Category: សុខភាព

អ្នកកើតរោគទឹកនោមផ្អែមគួរចៀសវាងបន្លែណាខ្លះ?
គឺជាការពិតដែលថា បន្លែល្អចំពោះសុខភាព គុណសម្បត្តិវិសេសរបស់បន្លែមានច្រើនណាស់ តែសម្រាប់អ្នកដែលកើតជំងឺទឹកនោមផ្អែម ឬអ្នកដែលត្រូវគ្រប់គ្រងកម្រឹតជាតិស្ករជាពិសេសនោះ អាចមិនស័ក្តិសមជាមួយនឹងបន្លែប្រភេទខ្លះ។ ថ្ងៃនេះ ទំព័រសុខភាព ទស្សនាវដ្តី ឡារ៉ែន មានព័ត៌មានល្អៗក្នុងការជ្រើសរើសញ៉ាំបន្លែសម្រាប់អ្នកកើតជំងឺទឹកនោមផ្អែមមកជម្រាបមិត្តអ្នកអានដូចតទៅ។
– បន្លែដែលមានជាតិស្ករ 3 – 5 ភាគរយ
ផ្លែត្រប់ ឃ្លោក បន្លែតាំងអោ ស្ពៃបូកគោ កញ្ឆែត ត្រសក់ ននោង ស្លឹកផ្ទី ទំពាំង មើមឆៃថាវ ត្រឡាច សាលាដ ត្រកួនចិនត្រួយល្ពៅ ម្រះ សណ្តែកបណ្តុះ ខាត់ណា ផ្កាគុយឆាយ ស្ពៃចង្កឹះ ស្ពៃក្តោប ស្អំ ក្រឪឈូក។
– បន្លែដែលមានជាតិស្ករ 5 – 10 ភាគរយ
សណ្តែកសៀង ស្លឹកឆះភ្លូ គល់ខ្ទឹម ត្រយូងចេក ខ្ទឹមបារាំង ស្លឹកម្រំ ផ្កាអង្គារដី ខ្ញី ស្នៀតពោត ផ្លែល្ហុងខ្ចី ស្លឹកកន្ទុំទេស និងផ្លែកន្ទុំទេសខ្ចី។
– បន្លែដែលមានជាតិស្ករ 15 – 20 ភាគរយ
ផ្កាអង្កាញ់ ត្រួយអំពឹល ស្លឹកបន្លែផ្អែម ស្លឹកងប់ មើមដំឡូងបារាំង គ្រាប់សណ្តែកឡាន់តៅ។
-បន្លែដែលមានជាតិស្ករ 20 – 30 ភាគរយ
មើមឈូក មើមក្តួច ត្រាវ ដំឡូងជ្វា ស្លឹកអង្កាញ់ មើមឈូកចិន។
អានមកដល់ត្រង់នេះហើយ ក៏សូមប្រកាស់ប្រាប់គ្នាឱ្យច្បាស់ៗតែម្តងថា បន្លែក្នុងក្រុមដែលមានជាតិស្ករ 20 – 30 ភាគរយនេះ មិនស័ក្តិសមជាមួយអ្នកដែលកើតជំងឺទឹកនោមផ្អែមនោះទេ និងសាកល្បងពិនិត្យម្តងទៀតមើលថា តើគួរកាត់បន្ថយបន្លែដែលខ្លួនចូលចិត្តអ្វីខ្លះ៕
April 3, 2020
មិនសរសើមិនបានគ្រូពេទ្យខ្មែរយើង បានព្យាបាលទារកអាយុ 4ខែម្នាក់ជាសះស្បើយ សរុបអ្នកជាសះស្បើយទាំងអស់ជាង 30នាក់
ត្រឹមម៉ោង 7ព្រឹក ថ្ងៃទី3 ខែមេសា ឆ្នាំ2020 ស្ថានភាពជំងឺកូវីដ19 នៅកម្ពុជា មាន៖
– ទារកប្រុសអាយុ ០៤ខែ បានជាសះស្បើយ ដោយទទួលបានលទ្ធផលតេស្តអវិជ្ជមានវិរុសកូរីដ19 ចំនួន
2លើក ត្រូវបានអនុញ្ញាតឲ្យចេញពីមន្ទីរពេទ្យកុមារជាតិ។ ទារកនេះ ជាកូនបង្កើតរបស់បុរសជនជាតិបារាំង
អាយុ 35ឆ្នាំ ដែលទើបបានព្យាបាលជាសះស្បើយផងដែរ។ គួររំលឹកថា ទារកនេះបានព្យាបាលនៅមន្ទីរពេទ្យ
គន្ធបុប្ឆាទី4 ហើយត្រូវបានបញ្ជូនត្រឡប់មកព្យាបាលបន្តនៅមន្ទីរពេទ្យកុមារជាតិវិញ។
– អ្នកព្យាបាលជាសះស្បើយ សរុបចំនួនកើនដល់ 35នាក់ (ស្មើនឹង 30,70% នីនចំន្លូន
អ្នកមានវីរុសកូរីដ19ទាំងអស់) ដែលមានបុរសជនជាតិចិន 1នាក់ ស្ត្រីជនជាតិអង់គ្លេស 2នាក់
បុរសជនជាតិអង់គ្លេស 1នាក់ បុរសជនជាតិប៊ែលហ្សិក 1នាក់ បុរសជនជាតិបារាំង 4នាក់ (ក្នុង
នេះ មានទារកអាយុ 8ខែ 1នាក់) ស្ត្រីជនជាតិបារាំង 5នាក់ និងបុរសជនជាតិខ្មែរ 21នាក់ (គិត
ចាប់ពីខែមករាដល់បច្ចុប្បន្ននេះ)
– អ្នកដែលកំពុងសម្រាកព្យាបាល បានថយចុះមកនៅសរុបចំនួន ៧៩នាក់ (ស្ត្រី 25នាក់ និង
បុរស 54នាក់) នៅតាមមន្ទីរពេទ្យរដ្ឋនៅថ្នាក់ជាតិ និងថ្នាក់ខេត្ត
– អ្នកមានវីរុសកូរវីដ19 / ដែលបានរកឃើញទាំងអស់ (រាប់ទាំងអ្នកដែលបានព្យាបាលជាសះ
ស្បើយ និងអ្នកដែលកំពុងព្យាបាល) នៅទូទាំងប្រទេសសរុបចំនួន 114នាក់ (ស្ត្រី 32នាក់ និងបុរស
82នាក់)។
អានសេចក្ដីលំអិត
April 3, 2020
នៅរួចខ្លួន 15ប្រទេស!!…តើប្រទេសណាខ្លះលើពិភពលោក ដែលនៅមិនទាន់មានរបាយការណ៍អ្នកឆ្លងមេរោគកូវីដ-19?
