សុខភាព - La Reine Media

COVID-19! អ្នកជំងឺនៅអេស្ប៉ាញកើនលើស188,000នាក់៖ ប្រទេសនេះប្ដូរវិធីគណនាអ្នកស្លាប់បែបថ្មី

អេស្ប៉ាញ បានរកឃើញអ្នកផ្ទុកមេរោគCOVID-19ថ្មីចំនួន5,252នាក់បន្ថេមទៀតនៅក្នុងថ្ងៃនេះ ធ្វើឱ្យតួលេខនៃអ្នកជំងឺសរុបកើនដល់ជាង188,000នាក់ ក្នុងនោះមានអ្នកជំងឺជិត19,500នាក់បានបាត់បង់ជីវិត។

តួលេខនៃអ្នកជំងឺថ្មី កើនឡើងច្រើនជាងម្សិលមិញបន្តិច។ អ្នកស្លាប់ថ្មីនៅប្រទេសនេះមានចំនួន585នាក់ ខ្ពស់ជាងបន្តិចបើធៀបនឹងចំនួន551នាក់កាលពីម្សិលមិញ។ អ្នកស្លាប់សរុបបានកើនដល់19,478នាក់។ នេះបើតាមក្រសួងសុខាភិបាលអេស្ប៉ាញ។

ជាមួយនឹងអ្នកជំងឺ188,068នាក់ ប្រទេសអេស្ប៉ាញគឺជាសម្បុកមេរោគCOVID-19 ធំជាងគេបង្អស់នៅអឺរ៉ុប និងលំដាប់ទី2នៅលើពិភពលោក បន្ទាប់ពីសហរដ្ឋអាមេរិក។ អេស្ប៉ាញក៏ជា “វាលពិឃាត” របស់COVID-19 ធំជាងគេលំដាប់ទី3នៅទូទាំងពិភពលោក ដោយនៅពីក្រោយសហរដ្ឋអាមេរិក និងអ៊ីតាលី។

ក្រុមមន្ត្រីសុខាភិបាលអេស្ប៉ាញ ប្រកាសថា បានប្ដូរវិធីគណនាតួលេខនៃករីស្លាប់ បន្ទាប់ពីមានការព្រួយបារម្ភថា ចំនួនអ្នកស្លាប់អាចខ្ពស់ជាងតួលេខដែលបានប្រកាស។ តំបន់ស្វយ័ត Catalonia បានប្រកាសថា នឹងគណនាចំនួនអ្នកស្លាប់សរុបបែបថ្មី ដោយគិតរួមទាំងអ្នកស្លាប់នៅឯផ្ទះ អ្នកស្លាប់នៅក្នុងមន្ទីរពេទ្យ ក្នុងនោះរួមមានទាំងករណីបានបញ្ជាក់ថាមានផ្ទុកវីរុសCOVID-19 និងករណីមានរោគសញ្ញាតែមិនទាន់បានបញ្ជាក់៕

ប្រភព៖ សារព័ត៌មានបរទេស

April 17, 2020

COVID-19! នាយករដ្ឋមន្ត្រីប្រទេសនូវែលហ្សេឡង់ត្រូវគេប្ដឹង ដោយសារចេញបម្រាមគោចរ

បុរស2នាក់បានដាក់ពាក្យប្ដឹងនាយករដ្ឋមន្ត្រី Jacinda Ardern ដោយសារតែពួកគេយល់ថា លោកស្រីដាក់បម្រាមគោចរទូទាំងប្រទេសនូវែលហ្សេឡង់ដើម្បីទប់ស្កាត់COVID-19 គឺដើម្បី “ផលប្រយោជន៍នយោបាយ”។

ដើមបណ្ដឹងដែលមិនត្រូវបានបញ្ចេញឈ្មោះ ថ្ងៃនេះបានដាក់ពាក្យបណ្ដឹងទៅតុលាការជាន់ខ្ពស់នៃទីក្រុង Auckland ប្រទេសនូវែលហ្សេឡង់ ដោយចោទប្រកាន់នាយករដ្ឋមន្ត្រី Ardern ថា បានប្រកាសអាសន្នកម្រិត4 នៅទូទាំងប្រទេស ធ្វើឱ្យពួកគេ “ត្រូវបង្ខាំងខ្លួនក្នុងផ្ទះដោយខុសច្បាប់ និងមិនគួរប្ដូរជាមួយនឹងការខាតបង់សេដ្ឋី ព្រោះតែចំនួនអ្នកស្លាប់ដោយសារវីរុសCOVID-19 មានកម្រិតទាប”។ ពួកគេយល់ថា បទបញ្ជាដាក់បម្រាមគោចររបស់លោកស្រី Ardern “ទាំងអស់សុទ្ធតែដោយសារផលប្រយោជន៍នយោបាយ”។

ដើមបណ្ដឹងទី1 បាននិយាយជាមួយ Mary Peters ដែលជាតំណាងតុលាការថា ការដាក់បម្រាមគោចរទូទាំងប្រទេស “គឺជាការលេងសើច” ហើយ COVID-19 គ្រាន់តែជា “ការភ័យស្លន់ស្លោប៉ុណ្ណោះ គឺវាមិនមែនជារោគរាតត្បាតអ្វីនោះទេ” បើទោះជាគាត់ទទួលបានសិទ្ធិចេញពីផ្ទះចាប់ពីម៉ោង8ដល់ម៉ោង17 ក៏ដោយ។

ដើមបណ្ដឹងរូបនេះយល់ថា នាយករដ្ឋមន្ត្រី Ardern មិនមានមូលដ្ឋានដើម្បីដាក់បម្រាមគោចរនោះទេ។ ទន្ទឹមនឹងនេះ បុរសនេះក៏បានចោទលោកស្រីថា បានឃុបឃិតជាមួយ Stephen Tindall ដែលជាស្ថាបនិកក្រុមហ៊ុនលក់រាយធំបំផុតនៅប្រទេសនូវែលហ្សេឡង់ ដើម្បីបំផ្លាញសេដ្ឋកិច្ច ហើយការដាក់បម្រាមគោចរទូទាំងប្រទេសនេះ គួរតែត្រូវបានពិគ្រោះយោបល់ជាមួយអគ្គលេខាធិការនៃអង្គការសហប្រជាជាតិ។

ដើមបណ្ដឹងថែមទាំងបានប្រៀបធៀបលោកស្រី Ardern ទៅនឹង Adolf Hitler ផងដែរ ហើយប្រៀបធៀបការដាក់បម្រាមគោចរដូចទៅនឹង “ការសម្លាប់រង្គាល”។ បុរសនេះនិយាយថា ការស្លាប់ចំនួន9ករណីដោយសារវីរុសCOVID-19 នៅនូវែលហ្សេឡង់បានកើតឡើងក្នុងពេលដែលពួកគេបានដាក់ពាក្យបណ្ដឹង នេះបង្ហាញថា ការដាក់បម្រាមគោចរគឺមិនសមហេតុផលជាមួយនឹងស្ថានភាពជាក់ស្ដែង។

ចំណែកដើមបណ្ដឹងទី2 យល់ថា តួលេខអ្នកស្លាប់ដោយសារជំងឺផ្សេងៗដូចជាមហារីកជាដើម វាមានអត្រាខ្ពស់ជាង COVID-19 ទៅទៀត ប៉ុន្តែមិនត្រូវបានពិនិត្យ និងព្យាបាល ដោយសារតែធនធានរបស់មន្ត្រីពេទ្យ ផ្ដោតទៅលើតែការទប់ស្កាត់COVID-19។ “នាយករដ្ឋមន្ត្រីបានសម្រេចចិត្តខុស ទាំងអស់គឺដើម្បីផលប្រយោជន៍នយោបាយរបស់លោកស្រីតែប៉ុណ្ណោះ”។

មេធាវី Austin Powell របស់នាយករដ្ឋមន្ត្រី Ardern បកស្រាយថា បម្រាមគោចរ បង្កផលប៉ះពាល់ច្រើនគួរសមដល់សិទ្ធិនៃការដើរហើររបស់អ្នករាល់គ្នា ក៏ប៉ុន្តែ ប្រជាជននៅតែមានសិទ្ធិដើរ ពេលមានការចាំបាច់។ មេធាវីខាងលើក៏បានបដិសេធការចោទប្រកាន់របស់ដើមបណ្ដឹង និងបានបកស្រាយថា ច្បាប់សុខភាពអនុញ្ញាតឱ្យក្រសួងសុខាភិបាលមានសិទ្ធិអនុវត្តវិធានការរឹតបន្តឹងនានាទាក់ទិននឹងបម្រាមគោចរ។ តំណាងតុលាការ លោកស្រី Peters បានឱ្យដឹងថា លោកស្រីនឹងកាត់ក្ដីរឿងនេះក្នុងពេលឆាប់ៗខាងមុខ។

