សុខភាព - La Reine Media

អ្នកវិទ្យាសាស្ត្រព្រមាន មេរោគ COVID-19 អាចនឹងទប់ទល់មិនឈ្នះ មនុស្សជាតិអាចឆ្លងមេរោគនេះ 70% និងស្លាប់ពី 10-100លាននាក់

បណ្ដាញអ្នកសារព័ត៌មាន បានរាយការណ៍កាលពីថ្ងៃទី26 កុម្ភៈម្សិលមិញថា The Atlantic បានបោះពុម្ពផ្សាយអត្ថបទយោងតាមអ្នកជំនាញខាងផ្នែកជំងឺឆ្លងវិទ្យា នៃមហាវិទ្យាល័យហាវ៉ាដ សហរដ្ឋអាមេរិកដែលបានព្រមានថា ការឆ្លងរាលដាលរបស់មេរោគវីរុស COVID-19 ដែលបានចម្លងមេរោគទៅមនុស្សជាង 80,000នាក់ និងមានអ្នកស្លាប់រួចទៅហើយចំនួនជិត 3,000នាក់នោះ អាចនឹងមិនអាចគ្រប់គ្រងបាន។

ក្រៅពីនេះ អត្ថបទនោះនៅបានបង្ហើបឱ្យដឹងទៀតថា ទោះជាគ្រូពេទ្យនៅប្រទេសចិន អ៊ីរ៉ង់ អ៊ីតាលី និងប្រទេសជាច្រើនទៀតកំពុងព្យាយាមយ៉ាងខ្លាំងក្លាក្នុងការពិនិត្យរកអ្នកឆ្លងមេរោគ និងបង្ខាំងពួកគេទាំងនោះក៏ដោយ តែនៅទីបំផុតទៅ មេរោគនេះក៏នៅតែឆ្លងរាលដាល និងចម្លងទៅប្រជាជននៅទូទាំងពិភពលោកក្នុងចំណែកប្រមាណជា 40-70%ក្នុងអំឡុងដំណាច់ឆ្នាំនេះ។

“ខ្ញុំគិតថា លទ្ធផលដែលចេញមក វាអាចទៅរួចខ្លាំងជាងដែលថា ទីបំផុតទៅ ពិភពលោកនឹងមិនអាចគ្រប់គ្រងមេរោគនេះបាន” ម៉ាក លិបស៊ិតឆ៍ អ្នកជំនាញខាងជំងឺឆ្លងវិទ្យាបានបញ្ជាក់ប្រាប់ The Atlantic។ ក្រៅពីនេះ លិបស៊ីតឆ៍ បានបញ្ជាក់ទៀតថា មេរោគវីរុសនេះនឹងឆ្លងរាលដាលបានមួយចំណែក ព្រោះអ្នកឆ្លងមេរោគដែលមានអាការមិនធ្ងន់ធ្ងរនឹងមិនអាចរារាំងមិនឱ្យពួកគេចេញក្រៅផ្ទះទៅធ្វើកិច្ចការងារប្រចាំថ្ងៃបានទេ ទើបធ្វើឱ្យមេរោគវីរុសមានឱកាសចម្លងមេរោគបានច្រើនឡើង ជាពិសេស ចំពោះអ្នកឆ្លងមេរោគជាច្រើនដែលមិនបង្ហាញអាការ។

ខណៈដែលសាស្ត្រាចារ្យ នីលស៍ ហ្គីលមែន មកពី Berggruen Institute បានសរសេរនៅក្នុងបណ្ដាញសង្គមធ្វីតធ្វើរ៍ផ្ទាល់ខ្លួនថា មានភាពអាចទៅរួចដែលថា មនុស្សជាតិនឹងឆ្លងមេរោគនេះ 70% និងបើគិតពីអត្រាការស្លាប់របស់អ្នកឆ្លងមេរោគត្រឹមតែ 1-3% ក៏អាចនឹងមានអ្នកស្លាប់ចាប់ពី 10-100លាននាក់ដែរ។

ទាំងអស់នេះ ទោះជាអ្នកស្លាប់ពីការឆ្លងមេរោគ COVID-19 ភាគច្រើនជាមនុស្សដែលមានអាយុច្រើនស្រាប់ហើយក៏ពិតមែន តែក៏មានអ្នកស្លាប់នៅក្នុងប្រទេសចិន ជាមន្ត្រីពេទ្យដែលមានអាយុនៅតិចដូចគ្នាដែរ៕

ប្រភព៖ សារព័ត៌មានបរទេស

February 27, 2020

ពិភពលោកចាប់ផ្ដើមភ័យញាប់ញ័រ “COVID-19” រាលដាលខ្លាំងនៅក្រៅប្រទេសចិន សរុបទូទាំងពិភពលោក ស្លាប់ 2,801 ឆ្លងមេរោគ 82,164នាក់

ចំនួនអ្នកឆ្លងមេរោគវីរុសកូរ៉ូណាប្រភេទថ្មី ឬ COVID-19 ក្រៅប្រទេសចិនបានកើនឡើង វ៉ាដាច់ចំនួនអ្នកឆ្លងមេរោគថ្មីៗ នៅក្នុងប្រទេសចិនជាលើកដំបូងកាលពីថ្ងៃទី26កុម្ភៈ ម្សិលមិញ ដោយមានប្រទេសអ៊ីរ៉ង់ និងអ៊ីតាលីក្លាយជាចំណុចកណ្ដាលនៃការចម្លងរបស់មេរោគដែលឆាប់រហ័សបំផុត។

នៅប្រទេសអ៊ីតាលី មានរបាយការណ៍ថា ចំនួនអ្នកឆ្លងមេរោគកំណាចនេះបានកើនឡើងចំនួន 400នាក់ ដែលនេះជាការកើនឡើងច្រើនដល់ទៅ 25%ក្នុងអំឡុងពេលត្រឹមតែ 24ម៉ោងប៉ុណ្ណោះ ធ្វើឱ្យអ៊ីតាលីក្លាយជាប្រភពឆ្លងរាលដាលធ្ងន់ធ្ងរបំផុតនៅក្នុងទ្វីបអឺរ៉ុប។

