សុខភាព - La Reine Media

ចំនួនអ្នកជំងឺCOVID-19 បានកើនលើសពី 4លាននាក់ហើយ!

ពិភពលោកទាំងមូលបានរកឃើញអ្នកជំងឺរលាកសួតប្រភេទថ្មីជាង4លាន់នាក់ ក្នុងនោះមានជិត276,000នាក់បានបាត់បង់ជីវិត។

ប្រទេសនិងដែនដីចំនួន212ក្នុងពិភពលោក គិតមកដល់ពេលនេះ បានរកឃើញអ្នកដែលបានឆ្លងវីរុសCOVID-19 សរុបឡើងដល់4,008,110នាក់ និងអ្នកស្លាប់សរុប275,784នាក់។ អ្នកជំងឺថ្មីមាន92,116នាក់ និងអ្នកស្លាប់ថ្មីមាន5,487នាក់។ អ្នកជំងឺដែលបានជាសះស្បើយមានចំនួន1,377,123នាក់។ នេះបើតាមស្ថិតិរបស់ WorldoMeters។

នៅឯទ្វីបអឺរ៉ុប មានអ្នកជំងឺសរុប1,581,256នាក់ ខណៈអាមេរិកខាងជើងមាន1,441,711នាក់ អាមេរិកខាងត្បូងមាន283,655នាក់ ទ្វីបអាស៊ីមាន634,829នាក់ និងទ្វីបអាហ្វ្រិកមានអ្នកជំងឺកូរ៉ូណាសរុប58,963នាក់។

បណ្ដាប្រទេសដែលមានអ្នកស្លាប់ដោយសារវីរុសCOVID-19 លើសពី30,000នាក់ គឺមាន3ប្រទេស រួមមានសហរដ្ឋអាមេរិក អង់គ្លេស និងប្រទេសអ៊ីតាលី។

ប្រភព៖ សារព័ត៌មានបរទេស

May 9, 2020

ឈឺពោះខាងស្តាំ… អាការឈឺនេះបញ្ជាក់ពីជំងឺអ្វីបានខ្លះ?

ឈឺពោះខាងស្តាំញឹកញាប់ រហូតចាប់ផ្តើមនឹកចម្លែកចិត្តចំពោះខ្លួនឯង ថាអេះ៎? អាការឈឺពោះខាងស្តាំនេះកំពុងតែប្រាប់ពី ហេតុអ្វីម្យ៉ាងនៅក្នុងរាងកាយឱ្យយើងដឹងទេដឹង?។

អាការឈឺពោះខាងស្តាំ មិនថាតែផ្នែកខាងលើ ខាងក្រោម ឬឈឺពោះម្តុំក្រោមឆ្អឹងជំនីនោះឡើយ គ្រប់អាការឈឺពោះដែលកើតឡើងសុទ្ធតែមានដើមកំណើតរបស់វាទាំងអស់ ហើយបើសិនជាមួយរយៈនេះអ្នកមានអាការឈឺពោះខាងស្តាំញឹកញាប់នោះ សាកល្បងមកពិនិត្យទៅមើល៍ថា តើអាការឈឺពោះខាងស្តាំក្នុងលក្ខណៈនេះ បញ្ជាក់ថារាងកាយយើងកំពុងបញ្ចេញសញ្ញារបស់ជំងឺអ្វី?

– ឈឺពោះខាងស្តាំផ្នែកលើ (ម្តុំឆ្អឹងជំនីផ្នែកស្តាំ)

បើអ្នកមានអាការឈឺពោះខាងស្តាំខាងលើ ហើយអាការច្រើនតែកើតបន្ទាប់ពីទទួលទានអាហារដែលមានជាតិខ្លាញ់ខ្ពស់នោះ បញ្ជាក់ថា អ្នកកំពុងមានភាពប្រថុយប្រថានរបស់ជំងឺក្រួសក្នុងថង់ប្រមាត់ និងជំងឺថ្លើម ដោយមានចំណុចសង្កេតបន្ថែមគឺ បើសង្កត់លើពោះបរិវេណដែលឈឺនោះហើយ ស្ទាបប៉ះដុំរឹងៗ រួមជាមួយរាងកាយមានអាការខ្លួនលឿង ភ្នែកលឿងផងនោះ។

ក្រៅពីនេះ បើមានអាការឈឺពោះផ្នែកស្តាំរាលដាលទៅដល់ផ្នែកខ្នង (អ្នកខ្លះអាចឈឺពោះផ្នែកលើ ឬផ្នែកកណ្តាល) នោះរាងកាយកំពុងចង់ប្រាប់អ្នកថា អ្នកមានអាការខុសប្រក្រតីនៅលើថ្លើមខ្ចី ដោយអាចប្រថុយប្រថាននឹងជំងឺរលាកថ្លើមខ្ចីពីការញ៉ាំភេសជ្ជៈជាតិអាល់កុលច្រើនជ្រុលពេកហ្នឹងឯង។

– ឈឺពោះខាងស្តាំខាងក្រោម

បើឈឺពោះខាងស្តាំផ្នែកក្រោម តាំងពីម្តុំជុំវិញរន្ធផ្ចឹតរាលទៅឈឺនៅម្តុំផ្នែកក្រោមខាងស្តាំ ស្ទាបទៅហើយប៉ះដុំសាច់ សង្កត់ទៅហើយឈឺ រួមជាមួយអាការឈឺចុកសៀតគ្រប់ពេលវេលា អាការបែបនេះអាចសន្និដ្ឋានបានថា អាចជាអាការរលាកខ្នែងពោះវៀន តែបើឈឺបែបមានខ្យល់នៅក្នុងពោះ រមូរៗពោះវិញនោះ អាចដោយសារតែពោះវៀនធំធ្វើការខុសប្រក្រតី។

