សុខភាព - La Reine Media

COVID-19! ចំនួនអ្នកជំងឺកូរ៉ូណាប្រភេទថ្មីនៅសហរដ្ឋអាមេរិក កើនលើស100,000នាក់

សហរដ្ឋអាមេរិក បច្ចុប្បន្នជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកឆ្លងវីរុសCOVID-19 ជាង100,000នាក់ កើនជិត17,000នាក់ បើធៀបនឹងមុននេះ1ថ្ងៃ។

យោងតាមស្ថិតិរបស់សាកលវិទ្យាល័យ Johns Hopskins បានឱ្យដឹងថា តួលេខនៃអ្នកបានឆ្លងវីរុសCOVID-19 នៅសហរដ្ឋអាមេរិកកាលពីថ្ងៃទី27មីនា បានកើន16,961ករណីបន្ថែមទៀត នាំឱ្យចំនួនអ្នកជំងឺសរុបទូទាំងប្រទេសឡើងដល់102,936នាក់។ ចំនួនអ្នកស្លាប់ថ្មីដោយសារវីរុសកូរ៉ូណានេះ កើន312នាក់បន្ថែមទៀត ដូច្នេះចំនួនអ្នកស្លាប់សរុបនៅសហរដ្ឋអាមេរិក ឡើងដល់1,607នាក់។

នៅទូទាំងពិភពលោក មានអ្នកឆ្លងវីរុសCOVID-19 សរុប593,952នាក់ ក្នុងនោះមាន27,341នាក់បានបាត់បង់ជីវិត និង133,057នាក់ (ស្មើនឹង22.3% នៃចំនួនអ្នកឆ្លងមេរោគសរុប) បានជាសះស្បើយ។ ចំណែកអ្នកជំងឺដែលកំពុងប្រឈមនឹងការស្លាប់ មានចំនួនដល់ទៅ 23,519នាក់៕

ប្រភព៖ សារព័ត៌មានបរទេស

March 28, 2020

COVID-19! មនុស្សជាង27,000នាក់ស្លាប់ដោយសារវីរុសកូរ៉ូណាថ្មី នៅទូទាំងពិភពលោក

តួលេខនៃអ្នកស្លាប់ដោយសារ COVID-19 នៅតែបន្តកើនឡើងនៅសហរដ្ឋអាមេរិក និងអឺរ៉ុប ធ្វើឱ្យចំនួនអ្នកស្លាប់ទូទាំងពិភពលោក កើនដល់27,215នាក់ ក្នុងចំណោមអ្នកឆ្លងមេរោគ 593,656នាក់។

COVID-19 បង្ហាញខ្លួននៅក្នុងប្រទេស និងដែនដីចំនួន199 នៅទូទាំងសកលលោក ក្នុងនោះចំនួនករណីឆ្លងមេរោគនៅសហរដ្ឋអាមេរិក កើនឡើងលឿនជាងគេក្នុងរយៈពេល24ម៉ោងកន្លងទៅនេះ។ សហរដ្ឋអាមេរិក រកឃើញអ្នកជំងឺកូរ៉ូណាថ្មី 16,419ករណីបន្ថែមទៀត ធ្វើឱ្យអ្នកឆ្លងមេរោគសរុបក្នុងប្រទេសនេះឡើងដល់102,396ករណី។

អ៊ីតាលី៖ អ្នកជំងឺសរុប86,498នាក់ ក្នុងនោះមានអ្នកស្លាប់9,134នាក់។
ប្រទេសចិន៖ អ្នកជំងឺសរុប 81,340នាក់ ក្នុងនោះមានអ្នកស្លាប់3,292នាក់។
អេស្ប៉ាញ៖ អ្នកជំងឺសរុប65,719 ក្នុងនោះមានអ្នកស្លាប់5,138នាក់។
អាល្លឺម៉ង់៖ អ្នកជំងឺសរុប50,871 ក្នុងនោះមានអ្នកស្លាប់351នាក់។
បារាំង៖ អ្នកជំងឺសរុប32,964នាក់ ក្នុងនោះមានអ្នកស្លាប់1,995នាក់។
អ៊ីរ៉ង់៖ អ្នកជំងឺសរុប32,332 ក្នុងនោះមានអ្នកស្លាប់2,378នាក់។
អង់គ្លេស៖ អ្នកជំងឺសរុប14,543 ក្នុងនោះមានអ្នកស្លាប់759នាក់។
ស្វីស៖ អ្នកជំងឺសរុប12,928នាក់ ក្នុងនោះមានអ្នកស្លាប់231នាក់។