ទីភ្នាក់ងារព័ត៌មាន Foxnews បានរាយការណ៍ថា វីរុសកូរ៉ូណាប្រភេទថ្មី ឬកូវីដ-19 នៅតែឆ្លងរាលដាលយ៉ាងសាហាវទូទាំងពិភពលោកក្នុងអត្រាទ្វេគុណ ក្នុងរយៈពេល1ម៉ោងៗដែលកន្លងផុតទៅ ទាំងប្រទេសធំ និងប្រទេសតូចសុទ្ធតែបានរាយការណ៍អំពីការរកឃើញអ្នកឆ្លងមេរោគថ្មីជាបន្តបន្ទាប់ ក៏ប៉ុន្តែ រហូតមកទល់ថ្ងៃព្រហស្បតិ៍(ទី2មេសា)ម្សិលមិញ នៅសល់ប្រទេសចំនួន 15ទៀត ដែលនៅមិនទាន់មានរបាយការណ៍ពីការរកឃើញអ្នកឆ្លងមេរោគវីរុសមរណៈនេះនៅឡើយ។
កាលពី 3សប្ដាហ៍ដំបូង ទីភ្នាក់ងារព័ត៌មាន Foxnews បានរាយការណ៍ថា នៅមាន 63ប្រទេសទៀតដែលមិនទាន់ការប្រកាសថា រកឃើញអ្នកឆ្លងមេរោគកូវីដ-19 នៅក្នុងតំបន់របស់ពួកគេនៅឡើយ មុននឹងថយចុះមកនៅ 19ប្រទេសកាលពីសប្ដាហ៍មុន និងចុងក្រោយបំផុត កាលពីថ្ងៃព្រហស្បតិ៍(ទី2មេសា)ម្សិលមិញ នៅសល់តែ 15ប្រទេសប៉ុណ្ណោះ ដែលមិនទាន់មានរបាយការណ៍អំពីអ្នកឆ្លងមេរោគនៅក្នុងប្រទេសរបស់ពួកគេទៅកាន់ស្ថាប័នពិភពលោកដែលពាក់ព័ន្ធនឹងរឿងនេះ ខណៈដែលចំនួនអ្នកឆ្លងមេរោគទូទាំងពិភពលោកបានកើនឡើងធ្លុះ 1លាននាក់ទៅហើយ និងស្លាប់ចំនួន 51,465នាក់។
តទៅនេះ គឺបញ្ជីឈ្មោះប្រទេសទាំងនោះ ព្រមជាមួយចំនួនប្រជាជនរបស់ពួកគេ៖ 1.ខូម៉ូរ៉ូស(814,000នាក់) 2.សាធារណរដ្ឋ ឃិរិបាស(116,300នាក់) 3.រាជាណាចក្រ ឡេសូថូ(2.2លាននាក់) 4.ម៉ាឡាវី(18.6លាននាក់) 5.ប៉ាឡៅ(21,000នាក់) 6.សាមួ(196,440នាក់) 7.សៅទូមេ និងព្រិនស៊ីពី(204,300នាក់) 8.បណ្ដុំកោះសូឡូម៉ុន(611,300នាក់) 9.ស៊ូដង់ខាងត្បូង(12.6លាននាក់) 10.ថាជិគីស្ថាន(8.9លាននាក់) 11.តង់ហ្កា(108,000នាក់) 12.ទើកមេនីស្ថាន(5.8លាននាក់) 13.ទូវ៉ាលូ(11,192នាក់) 14.វ៉ានូអាទូ(276,250នាក់) 15.យេមែន(28.2លាននាក់)។
យ៉ាងណាក៏ដោយ ក្រុមអាជ្ញាធរសាធារណៈសុខាភិបាល និងអ្នកជំនាញការរបស់ពិភពលោក បានវិភាគពីព័ត៌មានទាំងនោះយ៉ាងប្រយ័ត្នប្រយែងបំផុត ដោយសារតែ បើសិនជាប្រទេសណាមួយមិនបានរាយការណ៍ពីករណីអ្នកឆ្លងមេរោគកូវីដ-19 នោះមិនមែនមានន័យថា ពួកគេមិនមានអ្នកឆ្លងមេរោគនោះទេ ព្រោះនៅក្នុងនោះ មួយចំណែកខ្លះអាចមិនមានធនធានមនុស្ស និងបច្ចេកទេសសម្រាប់ពិនិត្យរកមេរោគដែលគួរឱ្យជឿទុកចិត្តបាន និងប្រទេសខ្លះទៀត ក៏ជាប្រធានបទពាក់ព័ន្ធនឹងការជិះជាន់សង្កត់សង្កិនរបស់អំណាចផ្ដាច់ការដែរ។
