សុខភាព - La Reine Media

សហរដ្ឋអាមេរិកព្រមានថានឹងវែកមុខអ្នកនៅពីក្រោយ COVID-19

រដ្ឋមន្ត្រីការបរទេសសហរដ្ឋអាមេរិក លោក Pompeo បានអះអាងថា នឹងមានការថ្កោលទោសអ្នកដែលត្រូវទទួលខុសត្រូវលើបញ្ហាវីរុសCOVID-19 ប៉ុន្តែលោកមិនបានលើកឡើងឱ្យចំឈ្មោះថាជាប្រទេសចិន ឬមួយប្រទេសណានោះទេ។

“នឹងដល់ពេលមួយដែលត្រូវធានាថា យើងទាំងអស់គ្នាត្រូវតែបានដឹងអំពីអ្វីដែលបានកើតឡើង ហើយអ្នកទទួលខុសត្រូវ ត្រូវតែមានមូលហេតុសមហេតុផលបំផុត។ ខ្ញុំជឿជាក់ថា ដំណាក់កាលនោះនឹងកើតឡើងមិនខាន” នេះបើតាមសម្ដីរបស់លោក Mike Pompeo ដែលបានឆ្លើយនឹងសំណួររបស់ភ្នាក់ងារយកព័ត៌មានអាល្លឺម៉ង់ កាលពីថ្ងៃទី13មេសាកន្លងទៅ។

នៅពេលត្រូវបានសួរថា តើប្រទេសចិន ត្រូវតែ “ទទួលខុសត្រូវ” ចំពោះការខាតបង់ដោយសារCOVID-19 ដែរ ឬអត់ លោករដ្ឋមន្ត្រីការបរទេសអាមេរិកាំង បានច្រានចោលរាល់ការដាក់ទោសជាបន្ទាន់ណាមួយទៅលើទីក្រុងប៉េកាំង ដោយលោកសង្កត់ធ្ងន់ថា ប្រការសំខាន់នៅពេលនេះ គឺត្រូវតែសហការគ្នាទូទាំងពិភពលោក ដើម្បីទប់ទល់នឹងរោគរាតត្បាត។

លោក Pompeo ឱ្យដឹងថា គេត្រូវការជជែកវែកញែកជាសកលអំពីការដែលថា តើរដ្ឋាភិបាលចិន ត្រូវតែទទួលខុសត្រូវលើបញ្ហាCOVID-19 ឬអត់។ លោកអះអាងថា “រឿងដែលសំខាន់គឺត្រូវតែយល់ច្បាស់ថា រោគរាតត្បាតនេះ បានចាប់ផ្ដើមដោយរបៀបណា កើតឡើងនៅទីណា និងមានប្រភពមកពីណា។ យើងបានដឹងអំពីរឿងរ៉ាវនៅតំបន់ផ្សារដ៏សើមមួយនៅប្រទេសចិន ជាកន្លែងដែលវីរុសបានចាប់ផ្ដើមឆ្លងរាលដាល ហើយសំខាន់គឺទូទាំងពិភពលោកសុទ្ធតែយល់អំពីប្រការនេះ”។

លោកបន្តថា រដ្ឋាភិបាលសហរដ្ឋអាមេរិក កំពុងតែផ្ដោតទៅលើការ “មើលទៅខាងមុខ” និងប្រឹងប្រែងស្វែងរកច្រកចេញសមស្របដើម្បីកាត់បន្ថយហានិភ័យដែលអាចកើតឡើងដោយសារCOVID-19 នាពេលខាងមុខ។ Pompeo អះអាងថា សហរដ្ឋអាមេរិក កំពុងអនុវត្តភារកិច្ចចំពោះមុខ ធ្វើឱ្យប្រព័ន្ធដំណើរការឡើងវិញ ដើម្បីអាចបើកទ្វារសេដ្ឋកិច្ចអាមេរិក និងសេដ្ឋកិច្ចសកលជាថ្មី។

រដ្ឋមន្ត្រីការបរទេសសហរដ្ឋអាមេរិក កាលពីខែមុន បានរិះគន់ចំពោះវិធីដែលប្រទេសចិនប្រើដើម្បីទប់ទល់នឹងCOVID-19 និងចោទប្រកាន់ទីក្រុងប៉េកាំងថា មិនបានផ្ដល់ព័ត៌មានចាំបាច់ដល់ពិភពលោក សម្រាប់ប្រយុទ្ធប្រឆាំងនឹងរោគរាតត្បាត។ លោក Pompeo បានអះអាងជាច្រើនលើកថា ប្រទេសចិនខ្ជះខ្ជាយពេលវេលាដ៏មានតម្លៃ ក្នុងការទប់ទល់នឹងវីរុស ហើយលោកក៏ធ្លាប់បានធ្វើឱ្យទីក្រុងប៉េកាំងខឹងសម្បាជាបន្តបន្ទាប់ ដោយហៅ COVID-19 ថាជា “វីរុសចិន”។

សូមរំឭកថា COVID-19 បានចាប់ផ្ដើមបង្ហាញខ្លួននៅក្នុងទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2019 ហើយមកដល់ពេលនេះ វាមានវត្តមាននៅក្នុងប្រទេស និងដែនដីចំនួន210 នៅក្នុងពិភពលោក បណ្ដាលឱ្យមនុស្សជាង1,925,000នាក់ត្រូវឆ្លងមេរោគ និងជាង119.600នាក់បានបាត់បង់ជីវិត ក្នុងនោះ សហរដ្ឋអាមេរិកមានអ្នកជំងឺសរុបជាង580,000នាក់ និងអ្នកស្លាប់ជាង23,600នាក់ ខណៈប្រទេសចិនបានប្រកាសថា បានគ្រប់គ្រងវីរុសនេះស្ទើរតែទាំងស្រុងហើយ ដោយមានអ្នកឆ្លងវីរុសថ្មីប្រមាណជា100នាក់ក្នុងមួយថ្ងៃៗ ចំណែកករណីស្លាប់ថ្មីក៏បានថយចុះនៅក្រោម10នាក់ក្នុងមួយថ្ងៃ៕

ប្រភព៖ សារព័ត៌មានបរទេស

April 14, 2020

ចេះតែរកនឹកឃើញហ្មង? ប្រទេសឥណ្ឌូនេស៊ី ប្រើ “ខ្មោច” ទប់ស្កាត់អ្នកចេញក្រៅផ្ទះ កាពារកូវីដ-19 ឆ្លងរាលដាល(មានឃ្លីប)

