Category: សុខភាព

  • បុរសអាមេរិកាំងម្នាក់ឆ្លងមេរោគវីរុស corona ទាំងមិនបានទៅប្រទេសចិនសោះ…

    បុរសអាមេរិកាំងម្នាក់ឆ្លងមេរោគវីរុស corona ទាំងមិនបានទៅប្រទេសចិនសោះ…

    មជ្ឈមណ្ឌលគ្រប់គ្រង និងបង្ការរោគអាមេរិក Centers for Disease Control and Prevention (CDC) កាល​ពី​​ថ្ងៃទី30 មករា បានឱ្យដឹងថា ករណីឆ្លងមេរោគ corona ថ្មីបំផុតនៅប្រទេសនេះ គឺ​មាន​ជាប់​ទាក់​ទិន​នឹងប្ដី​ប្រពន្ធ​ 1គូនៅក្រុង Chicago រដ្ឋ Illinois។

    បុរសដែលបានឆ្លងមេរោគនេះ មិនដែលធ្លាប់បានទៅប្រទេសចិនម្ដងណាឡើយ ប៉ុន្តែ​ប្រពន្ធ​របស់​គាត់​ត្រូវ​បាន​គេ​រកឃើញថា មានផ្ទុកមេរោគនេះ បន្ទាប់នាងពីត្រឡប់មកពីក្រុង Wuhan នៃប្រទេសចិនដែលជា “សម្បុក​មេរោគ” corona។

    នេះគឺជាករណីឆ្លងមេរោគវិរុស corona ពីមនុស្សទៅមនុស្សដំបូងគេនៅសហរដ្ឋអាមេរិក និង​ជា​ករណី​ដែល​អ្នក​ចម្លងមិនទាន់បង្ហាញអាការរោគអ្វីទាំងអស់ តែអាចចម្លងទៅអ្នកជិតខាងបាន។ ប៉ុន្តែ​មន្ត្រី​សុខាភិបាល​អាមេរិក​នៅតែអះអាងថា ចំពោះមុខ ហានិភ័យនៃការឆ្លងមេរោគនេះនៅអាមេរិក គឺនៅទាបនៅឡើយ។

    យ៉ាងនេះក្ដី អគ្គនាយកនៃ CDC លោក Robert Redfield បានថ្លែងថា នឹង​មាន​ការ​ឆ្លង​មេរោគ​នេះ​ពី​មនុស្ស​ទៅ​មនុស្សជាច្រើនករណីបន្ថែមទៀតនៅអាមេរិក។

    បច្ចុប្បន្ន អាមេរិកមានអ្នកផ្ទុកមេរោគវីរុស corona សរុបចំនួន 6នាក់។ ក្រៅ​ពី​ករណី​ថ្មី​បំផុត​ដែល​ឆ្លង​ពី​មនុស្ស​ទៅ​មនុស្ស គឺមាន 5ករណី ដែលសុទ្ធតែជាអ្នកទើបត្រឡប់មកពីប្រទេសចិនទាំងអស់៕

    ប្រភព៖ សារព័ត៌មានបរទេស

  • WHO ប្រកាសអាសន្ន ខណៈអ្នកស្លាប់កើនដល់ 213នាក់ ឯប្រទេសនានា បន្តបិទច្រកព្រំដែន និងជើងហោះហើរទៅ-មកប្រទេសចិន

    WHO ប្រកាសអាសន្ន ខណៈអ្នកស្លាប់កើនដល់ 213នាក់ ឯប្រទេសនានា បន្តបិទច្រកព្រំដែន និងជើងហោះហើរទៅ-មកប្រទេសចិន

    អង្គការសុខភាពពិភពលោក (WHO) កាលពីប៉ុន្មានម៉ោងមុននេះ (30មករា នៅតំបន់លោកខាងលិច) បានប្រកាសភាពអាសន្នជាផ្លូវការ ចំពោះមេរោគ corona ថ្មីនេះ ខណៈ​ប្រទេសដែលមានអ្នកឆ្លងមេរោគ nCoV (corona) បានកើនដល់ជាង 20ប្រទេស នៅទូទាំងពិភពលោក ជា​ហេតុ​ធ្វើ​ឱ្យ​បណ្ដា​ប្រទេស​នៅ​ក្បែរ​ចិន បន្ត​បិទ​ច្រក​ព្រមដែន​។

    ទីភ្នាក់ងារសារព័ត៌មានរុស្ស៊ី TASS កាលពីថ្ងៃទី30 មករា បានឱ្យដឹងថា នាយករដ្ឋមន្ត្រីរុស្ស៊ី លោក Mikhail Mishunstin បានចុះហត្ថលេខាលើបទបញ្ជាបិទច្រកព្រំដែនជាមួយចិន នៅចុងបូព៌ាប្រទេស ដើម្បីទប់ស្កាត់ការឆ្លងរាលដាលនៃមេរោគរលាកសួតថ្មីពីប្រទេសចិន។ ក្រៅពីនេះ TASS ក៏បានឱ្យដឹងទៀតដែរថា រុស្ស៊ីចាប់ផ្ដើមកាត់បន្ថយការធ្វើដំណើរតាមរថភ្លើង រវាងចិន និងរុស្ស៊ី ចាប់ពីថ្ងៃទី31 មករានេះតទៅ។

    ខ្សែ​​ក្រហម​គឺ​ជា​បន្ទាត់​ព្រមដែន​ចិន និង​រុស្ស៊ី

    កន្លងទៅថ្មីៗ ប្រទេសមួយចំនួន ក្នុងនោះមាន ម៉ុងហ្គោលី នេប៉ាល កូរ៉េខាងជើង ក៏បានបិទច្រកព្រំដែនជាមួយប្រទេសចិនដែរ មុនពេលអាសន្នរោគនេះរីករាលដាលខ្លាំង។

    ប្រទេសហ្វីលីពីន ទីក្រុងម៉ាកាវ និងប្រទេសកាហ្សាក់ស្ថាន បានផ្អាកផ្ដល់ទិដ្ឋាការដល់ពលរដ្ឋចិន ខណៈដែលក្រុង ហុងកុងក៏បានផ្អាកដំណើរការកប៉ាល់ និងស្រឡាងដែលធ្វើដំណើរទៅ-មករវាងចិនដីគោក និងហុងកុង ព្រមទាំងបានបិទច្រកព្រំដែនមួយចំនួនទៀតផងដែរ។

    ជើងហោះហើរអន្តរជាតិជាច្រើនបានប្រកាសផ្អាកដំណើរការហោះហើរទៅ-មកប្រទេសចិន ក្នុងនោះមានដូចជាក្រុមហ៊ុនអាកាសចរណ៍ Air Canada, Air India, American Airlines, British Airways, Cathay Pacific, Delta, United Airlines, Lufthansa និង Lion Air ជាដើម។

    អង្គការសុខភាពពិភពលោក (WHO) កាលពីប៉ុន្មានម៉ោងមុននេះ (30មករា នៅតំបន់លោកខាងលិច) បានប្រកាសភាពអាសន្នជាផ្លូវការ ចំពោះមេរោគ corona ថ្មីនេះ។ ប្រការនេះទាមទារឱ្យបណ្ដាប្រទេសក្នុងពិភពលោក ត្រូវបង្កើនវិធានការទប់ស្កាត់ការឆ្លងរាលដាលនៃមេរោគនេះជាលក្ខណៈអន្តរជាតិ។

