សុខភាព - La Reine Media

ចិនប្រកាសថា បាននាំចេញម៉ាស់ជិត4ពាន់លានបន្ទះ ខណៈចំណូលសរុបបានមកពីការលក់សម្ភារសុខាភិបាល ឡើងដល់1.4ពាន់លានដុល្លារ

មន្ត្រីនៃប្រទេសចិន ថ្ងៃនេះបានប្រកាសថា ប្រទេសនេះបានលក់ម៉ាស់ជិត4ពាន់លានបន្ទះទៅឱ្យបណ្ដាប្រទេសផ្សេងៗ រាប់ចាប់តាំងពីខែមិនារហូតដល់បច្ចុប្បន្ន។

បើទោះជា COVID-19 កំពុងតែបន្ថយឥទ្ធិពលនៅប្រទេសចិន ប៉ុន្តែទីក្រុងប៉េកាំងនៅតែជំរុញឱ្យបណ្ដារោងចក្រ បង្កើនការផលិតឧបករណ៍សុខាភិបាល ខណៈដែលវីរុសនៅតែបន្តឆ្លងរាលដាលខ្លាំងនៅលើពិភពលោក ដែលបានបណ្ដាលឱ្យមនុស្សជិត1.3លាននាក់ឆ្លងមេរោគ ក្នុងនោះមានជិត70,000នាក់បានបាត់បង់ជីវិត។

ប្រទេសចិន បាននាំចេញម៉ាស់ចំនួន3.86ពាន់លានបន្ទះ សម្លៀកបំពាក់ការពារមេរោគចំនួន37.5លានឈុត ម៉ាស៊ីនជំនួយដកដង្ហើមចំនួន16,000គ្រឿង និងឧបករណ៍ធ្វើតេស្តរកមេរោគCOVID-19ចំនួន2.84លានឈុត ចាប់តាំងពីថ្ងៃទី1មីនា ដោយមានការបញ្ជាទិញពីប្រទេសចំនួនជាង50។ នេះបើតាមការឱ្យដឹងពីមន្ត្រីគយម្នាក់ឈ្មោះ Jin Hai នាថ្ងៃនេះ។ មន្ត្រីរូបនេះបានបន្តថា ទំហំទឹកប្រាក់នៃសម្ភារសុខាភិបាលដែលបាននាំចេញរបស់ប្រទេសចិនសរុបប្រមាណជា1.4ពាន់លានដុល្លារអាមេរិក។

ក៏ប៉ុន្តែ ប្រទេសមួយចំនួនដូចជាហូឡង់ ហ្វីលីពីន ក្រូអាត ទួរគី និងអេស្ប៉ាញជាដើម បានត្អូញត្អែរអំពីគុណភាពសម្ភារដែលនាំចូលពីប្រទេសចិន៕

ប្រភព៖ សារព័ត៌មានបរទេស

April 6, 2020

COVID-19! ពលរដ្ឋហ្វីលីពីនម្នាក់ត្រូវបានបាញ់សម្លាប់ ព្រោះមិនគោរពបម្រាមគោចរ

ហ្វីលីពីន៖ បុរសម្នាក់នៅក្នុងខេត្ត Agusan del Norte ត្រូវបានសមត្ថកិច្ចបាញ់សម្លាប់ នៅពេលបុរសនេះគំរាមបុគ្គលិកសុខាភិបាល ព្រោះតែរំលឭកខ្លួនឱ្យពាក់ម៉ាស់។

“ជនសង្ស័យត្រូវបានបុគ្គលិកសុខាភិបាលក្នុងភូមិ ធ្វើការក្រើនរំឭកឱ្យពាក់ម៉ាស់”។ នេះបើតាមរបាយការណ៍របស់នគរបាលនៅទីតាំងគ្រប់គ្រង COVID-19 នៅក្នុងទីរួមស្រុក Nasipit នៃខេត្ត Agusan del Norte ភាគខាងត្បូងប្រទេសហ្វីលីពីន។ “ក៏ប៉ុន្តែ ជនសង្ស័យបែរជាមានភាពកាចសាហាវ និងបានបញ្ចេញសម្ដីមានលក្ខណៈបង្កហេតុ ហើយចុងក្រោយក៏បានយកកណ្ដៀវវាយប្រហារទៅលើបុគ្គលិកសុខាភិបាល”។

មន្ត្រីនគរបាលម្នាក់បានព្យាយាមបញ្ចុះបញ្ចូលឱ្យជនសង្ស័យបានត្រជាក់់ចិត្ត ប៉ុន្តែមិនបានសម្រេច ដូច្នោះក៏បានបាញ់សម្លាប់បរុសនោះ។ បុរសវ័យ63ឆ្នាំខាងលើត្រូវបានគេដឹងថា កំពុងស្រវឹងស្រា ពេលកំពុងបង្កហេតុ។ នេះគឺជាករណីដំបូងដែលនគរបាលបានបាញ់សម្លាប់ពលរដ្ឋ ដោយសារតែមិនបានគោរពតាមវិធានការទប់ស្កាត់ការឆ្លងរាលដាលនៃវីរុសCOVID-19។

