្នកគ្រាន់តែឧស្សាហ៍ទទួលទានស្លឹកម្ទេសជាប្រចាំ ឬអ្នកក៏អាចយកស្លឹកម្ទេសស្រស់ៗទៅដាំនៅក្នុងទឹកឱ្យពុះ រួចទទួលទានវា បន្ទាប់ពីទទួលទានអាហាររួចក៏បាន។

10. ព្យាបាលជំងឺគ្រុនក្តៅ : អ្នកអាចព្យាបាលជំងឺគ្រុនក្តៅ ដោយការទទួលទានស្លឹកម្ទេស ឬធ្វើតាមវិធីបែបបុរាណ ដោយការបុកស្លឹកម្ទេស លាយជាមួយប្រេងសាឡាត់ ហើយបិតនៅលើក្បាលជាការស្រេច។

11. ព្យាបាលមុខរបួស : សម្រាប់អ្នកដែលមានមុខរបួស ស្នាមមុតតូចៗ ឬមានការឈឺចាប់ត្រង់ស្នាមរបួសណាមួយនោះ អ្នកក៏អាចយកស្លឹកម្ទេសមកបុក រួចបិទពីលើស្នាមរបួសនោះផងដែរ ដើម្បីឱ្យមុខរបួសឆាប់ជាសះស្បើយ។

12. សម្បូរដោយអាហារូបត្ថម្ភ : ស្លឹកម្ទេសសម្បូរទៅដោយសារធាតុរ៉ែ និងជាប្រភពនៃវីតាមីនសំខាន់ៗដូចជា វីតាមីន A វីតាមីន Cវីតាមីន B1 B12 ជាតិដែក កាល់ស្យូ៉ម និងប៉ូតាស្យូមដែលអាចជំនួយសុខភាពរាងកាយរបស់អ្នកបានយ៉ាងប្រសើរ។

13. ព្យាបាលបញ្ហាមុខមុន : ស្លឹកម្ទេសអាចជួយកម្ចាត់បញ្ហាមុខមុនដែលកើតឡើងដោយសារតែមេរោគ និងបាក់តេរីផ្សេងៗ។ ដូច្នេះអ្នកអាចព្យាបាលមុខមុនរបស់អ្នកបាន ដោយគ្រាន់តែបុកស្លឹកម្ទេស ហើយយកមកបិតនៅត្រង់ផ្ទៃមុខដែលមានបញ្ហាមុនតែប៉ុណ្ណោះ រួចលាងមុខដោយទឹកស្អាតជាការស្រេច។

14. ជាស្ក្រាប់ដុសសម្អាតរាងកាយ : អ្នកគ្រាន់តែយកស្លឹកម្ទេសស្រស់ៗ មកបុកឬកិនឱ្យម៉ដ្ឋ ហើយយកមកលាប ឬត្រដុសនៅលើដៃ ជើង និងរាងកាយរបស់អ្នកតែប៉ុណ្ណោះជាការស្រេច។ ការធ្វើបែបនេះអាចចិញ្ចឹម និងថែរក្សាស្បែករបស់អ្នកឱ្យមានសុខភាពល្អ សាច់ឈាមភ្លឺថ្លា និងបំបាត់ជាតិកខ្វក់បានទៀតផង។

15. ម៉ាសសម្រាប់ផ្ទៃមុខ : អ្នកអាចយក ស្លឹកម្ទេសមកធ្វើជាម៉ាសថែរក្សាផ្ទៃមុខរបស់អ្នកឱ្យស្រស់ស្អាត ភ្លឺរលោង ម៉ដ្ឋខៃបានផងដែរ ដោយវិធីងាយៗ គឺគ្រាន់តែបុកស្លឹកម្ទេសឱ្យម៉ដ្ឋ រួចលាយជាមួយទឹកអង្ករឱ្យក្លាយជាល្បាយល្មម មិនគោកពេក មិនរាវពេក ហើយសឹមយកមកបំពកនៅលើផ្ទៃមុខរបស់អ្នក ទុកចោលប្រមាណជា15នាទី ចាំលាងទឹកចេញជាការស្រេច។