    ប្រធាន​អង្គការ​សុខភាព​ពិភព​លោក​

    យោងតាមគណៈកម្មាធិការជាតិសុខាភិបាលចិន គិតមកដល់ព្រឹកថ្ងៃនេះ (31មករា) ចំនួនអ្នកស្លាប់ដោយសារមេរោគ corona បានកើនដល់ 213នាក់ហើយនៅក្នុងប្រទេសចិន បន្ទាប់ពីខេត្ត Hebei បានប្រកាសថា ខេត្តនេះមានអ្នកស្លាប់បន្ថែម 42នាក់ ឯចំនួនអ្នកដែលបានឆ្លងមេរោគនេះនៅទូទាំងពិភពលោក គឺមាន 9,480 នាក់ ក្នុងនោះចិនដីគោកមានចំនួន 9,356នាក់។

    បច្ចុប្បន្ន តាមប្រភពព័ត៌មានមួយចំនួនទៀត បានឱ្យដឹងថា ចំនួនប្រទេសដែលមានអ្នកឆ្លងមេរោគ nCoV (corona) បានកើនដល់ជាង 20ប្រទេសហើយនៅទូទាំងពិភពលោក៕

    ប្រភព៖ សារព័ត៌មាន

  • 17ឆ្នាំ ពីមេរោគ «Sars» មកដល់ «Corona» វីរុសថ្មីផ្ដាច់ជីវិតមនុស្ស…តើមួយណាសាហាវជាង?

    17ឆ្នាំ ពីមេរោគ «Sars» មកដល់ «Corona» វីរុសថ្មីផ្ដាច់ជីវិតមនុស្ស…តើមួយណាសាហាវជាង?

    ជាង17ឆ្នាំនៃការឆ្លងរាលដាលពីមេរោគ«Sars»(សារស៍) មកដល់ «Corona» បានក្លាយជាមហាវិបត្តិថ្មី ដែលមានដើមកំណើតមកពីប្រទេស(ចិន)តែមួយ តើមេរោគទាំង2 នេះ មួយណាមានអានុភាពខ្លាំងក្លាជាង? និងតើមនុស្សនៅក្នុងពិភពលោក នឹងត្រូវស្លាប់ប៉ុន្មាននាក់ទៀត?

    គ្រប់ 1ខែគត់ដែលរដ្ឋបាលចិនបានរាយការណ៍ទៅអង្គការសុខភាពពិភពលោក(WHO)អំពីការឆ្លងរាលដាលនៃ “មេរោគវីរុសកូរ៉ូណាប្រភេទថ្មី2019” លើកដំបូងកាលពីថ្ងៃទី31 ខែធ្នូ ឆ្នាំ2019។ នៅក្នុងខណៈនោះ មានអ្នកផ្ទុកមេរោគវីរុសកូរ៉ូណារួចទៅហើយ 44នាក់ ហើយមកដល់ថ្ងៃនេះ(30 មករា 2020) ទូទាំងពិភពលោកមានអ្នកឆ្លងវីរុសកូរ៉ូណាកើនឡើង 7,783នាក់ និងស្លាប់ 170នាក់។

    តាមរយៈតួលេខនេះ បើប្រៀបធៀបនឹងមេរោគ«Sars» (សារស៍)ដែលកើតឡើងក្នុងអំឡុងឆ្នាំ2002-2003 ដែលមានអ្នកឆ្លងមេរោគនេះជាង 8,000នាក់ និងស្លាប់ 774នាក់ មានន័យថា អ្នកឆ្លងវីរុសកូរ៉ូណាទូទាំងពិភពលោកនាពេលបច្ចុប្បន្ន មានភាគរយខ្ពស់ជាងដល់ទៅ 74.80% នៃអ្នកឆ្លងមេរោគ«Sars» ក្នុងរយៈវេលាត្រឹមតែ 1ខែប៉ុណ្ណោះ។

    ខណៈដែលតួលេខឆ្លងមេរោគវីរុសកូរ៉ូណានៅក្នុងប្រទេសចិន នៅថ្ងៃទី30 មករានេះ ក៏ខ្ពស់ឡើងដល់ទៅ 5,974នាក់ទៅហើយដែរ ដោយកើនពីថ្ងៃពុធ ប្រមាណ 1,500នាក់ ឬគិតជាភាគរយ គឺច្រើនជាង 30% ផ្ដួលស្ថិតិ 5,327នាក់របស់មេរោគ«Sars» ស្រេចបាច់បាត់ទៅហើយ និងបើប្រៀបធៀបពីល្បឿននៃការឆ្លងរាលដាលរបស់វីរុសកូរ៉ូណា និង«Sars»វិញ បើយើងមើលពីតួលេខដែលបានបង្ហាញពីខាងដើម ក៏នឹងឃើញថា វីរុសកូរ៉ូណាមានការឆ្លងរាលដាលលឿនរហ័សជាងច្រើនណាស់។ ត្រឹមតែ 29ថ្ងៃ ក៏មានអ្នកឆ្លងមេរោគរួចទៅហើយជាង 3,000នាក់ ខណៈដែល«Sars»ប្រើពេលយ៉ាងហោចណាស់ក៏ 5ខែដែរ ទើបមានអ្នកឆ្លងរោគច្រើនដល់ 3,000នាក់។

    តាមរយៈតួលេខដែលបង្ហាញខាងលើនេះ មិត្តអ្នកអានគេហទំព័រឡារ៉ែន ច្បាស់ជាគិតថា វីរុសកូរ៉ូណាប្រហែលជាមានអានុភាពខ្លាំងក្លាជាងមេរោគ«Sars»មិនខាន…តែការគិតនេះ វាបញ្ច្រាស់គ្នានឹងអ្នកវិទ្យាសាស្ត្រ និងអ្នកជំនាញការខាងវេជ្ជសាស្ត្រនៅក្រៅប្រទេសជាច្រើននាក់ ដែលមិនបានគិតដូច្នេះឡើយ ដោយពួកគេមើលឃើញថា អានុភាពនៃភាពខ្លាំងក្លាដែលនឹងអាចសម្លាប់ជីវិតមនុស្សនៅលើពិភពលោករបស់វីរុសកូរ៉ូណា មានតិចជាង «Sars» ព្រោះគ្រាដែល«Sars»ឆ្លងរាលដាលរាតត្បាតខ្លាំងក្លានោះ មានអត្រាការស្លាប់ខ្ពស់ដល់ទៅ 9.6%ឯណោះ។ ផ្ទុយទៅវិញ វីរុសកូរ៉ូណា មានការវាយតម្លៃថា អាចនឹងស្ថិតក្នុងអត្រា 2.2 ទៅ 3%ប៉ុណ្ណោះ។

    ត្រឡប់ទៅនិយាយអំពីការឆ្លងរាលដាលដែលលឿនរហ័សវិញ គឺមានការវាយតម្លៃចេញមកថា អ្នកឆ្លងមេរោគវីរុសកូរ៉ូណាត្រឹមតែ 1នាក់ អាចចម្លងទៅបុគ្គលផ្សេងទៀតបាន 2-3នាក់ឯណោះ។