ហ្វីលីពីន បច្ចុប្បន្នគឺជាសម្បុកមេរោគCOVID-19 ធំជាងគេលំដាប់ទី2នៅអាស៊ីអាគ្នេយ៍ បន្ទាប់ពីប្រទេសម៉ាឡេស៊ី ដោយហ្វីលីពីនមានអ្នកឆ្លងមេរោគជាង3,200នាក់ ក្នុងនោះមាន152នាក់បានបាត់បង់ជីវិត។ កោះ Luzon របស់ហ្វីលីពីន ត្រូវបានដាក់បម្រាមគោចររយៈពេល1ខែ ដែលចាប់ផ្ដើមពីថ្ងៃទី16មីនា។ ពលរដ្ឋនៅទីនេះ ត្រូវបានហាមមិនឱ្យចេញពីផ្ទះ លើកលែងតែមានការចាំបាច់បំផុត ឬជាបុគ្គលិកសុខាភិបាលជួរមុខ។ ខេត្តជាច្រើនផ្សេងទៀតរបស់ប្រទេសនេះក៏បានចេញបទបញ្ជាដោយឡែករបស់ខ្លួន ដើម្បីជួយទប់ស្កាត់ការរីករាលដាលមេរោគ។

ប្រធានាធិបតីហ្វីលីពីន លោក Rodrigo Duterte កាលពីថ្ងៃទី1មេសា បានព្រមានប្រជាជន ឱ្យសហការជាមួយអាជ្ញាធរ និងត្រូវគោរពតាមបទបញ្ជាដែលតម្រូវឱ្យពួកគេនៅតែផ្ទះ។ ទន្ទឹមនឹងនេះ លោកប្រធានាធិបតីក៏បានផ្ដល់សិទ្ធិឱ្យនគរបាល និងកងទ័ព បាញ់សម្លាប់អ្នកទាំងឡាយណាដែលរំលោភលើបទបញ្ជានេះផងដែរ៕

ប្រភព៖ សារព័ត៌មានបរទេស

April 6, 2020

សម្ដេចតេជោនឹងធ្វើសន្និសីទសារព័ត៌មានពិសេសមួយនៅថ្ងៃទី7 មេសា ស្អែកនេះ

នៅថ្ងៃទី 7ខែមេសា ឆ្នាំ2020 វេលាម៉ោង8:30នាទី ព្រឹកស្អែកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងធ្វើសន្និសីទសារព័ត៌មានស្តីពីការស្ថានការណ៍ និងការវិវត្តន៍រួមនៃជំងឺកូវីដ-19 នៅវិមានសន្តិភាពរាជធានីភ្នំពេញ៕

April 6, 2020

មេបញ្ជាការនាវាផ្ទុកយន្តហោះអាមេរិកាំងដែលត្រូវដកតំណែង វិជ្ជមានជាមួយ COVID-19

អតីតមេបញ្ជការ Brett Crozier ដែលត្រូវបានដកហូតតំណែងព្រោះតែបានតឿនឱ្យជម្លៀសក្រុមនាវិកចេញពីនាវា ផ្ទុកយន្តហោះ USS Theodore Roosevelt បានឆ្លងវីរុសCOVID-19។

កាពីតែន Brett Crozier មានរោគសញ្ញា COVID-19 នៅមុនពេលលោកត្រូវបានដកហូតតំណែងកាលពីថ្ងៃទី3មេសា ហើយទើបតែបានទទួលលទ្ធផលនៃការធ្វើតេស្តថ្មីៗនេះ។ នេះបើតាមការបង្ហើបឱ្យដឹងពីមិត្ត2នាក់របស់លោក កាលពីម្សិលមិញ។

អ្នកនាំពាក្យរបស់កងទ័ពជើងទឹកសហរដ្ឋអាមេរិក បានបដិសេធការបញ្ចេញមតិអំពីដំណឹងនេះ។ បច្ចុប្បន្ន ស្ថានភាពជំងឺរបស់លោក Brett Crozier មិនទាន់ត្រូវបានគេបង្ហើបឱ្យដឹងនៅឡើយ។

លោក Crozier បានបាត់បង់តំណែង ដោយសារតែលោកបានផ្ញើលិខិតមួយច្បាប់ ទៅកាន់មន្ត្រីជាច្រើនរូប។ ក្នុងលិខិតនោះ លោកបាននិយាយអំពីស្ថានភាពនាវិករបស់លោកដែលកំពុងផ្ទុកវីរុសCOVID-19 ហើយអំពាវនាវឱ្យជម្លៀសក្រុមនាវិក4,000នាក់ចេញពីនាវាផ្ទុកយន្តហោះ USS Theodore Roosevelt ដើម្បីទប់ស្កាត់ការឆ្លងរាលដាលវីរុសនេះ។