ចំណែកឯ ប្រទេសកូរ៉េខាងជើង ដែលមានព្រំដែនជាប់នឹងប្រទេសចិន ចំណុចដែលការឆ្លងរាលដាលបានចាប់កំណើតឡើងកាលពីចុងឆ្នាំទៅនោះ មិនទទួលស្គាល់ថា មានការឆ្លងរាលដាលនៃមេរោគកូវីដ-19នៅក្នុងប្រទេសរបស់ខ្លួនឡើយ តែយ៉ាងណាក៏ដោយ Foxnews បានយោងលើព័ត៌មានសម្ងាត់របស់សហរដ្ឋអាមេរិក និងសារព័ត៌មានក្នុងតំបន់ដែលជឿថា ក្រុងព្យុងយ៉ាងកំពុងតែតស៊ូប្រយុទ្ធនឹងករណីអ្នកឆ្លងមេរោគកំណាចនេះជាច្រើនពាន់នាក់ ខណៈដែលសារព័ត៌មាន ហ្វៃនេនសៀល ថាមស៍ បានរាយការណ៍កាលពីថ្ងៃពុធ(ទី1មេសា)ថា ក្រុងព្យុងយ៉ាង បានទំនាក់ទំនងទៅអង្គការអន្តរជាតិជាច្រើនយ៉ាងស្ងាត់ៗ ដើម្បីសុំការជួយសង្គ្រោះក្នុងការគ្រប់គ្រងការឆ្លងរាតត្បាតនេះ៕
ប្រភព៖ សារព័ត៌មានបរទេស
April 3, 2020
អ្នកវិទ្យាសាស្ត្រចិន សង្ឃឹមថា វ៉ាក់សាំង COVID-19 ដែលត្រូវតេស្ត អាចនឹងយកទៅធ្វើតេស្តដល់បរទេស
អ្នកវិទ្យាសាស្ត្រចិន ដែលកំពុងធ្វើតេស្ដលើវ៉ាក់សាំងការពារវីរុស COVID-19 នឹងប្រកាសលទ្ធផលលើការធ្វើតេស្ដសាកល្បងលើកទី1 នៅក្នុងខែមេសានេះ។ ជាងនេះទៀត អ្នកជំនាញដដែលសង្ឃឹមថា អាចបន្តធ្វើតេស្ដសាកល្បងក្រោយៗទៀតនៅក្រៅប្រទេសចិន។
លោក Chen Ling អ្នកឯកទេសផ្នែកវីរុសនៅមន្ទីរពិសោធន៍ជំងឺផ្លូវដង្ហើម State Key បានលើកឡើងថា ការធ្វើតេស្ដសាកល្បងនៅដំណាក់កាលទី2 និងទី3 អាចនឹងត្រូវការអ្នកចូលរួមរាប់ពាន់នាក់ និងអាចធ្វើតេស្ដសាកល្បងនៅប្រទេសដែលកំពុងឆ្លងវីរុសខ្លាំង ដើម្បីទទួលបានលទ្ធផលកាន់តែឆាប់ និងត្រឹមត្រូវច្បាស់លាស់។ លោកបន្ថែមថា ប្រទេសអាចទប់ស្កាត់ការឆ្លងវីរុសCOVID-19 បានលឿនពេក គឺធ្វើឱ្យមិនមានករណីឆ្លងសម្រាប់ធ្វើតេស្ដសាកល្បងនៅដំណាក់កាលក្រោយ។

ប្រសិនបើ ធ្វើតេស្ដលើមនុស្ស 10,000នាក់ហើយលទ្ធផលបង្ហាញថា មានតែមនុស្ស 100នាក់អាចបង្កើតជាអង់ទីគ័រប្រឆាំងវីរុសនេះបាន លទ្ធផល 0 ,01% នេះមិនគ្រប់គ្រាន់ក្នុងការប្រើប្រាស់វ៉ាក់សាំងនេះទៅលើមនុស្សទូទៅទេ។
លោកស្រី Chen Wei អ្នកជំនាញជំងឺឆ្លង និងវីរុសនៅសាកលវិទ្យាល័យ វិទ្យាសាស្ត្រវេជ្ជសាស្ត្រយោធា បានប្រាប់ទៅសារព័ត៌មាន China Daily ថា ប្រសិនជាលទ្ធផលតេស្ដលើកដំបូងបញ្ជាក់ថា វ៉ាក់សាំងមានសុវត្ថិភាព និងមានលទ្ធផលតាមដែលចង់បាន ប្រទេសចិននឹងបន្តធ្វើតេស្ដរកប្រសិទ្ធភាពវ៉ាក់សាំងនេះនៅប្រទេសផ្សេង បើវីរុសនេះនៅតែបន្តរាតត្បាត។ អ្នកស្រីបានបន្តទៀតថា មានប្រទេសជាច្រើនមានចំណាប់អារម្មណ៍សហការជាមួយក្រុមអ្នកវិទ្យាសាស្ត្ររបស់ប្រទេសចិនក្នុងការធ្វើតេស្ដវ៉ាក់សាំងនេះ។
ការធ្វើតេស្ដសាកល្បងវ៉ាក់សាំងលើកដំបូងធ្វើឡើងនៅទីក្រុងវូហាននៅថ្ងៃទី16 ខែមីនា ដែលមានអ្នកស្ម័គ្រចិត្តចាក់វ៉ាក់សាំងនេះ 108នាក់៕
April 3, 2020