            -“វីរុស” រាលដាលឆ្លងប្រទេស
    មុនការឆ្លងរាលដាលឆ្លងប្រទេស ប្រហែលជាយើងត្រូវថយត្រឡប់ទៅមើលពីដើមកំណើតនៃវីរុសទាំង2 នេះសិន។ ទាំងកូរ៉ូណា និងសារស៍ សុទ្ធតែចេញមកពីប្រទេសតែមួយជាមួយគ្នា គឺ “ប្រទេសចិន” និងមានប្រភពកំណើតដូចគ្នា គឺចេញពី “ផ្សារលក់អាហារស្រស់” ខុសគ្នាតែត្រង់មិនបានចេញមកពីទីក្រុង និងមណ្ឌលជាមួយគ្នាតែប៉ុណ្ណោះ។ ដោយវីរុសកូរ៉ូណាចេញមកពីទីក្រុងវូហាន មណ្ឌលហ៊ូពេយ ឯសារស៍ ចេញមកពីមណ្ឌលក្វាងទុង។

    ពីការដែល “ផ្សារលក់អាហារស្រស់” គឺជាប្រភពកំណើតនៃការឆ្លងរាលដាលរបស់មេរោគកូរ៉ូណា ដែលមានរានលក់សាច់សត្វស្រស់ច្រើនប្រភេទ ទាំងពស់ សំពោច សត្វស្លាប រួមទាំងប្រចៀវផងនោះ បានធ្វើឱ្យរដ្ឋបាលចិនចេញវិធានការតឹងរ៉ឹង ចេញបញ្ជាហាមទូទាំងប្រទេសមិនឱ្យលក់សត្វព្រៃនៅក្នុងផ្សារលក់អាហារស្រស់ ភោជនីយដ្ឋាន និងផ្សារផ្លាតហ្វ៉ម អ៊ី-ខំមើរកស៍(លក់តាមអនឡាញ) រួមទាំងការចេញបញ្ជាបិទទីក្រុង និងផ្អាកការធ្វើគមនាគមន៍ ដឹកជញ្ជូនគ្រប់ប្រព័ន្ធផ្លូវ ដោយសារខ្លាចក្លាយជាប្រភពបណ្ដុះមេរោគ និងធ្វើឱ្យកើតការរាលដាលដែលអាចនឹងធ្ងន់ធ្ងរខ្លាំងឡើងជាងពេលបច្ចុប្បន្ន និងដែលអាចនឹងដូចកាលពីសម័យមេរោគ «សារស៍» ដែលឆ្លងរាលដាលរហូតដល់ទៅ 26ប្រទេសក្នុងរយៈពេលតែ 8ខែ ខណៈដែលវីរុសកូរ៉ូណាកំពុងរាលដាលទៅដល់ 18ប្រទេសក្នុងពិភពលោក(រួមទាំងកម្ពុជាផង)ក្នុងរយៈពេលតែ 1ខែប៉ុណ្ណោះ។

    ដោយចំនួនតួលេខប្រទេសដែលបានឆ្លងរាលដាលច្រើនជាងពាក់កណ្ដាលរបស់មេរោគ សារស៍ និងទោះជាមានការទាមទារឱ្យប្រកាស “សភាវគ្រោះថ្នាក់លំដាប់ពិភពលោក” ក្ដី តែអង្គការសុខភាពពិភពលោក(WHO) បែរជាមើលឃើញថា «វាហាក់ដូចជាលឿនពេកក្នុងការប្រកាសបែបនោះ» ទៅវិញ។

            សរុបទៅ តើវីរុសកូរ៉ូណា និងសារស៍ ដូចគ្នាដែរឬទេ?

    ចម្លើយ មានទាំង “ដូចគ្នា” និង “ខុសគ្នា”
    -ចំណុចដែល “ដូចគ្នា” របស់វីរុសកូរ៉ូណា និងសារស៍ គឺ “ប្រភពបង្កើតមេរោគ”
    -និងចំណុចដែល “ខុសគ្នា” របស់វីរុសកូរ៉ូណា និងសារស៍ គឺ “ភ្នាក់ងារចម្លងរោគ”

            យើងនាំគ្នាទៅមើល ម្ដង 1Step
    1-សារស៍ ចាប់ផ្ដើមពីសត្វប្រចៀវ ចូលទៅសត្វសំពោច រួចចូលមកមនុស្ស និងអាចចម្លងពីមនុស្សទៅមនុស្សបាន តាមរយៈកម្ទេច ឬលម្អងស្លេស្ម៍ ការប៉ះពាល់ និងការក្អក ឬកណ្ដាស។
    2-វីរុសកូរ៉ូណាប្រភេទ2019 ចាប់ផ្ដើមពីសត្វប្រចៀវ ចូលទៅ “ភ្នាក់ងារចម្លងរោគអាថ៌កំបាំង” រួចចូលមកមនុស្ស និងអាចចម្លងពីមនុស្សទៅមនុស្សបាន តាមរយៈកម្ទេច ឬលម្អងស្លេស្ម៍ ការប៉ះពាល់ និងការក្អក ឬកណ្ដាស់។

    ក្រៅពីនេះ រឿងមួយទៀតដែលមេរោគទាំង2 ដូចគ្នា នោះគឺ “គ្មានវ៉ាក់សាំងការពារ”។

    យុទ្ធនាការបង្ក្រាបវីរុសកូរ៉ូណា មេរៀនដែលចិនរៀនយល់ដឹងពីមេរោគ សារស៍

    ក្នុងអំឡុងដើមឆ្នាំ2003 ដែលមេរោគសារស៍មានការឆ្លងរាលដាលយ៉ាងខ្លាំងក្លានោះ ប្រទេសជាច្រើននាំគ្នាខឹងសម្បា និងគិតថា ផលប៉ះពាល់ដែលពិបាកហួសនឹងទប់ស្កាត់ រហូតរាលដាលឆ្លងទៅ 26ប្រទេស មានអ្នកឆ្លងមេរោគជាង 8,000នាក់ និងស្លាប់ជាង 700នាក់នោះ គឺដោយសារតែចិនមានការលាក់បាំងព័ត៌មានអ្វីម្យ៉ាង ទាំងដែលការឆ្លងរាលដាលបានចាប់ផ្ដើមឡើងក្នុងខែវិច្ឆិកា ឆ្នាំ2002 តែចិនបែរជាទើបតែរាយការណ៍ជាសាធារណៈលើកដំបូងនៅក្នុងខែកុម្ភៈ ឆ្នាំ2003។ ស្ថានការណ៍កើតវិបត្តិខ្លាំង មានអ្នកស្លាប់រហូតដល់ 5នាក់រួចទៅហើយ និងឆ្លងមេរោគជាង 300នាក់ក្នុងមណ្ឌលក្វាងទុង។

