សុខភាព - La Reine Media

មគ្គុទេសទេសចរខ្មែរ2នាក់ បានឆ្លងវីរុស COVID-19 ខណៈភ្ញៀវ29នាក់របស់ពួកគេក៏មានផ្ទុកមេរោគនេះ

ក្រសួងសុខាភិបាលកម្ពុជា បានប្រកាសឱ្យដឹងថា បានរកឃើញអ្នកឆ្លងវីរុស COVID-19 ថ្មីចំនួន31នាក់បន្ថែមទៀតហើយ នៅថ្ងៃទីយប់នេះ (22 ខែមីនា) ដែលនេះ ធ្វើឱ្យចំនួនអ្នកឆ្លងសរុបនៅក្នុងប្រទេសកម្ពុជា កើនដល់84។

ករណីថ្មីនេះ ភាគច្រើន ត្រូវបានរកឃើញនៅសណ្ឋាគារមួយកន្លែង ជាទីដែលជនជាតិបារាំង2នាក់ឆ្លងដែលបានឆ្លងមេរោគកូរ៉ូណាស្នាក់នៅ។ នេះបើតាមក្រសួងសុខាភិបាលកម្ពុជា។

ក្នុងចំណោមអ្នកឆ្លងមេរោគនេះ មានជនជាតិបារាំង29នាក់ និងជនជាតិខ្មែរ2នាក់។ ជនជាតិបារាំងទាំងនោះ បានទៅស្នាក់នៅខេត្តព្រះសីហនុ រីឯជនជាតិខ្មែរ2នាក់ដែលឆ្លងនោះ គឺជាមគ្គុទេសទេសចរ ឱ្យក្រុមជនជាតិបារាំងទាំងនោះ។ អ្នកជំងឺថ្មីទាំងនេះ កំពុងសម្រាកព្យាបាលក្នុងសណ្ឋាគារមួយ ហើយព័ត៌មានលម្អិត មិនទាន់ត្រូវបានគេឱ្យដឹងទាំងស្រុងនៅឡើយ។

March 22, 2020

ខ្លាចនាយករដ្ឋមន្ត្រីបច្ចុប្បន្នឆ្លងរោគ COVID-19 អង់គ្លេសក៏តែងតាំងអ្នកជំនួសឱ្យហើយ

រដ្ឋមន្ត្រីក្រសួងការបរទេសអង់គ្លេស Dominic Raab ត្រូវបានតែងតាំងឱ្យបំពេញភារកិច្ចជំនួសនាយករដ្ឋមន្ត្រីបច្ចុប្បន្ន ក្នុងករណីលោក Boris Johnson មិនអាចដឹកនាំប្រទេសបាន ដោយសារឆ្លងរោគ COVID-19។

ការិយាល័យនាយករដ្ឋមន្ត្រីអង់គ្លេស ថ្ងៃនេះបានប្រកាសថា រដ្ឋមន្ត្រីការបរទេសអង់គ្លេស Raab ដែលជាអ្នកធ្លាប់ធ្វើតេស្ត2លើក ប៉ុន្តែអវិជ្ជមានជាមួយនឹង COVID-19 ត្រូវបានជ្រើសតាំងជា “នាយករដ្ឋមន្ត្រីបម្រុង” នៃប្រទេសនេះ។ លោក Raab នឹងធ្វើកិច្ចការរបស់នាយករដ្ឋមន្ត្រីអង់គ្លេស ក្នុងករណីដែលលោក Johnson និងក្រុមមន្ត្រីកំពូលៗនៅក្នុងគណរដ្ឋមន្ត្រីរបស់លោក ឆ្លងវីរុស COVID-19។

នាយករដ្ឋមន្ត្រីអង់គ្លេស Johnson មកដល់ពេលនេះមិនទាន់បានធ្វើតេស្តរកមេរោគកូរ៉ូណានៅឡើយ ប៉ុន្តែការតែងតាំងនេះ បានធ្វើឱ្យមានរឿងចម្រូងចម្រាសនៅក្នុងចំណោមអ្នកនយោបាយអង់គ្លេស។

រដ្ឋមន្ត្រីម្នាក់សុំមិនបញ្ចេញឈ្មោះ បានឱ្យដឹងថា “ប្រសិនលោក Boris Johnson មិនអាចបំពេញកិច្ចការ មានមនុស្សជាច្រើនយល់ថា រដ្ឋមន្ត្រីនៃខុទ្ទកាល័យគណរដ្ឋមន្ត្រី (ដែលជាអ្នកគ្រប់គ្រងរាល់គោលនយោបាយនៃខុទ្ទកាល័យទាំងមូល) លោក Michael Gove គួរតែជាអ្នកត្រូវទទួលតួនាទីនេះ មិនមែនលោក Raab នោះទេ។

យោងតាមផែនការថ្មីនេះដែរ ក្នុងករណីជំនួយការរបស់លោក Johnson ដែលជាទីប្រឹក្សាជាន់ខ្ពស់ គឺលោក Dominic Cummings និងនាយកផ្នែកសារព័ត៌មាន Lee Cain បានឆ្លងរោគ COVID-19 ពួកគេនឹងត្រូវបានជំនួសដោយ Isaac Levido ដែលជានាយកផ្នែកយុទ្ធនាការឃោសនារកសំឡេងឆ្នោតរបស់គណបក្សអភិរក្សនិយម Conservative Party នៅក្នុងការបោះឆ្នោតជាតិ ឬ Paul Stephenson ដែលជានាយកផ្នែកសារព័ត៌មានសម្រាប់យុទ្ធនាការរកសំឡេងឆ្នោតក្នុងការបោះឆ្នោត Brexit (ការបោះឆ្នោតមួយដែលទាញប្រទេសអង់គ្លេសចេញពីសហភាពអឺរ៉ុប)។