ធ្លុះ 1លាននាក់ហើយ!! ចំនួនអ្នកឆ្លងមេរោគកូវីដ-19ទូទាំងពិភពលោក អាមេរិកធ្ងន់ធ្ងរបំផុត លើស 2.3សែននាក់
សារព័ត៌មានរ៉យទ័របានរាយការណ៍ដោយយោងតាមព័ត៌មានពីមហាវិទ្យាល័យ ចន ហប់គីនស៍ថា ចំនួនអ្នកឆ្លងមេរោគកូរ៉ូណាប្រភេទថ្មី ឬកូវីដ-19 បានកើនឡើងលើស 1លាននាក់ហើយកាលពីថ្ងៃព្រហស្បតិ៍(ទី2មេសា)ម្សិលមិញ ដោយរោគរាតត្បាតដ៏ចង្រៃនេះ នៅតែចម្លងមេរោគយ៉ាងធ្ងន់ធ្ងរនៅក្នុងប្រទេសអាមេរិក ខណៈដែលចំនួនអ្នកស្លាប់នៅតែកើនឡើងជារឿយៗ ទាំងនៅក្នុងប្រទេសអ៊ីតាលី និងអេស្ប៉ាញ។
វេបសាយតាមដានស្ថានការណ៍ការឆ្លងរាលដាលនៃមេរោគកូវីដ-19 បែបអនឡាញ របស់មហាវិទ្យាល័យ ចន ហប់គីនស៍ ថែមទាំងបានរកឃើញថា វីរុសកូវីដ-19បានប្រហារជីវិតមនុស្សទូទាំងពិភពលោកលើស 51.000នាក់ហើយទៀតផង ដោយប្រទេសដែលមានអ្នកស្លាប់ច្រើនជាងគេបំផុតគឺ អ៊ីតាលី តាមក្រោយដោយអេស្ប៉ាញ និងសហរដ្ឋអាមេរិក។
តួលេខរបស់មហាវិទ្យាល័យ ចន ហប់គីនស៍ បានបង្ហាញឱ្យដឹងពីព័ត៌មានដ៏គួរឱ្យភ្ញាក់ផ្អើលមួយ ក្រោយពីបានរកឃើញថា ពិភពលោកបានប្រើពេលវេលាប្រមាណជា 55ថ្ងៃក្នុងការមានអ្នកឆ្លងមេរោគកូវីដ-19 នេះគ្រប់ 100,000នាក់ដំបូង តែបន្ទាប់ពីនោះមកក៏ឡើងធ្លុះដល់ខ្ទង់ 500,000នាក់នៅថ្ងៃទី76(21ថ្ងៃក្រោយ) មុននឹងវីរុសនេះប្រើពេលវេលាថែមទៀតត្រឹមតែ 8ថ្ងៃប៉ុណ្ណោះ រាប់តាំងពីពេលនោះ ក្នុងការចម្លងមេរោគទៅមនុស្សលោកទ្វេ 1ជា2 រហូតដល់លើស 1លាននាក់។
ចំនួនអ្នកឆ្លងមេរោគជារួមនៅថ្ងៃព្រហស្បតិ៍(ទី2មេសា) កើនឡើងពីមួយថ្ងៃមុននោះ 10% ដែលតួលេខនេះអាចនិយាយបានថា គឺជាលើកដំបូងហើយដែលមានការចម្លងមេរោគរបស់កូវីដ-19 បានកើនឡើងក្នុងកម្រិតតួលេខ 2ខ្ទង់ រាប់ចាប់តាំងពីវីរុសកូរ៉ូណាប្រភេទថ្មីនេះចាប់ផ្ដើមឆ្លងរាលដាលចេញមកក្រៅប្រទេសចិន។
ពេលនេះ មានប្រទេស និងតំបន់ផ្សេងៗ 117កន្លែង បានរាយការណ៍ពីការរកឃើញអ្នកឆ្លងមេរោគលើស 100ករណី និង 50កន្លែង មានអ្នកឆ្លងមេរោគលើស 1,000ករណី និងមាន 7ប្រទេស ដែលបានរាយការណ៍អំពីការរកឃើញអ្នកឆ្លងមេរោគលើស 50,000នាក់ ភាគច្រើននៅក្នុងទ្វីបអឺរ៉ុប។
បច្ចុប្បន្នអ្នកស្លាប់ទូទាំងពិភពលោក ស្ថិតក្នុងកម្រិតលើសពី 5% របស់គ្រប់ករណីអ្នកឆ្លងមេរោគដែលមានការរាយការណ៍ជាផ្លូវការ ដោយសហរាជអាណាចក្រ, សហរដ្ឋអាមេរិក, និងប្រទេសអេស្ប៉ាញ សុទ្ធតែបានរាយការណ៍ពីចំនួនអ្នកស្លាប់កើនឡើងយ៉ាងច្រើនក្នុងអំឡុងពេលមិនប៉ុន្មានថ្ងៃកន្លងមកនេះ។