នៅទូទាំងពិភពលោក មានអ្នកឆ្លងវីរុសCOVID-19 សរុប593,656នាក់ ក្នុងនោះមាន27,215នាក់បានបាត់បង់ជីវិត និង132,526នាក់ (ស្មើនឹង22.3% នៃចំនួនអ្នកឆ្លងមេរោគសរុប) បានជាសះស្បើយ៕

ប្រភព៖ សារព័ត៌មានបរទេស

March 28, 2020

COVID-19! រុស្ស៊ី៖ វិមានក្រឹមឡាំង មានអ្នកឆ្លងវីរុសកូរ៉ូណាហើយ

វិមានក្រឹមឡាំង(Kremlin) នៅថ្ងៃនេះបានប្រកាសថា ខ្លួនកំពុងចាត់វិធានការទប់ស្កាត់ការឆ្លងរាលដាលនៃមេរោគ បន្ទាប់ពីមានបុគ្គលិកម្នាក់ធ្វើការនៅទីនេះ បានឆ្លងវីរុសCOVID-19។

“យើងបានរកឃើញករណីឆ្លង COVID-19 នៅក្នុងវិមានក្រឹមឡាំង។ ប្រធានាធិបតីមិនទាន់បានជួបមនុស្សនេះនៅឡើយ” អ្នកនាំពាក្យនៃវិមានក្រឹមឡាំង លោក Dmitry Peskov មានប្រសាសន៍បែបនេះនៅក្នុងសន្និសីទសារព័ត៌មានមួយនាថ្ងៃទី27មីនា ប៉ុន្តែលោកមិនបានបង្ហើបឱ្យដឹងអំពីអត្តសញ្ញាណអ្នកដែលបានឆ្លងវីរុសCOVID-19នេះនោះទេ។

នេះគឺជាករណីឆ្លងវីរុសCOVID-19 ដំបូងបង្អស់នៅក្នុងវិមានក្រឹមឡាំង។ ប្រទេសរុស្ស៊ី គិតមកដល់ពេលនេះ មានអ្នកឆ្លងមេរោគកូរ៉ូណាជាង1,000នាក់ ក្នុងនោះមាន3នាក់បានស្លាប់ និងជាង40នាក់បានជាសះស្បើយ។ រដ្ឋធានីម៉ូស្គូ បានរកឃើញករណីឆ្លងមេរោគCOVID-19 ច្រើនជាងគេបំផុត ដោយមានរហូតដល់ជាង700ករណី ក្នុងចំណោមអ្នកឆ្លងវីរុសសរុបទូទាំងប្រទេស៕

ប្រភព៖ សារព័ត៌មានបរទេស

March 27, 2020

COVID-19! នាយករដ្ឋមន្ត្រី និងរដ្ឋមន្ត្រីក្រសួងសុខាភិបាលអង់គ្លេស ឆ្លងវីរុសកូរ៉ូណា

រដ្ឋមន្ត្រីក្រសួងសុខាភិបាលអង់គ្លេស លោក Matt Hncock វិជ្ជមានជាមួយវីរុសCOVID-19 ភ្លាមៗក្រោយពីនាយករដ្ឋមន្ត្រី Boris Johnon បានទទួលស្គាល់ថា ខ្លួនក៏បានឆ្លងវីរុសនេះ។