COVID-19 បានបង្ហាញខ្លួននៅក្នុងប្រទេស និងដែនដីចំនួន188ក្នុងពិភពលោក បន្ទាប់ពីបានឆ្លងរាលដាលនៅក្នុងតំបន់ Wuhan ខេត្ត Hubei នៃប្រទេសចិនកាលពីខែធ្នូ ឆ្នាំ2019 បណ្ដាលឱ្យមនុស្សជាង300,000នាក់កើតរោគ និងជាង13,000នាក់បានស្លាប់ (នៅទូទាំងពិភពលោក)។

បច្ចុប្បន្ន អង់គ្លេសមានអ្នកឆ្លងរោគ COVID-19 ជាង5,000នាក់ ក្នុងនោះមាន240នាក់បានបាត់បង់ជីវិត៕

ប្រភព៖ សារព័ត៌មានបរទេស

March 22, 2020

COVID-19! ស្ថានភាពចុងក្រោយនៃរោគរាតត្បាតនៅប្រទេសថៃ និងវៀតណាម

ប្រទេសថៃ ទើបបានរកឃើញអ្នកផ្ទុកមេរោគកូរ៉ូណា COVID-19 ចំនួន188ករណីបន្ថែមទៀត ខណៈវៀតណាមបានរកឃើញអ្នកជំងឺថ្មីចំនួន12ករណីបន្ថែមទៀតដែរនៅក្នុងថ្ងៃនេះ។

ប្រទេសថៃ

អ្នកនាំពាក្យក្រសួងសុខាភិបាលថៃ Taweesin Wisanuyothin បានឱ្យដឹងថា “ករណីរកឃើញអ្នកផ្ទុកមេរោគកូរ៉ូណា ភាគច្រើននៅក្នុងរាជធានីបាងកក”។

Wisanuyothin បន្ថែមថា ក្នុងចំណោមអ្នកមានផ្ទុកមេរោគ COVID-19 ទាំងអស់ មាន7នាក់កំពុងស្ថិតក្នុងស្ថានភាពធ្ងន់ធ្ងរ 44នាក់បានជាសះស្បើយ និងម្នាក់បានបាត់បង់ជីវិត។

ដើម្បីទប់ស្កាត់ការឆ្លងរាលដាលខ្លាំង ប្រទេសថៃ បានប្រកាសបិទមជ្ឈមណ្ឌលពាណិជ្ជកម្មទាំងអស់នៅក្នុងទីក្រុងបាងកក ចាប់ពីថ្ងៃទី22មីនាដល់12មេសា។ល។ នៅថ្ងៃនេះដែរ កម្ពុជានិងភាគីថៃ ក៏បានសម្រេចបិទច្រកទ្វារព្រំដែននៃប្រទេសទាំងពីរគ្រប់កម្រិតជាបណ្តោះអាសន្ន រយៈពេល14ថ្ងៃ ចាប់ពីថ្ងៃទី23 ខែមីនា ដល់ថ្ងៃទី5 ខែមេសា ឆ្នាំ2020 ផងដែរ។

ក្រៅពីនេះ ប្រទេសថៃក៏បានបន្តបិទសាលារៀន និងក្លិបរាត្រីបន្ថែម22ថ្ងៃទៀត ហើយអ្នកណាដែលបានរំលោភលើបទបញ្ជានេះនឹងត្រូវជាប់ព័ន្ធនាគារ1ឆ្នាំ ឬពិន័យជាប្រាក់100,000បាត (ប្រហែល4,000ដុល្លារអាមេរិក)។ ចំណែកក្រុមហ៊ុនអាកាសចរណ៍ថៃជាច្រើនក៏បានផ្អាកសេវាកម្មផងដែរ។

ប្រទេសវៀតណាម

នៅក្នុងថ្ងៃនេះ ប្រទេសវៀតណាម បានរកឃើញអ្នកផ្ទុកមេរោគ COVID-19 ចំនួន12នាក់បន្ថែមទៀត ក្នុងនោះមានជនជាតិវៀតណាម10នាក់ និងជនជាតិអង់គ្លេស2នាក់។ អ្នកជំងឺដែលទើបតែត្រូវបានរកឃើញនេះ ភាគច្រើនស្ថិតនៅក្នុងទីក្រុងហូជីមិញ។

ប្រទេសវៀតណាមបានធ្វើតេស្តរកវីរុស COVID-19 បានជាង 17,148ករណី និងកំពុងបង្ខាំងដើម្បីតាមដានសុខភាពចំនួនជាង53,000ករណី ក្នុងនោះមាន30.295ករណី កំពុងបង្ខាំងនិងតាមដានសុខភាពនៅឯផ្ទះ ឬកន្លែងស្នាក់នៅរបស់ពួកគេ។

គិតត្រឹមព្រលប់ថ្ងៃទី22មីនានេះ ប្រទេសវៀតណាមមានអ្នកឆ្លងរោគកូរ៉ូណាសរុប 106ករណី ក្នុងនោះមាន17ករណីបានជាសះស្បើយ ជាង90ករណីកំពុងទទួលការព្យាបាល ក្នុងចំណោមនេះ មាន5ករណី កំពុងប្រឈមនឹងការស្លាប់។

នៅទូទាំងពិភពលោក គិតមកដល់ម៉ោងនេះ មានអ្នកឆ្លងរោគ COVID-18 ចំនួន318.254នាក់ ក្នុងនោះមាន96.010នាក់បានជាសះស្បើយ និង13.671នាក់បានបាត់បង់ជីវិត៕

ប្រភព៖សារព័ត៌មានបរទេស

March 22, 2020

កម្ពុជារកឃើញអ្នកផ្ទុកវីរុស COVID-19 ច្រើនជាងគេលំដាប់ទី8 នៅក្នុងតំបន់អាស៊ីអាគ្នេយ៍