ក្នុងករណីអ្នកឆ្លងមេរោគទាំងអស់របស់ពិភពលោក មានប្រមាណ 22% ស្ថិតក្នុងសហរដ្ឋអាមេរិក(ប្រមាណ 238,000នាក់) ចំណែកអ៊ីតាលី និងអេស្ប៉ាញ គិតត្រួសៗប្រមាណជា 10%ក្នុង1ប្រទេស ខណៈដែលចិន ប្រទេសដែលមេរោគវីរុសកើតឡើងមុនគេនោះ មានអ្នកឆ្លងមេរោគគិតជាភាគរយ ប្រមាណ 8% នៃចំនួនអ្នកឆ្លងមេរោគទាំងអស់របស់ពិភពលោក ដែលនេះជាភ័ស្តុតាងជាក់ស្ដែងថា មណ្ឌលកណ្ដាលនៃការឆ្លងសាយភាយ បានចូលមកដល់អឺរ៉ុប និងអាមេរិកហើយ។
ទាំងអស់នេះ បើរាប់គ្រប់ប្រទេសនៅក្នុងអឺរ៉ុបរួមគ្នា ពួកគេមានចំនួនអ្នកឆ្លងមេរោគ គិតទៅជាងពាក់កណ្ដាលនៃអ្នកឆ្លងមេរោគទូទាំងពិភពលោក និងមានអ្នកស្លាប់រួមគ្នាច្រើនជាង 70% នៃចំនួនអ្នកស្លាប់ទូទាំងពិភពលោក ដោយប្រទេសជាច្រើននៅភាគខាងត្បូងនៃទ្វីបអឺរ៉ុប ដែលជាសង្គមប្រជាជនវ័យចំណាស់ បានក្លាយជាប្រទេសដែលរងផលប៉ះពាល់ពីការឆ្លងរាតត្បាតនេះធ្ងន់ធ្ងរបំផុត៕
ប្រភព៖ សារព័ត៌មានបរទេស
April 3, 2020
លទ្ធផលពិសោធន៍ថ្មី៖ COVID-19 អាចរក្សាជីវិតបាន7ថ្ងៃនៅលើម៉ាស់(វីដេអូ)
“ថ្វីបើវីរុសCOVID-19 អាចរក្សាជីវិតរបស់វាបានដល់ទៅ7ថ្ងៃនៅលើម៉ាស់ ប៉ុន្តែពួកវាក៏ងាយនឹងត្រូវសម្លាប់ដោយវិធីសាមញ្ញ” នេះបើតាមការសិក្សាស្រាវជ្រាវថ្មីរបស់សាកលវិទ្យាល័យហុងកុង។
លទ្ធផលនៃការសិក្សាស្រាវជ្រាវនេះត្រូវបានប្រកាសកាលពីថ្ងៃទី15មីនា នៅលើគេហទំព័រ medRxiv របស់ក្រុមអ្នកវេជ្ជសាស្ត្រនៃសាកលវិទ្យាល័យហុងកុង។ ការសិក្សាស្រាវជ្រាវនេះបានបង្ហាញថា រយៈពេលនៃការរស់រានមានជីវិតរបស់វីរុសCOVID-19 មានភាពខុសគ្នាអាស្រ័យទៅលើបរិយាកាស ឬផ្ទៃនៃវត្ថុដែលវាកំពុងស្ថិតនៅ។
ក្រុមអ្នកវិទ្យាសាស្ត្របានបន្តក់វីរុសដែលគេបានបណ្ដុះ 1តំណក់ទៅលើផ្ទៃលើនៃវត្ថុមួយចំនួន រួមមាន ក្រដាស ឈើក្រដាសជូតមាត់ ក្រណាត់ វ៉ែនតា ប្រាក់ ដែកអ៊ីណុក ជ័រ រួមនឹងម៉ាស់ជាដើម។
ជាលទ្ធផល ក្រុមអ្នកវេជ្ជសាស្ត្រមិនបានរកឃើញវីរុសCOVID-19 នៅលើក្រដាស និងក្រដាសជូនមាត់នោះទេ បន្ទាប់ពីបានបន្តក់មេរោគរយៈពេល3ម៉ោង។
COVID-19 ក៏មិនមាននៅជាប់នៅលើឈើ និងក្រណាត់ បន្ទាប់ពី2ថ្ងៃក្រោយការបន្តក់មេរោគ។ បន្ទាប់ពីរយៈពេល4ថ្ងៃ គេក៏មិនឃើញមានវីរុសនេះនៅជាប់នៅលើកញ្ចក់វ៉ែនតា និងក្រដាសប្រាក់នោះដែរ។ វីរុសកូរ៉ូណាCOVID-19 អាចរក្សាជីវិតរបស់វាបានដល់ទៅ7ថ្ងៃ នៅលើដែកអ៊ីណុក និងជ័រ។
អ្វីដែលគួរឱ្យបារម្ភជាងគេនោះគឺថា នៅផ្ទៃខាងក្រៅនៃម៉ាស់ពេទ្យ (surgical mask) វីរុសនេះអាចរក្សាជីវិតរបស់វាបានដល់ទៅ7ថ្ងៃ ដូចទៅនឹងនៅលើជ័រ និងដែកអ៊ីណុក។
ក្រុមអ្នកវេជ្ជសាស្ត្របានសន្និដ្ឋានថា បើទោះវីរុស COVID-19 អាចមានជីវិតយូរថ្ងៃនៅលើវត្ថុមួយចំនួន ប៉ុន្តែវាក៏ងាយនឹងត្រូវបានសម្លាប់ដោយវិធីកំចាត់មេរោគសាមញ្ញៗផងដែរ៕
