សុខភាព - La Reine Media

COVID-19! ជាង3លាននាក់បានឆ្លងមេរោគនៅទូទាំងពិភពលោក ក្នុងនោះអាស៊ីអាគ្នេយ៍មានជាង40,700នាក់

ពិភពលោកទាំងមូល មានអ្នកឆ្លងវីរុស COVID-19 ដល់ទៅជាង3លាននាក់ ក្នុងនោះមានជាង210,000នាក់បានបាត់បង់ជីវិត។

យោងតាមស្ថិតិពីសាកលវិទ្យាល័យ Johns Hopkins មនុស្ស3,040,709នាក់បានឆ្លងជំងឺ និង211,099នាក់បានស្លាប់ដោយសារ COVID-19 នៅក្នុងប្រទេស និងដែនដី210ក្នុងពិភពលោក។ អ្នកស្លាប់ថ្មីមានចំនួន4,286នាក់ និងអ្នកជំងឺថ្មីមានចំនួន69,814នាក់។ ចំណែកអ្នកជំងឺដែលបានជាសះស្បើយ មានចំនួន891,804នាក់។

សហរដ្ឋអាមេរិក បច្ចុប្បន្នបានរកឃើញអ្នកជំងឺCOVID-19 សរុប985,443នាក់ កើន22,064នាក់ធៀបនឹងម្សិលមិញ។ ចំនួនអ្នកស្លាប់ដោយសារវីរុសនេះក៏បានកើនដល់55,952នាក់ ក្នុងនោះមានករណីស្លាប់ថ្មីចំនួន1,142នាក់។

អេស្ប៉ាញ៖ អ្នកជំងឺថ្មី1,831នាក់ និងអ្នកស្លាប់ថ្មី331នាក់។ អ្នកជំងឺសរុប209,465នាក់ និងអ្នកស្លាប់សរុប23,521នាក់។

អ៊ីតាលី៖ អ្នកជំងឺថ្មី1,739នាក់ និងអ្នកស្លាប់ថ្មី333នាក់។ អ្នកជំងឺសរុប199,414នាក់ និងអ្នកស្លាប់សរុប26,977នាក់។

បារាំង៖ អ្នកជំងឺថ្មី3,742នាក់ និងអ្នកស្លាប់ថ្មី437នាក់។ អ្នកជំងឺសរុប165,842នាក់ និងអ្នកស្លាប់សរុប23,393នាក់។

អាល្លឺម៉ង់៖ អ្នកជំងឺថ្មី664នាក់ និងអ្នកស្លាប់ថ្មី85នាក់។ អ្នកជំងឺសរុប158,434នាក់ និងអ្នកស្លាប់សរុប6,061នាក់។

អង់គ្លេស៖ អ្នកជំងឺថ្មី4,309នាក់ និងអ្នកស្លាប់ថ្មី360នាក់។ អ្នកជំងឺសរុប157,144នាក់ និងអ្នកស្លាប់សរុប21,092នាក់។

រុស្ស៊ី៖ អ្នកជំងឺថ្មី6,198នាក់ និងអ្នកស្លាប់ថ្មី47នាក់។ អ្នកជំងឺសរុប87,147នាក់(អ្នកជំងឺសរុបនៅចិន 82,836នាក់) និងអ្នកស្លាប់សរុប794នាក់។

អ៊ីរ៉ង់៖ អ្នកស្លាប់ថ្មី96នាក់ និងងអ្នកស្លាប់សរុប5,806នាក់ ខណៈអ្នកជំងឺសរុប91,472នាក់។

អាស៊ីអាគ្នេយ៍៖ អ្នកជំងឺសរុប40,766នាក់ ក្នុងនោះមានអ្នកស្លាប់សរុប1,445នាក់។ សិង្ហបុរីគឺជាសម្បុកមេរោគធំជាងគេបង្អស់ដោយមានអ្នកជំងឺសរុប14,423នាក់ និងអ្នកស្លាប់12នាក់។ ឥណ្ឌូនេស៊ីជាប់លេខ2 ជាមួយនឹងអ្នកជំងឺសរុប9,096នាក់ និងអ្នកស្លាប់765នាក់ ខណៈហ្វីលីពីនគឺជាសម្បុកមេរោគធំជាងគេទី3ក្នុងតំបន់នេះ។

ទីម័រខាងកើត និងឡាវ បន្តជាទឹកដីដែលទទួលរងផលប៉ះពាល់តិចជាងគេនៅអាស៊ីអាគ្នេយ៍។ កម្ពុជា វៀតណាម ទីម័រខាងកើត និងឡាវ មិនទាន់មានករណីស្លាប់ដោយសារ COVID-19 នៅឡើយ៕

ប្រភព៖ សារព័ត៌មានបរទេស

April 28, 2020

មនុស្សជាង1លាននាក់ ដាក់ញត្តិស្នើឱ្យមេដឹកនាំ WHO លាលែងពីតំណែង

ញត្តិស្នើឱ្យប្រធានអង្គការសុខភាពពិភពលោក(WHO) លាលែងពីតំណែង ទទួលបានការចុះហត្ថលេខាពីមនុស្សជាង1លាននាក់ហើយ គិតមកដល់បច្ចុប្បន្ន។

