សុខភាព - La Reine Media

រកឃើញមេរោគកូរ៉ូណាជាង 500ប្រភេទ នៅលើសត្វប្រចៀវ ក្នុងប្រទេសចិន

នៅពេលពិនិត្យលម្អិតទៅលើសត្វប្រចៀវមួយប្រភេទដែលគេហៅថាប្រចៀវ Rhinolophus ក្រុមអ្នកវិទ្យាសាស្ត្របានរកឃើញវីរុសកូរ៉ូណាដល់ទៅ 500ប្រភេទ ដែលនេះភ័ស្តុតាងមួយបន្ថែមទៀតបញ្ជាក់ថា មេរោគកូរ៉ូណាគឺបានឆ្លងពីប្រចៀវមកមនុស្ស។

របាយការណ៍របស់អង្គការសុខភាពពិភពលោក (WHO) ថ្ងៃទី 11កុម្ភៈ បានឱ្យដឹងថា ការសិក្សាស្រាវជ្រាវតាមបែបវិទ្យាសាស្ត្រនានា បានបង្ហាញភ័ស្តុតាងកាន់តែច្រើនឡើងៗថា អាសន្នរោគដែលបង្កឡើងដោយវីរុសកូរ៉ូណា (Covid-19) មានជាប់ទាក់ទិននឹងវីរុសកូរ៉ូណានៅលើសត្វប្រចៀវ Rhinolophus។

ការសិក្សាស្រាវជ្រាវថ្មីខាងលើនេះ បានរកឃើញវីរុសកូរ៉ូណាចំនួនជាង 500ប្រភេទនៅលើសត្វប្រចៀវ Rhinolophus នេះ នៅក្នុងប្រទេសចិន។ អ្វីដែលគួរឱ្យកត់សម្គាល់ជាងនេះ គឺថា ការធ្វើតេស្តឈាមនៅលើមនុស្សមួយចំនួនដែលរស់នៅក្បែរតំបន់មានសត្វប្រចៀវរស់នៅ បង្ហាញថា អត្រាមានផ្ទុកមេរោគកូរ៉ូណា គឺ 2,9%។ ភាគរយនេះ ក៏បង្ហាញថា ហានិភ័យនៃការឆ្លងដោយសារមនុស្សប៉ះពាល់សត្វប្រចៀវនេះ គឺមានខ្ពស់ពិតមែន។

យ៉ាងនេះក្ដី ក្រុមអ្នកសិក្សាស្រាវជ្រាវជាច្រើនបានឱ្យដឹងថា របៀបឆ្លងរបស់មេរោគ Covid-19 ចាប់តាំងពីការផ្ទុះឆ្លងដំបូង នៅតែមិនទាន់ច្បាស់លាស់នៅឡើយ។ សម្មតិកម្មនាបច្ចុប្បន្ន យល់ថា ប្រភេទសត្វផ្សេងមួយទៀត មានតួនាទីចម្លងមេរោគកូរ៉ូណា ដែលដូចទៅនឹងមេរោគ SARS កាលពីឆ្នាំ 2003។ នេះបើតាមការចេញផ្សាយរបស់សារព័ត៌មាន China News។

ក្រុមអ្នកវិទ្យាសាស្ត្រចិន និងអន្តរជាតិកំពុងតែស្ថិតក្នុងដំណាក់កាលធ្វើការកំណត់ឱ្យបានច្បាស់នូវប្រភពសត្វដែលបានចម្លងមេរោគកូរ៉ូណា Covid-19 ដើម្បីធានាឱ្យបានថា បញ្ហាដដែលនេះនឹងមិនអាចកើតឡើងនៅពេលអនាគត។ ការសិក្សាស្រាវជ្រាវក៏នឹងជួយបង្កើនការយល់ដឹងច្រើនអំពីរបៀប និងផ្លូវដែលវីរុសនានា ឆ្លងពីសត្វមកមនុស្ស។

អាសន្នរោគ Covid-19 បានផ្ទុះឆ្លងកាលពីដើមខែធ្នូ ឆ្នាំ2019 ដែលវាមានប្រភពចេញមកពីផ្សារ Huanan នៅក្នុងទីក្រុង Wuhan ដែលមានលក់សត្វព្រៃរស់៕

ប្រភព៖ សារព័ត៌មានបរទេស

February 13, 2020

ដំណឹងល្អមួយទៀត! ក្រុមហ៊ុនចិនផលិតថ្នាំរំងាប់មេរោគ សម្រាប់ព្យាបាលជំងឺកូរ៉ូណា Covid-19

ប្រទេសចិន៖ ក្រុមហ៊ុនផលិតឱសថមួយរបស់ចិន បានចាប់ផ្ដើមផលិតថ្នាំ Remdesivir ទៅតាមបច្ចេកវិទ្យារបស់សហរដ្ឋអាមេរិក ហើយគេរំពឹងថា នឹងមានប្រសិទ្ធភាពអាចទប់ស្កាត់មេរោគកូរ៉ូណា Covid-19។

នៅក្នុងរបាយការណ៍មួយផ្ញើទៅកាន់ផ្សារហ៊ុនសៀងហៃ កាលពីយប់ថ្ងៃទី 11កុម្ភៈ ក្រុមហ៊ុនបច្ចេកវិទ្យាជីវវេជ្ជសាស្ត្រ BrightGene មានទីតាំងនៅក្នុងទីក្រុង Suzhou នៃខេត្ត Jiangsu ប្រទេសចិន បានឱ្យដឹងថា ខ្លួនបានអភិវឌ្ឍបច្ចេកវិទ្យាសំយោគសារធាតុថ្នាំរបស់ Remdesivir។ នេះគឺជាថ្នាំរំងាប់មេរោគមួយប្រភេទដែលត្រូវបានផលិតឡើងដោយក្រុមហ៊ុន Gilead នៃសហរដ្ឋអាមេរិក។

ព័ត៌មានរបស់ក្រុមហ៊ុន BrightGene ត្រូវបានគេបញ្ចេញឱ្យដឹង អំឡុងមួយសប្ដាហ៍ប៉ុណ្ណោះ ក្រោយពីអាជ្ញាធរចិន បានយល់ព្រមសាកល្បងប្រើថ្នាំ Remdesivir ។

