Category: សុខភាព

កណ្តាស់ញឹកញាប់ កុំកន្តើយ អាការនេះបង្ហាញពីរោគសញ្ញាច្រើនណាស់
ក្នុងអំឡុងពេលដែលអាកាសធាតុប្រែប្រួល រដូវកាលផ្លាស់ប្តូរ មនុស្សជាច្រើនតែងមានអាការកណ្តាស់ហាច់ឈីស! ជាញឹកញាប់ ដែលប្រាកដណាស់ ច្បាស់ជានឹកភ្លែតឡើងថា ប្រហែលជាកើតផ្តាសាយមិនខាន។ អា៎… កុំអាលគិតថា អាការកណ្តាស់របស់យើងនេះ វាបញ្ចប់ត្រឹមតែជំងឺផ្តាសាយនោះ ព្រោះការពិតទៅ អ្នកណាដែលកណ្តាស់ញឹកញាប់ ព្រឹកក៏កណ្តាស់ ល្ងាចក៏កណ្តាស់ កណ្តាស់ពេញមួយថ្ងៃនេះ អាចបណ្តាលមកពីរាងកាយរបស់យើងមានលាក់បង្កប់ភាពខុសប្រក្រតីអ្វីម្យ៉ាង ឬច្រើនយ៉ាងក៏អាចថាបានដែរ។
1/ រោគប្រតិកម្មចាញ់អាកាសធាតុ
ក្នុងករណីដែលមិនមែនជាជំងឺផ្តាសាយ គឺមិនបានកណ្តាស់ និងមានទឹកសំបោរខាប់ស្អិត រួមទាំងមិនមានអាការឈឺក្បាលឡើយ ដូច្នេះវាអាចទៅរួចថា អាការកណ្តាស់ញឹកញាប់របស់អ្នកនេះ អាចបណ្តាលមកពីសភាវរបស់រោគប្រតិកម្មចាញ់ធាតុអាកាស រឹតតែនៅលើមនុស្សដែលមានអាការកណ្តាស់ញឹកញាប់ជាប់ៗគ្នា ឬមានអាការរមាស់ក្នុងភ្នែក ហៀរទឹកភ្នែករួមជាមួយផងនោះ ក៏រឹតតែសង្ស័យថាអាចនឹងកើតរោគប្រតិកម្មចាញ់អាកាធាតុ ឬជំងឺច្រមុះបានដែរព្រោះរោគនេះជាអាការដែលកើតឡើងនៅលើសាច់ភ្នាសក្នុងច្រមុះ ដែលសាច់ភ្នាសក្នុងច្រមុះរបស់អ្នកកើតរោគនេះនឹងឆាប់រហ័សមានប្រតិកម្មជាមួយនឹងកត្តាជំរុញជាច្រើនដូចជា សភាពអាកាសធាតុ ធូលីដី លំអងទឹកភ្លៀង កេសររបស់ផ្កា មេរោគផ្សិត រោមសត្វ ឬសូម្បីតែក្លិន និងវត្ថុដែលធ្វើឱ្យរលាកក្រហាយផ្សេងៗរហូតបង្កឱ្យកើតជាអាការកណ្តាស់ហាច់ឈីសៗហ្នឹងឯង។
2/ រលាកសាច់ភ្នាសច្រមុះ
សភាវរលាកសាច់ភ្នាសច្រមុះក៏អាចជាមូលហេតុរបស់អាការកណ្តាស់ញឹកញាប់នេះបានដែរ ដោយសាច់ភ្នាសក្នុងច្រមុះដែលរលាកនោះច្រើនតែបណ្តាលមកពីការឆ្លងមេរោគវីរុសនៅលើប្រព័ន្ធដកដង្ហើម ឬអាចជាការឆ្លងមេរោគបាក់តេរីដែលច្រើនតែកើតនៅលើមនុស្សដែលមានប្រព័ន្ធប្រឆាំងជំងឺទាប។ ទាំងអស់នេះយើងអាចសង្កេតអាការរលាកសាច់ភ្នាសច្រមុះនេះបានតាមរយៈអាការកណ្តាស់ញឹកញាប់ មិនព្រមបាត់ អ្នកខ្លះអាចមានក្តៅខ្លួនស្ទិញៗរួមជាមួយផង មានទឹកសំបោរពណ៌ប្រផេះ លឿង ដែលបង្ហាញពីអាការឆ្លងមេរោគ ហើយអ្នកខ្លះអាចមានអាការឈឺករួមជាមួយផងដែរ។
3/ ជំងឺឫសដូងច្រមុះ
ឫសដូងច្រមុះគឺ សភាវដែលសាច់ភ្នាសនៅក្នុងច្រមុះមានអាការរលាក និងហើម រហូតមានលក្ខណៈលយពកចេញមកដូចជាខ្នែង ដែលច្រើនតែបណ្តាលមកពីការរលាក ឬការឆ្លងមេរោគនៅលើសាច់ភ្នាសច្រមុះរ៉ាំរ៉ៃ ភាពខុសប្រក្រតីរបស់ការតបស្នងចំពោះប្រព័ន្ធប្រសាទដែលគ្រប់គ្រងការធ្វើការរបស់សរសៃឈាមក្នុងផ្នែកដែលចិញ្ចឹមសាច់ភ្នាសច្រមុះ ដែលជាហេតុធ្វើឱ្យកើតអាការហើមលើសាច់ភ្នាសច្រមុះ។ ភាពខុសប្រក្រតីទាំងនោះអាចបង្ហាញចេញមកដោយអាការតឹងណែនច្រមុះ កណ្តាស់ញឹកញាប់ មានទឹកសំបោរថ្លាៗ ឬសំបោរមានពណ៌ព្រមជាមួយក្លិន រួមទាំងមានអាការឈឺពើតនៅត្រង់ក្តោងច្រមុះ និងថ្ពាល់ ឈឺករ៉ាំរ៉ៃ និងអាការឈឺងឿងក្បាលទៀតផង។