ទីភ្នាក់ងារសារព័ត៌មាន Korea Times បានឱ្យដឹងថា ញត្តិប្រភេទអនឡាញមួយដែលត្រូវបានបង្ហោះនៅលើគេហទំព័រ Chang.org ដោយគណនីឈ្មោះ “Osuka Yip” ដែលបានចាប់ផ្ដើមធ្វើឡើងកាលពីថ្ងៃទី31មករា បានទាក់ទាញអ្នកគាំទ្រចូលមកចុះហត្ថលេខាជាង1លាននាក់ទៅហើយ គិតមកដល់ពេលនេះ។ ខ្លឹមសារនៃញត្តិនេះយល់ថា តួនាទីដឹកនាំគ្មានប្រសិទ្ធភាពរបស់ប្រធានអង្គការ WHO លោក Tedros Adhanom Ghebreyesus បាននាំឱ្យ COVID-19 ឆ្លងរាលដាលខ្លាំង។ ញត្តិនេះ ត្រូវបានគេបកប្រែជាច្រើនភាសា រួមមាន អង់គ្លេស បារាំង អេស្ប៉ាញ អាល្លឺម៉ង និងអារ៉ាប់។

ស្ថិតិពីសាកលវិទ្យាល័យ Johns Hopkins នៅសហរដ្ឋអាមេរិក បានប្រកាសថា គិតដល់ថ្ងៃនេះ ពិភពលោកបានរកឃើញអ្នកជំងឺCOVID-19 សរុបជាង985,000នាក់ ហើយចំនួនអ្នកស្លាប់ដោយសារវីរុសនេះក៏បានកើនដល់ជាង55,000នាក់។

ញត្តិខាងលើសរសេរថា លោក Tedros “មិនស័ក្ដិសម” ជាមួយនឹងតំណែងដឹកនាំ WHO នោះទេ និងបានស្នើឱ្យលោកលាលែងពីតំណែងជាបន្ទាន់។ ញត្តិនេះក៏បានរិះគន់ថា លោក Tedros មានប្រតិកម្មយ៉ាងយឺតយ៉ាវ នៅពេលដែល COVID-19 ផ្ទុះឆ្លងរាលដាល។

“យើងខ្ញុំពិតជាអស់សង្ឃឹម។ យើងខ្ញុំជឿថា WHO គួរតែផ្ដោតទៅលើនយោបាយ។ លោក Tedros ជឿទៅលើតួលេខនៃអ្នកស្លាប់ និងអ្នកឆ្លងវីរុស ដែលប្រទេសចិនបានរាយការណ៍ ដោយមិនបានធ្វើការស៊ើបអង្កេត” ខ្លឹមសារនៃញត្តិបានសរសេរច្បាស់បែបនេះ។

ប្រទេសមួយចំនួនក៏មិនយល់ស្របជាមួយនឹងវិធីដោះស្រាយវិបត្តិ COVID-19 របស់ប្រធានអង្គការ WHO ផងដែរ។ ប្រធានាធិបតីសហរដ្ឋអាមេរិក Donald Trump យល់ថា WHO មិនបានបំពេញភារកិច្ចជាមូលដ្ឋានរបស់ខ្លួន ហើយលោកក៏បានប្រកាសផ្អាកផ្ដល់ជំនួយដល់អង្គការនេះផងដែរ។

កាលពីដើមខែនេះ លោក Trump ក៏រិះគន់ WHO ថា “យកចិនជាធំ” និង “កាន់ជើងចិន” ខណៈដែលសហរដ្ឋអាមេរិកជាអ្នកឧបត្ថម្ភច្រើនជាងគេទៅឱ្យ WHO។ ប្រធានាធិបតីអាមេរិកាំង ថែមទាំងយល់ថា តួលេខនៃអ្នកស្លាប់ដោយសារ COVID-19 អាចនឹងមានតិចជាងអ្វីដែលបានកើតឡើង បើសិនជា WHO ចាប់ផ្ដើមធ្វើសកម្មភាពបានឆាប់រហ័ស និងលើកឡើងនូវការ “វិភាគត្រឹមត្រូ”។

ក្រៅពីសហរដ្ឋអាមេរិក ប្រទេសអូស្ត្រាលី កោះតៃវ៉ាន់ ឬកូរ៉េខាងត្បូងក៏បានរិះគន់ WHO ស្រដៀងទៅនឹងអាមេរិកាំងផងដែរ៕

ប្រភព៖ សារព័ត៌មានបរទេស

April 28, 2020

ជិត1លាននាក់បានឆ្លង COVID-19 នៅសហរដ្ឋអាមេរិក ខណៈអាជីវកម្មមួយចំនួនបានបើកដំណើរការឡើងវិញ

