សុខភាព - La Reine Media

វេជ្ជបណ្ឌិតរុស្ស៊ី3រូប ធ្លាក់ពីលើអគារមន្ទីរពេទ្យ ខណៈប្រទេសកំពុងទប់ទល់នឹងCOVID-19

វេជ្ជបណ្ឌិតនៅជួរមុខរបស់រុស្ស៊ីចំនួន3រូបហើយដែលបានធ្លាក់ពីលើអគារនៃមន្ទីរប្រកបដោយអាថ៌កំបាំង នៅក្នុងអំឡុង2សប្ដាហ៍កន្លងមកនេះ ធ្វើឱ្យមានការព្រួយបារម្ភអំពីស្ថានភាពការងាររបស់ក្រុមវេជ្ជបណ្ឌិតនៅទីនេះ ខណៈដែលវីរុសCOVID-19 កាន់តែបង្ហាញអំណាចនៅរុស្ស៊ី។

សារព័ត៌មាន CNN និង Moscow Times កាលពីម្សិលមិញបានរាយការណ៍ថា Alexader Shulepov អាយុ37ឆ្នាំ ជាវេជ្ជបណ្ឌិតផ្នែកសង្គ្រោះបន្ទាន់របស់មន្ទីរពេទ្យ Novousmanskaya ក្នុងទីក្រុង Voronezh នៃប្រទេសរុស្ស៊ី កំពុងស្ថិតក្នុងស្ថានភាពអាសន្ន បន្ទាប់ពីបានធ្លាក់ពីលើអគារ។ សមត្ថកិច្ចនៅកន្លែងកើតហេតុបានឱ្យដឹងថា វេជ្ជបណ្ឌិត Shulepov បានធ្លាក់ពីបង្អួចនៃអគារកម្ពស់2ជាន់របស់មន្ទីរពេទ្យកាលពីថ្ងៃទី2ឧសភា។

វេជ្ជបណ្ឌិត Shulepov ត្រូវចូលសម្រាក និងទទួលការព្យាបាលនៅមន្ទីរពេទ្យ ដោយសារគាត់បានឆ្លងវីរុសCOVID-19 កាលពីថ្ងៃទី22មេសា ប៉ុន្តែ ថ្ងៃដដែលនេះ Shulepov និងមិត្តរួមការងាររបស់គាត់គឺ Alexander Kosyakin បានបង្ហោះវីដេអូមួយដែលនិយាយថា គាត់ត្រូវបានបង្ខំឱ្យធ្វើការបន្ត បើទោះជាបានឆ្លងវីរុសកូរ៉ូណានេះក៏ដោយ។ កន្លងមក Kosyakin បានរិះគន់ខាងមន្ទីរពេទ្យដោយសារតែមិនមានសម្ភារ និងឈុតការពារឆ្លងមេរោគគ្រប់គ្រាន់សម្រាប់បុគ្គលិកសុខាភិបាល។ វេជ្ជបណ្ឌិត Kosyakin ក៏ធ្លាប់ត្រូវបាននគរបាលហៅទៅសួរនាំ ដោយមានការចោទប្រកាន់ថា បានបញ្ចេញព័ត៌មានមិនពិត។ 3ថ្ងៃក្រោយមក Shulepov ក៏បានដកវីដេអូដែលគាត់ធ្លាប់បានរិះគន់ខាងមន្ទីរពេទ្យ ហើយបញ្ជាក់ថាក្នុងវីដេអូនោះ គាត់ត្រូវបាន “អារម្មណ៍ដឹកមុខ”។

ភាគីខាងមន្ទីរពេទ្យ Novousmanskaya បានអះអាងថា វេជ្ជបណ្ឌិត Shulepov ត្រូវបានអនុញ្ញាតឱ្យឈប់សម្រាកបន្ទាប់ពីបានឆ្លងវីរុសកូរ៉ូណា និងត្រូវបានបញ្ជូនទៅព្យាបាលក្នុងអាគារឯកទេសជំងឺឆ្លងរបស់មន្ទីរពេទ្យនេះ។

Shulepov គឺជាវេជ្ជបណ្ឌិតទីបីហើយដែលបានធ្លាក់ពីលើអគារមន្ទីរពេទ្យយ៉ាងអាថ៌កំបាំងនៅប្រទេសរុស្ស៊ី។ វេជ្ជបណ្ឌិត2រូបដែលបានធ្លាក់ពីអាគារមុនករណីខាងលើ បានបាត់បង់ជីវិត។ ក្រុមមន្ត្រីមានសមត្ថកិច្ចកំពុងស៊ើបអង្កេតរកមូលហេតុដែលនាំឱ្យមានហេតុការណ៍ធ្លាក់ពីលើអគារទាំង3ករណីនេះ ក្នុងពេលដែលរុស្ស៊ីកំពុងប្រមូលកម្លាំងដើម្បីទប់ទល់នឹងវីរុសCOVID-19។

កាលពីថ្ងៃទី1ឧសភា Elena Nepomnyashchaya ដែលជាវេជ្ជបណ្ឌិតម្នាក់ធ្វើការនៅមន្ទីរពេទ្យ Krasnoyarsk ក្នុងតំបន់ Siberia បានបាត់បង់ជីវិត ក្រោយទទួលការព្យាបាលអស់រយៈពេល1សប្ដាហ៍។ សារព័ត៌មានក្នុងស្រុកបានឱ្យដឹងថា វេជ្ជបណ្ឌិតរូបនេះ បានធ្លាក់ពីលើអគាររបស់មន្ទីរពេទ្យ។

ថ្ងៃទី24មេសា Natalya Lebedeva ប្រធានក្រុមសង្គ្រោះបន្ទាន់នៃវិទ្យាស្ថានអនាម័យនិងមេរោគលេខ2 ក្នុងតំបន់ Star City ក៏បានបាត់បង់ជីវិតក្នុងមន្ទីរពេទ្យ បន្ទាប់ពីបានធ្លាក់ពីលើអគារខ្ពស់របស់មន្ទីរពេទ្យ។