ទីភ្នាក់ងារព័ត៌មានរ៉យទ័រ និងនីវយ៉ក ផូស្តិ៍ បានរាយការណ៍ថា បណ្ដុំកោះគើពូ នៅលើកោះជ្វារបស់ប្រទេសឥណ្ឌូនេស៊ី បានបញ្ចេញអៃឌៀប្លែកចម្លែកគ្មានអ្នកណាដូច សម្រាប់ចាត់ការពួកស្រុក ដែលល្មើសវិធានការបង្ខាំងខ្លួននៅតែក្នុងផ្ទះ និងរក្សាគម្លាតឆ្ងាយពីគ្នាខាងសង្គម កណ្ដាលការឆ្លងរាលដាលដ៏គួរឱ្យខ្លាចរបស់មេរោគវីរុសកូវីដ-19 ដោយការលែងខ្មោចឆៅ ឱ្យចេញលងបន្លាចក្នុងពេលរាត្រី…តែការពិត វិញ្ញាណខ្មោចទាំងនោះ មិនមែនជារបស់ពិតទេ គ្រាន់តែជាក្រុមអ្នកស្ម័គ្រចិត្ត តុបតែងកាយធ្វើជាវិញ្ញាណខ្មោចតែប៉ុណ្ណោះ។

កាលពីពេលមុននេះ នៅតាមទីប្រជុំជននានានៅក្នុងទីជនបទក្នុងប្រទេសឥណ្ឌូនេស៊ី បានបញ្ចេញមនុស្សដែលតុបតែងរាងកាយដោយឈុតខ្មោចឆៅ ចេញមកអើតឡឺមៗ លឹបលៗនៅតាមដងផ្លូវ ដោយសង្ឃឹមថា ជំនឿក្នុងរឿងវិញ្ញាណខ្មោចព្រាយបិសាចបែបបុរាណៗមួយនេះ នឹងជួយការពារពួកអ្នកស្រុកឱ្យនៅតែក្នុងផ្ទះ និងមានសុវត្ថិភាពពីការឆ្លងរាលដាលនៃមេរោគវីរុសកូរ៉ូណាប្រភេទថ្មី។

“យើងត្រូវការបង្កើតភាពខុសប្លែក និងរកឃើញវិធីដែលទទួលបានលទ្ធផលល្អ ព្រោះថា ខ្មោចពួចុង(Pocong- សាកសពមនុស្សដែលត្រូវបានរុំខ្ចប់ដោយក្រណាត់ស មានខ្សែចងជើង និងក្បាល) នេះ វាគួរឱ្យភ័យខ្លាច និងញ័ររន្ធត់ស្មារតីខ្លាំងណាស់ ពេលបានជួបនឹងភ្នែកស្រស់ៗ” អ្នកដឹកនាំក្រុមយុវជនរបស់ទីប្រជុំជនបានរៀបរាប់ឱ្យដឹងទៀតថា ក្រុមរបស់យើង បានរួមសហការជាមួយប៉ូលិសក្នុងការបញ្ចេញគំនិតប្លែកខុសគេមួយនេះ ដើម្បីគាំទ្រវិធានការនៅតែក្នុងផ្ទះ និងរក្សាគម្លាតឆ្ងាយពីគ្នាខាងសង្គម ក្នុងអំឡុងពេលឆ្លងរាលដាលរបស់មេរោគកូវីដ-19នេះ។

ខ្មោចពួចុង តាមរឿងនិទានបានរៀបរាប់ថា បើសិនក្រោយរយៈពេល 40ថ្ងៃបន្ទាប់ពីស្លាប់ហើយ វិញ្ញាណរបស់អ្នកស្លាប់ នៅមិនទាន់បានទៅកាន់សុគតិភពនោះ សាកសពដែលត្រូវបានរុំខ្ចប់ដោយក្រណាត់សនោះ នឹងងើបចេញពីសេចក្ដីស្លាប់ ងើបចេញពីផ្នូរ ដើម្បីមកជម្រះរឿងរ៉ាវផ្សេងៗ ដែលនៅសេសសល់ ដោយប្រើវិធីលោតក្នុងការធ្វើដំណើរ។

អ្នកស្រុកម្នាក់ បាននិយាយឱ្យដឹងថា តាំងពីមានវិញ្ញាណខ្មោចពួចុងចេញមក ឪពុកម្ដាយ និងក្មេងៗ ក៏លែងហ៊ានចេញពីផ្ទះតែម្ដង ពេលនេះ មនុស្សម្នាក៏លែងចេញមកជួបជុំប្រមូលផ្ដុំគ្នា ឬដើរលេងផ្ដេសផ្ដាស់តាមដងផ្លូវទៀតហើយ ក្រោយពីធ្វើពិធីឡៈម៉ាត នៅពេលល្ងាចចប់។

បច្ចុប្បន្ននេះ ប្រទេសឥណ្ឌូនេស៊ី បានអះអាងអំពីចំនួនអ្នកឆ្លងមេរោគ 4,557នាក់ ក្នុងនោះមានអ្នកស្លាប់ 399នាក់ ក្នុងខណៈដែលកំពុងមានក្ដីកង្វល់ថា ចំនួននេះ នឹងកាន់តែកើនឡើងជារឿយៗ៕

ប្រភព៖ សារព័ត៌មានបរទេស

April 14, 2020

COVID-19! បច្ចុប្បន្នភាពនៃករណីឆ្លងមេរោគ និងស្លាប់ នៅអាស៊ីអាគ្នេយ៍ សម្រាប់ថ្ងៃទី14មេសា

នៅតំបន់អាស៊ីអាគ្នេយ៍ទាំងមូលមានអ្នកជំងឺCOVID-19សរុប20,001នាក់ កើន769ករណីក្នុងរយៈពេលមួយថ្ងៃ ក្នុងនោះមានករណីស្លាប់ ចំនួន844នាក់។

ហ្វីលីពីនបានលោតរំលងម៉ាឡេស៊ី និងបានក្លាយជាសម្បុកមេរោគCOVID-19 ធំជាងគេបង្អស់ក្នុងតំបន់ ដោយមានអ្នកជំងឺសរុប4,932នាក់ និង315នាក់បានបាត់បង់ជីវិត។

ម៉ាឡេស៊ីបានរកឃើញអ្នកផ្ទុកមេរោគសរុប4,817នាក់ ក្នុងនោះមានអ្នកជំងឺ77នាក់បានស្លាប់។ ប្រទេសនេះ មានអ្នកជំងឺCOVID-19 ច្រើនជាងគេលំដាប់ទី2ក្នុងតំបន់អាស៊ីអាគ្នេយ៍។

ឥណ្ឌូនេស៊ីជាសម្បុកមេរោគCOVID-19ធំជាងគេលំដាប់ទី3នៅក្នុងតំបន់ ដោយមានអ្នកជំងឺសរុប4,557នាក់ និងអ្នកស្លាប់សរុប 399នាក់។ អត្រានៃការស្លាប់ដោយសារវីរុសCOVID-19 របស់ប្រទេសនេះ ឈរលំដាប់ទី2នៅទ្វីបអាស៊ី បន្ទាប់ពីប្រទេសចិន។

សិង្ហបុរីឈរលំដាប់ទី4ក្នុងតំបន់នេះ ដោយបានរកឃើញអ្នកផ្ទុកមេរោគចំនួន2,918នាក់ ក្នុងនោះមានអ្នកស្លាប់ចំនួន9នាក់។

