Category: សុខភាព

ការណែនាំ 4ចំណុចរបស់រដ្ឋបាលរាជធានីភ្នំពេញ ជូនចំពោះបងប្អូនប្រជាពលរដ្ឋដែលទើបអញ្ជើញត្រលប់មកពីក្រៅប្រទេស
រដ្ឋបាលរាជធានីភ្នំពេញ សូមជម្រាបជូនដំណឹងដល់សាធារណជន ពិសេសបងប្អូនប្រជាពលរដ្ឋទាំងអស់ដែលទើបអញ្ជើញត្រលប់មកពីធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀតឱ្យបានជ្រាបថា មេរោគកូវីដ ១៩ (COVID-19) បាន និងកំពុងរាតត្បាតនៅទូទាំងពិភពលោក ដោយឡែកនៅព្រះរាជាណាចក្រកម្ពុជា ក្រសួងសុខាភិបាលបានរកឃើញអ្នកមានផ្ទុកមេរោតកូវីដ ១៩ (COVID-19) ចំនួន ៨៦ ករណី គិតត្រឹមថ្ងៃទី២៣ ខែមីនា ឆ្នាំ២០២០ ហើយមេរោគនេះកំពុងតែបន្តរីករាលដាល ជាបន្តបន្ទាប់។
ដើម្បីចូលរួមទប់ស្កាត់ការរីករាលដាល និងការចម្លងមេរោគកូវីដ១៩ (COVID-19) នៅក្នុងរាជធានីភ្នំពេញ ក៏ដូចក្នុងព្រះរាជាណាចក្រកម្ពុជា រដ្ឋបាលរាជធានីភ្នំពេញស្នើបងប្អូនប្រជាពលរដ្ឋទាំងអស់ដែលទើបអញ្ជើញត្រលប់មកពីធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀត ត្រូវអនុវត្តតាមការណែនាំដូចខាងក្រោម៖
១. ត្រវជួនដំណឹងទៅរដ្ឋបាលខណ្ឌទាំង១៤ ដូចមានតារាងលេខទូរស័ព្ទសម្រាប់ទំនាក់ទំនង ដែលជាឯកសារឧបសម្ព័ន្ធ។
២. ត្រូវដាក់ខ្លួនឱ្យនៅដាច់ដោយឡែក រយៈពេល១៤ថ្ងៃ ដោយអនុវត្តតាមសេចក្តីណែនាំរបស់ក្រសួងសុខាភិបាល។ ក្នុងករណ៍ដែលបងប្អូនមានការលំបាកក្នុងការអនុវត្តសេចក្តីណែនាំរបស់ក្រសួងសុខាភិបាល ត្រវរាយការណ៍ទៅអាជ្ញាធរមូលដ្ឋាន ដើម្បីមានមូលដ្ឋានដោះស្រាយបញ្ហាជូន។
៣. ក្នុងករណីដែលបងប្អូនមានអាការមួយចំនួន ដូចជាក្អក ឡើងកម្តៅ ៣៨ ដឺក្រេ ពិបាកដកដង្ហើមដែលសង្ស័យថាអាចមានផ្ទុកមេរោគកូវីដ១៩(COVID-19) សូមបងប្អូនទំនាក់ទំនងតាមរយៈលេខទូរស័ព្ទដូចមានឯកសារឧបសម្ព័ន្ធភ្ជាប់មកជាមួយ / ឬអាចទំនាក់ទំនងដោយផ្ទាល់ទៅអាជ្ញាធរភូមិ ប៉ុស្តិ៍នគរបាលរដ្ឋបាលសង្កាត់ និងរដ្ឋបាលសង្កាត់ និងមន្ទីរពេទ្យរដ្ឋ ដែលនៅជិតទីកន្លែងរស់នៅរបស់បងប្អូន ជាបន្ទាន់។
៤. អាជ្ញាធរភូមិ ប៉ុស្តិ៍នគរបាលរដ្ឋបាលសង្កាត់ និងរដ្ឋបាលសង្កាត់ត្រូវរាយការណ៍បន្ទាន់ក្នុងករណី ដែលទទួលបានព័ត៌មានថាមានបងប្អូនប្រជាពលរដ្ឋដែលទើបអញ្ជើញត្រលប់មកពីធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀត ទៅរដ្ឋបាលខណ្ឌ ដើម្បីអនុវត្តវិធានការបង្ការ និងទប់ស្កាត់ការរាលដាលនៃមេរោគកូវីដ (COVID-19) និងត្រូវចុះអប់រំណែនាំដល់បងប្អូនប្រជាពលរដ្ឋទាំងអស់នោះ អំពីការដាក់ខ្លួនឱ្យនៅដាច់ដោយឡែក រយៈពេល ១៤ថ្ងៃ។
រដ្ឋបាលរាជធានីភ្នំពេញមានក្តីសង្ឃឹមយ៉ាងមុតម៉ាំថា បងប្អូនប្រជាពលរដ្ឋទាំងអស់ដែលទើបអញ្ជើញត្រលប់មកពិធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀត ត្រវច្ចលរួមទប់ស្កាត់ការរីករាលដាលមេរោតកូវីដ ១៩ (COVID-19) នេះ ដើម្បីសេចក្តីសុខក្រមត្រសារជាទីស្រឡាញ់ សាច់ញាតិក៏ដូចសង្គមជាតិយើងផងដែរ។
ទទួលបានសេចក្តីជូនដំណឹងនេះ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ រដ្ឋបាលខណ្ឌទាំង១៤ មន្ទីរ-អង្គភាពជំនាញពាក់ព័ន្ធ ត្រវអនុវត្តសេចក្តីជូនដំណឹងនេះ ឱ្យទទួលបានលទ្ធផលល្អប្រសើរ និងប្រកបដោយប្រសិទ្ធភាពខ្ពស់៕

ប្រភព៖ រដ្ឋបាលរាជធានីភ្នំពេញ
March 23, 2020
អត់ចប់!! ចិនចំអកអាមេរិកថា “កុហកទាំងមុខក្រាស់”…ទាំង 2នាក់ នៅមិនទាន់ឈប់ថ្កោលទោសគ្នា រឿងវីរុស COVID-19 ឆ្លងរាលដាលក្រៅវូហាន