ហេតុការណ៍ខាងលើនេះ បានកើតឡើងក្នុងគ្រាដែលប្រទេសរុស្ស៊ីកំពុងប្រឈមនឹងការរាតត្បាតយ៉ាងខ្លាំងក្លាពីវីរុសCOVID-19។ មជ្ឈមណ្ឌលទប់ទល់នឹងវិបត្តិវីរុសកូរ៉ូណារបស់រុស្ស៊ី កាលពីថ្ងៃទី4ឧសភា បានឱ្យដឹងថា ចំនួនអ្នកជំងឺកូរ៉ូណាសរុបក្នុងប្រទេសនេះបានឡើងដល់ជាង145,000នាក់ ក្នុងនោះមានជិត1,400នាក់បានស្លាប់។ បច្ចុប្បន្ន រុស្ស៊ីឈរលំដាប់លេខ7 នៅក្នុងចំណោមបណ្ដាប្រទេសដែលមានអ្នកជំងឺកូរ៉ូណាច្រើនជាងគេក្នុងពិភពលោក៕

ប្រភព៖ សារព័ត៌មានបរទេស

May 5, 2020

ជិត252,000នាក់បានស្លាប់ដោយសារCOVID-19នៅទូទាំងពិភពលោក ខណៈប្រទេសចំនួន4 មានអ្នកស្លាប់លើសពី20,000នាក់

គិតមកដល់បច្ចុប្បន្ន វីរុសCOVID-19 បានសម្លាប់មនុស្សជិត252,000នាក់ក្នុងចំណោមអ្នកជំងឺកូរ៉ូណាសុរបជាង3.6លាននាក់នៅក្នុងពិភពលោកទាំងមូល ខណៈដែលប្រទេសជាច្រើនបានបន្ធូរបន្ថយបម្រាមគោចរ។

នៅក្នុងប្រទេស និងដែនដីចំនួន212 ក្នុងពិភពលោក គិតត្រឹមព្រឹកនេះ មានអ្នកជំងឺកូរ៉ូណាសរុប 3,639,616នាក់ និងអ្នកស្លាប់ក៏បានឡើងដល់251,721នាក់។ អ្នកជំងឺថ្មីថ្ងៃនេះ មាន74,729នាក់ និងអ្នកស្លាប់ថ្មីមាន3,637នាក់។ អ្នកដែលបានជាសះស្បើយសុរប 1,192,842នាក់។ នេះបើតាមស្ថិតិរបស់ Worldometer។

ទ្វីបអឺរ៉ុបមានអ្នកជំងឺសរុប1,469,891នាក់ ខណៈអាមេរិកខាងជើងមាន1,318,547នាក់ អាស៊ីមាន572,839នាក់ អាមេរិកខាងត្បូងមាន223,852នាក់ និងទ្វីបអាហ្វ្រិកមាន47,804នាក់។

សហរដ្ឋអាមេរិកគឺជាសម្បុកមេរោគធំជាងគេក្នុងពិភពលោក ដោយមានអ្នកជំងឺសរុប 1,210,356នាក់ កើន23,321នាក់បើធៀបនឹងមុននេះមួយថ្ងៃ។ អ្នកស្លាប់ថ្មីនៅប្រទេសនេះមាន935នាក់ ធ្វើឱ្យតួលេខអ្នកស្លាប់សរុបកើនដល់64,494នាក់។

ក្រៅពីសហរដ្ឋអាមេរិកក៏មានប្រទេសចំនួន4ផ្សេងទៀតដែលមានអ្នកស្លាប់លើសពី20,000នាក់ រួមមាន៖

អេស្ប៉ាញ៖ អ្នកជំងឺសរុប248,301នាក់ និងអ្នកស្លាប់សរុប25,428នាក់។
អ៊ីតាលី៖ អ្នកជំងឺសរុប211,938នាក់ និងអ្នកស្លាប់សរុប29,079នាក់។
អង់គ្លេស៖ អ្នកជំងឺសរុប190,584នាក់ និងអ្នកស្លាប់សរុប28,734នាក់។
បារាំង៖ អ្នកជំងឺសរុប169,462នាក់ និងអ្នកស្លាប់សរុប25,201នាក់។

ប្រភព៖ សារព័ត៌មានបរទេស

May 5, 2020

អ្នកស្លាប់ដោយសារវីរុសCOVID-19នៅសហរដ្ឋអាមេរិកនឹងកើនដល់134,000នាក់នៅចុងខែសីហា ខណៈបច្ចុប្បន្នបានកើនដល់ជិត70,000នាក់ហើយ

New York Times ដកស្រង់ឯកសារសម្ងាត់មួយឱ្យដឹងថា រដ្ឋាភិបាលសហរដ្ឋអាមេរិកបានព្យាករថា តួលេខនៃអ្នកស្លាប់ដោយសារវីរុសCOVID-19 នៅប្រទេសនេះអាចកើនឡើងមកវិញនៅក្នុងខែឧសភានេះ។

យោងតាមទិន្នន័យពីទំព័រ Worldomerter គិតត្រឹមរសៀលថ្ងៃទី4ឧសភា(ម៉ោងនៅអាមេរិក) ចំនួនអ្នកស្លាប់ដោយសារកូរ៉ូណានៅសហរដ្ឋអាមេរិក គឺមាន69,589នាក់ កើន992នាក់បើធៀបនឹងមុននេះមួយថ្ងៃ។ សហរដ្ឋអាមេរិកក៏បានរកឃើញអ្នកជំងឺថ្មីជាង23,000នាក់ ដែលនាំឱ្យតួលេខនៃអ្នកជំងឺសរុបបានកើនលើសពី1.2លាននាក់។

ទីភ្នាក់ងារសារព័ត៌មាន New York Times កាលពីថ្ងៃទី4ឧសភា បានដកស្រង់ប្រភពព័ត៌មានសម្ងាត់មួយឱ្យដឹងថា រដ្ឋាភិបាលរបស់លោក Trump បានព្យាករថា តួលេខនៃអ្នកជំងឺ និងអ្នកស្លាប់នៅក្នុងប្រទេសនេះនឹងកើនខ្លាំងឡើងវិញនៅក្នុងខែឧសភានេះ។ ឯកសារសម្ងាត់សរសេរថា នៅចុងខែឧសភា COVID-19 នឹងសម្លាប់មនុស្សប្រហែលជា3,000នាក់នៅ1ថ្ងៃៗនៅសហរដ្ឋអាមេរិក ដែលនេះជាតួលេខខ្ពស់បំផុតបើធៀបនឹងចំនួនអ្នកស្លាប់ជាមធ្យមជិត1,800នាក់ក្នុង1ថ្ងៃ នាបច្ចុប្បន្ន។