4/ សភាវឌឺថ្នាំ
ការប្រើថ្នាំប្រភេទដដែលជាប់ៗគ្នាយូរ អាចបង្កឱ្យកើតប្រតិកម្មអវិជ្ជមានចំពោះរាងកាយបាន ដោយច្រើនប្រទះឃើញថា ថ្នាំដែលអ្នកជំងឺលេបជាប់ៗគ្នារយៈពេលយូរ ជាហេតុនាំឱ្យកើតអាការរលាក ហុចផលឱ្យកើតអាការកណ្តាស់ញឹកញាប់មិនបាត់បានដូចគ្នា ដោយនឹងមានចំណុចសង្កេតបន្តិចថា អ្នកជំងឺនឹងមានអាការកណ្តាស់ក្រោយពីប៉ះពាល់នឹងអ្វីដែលជាកត្តាជំរុញ ដូចជា ផ្សែងបារី ក្លិនឈួលខ្លាំង ឬផ្សែង និងធូលីជាដើម៕
January 29, 2020
លំដាប់ហេតុការណ៍៖ រដ្ឋបាលជប៉ុនជម្លៀសពលរដ្ឋចេញពីទីក្រុងវូហាន ក្នុងរយៈពេល 2ថ្ងៃ
រដ្ឋបាលជប៉ុនអាចជម្លៀសជនជាតិជប៉ុនដែលជាប់នៅក្នុងទីក្រុងវូហាន គេចចេញពីការឆ្លងរាលដាលរបស់មេរោគវីរុសកូរ៉ូណាបានក្នុងរយៈពេលត្រឹមតែ 2ថ្ងៃប៉ុណ្ណោះ។ ភាពឆាប់រហ័សនេះ កើតចេញពីការត្រៀមខ្លួនរួចជាស្រេចរបស់គ្រប់អង្គភាព និងការប្រើច្រកផ្លូវខាងការទូតយ៉ាងមានប្រសិទ្ធភាព។
ជើងហោះហើរពិសេសបានចុះចតនៅអាកាសយានដ្ឋានអន្តរជាតិ ហានេដៈ ក្នុងក្រុងតូក្យូ កាលពីពេលព្រឹកថ្ងៃនេះ(ថ្ងៃពុធទី29មករា) វេលាម៉ោងប្រមាណជា 8.40នាទី ព្រមជាមួយជនជាតិជប៉ុនចំនួន 206នាក់ដែលត្រូវបានជម្លៀសចេញពីទីក្រុងវូហាន មជ្ឈមណ្ឌលនៃការឆ្លងរាលដាលរបស់មេរោគវីរុសកូរ៉ូណាប្រភេទថ្មី។
ជើងហោះហើរនេះ បានចេញដំណើរព្រមជាមួយក្រុមមន្ត្រីពេទ្យ និងបុគ្គលិកត្រួតពិនិត្យរោគ ដោយអ្នកដំណើរមកពីវូហានទាំងអស់បានទទួលការពិនិត្យសុខភាពនៅក្នុងយន្តហោះ ដែលរហូតមកដល់ខណៈពេលនេះមិនទាន់មានអ្នកណាម្នាក់ឆ្លងមេរោគនោះនៅឡើយ តែមានអ្នកខ្លះដែលមានអាការក្អក ក្ដៅខ្លួន ត្រូវបានបញ្ជូនទៅមន្ទីរពេទ្យជាបន្ត។
នៅពេលយន្តហោះចុះចតភ្លាម រថយន្តBus 5គ្រឿង និងរថយន្តសង្គ្រោះ 20គ្រឿងដែលបានត្រៀមរួចជាស្រេចនៅក្នុងអាកាសយានដ្ឋាននោះ បាននាំអ្នកដំណើរទាំងអស់ទៅពិនិត្យសុខភាពម្ដងទៀត។ ទាំងអស់គ្នានឹងត្រូវដាក់ឱ្យនៅដាច់ដោយឡែក ដើម្បីពិនិត្យមើលអាការរយៈពេល 14ថ្ងៃ។
រដ្ឋបាលជប៉ុនបញ្ជាក់ថា យន្តហោះពិសេសជើងទី2 នឹងចេញដំណើរឆ្ពោះទៅទីក្រុងវូហាននៅក្នុងរាត្រីថ្ងៃនេះ(ថ្ងៃពុធទី29) ហើយជើងហោះហើរពិសេសទី3 នឹងចេញដំណើរនៅថ្ងៃព្រហស្បតិ៍ ដើម្បីទៅទទួលយកជនជាតិជប៉ុនចេញពីទីក្រុងវូហានទាំងអស់ប្រមាណជា 650នាក់។
លំដាប់ហេតុការណ៍៖ តើរដ្ឋបាលជប៉ុនត្រៀមការណ៍រួចជាស្រេចក្នុងរឿងនេះយ៉ាងណា?