សហរដ្ឋអាមរិកបានរកឃើញអ្នកផ្ទុកវីរុសCOVID-19 ជាង985,000នាក់ ក្នុងនោះមានអ្នកជំងឺជិត56,000នាក់បានស្លាប់ ក្នុងពេលដែលរដ្ឋជាច្រើននៃប្រទេសនេះ កំពុងបន្ធូរបន្ថយការរឹតត្បិតលើការដើរហើរ។

យោងតាមស្ថិតិរបស់សាកលវិទ្យាល័យ Johns Hopkins សហរដ្ឋអាមេរិក បច្ចុប្បន្នបានរកឃើញអ្នកជំងឺCOVID-19 សរុប985,443នាក់ កើន22,064នាក់ធៀបនឹងម្សិលមិញ។ ចំនួនអ្នកស្លាប់ដោយសារវីរុសនេះក៏បានកើនដល់55,952នាក់ ក្នុងនោះមានករណីស្លាប់ថ្មីចំនួន1,142នាក់។

ករណីឆ្លង និងស្លាប់ដោយសារឆ្លងវីរុសកូរ៉ូណានៅសហរដ្ឋអាមេរិក បានថយចុះគួរឱ្យកត់សម្គាល់ បើធៀបនឹងតួលេខអ្នកជំងឺថ្មី43,409នាក់ និងអ្នកស្លាប់ថ្មី2,374នាក់កាលពីមួយថ្ងៃមុននេះ។ ប្រទេសនេះ នៅតែបន្តជាសម្បុកមេរោគ និងជា “វាលពិឃាត” របស់កូរ៉ូណា ធំជាងគេបង្អស់នៅទូទាំងពិភពលោក។

ប្រធានាធិបតី Donald Trump កាលពីម្សិលមិញបានឱ្យដឹងថា លោកសង្ឃឹមថា សាលារៀនជាច្រើននឹងបើកដំណើរការឡើងវិញនាពេលដ៏ខ្លីខាងមុខ។

New York ដែលជារដ្ឋទទួលរងគ្រោះធ្ងន់់ជាងគេបំផុត បានបង្ហាញការប្រុងប្រយ័ត្ន ខណៈដែលតួលេខនៃអ្នកជំងឺដែលត្រូវចូលព្យាបាលនៅមន្ទីរពេទ្យ នៅមានកម្រិតខ្ពស់នៅឡើយ។ អភិបាលរដ្ឋ លោក Andrew Cuomo កំពុងត្រៀមប្រកាសពន្យារសុពលភាពនៃការរឹតត្បិតលើការដើរហើរនៅក្នុងតំបន់ដែលទទួលឥទ្ធិពលធ្ងន់ពី COVID-19។ ក្រោយថ្ងៃទី15ឧសភា សក្មភាពផលិត និងសាងសង់ តាមគម្រោងនឹងចាប់ដំណើរការឡើងវិញ នៅក្នុងតំបន់ខ្លះដែលរងផលប៉ះពាល់តិចតួច។

New Jersey ដែលជារដ្ឋទទួលរងគ្រោះធ្ងន់លំដាប់ទី2 រួមនឹង California និង Washington DC បានសន្យារថា បន្តរក្សាវិធានការដែលបានដាក់ចេញ ដើម្បីទប់ទល់នឹង COVID-19។ ក៏ប៉ុន្តែ មនុស្សរាប់ពាន់នាក់បាននាំគ្នាទៅលម្ហែកាយនៅមាត់សមុទ្រ California កាលពីចុងសប្ដាហ៍កន្លងទៅ ដោយមិនអើពើដល់វិធានការរបស់រដ្ឋាភិបាល។

Alaska, Georgia, Oklahoma និងរដ្ឋមួយចំនួនទៀត ចាប់ផ្ដើមបើកដំណើរការហាងលក់រាយ ឆ្នេរសមុទ្រ និងឧទ្យាន មួយចំនួនឡើងវិញចាប់ពីថ្ងៃទី24មេសា។ រដ្ឋ Georgia និង Tennessee នឹងបើកភោជនីយដ្ឋានឡើងវិញផងដែរចាប់ពីថ្ងៃទី27មេសា បើទោះជាក្រុមអ្នកជំនាញផ្នែកសុខាភិបាលយល់ថា គួរតែបន្តរក្សាបម្រាមគោចរដើម្បីទប់ស្កាត់ COVID-19។

អភិបាលរដ្ឋ Texas លោក Greg Abbott ប្រកាសថា ហាងលក់រាយ ភោជនីយដ្ឋាន រោងកុន មជ្ឈមណ្ឌលពាណិជ្ជកម្ម សារមន្ទីរ និងបណ្ណាល័យ នឹងត្រូវបានអនុញ្ញាតឱ្យបើកឡើងវិញចាប់ពីថ្ងៃទី1ឧសភាក្នុងទំហំ25%។ Minnesota, Mississippi, Colorado និង South Carolina ក៏បានអនុញ្ញាតឱ្យបើកដំណើរការអាជីវកម្មមួយចំនួនហើយដែរ៕