ខណៈដែលមានរបាយការណ៍អំពីអ្នកឆ្លងមេរោគលើកដំបូងកើនថែមឡើង នៅក្នុងប្រទេសជាច្រើនទូទាំងពិភពលោក ដូចជា ប៉ាគីស្ថាន ស៊ុយអែត ន័រវេយ៍ ក្រិក រ៉ូម៉ានី ម៉ាស៊ីដូនៀខាងជើង និងនៅមានរបាយការណ៍អំពីការរកឃើញអ្នកឆ្លងមេរោគដំបូងគេនៅក្នុងតំបន់អាមេរិកឡាទីន ក្នុងប្រទេសប្រេស៊ីលទៀតផង។

សម្រាប់តួលេខនៃចំនួនអ្នកស្លាប់ ថ្មីបំផុត នាថ្ងៃនេះ(27កុម្ភៈ)គឺ 2,801នាក់(ម៉ោង13.30នាទី) ដោយការស្លាប់នៅក្រៅប្រទេសចិនមានច្រើនបំផុត គឺនៅប្រទេសអ៊ីរ៉ង់ 19នាក់, អ៊ីតាលី និងកូរ៉េខាងត្បូងស្លាប់ 12 នាក់ដូចគ្នា, នាវាកម្សាន្ត Diamond Princess 4នាក់, បារាំង ហុងកុង និងជប៉ុន 2នាក់ដូចគ្នា, ហ្វ៊ីលីពីន និងតែវ៉ាន់ ម្នាក់1។

ខណៈដែលចំនួនអ្នកឆ្លងមេរោគវីរុសមរណៈនេះទូទាំងពិភពលោក ស្ថិតក្នុងចំនួន 82,164នាក់ និងអ្នកដែលបានជាសះស្បើយពីការឆ្លងមេរោគដ៏គ្រោះថ្នាក់នេះ ទូទាំងពិភពលោកមានចំនួន 30,496នាក់៕

ប្រភព៖ សារព័ត៌មានបរទេស

February 27, 2020

ចំនួនអ្នកស្លាប់ដោយសារវីរុសកូរ៉ូណានៅប្រទេសចិន កើនឡើងទាបបំផុតក្នុងអំំឡុង1ខែកន្លង ខណៈនៅខាងក្រៅប្រទេសនេះ បានកើនខ្ពស់ជាង

ប្រទេសចិនមានអ្នកស្លាប់បន្ថែមចំនួន29នាក់ដោយសារមេរោគកូរ៉ូណា Covid-19 ក្នុងថ្ងៃទី26មករា ធ្វើឱ្យចំនួនអ្នកស្លាប់សរុបនៅប្រទេសចិន(ចិនដីគោក) ឡើងដល់2,744នាក់។

កាសែត China Daily ដកស្រង់ទិន្នន័យពីគណៈកម្មការសុខាភិបាលចិន បានឱ្យដឹងថា ក្នុងថ្ងៃទី26កុម្ភៈ ប្រទេសនេះមានអ្នកស្លាប់ដោយសារមេរោគកូរ៉ូណាបន្ថែម ចំនួន29នាក់ ក្នុងនោះខេត្ត Hubei មាន26នាក់។ នេះគឺជាតួលេខនៃអ្នកស្លាប់ប្រចាំថ្ងៃដែលមានកម្រិតទាបបំផុត រាប់ចាប់ពីថ្ងៃទី28មករា ធ្វើឱ្យប្រទេសនេះ មានអ្នកស្លាប់សរុបចំនួន2,744នាក់។

ចំនួនករណីឆ្លងមេរោគកូរ៉ូណាបន្ថែមសម្រាប់ថ្ងៃទី26កុម្ភ នៅទូទាំងប្រទេសចិន មានចំនួន433នាក់ ក្នុងនោះ ខេត្តHubei មានចំនួន409នាក់ នាំឱ្យចំនួនអ្នកឆ្លងវីរុស Covid-19 នៅប្រទេសចិន កើនដល់ជិត78,500នាក់។

នៅទូទាំងពិភលោក ចំនួនអ្នកស្លាប់ដោយសារមេរោគបង្កជំងឺរលាកសួតថ្មីនេះ បានកើនដល់2,801នាក់ រីឯចំនួនអ្នកបានឆ្លងមេរោគនេះ ក៏កើនឡើងដល់82,164នាក់ផងដែរ។

យោងតាមអង្គការសុខភាពពិភពលោក(WHO) ការកើនឡើងដល់កម្រិតកំពូលនៃអាសន្នរោគកូរ៉ូណា គឺចាប់ពីថ្ងៃទី23មករា ដល់ថ្ងៃទី2កុម្ភៈ ហើយចាប់ពីក្រោយថ្ងៃនោះ ចំនួនករណីឆ្លង បានថយចុះបន្តិចម្ដងៗ។ ប្រធានអង្គការសុខភាពពិភពលោក(WHO) លោក Tedros Adhanom Ghegreyesus កាលពីថ្ងៃទី26កុម្ភៈ បានថ្លែងថា ជាលើកដំបូងដែលចំនួនអ្នកឆ្លងមេរោគនៅខាងក្រៅប្រទេសចិន មានការកើនឡើងខ្ពស់ជាងប្រទេសនេះ និងជាសញ្ញាបង្ហាញថា អាសន្នរោគបានរាលដាលទូទាំងពិភពលោក។

WHO ឱ្យដឹងថា ចំនួនករណីឆ្លងមេរោគកូរ៉ូណាថ្មីបន្ថែមនៅប្រទេសចិន ក្នុងថ្ងៃទី25កុម្ភៈ គឺមាន411នាក់ ខណៈចំនួនអ្នកឆ្លងមេរោគថ្មីបន្ថែមនៅខាងក្រៅប្រទេសចិន មានចំនួន427នាក់។ លោក Tedros យល់ថា “ការកើនឡើងដ៏ខ្លាំងនៃចំនួនអ្នកឆ្លងនៅតាមបណ្ដាប្រទេសដូចជា អ៊ីតាលី កូរ៉េខាងត្បូង អ៊ីរ៉ង់ជាដើម គឺជាការ “គួរឱ្យព្រួយបារម្ភ”។