    កន្លងមក នៅចុងឆ្នាំ2019 ចិនមានការផ្លាស់ប្ដូរ ដោយចាប់ផ្ដើមរាយការណ៍ជាសាធារណៈ និងទៅអង្គការសុខភាពពិភពលោកអំពីស្ថានការណ៍ឆ្លងរាលដាលក្នុងអំឡុងពេលដែលទើបតែមានការចាប់ផ្ដើមឆ្លងរាលដាល ដែលទោះជាកន្លងផុតទៅហើយ 3សប្ដាហ៍ក៏ដោយ តែក៏រាប់ថា លឿនជាងកាលពីគ្រាមុន(កាលពីមេរោគសារស៍រាតត្បាត)។

    យ៉ាងណាក៏ដោយ ទោះជាមានភាពលឿនរហ័សជាងមុន ទោះជាមានការត្រៀមវិធានការទប់ទល់ ទាំងការបិទទីក្រុង ការប្រកាសប្រាប់ប្រជាជន កាត់កាត់ផ្ដាច់ផ្លូវគមនាគមន៍ និងដឹកជញ្ជូន និងរាយការណ៍ពីបច្ចុប្បន្នភាពចំពោះអន្តរជាតិហើយក៏ដោយ តែក៏នៅតែមានភាពមិនច្បាស់លាស់ និងគួរឱ្យសង្ស័យសម្រាប់ប្រទេសជាច្រើនថា “ចិនអាចនៅមិនទាន់ស្មោះត្រង់ចំពោះការរាយការណ៍ទាំងអស់នៅឡើយ”។

    -មេរោគ2 បង្កគ្រោះថ្នាក់ ចិនជប់មន្ទីរពេទ្យឡើងក្នុងរយៈពេល 6ថ្ងៃ

    ថ្ងៃសុក្រ ទី24 មករា ឆ្នាំ2020 ចិនគាស់ “សាស៍ ម៉ូដែល” មកប្រើឡើងវិញម្ដងទៀត ដោយការសាងសង់មន្ទីរពេទ្យពិសេសសម្រាប់ទទួលអ្នកជំងឺមេរោគវីរុសកូរ៉ូណាប្រភេទថ្មី2019 ជាពិសេសតែម្ដង។

    ផ្ទៃដីជាង 25,000ម៉ែត្រការ៉េ ត្រូវបានជប់និម្មិតជាមន្ទីរពេទ្យទំហំ 1,000គ្រែអ្នកជំងឺ ដោយមានបែបគំរូដើមតាមមន្ទីរពេទ្យ សៀវ ថាំងសាន ដែលសាងឡើងដើម្បីទប់ទល់ការឆ្លងរាលដាលរបស់មេរោគសារស៍ក្នុងឆ្នាំ2003។

    កាលពីសម័យមេរោគសារស៍រាតត្បាត ចិនប្រើកម្មករជាង 4,000នាក់ សាងសង់ទាំងយប់ទាំងថ្ងៃ រហូតមន្ទីរពេទ្យកើតចេញជារូបរាងស្រេចបាច់ក្នុងរយៈពេល 7ថ្ងៃ។ ចំណែកក្នុងគ្រា វីរុសកូរ៉ូណានេះ ក៏ដូចគ្នាដែរ រដ្ឋបាលចិនដាក់កំណត់ ត្រូវសាងសង់ឱ្យហើយស្រេចក្នុងរយៈពេល 6ថ្ងៃ ដោយត្រូវត្រៀមឱ្យរួចជាស្រេចសម្រាប់ការប្រើប្រាស់នៅថ្ងៃទី3 កុម្ភៈ ឆ្នាំ2020។

    តាមរយៈស្ថានការណ៍ការឆ្លងរាលដាលនៃ វីរុសកូរ៉ូណាប្រភេទថ្មី2019 ដែលកំពុងតែឆាបឆេះខ្លាំងនាពេលនេះ ទោះជាក្នុងកម្រិតពិភពលោកនៅមិនទាន់មានការប្រកាសថាជា “សភាវវិបត្តិដែលគួរឱ្យភ័យបារម្ភ” ក៏ដោយ និងទោះជាមានអត្រាការស្លាប់ដែលទាបជាងកាលមេរោគសារស៍ក៏ដោយ តែដោយការឆ្លងរាលដាលដែលឆាប់រហ័សបែបនេះ វាអាចនឹងមានភាពអាចទៅរួចដែលថា អ្នកឆ្លងមេរោគនឹងកើនឡើងខ្ពស់ដល់ទៅ 250,000 ឬ 350,000នាក់ ដូចដែលមានការវាយតម្លៃ…។

    ហើយចាប់ពីពេលនេះទៅ ប្រហែលជាត្រូវតាមសង្កេតបែបមិនដាក់ភ្នែកហើយថា តើចិនអាចគ្រប់គ្រង “វីរុសកូរ៉ួណាប្រភេថ្មី2019” ឱ្យស្ថិតក្នុងរង្វង់កំណត់ និងបញ្ឈប់ការឆ្លងរាលដាលបានក្នុងអំឡុងពេល 8ខែដូចកាលពី មេរោគសារស៍ បានដែរឬទេ? ព្រោះបើសិនជាយូរជាងនេះ ច្បាស់ជាមានផលប៉ះពាល់ដល់ GDP របស់ចិន និងពិភពលោកយ៉ាងពិតប្រាកដ យ៉ាងតិចបំផុតក៏ប្រហែល 1-2%ដែរ៕

    ប្រភព ៖ សារព័ត៌មានបរទេស

  • ចិនព្រមានពីការកើតឡើងនៃ “សម្បុកមេរោគ” រលាកសួត “ទី2” បន្ទាប់​ពី Wuhan

    ចិនព្រមានពីការកើតឡើងនៃ “សម្បុកមេរោគ” រលាកសួត “ទី2” បន្ទាប់​ពី Wuhan

    អភិបាលខេត្ត Hebei បាននិយាយថា ជំងឺរលាកសួតដែលបង្កឡើងដោយមេរោគ Corona (nCoV) មកដល់ពេលនេះបានធ្វើឱ្យមានភាពវឹកវរជាខ្លាំងក្នុងក្រុង Huanggang (ទីក្រុង 1ទៀត)នៃខេត្តមួយនេះ។

    នៅក្នុងកិច្ចប្រជុំកាលពីថ្ងៃទី29 មករាកន្លងទៅ អភិបាលខេត្ត Hebei លោក Wang Xiaodong បានថ្លែងថា យើងមិនអាចបណ្ដោយឱ្យទីក្រុង Huanggang ក្លាយជា “សម្បុកមេរោគ” Wuhan ទី2បានទេ។ លោក Wang Xiaodong ក៏បានស្នើឱ្យបណ្ដាក្រុមហ៊ុនក្នុងខេត្ត Hebei បន្តផ្អាកសកម្មភាពរហូតដល់ក្រោយថ្ងៃទី13 កុម្ភៈ ឆ្នាំ2020។

    ទីក្រុង Huanggang មានប្រជាជនសរុប 7.5លាននាក់ ហើយវាគឺជាទីក្រុងដ៏ធំមួយដែរនៅក្បែរទីក្រុង Wuhan។ Huanggang ក៏ជាទីក្រុងមួយក្នុងចំណោមទីក្រុងដែលត្រូវបានដាក់បម្រាមគោចរដើម្បីទប់ស្កាត់ការឆ្លងរាលដាលនៃមេរោគ Corona ដែរ។ ទីក្រុងនេះ មានអ្នកស្លាប់ដោយសារមេរោគរលាកសួត Corona ចំនួន 5នាក់ និងមានអ្នកឆ្លងមេរោគនេះចំនួន 324ករណី គិតមកត្រឹមថ្ងៃទី28 មករា ឈរលំដាប់លេខ2 បន្ទាប់ពីក្រុង Wuhan ដែលជា “ស្រុកកំណើត” របស់មេរោគ Corona។