សហរដ្ឋអាមេរិក និងចិន កាលពីថ្ងៃសុក្រ(ទី20មីនា) នៅតែបើកសង្គ្រាមពាក្យសម្ដីដាក់គ្នា ពាក់ព័ន្ធនឹងមេរោគវីរុស COVID-19 ជាបន្តបន្ទាប់ ដោយក្រុងប៉េកាំង បានចេញមកស្រែកឡូឡាដាក់ លោក ម៉ៃក៍ ប៉ុមប៉េអូ ថា “និយាយកុហកទាំងមុខក្រាស់” ក្រោយពីរដ្ឋមន្ត្រីការបរទេសរបស់អាមេរិករូបនេះ បានអះអាងថា ចិនយឺតយ៉ាវក្នុងការប្រកាសព្រមានអំពីមេរោគវីរុសកូរ៉ូណាប្រភេទថ្មី ឬ COVID-19 និងបណ្ដោយឱ្យមនុស្សរាប់សែននាក់ធ្វើដំណើរចេញពីទីក្រុងវូហាន យកមេរោគមកចម្លងចូលប្រទេសផ្សេងទៀត…។
ក្នុងអំឡុងផ្ដល់សម្ភាសជាមួយ Fox News លោក ប៉ុមប៉េអូ បានបញ្ជាក់ថា ក្រុងប៉េកាំង បានខាតពេលវេលាដ៏មានតម្លៃអស់ជាច្រើនថ្ងៃ ចាប់តាំងពីរកឃើញការឆ្លងរាលដាលរបស់វីរុសកូរ៉ូណាប្រភេទថ្មីដ៏គ្រោះថ្នាក់នេះ និងបណ្ដោយឱ្យមនុស្សម្នារាប់សែននាក់ធ្វើដំណើរចេញពីទីក្រុងវូហាន ប្រភពចម្លងមេរោគដ៏ធំ ឆ្ពោះទៅប្រទេសផ្សេងៗ ក្នុងនោះមានទាំងប្រទេសអ៊ីតាលី ដែនដីដែលខណៈពេលនេះ កំពុងមានអ្នកស្លាប់ដ៏ច្រើនបំផុតក្នុងពិភពលោក…។
“បក្សកុម្មុយនីស្តចិន ធ្វើមិនត្រឹមត្រូវ និងបាននាំជីវិតមនុស្សដ៏ច្រើនមហាសាល ទៅស្ថិតក្នុងក្ដីប្រថុយប្រថាន ដោយសារតែការឆ្គាំឆ្គងរបស់ខ្លួន…” លោក ប៉ុមប៉េអូ បានថ្លែងយ៉ាងដូច្នេះ។
លោកស្រី ហួ ឈុនយីង អ្នកនាំពាក្យនៃក្រសួងការបរទេសចិន បានបង្ហាញភាពក្ដៅក្រហាយ ចំពោះសម្ដីរបស់លោក ប៉ុមប៉េអូ ខាងលើ ដោយបានសរសេរនៅលើបណ្ដាញសង្គមធ្វីតធើរជាភាសាអង់គ្លេសថា “ឈប់និយាយកុហកទាំងមុខក្រាស់ទៀតទៅ!”។
“ដូចដែលអ្នកជំនាញការរបស់អង្គការសុខភាពពិភពលោកបាននិយាយរួចហើយថា ការព្យាយាមរបស់ចិន បានធ្វើឱ្យមនុស្សជាច្រើនសែននាក់ រួចផុតពីការឆ្លងមេរោគ” លោកស្រីបានសរសេរនៅក្នុងបណ្ដាញសង្គមធ្វីតធើរ ដោយបានបញ្ជាក់ទៀតថា ចិនបានប្រាប់ទៅសហរដ្ឋអាមេរិកពាក់ព័ន្ធនឹងការឆ្លងរាលដាលរបស់វីរុស COVID-19 នេះជាលើកដំបូង តាំងពីថ្ងៃទី3 មករា តែក្រសួងការបរទេសអាមេរិក ទើបតែប្រកាសប្រាប់ពលរដ្ឋអាមេរិកនៅក្នុងទីក្រុងវូហាន នៅថ្ងៃទី15 មករា “ហើយពេលនេះ មកបន្ទោសថា ចិនជាដើមកំណើតនៃភាពយឺតយ៉ាវ?! តើច្បាស់ក្នុងចិត្តហើយឬ?!”
យ៉ាងណាក៏ដោយ អ្នកនាំពាក្យនៃក្រសួងការបរទេសសហរដ្ឋអាមេរិក បានចេញមកឆ្លើយតប តាមរយៈប្រព័ន្ធធ្វីតធើរដូចគ្នាភ្លាមៗថា “នៅថ្ងៃទី3 មករា ក្រុមមន្ត្រីចិន បានចេញបញ្ជាឱ្យ “កម្ទេចសំណាកគំរូមេរោគវីរុស COVID-19” ដើម្បីបំបិទមាត់ពួកពេទ្យវូហាន និងកាត់ផ្ដាច់ក្ដីកង្វល់ព្រួយរបស់ប្រជាជននៅលើប្រព័ន្ធព័ត៌មានអនឡាញ។ ហួ និយាយត្រូវ ដែលថា ពិភពលោកត្រូវតែពិចារណាពីកម្រិតពេលវេលាទាំងនោះយ៉ាងល្អិតល្អន់”។
សម្ព័ន្ធភាពដែលមានភាពតានតឹងកាលពីពេលមុនស្រាប់ហើយ រវាងប្រទេសមហាអំណាចទាំង2 នោះ អាចនឹងត្រូវទាញទម្លាក់ឱ្យកាន់តែអាក្រក់ឡើងទៀត ដោយសារវិបត្តិរោគឆ្លងរាតត្បាតដ៏ធំនេះ ដែលមើលទៅហាក់ដូចជា ចិនអាចគ្រប់គ្រងវាបានហើយ តែជ្រុងម្ខាងទៀតនៃពិភពលោក វីរុស COVID-19 កំពុងតែបង្កភាពស្មុគស្មាញយ៉ាងខ្លាំងក្លាដល់ជីវិតរស់នៅរបស់មនុស្សភាគច្រើនក្នុងពិភពលោកមួយនេះ ហើយរហូតមកដល់បច្ចុប្បន្ន មានអ្នកស្លាប់រួចហើយច្រើនជាង 1ម៉ឺននាក់ទូទាំងពិភពលោក។
កាលពីសប្ដាហ៍កន្លងទៅ សហរដ្ឋអាមេរិក បានកោះហៅឯកអគ្គរដ្ឋទូតចិនចូលជួប ដើម្បីតវ៉ា ក្រោយពីអ្នកនាំពាក្យក្រសួងការបរទេសចិនម្នាក់ បានសរសេរនៅលើធ្វីតធើរ បង្ហាញពីទ្រឹស្ដីចេតនាសមគំនិត ដោយជឿថា ទាហានអាមេរិកកាំង គឺជាអ្នកនាំមេរោគវីរុសចូលទៅក្នុងទីក្រុងវូហាន។
សំណេរនៅលើធ្វីតធ្វើរនោះ បានធ្វើឱ្យលោកប្រធាធិបតីសហរដ្ឋអាមេរិក ដូណាល់ ត្រាំ ខឹងពុះកញ្ជ្រោលយ៉ាងខ្លាំង រួចហើយលោក ត្រាំ ក៏បានប្រើពាក្យសម្ដីបញ្ឆេះកំហឹងអំពីចិនដូចគ្នា ក្រោយពីហៅវីរុស COVID-19 ថា ជា “វីរុសចិន”៕