ប្រភព៖ សារព័ត៌មានបរទេស

February 27, 2020

ចំនួនអ្នកឆ្លងមេរោគ Covid-19 នៅកូរ៉េខាងត្បូង កើនឡើងលឿនបំផុតមិនធ្លាប់មាន ខណៈនៅទូទាំងពិភពលោកមានអ្នកស្លាប់…

នៅក្នុងព្រឹកនេះ(27មករា) កូរ៉េខាងត្បូងបានប្រកាសឱ្យដឹងថា ប្រទេសនេះបានរកឃើញអ្នកជំងឺកូរ៉ូណាថ្មីចំនួន334ករណីបន្ថែមទៀតហើយ ធ្វើឱ្យអ្នកមានផ្ទុកមេរោគនេះឡើងដល់1,595នាក់ នៅទូទាំងប្រទេស។

សារព័ត៌មាន Yonhap បានចេញផ្សាយ ដោយយោងទៅលើមជ្ឈមណ្ឌលទប់ស្កាត់ និងគ្រប់គ្រងរោគឆ្លងរបស់កូរ៉េខាងត្បូង នាព្រឹកនេះ (27កុម្ភៈ) បានឱ្យដឹងថា ចំនួនអ្នកឆ្លងថ្មីនៅប្រទេសនេះ បានកើនបន្ថែម334នាក់ នាំឱ្យអ្នកមានផ្ទុកមេរោគសរុបឡើងដល់1,595នាក់។ នេះគឺជាតួលេខដែលកើនឡើងខ្ពស់បំផុតមិនធ្លាប់មាន ចាប់ពីអាសន្នរោគនេះបានឆ្លងនៅក្នុងប្រទេសកូរ៉េខាងត្បូង ដែលរាប់ចាប់ពីខែមករាមកដល់នឹងពេលនេះ។ ប្រទេសនេះក៏មានអ្នកស្លាប់ដោយសារមេរោគកូរ៉ូណាចំនួន12ករណីផងដែរ។

ជាងពាក់កណ្ដាលនៃអ្នកជំងឺកូរ៉ូណាដែលទើបបានរកឃើញ គឺមានជាប់ពាក់ព័ន្ធនឹងវិហារសាសនា Shincheonji មួយកន្លែងនៅឯទីក្រុង Daegu។ ជាក់ស្ដែង ក្នុងចំណោមអ្នកជំងឺថ្មី334នាក់នេះ គឺមាន307នាក់ស្ថិតនៅក្នុងតំបន់ Daegu និង4នាក់ទៀតនៅឯខេត្ត Gyeongsang ខាងជើង ដែលតំបន់ទាំងពីរនេះត្រូវបានគេចាត់ទុកថាជាសម្បុកមេរោគកូរ៉ូណាធំបំផុតនៅកូរ៉េខាងត្បូងនាបច្ចុប្បន្ន។ អ្នកជំងឺក្រៅពីនេះ គឺនៅក្នុងខេត្ត និងទីក្រុងផ្សេងៗរបស់កូរ៉េខាងត្បូង ក្នុងនោះក៏មានអ្នកជំងឺកូរ៉ូណា6នាក់នៅក្នុងទីក្រុង Seoul ផងដែរ។

មន្ត្រីសុខាភិបាលកូរ៉េខាងត្បូងបានឱ្យដឹងថា អ្នកជំងឺកូរ៉ូណា Covid-19 ដំបូងគេបង្អស់នៅក្នុងប្រទេសនេះ គឺជាស្ដ្រីជនជាតិចិនម្នាក់ មកពីទីក្រុង Wuhan ដែលជាសម្បុកមេរោគកូរ៉ូណាដំបូង និងធំបំផុតនៅប្រទេសចិន។

កូរ៉េខាងត្បូង បច្ចុប្បន្នគឺជាសម្បុកមេរោគ Covid-19 ធំជាងគេបំផុតក្នុងពិភពលោក បន្ទាប់ពីប្រទេសចិន។

គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារមេរោគកូរ៉ូណា Covid-19 ចំនួន2,799នាក់ និងអ្នកបានឆ្លងមេរោគនេះ មានចំនួន82,152នាក់ រីឯអ្នកដែលបានជាសះស្បើយពីជំងឺនេះ មានប្រមាណជា 32,814នាក់៕

ប្រភព៖ សារព័ត៌មានបរទេស

February 27, 2020

សញ្ញាអាក្រក់ចំពោះសុខភាព មិនមែនគ្រាន់តែជាសញ្ញាគម្រាមលេងៗទេ

មុននឹងកើតរឿងហេតុធំឡើង វាតែងតែមានសញ្ញាប្រកាសអាសន្នប្រាប់ជាមុនមិនខាន ប្រៀបដូចមុននឹងកើតមានព្យុះរលកស៊ូណាមិ គេតែងឃើញមានត្រីសមុទ្រទឹកជ្រៅហែលគេចពីសេចក្តីស្លាប់មកទើលើឆ្នេរខ្សាច់អុីចឹងដែរ ចំណែករោគចង្រៃ និងរោគប្លែកៗដែលកើតឡើង នឹងធ្វើឱ្យយើងភិតភ័យដូចគ្នានឹងគ្រានោះដែរ។ ការពិតទៅ វាមិនមែនជាការវាយលុកចូលមកមិនឱ្យយើងដឹងខ្លួននោះទេ តែដោយសារតែយើងបណ្តាយខ្លួនឱ្យក្លាយជាភ្នាក់ងារទទួលមេរោគដោយខ្លួនឯងទៅវិញទេ។