– ឈឺពោះខាងស្តាំក្រោមឆ្អឹងជំនី

ឈឺផ្សានៅម្តុំពោះខាងស្តាំក្រោមឆ្អឹងជំនី អ្នកខ្លះអាចមានអាការឈឺចុកសៀតរួមជាមួយផងដែរ នេះអាចជាសញ្ញាខុសប្រក្រតីរបស់ពោះវៀនតូច ដោយអាចមានមូលហេតុមកពីការកើតប្រតិកម្មចាញ់ប្រូតេអ៊ីនគ្លូដេន ប៉ះពាល់ដល់ពោះវៀនតូចឱ្យមិនអាចបឺតជ្រាបអាហារបាន រហូតកើតអាការឈឺពោះ និងបើបណ្តោយទុកចោលដោយមិនព្យាបាលនោះ អាចកើតសភាវរាករូស ឆ្អល់ និងអាចវិវឌ្ឍទៅជាជំងឺរលាកពោះវៀនតូចបាន។

– ឈឺពោះខាងក្រោមផ្នែកស្តាំ

ដោយមានអាការឈឺខ្លាំងជាតំណាក់ៗ ឈឺពោះខាងក្រោមផ្នែកស្តាំរាលដាលទៅដល់គល់ភ្លៅ អាចកើតបញ្ហាសុខភាពក្រលៀន ដូចជា មានក្រួសនៅក្នុងតម្រងនោម តែបើឈឺពោះផ្នែកក្រោមខាងស្តាំរួមទាំងមានឡើងកម្តៅខ្លួនខ្ពស់ ស្រៀវរងា និងមានធ្លាក់សផងនោះ លក្ខណៈសញ្ញានេះច្រើនតែជាអាការរលាកដៃស្បូន ដែលបើស្ទាបហើយឃើញមានដុំសាច់ផងនោះ អាចព្រោះតែសំបុកស៊ុតខុសប្រក្រតីម្យ៉ាងទៀត។

– ឈឺពោះខាងស្តាំផ្នែកកណ្តាល(ចង្កេះខាងស្តាំ)

បើឈឺនៅបរិវេណនេះ រួមទាំងមានអាការបត់ជើងមកមានឈាម បន្ទោបង់ខុសប្រក្រតី អាចជាសញ្ញារបស់ជំងឺរលាកពោះវៀនធំ ឬបើស្ទាបប៉ះដុំសាច់ផងនោះ អាចជាសញ្ញារបស់សាច់ដុះក្នុងពោះវៀនធំ តែបើឈឺតាំងពីចង្កេះខាងស្តាំរាលដាលចុះទៅគល់ភ្លៅនោះ អាចជាអាការក្រួសក្នុងតម្រងនោម ឬបើឈឺចង្កេះខាងស្តាំរួមទាំងមានគ្រុនក្តៅ រងាញាក់ និងទឹកមូត្រមានពណ៌ល្អក់ផងនោះសញ្ញានេះប្រាប់ពីជំងឺរលាកតម្រងនោម។

– ឈឺពោះខាងស្តាំ ពេលមានគភ៌

អាការឈឺពោះខាងស្តាំ ពេលមានគភ៌អាចមិនមែនជារឿងគួរឱ្យកង្វល់នោះទេ បើស្រ្តីមានគភ៌មានអារម្មណ៍ថាឈឺពោះផ្នែកខាងស្តាំ ឬខាងឆ្វេង ឈឺបែបស្រាលៗ នោះដោយសារតែកូនជីវិតចាប់ផ្តើមបញ្ចូលខ្លួននៅក្នុងស្បូនហើយ និងអាការឈឺបែបនេះនឹងកើតឡើងក្នុងតែរយៈពេលតាំងគភ៌ដំបូងៗប៉ុណ្ណោះ ដោយបន្ទាប់ពីការបញ្ចូលខ្លួនរបស់កូនជីវិតហើយនោះ អាការឈឺចាប់ដែលស្រ្តីមានគភ៌ត្រូវជួបតទៅទៀតនោះគឺ ការឈឺស្បូន ដោយសារតែស្បូនចាប់ផ្តើមរីកធំជារឿយៗ ដែលអ្នកម្តាយមានអារម្មណ៍ថាឈឺនៅផ្នែកខាងក្រោមពោះច្រើនជាងគេ។

អាការឈឺពោះអាចកើតឡើងបានគ្រប់ពេល តាមរយៈការបរិភោគអាហារខុសប្រក្រតីរហូតធ្វើប្រព័ន្ធពោះវៀន និងប្រព័ន្ធរំលាយអាហារធ្វើការខុសប្រក្រតី និងទង្វើផ្សេងៗ ដូចជា ការគេងភ្លាមៗក្រោយពីញ៉ាំអាហាររួចជាដើម តែបើអាការឈឺពោះកាន់តែខ្លាំងក្លាទ្វេរគុណឡើង ឬឈឺនៅលើចំណុចមួយចំនួន ដូចជា ឈឺពោះខាងស្តាំបែបនេះ ជួនកាលវាជាសញ្ញាដែលរាងកាយដាស់តឿនពីជំងឺ និងអាការខុសប្រក្រតីដែលកើតឡើងឱ្យយើងបានដឹងហើយ ដូច្នេះចូរកុំទុកចិត្តឱ្យសោះ គួរប្រញាប់ទៅជួបគ្រូពេទ្យឱ្យបានលឿនបំផុត៕

