សុខភាព - La Reine Media

ជិត1,000នាក់បានឆ្លងមេរោគកូរ៉ូណា COVID-19 នៅកូរ៉េខាងត្បូង ខណៈអ្នកស្លាប់បានកើនដល់2,704នាក់នៅទូទាំង…

កូរ៉េខាងត្បូងទើបតែបានបញ្ជាក់ថា មានអ្នកឆ្លងមេរោគកូរ៉ូណាថ្មីបន្ថែមចំនួន84នាក់ទៀត នាំឱ្យចំនួនអ្នកមានផ្ទុកមេរោគនេះឡើងដល់977នាក់។

មជ្ឈមណ្ឌលគ្រប់គ្រង និងទប់ស្កាត់រោគឆ្លងរបស់កូរ៉េខាងត្បូង(KCDC) បានឱ្យដឹងថា 80% ក្នុងចំណោមអ្នកមានផ្ទុកមេរោគកូរ៉ូណាសរុប977នាក់នៃប្រទេសនេះ សុទ្ធតែមកពីទីក្រុង Daegu ខេត្ត Gyeongsang ខាងជើង។ កូរ៉េខាងត្បូងក៏បានប្រកាសថា ប្រទេសនេះ មានអ្នកស្លាប់ចំនួន10នាក់ដោយសារមេរោគកូរ៉ូណា ក្នុងនោះមាន8នាក់ស្លាប់នៅក្នុងមន្ទីរពេទ្យ Cheongdo ជាកន្លែងដែលអ្នកជំងឺ110នាក់ត្រូវបានគេរកឃើញថាមានផ្ទុកមេរោគ COVID-19។

ជាមួយនឹងតួលេខថ្មីដែលទើបត្រូវបានប្រកាសឱ្យដឹង គេឃើញថាចំនួនករណីឆ្លងនៅកូរ៉េខាងត្បូង បានកើនឡើងជាង30ដង ចាប់ពីថ្ងៃទី18កុម្ភៈ ខណៈចំនួនអ្នកឆ្លងមេរោគថ្មីមាន31ករណី។ តំបន់ស្នូលនៃអាសន្នរោគចំនួន2គឺ វិហារ Shincheonji នៅឯទីក្រុង Daegu និងមន្ទីរពេទ្យ Daenam នៅក្នុងខណ្ឌ Cheongdo នៃខេត្ត Gyeongsang មានអ្នកផ្ទុកមេរោគកូរ៉ូណាសរុប70% ក្នុងចំណោមអ្នកមានមេរោគសរុបនៅកូរ៉េខាងត្បូង។

នៅក្នុងដំណើរទស្សនកិច្ចដំបូងទៅកាន់តំបន់ Daegu ចាប់តាំងពីអាសន្នរោគបានចាប់ផ្ដើមកើតឡើង ប្រធានាធិបតី Moon Jae-in បានថ្លែងថា “ស្ថានភាពពិតជាធ្ងន់ធ្ងរណាស់” ហើយលោកក៏បានសន្យាថា រដ្ឋាភិបាលនឹងជួយដល់តំបន់នេះ។

សូមរំឭកថា អាសន្នរោគកូរ៉ូណា COVID-19 នេះ បានកើតឡើងដំបូងនៅទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2020។ មកដល់បច្ចុប្បន្ន មេរោគនេះបានឆ្លងទៅមនុស្សយ៉ាងហោច 80,289នាក់ និងបានសម្លាប់មនុស្សជាង2,704នាក់ នៅទូទាំងពិភពលោក។ កូរ៉េខាងត្បូង បច្ចុប្បន្ន បានក្លាយជាសម្បុកមេរោគកូរ៉ូណាធំបំផុតលំដាប់ទី2ក្នុងពិភពលោក បន្ទាប់ពីប្រទេសចិន៕

ប្រភព៖ សារព័ត៌មានបរទេស

February 25, 2020

អាម៉ា អាយុ 80ឆ្នាំម្នាក់ បរិច្ចាគប្រាក់ 5ម៉ឺនយន់ជួយប្រឆាំងវីរុស អាជ្ញាធរទទួលយកទឹកចិត្ត តែមិនទទួលទឹកប្រាក់

“ប្រទេសជាតិកំពុងជួបគ្រោះភ័យ គឺជារឿងដែលពួកយើងត្រូវជួយគ្នាទទួលខុសត្រូវដែរ” ដោយផ្នត់គំនិត និងការយល់ឃើញបែបត្រង់ៗនេះ បានធ្វើឱ្យអាម៉ា វ័យ 80ឆ្នាំម្នាក់នៅក្នុងមណ្ឌល ហ៊ើយ លង់ចៀង ចូលរួមបរិច្ចាគលុយសន្សំចំនួន 50,000យន់(ស្មើនឹងប្រមាណ 7,000ដុល្លារ)ដើម្បីជួយដល់តំបន់ឆ្លងរាលដាលវីរុស COVID-19 តែអាជ្ញាធរបានអះអាងដាច់ខាតថា មិនទទួលយកទឹកប្រាក់នោះទេ តែទទួលយកទឹកចិត្តដ៏ល្អថ្លៃថ្លារបស់អាម៉ា…។

នៅព្រឹកថ្ងៃទី12 កុម្ភៈកន្លងមក មានស្ត្រីចំណាស់ម្នាក់ពាក់ម៉ាស់ការពារ បានដើរទៅរកក្រុមមន្ត្រីប៉ូលិសដែលកំពុងប្រតិបត្តិភារកិច្ចនៅម្ដុំផ្លូវបំបែកជា4 អ៊ឹងពីង និងផ្លូវតុងជឺ ក្នុងទីក្រុងសួងយ៉ា ស្រុកយ៉ូអ៊ី មណ្ឌលហ៊ើយ លង់ចៀង ដោយលោកយាយបានប្រាប់ពីគោលបំណងបរិច្ចាគប្រាក់ចំនួន 50,000យន់ទៅដល់តំបន់ដែលកំពុងមានការឆ្លងរាលដាលនៃមេរោគវីរុស។ ពាក្យសម្ដីដ៏ស្មោះត្រង់របស់លោកយាយជរា បានធ្វើឱ្យមនុស្សម្នាទាំងឡាយរលីងរលោងទឹកភ្នែក។ លោកយាយនិយាយថា “ប្រទេសជាតិកំពុងមានគ្រោះភ័យ ក៏ជារឿងរបស់ពួកយើងដែរ…”។

សៀវជឹង ប៉ូលិសស្រីដែលលោកយាយចំណាស់ដើរមកសុំការជួយចាត់ការរឿងបរិច្ចាគប្រាក់នោះ បានរៀបរាប់ប្រាប់អ្នកយកព័ត៌មានថា ខណៈដែលខ្លួន និងមិត្តប៉ូលិសម្នាក់កំពុងប្រតិបត្តិភារកិច្ចត្រួតពិនិត្យបត្រអនុញ្ញាតការធ្វើដំណើររបស់មនុស្សម្នានៅចំណុចនោះ អាម៉ាម្នាក់ក៏ដើរចូលមករក…។