    ប្រភពព័ត៌មានបានឱ្យដឹងថា អ្នកស្លាប់ដោយសារមេរោគ nCoV (Corona) កើនដល់ 170នាក់ និងអ្នកឆ្លងមេរោគនេះក៏កើនដល់ 7,783ករណីនៅទូទាំងពិភពលោក ភាគច្រើន គឺជាប្រជាជននៅក្រុង Wuhan នេះបើគិតមកដល់ថ្ងៃទី30 មករានេះ។

    ទិន្នន័យចុងក្រោយបានបង្ហាញថា ចិនដីគោកមានអ្នកឆ្លងមេរោគនេះចំនួន7,678នាក់ ប្រទេសថៃ14នាក់ ជប៉ុន11នាក់ ហុងកុង10នាក់ សិង្ហបុរី10នាក់ កោះតៃវ៉ាន់ 8នាក់ អូស្ត្រាលី 7នាក់ ក្រុងម៉ាកាវ 7នាក់ ម៉ាឡេស៊ី 7នាក់ បារាំង 5នាក់ អាមេរិក 5នាក់ អាល្លឺម៉ង់ 4នាក់ កូរ៉េខាងត្បូង 4នាក់ អេមីរ៉េត អារ៉ាប់រួម 4នាក់ កាណាដា 3នាក់ វៀតណាម 2នាក់ កម្ពុជា 1នាក់ ហ្វាំងឡង់ 1នាក់ នេប៉ាល 1នាក់ ស្រីលង្កា 1នាក់។

    ប្រធានាធិបតីចិន លោក ស៊ី ជីនពីង បានថ្លែងនៅក្នុងកិច្ចប្រជុំជាមួយអង្គការសុខភាពពិភពលោក (WHO) កាលពីថ្ងៃទី28កន្លងទៅថា “វីរុស nCoV គឺជាបិសាច ហើយយើងនឹងមិនបណ្ដោយឱ្យពួកវាគេចខ្លួនបានឡើយ។ ចិននឹងបង្កើនកិច្ចសហប្រតិបត្តិការអន្តរជាតិ និងស្វាគមន៍ WHO ដែលចូលរួមបេសកកម្មប្រឆាំងអាសន្នរោគនេះ។ ចិនមានជំនឿចិត្តថា នឹងអាចទប់ស្កាត់វីរុសនេះបាន”។

    អ្នកជំនាញជាច្រើនយល់ថា មេរោគប្រភេទថ្មី nCoV នេះ មិនសម្លាប់មនុស្សច្រើនដូចមេរោគ SARS មែន ប៉ុន្តែពួកគេនៅតែព្រមានអំពីការកើនឡើងនៃករណីឆ្លងដ៏លឿនរហ័ស ហើយចំណុចពិសេសជាច្រើនរបស់មេរោគនេះ មិនទាន់ត្រូវបានគេដឹងលម្អិតនៅឡើយ។

    ដូចនឹងជំងឺផ្លូវដង្ហើមផ្សេងទៀត មេរោគរលាកសួត Corona នេះ ឆ្លងពីមនុស្សម្នាក់ទៅមនុស្សម្នាក់ តាមរយៈគ្រាប់ល្អិតនៃធាតុរាវនៅពេលកណ្ដាស់ ក្អក ឬការប៉ះពាល់អ្នកជំងឺ។ មេរោគនេះក៏អាចឆ្លងទៅអ្នកដទៃបាន នៅមុនពេលអ្នកជំងឺមិនទាន់មានរោគសញ្ញាដែរ។

    WHO បានប្រកាសថា នឹងធ្វើការកោះប្រជុំបន្ទាន់មួយ ដើម្បីដោះស្រាយបញ្ហានៃមេរោគនេះ៕

    ប្រភព៖ សារព័ត៌មានបរទេស

  • ពលរដ្ឋអាមេរិកនាំគ្នាសម្រុកទៅទិញ “ម៉ាស់” មកស្ដុកទុកប្រើរយៈពេលយូរ

    ពលរដ្ឋអាមេរិកនាំគ្នាសម្រុកទៅទិញ “ម៉ាស់” មកស្ដុកទុកប្រើរយៈពេលយូរ

    នៅសហរដ្ឋអាមេរិក ប្រជាជនជាច្រើនបាននាំគ្នាទិញម៉ាស់ក្នុងចំនួនច្រើនៗ ដើម្បីទុកប្រើឱ្យបានយូរខែ ព្រោះ​តែ​ភ័យខ្លាចការឆ្លងរាលដាលនៃមេរោគ corona និងភ័យខ្លាចខ្វះឧបករណ៍ការពារដ៏សំខាន់មួយនេះ។

    នៅលើផ្សារអនឡាញ Amazon អ្នកផ្គត់ផ្គង់ធំៗជាច្រើនបានឱ្យដឹងថា ខ្លួនត្រូវរង់ចាំរយៈពេលច្រើនសប្ដាហ៍ទៀតទើបអាចប្រគល់ទំនិញទៅអតិថិជនបាន។ អ្នកជំនាញផ្នែកសុខាភិបាលក៏បានព្រួយបារម្ភ​អំពី​ហានិ​ភ័យ​នៃ​ការខ្វះខាតម៉ាស់នៅក្នុងទីផ្សារដែរ ដែលការណ៍នេះនឹងនាំឱ្យមានមនុស្សកាន់តែច្រើនមានអារម្មណ៍កាន់តែភ័យខ្លាចឡើង ហើយអាចបណ្ដាលឱ្យទំនិញនេះឡើងថ្លៃបានទៀតផង។

    ម៉ាស់ត្រូវបានគេចាត់ទុកជាខែលការពារមួយ ដែលអាចជួយកាត់បន្ថយការឆ្លងមេរោគនានានៅតាមទីប្រជុំជន ដូចជា ផ្សារ មន្ទីរពេទ្យ ការិយាល័យ ក្នុងរថយន្តក្រុង ឬភោជនីយដ្ឋាន។ល។

    យោងតាមអ្នកជំនាញ ការដែលមនុស្សនាំគ្នាទៅទិញម៉ាស់ច្រើនបែបនេះ គឺមានន័យថា បណ្ដាមន្ទីរពេទ្យ ឬមណ្ឌលសុខភាពក៏កំពុងខ្វះខាតម៉ាស់ដែរ។ ក្រុមគ្រូពេទ្យដែលមានតួនាទីព្យាបាល និងថែទាំអ្នកជំងឺផ្លូវដង្ហើម គឺជាអ្នកដែលត្រូវប្រើប្រាស់ម៉ាស់ច្រើនជាងគេ នេះបើយោងតាមមជ្ឈមណ្ឌលគ្រប់គ្រង និងបង្ការជំងឺអាសន្នរោគអាមេរិក​(Centers For Disease Control & Prevention ឬ CDC)។