នាយករដ្ឋមន្ត្រីអង់គ្លេស លោក Boris Johnson

“យោងតាមការណែនាំពីខាងមន្ត្រីសុខាភិបាល ខ្ញុំត្រូវបានស្នើឱ្យធ្វើតេស្តរកមេរោគCOVID-19។ ខ្ញុំទទួលបានលទ្ធផលវិជ្ជមាន។ សំណាងល្អណាស់ដែលអាការរោគរបស់ខ្ញុំនៅស្រាល ហើយខ្ញុំនៅតែអាចធ្វើការ ក៏ដូចជាបង្ខាំងខ្លួនឯងនៅក្នុងផ្ទះ”។ លោក Matt Hancock បានបង្ហោះសារបែបនេះនៅលើគណនី Twitter របស់ខ្លួនក្នុងថ្ងៃនេះ។

លោក Matt Hancock រដ្ឋមន្ត្រីក្រសួងសុខាភិបាលអង់គ្លេស

ប្រហែលជា1ម៉ោងមុននោះ នាយករដ្ឋមន្ត្រីអង់គ្លេស Boris Johnson ក៏បានប្រកាសនៅលើ Twitter ថា លោកបានឆ្លងមេរោគកូរ៉ូណានេះដែរ ដោយមានអាការស្រាល ក្ដៅខ្លួន និងក្អក។

បន្ទាប់ពីនាយករដ្ឋមន្ត្រី Boris Johnson ត្រូវបានបញ្ជាក់ថា វិជ្ជមានជាមួយនឹង COVID-19 អ្នកនាំពាក្យនៃវិមានរាជរដ្ឋាភិបាលអង់គ្លេស បានស្នើឱ្យរដ្ឋមន្ត្រីទាំងអស់ បង្ខាំងខ្លួននៅដោយឡែក បើសិនមានអាការរោគកើតឡើង៕

ប្រភព៖ សារព័ត៌មានបរទេស

March 27, 2020

ក្រសួងសុខាភិបាលកម្ពុជាប្ដូរពេលវេលាប្រកាសលទ្ធផលនៃការធ្វើតេស្ត COVID-19 ពីយប់ទៅព្រឹក

ក្រសួងសុខាភិបាលកម្ពុជាថ្មីៗនេះបានប្រកាសថា ក្រសួងនេះនឹងចេញសេចក្ដីប្រកាសព័ត៌មានអំពីស្ថានភាពបញ្ហាវិបត្តិសុខភាព COVID-19 នៅក្នុងប្រទេស នៅចម្លោះម៉ោង9-10ព្រឹករៀងរាល់ថ្ងៃ។

ក្រសួងសុខាភិបាលក៏បានឱ្យដឹងដែរថា គិតត្រឹមថ្ងៃនេះ កម្ពុជាមានអ្នឆ្លងមេរោគកូរ៉ូណា COVID-19 ចំនួន98នាក់ ក្នុងនោះមាន11នាក់បានជាសះស្បើយ និង87នាក់ទៀតកំពុងទទួលការព្យាបាលនៅមន្ទីរពេទ្យ។

ក្នុងចំណោមអ្នកដែលបានឆ្លងវីរុសCOVID-19ទាំងអស់ គឺមាន36ករណីបានរកឃើញនៅខេត្តព្រះសីហនុ 15ករណីនៅខេត្តកំពង់ចាម 13ករណីនៅភ្នំពេញ 8ករណីនៅបាត់ដំបង 5ករណីនៅខេត្តសៀមរាប រួមនឹងករណីមួយចំនួនទៀតត្រូវបានរកឃើញនៅក្នុងខេត្តផ្សេងៗ។

