សុខភាព - La Reine Media

COVID-19! អាល្លឺម៉ងថាអាមេរិក “ប្លន់” ម៉ាស់របស់ខ្លួន ប៉ុន្តែអាមេរិកទាត់ចោលការចោទប្រកាន់នេះ

សារព័ត៌មានអាល្លឺម៉ង់ បានចុះផ្សាយថា សហរដ្ឋអាមេរិកបាន “ដណ្ដើម” ម៉ាស់ចំនួន200,000បន្ទះដែលដឹកពីប្រទេសចិន ប៉ុន្តែសហរដ្ឋអាមេរិកបានច្រានចោលការចោទប្រកាន់នេះ។

សារព័ត៌មាន Tagesspiegel របស់អាល្លឺម៉ង់ កាលពីថ្ងៃទី3មេសាបានដកស្រង់ប្រភពព័ត៌មានពីមន្ត្រីសន្តិសុខជាតិបានឱ្យដឹងថា ម៉ាស់ប្រភេទ FFP2 (N95) និង FFP3 ចំនួន2សែនបន្ទះ ដែលត្រូវបានរដ្ឋាភិបាលអាល្លឺម៉ង់បញ្ជាទិញសម្រាប់ទុកឱ្យកងកម្លាំងនគរបាលប្រើប្រាស់ ត្រូវបាន “ស្កាត់យក និងបញ្ជូនទៅកាន់សហរដ្ឋអាមេរិក”។

សារព័ត៌មានខាងលើ បានដកស្រង់សម្ដីរបស់លោក Nadreas Geisel ដែលជាមេដឹកនាំអង្គភាពកិច្ចការផ្ទៃក្នុងរបស់ទីក្រុង Berlin បានឱ្យដឹងថា ពួកគេបានបញ្ជាទិញម៉ាស់ប្រភេទ FFP2 និង FFP3 ចំនួន400,000បន្ទះ ពីក្រុមអាមេរិកាំងមួយ ដើម្បីផ្គត់ផ្គង់ឱ្យកងកម្លាំងនគរបាលនៅរដ្ឋធានីនៃប្រទេសអាល្លឺម៉ង់សម្រាប់ទប់ទល់នឹងវីរុសCOVID-19។ ក៏ប៉ុន្តែ នៅពេលដែលម៉ាស់ចំនួន200,000បន្ទះ ត្រូវបានដឹកពីរោងចក្រមួយនៅប្រទេសចិនទៅកាន់អាល្លឺម៉ង់ វាក៏ត្រូវបានមន្ត្រីសហរដ្ឋអាមេរិករឹបអូសនៅឯព្រលានយន្តហោះក្នុងទីក្រុងបាងកក ប្រទេសថៃ។

បុគ្គលិកចិន កំពុងជញ្ជូនម៉ាស់ឡើងយន្តហោះអាមេរិក

Geisel ថ្លែងថា អាល្លឺម៉ង់ “ចាត់ទុកទង្វើនេះថាជាសកម្មភាពប្លន់ក្នុងសម័យទំនើប”។ ប៉ុន្តែ ស្នងការនគរបាលក្រុង Berlin លោកស្រី Barbara Slowik ថ្លែងថា បម្រាមលើការនាំចេញម៉ាស់របស់សហរដ្ឋអាមេរិក អាចជាមូលហេតុនៃសកម្មភាពរឹបអូសខាងលើ។

ទីភ្នាក់ងារសារព័ត៌មាន T-Online របស់អាល្លឺម៉ង់ បានទាក់ទងទៅកាន់សេតវិមានដើម្បីសាកសួរព័ត៌មាន ប៉ុន្តែ រដ្ឋាភិបាលអាមេរិកាំងបានទាត់ចោលការចោទប្រកាន់ពីអាល្លឺម៉ង់។ “នេះគឺជាព័ត៌មានខុសពីការពិត។ សហរដ្ឋអាមេរិក មិនបានរឹបអូស ឬយកម៉ាស់ណាមួយដែលត្រូវបញ្ជូនទៅកាន់ប្រទេសណាមួយនោះទេ។ សហរដ្ឋអាមេរិកនឹងផលិតសម្ភារវេជ្ជសាស្ត្រនៅក្នុងប្រទេស ដោយទិញវត្ថុធាតុដើមពីប្រទេសផ្សេង”។ នេះបើតាមការឱ្យដឹងពីមន្ត្រីជាន់ខ្ពស់ម្នាក់នៅសេតវិមាន។

សូមរំឭកថា ប្រធានាធិបតី Donald Trump កាលពីថ្ងៃទី3មេសា បានចេញបញ្ជាហាមមិនឱ្យនាំចេញម៉ាស់ និងសម្ភារការពារសុខភាពបុគ្គល ដើម្បីធានាមិនឱ្យមានការខ្វះខាត ខណៈដែលប្រទេសនេះកំពុងប្រឈមមុខជាមួយនឹងបញ្ហាជាច្រើនដែលកើតឡើងដោយវីរុសCOVID-19។

មន្ត្រីម្នាក់សហរដ្ឋអាមេរិកម្នាក់ ថ្លែងជាសាធារណៈ បន្ទាប់ពីបានទទួលម៉ាស់ដែលដឹកពីប្រទេសចិន

សហរដ្ឋអាមេរិក គឺជាសម្បុកមេរោគកូរ៉ូណាCOVID-19 ធំបំផុតក្នុងពិភពលោក ដោយមានអ្នកជំងឺសរុបជាង 311,600នាក់ ក្នុងនោះមាន 8,454នាក់បានបាត់បង់ជីវិត។ ក្រុមអ្នកជំនាញការបានព្យាករថា ជនជាតិអាមេរិកាំងប្រមាណពី100,000នាក់ ទៅ 240,000នាក់ អាចស្លាប់ដោយសារវីរុសCOVID-19។

ចំណែកអាល្លឺម៉ង់វិញ គឺជាសម្បុកមេរោគធំជាងគេលំដាប់ទី3នៅអឺរ៉ុប ដោយមានអ្នកឆ្លងមេរោគចំនួន96,092នាក់ និងស្លាប់1,444នាក់។

ប្រភព៖ Sputnik, T-Online

April 5, 2020

(ទស្សនាឃ្លីប) ថ្ងៃឆេងម៉េង 2020…”ថ្ងៃដ៏សែនរន្ធត់នៃប្រជាជាតិជាតិ”