“ដំបូង ខ្ញុំគិតថា ប្រហែលជាលោកយាយមានបញ្ហា និងមកសុំការជួយក្នុងរឿងអ្វីម្យ៉ាង ខ្ញុំមិននឹកស្មានថា នៅក្នុងដៃរបស់លោកយាយមានកាន់សែកប្រាក់សុទ្ធរបស់ធនាគារមួយដែលមានចំនួនទឹកប្រាក់ 50,000យន់ ដើម្បីយកទឹកប្រាក់នេះមកបរិច្ចាគសម្រាប់ជួយសង្គ្រោះអ្នកកំពុងជួបគ្រោះភ័យដោយសារមេរោគវីរុសកូរ៉ូណានេះសោះ”

សែកទឹកប្រាក់ចំនួន 50,000យន់ ដែលអាម៉ាបរិច្ចាគឱ្យទៅតំបន់ដែលរងគ្រោះដោយវីរុសកូរ៉ូណា

លោកយាយ ថែមទាំងបានប្រាប់ទៀតថា គាត់មិនត្រូវការចេញមុខនៅក្នុងកម្មវិធីទូរទស្សន៍ ឬសាព័ត៌មានណាមួយទេ…។ លោកយាយនិយាយថា “…ខ្ញុំអរគុណពួកនាង(ប៉ូលិស)ណាស់ ដែលខំប្រឹងជួយខ្ញុំដំណើរការរឿងបរិច្ចាគនេះ លុយនេះជាលុយដែលបក្សឱ្យមក ខ្ញុំនៅមានលុយសល់ទៀត ចាយមិនអស់ទេ…”

“…ខ្ញុំមិនដឹងថា នឹងត្រូវទៅបរិច្ចាគលុយនៅទីណាទេ ទើបមករកពួកនាងឱ្យជួយនាំយកលុយចំនួននេះទៅជួយតំបន់ការពារមេរោគឆ្លងផង ខ្ញុំគ្រាន់តែចង់ជួយប្រទេសជាតិខ្លះប៉ុណ្ណោះឯង”

សៀវជឹង ប្រាប់ថា ដោយសារតែនាងមិនធ្លាប់ជួបរឿងបែបនេះពីមុនមក នាងក៏ទូរស័ព្ទទៅទីបញ្ជាការ។ នៅពេលអ្នកនៅទីនោះបានដឹងរឿងរ៉ាវនេះហើយ ក៏បានបដិសេធទទួលប្រាក់ពីលោកយាយ គួ ព្រមទាំងសម្ដែងការអរគុណចំពោះលោកយាយ គួ ដោយនិយាយលួងលោមគាត់ថា បក្ស និងរដ្ឋាភិបាលបានទទួលទឹកចិត្តដ៏សប្បុរសនេះពីលោកយាយហើយ និងថែមទាំងសូមអរគុណលោកយាយជំនួសប្រជាជនដែលកំពុងជួបគ្រោះភ័យដោយសារឆ្លងរាលដាលមេរោគនេះផងដែរ។ បន្ទាប់ពីនោះ ប៉ូលិសក៏បានបើកឡានជូនលោកយាយត្រឡប់ទៅផ្ទះវិញ។

ផ្ទះរបស់លោកយាយ គឺជាបន្ទប់តូចមួយ លោកតាបានស្លាប់ចោលជាយូរឆ្នាំមកហើយ លោកយាយមានកូនស្រី 2នាក់ កូនប្រុសម្នាក់ និងម្នាក់ទៀតរស់នៅឯទីក្រុងផ្សេង។ ជាប្រក្រតី លោកយាយរស់នៅក្នុងបន្ទប់នេះតែម្នាក់ឯង មានប្រាក់ចំណូល 2,000យន់ ចំណែកប្រាក់ចំនួន 50,000យន់នេះ ជាប្រាក់ដែលលោកយាយខំសន្សំសំចៃបានមកដល់ពេលនេះ។

ស្ថានការណ៍ជំងឺឆ្លងដែលកំពុងតែធ្ងន់ធ្ងរខ្លាំង ទើបកូនស្រីមិនអាចនៅមើលថែទាំលោកយាយបាន…៕

ប្រភព សារព័ត៌មានបរទេស

February 25, 2020

បុគ្គលិកពេទ្យជាង3,000នាក់នៅប្រទេសចិន បានឆ្លងវីរុសកូរ៉ូណា ចំណែកសម្ភារវេជ្ជសាស្ត្រក៏កំពុងខ្វះខាត

មន្ត្រីរបស់ប្រទេសចិនម្នាក់ បានឱ្យដឹងថា មកដល់ពេលនេះ មានបុគ្គលិកពេទ្យជាង3,000នាក់នៃប្រទេសនេះ បានឆ្លងមេរោគបង្កជំងឺរលាកសួតប្រភេទថ្មី ដែលហៅថា COVID-19។

នៅក្នុងសន្និសីទសារព័ត៌មានរួមជាមួយនឹងប្រតិភូនៃអង្គការសុខភាពពិភពលោក(WHO) នៅឯប្រទេសចិនកាលពីថ្ងៃទី24កុម្ភៈ ឆ្នាំ2020 លោក Lang Wannian មកពីគណៈកម្មការសុខាភិបាលចិន បានឱ្យដឹងថា បុគ្គលិកពេទ្យជាង3,000នាក់នៃប្រទេសនេះ បានឆ្លងមេរោគកូរ៉ូណា COVID-19។ បុគ្គលិកពេទ្យដែលបានឆ្លងមេរោគនេះ ភាគច្រើននៅក្នុងមន្ទីរពេទ្យនានានៃខេត្ត Hubei ដែលជាតំបន់មួយត្រូវបានគេចាត់ទុកថា ជាស្នូលនៃសម្បុកវីរុសកូរ៉ូណានៅប្រទេសចិន។

ប្រធានាធិបតីចិន លោក ស៊ី ជីនពីង កាលពីថ្ងៃទី19កុម្ភៈ បានអំពាវនាវឱ្យបង្កើនវិធានការការពារក្រុមបុគ្គលិកពេទ្យដែលកំពុងប្រយុទ្ធប្រឆាំងនឹងអាសន្នរោគកូរ៉ូណា COVID-19 បន្ទាប់ពីមានវេជ្ជបណ្ឌិតជាច្រើនរូប បានស្លាប់ដោយសារឆ្លងមេរោគនេះ។ នេះបើតាមទីភ្នាក់ងារសារព័ត៌មានសិង្ហបុរី CNA។