មុនកើតជំងឺចង្រៃនៅក្នុងរាងកាយយើង វាច្រើនតែមកសម្ងំពង្រីកខ្លួនយ៉ាងរីករាយនៅក្នុងខ្លួនយើងមុនមួយរយៈរួចមកហើយ មិនមែននៅស្ងៀមៗវាកើតឡើងតែម្តងនោះទេ ឧទាហរណ៍ដែលមើលឃើញច្បាស់នោះគឺ ជំងឺមហារីក ទំរាំតែរីកធំឡើងក្លាយជាដុំសាច់ដែលយើងស្ទាបដឹងនោះ វាត្រូវពង្រីកខ្លួនបង្កើតកូនចៅរាប់លានក្បាល រហូតចូលទៅនៅក្នុងសរសៃឈាមបានហើយ ទើបដុះចេញមកជាដុំសាច់ឱ្យយើងមើលឃើញនោះ។សញ្ញាប្រកាសអាសន្នទាំងនេះ លោកអ្នកអាចប្រើការសង្កេតមើលខ្លួនឯងក៏បាន មិនពិបាកឡើយ ដូចជា៖
1-លែងចង់ញ៉ាំអាហារ
2-ចុះស្គមខុសប្រក្រតី (ទម្ងន់ខ្លួនស្រកចុះជាង 2គីឡូក្រាមក្នុង 1ខែ)
3-ឆាប់មួម៉ៅ អារម្មណ៍ងាយប្រែប្រួល
4-ចុករួយតាមរាងកាយគួរឱ្យរំខាន
5-ងឿងក្បាលបែបមិនស្រឡះសោះ
6-មានអាការគ្រុនបែបក្តៅរងាៗ
7-មុខមាត់ត្រចៀកមើលទៅឡើងក្រហម ហាក់ដូចជាមានកម្តៅក្តៅគគុកនៅក្នុងរាងកាយ។

សរុបងាយៗថា បើនៅសុខៗមានភាពប្រែប្រួលដែលមិនធ្លាប់កើតមានកើតឡើង មិនថាតែចំពោះរាងកាយ ឬសូម្បីតែក្នុងអារម្មណ៍ និងផ្លូវចិត្តក៏ដោយនោះ សម្តែងថា ច្បាស់ជាមាន “ហេតុភេទ” មិនល្អអ្វីម្យ៉ាងកើតឡើងហើយ ដូច្នេះវាជាតួនាទីរបស់យើងហើយដែលត្រូវតែស្វែងរក “ជនពាល” នោះឱ្យឃើញយ៉ាងឆាប់រហ័ស កុំបណ្តោយឱ្យវានៅសម្ងំពង្រីកខ្លួនក្នុងរាងកាយរបស់យើងរហូតដល់កើតបញ្ហាធំលែងអាចព្យាបាលបានឱ្យសោះ៕

February 27, 2020

អ៊ីតាលី៖ ចំនួនអ្នកឆ្លងវីរុស Covid-19 កើនដល់453នាក់ អភិបាលក្រុងត្រូវបង្ខាំងខ្លួនឯងដើម្បីការពារការឆ្លងរោគ

អភិបាលតំបន់ Lombardy នៃប្រទេសអ៊ីតាលី បានឱ្យដឹងថា លោកនឹងបង្ខាំងខ្លួនឯងក្នុងរយៈពេល2សប្ដាហ៍ ព្រោះថាសហការីរបស់គាត់ម្នាក់ ស្ថិតក្នុងចំណោមមនុស្ស453នាក់ដែលបានឆ្លងវីរុសកូរ៉ូណានៅអ៊ីតាលី។

នៅក្នុងឃ្លីបវីដេអូមួយដែលត្រូវបានបង្ហោះនៅលើ Facebook កាលពីថ្ងៃទី26កុម្ភៈ លោក Attilio Fontana ដែលជាអភិបាលតំបន់ Lombardy បានឱ្យដឹងថា សមាជិកម្នាក់នៃក្រុមសហការីរបស់គាត់ ត្រូវគេរកឃើញថា មានផ្ទុកមេរោគកូរ៉ូណា Covid-19។ ដូច្នេះ គាត់នឹងបង្ខាំងខ្លួនឯងក្នុងរយៈពេល2សប្ដាហ៍ ដើម្បីចៀសវាងការឆ្លងបន្ត។

លោក Fontana ថ្លែងថា “ចំនួនករណីឆ្លងនៅតែបន្តកើនឡើង វាមិនច្រើនប៉ុន្មាន ប៉ុន្តែគេនៅតែរកឃើញអ្នកជំងឺថ្មីបន្តបន្ទាប់ ហើយសហការីម្នាក់របស់ខ្ញុំ ត្រូវគេពិនិត្យឃើញថាមានផ្ទុកវីរុស”។

លោក Fontana បន្តថា “នោះគឺជាមនុស្សម្នាក់ដែលខ្ញុំតែងធ្វើការជាមួយ ជាមនុស្សឆ្លាតវៃម្នាក់ដែលជួយខ្ញុំបានច្រើន។ សំណាងមិនល្អ នាងបានឆ្លងមេរោគកូរ៉ូណា។ ជាក់ច្បាស់ណាស់ មនុស្សទាំងអស់ក្នុងក្រុម រួមទាំងរូបខ្ញុំផងក៏ត្រូវធ្វើតេស្តរកមេរោគ ហើយលទ្ធផលបង្ហាញថា យើងខ្ញុំមិនទាន់បានឆ្លងមេរោគនៅឡើយ។ យើងនឹងបន្តធ្វើការដើម្បីទប់ស្កាត់ការឆ្លងរាលដាលនៃមេរោគនេះ។ ខ្ញុំត្រេកអរដែលយើងខ្ញុំមិនបានឆ្លងមេរោគ បើទោះយើងខ្ញុំត្រូវបង្ខាំងខ្លួនឯងទៅតាមការណែនាំរបស់មន្ត្រីសុខាភិបាល ព្រោះប្រការនេះនឹងជួយការពារអ្នកដែលធ្វើការជាមួយខ្ញុំ”។

កាលពីយប់ថ្ងៃទី26កុម្ភៈ ប្រទេសអ៊ីតាលីបានបញ្ជាក់ថាប្រទេសនេះមានអ្នកផ្ទុកមេរោគកូរ៉ូណាសរុប400នាក់។ កាលពីយប់ថ្ងៃទី25កុម្ភៈ ប្រទេសនេះ មានអ្នកឆ្លងមេរោគកូរ៉ូណាត្រឹមតែ80នាក់ប៉ុណ្ណោះ។