រដ្ឋបាលជប៉ុនអាចជម្លៀសជនជាតិរបស់ខ្លួនចេញពីប្រទេសចិនបានក្នុងរយៈពេលតែ 2ថ្ងៃ និងជាប្រទេសដំបូងគេដែលបានទទួលការអនុញ្ញាតពីរដ្ឋបាលចិនឱ្យចូលទៅក្នុងទីក្រុងវូហាន ដែលនៅតែស្ថិតក្រោមវិធានការ Shutdown (បិទទីក្រុង)នៅឡើយ។
ព្រលប់ថ្ងៃអាទិត្យទី26មករា៖ នាយករដ្ឋមន្ត្រីជប៉ុន ស៊ីនហ្សូ អាបេ ប្រកាសថា រដ្ឋបាលជប៉ុនត្រៀមរួចរាល់ហើយក្នុងការជម្លៀសជនជាតិជប៉ុនចេញពីទីក្រុងវូហាន។
ថ្ងៃចន្ទ ទី27មករា៖ ក្រសួងការបរទេស ស្ថានទូតជប៉ុន និងសមាគមពាណិជ្ជករជប៉ុននៅក្នុងប្រទេសចិន បានប្រញាប់ប្រញាល់ស្វែងរក និងប្រមែប្រមូលជនជាតិជប៉ុនដែលត្រូវការត្រឡប់ទៅប្រទេសវិញ។
ថ្ងៃអង្គារ ទី28មករា៖ ជើងហោះហើរពិសេសបានត្រៀមរួចជាស្រេចនៅឯព្រលានយន្តហោះអន្តរជាតិ ហានេដៈតាំងពីព្រឹកព្រលឹម តែនៅមិនទាន់អាចចេញដំណើរបាន ព្រោះ “ខាងចិនមិនទាន់ត្រៀមខ្លួនរួច”។ រហូតទាល់តែបានទទួលសញ្ញាភ្លើងបៃតងឱ្យហោះឡើងបាននៅពេលព្រលប់ៗនៃថ្ងៃដដែល។ ជើងហោះហើរពិសេសនេះថែមទាំងបាននាំយកម៉ាស់អនាម័យចំនួន15,000ឈុត វ៉ែនតាការពារការឆ្លងមេរោគ 8,000ឈុត ស្រោមដៃ 50,000ឈុត និងវត្ថុជួយសង្គ្រោះផ្សេងៗទៀតទៅប្រគល់ជូនខាងចិនផងដែរ។
នៅក្នុងថ្ងៃដដែល គណៈរដ្ឋមន្ត្រីជប៉ុនបានត្រៀមជាស្រេចនៅក្នុងប្រទេស មានមតិអនុម័តឱ្យដាក់ចូលក្នុងបញ្ជីនូវជំងឺរលាកសួតដោយមេរោគវីរុសកូរ៉ូណា ជាជំងឺឆ្លងតាមច្បាប់ ផ្ដល់អំណាចបញ្ជាអ្នកឆ្លងមេរោគឱ្យចូលព្យាបាលក្នុងមន្ទីរពេទ្យ បញ្ជាឱ្យឈប់សម្រាកពីការងារ និងបញ្ជាឱ្យពិនិត្យជំងឺនៅតាមព្រលានយន្តហោះ និងកំពង់ផែ ដោយរដ្ឋបាលជាអ្នកទទួលខុសត្រូវលើការចំណាយក្នុងការព្យាបាលទាំងអស់។
ព្រឹកថ្ងៃពុធ ទី29មករា៖ ជើងហោះហើរពិសេសដំបូង ធ្វើដំណើរមកដល់ក្រុងតូក្យូ៕
ប្រភព៖ សារព័ត៌មានបរទេស
January 29, 2020
ឃ្លិបវីដេអូដ៏សែនរំជួលចិត្ត៖ អ្នកនៅក្នុងទីក្រុងវូហានដ៏គួរឱ្យភ័យខ្លាច ស្រែកលើកទឹកចិត្តគ្នាទៅវិញទៅមក លាន់រំពងទីក្រុង…
អ្នកនៅក្នុងទីក្រុងវូហាន ប្រភពធំនៃការឆ្លងរាលដាលរបស់មេរោគរលាកសួត កូរ៉ូណាប្រភេទថ្មី នាំគ្នាស្រែកលាន់កងរំពងទីក្រុង “វូហានស៊ូៗ!!” លើកទឹកចិត្តគ្នាឱ្យឆ្លងកាត់ស្ថានការណ៍ដ៏អាក្រក់នេះឱ្យបាន…។
កាលពីថ្ងៃទី27មករា វេលាម៉ោង 8.00យប់ ម៉ោងក្នុងស្រុក ក្នុងរាត្រីដ៏ងងឹតសូន្យសុងក្នុងទីក្រុងវូហាន ប្រទេសចិន ដែលទោះជាពន្លឺភ្លើងមិនមានបរិបូរណ៍មែន តែជំនឿជឿជាក់ក្នុងចិត្តរបស់ពលរដ្ឋវូហាននៅតែរឹងមាំខ្លាំងក្លា…។
មនុស្សម្នាដែលរស់នៅកណ្ដាលការប្រុងប្រយ័ត្នពីអាការរោគ និងរោគសញ្ញារបស់ខ្លួន និងអ្នកជិតខាង បាននាំគ្នាស្រែកខ្លាំងថា “តស៊ូឡើងៗ!!”