ប្រទេសថៃ បានរកឃើញអ្នកជំងឺថ្មី28នាក់ ធ្វើឱ្យតួលេខសរុបនៃអ្នកឆ្លងមេរោគCOVID-19 ក្នុងប្រទេសនេះឡើងដល់2,579នាក់ ក្នុងនោះមាន40នាក់បានស្លាប់។ អ្នកជំងឺថ្មីភាគច្រើនគឺជាអ្នករស់នៅក្នុងរាជធានីបាងកក ក្នុងនោះមាន3ករណីធ្លាប់ទៅកាន់ឥណ្ឌូនេស៊ីដើម្បីចូលរួមវិធីបុណ្យសាសនាកាលពីខែមីនាកន្លងទៅ។

វៀតណាម បានរកឃើញអ្នកផ្ទុកវីរុសសរុប265នាក់ ភាគច្រើនគឺនៅរដ្ឋធានីហាណូយ និងទីក្រុងសៃហ្គន(ហូជីមិញ)។

ប៊្រុយណេ មានអ្នកជំងឺកូរ៉ូណាសរុប136នាក់ ក្នុងនោះមានអ្នកជំងឺម្នាក់បានបាត់បង់ជីវិត។

កម្ពុជា គិតមកដល់ព្រឹកនេះ បានរកឃើញអ្នកជំងឺCOVID-19 សរុប122នាក់ ក្នុងនោះមាន91នាក់បានជាសះស្បើយ និង31នាក់កំពុងទទួលការព្យាបាល។

ប្រទេសមីយ៉ានម៉ារ(ភូមា) មានអ្នកជំងឺសរុប62នាក់ ក្នុងចំណោមនោះមាន4នាក់បានបាត់បង់ជីវិត។

ប្រទេសឡាវគឺជាដែនដីដែលមានអ្នកជំងឺCOVID-19 តិចជាងគេបង្អស់នៅក្នុងសមាគមប្រជាជាតិអាស៊ីអាគ្នេយ៍(ASEAN) ដោយមានអ្នកជំងឺតែ19នាក់ប៉ុណ្ណោះ។

ទីម័រខាងកើត(Timor-Leste) ដែលជាប្រទេសមួយក្នុងតំបន់អាស៊ីអាគ្នេយ៍ដែរនោះ មានអ្នកជំងឺCOVID-19 ចំនួន4នាក់ ក្នុងនោះមានម្នាក់បានជាសះស្បើយ។

ទ្វីបអាស៊ីទាំងមូល បានរកឃើញអ្នកផ្ទុកវីរុសCOVID-19 ចំនួន310,357នាក់ និងស្លាប់11,356នាក់។

ពិភពលោកទាំងមូល គិតមកដល់ពេលនេះ មានអ្នកឆ្លងជំងឺជាង1,924,600នាក់ និងអ្នកស្លាប់ជាង119,600នាក់ដោយសារវីរុសCOVID-19 ក្នុងនោះមានអ្នកជាសះស្បើយជាង445,000នាក់ និងអ្នកជំងឺកំពុងប្រឈមនឹងការស្លាប់មានចំនួន51,764នាក់៕

ប្រភព៖ សារព័ត៌មានបរទេស

April 14, 2020

ជាង2លាននាក់បានឆ្លង COVID-19 នៅទូទាំងសកលលោក

ពិភពលោកទាំងមូលមានអ្នកជំងឺជាង2លាននាក់ និងស្លាប់ជាង119,000នាក់ដោយសារវីរុសCOVID-19 ក្នុងនោះ ទ្វីបអឺរ៉ុបនិងសហរដ្ឋអាមេរិកនៅតែជាសម្បុកមេរោគធំជាងគេបង្អស់។

ស្ថិតិរបស់សាកលវិទ្យាល័យ Johns Hopkins បានបង្ហាញថា នៅទូទាំងពិភពលោក មានអ្នកជំងឺសរុប 2,019,320នាក់ ចំណែកអ្នកស្លាប់បានកើនដល់119,483នាក់។ ចំនួនជំងឺបានជាសះស្បើយសរុបមាន443,786នាក់។

សហរដ្ឋអាមេរិកជាសម្បុកមេរោគធំជាងគេបង្អស់ក្នុងពិភពលោក ដោយមានអ្នកជំងឺសរុប577,842នាក់ និងស្លាប់សរុប23,219នាក់។ អ្នកជំងឺថ្មី20,007នាក់ និងអ្នកស្លាប់ថ្មី1,140នាក់។

អេស្ប៉ាញ៖ អ្នកជំងឺថ្មី3,268នាក់ និងអ្នកស្លាប់ថ្មី547នាក់។ អ្នកជំងឺសរុប170,099នាក់ និងអ្នកស្លាប់សរុប17,756នាក់។ ប្រទេសនេះជាសម្បុកមេរោគធំជាងគេទី1នៅអឺរ៉ុប និងទី2ក្នុងពិភពលោក។

អ៊ីតាលី៖ អ្នកជំងឺសរុប159,516នាក់ និងអ្នកស្លាប់សរុប20,456នាក់។ អ្នកជំងឺថ្មី3,153នាក់ និងអ្នកស្លាប់ថ្មី566នាក់។

បារាំង៖ អ្នកជំងឺសរុប136,779នាក់ និងអ្នកស្លាប់សរុប14,967នាក់។ អ្នកជំងឺថ្មី4,188នាក់ និងអ្នកស្លាប់ថ្មី574នាក់។

អង់គ្លេស៖ អ្នកជំងឺសរុប88,621នាក់ និងអ្នកស្លាប់សរុប11,329នាក់ ក្នុងនោះអ្នកស្លាប់ថ្មីមាន 717ករណី។

ប្រភព៖ សារព័ត៌មានបរទេស

April 14, 2020

ជាង23,000នាក់ស្លាប់ដោយសារ COVID-19 នៅសហរដ្ឋអាមរិក

សហរដ្ឋអាមេរិក មានអ្នកស្លាប់ចំនួន23,232នាក់ ក្នុងចំណោមអ្នកជំងឺCOVID-19 សរុបជិត578,000នាក់ ក្នុងនោះរដ្ឋ New York នៅតែជាសម្បុកមេរោគធំជាងគេរបស់ប្រទេសនេះ ដោយមានអ្នកស្លាប់ដល់ទៅជាង10,000នាក់។

សាកលវិទ្យាល័យ Johns Hopkins ថ្ងៃនេះឱ្យដឹងថា ចំនួនអ្នកស្លាប់ដោយសារវីរុសCOVID-19 នៅសហរដ្ឋអាមេរិក សរុប577,842នាក់ ក្នុងនោះមានជាង36,000នាក់បានជាសះស្បើយ។

New York គឺជារដ្ឋដែលទទួលរងផលប៉ះពាល់ធ្ងន់ធ្ងរជាងគេបង្អស់ដោយសារ COVID-19 ដោយមានអ្នកជំងឺសរុបជិត189,000នាក់ និងអ្នកស្លាប់សរុបជាង10,000នាក់។ អភិបាលរដ្ឋ New York លោក Andrew Cuomo ឱ្យដឹងថា ស្ថានភាពហាក់ប្រសើរបន្តិច ដោយសារតួលេខអ្នកត្រូវចូលមន្ទីរពេទ្យមិនកើនខ្លាំងដូចប៉ុន្មានថ្ងៃមុន ខណៈអ្នកស្លាប់ថ្មីបានថយចុះទាបបំផុតក្នុងអំឡុង1សប្ដាហ៍កន្លង។