May 8, 2020

អ្នកជំងឺCOVID-19ចុងក្រោយ2នាក់ ត្រូវបញ្ជូនមកព្យាបាលបន្តនៅភ្នំពេញ

គិតមកដល់បច្ចុប្បន្ន កម្ពុជាមានអ្នកជំងឺCOVID-19 សរុបចំនួន122នាក់ ក្នុងនោះមានអ្នកជំងឺ120នាក់បានជាសះស្បើយ ដូច្នេះ កម្ពុជានៅសល់អ្នកជំងឺកូរ៉ូណាចុងក្រោយតែ2នាក់ទៀតប៉ុណ្ណោះ ដែលពួកគេនឹងត្រូវបញ្ជូនមកព្យាបាលបន្តនៅរាជធានីភ្នំពេញ។

អ្នកនាំពាក្យក្រសួងសុខាភិបាលកម្ពុជា លោកស្រីវេជ្ជបណ្ឌិតឱ វណ្ណឌីន មានប្រសាសន៍ថា សុខភាពរបស់អ្នកជំងឺCOVID-19ចុងក្រោយទាំង2រូបដែលកំពុងទទួលការព្យាបាលនៅឯមន្ទីរពេទ្យខេត្ត មិនមានសភាពធ្ងន់ធ្ងរនោះទេ។ លោកស្រីរដ្ឋលេខាធិការក្រសួងសុខាភិបាលបានឱ្យដឹងនៅព្រឹកនេះថា អ្នកជំងឺទាំងនេះនឹងត្រូវបញ្ជូនទៅកាន់មន្ទីរពេទ្យខ្មែរ-សូវៀត ដើម្បីព្យាបាលបន្ត។

ចំពោះមូលហេតុដែលនាំឱ្យក្រសួងសម្រេចចិត្តបញ្ជូនអ្នកជំងឺCOVID-19ចុងក្រោយមកបន្តព្យាបាលនៅឯមន្ទីរពេទ្យរុស្ស៊ីនេះ គឺដោយសារម្នាក់មានវ័យចំណាស់ និងមានជំងឺប្រចាំកាយស្រាប់ ចំណែកម្នាក់ទៀតមានបញ្ហាផ្លូវចិត្ត ហើយមន្ទីរពេទ្យរុស្ស៊ី ក៏មានសម្ភារវេជ្ជសាស្ត្រទំនើបៗ និងវេជ្ជបណ្ឌិតដែលមានបទពិសោធន៍ច្រើន និងជំនាញខ្ពស់។

May 8, 2020

អ្នកបម្រើផ្ទាល់របស់លោក Trump ឆ្លងវីរុសCOVID-19

ទាហានជើងទឹកអាមេរិកាំងម្នាក់ដែលបម្រើការជូនប្រធានាធិបតីនៅសេតវិមាន ត្រូវបានរកឃើញថាវិជ្ជមានជាមួយCOVID-19 ដែលនេះកំពុងតែបង្កការព្រួយបារម្ភយ៉ាងខ្លាំងចំពោះហានិភ័យនៃការចម្លងមេរោគទៅប្រធានាធិបតី Donald Trump។

“ថ្មីៗនេះ យើងទទួលបានរបាយការណ៍ពីសេតវិមានដែលបានប្រកាសថា សមាជិកម្នាក់របស់កងទ័ពសហរដ្ឋអាមេរិក ដែលធ្វើការនៅក្នុងសេតវិមាន បានឆ្លងវីរុសCOVID-19” ជំនួយការផ្នែកសារព័ត៌មានប្រចាំសេតវិមាន លោក Hogan Gidley បានឱ្យដឹងនៅក្នុងថ្ងៃនេះ។

ទាហានដែលបានឆ្លងមេរោគកូរ៉ូណានេះគឺជាសមាជិកនៃក្រុមអ្នកបម្រើនៅសេតវិមាន។ ក្រុមនេះគឺជាអង្គភាពពិសេសរបស់កងទ័ពជើងទឹកសហរដ្ឋអាមេរិកដែលមានជំនាញក្នុងផ្នែកបម្រើការនៅសេតវិមាន និងតែងតែធ្វើកិច្ចការដែលនៅក្បែរៗប្រធានាធិបតី Donald Trump ក៏ដូចជាក្រុមគ្រួសាររបស់លោក។

ទាហានខាងលើនេះ មានរោគសញ្ញានៃជំងឺកូរ៉ូណាកាលពីព្រឹកថ្ងៃទី6ឧសភា ហើយត្រូវបានធ្វើតេស្តរកឃើញថាមានផ្ទុកវីរុសCOVID-19។ ប្រភពព័ត៌មានមួយបានឱ្យដឹង លោក Trump មានអារម្មណ៍ស្រងូតស្រងាត់ខ្លាំង នៅពេលបានដឹងដំណឹងនេះ។ ភ្លាមនោះ លោក Trump ក៏ត្រូវបានក្រុមវេជ្ជបណ្ឌិតនៅសេតវិមានជួយធ្វើតេស្តរកមេរោគ។

លោក Hogan Gidley បានឱ្យដឹងថា “ប្រធានាធិបតី និងអនុប្រធានាធិបតី សុទ្ធតែត្រូវបានធ្វើតេស្តរកមេរោគរួចហើយ និងទទួលបានលទ្ធផលអវិជ្ជមានជាមួយវីរុសនេះ។ បច្ចុប្បន្ន សុខភាពរបស់លោកទាំង2 មិនមានបញ្ហាអ្វីនោះទេ”។