ចិនបានកំណត់យកថ្ងៃទី4 ខែមេសា ឆ្នាំនេះជា “ថ្ងៃកាន់ទុក្ខនៃប្រជាជតិចិន” ចំពោះអ្នកស្លាប់ដោយសារមេរោគវីរុសកូវីដ-19 ជាង 3,300នាក់។

ចិនបានទម្លាក់ទង់ជាតិមកនៅត្រឹមពាក់កណ្ដាលដងទូទាំងប្រទេស រួមទាំងនៅតាមស្ថានទូត និងស្ថានកុងស៊ុលចិនប្រចាំប្រទេសផ្សេងៗទូទាំងពិភពលោក និងថែមទាំងផ្អាកកិច្ចការងារសន្ទនាទាំងអស់ទៀតផង។

លោកប្រធានាធិបតីស៊ី ជីនភីង បានដឹកនាំក្រុមមេដឹកនាំដែលមានឥទ្ធិពលខ្ពស់បំផុតរបស់ប្រទេស ដែលមានដូចជា លោកលី ឃើឈាង លោកលី ចានស៊ូ លោកវ៉ាង យ៉ាំង លោកវ៉ាង ហ៊ូមិង លោកចាវ ឡឺជី លោកហាន់ ជឹង លោក វ៉ាង ឈីសាន់ រួមសម្ដែងក្ដីអាឡោះអាល័យនៅមុខបរិវេណវិមានអនុស្សាវរីយ៍ ចុង ណាន់ហៃ ក្នុងទីក្រុងប៉េកាំង រយៈពេល 3នាទី ក្រោមសំឡេងស៊ីរ៉ែន សំឡេងស៊ីហ្វ្លេរថយន្ត សំឡេងត្រែរថភ្លើង និងកប៉ាល់ រួមប្រគំសំឡេង ប្រៀបបីដូចជាសំឡេងស្រែកទ្រហោយំទូទាំងប្រទេស។

ខាងក្រោមនេះ គឺជាឃ្លីបវីដេអូដែលបង្ហាញពីបរិយាកាសក្នុងថ្ងៃកាន់ទុក្ខចំពោះជនរងគ្រោះដែលបានស្លាប់ដោយសារមេរោគវីរុសកូវីដ-19 ដែលរៀបចំធ្វើឡើងដោយសារព័ត៌មាននៅទីក្រុងហុងកុង South China Morning Post។

ថ្ងៃទី4 មេសារៀងរាល់ឆ្នាំ គឺជាថ្ងៃនៃពិធីបុណ្យឆេងម៉េង ឬថ្ងៃសម្អាតចេតីយ៍ ឬផ្នូរសព ជាពិធីតាមប្រពៃណីមួយដែលជនជាតិចិននាំគ្នាទៅសែនព្រេនដល់បុព្វបុរស និងសម្អាតផ្នូរ តែសម្រាប់ថ្ងៃឆេងម៉េងឆ្នាំនេះ បានប្រែក្លាយជា “ថ្ងៃដ៏សែនរន្ធត់នៃប្រជាជាតិចិន” ទៅវិញ៕

ប្រភព៖ សារព័ត៌មានបរទេស

April 5, 2020

មនុស្សជាង64,000នាក់ស្លាប់ដោយសារ COVID-19 នៅទូទាំងពិភពលោក ខណៈចិនធ្លាក់ទៅឈរលេខរៀងទី6ក្នុងចំណោមសម្បុកមេរោគធំៗក្នុងលោក

សហរដ្ឋអាមេរិក និងអឺរ៉ុប នៅតែជាសម្បុកមេរោគCOVID-19 ធំជាងគេក្នុងពិភពលោកដែលនាំឱ្យអ្នកឆ្លងវីរុសកើនដល់ជាង1.1លាននាក់ និងស្លាប់ជាង64,000នាក់។

សាកលវិទ្យាល័យ Johns Hopkins ថ្ងៃនេះបានឱ្យដឹងថា ប្រទេស និងដែនដីចំនួន205ក្នុងពិភពលោក បានរកឃើញអ្នកឆ្លងមេរោគថ្មី102,485នាក់ និងស្លាប់5,762នាក់ នាំឱ្យតួលេខនៃអ្នកជំងឺសរុបឡើងដល់ 1,196,553នាក់ ក្នុងនោះមានអ្នកស្លាប់សរុប64,549នាក់ និងជាសះស្បើយមាន246,108នាក់។

សហរដ្ឋអាមេរិក៖ អ្នកឆ្លងមេរោគថ្មី27,867នាក់ និងស្លាប់ថ្មី1,139នាក់។ អ្នកឆ្លងមេរោគសរុប305,820នាក់ និងស្លាប់សរុប8,291នាក់។

អេស្ប៉ាញ៖ អ្នកឆ្លងមេរោគថ្មី7,026នាក់ និងស្លាប់ថ្មី806នាក់។ អ្នកឆ្លងមេរោគសរុប124,736នាក់ និងស្លាប់សរុប11947នាក់។

អ៊ីតាលី៖ អ្នកឆ្លងមេរោគថ្មី4,805នាក់ និងអ្នកស្លាប់ថ្មី681នាក់។ អ្នកឆ្លងមេរោគសរុប124,632នាក់ និងស្លាប់សរុប 15,362នាក់។

អាល្លឺម៉ង់៖ អ្នកឆ្លងមេរោគថ្មី6,082នាក់ និងស្លាប់ថ្មី141នាក់។ អ្នកឆ្លងមេរោគសរុប85,778នាក់ និងស្លាប់សរុប1,158នាក់។

អង់គ្លេស៖ អ្នកឆ្លងមេរោគថ្មី3,735នាក់ និងស្លាប់ថ្មី708នាក់។ អ្នកឆ្លងមេរោគសរុប41,903នាក់ និងស្លាប់សរុប4,313នាក់។

ប្រទេសបារាំង៖ អ្នកឆ្លងមេរោគថ្មី7,788នាក់ និងស្លាប់ថ្មី441នាក់។ អ្នកឆ្លងមេរោគសរុប89,953នាក់ និងស្លាប់សរុប7,560នាក់។