លាន់ឮកងរំពងឆ្លងអគារទៅមក ដើម្បីផ្ដល់កម្លាំងចិត្តដល់គ្នាទៅវិញទៅមកកណ្ដាលមហាសង្គ្រាមអាសន្នរោគដែលអូសបន្លាយពេលក្នុងគ្រានេះ៕
January 29, 2020
ជនជាតិជប៉ុន 2នាក់ប្រាប់ការពិត បន្ទាប់ពីរដ្ឋបាលជប៉ុនបញ្ជូនយន្តហោះទៅទទួលមកប្រទេសកំណើតវិញ៖ “ស្ថានការណ៍ក្នុងទីក្រុង វូហាន កាន់តែយ៉ាប់យ៉ឺនជារឿយៗ”
ជនជាតិជប៉ុន 2នាក់គឺ លោក ថាខេអូ អាអូយ៉ាម៉ា និងលោក ថាកាយូគិ ខាតូ បានប្រាប់ទៅអ្នកសារព័ត៌មាន ក្រោយពីធ្វើដំណើរត្រឡប់ពីទីក្រុងវូហាន ប្រទេសចិន មកដល់ប្រទេសជប៉ុនវិញនៅព្រឹកថ្ងៃទី29 មករា(ព្រឹកមិញ)ថា មានអារម្មណ៍ថា ធូរស្បើយក្នុងចិត្តដែលបានត្រឡប់មកដល់ប្រទេសកំណើតវិញ ចំណែកស្ថានការណ៍នៅក្នុងទីក្រុង វូហានវិញ កំពុងតែយ៉ាប់យ៉ឺនទៅៗជារឿយៗ ទោះជានៅអាចរកទិញម្ហូបអាហារ និងរបស់របរប្រើប្រាស់ចាំបាច់បានមែន តែក៏មិនងាយស្រួលដូចកាលពីមុនដែរ។
ទាំងលោក អាអូយ៉ាម៉ា និងលោក ខាតូ បានសម្ដែងនូវការលើកទឹកចិត្តដល់ពលរដ្ឋចិនដែលស្ថិតនៅក្នុងទីក្រុងវូហាន និងបាននិយាយថា ពួកគាត់ទាំង 2នាក់បារម្ភពីមិត្តរួមការងារជនជាតិចិន និងជនជាតិជប៉ុនដទៃទៀតដែលកំពុងស្ថិតនៅក្នុងទីក្រុងនោះ។
លោក Takeo Aoyama (កណ្ដាល ខាងឆ្វេង) ជាបុគ្គលិកបម្រើការឱ្យក្រុមហ៊ុន Nippon Steel Corp នៅក្រុង Wuhan និងលោក Takayuki Kato (កណ្ដាល ស្ដាំ) បម្រើការនៅក្នុងក្រុមហ៊ុន Intec នៅ Wuhan ប្រទេសចិន
បុរសជនជាតិជប៉ុនទាំង 2នាក់បានធ្វើដំណើរត្រឡប់មកវិញជាមួយនឹងជនជាតិជប៉ុនចំនួន 206នាក់ដែលរដ្ឋបាលជប៉ុនម៉ៅយន្តហោះ 1គ្រឿងផ្ដាច់មុខរបស់ក្រុមហ៊ុនអាកាសចរណ៍ អល នីប៉ុន អ៊ែរឡាញ(ANA)ទៅទទួលត្រឡប់មកប្រទេសវិញ។
ក្រុមមន្រ្តីជប៉ុនបានបង្ហើបឱ្យដឹងថា ទាំង 206នាក់នេះ ជាអ្នកដែលរស់នៅជិតផ្សារលក់អាហារសមុទ្រ ហួណាន បំផុត ដែលគេជឿថា ជាកន្លែងកំណើតនៃការឆ្លងរាលដាលរបស់មេរោគវីរុស កូរ៉ូណាប្រភេទថ្មី និងបន្ទាប់ពីនេះ រដ្ឋបាលជប៉ុននឹងបន្តជម្លៀសជនជាតិជប៉ុនដែលនៅសេសសល់ដទៃទៀតឱ្យចាកចេញពីទីក្រុងនោះជាបណ្ដើរៗ៕
ប្រភព៖ សារព័ត៌មានបរទេស
January 29, 2020
អេមីរ៉ាតអារ៉ាប់រួម (United Arab Emirates) រកឃើញអ្នកមានផ្ទុកមេរោគ Corona ករណីដំបូងនៅមជ្ឈិមបូពា៌
ករណីឆ្លងមេរោគ Corona ដំបូងបង្អស់ក្នុងប្រទេស អេមីរ៉ាតអារ៉ាប់រួម (United Arab Emirates) ត្រូវបានអាជ្ញាធរប្រកាសឱ្យដឹងនៅក្នុងថ្ងៃនេះ (29មករា ឆ្នាំ2020)។