នៅសេតវិមាន លោក Trump និងអនុប្រធានាធិបតី Mike Pence រួមនឹងបុគ្គលិកជាន់ខ្ពស់ទាំងអស់ សុទ្ធតែត្រូវធ្វើតេស្តរក COVID-19 ជារៀងរាល់សប្ដាហ៍។ សេតវិមានកំពុងប្រើប្រាស់ឧបករណ៍ធ្វើតេស្តឈ្មោះ Abbott Labs ដែលផ្ដល់លទ្ធផលក្នុងរយៈពេល15នាទីបន្ទាប់ពីការធ្វើតេស្ត៕

ប្រភព៖ សារព័ត៌មានបរទេស

May 8, 2020

បណ្ដាប្រទេសនៅអាស៊ីអាគ្នេយ៍ដែលមានអ្នកស្លាប់ច្រើនដោយសារវីរុសCOVID-19

តំបន់អាស៊ីអាគ្នេយ៍ដែលមាន11ប្រទេស បានរកឃើញអ្នកជំងឺCOVID-19សរុបឡើងដល់54,076នាក់ ក្នុងនោះមានអ្នកជំងឺថ្មីចំនួន1,463នាក់។ អ្នកស្លាប់សរុបក្នុងតំបន់នេះក៏បានឡើងដល់1,805នាក់។

សិង្ហបុរីគឺជាសម្បុកមេរោគកូរ៉ូណាធំជាងគេបង្អស់ក្នុងតំបន់អាស៊ីអាគ្នេយ៍នេះ ដោយមានអ្នកជំងឺសរុប20,939នាក់ និងអ្នកស្លាប់ចំនួន20នាក់។

ឥណ្ឌូនេស៊ីឈរលំដាប់លេខពីរបើគិតទៅលើចំនួនអ្នកជំងឺសរុប ប៉ុន្តែឈរលេខមួយបើគិតអំពីតួលេខអ្នកស្លាប់ ដោយមានអ្នកជំងឺសរុប12,776នាក់ និងអ្នកស្លាប់សរុប930នាក់។

រីឯប្រទេសហ្វីលីពីនវិញគឺជាសម្បុកមេរោគធំជាងគេទីបី ដោយមានអ្នកជំងឺសរុប10,343នាក់ និងអ្នកស្លាប់មានចំនួន685នាក់។

ចំណែកប្រទេសវៀតណាម កម្ពុជា ឡាវ និងទីម័រខាងកើត គឺជាបណ្ដាប្រទេសក្នុងតំបន់អាស៊ីអាគ្នេយ៍ដែលមិនទាន់មានករណីស្លាប់ដោយសារវីរុសCOVID-19នៅឡើយ៕

ប្រភព៖ សារព័ត៌មានបរទេស

May 8, 2020

ជាង3.9លាននាក់ឆ្លងវីរុសCOVID-19 នៅទូទាំងពិភពលោក

វីរុសCOVID-19 បានសម្លាប់មនុស្សជាង270,000នាក់ ក្នុងចំណោមអ្នកជំងឺជាង3.9លាននាក់ នៅទូទាំងពិភពលោក។

ប្រទេសនិងដែនដីចំនួន212ក្នុងពិភពលោក គិតមកដល់ថ្ងៃនេះ(8ឧសភា) មានអ្នកឆ្លងវីរុសCOVID-19 សរុប3,915,974នាក់ និងអ្នកស្លាប់សរុប270,297នាក់។ អ្នកជំងឺកើន97,410នាក់ និងអ្នកស្លាប់កើន6,188នាក់បើធៀបនឹងតួលេខម្សិលមិញ។ អ្នកជំងឺដែលបានជាសះស្បើយក៏បានកើនដល់1,335,241នាក់ហើយដែរ។ នេះបើតាមស្ថិតិរបស់ WorldMeters។

ទ្វីបអាមេរិកគឺជាសម្បុកមេរោគធំបង្អស់ក្នុងពិភពលោក ក្នុងនោះអាមេរិកខាងជើងមានអ្នកជំងឺសរុប1,411,447នាក់ អាមេរិកខាងត្បូងមាន267,787នាក់ ខណៈទ្វីបអឺរ៉ុបមាន1,553,700នាក់ អាស៊ីមាន618,505នាក់ និងអាហ្វ្រិកមាន55,319នាក់។

សហរដ្ឋអាមេរិកនៅតែជាសម្បុកមេរោគកូរ៉ូណាធំជាងគេបង្អស់ក្នុងពិភពលោក ដោយមានអ្នកជំងឺសរុប1,290,242នាក់ និងអ្នកស្លាប់សរុប76,864នាក់ ក្នុងមានអ្នកជំងឺថ្មីចំនួន32,191នាក់ និងអ្នកស្លាប់ថ្មីមានចំនួន2,674នាក់។

ប្រទេសដែលមានអ្នកជំងឺCOVID-19 សរុបលើសពី100,000នាក់ មាន10ប្រទេស គឺសហរដ្ឋអាមេរិក អេស្ប៉ាញ អ៊ីតាលី អង់គ្លេស រុស្ស៊ី បារាំង អាល្លឺម៉ង់ ប្រេស៊ីល ទួរគី និងអ៊ីរ៉ង់។ ចំណែកប្រទេសដែលមានអ្នកស្លាប់លើសពី 10,000នាក់ រួមមាន5ប្រទេស គឺសហរដ្ឋអាមេរិក អង់គ្លេស អ៊ីតាលី អេស្ប៉ាញ និងប្រទេសបារាំង៕