តំបន់ដែលទទួលរងផលប៉ះពាល់ខ្លាំងបំផុតគឺតំបន់ឧស្សាហកម្មដែលស្ថិតនៅភាគខាងជើងប្រទេសអ៊ីតាលី នោះគឺតំបន់ Lombardy ដែលស្ថិតនៅជុំវិញទីក្រុង Milan និងតំបន់ Veneto ដែលនៅក្បែរ Venice។

ចំនួនអ្នកស្លាប់ដោយសារមេរោគកូរ៉ូណានៅអ៊ីតាលី គិតមកដល់ពេលនេះ មានចំនួន12នាក់។ បច្ចុប្បន្ន អ៊ីតាលីគឺជាប្រទេសដែលមានអ្នកឆ្លងមេរោគខ្ពស់បំផុតលំដាប់ទី4 បន្ទាប់ពីប្រទេសចិន កូរ៉េខាងត្បូង និងជប៉ុន។

អាជ្ញាធរអ៊ីតាលីបានបញ្ចេញវិធានការជាច្រើនដើម្បីទប់ស្កាត់អាសន្នរោគកូរ៉ូណា។ ទីរួមស្រុកចំនួន11នៅក្នុងតំបន់ស្នូលនៃអាសន្នរោគ ដែលមានប្រជាជនចំនួន55,000កំពុងរស់នៅ ត្រូវបានដាក់បម្រាមគោចរ។ ក្រៅពីនេះ អ៊ីតាលីក៏បាន និងកំពុងផ្អាកសកម្មភាពសាលារៀន សកលវិទ្យាល័យ រួមនឹងតំបន់ទេសចរណ៍ល្បីៗ។ល។

ប្រភព៖ សារព័ត៌មានបរទេស

February 27, 2020

ក្រុមហ៊ុនធំៗនៅកូរ៉េខាងត្បូង ផ្ដល់ថវិការាប់ពាន់លានវ៉ុន ជួយដល់បេសកម្មប្រឆាំង និងទប់ស្កាត់កូរ៉ូណា Covid-19

ក្រុមហ៊ុនយក្សជាច្រើនរបស់កូរ៉េខាងត្បូងបានប្រកាសអំពីគម្រោងផ្ដល់ថវិកាបន្ទាន់ដើម្បីជួយដល់បេសកកម្មទប់ស្កាត់ការឆ្លងរាលដាលនៃអាសន្នរោគកូរ៉ូណា Covid-19។

Samsung Group បានឱ្យដឹងថា សាខាក្រុមហ៊ុន Samsung ទាំងអស់របស់ខ្លួននឹងរួមគ្នាផ្ដល់ថវិកាសរុប 30ពាន់លានវ៉ុន (ប្រហែល246លានដុល្លារអាមេរិក) ទៅឱ្យសមាគមសង្គ្រោះគ្រោះមហន្តរាយកូរ៉េ(Korea Disaster Relief Association) ដើម្បីធានាឱ្យបានថាមិនមានការខ្វះខាតសម្ភារ និងឧបករណ៍ការពាររោគចាំបាច់ ដូចជាថ្នាំសម្លាប់មេរោគ ទឹកកម្ចាត់មេរោគសម្រាប់លាងដៃ របស់របរចាំបាច់ប្រចាំថ្ងៃ និងសម្ភារវេជ្ជសាស្ត្រ។ល។

Samsung Electronics រួមនឹងសាខាទាំងអស់របស់ខ្លួន បានបើកកិច្ចប្រជុំក្រុមប្រឹក្សាភិបាលបន្ទាន់មួយដើម្បីធ្វើការអនុម័តទៅលើការចំណាយខាងលើ។

អគ្គនាយករងនៃក្រុមហ៊ុន Samsung Electronics លោក Lee Jae-yong មានប្រសាសន៍ថា “យើងបានរីកចម្រើនដូចសព្វថ្ងៃគឺដោយសារមានការគាំទ្ររបស់អ្នករាល់គ្នា ហើយយើងត្រូវតែចែករំលែកសុខទុក្ខក្នុងគ្រាអាសន្នបែបនេះ”។

ចំណែកក្រុមហ៊ុន Hyundai Motor Group មុននេះ ក៏បានផ្ដល់ថវិកា5ពាន់លានវ៉ុន(4,1លានដុល្លារសហរដ្ឋអាមេរិក) ទៅឱ្យសមគមសង្គ្រោះអ្នករងគ្រោះមហន្តរាយជាតិ(Hope Bridge Association of the National Disaster Relief) ដើម្បីជួយដល់បុគ្គលិកសុខាភិបាល និងផ្គត់ផ្គង់សម្ភារសង្គ្រោះបន្ទាន់ជាដើម។

ភាគី Hyundai Motor Group បាននិយាយថា ជំនួយទាំងនេះត្រូវបានធ្វើឡើងដើម្បីជួយដល់ប្រជាជននៅក្នុងតំបន់ Daegu និងខេត្ត Gyeongsang ខាងជើងដែលកំពុងរងផលប៉ះពាល់ខ្លាំងជាងគេពីអាសន្នរោគនៅកូរ៉េខាងត្បូង។

រីឯ LG Corp ដែលជាអ្នកគ្រប់គ្រងក្រុមហ៊ុន LG Group ក៏បានប្រកាសថានឹងផ្ដល់ជំនួយ5ពាន់លានវ៉ុនទៅឱ្យអង្គការមនុស្សធម៌កូរ៉េ Community Chest of Korea សម្រាប់ចាត់ចែងជួយដល់អ្នកជំងឺកូរ៉ូណា ពិសេសគឺអ្នកជំងឺនៅតំបន់ Daegu និងខេត្ត Gyeongsang ខាងជើង រួមនឹងអ្នកដែលងាយរងគ្រោះ។

ក្រុមហ៊ុន SK Group ឯណោះវិញ ក៏ផ្ដល់ជំនួយ5ពាន់លានវ៉ុនទៅឱ្យអង្គការមនុស្សធម៌កូរ៉េ Community Chest of Korea ដើម្បីជួយដល់ក្រុមអ្នកជំងឺកូរ៉ូណា និងអ្នកដែលត្រូវបានបង្ខាំងឱ្យនៅដាច់ដោយឡែកក្នុងខេត្ត Gyeongsang ខាងជើងផងដែរ។