រដ្ឋមួយចំនួនមានគម្រោងបើកដំណើរការក្រុមហ៊ុន អាជីវកម្ម និងសាលារៀនឡើងវិញ។

នៅក្នុងកិច្ចប្រជុំមួយនៅសេតវិមានកាលពីម្សិលមិញ ប្រធានាធិបតី Donald Trump បានឱ្យដឹងថា នឹងប្រកាសបង្ហាញក្រុមជំនាញផ្នែកសេដ្ឋកិច្ចក្នុងថ្ងៃនេះ(14មេសា) ដើម្បីផ្ដោតទៅលើការបើកដំណើរការសេដ្ឋកិច្ចឡើងវិញនៅក្នុងពេលឆាប់ៗខាងមុខ។

Covid-19 បានបង្ហាញខ្លួននៅក្នុងប្រទេស និងដែនដីចំនួន210 ក្នុងពិភពលោក បណ្ដាលឱ្យមនុស្សជាង1.9លាននាក់បានឆ្លងវីរុស និងជាង119,000នាក់បានស្លាប់៕

ប្រភព៖ AFP

April 14, 2020

អាស៊ានឯកភាពគ្នា បង្កើតមូលនិធិឆ្លើយតប ដើម្បីដោះស្រាយផលប៉ះពាល់របស់វីរុសកូវីដ-19 នៅក្នុងតំបន់

នៅក្នុងកិច្ចប្រជុំក្រុមប្រឹក្សាសម្របសម្រួលអាស៊ានលើកទី25 តាមរយៈសន្និសីទវីដេអូកាល ពីថ្ងៃព្រហស្បតិ៍ រដ្ឋមន្រ្តីការបរទេសអាស៊ាន បានឯកភាពគ្នាលើការបង្កើតការឆ្លើយតបដើម្បីជួយរដ្ឋជាសមាជិកទាំងអស់ កាត់បន្ថយផលប៉ះពាល់នៃជំងឺរាតត្បាតវីរុសកូវីដ-19។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការកម្ពុជាបាន ឱ្យដឹងថា គោលបំណងនៅពីក្រោយមូលនិធិឆ្លើយតបអាស៊ាន វីរុសកូវីដ-19 គឺដើម្បីកៀរគរធនធានហិរញ្ញវត្ថុ ដើម្បីដោះស្រាយកង្វះខាត ក្នុងការផ្គត់ផ្គង់ផ្នែកវេជ្ជសាស្ត្រ និងដើម្បីគាំទ្រដល់ការស្រាវជ្រាវ និងការអភិវឌ្ឍ វីរុសCOVID-19 ។ មូលនិធិនេះក៏មានគោលបំណងដើម្បីរៀបចំរដ្ឋជាសមាជិកសម្រាប់ឆ្លើយតបទៅនឹងភាពអាសន្ននាពេលអនាគតផងដែរ។

រដ្ឋមន្ត្រី នៃបណ្តាប្រទេសអាស៊ាន ក៏បានសម្តែងការប្តេជ្ញាចិត្ត ដើម្បីធានាចង្វាក់ផ្គត់ផ្គង់ក្នុងតំបន់ និងទីផ្សារបើកចំហ ក៏ដូចជាធ្វើការយ៉ាងជិតស្និទ្ធ ដើម្បីកាត់បន្ថយផលប៉ះពាល់នៃវិបត្តិសេដ្ឋកិច្ចក្នុងតំបន់ និងពិភពលោក ស្តារទំនុកចិត្តរបស់អ្នកប្រើប្រាស់ និងសហគមន៍ពាណិជ្ជកម្ម និងរក្សាស្ថិរភាពសេដ្ឋកិច្ចសង្គម។ នេះបើតាមសេចក្តីប្រកាសព័ត៌មាន។

លោក កុយ គួង អ្នកនាំពាក្យក្រសួងការបរទេស បានប្រាប់ឱ្យដឹងថា គំនិតផ្តួចផ្តើមនេះ គឺជាឧទាហរណ៍ដ៏ល្អមួយពីរបៀបដែលរដ្ឋជាសមាជិកអាស៊ានកំពុងធ្វើការជាមួយគ្នាដើម្បីដោះស្រាយបញ្ហារួម។

លោកបានមានប្រសាសន៍ថា៖«ផលប៉ះពាល់នៃជំងឺរាតត្បាតវីរុសកូវីដ-19 កំពុងធ្វើឱ្យប៉ះពាល់ដល់បណ្តាប្រទេសនានានៅលើពិភពលោក ជាពិសេសសេដ្ឋកិច្ចរបស់ពួកគេហើយមនុស្សគ្រប់គ្នាកំពុងរងគ្រោះ»។

លោក កុយ គួង បានមានប្រសាសន៍ទៀតថា៖«ក្រោមប្រធានបទ«សហគមន៍តែមួយ វាសនាតែមួយ» រដ្ឋសមាជិកនៃបណ្តាប្រទេសអាស៊ានទាំងអស់ បានបោះជំហានបន្ទាប់ក្នុងការការពារ និងកាត់បន្ថយផលប៉ះពាល់នៃជំងឺរាតត្បាតនៅលើតំបន់ ក៏ដូចជាដើម្បីត្រៀមសម្រាប់អ្វី ដែលអាចកើតឡើងនាពេលអនាគត»។

យ៉ាងណាក្តី តាមលោក កុយ គួង បើទោះ អាស៊ានឯកភាពគ្នា បង្កើតមូលនិធិឆ្លើយតប ដើម្បីដោះស្រាយផលប៉ះពាល់របស់វីរុសកូវីដ-19 នៅក្នុងតំបន់ក៏ដោយ ក៏រយៈពេលគ្រោងក្របខ័ណ្ឌ និងសកម្មភាពនៃមូលនិធិឆ្លើយតបអាស៊ាន គឺវីរុសកូវីដ-19 មិនទាន់ត្រូវបានគេកំណត់ និងសម្រេចចិត្តនៅឡើយទេ។

គិតត្រឹមថ្ងៃទី9 ខែមេសា ករណីចំនួន 1,600,019 ត្រូវបានកំណត់អត្តសញ្ញាណ នៅអាស៊ីអាគ្នេយ៍។ ប្រទេសម៉ាឡេស៊ីដែលជាប្រទេសមានសេដ្ឋកិច្ចធំលំដាប់ទី3 ក្នុងតំបន់ បានរាយការណ៍ ថាមានអ្នកឆ្លងមេរោគថ្មីចំនួន 109នាក់ដែលបង្កើនចំនួនសរុបដល់ 4,228ករណីដែលធ្វើឱ្យប្រទេស នេះមានអត្រាឆ្លងខ្ពស់បំផុតនៅអាស៊ីអាគ្នេយ៍ និងជាប្រទេសមួយដែលមានចំនួនអ្នកព្យាបាលខ្ពស់បំផុត៕

