សុខភាព - La Reine Media

ម្ចាស់នាវា MS Westerdam សហការជាមួយកម្ពុជា និងប្រទេសពាក់ព័ន្ធ តាមរកអ្នកទេសចរដែលបានចាកចេញពីនាវានេះ

ម្ចាស់នាវាទេសចរណ៍ MS Westerdam កំពុងសហការជាមួយអាជ្ញាធរកម្ពុជា និងម៉ាឡេស៊ីដើម្បីស្វែងរកអ្នកដែលបានចាកចេញពីនាវា បន្ទាប់ពីបានពិនិត្យឃើញថា អ្នកទេសចរម្នាក់មានផ្ទុកមេរោគកូរ៉ូណា COVID-19។

“យើងខ្ញុំកំពុងតែសហការជាមួយមន្ត្រីសុខាភិបាលកម្ពុជា និងមា៉ឡេស៊ី ក៏ដូចជាអ្នកជំនាញមកពីមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) និងអង្គការសុខភាពពិភពលោក។ អ្នកទេសចរដែលបានវិលត្រឡប់ទៅដល់ផ្ទះ នឹងត្រូវបានមន្ត្រីសុខាភិបាលក្នុងតំបន់ ធ្វើការទំនាក់ទំនង និងផ្ដល់ព័ត៌មានបន្ថែម”។ នេះគឺជាការប្រកាសរបស់ក្រុមហ៊ុន Holland America Line ដែលជាម្ចាស់នាវាទេសចរណ៍ MS Westerdam ឱ្យដឹងនៅថ្ងៃនេះ (17កុម្ភៈ ឆ្នាំ2020)។ នេះបើតាមសារព័ត៌មាន Reuters។

សេចក្ដីប្រកាសនេះ ត្រូវបានធ្វើឡើងបន្ទាប់ពីអ្នកដំណើរ145នាក់ ចាកចេញពីនាវា MS Westerdam ដែលចូលចតក្នុងកំពង់ផែនខេត្តព្រះសីហនុ បានធ្វើដំណើរតាមយន្តហោះទៅម៉ាឡេស៊ី ដើម្បីបន្តដំណើរត្រឡប់ទៅផ្ទះ។ ប៉ុន្តែ អ្នកដំណើរ8នាក់ត្រូវបានម៉ាឡេស៊ី ឃាត់ឱ្យនៅ ដើម្បីពិនិត្យរកមេរោគកូរ៉ូណា ក្នុងនោះលោកយាយអាយុ83ឆ្នាំម្នាក់ ត្រូវបានគេរកឃើញថា មានផ្ទុកមេរោគរលាកសួតប្រភេទថ្មីកូរ៉ូណា COVID-19។ រឿងនេះបានធ្វើឱ្យមានការព្រួយបារម្ភ និងសង្ស័យថា អ្នកដំណើរ137នាក់ ដែលចាកចេញពីទីក្រុង Kuala Lumpur ដើម្បីបន្តដំណើរទៅផ្ទះ អាចមានផ្ទុកមេរោគ COVID-19 នេះដែរ។

ក្រុមហ៊ុន Holland America Line បានឱ្យដឹងថា អ្នកទេសចរ 1,454នាក់ និងក្រុមបុគ្គលិកនាវា 802នាក់ មុននោះមិនមានអាការនៃជំងឺកូរ៉ូណានោះទេ។

យ៉ាងហោចណាស់មានអ្នកដំណើរ236នាក់ និងបុគ្គលិកនាវា747នាក់ នៅបន្តស្នាក់នៅក្នុងនាវា ខណៈដែលអ្នកដំណើរផ្សេងទៅស្នាក់នៅក្នុងសណ្ឋាគារនានាក្នុងក្រុងភ្នំពេញ។ អាជ្ញាធរថៃក៏បានប្រកាសថា អ្នកដំណើររាប់សិបនាក់ដែលធ្លាប់នៅលើនាវា MS Westerdam ក៏បានចូលមកទឹកដីថៃ ដើម្បីបន្តដំណើរទៅផ្ទះ។

សូមបញ្ជាក់ថា នាវាទេសចរណ៍ MS Westerdam បានចូលចតក្នុងកំពង់ផែខេត្តព្រះសីហនុ កាលពីថ្ងៃទី13កុម្ភៈ ក្រោយរយៈ2សប្ដាហ៍ធ្វើដំណើរគ្មានគោលដៅនៅលើផ្ទៃសមុទ្រ ដោយសារត្រូវបានប្រទេសជាច្រើនដូចជា ហ្វីលីពីន តៃវ៉ាន់ ជប៉ុន កូរ៉េខាងត្បូង និងប្រទេសថៃ បដិសេធមិនឱ្យចូលចត ព្រោះតែខ្លាចឆ្លងវីរុសកូរ៉ូណាដល់ពលរដ្ឋរបស់ពួកគេ។ ប៉ុន្តែ ដោយសារតែទទួលដំណឹងដូចខាងលើ និងបានដឹងថា នាវានេះជិតអស់ស្បៀង ទើបកម្ពុជាអនុញ្ញាតឱ្យនាវានេះចូលចត។

ក្រោយពីទីក្រុង Kuala Lumpur ប្រកាសថា អ្នកដំណើរម្នាក់មកពីនាវា MS Westerdam មានផ្ទុកមេរោគកូរ៉ូណា គម្រោងបញ្ជូនអ្នកទេសចរលើនាវាទៅកាន់ប្រទេសពួកគេវិញ ត្រូវបានអាក់ខាន ហើយអ្នកដំណើរដែលប្រុងនឹងចាកចេញពីកម្ពុជាទៅកាន់ប្រទេសម៉ាឡេស៊ីក៏ត្រូវបានលុបចោល។