នៅយប់ថ្ងៃទី21 ខែមីនាកន្លងទៅ ក្រសួងសុខាភិបាលកម្ពុជា បានប្រកាសឱ្យដឹងថា បានរកឃើញអ្នកផ្ទុកវីរុស COVID-19 ថ្មីចំនួន 2នាក់បន្ថែមទៀត ដូច្នេះ កម្ពុជាមានអ្នកឆ្លងមេរោគកូរ៉ូណាសរុប 53នាក់។

អ្នកឆ្លងវីរុស COVID-19 2នាក់ ដែលទើបត្រូវបានរកឃើញកាលពីថ្ងៃទី21មីនានេះ គឺជាជនជាតិបារាំងទាំង2រូប និងត្រូវបានរកឃើញនៅខេត្តព្រះសីហនុ ហើយបច្ចុប្បន្នត្រូវបានដាក់ឱ្យសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ។ កម្ពុជា បច្ចុប្បន្នជាប្រទេសដែលមានករណីឆ្លងរោគ COVID-19 ច្រើនជាងគេលំដាប់ទី8 បើធៀបនឹងប្រទេសនានាក្នុងតំបន់អាស៊ីអាគ្នេយ៍។

ខាងក្រោមនេះគឺជាតួលេខនៃចំនួនករណីឆ្លង និងស្លាប់ ដោយសាររោគរលាកសួតប្រភេទថ្មី ដែលបង្កឡើងដោយវីរុស COVID-19 ៖

ទី1.ម៉ាឡេស៊ី មានករណីឆ្លង 1.183នាក់ និងស្លាប់ 8នាក់។
ទី2.ឥណ្ឌូនេស៊ី មានករណីឆ្លង 450នាក់ និងស្លាប់ 38នាក់់។
ទី3.សិង្ហបុរី ឆ្លង432នាក់ និងស្លាប់2នាក់។
ទី4.ថៃ ឆ្លង411នាក់ និងស្លាប់1នាក់។
ទី5.ហ្វីលីពីន ឆ្លង380នាក់ និងស្លាប់25នាក់។
ទី6.វៀតណាម ឆ្លង94នាក់ និងស្លាប់0នាក់។
ទី7.ប៊្រុយណេ ឆ្លង83នាក់ និង0នាក់។
ទី8.កម្ពុជា ឆ្លង53នាក់ និងស្លាប់0នាក់។
ទី9.ទីម័រខាងកើត (Timor Leste) ឆ្លង1នាក់ និងស្លាប់0នាក់។
ទី10.ឡាវ មិនទាន់មានករណីឆ្លង ឬស្លាប់នៅឡើយ។
ទី11.មីយ៉ានម៉ា មិនទាន់មានករណីឆ្លង ឬស្លាប់នៅឡើយ។

March 22, 2020

កូនស្រីរបស់លោក Trump ទទួលបានលទ្ធផលនៃការធ្វើតេស្តរកមេរោគរួចហើយ ប៉ុន្តែត្រូវត្រួតពិនិត្យសុខភាពជាប្រចាំ

Ivanka ដែលជាកូនស្រី និងជាទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិក បានត្រឡប់ចូលមកធ្វើការនៅសេតវិមានវិញនៅថ្ងៃទី20មីនា បន្ទាប់ពីទទួលបានលទ្ធផលអវិជ្ជមានជាមួយនឹងវីរុស COVID-19។

លោកស្រី Ivanka បានបង្ខាំងខ្លួន ក៏ដូចជាធ្វើការនៅឯផ្ទះ ចាប់ពីថ្ងៃទី13មីនា ក្រោយពីមន្ត្រីអូស្ត្រាលីម្នាក់លោកស្រីធ្លាប់បានជួបផ្ទាល់ បានឆ្លងមេរោគកូរ៉ូណា COVID-19។ Ivanka មិនមានរោគសញ្ញាអ្វីនោះទេ ប៉ុន្តែបានធ្វើតេស្តរកមេរោគកាលពីសប្ដាហ៍មុន។

“មួយសប្ដាហ៍កន្លងទៅ ទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិក Ivanka Trump បានគោរពយ៉ាងខ្ជាប់ខ្ជួនចំពោះវិធានការចត្តាឡីស័ក (បង្ខាំងខ្លួន និងព្យាបាលនៅដាច់ដោយឡែកពីគេឯង) នៅឯផ្ទះរបស់លោកស្រី” នេះជាប្រសាសន៍របស់មន្ត្រីជាន់ខ្ពស់អាមេរិកាំងម្នាក់សុំមិនបញ្ចេញឈ្មោះ បាននិយាយប្រាប់សារព័ត៌មាន the Hill កាលពីថ្ងៃទី20 ខែមីនាកន្លងទៅ។

មន្ត្រីខាងលើបានបន្តថា “យោងតាមការណែនាំរបស់ក្រុមគ្រូពេទ្យ លោកស្រី (Ivanka) នឹងបន្តធ្វើការនៅឯសេតវិមាន ចាប់ពីថ្ងៃនេះ ដោយសារតែមិនមានរោគសញ្ញា ហើយលទ្ធផលនៃការធ្វើតេស្តជាច្រើនលើក ក៏សុទ្ធតែបង្ហាញថាមិនមានរោគអ្វីនោះដែរ”។

Ivanka ដែលជាកូនស្រី និងជាទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិកមន្ត្រីរូបនោះបញ្ជាក់ថា “ដូចទៅនឹងបុគ្គលិកគ្រប់រូបនៅសេតវិមាន លោកស្រីនឹងត្រូវពិនិត្យកម្ដៅខ្លួន និងសុខភាពជាបន្តទៀត ដើម្បីធានាសុវត្ថិភាពសុខភាពផ្ទាល់ខ្លួន គ្រួសារ និងអ្នកនៅក្នុងសេតវិមាន”។