ប្រភព៖ សារព័ត៌មានបរទេស

April 28, 2020

COVID-19! ប្រទេសថៃពន្យារសុពលភាពនៃការប្រកាសអាសន្នទូទាំងប្រទេស ដើម្បីបន្តទប់ស្កាត់វីរុសកូរ៉ូណា

រាជាណាចក្រថៃ នឹងអូសបន្លាយសុពលភាពនៃបទបញ្ជាដាក់ប្រទេសឱ្យស្ថិតក្នុងស្ថានភាពប្រកាសអាសន្នដើម្បីទប់ទល់នឹងវីរុសCOVID-19 រហូតដល់ចុងខែឧសភា បើទោះជាស្ថានភាពនៃរោគរាតត្បាតនេះបង្ហាញភាពវិជ្ជមានយ៉ាងណាក៏ដោយ។

អ្នកនាំពាក្យរបស់រាជរដ្ឋាភិបាលថៃ ថ្ងៃនេះប្រកាសថា ការប្រកាសអំពីស្ថានភាពអាសន្នដើម្បីប្រឆាំងនឹង COVID-19 ដែលត្រូវបានដាក់ចេញចាប់ពីថ្ងៃទី26មីនានោះ នឹងត្រូវបានពន្យារសុពលភាពដល់ចុងខែឧសភា។ ក៏ប៉ុន្តែ អ្នកនាំពាក្យរូបនេះបានឱ្យដឹងថា នឹងមានការបន្ធូរបន្ថយការរឹតត្បិតខ្លះចំពោះអាជីវកម្ម និងសកម្មភាពសាធារណៈមួយចំនួន ខណៈដែលករណីឆ្លងវីរុសថ្មីមានសញ្ញាថយចុះច្រើន។

ប្រទេសថៃ ក្នុងថ្ងៃនេះក៏បានរាយការណ៍ថា មានករណីឆ្លងវីរុស COVID-19ថ្មីចំនួន9នាក់បន្ថែមទៀត។ បច្ចុប្បន្ន ចំនួនអ្នកជំងឺសរុបនៅក្នុងប្រទេសនេះគឺ2,931នាក់ ក្នុងនោះមាន52នាក់បានស្លាប់ និង2,609នាក់បានជាសះស្បើយ៕

ប្រភព៖ សារព័ត៌មានបរទេស

April 27, 2020

ឥណ្ឌាថា វ៉ាក់សាំងទប់ទល់ COVID-19 នឹងបង្ហាញវត្តមាននៅខែឧសភាខាងមុខ

ឥណ្ឌាទើបតែបានប្រកាសអំពីគម្រោងផលិតវ៉ាក់សាំងទប់ស្កាត់ COVID-19 ដែលនឹងត្រូវចាប់ផ្ដើមផលិតក្នុងខែឧសភាខាងមុខ ជាមួយនឹងតម្លៃប្រមាណជា1,000រូពីក្នុង1អំពូល។

វិទ្យាស្ថាន Serum ដែលជាក្រុមហ៊ុនផលិតឱសថឥណ្ឌាមួយ មានទីស្នាក់ការកណ្ដាលនៅទីក្រុង Pune រដ្ឋ Maharashtra ទើបតែបានប្រកាសអំពីគម្រោងផលិតវ៉ាក់សាំងសម្រាប់ទប់ទល់នឹង COVID-19។ ពួកគេបានសន្យាថា វ៉ាក់សាំងនេះនឹងមានវត្តមាននៅក្នុងខែឧសភា។ វ៉ាក់សាំងនេះ ត្រូវបានគេឱ្យដឹងថា នឹងមានតម្លៃ 1,000រូពី (ប្រហែល13ដុល្លារអាមេរិក) ក្នុង1អំពូល(Ampoule)។ ការផលិតវ៉ាក់សាំងរបស់ក្រុមហ៊ុន Serum នេះ នឹងយោងទៅលើរូបមន្ត និងលទ្ធផលនៃការសាកល្បងថ្នាំព្យាបាល COVID-19 នៅលើមនុស្ស ដែលសាកលវិទ្យាល័យ Oxford (អង់គ្លេស) បានធ្វើឡើងកាលពីថ្ងៃទី23មេសាកន្លងទៅ។

នាយកប្រតិបត្តិរបស់វិទ្យាស្ថាន Serum លោក Adar Poonawalla ថ្លែងថា “យើងសង្ឃឹមថា នឹងអាចសាកល្បងវ៉ាក់សាំងនេះនៅឥណ្ឌាក្នុងខែឧសភា នៅលើមនុស្សប្រហែល100នាក់។ ក្រោយមកនឹងត្រូវផលិតជាផ្លូវការចាប់ពីខែកញ្ញា ឬខែតុលា បើសិនការពិសោធទទួលបានជោគជ័យ។