មន្ត្រីយោធានៃកងទ័ពជើងទឹកសហរដ្ឋអាមេរិកមួយចំនួនយល់ថា លិខិតរបស់លោក Crozier បានធ្វើឱ្យក្រុមនាវិកនៃនាវាផ្ទុកយន្តហោះ USS Theodore Roosevelt និងគ្រួសាររបស់ពួកគេភ័យស្លន់ស្លោ។

កាលពីថ្ងៃទី25មីនា គេបានរកឃើញអ្នកផ្ទុកវីរុសCOVID-19 ចំនួន3ករណីនៅលើនាវា USS Theodore Roosevelt ប៉ុន្តែគេមិនទាន់បានដឹងប្រាកដអំពីប្រភពចម្លងនៅឡើយ។

កងទ័ពជើងទឹកសហរដ្ឋអាមេរិក បានបញ្ជាឱ្យផ្អាកដំណើរការនាវាផ្ទុកយន្តហោះ Theodore Roosevelt ដើម្បីធ្វើតេស្តរកមេរោគទៅលើនាវិកជាង5,000នាក់។ រដ្ឋមន្ត្រីក្រសួងការពារជាតិសហរដ្ឋអាមេរិក Mark Esper កាលពីម្សិលមិញបានឱ្យដឹងថា សមាជិកចំនួន155នាក់នៃក្រុមនាវិកខាងលើ វិជ្ជមានជាមួយនឹង COVID-19 បន្ទាប់ពីបានធ្វើតេស្ត៕

ប្រភព៖ សារព័ត៌មានបរទេស

April 6, 2020

នៅថ្ងៃនេះគ្មានឡើយករណីវីជ្ជមានកូវីដ19 និងអ្នកជំងឺបានជាសះស្បើយចំនួន 3នាក់បន្ថែម

គិតត្រឹមម៉ោង 7ព្រឹក ថ្ងៃទី6 មេសា នេះ ក្រសួងសុខាភិបាលបានប្រកាសថា មិនមានករណីវិជ្ជាមានកូវីដ19 ថ្មីទេ។ ម្យ៉ាងវិញទៀតក្រសួងក៏បានប្រកាសអំពីករណីជាសះស្បើយចំនួន 3នាក់ បន្ថែម ដែលចំនួនអ្នកជាកើនឡើងដល់ 53នាក់៕

April 6, 2020

ជាង69,000នាក់ស្លាប់ដោយសារ COVID-19 នៅទូទាំងពិភពលោក

សហរដ្ឋអាមេរិក និងអឺរ៉ុប បន្តជាសម្បុកមេរោគ COVID-19 ធំជាងគេក្នុងពិភពលោក បណ្ដាលឱ្យតួលេខអ្នកឆ្លងមេរោគឡើងដល់ជិត1,3លាននាក់ និងស្លាប់ជាង69,000នាក់។

ស្ថិតិរបស់សាកលវិទ្យាល័យ Johns Hopkins ឱ្យដឹងថា ពិភពលោកទាំងមូលបានរកឃើញអ្នកផ្ទុកមេរោគ COVID-19 សរុប1,270,069នាក់ និងស្លាប់69,309នាក់នៅក្នុងប្រទេស និងដែនដីចំនួន208 ដោយអ្នកឆ្លងមេរោគកើន73,515ករណី និងស្លាប់កើន4,760ករណីបន្ថែមទៀតបើធៀបនឹងម្សិលមិញ។ ចំនួនអ្នកជំងឺបានជាសះស្បើយ មាន 259,810នាក់។

សហរដ្ឋអាមេរិក៖ អ្នកជំងឹថ្មី29,704នាក់ និងអ្នកជំងឺសរុប335,524នាក់។ អ្នកស្លាប់ថ្មី1,271នាក់ និងអ្នកស្លាប់សរុប9,562នាក់។ ប្រទេសនេះ នៅតែជាសម្បុកមេរោគធំជាងគេក្នុងពិភពលោក។

អេស្ប៉ាញ៖ អ្នកជំងឺថ្មី 5,478នាក់ និងអ្នកជំងឺសរុប131,646នាក់។ អ្នកស្លាប់ថ្មី694នាក់ និងស្លាប់សរុប12,641នាក់។ ប្រទេសនេះ បានក្លាយជាសម្បុកមេរោគកូរ៉ូណាធំជាងគេលំដាប់ទី2ក្នុងពិភពលោក និងលំដាប់ទី1នៅអឺរ៉ុប។