លោកស្រី Ivanka គឺជាកូនស្រី និងជាទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិក Donald Trump

បុគ្គលិកម្នាក់ធ្វើការនៅក្នុងការិយាល័យរបស់អនុប្រធានាធិតី Mike Pence ដែលជាអ្នកដឹកនាំក្នុងការប្រយុទ្ធប្រឆាំងរោគ COVID-19 បានឆ្លងមេរោគនេះ។ ប៉ុន្តែ លេខាផ្នែកសារព័ត៌មានរបស់អនុប្រធានាធិបតីសហរដ្ឋអាមេរិកឱ្យដឹងថា លោក Trump និងលោក Pence សុទ្ធតែមិនបាននៅក្បែរអ្នកបានឆ្លង COVID-19 ខាងលើនោះទេ។

COVID-19 បានបង្ហាញវត្តមាននៅក្នុងប្រទេស និងដែនដីចំនួន185 នៅទូទាំងពិភពលោក បណ្ដាលឱ្យមនុស្ស 278.557នាក់បានកើតរោគ ក្នុងនោះមាន7.918 ស្ថិតក្នុងស្ថានភាពធ្ងន់ធ្ងរ និង11.554នាក់បានស្លាប់ ខណៈជិត93.000នាក់បានជាសះស្បើយ៕

ប្រភព៖ សារព័ត៌មានបរទេស

March 21, 2020

ទាហានអាមេរិកាំង 2,600នាក់នៅអឺរ៉ុប ត្រូវបានបង្ខាំងឱ្យនៅដាច់ដោយឡែក ខណៈមានករណីឆ្លង COVID-19 ជាច្រើនសិបនាក់

កងទ័ពសហរដ្ឋអាមេរិកប្រចាំនៅទ្វីបអឺរ៉ុប បានស្នើឱ្យទាហាន និងបុគ្គលិកស៊ីវិលរបស់ខ្លួនចំនួន 2,600នាក់ ធ្វើការបង្ខាំងខ្លួនឯង ព្រោះសង្ស័យថា បានឆ្លង COVID-19 ក្នុងចំណោមនោះ មាន35នាក់ បានឆ្លងមេរោគនេះរួចហើយ។

បញ្ជាការដ្ឋានកងទ័ពសហរដ្ឋអាមេរិកប្រចាំនៅអឺរ៉ុប(EUCOM) កាលពីម្សិលមិញបានប្រកាសឱ្យដឹងថា អ្នកទាំងនេះ ដែលកំពុងធ្វើចត្តាឡីស័ក(ដាក់ឱ្យនៅដាច់ដោយឡែក) គឺដើម្បីទប់ស្កាត់ការឆ្លងរាលដាលនៃវីរុស COVID-19។ EUCOM ក៏បានទទួលស្គាល់ថា ទាហានចំនួន35នាក់ ក្នុងចំណោម 2,600នាក់ បានឆ្លងវីរុសកូរ៉ូណា។

មេបញ្ជាការ EUCOM លោក Tod Wolters បានថ្លែងថា ទាហានចំនួន72នាក់របស់កងកម្លាំង EUCOM កំពុងអនុវត្តយ៉ាងម៉ឺងម៉ាត់នូវវិធាននានា ដើម្បីទប់ស្កាត់ការរីករាលដាលនៃមេរោគនេះ។

លោក Tod Wolters មេបញ្ជាការកងទ័ពសហរដ្ឋអាមេរិកប្រចាំតំបន់អឺរ៉ុប (EUCOM)

យោងតាមសេតវិមាន គិតមកដល់ទី20មីនា យ៉ាងហោចមានទាហាន និងបុគ្គលិកស៊ីវិលចំនួន 67នាក់ បានឆ្លងវីរុស COVID-19 កើនឡើងជា3ដង ធៀបនឹងចំនួនអ្នកឆ្លងរោគកាលពីដើមសប្ដាហ៍។ មនុស្ស2នាក់់ដែលកំពុងធ្វើការនៅក្នុងមន្ទីរបញ្ចកោណ(Pentagon) ក៏ត្រូវបានរកឃើញថា មានផ្ទុកវីរុសកូរ៉ូណានេះដែរ។ សរុបមក នៅទូទាំងសហរដ្ឋអាមេរិក មកដល់ពេលនេះ មានអ្នកឆ្លងរោគ COVID-19 ចំនួន19.774នាក់ ក្នុងនោះមាន 275នាក់បានបាត់បង់ជីវិត។

នៅទូទាំងពិភពលោក វីរុស COVID-19 បានសម្លាប់មនុស្សចំនួន 11.419នាក់ ចំណែកអ្នកបានឆ្លងរោគនេះ មានចំនួន 276.698នាក់ ក្នុងនោះមាន7.914នាក់ កំពុងស្ថិតក្នុងស្ថានភាពគ្រោះថ្នាក់ដល់ជីវិត។ រីឯអ្នកដែលបានជាពីជំងឺ មានចំនួន 91.954នាក់៕

ប្រភព៖ សារព័ត៌មានបរទេស

March 21, 2020

COVID-19! បុគ្គលិកសុខាភិបាលអង់គ្លេស ត្រូវយកថង់ផ្លាស្ទិកដាក់សំរាម មកប្រើជំនួសសម្ភារការពាររោគ