April 13, 2020

ប្រធាន WHO ត្រូវបានចោទថា លាក់អាសន្នរោគ3លើក នៅក្នុងឆ្នាំ2017

ប្រធានអង្គការសុខភាពពិភពលោកWHO លោក Tedro ត្រូវបានចោទប្រកាន់ចំនួន3លើក ទាក់ទិននឹងការលាក់បាំងអាសន្នរោគ cholerae ដែលបានផ្ទុះឆ្លងរាលដាលនៅឯស្រុកកំណើតរបស់លោក ដែលកាលណោះលោកកំពុងកាន់តំណែងជារដ្ឋមន្ត្រីក្រសួងសុខាភិបាលប្រទេសអេត្យូពី (Ethiopia)។

វេជ្ជបណ្ឌិត Tedros Adhanom Ghebreyesus បានជាប់ឆ្នោតជាប្រធានអង្គការសុខភាពពិភពលោក(WHO) នៅថ្ងៃទី1កក្កដាឆ្នាំ2017 ដោយមានអាណត្តិកាល5ឆ្នាំ ក្លាយជាមន្ត្រីសុខាភិបាលដែលមានអំណាចជាងគេបង្អស់ក្នុងពិភពលោក។

ប៉ុន្តែ កាលពីខែឧសភា ឆ្នាំ2017 មុនពេលលោកបានឡើងកាន់កាប់តំណែងនេះ មានសំណួរជាច្រើនត្រូវបានលើកឡើងអំពីភាពសមហេតុផលរបស់លោកជាមួយនឹងតំណែងជាអ្នកជំនាញខាងសុខភាពទូទាំងពិភពលោក។ នៅក្នុងកិច្ចសម្ភាសមួយជាមួយនឹង NYTimes កាលណោះ សាស្ត្រាចារ្យ Larry Gostin ដែលជាអ្នកជំនាញផ្នែកសុខាភិបាលសកល បានចោទប្រកាន់វេជ្ជបណ្ឌិត Tedros ថា មិនបានទទួលស្គាល់អាសន្នរោគ cholerae ចំនួន3លើក ដែលបានឆ្លងរាលដាលនៅប្រទេសអេត្យូពី ដែលកាលណោះ លោក Tedros គឺជារដ្ឋមន្ត្រីក្រសួងសុខាភិបាលប្រទេសនេះ។

សាស្ត្រាចារ្យ Gostin យល់ថា លោក Tedros បានលាក់បាំងអាសន្នរោគ cholerae នៅប្រទេសអេត្យូពី ដល់ទៅ3លើកផ្សេងៗគ្នា រួមមាន ក្នុងឆ្នាំ2006 2009 និង2011។ លោក Tedros គឺជារដ្ឋមន្ត្រីក្រសួងសុខាភិបាលប្រទេសអេត្យូពីចាប់ពីឆ្នាំ2005ដល់ឆ្នាំ2012 មុនពេលលោកបានក្លាយជារដ្ឋមន្ត្រីការបរទេស4ឆ្នាំ ពោលគឺរហូតដល់ឆ្នាំ2016។

“វេជ្ជបណ្ឌិត Tedros គឺជាមន្ត្រីសុខាភិបាលសាធារណៈដែលមានទឹកចិត្តប្រកបដោយមេត្តាធម៌ និងមានថាមពលល្អ។ ប៉ុន្តែ គាត់នៅមានភារកិច្ចនិយាយអំពីការពិត និងស្មោះត្រង់ក្នុងការរាយការណ៍អំពីការផ្ទុះឆ្លងអាសន្នរោគcholerae ដែលត្រូវបានផ្ទៀងផ្ទាត់ក្នុងមួយរយៈពេលវែង” លោក Gostin ដែលបច្ចុប្បន្នជាប្រធានមជ្ឈមណ្ឌលសហការផ្នែកច្បាប់សុខភាពសាធារណៈ និងសិទ្ធិមនុស្សរបស់ WHO បានថ្លែងប្រាប់ទីភ្នាក់ងារសារព័ត៌មាន NYTimes បែបនេះកាលពី3ឆ្នាំមុន។

សាស្ត្រាចារ្យ Gostin ក៏ធ្លាប់បានសម្ដែងការព្រួយបារម្ភខ្លាចក្រែង WHO “អាចបាត់បង់ភាពស្របច្បាប់” បើសិនត្រូវបានដឹកនាំដោយតំណាងប្រទេសមួយរូបដែលធ្លាប់លាក់បាំងអាសន្នរោគ។

លោក Tedros ជាប់ឆ្នោតក្លាយជាប្រធាន WHO កាលពីឆ្នាំ2017 ប៉ុន្តែ មិនយូរប៉ុន្មាន លោកក៏ទទួលរងការរិះគន់នៅពេលលោកមិនបានកត់ត្រាអាសន្នរោគ cholerae នៅស៊ូដង់ ដែលជាប្រទេសជិតខាងរបស់អេត្យូពី។

ខែកញ្ញាឆ្នាំ2017 វេជ្ជបណ្ឌិតមួយក្រុមរបស់សហរដ្ឋអាមេរិក ដែលមានជំនាញខាងជំងឺឆ្លង បានសរសេរសំបុត្ររិះគន់លោក Tedros ដោយបានចោទថា លោកនិង WHO បានបដិសេធមិនទទួលស្គាល់សម្បុកអាសន្នរោគcholerae នៅប្រទេសស៊ូដង់។ សកម្មភាពនេះរបស់ WHO គឺដើម្បីការពារកេរ្តិ៍ឈ្មោះរបស់អង្គការនេះនៅលើឆាកអន្តរជាតិ។

កាលណោះ នៅក្នុងសំបុត្ររបស់ក្រុមវេជ្ជបណ្ឌិតសហរដ្ឋអាមេរិក មានឃ្លាសរសេរថា “ការស្ងៀមស្ងាត់របស់លោក (Tedros) នៅចំពោះមុខអាសន្នរោគនៅស៊ូដង់ កាន់តែគួរឱ្យបន្ទោស។ ការដែលលោកមិនអនុញ្ញាតឱ្យបញ្ជូនសំណាករបស់អ្នកជំងឺនៅស៊ូដង់ទៅកាន់ប្រទេសស្វីសដើម្បីវិភាគ និងបញ្ចាក់អំពីអាសន្នរោគ ធ្វើឱ្យលោកក្លាយជាអ្នកសមគំនិតក្នុងការជួយឱ្យទុក្ខលំបាក និងការស្លាប់ដ៏សាហាវ បន្តរាលដាលធំឡើងៗ ហួសពីលទ្ធភាពគ្រប់គ្រង ខណៈដែលរបាយការណ៍ថ្មីប្រចាំថ្ងៃជាច្រើន បញ្ជាក់ថានេះពិតជាអាសន្នរោគcholerae។ ប្រវត្តិនៃអាសន្នរោគនេះ ប្រាកដជាមានឈ្មោះរបស់លោក”។