អ៊ីតាលី៖ អ្នកជំងឺថ្មី4,316នាក់ និងអ្នកស្លាប់ថ្មី525នាក់។ អ្នកជំងឺសរុប128,948នាក់ និងអ្នកស្លាប់សរុប15,887នាក់។ ប្រទេសនេះ បន្តជា “វាលពិឃាត” របស់ COVID-19 ធំជាងគេក្នុងពិភពលោក។ អ៊ីតាលី ក៏ជាប្រទេសដំបូងគេបង្អស់នៅអឺរ៉ុប ដែលបានចេញបទបញ្ជាបិទប្រទេសទាំងមូលដោយសារតែ COVID-19។

អាល្លឺម៉ង់៖ អ្នកជំងឺថ្មី4,031នាក់ និងអ្នកស្លាប់ថ្មី140នាក់។ អ្នកជំងឺសរុប100,123នាក់ និងអ្នកស្លាប់សរុប1,584នាក់។ ប្រទេសនេះគឺជាសម្បុកមេរោគ COVID-19 ធំជាងគេលំដាប់ទី3នៅអឺរ៉ុប។

អង់គ្លេស៖ អ្នកជំងឺសរុប47,806នាក់ និងអ្នកស្លាប់សរុប4,934នាក់។ អ្នកស្លាប់កើន621នាក់ បើធៀបនឹងម្សិលមិញ។

អ៊ីរ៉ង់៖ ប្រទេសនេះបន្តជាសម្បុកមេរោគធំជាងគេលំដាប់ទី2នៅអាស៊ី បន្ទាប់ពីប្រទេសចិន ដោយមានអ្នកជំងឺសរុប52,226នាក់។ ប៉ុន្តែ ប្រទេសនេះគឺជា “វាលពិឃាត” របស់ COVID-19 ធំជាងគេលំដាប់ទី1នៅអាស៊ី ដោយមានអ្នកស្លាប់សរុប3,603នាក់ ខណៈអ្នកស្លាប់សរុបនៅប្រទេសចិន មានចំនួន3,329នាក់ ក្នុងចំណោមអ្នកជំងឺសរុប81,669នាក់។

អាស៊ីអាគ្នេយ៍៖ ម៉ាឡេស៊ី ជាសម្បុកមេរោគធំជាងគេក្នុងតំបន់ ដោយមានអ្នកជំងឺសរុប3,662នាក់ និងស្លាប់61នាក់។ ចំណែកឥណ្ឌូនេស៊ីវិញ គឺជា “វាលពិឃាត” របស់ COVID-19 ធំជាងគេក្នុងតំបន់ ដោយមានអ្នកស្លាប់198នាក់ និងអ្នកជំងឺសរុប2,273នាក់។ កម្ពុជាមានអ្នកជំងឺសរុប114នាក់ ក្នុងនោះមាន64នាក់កំពុងទទួលការព្យាបាល និង50នាក់បានជាសះស្បើយ៕

ប្រភព៖ សារព័ត៌មានបរទេស

April 6, 2020

សម្តេចតេជោ ហ៊ុន សែន តម្លើងប្រាក់ឧបត្ថម្ភបន្ថែម និងផ្តល់ភាពកក់ក្តៅដល់ក្រុមគ្រូពេទ្យក្នុងពេលបំពេញការងារប្រយុទ្ធប្រឆាំងជំងឺឆ្លងកូវីដ19

កាលពីថ្ងៃទី4 មេសា ម្សិលមិញនេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានចេញបញ្ជាអោយ រដ្ឋមន្រ្តីក្រសួងសុខាភិបាល និងរដ្ឋមន្រ្តីក្រសួងហិរញ្ញវត្ថុ ពិនិត្យបង្កើននូវប្រាក់ឧបត្ថម្ភបំប៉នដល់ក្រុមគ្រូពេទ្យនៅជួរមុខ ដែលកំពុងបំពេញបេសកកម្មពិនិត្យព្យាបាលជំងឺឆ្លងកូវីដ19។

សម្តេចតេជោនាយករដ្ឋមន្រ្តី បានបញ្ជាក់ជូន ឯកឧត្តមរដ្ឋមន្រ្តីទាំងពីររូប “ត្រូវរៀបចំធ្វើអោយបានឆាប់ ព្រោះក្នុងរយៈពេលប៉ុន្មានខែមកនេះ គឺក្រុមគ្រូពេទ្យទាំងនោះមិនមានឱកាសបាននៅជិតប្រពន្ធកូនទេ នេះគឺជាការលះបង់មួយខ្ពស់ណាស់ ដូច្នេះដើម្បីកុំអោយបងប្អូនកូនក្មួយក្រុមគ្រូពេទ្យទាំងនេះ មានការពិបាកខ្វល់ចិត្តក្នុងការគិតគូរទៅដល់ក្រុមគ្រួសារនៅឯផ្ទះ ហើយកាន់តែមានភាពហ្នឹងហ្នរចិត្ត និងលទ្ថភាពគ្រប់គ្រាន់ក្នុងការបម្រើសេវាសុខភាពជូនបងប្អូនប្រជាពលរដ្ឋយើង”។