នាយករដ្ឋមន្ត្រី Ardern កាលពីខែមីនា បានប្រកាសអាសន្នកម្រិត4(កម្រិតខ្ពស់បំផុត) ទូទាំងប្រទេស ព្រោះតែCOVID-19។ តាមរយៈការប្រកាសអាសន្នដែលមានសុពលភាព4សប្ដាហ៍នេះ សាលារៀន ភោជនីយដ្ឋាន បារ រោងកុន រួមនឹងកន្លែងដែលប្រមូលផ្ដុំមនុស្សច្រើន ត្រូវបានផ្អាកដំណើរការទាំងស្រុង។

វិធានការខ្លាំងក្លានេះ ត្រូវបានគេមើលឃើញថា បាន និងកំពុងជួយប្រទេសនូវែលហ្សេឡង់ គ្រប់គ្រងវីរុសCOVID-19 បានឆាប់រហ័ស៕

ប្រភព៖ សារព័ត៌មានបរទេស

April 17, 2020

ពលរដ្ឋអាមេរិកាំង22លាននាក់ ដាក់ពាក្យសុំជំនួយពីរដ្ឋ ព្រោះបាត់បង់ការងារដោយសារ COVID-19

ពាក្យសុំឧបត្ថម្ភពីកម្មវិធីជំនួយសម្រាប់អ្នកបាត់បង់ការងារ បានកើនឡើងដល់ទៅជាង22លានច្បាប់ក្នុងរយៈពេល1ខែកន្លងមកនេះ ខណៈដែល COVID-19 កំពុងបង្កផលវិបាកខ្លាំងដល់សេដ្ឋកិច្ចសហរដ្ឋអាមេរិក។

“ចំនួនករណីបាត់បង់ការងារធ្វើក្នុងអំឡុង4សប្ដាហ៍កន្លងទៅ ពិតជាគួរឱ្យចាប់ព្រួយបារម្ភ ពោលគឺ ការងារទាំងឡាយដែលយើងមានចាប់តាំងពិក្រោយវិបត្តិហិរញ្ញវត្ថុឆ្នាំ2007-2008 បានបង់ទាំងស្រុង” James Knightley អ្នកសេដ្ឋសាស្ត្រអន្តរជាតិប្រចាំទីក្រុង New York សហរដ្ឋអាមេរិកថ្លែងបែបនេះ។

បច្ចុប្បន្ន មានពលរដ្ឋអាមេរិកាំង 22,034,000នាក់បានដាក់ពាក្យស្នើសុំជំនួយពីកម្មវិធីជំនួយសម្រាប់អ្នកបាត់បង់ការងារ រាប់ចាប់ពីថ្ងៃទី21មីនា ដែលតួលេខនេះស្មើនឹង13.5% នៃកម្លាំងពលកម្មសរុបទូទាំងប្រទេស។ Gus Faucher សេដ្ឋវិទូមកពីរដ្ឋ Pennsylvania បានឱ្យដឹងថា “ទីផ្សារពលកម្មបានដួលរលំ។ មានលិខិតស្នើសុំជំនួយឧបត្ថម្ភពីកម្មវិធីជំនួយសម្រាប់អ្នកបាត់បង់ការងារ បានកើនដល់ជាង22លានច្បាប់ ហើយនឹងមានការស្នើសុំបែបនេះរាប់លានទៀតនៅសប្ដាហ៍ក្រោយ”។

រដ្ឋនានា និងអាជ្ញាធរដែនដីនៅមូលដ្ឋាន បានចេញបទបញ្ជាស្នើឱ្យប្រជាជននៅក្នុងផ្ទះ បើសិនជាមិនមានការចាំបាច់ ដើម្បីទប់ស្កាត់ COVID-19។ បទបញ្ជាទាំងនេះ បានធ្វើឱ្យប៉ះពាល់ដល់ពលរដ្ឋអាមេរិកាំងជាង90%។

តួលេខនៃពាក្យស្នើសុំជំនួយដែលជាឯកសារសំខាន់ទាក់ទិននឹងខឿនសេដ្ឋកិច្ច កំពុងត្រូវបានគេតាមដានយ៉ាងយកចិត្តទុកដាក់ ដើម្បីស្វែងយល់ថា ពេលណាអត្រានៃការកាត់បន្ថយបុគ្គលិកបានថយចុះ ក៏ដូចជា ពេលណាទើបខឿនសេដ្ឋកិច្ចចាប់ផ្ដើមងើបឡើងវិញ។

ប្រធានាធិបតីអាមេរិកាំង លោក Donald Trump កាលពីថ្ងៃទី16មេសា បានប្រកាសណែនាំឱ្យដំណើរការសេដ្ឋកិច្ចឡើងវិញ បន្ទាប់ពីសម័យកាល COVID-19 បានបញ្ចប់។ លោក Trump ឱ្យដឹងថា អភិបាលរដ្ឋ និងទីក្រុងនានានឹងទទួលបានសិទ្ធិសម្រេចក្នុងការបើកដំណើរការសេដ្ឋកិច្ចឡើងវិញ ដោយយោងទៅតាមស្ថានភាពជាក់ស្ដែងនៃរដ្ឋ និងទីក្រុងនីមួយៗ។ លោកក៏បានថ្លែងថានឹងមានបទបញ្ជាមួយ បង្ខំឱ្យអភិបាលរដ្ឋ និងទីក្រុងនានា ត្រូវធ្វើតាមលោក ក៏ប៉ុន្តែ ក្រោយមក លោកក៏បានថ្លែងដកសម្ដីនេះត្រឡប់វិញ។

ប្រធានសភាជាន់ទាបអាមេរិកាំង លោកស្រី Nancy Pelosi បានរិះគន់ទៅលើការណែនាំរបស់លោក Trump អំពីការបើកដំណើរការសេដ្ឋកិច្ចឡើងវិញថាជា “ការមិនច្បាស់លាស់ និងច្របូកច្របល់”។

COVID-19 បានបង្ហាញខ្លួននៅក្នុងដែនដី និងប្រទេសចំនួន210 នៅក្នុងពិភពលោក ធ្វើឱ្យមនុស្សជាង2លាននាក់បានឆ្លងរោគ និងបានសម្លាប់មនុស្សជិត147,000នាក់។ នៅសហរដ្ឋអាមេរិក វីរុសនេះបានឆ្លងទៅមនុស្សជាង678,000នាក់ ហើយក៏បានសម្លាប់អ្នកជំងឺជិត35,000នាក់ផងដែរ៕

ប្រភព៖ សារព័ត៌មានបរទេស

April 17, 2020

អង់គ្លេសកំពុងពិនិត្យលើសម្មតិកម្ម “COVID-19 រួចចេញពីបន្ទប់ពិសោធន៍នៅ Wuhan” និងត្រៀមសំណួរពិបាកឆ្លើយសម្រាប់ចិន

រដ្ឋមន្ត្រីការបរទេស Dominic Raab បានឱ្យដឹងថា ប្រទេសអង់គ្លេស និងសម្ព័ន្ធមិត្ត នឹងដាក់សំណួរទៅកាន់ប្រទេសចិន ទាក់ទិននឹងប្រភពវីរុសCOVID-19 រួមនឹងវិធីដោះស្រាយបញ្ហានេះ។

“យើងនឹងត្រូវតែសួរសំណួរដែលពិបាកបំផុតអំពីរោគរាតត្បាតនេះថា តើវាផ្ទុះឆ្លងរាលដាលតាមរបៀបណា ហើយហេតុអ្វីមិនត្រូវបានទប់ស្កាត់ឆាប់រហ័ស” រដ្ឋមន្ត្រីការបរទេសអង់គ្លេស Cominic Raab ថ្លែងនៅក្នុងសន្និសីទសារព័ត៌មានមួយស្ដីអំពី COVID-19 កាលពីថ្ងៃទី16មេសា នៅឯការិយាល័យនាយករដ្ឋមន្ត្រី បន្ទាប់ពីត្រូវបានសួរអំពីទំនាក់ទំនងនាពេលអនាគតរវាងអង់គ្លេសជាមួយនឹងប្រទេសចិន។ លោក Raab បានដឹកនាំកិច្ចប្រជុំនេះជំនួសនាយករដ្ឋមន្ត្រី Boris Johnson ដែលកំពុងសម្រាកយកកម្លាំងក្រោយពីបានជាពីជំងឺ COVID-19។