ក្រុមហ៊ុនឥណ្ឌាបានឱ្យដឹងថា នឹងមិនរង់ចាំដល់ខែកញ្ញា ជាពេលដែលអង់គ្លេសប្រកាសលទ្ធផលនៃការសាកល្បងវ៉ាក់សាំងនេះជាផ្លូវការនោះទេ តែឥណ្ឌានឹងរៀបគម្រោងជាមុនដើម្បីអាចផលិតថ្នាំនេះបានឆាប់ និងក្នុងបរិមាណច្រើន។ ក្នុងខែដំបូងនៃការផលិត វិទ្យាស្ថាន Serum គ្រោងនឹងផលិតបាន10លានអំពូលក្នុង1ខែ ហើយបន្ទាប់មកនឹងបង្កើនបរិមាណពី20-40អំពូលនៅខែតុលា។ Serum គឺជាក្រុមហ៊ុនធំមួយនៅឥណ្ឌា ដែលមានជំនាញខាងអភិវឌ្ឍន៍ និងផលិតវ៉ាក់សាំងនៅឥណ្ឌា៕

ប្រភព៖ សារព័ត៌មានបរទេស

April 27, 2020

អាណាព្យាបាលគួរចែករំលែកក្តីស្រឡាញ់ និងក្តីមេត្តាដល់កូនដើម្បីសម្រួលភាពតានតឹងដែលគ្រប់គ្នាត្រូវទប់ស្កាត់ Covid-19

ក្នុងដំណាក់កាលដែលកម្ពុជាត្រូវទប់ស្កាត់ការរីករាលដាលនៃមេរោគ Covid-19 នេះ សាលាទាំងអស់នៅទូទាំងប្រទេសត្រូវដាក់ឱ្យវិសមកាលមុនកាលកំណត់ ដែលធ្វើឱ្យសិស្សានុសិស្សត្រូវសិក្សាពីចម្ងាយនៅក្នុងផ្ទះ និងមានពេលទំនេរច្រើន។ ក្នុងពេលនេះក៏ជាពេលវេលាមួយដែលធ្វើឱ្យកុមារមានភាពតានតឹង និងត្រូវការការយកចិត្តទុកដាក់កាន់តែខ្លាំង។

ពាក់ព័ន្ធនឹងបញ្ហានេះ គណៈកម្មការជាតិគាំពារ អភិវឌ្ឍកុមារតូច នៃក្រសួងអប់រំ យុវជន និងកីឡា សហការជាមួយនឹងដៃគូអភិវឌ្ឍនានាដូចជា USAID និង UNICEF ជាដើមបង្កើតផ្ទាំងអប់រំមួយសម្រាប់អាណាព្យាបាលដោយជំរុញឱ្យគ្រប់ឪពុកម្តាយ ចែករំលែកក្តីស្រឡាញ់ និងក្តីមេត្តាដល់កូនៗមិនមែនបង្កើនភាពភ័យខ្លាចនោះទេ។

នៅក្នុងផ្ទាំងផ្សព្វផ្សាយនោះ ស្ថាប័នខាងលើបានបញ្ជាក់ថា ដើម្បីសម្រួលភាពតានតឹងដល់កូនៗក្នុងដំណាក់កាលនៃការរាតត្បាតនៃជំងឺ Covid-19 នេះ អាណាព្យាបាលគួរតាមដានអារម្មណ៍ និងសួរសុខទុក្ខកូន ព្រមទាំងនិយាយពាក្យល្អៗឱ្យកូនស្តាប់ដោយយកចិត្តទុកដាក់។ បន្ថែមពីលើនេះអាណាព្យាបាលចាំបាច់ត្រូវតាមដានឱ្យបានដិតដល់ក្រែងកូនមានអារម្មណ៍ថាភ័យខ្លាច ឬត្រូវគេរើសអើងជាដើម។

លើសពីនេះទៅទៀត អាណាព្យាបាលគួរជួយកុមារឱ្យរៀនសូត្រ និងធានាថាពួកគេមានកន្លែងសម្រាប់រៀនសូត្រនៅផ្ទះ និងជួយរក្សាទម្លាប់ពួកគេក្នុងការលេង រៀន ញ៉ាំ និងសម្រាកប្រចាំថ្ងៃ ទោះជាសាលាត្រូវបិទក៏ដោយ។ អាណាព្យាបាលក៏គួរតែស្មោះត្រង់ជាមួយកូន និងពន្យល់ពួកគេពីអ្វីៗដែលកំពុងកើតឡើងដោយប្រើប្រាស់ភាសាសមរម្យ និងបង្រៀនពួកគេឱ្យចេះការពារខ្លួនពីការឆ្លងជំងឺ Covid-19។

ចំណុចសំខាន់ចុងក្រោយគឺអាណាព្យាបាល គួរលេង ច្រៀង អានសៀវភៅ និងគូរគំនូរជាមួយពួកគេ ព្រោះវាមានសារៈសំខាន់ខ្លាំងណាស់សម្រាប់កុមារក្នុងការបន្តលេង កម្សាន្ត និងរីករាយក្នុងវ័យកុមារភាពទោះស្ថិតក្នុងស្ថានភាពលំបាកក៏ដោយ។ អាណាព្យាបាលត្រូវធ្វើឱ្យកុមារមានអារម្មណ៍សុវត្ថិភាព និងគ្មានអារម្មណ៍ភ័យខ្លាច៕