March 27, 2020

ដើម្បីទប់ស្កាត់ការរីករាលដាលនៃជំងឺកូវីដ19 ឃុំចំនួន២ នៅខេត្ដរតនគិរីបានប្រកាសបិទ

លោកឆាយ ធី មេឃុំប៉ាតេ បានថ្លែងប្រាប់អ្នកសារព័ត៌មានយើងនៅថ្ងៃនេះថា ឃុំចំនួន២នៅក្នុងខេត្តរតនគិរី គឺឃុំសេដា នៅក្នុងស្រុកលំផាត់ និងឃុំប៉ាតេ នៅក្នុងស្រុកអូរយ៉ាដាវ បានប្រកាសបិទឃុំដោយហាមឃាត់មនុស្សប្លែកមុខចេញចូល និងប្រាស្រ័យទាក់ទងជាមួយប្រជាពលរដ្ឋដែលរស់នៅក្នុងឃុំទាំងនេះ។ ការបិទឃុំនេះ គឺដើម្បីចូលរួមទប់ស្កាត់ការរីករាលដាលនៃជំងឺកូវីដ19 ដែលកំពុងវាយលុកនៅក្នុងប្រទេសកម្ពុជា បើទោះបីបិទឃុំហាមមនុស្សប្លែកមុខចេញចូលក៏ដោយ ប៉ុន្តែការរកស៊ីជួញដូរទំនិញ គឺធ្វើឡើងជាធម្មតា។ បើតាមលោកឆាយ ធី ឃុំប៉ាតេរបស់លោកនឹងបិទគ្មានការកំណត់ឡើយ ដរាបណាជំងឺកូវីដ19 ត្រូវបានគ្រប់គ្រង់ទាំងស្រុង ទើបបើកឱ្យមានការចេញចូលឡើងវិញ។

March 27, 2020

វេជ្ជបណ្ឌិតនៅអេស្ប៉ាញ ត្រូវបង្ខំចិត្តជ្រើសរើស “អ្នកជំងឺណាគួរស្លាប់ និងអ្នកជំងឺណាគួររស់”

នៅក្នុងបន្ទប់សង្គ្រោះបន្ទាន់នៃមន្ទីរពេទ្យនៅទីក្រុង Madrid វេជ្ជបណ្ឌិត Bernabeu បានចុះហត្ថលេខាលើលិខិតបញ្ជាក់មរណភាពជូនលោកតាម្នាក់ ហើយបានងាកទៅជួយសង្គ្រោះអ្នកជំងឺម្នាក់ផ្សេងទៀតដែលកំពុងដង្ហក់ ដោយទុកឱ្យលោកតាម្នាក់នោះបាត់បង់ជីវិត ដោយគ្មានការជួយសង្គ្រោះ។

“នៅក្នុងស្ថានភាពផ្សេង លោកតានោះនឹងមានឱកាសទទួលបានការជួយសង្គ្រោះជីវិត។ ក៏ប៉ុន្តែ នៅទីនេះមានមនុស្សច្រើនហួសពេក ហើយអ្នកទាំងអស់សុទ្ធតែកំពុងដង្ហក់រកខ្យល់ដូចៗគ្នា” វេជ្ជបណ្ឌិត Daniel Bernabeu ធ្វើការនៅឯមន្ទីរពេទ្យ La Paz (ដែលជាមន្ទីរពេទ្យធំជាងគេមួយនៅក្នុងរាជធានី Madrid របស់ប្រទេសអេស្ប៉ាញ) បានថ្លែងដូច្នេះកាលពីម្សិលមិញ។

វេជ្ជបណ្ឌិត Bernabeu បានឱ្យដឹងថា បន្ទប់ពិសេសទាំងអស់នៅក្នុងមន្ទីរពេទ្យនេះសុទ្ធតែចង្អៀតណែន ហើយក្រុមគ្រូពេទ្យត្រូវបានស្នើឱ្យផ្ដល់អាទិភាពក្នុងការព្យាបាលអ្នកជំងឺដែលមានវ័យក្មេង ព្រោះថា អ្នកជំងឺចាស់ៗដែលបានឆ្លងវីរុសCOVID-19 សុទ្ធតែមានឱកាសជាសះស្បើយតិចតួចបំផុត។ អ្នកជំងឺជាច្រើនបានដាច់ខ្យល់ស្លាប់ខណៈកំពុងស្ថិតនៅក្នុងបន្ទប់រង់ចាំ មុនពេលត្រូវបានជួយសង្គ្រោះ ព្រោះថា ទាំងមន្ទីរពេទ្យ ទាំងបុគ្គលិកពេទ្យ សុទ្ធតែត្រូវធ្វើការលើសចំណុះដូចគ្នា។