យោងតាមការព្យាករខាងលើ ជារៀងរាល់ថ្ងៃ សហរដ្ឋអាមេរិកអាចរកឃើញអ្នកជំងឺថ្មីក្នុង1ថ្ងៃប្រហែល200,000នាក់ ខណៈតួលេខមធ្យមនាបច្ចុប្បន្នគឺ 25,000នាក់/ថ្ងៃ។

ការព្យាករនេះត្រូវបានគេជឿថា បានធ្វើឡើងដោយយោងទៅលើការវិភាគរបស់មជ្ឈមណ្ឌលគ្រប់គ្រង និងទប់ស្កាត់ជំងឺនៃសហរដ្ឋអាមេរិក CDC (Centers for Disease Control and Prevention)។ ទាក់ទិននឹងបញ្ហានេះ អ្នកនាំពាក្យរបស់សេតវិមាន លោក Judd Deere បានថ្លែងថា “នេះមិនមែនជាឯកសារដែលប្រកាសនៅក្នុងសេតវិមានទេ ហើយក៏មិនបានដាក់ជូនគណកម្មធិការប្រយុទ្ធប្រឆាំងនឹង COVID-19 ព្រមទាំងមិនទាន់មានការត្រួតពិនិត្យដោយអន្តរក្រសួងនោះដែរ”។

កាលពីចុងសប្ដាហ៍មុន ប្រធានាធិបតី Donald Trump បានព្យាករថា ចំនួនអ្នកស្លាប់ដោយសារ COVID-19 នៅសហរដ្ឋអាមេរិក អាចឡើងដល់100,000នាក់ ខ្ពស់ជាងការព្យាករដែលលោកបានលើកឡើងកន្លងមកដែលថា អ្នកស្លាប់នឹងមានចំនួនពី60,000ទៅ70,000នាក់។ លោក Trump ថ្លែងប្រាប់សារព័ត៌មាន Fox News កាលពីថ្ងៃទី3ឧសភាថា “យើងនឹងបាត់បង់មនុស្សប្រមាណពី80,000-100,000នាក់។ នោះគឺជារឿងដ៏អាក្រក់ខ្លាំងណាស់”។

ចំណែក CNN វិញ ក៏បានដកស្រង់ប្រភពព័ត៌មានពីវិទ្យាស្ថានវាស់វែង និងវាយតម្លៃសុខភាព IHME (Institute for Health Metrics and Evaluation) នៃសាកលវិទ្យាល័យ Washington បានព្យាករថា តួលេខអ្នកស្លាប់ដោយសារវីរុសកូរ៉ូណានៅសហរដ្ឋអាមេរិក អាចឡើងដល់134,000នាក់ គិតត្រឹមដើមខែសីហា៕

ប្រភព៖ សារព័ត៌មានបរទេស

May 5, 2020

ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?(ត…)

ជំងឺគ្រុនផ្ដាសាយធំអេស្ប៉ាញ នៅតែបន្តបង្កផលប៉ះពាល់យ៉ាងធ្ងន់ធ្ងរដល់មនុស្សម្នានៅក្នុងប្រទេសទីទ័លក្រ។

ការសិក្សាស្រាវជ្រាវនៅឆ្នាំ2020 នេះ ដែលដឹកនាំក្រុមដោយលោក រ៉ូបឺត បាររ៉ូ អ្នកវិទ្យាសាស្ត្រនៃមហាវិទ្យាល័យ ហាវ៉ាដ បានវាយតម្លៃថា ក្នុងខណៈដែលប្រជាជនប្រមាណ 0.5% (ប្រមាណជា 550,000នាក់) នៅក្នុងសហរដ្ឋអាមេរិកនៅខណៈពេលនោះ បានស្លាប់ដោយសារជំងឺគ្រុនផ្ដាសាយធំអេស្ប៉ាញ តែជំងឺដ៏សាហាវនេះ បានសម្លាប់ជីវិតមនុស្សប្រមាណ 5.2% នៃប្រជាជនក្នុងប្រទេសឥណ្ឌា ឬជិត 17លាននាក់។

ជំងឺរាតត្បាតដែលកើតឡើង ថែមទាំងបានធ្វើឱ្យមានការខាតបង់យ៉ាងធំធេងខាងសេដ្ឋកិច្ច ដោយលោកបាររ៉ូ និងក្រុមការងារ បានវាយតម្លៃថា ជំងឺគ្រុនផ្ដាសាយធំអេស្ប៉ាញ បានធ្វើឱ្យ GDP របស់ប្រទេសផ្សេងៗ ថយចុះ 6% ជាមធ្យម។

អ្នកស្រី ឃែតធើរីន អារ៍ណូល អ្នកនិពន្ធសៀវភៅរឿង Pandemic 1918 បានបញ្ជាក់ថា ការស្លាប់របស់មនុស្សក្នុងសង្គ្រាមលោកលើកទី1 បូកជាមួយការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញ បានធ្វើឱ្យកើតគ្រោះហាយនៈធំធេងខាងសេដ្ឋកិច្ចបន្ទាប់ពីនោះមក។

បុព្វបុរសរបស់អ្នកស្រីអារ៍ណូលខ្លួនឯង ក៏ជាជនរងគ្រោះរបស់ជំងឺគ្រុនផ្ដាសាយធំអេស្ប៉ាញដែលឆ្លងរាតត្បាតក្នុងប្រទេសសហរាជាណាចក្រ(UK) ដែរ។ អ្នកស្រីបាននិយាយថា “នៅក្នុងប្រទេសជាច្រើន ស្ទើរលែងមានបុរសវ័យកំលោះនៅសេសសល់ឱ្យបន្តដំណើរការមុខជំនួញរបស់គ្រួសារ ធ្វើស្រែចម្ការ ហ្វឹកហាត់វិជ្ជាជីវៈ ធ្វើពាណិជ្ជកម្ម រៀបការ និងមានកូនមកស្នងត្រកូល ជំនួសប្រជាជនដែលបានដួលស្លាប់អស់ជាច្រើនលាននាក់នៅក្នុងអំឡុងពេលនោះទៀតផង”។ អ្នកស្រីបន្តថា “ការខ្វះខាតមនុស្សប្រុសដែលមានគុណសម្បត្តិស័ក្តិសម បាននាំឆ្ពោះទៅរកបញ្ហាដែលគេហៅថា “ក្រមុំសៅកែ” ដែលធ្វើឱ្យមនុស្សស្រីជាច្រើនលាននាក់ មិនអាចស្វែងរកគូគ្រងដែលស័ក្តិសមល្មមនឹងខ្លួនបាន”។