ប្រភព៖ សារព័ត៌មានបរទេស

May 8, 2020

អ្នកនាំពាក្យប្រធានាធិបតីប្រេស៊ីល ឆ្លងវីរុសCOVID-19! ប្រធានាធិបតីក៏ត្រូវគេសង្ស័យថាឆ្លងមេរោគនេះដែរ

ឧត្ដមសេនីយ៍ Otavio Rego Barros ដែលជាអ្នកនាំពាក្យរបស់ប្រធានាធិបតីប្រេស៊ីល គឹជាមន្ត្រីថ្មីបំផុតនៅក្នុងរដ្ឋាភិបាលរបស់លោក Bolsonaro ត្រូវឆ្លង COVID-19 ដែលវីរុសនេះ ត្រូវបានប្រធានាធិបតីចាត់ទុកថា គ្រាន់តែជាគ្រុនផ្ដាសាយរដូវ (Seasonal influenza) តែប៉ុណ្ណោះ។

ឧត្ដមសេនីយ៍ Otavio Rego Barros មានអាយុ59ឆ្នាំ ដែលជាមន្ត្រីជាន់ខ្ពស់ម្នាក់របស់រដ្ឋាភិបាលលោក Bolsonaro “កំពុងនៅឯផ្ទះ ទៅតាមការណែនាំរបស់ក្រសួងសុខាភិបាល” បន្ទាប់ពីទទួលបានលទ្ធផលវិជ្ជមានជាមួយ COVID-19 កាលពីថ្ងៃទី5ឧសភាកន្លងទៅ។ នេះបើតាមការិយាល័យប្រធានាធិបតីប្រេស៊ីល ដែលបានឱ្យដឹងកាលពីថ្ងៃទី6ឧសភា។

គិតមកដល់បច្ចុប្បន្ន មន្ត្រីរដ្ឋាភិបាលរបស់លោក Bolsonaro ជាង20រូបហើយដែលបានឆ្លងវីរុសកូរ៉ូណា ក្នុងនោះក៏មានជំនួយការផ្នែកសារព័ត៌មាន Fabio Wajngarten និងរដ្ឋមន្ត្រីក្រសួងសន្តិសុខជាតិ Augusto Heleno ផងដែរ។ ប្រធានាធិបតី Bolsonaro បានថ្លែងថា លោកបានធ្វើតេស្ត និងទទួលបានលទ្ធផលអវិជ្ជមាន ប៉ុន្តែ លោកមិនបានប្រកាសជាសាធារណៈអំពីលទ្ធផលនៃការពិនិត្យសុខភាពនេះនោះទេ។

ទីភ្នាក់ងារសារព័ត៌មាន Estado de Sao Paulo របស់ប្រទេសប្រេស៊ីល បានដាក់ពាក្យបណ្ដឹងទៅតុលាការ ដើម្បីបង្ខំឱ្យប្រធានាធិបតី Bolsonaro ប្រកាសអំពីលទ្ធផលនៃការធ្វើតេស្តរកវីរុសកូរ៉ូណារបស់លោក ដោយយល់ថា សុខភាពរបស់ប្រធានាធិបតីគឺជាបញ្ហាដែលសាធារណជនមានការចាប់អារម្មណ៍។ ចៅក្រមនៃតុលាការសហព័ន្ធ កាលពីថ្ងៃទី6ឧសភា បានចេញសាលក្រមមួយ គាំទ្រដល់កាសែតខាងលើ និងបានច្រានចោលបណ្ដឹងឧទ្ធរណ៍របស់រដ្ឋាភិបាលផងដែរ។ ក៏ប៉ុន្តែ រដ្ឋបាលរបស់លោក Bolsonaro ត្រូវបានគេជឿថានឹងប្ដឹងទៅតុលាការថ្នាក់លើបន្តទៀត។

ប្រធានាធិបតីប្រេស៊ីល បានចាត់ទុក COVID-19 ថាដូចទៅនឹងជំងឺផ្ដាសាយរដូវ ហើយក៏ធ្លាប់បានប្រកាសថា ឥទ្ធិពលអាក្រក់របស់វីរុសនេះ ត្រូវបានគេបំផ្លើសហួសហេតុដោយសារតែនយោបាយ។ លោកប្រធានាធិបតីរូបនេះ ក៏តែងតែបង្ហាញភាពខ្វះអំណត់ចំពោះបម្រាមគោចរដែលត្រូវបានដាក់ចេញដោយអភិបាលរដ្ឋនានានៅក្នុងប្រទេសនេះ និងបានថ្កោលទោសទៅលើ “ភាពស្លន់ស្លោ” ជុំវិញ COVID-19 ព្រមទាំងបានតឿនអភិបាលរដ្ឋនានា ឱ្យបើកដំណើរការសេដ្ឋកិច្ចឡើងវិញទៀតផង។

បច្ចុប្បន្ន COVID-19 បានសម្លាប់មនុស្សជាង365,000នាក់ ក្នុងចំណោមអ្នកជំងឺកូរ៉ូណាជាង3.8លាននាក់នៅក្នុងពិភពលោក។ ប្រេស៊ីលគឺជាសម្បុកមេរោគធំជាងគេបង្អស់នៅតំបន់ខាងត្បូងនៃទ្វីបអាមេរិក ដោយមានអ្នកជំងឺជាង8,500នាក់ ក្នុងនោះមានជាង126,000នាក់បានបាត់បង់ជីវិត៕

ប្រភព៖ សារព័ត៌មានបរទេស

May 7, 2020

លោក ត្រាំ ទទួលស្គាល់វិបត្តិកូវីដ-19 ថា ពិតជាអាក្រក់ខ្លាំងជាង “ភើល ហាប៊ើរ និង 9/11” និងក្រឡាស់សម្ដី មិនលុបចោលក្រុមប្រយុទ្ធប្រឆាំងវីរុស…