នៅឯមន្ទីរពេទ្យ La Paz ដែលមានអគារធំៗចំនួន17អគារ ក្នុងបន្ទប់សង្គ្រោះបន្ទាន់កាលពីថ្ងៃទី24មីនា មានពេលខ្លះត្រូវទទួលអ្នកជំងឺរហូតដល់240នាក់ ដែលកំពុងរង់ចាំចូលសម្រាកព្យាបាល។ ក្រុមគ្រូពេទ្យនៅជួរមុខ មិនមានឈុតការពារការឆ្លងមេរោគគ្រប់គ្រាន់នោះទេ ដោយពួកគេខ្លះពាក់តែអាវធំពីក្រៅ និងពាក់ម៉ាស់តែប៉ុណ្ណោះ។ ក្រុមគ្រូពេទ្យទាំងនេះត្រូវបានស្នើឱ្យនៅឆ្ងាយពីអ្នកជំងឺប្រវែង1ម៉ែត្រ ប៉ុន្តែប្រការនេះគឺមិនអាចទៅរួចនោះទេ។ នេះក៏ជាកត្តាដែលនាំឱ្យបុគ្គលិកសុខាភិបាលប្រមាណជា4,000នាក់(ស្មើនឹង12% នៃអ្នកជំងឺសរុប) របស់អេស្ប៉ាញ បានឆ្លងវីរុសCOVID-19។

ប្រទេសអេស្ប៉ាញ បច្ចុប្បន្ន មានអ្នកជំងឺកូរ៉ូណា COVID-19 ជិត58,000នាក់ ក្នុងនោះមាន4,365នាក់បានបាត់បង់ជីវិត ពោលគឺខ្ពស់ជាងប្រទេសចិន និងទាបជាងប្រទេសអ៊ីតាលីមួយតែប៉ុណ្ណោះ។

គួររំឭកថា កាលពីថ្ងៃទី8មីនា នាយករដ្ឋមន្ត្រីអេស្ប៉ាញ លោក Sanchez បានលើកទឹកចិត្តឱ្យពលរដ្ឋអេស្ប៉ាញចូលរួមក្នុងព្រឹត្តការណ៍ដ៏ធំមួយដើម្បីអបអរថ្ងៃសិទ្ធិនារីអន្តរជាតិ ដោយមិនអើពើចំពោះបម្រាមគោចរនៅភាគខាងជើងប្រទេសនេះ។

ព្រឹត្តិការខាងលើនោះ មានមនុស្សប្រមាណជា120,000នាក់បានចូលរួម ក្នុងនោះមានរដ្ឋមន្ត្រីជាច្រើនរូប រួមនឹងលោក Sanchez និងលោកស្រី Begona Gomez ផងដែរ។ រាជរដ្ឋាភិបាលអេស្ប៉ាញពេលនោះគិតថា ស្ថានភាពអាសន្នរោគនៅពេលនោះអាចគ្រប់គ្រងបាននៅឡើយ។ ប៉ុន្តែ Begona Gomez ដែលជាភរិយារបស់នាយករដ្ឋមន្ត្រីអេស្ប៉ាញ ជាមួយនឹងរដ្ឋមន្ត្រីក្រសួងសមធម៌ Irene Montero និងឧបនាយករដ្ឋមន្ត្រី Carmen Calvo ក៏បានឆ្លងវីរុសCOVID-19.