ក្រុមបុគ្គលិកពេទ្យដែលជាគិលានុបដ្ឋាយិកានៃមន្ទីរពេទ្យ Northwick Park បានបង្ហើបឱ្យដឹងថា ពួកគេកំពុងតែធ្វើការដោយហួសកម្លាំង ព្រោះតែមានអ្នកជំងឺច្រើនពេក ហើយពួកគេក៏ត្រូវប្រើថង់ផ្លាស្ទិកមកប្រើជំនួសសម្ភារវេជ្ជសាស្ត្រ ដើម្បីការពារខ្លួន។

នៅក្នុងសេចក្ដីប្រកាសមួយដែលផ្ញើទៅកាន់បុគ្គលិករបស់ខ្លួនកាលពីថ្ងៃទី20មីនា មន្ទីរពេទ្យ Northwick Park ដែលមានទីតាំងនៅក្នុងទីក្រុងឡុងដ៍ បានឱ្យដឹងថា មន្ទីរពេទ្យនេះអស់គ្រែពិសេសរលីងហើយ ក្រោយពីចំនួនអ្នកជំងឺដែលឆ្លងវីរុស COVID-19 បានកើនឡើងយ៉ាងឆាប់រហ័ស។ អ្នកជំងឺ6នាក់ បានស្លាប់នៅក្នុងមន្ទីរពេទ្យនេះ និងរាប់សិបនាក់ផ្សេងទៀតកំពុងត្រូវដកដង្ហើមដោយពឹងលើម៉ាស៊ីនជំនួយ។

បុគ្គលិកពេទ្យដែលបានបង្ហើបឱ្យដឹងអំពីបញ្ហាប្រឈមក្នុងមន្ទីរពេទ្យ Northwick Park ខាងលើ បានស្នើសុំម៉ាស់ វ៉ែនតា និងស្រោមដៃ ដោយសារបុគ្គលិកនៅក្នុងមន្ទីរពេទ្យនេះ ត្រូវបង្ខំចិត្តយកថង់ដាក់សំរាម មកគ្របក្បាល និងជើង ព្រោះខ្វះសម្ភារការពារខ្លួន។

បច្ចុប្បន្ន ប្រទេសអង់គ្លេសមានអ្នកផ្ទុកមេរោគ COVID-19 ជិត4,000នាក់ ក្នុងនោះមាន177នាក់បានស្លាប់។ ក្រុមអ្នកតាមដានយល់ថា តួលេខខាងលើនេះ អាចមិនទាន់បង្ហាញអំពីតួលេខពិតនៅឡើយ ព្រោះថា មានតែអ្នកជំងឺនៅក្នុងមន្ទីរពេទ្យប៉ុណ្ណោះដែលត្រូវបានស្រង់ស្ថិតិ។ មន្ត្រីប្រទេសអង់គ្លេសមានការព្រួយបារម្ភថា មនុស្សប្រមាណជា180,000នាក់ ប្រហែលជាបានឆ្លងមេរោគ COVID-19 ខណៈដែលក្រុមអ្នកជំនាញ បានសន្និដ្ឋានថា អ្នកស្លាប់អាចមានដល់ទៅ1,000នាក់។

កាលពីថ្ងៃទី20មីនា ប្រទេសអង់គ្លេសបានស្នើឱ្យអាជ្ញាធរ បិទហាងកាហ្វេ ហាងស្រា ក្លិប KTV ភោជនីយដ្ឋាន កន្លែងប្រគំតន្ត្រី និងមជ្ឈមណ្ឌលកម្សាន្តផងដែរ ដើម្បីទប់ស្កាត់ការឆ្លងរាលដាលកាន់តែខ្លាំងនៃវីរុស COVID-19នេះ៕

ប្រភព៖ សារព័ត៌មានបរទេស

March 21, 2020

វេជ្ជបណ្ឌិតអ៊ីតាលី ឆ្លងវីរុស COVID-19 ហើយស្លាប់ម្នាក់ឯង ខណៈបុគ្គលិកសុខាភិបាលរាប់ពាន់នាក់ផ្សេងទៀតបានឆ្លងមេរោគនេះដែរ

Natali ដែលជាវេជ្ជបណ្ឌិតអ៊ីតាលី1រូប ធ្លាប់ព្យាបាលអ្នកជំងឺកូរ៉ូណារាប់សិបនាក់ ក៏បានបាត់បង់ជីវិត ដោយសារវីរុស COVID-19 ខណៈគាត់កំពុងធ្វើចត្តាឡីស័ក(បង្ខាំងខ្លួនឱ្យនៅដាច់ដោយឡែក) នៅក្នុងបន្ទប់ព្យាបាល។

សហព័ន្ធវេជ្ជបណ្ឌិត និងក្រុមវេជ្ជបណ្ឌិតពហុឯកទេសជាតិអ៊ីតាលី កាលពីម្សិលមិញបានឱ្យដឹងថា វេជ្ជបណ្ឌិត Marcello Natali អាយុ57ឆ្នាំ បានបាត់បង់ជីវិតនៅថ្ងៃទី18មីនា បន្ទាប់ពីបានឆ្លងមេរោគកូរ៉ូណា COVID-19។

វេជ្ជបណ្ឌិតរូបនេះ ធ្វើការនៅក្នុងមន្ទីរពេទ្យទីក្រុង Codogno ខេត្ត Lodi ក្នុងតំបន់ Lombardy ភាគខាងជើងប្រទេសអ៊ីតាលី ជាកន្លែងដែលរោគកូរ៉ូណារាតត្បាតខ្លាំងជាងគេនៃប្រទេសនេះ។ វេជ្ជបណ្ឌិតដែលមានកូន2នាក់រូបនេះ ក៏ធ្លាប់ធ្វើជាលេខាធិការនៃសហព័ន្ធវេជ្ជបណ្ឌិតពហុឯកទេស នៅក្នុងទីក្រុង Lodo និងជាទីប្រឹក្សារបស់ក្រុមគ្រូពេទ្យដទៃ ព្រមទាំងបានព្យាបាលអ្នកជំងឺដែលបានឆ្លងវីរុស COVID-19 រាប់សិបនាក់នៅក្នុងតំបន់ Lodi ផងដែរ។