ប្រទេសអ៊ីរ៉ង់៖ អ្នកឆ្លងមេរោគសរុប55,743នាក់ និងស្លាប់សរុប3,452នាក់។

ប្រទេសចិន៖ (តួលេខចុងក្រោយ) អ្នកឆ្លងមេរោគសរុប81,669 និងស្លាប់សរុប3,329នាក់។

កូរ៉េខាងត្បូង៖ (តួលេខចុងក្រោយ) អ្នកឆ្លងមេរោគសរុប10,156នាក់ និងស្លាប់សរុប177នាក់។

ម៉ាឡេស៊ី៖ អ្នកឆ្លងមេរោគសរុប3,483នាក់ និងស្លាប់សរុប57នាក់។

ហ្វីលីពីន៖ អ្នកឆ្លងមេរោគសរុប3,018នាក់ និងស្លាប់សរុប144នាក់។

ឥណ្ឌូនេស៊ី៖ អ្នកឆ្លងមេរោគសរុប2,092នាក់ (កើន106ករណីធៀបនឹងម្សិលមិញ) និងស្លាប់សរុប191នាក់(កើន10ករណីធៀបនឹងម្សិលមិញ)។

ប្រទេសថៃ៖ អ្នកឆ្លងមេរោគសរុប2,067នាក់ និងស្លាប់សរុប20នាក់។

វៀតណាម៖ អ្នកឆ្លងមេរោគសរុប240នាក់

ប្រភព៖ AFP, CNN, Reuters

April 5, 2020

COVID-19! ប្រទេសចិនផ្ដល់ឋានៈដល់សពវេជ្ជបណ្គិត Li Wenliang ជាវីរជនពលីរបស់ប្រទេសជាតិ

លោកវេជ្ជបណ្ឌិត Li Wenliang ដែលជាមនុស្សម្នាក់ក្នុងចំណោមអ្នកដែលបានព្រមានអំពីវីរុស COVID-19 ដំបូងគេនៅប្រទេសចិន ប៉ុន្តែត្រូវបានអាជ្ញាធរបង្ខំឱ្យចុះកិច្ចសន្យាទទួលកំហុសកន្លងមកនោះ ពេលនេះត្រូវបានតែងតាំងជាវីរជនពលី។

អាជ្ញាធរខេត្ត Hubei ប្រទេសចិន បានសម្រេចផ្ដល់ឋានៈជាវីរជនពលី (martyr) ដល់បុគ្គលិកពេទ្យចំនួន12រូបដែលបានបាត់បង់ជីវិតដោយសារវីរុសCOVID-19 បន្ទាប់ពីបានបូជាជីវិតក្នុងសង្គ្រាមប្រឆាំងនឹងវីរុសដើម្បីការពារជីវិត និងសុខភាពរបស់ប្រជាជន។ នេះបើតាមការចេញផ្សាយរបស់ CCTV កាលពីថ្ងៃទី2មេសាកន្លងទៅ។

“វីរជនពលី” គឺជាឋានៈកិត្តិយសខ្ពស់បំផុតត្រូវបានប្រទេសចិនតែងតាំងដល់ពលរដ្ឋដែលបានស្លាប់ក្នុងពេលបំពេញបេសកកម្មដើម្បីប្រទេសជាតិ។ ឋានៈនេះត្រូវបានផ្ដល់ជូនសពវេជ្ជបណ្ឌិត Li Wenliang បន្ទាប់ពីគ្រូពេទ្យរូបនេះត្រូវបានអាជ្ញាធរទីក្រុង Wuhan ហៅទៅស្ដីបន្ទោស បង្ខំឱ្យចុះកិច្ចសន្យា និងទទួលកំហុស។

Li Wenliang គឺជាវេជ្ជបណ្ឌិតឯកទេសខាងជំងឺភ្នែកនៅមន្ទីរពេទ្យ Central Hospital ក្នុងទីក្រុង Wuhan ខេត្ត Hubie។ ចុងខែធ្នូ ឆ្នាំ2019 វេជ្ជបណ្ឌិតរូបនេះបានចែករំលែកសារមួយទៅកាន់អ្នករួមអាជីព អំពីជំងឺថ្មីមួយដែលដូចទៅនឹងជំងឺផ្លូវដង្ហើមបង្កឡើងដោយវីរុសSARS។ បន្ទាប់មក មេរោគនេះត្រូវបានគេហៅថា COVID-19 ដែលបច្ចុប្បន្ន បានធ្វើឱ្យមនុស្សជាង1098,000នាក់បានកើតជំងឺ និងជាង59,160នាក់ បានបាត់បង់ជីវិត នៅទូទាំងពិភពលោក។

ក្រោយពីបានចែករំលែកព័ត៌មានស្ដីអំពីវីរុសថ្មី វេជ្ជបណ្ឌិត Li Wenliang ក៏ត្រូវបានសមត្ថកិច្ចហៅទៅសួរនាំ ហើយបង្ខំឱ្យចុះហត្ថលេខាទទួលស្គាល់កំហុសថាបាន “បញ្ចេញព័ត៌មានព័ត៌មិនពិត” និង “បញ្ចេញមតិមិនត្រឹមត្រូវ”។

លោកវេជ្ជបណ្ឌិត Li បន្ទាប់មកក៏បានឆ្លងវីរុសកូរ៉ូណា COVID-19 នៅពេលកំពុងព្យាបាលអ្នកជំងឺ ហើយបានបាត់បង់ជីវិតកាលពីថ្ងៃទី27មីនា នៅមន្ទីរពេទ្យCentral Hospital។ នៅមុនពេលលោកស្លាប់ លោកវេជ្ជបណ្ឌិតរូបនេះក៏ធ្លាប់បានសម្ភាសជាមួយសារព័ត៌មាន New York Time និងបានថ្លែងថា “បើសិនជាក្រុមមន្ត្រីបានបញ្ចេញព័ត៌មានស្ដីអំពីជំងឺនេះបានឆាប់ ខ្ញុំគិតថាស្ថានភាពនឹងបានធូរស្រាលជាងនេះច្រើន។ គេត្រូវការភាពស្មោះត្រង់ និងតម្លាភាពជាងនេះ”។

ការស្លាប់របស់គ្រូពេទ្យ Li បានធ្វើឱ្យមានការខឹងសម្បាយ៉ាងខ្លាំងពីសំណាក់ប្រជាជនចិន។ ពួកគេអំពាវនាវឱ្យមានសេរីភាពក្នុងការបញ្ចេញមតិ និងឱ្យអាជ្ញាធរសុំទោសជាដើម។ល។ ប្រការនេះបានជះឥទ្ធិពលដល់រដ្ឋាភិបាលចិន។ ថ្ងៃទី19មីនា NSC(National Supervisory Commission) ដែលជាអង្គភាពប្រឆាំងអំពើពុករលួយរបស់ប្រទេសចិន បានប្រកាសថា ទង្វើដែលអាជ្ញាធរទីក្រុង Wuhan ពិន័យទៅលើវេជ្ជបណ្ឌិត Li Wenliang គឺជារឿង “ខុសប្រក្រតី” និង “មិនត្រឹមត្រូវ”។