លោក Raab ព្រមានប្រទេសចិនថា មិនអាចត្រឡប់មកធ្វើសកម្មភាពពាណិជ្ជកម្មជាធម្មតាជាមួយអង់គ្លេសដូចមុនទៀតនោះទេ ក្រោយវិបត្តិ COVID-19 ហើយសាធារណៈមតិអន្តរជាតិ ចង់បានចម្លើយពីទីក្រុងប៉េកាង អំពីវិធីដោះស្រាយបញ្ហាវិបត្តិសុខភាពនេះ។

“បច្ចុប្បន្ន យើងត្រូវការពិនិត្យមើលគ្រប់ជ្រុងជ្រោយនៃទំនាក់ទំនងជាមួយប្រទេសចិន និងអនុវត្តវាដោយយុត្តិធម៌បំផុត ប៉ុន្តែ ប្រាកដណាស់ថា ប្រទេសអង់គ្លេសនឹងមិនអាចរកស៊ីធម្មតាជាមួយចិនបានដូចមុននោះទេ ក្រោយវិបត្តិសុខភាពនេះ” រដ្ឋមន្ត្រីការបរទេសអង់គ្លេសមានប្រសាសន៍។

សារព័ត៌មានអង់គ្លេសយល់ថា យោបល់របស់រដ្ឋមន្ត្រីការបរទេស Raab បានបង្ហាញអំពីការខកចិត្តរបស់រាជរដ្ឋាភិបាលអង់គ្លេសចំពោះការខ្វះតម្លាភាពរបស់ប្រទេសចិនទាក់ទង់នឹងវិបត្តិ COVID-19។

ការប្រកាសរបស់រដ្ឋមន្ត្រីការបរទេសអង់គ្លេសនេះ ត្រូវបានធ្វើឡើងបន្ទាប់ពីប្រធានាធិបតី Donald Drump បានឱ្យដឹងថា រដ្ឋាភិបាលរបស់លោកកំពុងតែពិនិត្យយ៉ាងយកចិត្តទុកដាក់ទៅលើសម្មតិកម្មមួយដែលថា COVID-19 “រួច” ចេញពីបន្ទប់ពិសោធន៍នៅទីក្រុង Wuhan ដែលជាទីក្រុងធំរបស់ខេត្ត Hubei ប្រទេសចិន និងជាកន្លែងដែលមេរោគនេះចាប់ផ្ដើមឆ្លង និងរាតត្បាតកាលពីចុងឆ្នាំ2019។

មានសម្មតិកម្មជាច្រើនយល់ថា បន្ទប់ពិសោធន៍ដែលមានស្ដង់ដាទាបនៅទីក្រុង Wuhan បានធ្វើឱ្យមនុស្សម្នាក់ឆ្លងវីរុស ហើយមនុស្សម្នាក់នេះក៏បានទៅកាន់ផ្សារលក់គ្រឿងសមុទ្រ និងសត្វព្រៃ ជាកន្លែងដែល COVID-19 ចាប់ផ្ដើមផ្ទុះឆ្លង។ ប៉ុន្តែ វិទ្យាស្ថានស្រាវជ្រាវមេរោគ Wuhan បានទាត់ចោលការចោទប្រកាន់នេះកាលពីខែកុម្ភៈកន្លងទៅ។

ប្រតិកម្មទៅនឹងមតិរបស់លោក Trump ក្រសួងការបរទេសចិន បានឱ្យដឹងថា មន្ត្រីនៃអង្គការសុខភាពពិភពលោក (WHO) បាននិយាយជាច្រើនលើកហើយថា មិនមានភ័ស្ដុតាងណាមួយបញ្ជាក់ថា វីរុសCOVID-19 ត្រូវបានបង្កើតឡើងនៅក្នុងបន្ទប់ពិសោធន៍នោះទេ ហើយអ្នកជំនាញជាច្រើនក៏បានយល់ថា ការប្រកាសរបស់មន្ត្រីសហរដ្ឋអាមេរិក គឺមិនប្រកបដោយវិទ្យាសាស្ត្រ។

ក្រុមអ្នកវិទ្យាសាស្ត្រភាគច្រើនយល់ថា COVID-19 មានប្រភពពីតំបន់ផ្សារត្រីសមុទ្រនៅទីក្រុង Wuhan។ ប៉ុន្តែក្រុមមន្ត្រីជំនាញរបស់អង់គ្លេសកំពុងតែពិនិត្យទៅលើលទ្ធភាពដែលថា វីរុសនេះបាន “រួច” ចេញពីមន្ទីរពិសោធន៍នៅទីក្រុង Wuhan។ នេះបើតាមសារព័ត៌មានអង់គ្លេស Daily Mail ចេញផ្សាយកាលពីថ្ងៃទី12មេសា។ សមាជិកម្នាក់នៃគណៈកម្មធិការសង្គ្រោះបន្ទាន់របស់រាជរដ្ឋាភិបាលអង់គ្លេសថ្លែងថា “វាប្រហែលជាមិនធម្មតានោះទេ ដែលនៅសុខៗ គេបង្កើតមន្ទីរពិសោធន៍នៅ Wuhan បែបនេះ”។

ឆ្លើយនឹងសំណួររបស់អ្នកយកព័ត៌មានរបស់ Financial Times កាលពីថ្ងៃទី16មេសា ប្រធានាធិបតីបារាំង លោកEmmanuel Macron បានថ្លែងថា មាន “តំបន់ប្រផេះ” ជាច្រើននៅក្នុងវិធីដែលចិនប្រើប្រាស់ក្នុងដោះស្រាយបញ្ហា COVID-19។ “យើងមិនត្រូវឆោតល្ងង់ដល់ថ្នាក់និយាយថា ការដោះស្រាយបញ្ហារោគរាតត្បាតរបស់ពួកគេ បានល្អនោះទេ។ យើងមិនដឹងសោះឡើយ។ មានរឿងខ្លះបានកើតឡើង ហើយយើងមិនបានដឹងអំពីវា”៕

ប្រភព៖ សារព័ត៌មានបរទេស

April 17, 2020

រូបភាពដក់ជាប់ក្នុងចិត្ត ស្វាមី-ភរិយាសម្លឹងភ្នែកគ្នា៖ “យើងនឹងឆ្លងផុតវិបត្តិកូវីដទៅជាមួយគ្នា…”

ទីភ្នាក់ងារសារព័ត៌មាន AP បានរាយការណ៍ពីរឿងរ៉ាវខាងក្រោយរូបភាពដ៏គួរឱ្យរំភើបចិត្តនៅក្នុងបន្ទប់វះកាត់ នៅពេលដែលស្វាមី-ភរិយាកំពុងផ្ដល់កម្លាំងចិត្តគ្នាទៅវិញទៅមកឆ្លងកាត់របាំងមុខការពារមេរោគកូរ៉ូណា ក្រោមស្ថានការណ៍តានតឹងពីមេរោគរាតត្បាតកូវីដ-19។

បេន ខេយើរ និងមិនឌី ប្រុក ស្វាមី-ភរិយាជនជាតិអាមេរិកាំង ដែលសុទ្ធតែជាគ្រូពេទ្យជំនាញផ្នែកថ្នាំសណ្ដំក្នុងបន្ទប់វះកាត់ សម្លឹងកែវភ្នែកគ្នាទៅវិញទៅមកឆ្លងកាត់កញ្ចក់របាំងមុខការពារមេរោគ និងសម្លៀកបំពាក់ឈុតការពារមេរោគ តែក៏នៅតែមិនអាចរារាំងអារម្មណ៍ព្រួយបារម្ភពីគ្នាបានឡើយ ធ្វើឱ្យមិត្តរួមការងាររំភើបចិត្តរហូតដល់ទាញទូរស័ព្ទដៃមកថតយករូបភាពដ៏គួរឱ្យរំជួលចិត្តនេះ យកមកផូស្តនៅក្នុងប្រព័ន្ធបណ្ដាញសង្គម។