លោកប្រធានាធិបតី ដូណាល់ ត្រាំ នៃសហរដ្ឋអាមេរិក កាលពីថ្ងៃពុធ(ទី6 ឧសភា)ម្សិលមិញ បានទទួលស្គាល់ថា រោគរាតត្បាតដ៏ធំកូវីដ-19 បានធ្វើឱ្យកើតមានផលប៉ះពាល់ដល់ប្រទេសអាមេរិក ធ្ងន់ធ្ងរជាងហេតុការណ៍វាយប្រហារកោះ ភើល ហាប៊ើរ កាលពីសម័យសង្គ្រាមលោកទី2 ឬសូម្បីតែសោកនាដកម្ម 9/11 ទៅទៀត ព្រមទាំងបានបដិសេធព័ត៌មានដែលថា លោកត្រៀមរំលាយចោលក្រុមចំពោះកិច្ចប្រយុទ្ធប្រឆាំងវីរុសកូរ៉ូណារបស់សេតវិមាន និងតាំងគោលដៅ រីស្តាតសេដ្ឋកិច្ច។

លោកថ្លែងប្រាប់អ្នកយកព័ត៌មាននៅឯសេតវិមានថា “យើងកំពុងជួបប្រទះនឹងការវាយប្រហារក៏អាក្រក់បំផុត តាមដែលធ្លាប់កើតមានកន្លងមកនៅក្នុងប្រទេសរបស់យើង វាជាពិតជាការវាយប្រហារដ៏អាក្រក់បំផុត តាមដែលយើងធ្លាប់ប្រឈមកន្លងមក” លោកបន្តថា “វាអាក្រក់ជាង ភើល ហាប៊ើរ វាអាក្រក់ជាងហេតុការណ៍ វើលថ្រេដ សេនធើរ ទៅទៀត”

យុទ្ធនាការ ភើល ហាប៊ើរ គឺជាការវាយប្រហារខាងយោធាដ៏គួរឱ្យចម្លែកចិត្ត របស់កងកម្លាំងពិសេស(ស្ម័គ្រស្លាប់)ខាងផ្លូវអាកាស នៃកងទ័ពជើងទឹកចក្រពត្តិជប៉ុន ទៅលើមូលដ្ឋានកងទ័ពជើងទឹកសហរដ្ឋអាមេរិកនៅកំពង់ផែ ភើល ហាប៊ើរ កោះហាវ៉ៃ ក្នុងឆ្នាំ1941 ដែលហេតុការណ៍នេះ បានក្លាយជាការអូសប្រទេសអាមេរិកឱ្យធ្លាក់ចូលសង្គ្រាមលោកលើកទី2។

ខណៈដែលហេតុការណ៍វាយប្រហារភេរវកម្ម ថ្ងៃទី11 ខែកញ្ញា(ខែ9) ឆ្នាំ2001 ដែលបានសម្លាប់ជីវិតមនុស្សនៅក្នុងសហរដ្ឋអាមេរិកប្រមាណជា 3,000នាក់ ភាគច្រើនស្ថិតនៅក្នុងអគារ វើលថ្រេដ សេនធើរ ក្នុងទីក្រុងនីវយ៉ក គឺមានមូលហេតុមកពីសង្គ្រាមផ្សេងៗរបស់អាមេរិក និងប្រតិបត្តិការតតាំងប្រឆាំងការបង្កវិនាសកម្មនៅក្នុងប្រទេសអ៊ីរ៉ាក់ អាហ្វហ្គានីស្ថាន និងប្រទេសផ្សេងៗទៀត។

មកដល់ពេលនេះ មានពលរដ្ឋអាមេរិកាំងជាង 70,000នាក់ហើយ ដែលត្រូវអស់ជីវិតក្នុងអំឡុងការឆ្លងរាលដាលរបស់រោគរាតត្បាតដ៏ធំ ដែលមានអាការស្រដៀងនឹងជំងឺគ្រុនផ្ដាសាយធំ ក្នុងខណៈដែលការលុបចោលវិធានការរក្សាគម្លាតឆ្ងាយពីគ្នាខាងសង្គម អាចនឹងធ្វើឱ្យពលរដ្ឋអាមេរិកាំងកាន់តែស្លាប់ច្រើនឡើង…យ៉ាងណាក៏ដោយ កាលពីថ្ងៃពុធ(ទី6ឧសភា) មើលទៅលោក ត្រាំ ហាក់ដូចជាក្រឡាស់សម្ដីពីផែនការដែលបានថ្លែងកាលពីពេលមុននេះ។

កាលពីមុន សេតវិមានបានចង្អុលបង្ហាញថា ក្រុមការងារលំដាប់ខ្ពស់មួយ អាចនឹងត្រូវរំលាយចោលក្នុងអំឡុងប្រមាណជាដើមខែមិថុនា ខណៈដែលលោកត្រាំ បានបញ្ជូនសញ្ញាឱ្យដឹងថា វាដល់ពេលហើយ ដែលនឹងត្រូវងាកចេញពីវិបត្តិផ្នែកសាធារណៈសុខាភិបាល និងបែរតម្រង់ឆ្ពោះទៅរកការបើកសេដ្ឋកិច្ចឡើងវិញ។