    រដ្ឋមន្ត្រីក្រសួងសុខាភិបាលអាមេរិក

    មន្ត្រីម្នាក់នៅ CDC បានឱ្យដឹងថា ពួកគេកំពុងចរចាជាមួយបណ្ដារោងចក្រផលិតម៉ាស់ ដើម្បីធ្វើយ៉ាងណាឱ្យមានម៉ាស់គ្រប់គ្រាន់តាមតម្រូវការ។ ប៉ុន្តែបណ្ឌិត Anita Patel មកពី CDC បាននិយាយថា៖ “យើងខ្ញុំគិតថា អ្នករាល់គ្នា នាំគ្នាទិញម៉ាស់មកទុកប្រើប្រាស់ គឺដោយសារការភ័យខ្លាច មិនមែនដោយសារតម្រូវការជាក់ស្ដែងនោះទេ”។

    រដ្ឋមន្ត្រីក្រសួងសុខាភិបាលអាមេរិក (United States Department of Health & Human Services (HHS) លោក Alex M. Azar II បានថ្លែងថា ការស្ដុកទុកម៉ាស់ក្នុងចំនួនច្រើន គឺជាការមិនចាំបាច់សម្រាប់ជនជាតិអាមេរិក ព្រោះថា ហានិភ័យទាក់ទិននឹងមេរោគនេះមិនខ្ពស់ទេ។

    ម៉ាស់ គឺជាសម្ភារសុខាភិបាលមួយប្រភេទដែលត្រូវបានស្ដុកទុកក្នុងឃ្លាំងយុទ្ធសាស្ត្ររបស់អាមេរិក ហើយវាត្រូវបានផ្គត់ផ្គង់ទៅឱ្យមន្ទីរពេទ្យរដ្ឋនានានៅទូទាំងប្រទេស។ ប៉ុន្តែអ្នកជំនាញអាមេរិកបច្ចុប្បន្នក៏មិនដឹងដែរថា ម៉ាស់ដែលមាននៅក្នុងឃ្លាំង និងប្រភពផ្គត់ផ្គង់មានចំនួនគ្រប់សម្រាប់តម្រូវការដែរឬក៏អត់នោះទេ បើសិនជាការឆ្លងនៃអាសន្នរោគនេះអូសបន្លាយពេលយូរ។

    ប្រភព​ព័ត៌មាន​បាន​ឱ្យ​ដឹង​ថា គិត​ត្រឹម​យប់​ថ្ងៃ​ទី 29​ មករា 2020 អាមេរិក​មាន​អ្នក​​ឆ្លង​មេរោគ corona ចំនួន 5ករណី។

    រដ្ឋាភិបាលនៃប្រទេសជាច្រើនក្នុងពិភពលោក កំពុងព្យាយាមនាំពលរដ្ឋរបស់ពួកគេចេញពីតំបន់គ្រោះថ្នាក់ Wuhan នៃប្រទេសចិន ខណៈដែលមានអ្នកស្លាប់ដោយសារមេរោគ corona នេះ កំពុងកើនឡើងជាបន្តបន្ទាប់។

    ក្រុមមន្ត្រីចិនបានឱ្យដឹងថា ចំនួនអ្នកស្លាប់ដោយសារឆ្លងមេរោគរលាកសួតថ្មី corona បានកើនដល់ 170នាក់ និងអ្នកកំពុងផ្ទុកមេរោគនេះមានចំនួន 7,711នាក់៕

    ប្រភព៖ សារព័ត៌មានបរទេស

  • អតីតមន្ត្រីនៅវិទ្យាស្ថានប៉ាស្ទ័រថា វីរុសកូរ៉ូណានឹងថយឥទ្ធិពល​ក្នុងសីតុណ្ហភាពនៅកម្ពុជា ព្រោះយើងជាប្រទេសក្តៅ មិនត្រជាក់ដូចនៅចិនទេ

    អតីតមន្ត្រីនៅវិទ្យាស្ថានប៉ាស្ទ័រថា វីរុសកូរ៉ូណានឹងថយឥទ្ធិពល​ក្នុងសីតុណ្ហភាពនៅកម្ពុជា ព្រោះយើងជាប្រទេសក្តៅ មិនត្រជាក់ដូចនៅចិនទេ

    ថ្មីៗនេះបន្ទាប់​ពីមានការព្រួយបារម្ភខ្លាំង​អំពីបញ្ហាជំងឺរលាកសួតថ្មីដែលកើតចេញពីមេរោគវីរុសកូរ៉ូណា (2019-nCov) លោកវេជ្ជបណ្ឌិត ជឹម ភក្ត្រា អតីតមន្ត្រីនៃមន្ទីរពិសោធន៍​នៅវិទ្យាស្ថានប៉ាស្ទ័រកម្ពុជាដែលមានបទពិសោធជាង 10ឆ្នាំក្នុងមន្ទីរពិសោធន៍ បានបង្ហាញពីចំណេះដឹងមួយចំនួនចំពោះបញ្ហាមេរោគរលាកសួតថ្មីនេះដល់សាធារណជនបានដឹង។

    នៅក្នុងនោះលោកវេជ្ជបណ្ឌិត បានបង្ហាញថា ជាទូទៅការចម្លងមេរោគវីរុសកូរ៉ូណាថ្មីនេះ អាចឆ្លងបានដោយអាស្រ័យលើកត្តា 3យ៉ាង គឺចំនួនមេរោគ កត្តាសីតុណ្ហភាព និង​ការប៉ះពាល់ និងនៅទល់មុខអ្នកជំងឺផ្ទាល់ដោយគ្មានរបាំងការពារ។

    លោកបានបញ្ជាក់ផងដែរថា កត្តាដែលមិនងាយរាលដាលនៅក្នុងប្រទេសកម្ពុជាយើង គឺដោយសារតែប្រទេសយើងមានសីតុណ្ហភាពលើសពី 30អង្សារសេ ដែលធ្វើឱ្យមេរោគមិនអាចរស់បានទេនៅពេលខ្ទាតចេញពីអ្នកជំងឺណាម្នាក់ទៅមនុស្សផ្សេងទៀត ព្រោះមេរោគនេះអាចរស់បានតែក្នុងសីតុណ្ហភាពក្រោម 20អង្សារសេតែប៉ុណ្ណោះ។ ហេតុនេះប្រសិនបើស្ថិតនៅចម្ងាយពីគ្នា 1ម៉ែត្រ មិនងាយនឹងឆ្លងទេ។ ចំពោះបញ្ហាមួយផ្សេងទៀត គឺនៅកម្ពុជាមិនទាន់មានអ្នកឆ្លងជំងឺនេះច្រើននៅឡើយទេ ហេតុនេះសូមប្រជាពលរដ្ឋខ្មែរយើង កុំមានការព្រួយបារម្ភខ្លាំងពេកដែលនឹងនាំឱ្យជ្រួលច្របល់៕

     

     

  • អ្នកជំនាញចិនបញ្ជាក់៖ “ផ្សារលក់អាហារសមុទ្រវូហាន” មិនមែនជាប្រភពកំណើតមេរោគវីរុសកូរ៉ូណាវូហានតែមួយទេ