សម្តេចតេជោ ហ៊ុន សែន នាយករដ្ឋមន្ត្រី តែងតែយកចិត្តទុកដាក់គិតគូពីសុខទុក្ខ និងសុវត្ថិភាពរបស់ក្រុមគ្រូពេទ្យដែលកំពុងបំពេញការងារជួរមុខប្រឆាំងនឹងជំងឺឆ្លងកូវីដ19 «ទាំងសម្ភារៈ និងបរិក្ខារពេទ្យចាំបាច់នានាសម្រាប់គ្រូពេទ្យ គឺត្រូវត្រៀមបម្រុងទុកអោយមានប្រើប្រាស់គ្រប់ៗគ្នា ហើយនេះជាការចាំបាច់ ព្រោះយើងមិនអាចអោយគ្រូពេទ្យណាម្នាក់ឆ្លងរោគព្រោះតែខ្វះការទទួលខុសត្រូវរបស់យើងនោះទេ”៕

ប្រភព៖ Samdech Hun Sen, Cambodian Prime Minister

April 5, 2020

សម្តេចតេជោ ហ៊ុន សែន បញ្ជាអោយក្រសួងសុខាភិបាលត្រៀមរៀបចំកន្លែងពិនិត្យសុខភាព និងត្រៀមបម្រុងសម្ភារៈគ្រប់គ្រាន់ជូនពលករមកពីប្រទេសថៃដែលត្រូវដាក់អោយនៅដាច់ដោយឡែក 14ថ្ងៃ

នៅថ្ងៃទី4 មេសា ម្សិលមិញ សម្តេចតេជោ ហ៊ុន សែន នាយករដ្ឋមន្រ្តី បានចេញបញ្ជាណែនាំបន្ថែមក្នុងការដោះស្រាយជូនបងប្អូនកូនក្មួយពលករ ដែលបានវិលត្រឡប់មកពីប្រទេសថៃកន្លងមកចំនួនប្រមាណ 5ម៉ឺននាក់ ហើយដែលចំនួននេះនឹងមានមកជាបន្តបន្ទាប់ទៀត ដែលអាចនឹងកើនទៅដល់ 6ម៉ឺននាក់។

ក្នុងនាមជាប្រធានគណៈកម្មការជាតិប្រយុទ្ធប្រឆាំងនឹងជំងឺកូវីដ19 សម្តេចតេជោ បានណែនាំទៅក្រសួងសុខាភិបាល “ត្រូវតាមដានត្រួតពិនិត្យនៅតាមទល់ដែនអោយបានហ្មត់ចត់ ហើយក្នុងនោះត្រូវត្រៀមរៀបចំបំពាក់សម្ភារៈបរិក្ខារពេទ្យ និងរៀបចំទីកន្លែងពិនិត្យសុខភាពអោយបានល្អដល់ពលករ។

ក្រសួងសុខាភិបាលត្រូវធ្វើជាម្ចាស់ការលើការងារនេះ ហើយសហការជាមួយក្រុមការងារនៅតាមព្រំដែនទាំងអស់។ ទន្ទឹមនឹងនេះ គឺត្រូវត្រៀមទិញមុង, ភួយ, កន្ទេល, ខ្នើយ, ក្រមា សម្រាប់ប្រគល់ជូនបងប្អូនកូនក្មួយពលករដែលត្រូវដាក់អោយស្នាក់នៅដាច់ដោយឡែកបណ្តោះអាសន្នចំនួន 14ថ្ងៃ ដូចជានៅតាមសាលារៀន តាមសហគម ឬនៅតាមលំនៅដ្ឋានជាមួយក្រុមគ្រួសារជាដើម”។

សម្តេចតេជោ ហ៊ុន សែន បានបញ្ជាក់ផងដែរថា “ពេលណាបងប្អូនចាកចេញពីទីនោះ គឺសូមប្រគល់សំម្ភារៈទាំងនោះជូនទៅគាត់យកទៅប្រើប្រាស់តែម្តង”។

ចំពោះមធ្យោបាយសម្រាប់ដឹកជញ្ជូនបងប្អូនកូនក្មួយពលករវិញ គឺត្រូវប្រើប្រាស់រថយន្តកងទ័ពមកពីកងពលលេខ90 និង កងពលលេខ99 ដែលត្រូវរៀបចំដាក់ដំបូលអោយបានស្រួល។

មកទល់ពេលនេះ បងប្អូនកូនក្មួយពលករទាំងអស់ដែលបានវិលត្រឡប់មកប្រទេសវិញ គឺមិនមានបង្ករហានិភ័យណាមួយនៅតាមសហគមនៅឡើយទេ។