ម្ចាស់នាវា MS Westerdam នាល្ងាចនេះ បានប្រកាសថា យ៉ាងហោចណាស់មានភ្ញៀវទេសចរចំនួន 255នាក់ និងបុគ្គលិកនាវា747នាក់ ក្នុងនាវា Westerdam ត្រូវបានធ្វើតេស្តរកមេរោគ។

គិតមកដល់ល្ងាចនេះ (17កុម្ភៈ) អ្នកទេសចរលើនាវា MS Westerdam ជាង1ពាន់នាក់ហើយ បានចាកចេញពីកម្ពុជា។ ក្រៅពីនេះ អ្នកដំណើរប្រហែល500នាក់ កំពុងស្នាក់នៅក្នុងប្រទេសកម្ពុជា។ អ្នកទេសចរជាង120នាក់ ដែលបានពិនិត្យសុខភាពរួចរាល់ហើយ បានធ្វើទេសចរណ៍នៅរាជធានីភ្នំពេញ និងមួយចំនួនទៀតនៅលើកប៉ាល់ ជាមួយនឹងបុគ្គលិកនាវា Westerdam ជាង800នាក់។

ក្រុមហ៊ុន Holland America Line បានឲ្យដឹងនៅថ្ងៃទី17នេះថា នាវា MS Westerdam កំពុងស្ថិតនៅឯកំពង់ផែខេត្តព្រះសីហនុ នៅឡើយ៕

February 17, 2020

IMF ព្រមានអំពីការខាតបង់សេដ្ឋកិច្ច ព្រោះតែកូរ៉ូណា ប៉ុន្តែថាសេដ្ឋកិច្ចនឹងងើបឡើងឆាប់រហ័ស ក្រោយវិបត្តិសុខភាពនេះ

ប្រធានអង្គការមូលនិធិរូបិយវត្ថុអន្ដរជាតិ IMF (International Monetary Fund) អ្នកស្រី Kristalina Georgieva បានព្រមានថា សេដ្ឋកិច្ចទូទាំងពិភពលោកសម្រាប់ឆ្នាំ2020 នឹងខាតបង់ច្រើនដោយសារអាសន្នរោគកូរ៉ូណា COVID-19 ប៉ុន្តែថា វានឹងងើបឡើងវិញបានឆាប់រហ័ស។

ថ្លែងក្នុងវេទិកាស្ត្រីសកលដែលបានធ្វើឡើងនៅទីក្រុង Dubai (អារ៉ាប់រួម) កាលពីថ្ងៃទី16កុម្ភៈ ប្រធានអង្គការមូលនិធិរូបិយវត្ថុអន្តរជាតិ IMF អ្នកស្រី Kristalina Georgieva យល់ថា វាមិនទាន់ដល់ពេលដើម្បីធ្វើការវាយតម្លៃគ្រប់ជ្រុងជ្រោយទៅលើឥទ្ធិពលនៃអាសន្នរោគកូរ៉ូណា COVID-19។

AFP ដកស្រង់សម្ដីប្រធានអង្គការនេះ បកស្រាយថា ព័ត៌មានអំពីអាសន្នរោគកូរ៉ូណា នៅតែមិនទាន់ត្រូវបានស្វែងយល់លម្អិតនៅឡើយ ហើយបច្ចុប្បន្ន គេក៏នៅមិនទាន់ដឹងថា ប្រទេសចិននឹងអាចទប់ទល់មេរោគនេះបានដល់ពេលណា ឬក៏មេរោគនេះអាចរាលដាលទូទាំងពិភពលោក?

ប៉ុន្តែ អ្នកស្រី Georgieva ទទួលស្គាល់ថា អាសន្នរោគនេះ បានបង្ករផលប៉ះពាល់ខ្លាំងដល់វិស័យមួយចំនួន ដូចជាវិស័យទេសចរណ៍ និងដឹកជញ្ជូនជាដើម។ “អាចថា (កំណើនសេដ្ឋកិច្ចទូទាំងពិភពលោក) នឹងទទួលរងការខូចខាត ហើយយើងសង្ឃឹមថា កម្រិតនៃការខូចខាតនឹងមានប្រហែលពី 0,1-0,2%”។ អ្នកស្រី Georgieva ថ្លែងដូច្នេះ។

កត្តាមួយដែលត្រូវបានគេយកមកប្រៀបធៀបអំពីកម្រិតនៃផលប៉ះពាល់របស់អាសន្នរោគ COVID-19 នោះគឺទំហំសេដ្ឋកិច្ចរបស់ប្រទេសចិន។ ឆ្នាំ2002 ដល់ឆ្នាំ2003 ប្រទេសចិនកាន់កាប់8%នៃទំហំសេដ្ឋកិច្ចទូទាំងពិភពលោក នាសម័យអាសន្នរោគ SARS ប៉ុន្តែបច្ចុប្បន្ន ចំនួននេះ បានកើនឡើងដល់19%។

អ្នកស្រី Georgieva ថ្លែងថា សេដ្ឋកិច្ចពិភពលោក អាចនឹងមានឱនភាពខ្លាំងក្នុងមួយរយៈពេលខ្លីដោយសារអាសន្នរោគកូរ៉ូណា ហើយក្រោយវិបត្តិសុខភាពនេះ សេដ្ឋកិច្ចនឹងងើបឡើងបានឆាប់រហ័ស។