លោកនាយករដ្ឋមន្ត្រី Sanchez កាលពីថ្ងៃទី15មីនា បានចេញបញ្ជាឱ្យបិទប្រទេសទាំងស្រុង និងចាប់ផ្ដើមចាត់វិធានការថ្មីៗ និងខ្លាំងក្លាជាបន្តបន្ទាប់។ ក៏ប៉ុន្តែ វាហាក់ដូចជាយឺតពេលបន្តិចទៅហើយ ខណៈដែលប្រទេសនេះកំពុងខ្វះខាត់ស្ទើរគ្រប់យ៉ាងក្នុងវិស័យសុខាភិបាល៕

ប្រភព៖ សារព័ត៌មានបរទេស

March 27, 2020

ហេតុផល ៣ សំខាន់ ដែលចិនបញ្ជូនគ្រូពេទ្យមកកម្ពុជា

អតីតរដ្ឋមន្ត្រីការបរទេសកម្ពុជា ឯកឧត្តម ហោ ណាំហុង បានបង្ហាញនូវក្តីត្រេកអរ និងអរគុណរដ្ឋាភិបាលចិន ដែលបញ្ជូនគ្រូពេទ្យជំនាញ និងគ្រឿងបរិក្ខារវេជ្ជសាស្ត្រ មកកាន់ប្រទេសកម្ពុជា។ ឯកឧត្តម លើកឡើងថា ដំណើរមកកាន់កម្ពុជារបស់គ្រូពេទ្យចិននៅពេលនេះ បង្ហាញពីទំនាក់ទំនងដ៏ល្អរវាងប្រទេសទាំងពីរ។

កម្ពុជាជាប្រទេសទី១ នៅក្នុងអាស៊ាន ដែលរដ្ឋាភិបាលចិនបានបញ្ជូនក្រុមគ្រូពេទ្យជំនាញ ដើម្បីចូលរួមប្រយុទ្ធប្រឆាំងនឹងជំងឺកូវីដ ១៩ ។ នេះជាការបញ្ជាក់របស់ឯកឧត្តមឧបនាយករដ្ឋមន្ត្រី ហោ ណាំហុង ក្នុងសារសំឡេងតាមប្រព័ន្ធតេឡេក្រាម។

អតីតប្រមុខការទូតចាស់វស្សារបស់កម្ពុជារូបនេះ បានពន្យល់នូវហេតុ ៣ យ៉ាងសំខាន់ ដែលចិនបញ្ជូនគ្រូពេទ្យជំនាញខ្លួនមកកម្ពុជា៖

ហេតុផលទី1. ដោយសារដំណើរទស្សនកិច្ចរបស់សម្តេចតេជោ ទៅកាន់ប្រទេសចិន ដែលឯកឧត្តមចាត់ទុកថា វាមានអត្ថន័យនយោបាយយ៉ាងជ្រាលជ្រៅ ទៅកាន់ថ្នាក់ដឹកនាំ និងប្រជាជនចិន និងធ្វើឲ្យចិនមិនអាចបំភ្លេចបាន។
ហេតុផលទី2. ដោយសារ កម្ពុជានិងចិន ជាដៃគូយុទ្ធសាស្ត្រគ្រប់ជ្រុងជ្រោយនឹងគ្នា ដែលជាហេតុនាំឲ្យប្រទេសទាំងពីរត្រូវជួយគ្នាទៅវិញទៅមក។
ហេតុផល ទី3. ដែលនាំឲ្យចិនជួយកម្ពុជានៅពេលនេះដែរ គឺឯកឧត្តម ហោ ណាំហុង យល់ថា ដោយសារកម្ពុជានិងចិន បានចុះហត្ថលេខាអនុវត្តគោលនយោបាយជោគវាសនារួមគ្នា។

ប្រភពពី៖ Bayontv

March 27, 2020

ក្រុមគ្រូពេទ្យចិនបានចងក្រងសៀវភៅពិសេសណែនាំអំពីការទប់ស្កាត់ និងការពារជំងឺ Covid-19 សម្រាប់ចែករំលែកការយល់ដឹងដល់ប្រជាពលរដ្ឋ

គណៈកម្មាធិការសុខាភិបាលខេត្តយូនណាននៃសាកលវិទ្យាល័យវេជ្ជសាស្ត្រគុនមីង និងបណ្ឌិតសភាវិទ្យាសាស្ត្រវេជ្ជសាស្ត្រអប់រំខេត្តយូនណាន រួមគ្នាចងក្រងសៀវភៅពិសេសមួយក្បាលណែនាំពីការទប់ស្កាត់ និងការពារជំងឺកូវីដ19 ឡើងដើម្បីចែករំលែកការយល់ដឹងដល់ប្រជាពលរដ្ឋ។

