សុខភាព - La Reine Media

COVID-19 នៅអាស៊ីអាគ្នេយ៍! តារាងស្ថិតិនៃករណីឆ្លង និងស្លាប់ដោយសារវីរុសកូរ៉ូណា

បណ្ដាប្រទេសនៅតំបន់អាស៊ីភាគអាគ្នេយ៍ទាំង11ប្រទេស បានរកឃើញអ្នកជំងឺCOVID-19 សរុបយ៉ាងតិច 59.748នាក់ និងអ្នកស្លាប់សរុបយ៉ាងតិច1.910នាក់។

សិង្ហបុរីដែលជាសម្បុកមេរោគកូរ៉ូណាធំជាងគេបង្អស់ក្នុងតំបន់អាស៊ីអាគ្នេយ៍ បានរាយការណ៍ថា មានអ្នកជំងឺថ្មីចំនួន451នាក់បន្ថែមទៀត នាំឱ្យតួលេខនៃអ្នកជំងឺសរុបរបស់ប្រទេសនេះឡើងដល់23,822នាក់។ ចំណែកអ្នកស្លាប់សរុបដោយសារវីរុសCOVID-19 នៅសិង្ហបុរីបានកើនដល់21នាក់ ខណៈដែលអ្នកជំងឺបានជាសះស្បើយមានចំនួន2,721នាក់។

កំណើននៃអ្នកជំងឺCOVID-19 ក្នុងប្រទេសជិតពាក់កណ្ដាលនៅអាស៊ីអាគ្នេយ៍ នៅតែបន្តកើនឡើង ខណៈដែលប្រទេសប្រមាណជាជិតពាក់កណ្ដាលផ្សេងទៀតក្នុងតំបន់នេះ រួមមាន កម្ពុជា វៀតណាម ទីម័រខាងកើត និងឡាវ ហាក់កំពុងស្ងប់ស្ងាត់ ដោយមកដល់បច្ចុប្បន្ន មិនទាន់មានករណីស្លាប់ដោយសារវីរុសCOVID-19 ដែលត្រូវបានគេរាយការណ៍ជាផ្លូវការនៅឡើយ។

ខាងក្រោមនេះគឺជាតារាងដែលបង្ហាញអំពីតួលេខនៃអ្នកជំងឺ និងអ្នកស្លាប់ដោយសារវីរុសCOVID-19 នៅតំបន់អាស៊ីអាគ្នេយ៍៖

ប្រភព៖ សារព័ត៌មានបរទេស

May 12, 2020

COVID-19! អ្នកទោសអាមេរិកាំង ចម្លងវីរុសដល់ខ្លួនឯង ដើម្បីបានរួចពីពន្ធនាគារ

អ្នកទោសមួយចំនួននៅឯពន្ធនាគារក្នុងរដ្ឋ California នៃសហរដ្ឋអាមេរិក ត្រូវបានសមត្ថកិច្ចរកឃើញថា មានការព្យាយាមក្នុងការចម្លងវីរុសCOVID-19 មកលើខ្លួនឯង ក្នុងបំណងជួយឱ្យពួកគេបានរួចខ្លួនពីពន្ធនាគារ។

ស្នងការនគរបាលក្រុង Los Angeles នៃរដ្ឋ California លោក Alex Villanueva កាល ពីថ្ងៃទី11ឧសភា បានឱ្យដឹងថា សមត្ថកិច្ចមានភ័ស្តុតាងបញ្ជាក់ថា អ្នកទោសមួយចំនួននៅក្នុងបណ្ដាពន្ធនាគារនៅ Los Angeles កំពុងព្យាយាមដើម្បីធ្វើឱ្យពួកគេបានឆ្លងវីរុសCOVID-19។

នៅក្នុងឃ្លីបវីដេអូដែលត្រូវបានសមត្ថកិច្ចចាត់ទុកជាភ័ស្តុតាង គេឃើញថា អ្នកទោសមួយចំនួនបាននាំគ្នាផឹកទឹកដែលត្រូវបានដាក់នៅក្នុងបំពង់ទឹកមួយដែលមានផ្ទុកវីរុសCOVID-19។ ក្រោយមក ពួកគេបានលាក់បំពង់ទឹកនេះ និងរង់ចាំការដោះលែងព្រោះឆ្លងវីរុស។

Villanueva បានប្រាប់សារព័ត៌មាន Los Angeles Times ថា “ពិតជាមានការពិបាកទ្រាំណាស់នៅពេលដឹងថា មានមនុស្សជាច្រើនកំពុងព្យាយាមចម្លងមេរោគមកឱ្យខ្លួនពួកគេផ្ទាល់”។

សកម្មភាពនៃល្បិចខាងលើនេះត្រូវបានថតជាវីដេអូ បន្ទាប់ពីសមត្ថកិច្ចទទួលបានព័ត៌មានសម្ងាត់ពីអ្នកទោសម្នាក់ដែលបានរាយការណ៍ថា ខ្លួនបានឃើញសម្ភារមួយចំនួនដែលអ្នកទោសផ្សេងៗជឿថា វាអាចចម្លងមេរោគកូរ៉ូណាទៅឱ្យពួកគេ។

ប្រភពព័ត៌មានពីសមត្ថកិច្ចបានឱ្យដឹងថា អ្នកទោសដែលបានរាយការណ៍នេះ ហាក់ត្រូវបានអ្នកទោសដទៃវាយដំ ក្រោយពីបានរំខានដល់សកម្មភាពនៃការព្យាយាមបង្កជំងឺដូចដែលបានរៀបរាប់ខាងលើ។