សូមរំឭកថា មុននេះ ក្នុងរបាយការណ៍មួយស្ដីអំពីការរំពឹងទុកនៃសេដ្ឋកិច្ចពិភពលោក ដែលត្រូវបានប្រកាសកាលពីខែមករា មូលនិធី IMF បានទម្លាក់ពិន្ទុនៃកំណើនសេដ្ឋកិច្ចទូទាំងពិភពលោកសម្រាប់ឆ្នាំ2020 មកនូវត្រឹម3,3% ថយចុះ0,1% បើធៀបនឹងការប៉ានស្មានមុននេះ។ កំណើនសេដ្ឋកិច្ចក្នុងឆ្នាំ2019 ត្រឹមតែ2,9% ពោលគឺទាបបំផុតក្នុងអំឡុង1ទសវត្សរ៍កន្លង៕

ប្រភព៖ សារព័ត៌មានបរទេស

February 17, 2020

ប្រជាពលរដ្ឋប៉ាគីស្ថាន ធ្វើបាតុកម្មទាមទារឱ្យរដ្ឋាភិបាលជម្លៀសនិស្សិតរបស់ប្រទេសនេះ ចេញពីស្រុកចិន

រដ្ឋាភិបាលប៉ាគីស្ថាន បានសម្រេចចិត្តមិនជម្លៀសនិស្សិតរបស់ខ្លួនជាង1,000នាក់ ចេញពីតំបន់ Wuhan ដែលជាសម្បុកមេរោគកូរ៉ូណា ខណៈនិស្សិតជាច្រើនមានបំណងត្រឡប់មកស្រុកវិញ។

រដ្ឋមន្ត្រីក្រសួងសុខាភិបាលប៉ាគីស្ថាន Zafar Mirza បានឱ្យដឹងនៅលើទំព័រ Twitter កាលពីថ្ងៃទី15កុម្ភៈថា រូបលោក និងក្រុមរដ្ឋមន្ត្រី នឹងបើកកិច្ចប្រជុំមួយសម្រាប់អាណាព្យាបាលសិស្ស និស្សិតនៅ ទីក្រុង Islamabad នាថ្ងៃពុធ ហើយរដ្ឋាភិបាលក៏កំពុងធ្វើការជាមួយអាជ្ញាធរចិន ដើម្បីធានាសុវត្ថិភាពរបស់និស្សិតដែលកំពុងសិក្សានៅឯក្រុង Wuhan ប្រទេសចិន។

ក៏ប៉ុន្តែ និស្សិត និងគ្រួសាររបស់ពួកគេ បានសម្ដែងការខកចិត្តកាន់តែខ្លាំង ខណៈចំនួនអ្នកស្លាប់ដោយសារមេរោគកូរ៉ូណា ចេះតែកើនឡើងពីមួយថ្ងៃទៅមួយថ្ងៃ។

“ដើម្បីផលប្រយោជន៍របស់យើង យើងស្នើរឱ្យរដ្ឋាភិបាលយកចិត្តទុកដាក់ទៅលើកូនចៅរបស់យើងខ្ញុំ សូមមេត្តាស្ដាប់នូវការកើតទុក្ខមិនសុខចិត្តរបស់អ្នកម្ដាយមួយរូបដូចខ្ញុំ”។ នេះគឺជាសម្ដីរបស់បាតុករម្នាក់ដែលសុំមិនបញ្ចេញឈ្មោះ បានថ្លែងប្រាប់អ្នកយកព័ត៌មាន។

បាតុករនាំគ្នាស្រែកខ្លាំងៗថា “នាំកូនយើងខ្ញុំត្រឡប់មកស្រុកវិញ” និងនាំគ្នាលើកបដាដែលមានសរសេរពាក្យដូចគ្នានេះ។

កាលពីដើមសប្ដាហ៍មុន មនុស្សរាប់រយនាក់នៅទីក្រុង Lahore នៃប្រទេសប៉ាគីស្ថាន ក៏បានធ្វើបាតុកម្មដូចគ្នានេះដែរ នៅខាងក្រៅស្ថានកុងស៊ុលចិន ដោយសារតែមាននិស្សិតជនជាតិប៉ាគីស្ថានជាច្រើននាក់ បានឆ្លងមេរោគកូរ៉ូណានៅប្រទេសចិន។ អាជ្ញាធរប៉ាគីស្ថានបានឱ្យដឹងថា និស្សិតប៉ាគីស្ថាន6នាក់ដែលបានឆ្លងមេរោគនេះ កំពុងទទួលការព្យាបាល និងកំពុងមានសុខភាពប្រសើរឡើងវិញខ្លះហើយ។

យ៉ាងនេះក្ដី ក្រុមនិស្សិតប៉ាគីស្ថានដែលកំពុងជាប់គាំងនៅឯប្រទេសចិន បានទាក់ទងមកកាន់ភ្នាក់ងារសារព័ត៌មាន Reuters ដោយប្រាប់ថា ពួកគេចង់ចាកចេញពីប្រទេសចិន៕

ប្រភព៖ សារព័ត៌មានបរទេស

February 17, 2020

ធនាគារសម្រេចចិត្ត “ដុតកម្ទេច” សាច់ប្រាក់ ដើម្បីទប់ស្កាត់ការឆ្លងវីរុសកូរ៉ូណា COVID-19

ធនាគារកណ្ដាលរបស់ប្រទេសចិន សាខាក្វាងចូវ (Guangzhou) សម្រេចចិត្តថានឹងដុតកម្ទេចក្រដាសប្រាក់មួយចំនួន ដែលធ្លាប់ចរាចរនៅក្នុងមន្ទីរពេទ្យ ផ្សារលក់អាហារ និងចំណត់រថយន្ត ដើម្បីរួមចំណែកទប់ស្កាត់ការឆ្លងរាលដាលនៃមេរោគកូរ៉ូណា។