ថ្នាំ Remdesivir ត្រូវបានគេចាត់ទុកថាជា “បេក្ខភាព” លំដាប់កំពូល ក្នុងយុទ្ធនាការប្រឆាំងនឹងមេរោគកូរ៉ូណា Covid-19។ បច្ចុប្បន្ន Remdesivir មិនទាន់ត្រូវបានអនុញ្ញាតឱ្យផលិត ឬដាក់លក់នៅទីផ្សារណាមួយក្នុងពិភពលោកនៅឡើយ។ ក្រុមហ៊ុន BrightGene បានឱ្យដឹងថា ពួកគេមានគម្រោងសុំច្បាប់ពីក្រុមហ៊ុន Gilead ប៉ុន្តែ បានសម្រេចចិត្តងាកទៅផលិត Remdesivir ដោយសារតែការសិក្សាស្រាវជ្រាវផលិតថ្នាំថ្មី ទើបតែស្ថិតក្នុងដំណាក់កាលដំបូង។

មេធាវី Wang Yanyu មកពីការិយាល័យមេធាវី AllBright ដែលមានទីស្នាក់ការនៅទីក្រុង ប៉េកាំង បាននិយាយថា ៖ “និយាយរួម ការផលិតនេះគឺរំលោភទៅលើច្បាប់កម្មសិទ្ធិបញ្ញា ប៉ុន្តែ វានឹងជាករណីលើកលែង បើសិនជាការផលិតនោះ មិនមែនដើម្បីដាក់លក់ក្នុងទីផ្សារ”។

ផលិតផលនេះរបស់ក្រុមហ៊ុន Gilead ត្រូវបានចាត់ទុកថាមានសក្ដានុពល ព្រោះវាបាននាំមកនូវលទ្ធផលល្អ នៅពេលប្រើប្រាស់វាក្នុងការព្យាបាលអ្នកជំងឺកូរ៉ូណា នៅសហរដ្ឋអាមេរិក។ ក្រុមគ្រូពេទ្យនៅប្រទេសចិន កំពុងសាកល្បងថ្នាំនេះ នៅលើអ្នកជំងឺ 761 នៅទីក្រុង Wuhan។

លោក Wang Chen (ស្ដាំបង្អស់) ជាអនុប្រធានបណ្ឌិតសភាវិស្វកម្មចិន និងជាប្រធានបណ្ឌិតសភាវិទ្យាសាស្ត្រវេជ្ជសាស្ត្រចិន ថ្លែងនៅក្នុងសន្និសីទមួយនៅទីក្រុងវូហាន ខេត្តហ៊ូប៉ី ប្រទេសចិន កាលពីថ្ងៃទី5 ខែកុម្ភៈ ឆ្នាំ2020។

ក្រុមហ៊ុន BrightGene បានឱ្យដឹងថា ពួកគេត្រូវសុំច្បាប់ពីក្រុមហ៊ុន Gilead ក្រោយមកទើបធ្វើការពិសោធ និងត្រូវមានការអនុញ្ញាត មុនពេលដាក់លក់ថ្នាំនេះក្នុងទីផ្សារ។ ថ្នាំ Remdesivir ដែលចិនកំពុងផលិត នឹងមិនមានប្រយោជន៍ បើសិនមិនមានលទ្ធផលល្អក្នុងការពិសោធដែលកំពុងត្រូវបានធ្វើឡើង ឬក៏ថ្នាំនេះផលិតឡើងក្រោយអាសន្នរោគត្រូវបានគ្រប់គ្រង។ នេះបើយោងតាមសារព័ត៌មាន Bloomberg។

ភាគីខាងក្រុមហ៊ុន Gilead មិនទាន់បានបញ្ចេញមតិអ្វីទាក់ទិននឹងការប្រកាសរបស់ក្រុមហ៊ុន BrightGene ប៉ុន្តែ ពួកគេបានឱ្យដឹងថា កំពុងតែផ្ដោតទៅលើការសិក្សាស្រាវជ្រាវលើថ្នាំនេះ។ ក្រុមហ៊ុន Gilead កំពុងធ្វើការជាមួយអាជ្ញាធរចិន អាមេរិក និងអង្គការសុខភាពពិភពលោក ដើម្បីឱ្យប្រាកដថា ថ្នាំនេះ អាចត្រូវបានអនុញ្ញាតឱ្យប្រើប្រាស់ក្នុងការព្យាបាលជំងឺកូរ៉ូណា Covid-19 ដែរ ឬអត់៕

ប្រភព៖ សារព័ត៌មានបរទេស

February 13, 2020

ភ័យខ្លាចមេរោគរាលដាល!! “ហុងកុង” ប្រកាសបិទសាលារៀនរហូតដល់ពាក់កណ្ដាលខែមីនា

រដ្ឋបាលក្រុងហុងកុង បានប្រកាសបិទសាលារៀនជាបន្តបន្ទាប់យ៉ាងហោចណាស់រហូតដល់ថ្ងៃទី16 ខែមីនា ដើម្បីគ្រប់គ្រងការឆ្លងរាលដាលរបស់វីរុស COVID-19 ព្រមទាំងសំណូមពរឱ្យនិស្សិតបរទេស មិនចាំបាច់ប្រញាប់ធ្វើដំណើរត្រឡប់មកហុងកុងវិញទេ ក្នុងអំឡុងពេលនេះ។

គណៈគ្រប់គ្រងទីក្រុងហុងកុងថែមទាំងបានអនុញ្ញាតឱ្យបុគ្គលិករបស់រដ្ឋអាចធ្វើការពីផ្ទះមកបាន រហូតដល់ថ្ងៃទី23 កុម្ភៈ ដើម្បីកាត់បន្ថយការប្រថុយប្រថានក្នុងការចម្លងសាយភាយមេរោគ។

ខេវីន យ៉ាង អគ្គលេខាធិការនៃគណៈកម្មាធិការការសិក្សាអប់រំក្រុងហុងកុង បានបញ្ជាក់ថា សាលាបឋមសិក្សា និងមធ្យមសិក្សាក្នុងក្រុងហុងកុង នឹងផ្អាកការបង្រៀន និងរៀនរហូតដល់ពាក់កណ្ដាលខែមីនា ដែលកាលពីពេលមុនបានពន្យារពេលបវេសនកាលក្រោយបុណ្យចូលឆ្នាំត្រឹមតែថ្ងៃទី2 ខែមីនាប៉ុណ្ណោះ។