ស្ត្រីនៅក្នុងកន្លែងធ្វើការ

បញ្ហាខ្វះខាតកម្លាំងពលកម្ម ដែលបណ្ដាលមកពីការឆ្លងរាតត្បាតរបស់ជំងឺគ្រុនផ្ដាសាយធំអេស្ប៉ាញ និងសង្គ្រាមលោកលើកទី1 បានបើកផ្លូវឱ្យស្ត្រីបានចូលទៅក្នុងប្រព័ន្ធការងារកាន់តែច្រើនឡើង

ទោះជាការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញ មិនបានសាងនូវភាពផ្លាស់ប្ដូរខាងសង្គមបានស្មើនឹងហេតុការណ៍ “រោគពិសមរណៈ” ឬ Black Death ដែលជាការឆ្លងរាតត្បាតដ៏ធំរបស់ជំងឺ “កាឡរោគ” ក្នុងសម័យសតវត្សរ៍ទី14 ដែលធ្វើឱ្យមានអ្នកស្លាប់ប្រមាណ 75-100លាននាក់ និងនាំឆ្ពោះទៅរកភាពធ្លាក់ចុះអាប់ឱនរបស់ការគ្រប់គ្រងបែបប្រព័ន្ធសក្ដិភូមិក៏ពិតមែន តែជំងឺគ្រុនផ្ដាសាយធំអេស្ប៉ាញ បានសាងនូវភាពរង្គោះរង្គើដល់ភាពស្មើភាគគ្នា រវាងបុរស-ស្ត្រី នៅក្នុងប្រទេសជាច្រើន។

អ្នកស្រី គ្រីស្ទីន ប្ល៊ែកប៊ើន អ្នកស្រាវជ្រាវពីមហាវិទ្យាល័យ Texas A and M បានរកឃើញថា បញ្ហាខ្វះខាតកម្លាំងពលកម្មនៅក្នុងប្រទេសសហរដ្ឋអាមេរិក ដែលបណ្ដាលមកពីការឆ្លងរាតត្បាតរបស់ជំងឺគ្រុនផ្ដាសាយធំអេស្ប៉ាញ និងសង្គ្រាមលោកលើកទី1 បានបើកផ្លូវឱ្យស្ត្រីបានចូលទៅក្នុងប្រព័ន្ធការងារកាន់តែច្រើនឡើង។ អ្នកស្រីថ្លែងថា “ក្នុងអំឡុងឆ្នាំ1920 មានស្ត្រីប្រមាណជា 21% នៃកម្លាំងពលកម្មទាំងអស់ក្នុងប្រទេស”។

ក្នុងឆ្នាំដដែល សភាកុងហ្ក្រេស បានផ្ដល់សត្យាប័នបទប្បញ្ញត្តិកែសម្រួលបន្ថែមរដ្ឋធម្មនុញ្ញរបស់សហរដ្ឋអាមេរិក មាត្រា19 ឱ្យពលរដ្ឋដែលជាស្ត្រីជនជាតិអាមេរិក មានសិទ្ធិបោះឆ្នោតជ្រើសតាំង(Women’s Suffrage)លំដាប់ថ្នាក់ជាតិបានជាលើកដំបូង ដែលផ្ដល់សិទ្ធិក្នុងការបញ្ចេញសំឡេងជ្រើសតាំងទៅដល់ស្ត្រីជនជាតិអាមេរិកគ្រប់រូប។

អ្នកស្រី ប្ល៊ែកប៊ើន បានបន្ថែមទៀតថា “មានភ័ស្តុតាងដែលបង្ហាញឱ្យឃើញថា ជំងឺគ្រុនផ្ដាសាយធំអេស្ប៉ាញកាលពីឆ្នាំ1918 បានផ្ដល់ផលដល់សិទ្ធិស្ត្រីនៅក្នុងប្រទេសជាច្រើន”

ក្រៅពីនេះ និយោជិត នៅបានទទួលផលប្រយោជន៍ពីតម្លៃពលកម្មដែលកើនឡើងខ្ពស់ ដោយសារតែបញ្ហាខ្វះខាតកម្លាំងពលកម្មទៀតផង។

ព័ត៌មានរបស់រដ្ឋាភិបាលសហរដ្ឋអាមេរិក បានចង្អុលបង្ហាញថា តម្លៃពលកម្មក្នុងផ្នែកការផលិតបានហក់ឡើងពី 1ម៉ោង 21សេន ក្នុងឆ្នាំ1915 ទៅជា 1ម៉ោង 56សេន ក្នុងឆ្នាំ1920។

ទុព្វលភាព ដែលបន្សល់ទុកឱ្យទារកជំនាន់ក្រោយ

អ្នកវិទ្យាសាស្ត្រ បានសិក្សាពីទារកដែលកើតក្នុងអំឡុងពេលដែលជំងឺគ្រុនផ្ដាសាយធំអេស្ប៉ាញឆ្លងរាតត្បាត បានរកឃើញថា កុមារក្រុមនេះ មានសញ្ញាថា នឹងកើតមកព្រមជាមួយភាពខុសប្រក្រតីផ្សេងៗ ដូចជា មានជំងឺបេះដូងច្រើនជាងក្មេងដែលកើតមុន និងក្រោយការឆ្លងរាតត្បាត។