បុគ្គលិកសុខាភិបាលជាង30,000នាក់ មកពីគ្រប់ទិសទីក្នុងប្រទេសចិន រួមទាំងបុគ្គលិកពេទ្យយោធាផងដែរ ត្រូវបានបញ្ជូនទៅកាន់ “សមរភូមិ” Wuhan និងខេត្ត Hubei ដើម្បីជួយប្រយុទ្ធប្រឆាំងនឹងអាសន្នរោគកូរ៉ូណា។ ទោះជាយ៉ាងនេះក្ដី ក្រុមគ្រូពេទ្យនៅតែត្រូវរងសម្ពាធធ្ងន់ធ្ងរ ដោយសារតែអ្នកជំងឺមានចំនួនច្រើនខ្លាំងពេក។

គិតមកដល់ព្រឹកថ្ងៃទី25កុម្ភៈនេះ ប្រទេសចិន មានអ្នកស្លាប់ដោយសារអាសន្នរោគកូរ៉ូណាឡើងដល់2,663នាក់ និងជាង77,658នាក់បាន និងកំពុងផ្ទុកមេរោគនេះ។

ប្រទេសចិនកំពុងខ្វះខាតសម្ភារវេជ្ជសាស្ត្រជាច្រើនដូចជា ម៉ាស់ និងឈុតសម្លៀកបំពាក់ការពារការឆ្លងមេរោគជាដើម។ ពួកគេខ្លះទៀតក៏ត្រូវប្រើប្រាស់ឈុតការពារមេរោគច្រើនដង ឬប្រើសម្ភារដែលមិនធានាដល់សុវត្ថិភាព ហើយបន្តធ្វើការក្នុងពេលដែលខ្លួនចាប់ផ្ដើមមានអាការខុសប្រក្រតីទាក់ទិននឹងផ្លូវដង្ហើម៕

ប្រភព៖ សារព័ត៌មានបរទេស

February 25, 2020

កូរ៉េខាងត្បូងមានអ្នកផ្ទុកមេរោគ COVID-19 ជិត900នាក់ ក្នុងនោះអ្នកស្លាប់កើនដល់…

កូរ៉េខាងត្បូងមានអ្នកស្លាប់បន្ថែមចំនួន2នាក់ទៀតហើយ ដោយសារមេរោគកូរ៉ូណា ដែលនេះបានធ្វើឱ្យចំនួនអ្នកស្លាប់សរុបឡើងដល់9នាក់ ក្នុងពេលដែលអ្នកមានផ្ទុកមេរោគនេះ កើនដល់893នាក់ ក្នុងនោះមាន60នាក់ទើបតែត្រូវបានរកឃើញថ្មីៗនេះ។

មជ្ឈមណ្ឌលគ្រប់គ្រង និងទប់ស្កាត់ជំងឺរបស់កូរ៉េខាងត្បូង (KCDC) ព្រឹកនេះបានឱ្យដឹងថា តួលេខខាងលើនេះ បង្ហាញអំពីកម្រិតនៃការឆ្លងទាបបំផុតក្នុងអំឡុង4ថ្ងៃកន្លងមក។ កូរ៉េខាងត្បូងក៏មានអ្នកស្លាប់បន្ថែមចំនួន2នាក់ទៀតដែរ ធ្វើឱ្យអ្នកស្លាប់ដោយសារមេរោគកូរ៉ូណានៅប្រទេសនេះ ឡើងដល់9នាក់។

ក្នុងចំណោមអ្នកដែលបានឆ្លងមេរោគថ្មី ក៏មានញាតិរបស់ទាហានអាមេរិកាំងម្នាក់ដែលកំពុងបម្រើការនៅក្នុងជួរកងទ័ពអាមេរិកនៅកូរ៉េខាងត្បូង រួមនឹងទាហានកូរ៉េខាងត្បូង2នាក់ផ្សេងទៀតផងដែរ។ សម្បុកមេរោគធំចំនួន2នៅកូរ៉េខាងត្បូង គឺទីក្រុង Daegu និងទីរួមស្រុក Cheongdo នៃខេត្ត Gyeongsang ខាងជើង បន្តឆ្លងរាលដាលខ្លាំង និងមានផ្ទុកមេរោគនេះច្រើនជាងពាក់កណ្ដាលនៃករណីឆ្លងមេរោគ COVID-19 សរុបក្នុងប្រទេសនេះ។ ខេត្តក្រុងធំៗស្ទើរតែទាំងអស់របស់កូរ៉េខាងត្បូង សុទ្ធតែមានអ្នកផ្ទុកមេរោគកូរ៉ូណា ក្នុងនោះមានរដ្ឋធានី Seoul និងទីក្រុង Busan។

រដ្ឋាភិបាលកូរ៉េខាងត្បូងអះអាងថានឹងប្រើប្រាស់ “វិធានការពិសេស” ដើម្បីទប់ស្កាត់ការឆ្លងរាលដាលនៃមេរោគ រួមទាំងការបន្ថែមថវិកាសម្រាប់កាត់បន្ថយផលប៉ះពាល់របស់អាសន្នរោគ ទៅលើសេដ្ឋកិច្ចជាតិ។

អ្នកជំងឺកូរ៉ូណាជាច្រើននៅកូរ៉េខាងត្បូង មានជាប់ទាក់ទិននឹងវិហារសាសនា Shincheonji នៅឯទីក្រុង Daegu ។ KCDC ឱ្យដឹងថានឹងធ្វើតេស្តរកមេរោគទៅលើសមាជិកទាំងអស់នៃក្រុមសាសនិករបស់វិហារ Shincheonji បន្ទាប់ពីក្រុមនេះព្រមផ្ដល់បញ្ជីឈ្មោះនៃសមាជិករបស់ក្រុមនេះទៅឱ្យអាជ្ញាធរ ក្នុងបំណងទប់ស្កាត់ការឆ្លងរាលដាលនៃមេរោគ COVID-19។

មកដល់ពេលនេះ នៅទូទាំងពិភពលោក មានអ្នកផ្ទុកមេរោគកូរ៉ូណា COVID-19 ជាង80,000នាក់ និងអ្នកស្លាប់ចំនួន2,699នាក់៕

ប្រភព៖ សារព័ត៌មានបរទេស

February 25, 2020

លោក Trump ថា អាមេរិកកំពុងគ្រប់គ្រងអាសន្នរោគកូរ៉ូណាបានល្អ ខណៈអ្នកជំងឺថ្មីកើនឡើង55%

ប្រធានាធិបតីអាមេរិក លោក Donald Trump បានអះអាងថា ទីក្រុង Washington កំពុងគ្រប់គ្រងលើអាសន្នរោគកូរ៉ូណា COVID-19 បានយ៉ាងល្អ ខណៈដែលតួលេខនៃការឆ្លងមេរោគនេះនៅទូទាំងសហរដ្ឋអាមេរិក នៅតែបន្តកើនឡើង។