ដើម្បីអនុវត្តបាន បណ្ដាធនាគារពាណិជ្ជកម្មក្នុងខេត្ត នឹងត្រូវញែកក្រដាសប្រាក់ដែលធ្លាប់បានចរាចរនៅក្នុងតំបន់ដែលមានហានិភ័យខ្ពស់ក្នុងការឆ្លងមេរោគកូរ៉ូណា ទុកមួយឡែក ដើម្បីងាយស្រួលសម្លាប់មេរោគ។ ក្រោយមក ក្រដាសប្រាក់នោះនឹងត្រូវបញ្ជូនទៅកាន់ធនាគារកណ្ដាលរបស់ចិន សាខាខេត្តក្វាងចូវ ដើម្បីដុតសម្លាប់មេរោគ។ នេះបើតាមសារព័ត៌មាន SCMP។

ទាក់ទិននឹងវិធានការនេះ អគ្គនាយករងនៃធនាគារធំមួយនៅក្នុងខេត្តក្វាងចូវ សុំមិនបញ្ចេញឈ្មោះ បាននិយាយថា អតិថិជននឹងត្រូវស្នើឱ្យបញ្ជាក់អំពីប្រភពនៃក្រដាសប្រាក់របស់ពួកគេដែលបានផ្ញើនៅក្នុងសាខាធនាគាររបស់ពួកគេ។ ប៉ុន្តែ មន្ត្រីធនាគាររូបនេះ ជឿថា វិធានការបែបនេះ ពិបាកនឹងធ្វើឱ្យមានប្រសិទ្ធភាព។

ដំណោះស្រាយខាងលើរបស់ខេត្តក្វាងចូវ ត្រូវបានដាក់ចេញ បន្ទាប់ពីអគ្គនាយករងធនាគារ PBOC បានឱ្យដឹងថា ប្រាក់ប្រភេទក្រដាសថ្មី ចំនួន600ពាន់លានយន់ (85,6ពាន់លានដុល្លារអាមេរិក) ត្រូវបានដាក់ឱ្យប្រើប្រាស់ទូទាំងប្រទេសចាប់ពីថ្ងៃទី17មករា ឆ្នាំ2020 រួមទាំងប្រាក់ថ្មីចំនួន4ពាន់លានយន់ ត្រូវបានបញ្ជូនទៅកាន់ក្រុង Wuhan ខណៈដែលប្រាក់ចំនួន7,8ពាន់លានយន់ជាសាច់ប្រាក់សុទ្ធ ត្រូវបានដកចេញពីការចរាចរ។

PBOC បានឱ្យដឹងថា ខ្លួននឹងប្រើប្រាស់កម្ដៅខ្ពស់ ឬកាំរស្មី UV (ultraviolet ray) ដើម្បីរម្ងាប់មេរោគនៅលើក្រដាសប្រាក់ទាំងនោះ បន្ទាប់មកដាក់វាទុកដាច់ដោយឡែករយៈពេល14ថ្ងៃ មុនពេលដាក់ឱ្យប្រើប្រាស់ឡើងវិញ៕

ប្រភព៖ សារព័ត៌មានបរទេស

February 17, 2020

អ្នកដំណើរដែលចាកចេញពីកម្ពុជា ត្រូវបានថៃរឹតបន្តឹងខ្លាំង ទាក់ទិននឹងមេរោគកូរ៉ូណា

អាកាសយានដ្ឋាននានានៅប្រទេសថៃ កំពុងតែត្រូវបានរឹតបង្កើនខ្លាំង ទៅលើការត្រួតពិនិត្យអ្នកដំណើរទាំងឡាយណាដែលធ្វើដំណើតតាមយន្តហោះមកពីប្រទេសកម្ពុជា ក្រោយពីកម្ពុជាបានអនុញ្ញាតឱ្យនាវាទេសចរណ៍ MS Westerdam ចូលចតនៅឯកំពង់ផែនខេត្តព្រះសីហនុ។

“វិធានការរឹតបន្តឹងនានាត្រូវបានអនុវត្តនៅឯព្រលានយន្តហោះអន្តរជាតិ Suvarnabhumi និង Don Mueang រួមនឹង ព្រលានយន្តហោះ Phuket ដែលមានជើងហោះហើរពីប្រទេសកម្ពុជា”។ នេះបើតាមសេចក្ដីប្រកាសរបស់អាជ្ញាធរអាកាសចរណ៍ថៃ (AOT)

ការរឹតបន្តឹងខាងលើនេះ ត្រូវបាន AOT លើកឡើងបន្ទាប់ពីកម្ពុជាបានអនុញ្ញាតឱ្យនាវាទេសចរណ៍ MS Westerdam ចូលចតក្នុងកំពង់ផែនខេត្តព្រះសីហនុ ដែលត្រូវបានគេចាត់ទុកថាដើម្បីសម្រួលឱ្យអ្នកទេសចរណ៍នៅលើកប៉ាល់នេះ បានវិលត្រឡប់ទៅកាន់ប្រទេសរៀងៗខ្លួន។