ក្រៅពីនេះ ក្រុមហ៊ុន Lotte Group ក៏នឹងផ្ដល់ជំនួយដែលមានតម្លៃ1ពាន់លានវ៉ុន ដល់មូលនិធិ ChildFund Korea និងអង្គការ Salvation Army ដើម្បីជួយដល់កុមារ និងមនុស្សចាស់ក្នុងគ្រាកូរ៉េខាងត្បូងកំពុងរងគ្រោះដោយសារមេរោគបង្កជំងឺរលាកសួតប្រភេទថ្មី Covid-19៕

ប្រភព៖ សារព័ត៌មានបរទេស

February 26, 2020

Covid-19៖ កូរ៉េខាងត្បូងរកឃើញអ្នកផ្ទុកមេរោគបន្ថែម284នាក់ក្នុងថ្ងៃនេះ ធ្វើឱ្យចំនួនអ្នកជំងឺសរុបឡើងដល់…

ចំនួនអ្នកជំងឺកូរ៉ូណា (covid-19) នៅប្រទេសកូរ៉េខាងត្បូងត្រូវបានគេព្យាករថានឹងកើនឡើងខ្លាំងបន្ថែមទៀតនៅក្នុងអំឡុងប៉ុន្មានថ្ងៃខាងមុខ បន្ទាប់ពីក្រុមគ្រូពេទ្យបញ្ចប់ការធ្វើតេស្តទៅលើសាសនិកប្រមាណ212,000នាក់របស់វិហារសាសនា Shincheonji។

សារព័ត៌មាន Yonhap បានឱ្យដឹងថា មជ្ឈមណ្ឌលទប់ស្កាត់ និងគ្រប់គ្រងអាសន្នរោគរបស់កូរ៉េខាងត្បូងប្រកាសក្នុងល្ងាចនេះថា ប្រទេសនេះ បានរកឃើញអ្នកផ្ទុកមេរោគកូរ៉ូណាចំនួន115នាក់បន្ថែមទៀត នាំឱ្យចំនួនអ្នកជំងឺនេះកើនឡើងដល់2,261នាក់។

កាលពីព្រឹកមិញ(26កុម្ភៈ) ចំនួនអ្នកឆ្លងមេរោគថ្មីមាន169ករណី ដូច្នេះ សរុបមក ថ្ងៃនេះកូរ៉េខាងត្បូងបានរកឃើញអ្នកផ្ទុកមេរោគកូរ៉ូណា Covid-19 ចំនួន284នាក់។ បច្ចុប្បន្ន ប្រទេសនេះក៏មានអ្នកស្លាប់ដោយសារមេរោគកូរ៉ូណាចំនួន12នាក់ហើយដែរ។

បច្ចុប្បន្ន កូរ៉េខាងត្បូងកំពុងពិនិត្យសុខភាព និងធ្វើតេស្តរកមេរោគទៅលើមនុស្សចំនួនជាង 210,000នាក់ ដែលអ្នកទាំងនេះត្រូវបានគេសង្ស័យថាអាចមានផ្ទុកមេរោគកូរ៉ូណា ដោយសារពួកគេគឺជាសាសនិកនៃវិហារ Shincheonji ដែលវិហារនេះមានអ្នកផ្ទុកមេរោគច្រើនជាងគេក្នុងចំណោមអ្នកផ្ទុកមេរោគសរុបនៅកូរ៉េខាងត្បូង។ ក្រុមអ្នកជំនាញបានព្យាករថា អំឡុងប៉ុន្មានថ្ងៃខាងមុខ កូរ៉េខាងត្បូងនឹងមានអ្នកជំងឺកូរ៉ូណាកើនឡើងច្រើនជាងនេះមិនខាន៕

ប្រភពសារព័ត៌មានបរទេស

February 26, 2020

ទូតរុស្ស៊ីបង្ហើបអំពី “វិធីពិសេស” ដែលកំពុងជួយឱ្យកូរ៉េខាងជើងអាចទប់ស្កាត់វីរុសកូរ៉ូណា COVID-19 បានយ៉ាងល្អ

កូរ៉េខាងជើងកំពុងតែអនុវត្តវិធានការជាច្រើនដែលក្រុមអ្នកការទូតបរទេសយល់ថា “មិនធ្លាប់មានពីមុនមក” ដើម្បីទប់ស្កាត់អាសន្នរោគកូរ៉ូណា COVID-19។

កូរ៉េខាងជើង មកដល់ពេលនេះនៅតែអនុវត្តវិធានការពិសេសៗរបស់ខ្លួនដើម្បីការពារពលរដ្ឋ បន្ទាប់ពីអាសន្នរោគកូរ៉ូណាបានចាប់ផ្ដើមឆ្លងរាលដាលនៅប្រទេសចិន ដែលជាសម្ព័ន្ធមិត្តផ្នែកការទូត និងជាដៃគូពាណិជ្ជកម្មធំបំផុតរបស់ទីក្រុងព្យុងយ៉ាង។

ក្រោយពីអាសន្នរោគកូរ៉ូណាបានកើតឡើងភ្លាម កូរ៉េខាងជើងក៏បានចាប់ផ្ដើមបិទច្រកព្រំដែន និងរក្សាខ្លួននៅដាច់ដោយឡែកពីពិភពលោកខាងក្រៅ។ ឥរិយាបថនេះ ត្រូវបានអ្នកការទូត និងក្រុមអ្នកវិភាគយល់ថា ជាវិធីល្អបំផុតដើម្បីឱ្យកូរ៉េខាងជើងអាចការពាខ្លួនពីអាសន្នរោគកូរ៉ូណា ដែលកំពុងរាតត្បាតពិភពលោក ពិសេសគឺនៅពេលដែលប្រព័ន្ធសុខាភិបាលប្រទេសនេះនៅខ្សត់ខ្សោយ។