សៀវភៅនេះផងដែរ បានផ្តល់នូវចំណេះដឹងទូទៅនៃជំងឺកូវីដ១៩ ការបង្ហាញពីរោគសញ្ញា ការការពារផ្ទាល់ពីមេរោគ របបអាហារបែបវិទ្យាសាស្ត្រ និងការឆ្លើយតបកម្លាំងសង្កត់ខាងផ្លូវចិត្តក្នុងអំឡុងពេលការរីករាលដាលនៃជំងឺនេះ។

សៀវភៅនេះត្រូវបានបកប្រែជាភាសាខ្មែរ ដើម្បីសម្រួលដល់ការអានរបស់ប្រជាពលរដ្ឋខ្មែរ ហើយក៏បានលើកបង្ហាញនូវការឆ្លើយសំណួរមួយចំនួនពីអ្នកជំនាញលើជំងឺកូវីដ19នេះផងដែរ។

March 27, 2020

(ទស្សនារូបភាព)កម្មករនៅក្នុងទីក្រុងវូហាន អង្គុយហូបបាយថ្ងៃត្រង់ ឆ្ងាយពីគ្នា 2ម៉ែត្រ ក្រោយរោងចក្របើកដំណើរការឡើងវិញ

អាចនិយាយបានថា ជារូបភាពនៃក្ដីឯកោ ដែលកក់ក្ដៅក្នុងចិត្តសម្រាប់បរិយាកាសក្នុងអំឡុងពេលសម្រាកថ្ងៃត្រង់ នៅក្នុងរោងចក្រផលិតរថយន្ត តុងហ្វឹង ក្នុងទីក្រុងវូហាន មណ្ឌលហ៊ូពេយ មណ្ឌលកណ្ដាលនៃការឆ្លងរាលដាលរបស់មេរោគវីរុសកូវីដ-19 ព្រោះបណ្ដាបុគ្គលិកទាំងអស់បាននាំគ្នាឱនមុខយកចិត្តទុកដាក់លើការញ៉ាំអាហារថ្ងៃត្រង់របស់ខ្លួនឯង នៅលើកៅអីជ័រពណ៌ក្រហមដែលរៀបជាជួរមួយៗ រក្សាគម្លាតឆ្ងាយពីគ្នាប្រមាណជា 2ម៉ែត្រ ដើម្បីការពារការឆ្លងសាយភាយរបស់មេរោគវីរុសកូរ៉ូណាប្រភេទថ្មី ឬកូវីដ-19 ក្រោយពីស្ថានការណ៍រោគរាតត្បាតក្នុងប្រទេសចិនវិវឌ្ឍទៅក្នុងផ្លូវល្អប្រសើឡើងជាលំដាប់ ធ្វើឱ្យធុរកិច្ចជាច្រើនវិលត្រឡប់មកដំណើរការជាថ្មីឡើងវិញ។

បន្ទាប់ពីបានបញ្ចូលថាមពលពេញវិញហើយ ពួកគេក៏នាំគ្នាត្រឡប់ទៅប្រតិបត្តិការងារយ៉ាងសស្រោកសស្រាំបន្តទៀត…ទាំងអស់នេះ វិធានការនេះបានធ្វើឱ្យអ្នកលេងបណ្ដាញសង្គមនៅក្នុងប្រទេសចិន មានអារម្មណ៍កោតសរសើរ ចំពោះភាពមានវិន័យ និងនឹកអាណិតអ្នកប្រើកម្លាំងពលកម្មទាំងនោះជាខ្លាំង អ្នកខ្លះបានសម្ដែងការយល់ឃើញថា បើជួយរៀបចំតុឱ្យពួកគាត់ផង ប្រហែលជាល្អខ្លាំងណាស់…។

ប្រភព៖ សារព័ត៌មានបរទេស

March 27, 2020

Category: សុខភាព