សម្តេចតេជោ ហ៊ុន សែន បានអបអរសាទរ និងកោតសរសើរដល់ថ្នាក់ភូមិ, ថ្នាក់ឃុំ, ស្រុក និងថ្នាក់ជាតិ ដែលបានចុះជួយនៅតាមមូលដ្ឋាន ក្នុងនោះរួមទាំងការអប់រំឃោសនា ផ្សព្វផ្សាយណែនាំទប់ស្កាត់ជំងឺឆ្លងកូវីដ19 ដែលធ្វើអោយយើងគ្រប់គ្រងស្ថានការណ៍បានល្អមកទល់ពេលនេះ៕

ប្រភព៖ Samdech Hun Sen, Cambodian Prime Minister

April 5, 2020

អូស្ត្រាលីរកឃើញថ្នាំកាត់បន្ថយ “ការបង្កើតកូនចៅ” របស់ COVID-19

អូស្ត្រាលី៖ ក្រុមអ្នកវិទ្យាសាស្ត្រនៅសាកលវិទ្យាល័យ Monash បានរកឃើញថា ថ្នាំប្រឆាំងប៉ារ៉ាស៊ីតឈ្មោះ Ivermectin មានប្រសិទ្ធភាពខ្ពស់ក្នុងការកាត់បន្ថយ “ការបង្កើតកូនចៅ” របស់វីរុសCOVID-19 នៅពេលពួកគេធ្វើការនៅក្នុងបន្ទប់ពិសោធន៍។

“Ivermectin ត្រូវបានប្រើប្រាស់យ៉ាងទូលំទូលាយ និងជាឱសថសុវត្ថិភាព។ ពេលនេះ យើងត្រូវការស្វែងយល់អំពីកម្រិតសុវត្ថិភាពដែលមនុស្សអាចប្រើប្រាស់បាន ហើយថាតើវាអាចមានប្រសិទ្ធភាពដែរ ឬអត់ ពេលប្រើនៅលើមនុស្ស។ នោះគឺជាជំហានបន្ទាប់” វេជ្ជបណ្ឌិត Kylie Wagstaff នៅសាកលវិទ្យាល័យ Monash ដែលជាប្រធានក្រុមអ្នកស្រាវជ្រាវខាងលើ បានឱ្យដឹងបែបនេះ។ លទ្ធផលនៃការសិក្សាស្រាវជ្រាវខាងលើនេះ ត្រូវបានចេញផ្សាយនៅលើទស្សាវដ្ដី Antiviral Research កាលពីថ្ងៃទី3មេសាកន្លងទៅ។

(ថ្នាំ Ivermectin ដែលគេប្រើសម្រាប់ព្យាបាលកមរមាស់ និងជំងឺមួយចំនួនទៀតដែលកើតឡើងដោយប៉ារ៉ាស៊ីត)។

ថ្នាំ Ivermectin កាត់បន្ថយម៉ូលេគុល ARN (RNA គឺ អាស៊ីត nucleic តែមួយដែលជាប់គ្នាដែលផ្សំឡើងពីនុយក្លូទ័រ។ RNA ដើរតួយ៉ាងសំខាន់ក្នុងការសំយោគប្រូតេអ៉ុននៅពេលដែលវាត្រូវបានបញ្ចូលក្នុងការ ចម្លង សំយោគនិង បកប្រែក្រមហ្សែន ដើម្បីផលិតប្រូតេអ៊ីន។ RNA តំណាងឱ្យអាស៊ីត ribonucleic) របស់វីរុសCOVID-19 នៅលើកោសិកាដែលបានបណ្ដុះ ដល់ទៅ93%ក្រោយប្រើថ្នាំនេះរយៈពេល24ម៉ោង និង99% ក្រោយរយៈពេល48ម៉ោង ពោលគឺថ្នាំនេះធ្វើឱ្យ ARN របស់វីរុស ត្រូវថយចុះប្រហែល5,000ដង។ “យើងបានរកឃើញថា គ្រាន់តែប្រើថ្នាំនេះមួយដង ក៏អាចកម្ចាត់ ARN របស់វីរុសស្ទើរតែទាំងអស់ដោយប្រើពេលត្រឹមតែ48ម៉ោង ហើយបើ24ម៉ោង វាក៏អាចកាត់បន្ថយបានច្រើនផងដែរ” Wagstaff ថ្លែងបែបនេះ។ ក្រុមអ្នកវិទ្យាសាស្ត្រមិនទាន់បានដឹងច្បាស់អំពីយន្តការនៃការកម្ចាត់វីរុសរបស់ថ្នាំនេះនៅឡើយ។ អ្នកស្រី Wagstaff យល់ថា ថ្នាំនេះអាចមានលទ្ធភាពទប់ស្កាត់មិនឱ្យវីរុសរារាំងកោសិកាមនុស្សកម្ចាត់ពួកវា។