ក្រៅពីការបង្កើនពេលវេលាក្នុងការដាក់ឱ្យនៅដាច់ដោយឡែកឡើងដល់30ថ្ងៃចំពោះភ្ញៀវទេសចរបរទេស និងអ្នកដែលត្រូវសង្ស័យថាបានឆ្លងវីរុសកូរ៉ូណា កូរ៉េខាងជើងក៏កំពុងបង្កើនសកម្មភាពទប់ស្កាត់មេរោគនេះពីក្នុងប្រទេសផងដែរ។

សារព័ត៌មានរដ្ឋកូរ៉េខាងជើង(KCNA) បានផ្សាយដំណឹងអំពី “យុទ្ធនាការប្រឆាំងអាសន្នរោគ” របស់ប្រទេសនេះ រួមមានការចុះទៅពិនិត្យសុខភាពដល់គ្រូសារនីមួយៗ និងប្រើប្រាស់រថយន្តបំពាក់ប្រដាប់បំពងសំឡេង ចុះទៅណែនាំប្រជាពលរដ្ឋអំពីការថែទាំសុខភាពដល់ភូមិឋាន នៅទូទាំងប្រទេស។

ចំណែកជនបរទេសដែលកំពុងស្ថិតនៅក្នុងប្រទេសកូរ៉េខាងជើង ក៏ត្រូវប្រឈមនឹងវិធានការតឹងតែងរបស់អាជ្ញាធរផងដែរ។ ជនបរទេសទាំងអស់ដែលកំពុងស្ថិតនៅក្នុងប្រទេសនេះ ត្រូវបានស្នើឱ្យនៅតែក្នុងទីកន្លែងដែលពួកគេស្នាក់នៅតែប៉ុណ្ណោះ។

អ្នកការទូតបរទេសនៅឯទីក្រុងព្យុងយ៉ាង ក៏ត្រូវបានដកហូតសិទ្ធិដើរហើរជុំវិញទីក្រុងផងដែរ។ ឯកអគ្គរដ្ឋទូតរុស្ស៊ីប្រចាំប្រទេសកូរ៉េខាងជើង លោក Alexander Matsegora បានឱ្យដឹងថា បុគ្គលិកទាំងអស់របស់ស្ថានទូតមានសិទ្ធិត្រឹមតែយកសំរាមចេញទៅដាក់ក្នុងធុងនៅខាងក្រៅក្បែរនោះប៉ុណ្ណោះ។ ពេលនោះ ក្រុមអ្នកជំនាញរបស់កូរ៉េខាងជើងនឹងធ្វើការបាញ់ថ្នាំសម្លាប់មេរោគទៅលើរថយន្តដឹកសំរាមនោះភ្លាមនៅនឹងកន្លែងតែម្ដង។

វិហារសាសនា សាលាបង្រៀនក្បាច់គុនតៃក្វាន់ដូ ទីលានជីះស្គីលើកទឹកកក អាងហែលទឹក សាលាគំនូរ សាលាបង្រៀនភាសាកូរ៉េជាដើម សុទ្ធតែត្រូវបានបិទ។

ឯកអគ្គរដ្ឋទូតរុស្ស៊ីបានបន្ថែមថា សកម្មភាពការទូតនៅក្នុងប្រទេសកូរ៉េខាងជើង ហាក់ត្រូវបានផ្អាកទាំងស្រុង ខណៈដែលមិនមានកិច្ចប្រជុំ កិច្ចចរចាណាមួយត្រូវបានធ្វើឡើងជាមួយមន្ត្រីកូរ៉េខាងជើង ឬជាមួយបណ្ដាក្រុមអ្នកការទូតប្រទេសផ្សេងៗ។ ការធ្វើទំនាក់ទំនងជាមួយក្រុមមន្ត្រីកូរ៉េខាងជើង ក៏បានត្រឹមតែនិយាយគ្នាតាមទូរស័ព្ទ ឬការប្រកាសជាផ្លូវការដោយសំបុត្រដែលដាក់នៅក្នុងប្រអប់សំបុត្រពិសេស។

ឯកអគ្គរដ្ឋទូតរុស្ស៊ី មានយោបល់ថា មានតែប្រទេស “គ្មានពីរក្នុងលោក” ដូចជាកូរ៉េខាងជើងប៉ុណ្ណោះ ទើបអាចប្រើវិធានការទប់ស្កាត់អាសន្នរោគបែបនេះដើម្បីដោះស្រាយបញ្ហាមួយដែលត្រូវបានកូរ៉េខាងជើងចាត់ទុកថា “មានសារសំខាន់លំដាប់ជាតិ”។ អ្នកការទូតរុស្ស៊ីរៀបរាប់ថា នោះគឺជាស្ថានភាព “ពិសេស”។

កូរ៉េខាងជើង មកដល់ពេលនេះ នៅតែអះអាងថា កូរ៉េខាងជើងគឺជាប្រទេសជិតខាងតែមួយគត់របស់ចិន ដែលមិនទាន់មានអ្នកឆ្លងមេរោគកូរ៉ូណា សូម្បីតែមួយករណី។

រដ្ឋមន្ត្រីក្រសួងសុខាភិបាលកូរ៉េខាងជើង កាលពីសប្ដាហ៍មុនបានបង្ហាញខ្លួននៅលើកញ្ចក់ទូរទស្សន៍រដ្ឋ អះអាងថា កូរ៉េខាងជើងមិនទាន់មានករណីឆ្លងវីរុសកូរ៉ូណា COVID-19 នៅឡើយ។ ការិយាល័យនៃអង្គការសុខភាពពិភពលោក(WHO) ប្រចាំនៅទីក្រុងព្យុងយ៉ាង ថ្មីៗនេះក៏បានឱ្យដឹងថា ខ្លួនមិនទាន់ទទួលបានរបាយការណ៍ណាមួយស្ដីអំពីអ្នកឆ្លងមេរោគកូរ៉ូណាក្នុងប្រទេសនេះនៅឡើយ។