លទ្ធផលការវិភាគក្នុងប្រទេសសហរាជាណាចក្រ(UK) និងប្រទេសប្រេស៊ីល បានរកឃើញថា ទារកដែលកើតក្នុងឆ្នាំ1918-1919 នៅមានសញ្ញាតិចតួចណាស់ក្នុងការបានទទួលការជួលឱ្យធ្វើការជាផ្លូវការ ឬបានទទួលការសិក្សារៀនសូត្រដល់កម្រិតឧត្ដមសិក្សា។

ទ្រឹស្ដីខ្លះ បានដាក់ចំណុចសន្និដ្ឋានថា ភាពធុញថប់តានតឹងខាងអារម្មណ៍របស់ស្ត្រីជាម្ដាយ ដែលកើតមានក្នុងអំឡុងរោគរាតត្បាត អាចហុចផលប៉ះពាល់ទៅដល់វិវឌ្ឍនាការរបស់ទារកក្នុងគភ៌។

ក្រៅពីនេះ លទ្ធផលនៃការវិភាគព័ត៌មានការទទួលយកទាហាន ចូលទៅក្នុងជួរកងទ័ពសហរដ្ឋអាមេរិករបស់មនុស្សប្រុសដែលកើតក្នុងអំឡុងឆ្នាំ1915-1922 នៅបានរកឃើញទៀតថា អ្នកដែលកើតក្នុងឆ្នាំ1919 មានកម្ពស់ទាបជាងមនុស្សភាគច្រើន 1មីល្លីម៉ែត្រ។

សូមរង់ចាំអានបន្តនៅថ្ងៃស្អែក

ប្រភព៖ សារព័ត៌មានបរទេស

May 4, 2020

ពិនិត្យមើលបរិមាណកាហ្វេអុីនក្នុងរាងកាយ តើយើងញ៉ាំកាហ្វេច្រើនពេកទេដឹង?

អ្នកណាថា អាហារដែលមានជាតិកាហ្វេអុីន មានតែកាហ្វេមួយមុខនោះ? សាកល្បងនាំគ្នាមកគណនាពីបរិមាណកាហ្វេអុីនក្នុងអាហារប្រភេទផ្សេងទៀតបន្តិចមើល៍ ព្រោះជួនកាល ក្នុង 1 ថ្ងៃយើងអាចបានទទួលកាហ្វេអុីនច្រើនជ្រុលពេកក៏អាចថាបានដែរ។

អ្នកជំនាញខាងភោជនាហារបានណែនាំថា បរិមាណកាហ្វអ៊ីនដែលស័ក្តិសមល្អចំពោះរាងកាយមនុស្សនោះគឺ ត្រឹមតែ 300 មីល្លីក្រាមក្នុងមួយថ្ងៃប៉ុណ្ណោះ តែបើអ្នកនិយមញ៉ាំកាហ្វេទាំងឡាយដូចជារាងមិនសូវប្រាកដក្នុងចិត្តថា បរិមាណ 300 មីល្លីក្រាមគឺប៉ុនណា ហើយកាហ្វេ ឬទឹកតែដែលញ៉ាំចូលទៅរៀងរាល់ថ្ងៃ មួយថ្ងៃៗច្រើនកែវនោះ បើរួមៗចូលគ្នាទៅ តើវាលើសកម្រឹតកំណត់ដែរឬទេ?

ដូច្នេះថ្ងៃនេះ ឡារ៉ែន សូមនាំអ្នកនិយមញ៉ាំតែ ឬកាហ្វេទាំងឡាយទៅពិនិត្យមើលបរិមាណជាតិកាហ្វេអុីននៅក្នុងអាហារទាំងនោះដើម្បីឱ្យយើងបានគណនាមើលទាំងអស់គ្នា។

– ស្ករសូកូឡា 1 បន្ទះ (បរិមាណ 50 ក្រាម) មានជាតិកាហ្វេអ៊ីន 50 មីល្លីក្រាម។

– ទឹកភេសជ្ជៈពណ៌ខ្មៅ 1 កំប៉ុង មានកាហ្វេអ៊ីន 32 មីល្លីក្រាម។

– តែបៃតង 1 កែវ មានកាហ្វេអ៊ីន 45 មីល្លីក្រាម។

– កាហ្វេខ្មៅ 1 ពែង មានកាហ្វេអ៊ីន 100 មីល្លីក្រាម។

– តែទឹកដោះគោ 1 ពែងមានជាតិកាហ្វេអ៊ីន 75 មីល្លីក្រាម។

– កាហ្វេអេសផ្រេសសូ 1 ពែង មានកាហ្វេអ៊ីន 75 មីល្លីក្រាម។

ឃើញតួលេខហើយ អ្នកណាដែលចូលចិត្តញ៉ាំទឹកតែ ឬកាហ្វេក្នុងមួយថ្ងៃច្រើនៗកែវ និងថែមទាំងញ៉ាំទឹកភេសជ្ជៈកំប៉ុង ញ៉ាំស្ករសូកូឡាយ៉ាងសប្បាយរីករាយផងនោះ ប្រហែលជាត្រូវបន្ថយៗខ្លះហើយ។

Drinking Tips

ការញ៉ាំជាតិកាហ្វេអ៊ីនចូលទៅច្រើន អាចមានផលធ្វើឱ្យសម្ពាធឈាមឡើងខ្ពស់ និងបង្កើនកម្រឹតការលោតរបស់បេះដូងទៀតផង ហើយសម្រាប់អ្នកដែលមានភាពទន់ខ្សោយចំពោះកាហ្វេ បើញ៉ាំក្រោយម៉ោង 4 ល្ងាចផងនោះ អាចធ្វើឱ្យគេងមិនលក់បាន តែចំណុចល្អនោះគឺ វាជួយបង្កើនភាពស្វាហាប់ ដូច្នេះការញ៉ាំកាហ្វេ 15 នាទីមុនហាត់ប្រាណ ឬមុនពេលប្រជុំ ក៏ជួយឱ្យខួរក្បាលភ្លឺស្រឡះបានដែរ។

Did You Know ?