សេចក្ដីប្រកាសពីរដ្ឋបាលក្រុងហុងកុងនេះ បានធ្វើឡើងក្នុងខណៈដែលមន្ត្រីមណ្ឌលហ៊ូពេយរបស់ចិន បានរកឃើញអ្នកឆ្លងមេរោគ COVID-19 ថ្មីៗកើនឡើងខ្ពស់ជាប្រវត្តិសាស្ត្រ និងមានការប្រកាសព្រមានពីអ្នកជំនាញការផ្នែកសាធារណៈសុខាភិបាលទូទាំងពិភពលោកថា ស្ថានការណ៍ឆ្លងរាលដាលរបស់មេរោគវីរុស អាចនឹងកាន់តែអាក្រក់ខ្លាំងជាងនេះ មុននឹងអាចគ្រប់គ្រងបាន។

“ការស្ថិតនៅឆ្ងាយខាងសង្គម និងចៀសវាងពីទីកន្លែងដែលមានមនុស្សច្រើន គឺជាយុទ្ធសាស្ត្រចម្បងក្នុងការ ជួយការពារ និងគ្រប់គ្រងការឆ្លងរាលដាល” លោកយ៉ាង ថ្លែងប្រាប់អ្នកសារព័ត៌មានបន្តថា “ហើយសម្រាប់សិស្សនិស្សិតដែលនៅក្នុងប្រទេសចិន ឬនៅក្រៅប្រទេស ក៏មិនចាំបាច់ប្រញាប់ធ្វើដំណើរវិលត្រឡប់មកហុងកុងវិញដែរ”

ទីក្រុងកោះដែលជាមជ្ឈមណ្ឌលកណ្ដាលនៃវិស័យហិរញ្ញវត្ថុមួយនេះ បានរកឃើញអ្នកឆ្លងមេរោគវីរុស COVID-19 ដែលបានអះអាងហើយចំនួន 50នាក់ និងមានអ្នកស្លាប់ 1នាក់។

សាលារៀនជាច្រើនកន្លែងក្នុងទីក្រុងហុងកុង ចាប់ផ្ដើមឱ្យគ្រូៗ បង្រៀនសិស្សតាមអនឡាញ ឬតាមប្រព័ន្ធវីដេអូខន់ហ្វើរេនស៍ ដោយមានការដាក់កិច្ចការផ្ទះឱ្យកូនសិស្សធ្វើរៀងរាល់ថ្ងៃ ឬ 1សប្ដាហ៍ម្ដង។

ការឆ្លងរាលដាលរបស់មេរោគវីរុសដែលមានដើមកំណើតមកពីទីក្រុងវូហាន ថែមទាំងបានបង្កឱ្យមានទំនាស់រវាងប្រជាជនហុងកុង ជាមួយគណៈគ្រប់គ្រងក្នុងតំបន់ទៀតផង ដោយអ្នកក្រុងហុងកុងជាច្រើនបានទាម ទារឱ្យមានការបិទព្រំដែនជាមួយប្រទេសចិនដីគោក ដើម្បីទប់ស្កាត់មេរោគ ខណៈដែលលោកស្រី ឃែរី ឡាម អភិបាលក្រុងហុងកុង យល់ព្រមបិទចំណុចឆ្លងព្រំដែនតែមួយចំនួនប៉ុណ្ណោះ និងបានអះអាងថា ការកាត់ផ្ដាច់ជាមួយចិនដីគោកទាំងស្រុង មិនមែនជារឿងសមរម្យ និងមិនអាចធ្វើបានឡើយ ព្រោះអាចរាប់បានថាជាការរើសអើង៕

ប្រភព៖ សារព័ត៌មានបរទេស

February 13, 2020

ចិនដក “លេខាបក្ស” ប្រចាំតំបន់ហ៊ូពេយ បន្ទាប់ពីមានការរិះគន់ថា អសមត្ថភាពក្នុងការទប់ទល់“វីរុសកូរ៉ូណា”

ចិនបានដកមេដឹកនាំខាងនយោបាយលំដាប់ខ្ពស់របស់មណ្ឌលហ៊ូពេយ ដែលជាចំណុចកណ្ដាលនៃការឆ្លងរាលដាលរបស់មេរោគវីរុសកូរ៉ូណា ដែលធ្វើឱ្យមានមនុស្សស្លាប់មកដល់ពេលនេះចំនួន 1,355នាក់។ នេះបើតាមប្រភពព័ត៌មានផ្លូវការដែលបានរាយកាយនៅព្រឹកថ្ងៃព្រហស្បតិ៍នេះ។

ចៀង សៅលៀង លេខាបក្សប្រចាំតំបន់ហ៊ូពេយ នឹងត្រូវជំនួសដោយ យីង យង់ អភិបាលក្រុងស៊ាងហៃ។ នេះបើយោងតាមការអះអាងពីទីភ្នាក់ងារព័ត៌មានស៊ីនហួរបស់រដ្ឋចិន ដែលមិនបានរាយការណ៍អ្វីបន្ថែមឡើយ។

ការដកសមមិត្ត ចៀង ចេញនេះ កើតឡើងបន្ទាប់ពីមន្ត្រីជើងចាស់ផ្នែកសាធារណៈសុខាភិបាល 2រូបរបស់ហ៊ូពេយ ត្រូវបានដកចេញកាលពីថ្ងៃចន្ទ ក្រោមសំឡេងរិះគន់ដ៏ច្រើនអំពីវិធានការប្រយុទ្ធប្រឆាំងមេរោគដែលក្រុមមន្ត្រីក្នុងតំបន់បានដាក់ចេញក្នុងស្ថានការណ៍វិបត្តិ។

មណ្ឌលនេះបានរាយការណ៍ថា រកឃើញអ្នកឆ្លងមេរោគកើនឡើងយ៉ាងគួរឱ្យភ្ញាក់ផ្អើលនៅថ្ងៃព្រហស្បតិ៍នេះ ដែលធ្វើឱ្យចំនួនអ្នកឆ្លងមេរោគទូទាំងប្រទេសកើនឡើងដល់ជិត 60,000នាក់ ក្រោយពីរដ្ឋបាលហ៊ូពេយប្ដូរវិធីថ្មីក្នុងការរាប់ចំនួនអ្នកឆ្លងមេរោគ។