NSC ថ្លែងថា នគរបាលទីក្រុង Wuhan ត្រូវតែទទួលខុសត្រូវ ហើយការពិន័យទៅលើវេជ្ជបណ្ឌិត Li ក៏ត្រូវតែលុបចោល។ អាជ្ញាធរទីក្រុង Wuhan ក្រោយមកក៏បានធ្វើការសុំទោស និងដកការពិន័យរបស់ខ្លួនមកវិញ។

នៅព្រឹកនេះ ប្រទេសចិនទាំងមូលបានធ្វើការគោរពវិញ្ញាណក្ខន្ធ3នាទី ដើម្បីលើកតម្កើងកិត្តិយសរបស់វីរជន វីរនាីទាំងអស់ដែលបានស្លាប់ក្នុងសង្គ្រាមប្រឆាំងនឹងវីរុសCOVID-19៕

ប្រភព៖ សារព័ត៌មានបរទេស

April 4, 2020

អបអរសាទរថ្ងៃនេះគ្រូពេទ្យខ្មែរព្យាបាលអ្នកជំងឺកូវីដ19 ជាសះស្បើយចំនួន 15នាក់បន្ថែម និងមិនមានអ្នកឆ្លងទេ

នៅថ្ងៃនេះដែរក្រសួងសុខាភិបាលកម្ពុជា បានប្រកាសនៅលើទំព័រហ្វេសរបស់ខ្លួនថាពុំមានករណីឆ្លងថ្មីកើតឡើងទេ ហើយថែមទាំងព្យាបាលអ្នកជំងឺផ្លូវដង្ហើមកូវីដ19 ជាសះស្បើយចំនួន 15នាក់បន្ថែមទៀងផង ដែលធ្វើឲ្យអ្នកជាសះស្បើយកើនឡើងដល់ 49នាក់ហើយ៕

April 4, 2020

តើវីតាមីនសំខាន់ចំពោះអ្នកប៉ុនណា?

តារាស្រីហូលីវុដ ហ៊ីឡារី ស្វ៊ែងក៏ ញ៉ាំវីតាមីនបន្ថែមក្នុងមួយថ្ងៃ 45 គ្រាប់ ដោយសារតែមកពីការសម្រកទម្ងន់ ( Diet ) ទើបមានសំណួរមួយថា តើការញ៉ាំវីតាមីនបន្ថែមនោះសំខាន់ប៉ុនណា? គួរញ៉ាំយ៉ាងណា? មនុស្សបែបណាខ្លះដែលគួរញ៉ាំ? និងវីតាមីនជួយអ្វីដល់យើងខ្លះ? ចំពោះរឿងនេះ លោកវេជ្ជបណ្ឌិតជំនាញមានចម្លើយសម្រាប់មិត្តអ្នកអានទាំងអស់។

តើវីតាមីន មានភាពចាំបាច់ចំពោះសុខភាពយ៉ាងណា? អាហារ 5 ប្រភេទក្រុមដែលរាងកាយត្រូវការនោះគឺ ខាបូហាយដ្រេតប្រូតេអ៊ីន វីតាមីន ជាតិខ្លាញ់ និងសារធាតុរ៉ែ ប្រៀបដូចជាថាមពលបញ្ឆេះឱ្យរាងកាយ និងអង់ហ្ស៊ីមផ្សេងៗធ្វើការបានតាមប្រក្រតី។

វីតាមីនបន្ថែមមានភាពចាំបាច់សម្រាប់អ្នកណាខ្លះ? បើស្ថិតក្នុងស្ថានភាពដែលញ៉ាំបន្លែ និងផ្លែឈើ រួមទាំងញ៉ាំអាហារផ្សេងៗក្នុងចំណែកដែលត្រឹមត្រូវបាននោះ ក៏គ្មានភាពចាំបាច់អ្វីត្រូវបន្ថែមវីតាមីនទេ លើកលែងតែករណីដែលមិនអាចញ៉ាំអាហារបានតាមចំណែកដែលត្រូវការ និងស្ថិតក្នុងសភាវដែលរាងកាយត្រូវការវីតាមីនជាពិសេស ដូចជា ឈឺថ្កាត់ និងត្រូវការឱ្យរាងកាយស្វាហាប់ឡើងវិញប៉ុណ្ណោះ តែសម្រាប់មនុស្សទូទៅដែលញ៉ាំអាហារបានតាមប្រក្រតី អាចប្រើតិចនិកផ្សេងទៀតដែលធ្វើឱ្យយើងញ៉ាំបន្លែ និងផ្លែឈើមិនច្រើនជាពិសេសពេក ដូចជា កាត់បន្ថយអាហារលាងជាតិពុលមួយសប្តាហ៍មួយដង ឬពីរសប្តាហ៍ម្តងដោយការញ៉ាំផ្លែឈើពេញមួយថ្ងៃ ដើម្បីរាងកាយនឹងបានទទួលវីតាមីនពីផ្លែឈើ តែត្រូវមានលក្ខ័ណមួយថា ត្រូវតែជាផ្លែឈើដែលគ្មានជាតិម្សៅ និងរសជាតិដែលមិនផ្អែមខ្លាំងពេក។

អាការខ្វះវីតាមីនរ៉ាំរ៉ៃ ជាសភាវម្យ៉ាងដែលមិនត្រូវបានរាប់ចូលក្នុងក្រុមជំងឺឈឺថ្កាត់ទេ ដូចជា ការខ្វះវីតាមីន C នឹងធ្វើឱ្យចេញឈាមតាមជើងធ្មេញ ឬការខ្វះវីតាមីន B1 នឹងធ្វើឱ្យកើតអាការស្ពឹកស្រពន់ជាដើម។ អាចមិនដល់ថ្នាក់ខ្វះវីតាមីនរហូតកើ់តជំងឺនោះទេគ្រាន់តែអាចមានអារម្មណ៍ថាមិនសូវស្រស់ស្រាយដោយមិនដឹងមូលហេតុ ឬអស់កម្លាំងល្វើយតែប៉ុណ្ណោះ។