រឹតតែត្រាំថង់កាកតែនៅក្នុងកែវទឹកក្តៅៗយូរប៉ុនណា ក៏រឹតតែបង្កើនភាពខាប់របស់កាហ្វេអ៊ីនច្រើនឡើងប៉ុននោះដែរ ដូចជា បើយើងត្រាំទុកចោល 1 នាទី ស្មើនឹងបង្កើនបរិមាណជាតិកាហ្វេអ៊ីន 19 មីល្លីក្រាម តែបើត្រាំទុកចោល 5 នាទី នឹងមានបរិមាណជាតិកាហ្វេអ៊ីនកើនឡើងដល់ទៅ 31 មីល្លីក្រាមឯណោះ៕

May 4, 2020

លោក Trump “ជឿជាក់” ថា ចុងឆ្នាំនឹងមានវ៉ាក់សាំង COVID-19

ប្រធានាធិបតីអាមេរិកាំង លោក Donald Trump កាលពីថ្ងៃទី3ឧសភា បានឱ្យដឹងថា លោក “ជឿជាក់” ថា សហរដ្ឋអាមេរិកនឹងមានវ៉ាក់សាំងទប់ស្កាត់វីរុសCOVID-19 នៅមុនដំណាច់ឆ្នាំនេះ។

លោក Trump សង្កត់ធ្ងន់ថា ក្រុមហ៊ុនជាច្រើនកំពុងប្រឹងប្រែងស្រាវជ្រាវ និងពិសោធវ៉ាក់សាំង ហើយពួកគេជិតទទួលបានជោគជ័យក្នុងការអភិវឌ្ឍវ៉ាក់សាំងនេះហើយ។ “ខ្ញុំគិតថា យើងនឹងមានវ៉ាក់សាំងក្នុងពេលឆាប់ៗនេះ” ប្រធានាធិបតីអាមេរិកាំងមានប្រសាសន៍បែបនេះជាមួយអ្នកយកព័ត៌មានរបស់ Fox News។

សហរដ្ឋអាមរិក និងបណ្ដាប្រទេសក្នុងពិភពលោក កំពុងតែប្រជែងគ្នាដើម្បីក្លាយជាអ្នកដំបូងគេដែលមានវ៉ាក់សាំងប្រឆាំងវីរុសCOVID-19។ ម្ចាស់សេតវិមានបានប្រកាសថា លោកនៅតែត្រេកអរជាទីបំផុតបើសិនក្រុមអ្នកស្រាវជ្រាវអាមេរិកាំង ត្រូវបានគេធ្វើឱ្យបរាជ័យក្នុងការប្រជែងលើការអភិវឌ្ឍថ្នាំសម្រាប់វីរុសCOVID-19។

លោក Trump ឱ្យដឹងថា “បើសិនប្រទេសណាមួយទទួលបានជោគជ័យមុនគេ ខ្ញុំនឹងដោះមួកគោរពកោតសរសើរ។ ខ្ញុំមិនខ្វល់អ្វីទាំងអស់ ខ្ញុំគ្រាន់តែចង់បានវ៉ាក់សាំងមួយដែលមានប្រសិទ្ធភាព”។

នៅពេលត្រូវបានសួរអំពីហានិភ័យដែលកើតឡើងចំពោះមនុស្សក្នុងការអភិវឌ្ឍវ៉ាក់សាំងតាមបែបប្រញាប់ប្រញាល់ខុសធម្មតាដូចបច្ចុប្បន្ន លោក Trump អះអាងថា អ្នកដែលបានចូលរួមក្នុងការពិសោធ គឺសុទ្ធតែជាអ្នកស្ម័គ្រចិត្ត។ លោកថា “ពួកគេដឹងនូវអ្វីដែលពួកគេកំពុងតែធ្វើ”។

សហរដ្ឋអាមេរិកបច្ចុប្បន្នគឺជាសម្បុកមេរោគធំជាងគេក្នុងពិភពលោក ដោយមានអ្នកជំងឺកូរ៉ូណាសរុបជិត1.2លាននាក់ ក្នុងនោះមានអ្នកជំងឺជិត69,000នាក់បានបាត់បង់ជីវិត ខណៈរដ្ឋប្រហែលពាក់កណ្ដាលនៃប្រទេសនេះ បានបន្ធូរបន្ថយការរឹតត្បិតលើការដើរហើរ។ ប៉ុន្តែ រដ្ឋមួយចំនួនក៏នៅតែមានការប្រុងប្រយ័ត្នខ្ពស់ចំពោះវីរុសនេះនៅឡើយ។

COVID-19 បានបង្ហាញខ្លួននៅប្រទេសចិនកាលពីចុងឆ្នាំ2019 ហើយមកដល់បច្ចុប្បន្ន វាមានវត្តមាននៅក្នុងប្រទេស និងដែនដីជាង200ក្នុងពិភពលោក បណ្ដាលឱ្យមានមនុស្សជិត3.6លាននាក់ត្រូវឆ្លងមេរោគ ក្នុងនោះមានជិត250,000នាក់បានបាត់បង់ជីវិត និងជាង1.1លាននាក់បានរួចផុតពីការស្លាប់៕

ប្រភព៖ សារព័ត៌មានបរទេស

May 4, 2020

Mike Pompeo៖ មានភ័ស្ដុតាងបង្ហាញថា COVID-19 មានប្រភពពីមន្ទីរពិសោធន៍នៅ Wuhan

រដ្ឋមន្ត្រីក្រសួងការបរទេសអាមេរិកាំង លោក Mike Pompeo កាលពីល្ងាចម្សិលមិញបានប្រកាសថា “មានភ័ស្ដុតាងធំ” បង្ហាញថា វីរុសCOVID-19 មានប្រភពពីមន្ទីរពិសោធន៍មួយនៅក្នុងទីក្រុង Wuhan ខេត្ត Hubei ប្រទេសចិន។

“មានភ័ស្ដុតាងយ៉ាងធំបញ្ជាក់ថា នោះគឺជាកន្លែងដែលវីរុសបង្ហាញខ្លួន” លោក Pompeo ថ្លែងនៅក្នុងកម្មវិធី “This Week” របស់ទូរទស្សន៍ ABC បែបនេះ។ រដ្ឋមន្ត្រីការបរទេសអាមេរិកាំងរូបនេះបន្តថា “ខ្ញុំគិតថា ពេលនេះពិភពលោកអាចមើលឃើញហើយថា ប្រទេសចិនមានប្រវត្តិចម្លងមេរោគដល់ពិភពលោក ហើយពួកគេគ្រប់គ្រងបន្ទប់ពិសោធន៍ដោយមិនមានស្តង់ដា”។