មេរោគវីរុសនេះ ត្រូវបានគេជឿថា ចាប់កំណើតឡើងកាលពីចុងឆ្នាំកន្លងទៅ នៅក្នុងផ្សារលក់អាហារសមុទ្រមួយកន្លែងក្នុងទីក្រុងវូហាន ក្នុងតំបន់ហ៊ូពេយ។

ការរិះគន់ទៅលើក្រុមមន្ត្រីក្នុងតំបន់ អំពីរឿងមិនបានត្រៀមខ្លួន និងបណ្ដែតបណ្ដោយក្នុងការទប់ទល់មេរោគ បានកើនឡើងយ៉ាងច្រើន បន្ទាប់ពីមានការស្លាប់កាលពីសប្ដាហ៍មុនរបស់លោកគ្រូពេទ្យចិនម្នាក់ដែលធ្លាប់ត្រូវអាជ្ញាធរទីក្រុងវូហានដាក់ទោសពីបទប្រកាសដំណឹងពាក់ព័ន្ធនឹងមេរោគវីរុសប្រភេទថ្មីនេះ។

រដ្ឋបាលទីក្រុងវូហាន ថែមទាំងត្រូវប្រឈមនឹងការរិះគន់យ៉ាងចាស់ដៃកាលពីខែមករា ចំពោះការរឹងរូសក្នុងការរៀបចំពិធីជប់លៀងសាធារណៈប្រចាំឆ្នាំដល់ក្រុមគ្រួសារចំនួន 40,000គ្រួសារ ត្រឹមតែប៉ុន្មានថ្ងៃមុនពេលដែលទីក្រុងនេះត្រូវបានបិទជាផ្លូវការទាំងស្រុងទៀតផង។

ការប្រែប្រួលផ្សេងៗកំពុងតែកើតឡើងនៅក្នុងមណ្ឌលនេះ រួមទាំងការដកមន្ត្រីកាកបាទក្រហមលំដាប់ខ្ពស់ម្នាក់ក្នុងទីក្រុងវូហាន ពីបទព្រងើយកន្តើយចំពោះតួនាទី ក្នុងខណៈដែលមន្ត្រីជើងចាស់ក្នុងទីក្រុងប៉េកាំង ឈឹន អ៊ីស៊ីន ត្រូវបានបញ្ជូនទៅទីក្រុងវូហាន ដើម្បីកាន់កាប់គ្រប់គ្រងការឆ្លងរាលដាលរបស់មេរោគ៕

ប្រភព៖ សាព័ត៌មានបរទេស

February 13, 2020

ទេសចរលើនាវា Westerdam 20នាក់ ត្រូវបានដាក់ឱ្យនៅដាច់ដោយឡែក ព្រោះមានបញ្ហាសុខភាព

អាជ្ញាធរក្រុងព្រះសីហនុ បានអះអាងថា អ្នកទេសចរលើនាវា Westerdam ចំនួន20នាក់មានបញ្ហាសុខភាពបន្ដិចបន្ដួច ដូចជាជំងឺក្រពះពោះវៀន និងរាករូសជាដើម ប៉ុន្តែ មិនបានបញ្ជាក់ថា មានរោគសញ្ញានៃវីរុសកូរ៉ូណានោះទេ។

ក្រុមមន្ដ្រីសុខាភិបាល និងមន្ដ្រីអង្គការសុខភាពពិភពលោក (WHO) បាននាំយកកំហាករបស់ពួកគេ ធ្វើដំណើរតាមឧត្ថម្ភាគចក្រមកកាន់វិទ្យាស្ថានប៉ាស្ទ័រ រាជធានីភ្នំពេញ ដើម្បីធ្វើតេស្តរកមេរោគកូរ៉ូណា។ នេះបើតាមការចុះផ្សាយរបស់សារព័ត៌មាន Fresh News។

ក្រុមមន្ត្រីសុខាភិបាល បានឱ្យដឹងថា ភ្ញៀវទេសចរទាំង20នាក់នេះ ត្រូវបានដាក់ឲ្យស្ថិតនៅក្នុងបន្ទប់ដាច់ដោយឡែកនៅលើកប៉ាល់ Westerdam៕

February 13, 2020

នាវា Westerdam បានចូលចតនៅកំពង់ផែខេត្តព្រះសីហនុ៖ ភាគីពាក់ព័ន្ធ អរគុណកម្ពុជា

ក្រោយពីចំណាយពេលជាច្រើនថ្ងៃ បណ្ដែតខ្លួននៅលើសមុទ្រ ព្រោះគ្មានប្រទេសណាអនុញ្ញាតឱ្យចូលចត ដោយសារតែភ័យខ្លាចមានមេរោគកូរ៉ូណា ពេលនេះនាវាទេសចរណ៍ Westerdam ក៏បានមកដល់ក្រុងព្រះសីហនុ តាមការអនុញ្ញាតពីរាជរដ្ឋាភិបាលកម្ពុជា។

នៅព្រឹកថ្ងៃទី 13កុម្ភៈនេះ នាវាដឹកអ្នកទេសចរ Westerdam ដែលដោតទង់ជាតិហូឡង់ និងមានផ្ទុកអ្នកដំណើរ 1455នាក់ និងនាវិក 800នាក់ បានមកដល់ក្រុងព្រះសីហនុ។

អ្នកដំណើរទាំងអស់ដែលនៅលើកប៉ាល់នេះ បានត្រូវអនុញ្ញាតឱ្យឡើងគោក ដើម្បីធ្វើដំណើរទៅកាន់ក្រុងភ្នំពេញ ហើយឡើងយន្តហោះ ឆ្ពោះទៅកាន់ប្រទេសរៀងៗខ្លួន។

ក្រុមហ៊ុន Holland America Line និងអ្នកទេសចរទាំងអស់ មានការសប្បាយចិត្តយ៉ាងខ្លាំង និងបានអរគុណចំពោះរាជរដ្ឋាភិបាលកម្ពុជាចំពោះការអនុញ្ញាតនេះ។ ក្រុមហ៊ុន Holland America Line ដែលជាម្ចាស់នាវានេះ ក៏នឹងចេញសោហ៊ុយធ្វើដំណើរដល់អតិថិជនរបស់ខ្លួន រហូតដល់ពួកគេទៅដល់ផ្ទះ។