អាសន្នរោគនៅប្រទេសអេត្យូពី និងស៊ូដង់ សុទ្ធតែត្រូវបាន WHO ហៅថា “ជំងឺរាកស្រួចស្រាល” ជំនួសឱ្យពាក្យអាសន្នរោគcholerae។ មតិជាច្រើនយល់ថា ដោយការលាក់បាំងអាសន្នរោគcholerae ខណៈដែលនៅជារដ្ឋមន្ត្រីសុខាភិបាល អេត្យូពី បានជួយឱ្យលោក Tedros បន្តជាប់ជារដ្ឋមន្ត្រីការបរទេសរហូតដល់ឆ្នាំ2016។ ចំណែកសម្បុកអាសន្នរោគនៅស៊ូដង់វិញ WHO សង្កត់ធ្ងន់ថា ឈ្មោះរបស់ជំងឺ មិនអាចផ្លាស់ប្ដូរវិធីប្រយុទ្ធប្រឆាំងនឹងរោគនេះនោះទេ។

Tedros បច្ចុប្បន្នអាយុ55ឆ្នាំ មានសញ្ញាបត្រវេជ្ជបណ្ឌិតរបស់សាកលវិទ្យាល័យ Nottingham និងសញ្ញាបត្រអនុបណ្ឌិតរបស់សាកលវិទ្យាល័យ London។ ឆ្នាំ2017 លោកក៏ធ្លាប់បានច្រានចោលការចោទប្រកាន់ខាងលើផងដែរ។ លោក Tedros ថ្លែងថា លោកជាជនរងគ្រោះក្នុងយុទ្ធនាការបរិហារកេរ្តិ៍នៅនាទីចុងក្រោយ ដើម្បីរារាំងមិនឱ្យលោកបានអង្គុយលើកៅអី “មន្ត្រីសុខាភិបាលកំពូលរបស់ពិភពលោក”។ លោក Tedros ពន្យល់ថា ជំងឺឆ្លងបានកើតនៅក្នុងតំបន់ដាច់ស្រយាលនៅអេត្យូពី បង្កការលំបាកដល់បេសកកម្មពិសោធន៍មេរោគ។

សាស្ត្រាចារ្យ Gostin កាលពីសប្ដាហ៍មុនបានបដិសេធការបញ្ចេញមតិជាមួយ Telegraph ដោយនិយាយថា កិច្ចសម្ភាសជាមួយ NYTimes កាលណោះ គឺជារឿងយូរហើយ។ ប៉ុន្តែ នៅលើទស្សនាវដ្ដីសុខាភិបាលអង់គ្លេស លោក Gostin បែរជានិយាយថា យោបល់របស់លោកត្រូវបាន NYTimes ចុះផ្សាយ “មិនត្រឹមត្រូវ”។

ប្រធាន WHO ថ្មីៗនេះ ត្រូវប្រទេសជាច្រើនរិះគន់ ក្នុងនោះមានសហរដ្ឋអាមេរិក ជប៉ុន តៃវ៉ាន់ជាដើម ទាក់ទិននឹងរោគរាតត្បាតCOVID-19៕

ប្រភព៖ សារព័ត៌មានបរទេស

April 13, 2020

អាថ៌កំបាំងធម្មជាតិ…វីរុសកូវីដ-19 ប្រណីជីវិតក្មេងតូច?

ជារឿងដែលគួរឱ្យចម្លែកចិត្តខ្លាំងបំផុតជាមួយនឹងអាថ៌កំបាំងធម្មជាតិ ថាតើបណ្ដាលមកពីហេតុអ្វី ទើបវីរុសកូរ៉ូណាប្រភេទថ្មីដ៏កំណាចនេះ មើលទៅហាក់ដូចជាលើកលែង(ប្រណី)ជីវិតឱ្យកូនមនុស្សតូចៗ(ទារក) ដែលជាអនាគតនៃពូជពង្សមនុស្ស?

កាលពីពេលមុននេះ សារព័ត៌មានស៊ីនហួ បានរាយការណ៍ពីលទ្ធផលនៃការស្រាវជ្រាវវិភាគមួយនៅក្នុងព្រឹត្តិបត្រ វេជ្ជសាស្ត្រកុមារអន្តរជាតិ លេខថ្មីចុងក្រោយបំផុត ដែលដំណើរការស្រាវជ្រាវដោយអ្នកជំនាញការនៃមជ្ឈមណ្ឌលវេជ្ជសាស្ត្រកុមារនៃប្រទេសចិន និងមជ្ឈមណ្ឌលវេជ្ជសាស្ត្រកុមារនៃទីក្រុងសៀងហៃ ក្នុងបណ្ដាញមហាវិទ្យាល័យវេជ្ជសាស្ត្រ នៃមហាវិទ្យាល័យសៀងហៃ ចៀវថុង។

លទ្ធផលនៃការស្រាវជ្រាវ បានបញ្ជាក់ថា ទោះជាអាការឆ្លងមេរោគនៅលើកុមារ នឹងមិនធ្ងន់ធ្ងរ ដូចមនុស្សធំមែន តែកុមារគ្រប់វ័យ មានភាពប្រថុយប្រថានក្នុងការឆ្លងមេរោគវីរុសគ្រប់គ្នា ដោយមិនបែងចែកថា ក្មេងប្រុស ឬក្មេងស្រីនោះឡើយ តែទារកនឹងមានភាពប្រថុយប្រថានក្នុងការឆ្លងមេរោគខ្លាំងជាង។ យ៉ាងណាក៏ដោយ ការឆ្លងមេរោគនៅលើក្មេង ទោះជាបង្ហាញអាការក៏ដោយ តែច្រើនតែមិនធ្ងន់ធ្ងរឡើយ ព្រោះការខូចខាតដោយសារការតតាំងជាមួយវីរុសរបស់ប្រព័ន្ធប្រឆាំងជំងឺរបស់ក្មេងដែលនៅមិនទាន់រីកចម្រើនពេញទំហឹង។

ការសិក្សាស្រាវជ្រាវ បានយោងទៅលើព័ត៌មានពីអ្នកជំងឺដែលបានទទួលការអះអាងលទ្ធផលហើយថា មានឆ្លងមេរោគទាំងប៉ុន្មាននៅក្នុងប្រទេសចិនមុនថ្ងៃទី8 កុម្ភៈ ឆ្នាំ2020 បានរកឃើញថា តួលេខអ្នកជំងឺក្មេង សរុបស្ថិតក្នុងចំនួន 731នាក់ គិតជាភាគរយគឺ 2.3ភាគរយនៃចំនួនអ្នកឆ្លងមេរោគសរុបទូទាំងប្រទេសចិន។

ក្នុងចំនួននេះ មានកុមារស្លាប់ 1នាក់ ក្មេងដែលមានអាការកម្រិតធ្ងន់ធ្ងរ 3នាក់ ខណៈដែលអ្នកជំងឺក្មេង 709នាក់ទៀត បង្ហាញអាការមិនធ្ងន់ធ្ងរ ដែលគិតជាភាគរយគឺ 97% នៃចំនួនក្មេងឆ្លងមេរោគទាំងអស់។

ហេតុអីបានមេរោគវីរុសកូរ៉ូណាប្រភេទថ្មី មិនបង្កផលអាក្រក់ដល់អវយវៈរបស់ក្មេងតូចៗ?