សូមរំឭកថា ក្រុមមន្ត្រីម៉ាឡេស៊ី កាលពីថ្ងៃទី15កុម្ភៈ បានឱ្យដឹងថា ស្ត្រីអ្នកទេសចរវ័យ83ឆ្នាំម្នាក់ដែលបានស្ថិតនៅលើនាវា Westerdam ត្រូវបានម៉ាឡេស៊ីរកឃើញថា មានផ្ទុកមេរោគកូរ៉ូណា COVID-19 បន្ទាប់ពីជិះយន្តហោះពីកម្ពុជាទៅកាន់ម៉ាឡេស៊ី។ ម៉ាឡេស៊ីបានធ្វើតេស្តរកមេរោគកូរ៉ូណាលើស្រ្តីដដែលនេះជាលើកទីពីរ ទៅតាមការស្នើរពីភាគីកម្ពុជា ហើយជាលទ្ធផល ស្ត្រីនេះពិតជាមានផ្ទុកមេរោគកូរ៉ូណាប្រាកដមែន។

ព្រលានយន្តហោះរបស់ថៃ ចំនួន3ខាងលើ ត្រូវបាន AOT រៀបចំឱ្យមានកន្លែងចុះចតដោយឡែក សម្រាប់យន្តហោះដែលមកពីកម្ពុជា ក្នុងអំឡុងពេលចាប់ពីថ្ងៃទី14កុម្ភ ដល់ថ្ងៃទី21កុម្ភៈ ឆ្នាំ2020 ដូចទៅនឹងជើងហោះហើរពីប្រទេសចិន។

ចំណែកជើងហោះហើរ TG585 របស់ក្រុមហ៊ុនអាកាសចរណ៍ Thai Airways មានដឹកអ្នកដំណើរ27នាក់ ហោះចេញពីភ្នំពេញ ក៏ត្រូវបានគេត្រួតពិនិត្យសុខភាពចំពោះអ្នកដំណើរទាំងនោះ ប៉ុន្តែមិនបានរកឃើញអ្នកដំណើរណាម្នាក់មានផ្ទុកមេរោគកូរ៉ូណានោះទេ ដូច្នេះទើបថៃបានអនុញ្ញាតឱ្យបន្តដំណើរប្រកាន់ប្រទេសរបស់ពួកគេ។ នេះបើតាមសារព័ត៌មាន Nation Thailand។

អាកាសយានដ្ឋានទាំង3ខាងលើ ទទួលការចុះចតពីយន្តហោះចំនួន27ជើងមកពីកម្ពុជាជារៀងរាល់ថ្ងៃ។ ប្រទេសថៃមិនអនុញ្ញាតឱ្យយន្តហោះមកពីកម្ពុជា ចុះចតលើអាកាសយានដ្ឋានណាមួយផ្សេងទៀត ក្រៅតែពីព្រលានយន្តហោះទាំង3ដែលបានរៀបរាប់ខាងលើនេះនោះទេ។

អាសន្នរោគកូរ៉ូណា Covid-19 បានចាប់ផ្ដើមផ្ទុះការឆ្លងរាលដាលចេញពីទីក្រុង Wuhan ខេត្ត Hubei នៃប្រទេសចិន កាលពីដើមខែធ្នូ ឆ្នាំ2019 បច្ចុប្បន្ន បានលេចមុខនៅក្នុងប្រទេស និងតំបន់ចំនួន27នៅទូទាំងពិភពលោក បណ្ដលឱ្យមានអ្នកស្លាប់ 1,775នាក់ និងអ្នកដែលបានឆ្លងមេរោគនេះ ចំនួន71,331នាក់៕

ប្រភព៖ សារព័ត៌មានបរទេស

February 17, 2020

ថៃនាំខ្លួនជនជាតិវៀតណាម21នាក់ទៅកាន់មូលដ្ឋានទ័ព ដើម្បីពិនិត្យរកមេរោគកូរ៉ូណា

កងទ័ពជើងទឹករបស់ថៃ បាននាំពលរដ្ឋវៀតណាមចំនួន21នាក់ ទៅកាន់កន្លែងដាច់ដោយឡែក និងពិនិត្យរកមេរោគកូរ៉ូណា COVID-19 បន្ទាប់ពីបានទទួលដំណឹងថា ជនជាតិវៀតណាមទាំងនេះ ធ្លាប់ទៅកាន់ប្រទេសចិន។

សមាជិកក្រុមនាវិកចំនួន21នាក់នៅលើកបា៉ល់ចំនួន4របស់វៀតណាម ដែលកំពុងនេសាទសត្វត្រសក់សមុទ្រ (Holothurian/Sea cucumber) នៅលើសមុទ្រ ក្បែរដែនទឹកប្រទេសថៃ ត្រូវបានកងទ័ពជើងទឹកនៃប្រទេសនេះ នាំទៅកាន់ខេត្ត Songkhla ដើម្បីដាក់ឱ្យនៅដាច់ដោយឡែក កាលពីយប់ថ្ងៃទី15កុម្ភៈ។ ក្រុមគ្រូពេទ្យនៅឯមន្ទីរពេទ្យទ័ពជើងទឹក Songkhla បានធ្វើការពិនិត្យរកមេរោគកូរ៉ូណា បន្ទាប់ពីទទួលបានដំណឹងថា ក្រុមអ្នកនេសាទទាំងនេះ ធ្លាប់ទៅកាន់ប្រទេសចិន ក្នុងអំឡុងពេលដែលមានផ្ទុះឆ្លងរាលដាលនៃវីរុសរលាកសួតកូរ៉ូណា COVID-19។

លទ្ធផលនៃការពិនិត្យសុខភាពបានបង្ហាញថា សមាជិកនាវិក16នាក់ មិនមានរោគសញ្ញានៃជំងឺកូរ៉ូណានោះទេ។ ស្ថានភាពសុខភាពរបស់សមាជិកក្រុមនាវិក5នាក់ផ្សេងទៀត កំពុងរង់ចាំលទ្ធផល។