April 27, 2020

ទាហានរុស្ស៊ី ជិត900នាក់ បានឆ្លងវីរុសCOVID-19

របាយការណ៍ដំបូងពីទីក្រុងម៉ូស្គូ ស្ដីអំពីស្ថានភាព COVID-19 ក្នុងជួរកងទ័ពរុស្ស៊ី បានឱ្យដឹងថា ទាហានចំនួន874នាក់នៃប្រទេសនេះ បានឆ្លងវីរុសបង្កជំងឺរលាកសួតប្រភេទ ក្នុងនោះមានទាហាន4នាក់កំពុងស្ថិតក្នុងសភាពធ្ងន់ធ្ងរ។

“ការធ្វើតេស្តរកមេរោគក្នុងជួរកងទ័ពរស្ស៊ី រាប់ចាប់ពីខែមីនា ដល់ថ្ងៃទី26មេសា បានបង្ហាញថា ទាហានចំនួន874នាក់ មានលទ្ធផលវិជ្ជមានជាមួយនឹង COVID-19។ ក្នុងចំណោមនេះ មាន314នាក់កំពុងទទួលការព្យាបាលនៅក្នុងមន្ទីរពេទ្យរបស់ក្រសួងការពារជាតិ 175នាក់ទទួលការព្យាបាលនៅក្នុងបន្ទាយ 6នាក់ព្យាបាលនៅមន្ត្រីពេទ្យសាធារណៈ និង379នាក់ទៀតកំពុងបង្ខាំងខ្លួនក្នុងផ្ទះ” នេះបើតាមក្រសួងការពារជាតិរុស្ស៊ី ប្រកាសកាលពីម្សិលមិញ។

កងទ័ពរុស្ស៊ីបានឱ្យដឹងបន្ថែមថា ទាហាន4នាក់មានអាការធ្ងន់ធ្ងរបន្ទាប់ពីបានឆ្លងវីរុសCOVID-19 ក្នុងនោះមានអ្នកជំងឺម្នាក់ត្រូវបំពាក់ម៉ាស៊ីនជំនួយដង្ហើម។ 15នាក់ស្ថិតក្នុងស្ថានភាពមធ្យម ក្រៅពីនេះគឺពុំទាន់មានរោគសញ្ញានៅឡើយ។ ជាងនេះ កងទ័ពរុស្ស៊ីក៏បានរកឃើញបុគ្គលិកផ្នែកស៊ីវិលរបស់ខ្លួនចំនួន245នាក់ និងសិក្ខាកាម779នាក់នៅតាមបណ្ដាសាលាយោធា ក៏មានផ្ទុកវីរុសនេះ ប៉ុន្តែភាគច្រើនពុំទាន់មានរោគសញ្ញា។

របាយការណ៍បានសរសេរថា “ទាហានទាំងអស់ត្រូវបានពិនិត្យសុខភាពរៀងរាល់ថ្ងៃ។ យានយន្តទាំងអស់របស់កងទ័ព ក៏ត្រូវបានបាញ់ថ្នាំសម្លាប់មេរោគយ៉ាងទៀតទាត់ផងដែរ”។

កងទ័ពរុស្ស៊ី កាលពីសប្ដាហ៍មុនបានប្រកាសថា ទាហានរបស់ខ្លួនរាប់ពាន់នាក់ ដែលប្រមូលផ្ដុំគ្នាដើម្បីធ្វើការហ្វឹកហាត់សម្រាប់ពិធីព្យុហយាត្រារំឭកពីជ័យជម្នះនៅទីក្រុងម៉ូស្គូ ត្រូវបង្ខំឱ្យនៅដាច់ដោយឡែករយៈពេល2សប្ដាហ៍ បន្ទាប់ពីត្រឡប់មកកាន់អង្គភាព ដើម្បីទប់ស្កាត់ការឆ្លងវីរុសCOVID-19។ ប៉ុន្តែ កងទ័ពរុស្ស៊ីមិនបានបញ្ជាក់ថា នេះជាវិធានការដើម្បីទប់ស្កាត់ជាមុន ឬមួយមានករណីឆ្លងមេរោគរួចហើយនោះទេ។

COVID-19 បានបង្ហាញខ្លួននៅក្នុងប្រទេស និងដែនដីចំនួន210 ក្នុងពិភពលោក បណ្ដាលឱ្យមនុស្សជិត3លាននាក់បានឆ្លងមេរោគ និងជាង206,000នាក់បានបាត់បង់ជីវិត។ កាលពីម្សិលមិញ រុស្ស៊ីបានរាយការណ៍ថា ប្រទេសនេះ មានអ្នកជំងឺ80,949នាក់បានឆ្លងវីរុស ក្នុងនោះមាន747នាក់បានស្លាប់ និង6,767នាក់បានជាសះស្បើយ។ រដ្ឋាភិបាលប្រទេសនេះបានធ្វើតេស្តរកមេរោគCOVID-19 សរុបជាង2.8លាននាក់នៅទូទាំងប្រទេស៕