“វីរុសកូរ៉ូណា កំពុងត្រូវបានគ្រប់គ្រងយ៉ាងល្អនៅអាមេរិក។ យើងកំពុងរក្សាទំនាក់ទំនងជាមួយបណ្ដាប្រទេស និងភាគីពាក់ព័ន្ធ។ មជ្ឈមណ្ឌលទប់ស្កាត់ និងគ្រប់គ្រងរោគអាមេរិក (CDC) រួមជាមួយនឹងអង្គការសុខភាពពិភពលោក ធ្វើការយ៉ាងយកចិត្តទុកដាក់ និងមានភាពឆ្លាតវៃ។ ទីផ្សារមូលបត្រចាប់ផ្ដើមមានសញ្ញាល្អវិញហើយ” នេះបើតាមការរៀបរាប់របស់លោក Donald Trump នៅលើទំព័រ Twitter កាលពីម្សិលមិញ។

ការអះអាងខាងលើរបស់ប្រធានាធិបតីអាមេរិក ត្រូវបានធ្វើឡើងក្នុងពេលទីផ្សារមូលបត្រពិភពលោក កំពុងបាត់បង់ស្ថេរភាព ដោយសារមានការព្រួយបារម្ភអំពីអាសន្នរោគកូរ៉ូណា COVID-19 ខណៈដែលមេរោគបង្កជំងឺរលាកសួតប្រភេទថ្មីនេះ បានឆ្លងរាលដាលទៅដល់ប្រទេស និងដែនដីចំនួន37ក្នុងពិភពលោក។

សារព័ត៌មាន Washington Post របស់អាមេរិក កាលពីម្សិលមិញបានដកស្រង់ប្រភពព័ត៌មានសុំមិនបញ្ចេញឈ្មោះ បានឱ្យដឹងថា ក្នុងពេលដ៏ខ្លីខាងមុខ សេតវិមានអាចនឹងស្នើសុំសភាដើម្បីចំណាយប្រាក់ជិត1ពាន់លានដុល្លារ សម្រាប់បង្កើនសមត្ថភាពទប់ស្កាត់អាសន្នរោគ COVID-19 ដែលមកដល់ពេលនេះ វាបានសម្លាប់មនុស្ស2,699នាក់និង 80,146នាក់ បានផ្ទុកមេរោគនេះ។

Hogan Gedley ដែលជាអ្នកនាំពាក្យរបស់សេតវិមានបានអះអាងថា រដ្ឋាភិបាលត្រូវការថវិកាដើម្បី “ការពារពលរដ្ឋអាមេរិកាំងទាំងមូល” ប៉ុន្តែ អ្នកនាំពាក្យរូបនេះមិនបានបញ្ជាក់អំពីចំនួនទឹកប្រាក់1ពាន់លានដុល្លារដែលសារព័ត៌មានបានលើកឡើងនោះទេ។ លោកស្រី Hogan Gedley បានបន្តថា “ខ្ញុំមិនទាន់ទទួលបានឯកសារទាក់ទិននឹងចំនួនទឹកប្រាក់នៅឡើយ ប៉ុន្តែ យើងត្រូវការប្រយុទ្ធប្រឆាំងនឹងអាសន្នរោគ”។

កាលពីម្សិលមិញ(25កុម្ភៈ) ស្ថាប័ន CDC បានឱ្យដឹងថា សហរដ្ឋអាមេរិក មានអ្នកផ្ទុកមេរោគកូរ៉ូណា COVID-19 ចំនួន53នាក់ ដោយបូករួមទាំងអ្នកជំងឺថ្មីក្នុងប្រទេសនេះ និងពលរដ្ឋដែលបានត្រឡប់មកពីទីក្រុង Wuhan និងនាវាទេសចរណ៍ Diamond Princess។ តួលេខស្ដីអំពីអ្នកផ្ទុកមេរោគកូរ៉ូណានេះ កើនឡើង55% បើធៀបនឹងតួលេខកាលពីថ្ងៃទី22កុម្ភៈ៕

ប្រភព៖ សារព័ត៌មានបរទេស

February 25, 2020

តើចាំបាច់ត្រូវពិនិត្យសុខភាពប្រចាំឆ្នាំដែរឬទេ?

ដោយសារការបំពុលកាន់តែច្រើននៅក្នុងចំណីអាហារដែលយើងទទួលទាន និងខ្យល់បរិយាកាសដែលអ្នកដកដង្ហើម អ្នកចាំបាច់ត្រូវតែការពារខ្លួនអ្នកពីជំងឺមហារីក។ ជំងឺមហារីកសួត ជំងឺមហារីកពោះវៀនធំ ជំងឺមហារីកក្រពេញប្រូស្ដាត ជំងឺមហារីកសុដន់ និងជំងឺមហារីកមាត់ស្បូន កំពុងកើតមានកាន់តែច្រើនឡើងៗពីឆ្នាំទៅមួយឆ្នាំ។

ទង្វើធ្វេសប្រហែលព្រងើយកន្ដើយជាមួយការត្រួតពិនិត្យសុខភាព គឺមានគ្រោះថ្នាក់ខ្លាំង តែប្រសិនបើអ្នកបានពិនិត្យឃើញឆាប់រហ័សគ្រប់គ្រាន់ ជំងឺទាំងនេះអាចព្យាបាលឱ្យជាសះស្បើយបានវិញ។ ជំងឺមហារីកដែលត្រូវបានពិនិត្យឃើញយឺតពេលជាញឹកញាប់ មិនអាចព្យាបាលបានឡើយ ឬអាចទាមទារការព្យាបាលដោយគីមី និងការវះកាត់ធំ ដែលមានការឈឺចាប់ និងការចំណាយខ្ពស់។

នៅពេលដែលអ្នកមានអាយុកាន់តែច្រើន អ្នកចាប់ផ្ដើមមានជំងឺរ៉ាំរ៉ៃ ដូចជា ជំងឺទឹកនោមផ្អែម សម្ពាធឈាមខ្ពស់ និងជាតិកូឡេស្ដេរ៉ូលខ្ពស់ ដែលប្រសិនបើទុកចោលមិនព្យាបាលនឹងបណ្ដាលឱ្យខូចផ្នែកផ្សេងទៀតជាច្រើននៃរាងកាយរបស់អ្នក។ ឧទាហរណ៍ ជំងឺទឹកនោមផ្អែមអាចបណ្ដាលឱ្យពិការភ្នែក ខូចតម្រងនោម គាំងបេះដូង ដាច់សរសៃឈាមក្នុងខួរក្បាល ស្ពឹកដៃជើង និងឆ្លងរោគជាដើម។