ប្រភព៖ សារព័ត៌មានបរទេស
April 3, 2020
ក្រសួងអប់រំយុវជន និងកីឡា ប្រកាសស្នើសុំផ្អាកដំណើរការអាជីវកម្មក្លឹបហាត់ប្រាណ នៅទូទាំងប្រទេស ជាបណ្ដោះអាសន្ន
នៅថ្ងៃនេះដែរ ក្រសួងអប់រំយុវជន និងកីឡា ប្រកាសស្នើសុំផ្អាកដំណើរការអាជីវកម្មក្លឹបហាត់ប្រាណ នៅទូទាំងប្រទេស ជាបណ្ដោះអាសន្ន ចាប់ពីថ្ងៃនេះតទៅ រហូតដល់ស្ថានភាពនៃការរាតត្បាតនៃជំងឺកូវីដ19 ត្រូវបានបញ្ចប់ ដើម្បីចូលរួមបង្ការ និងទប់ស្កាត់ការរីក រាលដាលនៃជំងឺនេះ។
April 3, 2020
អាថ៍កំបាំងរបស់ញើស
មិនថាដោយសារតែក្តីរំភើបញាប់ញ័រដែលបានចេញទៅដើរលេងកំសាន្តជាមួយមនុស្សដែលយើងស្រឡាញ់ ឬមកពីភាពនឿយហត់ពីការហាត់ប្រាណក្នុងក្លឹបហ្វ៊ីតនេសនោះឡើយ វាជាកិច្ចការដែលមើលទៅខុសគ្នាស្រឡះ តែក៏ធ្វើឱ្យយើងបែកញើសបានដូចគ្នាដែរ ដូច្នេះថ្ងៃនេះយើងនាំគ្នាមកស្គាល់ពីដំណក់ទឹកប្រៃៗដែលជ្រាបចេញមកពីរាងកាយយើងនោះគឺជាអ្វី និងចេញមកពីណា?ឭ

– ប្រភពរបស់ញើស
ធ្លាប់សង្កេតមើលទេថា ភាពក្តៅហប់ និងញើសច្រើនតែមកដំណាលគ្នា មិនថាតែជាពេលវេលាដែលធាតុអាកាសក្តៅហប់ខណៈពេលដែលយើងកំពុងប្រើកម្លាំងសាច់ដុំយ៉ាងខ្លាំងក្លា ឬរំភើបញាប់ញ័ររហូតសរសៃប្រសាទត្រូវបានជំរុញខ្លាំងៗរហូតញើសជ្រាបចេញនោះទេ ការពិតទៅ គឺជាដំណោះស្រាយដែលធម្មជាតិសាងឡើងមកជួយ ដើម្បីសម្រាលភាពក្តៅ និងសាងភាពត្រជាក់ឡើងមកជំនួសវិញ និងដើម្បីជាការសម្រួលតុល្យភាពដល់រាងកាយរបស់យើង ហើយដែលកើតភាពត្រជាក់បាននោះ ក៏ព្រោះតែនៅក្នុងញើសនោះប្រកបទៅដោយទឹកជាចម្បងហ្នឹងឯង ហើយសារធាតុរ៉ែបន្ទាប់ចុះមកនោះគឺ ខ្ល័រ និងប៉ូតាស្យូម។
– ក្លិនរបស់ញើស
ចេញញើស គឺជាយន្តការមួយក្នុងចំណោមយន្តការឆ្លើយតបខាងធម្មជាតិរបស់រាងកាយ ដែលមនុស្សជាច្រើនប្រហែលជាចង់ឱ្យកើតតិចបំផុត ព្រោះក្រៅពីនឹងធ្វើឱ្យស្អឹតតតេកតតាក់ និងមិនស្រួលខ្លួនហើយនោះ ក្លិនដែលកើតឡើងក៏មិនមែនជាអ្វីដែលគួរឱ្យបេតីប៉ុន្មានឡើយ ហើយញើសរបស់អ្នកខ្លះថែមទាំងមានក្លិនខ្លាំងជាពិសេសទៀតផង ប្រភេទដែលធ្វើឱ្យអ្នកនៅជុំវិញខ្លួនដែលមិនធ្លាប់នឹងក្លិននោះ ត្រូវប្រញាប់លើកដៃខ្ទប់ច្រមុះ ហើយដើរចេញភ្លាមតែម្តង។ ការពិតទៅ ញើសរបស់មនុស្សយើងនេះគ្មានក្លិនទេ តែនៅពេលវាលាយគ្នាជាមួយនឹងមេរោគបាក់តេរីដែលមាននៅលើស្បែក និងរោម រួមទាំងអាស៊ីតខ្លាញ់ពីអាហារដែលយើងញ៉ាំចូលទៅផងនោះ ទើបធ្វើឱ្យកើតក្លិនមិនល្អឡើងបាន។