បើទោះជាបាន និងកំពុងរិះគន់យ៉ាងចាស់ដៃទៅលើវិធីដែលប្រទេសចិនប្រើប្រាស់ក្នុងការទប់ស្កាត់វីរុសCOVID-19 ប៉ុន្តែ រដ្ឋមន្ត្រី Pompeo បានបដិសេធមិនបញ្ចេញមតិអំពីលទ្ធភាពដែលថាប្រទេសចិនបានបញ្ចេញវីរុសនេះដោយចេតនានោះដែរ។ លោកបានសង្កត់ធ្ងន់ថា ការដែលប្រទេសចិនរកវិធីលាក់បាំងភាពធ្ងន់ធ្ងររបស់រោគរាតត្បាតនៅក្នុងដំណាក់កាលដំបូង បានធ្វើឱ្យមាន “ហានិភ័យធំធេង” ដល់ពិភពលោក។ រដ្ឋមន្ត្រីការបរទេសអាមេរិកាំងបានប្រកាសថា “ប្រធានាធិបតី Trump មានប្រសាសន៍យ៉ាងច្បាស់ថា យើងនឹងធ្វើឱ្យអ្នកដែលត្រូវទទួលខុសត្រូវ ត្រូវតែចេញមកទទួលកំហុស”។

ប្រធានាធិបតីសហរដ្ឋអាមេរិក Donald Trump តែងតែរិះគន់ទៅលើតួនាទីរបស់ប្រទេសចិននៅក្នុងបញ្ហាវិបត្តិសុខភាពដែលបង្កឡើងដោយវីរុសCOVID-19។ លោកអះអាងថា ទីក្រុងប៉េកាំងបានលាក់បាំងដោយមិនមានការពិចារណានូវព័ត៌មានសំខាន់អំពី COVID-19។ ទន្ទឹមនឹងនេះ លោក Trump ក៏បានទាមទារឱ្យប្រទេសចិន “ត្រូវតែទទួលខុសត្រូវ” ចំពោះទង្វើនេះ។

យោងតាមប្រភពព័ត៌មានមួយចំនួនបានឱ្យដឹងថា ប្រធានាធិបតីអាមេរិកាំង បានប្រគល់ភារកិច្ចក្នុងការស៊ើបអង្កេតលើបញ្ហាប្រភពនៃវីរុសកូរ៉ូណាថ្មីនេះទៅឱ្យក្រុមចារបុរសអាមេរិកាំង ដែលវីរុសនេះ ដំបូងឡើយត្រូវបានគេជឿថា បានចាប់ផ្ដើមឆ្លងចេញពីផ្សារលក់សត្វព្រៃរស់នៅក្នុងទីក្រុង Wuhan ប្រទេសចិន ក៏ប៉ុន្តែបច្ចុប្បន្ន វីរុសនេះត្រូវបានសង្ស័យថា ជាផលិតផលដែលចេញពីមន្ទីរពិសោធន៍។

វិទ្យាស្ថានវីរុសសាស្ត្រ Wuhan ដែលស្ថិតនៅក្នុងទីក្រុង Wuhan ជាទីកន្លែងបង្ហាញខ្លួនដំបូងរបស់វីរុសCOVID-19 បានបដិសេធចំពោះការសង្ស័យដែលថា វីរុសនេះបានឆ្លងចេញពីមន្ទីរពិសោធន៍របស់ខ្លួន។ អ្នកជំនាញភាគច្រើនយល់ថា វីរុសនេះ មានប្រភពពីសត្វព្រៃ ហើយសត្វប្រចៀវ និងពង្រូលត្រូវគេគិតថាជាសត្វចម្លងរោគ។

វីរុសCOVID-19 បានចាប់ផ្ដើមឆ្លងរាលដាលនៅប្រទេសចិន កាលពីខែធ្នូ2019 ដែលមកដល់បច្ចុប្បន្ន វាបានសម្លាប់មនុស្សយ៉ាងតិច245,000នាក់ ក្នុងចំណោមអ្នកជំងឺជាង1.1លាននាក់ នៅទូទាំងសកលលោក៕

ប្រភព៖ សារព័ត៌មានបរទេស

May 4, 2020

ជិត3.6លាននាក់ឆ្លងវីរុសCOVID-19 នៅទូទាំងពិភពលោក ក្នុងនោះមាន9ប្រទេសដែលមានអ្នកជំងឺលើសពី100,000នាក់

វីរុសCOVID-19 បានបង្កឱ្យមនុស្សស្លាប់យ៉ាងតិច248,000នាក់ ក្នុងចំណោមអ្នកជំងឺជិត3.6លាននាក់នៅក្នុងសកលលោកទាំងមូល។

ប្រទេស និងដែនដីចំនួន212ក្នុងពិភពលោក គិតមកដល់ថ្ងៃនេះ មានមនុស្សយ៉ាងតិច3,561,887នាក់បានឆ្លងមេរោគកូរ៉ូណាថ្មី ក្នុងនោះមានអ្នកជំងឺ248,084នាក់បានស្លាប់។ ពិភពលោកថ្ងៃនេះក៏បានរកឃើញអ្នកជំងឺថ្មី83,735នាក់ និងអ្នកស្លាប់ថ្មីចំនួន3,623នាក់។ ចំនួនអ្នកជំងឺដែលបានជាសះស្បើយ បានឡើងដល់1,152,993នាក់។ នេះបើតាមទំព័រ WorldoMeters។

ទ្វីបអាមេរិកនៅតែជាសម្បុកមេរោគធំជាងគេបង្អស់ក្នុងពិភពលោក ក្នុងនោះអាមេរិកខាងជើងមានអ្នកជំងឺសរុប1,290,469នាក់ អាមេរិកខាងត្បូងមាន211,800នាក់ ទ្វីបអឺរ៉ុបមាន1,447,503នាក់ ទ្វីបអាស៊ីមាន558,496នាក់ និងទ្វីបអាហ្វ្រិកមាន45,380នាក់។