ប្រភព ៖ សារព័ត៌មានបរទេស
March 23, 2020
វេជ្ជបណ្ឌិតវៀតណាមដំបូងគេបង្អស់ដែលបានឆ្លងវីរុស COVID-19 ខណៈចំនួនករណីឆ្លងមេរោគនេះ កើនដល់…
បុរសជាវេជ្ជបណ្ឌិតវ័យ29ឆ្នាំ ធ្វើការនៅក្នុងមន្ទីរពេទ្យជាតិជំងឺត្រូពិក ត្រូវបានរកឃើញថា មានផ្ទុកវីរុស COVID-19 ដូច្នេះគាត់បានក្លាយជាបុគ្គលិកសុខាភិបាលដំបូងគេដែលបានឆ្លងមេរោគកូរ៉ូណានៅកន្លែងធ្វើការ។
វេជ្ជបណ្ឌិតរូបនេះ គឺជាមនុស្សម្នាក់ក្នុងចំណោមអ្នកជំងឺកូរ៉ូណាទាំង3នាក់ ដែលត្រូវបានក្រសួងសុខាភិបាល ប្រកាសឱ្យដឹងនាព្រឹកនេះ ធ្វើឱ្យចំនួនអ្នកឆ្លងមេរោគ COVID-19 នៅប្រទេសវៀតណាម កើនដល់116នាក់។
វេជ្ជបណ្ឌិតខាងលើ ដែលត្រូវបានចាត់ទុកជា “អ្នកជំងឺទី116” នេះ ធ្វើការផ្នែកសង្គ្រោះបន្ទាន់ នៅក្នុងមន្ទីរពេទ្យជាតិផ្នែកជំងឺត្រូពិក (National Hospital Of Tropical Diseases) ទី2 នៅតំបន់ Dong Anh ទីក្រុងហាណូយ។ តួនាទីរបស់វេជ្ជបណ្ឌិតនេះ គឺធ្វើរោគវិនិច្ឆ័យទៅលើអ្នកដែលត្រូវសង្ស័យឆ្លងមេរោគ ព្យាបាលអ្នកជំងឺដែលបានឆ្លងមេរោគ និងសង្គ្រោះបន្ទាន់ចំពោះអ្នកជំងឺកូរ៉ូណាធ្ងន់ធ្ងរ។
ក្នុងពេលធ្វើការ វេជ្ជបណ្ឌិតនេះ មានសម្ភារវេជ្ជសាស្ត្រការពារខ្លួនគ្រប់គ្រាន់។ ក្រោយម៉ោងធ្វើការ គ្រូពេទ្យនេះក៏សម្រាកនៅក្នុងកន្លែងដាច់ដោយឡែកសម្រាប់បុគ្គលិកសុខាភិបាល ដែលនៅក្នុងមន្ទីរពេទ្យ។
ថ្ងៃទី19 ខែមីនា គាត់មានអាការឈឺក្រហាយបំពង់ក។ ថ្ងៃទី20មីនា គាត់មានអាការក្អក ឈឺសាច់ដុំ ក្ដៅខ្លួន។ ថ្ងៃទី21មីនា គាត់ក៏បានបង្ខាំងខ្លួនឯងនៅក្នុងបន្ទប់ត្រៀមសង្គ្រោះបន្ទាន់មួយ ហើយបានធ្វើតេស្តរកវីរុសកូរ៉ូណា។ លទ្ធផលបានបង្ហាញថា គាត់មានផ្ទុកមេរោគ COVID-19។
បុគ្គលិកសុខាភិបាលទាំងអស់ដែលបានធ្វើការជាមួយវេជ្ជបណ្ឌិតខាងលើ ក៏ត្រូវបានបញ្ជូនទៅកាន់កន្លែងបង្ខាំងដាច់ដោយឡែក ដើម្បីធ្វើតេស្ត និងតាមដានសុខភាព។
ចំណែកអ្នកជំងឺ2នាក់ផ្សេងទៀតដែលត្រូវបានរកឃើញវីរុស COVID-19 ក្នុងពេលជាមួយគ្នានឹងលោកវេជ្ជបណ្ឌិតខាងលើនេះដែរនោះ គឺមានម្នាក់មកពីប្រទេសឆែក (Czech) និងម្នាក់ទៀតមកពីប្រទេសហូឡង់។
គិតមកដល់ពេលនេះ ប្រទេសវៀតណាម បានរកឃើញអ្នកផ្ទុកមេរោគ COVID-19 ចំនួន116ករណី ក្នុងនោះមាន17ករណីបានជាសះស្បើយ។ អ្នកជំងឺក្រៅពីនេះ ដែលក្នុងនោះមានបុគ្គលិកសុខាភិបាលចំនួន3នាក់ផងដែរនោះ ក៏កំពុងទទួលការព្យាបាលនៅឯមន្ទីរពេទ្យ។
នៅទូទាំងពិភពលោក អ្នកបានឆ្លងមេរោគ COVID-19 បានកើនដល់ 339,039នាក់ ក្នុងនោះមាន 99,014នាក់បានជាសះស្បើយ និង14,698នាក់បានបាត់បង់ជីវិត៕
ប្រភព៖ សារព័ត៌មានបរទេស
March 23, 2020
ពិភពលោក មកដល់ថ្ងៃនេះ៖ ខាមេនេអ៊ី “មិនទទួលយកទឹកចិត្តសប្បុរស” របស់អាមេរិកជួយស្ដារវិបត្តិ, បុគ្គលិកស្ថាប័នព័ត៌មាន NBC ឆ្លងមេរោគស្លាប់, “អាមេរិក” ឆ្លងមេរោគលំដាប់លេខ3 ក្នុងពិភពលោក, “អ៊ីតាលី” 1ថ្ងៃ ស្លាប់ជិត 800នាក់…
មេដឹកនាំកំពូលរបស់ប្រទេសអ៊ីរ៉ង់ លោក យ៉ាឌុលឡោះហ៍ ខាមេនេអ៊ី កាលពីថ្ងៃទី22 មីនា ម្សិលមិញ បានប្រកាសមិនទទួលយកជំនួយគ្រប់រូបបែបពីសហរដ្ឋអាមេរិក សម្រាប់វិបត្តិមេរោគវីរុសកូរ៉ូណារាតត្បាត។ រកឃើញលោក លែរី អ៊ែដច៍វើធ(Larry Edgworth) បុគ្គលិកស្ថាប័នព័ត៌មានសហរដ្ឋអាមេរិក NBD News ស្លាប់កាលពីថ្ងៃព្រហស្បតិ៍(ទី19មីនា) បន្ទាប់ពីមិត្តរួមការងារម្នាក់ ដឹងលទ្ធផលឆ្លងមេរោគ 1ថ្ងៃមុន។ ទីក្រុងនីវយ៉ក រកឃើញអ្នកឆ្លងមេរោគថ្មី ចំនួន 8,115នាក់ ចំនួនស្លាប់ហក់ឡើងដល់ជាង 300នាក់ ជាប់លំដាប់លេខ3 ទូទាំងពិភពលោក ចំណែកអ៊ីតាលី ក្នុង 1ថ្ងៃ(ម្សិលមិញ)មានអ្នកស្លាប់ចំនួន 793នាក់។