អ្នកអាចចាប់ផ្ដើមថែទាំសុខភាពរបស់អ្នកបានតាមរយៈការយកចិត្តទុកដាក់ ការកែប្រែរបៀបដែលអ្នករស់នៅ និងការទទួលទានអាហារ។ តួយ៉ាងហានិភ័យនៃការកើតជំងឺបេះដូង ក៏ដូចជាជំងឺផ្សេងទៀតជាច្រើន អាចត្រូវបានកាត់បន្ថយតាមរយៈការទទួលទានអាហារត្រឹមត្រូវ បន្ថែមលើការហាត់ប្រាណគ្រប់គ្រាន់។ ត្រូវទទួលទានបន្លែ ផ្លែឈើ និងត្រី ឱ្យបានច្រើនជាងមុន។ ចៀសវាងការទទួលទានសាច់ក្រហម អាហារខ្លាញ់ និងអាហារចៀន បំពង។ ត្រូវកាត់បន្ថយទម្លាប់ជក់បារីរបស់អ្នក។ ជំហានទាំងនេះ ក៏នឹងជួយអ្នកក្នុងការកាត់បន្ថយហានិភ័យនៃការកើតជំងឺមហារីកផងដែរ។

ពិនិត្យសុខភាពដើម្បីអ្វី?
រាងកាយមនុស្សម្នាក់ៗប្រៀបដូចជារថយន្តដែលចាំបាច់ត្រូវពិនិត្យពិច័យ ថែរក្សា និងកែតម្រូវឱ្យទាន់ពេលវេលាមុននឹងជំងឺរាតត្បាត ឬធ្ងន់ធ្ងរ ដូច្នេះការពិនិត្យសុខភាពជារឿងសំខាន់ដែលអាចធ្វើឱ្យអ្នក៖
1. ដឹងពីស្ថានភាពសុខភាពរបស់ខ្លួនឯង ថាតើខ្លួនឯងមានសភាពលក្ខណៈធម្មតា ឬខ្វះខាតនូវជីវជាតិ ឬមានឱកាសកើតជំងឺផ្សេងៗ បើធៀបទៅនឹងភេទ អាយុវ័យ និងអាជីព។
2. ជាការថែរក្សាសុខភាពដោយវិធីការពារជាមុន ដឹងលឿនព្យាបាលទាន់ពេល ឬការពារទុកជាមុន អាចជួយកាត់បន្ថយការបាត់បង់មនុស្សជាទីស្រឡាញ់ ការប៉ះទង្គិចសុខភាពផ្លូវចិត្ត ការខាតបង់ពេលវេលា និងទ្រព្យធន។
3. ជាដំណើរនៃការធ្វើឱ្យជីវិតប្រសើរឡើងផ្នែកសុខភាព ថាតើត្រូវបំពេញ និងកាត់បន្ថយអ្វីខ្លះ ដើម្បីឱ្យមានតុល្យភាព និងមានសុខភាពល្អ មានអាយុវែង កាត់បន្ថយបញ្ហាក្នុងក្រុមគ្រួសារ បញ្ហាសេដ្ឋកិច្ច និងជីវភាពគ្រួសារ ទាំងខ្លួនឯង និងគ្រួសារផងដែរ។

ការណែនាំដើម្បីភាពងាយស្រួលមុនពេលពិនិត្យសុខភាព
របៀបគួរដឹង និងត្រៀមខ្លួនមុនពិនិត្យ៖
1. មិនត្រូវបរិភោគទឹក អាហារ និងភេសជ្ជៈគ្រប់ប្រភេទ មុនទទួលការពិនិត្យសុខភាពយ៉ាងតិច 8-10 ម៉ោង។
2. សូមពន្យារការទទួលទានថ្នាំនៅពេលព្រឹករបស់អ្នក រហូតដល់ការបូមឈាមត្រូវបានបពា្ចប់រួចរាល់។
3. មុននឹងទទួលការថតអេកូសាស្ដ្រពិនិត្យ អ្នកចាំបាច់ត្រូវទទួលទានទឹកបីទៅបួនកែវជាមុនសិន។ ចូរកុំបត់ជើងតូចសម្រាប់រយៈពេលប្រហែលមួយម៉ោងមុនពេលថត។
4. សូមកុំលាបឡេបំបាត់ក្លិន ទឹកអប់ ម្សៅ ឬក្រែម នៅក្រោមដៃ ឬទ្រូងរបស់អ្នក ព្រោះវាអាចប៉ះពាល់ទៅដល់គុណភាព នៃការថតឆ្លុះមើលសុដន់។
5. ប្រសិនបើលោកអ្នកត្រូវការធ្វើតេស្ដដោយរត់លើម៉ាស៊ីន សូមយកតាមខ្លួននូវសម្លៀកបំពាក់ និងស្បែកជើងសម្រាប់ផ្លាស់៕

February 25, 2020

អ៊ីតាលី៖ ចំនួនអ្នកឆ្លងមេរោគកូរ៉ូណា COVID-19 កើនឡើងដល់229នាក់ ខណៈអ្នកស្លាប់នៅទូទាំងពិភពលោកកើនដល់2.699នាក់

អ៊ីតាលីបានរកឃើញអ្នកឆ្លងវីរុសកូរ៉ូណាបន្ថែម72នាក់ ធ្វើឱ្យចំនួនអ្នកមានផ្ទុកមេរោគនេះឡើងដល់229នាក់ ប៉ុន្តែក្រុមមន្ត្រីសុខាភិបាលមិនទាន់រកឃើញប្រភពចម្លងដំបូងនៃមេរោគ COVID-19 នេះនៅឡើយ។

មន្ត្រីសុខាភិបាលអ៊ីតាលី កាលពីម្សិលមិញបានឱ្យដឹងថា ប្រទេសនេះមានអ្នកផ្ទុកមេរោគកូរូណាចំនួន229នាក់ ក្នុងនោះមាន7នាក់បានបាត់បង់ជីវិត។ អ្នកជំងឺ101នាក់ផ្សេងទៀតកំពុងទទួលការព្យាបាលក្នុងមន្ទីរពេទ្យ និង27នាក់ទទួលបានការព្យាបាលពិសេស។

តំបន់ Lombardy នៅភាគខាងជើងនៃប្រទេសអ៊ីតាលី មានអ្នកផ្ទុកមេរោគចំនួនដល់ទៅ172នាក់ ក្នុងនោះមាន5នាក់បានស្លាប់។ យ៉ាងហោចណាមានទីរួមស្រុកចំនួន10នៅភាគខាងជើងអ៊ីតាលី ដែលមានប្រជាជនសរុបប្រហែល50,000នាក់ ត្រូវបានអាជ្ញាធរដាក់បម្រាមគោចរចាប់ពីថ្ងៃទី23កុម្ភៈ ដើម្បីទប់ស្កាត់ការឆ្លងរាលដាលនៃមេរោគបង្កជំងឺរលាកសួត COVID-19។