ទាក់ទិននឹងបញ្ហានេះដែរ ប្រធានអង្គការសុខភាពពិភពលោក WHO លោក Tedros Adhanom Ghebreyesus ក៏បានអរគុណចំពោះសម្តេច ហ៊ុន សែន ដែលបានអនុញ្ញាតឱ្យនាវា Westerdam ចូលចតក្នុងកំពង់ផែក្រុងព្រះសីហនុ។

ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក W. Patrick Murphy បានបង្ហោះសារមួយតាមបណ្តាញសង្គម Twitter ដោយសូមអរគុណ និងកោតសរសើរយ៉ាងខ្លាំងចំពោះទឹកចិត្តរាជរដ្ឋាភិបាលកម្ពុជា ដែលបានអនុញ្ញាតជួយឱ្យកប៉ាល់ខ្នាតយក្ស Westerdam ដែលមានមូលដ្ឋាននៅសហរដ្ឋអាមេរិក ដែលកំពុងវិលវល់នោះចូលចតនៅកំពង់ផែ ខេត្តព្រះសីហនុ នៅព្រឹកថ្ងៃទី 13 ខែកុម្ភៈ ឆ្នាំ2020នេះ។

មុននេះ ប្រទេសថៃ និងបណ្ដាប្រទេស និងកោះមួយចំនួន បានបដិសេធមិនឱ្យនាវា Westerdam ចូលចតក្នុងកំពង់ផែរបស់ពួកគេ ដោយសារតែមានការព្រួយបារម្ភ ខ្លាចមានវត្តមានមេរោគកូរ៉ូណានៅលើកប៉ាល់នេះ បើទោះថ្នាក់ដឹកនាំកប៉ាល់បានអះអាងថា មិនមានអ្នកណាមានផ្ទុកមេរោគនេះក៏ដោយ។

គួររំឭកថា កប៉ាល់ Diamond Princess ដែលបច្ចុប្បន្ន ស្ថិតនៅក្នុងកំពង់ផែមួយរបស់ជប៉ុន ត្រូវគេដាក់ឱ្យនៅដាច់ដោយឡែក ព្រោះតែមានអ្នកផ្ទុកមេរោគកូរ៉ូណានៅលើនាវានោះ ហើយគេក៏បានរកឃើញអ្នកផ្ទុកមេរោគកូរ៉ូណា កាន់តែច្រើនឡើងៗ។ ប្រការនេះហើយ ធ្វើឱ្យនាវា Westerdam របស់ក្រុមហ៊ុន Holland America Line ទទួលរងឧបសគ្គដោយសារបញ្ហានៅលើនាវា កប៉ាល់ Diamond Princess៕

February 13, 2020

ចំនួនអ្នកមានផ្ទុកមេរោគកូរ៉ូណាកើនដល់ជិត 15,000នាក់ និងចំនួនអ្នកស្លាប់កើនដល់…

ចំនួនអ្នកស្លាប់ដោយសារមេរោគកូរ៉ូណា Covid-19 នៅក្នុងខេត្ត Hubei កើន 242នាក់ ច្រើនជាងពីរដងធៀបនឹងម្សិលមិញ ហើយចំនួនអ្នកឆ្លងកើនដល់ 14,840នាក់ គឺច្រើនជាងជិត10ដង ធៀបនឹងម្សិលមិញផងដែរ បន្ទាប់ពីខេត្តនេះ បានប្ដូរវិធីស្រង់ស្ថិតិ។

គណៈកម្មការសុខាភិបាលខេត្ត Hebei ថ្ងៃនេះ បានរាយការណ៍ថា អ្នកស្លាប់ថ្មីដោយសារអាសន្នរោគកូរ៉ូណា មានចំនួន 242នាក់ ច្រើនជាងទ្វេដងធៀបនឹងម្សិលមិញ ធ្វើឱ្យចំនួនអ្នកស្លាប់សរុបនៅក្នុងខេត្តនេះឡើងដល់ 1,310នាក់។

ខេត្ត Hubei បានឱ្យដឹងថា ពួកគេបានប្ដូរវិធីស្រស់ស្ថិតិទៅលើអ្នកឆ្លងមេរោគ ចាប់ពីថ្ងៃទី 13កុម្ភៈ។ ខេត្តនេះក៏បានរកឃើញអ្នកផ្ទុកមេរោគកូរ៉ូណាបន្ថែមចំនួន 14,840នាក់ផងដែរ ធ្វើឱ្យចំនួនអ្នកមានផ្ទុកមេរោគសរុបក្នុងខេត្តនេះឡើងដល់ 48,206នាក់។

នៅទូទាំងប្រទេសចិន (ដីគោក) មានអ្នកស្លាប់ថ្មីចំនួន 250នាក់ និងអ្នកឆ្លងថ្មីចំនួន 14,985នាក់។ ដូច្នេះ អ្នកស្លាប់សរុបនៅប្រទេសចិន (ដីគោក) មានចំនួនដល់ទៅ 1,363នាក់ អ្នកឆ្លងសរុប 5,694នាក់។

ចំណែកនៅទូទាំងពិភពលោកវិញ មានអ្នកស្លាប់សរុប 1,367នាក់។ 60,161នាក់ មានផ្ទុកមេរោគនេះ ក្នុងនោះ មាន 8,243នាក់ ស្ថិតក្នុងស្ថានភាពគ្រោះថ្នាក់ដល់ជីជិត និង 5,756នាក់ បានជាសះស្បើយពីជំងឺ៕

ប្រភព៖ សារព័ត៌មានបរទេស

February 13, 2020

កម្ពុជា អនុញ្ញាតឱ្យនាវាផ្ទុកអ្នកទេសចរដែលជិតអស់ស្បៀង ចូលចតនៅកំពង់ផែក្រុងព្រះសីហនុ

ក្រុមហ៊ុន Holland America Line ដែលជាម្ចាស់នាវាទេសចរណ៍ខ្នាតយក្ស MS Westerdam នៅថ្ងៃទី12 កុម្ភៈនេះ បានប្រកាសឱ្យដឹងថា កម្ពុជាបានយល់ព្រមឱ្យនាវាដឹកអ្នកដំណើរទេសចរណ៍របស់ខ្លួន ចូលចតនៅកំពង់ផែរបស់កម្ពុជាហើយ។