CNN របស់សហរដ្ឋអាមេរិក បានរាយការណ៍នៅថ្ងៃនេះ(ទី23មីនា)ថា មេដឹកនាំកំពូលរបស់ប្រទេសអ៊ីរ៉ង់ លោក យ៉ាឌុលឡោះហ៍ ខាមេនេអ៊ី កាលពីថ្ងៃអាទិត្យ(ទី22មីនា) បានចេញមកបដិសេធការជួយសង្គ្រោះពីសហរដ្ឋអាមេរិក សម្រាប់វិបត្តិការឆ្លងរាតត្បាតរបស់វីរុសកូវីដ-19 ដោយបានចង្អុលបង្ហាញថា “វាជារឿងចម្លែកខ្លាំងណាស់” ដោយមេដឹកនាំអ៊ីរ៉ង់ បានបញ្ជាក់ថា ក្រុងវ៉ាស៊ីនតោន អាចប្រើការជួយសង្គ្រោះខាងវេជ្ជសាស្ត្ររបស់ខ្លួននេះ ដើម្បីវាយប្រហារអ៊ីរ៉ង់។
“ជួនកាល ការជួយសង្គ្រោះខាងវេជ្ជសាស្ត្រដែលបានរៀបចំឱ្យនេះ អាចជាឧបករណ៍មួយដើម្បីធ្វើឱ្យការឆ្លងរាតត្បាតនេះ កាន់តែអាក្រក់ទៅ ដូច្នេះទើបយើងគ្មានថ្ងៃនឹងជឿអ្នកឯងឡើយ”
CNN បានចង្អុលបង្ហាញថា គឺជាការថ្លែងដែលបានផ្សព្វផ្សាយតាមទូរទស្សន៍ក្នុងថ្ងៃចូលឆ្នាំថ្មីរបស់ប្រទេសអ៊ីរ៉ង់ ដោយលោក ខាមេនេអ៊ីថែមទាំងបានចំអកទៀតថា “វាជារឿងចម្លែកខ្លាំងណាស់” ដែលសហរដ្ឋអាមេរិកស្នើផ្ដល់ការជួយសង្គ្រោះខាងវេជ្ជសាស្ត្រ ទាំងក្នុងពេលនេះ កើតមានបញ្ហាខ្វះខាតផ្នែកនេះនៅក្នុងប្រទេសរបស់ខ្លួន ដោយមេដឹកនាំកំពូលអ៊ីរ៉ង បញ្ជាក់ថា សហរដ្ឋអាមេរិក កំពុងមានបញ្ហាខ្វះខាតផ្នែកឧបករណ៍វេជ្ជសាស្ត្រ។
យោងតាមតួលេខពីមហាវិទ្យាល័យ ចន ហប់ឃីនស៍ កាលពីថ្ងៃម្សិលមិញ(ទី22មីនា)បានឱ្យដឹងថា ប្រទេសអ៊ីរ៉ង់មានចំនួនអ្នកឆ្លងមេរោគ 20,610នាក់ ស្លាប់ 1,556នាក់ និងជាសះស្បើយចំនួន 7,635នាក់ ខណៈដែលសហរដ្ឋអាមេរិក មានអ្នកឆ្លងមេរោគជាប់លំដាប់លេខ3 ក្នុងពិភពលោកក្នុងពេលនេះ ចំនួន 26,747នាក់ ស្លាប់ 340នាក់ និងជាសះស្បើយ 176នាក់។
សម្រាប់ នីវយ៉ក ស៊ីធី ចុងក្រោយបំផុត មានការប្រកាសរកឃើញអ្នកឆ្លងមេរោគថ្មីចំនួន 8,115នាក់ និងស្លាប់ 60នាក់ ពីចំនួនទាំងអស់ 1,450នាក់ដែលបានចូលព្យាបាលនៅមន្ទីរពេទ្យ ដោយក្នុងនោះរកឃើញអ្នកធ្ងន់ធ្ងរចំនួន 370នាក់។
ចំណែកប្រទេសអេស្ប៉ាញ មានចំំនួនអ្នកឆ្លងមេរោគ 25,496នាក់ ស្លាប់ 1,381នាក់ និងនៅអ៊ីតាលី មានអ្នកឆ្លង 53,578នាក់ ស្លាប់ 4,825នាក់។ កាលពីថ្ងៃសៅរ៍ អ៊ីតាលីមានអ្នកស្លាប់ចំនួន 793នាក់ ដែលធ្វើឱ្យនៅទូទាំងប្រទេសអ៊ីតាលី មានចំនួនអ្នកស្លាប់ខ្ពស់ជាងចិន ដោយទាំងអស់នេះយោងតាមគណៈកម្មការសុខភាពនៃប្រទេសចិនដែលបានរកឃើញថា មានចំនួនអ្នកស្លាប់ 3,261នាក់ និងអ្នកឆ្លងមេរោគសរុប 81,054នាក់ និងមានអ្នកជាសះស្បើយចំនួន 72,244នាក់។
ផូលីទីកូ សារព័ត៌មានសហរដ្ឋអាមេរិក បានរាយការណ៍កាលពីថ្ងៃសុក្រ(ទី20មីនា)ថា បុគ្គលិករបស់ស្ថានីយព័ត៌មាន NBC News លែរី អ៊ែដច៍វើធ បានស្លាប់ដោយសារវីរុសកូរ៉ូណា កាលពីថ្ងៃព្រហស្បតិ៍(ទី19មីនា) ដោយប្រធានគប់គ្រងរបស់ក្រុមហ៊ុន លោក អ៊ែនឌី លេកខ៍ បានប្រកាសឱ្យបានដឹងតាមរយៈកំណត់ត្រានៅក្នុងថ្ងៃសុក្រ។
បុគ្គលិក NBC News បានដឹងលទ្ធផលនៃការឆ្លងមេរោគរបស់ លែរី អ៊ែដច៍វើធ នៅថ្ងៃពុធ(ទី18មីនា) និងបានដឹងថា លែរី បានធ្វើការនៅក្នុងស្ថាប័នព័ត៌មានមួយនេះយូរណាស់មកហើយ ភាគច្រើននៅក្នុងបន្ទប់ឱបករណ៍ និងពេលមុននេះ ក្នុងឋានៈជាអ្នកបច្ចេកទេសសំឡេងរយៈពេល 25ឆ្នាំមកហើយជាមួយ NBC News៕
https://www.youtube.com/watch?v=uZ4aEEcZxbM&feature=emb_logo
https://www.youtube.com/watch?v=Gczmj1F42vc&feature=emb_logo

ប្រភព ៖ សារព័ត៌មានបរទេស
March 23, 2020