លោក ហ្គ្រេហ៊ែម រ៉ូប៊ើត អគ្គនាយកមជ្ឈមណ្ឌលស្រាវជ្រាវជំងឺប្រតិកម្មចាញ់របស់ស្ថាប័ន ដេវីត ហាយដ៍ ក្នុងទីក្រុងនីវផត នៃប្រទេសអង់គ្លេស បាននិយាយថា “មូលហេតុមួយនៅក្នុងចំណោមមូលហេតុដែលគួរតែអាចទៅរួចនោះគឺ វីរុសត្រូវការប្រូតេអ៊ីននៅលើស្រទាប់ស្បែករបស់កោសិកា ដើម្បីចូលទៅផ្នែកខាងក្នុងរបស់កោសិកា និងចាប់ផ្ដើមបង្កឱ្យកើតមានអាការរោគ ដែលវាអាចទៅរួចថា ក្មេងមានប្រូតេអ៊ីននៅលើស្រទាប់ស្បែកកោសិកា តិចជាងក្នុងប្រព័ន្ធដង្ហើមផ្នែកខាងក្រោម(សួត) តិចជាងផ្លូវដង្ហើមផ្នែកខាងលើ ដែលនេះជាមូលហេតុដែលថា ហេតុអីបានជាក្មេងៗដែលឆ្លងមេរោគ មានអាការត្រឹមតែបរិវេណផ្លូវដង្ហើមផ្នែកខាងលើ(ច្រមុះ មាត់ និងបំពង់ក) មិនចុះទៅដល់សួត រហូតធ្វើឱ្យឆ្លងមេរោគរលាកសួតរុករានដល់ជីវិតដូចមនុស្សចាស់”។

លោក អ៊ែនឌ្រូវ៍ ផលឡាត ប្រធានមជ្ឈមណ្ឌលវ៉ាក់សាំង អុកស្វ៉ដ អ្នកស្រាវជ្រាវម្នាក់ក្នុងក្រុមអ្នកស្រាវជ្រាវរកវ៉ាក់សាំងដើម្បីការពារជំងឺកូវីដ-19 បានថ្លែងថា មានបច្ច័យជាច្រើនក្នុងប្រព័ន្ធប្រឆាំងជំងឺរបស់ក្មេង ដែលខុសប្លែកពីមនុស្សធំមិនតិចទេ ដែលហុចផលខុសប្លែកពីគ្នាជាមូលដ្ឋាន ពាក់ព័ន្ធនឹងវិធីចាត់ការមេរោគវីរុសនៅលើក្មេង និងមនុស្សធំ។ ប្រព័ន្ធប្រឆាំងជំងឺរបស់ក្មេង នៅតែរីកចម្រើនមិនទាន់ពេញលេញ ហុចផលឱ្យក្រោយពីការព្យាយាមរបស់រាងកាយក្នុងការកម្ចាត់វីរុស មិនកើតសភាវក្ដៅ និងបន្សល់ការខូចខាតធ្ងន់ធ្ងរ(Cytokine storm) នៅលើអវយវៈស្មើនឹងមនុស្សធំឡើយ ទើបមិនបង្កឱ្យកើតគ្រោះថ្នាក់ ឬការខូចគាំងលើអវយវៈជាច្រើនដែលពាក់ព័ន្ធ។

យ៉ាងណាក៏ដោយ លោក ហ្គ្រេហ៊ែម រ៉ូប៊ើត អគ្គនាយកមជ្ឈមណ្ឌលស្រាវជ្រាវជំងឺប្រតិកម្មចាញ់របស់ស្ថាប័ន ដេវីត ហាយដ៍ ក្នុងទីក្រុងនីវផត នៃប្រទេសអង់គ្លេស បានទទួលស្គាល់ថា “នៅមានរឿងច្រើនទៀតដែលយើងមិនដឹង ពាក់ព័ន្ធនឹងវីរុសប្រភេទថ្មីនេះ”៕

ប្រភព៖ សារព័ត៌មានបរទេស

April 13, 2020

COVID-19! នាយករដ្ឋមន្ត្រីអង់គ្លេសរៀបរាប់អំពី “48ម៉ោងដែលលោកប្រឈមនឹងការស្លាប់ដោយសារកូរ៉ូណា”

បន្ទាប់ពីបានចេញពីមន្ទីរពេទ្យ នាយករដ្ឋមន្ត្រីអង់គ្លេស លោក Boris Johnson បានរ៉ាយរ៉ាប់អំពីអំឡុងពេល48ម៉ោងដែលលោកបានប្រឈមនឹងគ្រោះថ្នាក់ដល់ជីវិត ដោយសារតែអាការរោគដ៏ធ្ងន់ធ្ងរនៃជំងឺCOVID-19ដែលលោកបានឆ្លង។

យោងតាមសារព័ត៌មាន Telegraph នាយករដ្ឋមន្ត្រី Johnson កាលពីថ្ងៃទី12មេសាកន្លងទៅ បានរៀបរាប់ថា “48ម៉ោងដែលអ្វីៗទាំងអស់អាចឆ្ពោះទៅទិសផ្សេង”។ លោកនាយករដ្ឋមន្ត្រីរូបនេះក៏បានថ្លែងអំណរគុណចំពោះបុគ្គលិកសុខាភិបាលអង់គ្លេស NHS (National Health Service) “ដែលបានជួយសង្គ្រោះជីវិតខ្ញុំ ជាទង្វើដែលខ្ញុំមិនមានអ្វីអាចប្រកែកបាន”។

លោក Johnson ត្រូវបានអនុញ្ញាតឱ្យចេញពីមន្ទីរពេទ្យកាលពីម្សិលមិញ និងបានទៅកាន់ភូមិគ្រឹះ Chequers នៅតំបន់ Buckinghamshire ជាកន្លែងភរិយាកំពុងមានផ្ទៃពោះ(លោកស្រី Carrie Symonds)របស់លោក រស់នៅ។

លោក Johnson និងលោកស្រី Carrie Symonds មិនបានជួបគ្នាអស់មួយរយៈពេល ចាប់តាំងពីលោក Johnson បានឆ្លងវីរុសCOVID-19 កាលពីចុងខែមុន។

មុនពេលទៅកាន់ Chequers ដើម្បីសម្រាកយកកម្លាំង លោក Johnson បានបង្ហោះសារជាវីដេអូមួយ រៀបរាប់អំពីកម្រិតនៃភាពធ្ងន់ធ្ងររបស់ជំងឺដែលលោកបានឆ្លង ជាពេលវេលាដែលអាចគ្រោះថ្នាក់ដល់ជីវិត ហើយលោកក៏បានកោតសរសើរចំពោះបុគ្គលិកសុខាភិបាល(NHS) ដែលបានជួយសង្គ្រោះជីវិត និងថែទាំរូបលោក។