កាសែត Rodong Sinmun ដែលជាអ្នកនាំពាក្យរបស់បក្សពលករកូរ៉េខាងជើង បានអំពាវនាវឱ្យពលរដ្ឋទាំងអស់ ដាច់ខាតត្រូវតែអនុវត្តទៅតាមការណែនាំពីមន្ត្រីសុខាភិបាល និងមន្ត្រីរដ្ឋការ ក្នុងបេសកកម្មទប់ស្កាត់អាសន្នរោគកូរ៉ូណា។ នេះបើតាមសារព័ត៌មាន AFP។

គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារមេរោគកូរ៉ូណាឡើងដល់2,762នាក់ និង81,005នាក់កំពុងផ្ទុកមេរោគនេះ។ ប្រទេសមួយចំនួនដែលកំពុងរងការរាតត្បាតពីអាសន្នរោគកូរ៉ូណាធ្ងន់ជាងគេគឺ ប្រទេសចិន កូរ៉េខាងត្បូង អ៊ីតាលី ជប៉ុន អ៊ីរ៉ង់ និងសិង្ហបុរី។ល។

ប្រភព៖ សារព័ត៌មានបរទេស

February 26, 2020

អនុរដ្ឋមន្ត្រីក្រសួងសុខាភិបាលអ៊ីរ៉ង់ មានរោគសញ្ញានៃជំងឺកូរ៉ូណា COVID-19 មុនពេលដឹងថាបានឆ្លងវីរុសនេះ(វីដេអូ)

ឃ្លីបវីដេអូមួយដែលត្រូវបានគេបង្ហោះជាសាធារណៈ បានឱ្យឃើញថា អនុរដ្ឋមន្ត្រីក្រសួងសុខាភិបាលអ៊ីរ៉ង់ លោក Iraj Harirchi មានអាការមិនធម្មតាទាក់ទិននឹងសុខភាព នៅមុនពេលគាត់ត្រូវបានគេពិនិត្យឃើញថា មានផ្ទុកមេរោគកូរ់ូណា COVID-19។

កាលពីថ្ងៃទី25កុម្ភៈ សារព័ត៌មានរបស់រដ្ឋអ៊ីរ៉ង់ បានចេញ្ផ្សាយថា អនុរដ្ឋមន្ត្រីក្រសួងសុខាភិបាលអ៊ីរ៉ង់់ លោក Harirchi បានឆ្លងមេរោគកូរ៉ូណាប្រភេទថ្មី COVID-19។ មុននោះ លោក Harirchi បានទៅចូលរួមក្នុងសន្និសីទសារព័ត៌មានរួមជាមួយនឹងអ្នកនាំពាក្យរបស់រដ្ឋាភិបាលអ៊ីរ៉ង់ កាលពីថ្ងៃទី24កុម្ភៈ ដើម្បីប្រកាសអំពីប្រតិកម្មរបស់ប្រទេសនេះទៅនឹងអាសន្នរោគកូរ៉ូណា។

រូបភាពពីឃ្លីបវីដេអូបានបង្ហាញថា អនុរដ្ឋមន្ត្រីសុខាភិបាលរូបនេះ បានយកកន្សែងជូតថ្ងាស និងជូតច្រមុះជាបន្តបន្ទាប់។ កាលណោះ លោក Harirchi ហាក់មានបញ្ហាសុខភាពទៅហើយ ខណៈលោកតែងតែបែកញើសតាំងពីសន្និសីទកាសែតបានចាប់ផ្ដើម រហូតដល់បានបញ្ចប់។

នៅក្នុងសន្និសីទកាសែតនោះ អនុរដ្ឋមន្ត្រីរូបនេះ បានទាត់ចោលរាល់ព័ត៌មានដែលបានចុះផ្សាយថា ប្រទេសនេះមានអ្នកស្លាប់ដោយសារវីរុសកូរ៉ូណាចំនួន50នាក់ នៅឯទីក្រុង Qom។ លោកថែមទាំងបាននិយាយថា នឹងលាឈប់ពីតំណែងប្រសិនបើព័ត៌មាននោះគឺជាការពិត។

ក្រៅពីសន្និសីទកាសែតខាងលើ លោក Harirchi ក៏មានកិច្ចសម្ភាសមួយជាមួយអ្នកយកព័ត៌មាននៃទូរទស្សន៍អ៊ីរ៉ង់ផងដែរ។ ក្នុងកិច្ចសម្ភាស លោកមានអាការក្អកជាច្រើនដង និងតែងយកដៃជូតច្រមុះ។ នេះបើតាមសារព័ត៌មាន RT។

នៅក្នុងព្រឹត្តិការណ៍ទាំងពីរខាងលើ លោកអនុរដ្ឋមន្ត្រីក្រសួងសុខាភិបាលរូបនេះ មិនបានពាក់ម៉ាស់នោះទេ។ បន្ទាប់ពីត្រូវបានពិនិត្យឃើញថាមានផ្ទុកមេរោគកូរ៉ូណា លោក Harirchi ត្រូវបានគេសង្ស័យថា បានចម្លងមេរោគនេះទៅមនុស្សជាច្រើននាក់ដែលធ្លាប់នៅក្បែរគាត់។

ក្រសួងសុខាភិបាលអ៊ីរ៉ង់ កាលពីថ្ងៃទី25កុម្ភៈ បានឱ្យដឹងថា ប្រទេសនេះមានអ្នកស្លាប់ដោយសារមេរោគកូរ៉ូណាចំនួន16នាក់ ខណៈអ្នកមានផ្ទុកមេរោគនេះ ចំនួន95នាក់ និង900នាក់ផ្សេងទៀតកំពុងត្រូវគេសង្ស័យថាបានឆ្លងមេរោគនេះ។ អ៊ីរ៉ង់ បច្ចុប្បន្នគឺជាប្រទេសដែលមានអ្នកស្លាប់ដោយសារវីរុសកូរ៉ូណាច្រើនជាងគេបង្អស់ក្នុងពិភពលោក បន្ទាប់ពីប្រទេសចិន។

គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារអាសន្នរោគកូរ៉ូណា ឡើងដល់ 2,762 នាក់ និងអ្នកមានផ្ទុកមេរោគនេះមានចំនួន81,005នាក់៕

ប្រភព៖ សារព័ត៌មានបរទេស

February 26, 2020

Category: សុខភាព