ទីភ្នាក់ងារសារព័ត៌មាន MBS បានចេញផ្សាយថា អ្នកដែលមានផ្ទុកមេរោគនេះ គឺជាសមាជិកគ្រួសារមួយមកពីក្រុង Wuhan ប្រទេសចិន។ នេះគឺជាករណីទីមួយដែលត្រូវបានគេរកឃើញនៅមជ្ឈឹមបូពា៌ នេះបើតាមសេចក្ដីប្រកាសរបស់ក្រសួងសុខាភិបាលនៃអេមីរ៉ាតអារ៉ាប់រួម ក្នុងថ្ងៃនេះ។
សូមបញ្ជាក់ថា ប្រជាជនសរុបនៃប្រទេស អេមីរ៉ាតអារ៉ាប់រួម គិតត្រឹមឆ្នាំ2019 មានសរុប 9.68 លាននាក់ នេះបើតាមស្ថិតិរបស់ធនាគារពិភពលោក (World Bank)។
ចំណែកគេហទំព័រ Statista.com វិញ រកឃើញថា ប្រទេសនេះមានប្រជាជនសរុប 10,750,000នាក់៕
ប្រភព៖ សារព័ត៌មានបរទេស
January 29, 2020
អាណិតអ្នកស្រុក Wuhan! ជាអ្នករងគ្រោះសោះ តែមនុស្សភាគច្រើនបែរជាខ្លាចពួកគាត់ ដូចខ្លាច “Zombie”
អ្នកដំណើរនៃជើងហោះហើរពីប្រទេសជប៉ុន ទៅកាន់ប្រទេសចិន បដិសេធមិនព្រមឡើងយន្តហោះ បន្ទាប់ពីដឹងថា មានអ្នកស្រុក Wuhan រួមដំណើរជាមួយ។
អ្នកដំណើរបានតវ៉ាប្រឆាំងមិនឱ្យជនជាតិចិនមកពី Wuhan រួមដំណើរជាមួយ ប៉ុន្តែ ចុងក្រោយក៏មានការសម្របសម្រួល
នៅក្នុងជើងហោះហើរមួយពីប្រទេសជប៉ុន ទៅកាន់ប្រទេសចិន អ្នកដំណើរប្រមាណជាជាង 70នាក់ បានបដិសេធមិនព្រមឡើងយន្តហោះជាដាច់ខាត ដោយសារតែនៅក្នុងយន្តហោះនោះ មានវត្តមានអ្នកដំណើរជាជនជាតិចិនមកពីទីក្រុង Wuhan (ជាតំបន់កំពុងផ្ទុះការឆ្លងរាលដាលនៃមេរោគ Corona) ចំនួន 16នាក់ ដោយសារពួកគេភ័យខ្លាចឆ្លងមេរោគដ៏មហាប្រល័យនេះ។
ការប្រឆាំងតវ៉ាយ៉ាងដាច់ណាត់របស់អ្នកដំណើរជនជាតិជប៉ុនខាងលើ បានបណ្ដាលឱ្យជើងហោះហើរនៃក្រុមហ៊ុនអាកាសចរណ៍ចិន Southern Airlines ដែលនឹងហោះចេញពីក្រុង Nagoya នៃប្រទេសជប៉ុន ទៅកាន់ទីក្រុងស៊ាងហៃ ប្រទេសចិន ត្រូវពន្យារពេលដល់ទៅ 5ម៉ោង កាលពីថ្ងៃទី28មករាកន្លងទៅ។
ក្រុមអ្នកដំណើរបានស្នើឱ្យក្រុមហ៊ុនអាកាសចរណ៍នេះ ដកអ្នកដំណើរដែលជាអ្នកស្រុក Wuhan ទាំង 16នាក់នោះចេញពីជើងហោះហើរនេះ។ បញ្ហានេះ បានអូសបន្លាយពេលរហូតដល់មានវត្តមានរបស់បុគ្គលិកស្ថានទូតចិននៅ Nagayo។ ចុងក្រោយ អ្នកដំណើរជនជាតិជប៉ុនទាំងអស់ ក៏ព្រមឡើងយន្តហោះ និងហោះឆ្ពោះទៅកាន់ស៊ាងហៃ ប្រទេសចិន។
សូមបញ្ជាក់ថា ទីក្រុង Wuhan នៃខេត្ត Hebei ប្រទេសចិន ត្រូវបានអាជ្ញាធរប្រកាសបិទទ្វារ បន្ទាប់ពីអាសន្នរោគ Corona បានផ្ទុះឡើង។ ប៉ុន្តែ ប្រជាជននៅក្នុងទីក្រុងនេះ ប្រមាណជា 5លាននាក់ បានចាកចេញទៅកាន់តំបន់ផ្សេងៗក្នុងពិភពលោក ក្នុងនោះមានអ្នកស្រុក Wuhan ប្រហែលជាង 3,000នាក់ បានមកកាន់កម្ពុជា។
តាមសេចក្ដីរាយការណ៍នៅពេលព្រឹកនេះ (29 មករា 2020) ចំនួនអ្នកស្លាប់ដោយសារជម្ងឺរលាកសួតថ្មីដែលបង្កឡើងដោយមេរោគ Corona បានកើនដល់ 132នាក់ហើយ។ ចំណែកអ្នកដែលបានឆ្លងមេរោគនេះ មានចំនួនជិត 6,000នាក់ ខណៈដែលមនុស្សជិត 7,000នាក់ផ្សេងទៀត ត្រូវបានគេសង្ស័យថា កំពុងផ្ទុកមេរោគនេះ៕