អាសន្នរោគកូរ៉ូណា Covid-19 បានចាប់ផ្ដើមផ្ទុះការឆ្លងរាលដាលចេញពីទីក្រុង Wuhan ខេត្ត Hubei នៃប្រទេសចិន កាលពីដើមខែធ្នូ ឆ្នាំ2019 បច្ចុប្បន្ន បានលេចមុខនៅក្នុងប្រទេស និងតំបន់ចំនួន27នៅទូទាំងពិភពលោក បណ្ដលឱ្យមានអ្នកស្លាប់ 1,775នាក់ និងអ្នកដែលបានឆ្លងមេរោគនេះ ចំនួន71,331នាក់៕

ប្រភព៖ សារព័ត៌មានបរទេស

February 17, 2020

អាមេរិកមិនទទួលយកពលរដ្ឋរបស់ខ្លួនដែលឆ្លងវីរុសកូរ៉ូណា នៅលើនាវា Diamond Princess

ពលរដ្ឋអាមេរិកាំង40នាក់ដែលឆ្លងមេរោគកូរ៉ូណានៅលើនាវាទេសចរណ៍ Diamond Princess មិនត្រូវបាននាំត្រឡប់ទៅកាន់ប្រទេសតាមជើងហោះហើរចំនួន2 ដែលក្រសួងការបរទេសអាមេរិកបានរៀបចំនោះទេ។

“40នាក់ក្នុងចំណោមពួកគេ បានឆ្លងមេរោគ។ ពួកគេនឹងមិនទៅណាទាំងអស់ ពួកគេកំពុងត្រូវបានបញ្ជូនទៅកាន់មន្ទីរពេទ្យផ្សេងៗនៅជប៉ុន” នេះគឺជាប្រសាសន៍របស់លោក Anthony Fauci មន្ត្រីជាន់ខ្ពស់នៃមន្ទីរសុខាភិបាលជាតិអាមេរិកាំង ដែលបានឆ្លើយនៅក្នុងកិច្ចសម្ភាសមួយជាមួយសារព័ត៌មាន CBS កាលពីម្សិលមិញ។ លោកបន្តថា អ្នកជំងឺទាំងនោះមិនស្ថិតក្នុងបញ្ជីឈ្មោះដែលត្រូវជម្លៀសទៅកាន់សហរដ្ឋអាមេរិកវិញនោះទេ។

នៅពេលត្រូវបានសួរអំពីកម្រិតនៃភាពធ្ងន់ធ្ងររបស់ពលរដ្ឋអាមេរិកាំង ដែលមានផ្ទុកមេរោគកូរ៉ូណា COVID-19 លោក Anthony Fauci ថ្លែងថា ប្រការនេះគឺមានច្រើនបែប។ លោកបន្តថា “អ្នកអាចត្រូវឆ្លងមេរោគ ហើយជំងឺនេះមានរោគសញ្ញាតិចតួចណាស់ ប៉ុន្តែ អ្នកអាចចម្លងមេរោគនេះទៅអ្នកដទៃបាន”។

មជ្ឈមណ្ឌលគ្រប់គ្រង និងបង្ការជំងឺឆ្លងនៃសហរដ្ឋអាមេរិក Centers for Disease Control and Prevention (CDC) កាលពីថ្ងៃទី15កុម្ភៈ បានប្រកាសថា ក្រសួងការបរទេសអាមេរិកាំងនឹងបញ្ជូនយន្តហោះ2គ្រឿងទៅកាន់ប្រទេសជប៉ុន ដើម្បីនាំយកពលរដ្ឋរបស់ខ្លួនចំនួនប្រហែល400នាក់ ដែលស្ថិតនៅលើនាវា Diamond Princess ដែលកំពុងចតនៅកំពង់ផែ Yokohama ប្រទេសជប៉ុន ត្រឡប់មកស្រុកវិញ។

បន្ទាប់ពីបានត្រឡប់ទៅកាន់សហរដ្ឋអាមេរិក អ្នកទាំងនោះអាចត្រូវបានបញ្ជូនទៅកាន់មូលដ្ឋានទ័ពអាកាស Travis ក្នុងរដ្ឋ California ដើម្បីតាមដានសុខភាព។ ពលរដ្ឋមួយចំនួនធំដែលស្ថិតក្នុងចំណោមពលរដ្ឋខាងលើនេះ អាចត្រូវបានរៀបចំឱ្យនៅដាច់ដោយឡែកក្នុងមូលដ្ឋានទ័ពអាកាស Travis ក្នុងរយៈពេល14ថ្ងៃ។ ក្រៅពីនេះ មនុស្សមួយចំនួនទៀតអាចត្រូវបានបញ្ជូនទៅកាន់មូលដ្ឋានទ័ពអាកាស Lackland ក្នុងរដ្ឋ Texas ដើម្បីពិនិត្យរកមេរោគ។

ចំណែកអាជ្ញាធរទីក្រុងហុងកុង កាលពីម្សិលមិញក៏បានប្រកាសថា នឹងបញ្ជូនយន្តហោះទៅកាន់ប្រទេសជប៉ុន ដើម្បីនាំពលរដ្ឋរបស់ខ្លួនចេញពីនាវា Diamond Princess ។ ពលរដ្ឋហុងកុងដែលកំពុងស្ថិតនៅលើនាវានេះ មានចំនួនប្រហែល330នាក់ ហើយអ្នកទាំងនេះនឹងត្រូវដាក់ឱ្យនៅដាច់ដោយឡែករយៈពេល14ថ្ងៃដូចគ្នា នៅពេលបានទៅដល់ទីក្រុងហុងកុង។