ប្រភព៖ សារព័ត៌មានបរទេស

April 27, 2020

ក្រសួងសុខាភិបាលថា កម្ពុជានៅសល់អ្នកជំងឺ COVID-19 តែ3នាក់ទៀតប៉ុណ្ណោះ

រដ្ឋមន្ត្រីក្រសួងសុខាភិបាល ព្រឹកនេះបានប្រកាសថា អ្នកជំងឺCOVID-19 បានជាសះស្បើយ2នាក់បន្ថែមទៀត ដូច្នេះ កម្ពុជានៅសល់អ្នកជំងឺរលាកសួតប្រភេទថ្មី តែ3នាក់ទៀតតែប៉ុណ្ណោះ។

អ្នកជំងឺ2នាក់ដែលបានជាសះស្បើយនេះ គឺជាប្តីប្រពន្ធជនជាតិបារាំង ស្នាក់នៅក្នុងសង្កាត់ទួលទំពូង រាជធានីភ្នំពេញ។ គិតមកដល់ថ្ងៃនេះ ចំនួនអ្នកដែលបានជាសះស្បើយពីជំងឺ COVID-19 សរុបឡើងដល់119នាក់ ដូច្នេះ បច្ចុប្បន្នកម្ពុជានៅសល់អ្នកជំងឺរលាកសួតប្រភេទថ្មី 3នាក់ទៀត ដែលកំពុងទទួលការព្យាបាលនៅមន្ទីរពេទ្យ ក្នុងនោះស្ត្រី1នាក់ និងបុរស2នាក់។ នេះបើតាមរដ្ឋមន្ត្រីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង។

រាប់ចាប់ពីវីរុសកូរ៉ូណាប្រភេទថ្មី បង្ហាញខ្លួននៅកម្ពុជា មកទល់នឹងថ្ងៃទី27មេសានេះ កម្ពុជាបានធ្វើតេស្តរកឃើញអ្នកផ្ទុក COVID-19 សរុប 122នាក់ ប៉ុន្តែ បើតាមក្រសួងសុខាភិបាល កម្ពុជាមិនទាន់មានករណីស្លាប់ដោយសារវីរុសនេះនៅឡើយ។ កម្ពុជាក៏មិនបានរកឃើញអ្នកជំងឺ COVID-19 ថ្មីបន្ថែមទៀតនោះទេ ក្នុងអំឡុងកន្លះខែមកនេះ៕

April 27, 2020

COVID-19! 5ប្រទេសដែលមានអ្នកស្លាប់ច្រើនជាង20,000នាក់ ខណៈពិភពលោកទាំងមូលមានអ្នកជំងឺជិត3លាននាក់

ពិភពលោកទាំងមូល មានអ្នកជំងឺសរុបជិត3លាននាក់ ក្នុងនោះមានជាង206,000នាក់បានបាត់បង់ជីវិត ខណៈអ្នកជំងឺបានជាសះស្បើយមានចំនួន 878,700នាក់។

យោងតាមស្ថិតិរបស់សាកលវិទ្យាល័យ Johns Hopkins បណ្ដាប្រទេស និងដែនដីចំនួន210 ក្នុងពិភពលោក មានអ្នកស្លាប់ចំនួន 206,265នាក់ ក្នុងចំណោមអ្នកជំងឺ COVID-19 សរុប2,965,363នាក់។ អ្នកជំងឺបានជាសះស្បើយមានចំនួន 863,464នាក់។ ថ្ងៃនេះ ពិភពលោក អ្នកជំងឺថ្មីមានចំនួន 77,469នាក់ និងអ្នកស្លាប់ថ្មីមានចំនួន3,897នាក់។

សហរដ្ឋអាមេរិកបន្តជាសម្បុកមេរោគ និងជា “វាលពិឃាត” ធំជាងគេក្នុងពិភពលោក ដោយមានអ្នកជំងឺសរុប 963,379នាក់ ក្នុងនោះមានអ្នកស្លាប់ 54,810នាក់។ អ្នកជំងឺកើនមានចំនួន 29,446នាក់ និងអ្នកស្លាប់ថ្មីកើន1,361នាក់។

អេស្ប៉ាញ មានអ្នកជំងឹថ្មី2,870នាក់ អ្នកស្លាប់ថ្មីមាន288នាក់។ អ្នកជំងឺសរុបមាន226,629នាក់ និងអ្នកស្លាប់សរុប23,190នាក់។ ប្រទេសនេះគឺជា “វាលពិឃាត” របស់ COVID-19 (អ្នកស្លាប់ដោយសារ COVID-19) ធំជាងគេទី2ក្នុងពិភពលោក។

អ៊ីតាលី៖ អ្នកជំងឺថ្មី2,324នាក់ អ្នកស្លាប់ថ្មី260នាក់។ អ្នកជំងឺសរុប197,675នាក់ និងអ្នកស្លាប់សរុប26,644នាក់។