ប្រភព៖ សារព័ត៌មានបរទេស
January 29, 2020
ចិនដុតដៃដុតជើងផលិតម៉ាស់ការពារវីរុសកូរូណា
តាមរយៈសារព័ត៌មានចិន xinhua ចេញផ្សាយនៅពេលមុននេះបន្ដិចបានឱ្យដឹងថា កម្មករចិនជាច្រើននាក់កំពុងដុតដៃដុតជើងផលិតម៉ាស់ការពារវីរុសកូរូណានៅទីក្រុងវូហាន ខេត្តហ៊ូប៉ី ភាគកណ្តាលប្រទេសចិន បន្ទាប់ពីបញ្ចប់ការបណ្ដុះបណ្ដាលសិក្ខាសាលាកាលពីថ្ងៃទី ២៨ ខែមករាឆ្នាំ ២០២០ ដើម្បីជួយប្រយុទ្ធប្រឆាំងនឹងការផ្ទុះឡើងនៃវីរុសរាតត្បាត កូរូណាបង្កជំងឺរលាកសួត។
ប្រភពសារព័ត៌មានដដែរនេះ បានអះអាងថា ក្រៅពីផលិតម៉ាស់ការពារវីរុសហើយនោះ ក៏នៅមានការផលិតសម្លៀកបំពាក់ និងឧបករណ៍ការពារជាច្រើនផ្សេងទៀត ដើម្បីឱ្យធានាបាននូវការឆ្លងវីរុសពីមនុស្សម្នាក់ទៅកាន់មនុស្សម្នាក់៕

January 29, 2020
មេរោគ Corona សម្លាប់មនុស្ស 132នាក់ និងកំពុងគំរាមជីវិតអ្នករងគ្រោះជាង 6,000នាក់ផ្សេងទៀត
គិតមកដល់ព្រឹកនេះ (29 មករា 2020) មានអ្នកស្លាប់ដោយសារជំងឺរលាកសួតដែលបង្កឡើងដោយមេរោគ Corona កើនឡើងដល់ 132នាក់ហើយ។
តាមសេចក្ដីរាយការណ៍នៃសារព័ត៌មាន CNBC និង Bloomberg បានឱ្យដឹងថា បច្ចុប្បន្ន ប្រទេសចិនមានអ្នកឆ្លងមេរោគ Corona កើនឡើងដល់ជាង 6,000ករណី ដោយសារព័ត៌មានទាំង2 ខាងលើបានបញ្ជាក់ថា ចំនួននេះរួមទាំងកោះតៃវ៉ាន់ផងដែរ។
សម្រាប់តែក្នុងតំបន់ Hubei (ចិនដីគោក)មួយ ត្រូវបានគេរាយការណ៍ជាផ្លូវការថា មានអ្នកឆ្លងមេរោគនេះចំនួន 3,554ករណី និងស្លាប់ 125ករណី។
ប្រភព៖ សារព័ត៌មានបរទេស
January 29, 2020
ពេទ្យជនជាតិជប៉ុននៅ វូហាន បង្ហើបឱ្យដឹងពីស្ថានការណ៍បច្ចុប្បន្ន “ធ្ងន់ធ្ងរខ្លាំងជាងយើងគិតទៅទៀត”
ពេទ្យជនជាតិជប៉ុនដែលស្ថិតនៅក្នុងទីក្រុងវូហាន ប្រទេសចិន បានបង្ហើបឱ្យដឹងថា ចំនួនអ្នកឆ្លងមេ រោគ វីរុសកូរ៉ូណា មានច្រើនជាងក្នុងរបាយការណ៍ទៅទៀត ដោយសារតែភាពយឺតយ៉ាវក្នុងការបង្ហាញព័ត៌មានរបស់រដ្ឋបាលចិន។
ស្ថានីយទូរទស្សន៍ NHK របស់ជប៉ុនបានឆ្លើយឆ្លងតាមទូរស័ព្ទជាមួយគ្រូពេទ្យហ្វឹកហាត់ជនជាតិជប៉ុនម្នាក់ដែលកំពុងស្ថិតនៅក្នុងទីក្រុងវូហាន និងសុំមិនបញ្ចេញឈ្មោះបានរៀបរាប់ថា៖ “មនុស្សម្នានៅទីនោះមិនសូវជាភ្ញាក់ផ្អើលប៉ុន្មានទេក្នុងរយៈដំបូងៗ ខ្ញុំគិតថាគ្មាននរណានឹកស្មានដល់ថា វានឹងឆ្លងរាលដាលឆាប់រហ័សបែបនេះ”។