ប្រទេសកាណាដាវិញ បានឱ្យដឹងថា ពលរដ្ឋដែលមានរោគសញ្ញានៃជំងឺកូរ៉ូណា នឹងមិនត្រូវបានអនុញ្ញាតឱ្យឡើងយន្តហោះត្រឡប់ទៅប្រទេសកំណើតវិញនោះដែរ ប៉ុន្តែពួកគេត្រូវនៅទទួលការព្យាបាលក្នុងប្រទេសជប៉ុន។ អ្នកដំណើរទាំងអស់នឹងត្រូវបានដាក់ឱ្យនៅដាច់ដោយឡែក ពេលវិលត្រឡប់ទៅដល់កាណាដា។ ពលរដ្ឋកាណាដាចំនួន 255នាក់ កំពុងស្ថិតនៅក្នុងនាវាទេសចរណ៍ Damond Princess នេះ។

សួមបញ្ជាក់ថា នាវាទេសចរណ៍ Diamond Princess មានផ្ទុកមនុស្សចំនួន 3,711នាក់ បូករួមទាំងក្រុមនាវិក ត្រូវបានដាក់ឱ្យនៅដាច់ដោយឡែកក្នុងកំពង់ផែ Yokohama ប្រទេសជប៉ុន បន្ទាប់ពីអ្នកដំណើរមកពីទីក្រុងហុងកុងម្នាក់ កាលពីខែមុនបានឆ្លងមេរោគកូរ៉ូណា។ នាវាខាងលើនេះ កាលពីម្សិលមិញបានរកឃើញអ្នកមានផ្ទុកមេរោគកូរ៉ូណាចំនួន70នាក់បន្ថែមទៀត ដូច្នេះ នៅលើនាវានេះ មានអ្នកផ្ទុកមេរោគសរុបចំនួន355នាក់៕

ប្រភព៖សារព័ត៌មានបរទេស

February 17, 2020

ចំនួនអ្នកស្លាប់ដោយសារវីរុសកូរ៉ូណា កើនដល់ 1,773នាក់

ប្រទេសចិនបានបញ្ជាក់ថា ចំនួនអ្នកឆ្លងមេរោគកូរ៉ូណាបន្ថែមមានចំនួន1,933នាក់ ធ្វើឱ្យចំនួនអ្នកផ្ទុកមេរោគនេះនៅទូទាំងពិភពលោក កើនដល់ 71,279នាក់ ក្នុងនោះមាន1,773នាក់បានបាត់បង់ជីវិត។

ខេត្ត Hubei ដែលជាសម្បុកអាសន្នរោគកូរ៉ូណា COVID-19 មកដល់ថ្ងៃនេះ (17កុម្ភ) មានអ្នកស្លាប់បន្ថែមដល់ទៅ100នាក់ និងអ្នកជំងឺថ្មីមានចំនួន19,33នាក់ ធ្វើឱ្យចំនួនអ្នកផ្ទុកមេរោគសរុបនៅខេត្តនេះ មានចំនួន58,182នាក់ និងអ្នកស្លាប់មានចំនួន1,696នាក់។ នេះបើតាមទិន្នន័យពីគណៈកម្មការសុខាភិបាលខេត្ត Hubei ដែលបានប្រកាសក្នុងថ្ងៃនេះ។

បើធៀបនឹងម្សិលមិញ ចំនួនករណីឆ្លងថ្មីក្នុងខេត្ត Hubei ថ្ងៃនេះបានកើនជិត5% ប៉ុន្តែ ករណីស្លាប់បានថយចុះបើធៀបនឹង139នាក់កាលពីម្សិលមិញ។ អ្នកជំងឺថ្មីជិត90% ត្រូវបានរកឃើញក្នុងក្រុងអ៊ូហាននៃខេត្ត Hubei។

នៅទូទាំងពិភពលោក មានអ្នកឆ្លងជំងឺ 71,290នាក់ អ្នកស្លាប់មានចំនួន1,773នាក់ និងអ្នកដែលបានជាសះស្បើយមានចំនួន10,892នាក់។ ក្នុងចំណោមអ្នកស្លាប់សរុប មាន5ករណីស្លាប់នៅក្រៅប្រទេសចិន (ដីគោក) ក្នុងមួយមាន ជប៉ុន ហុងកុង បារាំង ហ្វីលីពីន និងតៃវ៉ាន់៕

ប្រភព៖ សារព័ត៌មានបរទេស

February 17, 2020

1,800នាក់បន្ថែមទៀតហើយដែលត្រូវគេរកឃើញថាមានផ្ទុកវីរុសកូរ៉ូណា COVID-19 ខណៈអ្នកស្លាប់សរុបឡើងដល់…

ខេត្ត Hubei បានរកឃើញអ្នកឆ្លងមេរោគកូរ៉ូណាបន្ថែមចំនួន1,800នាក់ ធ្វើឱ្យចំនួនអ្នកផ្ទុកមេរោគនេះនៅទូទាំងពិភពលោក ឡើងដល់ 69,044នាក់ ក្នុង1,666នាក់បានបាត់បង់ជីវិត។