យោងតាមសារព័ត៌មានអឺរ៉ុប វេជ្ជបណ្ឌិត Natali បានស្លាប់ម្នាក់ឯង ដោយមិនមានអ្នកនៅក្បែរ ខណៈពេលកំពុងបង្ខាំង និងព្យាបាលដាច់ដោយឡែកក្នុងមន្ទីរពេទ្យ។ “ខ្ញុំអស់ទឹកភ្នែកដើម្បីយំទៀតហើយ។ គាត់មិនគួរទទួលលទ្ធផលបែបនេះសោះ” មេដឹកនាំសហព័ន្ធវេជ្ជបណ្ឌិត លោក Silvestro Scotti បានបង្ហោះសារដូច្នេះ នៅលើបណ្ដាញសង្គម Facebook ដើម្បីរំឭកដល់វិញ្ញាណក្ខន្ធមិត្តរបស់ខ្លួន។

នៅមុនពេលត្រូវបានធ្វើតេស្តរកមេរោគ COVID-19 លោកវេជ្ជបណ្ឌិត Natali ធ្លាប់បានបង្ហាញខ្លួននៅលើកញ្ចក់ទូរទស្សន៍ជាលើកចុងក្រោយ ដោយលោកបានលើកឡើងអំពីបញ្ហាប្រឈមមួយចំនួនសម្រាប់ក្រុមគ្រូពេទ្យដែលនៅជួរមុខ។ លោកថ្លែងថា “អស់ស្រោមដៃការពារវត្ថិភាពហើយ។ ប្រាកដណាស់ថា យើងមិនបានត្រៀមខ្លួនរួចរាល់ដើម្បីទប់ទល់នឹងស្ថានភាពនេះ”។

គិតត្រឹមថ្ងៃទី19មីនា លោក Natali គឺជាគ្រូពេទ្យម្នាក់ ក្នុងចំណោមវេជ្ជបណ្ឌិតចំនួន13រូបនៅ “សមរភូមិ” ជួរមុខ ក្នុងប្រទេសអ៊ីតាលី បានស្លាប់ក្នុងពេលកំពុងព្យាបាលអ្នកជំងឺកូរ៉ូណា COVID-19។ ប្រទេសអ៊ីតាលី គឺជាសម្បុកមេរោគធំជាងគេបង្អស់នៅអឺរ៉ុប និងធំជាងគេលំដាប់ទី2 ក្នុងពិភពលោក ដោយមានអ្នកឆ្លងរោគជាង 47,000នាក់ និងជាង 4,000នាក់បានបាត់បង់ជីវិត។ អ៊ីតាលីក៏មានបុគ្គលិកសុខាភិបាលជាង2,600នាក់ បានឆ្លងមេរោគ COVID-19នេះដែរ។

មេរោគបង្កជំងឺរលាកសួតប្រភេទថ្មី COVID-19 បានបង្ហាញខ្លួននៅក្នុងប្រទេស និងដែនដីចំនួន185 នៅទូទាំងពិភពលោក បណ្ដាលឱ្យមនុស្ស 276,104នាក់បានឆ្លងរោគ និង11.402នាក់បាត់បង់ជីវិត៕

ប្រភព៖ សារព័ត៌មានបរទេស

March 21, 2020

តើអ្នកដឹងទេថា វីតាមីនសំខាន់ចំពោះមនុស្សខ្លាំងប៉ុនណា?

តារាស្រីហូលីវូដ ហ៊ីឡារី ស្វ៊ែងក៍ ញ៉ាំវីតាមីនបន្ថែមក្នុង1ថ្ងៃ 45គ្រាប់ ដោយសារតែមកពីការចង់សម្រកទម្ងន់ (Diet) ដូច្នេះទើបកើតមានជាសំណួរមួយឡើងថា តើការញ៉ាំវីតាមីនបន្ថែមនោះសំខាន់ប៉ុនណា? គួរញ៉ាំយ៉ាងណា? តើមនុស្សបែបណាខ្លះដែលគួរញ៉ាំ? និងវីតាមីនជួយអ្វីដល់យើងខ្លះ? ចំពោះរឿងនេះ លោកវេជ្ជបណ្ឌិតជំនាញមានចម្លើយសម្រាប់មិត្តអ្នកអានទាំងអស់។

តើវីតាមីន មានភាពចាំបាច់ចំពោះសុខភាពយ៉ាងណា? អាហារ 5ប្រភេទក្រុមដែលរាងកាយត្រូវការនោះគឺ ខាបូហាយដ្រេត ប្រូតេអុីន វីតាមីន ជាតិខ្លាញ់ និងសារធាតុរ៉ែ ប្រៀបដូចជាថាមពលបញ្ឆេះឱ្យរាងកាយ និងអង់ហ្ស៊ីមផ្សេងៗធ្វើការបានតាមប្រក្រតីដូច្នោះដែរ។