ពេទ្យហ្វឹកហាត់ជនជាតិជប៉ុនរូបនោះបានប៉ាន់ស្មានថា ចំនួនអ្នកឆ្លងមេរោគ អាចនឹងខ្ពស់ជាងនៅក្នុងរបាយការណ៍ច្រើនណាស់ ដោយលោកបានបញ្ជាក់ថា អំឡុងប្រហែលជាថ្ងៃទី 3មករា រូបលោកបានទទួលដំណឹងថា បុគ្គលិកមន្ទីរពេទ្យអាចនឹងឆ្លងមេរោគនេះ តែសារព័ត៌មានចិនប្រើពេលវេលាច្រើនជាង 2សប្ដាហ៍ ទើបរាយការណ៍ថា បុគ្គលិកពេទ្យទាំងនោះបានឆ្លងមេរោគវីរុសកូរ៉ូណាប្រភេទថ្មី។
អភិបាលក្រុង វូហាន៖ ត្រូវរង់ចាំការអនុម័តសិន ទើបអាចផ្សាយព័ត៌មានបាន

រដ្ឋបាលក្រុងវូហាន ត្រូវរងការរិះគន់យ៉ាងខ្លាំង រឿងការលាក់បាំងព័ត៌មាន រហូតធ្វើឱ្យការឆ្លងរីករាលដាលសាយភាយធ្ងន់ធ្ងរ រហូតពិបាកក្នុងការទប់ស្កាត់ ជាពិសេសក្នុងអំឡុងពេលចូលឆ្នាំចិន ដែលជនជាតិចិនរាប់លាននាក់ធ្វើដំណើរទាំងក្នុងប្រទេស និងក្រៅប្រទេស។
លោក ចូ សៀនវ៉ាង អភិបាលក្រុងវូហាន បានទទួលស្គាល់ថា ការបញ្ចេញព័ត៌មានមានការយឺតយ៉ាវមែន ព្រោះត្រូវទទួលបានការអនុញ្ញាតពីថ្នាក់លើ គឺមណ្ឌលហ៊ូពើយ និងគណៈកម្មការសុខាភិបាលជាតិចិន ជាមុនសិន ទើបអាចបញ្ចេញព័ត៌មានបាន។
លោកអភិបាលក្រុងវូហាន ក៏បានទទួលស្គាល់ដែរថា មុនមានវិធានការបិទទីក្រុងវូហាននេះ មានអ្នកធ្វើដំណើរចេញពីទីក្រុងនេះច្រើនជាង 5លាននាក់។ លោកបានឱ្យដឹងទៀតថា លោកដឹងច្បាស់ពីការមិនពេញចិត្តរបស់ប្រជាជន តែវិធានការផ្សេងៗ ចាំបាច់ត្រូវតែប្រើ ដើម្បីទប់ស្កាត់ និងគ្រប់គ្រង។
អ្នកជំនាញការបង្ហាញថា មិនមានអាការរោគ ក៏ចម្លងមេរោគបានដែរ

អ្នកជំនាញការជនជាតិជប៉ុនបាននិយាយថា ការគ្រប់គ្រងការចម្លងរោគ និងការការពារ ពិបាកនឹងធ្វើបានណាស់សម្រាប់វីរុសកូរ៉ូណាប្រភេទថ្មីនេះ។ ការចម្លងមេរោគអាចកើតឡើងបាន ខណៈដែលអ្នកផ្ទុកមេរោគមិនទាន់បង្ហាញរោគសញ្ញា។
លោកសាស្ត្រាចារ្យ មីតស៊ីអូ ខាកូ នៃមហាវិទ្យាល័យវេជ្ជសាស្ត្រ និងឱសថសាស្ត្រ ថូហូកូ បានរៀបរាប់ថា ចំនួនអ្នកជំងឺនៅក្នុងប្រទេសចិនបានកើនច្រើនឡើងជាបន្តបន្ទាប់ ទោះជាមានការគ្រប់គ្រងការធ្វើដំណើរក្នុងទីក្រុងវូហាន និងកន្លែងផ្សេងៗក្នុងប្រទេសចិនក៏ដោយ។ លោកបានបន្តទៀតថា រដ្ឋបាលចិនមានអារម្មណ៍ដឹងអំពីភាពប្រញាប់ប្រញាល់ខ្លាំងឡើង ដោយសារតែមនុស្សដែលជាភ្នាក់ងារចម្លងមេរោគនេះ អាចនឹងសាយភាយវីរុសនេះបាន ទោះជាក្នុងអំឡុងពេលដែលមិនមានបង្ហាញអាការរោគក៏ដោយ។
វីរុសកូរ៉ូណាប្រភេទថ្មីនេះ ខុសប្លែកពីប្រភេទដែលបង្កឱ្យកើតការសាយភាយរាតត្បាតរបស់ជំងឺខាងប្រព័ន្ធដកដង្ហើមទាន់ហន់ និងធ្ងន់ធ្ងរ ឬសារស៍ និងរោគខាងផ្លូវដង្ហើមមជ្ឈិមបូព៌ា ឬជំងឺមើស ព្រោះថា អ្នកដែលឆ្លងមេរោគវីរុសជំងឺសារស៍ និងមើស នឹងមិនសាយភាយ ឬចម្លងទៅបុគ្គលដទៃឡើយ ខណៈដែលខ្លួនឯងនៅមិនទាន់មានអាការរោគ ដូចជាក្អក ឬហៀរសំបោរ ជាដើមនោះ។