យ៉ាងម៉េចទើបហៅថា ការញ៉ាំវីតាមីនដែលត្រឹមត្រូវ? ការញ៉ាំវីតាមីនតាមប្រភេទនីមួយៗក៏ខុសប្លែកគ្នាដែរ ដូចជា បេតាឃែរ៉ូធីន គួរជ្រើសរើសយកប្រភេទដែលចម្រាញ់ពីធម្មជាតិទើបប្រសើរជាង ចំណែកវីតាមីនច្នៃប្រឌិតក៏មានចំណុចគួរប្រយ័ត្នដែរ ព្រោះនឹងមានភាពប្រថុយប្រថានក្នុងការកើតជំងឺមហារីកសួតច្រើន ចំណែកឯវីតាមីន E ជាវីតាមីនរលាយក្នុងខ្លាញ់ដូចគ្នានឹងវីតាមីន K . A និង D ដែរ តែមានចំណុចកំណត់ថា ថ្នាំ ឬវីតាមីនដែលរលាយក្នុងខ្លាញ់ងាយនឹងប្រមូលសន្សំច្រើនណាស់ ដូច្នេះទើបត្រូវកំណត់បរិមាណ។

វីតាមីនជួយអ្វីដល់លោកអ្នកខ្លះ?
– វីតាមីន A ជួយដល់ការមើលឃើញនៅពេលយប់ និងជួយការពារការឆ្លងមេរោគក្នុងប្រព័ន្ធរំលាយអាហារ ប្រព័ន្ធបន្ទោបង់ទឹកមូត្រ និងប្រព័ន្ធដង្ហើម។
– វីតាមីន B1 សំខាន់ចំពោះសាច់ដុំ ប្រព័ន្ធប្រសាទ និងការធ្វើការរបស់បេះដូង។
– វីតាមីន B12 ចាំបាច់ចំពោះការចម្រើនធំធាត់ ជួយសាងគ្រាប់ឈាមក្រហម និងជំរុញប្រព័ន្ធប្រសាទ។
– វីតាមីន C មានសារធាតុអ៊ែនទីអុកស៊ីឌែនត៍ ការពារការឆ្លងមេរោគ មុខរបួស ឬតំបៅឆាប់ជា និងជួយបឺតជ្រាបសារធាតុដែក តែអ្វីដែលសំខាន់នោះគឺ ជួយផលិតខូឡាជេន ដែលជួយឱ្យស្បែកតឹងណែនមិនឆាប់ចាស់។
– វីតាមីន E ជួយបំប៉នគ្រាប់ឈាមក្រហម ការពារសួត និងសាច់ភ្នាសផ្សេងៗ៕

April 4, 2020

មនុស្សជិត59,000នាក់បានស្លាប់ដោយសារ COVID-19 នៅទូទាំងពិភពលោក

អឺរ៉ុប និងសហរដ្ឋអាមេរិកបន្តជាចំណុចក្ដៅរបស់ COVID-19 នាំឱ្យករណីឆ្លងមេរោគនៅទូទាំងពិភពលោកកើនឡើងជិត1.1លាននាក់ ក្នុងនោះអ្នកជំងឺជិត59,000នាក់ បានបាត់បង់ជីវិត។

យោងតាមទិន្នន័យរបស់សាកលវិទ្យា John Hopkins ពិភពលោកទាំងមូលមានអ្នកឆ្លងមេរោគ COVID-19 ចំនួន1,094,068នាក់ ក្នុងនោះអ្នកស្លាប់មានចំនួន58,787នាក់។ អ្នកឆ្លងមេរោគថ្មីកើន 82,578ករណី និងអ្នកស្លាប់ថ្មីកើន5,924ករណី ក្នុងរយៈពេល24ម៉ោងកន្លងមកនេះ។ ក្នុងចំណោមអ្នកជំងឺសរុប មាន225,796ករណីបានជាសះស្បើយ ដែលភាគច្រើនគឺនៅប្រទេសចិន។

សហរដ្ឋអាមេរិក៖ មានអ្នកឆ្លងមេរោគថ្មី28,667ករណី និងអ្នកឆ្លងមេរោគសរុប273,880ករណី។ អ្នកស្លាប់ថ្មី1,094ករណី និងអ្នកស្លាប់សរុប7,094ករណី។

អ៊ីតាលី៖ អ្នកឆ្លងវីរុសថ្មី4,585ករណី និងឆ្លងសរុប119,827ករណី។ អ្នកស្លាប់ថ្មី766ករណី និងអ្នកស្លាប់សរុប14,681ករណី។

អេស្ប៉ាញ៖ អ្នកឆ្លងមេរោគថ្មី7,134ករណី និងអ្នកឆ្លងសរុប119,199ករណី។ អ្នកស្លាប់ថ្មី850ករណី និងស្លាប់សរុប11,198ករណី

អាល្លឺម៉ង់៖ អ្នកឆ្លងមេរោគថ្មី6,365ករណី និងអ្នកឆ្លងសរុប91,159ករណី។ អ្នកស្លាប់ថ្មី168ករណី និងអ្នកស្លាប់សរុប1,275ករណី។

អង់គ្លេស៖ អ្នកឆ្លងមេរោគថ្មី4,450ករណី និងអ្នកឆ្លងសរុប38,168ករណី។ អ្នកស្លាប់ថ្មី684ករណី និងស្លាប់សរុប3,560ករណី។

នៅប្រទេសចិន តួលេខចុងក្រោយបង្ហាញថា ចំនួនអ្នកឆ្លងមេរោគសរុបមាន81,639ករណី និងអ្នកស្លាប់សរុប3,326ករណី ខណៈកូរ៉េខាងត្បូង មានអ្នកឆ្លងមេរោគសរុប10,156ករណី និងស្លាប់សរុប177ករណី។

ប្រទេសអ៊ីរ៉ង់មានអ្នកឆ្លងមេរោគសរុប53,183ករណី និងស្លាប់សរុប3,294ករណី បន្ទាប់ពីបានរកឃើញអ្នកជំងឺថ្មី2,715ករណី និងស្លាប់ថ្មី134ករណី។

អាស៊ីអាគ្នេយ៍៖ ម៉ាឡេស៊ីគឺជាសម្បុកមេរោគធំបំផុត ដោយមានអ្នកជំងឺ3,333នាក់ និងស្លាប់53នាក់។ ចំណែកឥណ្ឌូនេស៊ីវិញគឺជា “វាលពិឃាត” ធំបំផុតរបស់វីរុសCOVID-19 ក្នុងតំបន់នេះ ដោយមានអ្នកស្លាប់181នាក់ ក្នុងចំណោមអ្នកជំងឺ1,986នាក់។ ហ្វីលីពីនមានអ្នកផ្ទុកមេរោគ3,018ករណី ក្នុងនោះមាន136ករណីបានបាត់បង់ជីវិត។ ប្រទេសថៃ មានអ្នកជំងឺសរុប1,978នាក់ ក្នុងនោះករណីស្លាប់មានចំនួន19នាក់៕