គណៈកម្មការសុខាភិបាលខេត្ត Hubei ប្រទេសចិន បានឱ្យដឹងថា ខេត្តនេះមានអ្នកស្លាប់បន្ថែម 139នាក់ទៀតដោយសារមេរោគកូរ៉ូណា កើន9,5% ធៀបនឹងម្សិលមិញ ធ្វើឱ្យចំនួនអ្នកស្លាប់សរុបក្នុងខេត្តនេះឡើងដល់ 1,596នាក់។ ខេត្ត Hubei ក៏រកឃើញអ្នកផ្ទុកមេរោគបន្ថែម1,843នាក់ នាំឱ្យចំនួនអ្នកមានផ្ទុកមេរោគសរុបក្នុងខេត្តនេះ ឡើងដល់ 56,249នាក់។ ករណីមានអ្នកឆ្លងថ្មីតិចជាង577នាក់ បើធៀបនឹងថ្ងៃម្សិលមិញ។

ចំនួនអ្នកស្លាប់សរុបនៅទូទាំងប្រទេសចិន (ដីគោក) គឺ 1,662នាក់។ អ្នកឆ្លងថ្មី 1,855នាក់ និងអ្នកមានផ្ទុកមេរោគសរុបក្នុងប្រទេសនេះ មានចំនួន 68,347នាក់។ ចំណែកអ្នកដែលបានជាសះស្បើយពីជំងឺ មានចំនួន 9,306នាក់ និងអ្នកជំងឺដែលស្ថិតក្នុងស្ថានភាពគ្រោះថ្នាក់ដល់ជីវិត មានចំនួន 11,053នាក់។

នៅទូទាំងពិភពលោក មានអ្នកផ្ទុកមេរោគកូរ៉ូណាសរុប 69,044នាក់ និងអ្នកស្លាប់សរុប1,666នាក់ រួមទាំងអ្នកស្លាប់នៅខាងក្រៅប្រទេសចិនដីគោកចំនួន4នាក់ គឺម្នាក់ស្លាប់នៅជប៉ុន ម្នាក់នៅហុងកុង ម្នាក់នៅបារាំង និងម្នាក់ទៀតស្លាប់នៅហ្វីលីពីន។ អ្នកមានផ្ទុកមេរោគសរុប69,044នាក់ ក្នុងនោះមាន11,080នាក់ស្ថិតក្នុងស្ថានភាពធ្ងន់ធ្ងរ និង9,425នាក់បានជាសះស្បើយពីជំងឺ៕

ប្រភព៖ សារព័ត៌មានបរទេស

February 16, 2020

ករណីម៉ាឡេស៊ីរកឃើញអ្នកផ្ទុកមេរោគកូរ៉ូណាដែលធ្វើដំណើរពីកម្ពុជា ក្រសួងសុខាភិបាលស្នើឱ្យម៉ាឡេស៊ីពិនិត្យឱ្យបានសុក្រឹតឡើងវិញ

កាលពីយប់ថ្ងៃទី15កុម្ភៈ សារព័ត៌មានធំៗជាច្រើនបានរាយការណ៍ថា ក្រសួងសុខាភិបាលប្រទេសម៉ាឡេស៊ី បានឱ្យដឹងថា ខ្លួនបានរកឃើញជនជាតិអាមេរិកាំងម្នាក់ មានផ្ទុកមេរោគកូរ៉ូណា បន្ទាប់ពីអ្នកជំងឺនេះ បានធ្វើដំណើរចេញពីប្រទេសកម្ពុជា។

លោកវេជ្ជបណ្ឌិត Noor Hisham Abdullah មកពីក្រសួងសុខាភិបាលម៉ាឡេស៊ី បាននិយាយថា ស្រ្ដីជាជនជាតិអាមេរិកាំងដែលគេរកឃើញមានផ្ទុកមេរោគកូរ៉ូណានេះ គឺជាអ្នកទេសចរម្នាក់ ក្នុងចំណោមអ្នកទេសចរដែលធ្លាប់ស្ថិតនៅលើនាវា MS Westerdam ដែលទើបត្រូវបានអនុញ្ញាតឱ្យចូលចតក្នុងកំពង់ផែនក្រុងព្រះសីហនុនាពេលថ្មីៗនេះ។

សូមរំឭកថា នាវាទេសចរណ៍ MS Westerdam ដែលបានចូលចតក្នុងកំពង់ផែក្រុងព្រះសីហនុ មានផ្ទុកអ្នកទេសចរសរុប 145នាក់។ អ្នកដែលត្រូវម៉ាឡេស៊ីរកឃើញថាមានផ្ទុកមេរោគកូរ៉ូណា គឺជាស្ត្រីវ័យ83ឆ្នាំម្នាក់ និងជាមនុស្សម្នាក់ក្នុងចំណោមអ្នកដែលបាននៅលើនាវា MS Westerdam។

អ្នកដំណើរសរុបទាំង 145នាក់មកពីនាវាទេសចរណ៍ MS Westerdam បានចេញដំណើរតាមជើងយន្តហោះមួយពីប្រទេសកម្ពុជា ឆ្ពោះទៅកាន់ប្រទេសម៉ាឡេស៊ី កាលពីថ្ងៃ14ខែកុម្ភៈកន្លងទៅ ក្នុងនោះមានស្ត្រីវ័យចំណាស់អាយុ83ឆ្នាំម្នានក់ដែលម៉ាឡេស៊ីអះអាងថា មានផ្ទុកមេរោគកូរ៉ូណា។

ប្រវត្តិនៃការធ្វើនាវាចរណ៍នាពេលថ្មីៗនេះ របស់កប៉ាល់យក្ស Westerdam

ករណីនេះក្រសួងសុខាភិបាលកម្ពុជា បានចេញសេចក្ដីប្រកាស ស្នើសុំឱ្យភាគីម៉ាឡេស៊ី ពិនិត្យឡើងវិញអំពីករណីខាងលើនេះឱ្យបានសុក្រឹត៕

February 16, 2020

Category: សុខភាព