តែយ៉ាងណាក៏ដោយ លោកត្រាំបានសរសេរនៅក្នុងធ្វីតធើរជាដំណាក់ៗ នៅក្នុងថ្ងៃពុធ(ទី6ឧសភា) ក្នុងអំឡុងពេលដែលក្រុមការងារចំពោះកិច្ចប្រយុទ្ធប្រឆាំងនឹងវីរុសកូរ៉ូណា បានទទួលជោគជ័យយ៉ាងធំធេង ថា “នឹងធ្វើការបន្តទៅមុខទៀតយ៉ាងគ្មានពេលកំណត់ ព្រមជាមួយគោលដៅបើកប្រទេសរបស់យើងឡើងវិញយ៉ាងមានសុវត្ថិភាព”។

…និងទោះជាយ៉ាងនេះក្ដី លោកប្រធានាធិបតីរូបនេះ បានប្រាប់ថា លោកអាចនឹង “បន្ថែម ឬបន្ថយចំនួនមនុស្ស” ក្នុងក្រុមការងារឈុតនេះ ដែលរឿងនេះបានបង្ហាញឱ្យឃើញថា ស្ថានការណ៍មិនទាន់នឹងនរនៅឡើយទេ…៕

ប្រភព៖ សាព័ត៌មានបរទេស

May 7, 2020

ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?(តចប់)

រោគរាតត្បាតដែលត្រូវបានបំភ្លេចចោល?

ទោះជាបានផ្ដល់មេរៀនដល់មនុស្សក្នុងពិភពលោកយ៉ាងច្រើនហើយក៏ដោយ តែមើលទៅហាក់ដូចជាជំងឺគ្រុនផ្ដាសាយធំអេស្ប៉ាញ បានក្លាយជាជំងឺមួយដែលត្រូវបានគេបំភ្លេចចោល។

ដូចគ្នានឹងកូវីដ-19ដែរ ជំងឺគ្រុនផ្ដាសាយធំអេស្ប៉ាញបានធ្វើឱ្យកើតមានផលប៉ះពាល់ដល់បុគ្គលដែលមានកេរ្តិ៍ឈ្មោះល្បីល្បាញជាច្រើន ដូចជា ប្រធានាធិបតី អ៊ែនឌ្រូ វីលសុន របស់សហរដ្ឋអាមេរិក និងលោកនាយករដ្ឋមន្ត្រី ឡយដ៍ ចច របស់អង់គ្លេស ដែលទាំង 2នាក់សុទ្ធតែធ្លាក់ខ្លួនឈឺដោយសារជំងឺគ្រុនផ្ដាសាយធំអេស្ប៉ាញដូចគ្នា ខណៈដែលលោកប្រធានាធិបតី រូឌ្រីហ្គេស អាល់វីស របស់ប្រទេសប្រេស៊ីល បានស្លាប់ដោយសារជំងឺដ៏សាហាវនេះ។

យ៉ាងណាក៏ដោយ ជំងឺគ្រុនផ្ដាសាយធំអេស្ប៉ាញ បែរជាត្រូវបិទបាំងចំណាប់អារម្មណ៍របស់មនុស្សម្នាក្នុងពិភពលោកដោយសារសង្គ្រាមលោកលើកទី1…1ផ្នែក គឺដោយសារតែខណៈពេលនោះ រដ្ឋបាលនៃប្រទេសជាច្រើនបានប្រើវិធានការសិនស៊ើរ ឬកាត់ចោល មិនឱ្យសារព័ត៌មានរាយការណ៍អំពីផលប៉ះពាល់ដោយសារជំងឺរាតត្បាតនៅគ្រានោះក្នុងអំឡុងពេលសង្គ្រាម។

ក្រៅពីត្រូវបានរារាំងការរាយការណ៍ព័ត៌មានហើយ ការឆ្លងរាតត្បាតរបស់ជំងឺគ្រុនផ្ដាសាយធំអេស្ប៉ាញ ថែមទាំងស្ទើរតែមិនត្រូវបានកត់ត្រាទុកនៅក្នុងសៀវភៅប្រវត្តិសាស្ត្រ ឬវប្បធម៌សម័យនិយមផ្សេងៗ ដូចជា បទចម្រៀង ឬស្នាដៃសិល្បៈផ្សេងៗឡើយ។

តែមានម្នាក់ ក្នុងចំណោមសិល្បករដែលបានបង្កើតស្នាដៃទុកក្នុងអំឡុងពេលនោះគឺ លោក អ៊ែដវើដ មុនហ្ស៍ វិចិត្រករជនជាតិន័រវេយ៍ ដែលបានគូររូបរបស់ខ្លួនឯង ក្នុងខណៈពេលកំពុងឈឺដោយសារជំងឺគ្រុនផ្ដាសាយធំអេស្ប៉ាញ។

ទោះជាការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញ អាចត្រូវបានបំភ្លេច ឬរលុបបាត់ពីការចងចាំរបស់មនុស្សម្នា ឬបាត់ពីក្នុងទំព័រប្រវត្តិសាស្ត្រពិភពលោកក៏ពិតមែន តែការឆ្លងរាលដាលដ៏ធំរបស់មេរោគកូវីដ-19 ដែលកំពុងកើតឡើងនៅពេលនេះ បានរើកកាយការចងចាំ ដាស់ស្មារតី និងដាស់តឿនមនុស្សលោក ឱ្យដឹងពីភាពធ្ងន់ធ្ងររបស់រោគរាតត្បាតដែលបាននាំមហាហាយនៈមកឱ្យពិភពលោកកាលពីជាង 100ឆ្នាំមុនដែរ៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 7, 2020

កងទ័ពអាមេរិកាំងដកខ្លួនចូល “ពួនក្រោមដី” ដើម្បីគេចពីCOVID-19 បំណងការពារកម្លាំង ត្រៀមសម្រាប់ករណីអាក្រក់បំផុត