នៅពេលក្រោយមក រូបភាពនេះបានទទួលការចែករំលែកនៅក្នុងបណ្ដាញសង្គមអនឡាញយ៉ាងទូលំទូលាយ ព្រោះវាក្លាយជាកម្លាំងជំរុញចិត្តដល់មនុស្សទូទាំងពិភពលោក…។

ខេយើរ វ័យ 46ឆ្នាំ បាននិយាយថា មនុស្សទាំងអស់នាំគ្នានិយាយពីរូបភាពនោះ ព្រោះយើងកំពុងដើរឈានរំលងរឿងដ៏គួរឱ្យភ័យខ្លាចមួយជាមួយគ្នា ហើយវាជានិមិត្តសញ្ញា នៃសេចក្ដីសង្ឃឹម និងសេចក្ដីស្រឡាញ់។

ចំណែក ប្រុក វ័យ 38ឆ្នាំ បានឱ្យដឹងថា ពួកគេទាំង 2នាក់ស្រឡាញ់គ្នាណាស់ ធ្វើការងារជាមួយគ្នា និងគាំទ្រ ផ្ដល់កម្លាំងចិត្តគ្នាទៅវិញទៅមកជានិច្ច មិនមែនដោយសារតែ បេនជាស្វាមីប៉ុណ្ណោះទេ តែក្នុងឋានៈជាមិត្តមនុស្សដូចគ្នាទៀតផង។

រូបភាពក្នុងថ្ងៃរៀបការរបស់អ្នកទាំង2 នៅឯទីក្រុងឆាលស្តុន រដ្ឋសៅថ៍ ឃែរ៉ូឡៃណា

ទាំង 2នាក់រស់នៅក្នុងផ្ទះ នៅឯរដ្ឋហ្វ្ល៉រីដា សហរដ្ឋអាមេរិក ធ្វើការនៅកន្លែងជាមួយគ្នា រួមភារកិច្ចជាមួយគ្នា និងត្រូវកៀកស្មាគ្នាទទួលបន្ទុកតួនាទីដ៏សែនប្រថុយប្រថានក្នុងការស៊កបញ្ជូនបំពង់ជួយដកដង្ហើមឱ្យអ្នកជំងឺដែលត្រូវវះកាត់ ដែលអ្នកជំងឺភាគច្រើន ជាអ្នកជំងឺកូវីដ-19 តែទាំង 2នាក់មិនដែលរួញរាក្នុងការធ្វើជាគ្រូពេទ្យស្ម័គ្រចិត្តនៅក្នុងមន្ទីរពេទ្យ ថេមប៉ា ជេនើរ៉ល ឡើយ៕

ប្រភព៖ សារព័ត៌មានបរទេស

April 17, 2020

ទិដ្ឋភាពគួរឱ្យភ្ញាក់ផ្អើល!! រថយន្តសង្គ្រោះចតបន្តកន្ទុយគ្នារាប់គីឡូម៉ែត្រ ព្រោះមេរោគកូវីដ-19 ធ្វើឱ្យមន្ទីរពេទ្យនៅរុស្ស៊ី ទទួលអ្នកជំងឺលែងទាន់… (មានឃ្លីប)

ក្នុងខណៈដែលបញ្ហាការចរាចរណែនណាន់តាន់តាប់នៅលើទ្រូងផ្លូវផ្សេងៗនៅក្នុងទីក្រុងមូស្គូលែងក្លាយជាបញ្ហាក្ដៅតទៅទៀត ដោយសារតែវិធានការបិទទីក្រុង ដើម្បីទប់ស្កាត់ការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 ហើយនោះ អង្គភាពពេទ្យសង្គ្រោះបន្ទាន់របស់ទីក្រុងមួយនេះ ត្រូវជួបនឹងបញ្ហាមួយយ៉ាងមិននឹកស្មានដល់ នោះគឺ រថយន្តសង្គ្រោះបន្ទាន់ជាច្រើន ត្រូវចតបន្តកន្ទុយគ្នាជាជួរយ៉ាងវែងរាប់គីឡូម៉ែត្រ នៅខាងក្រៅមន្ទីរពេទ្យនានាដើម្បីដឹកជញ្ជូនអ្នកជំងឺ និងបុគ្គលដែលត្រូវសង្ស័យថា ឆ្លងមេរោគ។ នេះបើតាមសារព័ត៌មាន រុស្ស៊ី ធូដេយ៍ របស់ប្រទេសរុស្ស៊ី។

ទិដ្ឋភាពរថយន្តសង្គ្រោះបន្ទាន់ ចតបន្តកន្ទុយគ្នាជាជួរយ៉ាងវែង ត្រូវគេថតបាននៅបរិវេណខាងក្រៅរបស់មន្ទីរពេទ្យអតីតយុទ្ធជន ដែលស្ថិតនៅប៉ែកខាងជើងទីក្រុងមូស្គូកាលពីថ្ងៃសុក្រសប្ដាហ៍មុន ដោយនៅក្នុងខ្សែវីដេអូ ដែលបានផ្សព្វផ្សាយដោយអ្នកសារព័ត៌មានរុស្ស៊ីនោះ នៅបានបង្ហាញឱ្យឃើញថា មានរថយន្តដែលមានសញ្ញាកាកបាតទាំងនោះ មិនមែនគ្រាន់តែដណ្ដើមយកតែផ្លូវដែលតម្រង់ឆ្ពោះទៅមន្ទីរពេទ្យប៉ុណ្ណោះទេ តែនៅមានរថយន្តសង្គ្រោះចំនួនដ៏ច្រើនទៀត បានចតនៅលើផ្លូវខាងៗក្បែរនោះទៀតផង ខណៈដែលមន្ទីរពេទ្យមួយនេះ ត្រូវបានកែច្នៃទៅជាមណ្ឌលព្យាបាលថែទាំអ្នកជំងឺកូវីដ-19 កាលពីពេលថ្មីៗនេះ។

របាយការណ៍បានបញ្ជាក់ថា អ្នកជំងឺ និងអ្នកត្រូវសង្ស័យថា ឆ្លងមេរោគកូវីដ-19 ត្រូវរង់ចាំដល់ទៅ 15ម៉ោង ទម្រាំនឹងទៅដល់ដៃគ្រូពេទ្យ។

ស្ថានការណ៍នៅក្នុងមន្ទីរពេទ្យអតីតយុទ្ធជន មានមែនជាហេតុការណ៍តែមួយដែលបានកើតឡើងនោះទេ ដោយនៅក្នុងឃ្លីបវីដេអូ 1ទៀត គេបានឃើញរថយន្តសង្គ្រោះបន្ទាន់ជាច្រើនសិបគ្រឿងទៀត កំពុងចតបន្តកន្ទុយគ្នាយ៉ាងវែងរាប់គីឡូម៉ែត្រ នៅលើផ្លូវដែលតម្រង់ឆ្ពោះទៅមន្ទីរពេទ្យមួយ នៅក្នុងក្រុងឃីមគី ជិតព្រលានយន្តហោះសេរេមេតៀវ៉ូ ដែលនៅក្នុងរថយន្តនីមួយៗ សុទ្ធតែផ្ទុកអ្នកត្រូវសង្ស័យថា បានឆ្លងមេរោគកូវីដ-19 ហើយអ្នកត្រូវសង្ស័យទាំងនោះ ត្រូវរង់ចាំជាច្រើនម៉ោង ទម្រាំនឹងបានចូលទៅពិនិត្យរោគនៅក្នុងមន្ទីរពេទ្យ។

មន្ត្រីនៃមជ្ឈមណ្ឌលទប់ទល់វិបត្តិវេជ្ជសាស្ត្រ ដែលទទួលខុសត្រូវក្នុងការតស៊ូប្រឆាំងនឹងមេរោគវីរុសកូរ៉ូណាប្រភេទថ្មីនៅក្នុងប្រទេសរុស្ស៊ី បានបង្ហើបប្រាប់ទីភ្នាក់ងារព័ត៌មាន RT news របស់សារព័ត៌មាន រុស្ស៊ី ធូដេយ៍ ថា ជួររថយន្តសង្គ្រោះដែលតគ្នាវែងអន្លាយនៅខាងក្រៅមន្ទីរពេទ្យនានានោះ គឺបណ្ដាលមកពីស្ថានការណ៍រោគរាតត្បាតនាពេលបច្ចុប្បន្ន ដែលគេប្រទះឃើញ មានអ្នកជំងឺដ៏ច្រើននាំគ្នាសម្រុកចូលមកមន្ទីរពេទ្យ ក្នុងអំឡុងពេលប៉ុន្មានថ្ងៃកន្លងមកនេះ។