តើវីតាមីនបន្ថែម មានភាពចាំបាច់សម្រាប់អ្នកណាខ្លះ? បើស្ថិតក្នុងស្ថានភាពដែលអាចញ៉ាំបន្លែ និងផ្លែឈើ រួមទាំងញ៉ាំអាហារផ្សេងៗក្នុងចំណែកដែលត្រឹមត្រូវបាននៅឡើយនោះ ក៏មិនមានភាពចាំបាច់អ្វីត្រូវបន្ថែមវីតាមីនទេ លើកលែងតែក្នុងករណីដែលមិនអាចញ៉ាំអាហារបានគ្រប់តាមតម្រូវការដែលរាងកាយត្រូវការ និងស្ថិតក្នុងសភាវដែលរាងកាយត្រូវការវីតាមីនជាពិសេស ដូចជា ពេលឈឺថ្កាត់ និងត្រូវការឱ្យរាងកាយស្វាហាប់ឡើងវិញប៉ុណ្ណោះ។ តែសម្រាប់មនុស្សទូទៅដែលញ៉ាំអាហារបានតាមប្រក្រតី អាចប្រើតិចនិកផ្សេងទៀតដែលនឹងធ្វើឱ្យយើងញ៉ាំបន្លែ និងផ្លែឈើមិនច្រើនជ្រុលពេក ដូចជា កាត់បន្ថយអាហារលាងជាតិពុល ក្នុង 1សប្តាហ៍ 1ដង ឬ 2សប្តាហ៍ម្តងដោយការញ៉ាំផ្លែឈើពេញ 1ថ្ងៃ ដើម្បីឱ្យរាងកាយបានទទួលវីតាមីនពីផ្លែឈើ តែត្រូវមានលក្ខខណ្ឌមួយថា ត្រូវតែជាផ្លែឈើដែលគ្មានជាតិម្សៅ និងរសជាតិដែលមិនផ្អែមខ្លាំងពេក។
អាការខ្វះវីតាមីនរ៉ាំរ៉ៃ ជាសភាវម្យ៉ាងដែលមិនត្រូវបានរាប់ចូលក្នុងក្រុមជំងឺឈឺថ្កាត់ទេ ដូចជាការខ្វះវីតាមីន C នឹងធ្វើឱ្យចេញឈាមតាមជើងធ្មេញ ឬការខ្វះវីតាមីន B1 នឹងធ្វើឱ្យកើតអាការស្ពឹកស្រពន់ជាដើម តែមិនមែនដល់ថ្នាក់ខ្វះវីតាមីន រហូតដល់កើ់តជំងឺនោះទេ គ្រាន់តែអាចមានអារម្មណ៍ថា មិនសូវស្រស់ស្រាយដោយមិនដឹងមូលហេតុ ឬអស់កម្លាំងល្វើយតែប៉ុណ្ណោះ។

យ៉ាងម៉េចទើបហៅថា ការញ៉ាំវីតាមីនដែលត្រឹមត្រូវ? ការញ៉ាំវីតាមីនតាមប្រភេទនីមួយៗក៏ខុសប្លែកពីគ្នាដែរ ដូចជា បេតាឃែរ៉ូធីន គួរជ្រើសរើសយកប្រភេទដែលចម្រាញ់ពីធម្មជាតិទើបប្រសើរជាង។ ចំណែកវីតាមីនច្នៃប្រឌិត ក៏មានចំណុចគួរប្រយ័ត្នដែរ ព្រោះនឹងមានភាពប្រថុយប្រថានក្នុងការកើតជំងឺមហារីកសួតច្រើន។ ចំណែកឯវីតាមីនE ជាវីតាមីនរលាយក្នុងខ្លាញ់ដូចគ្នានឹងវីតាមីន K. A និងD ដែរ តែមានចំណុចកំណត់ថា ថ្នាំ ឬវីតាមីនដែលរលាយក្នុងខ្លាញ់ ងាយនឹងប្រមូលពូនផ្ដុំច្រើនណាស់ ដូច្នេះទើបត្រូវកំណត់បរិមាណក្នុងការទទួលទាន។

តើវីតាមីនជួយអ្វីដល់រាងកាយមនុស្សខ្លះ?
-វីតាមីន A ជួយដល់ការមើលឃើញនៅពេលយប់ និងជួយការពារការឆ្លងមេរោគក្នុងប្រព័ន្ធរំលាយអាហារ ប្រព័ន្ធបន្ទោបង់ទឹកមូត្រ និងប្រព័ន្ធដង្ហើម។
-វីតាមីន B1 សំខាន់ចំពោះសាច់ដុំ ប្រព័ន្ធប្រសាទ និងការធ្វើការរបស់បេះដូង។
-វីតាមីន B12 ចាំបាច់ចំពោះការចម្រើនធំធាត់ ជួយសាងគ្រាប់ឈាមក្រហម និងជំរុញប្រព័ន្ធប្រសាទ។
-វីតាមីន C មានសារធាតុ អ៊ែនទីអុកស៊ីឌែនត៍ ការពារការឆ្លងមេរោគ ធ្វើឱ្យមុខរបួស ឬដំបៅឆាប់ជាសះ និងជួយបឺតជ្រាបសារធាតុដែក តែអ្វីដែលសំខាន់នោះគឺ ជួយផលិតខូឡាជេន ដែលនឹងជួយឱ្យស្បែកតឹងណែនមិនឆាប់ចាស់។
-វីតាមីន E ជួយបំប៉នគ្រាប់ឈាមក្រហម ការពារសួត និងសាច់ភ្នាសផ្សេងៗ៕

March 21, 2020

មនុស្សជាង 11,000នាក់ បានបាត់បង់ជីវិតដោយសារ COVID-19 នៅទូទាំងពិភពលោក

តួលេខស្ដីអំពីអ្នកស្លាប់ដោយសារឆ្លងវីរុស COVID-19 បានកើនឡើងយ៉ាងឆាប់រហ័សនៅអឺរ៉ុប ធ្វើឱ្យចំនួនអ្នកស្លាប់នៅទូទាំងពិភពលោក កើនដល់ 11,357នាក់ នៅក្នុងចំណោមអ្នកជំងឺកូរ៉ូណាសរុប 274,413នាក់។