មេទ័ពកំពូលរបស់ប្រទេសអេហ្ស៊ីប បានស្លាប់ហើយ ដោយសារតែឆ្លងមេរោគ COVID-19
កងទ័ពអេហ្ស៊ីបបានប្រកាសឱ្យដឹងថា “ឧត្តមសេនីយ៍ Khaled Shaltout បានបាត់បង់ជីវិត” កាលពីម្សិលមិញ ដែលនេះ បានធ្វើឱ្យលោកក្លាយជាមេទ័ពកំពូលបំផុត ដែលបានស្លាប់ដោយសារ COVID-19 នៅក្នុងប្រទេសមជ្ឈិមបូព៌ាមួយនេះ។
ឧត្តមសេនីយ៍ Shaltout បានឆ្លងវីរុស COVID-19 នៅពេលដែលកំពុងដឹកនាំទាហានរបស់លោក ដើរបាញ់ថ្នាំសម្លាប់មេរោគ នេះបើតាមសេចក្ដីប្រកាសកាលពីថ្ងៃទី22មីនា។ យោធាអេហ្ស៊ីបបានឱ្យដឹងថា ពួកគេបានដើរបាញ់ថ្នាំសម្លាប់មេរោគនៅតាមទីសាធារណៈ និងទីលាននានានៅក្នុងទីក្រុង Cairo និងទីក្រុងមួយចំនួនផ្សេងទៀត ដើម្បីទប់ស្កាត់ការឆ្លងរាលដាល COVID-19។
អេហ្ស៊ីប បច្ចុប្បន្នបានរកឃើញអ្នកផ្ទុកមេរោគ COVID-19 ជាង320នាក់ ក្នុងនោះមាន14នាក់បានបាត់បង់ជីវិត និង56នាក់បានជាសះស្បើយ។ ប្រធានាធិបតី Abdel-Fattah el Sisi បានព្រមានថា ចំនួនអ្នកឆ្លងរោគ COVID-19 អាចនឹងកើនឡើងរាប់ពាន់នាក់ក្នុងរយៈពេលប៉ុន្មានថ្ងៃខាងមុខនេះ បើសិនប្រជាពលរដ្ឋមិនអនុវត្តតាមវិធានការដែលបានដាក់ចេញ។
ប្រធានាធិបតី Abdel-Fattah el Sisi បានថ្លែងថា “ប្រជាជនអេហ្ស៊ីប សូមជួយដល់យើងខ្ញុំ! យើងចង់ឱ្យពលរដ្ឋគ្រប់គ្នា មានភាពទទួលខុសត្រូវជាងនេះ ក្នុងអំឡុង2សប្ដាហ៍ទៀត ដើម្បីទប់ស្កាត់ការឆ្លងរាលដាលវីរុស COVID-19 នៅអេហ្ស៊ីប”។
មុននេះ ប្រធានាធិបតីអេហ្ស៊ីប បានឱ្យដឹងដែរថា រដ្ឋាភិបាលអេហ្ស៊ីប បានបែងចែកថវិកាជាង6.3ពាន់លានដុល្លារអាមេរិក សម្រាប់កិច្ចការប្រយុទ្ធប្រឆាំងនឹងរោគរាតត្បាត COVID-19។
ប្រទេសអេហ្ស៊ីប បានបិទសាលារៀន និងស្នើឱ្យគ្រប់វិហារសាសនា ផ្អាកដំណើរការបណ្ដោះអាសន្នរយៈពេល14ថ្ងៃ ដើម្បីកុំឱ្យក្រុមសាសនិកមានឱកាសជួបជុំគ្នា។ ភោជនីយដ្ឋាន ហាងកាហ្វេ ក្លិបកម្សាន្ត និងមជ្ឈមណ្ឌលពាណិជ្ជកម្មជាដើម ក៏ត្រូវបានផ្អាកដំណើរការ។
COVID-19 បានឆ្លងរាលដាលនៅប្រទេសចិន ចាប់ពីខែធ្នូ ឆ្នាំ2019 ហើយបានរាលដាលដល់ប្រទេស និងដែនដីចំនួន192 ក្នុងពិភពលោក បណ្ដាលឱ្យមនុស្សជាង 338,720នាក់បានឆ្លងរោគ និងជាង14,680នាក់បានបាត់បង់ជីវិត៕
ប្រភព៖ សារព័ត៌មានបរទេស
March 23, 2020
គ្រូពេទ្យជំនាញថៃ និយាយថា វីរុសកូវីដ-19នៅប្រទេសអ៊ីតាលី ជាប្រភេទវីរុសកាចសាហាវ…
លោកវេជ្ជបណ្ឌិត ម៉ានូន អ្នកជំនាញខាងជំងឺប្រព័ន្ធដង្ហើម និងជំងឺមនុស្សចាស់ បានចង្អុលបង្ហាញថា មេរោគវីរុសកូវីដ-19 ដែលកំពុងរាតត្បាតយ៉ាងខ្លាំងនៅក្នុងប្រទេសអ៊ីតាលីនាពេលបច្ចុប្បន្ននេះ ជាប្រភេទវីរុសដែលកាចសាហាវខ្លាំងជាងវីរុសដែលឆ្លងរាលដាលនៅក្នុងទ្វីបអាស៊ី ហើយលោកបានវាយតម្លៃថា អ្នកដែលឆ្លងមេរោគនេះនៅក្នុងសង្វៀនប្រដាល់កាលពីពេលថ្មីៗនេះនៅក្នុងប្រទេសថៃ ក៏ជាវីរុសនេះដែរ ព្រោះអ្នកដែលនៅជិតស្និទ្ធនឹងអ្នកផ្គូផ្គងប្រដាល់ គឺជាអ្នកដែលទើបតែត្រឡប់មកពីប្រទេសអ៊ីតាលី។
លោកបានបន្តឱ្យដឹងទៀតថា អ្វីដែលអាក្រក់បំផុតនោះ គឺមេរោគដែលមានប្រភពចម្លងមកពីប្រទេសអ៊ីតាលីនេះ ពីដំបូងនៅក្នុងប្រទេសអ៊ីតាលីចាប់ផ្ដើមមានការឆ្លងរាលដាលនៅចុងខែមករា ហើយការឆ្លងរាលដាលនោះបានកើតឡើងយ់ាងឆាប់រហ័ស ធ្វើឱ្យចំនួនអ្នកស្លាប់បានហក់ឡើងខ្ពស់បំផុត ដោយមានចំនួនអ្នកស្លាប់សរុបមកដល់ពេលនេះ បានវ៉ាដាច់ប្រទេសចិន ឡើងមកឈរលើលំដាប់លេខ1 ក្នុងពិភពលោកហើយ។