រឿងបែបនេះ ប្រហែលជារឿងដែលទទួលយកមិនបាននោះទេ បើសិនមណ្ឌលព្យាបាលទាំងឡាយធ្វើការក្រោមករណីប្រក្រតី តែយ៉ាងណាក៏ដោយ ក្រុមគ្រូពេទ្យបានប្រាប់ថា ពួកគេកំពុងស្ថិតក្រោមសម្ពាធដែលកើនឡើងក្នុងពេលបច្ចុប្បន្ន និងបានសូមទោសអ្នកជំងឺ សម្រាប់ភាពមិនងាយស្រួលដែលកើតឡើងទាំងប៉ុន្មាន។

https://www.youtube.com/watch?v=Rs5bLMB1NhQ&feature=emb_logo

រហូតមកដល់ថ្ងៃព្រហស្បតិ៍(ទី16 មេសា)ម្សិលមិញ ប្រទេសរុស្ស៊ី មានអ្នកឆ្លងមេរោគកូវីដ-19 សរុប 27,938នាក់ តែនៅក្នុងនោះ ស្លាប់ត្រឹមតែ 232នាក់ប៉ុណ្ណោះ ដែលចំនួននេះអាចរាប់បានថា តិចតួចខ្លាំងណាស់ បើធៀបនឹងប្រទេសផ្សេងៗទៀតនៅក្នុងទ្វីបអឺរ៉ុបដូចគ្នា៕

ប្រភព៖ សារព័ត៌មានបរទេស

April 17, 2020

COVID-19! កូនស្រី និងទីប្រឹក្សាជាន់ខ្ពស់របស់លោកTrump ទៅលម្ហែកាយ ខណៈបម្រាមគោចរកំពុងត្រូវបានអនុវត្ត

លោកស្រី Ivanka Trump និងស្វាមី (លោក Jared Kushner) បាននាំគ្នាទៅសម្រាកលម្ហែកាយនៅ New Jersey បើទោះជារដ្ឋាភិបាលអាមេរិកាំងបានចេញអនុសាសន៍កាត់បន្ថយការដើរហើរដើម្បីទប់ស្កាត់វីរុសCOVID-19។

ប្ដីប្រពន្ធដែលជាកូនរបស់ប្រធានាធិបតីអាមេរិកាំង បានធ្វើដំណើរពីទីក្រុង Washington D.C ទៅកាន់ទីតាំងលម្ហែកាយរបស់គ្រួសារ Trump នៅឯតំបន់ Bedminster ក្នុងរដ្ឋ New Jersey ដើម្បីអបអរបុណ្យ Passover (ជាថ្ងៃបុណ្យសាសនាដ៏ធំមួយរបស់ជនជាតិជ្វីហ្វ/Jewish) ដែលមានរយៈពេល1សប្ដាហ៍ ចាប់ផ្ដើមពីថ្ងៃទី8មេសា។ ព័ត៌មាននេះត្រូវបានទទួលស្គាល់កាលពីថ្ងៃទី16មេសាដោយសេតវិមាន។ ប៉ុន្តែ សេតវិមានបញ្ជាក់ថា ដំណើរទៅលម្ហែកាយនេះ មានតែសមាជិកក្រុមគ្រួសារតូចរបស់លោកស្រី Ivanka តែប៉ុណ្ណោះ។

សេតវិមានប្រកាសថា “លោកស្រី Ivanka និងគ្រួសារតួចរបស់ខ្លួនបានប្រារព្ធពិធីបុណ្យ Passover នៅក្នុងតំបន់លម្ហែកាយមួយដែលបានផ្អាកដំណើរការ ដែលត្រូវចាត់ទុកដូចជាផ្ទះ។ ដំណើររបស់លោកស្រី មិនខុសពីការទៅបំពេញការងារនោះទេ ហើយទីតាំងនោះមានមនុស្សតិចជាងនៅជុំវិញផ្ទះរបស់លោកស្រីដែលនៅឯរដ្ឋធានីទៅទៀត”។

“ពេលស្ថិតនៅឯ Bedminster លោកស្រី Iavnka អនុវត្តវិធានការរក្សាគម្លាតពីសហគមន៍ និងធ្វើការពីចម្ងាយ។ ដំណើរលម្ហែកាយរបស់នេះ មិនមែនសំដៅលើការធ្វើជំនួញនោះទេ ប៉ុន្តែជាការសម្រាកដោយឡែកជាមួយគ្រួសារ”។

ប្រជាជនក្នុងទីក្រុង Washington D.C និងតំបន់ជាច្រើនផ្សេងទៀតនៅសហរដ្ឋអាមេរិក ត្រូវបានស្នើឱ្យនៅក្នុងផ្ទះ ចៀសវាងការធ្វើដំណើរដែលមិនចាំបាច់ក្នុងស្ថានភាព COVID-19 កំពុងមានសភាពស្មុគស្មាញ។ សេតវិមានក៏បានចេញអនុសាសន៍ “ចៀសវាងការដើរហើរផ្ដេសផ្ដាស” ធ្វើឱ្យប្រជាជនអាមេរិកាំង ត្រូវប្រារព្ធពិធីចួបជុំគ្រួសារនៅក្នុងពិធីបុណ្យ Easter និងបុណ្យ Passover ក្នុងឆ្នាំនេះ ដោយវិធីសាស្ត្រអនឡាញ។

ក្នុងតួនាទីជាទីប្រឹក្សាផ្ទាល់របស់ប្រធានាធិបតីអាមេរិកាំង លោកស្រី Ivanka បានអំពាវនាវឱ្យពលរដ្ឋអាមេរិកាំង គោរពវិធានការរបស់រដ្ឋាភិបាលដើម្បីទប់ស្កាត់ COVID-19។

លោក Jared Kushner ដែលជាស្វាមីរបស់លោកស្រី Ivanka គឺជាជនជាតិជ្វីហ្វ និងកាន់សាសនាយូដា។ Passover គឺជាពិធីបុណ្យសំខាន់របស់សាសនាយូដា (Judaism) ដែលប្រារព្ធឡើងដើម្បីអបអរព្រះដែលបានរំដោះប្រជាជនអ៊ីស្រាអែលឱ្យរួចផុតពីនឹមត្រូតត្រានៅអេហ្ស៊ីប។ លោក Jared Kushner ក៏ជាទីប្រឹក្សាជាន់ខ្ពស់របស់ប្រធានាធិបតីអាមេរិកាំងផងដែរ។

COVID-19 បានបង្ហាញខ្លួនក្នុងប្រទេស និងដែនដីចំនួន210នៅទូទាំងពិភពលោក បណ្ដាលឱ្យមនុស្សជិត2.2លាននាក់បានឆ្លងវីរុស ក្នុងនោះមានជិត145,000នាក់បានស្លាប់។ ចំណែកសហរដ្ឋអាមេរិកវិញ គឺជាសម្បុកមេរោគធំជាងគេក្នុងពិភពលោក ដោយមានអ្នកជំងឺជិត678,000នាក់ ខណៈអ្នកស្លាប់បានកើនជិតដល់35,000នាក់៕

ប្រភព៖ សារព័ត៌មានបរទេស

April 17, 2020

ជប៉ុន ប្រកាសដាក់ប្រទេសក្នុងសភាវគ្រាអាសន្ន និងចែកប្រាក់ប្រជាជនម្នាក់ 100,000យ៉េន

ជនជាតិជប៉ុនចំនួនដ៏ច្រើនក្នុងទីក្រុងតូក្យូកំពុងធ្វើដំណើរមកស្ថានីយរថភ្លើង ឈីណាហ្កាវៈ ដើម្បីជិះរថភ្លើងទៅធ្វើការ ទោះជាមានការប្រកាសដាក់ប្រទេសក្នុងសភាវអាសន្ន កាលពីថ្ងៃម្សិលមិញ(ព្រហស្បតិ៍ ទី16 មេសា)ក៏ដោយ…