អ៊ីតាលី បច្ចុប្បន្នត្រូវបានគេចាត់ទុកថាជាសម្បុកមេរោគកូរ៉ូណាធំបំផុតលំដាប់ទី4ក្នុងពិភពលោក បន្ទាប់ពីចិន កូរ៉េខាងត្បូង និងនាវាទេសចរណ៍ Diamond Princess។ អាជ្ញាធរតំបន់ Lombardy និង Veneto ដែលជាចំណុចកណ្ដាលនៃមេរោគកូរ៉ូណានៅប្រទេសអ៊ីតាលី បានស្នើឱ្យសាលារៀន ផ្អាកដំណើរការ1សប្ដាហ៍ និងបានបិទទ្វារសារមន្ទីរ រោងភាពយន្ត ព្រមទាំងបានលុបចោលពិធីបុណ្យ Venice ចំនួន2ថ្ងៃចុងក្រោយផងដែរ។

មន្ត្រីអ៊ីតាលី2រូប កាលពីម្សិលមិញបានឱ្យដឹងថា ប្រទេសនេះ មិនទាន់រកឃើញ “អ្នកជំងឺលេខ 0” (ប្រភពចម្លងដំបូងគេដំបូងក្នុងប្រទេសនេះ) នៅឡើយ។ Nott Angelo Borrelli ដែលជាប្រធាននៃគណៈកម្មការការពារពលរដ្ឋរបស់អ៊ីតាលី បានឱ្យដឹងថា “ប្រការដែលសំខាន់គឺត្រូវរកឱ្យឃើញថា តើអ្នកនោះមកពីទីណា ដើម្បីអាចទប់ស្កាត់ការបន្តចម្លងវីរុសពីប្រភពមេរោគនេះ”។

អាសន្នរោគកូរ៉ូណា COVID-19 បានកើនឡើងនៅតំបន់ Wuhan នៃប្រទេសចិន កាលពីខែធ្នូ ឆ្នាំ2019 ហើយបានរាលដាលទៅដល់ប្រទេសចំនួន37ក្នុងពិភពលោក។ គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារអាសន្នរោគនេះ កើនឡើងដល់ 2,630នាក់ និងអ្នកមានផ្ទុកមេរោគនេះកើនដល់ជិត80.000នាក់ ចំណែកអ្នកដែលបានជាសះស្បើយមានចំនួន25,282នាក់៕

ប្រភព៖ សារព័ត៌មានបរទេស

February 25, 2020

ជនជាតិកូរ៉េខាងត្បូង ត្រូវបានប្រទេសជាច្រើន ហាមមិនឱ្យចូលស្រុក

យ៉ាងហោចណាស់មានប្រទេស និងដែនដីចំនួន15ហើយដែលបានហាម ឬកាត់បន្ថយការផ្ដល់ទិដ្ឋាការចំពោះពលរដ្ឋកូរ៉េខាងត្បូង ក្នុងអំឡុងពេលដែលអាសន្នរោគកូរ៉ូណា COVID-19 កំពុងផ្ទុះឆ្លងរាលដាលខ្លាំងនៅក្នុងប្រទេសនេះ។

ទីភ្នាក់ងារសារព័ត៌មាន Yonhap បានចេញផ្សាយថា ប្រទេសអ៊ីស្រាអែលគឺជាប្រទេសមួយក្នុងចំណោមប្រទេសដំបូងៗដែលបានហាមពលរដ្ឋកូរ៉េខាងត្បូងចូលមកប្រទេសរបស់ពួកគេ។ ប្រទេសផ្សេងៗចំនួន5ទៀត ក៏បានចេញបទបញ្ជាដូចគ្នានេះដែរ ក្នុងនោះរួមមានប្រទេសបារ៉ែន ហ្ស៊កដានី គីរីបាទី សាម័រ និងសាម័ររបស់សហរដ្ឋអាមេរិក។

ចាប់ពីថ្ងៃនេះ(24កុម្ភៈ) អ៊ីស្រាអែលបានចាប់ផ្ដើមហាមឃាត់ជនជាតិកូរ៉េខាងត្បូង និងអ្នកដែលធ្លាប់ទៅកាន់ប្រទេសនេះក្នុងអំឡុង2សប្ដាហ៍ចុងក្រោយនេះ។ នៅមុនការចេញបទបញ្ជាខាងលើ អ៊ីស្រាអែលបានតម្រូវឱ្យយន្តហោះនៃក្រុមហ៊ុនកូរ៉េខាងត្បូងមួយគ្រឿងដែលដឹកអ្នកដំណើរ180នាក់ ក្នុងនោះមានជនជាតិកូរ៉េខាងត្បូង130នាក់ ត្រូវបកក្បាលត្រឡប់ក្រោយខណៈយន្តហោះនេះចុះចតនៅឯទីក្រុង Tel Aviv កាលពីថ្ងៃទី22កុម្ភៈ។

អ៊ីស្រាអែលមានការព្រួយបារម្ភខ្លាំងនៅពេលទទួលបានព័ត៌មានថា ជនជាតិកូរ៉េខាងត្បូងមួយក្រុមដែលទើបត្រឡប់មកដល់អ៊ីស្រាអែល ត្រូវបានគេរកឃើញថាមានផ្ទុកមេរោគកូរ៉ូណា COVID-19។ ក្រៅពីហាមជនជាតិកូរ៉េខាងត្បូង ប្រទេសអ៊ីស្រាអែលក៏បានហាមអ្នកទាំងឡាយណាដែលធ្លាប់ទៅកាន់ប្រទេសចិន ជប៉ុន ហុងកុង ម៉ាកៅ ប្រទេសថៃ និងសិង្ហបុរីផងដែរ។

ប្រទេសបារ៉ែនក៏បានចេញបទបញ្ជាហាមមិនឱ្យជនជាតិកូរ៉េខាងត្បូង និងអ្នកដែលធ្លាប់ទៅកាន់ប្រទេសនេះ ចូលមកប្រទេសខ្លួនផងដែរ។ ពលរដ្ឋកូរ៉េខាងត្បូងដែលមានលិខិតស្នាក់នៅស្របច្បាប់អាចអនុញ្ញាតឱ្យចូលប្រទេសនេះ ប៉ុន្តែត្រូវត្រួតពិនិត្យសុខភាព និងតម្រូវឱ្យនៅដាច់ដោយឡែករយៈពេលច្រើនថ្ងៃ។

ខណៈនេះដែរ ប្រទេសសាម័រ ក៏បានហាមមិនឱ្យចូលប្រទេសខ្លួន ចំពោះជនជាតិកូរ៉េខាងត្បូង ចិន ជប៉ុន និងពលរដ្ឋសិង្ហបុរីទាំងឡាយណាដែលមិនមានលិខិតបញ្ជាក់ថាពួកគេធ្លាប់បានដាក់ឱ្យនៅដាច់ដោយឡែកយ៉ាងតិច2សប្ដាហ៍។ រីឯកោះសាម័ររបស់សហរដ្ឋអាមេរិកវិញ ក៏អនុវត្តវិធានការប្រហាក់ប្រហែលនេះដែរ ដោយតម្រូវឱ្យអ្នកទេសចរដែលចូលមកតំបន់នេះ ត្រូវតែបង្ខាំងខ្លួននៅដាច់ដោយឡែកចំនួន14ថ្ងៃជាមុននៅលើកោះហាវ៉ៃ។