ទាំងអស់នេះ មានអ្នកពន្យល់ថា អ៊ីតាលីជាប្រទេសដែលមានប្រជាជនវ័យចំណាស់ចំនួនច្រើន តែជប៉ុន ក៏ជាប្រទេសមួយដែលមានប្រជាជនអាយុច្រើនជាង 65ឆ្នាំ ច្រើនដល់ទៅ 28%នៃចំនួនប្រជាជនទាំងអស់នោះ បែរជាមានអ្នកឆ្លងមេរោគត្រឹមតែ 1,101នាក់ និងស្លាប់ត្រឹមតែ 41នាក់ប៉ុណ្ណោះ(តែនៅក្នុងប្រទេសអ៊ីតាលី មកដល់ថ្ងៃនេះ(ទី23មីនា)មានអ្នកឆ្លងចំនួន 59,138នាក់ និងស្លាប់ 5,476នាក់)។
មូលហេតុដែលសំខាន់ អាចបណ្ដាលមកពីមេរោគវីរុសកូវីដ-19 នៅក្នុងប្រទេសអ៊ីតាលី ជាប្រភេទមេរោគដែលកាចសាហាវខ្លាំងជាងនៅប្រទេសដទៃទៀតក្នុងទ្វីបអាស៊ី ដែលអាចបង្កើនចំនួននៅក្នុងសួតអ្នកជំងឺបានយ់ាងឆាប់រហ័ស ធ្វើឱ្យចម្លងសាយភាយមេរោគទៅអ្នកដទៃបានច្រើនឡើង ហើយវាយប្រហារសួតយ៉ាងខ្លាំងក្លា ធ្វើឱ្យសួតរលាកយ៉ាងធ្ងន់ធ្ងរ ប្រព័ន្ធដង្ហើមដំណើរការបរាជ័យ ធ្វើឱ្យអត្រាស្លាប់មានភាគរយខ្ពស់បំផុត។
លោកវេជ្ជបណ្ឌិត ម៉ានូន បានអំពាវនាវដល់ប្រជាជនក្នុងប្រទេសថៃ និងក្នុងប្រទេសជិតខាង ឱ្យជួយគ្នាប្រតិបត្តិតាមបញ្ជារបស់រដ្ឋាភិបាល ដោយនៅតែក្នុងផ្ទះ ស្ថិតនៅឆ្ងាយពីមនុស្សម្នាចម្ងាយ 2ម៉ែត្រ និងដែលសំខាន់អ្នកផ្ទុកមេរោគ ត្រូវមិនចម្លងមេរោគទៅអ្នកឯទៀត ក្អក ឬកណ្ដាស់ដាក់ម៉ាស់កាពារ ឬក្អក កណ្ដាស់ដាក់ដៃហើយ ត្រូវប្រញាប់លាងសម្អាតដៃចេញភ្លាមៗ។ មនុស្សទូទៅត្រូវឧស្សាហ៍លាងសម្អាតដៃឱ្យបានញឹកញាប់ កុំយកដៃដែលមិនទាន់បានលាងសម្អាតមកប៉ះភ្នែក ច្រមុះ និងមាត់ឱ្យសោះ និងពេលចូលទៅក្នុងទីកន្លែងដែលមានមនុស្សច្រើនៗ ត្រូវពាក់ម៉ាស់អនាម័យការពារជាប់ជានិច្ច៕
ប្រភព ៖ សារព័ត៌មានបរទេស
March 23, 2020
ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានចេញសារសំឡេងដោយដាក់ចេញនូវវិធានការដោះស្រាយបន្ទាន់ ចំពោះបងប្អូនពលករខ្មែរដែលទើបត្រឡប់មកពីប្រទេសថៃ
នៅក្នុងសារសំឡេងនោះសម្តេចតេជោបានជម្រាបថា៖ “ជូនថ្នាក់ដឹកនាំរបស់យើងនៅក្នុង Group ប្រឆាំងកូវីត-19នេះ ហើយក៏ដូចជាពិសេសគឺអភិបាលខេត្ត ដែលជាប្រធានគណៈកម្មការប្រយុទ្ធប្រឆាំងកូវីត-19នៅតាមខេត្ត។
យើងបានឃើញហើយថា អ្នកជំងឺរបស់យើងជូនកាលកន្លែងខ្លះមានការកើនឡើង ដូចជានៅខេត្តព្រះសីហនុជាដើម អញ្ចឹងបើកើតឡើងរបៀបនេះ ធ្វើឱ្យកន្លែងដែលយើងទទួល គឺវាមិនគ្របគ្រាន់ទេ។ អញ្ចឹងខ្ញុំបានពិភាក្សាជាមួយនឹងឯកឧត្តម ម៉ម ប៊ុនហេង យើងត្រូវប្រើប្រាស់សាលារៀន ហើយខ្លះមានអ្នកជូនយោបល់ខ្ញុំថាអោយយកកុងទីន័ររមកកែច្នែធ្វើជាបន្ទប់ ប៉ុន្តែគឺវាមិនល្អទេ ចឹងខ្ញុំគិតថា ត្រូវប្រើប្រាស់សាលារៀន ហើយសាលារៀនដែលខ្ញុំបានធ្វើកន្លងមកគឺស្អាតៗណាស់ គឺនៅទីរួមខេត្ត និងកន្លែងមួយចំនួន គឺយើងយកសាលារៀនតែម្តង អ្វីដែលជាបញ្ហាបន្ទាន់ គឺត្រូវជ្រើសរើសទីតាំងណាមួយ ឬពីរ ក្នុងខេត្តមួយ ហើយគឺថានឹងរៀបចំប្រព័ន្ធទឹក ភ្លើង ចូលអោយដល់ជាបន្ទាន់ នេះជាកិច្ចការបន្ទាន់នៅតាមខេត្តត្រូវយកចិត្តទុកដាក់។
រាជធានីភ្នំពេញមិនជាចំណោទទេ ដោយសារយើងមាន មន្ទីរពេទ្យរុស្ស៊ី ហើយអគារនៅចាក់អង្រែ ហើយក្រៅពីនោះ នៅមន្ទីរពេទ្យ UT ហើយនឹងសណ្ឋាគារអាំងទែកុងទីណង់តាល់ហើយ មិនជាចំណោទទេ ប៉ុន្តែអ្វីដែលជាចំណោទ គឺនៅតាមបណ្តាខេត្ត ដែលត្រូវធ្វើបន្ទាន់ ដោះស្រាយធ្វើមិចត្រូវជ្រើសរើសសាលារៀនដែលយើងកំពុងតែបិទ យកអគារមួយ ឬពីរ គឺអោយមានច្រើនបន្ទប់ រៀបចំបន្ទប់ រៀបចំគ្រែ ដើម្បីដំណើរការតែម្តង ដោយប្រើប្រាស់កម្លាំងសរុប ដែលអាចយកទាំងកម្លាំងប៉ូលីស កម្លាំងទាហាន និងប៉េអឹមដើម្បីយកមកជួយការងារនេះតែម្តង។