16. ប្រើជាទឹកខ្ពុរមាត់បំបាត់ក្លិនមាត់ : អ្នកអាចបំបាត់បញ្ហាក្លិនមាត់ និងធ្វើឱ្យមាត់ធ្មេញមានសុខភាព រួមជាមួយក្លិនប្រហើរស្រស់ថ្លាដោយវិធីងាយៗបាន ដោយគ្រាន់តែអ្នកយកស្លឹកម្ទេសស្រស់ៗទៅដាំនៅក្នុងទឹកឱ្យពុះ រួចទុកវាឱ្យរាងត្រជាក់បន្តិច ហើយយកទឹកនោះមកធ្វើការខ្ពុរមាត់របស់អ្នកជាប្រចាំ។

17. ព្យាបាលស្នាមកន្ទួលផ្សេងៗនៅលើ ស្បែក : សម្រាប់អ្នកដែលមានស្នាមក្រហម រមាស់ ឬបញ្ហាស្បែកជាច្រើន មិនថាជា សត្វមូស ឬសត្វផ្សេងៗទិច និងខាំនោះទេ ស្លឹកម្ទេសអាចជួយអ្នកបាន។ អ្នកគ្រាន់តែយកស្លឹកម្ទេសមកបុកឱ្យម៉ដ្ឋ រួចលាបវាលើស្នាមរបួសក្រហមៗ ឬស្នាមសត្វទិច ឬខាំនោះជាការស្រច។ គុណប្រយោជន៍របស់ស្លឹកម្ទេសមានជាច្រើនទៀត រាប់មិនអស់នោះទេ។ អ្នកអាចប្រើប្រាស់ស្លឹកម្ទេសបានតាមចិត្តត្រូវការរបស់អ្នកសម្រាប់បញ្ហាស្បែកផ្សេងៗ ជាពិសេសគឺការទទួលទានវាជាមុខម្ហូបប្រចាំថ្ងៃក៏បាន។

18. បង្ការជំងឺដង្កាត់ : ការសិក្សាថ្មីមួយដែលបានធ្វើឡើងដោយបណ្ឌិតសភាវិទ្យាសាស្ត្រចិន វេជ្ជសាស្ត្របានបង្ហាញថា អ្នកដែលបានទទួលទានអាហារដែលមានរសជាតិហឹរជារៀងរាល់ថ្ងៃ មានការថយចុះហានិភ័យនៃការស្លាប់ដោយសារជំងឺបាន14% ច្រើនជាងអ្នកដែលបរិភោគអាហារដែលមានរសជាតិហឹរម្តងក្នុងមួយសប្តាហ៍។

19. កាត់បន្ថយបញ្ហាឃ្លានអាហារ : សារធាតុហឹរដែលមាននៅក្នុងអាហារជួយអ្នកឱ្យទទួលទានឆាប់ឆ្អែត និងមិនឆាប់ឃ្លានអាហារទៀត ល្អសម្រាប់អ្នកដែលមានបំណងសម្រកទម្ងន់។

20. ការពារជំងឺគ្រុនផ្ដាសាយ : ម្ទេសគឺជាគ្រឿងហឹរ ដែលជួយសម្រួលផ្លូវដង្ហើម ដោយការបន្ថយអាការតឹងច្រមុះ តែវាក៏ត្រូវបានហាមមិនឱ្យទទួលក្នុងករណីអ្នកជំងឺក្អកផងដែរ។ វាមានគុណប្រយោជន៍សម្រាប់ព្យាបាលជំងឺខាងផ្លូវដង្ហើម និងជំងឺគ្រុនផ្ដាសាយ ដោយអ្នកអាចទទួលទានម្ទេសជាមួយនឹងសម្លរ រួចហុតក្ដៅៗតែម្តង៕

June 22, 2019

Category: សុខភាព