ប្រទេសប្រ៊ុយណេ អង់គ្លេស តូមិននីស្ថាន កាហ្សាក់ស្ថាន អេត្យូពី និងអ៊ូហ្គង់ដា ក៏បានចាប់ផ្ដើមរឹតបន្តឹងចំពោះភ្ញៀវទេសចរមកពីកូរ៉េខាងត្បូង និងបណ្ដាប្រទេសដែលមានអ្នកជំងឺកូរ៉ូណាច្រើន ខណៈដែលប្រទេសអូម៉ង់នឹងបង្ខាំងអ្នកទេសចរកូរ៉េខាងត្បូង ចិន អ៊ីរ៉ង់ និងសិង្ហបុរីចំនួន14ថ្ងៃ នៅពេលពួកគេចូលដល់ប្រទេសនេះ។

ក្រៅពីនេះ ប្រទេសកាតា ប្រទេសម៉ូរីស(នៅអាហ្វ្រិកខាងកើត) និងទីក្រុងម៉ាកៅក៏បានរឹតបន្តឹងចំពោះអ្នកទេសចរកូរ៉េខាងត្បូងផងដែរ។ នេះបើតាមសារព័ត៌មាន Yonhap។

សកម្មភាពខាងលើត្រូវបានធ្វើឡើងបន្ទាប់ពីចំនួនអ្នកឆ្លងមេរោគកូរ៉ូណា COVID-19 នៅកូរ៉េខាងត្បូង បានកើនឡើងយ៉ាងឆាប់រហ័ស ពី30នាក់កាលពីថ្ងៃទី17កុម្ភៈ ឡើងដល់833នាក់គិតមកដល់ថ្ងៃទី24កុម្ភៈ ឆ្នាំ2020នេះ។ កូរ៉េខាងត្បូងក៏មានអ្នកស្លាប់ចំនួន8នាក់ហើយដែរ៕

ប្រភព៖ សារព័ត៌មានបរទេស

February 24, 2020

សែនរន្ធត់! វីរុស COVID-19 ប្រហារជីវិត “គ្រូពេទ្យចិន” អស់ 2នាក់ទៀតហើយ…

អ្នកស្រីវេជ្ជបណ្ឌិត សៀ ស៊ឺស៊ឺ អាយុ 29ឆ្នាំ ជំនាញផ្នែកប្រព័ន្ធរំលាយអាហារប្រចាំមន្ទីរពេទ្យក្នុងទីក្រុងវូហាន ដែលទទួលព្យាបាលអ្នកឆ្លងមេរោគ COVID-19 បានស្លាប់បាត់បង់ជីវិតដោយសារការឆ្លងមេរោគដ៏សាហាវនេះ កាលពីថ្ងៃអាទិត្យម្សិលមិញ។

អ្នកស្រីវេជ្ជបណ្ឌិត សៀ បានឆ្លងមេរោគ COVID-19 ខណៈធ្វើការនៅក្នុងមន្ទីរពេទ្យ យូនៀន ចៀងពេយ ដោយអ្នកស្រីចាប់ផ្ដើមទទួលការព្យាបាលតាំងពីថ្ងៃទី19 មករា និងត្រូវបានបញ្ជូនទៅព្យាបាលបន្តនៅមន្ទីពេទ្យ ចុងណាន របស់មហាវិទ្យាល័យវូហាននៅថ្ងៃទី7 ខែកុម្ភៈ។

ប៉ុន្តែអាការជំងឺរបស់អ្នកស្រី សៀ បានធ្លាក់ដុនដាបខ្លាំង រហូតដល់បាត់បង់ជីវិតនៅព្រឹកថ្ងៃអាទិត្យទី23 កុម្ភៈម្សិលមិញ ទោះជាក្រុមគ្រូពេទ្យខំព្យាយាមជួយជីវិតអ្នកស្រីយ៉ាងអស់ពីសមត្ថភាពយ៉ាងណាក្ដី។ មន្ទីរពេទ្យ យូនៀន ចៀងពេយ បានសម្ដែងក្ដីអាឡោះអាល័យចំពោះការលាចាកពិភពលោក និងបានសម្ដែងការសោកស្ដាយចំពោះគ្រួសាររបស់អ្នកស្រី សៀ ផងដែរ។

នៅក្នុងថ្ងៃជាមួយគ្នា របាយការណ៍របស់សារព័ត៌មានស៊ីនហួ ក៏បានរាយការណ៍បន្ថែមដែរថា លោកវេជ្ជបណ្ឌិត ទូ សៀនស៊ឹង វ័យ 55ឆ្នាំ បានស្លាប់ដោយសារមេរោគ COVID-19 ដូចគ្នា នៅក្នុងមន្ទីរពេទ្យប្រជាជន ក្នុងទីក្រុង ហៃខូ ទីក្រុងចម្បងរបស់មណ្ឌល ហៃណាន។

លោក ទូ ជាវេជ្ជបណ្ឌិតប្រចាំមន្ទីរពេទ្យ យ៉ាងចៀង ក្នុងស្រុកឆៀងចុង លោកបានទទួលការវិនិច្ឆ័យរោគថា បានឆ្លងមេរោគវីរុស នៅខែមករា ខណៈប្រតិបត្តិភារកិច្ចក្នុងមន្ទីរពេទ្យ មុននឹងត្រូវបញ្ជូនទៅមន្ទីពេទ្យប្រជាជន នៅទីក្រុងហៃខូ ដើម្បីព្យាបាលបន្ត។ តែយ៉ាងណាក្ដី អាការរបស់លោក ទូ បានធ្លាក់ចុះទ្រុឌទ្រោមខ្លាំងនៅថ្ងៃទី26 ខែមករា និងបានស្លាប់នៅថ្ងៃទី23 កុម្ភៈ(ថ្ងៃអាទិត្យមិ្សលមិញ) ទោះបីជាក្រុមវេជ្ជបណ្ឌិតខំព្យាយាមជួយស្រោចស្រង់ជីវិតរបស់លោកយ៉ាងអស់ពីសមត្ថភាពហើយក៏ដោយ។

ទាំងអស់នេះ អង្គភាពសាធារណៈសុខាភិបាលរបស់ចិន បានកំណត់ឱ្យអង្គភាពសាធារណៈសុខាភិបាលក្នុងតំបន់សហការជាមួយអង្គភាពកិច្ចការអតីតយោធា ដើម្បីធ្វើការប្រកាសគុណបំណាច់កិត្តិយសរបស់ធនធានបុគ្គលិកសុខាភិបាលដែលបានពលីជីវិត លើកទឹកចិត្ត និងជួយដល់ក្រុមគ្រួសាររបស់អ្នកស្លាប់៕