(ARN គឺ អាស៊ីត nucleic តែមួយដែលជាប់គ្នាដែលផ្សំឡើងពីនុយក្លូទ័រ។ RNA ដើរតួយ៉ាងសំខាន់ក្នុងការសំយោគប្រូតេអ៉ុននៅពេលដែលវាត្រូវបានបញ្ចូលក្នុងការ ចម្លង សំយោគនិង បកប្រែក្រមហ្សែន ដើម្បីផលិតប្រូតេអ៊ីន។ RNA តំណាងឱ្យអាស៊ីត ribonucleic)។

ថ្នាំ Ivermectin ត្រូវបានប្រើប្រាស់ចាប់ពីទសវត្សរ៍ឆ្នាំ1980 ដើម្បីព្យាបាលជំងឺកមរមាស់ និងចៃ និងជំងឺមួយចំនួនទៀតដែលកើតឡើងដោយប៉ារ៉ាស៊ីត (ប៉ារ៉ាស៊ីតគឺជាពពួកមីក្រុបដែលរស់នៅដោយសារសរីរាង្គដទៃ)។ គ្រូពេទ្យក៏ប្រើថ្នាំនេះដើម្បីព្យាបាល rosacea ជាជំងឺដែលធ្វើឱ្យស្បែកមុខឡើងក្រហមផងដែរ៕

ប្រភព៖ Newsweek

April 5, 2020

សែនអាណោចអធម…ប្រទេសអេក្វាដ័រ តស៊ូវិបត្តិកូវីដ-19 លែងរួច បង្ខំចិត្តដើរប្រមូលសាកសពជនរងគ្រោះដ៏ច្រើនដែលដេកស្លាប់តាមចិញ្ចើមថ្នល់

អាជ្ញាធរនៃប្រទេសអេក្វាដ័រ បានប្រញាប់ដើរប្រមូលសាកសពអ្នកស្លាប់ដោយសារមេរោគកូវីដ-19 ដែលដេកស្លាប់នៅតាមចិញ្ចើមថ្នល់ដ៏ច្រើន មកដាក់ក្នុងទូកុងតឺន័រ ក្រោយពីប្រព័ន្ធសាធារណៈសុខាភិបាលក្នុងទីក្រុង កួយ៉ាហ្គីល មណ្ឌលកណ្ដាលនៃការឆ្លងរាតត្បាត ទ្រាំទ្រនឹងវិបត្តិកូវីដ-19 លែងរួច។

នៅថ្ងៃទី5 មេសា 2020នេះ ទីភ្នាក់ងារសារព័ត៌មានអន្តរជាតិ និងរ៉យទ័រ បានរាយការណ៍ពីការឆ្លងរាតត្បាតរបស់មេរោគវីរុសកូរ៉ូណាប្រភេទថ្មី ឬកូវីដ-19 នៅក្នុងប្រទេសអេក្វាដ័រ ប្រទេសដែលក្របំផុតក្នុងតំបន់អាហ្វ្រិកខាងត្បូង ដែលនាំឱ្យកើតមានភាពអាណោចអធម និងសោកសង្រេងក្នុងចិត្តយ៉ាងខ្លាំង ដោយសារតែប្រទេសមួយនេះ កំពុងជួបនឹងបញ្ហាមានចំនួនអ្នកស្លាប់ដ៏ច្រើន រហូតដល់បន្ទប់តម្កល់សពនៅក្នុងមន្ទីពេទ្យក្នុងតំបន់ លែងមានកន្លែងគ្រប់គ្រាន់សម្រាប់ទុកដាក់ និងខណៈពេលជាមួយគ្នា បុគ្គលិកក្នុងមន្ទីរពេទ្យ ក៏កំពុងតស៊ូទ្រាំទ្រក្នុងការព្យាបាលអ្នកជំងឺក្នុងចំនួនដ៏ច្រើន ស្ទើរតែលែងរួចហើយដែរ ធ្វើឱ្យមានអ្នកជំងឺដោយសារមេរោគកូវីដ-19 ដែលមិនបានមកព្យាបាលក្នុងមន្ទីរពេទ្យ ត្រូវដេកស្លាប់នៅតាមចិញ្ចើមថ្នល់យ៉ាងច្រើនគួរឱ្យរន្ធត់ចិត្ត រហូតដល់អាជ្ញាធរក្នុងតំបន់ត្រូវប្រញាប់ដើរប្រមូលសាកសពទាំងនោះមកទុកមួយកន្លែង។

អាជ្ញាធរក្នុងប្រទេសអេក្វាដ័រ កំពុងដឹកជញ្ជូនសាកសពអ្នកស្លាប់ដោយសារមេរោគកូវីដ-19 យកទៅដាក់ក្នុងទូកុងតឺន័រ ខណៈដែលមេរោគមរណៈនេះកំពុងឆ្លងរាតត្បាតយ៉ាងខ្លាំងក្លានៅក្នុងប្រទេសនេះ