    អ្នកជំនាញចិនបញ្ជាក់៖ “ផ្សារលក់អាហារសមុទ្រវូហាន” មិនមែនជាប្រភពកំណើតមេរោគវីរុសកូរ៉ូណាវូហានតែមួយទេ

    អ្នកជំនាញការផ្នែកជំងឺសួតរបស់ប្រទេសចិន បានបង្ហើបឱ្យដឹងថា ផ្សារលក់អាហារសមុទ្រក្នុងទីក្រុងវូហាន មណ្ឌលហ៊ូពេយ ប្រទេសចិន អាចមិនមែនជាប្រភពកំណើតនៃការឆ្លងរាលដាលរបស់វីរុសកូរ៉ូណាប្រភេទថ្មីតែមួយកន្លែងទេ។

    កាលពីថ្ងៃទី29 មករា ទីភ្នាក់ងារសារព័ត៌មានស៊ីនហួ បានរាយការណ៍ថា លោក ហួង ឆៅលីន អគ្គនាយករងមន្ទីរពេទ្យវូហាន ជីន យីនតាន់ បានផ្ដល់បទសម្ភាសជាមួយទស្សនាវដ្តី Caixin ថា អាចនឹងមានទីកន្លែងផ្សេងទៀតដែលចម្លងមេរោគនេះមកមនុស្ស។

    ទាំងអស់នេះ មន្ទីពេទ្យវូហាន ជីន យីនតាន់ គឺជាមន្ទីរពេទ្យមួយដែលទទួលអ្នកជំងឺឆ្លងមេរោគវីរុសកូរ៉ូណាច្រើនជាងគេ ខណៈដែលលោក ហួង ឆៅលីន និងក្រុមការងារបានបញ្ចេញរបាយការណ៍ពាក់ព័ន្ធនឹងលទ្ធផលស្រាវជ្រាវថ្មីបំផុតមួយតាមរយៈព័ត៌មានពីគ្លីនិករបស់អ្នកឆ្លងមេរោគវីរុសកូរ៉ូណាប្រភេទថ្មី 41នាក់ដំបូងនៅក្នុងព្រឹត្តិបត្រព័ត៌មាន Lancet ដែលជាព្រឹត្តិបត្រខាងវេជ្ជសាស្ត្រលំដាប់ពិភពលោក។ ដោយអ្នកជំងឺដំបូងគេដែលបានបញ្ជូនចូលមកមន្ទីរពេទ្យរបស់លោក ហួង កាលពីថ្ងៃទី1 ខែធ្នូ ឆ្នាំ2019 នោះ បានឱ្យការណ៍ថា មិនដែលបានទៅផ្សារលក់អាហារសមុទ្រហួណាន ក្នុងទីក្រុងវូហានទេ ហើយក្រុមគ្រួសាររបស់អ្នកជំងឺនោះក៏មិនមានអាការគ្រុនក្ដៅ ឬមានអាការរោគខាងប្រព័ន្ធដង្ហើមដែរ។

    ក្នុងចំណោមអ្នកជំងឺ 3នាក់ដែលបានចូលមកព្យាបាលកាលពីថ្ងៃទី10 ខែធ្នូ ឆ្នាំ2019 ក្នុងនោះមាន 2នាក់ ក៏មិនដែលបានទៅផ្សារលក់អាហារសមុទ្រហួណានដូចគ្នា តែតាមរយៈអ្នកជំងឺទាំងអស់ដែលបានបញ្ជាក់ខាងលើនោះ មានតែ 27នាក់ប៉ុណ្ណោះដែលបានទៅផ្សារលក់អាហារសមុទ្រហួណាន ដែលជាប្រភពសាយភាយមេរោគវីរុសកូរ៉ូណាប្រភេទថ្មីនេះ។

    លោក ហួង បានថ្លែងថា នៅពេលពិចារណាតាមរយៈស្ថានការណ៍ជារួមហើយនោះ ផ្សារលក់អាហារសមុទ្រខាងលើ អាចមិនមែនជាប្រភពកំណើតរបស់មេរោគវីរុសកូរ៉ូណាប្រភេទថ្មីតែមួយកន្លែងទេ គឺអាចនឹងមានកន្លែងចម្លងមេរោគនេះជាច្រើនផ្សេងទៀត ក៏អាចថាបានដែរ៕

  • ចំនួនអ្នកស្លាប់ដោយ​សារ​មេ​រោគ​វីរុស​ corona កើនដល់ 170នាក់ និងអ្នកឆ្លងកើនឡើងដល់…

    ចំនួនអ្នកស្លាប់ដោយ​សារ​មេ​រោគ​វីរុស​ corona កើនដល់ 170នាក់ និងអ្នកឆ្លងកើនឡើងដល់…

    ក្រុមមន្ត្រីចិនបានឱ្យដឹងថា ចំនួនអ្នកស្លាប់ដោយសារឆ្លងមេរោគរលាកសួតថ្មី corona បានកើនដល់ 170នាក់ និងអ្នកកំពុងផ្ទុកមេរោគនេះ មានចំនួន 7,711នាក់។

    គណៈកម្មាធិការសុខាភិបាលជាតិរបស់ប្រទេសចិន (NHC) បានឱ្យដឹងថា ករណីស្លាប់បន្ថែមដោយសារមេរោគវីរុស Corona (nCoV) មានចំនួន 38នាក់ និងចំនួនអ្នកដែលបានឆ្លងបន្ថែម មានដល់ទៅ 1,737ករណី គិតមកដល់ត្រឹមយប់ថ្ងៃទី29 មករា។

    ចំំំណែកអ្នកជំងឺប្រមាណជា 170នាក់ បានរួចផុតពីការស្លាប់ ពោលគឺ ពួកគេបានជាសះស្បើយពីជំងឺរលាកសួតនេះ និងត្រូវបានអនុញ្ញាតឱ្យត្រឡប់ទៅផ្ទះ។

    ប្រភព៖ សារព័ត៌មានបរទេស

  • តើឈ្មោះរបស់មេរោគ Corona មានប្រភពចេញពីណា និងមានទំនាក់ទំនងអ្វីជាមួយស្រាបៀរ Corona របស់ម៉ិកស៊ិក?

    តើឈ្មោះរបស់មេរោគ Corona មានប្រភពចេញពីណា និងមានទំនាក់ទំនងអ្វីជាមួយស្រាបៀរ Corona របស់ម៉ិកស៊ិក?

    នៅពេលយើងស្វែងរកពាក្យ “corona” នៅលើ Google ភ្លាមនោះ យើងនឹងបានឃើញលទ្ធផលដ៏ច្របូកច្របល់ រវាងមេរោគ corona និងស្រាបៀរ corona។ តើ​ឈ្មោះ​មេរោគរលាក​សួត​ corona នេះ មាន​ប្រភព​ពី​ណា​?