ក្រពេញញើសរបស់យើងមានពីរប្រភេទ បើជាញើសដែលចេញពាសពេញរាងកាយ ជាពិសេសម្តុំថ្ងាស បាតដៃ និងបាតជើងនោះ នឹងចេញមកពីក្រពេញដែលហៅថា Eccrine ដែលចាប់ផ្តើមផលិតញើសតាំងពីយើងនៅជាទារកទើបនឹងកើតម្ល៉េះ ទើបមិនសូវជាមានក្លិនខ្លាំងក្លាដូចញើសដែលចេញមកពីក្រពេញ Aprocrine ដែលស្ថិតនៅត្រង់ម្តុំក្លៀក និងគល់ភ្លៅជិតទ្វាធំ និងអវយវៈភេទឡើយ ដែលក្រពេញនេះនឹងចាប់ផ្តើមធ្វើការនៅពេលឈានចូលវ័យបន្តពូជ ហើយបើសិននាំគ្នាពិនិត្យមើលយ៉ាងដិតដល់វិញនោះ នឹងបានឃើញថា មានទាំងអាស៊ីតខ្លាញ់ និងប្រូតេអុីនលាយឡំជាមួយ ធ្វើឱ្យញើសដែលចេញមកមានពណ៌រាងលឿងល្អក់បន្តិច និងច្រើនតែឃើញមានជាស្នាមប្រឡាក់នៅលើខោអាវបានយ៉ាងងាយ ទើបនេះឯងជាដែលជាមូលហេតុថា តើហេតុអីបានបណ្តាផលិតផលបំបាត់ញើស និងក្លិនខ្លួនផ្សេងៗនោះនាំគ្នាតម្រង់មុខសញ្ញាទៅរកការកំចាត់ក្លិននៅម្តុំក្លៀកជាពិសេសនោះ។
ញើសដែលខុសប្រក្រតី
អ្នកខ្លះមានញើសចេញមកច្រើនជ្រុលពេករហូតដល់គួរឱ្យរំខាន និងធ្វើឱ្យសាម៉ីខ្លួនកើតក្តីអៀនខ្មាស់ជាញឹកញាប់ ជាពិសេសញើសនៅតាមបាតដៃ និងក្លៀកដែលសើមជោកជារង្វង់ មូលហេតុនោះខាងវេជ្ជសាស្រ្តខ្លួនឯងក៏នៅមិនទាន់អាចបញ្ជាក់បានច្បាស់លាស់ដែរ តែអាចមូលហេតុកើតឡើងដូចតទៅនេះ និងអាចព្យាបាលបានដោយការញ៉ាំថ្នាំ និងការវះកាត់។
– ភាពមិនតុល្យការរបស់អ័រម៉ូន ដូចជា អាការមេណូផូស ( Menopause )ក្នុងអំឡុងវ័យអស់រដូវ។
– ក្រពេញថៃរ៉យដ៍ធ្វើការខុសប្រក្រតីដែលធ្វើឱ្យរាងកាយផលិតកម្តៅបានខ្ពស់។
– ថ្នាំដែលកំពុងប្រើប្រាស់ប្រភេទខ្លះ។
– អាហារ ដូចជា កាហ្វេដែលមានជាតិកាហ្វេអ៊ីនខ្ពស់។
– ប្រព័ន្ធប្រសាទធ្វើការខ្លាំងជ្រុលពេក។
FUN FACTS ABOUT SWEAT ដឹងទេថា…
– មនុស្សយើងមានក្រពេញញើសពាសពេញក្នុងរាងកាយ ក្នុងម្នាក់ៗប្រមាណជា 2,6 លានក្រពេញ។
– ញើសដែលជ្រាបចេញមកនៅត្រង់បាតដៃ និងក្លៀកនោះ មិនដូចគ្នាទេ ហើយឱ្យក្លិនខុសប្លែកពីគ្នាទៀតផង។
– បើសង្កេតឱ្យដិតដល់ ការពិតទៅយើងមានញើសចេញមកគ្រប់ពេលវេលា។
– បើធាតុអាកាសក្តៅខ្លាំង មនុស្សយើងអាចបាត់បង់ញើសក្នុងមួយម៉ោងដល់ទៅ 1 លិត្រឯណោះ។
– ញើសមានរសជាតិប្រៃ ដោយសារតែមានសារធាតុរ៉ែសំខាន់គឺ សូដ្យូម និងប៉ូតាស្យូម។
– បើញើសចេញមកច្រើនហើយមិនប្រញាប់ញ៉ាំទឹកចូលទៅបន្ថែមវិញទេ អាចនឹងធ្វើឱ្យកើតខ្យល់គ កើតបញ្ហាក្នុងប្រព័ន្ធហូរវឹល ឬអាចគាំងក្រលៀនបាន។
– ម៉ាស៊ីនចាប់កំហុស អាចវាស់ដឹងបានពីភាពប្រែប្រួលរបស់ចរន្តអគិ្គសនីដែលស្ថិតនៅលើស្បែក និងញើសដែលចេញមកនៅពេលយើងភ័យខ្លាច ឬញាប់ញ័រ៕
April 3, 2020
ប្រធានសភាអ៊ីរ៉ង់ បានឆ្លងវីរុសCOVID-19!