ប្រភព៖ AFP/Worldometers

April 4, 2020

ករណីស្លាប់ និងឆ្លង COVID-19 នៅអាស៊ីអាគ្នេយ៍ បន្តកើនឡើងគួរឱ្យព្រួយបារម្ភ

ប្រទេសម៉ាឡេស៊ីថ្ងៃនេះបានរកឃើញអ្នកជំងឺCOVID-19ថ្មីចំនួន217ករណីបន្ថែមទៀត នាំឱ្យករណីឆ្លងមេរោគសរុបកើនលើសពី3,300នាក់ ខណៈដែលឥណ្ឌូនេស៊ី បានរកឃើញអ្នកផ្លុកមេរោគកូរ៉ូណាច្រើនបំផុតរាប់ចាប់ពីមេរោគនេះបានបង្ហាញខ្លួននៅប្រទេសនេះ។

រដ្ឋមន្ត្រីក្រសួងសុខាភិបាលម៉ាឡេស៊ី ថ្ងៃនេះបានឱ្យដឹងថា ប្រទេសនេះមានអ្នកស្លាប់ដោយសារមេរោគCOVID-19 ចំនួន3នាក់បន្ថែមទៀត ធ្វើឱ្យចំនួនករណីស្លាប់ដោយសារមេរោគនេះកើនដល់53នាក់ ក្នុងចំណោមអ្នកជំងឺសរុប3,333នាក់។ ម៉ាឡេស៊ីគឺជាសម្បុកមេរោគកូរ៉ូណាធំជាងគេនៅតំបន់អាស៊ីអាគ្នេយ៍។។

“វាលពិឃាត” របស់ COVID-19 ដែលធំជាងគេលំដាប់ទី2នៅតំបន់អាស៊ីអាគ្នេយ៍ នោះគឺប្រទេសហ្វីលីពីន ដោយមានអ្នកស្លាប់សរុប136ករណី ក្នុងនោះមាន29ករណីទើបបានកើតឡើងក្នុងថ្ងៃនេះ។ ប្រទេសនេះក៏ទើបបានរកឃើញអ្នកផ្ទុកមេរោគកូរ៉ូណាថ្មីចំនួន385នាក់បន្ថែមទៀតដែរ នាំឱ្យចំនួនអ្នកជំងឺកើនដល់3,018នាក់។

ប្រទេសថៃ ថ្លៃនេះបានរកឃើញករណីឆ្លងមេរោគថ្មី103ករណី ធ្វើឱ្យអ្នកជំងឺសរុបឡើងដល់1,978នាក់។ ប្រទេសនេះ មានអ្នកស្លាប់ដោយសារ COVID-19 ចំនួន19នាក់ ក្នុងនោះមាន4នាក់ទើបតែបានស្លាប់ក្នុងថ្ងៃនេះ។

ចំណែកប្រទេសឥណ្ឌូនេស៊ីវិញ ទើបបានរកឃើញអ្នកផ្ទុកមេរោគកូរ៉ូណាចំនួន196ករណីបន្ថែមទៀតដែរ បណ្ដាលឱ្យតួលេខនៃអ្នកជំងឺឡើងដោយ1,986នាក់។ ឥណ្ឌូនេស៊ីជា “វាលពិឃាត” ធំបំផុតរបស់ COVID-19 នៅក្នុងតំបន់អាស៊ីអាគ្នេយ៍ ដោយមានអ្នកស្លាប់181នាក់។

តួលេខនៃចំនួនអ្នកបានឆ្លងមេរោគកូរ៉ូណាសរុបនៅប្រទេសសិង្ហបុរី បានឡើងដល់1,114ករណី ក្នុងនោះអ្នកស្លាប់មានចំនួន5ករណី បើគិតមកដល់ពេលនេះ។

ប្រទេសវៀតណាម ថ្ងៃនេះបានរកឃើញអ្នកជំងឺថ្មីចំនួន10ករណី ធ្វើឱ្យករណីឆ្លងមេរោគកូរ៉ូណាសរុបឡើងដល់237ករណី ក្នុងនោះមាន86ករណីបានជាសះស្បើយ។

ប្រទេសប៊្រុយណេ មានអ្នកជំងឺសរុប134នាក់ ក្នុងនោះមានអ្នកជំងឺម្នាក់បានបាត់បង់ជីវិត។

ប្រទេសមីយ៉ានម៉ារ បានរកឃើញអ្នកជំងឺកូរ៉ូណាសរុប20នាក់ ក្នុងនោះមានម្នាក់បានស្លាប់។

ប្រទេសឡាវ មានអ្នកជំងឺសរុប10នាក់។ ប្រទេសនេះមិនទាន់មានអ្នកស្លាប់នៅឡើយ។

ទីម័រខាងកើត ដែលជាប្រទេសមួយស្ថិតនៅក្នុងតំបន់អាស៊ីភាគអាគ្នេយ៍ដែរនោះ មានអ្នកជំងឺសរុប1នាក់។

នៅកម្ពុជា មកដល់បច្ចុប្បន្នបានរកឃើញអ្នកផ្ទុកមេរោគកូរ៉ូណាសរុបចំនួន114ករណី បន្ទាប់ពីបានរកឃើញ4ករណីថ្មីក្នុងថ្ងៃនេះ។ ក្នុងចំណោមអ្នកបានឆ្លងមេរោគសរុប គឺមាន79ករណីកំពុងទទួលការព្យាបាល និង35ករណីបានជាសះស្បើយ។

COVID-19 បានបង្ហាញវត្តមាននៅក្នុងប្រទេស និងដែនដីចំនួន204 នៅទូទាំងពិភពលោក បណ្ដាលឱ្យមនុស្សជាង54,465នាក់បានស្លាប់ និង38,405នាក់កំពុងប្រឈមនឹងការស្លាប់ ខណៈដែល220,025នាក់បានជាសះស្បើយ ក្នុងចំណោមអ្នកជំងឺសរុប1,034,163នាក់៕

ប្រភព៖ សារព័ត៌មានបរទេស

April 3, 2020

ភ័ស្តុតាងបង្ហាញថា COVID-19 មិនមែនជាផលិតផលបង្កើតឡើងដោយមនុស្សលោក

ការវិភាគទៅលើប្រព័ន្ធហ្សែនរបស់ COVID-19 បានបង្ហាញថា រចនាសម្ព័ន្ធប្រូតេអ៊ីនរាងបន្លានៅលើផ្ទៃខាងលើនៃវីរុសនេះ ធ្វើការដោយមានប្រសិទ្ធភាពខ្លាំងណាស់ រហូតដល់ក្រុមអ្នកវិទ្យាសាស្ត្រអាចសន្និដ្ឋានបានថា មនុស្សមិនអាចបង្កើតបានមេរោគបែបនេះនោះឡើយ។