ហើយជាពិសេសគឺសម្រុកដោះស្រាយបញ្ហាតភ្ជាប់ប្រព័ន្ធទឹក ប្រព័ន្ធភ្លើង ចូលទៅក្នុងសាលាតែម្តង ហើយរៀបចំគ្រែ ដោះស្រាយគ្រែ ដើម្បីដាក់សម្រាប់ទទួលអ្នកជំងឺដែលយើងត្រូវមានការចំបាច់ នេះជាវិធីដែលដោះស្រាយបន្ទាន់ ហើយយើងមានអគារស្រាប់ទាំងអស់ មិនចាំបាច់ដូចនៅប្រទេសចិនគេកសាងអគារភ្លាមៗ ដែលយើងគឺមិនចំបាច់ទេ គឺយើងយកអគារសាលារៀនតែម្តង បន្ទប់សាលារៀនដែលយើងបានធ្វើកន្លងទៅស្អាតៗណាស់ ហើយរឿងដែលខ្វះ គឺថាខ្វះតែបន្ទប់ទឹកទេ ប៉ុន្តែបើនិយាយពីសាលាមានកន្លែងខ្លះ គឺមានបន្ទប់ទឹក ប៉ុន្តែបណ្តាញទឹកដែលត្រូវផ្គត់ផ្គង់គឺវាត្រូវអោយគ្រប់ ដែលត្រូវខិតខំដោះស្រាយបញ្ហានឹងបន្ទាន់។
សូមអោយយកចិត្តទុកដាក់អំពីបញ្ហានេះ ព្រោះដើម្បីជៀសវាងគឺនៅពេលមានអ្នកជំងឺច្រើន យើងមិនអាចរកកន្លែងដាក់បាន តែយើងបានត្រៀមបម្រុងទុកហើយ ។
សូមអោយថ្នាក់ខេត្ត ឯកឧត្តម ម៉ម ប៊ុនហេង ក៏ដូចជាថ្នាក់ដឹកនាំក្រសួងគឺចូលរួមផ្តល់មតិបន្ថែមទៅអោយសុខាភិបាលខេត្ត រួមជាមួយនឹងគណៈអភិបាល ដើម្បីពិនិត្យទៅថា គួរយកកន្លែងណាដែលសមស្រប យើងមិនមែនចេះតែដើរយកទេ គឺយកកន្លែងណាដែលសមស្រប ដែលមានលទ្ធភាព ហើយដែលមិនអាចរីករាលដាលទៅកន្លែងដទៃ សូមអរគុណ”៕
ប្រភព៖ ទូរទស្សន៍ជាតិកម្ពុជា ទទក – TVK
March 23, 2020
អ្នកជំងឺជាង 14,000នាក់បានស្លាប់ និងជាង10,000នាក់ប្រឈមនឹងការស្លាប់ ដោយសារ COVID-19 នៅទូទាំងពិភពលោក
ចំនួនអ្នកស្លាប់ដោយសារ COVID-19 កំពុងបន្តកើនឡើងខ្លាំងនៅអឺរ៉ុប ធ្វើឱ្យអ្នកស្លាប់កើនដល់ជាង 14,000ករណី ក្នុងចំណោមអ្នកឆ្លងរោគ ជាង 335,000នាក់។
COVID-19 បង្ហាញខ្លួននៅប្រទេស និងដែនដីចំនួន192 នៅទូទាំងពិភពលោក ក្នុងនោះ ប្រទេសអ៊ីតាលី អេស្ប៉ាញ អាល្លឺម៉ង់ សហរដ្ឋអាមេរិក គឺជាប្រទេសដែលមានអ្នកឆ្លងរោគកូរ៉ូណាច្រើនជាងគេបំផុតក្នុងរយៈពេល24ម៉ោងចុងក្រោយ។
ប្រទេសអ៊ីតាលី ជាសម្បុកមេរោគ COVID-19 ធំបំផុតនៅអឺរ៉ុប និងធំទី2នៅក្នុងពិភពលោក បានរកឃើញអ្នកផ្ទុកមេរោគកូរ៉ូណាសរុប 59,138ករណី កើន5,560ករណី និងអ្នកស្លាប់ 5,476ករណី កើន651ករណី ធៀបនឹងមុននេះមួយថ្ងៃ។
អេស្ប៉ាញ គឺជាសម្បុកមេរោគធំបំផុតទី2 នៅអឺរ៉ុប ដោយមានអ្នកឆ្លងរោគសរុប 28,603ករណី កើន3,107ករណី និងអ្នកស្លាប់ 1,756ករណី កើន375ករណី បើធៀបនឹងម្សិលមិញ។
អាល្លឺម៉ង់ ទើបតែរកឃើញអ្នកផ្ទុកមេរោគកូរ៉ូណា 2,488ករណី និងអ្នកស្លាប់10ករណីបន្ថែមទៀត នាំឱ្យតួលេខនៃអ្នកឆ្លងរោគ និងស្លាប់កើនដល់ 24,852ករណី និង94ករណី។
អឺរ៉ុប ថ្មីៗនេះ បានរាយការណ៍ថា ចំនួនអ្នកស្លាប់ដោយសារមេរោគ COVID-19 បានកើនដល់ជិត 9,000ករណី ស្មើនឹង64% នៃករណីស្លាប់សរុបនៅទូទាំងពិភពលោក។
នៅសហរដ្ឋអាមេរិក មនុស្សចំនួន 8,149នាក់បន្ថែមទៀត ត្រូវបានរកឃើញថាមានផ្ទុកមេរោគ COVID-19 ធ្វើឱ្យតួលេខនៃអ្នកជំងឺកូរ៉ូណាសរុបឡើងដល់ 32,356ករណី ក្នុងនោះមាន414ករណីបានបាត់បង់ជីវិត គឺកើន112ករណី បើធៀបនឹងមុននេះមួយថ្ងៃ។ នាយកដ្ឋានគ្រប់គ្រង់អាហារ និងឱសថនៃសហរដ្ឋអាមេរិក បានអនុញ្ញាតឱ្យធ្វើតេស្តលឿនចំពោះអ្នកត្រូវសង្ស័យថាមានផ្ទុកមេរោគកូរ៉ូណា ដោយចំណាយពេលត្រឹមតែ45នាទីប៉ុណ្ណោះ នឹងឃើញលទ្ធផល។
ប្រទេសអ៊ីរ៉ង់ បន្តជាសម្បុកមេរោគកូរ៉ូណាធំបំផុតលំដាប់ទី2នៅអាស៊ី បន្ទាប់ពីប្រទេសចិន ដោយមានអ្នកឆ្លងរោគសរុប 21,638ករណី និងស្លាប់1,685ករណី។ មុននេះ សហរដ្ឋអាមេរិកក៏បានស្នើជួយដល់ប្រទេសអ៊ីរ៉ង់ ក្នុងការប្រយុទ្ធនឹងរោគរាតត្បាតនេះផងដែរ ប៉ុន្តែអ៊ីរ៉ង់បានបដិសេធ។