    ប៉ុន្មានសប្ដាហ៍កន្លងមកនេះ បន្ទាប់ពីជំងឺរលាកសួតដែលបង្កដោយមេរោគ Corona បានផ្ទុះឆ្លងរាលដាល ការស្វែងរកទិន្នន័យនៅលើ Google ទាក់ទិននឹងពាក្យ “corona” បានកើនឡើងច្រើនគួរឱ្យកត់សម្គាល់ ហើយមិនមែនមានតែមនុស្សទេដែលជាអ្នកច្រឡំនោះ សូម្បីតែ Google ក៏ច្រឡំដែរ ដោយបានបង្ហាញលទ្ធផលយ៉ាងច្របូកច្របល់ រវាងមេរោគ corona និង ស្រាបៀរ 1ប្រភេទរបស់ប្រទេសម៉ិកស៊ិកដែលមានឈ្មោះដូចគ្នានេះដែរ។

    យោងតាមទំព័រ Miamiherald របស់អាមេរិកបានធ្វើឱ្យយើងដឹងថា ចំនួនលើកនៃការស្វែងរកពាក្យ “corona” មានច្រើននៅ Iowa និង Oklahoma ខណៈដែលអ្នកស្រុក Connecticut, New Hampshire និង New Mexico កំពុងស្វែងរកយ៉ាងច្របូកច្របល់វាងស្រាបៀរ និងមេរោគ corona មួយនេះ។ ចំណែកអ្នកស្រុកអូស្ដ្រាលី ឥណ្ឌា និងកាណាដាវិញ ក៏កំពុងស្វែងរកពាក្យដែលទាក់ទងនឹងស្រាបៀរ corona នេះដែរ។

    សាស្ត្រាចារ្យផ្នែកទីផ្សារនៃសាកលវិទ្យាល័យ Wayne (អាមេរិក) លោក Mitch Jeffrey Stoltman យល់ថា នេះគឺជាការករណីច្រឡំដ៏គួរឱ្យសោកស្ដាយ។

    ការច្រឡំបែបនេះក៏ធ្លាប់បានកើតឡើងកាលពីទសវត្សរ៍ឆ្នាំ1980 ម្ដងដែរ ដែលកាលនោះជម្ងឺអេដស៍ (AIDS) បានឆ្លងរាលដាលទូទាំងពិភពលោក បណ្ដាលឱ្យក្រុមហ៊ុនផលិតស្ករគ្រាប់សម្រកទម្ងន់ Ayds ត្រូវរងផលប៉ះពាល់យ៉ាងធ្ងន់ធ្ងរ ព្រោះវាមានឈ្មោះដែលអានទៅ មានសំនៀងដូចទៅនឹងជំងឺអេដស៍ដែរ។

    មនុស្សជាច្រើនបានឆ្ងល់ថា ហេតុអ្វីបានជាមេរោគបង្កជំងឺរលាកសួត Wuhan ត្រូវបានគេដាក់ឈ្មោះថា corona តើមេរោគនេះមានរូបរាងដូចមកុដស្ដេច (តាមភាសាម៉ិកស៊ិក) មែនទេ?

    ទីភ្នាក់ងារសារព័ត៌មាន Aljazeera និង Metropoltv បានសរសេរថា ពាក្យ corona នេះ ត្រូវបានគេហៅតាមភាសាឡាតាំង (the Latin word) ដែលមានន័យថា “មកុដ” ឬ “រស្មី”។ នៅក្នុងកែវពង្រីក មីក្រូទស្សន៍​អេឡិច​ត្រុង រូបភាពរបស់មេរោគ corona មានសភាពស្រដៀងនឹងរស្មីនៃព្រះអាទិត្យ។

    បណ្ឌិត Dana Hawkinson ជាអ្នកជំនាញផ្នែកជំងឺឆ្លងនៅសាកលវិទ្យាល័យ Kansas បានអះអាងថា មេរោគ corona មិនមានទំនាក់ទំនងអ្វីជាមួយនិងស្រាបៀរ corona នោះឡើយ៕

    ប្រភព៖ សារព័ត៌មានបរទេស

  • បេះដូងទួញយំ…សារព័ត៌មានចិន បង្ហាញរូបភាពគ្រូពេទ្យជំនាញ 142នាក់ យំលាគូស្នេហ៍ មុនចូលទៅសមរភូមិ វូហាន

    បេះដូងទួញយំ…សារព័ត៌មានចិន បង្ហាញរូបភាពគ្រូពេទ្យជំនាញ 142នាក់ យំលាគូស្នេហ៍ មុនចូលទៅសមរភូមិ វូហាន

    កាលពីថ្ងៃទី29 មករា(ម្សិលមិញ) ទីភា្នក់ងារសារព័ត៌មាន ស៊ីនហួ របស់ចិន បានបង្ហាញរូបភាពឈុត “បេះដូង​ទួញយំ…បុគ្គលិកពេទ្យ ស៊ីនចៀង 142នាក់ លាគូស្នេហ៍ មុនចូលទៅសមរភូមិ វូហាន” ដោយបានបញ្ជាក់ថា លី វិន គឺជាសមាជិកម្នាក់នៃក្រុមបុគ្គលិកគ្រូពេទ្យទាំង 142នាក់ដែលត្រូវធ្វើដំណើរទៅទីក្រុង វូហាន មណ្ឌល ហ៊ូពេយ ភាគកណ្ដាលនៃប្រទេសចិន កាលពីថ្ងៃទី28 មករា បានពោលពាក្យលា និងលួងលោមភរិយាដែលកំពុងទួញសោក មុនទៅចូលរួមប្រតិបត្តិការប្រយុទ្ធប្រឆាំងនឹង “វីរុសកូរ៉ូណាប្រភេទថ្មី” ដែលនៅតែឆ្លងរាលដាលទូទាំងប្រទេស។

    លី ឈុនវ៉ា ជាមន្ត្រីម្នាក់ទៀតនៅក្នុងក្រុមបុគ្គលិកពេទ្យទាំងនោះដែរ នាងបានពាក់ម៉ាស់ការពារដែលមានរូបគំនូរ មុខមនុស្សញញឹម ដែលជាស្នាដៃកូនស្រីរបស់នាង ក៏កំពុងស្ថិតក្នុងបរិយាកាសដ៏សែនសោកសៅនៃការលាគ្នានៅក្នុងអាកាសយានដ្ឋានអន្តរជាតិ អ៊ុរុមស៊ីធី វ៉ូភូ ដែរ។

    ក្រុមបុគ្គលិកពេទ្យទាំង 142នាក់នេះ មកពីមន្ទីរពេទ្យ 6កន្លែង ជាចម្បងគឺជាគ្រូពេទ្យរបស់មន្ទីរពេទ្យលំដាប់​លេខ1 ក្នុងបណ្ដាញសាខារបស់មហាវិទ្យាល័យវេជ្ជសាស្ត្រ ស៊ីនចៀង ក្នុងមណ្ឌល អ៊ុរុម ទីក្រុងឯករបស់តំបន់ស្វយ័ត ស៊ីនចៀង អ៊ុយគូ ភាគឦសានប្រទេសចិន ដែលភាគច្រើនជាគ្រូពេទ្យ គិលានុបដ្ឋាក និងក្រុមមន្ត្រីជំនាញពីសាខាផ្សេងៗ ដូចជា ជំនាញស្ដារស្ថានភាពអាក្រក់នៃប្រព័ន្ធដកដង្ហើម និងសាខាបំបាត់ និងទប់ស្កាត់ជំងឺឆ្លង ជាដើម។

    ប្រភព៖ សារ​ព័ត៌មាន​បរទេស