រដ្ឋភិបាលជប៉ុន បានសម្រេចចិត្តប្រកាសសភាវគ្រាអាសន្នទូទាំងប្រទេសហើយ ក្រោយមានការឆ្លងរាលដាលរបស់វីរុសកូវីដ-19 កាន់តែអាក្រក់ឡើងៗ ដោយលោកនាយករដ្ឋមន្ត្រីបានបង្ហើបឱ្យដឹងថា កំពុងត្រៀមចែកប្រាក់ដល់ប្រជាជនក្នុងម្នាក់ 100,000យ៉េន(ជិត 1,000ដុល្លារអាមេរិក)។

ទីភ្នាក់ងារព័ត៌មាន BBC បានរាយការណ៍ថា រដ្ឋាភិបាលជប៉ុន បានប្រកាសដាក់ប្រទេសក្នុងសភាវអាសន្នហើយ កាលពីថ្ងៃទី16 មេសា ម្សិលមិញ ដែលកាលពីមុន បានប្រកាសតែនៅក្នុងខេត្តចំនួន7 រួមទាំងទីក្រុងតូក្យូប៉ុណ្ណោះ ក្រោយពីស្ថានការណ៍ឆ្លងរាលដាលរបស់មេរោគកូវីដ-19 នៅក្នុងប្រទេសកាន់តែអាក្រក់ឡើង ដោយមានអ្នកឆ្លងមេរោគសរុបច្រើនជាង 9,000នាក់ ក្នុងចំនួននេះ មានអ្នកស្លាប់រួចហើយ 178នាក់ និងព្យាបាលជាសះស្បើយបានត្រឹមតែ 901នាក់ ដោយការប្រកាសនេះ នឹងមានសុពលភាពរហូតដល់ថ្ងៃទី6 ខែឧសភា ខាងមុខ។

ការប្រកាសសភាវគ្រាអាសន្នរបស់រដ្ឋាភិបាលជប៉ុន នឹងធ្វើឱ្យរដ្ឋបាលនៅក្នុងខេត្តនីមួយៗ អាចអំពាវនាវឱ្យប្រជាជនស្ថិតនៅតែក្នុងផ្ទះបាន តែនឹងមិនមានវិធានការដាក់ទោសអ្នកល្មើសក្នុងករណីចំនួនច្រើន ឬក៏ការបញ្ជាខាងច្បាប់ឡើយ។

លោកនាយករដ្ឋមន្ត្រី ស៊ីនហ្សូ អាបេ រួមប្រជុំជាមួយអ្នកជំនាញការផ្នែកវេជ្ជសាស្ត្រ

លោកនាយករដ្ឋមន្ត្រី ស៊ីនហ្សូ អាបេ នៃប្រទេសជប៉ុន បានថ្លែងក្នុងអំឡុងការប្រជុំលើរបៀបវារៈពិសេស ជាមួយអ្នកជំនាញការផ្នែកពេទ្យថា ទីតាំងដែលមានការប្រកាសសភាវអាសន្ន គួរតែពង្រីកចេញពី 7ខេត្ត ទៅជាគ្រប់ខេត្តទូទាំងប្រទេសតែម្ដង និងសូមអំពាវនាវឱ្យប្រជាជនកាត់បន្ថយការជួបជុំគ្នាឱ្យបានយ៉ាងតិច 80% ដើម្បីជួយបន្ថយការឆ្លងរាលដាលរបស់មេរោគវីរុសកូវីដ-19 ខណៈដែលធុរកិច្ចផ្សេងៗ ឱ្យបង្កើនការធ្វើការងារពីចម្ងាយរបស់បុគ្គលិកឱ្យបានយ៉ាងតិច 70%ទៀតផង។

ខណៈដែលទីភ្នាក់ងារព័ត៌មាន នីបប៉ុន របស់ជប៉ុនក៏បានបញ្ជាក់ដែរថា លោក អាបេ បានត្រៀមឱ្យរដ្ឋបាលចែកលុយសុទ្ធដល់ប្រជាពលរដ្ឋគ្រប់រូប ម្នាក់ៗ 100,000យ៉េន(ជិត 1,000ដុល្លារអាមេរិក) ដោយបញ្ជាឱ្យគណបក្សរដ្ឋាភិបាល “សេរីប្រជាធិបតេយ្យ” ពិចារណាពិនិត្យកែច្បាប់ថវិកាពិសេសសម្រាប់ឆ្នាំថវិកា2020 មិនប៉ុន្មានថ្ងៃមុន ដោយលោកនឹងដាក់ស្នើច្បាប់នេះទៅឱ្យរដ្ឋសភាពិចារណា និងមិនមានការកម្រិតប្រាក់ចំណូលសម្រាប់ការចែកប្រាក់នេះទេ គឺដើម្បីឃុំគ្រងសេដ្ឋកិច្ចពីផលប៉ះពាល់ដោយសារការឆ្លងរាតត្បាតរបស់វីរុស។ យ៉ាងណាក៏ដោយ ប្រភពព័ត៌មានបានបញ្ជាក់ថា រដ្ឋាភិបាលអាចលុបចោលផែនការចែកលុយសុទ្ធ 300,000យ៉េនទៅឱ្យគ្រួសារណាដែលមានបញ្ហាខាងហិរញ្ញវត្ថុ។

ចំណែកលោក យ៉ាស៊ុតូឈិ និឈិមូរៈ រដ្ឋមន្ត្រីទទួលបន្ទុកផ្នែកវិធានការបន្ទាន់របស់ជប៉ុន បានថ្លែងថា ការពង្រីកសភាវគ្រាអាសន្នឱ្យគ្របដណ្ដប់ទូទាំង 47ខេត្តក្នុងប្រទេសនេះ ជារឿងចាំបាច់ដែលត្រូវតែធ្វើ មុននឹងដល់អំឡុងពេល Golden week ជាអំឡុងពេលដែលមានថ្ងៃឈប់សម្រាកជាតិ ដល់ទៅ 4ថ្ងៃជាប់គ្នា ក្នុងសប្ដាហ៍តែមួយ ដោយសភាវគ្រាអាសន្ននឹងត្រូវប្រកាសឱ្យប្រើរហូតដល់ថ្ងៃទី6 ខែឧសភា ដែលជាថ្ងៃចុងក្រោយរបស់ Golden week។

មន្ត្រីសាលាក្រុង ហ្វ៊ូគូយ៉ៈ ក្នុងខេត្តសៃតាម៉ៈ ប្រើផ្ទាំងប្លាស្ទិកឃាំងតុធ្វើការ ដើម្បីការពារវីរុសឆ្លងសាយភាយ

ការប្រកាសសភាវគ្រាអាសន្នទូទាំងប្រទេស បានកើតឡើងក្នុងខណៈដែលមានសំឡេងរិះគន់ចំពោះលោក អាបេ ចាប់ផ្ដើមលាន់ឮខ្លាំងឡើងជារឿយៗ ដោយលទ្ធផលប្រជាមតិ និងការយល់ឃើញរបស់ប្រជាពលរដ្ឋជប៉ុន បានបង្ហាញថា មនុស្ស 75% គិតថា លោកនាយករដ្ឋមន្ត្រីម្នាក់នេះប្រើពេលវេលាយូរជ្រុលពេក ទម្រាំនឹងប្រកាសសភាវអាសន្នក្នុងទីក្រុងតូក្យូ ដោយត្រូវរង់ចាំឱ្យចំនួនអ្នកឆ្លងមេរោគហក់ឡើងខ្ពស់ កាលពីអំឡុងដើមខែកន្លងទៅ ទើបប្រកាស។

ក្រោយពីសភាវគ្រាអាសន្ន ត្រូវបានប្រកាសឱ្យប្រើនៅក្នុង 7ខេត្ត កាលពីថ្ងៃទី8 មេសាមក អភិបាលខេត្តផ្សេងៗទៀតរបស់ជប៉ុន ក៏ចេញមកអំពាវនាវឱ្យរដ្ឋាភិបាលប្រកាសសភាវគ្រាអាសន្ននៅក្នុងខេត្តរបស់ពួកគេផង ដោយសារតែចំនួនអ្នកឆ្លងមេរោគបានកើនឡើងយ៉ាងបន្តបន្ទាប់ ហើយក្រុមមន្ត្រីពេទ្យ ត្រូវទប់ទល់ជាមួយអ្នកជំងឺក្នុងចំនួនដ៏ច្រើន។ អភិបាលក្រុងអូសាកា ដល់ថ្នាក់ត្រូវសុំអង្វរឱ្យមានការបរិច្ចាគអាវភ្លៀងពីប្រជាជន ដើម្បីឱ្យបុគ្គលិកខាងផ្នែកពេទ្យ បានប្រើធ្វើជាឧបករណ៍ការពារ ដោយសារតែឧបករណ៍បែបនេះមានការខ្វះខាតខ្លាំង។