បារាំង៖ អ្នកជំងឺថ្មី612នាក់ អ្នកស្លាប់ថ្មី242នាក់។ អ្នកជំងឺសរុប162,100នាក់ និងអ្នកស្លាប់សរុបមាន22,856នាក់។

អង់គ្លេស៖ អ្នកជំងឺថ្មី4,463នាក់ អ្នកស្លាប់ថ្មី413នាក់ ក្នុងចំណោមអ្នកជំងឺសរុប152,840នាក់ និងអ្នកស្លាប់សរុប20,732នាក់៕

ប្រភព៖ សារព័ត៌មានបរទេស

April 27, 2020

ជាង2,887,000នាក់ឆ្លងវីរុសCOVID-19 នៅទូទាំងពិភពលោក៖ 7ប្រទេសដែលមានអ្នកជំងឺច្រើនជាង100,000នាក់

ពិភពលោកទាំងមូលមានអ្នកស្លាប់ជាង200,000នាក់ ដោយសារឆ្លងវីរុសCOVID-19 នៅក្នុងចំណោមអ្នកជំងឺជិត2.9លាននាក់ ដែលភាគច្រើនកើតឡើងនៅអឺរ៉ុប និងសហរដ្ឋអាមេរិក។

ទិន្នន័យពីសាកលវិទ្យាល័យ Johns Hopkins បានឱ្យដឹងថា នៅក្នុងបណ្ដាប្រទេស និងដែនដីចំនួន210 បានរកឃើញអ្នកឆ្លងវីរុសCOVID-19 ចំនួន2,887,894នាក់ ក្នុងនោះមាន202,368នាក់បានបាត់បង់ជីវិត។ អ្នកជំងឺថ្មីកើនបន្ថែម 96,908នាក់ និងអ្នកស្លាប់ថ្មីកើន 6,448នាក់ បើធៀបនឹងម្សិលមិញ ខណៈអ្នកជំងឺដែលបានជាសះស្បើយមានចំនួន 814,025នាក់។

សហរដ្ឋអាមេរិកនៅតែជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប 933,933នាក់ និងអ្នកស្លាប់53,449នាក់។ អ្នកជំងឺថ្មីកើន43,409នាក់ ខណៈអ្នកស្លាប់ថ្មីកើន2,432នាក់ ធៀបនឹងមួយថ្ងៃមុននេះ។

អេស្ប៉ាញ៖ អ្នកជំងឺថ្មី3,995នាក់ អ្នកស្លាប់ថ្មី378នាក់។ អ្នកជំងឺសរុបជិត224,000នាក់ និងអ្នកស្លាប់សរុបជិត23,000នាក់។ ប្រទេសនេះជាសម្បុកមេរោគធំជាងគេលំដាប់ទី2ក្នុងពិភពលោក និងជា “វាលពិឃាត” របស់កូរ៉ូណា ធំជាងគេទី3 បន្ទាប់ពីសហរដ្ឋអាមេរិក និងអ៊ីតាលី។

អ៊ីតាលី៖ អ្នកជំងឺថ្មី2,357នាក់ និងអ្នកស្លាប់ថ្មី415នាក់។ អ្នកជំងឺសរុប195,351នាក់ និងអ្នកស្លាប់សរុប26,284នាក់។ តួលេខនៃការស្លាប់បានថយចុះទាបបំផុត រាប់ចាប់ពីថ្ងៃទី19មីនា។

បារាំង៖ អ្នកជំងឺថ្មី1,660នាក់ និងអ្នកស្លាប់ថ្មី369នាក់។ អ្នកជំងឺសរុប161,488នាក់ និងអ្នកស្លាប់សរុប22,614នាក់។ ប្រទេសនេះ នឹងអនុញ្ញាតឱ្យបើកសាលារៀនឡើងវិញ ក្រោយថ្ងៃទី11ឧសភា។

អាល្លឺម៉ង់៖ អ្នកជំងឺថ្មី1,419នាក់ អ្នកស្លាប់ថ្មី133នាក់។ អ្នកជំងឺសរុប156,418នាក់ និងអ្នកស្លាប់សរុប5,873នាក់។

អង់គ្លេស៖ អ្នកជំងឺថ្មី4,913នាក់ ខណៈអ្នកស្លាប់ថ្មីមាន8113នាក់។ អ្នកជំងឺសរុប148,377នាក់ និងអ្នកស្លាប់សរុប20,319នាក់។ អ្នកស្លាប់ដោយសារ COVID-19 ក្នុងប្រទេសនេះ មិនបានរាប់បញ្ចូលអ្នកស្លាប់នៅក្រៅមន្ទីរពេទ្យនោះទេ។

ប្រទេសទួរគី៖ អ្នកជំងឺសរុបមាន107,773នាក់ អ្នកស្លាប់សរុបមាន2,706នាក់ និងអ្នកដែលបានជាសះស្បើយមានចមនួន25,582នាក់៕

ប្រភព៖ សារព័ត៌មានបរទេស

April 26, 2020

Category: សុខភាព