កប៉ាល់ដឹកអ្នកដំណើរទេសចរណ៍ដែលមានឈ្មោះថា MS Westerdam នេះ ធ្លាប់ត្រូវបានប្រទេសជាច្រើនមិនអនុញ្ញាតឱ្យចូលចតនៅឯកំពង់ផែរបស់ពួកគេ។ ប្រទេស និងកោះដែលបានបដិសេធនាវានេះ រួមមានប្រទេស ជប៉ុន តៃវ៉ាន់ ថៃ ហ្វីលីពីន និងកោះហ្គ័ម (Guam)។ មូលហេតុនៃការបដិសេធខាងលើនេះ គឺដោយសារប្រទេសទាំងនោះ មានការភ័យខ្លាច និងសង្ស័យថា អ្នកទេសចរ និងក្រុមបុគ្គលិកនៅលើកប៉ាល់នេះ អាចមានផ្ទុកមេរោគវីរុសកូរ៉ូណាប្រភេទថ្មី Covid-19។

កាលពីសប្ដាហ៍មុន អ្នកនាំពាក្យនៃនាវាទេសចរណ៍ខាងលើ បានឱ្យដឹងថា ពួកគេមានការព្រួយបារម្ភខ្លាំងណាស់ ព្រោះថា ស្បៀងអាហារនៅលើកប៉ាល់នេះ ជិតអស់ទៅហើយ តែនៅទីបំផុត ទីភ្នាក់ងារសារព័ត៌មាន The guardian របស់ប្រទេសអង់គ្លេស បានរាយការណ៍ថា អាជ្ញាធរកម្ពុជាបានអនុញ្ញាតឱ្យនាវានេះចូលចតក្នុងកំពង់ផែក្រុងព្រះសីហនុ នៅថ្ងៃស្អែក (13កុម្ភៈ)ហើយ។

គួរបញ្ជាក់ដែរថា នាវាទេសចរណ៍ MS Westerdam ដែលមានផ្ទុកអ្នកដំណើរទេសចរណ៍ចំនួន 1,455នាក់ និងក្រុមនាវិក 802នាក់នេះ បាននិងកំពុងស្ថិតក្នុងការត្រួតពិនិត្យសុខភាពជាប្រចាំ។ ក្រុមអ្នកគ្រប់គ្រងនាវានេះ បានឱ្យដឹងថា អ្នកទេសចរ និងក្រុមនាវិកនៅលើនាវានេះ ពុំមាននរណាម្នាក់ មានផ្ទុកមេរោគកូរ៉ូណា Covid-19 នោះទេ។

បើយោងតាមអង្គភាពព័ត៌មាន Fresh News របស់កម្ពុជា ក៏បានរាយការណ៍ដូចគ្នាដែរថា នាវាទេសចរណ៍ដ៏ធំ ឈ្មោះ MS Westerdam ត្រូវបានអនុញ្ញាតឱ្យចូលចតនៅកំពង់ផែ ខេត្តព្រះសីហនុ នៅវេលាម៉ោង 7ព្រឹក នៃថ្ងៃទី13 ខែកុម្ភៈ ឆ្នាំ2020 ស្អែកនេះហើយ ក្រោយពីទទួលបានការអនុញ្ញាតពីប្រមុខរាជរដ្ឋាភិបាលកម្ពុជា។ នេះបើតាមមន្ត្រីជាន់ខ្ពស់របស់រាជរដ្ឋាភិបាលកម្ពុជាដែលបានថ្លែងប្រាប់អង្គភាពព័ត៌មាន Fresh News។

ការអនុញ្ញាតឱ្យចូលចតនេះធ្វើឡើង បន្ទាប់ពីមានការធានាយ៉ាងច្បាស់លាស់ពីអ្នកគ្រប់គ្រងនាវាទេសចរណ៍ Westerdam ថា មនុស្សទាំងអស់នៅលើកប៉ាល់មួយនេះ មិនមាននរណាម្នាក់ ផ្ទុកមេរោគវីរុសកូរ៉ូណាថ្មី ឬ Covid-19 នោះទេ៕

February 12, 2020

ចង់មានសុខភាពល្អ ត្រូវតែអាន “រឿង 6 យ៉ាងដែលគួរដឹង ពាក់ព័ន្ធនឹងសុខភាព”

បច្ចុប្បន្ននេះរោគាទាំងឡាយក្លាយជារឿងក្បែរៗខ្លួន ដែលចាំតែសួររកមុខយើងជានិច្ច ដូច្នេះហើយទើបយើងត្រូវតែមើលថែទាំសុខភាពឱ្យបានល្អជាពិសេស អ្នកខ្លះអាចនឹងស្វែងរកអាហារបន្ថែម ឬអាហារបំប៉នផ្សេងៗដើម្បីបំប៉នរាងកាយឱ្យមានសុខភាពល្អ ទាំងការពិតទៅ ការមានសុខភាពល្អអាចជារឿងងាយជាងលោកអ្នកគិតទៅទៀត ដូចដែលថ្ងៃនេះជាដើម ឡារ៉ែន សូមនាំយករឿងដែលគួរឱ្យយល់ដឹងពាក់ព័ន្ធនឹងសុខភាពដ៏ល្អ មកជម្រាបមិត្តអ្នកអានដូចខាងក្រោម “ចង់មានសុខភាពល្អ ត្រូវតែអាន”។

1. ចេកទុំ ជួយកាត់បន្ថយអាការឆ្អល់ពោះបានមុននឹងទៅមើលថា តើយ៉ាងម៉េចបានផ្លែចេកជួយកាត់បន្ថយអាការឆ្អល់ពោះបាននោះ យើងមកស្គាល់ពីអាការឆ្អល់ពោះជាមុនសិន…ឆ្អល់ពោះ គឺជាអាការដែលកើតមានហ្កាសច្រើននៅក្នុងក្រពះ ជួនកាលកើត-ឡើងដោយសារការទទួលទានជាតិសូដ្យូមច្រើនជ្រុលពេក ហើយផ្លែចេកនេះឯងដែលនឹងជួយធ្វើឱ្យអាការឆ្អល់ពោះធូរស្រាលបាន ព្រោះចេកមានបរិមាណប៉ូតាស្យូមខ្ពស់ ដែលនឹងទៅចាត់ការផលប៉ះពាល់ដែលកើតឡើងដោយសារសូដ្យូមដែលលើសនោះ ធ្វើឱ្យអាការឆ្អល់ពោះថយចុះបាន។