ប្រទេសចិន និងកូរ៉េខាងត្បូងមិនទាន់បញ្ចេញលទ្ធផលនៃការធ្វើតេស្ត និងតួលេខថ្មីនៅឡើយ ប៉ុន្តែ កាលពីម្សិលមិញ ប្រទេសចិនបានរកឃើញអ្នកផ្ទុកកូរ៉ូណាចំនួន46នាក់បន្ថែមទៀត ក្នុងនោះមានតែ1ករណីគត់ដែលជាអ្នកជំងឺក្នុងស្រុក ក្រៅពីនេះគឺសុទ្ធតែជាអ្នកជំងឺនាំចូល។ តួលេខចុងក្រោយនៃអ្នកឆ្លងរោគនៅប្រទេសចិន គឺមាន81.093ករណី ក្នុងនោះមានអ្នកស្លាប់ 3,270ករណី។ ចំណែកកូរ៉េខាងត្បូងវិញ មានអ្នកឆ្លងរោគសរុប 8,897ករណី ក្នុងនោះស្លាប់104ករណី។
តំបន់អាស៊ីអាគ្នេយ៍ ប្រទេសម៉ាឡេស៊ី បន្តជាសម្បុកមេរោគធំបំផុត ដោយមានអ្នកឆ្លងរោគសរុប 1,306ករណី និងស្លាប់10ករណី។ ចំណែកឥណ្ឌូនេស៊ីវិញ គឺជាប្រទេសដែលមានអ្នកស្លាប់ខ្ពស់បំផុតក្នុងតំបន់ ដោយមានអ្នកស្លាប់48នាក់ ក្នុងចំណោមអ្នកជំងឺ514នាក់។
នៅទូទាំងពិភពលោក គិតមកដល់ពេលនេះ មានអ្នកស្លាប់ដោយសាររោគ COVID-19 ចំនួន 14,654ករណី កើន ជាង1,598ករណី ធៀបនឹងមុននេះមួយថ្ងៃ។ អ្នកជំងឺ 98,884នាក់ ស្មើនឹង29.1% នៃចំនួនអ្នកឆ្លងរោគសរុប បានជាសះស្បើយ។ ក្រៅពីនេះ មានអ្នកជំងឺ 10,553នាក់កំពុងប្រឈមនឹងហានិភ័យនៃការស្លាប់ខ្ពស់ជាងគេ ក្នុងចំណោមអ្នកជំងឺសរុប។ Dominica, Grenada, Mozambique និង Syria គឺជាបណ្ដាប្រទេសដែលទើបតែបានរកឃើញអ្នកផ្ទុកមេរោគ COVID-19៕
ប្រភព៖ សារព័ត៌មានបរទេស
March 23, 2020
ចិនបានបញ្ជូនគ្រូពេទ្យជំនាញចំនួន7នាក់ រួមទាំងបរិក្ខាពេទ្យមកកម្ពុជា
ដូចការគ្រោងទុកក្រុមគ្រួពេទ្យជំនាញរបស់ចិនចំនួន7នាក់ និងជំនួយសម្ភារៈបរិក្ខាពេទ្យជាង4តោន បានមកដល់ប្រទេសកម្ពុជាហើយនៅវេលាម៉ោង 8:50នាទីព្រឹកថ្ងៃទី23នេះ ដើម្បីចូលរួមទប់ស្កាត់ការរីករាលដាលវីរុស Covid-19 ជាមួយរាជរដ្ឋាភិបាលកម្ពុជា។
March 23, 2020
មន្ត្រីនគរបាលអាមេរិកាំងនៅ New York ជាង50នាក់ ឆ្លងមេរោគ COVID-19 ខណៈតួលេខនៃអ្នកឆ្លងរោគនេះ កើនឡើងយ៉ាងឆាប់រហ័ស
ប្រធានស្នងការដ្ឋាននគរបានទីក្រុង New York បានបញ្ជាក់ថា មន្ត្រីប៉ូលិសជាង50នាក់របស់ស្នងការដ្ឋាននេះ បានឆ្លងវីរុសកូរ៉ូណា COVID-19 ប៉ុន្តែ មានតែម្នាក់គត់ដែលបានសម្រាកព្យាបាលនៅមន្ទីរពេទ្យ។
សារព័ត៌មាន Fox News បានរាយការណ៍ថា កងកម្លាំងនគរបាលធំបំផុតនៅសហរដ្ឋអាមេរិក កំពុងតែប្រឈមនឹងការកើនឡើងខ្ពស់ និងឆាប់រហ័សនៃតួលេខអ្នកឆ្លង COVID-19 ក្នុងក្រុមប៉ូលីស នៅក្នុងសង្កាត់1 នៃតំបន់Manhattan ជាទីតាំងដែលរងផលប៉ះពាល់ខ្លាំងជាងគេ។
យោងតាមប្រភពខាងលើ មានប៉ូលីសរហូតដល់31នាក់នៅក្នុងសង្កាត់1 មានលទ្ធផលវិជ្ជមានជាមួយនឹង COVID-19 ស្មើនឹង17% នៃកម្លាំងសរុប ធ្វើឱ្យនាយកដ្ឋានប៉ូលិសទីក្រុង New York ត្រូវបញ្ជូនមន្ត្រីនគរបាលបន្ថែមទៅកាន់ទីនោះ។
ស្នងការដ្ឋាននគរបាលទីក្រុង New York លោក Dermot Shea បានឱ្យដឹងថា ពួកគេកំពុងតែរៀបចំកាលវិភាគការងារ បង្កើនការអនាម័យ។ល។ លោក បន្តថា នៅទីនេះមានវេជ្ជបណ្ឌិត1ក្រុម មានតួនាទីពិនិត្យ និងសម្រេចទៅលើការបង្ខាំងឱ្យនៅដោយឡែកចំពោះប៉ូលិសរូបណាដែលត្រូវបានសង្ស័យថា អាចមានផ្ទុកមេរោគ COVID-19។
ក៏ប៉ុន្តែ ខាងសហជីពនគរបាល បាននិយាយថា អធិការដ្ឋាននគរបាលទីក្រុង New York មិនបានផ្ដល់សម្ភារការពារសុវត្ថិភាពសុខភាពដែលសមស្របទៅឱ្យមន្ត្រីនគរបាលនោះទេ។
ស្ថានភាពរោគរាតត្បាត COVID-19 កំពុងតែអាក្រក់ទៅៗនៅសហរដ្ឋអាមេរិក ដោយសារករណីឆ្លងរោគនេះ បានកើនឡើងរហ័សពីមួយថ្ងៃទៅមួយថ្ងៃ។ សហរដ្ឋអាមេរិក គិតមកដល់បច្ចុប្បន្ន បានរកឃើញអ្នកផ្ទុកមេរោគកូរ៉ូណាសរុបជាង 26,000ករណី និងស្លាប់ 326ករណី។
New York គឺជារដ្ឋដែលមានករណីឆ្លង COVID-19 ច្រើនជាងគេបំផុតនៅសហរដ្ឋអាមេរិក ដោយរដ្ឋនេះមានអ្នកឆ្លងរោគជាង 10,300ករណី៕
ប្រភព៖ សារព័ត៌មានបរទេស
March 23, 2020