ក្រុមអ្នកវិទ្យាសាស្ត្របានឱ្យដឹងថា COVID-19 មិនមែនជាផលិតផលនៃការបង្កើតឡើងដោយមនុស្សនោះទេ នៅពេលបានប្រៀបធៀបលំដាប់អាស៊ីត RNA (Ribonucleic acid) របស់វីរុសCOVID-19 ជាមួយនឹងវីរុសSARS, MERS និងបណ្ដាវីរុសកូរ៉ូណាប្រភេទផ្សេងទៀត ដូចជាវីរុស HKU1 ដែលបង្កអាការរោគស្រាលនៅលើមនុស្សជាដើម។

លទ្ធផលនៃការសិក្សាស្រាវជ្រាវនេះ ត្រូវបានចុះផ្សាយកាលពីថ្ងៃទី17មីនា លើទស្សនាវដ្ដី Nature។ ការសិក្សាស្រាវជ្រាវនេះ ផ្ដោតសំខាន់ទៅលើបណ្ដាប្រូតេអ៊ីនដែលមានរូបរាងដូចបន្លារបស់ COVID-19។ ប្រូតេអ៊ីននេះ រួមមានដែនតភ្ជាប់ RDB (Receptor Binding Domain) និងទីតាំងកាត់ផ្ដាច់ (Cleavage Site)។

RDB ថ្ពក់ជាប់ទៅនឹងទីតាំងភ្ជាប់ ACE2 ដែលមាននៅលើកោសិកាមនុស្ស បន្ទាប់មក Cleavage Site បើកផ្លូវឱ្យវីរុសរុកចូលទៅខាងក្នុងកោសិកា។ រចនាសម្ព័ន្ធរបស់ប្រូតេអ៊ីនរូបបន្លារបស់វីរុសCOVID-19 ធ្វើការមានប្រសិទ្ធភាពរហូតដល់ថ្នាក់ “មានតែធម្មជាតិប៉ុណ្ណោះទើបអាចធ្វើបែបនេះបាន” ពោលគឺមិនមែនជាផលិតផលផ្នែកជីវសាស្ត្ររបស់មនុស្សនោះទេ។

នៅពេលដែលអ្នកវិទ្យាសាស្ត្របង្កើតវីរុស COVID-19 នៅលើកុំព្យូទ័រ ពួកគេឃើញថា សមត្ថភាពឆ្លងរបស់វីរុសនៅលើកុំព្យូទ័រ មានលក្ខណៈខ្សោយជាងច្រើនណាស់បើធៀបនឹងវីរុសនៅខាងក្រៅ។

វេជ្ជបណ្ឌិត Kristian Andersen នៅមន្ទីរពិសោធន៍ Scripps ដែលជាសមាជិកម្នាក់នៃក្រុមអ្នកវិទ្យាសាស្ត្រខាងលើ បានឱ្យដឹងថា បើសិនជាអ្នកវិទ្យាសាស្ត្រជាអ្នកបង្កើតវីរុសCOVID-19ពិតមែន នោះពួកគេនឹងមិនជ្រើសយកប្រូតេអ៊ីនវ៉ារ៉្យុង(variant protein) ដែលមិនសូវមានប្រសិទ្ធភាពនោះទេ។ ក្រៅពីនេះ អាវុធជីវសាស្ត្រជាទូទៅត្រូវបានបង្កើតឡើងដោយវីរុសសាហាវៗ។ ក៏ប៉ុន្តែ បណ្ដាវីរុសសែស្រឡាយជិតរបស់កូរ៉ូណាCOVID-19 ដែលមាននៅលើសត្វប្រចៀវ និងពង្រូល វាហាក់មិនបង្កគ្រោះថ្នាក់នោះឡើយ។

រូបរាង និងរចនាសម្ព័ន្ធរបស់វីរុសកូរ៉ូណាCOVID-19

COVID-19 ត្រូវបានគេជឿថា បានឆ្លងពីសត្វប្រចៀវ ទៅពង្រូល និងពីពង្រូលទៅកាន់មនុស្ស។ ក្រុមអ្នកវិទ្យាសាស្ត្រខាងលើបានឱ្យដឹងថា ពួកគេកំពុងតែធ្វើការដើម្បីកំណត់ឱ្យបានច្បាស់ទៅលើបញ្ហានេះ៕

ប្រភព៖ សារព័ត៌មានបរទេស

April 3, 2020

ឥណ្ឌាដូចជាសុខចិត្តចុះចាញ់កូវីដ-19ហើយ! ត្រៀមលុបចោលវិធានការ “បិទប្រទេស” ព្រោះបារម្ភមនុស្សច្រើនលាននាក់គ្មានការងារធ្វើ

ប្រទេសឥណ្ឌានឹងលុបចោលវិធានការ “បិទទីក្រុង 3សប្ដាហ៍” ជាដំណាក់ៗ តាមការឱ្យដឹងរបស់លោកនាយករដ្ឋមន្ត្រី ណារិនដ្រា ម៉ូឌី កាលពីថ្ងៃព្រហស្បតិ៍(ទី2មេសា)ម្សិលមិញ បើទោះជាអាជ្ញាធរព្យាយាមខំរើបម្រះប្រយុទ្ធយ៉ាងខ្លាំងក្លា ដើម្បីគ្រប់គ្រងក្រុមអ្នកឆ្លងមេរោគកូរ៉ូណាប្រភេទថ្មី ឬកូវីដ-19 ដ៏ធំបំផុតរបស់ប្រទេសក្នុងទីក្រុងនីវដេលីយ៉ាងណាក៏ដោយ។

វិធានការបិទប្រទេស ដែលធ្វើឱ្យប្រទេសមានសេដ្ឋកិច្ចធំជាងគេលំដាប់លេខ3 របស់ទ្វីបអាស៊ីមួយនេះធ្លាក់ក្នុងសភាវនៅទ្រឹងនោះ នឹងផុតកំណត់នៅថ្ងៃទី14 មេសាខាងមុខ។