2. ទឹកនៅក្នុងរាងកាយនឹងធ្វើឱ្យទម្ងន់ខ្លួនរបស់អ្នកឡើង-ចុះយ៉ាងតិច ក្នុង 1ថ្ងៃ 1-2គីឡូក្រាម
តើលោកអ្នកធ្លាប់នឹកឆ្ងល់ខ្លះទេថា ហេតុអីបានយើងថ្លឹងទម្ងន់នៅពេលព្រឹក និងនៅពេលល្ងាច ទម្ងន់ចេញមកខុសគ្នា ទាំងយើងមិនទាន់បានញ៉ាំអីច្រើនផងនោះ? នេះគឺដោយសារតែទម្ងន់របស់ទឹកនៅក្នុងរាងកាយដែលចេញមកពីអាហារដែលមានរសជាតិប្រៃ ឬសភាវមានវដ្តរដូវប្រចាំខែរបស់អ្នកដែលធ្វើឱ្យទម្ងន់ខ្លួនឡើង ឬចុះគ្រប់ពេលវេលា។ បើអ្នកចង់ចាត់ការរឿងទឹកដែលនៅក្នុងរាងកាយនេះ អ្នកគួរតែទៅប្រឹក្សាជាមួយគ្រូពេទ្យ ដើម្បីប្រើថ្នាំបញ្ចុះទឹកនោមក៏បាន។

3. ការអង្គុយនៅមួយកន្លែងក្នុង 1ថ្ងៃៗ យូរជាង11ម៉ោង នឹងធ្វើឱ្យអាយុខ្លី
ការអង្គុយធ្វើការនៅនឹងតុរហូត ដោយមិនក្រោកទៅណាពេញមួយថ្ងៃ អាចនឹងធ្វើឱ្យអ្នកអាយុខ្លីដោយមិនដឹងខ្លួន នោះគឺដោយសារតែ នៅពេលដែលរាងកាយរបស់យើងមិនបានកម្រើក ឬធ្វើចលនាទៅណា វាអាចបង្កឱ្យកើតមានបញ្ហាសុខភាពបាន មិនថាតែបញ្ហាពាក់ព័ន្ធនឹងប្រព័ន្ធដុតបំផ្លាញក្នុងរាងកាយ ប្រព័ន្ធរំលាយអាហារ ប្រព័ន្ធបន្ទោបង់ ឬសូម្បីតែប្រព័ន្ធឈាមរត់ក៏ដោយ ដូច្នេះបើចង់មានអាយុវែង គួរឧស្សាហ៍ក្រោកចេញពីតុធ្វើការខ្លះផង គ្រាន់តែក្រោកទៅចូលបន្ទប់ទឹកក៏ជួយបានច្រើនដែរ។

4. តែបៃតងជួយបង្កើនការធ្វើការរបស់ខួរក្បាលបាន
យើងដឹងច្បាស់ហើយថា តែបៃតងមានប្រយោជន៍ច្រើនណាស់ ជាពិសេសតែបៃតងនេះ មានសារធាតុប្រឆាំងអនុមូលឥស្សរៈខ្ពស់ ទើបវាជួយការពារការកើតជំងឺមហារីកបាន តែប្រយោជន៍មួយទៀតដែលសំខាន់នោះគឺ តែបៃតងជួយបង្កើនការធ្វើការងាររបស់ខួរក្បាលបានទៀតផង ដោយមានការសិក្សាស្រាវជ្រាវមួយបានរកឃើញថា អ្នកដែលញ៉ាំតែបៃតងជាប់ជាប្រចាំ នឹងធ្វើឱ្យមានការចងចាំល្អជាងអ្នកដែលមិនធ្លាប់ញ៉ាំសោះ។

5. ស្ករ ធ្វើឱ្យអាការក្នុងអំឡុងពេលមានវដ្តរដូវកាន់តែអាក្រក់
ស្ត្រីជាច្រើន ច្រើនតែគិតថា ការទទួលទានបង្អែមនៅក្នុងអំឡុងពេលមានរដូវប្រចាំខែ នឹងជួយឱ្យអាការផ្សេងៗដែលកើតឡើងក្នុងអំឡុងពេលនោះថយចុះ តែការពិតវិញ ជាតិស្ករហ្នឹងឯងដែលជាបច្ច័យអាក្រក់ធ្វើឱ្យអាការទាំងនោះកាន់តែអាក្រក់ឡើង ព្រោះការទទួលទានស្ករ(ជាតិផ្អែម)ច្រើនពេកនឹងធ្វើឱ្យជាតិម៉ាញេស្យូមក្នុងរាងកាយថយចុះ ធ្វើឱ្យឆ្អល់ពោះ ដែលអាការឆ្អល់ពោះនេះ គឺជាអាការមួយដែលស្ត្រីមិនចង់ឱ្យកើតមានក្នុងអំឡុងពេលមានរដូវឡើយ ដូច្នេះបើពេលមានរដូវប្រចាំខែ គួរប្តូរពីបង្អែមមកទទួលទានផ្លែឈើវិញប្រសើរជាងបាយអង្ករស្រូវសាលីជួយឱ្យអារម្មណ៍ល្អជឿថា អ្នកណាៗក៏ចង់មានពេលព្រឹក និងថ្ងៃធ្វើការដ៏ស្រស់ថ្លាដែរ ដូច្នេះ ឡារ៉ែន ចង់ប្រាប់ថា បាយអង្ករស្រូវសាលីអាចជួយបាន ព្រោះអង្ករស្រូវសាលីនឹងទៅជួយបង្កើនកម្រិតរបស់អ័រម៉ូនសេរ៉ូថូនិន(Serotonin)នៅក្នុងខួក្បាល ដោយសារធាតុមួយនេះគឺជាសារធាតុដែលជួយធ្វើឱ្យមនុស្សមានអារម្មណ៍ល្អ។ ដូច្នេះពេលព្រឹកថ្ងៃស្អែកនេះ សាកល្បងរកបាយអង្ករស្រូវសាលីមកញ៉ាំធ្វើជាអាហារពេលព្រឹកម្តងមើល៍…។