“ថ្ងៃនេះខ្ញុំបានចេញពីមន្ទីរពេទ្យ បន្ទាប់ពីទទួលការព្យាបាលអស់រយៈពេល1សប្ដាហ៍។ នៅទីនោះ ក្រុមបុគ្គលិកសុខាភិបាលបានជួយសង្គ្រោះជីវិតខ្ញុំ។ ខ្ញុំពិតជាពិបាករកពាក្យអ្វីមកសម្ដែងអំពីការដែលខ្ញុំជំពាក់គុណពួកគេខ្លាំងណាស់” នាយករដ្ឋមន្ត្រី Johnson ថ្លែងនៅក្នុងសារខាងលើ។

លោកស្រី Carrie Symonds ភរិយារបស់នាយករដ្ឋមន្ត្រីអង់គ្លេស (រូបកណ្ដាល)

នាយករដ្ឋមន្ត្រីអង់គ្លេសបានឱ្យដឹងថា លោកបានមើលឃើញផ្ទាល់នឹងភ្នែកនូវ “សម្ពាធដែលបុគ្គលិកសុខាភិបាលកំពុងជួបប្រទះ” ហើយលោកសង្កត់ធ្ងន់ថា NHS នឹងទទួលបានជោគជ័យលើវីរុសCOVID-19។ លោកប្រាប់ថា NHS គឺជាស្ថាប័នល្អបំផុតនៅអង់គ្លេស។

ក្នុងសារខាងលើ លោកនាយករដ្ឋមន្ត្រីអង់គ្លេសក៏បានថ្លែងអំណរគុណចំពោះបុគ្គលិកសុខាភិបាលមួយចំនួន ដូចជា “Jenny មកពី នូវែលហ្សេឡង់ និង Luis មកពីព័រទុយហ្គាល់” ផងដែរ។ “ខ្ញុំសង្ឃឹមថា ពួកគេនឹងមិនប្រកាន់នោះទេនៅពេលខ្ញុំរំឭកពីគិលានុបដ្ឋាយិកា2រូបដែលនៅក្បែរខ្ញុំ48ម៉ោង ខណៈដែលអ្វីៗអាចឆ្ពោះទៅទិសផ្សេង”។

“មូលហេតុដែលរាងកាយរបស់ខ្ញុំ ក្នុងដំណាក់កាលចុងក្រោយ អាចមានសុខភាពល្អ នោះគឺដោយសារថា ជារៀងរាល់វិនាទីក្នុងរាត្រី ពួកគេសុទ្ធតែសង្កេតមើល គិតគូរ យកចិត្តទុកដាក់ និងធ្វើអ្វីដែលខ្ញុំត្រូវការ” លោក Johnson ថ្លែងដូច្នេះ។ លោកក៏បានអរគុណដល់ក្រុមវេជ្ជបណ្ឌិតនៅមន្ទីរពេទ្យ St Thomas ដែលបានប្រឹងប្រែងព្យាបាលរូបលោក។

នាយករដ្ឋមន្ត្រីអង់គ្លេសក៏បានសម្ដែងការគោរពចំពោះការលះបង់របស់សាធារណជន ក្នុងពេលខិតខំធ្វើតាមបទបញ្ជាបម្រាមគោចដ៏លំបាក ដែលត្រូវបានប្រកាសឱ្យអនុវត្តកាលពី3សប្ដាហ៍មុន។

បន្ទាប់ពីលោក Johnson បានចេញពីមន្ទីរពេទ្យ លោកស្រី Carrie Symonds ក៏បានផ្ញើសារថ្លែងអំណរគុណដល់ក្រុមការងារ NHS ផងដែរ។

ការិយាល័យនាយករដ្ឋមន្ត្រីអង់គ្លេសបានឱ្យដឹងថា លោក Johnson នឹងមិនទាន់វិលមកបំពេញភារកិច្ចបានភ្លាមៗនោះទេ៕

ប្រភព៖ សារព័ត៌មានបរទេស

April 13, 2020

COVID-19! ស្ថិតិសង្ខេបស្ដីអំពីករណីឆ្លង និងស្លាប់នៅអាស៊ីអាគ្នេយ៍

តំបន់អាស៊ីអាគ្នេយ៍មានប្រទេសសរុបចំនួន11 ក្នុងនោះមានសមាជិក ASEAN ចំនួន10ប្រទេស និងអ្នកសង្កេតការណ៍(ទីម័រ/Timor-Leste)1ប្រទេស សុទ្ធតែមានករណីឆ្លងវីរុសCOVID-19។

ម៉ាឡេស៊ីគឺជាសម្បុកមេរោគធំជាងគេបង្អស់ក្នុងតំបន់អាស៊ីអាគ្នេយ៍នេះ ដោយមានអ្នកជំងឺសរុប4,683នាក់ និងអ្នកស្លាប់សរុប76នាក់។

ហ្វីលីពីនជាសម្បុកមេរោគCOVID-19 ធំជាងគេលំដាប់ទី2នៅអាស៊ីអាគ្នេយ៍ ដោយមានអ្នកជំងឺសរុប4,648នាក់ និងស្លាប់297នាក់។

ឥណ្ឌូនេស៊ីគឺជា “វាលពិឃាត” របស់វីរុសCOVID-19 ធំជាងគេលំដាប់ទី1 និងជាសម្បុកមេរោគធំជាងគេលំដាប់ទី3នៅក្នុងតំបន់នេះ ដោយមានអ្នកស្លាប់សរុបឡើងដល់373នាក់ កើន46នាក់បើធៀបនឹងម្សិលមិញ។ អ្នកជំងឺសរុបមានចំនួន4,241នាក់។

ប្រទេសថៃ៖ អ្នកជំងឺសរុប2,551នាក់ និងស្លាប់សរុប38នាក់។

សិង្ហបុរី៖ អ្នកជំងឺថ្មី មាន233នាក់ និងអ្នកជំងឺសរុបមាន2,532នាក់ ក្នុងនោះមាន8នាក់បានបាត់បង់ជីវិត។

វៀតណាម៖ អ្នកជំងឺសរុប262នាក់ (មិនទាន់មានអ្នកស្លាប់)។

ប៊្រុយណេ៖ អ្នកជំងឺសរុប136នាក់ និងអ្នកស្លាប់សរុប1នាក់។

កម្ពុជា៖ អ្នកជំងឺសរុប122នាក់ ក្នុងនោះមាន77នាក់បានជាសះស្បើយ និង45នាក់កំពុងព្យាបាល។

មីយ៉ានម៉ារ៖ អ្នកជំងឺសរុប41នាក់ និងស្លាប់សរុប4នាក់។

ប្រទេសឡាវ៖ អ្នកជំងឺសរុប19នាក់។

ទីម័រខាងកើត(Timor-Leste)៖ អ្នកជំងឺសរុប2ករណីដដែល។

ប្រភព៖ សារព័ត៌មានបរទេស

April 13, 2020

Category: សុខភាព