លោកសាស្ត្រចារ្យ ខាកូ បានដាស់តឿនថា អ្នកដែលមានជំងឺរ៉ាំរ៉ៃ អាចនឹងមានអាការធ្ងន់ធ្ងរ បើបានទទួលមេរោគវីរុសកូរ៉ូណាប្រភេទថ្មីនេះ លោកព្រមទាំងបានដាស់តឿនទៀតថា ចូរព្យាយាមចៀសវាងកុំឱ្យបានទទួលវីរុសនេះឱ្យសោះ ទោះជាតិចតួចក៏ដោយ ព្រោះវាជាមេរោគប្រភេទថ្មីដែលមនុស្សមិនធ្លាប់ស្គាល់ និងមិនមានបទពិសោធពីមុនមក៕
ប្រភព៖ សារព័ត៌មានបរទេស
January 28, 2020
មនុស្ស 5លាននាក់ បានចាកចេញពី Wuhan ទៅកាន់តំបន់ផ្សេងៗ និងរាប់ពាន់នាក់មកកម្ពុជា មុនការបិទទីក្រុងនេះ
មនុស្សប្រមាណ 5លាននាក់ បានចាកចេញពីតំបន់ Wuhan មុនពេលតំបន់នេះត្រូវបានដាក់បម្រាមគោចរកាលពីថ្ងៃទី23មករា ព្រោះតែការឆ្លងរាលដាលនៃមេរោគរលាកសួតប្រភេទថ្មី Corona។
បច្ចុប្បន្ន មនុស្សប្រមាណជា 9លាននាក់កំពុងស្ថិតនៅក្នុងតំបន់ Wuhan (ដែលជាទីតាំងឆ្លងមេរោគ Corona មុនគេ) នៃខេត្ត Hebei ប្រទេសចិន នេះបើតាមការឱ្យដឹងពីអភិបាលក្រុង លោក Zhou Xianwang។ អភិបាលក្រុងរូបនេះ បានបន្ថែមថា ក្នុងចំណោមអ្នកជំងឺ 2,700នាក់ដែលកំពុងត្រូវបានតាមដាន គឺមានប្រហែល 1,000នាក់អាចនឹងមានផ្ទុកមេរោគ Corona (nCoV)នេះ។
គិតមកដល់ព្រឹកថ្ងៃទី27 មករានេះ តំបន់ Wuhan មានអ្នកជំងឺដល់ទៅ 533នាក់ ត្រូវបានគេបញ្ជាក់ថា មានផ្ទុកជំងឺរលាកសួតថ្មី Corona។ ខេត្ត Hebei នៃប្រទេសចិន មានអ្នកជំងឺរលាកសួតជាងពាក់កណ្ដាលក្នុងចំណោមអ្នកជំងឺជាង 2,700នាក់នៅប្រទេសចិន នេះបើតាមគេហទំព័រ CNBC។
ទីភ្នាក់ងារសារព័ត៌មាន Aljazeera បានឱ្យដឹងដែរថា អាជ្ញាធរចិនបានបិទទ្វារទីក្រុងចំនួនជិត 20 ដើម្បីទប់ស្កាត់ការរីករាលដាលនៃមេរោគកំណាច Corona ដែលបានសម្លាប់មនុស្សយ៉ាងតិច 81នាក់ ក្នុងរយៈពេលតែប៉ុន្មានសប្ដាហ៍ចុងក្រោយនេះ។
ទីភ្នាក់ងារសារព័ត៌មាន Nytimes បានដកស្រង់សម្ដីលោកអភិបាលក្រុង Wuhan លោក Zhou Xianwang ឱ្យដឹងថា មុនការដាក់បម្រាមគោចរ មានមនុស្សចំនួនប្រមាណជា 5លាននាក់បានចាកចេញពីទីក្រុង Wuhan ទៅកាន់តំបន់ផ្សេងៗក្នុងពិភពលោក។
បើតាមគេហទំព័រដែលមានឈ្មោះថា “ថ្មីៗ” បានសរសេរថា លោក ជា អូន អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិលកម្ពុជា បានឱ្យដឹងថា បច្ចុប្បន្នមានជនជាតិចិនដែលមកពីទីក្រុងវូហានចំនួនជាង 3,000នាក់បានស្នាក់នៅក្នុងប្រទេសកម្ពុជា ដោយពួកគេបានធ្វើដំណើរមកដល់កម្ពុជាតាំងពីថ្ងៃទី23 មករាកន្លងទៅ៕
ប្រភព៖ សារព័ត៌មានបរទេស
January 28, 2020