ឧត្តមសេនីយ៍ Pete Fesler កាលពីចុងខែកុម្ភៈ បានត្រៀមឱ្យទាហានរបស់ខ្លួនប្រមាណជា130នាក់ ចូលរួមក្នុងយុទ្ធនាការទាក់ទិននឹងវិធានការទប់ស្កាត់វីរុសCOVID-19 ដោយការដកថយចូលទៅធ្វើការក្រោមដី ដើម្បីការពារខ្លួន និងរក្សាកម្លាំងស្នូលរបស់ខ្លួន។

Pete Fesler គឺជាមេបញ្ជាការជាន់ខ្ពស់នៃបញ្ជាការដ្ឋានកងទ័ពការពារអវកាស និងដែនអាកាសអាមេរិកភាគខាងជើង ដែលហៅថា NORAD (North American Aerospace Defense Command) ដែលមានមូលដ្ឋាននៅតំបន់ Colorado Spring ក្នុងរដ្ឋ Colorado សហរដ្ឋអាមេរិក។ កងកម្លាំងរបស់ឧត្តមសេនីយ៍រូបនេះ កំពុងដកថយចូលទៅនៅក្រោមដី ដើម្បីបង្ខាំងខ្លួនពីពិភពខាងក្រៅ ក្នុងបំណងទប់ស្កាត់ការឆ្លងវីរុសCOVID-19។ NORAD មានភារកិច្ចការពារសហរដ្ឋអាមេរិកពីការវាយប្រហារដោយកាំជ្រួចផ្លោង ឬការគំរាមពីដែនអាកាស និងអវកាស។

មន្ទីរបញ្ចកោណសង្ឃឹមថា កាយវិការដូចជានៅបញ្ជាការដ្ឋានរបស់ Fesler នឹងជួយទប់ស្កាត់COVID-19 មិនឱ្យវាយលុកចូលក្នុងជួរកងទ័ពដែលត្រូវបានហ្វឹកហាត់ជាពិសេសរបស់កងទ័ពសហរដ្ឋអាមេរិក។

បើទោះជាមន្ទីរបញ្ចកោណដែលជាអគ្គបញ្ជាការដ្ឋាននៃកងទ័ពសហរដ្ឋអាមេរិក បានបញ្ចេញទាហានរាប់ម៉ឺននាក់ដើម្បីជួយដល់ការប្រយុទ្ធប្រឆាំងនឹងវីរុសកូរ៉ូណាក្នុងប្រទេស ប៉ុន្តែ COVID-19នេះ នៅតែបង្កឧបសគ្គដល់ការបំពេញភារកិច្ចស្នូលរបស់កងទ័ពអាមេរិកាំង។ វីរុសនេះបានធ្វើឱ្យនាវាផ្ទុកយន្តហោះចម្បាំងមួយគ្រឿងរបស់សហរដ្ឋអាមេរិកត្រូវគាំងដំណើរការដោយសារមានទាហានជាច្រើនបានឆ្លងមេរោគ ចំណែកទាហានថ្មីក៏ត្រូវថយចុះច្រើន បណ្ដាលឱ្យសមយុទ្ធអន្តរជាតិនានាត្រូវពន្យារពេល ឬកាត់បន្ថយទំហំ។ គិតមកដល់បច្ចុប្បន្ន ទាហានអាមេរិកាំងជិត5,000នាក់បានឆ្លងវីរុសCOVID-19 ក្នុងនោះមានទាហាន2នាក់បានបាត់បង់ជីវិត។

ដើម្បីកាត់បន្ថយឥទ្ធិពលរបស់វីរុសCOVID-19 មន្ទីរបញ្ចកោណបានចេញបញ្ជា ហាមមិនឱ្យកងទ័ពអាមេរិកាំងផ្លាស់ទីទូទាំងសកលលោក និងបានបញ្ចេញវិធានការផ្សេងៗទៀត។ ចំពោះអង្គភាពពិសេសដូចជា NORAD ជាដើម ថ្នាក់ដឹកនាំមានប្រតិកម្មដោយឡែក និងជាពិសេស។

បុគ្គលិកមួយផ្នែករបស់អង្គភាពដែលគ្រប់គ្រងដោយឧត្តមសេនីយ៍ Fesler ត្រូវបានបញ្ជូនទៅ “លាក់ខ្លួន” និងធ្វើការនៅក្នុងបន្ទប់ក្រោមដីនៅតំបន់ភ្នំ Cheyenne ដែលត្រូវបានសាងសង់ឡើងកាលពីសម័យសង្គ្រាមត្រជាក់ ដើម្បីគេចពីវីរុសកូរ៉ូណា។ ពួកគេត្រូវបានបញ្ជុនមកកាន់ទីនេះកាលពី2ខែមុខ ដើម្បីត្រៀមក្នុងករណីវីរុសបានធ្វើឱ្យគាំងដំណើរការនៅមូលដ្ឋាន Peterson ក្នុងរដ្ឋ Colorado។

លោក Fesler ថ្លែងថា “បន្ទាប់ពីបានដឹងថា COVID-19 ឆ្លងរាលដាលខ្លាំង យើងយល់ថា ត្រូវតែមានវិធានការដើម្បីត្រៀម និងការពារកម្លាំងក្នុងករណីធ្លាក់ចូលក្នុងស្ថានភាពអាក្រក់បំផុត”៕

ប្រភព៖ សារព័ត៌មានបរទេស

May 7, 2020

Category: សុខភាព