លោក Ali Larijani អាយុ62ឆ្នាំ ជាប្រធានសភាអ៊ីរ៉ង់ ត្រូវបានរកឃើញថាវិជ្ជមានជាមួយនឹងវីរុសCOVID-19 ហើយលោកកំពុងទទួលការព្យាបាលក្នុងបន្ទប់ដាច់ដោយឡែក។
ស្ថានីយទូរទស្សន៍ជាតិអ៊ីរ៉ង់កាលពីម្សិលមិញបានចេញផ្សាយថា ប្រធានសភាអ៊ីរ៉ង់ លោក Ali Larijani ត្រូវបានធ្វើតេស្តរកមេរោគCOVID-19 បន្ទាប់ពីមានរោគសញ្ញាមួយចំនួន។ លទ្ធផលនៃការធ្វើតេស្ត បានរកឃើញថាលោកមានផ្ទុកមេរោគCOVID-19 ហើយលោកក៏កំពុងទទួលការព្យាបាល។
លោក Ali Larijani បានក្លាយជាមន្ត្រីម្នាក់ ក្នុងចំណោមមន្ត្រីជាន់ខ្ពស់របស់អ៊ីរ៉ង់ដែលបានឆ្លងវីរុសកូរ៉ូណានេះ។ មុននេះ អនុប្រធានាធិបតី Masoumeh Ebtekar រួមនឹងប្រធានគណៈកម្មការកិច្ចការបរទេស និងសន្តិសុខជាតិរបស់សភាអ៊ីរ៉ង់ លោក Mojtaba Zolnour និងតំណាងរាស្ត្រ Mahmoud Sadeghi និងអនុរដ្ឋមន្ត្រីក្រសួងសុខាភិបាល លោក Iraj Harirchi ក៏បានឆ្លងវីរុសCOVID-19។
លោក Hadi Khosroshahi ជាបព្វជិតម្នាក់នៅទីក្រុង Qom ដែលជាអតីតឯកអគ្គរដ្ឋទូតអ៊ីរ៉ង់ប្រចាំនៅទីក្រុង Vatican ក៏បានទទួលមរណភាពដោយសារ COVID-19។
ប្រទេសអ៊ីរ៉ង់នៅតែជាសម្បុកមេរោគធំជាងគេលំដាប់ទី2នៅទ្វីបអាស៊ី បន្ទាប់ពីប្រទេសចិន ដោយមានអ្នកជំងឺសរុប50,468នាក់ និងអ្នកស្លាប់សរុប3,160នាក់៕
ប្រភព៖ សារព័ត៌មានបរទេស
April 3, 2020
កម្ពុជាបានរកឃើញអ្នកឆ្លងមេរោគកូវីដ19 ចំនួន 4នាក់បន្ថែម នាព្រឹកថ្ងៃទី3 ខែមេសា ឆ្នា2020
ក្រសួងសុខាភិបាលបានប្រកាសថា បានរកឃើញអ្នកឆ្លងមេរោគផ្លូវដង្ហើមប្រភេទថ្មីកូវីដ19 ចំនួន4 នាក់បន្ថែម
ដែលធ្វើឲ្យអ្នកសរុបកើនឡើងដល់114នាក់។
ក. បុរសជនជាតិបារាំងអាយុ 67ឆ្នាំ និងស្ត្រីជនជាតិបារាំងអាយុ 67ឆ្នាំ វិជ្ជមានវីរុសកូវីដ19
ត្រូវបានដាក់ឲ្យនៅព្យាបាលក្នុងសណ្ឋាគារក្នុងក្រុងព្រះសីហនុ។ បុគ្គលទាំងពីររូបនេះ ជាអ្នកទេសចរ
បារាំងនៅក្នុងក្រុមជាមួយអ្នកទេសចរបារាំងជាង 30នាក់ ដែលមួយចំនួនធំបានរកឃើញមានវីរុសកូវីដ
19ក្នុងពេលកន្លងទៅនេះ។
ខ. ស្ត្រីអាយុ 59ឆ្នាំ ជនជាតិបារាំង វិជ្ជមានវីរុសកូរីដ19 (ជាអ្នកនៅក្នុងចំណោមក្រុមទេសចរ
បារាំងចំនួន 4នាក់ផ្សេងពីក្រមខាងលើ ដែលបានរកឃើញក្នុងក្រុមនេះ មានវិជ្ជមានវីរុសកូវីដ19
ចំនួន 4នាក់ ដំបូងគេ) ត្រូវបានដាក់ឲ្យព្យាបាលនៅសណ្ឋាគារក្នុងក្រុងព្រះសីហនុ។
គ. បុរសអាយុ 40ឆ្នាំ ជនជាតិម៉ាឡេស៊ី វិជ្ជមានវីរុសកូរីដ19 ជាអ្នកដំណើរស្នាក់នៅបណ្តោះ
អាសន្ននៅឃុំពាមជីកង ស្រុកកងមាស ខេត្តកំពង់ចាម ត្រូវបានដាក់ឲ្យព្យាបាលនៅមន្ទីរពេទ្យខេត្ត
កំពង់ចាម។ បុរសរូបនេះ ជាក្រុមមកធ្វើការងារសាសនាមានគ្នាចំនួន 8នាក់ ដែលចំនួន 8នាក់
លើកមុន បានរកឃើញមានវីរុសកូវីដ19 នៅស្រុកកងមាសនេះដែរ។
ក្រុមការងាររបស់ក្រសួងសុខាភិបាល កំពុងតែធ្វើកិច្ចការស្រាវជ្រាវករណីថ្មីជាបន្តទៀត ហើយ
នឹងបន្តជម្រាបជូនដល់បងប្អូនសាធារណជន ប្រសិនបើមានរកឃើញករណីវិជ្ជមានវីរុសកូរីដ19 ថ្មីណា
ផ្សេងទៀត៕

April 3, 2020