សហរដ្ឋអាមេរិកក៏នៅតែជាសម្បុកមេរោគកូរ៉ូណាថ្មី ធំបំផុតក្នុងសកលលោក ដោយមានអ្នកជំងឺសរុប1,187,035នាក់ កើន26,261នាក់ធៀបនឹងម្សិលមិញ។ ប្រទេសនេះក៏មានអ្នកស្លាប់ថ្មីចំនួន1,115នាក់ ធ្វើឱ្យតួលេខនៃអ្នកស្លាប់សរុបដោយសារ COVID-19 កើនដល់68,559នាក់។

ចំណែកអេស្ប៉ាញវិញ មានអ្នកជំងឺកូរ៉ូណាសរុប247,122នាក់ ខណៈប្រទេសអ៊ីតាលីមាន210,717នាក់ អង់គ្លេសមាន186,599នាក់ បារាំងមាន168,693នាក់ អាល្លឺម៉ង់មាន165,664នាក់ ទួរគីមាន126,045នាក់ រុស្ស៊ីមាន134,687នាក់ និងប្រេស៊ីលមាន101,147នាក់។ ក្រៅពីនេះ គឺជាបណ្ដាប្រទេសដែលមានអ្នកជំងឺCOVID-19 ក្រោម100,000នាក់៕

ប្រភព៖ សារព័ត៌មានបរទេស

May 4, 2020

ជិត3.5លាននាក់ឆ្លងCOVID-19 នៅទូទាំងពិភពលោក ក្នុងនោះមាន12ប្រទេសដែលមានអ្នកជំងឺលើសពី5ម៉ឺននាក់

ពិភពលោកទាំងមូលមានអ្នកជំងឺកូរ៉ូណាចំនួនជាង244,000នាក់បានស្លាប់ ក្នុងពេលដែលអ្នកជំងឺកូរ៉ូណាសរុបបានកើនដល់ជិត3.5លាននាក់។

ប្រទេស និងដែនដីចំនួន212ក្នុងពិភពលោក បានរកឃើញអ្នកផ្ទុកវីរុសCOVID-19 សុបឡើងដល់ 3,478,152នាក់ និងអ្នកស្លាប់សរុប244,461នាក់។ ក្នុងនោះអ្នកជំងឺថ្មីកើន134,850នាក់ និងអ្នកស្លាប់ថ្មីកើន5,955នាក់បើធៀបនឹងម្សិលមិញ។ ក្នុងចំណោមអ្នកជំងឺសរុប មានអ្នកជំងឺជាង1.1លាននាក់បានជាសះស្បើយ។ នេះបើតាមស្ថិតិរបស់ WorldoMeters។

ទ្វីបអឺរ៉ុបកំពុងរងគ្រោះធ្ងន់ជាងគេ ដោយមានអ្នកជំងឺសរុប1,424,364នាក់់ ខណៈអាមេរិកខាងជើងមាន1,258,413នាក់ ទ្វីបអាស៊ីមាន545,544នាក់ អាមេរិកខាងត្បូងមាន199,750នាក់ និងទ្វីបអាហ្វ្រិកមានអ្នកជំងឺសរុប43,734នាក់។

បណ្ដាប្រទេសដែលមានអ្នកជំងឺCOVID-19 លើសពី 50,000នាក់ រួមមាន សហរដ្ឋអាមេរិក អេស្ប៉ាញ អ៊ីតាលី អង់គ្លេស បារាំង អាល្លឺម៉ង់ ទួរគី រុស្ស៊ី អ៊ីរ៉ង់ ប្រេស៊ីល ចិន និងកាដាណា៕

ប្រភព៖ សារព័ត៌មានបរទេស

May 3, 2020

សហរដ្ឋអាមេរិក៖ អ្នកឆ្លងCOVID-19 កើនដល់ជិត1,159,000នាក់ ខណៈរដ្ឋខ្លះបើកដំណើរការសេដ្ឋកិច្ចឡើងវិញស្ទើរតែ100%

សហរដ្ឋអាមេរិកគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប 1,158,881នាក់ កើន27,851ធៀបនឹងម្សិលមិញ។ អ្នកជំងឺដែលបានបាត់បង់ជីវិតនៅក្នុងប្រទេសនេះ បានកើនឡើងដល់ 67,293នាក់ ក្នុងនោះមានអ្នកស្លាប់ថ្មី1,540នាក់បន្ថែមទៀត។ អ្នកជំងឺដែលបានជាសះស្បើយ មានចំនួន160,705នាក់។

New York គឺជារដ្ឋដែលទទួលរងផលប៉ះពាល់ច្រើនបំផុតពីCOVID-19នៅសហរដ្ឋអាមេរិក។ រដ្ឋនេះ មានអ្នកជំងឺសរុប319,213នាក់ កើន3,991នាក់បើធៀបនឹងម្សិលមិញ(2ឧសភា) ចំណែកអ្នកស្លាប់ថ្មីដោយសារវីរុសកូរ៉ូណានៅ New York មានចំនួន299នាក់ នាំឱ្យអ្នកស្លាប់សរុបក្នុងរដ្ឋនេះកើនដល់24,368នាក់។

រដ្ឋនៅសហរដ្ឋអាមេរិកប្រមាណជាពាក់កណ្ដាល បានបន្ធូរបន្ថយការរឹតត្បិតលើកការដើរហើរចាប់ពីថ្ងៃទី1ឧសភា ខណៈដែលតួលេខនៃករណីឆ្លងវីរុសបានថយចុះ ឬនៅថេរ។ រដ្ឋ Texas បានអនុញ្ញាតឱ្យក្រុមហ៊ុន អាជីវកម្មនានាដំណើរការឡើងវិញទៅតាមផ្នែកដែលអាចធ្វើបាន ក្នុងពេលដែលហាងលក់រាយ និងមជ្ឈមណ្ឌលពាណិជ្ជកម្មបានបើកឡើងវិញក្នុងទំហំ25%នៃលទ្ធភាព។ នៅឯរដ្ឋ Georgia ក្រុមហ៊ុន អាជីវកម្មស្ទើរតែទាំងអស់ត្រូវបានអនុញ្ញាតឱ្យបើកដំណើរការឡើងវិញ៕

ប្រភព៖ សារព័ត៌មានបរទេស

May 3, 2020

Category: សុខភាព