ប្រភព៖ សារព័ត៌មានស៊ីនហួ

February 24, 2020

កូរ៉ូណា! វៀតណាមស្នើឱ្យឈប់ចាប់ដៃគ្នានៅពេលស្វាគមន៍ ខណៈអនុសាសន៍ជាច្រើនផ្សេងទៀតត្រូវបានលើកឡើងដើម្បី…

ក្រសួងសុខាភិបាលវៀតណាម កាលពីថ្ងៃទី23កុម្ភៈ បានស្នើឱ្យអ្នករកស៊ី និងអ្នកធ្វើការជាដើម កាត់បន្ថយការចាប់ដៃគ្នាជាមួយអតិថិជននៅពេលស្វាមគន៍ ឬលាគ្នា ហើយពេលជួបភ្ញៀវក៏ត្រូវតែឈរឱ្យឆ្ងាយពីគ្នាប្រហែល1ម៉ែត្រ។

អនុសាសន៍ខាងលើនេះ ត្រូវបានក្រសួងសុខាភិបាលវៀតណាមធ្វើឡើងដើម្បីទប់ស្កាត់ និងប្រឆាំងការរីករាលដាលនៃមេរោគបង្កជំងឺរលាកសួតប្រភេទថ្មី COVID-19។ អនុសាសន៍នេះ សំដៅទៅលើអ្នកធ្វើការ អ្នករកស៊ីទាំងអស់ ពិសេសគឺបុគ្គលិកនៅសណ្ឋាគារ ភោជនីយដ្ឋាន មជ្ឈមណ្ឌលពាណិជ្ជកម្ម និងតំបន់ទេសចរណ៍ជាដើម។

ក្រសួងក៏បានណែនាំឱ្យអ្នកធ្វើការ និងអ្នករកស៊ីទាំងអស់ ត្រូវវាស់កម្ដៅខ្លួន មុនពេលចេញទៅបំពេញភារកិច្ច។ បើសិនក្ដៅខ្លួនខ្លាំង ឬក្អក ថប់ដង្ហើម ត្រូវតែប្រញាប់រាយការណ៍ទៅអ្នកគ្រប់គ្រងបុគ្គលិក និងមន្ត្រីសុខាភិបាល ហើយត្រូវនៅដាច់ដោយឡែកក្នុងផ្ទះ ដើម្បីតាមដានសុខភាព។ ពេលចាំបាច់ អ្នកដែលមានអាការដូចខាងលើនេះ ត្រូវតែប្រញាប់ទៅកាន់មន្ទីរពេទ្យដែលនៅក្បែរបំផុត ដើម្បីពិនិត្យពិគ្រោះយោបល់ និងព្យាបាលឱ្យទាន់ពេលវេលា។ អ្នកដែលត្រូវបានសង្ស័យថាមានផ្ទុកមេរោគ ត្រូវតែនៅក្នុងផ្ទះ និងនៅដាច់ដោយឡែកទៅតាមការស្នើរបស់មន្ត្រីសុខាភិបាល។

អ្នកដែលធ្វើការនៅកន្លែងដែលមានមនុស្សច្រើន ឬត្រូវជួបអតិថិជន ពួកគេត្រូវតែពាក់ម៉ាស់ឱ្យបានត្រឹមត្រូវ និងកាត់បន្ថយការចាប់ដៃឱ្យបានជាអតិបរមា និងឈរ ឬអង្គុយឆ្ងាយពីអតិថិជនឱ្យបាន1ម៉ែត្រ ហើយត្រូវលាងដៃនឹងសាប៊ូ និងទឹកស្អាតឱ្យបានញាប់ញាប់នៅមុនពេលធ្វើការ ក្រោយម៉ោងសម្រាក និងមុន និងក្រោយការទទួលទានអាហារ មុននិងក្រោយការចម្អិនអាហារ ក្រោយពីចូលបន្ទប់ទឹក ក្រោយពីក្អក កណ្ដាស់ ពេលដៃបែកញើស ឬប្រឡាក់អ្វីមួយ និងក្រោយពីនៅក្បែរ ឬចាប់ដៃអ្នកណាម្នាក់។

ពេលកណ្ដាស់ ឬក្អក ត្រូវបិទមាត់ និងច្រមុះដោយប្រើដៃអាវត្រង់សន្លាក់កែងដៃខាងក្នុង ក្រដាស់ជូតមាត់ ឬកន្សែងដៃជាដើម ដើម្បីកាត់បន្ថយការជះកម្ទេចជាតិរាវចេញពីផ្លូវដង្ហើម ហើយត្រូវបោះក្រដាស់នោះចោលទៅក្នុងធុងសម្រាមភ្លាមៗ ឬបោកសម្អាតកន្សែងដៃដែលបានប្រើហើយនោះ និងលាងសម្អាតដៃដើម្បីកម្ចាត់មេរោគ។ ត្រូវចៀសវាងការយកដៃទៅប៉ះមាត់ ច្រមុះ និងភ្នែកដើម្បីកុំឱ្យឆ្លងមេរោគ។ មិនត្រូវប្រើប្រាស់របស់រួមមួយចំនួនដូចជា កែវទឹក ដបទឹក កន្សែងជូតដៃ។ល។ និងមិនត្រូវខាកស្ដោះគ្មានរបៀប។

នៅពេលខ្លួនឯង ឬអ្នករួមការងារ ឬមួយអតិថិជន មានអាការក្ដៅខ្លួន ក្អក ពិបាកដកដង្ហើម អ្នកត្រូវតែរាយការណ៍ទៅកាន់អ្នកគ្រប់គ្រងដើម្បីបានទទួលយោបល់ និងព្យាបាលទាន់ពេលវេលាន។

នៅឯប្រទេសវៀតណាម ក្រុមហ៊ុន និងរោងចក្រជាដើម ក៏ត្រូវបានអាជ្ញាធរស្នើឱ្យផ្ដល់ម៉ាស់ដល់បុគ្គលិកឱ្យបានគ្រប់ៗគ្នាផងដែរ។

គិតមកដល់ពេលនេះ ប្រទេសវៀតណាម មានអ្នកឆ្លងមេរោគសរុបចំនួន16នាក់ ក្នុងនោះមាន14នាក់បានជាសះស្បើយ។ ចំណែកនៅទូទាំងពិភពលោកវិញ មានអ្នកផ្ទុកមេរោគ COVID-19 ចំនួន79,360នាក់ អ្នកស្លាប់មានចំនួន2,619នាក់ និងអ្នកបានជាសះស្បើយមានចំនួន24,963នាក់៕

ប្រភព៖ សារព័ត៌មានបរទេស

February 24, 2020

Category: សុខភាព