COVID-19 បានបង្ហាញខ្លួននៅក្នុងប្រទេស និងដែនដីចំនួន185 នៅទូទាំងសកលលោក។ អេស្ប៉ាញ និងអាល្លឺម៉ង់ បានលោតរំលងផុតប្រទេសអ៊ីរ៉ង់ ហើយបានក្លាយជាសម្បុកមេរោគធំបំផុតទី3 និងទី4 ក្នុងពិភពលោក បន្ទាប់ពីប្រទេសចិន និងអ៊ីតាលី។ ចំនួនអ្នកស្លាប់ដោយសារកូរ៉ូណានៅអឺរ៉ុប កើនលើសពី 5,000ករណី។

អ៊ីតាលី ដែលជាសម្បុកមេរោគធំបំផុតនៅអឺរ៉ុប និងធំលំដាប់ទី2នៅលើលោក បានរកឃើញអ្នកជំងឺ COVID-19 សរុប 47,021នាក់ ក្នុងនោះ 4,032នាក់បានស្លាប់។ អត្រានៃការស្លាប់គឺ 8.5% ខ្ពស់ជាងទ្វេដង ធៀងនឹងអត្រាមធ្យម 4.1% នៅទូទាំងពិភពលោក។ កត្តាចម្បងដែលនាំឱ្យមានអ្នកស្លាប់ច្រើនបែបនេះ គឺដោយសារប្រទេសនេះមានមនុស្សចាស់ច្រើនជាងគេនៅអឺរ៉ុប ហើយ99%នៃអ្នកស្លាប់ សុទ្ធតែមានរោគប្រចាំកាយស្រាប់។

អេស្ប៉ាញគឺជាសម្បុកមេរោគ COVID-19 ធំទី2ក្នុងលោក។ បច្ចុប្បន្ន ប្រទេសនេះ មានអ្នកឆ្លងរោគសរុប21,510ករណី និងស្លាប់1,093ករណី ដោយមានអ្នកឆ្លងរោគថ្មីចំនួន 3,433ករណី និងអ្នកស្លាប់ថ្មី 262ករណី។

អាល្លឺម៉ង់ រកឃើញអ្នកឆ្លងរោគថ្មី4,528ករណី និងអ្នកស្លាប់24ករណីបន្ថែមទៀត ធ្វើឱ្យចំនួនអ្នកផ្ទុកមេរោគសរុបកើនដល់19,848នាក់ និងស្លាប់68នាក់។ បើទោះបានក្លាយជាសម្បុកមេរោគធំបំផុតលំដាប់ទី3ក្នុងពិភពលោក ប៉ុន្តែ អត្រានៃការស្លាប់នៅប្រទេសនេះ មានត្រឹមតែ 0.3% ប៉ុណ្ណោះ។

អ៊ីរ៉ង់គឺជាសម្បុកមេរោគធំបំផុតលំដាប់ទី2នៅអាស៊ី បន្ទាប់ពីប្រទេសចិន (ចិនដីគោក) ដោយមានអ្នកឆ្លងរោគសរុប19,644ករណី និងអ្នកស្លាប់សរុប1,433ករណី។

ប្រទេសចិន បានប្រកាសថា មិនបានរកឃើញអ្នកផ្ទុកមេរោគកូរ៉ូណាក្នុងស្រុកនោះទេ ប៉ុន្តែ បានរកឃើញ41ករណី ដែលជាអ្នកជំងឺ “នាំចូល” ពីបរទេស។ ចំណែកកូរ៉េខាងត្បូង មិនទាន់បានបញ្ចេញរបាយការណ៍ថ្មីនៅឡើយ។

សហរដ្ឋអាមេរិកបានរកឃើញករណីឆ្លងរោគថ្មីចំនួន 5,087នាក់បន្ថែមទៀត នាំឱ្យចំនួនអ្នកបានឆ្លង COVID-19 សុរបឡើងដល់ 18,876ករណី ក្នុងនោះមាន 237នាក់បានបាត់បង់ជីវិត។ បុគ្គលិកម្នាក់ធ្វើការក្នុងការិយាល័យអនុប្រធានាធិបតី Mike Pence ដែលជាអ្នកចាត់ចែងយុទ្ធនាការប្រឆាំង COVID-19 ក៏បានឆ្លងវីរុសនេះដែរ។

នៅតំបន់អេស៊ីអាគ្នេយ៍វិញ ប្រទេសម៉ាឡេស៊ី នៅតែបន្តជាសម្បុកមេរោគធំជាងគេ ដោយមានអ្នកជំងឺ 1,030នាក់ ក្នុងនោះមាន3នាក់បានបាត់បង់ជីវិត។ ចំណែកឥណ្ឌូនេស៊ីវិញ គឺជាប្រទេសដែលមានអ្នកស្លាប់ដោយសារ COVID-19 ច្រើនជាងគេក្នុងតំបន់ ដោយមានអ្នកស្លាប់ចំនួន32ករណី ក្នុងចំណោមអ្នកជំងឺសរុប369នាក់។

សរុបមក ពិភពលោកទាំងមូល មានករណីស្លាប់ថ្មីចំនួន 1,326នាក់ ដែលភាគច្រើនកើតឡើងនៅអឺរ៉ុប ធ្វើឱ្យចំនួនអ្នកស្លាប់សរុបកើនដល់ 11,357នាក់។ អ្នកជំងឺចំនួន 90,942នាក់ (ស្មើនឹង33.1% ធៀបនឹងអ្នកជំងឺសរុប) បានជាសះស្បើយពីជំងឺ។ ប្រទេស Papua New Guinea និងប្រទេស Cabo Verde រួមនឹង Angola គឺជាប្រទេសដែលទើបតែបានរកឃើញករណីឆ្លង COVID-19 ដំបូងបង្អស់របស់ខ្លួន៕

ប្រភព៖ សារព័ត៌មានបរទេស

March 21, 2020

Category: សុខភាព