វិធានការនោះ គឺលោកនាយករដ្ឋមន្ត្រី ម៉ូឌី បានបញ្ជាឱ្យប្រជាជនចំនួន 1,300លាននាក់របស់ប្រទេសស្ថិតនៅតែក្នុងផ្ទះ ដើម្បីចៀសវាងពីការឆ្លងមេរោគកូវីដ-19ដ៏ធំធេងមួយ តែយ៉ាងណាក៏ដោយ សភាវបិទប្រទេសដ៏ធំបំផុតរបស់ពិភពលោកមួយនេះ បានបណ្ដាលឱ្យមនុស្សជាច្រើនលាននាក់ត្រូវអស់ការងារធ្វើ និងបង្ខំឱ្យពលករចំណាកស្រុកនាំគ្នារត់ភៀសខ្លួនត្រឡប់ទៅស្រុកកំណើត ជាទីដែលពួកគេល្មមអាចនៅមានកន្លែងជ្រកពួន និងមានអាហារបរិភោគខ្លះៗគ្រាន់នឹងរស់។

លោក ម៉ូឌី បានប្រាប់ទៅគណៈអភិបាលរដ្ឋទាំងឡាយរបស់ប្រទេសឥណ្ឌាថា វិធានការបិទប្រទេសនេះ ជួយកម្រិតការឆ្លងរាលដាលបានមែន តែស្ថានការណ៍ទូទាំងពិភពលោកនៅស្ថិតនៅឆ្ងាយពីកម្រិតដែលគួរឱ្យកក់ក្ដៅច្រើនណាស់ និងជឿថា នឹងមានការឆ្លងរាលដាលរលកទី2 កើតឡើងជាមិនខាន។

រដ្ឋបាលរដ្ឋនានា បានស្រង់សម្ដីរបស់លោកនាយករដ្ឋមន្ត្រីក្នុងអំឡុងការប្រជុំតាមរយៈវីដេអូ ខន់ហ្វើរ៉េនស៍ ថា “នាយករដ្ឋមន្ត្រីប្រាប់ថា វាសំខាន់ណាស់ដែលត្រូវកំណត់យុទ្ធសាស្ត្រចាកចេញពីការបិទប្រទេសរួមគ្នា ដើម្បីចៀសវាងពីការប្រមូលផ្ដុំរបស់ប្រជាជន នៅពេលដែលការបិទប្រទេសត្រូវបញ្ចប់”

ឥណ្ឌាបានរកឃើញអ្នកឆ្លងមេរោគហើយ 1,965នាក់ ក្នុងនោះមានស្លាប់ 50នាក់ ដែលចំនួននេះអាចរាប់បានថា តិចតួចខ្លាំងណាស់បើប្រៀបធៀបជាមួយសហរដ្ឋអាមេរិក ចិន អ៊ីតាលី និងអេស្ប៉ាញ តែយ៉ាងណាក៏ដោយ ក៏មានក្ដីកង្វល់ដ៏ធំធេងមួយថា ការប្រមូលផ្ដុំរបស់ប្រជាជននឹងកើតឡើងម្ដងទៀតនៅក្នុងទីក្រុងនីវដេលី បន្ទាប់ពីការប្រមូលផ្ដុំរបស់ក្រុមអ្នកបង្ហាត់សាសនាមូស្លីម 1ក្រុមកាលពីខែមុន ដែលបានក្លាយជាខ្សែដុតបញ្ឆេះនៃករណីឆ្លងរាលដាលមេរោគរាប់សិបនាក់ទូទាំងប្រទេស។

កាលពីសប្ដាហ៍កន្លងទៅ ប្រជាជនឥណ្ឌាចំនួនដ៏ច្រើនបានទៅប្រជ្រៀតគ្នាឡើងជិះរថភ្លើង និងរថយន្តក្រុងឱ្យបានទាន់ មុនពេលកិច្ចការងារអ្វីៗត្រូវបញ្ឈប់យ៉ាងទាន់ហន់ ខណៈដែលមនុស្សម្នាជាច្រើនទៀតសុខចិត្តដើរដោយជើង ដើម្បីត្រឡប់ទៅស្រុកកំណើតរបស់ខ្លួន ក្រោយពីរដ្ឋបាលបានបញ្ជាឱ្យបិទប្រព័ន្ធដឹកជញ្ជូនសាធារណៈ និងទុកតែសេវាកម្មសំខាន់ៗ ដើម្បីគ្រប់គ្រងការចម្លងសាយភាយរបស់មេរោគវីរុស ដែលខណៈនោះមានអ្នកឆ្លងមេរោគរួចហើយជាង 1,000នាក់។

តាមរយៈស្ថិតិរបស់រដ្ឋាភិបាល កាលពីអំឡុងឆ្នាំ2016-2017 បានរកឃើញថា ឥណ្ឌាមានពលករចំណាកស្រុកគ្មានជំនាញ ឬមានជំនាញតិចតួចប្រមាណជា 100លាននាក់ ឬប្រមាណជា 1ភាគ5 នៃកម្លាំងពលកម្មសរុបទូទាំងប្រទេស។

នៅពេលគ្មានការងារឱ្យធ្វើ ពលករភាគច្រើន ជាពិសេសក្នុងរដ្ឋដែលក្រៗ ដូចជា រដ្ឋភិហារ និងរដ្ឋឧតតារៈប្រទេសជាដើម បាននាំគ្នាធ្វើដំណើរឆ្ពោះមកទីក្រុងធំ និងរដ្ឋដែលមានៗ នៅប៉ែកខាងត្បូង។ មនុស្សទាំងនោះត្រូវស្នាក់អាស្រ័យដេកពួននៅក្នុងបន្ទប់ដ៏តូចចង្អៀត និងមានរយៈពេលធ្វើការច្រើនម៉ោងក្នុង 1ថ្ងៃៗ ដោយទទួលបានប្រាក់ឈ្នួលត្រឹមតែបន្តិចបន្តួច និងគ្មានសុវត្ថិភាព និងជំនួយអ្វីទាំងអស់អំពីរដ្ឋ។

ប្រាក់ដែលនៅសល់ពីការចាយវាយ នឹងត្រូវផ្ញើត្រឡប់ទៅទំនុកបម្រុងក្រុមគ្រួសារនៅឯស្រុក។

សារព័ត៌មានឥណ្ឌាបានប៉ាន់ប្រមាណថា វិធានការបិទប្រទេស បានបង្កឱ្យកើតមានការភៀសខ្លួនបំផ្លាស់ទីរបស់ប្រជាជនរាប់សែននាក់៕

ប្រភព៖ សាព័ត៌មានបរទេស

April 3, 2020

Category: សុខភាព