សាលហាត់ប្រាណមួយនៅក្នុងខេត្តខាណាហ្កាវៈ ត្រូវបានផ្លាស់ប្ដូរទៅជាកន្លែងស្នាក់នៅបណ្ដោះអាសន្ន សម្រាប់អ្នកដែលគ្មានថវិកាជួលបន្ទប់អាផាតមិនត៍នៅ ក្នុងអំឡុងវិបត្តិកូវីដ-19

ទាំងអស់នេះ ជប៉ុនបានរកឃើញអ្នកឆ្លងមេរោគកូវីដ-19 ដំបូងគេតាំងពី 3ខែមុន តែរហូតមកដល់ពេលនេះ ពួកគេបានធ្វើការត្រួតពិនិត្យរោគទៅលើប្រជាជន បានចំនួនត្រឹមតែបន្តិចបន្តួចប៉ុណ្ណោះ ខុសពីកូរ៉េខាងត្បូងដែលគ្រប់គ្រងការឆ្លងរាលដាលបានស្ទើរតែទាំងស្រុង ដោយការពិនិត្យប្រជាជនក្នុងចំនួនដ៏ច្រើន ដោយរដ្ឋាភិបាលជប៉ុនបានបញ្ជាក់ថា ការពិនិត្យជាទ្រង់ទ្រាយធំ គឺជាការខាតបង់ទ្រព្យធន និងខ្លាចថា មន្ទីរពេទ្យនឹងពេញទៅដោយអ្នកជំងឺដែលមានលទ្ធផលវិជ្ជមាន(ឆ្លងមេរោគ) តែមានអាការតែបន្តិចបន្តួច(មិនធ្ងន់ធ្ងរ)។

ក្រៅពីនេះ ការពិនិត្យរកមេរោគរបស់ជប៉ុន ថែមទាំងធ្វើឡើងនៅតាមមណ្ឌលសុខភាពកម្រិតតំបន់ មិនមែនលំដាប់ប្រទេសឡើយ ដោយមណ្ឌលសុខភាពក្នុងតំបន់មួយចំនួន ថែមទាំងមានឧបករណ៍មិនគ្រប់គ្រាន់ក្នុងការពិនិត្យមនុស្សម្នាក្នុងចំនួនច្រើនបានទៀតផង៕

ប្រភេព៖ សារព័ត៌មានបរទេស

April 17, 2020

COVID-19! វេជ្ជបណ្ឌិតឥណ្ឌូនេស៊ី ពាក់អាវភ្លៀងជំនួសឈុតការពារវីរុស

ដោយសារតែមានការខ្វះខាតឧបករណ៍វេជ្ជសាស្ត្រ និងសម្ភារការពារការឆ្លងវីរុស ក្រុមវេជ្ជបណ្ឌិតនៅប្រទេសឥណ្ឌូនេស៊ី កំពុងតែប្រថុយប្រថានជាមួយនឹងការប្រយុទ្ធប្រឆាំងវីរុសCOVID-19 ដែលអាចមានហានិភ័យខ្ពស់ក្នុងការឆ្លងមេរោគដល់ពួកគេ។

គិតមកដល់បច្ចុប្បន្ន វេជ្ជបណ្ឌិតចំនួន20រូបហើយដែលបានបាត់បង់ជីវិតចាប់តាំងពីCOVID-19 បានបង្ហាញខ្លួននៅឥណ្ឌូនេស៊ី។ តួលេខនៃអ្នកស្លាប់ចំនួន459នាក់ក្នុងប្រទេសនេះ ត្រូវបានក្រុមអ្នកវិភាគយល់ថា ជាតួលេខទាបបំផុត បើធៀបជាមួយនឹងស្ថានភាពជាក់ស្ដែង។

មន្ទីរពេទ្យនានា មិនមានសម្ភារការពារសុវត្ថិភាពគ្រប់គ្រាន់ ខណៈម៉ាស៊ីនជំនួយដង្ហើមក៏មានតម្លៃខ្ពស់ ធ្វើឱ្យក្រុមវេជ្ជបណ្ឌិតពិបាលក្នុងការទប់ទល់នឹងវីរុសCOVID-19នេះ។ ពួកគេក៏ត្រូវពាក់អាវភ្លៀងដែលមានតម្លៃទាប ជំនួសឈុតការពារសុវត្ថិភាពដែលមានតម្លៃថ្លៃ និងកំពុងខ្វះខាត។

Muhammad Farras Hadyan ដែលជាវេជ្ជបណ្ឌិតម្នាក់នៅទីក្រុង Jakarta បានឱ្យដឹងថា សម្ភារវេជ្ជសាស្ត្រកំពុងតែអស់ជាបណ្ដើរៗហើយនៅក្នុងមន្ទីរពេទ្យរបស់លោក រហូតដល់មានវេជ្ជបណ្ឌិតខ្លះ ត្រូវស្នើសុំជំនួយប្រាក់កាសពីគ្រួសាររបស់ពួកគេដើម្បីទិញឈុតការពារសុវត្ថិភាព។

Handoko Gunawan វេជ្ជបណ្ឌិតឯកទេសផ្នែករោគសួត វ័យ79ឆ្នាំ បាននៅជួរមុខរហូតដល់ថ្ងៃមួយគាត់ត្រូវបង្ខំចិត្តបង្ខាំងខ្លួនឯងដោយសារសង្ស័យថា បានឆ្លងវីរុសកូរ៉ូណា។

Handoko Gunawan និយាយថា “ខ្ញុំពិតជារន្ធត់ចិត្តខ្លាំងណាស់ ហើយក្រុមបុគ្គលិកពេទ្យផ្សេងៗទៀតក៏ដូចគ្នា។ វេជ្ជបណ្ឌិតក្មេងៗ មានប្ដី និងកូនៗនៅឯផ្ទះ ប៉ុន្តែពួកគេនៅតែប្រឹងប្រែងប្រឈមនឹងបញ្ហានេះ។ មានវេជ្ជបណ្ឌិតតិចណាស់នៅឥណ្ឌូនេស៊ី ហើយបើពួកគេស្លាប់ ពួកយើងនឹងមានវេជ្ជបណ្ឌិតកាន់តែតិចដើម្បីជួយព្យាបាលអ្នកជំងឺ”។

យោងតាមទិន្នន័យរបស់អង្គការសុខភាពពិភពលោក ប្រទេសឥណ្ឌូនេស៊ី មានវេជ្ជបណ្ឌិតមិនដល់4នាក់ផងក្នុងចំណោមមនុស្ស10,000នាក់។ តួលេខនេះ ទាបខ្លាំងណាស់បើធៀបនឹងចំនួន40នាក់នៅអ៊ីតាលី និង24នាក់នៅកូរ៉េខាងត្បូង។ សមាគមវេជ្ជបណ្ឌិតឥណ្ឌូនេស៊ីបានព្រមានថា វិបត្តិCOVID-19នេះ អាក្រក់ជាងអ្វីដែលបានរាយការណ៍ទៅទៀត ចំណែកប្រតិកម្មរបស់រដ្ឋាភិបាលវិញ ហាក់មានសភាព “ទន់ជ្រាយ”។

ស្ថិតិផ្លូវការថ្មីបំផុតបានឱ្យដឹងថា ឥណ្ឌូនេស៊ីបានរកឃើញអ្នកផ្ទុកវីរុសចំនួន 5,136នាក់ ក្នុងចំណោម36,000នាក់ដែលបានធ្វើតេស្ត ខណៈប្រជាជនរបស់ប្រទេសនេះ មានចំនួនដល់ទៅជាង260លាននាក់ (ច្រើនជាងគេលំដាប់ទី4ក្នុងពិភពលោក)។

អ្នកនាំពាក្យរបស់សមាគមវេជ្ជបណ្ឌិតឥណ្ឌូនេស៊ីបានថ្លែងថា “តួលេខផ្លូវការរបស់រដ្ឋាភិបាល មិនបង្ហាញអំពីទិដ្ឋភាពពិតប្រាកដស្ដីអំពីចំនួនអ្នកឆ្លងមេរោគក្នុងប្រទេសនេះនោះទេ”។