Caption៖ អាជ្ញាធរក្នុងប្រទេសអេក្វាដ័រ កំពុងដឹកជញ្ជូនសាកសពអ្នកស្លាប់ដោយសារមេរោគកូវីដ-19 យកទៅដាក់ក្នុងទូកុងតឺន័រ ខណៈដែលមេរោគមរណៈនេះកំពុងឆ្លងរាតត្បាតយ៉ាងខ្លាំងក្លានៅក្នុងប្រទេសនេះ

យ៉ាងណាក៏ដោយ ទីភ្នាក់ងារសារព័ត៌មានរ៉យទ័រ បានរាយការណ៍ថា កាលពីថ្ងៃសៅរ៍(ទី4មេសា)កន្លងទៅ រដ្ឋបាលអេក្វាដ័រ បានចាប់ផ្ដើមដំណើរការដឹកជញ្ជូនអ្នកស្លាប់ដោយសារមេរោគវីរុសកូវីដ-19 យកទៅដាក់ក្នុងទូកុងតឺន័រខ្នាតធំហើយ ក្រោយពីមានអ្នកស្លាប់ចំនួនជាច្រើនរយនាក់ នៅក្នុងទីក្រុង កួយ៉ាហ្គីល ទីក្រុងធំបំផុត និងមានប្រជាជនច្រើនបំផុតរបស់ប្រទេស ចំនួនប្រមាណជា 2.29លាននាក់។

រដ្ឋបាលអេក្វាដ័រ មានការត្រៀមទូកុងតឺន័រខ្នាតធំ មានម៉ាស៊ីនត្រជាក់ចំនួន 3ទូ ដែលទូនីមួយៗមានបណ្ដោយប្រវែង ប្រមាណជា 12ម៉ែត្រ និងបាននាំយកមកដាក់តាំងនៅក្នុងមន្ទីរពេទ្យដើម្បីតម្កល់សាកសពអ្នកស្លាប់ មុននឹងនាំយកទៅធ្វើបុណ្យតាមពិធីសាសនា។

លោកអភិបាលក្រុង កួយ៉ាហ្គីល ដែលជាទីក្រុងធំរបស់ប្រទេសអេក្វាដ័រ និងដែលបានរកឃើញអ្នកឆ្លងមេរោគ និងស្លាប់ច្រើនជាងគេបំផុតក្នុងចំណោមទីក្រុងផ្សេងទៀតរបស់ប្រទេសអេក្វាដ័រនោះ បានថ្លែងថា ខណៈនេះមានអ្នកស្លាប់ដោយសារមេរោគកូវីដ-19នៅក្នុងទីក្រុងនេះ ត្រូវបានយកទៅបញ្ចុះរួចរាល់ហើយប្រមាណជា 150សាកសព។

ទាំងអស់នេះ រដ្ឋបាលអេក្វាដ័រ បានអះអាងថា មានអ្នកស្លាប់ដោយសារមេរោគកូវីដ-19 ចំនួន 318នាក់ ដែលធ្វើឱ្យអេក្វាដ័រកំពុងតែក្លាយជាប្រទេសមួយដែលមានចំនួនអ្នកស្លាប់ដោយសារមេរោគនេះ ច្រើនបំផុតនៅក្នុងទ្វីបអាហ្វ្រិក និងមានអ្នកឆ្លងមេរោគនេះ ចំនួន 3,465នាក់ ខណៈដែលរដ្ឋបាលអេក្វាដ័របានធ្វើការប៉ាន់ប្រមាណថា ចំនួនអ្នកស្លាប់ដោយសារមេរោគកូវីដ-19 នៅក្នុងទីក្រុងកួយ៉ាហ្គីល និងខេត្តក្បែរខាង នឹងកើនឡើងខ្ពស់ដល់ទៅ 3,500នាក់ រហូតដល់ត្រូវរៀបចំជាជំរំពិសេសមួយសម្រាប់កប់សាកសពចំនួនដ៏ច្រើនទាំងនោះ និងកាលពីថ្ងៃសៅរ៍(ទី4មេសា)កន្លងទៅ រដ្ឋបាលអេក្វាដ័រថែមទាំងបានចាប់ផ្ដើមប្រើប្រព័ន្ធឌីជីថលបែបថ្មី ដើម្បីឱ្យសមាជិកក្នុងគ្រួសារអ្នកស្លាប់ អាចតាមដានស្វែងរកសាច់ញាតិរបស់ខ្លួនដែលស្លាប់ហើយនោះថា ត្រូវបាននាំយកទៅបញ្ចុះនៅទីណាហើយទៀតផង៕

ប្រភព៖សារព័ត៌មានបរទេស

April 5, 2020

Category: សុខភាព