6. ការហាត់ប្រាណ គួរប្តូរពីបង្អែមមកទទួលទានផ្លែឈើវិញប្រសើរជាងពេលខ្លួនចាស់ទៅ
ការចាប់ផ្តើមហាត់ប្រាណតាំងពីវ័យកំលោះក្រមុំ ក្រៅពីនឹងធ្វើឱ្យសុខភាពរឹងមាំល្អជាបន្តរហូតទៅដល់អនាគតហើយនោះ នៅមានផលវិជ្ជមានដល់ខួរក្បាលទៀត ព្រោះមានការសិក្សាស្រាវជ្រាវមួយបានការហាត់ប្រាណជាប្រចាំក្នុងអំឡុងអាយុងអំឡុងអាយុ 20ឆ្នាំរហូតមក នឹងជួយឱ្យមានការចងចាំល្អ ទោះជាវ័យហួសទៅដល់ 40 ឬ 50ឆ្នាំហើយក៏ដោយសុខភាពរាងកាយងកាយរបស់យគឺជារឿងសំខាន់ បើយើងចេះមើលថែទាំវាឱ្យបានល្អ នឹងជួយឱ្យសុខភាពផ្លូវចិត្តរបស់យើងល្អទៅតាមនោះដែរ តែបើអ្នកព្រងើយកន្តើយ វាអាចនឹងធ្វើឱ្យទាំងរាងកាយ និងផ្លូវចិត្តរបស់អ្នកកាន់តែយ៉ាប់យ៉ឺនទៅ បន្ទាប់ពីនោះរោគាផ្សេងៗនឹងតាមមក ដូច្នេះគួរនាំគ្នាថែរក្សាសុខភាពឱ្យបានល្អប្រសើរជាង៕

February 12, 2020

មិនមែន Corona ឬ Ebola តែជាជំងឺចម្លែក! សម្លាប់មនុស្ស 15នាក់ក្នុងពេលមិនដល់ 1សប្ដាហ៍ នៅនីហ្សេរីយ៉ា

ក្រុមមន្ត្រីសុខាភិបាល បានព្រមានអំពីជំងឺចម្លែកម្យ៉ាងដែលបានសម្លាប់មនុស្ស 15នាក់ និងរាប់សិបនាក់ទៀតកំពុងផ្ទុកមេរោគនេះ ក្នុងរយៈពេលមិនដល់1សប្ដាហ៍។

អ្នកជំងឺទាំងអស់ សុទ្ធតែមានអាការក្អួតចង្អោរ ហើមខ្លួន និងរាក។ ករណីដំបូងដែលត្រូវបានគេកត់ត្រា គឺនៅចុងខែមករា នៅក្នុងរដ្ឋ Benue ភាគអាគ្នេយ៍នៃរដ្ឋធានី Abuja ប្រទេស នីហ្សេរីយ៉ា។ គិតមកដល់ថ្ងៃទី 3កុម្ភៈ ជំងឺនេះបានធ្វើឱ្យប៉ះពាល់ដល់សុខភាពរបស់មនុស្សចំនួន 104នាក់។ នេះបើតាមអ្នកតំណាងរាស្ត្រម្នាក់ គឺលោក Abba Moro។

លោក Moro បានឱ្យដឹងថា អ្នកជំងឺជាច្រើនបានស្លាប់ បន្ទាប់ពីឆ្លងមេរោគរយៈពេល48ម៉ោង។ ក្រុមអ្នកតំណាងរាស្ត្រនៃប្រទេសនេះ បានស្នើឱ្យក្រសួងសុខាភិបាល បញ្ជូនអ្នកជំនាញទៅកាន់តំបន់អាសន្នរោគ ដើម្បីស្វែងយល់បន្ថែមអំពីជំងឺនេះ។ ស្ថាប័នគ្រប់គ្រង់ និងទប់ស្កាត់ជំងឺឆ្លងនៃប្រទេសនីហ្សេរីយ៉ា (NCDC) ក៏បានស្នើឱ្យមានការតាមដានឱ្យបានម៉ត់ចត់ ដើម្បីទប់ស្កាត់ការឆ្លងរាលដាលនៃមេរោគចម្លែកនេះ។

រដ្ឋមន្ត្រីក្រសួងសុខាភិបាលនីហ្សេរីយ៉ា លោក Osagie Ehanire កាលពីថ្ងៃទី 8កុម្ភៈ បានមានប្រសាសន៍ថា នេះគឺជាជំងឺថ្មី មិនមែនជំងឺ Ebola ឬ Lassa (អាសន្នរោគទាំងពីរនេះ ធ្លាប់រាតត្បាតតំបន់អាហ្វ្រិកខាងលិច) នោះទេ។ ជំងឺនេះ ក៏មិនមានទំនាក់ទំនងអ្វីជាមួយនឹងអាសន្នរោគកូរ៉ូណា ដែលកំពុងឆ្លងរាលដាលនៅប្រទេសចិននោះដែរ។

NCDC បានបង្កើតខ្សែទូរស័ព្ទពិសេសមួយ ជួយឱ្យប្រជាជនរាយការណ៍ពីករណីថ្មីទាក់ទិននឹងជំងឺចម្លែកនេះ ដើម្បីកាត់ផ្ដាច់់ការឆ្លងរាលដាលរបស់មេរោគនេះ តាំងពីដើមទី។ នេះ បើតាមសារព័ត៌មាន Telegraph។

នីហ្សេរីយ៉ា គឺជាប្រទេសមួយដែលប្រព័ន្ធសុខាភិបាលនៅមានកម្រិតនៅឡើយ។ Ebola ធ្លាប់បានឆ្លងរាលដាលកាលពីឆ្នាំ 2014 បណ្ដាលឱ្យប្រជាជននីហ្សេរីយ៉ាចំនួន 20នាក់បានឆ្លងមេរោគនេះ ក្នុងនោះមាន 8នាក់ បានបាត់បង់ជីវិត។ នៅក្នុងរដូវអាសន្នរោគគ្រុនឈាម Lassa កាលពីដើមឆ្នាំ 2018 ប្រទេសនេះក៏មានអ្នកស្លាប់ដល់ទៅ 90នាក់ និងមនុស្ស 1,447នាក់ បានឆ្លងជំងឺនេះ៕

ប្រភព៖ សារព័ត៌មានបរទេស

February 12, 2020

Category: សុខភាព