អង្គការសុខភាពពិភពលោក (WHO) កាលពីម្សិលមិញ (២៥ មិថុនា) បានអះអាងថា ជំងឺអុតស្វាបច្ចុប្បន្ន មិនទាន់ឈានដល់ស្ថានភាពអាសន្នផ្នែកសុខាភិបាលកម្រិតសកល បើទោះជាប្រធាន WHO បានសម្ដែងការព្រួយបារម្ភខ្លាំងចំពោះការឆ្លងរាលដាលនៃជំងឺនេះ។
ប្រកាសអំពីសេចក្ដីសម្រេចរបស់គណៈកម្មការជំនាញរបស់ WHO កាលពីថ្ងៃទី ២៣ មិថុនា លោក Tedros Adhanom Ghebreyesus ប្រធាន WHO បានឱ្យដឹងថា គណៈកម្មការទទួលបន្ទុកលើបញ្ហាបន្ទាន់នេះ បានចែករំលែកនូវការព្រួយបារម្ភអំពីទំហំ និងល្បឿននៃការឆ្លងរាលដាលរបស់ជំងឺអុតស្វានាបច្ចុប្បន្ន។
យោងតាមលោក Tedros របាយការណ៍របស់គណៈកម្មការខាងលើបានណែនាំថា នៅក្នុងពេលបច្ចុប្បន្ន ជំងឺអុតស្វា មិនទាន់ក្លាយជាស្ថានភាពអាសន្នស្ដីពីសុខភាពសាធារណៈសកល (PHEIC) នៅឡើយ។ PHEIC គឺជាកម្រិតនៃភាពអាសន្នខ្ពស់បំផុតដែល WHO អាចប្រកាស។
គិតចាប់ពីដើមខែឧសភា ករណីឆ្លងជំងឺអុតស្វាជាច្រើនត្រូវបានរកឃើញនៅក្នុងបណ្ដាប្រទេសនៅ អាហ្វ្រិកកណ្ដាល និង អាហ្វ្រិកខាងលិច ជាទីដែលជំងឺនេះ កន្លងមកត្រូវបានចាត់ទុកថាជាជំងឺឆ្លងដោយតំបន់។ ជាសរុប មកដល់បច្ចុប្បន្ន ការឆ្លងជំងឺអុតស្វាចំនួនជាង ៣,២០០ ករណី និងស្លាប់ ១ ករណី ត្រូវបានរាយការណ៍ទៅកាន់ WHO ក្នុងនោះ ភាគច្រើនគឺនៅ តំបន់អឺរ៉ុបខាងលិច៕