តួលេខរបស់អាជ្ញាធរទីក្រុង Jakarta បានបង្ហាញថា មានអ្នកស្លាប់ដោយសារការឆ្លងមេរោគ ឬសង្ស័យថាបានឆ្លងមេរោគCOVID-19 ជាង1,000នាក់ ត្រូវបានបញ្ចុះនៅក្នុងទីបញ្ចុះសពនៅឯមូលដ្ឋាន ដែលតួលេខនេះ ខ្ពស់ជាង5ដង បើធៀបនឹងតួលេខដែលបង្ហាញដោយរដ្ឋាភិបាល។

ករណីបញ្ចុះសពនៅក្នុងទីក្រុង Ban Dung នៃខេត្ត Java ដែលជាប់ជាមួយនឹងទីក្រុង Jakarta បានកើនទ្វេដង ដោយមានប្រមាណជា400នាក់ក្នុងរយៈពេលតែ1ខែ រាប់ចាប់ពី COVID-19 បានឆ្លងរាលដាលក្នុងប្រទេសនេះ។ នេះបើតាមការឱ្យដឹងពីអភិបាលក្រុង Ban Dung លោក Ridwan Kamil។

លោក Ridwan Kamil បន្តថា “នេះគឺជាស្ថានភាពដែលដូចទៅនឹង Jakarta។ យើងមិនអាចប្រាកដថា អ្នកដែលបានស្លាប់ទាំងអស់នេះ គឺសុទ្ធតែបានឆ្លងវីរុសCOVID-19នោះទេ ប៉ុន្តែតួលេខនៃករណីស្លាប់ គឺវាខ្ពស់ជាងធម្មតា”៕

ប្រភព៖សារព័ត៌មានបរទេស

April 17, 2020

សិង្ហបុរី ទប់លែងឈ្នះ! ឆ្លងមេរោគ 1ថ្ងៃ 728នាក់ ចំណែកឥណ្ឌូនេស៊ី និងហ្វីលីពីន នៅតែធ្ងន់ធ្ងរ…

ក្រសួងសាធារណៈសុខាភិបាល របស់ប្រទេសសិង្ហបុរី កាលពីថ្ងៃព្រហស្បតិ៍(ទី16មេសា)ម្សិលមិញ បានអះអាងពីការរកឃើញអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 បន្ថែមទៀតច្រើនដល់ទៅ 728នាក់ ដែលអាចនិយាយបានថា ជាស្ថិតិប្រចាំថ្ងៃដែលខ្ពស់បំផុត រាប់ចាប់តាំងពីមានការឆ្លងរាលដាលមក ខណៈដែលប្រទេសជាច្រើនទៀតនៅក្នុងតំបន់អាស៊ាន រកឃើញអ្នកឆ្លងមេរោគថ្មីខ្ទង់រយដូចគ្នា។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

តាមរយៈសេចក្ដីថ្លែងការណ៍របស់ក្រសួងសាធារណៈសុខាភិបាលសិង្ហបុរីនេះ បានធ្វើឱ្យចំនួនអ្នកឆ្លងមេរោគសរុបរបស់ប្រទេសមួយនេះ ស្ថិតក្នុងចំនួន 4,427នាក់ ដោយក្នុងចំណោមអ្នកឆ្លងមេរោគថ្មីទាំងនោះ មានច្រើនដល់ទៅ 654នាក់ ពាក់ព័ន្ធនឹងតំបន់ស្នាក់នៅរបស់ពលករចំណាកស្រុកបរទេស ចំណែកចំនួនដែលនៅសល់ ជាការឆ្លងរាលដាលក្នុងតំបន់។

តួលេខអ្នកឆ្លងមេរោគថ្មីក្នុងថ្ងៃព្រហស្បតិ៍(ទី16មេសា) អាចរាប់បានថា កើនឡើងយ៉ាងច្រើន ជាងស្ថិតិប្រចាំថ្ងៃខ្ពស់បំផុតកាលពីថ្ងៃមុន 447នាក់ ដែលចំនួននេះទើបតែកើតឡើងកាលពីថ្ងៃពុធ(ទី15មេសា)កន្លងទៅប៉ុណ្ណោះ…តែយ៉ាងណាក៏ដោយ ក្នុងថ្ងៃព្រហស្បតិ៍(ទី16មេសា) គ្មានរបាយការណ៍ពីអ្នកស្លាប់ឡើយ ដូច្នេះធ្វើឱ្យចំនួនអ្នកស្លាប់សរុបស្ថិតក្នុងតួលេខដដែលគឺ 10នាក់។

កាលពីពេលមុននេះ ការព្យាយាមយ៉ាងខ្លាំងក្លារបស់អាជ្ញាធរ ក្នុងការគ្រប់គ្រងការឆ្លងរាលដាលរបស់មេរោគកូវីដ-19 ក្នុងក្រុមពលរដ្ឋសិង្ហបុរី ដោយការតាមដានអ្នកប៉ះពាល់ជិតស្និទ្ធយ៉ាងតឹងរ៉ឹង និងប្រុងប្រយ័ត្នយ៉ាងម៉ឺងម៉ាត់នាពេលកន្លងមក បានទទួលការកោតសរសើរពីអង្គការសុខភាពពិភពលោក។

តែយ៉ាងណាក្ដី វីរុសកូរ៉ូណាប្រភេទថ្មី បានឆ្លងរាលដាលយ៉ាងឆាប់រហ័សនៅក្នុងទីប្រជុំជនពលករចំណាកស្រុកបរទេសខ្នាតធំមួយ បន្ថែមពីលើនូវអ្វីដែលពួកក្រុមសិទ្ធិមនុស្សបានបញ្ជាក់ថា ការព្យាយាមគ្រប់គ្រងការឆ្លងរាលដាលរបស់ប្រទេសមួយនេះ មានការទំនាក់ទំនងគ្នាមិនសូវជាល្អប៉ុន្មានឡើយ។

ព័ត៌មានចុងក្រោយបំផុតរបស់ប្រទេសសិង្ហបុរីនេះ បានធ្វើឱ្យពួកគេនៅតែស្ថិតជាប្រទេសមួយ ដែលរកឃើញអ្នកឆ្លងមេរោគកូវីដ-19 ច្រើនបំផុតលំដាប់លេខ4 ក្នុងភូមិភាគអាស៊ីភាគអាគ្នេយ៍ ដោយលំដាប់លេខ1 ជារបស់ប្រទេសហ្វីលីពីន ដែលមានចំនួនអ្នកឆ្លងមេរោគសរុប 5,660នាក់ ក្រោយរកឃើញអ្នកឆ្លងមេរោគថ្មី 207នាក់ ខណៈដែលការរកឃើញអ្នកស្លាប់បន្ថែមមានចំនួន 13នាក់ សរុប 362នាក់។

បន្ទាប់មកគឺ ប្រទេសឥណ្ឌូនេស៊ី ដែលស្ថានការណ៍នាពេលនេះ មើលទៅហាក់ដូចជាអាចវ៉ាប្រទេសហ្វីលីពីនក្នុងពេលឆាប់ៗនេះ ដោយឥណ្ឌូនេស៊ី រកឃើញអ្នកឆ្លងមេរោគថ្មី 380នាក់ សរុប 5,516នាក់ ចំណែកអ្នកស្លាប់បន្ថែមមាន 27នាក់ សរុប 496នាក់។

លំដាប់លេខ3 ជារបស់ប្រទេសម៉ាឡេស៊ី រកឃើញអ្នកឆ្លងមេរោគថ្មិ 10នាក់ សរុប 5,182នាក់ ឯអ្នកស្លាប់បន្ថែម មានតែ 1នាក់គត់ ធ្វើឱ្យចំនួនអ្នកស្លាប់សរុប មាន 84នាក់។ ចំណែកប្រទេសថៃ គ្រងលំដាប់លេខ5 ក្រោយរកឃើញអ្នកឆ្លងមេរោគថ្មីចំនួន 29នាក់ សរុប 2,672នាក់ និងមានអ្នកស្លាប់សរុប 46នាក់៕

ប្រភព៖ សារព័ត៌មានបរទេស

April 17, 2020

Category: សុខភាព