រាប់ចាប់ពីវីរុសCOVID-19 បានឆ្លងរាលដាលនៅសហរដ្ឋអាមេរិក មានអ្នកទោស357នាក់បានឆ្លងវីរុសនៅក្នុងបណ្ដាពន្ធនាគារនេះ ក្នុងចំណោមនោះ មានអ្នកទោស117នាក់បានជាសះស្បើយ។

ចំនួនអ្នកទោសនៅក្នុងតំបន់ Los Angeles ត្រូវបានកាត់បន្ថយដើម្បីទប់ស្កាត់ការឆ្លងវីរុសCOVID-19។ គិតត្រឹមចុងសប្ដាហ៍កន្លងទៅ បណ្ដាពន្ធនាគារដែលមានអ្នកទោសប្រមាណជា17,000នាក់ ពេលនេះនៅសល់ត្រឹម11,723នាក់ប៉ុណ្ណោះ៕

ប្រភព៖ សារព័ត៌មានបរទេស

May 12, 2020

COVID-19! តួលេខអ្នកស្លាប់នៅអាមេរិក ជិតស្មើនឹងតួលេខអ្នកជំងឺនៅប្រទេសចិន

សហរដ្ឋអាមេរិកបានរកឃើញអ្នកស្លាប់ថ្មីជិត1,000នាក់ នៅក្នុងរយៈពេល24ម៉ោងកន្លងទៅ ធ្វើឱ្យអ្នកស្លាប់សរុបឡើងដល់ជិត82,000នាក់ នៅក្នុងចំណោមអ្នកជំងឺជិត1.4លាននាក់។

បច្ចុប្បន្ន សហរដ្ឋអាមេរិកមានអ្នកជំងឺ COVID-19 សរុប1,384,033នាក់ កើន18,501ករណីក្នុងរយៈពេល24ម៉ោងចុងក្រោយនេះ។ ចំនួនអ្នកស្លាប់នៅប្រទេសនេះក៏បានកើន971នាក់បន្ថែមទៀត នាំឱ្យតួលេខអ្នកស្លាប់សរុបឡើងដល់81,703នាក់។ តួលេខអ្នកស្លាប់ដោយសារវីរុសកូរ៉ូណានៅសហរដ្ឋអាមេរិក ជិតស្មើនឹងតួលេខអ្នកជំងឺនៅប្រទេសចិន ដែលបច្ចុប្បន្នមានចំនួន82,918នាក់ ពោលគឺអ្នកជំងឺនៅប្រទេសចិន ច្រើនជាងអ្នកស្លាប់នៅសហរដ្ឋអាមេរិកត្រឹមតែ1,215នាក់ប៉ុណ្ណោះ។

ប្រធានាធិបតីសហរដ្ឋអាមេរិក លោក Donald Trump កាលពីថ្ងៃទី11ឧសភា បានរិះទៅលើបក្សប្រជាធិបតេយ្យទាក់ទងនឹងការពន្យារការបើកទ្វារសេដ្ឋកិច្ចឡើងវិញ ដោយបានចោទបក្សប្រឆាំងថា កំពុងកេងចំណេញផ្នែកនយោបាយ។ លោក Trump ក៏បានជំរុញឱ្យបណ្ដារដ្ឋបន្ធូរបន្ថយបម្រាមគោចរ និងបើកទ្វារសេដ្ឋកិច្ចឡើងវិញកាន់តែឆាប់ កាន់តែល្អ។

ការស្នើរបស់លោក Trump ត្រូវបានធ្វើឡើងខណៈដែលអ្នកជំនាញផ្នែកសុខាភិបាលបានព្រមានអំពីហានិភ័យនៃការផ្ទុះឆ្លងរាលដាលសាជាថ្មីនៃវីរុសCOVID-19 នៅប្រទេសនេះ និងបានស្នើឱ្យមានការប្រុងប្រយ័ត្នខ្ពស់នៅពេលបើកទ្វារសេដ្ឋកិច្ចឡើងវិញ៕

ប្រភព៖ សារព័ត៌មានបរទេស

May 12, 2020

មនុស្សជិត287,000នាក់ស្លាប់ដោយសារ COVID-19 នៅទូទាំងពិភពលោក

វីរុសCOVID-19 បានសម្លាប់មនុស្សជិត287,000នាក់ ខណៈបានបង្កជំងឺដល់មនុស្សជាង4.2លាននាក់នៅទូទាំងពិភពលោក ក្នុងនោះ ប្រទេសចំនួន10 មានអ្នកជំងឺលើសពី100,000នាក់ និងប្រទេសចំនួន6 មានអ្នកស្លាប់លើសពី10,000នាក់។

នៅលើពិភពលោក មានប្រទេសនិងដែនដីចំនួន212 ត្រូវបានរាយការណ៍ថា មានមនុស្ស4,246,795នាក់បានឆ្លងវីរុសCOVID-19 ក្នុងនោះមាន286,740នាក់បានបាត់បង់ជីវិត។ រយៈពេល24ម៉ោងចុងក្រោយនេះ ពិភពលោកបានរកឃើញអ្នកជំងឺថ្មីចំនួន72,044នាក់ និងអ្នកស្លាប់ថ្មីចំនួន3,129នាក់។ ចំណែកអ្នកដែលបានជាសះស្បើយពីជំងឺកូរ៉ូណានេះ បានឡើងដល់1,522,034នាក់។ តួលេខនេះគឺយោងទៅតាមស្ថិតិរបស់ Worldometer។

ទ្វីបអឺរ៉ុបមានមនុស្ស1,653,012នាក់បានធ្លាក់ខ្លួនឈឺដោយសារឆ្លង COVID-19 ខណៈដែលអាមេរិកខាងជើងមានអ្នកជំងឺសរុប1,517,580នាក់ ទ្វីបអាស៊ីមាន683,637នាក់ អាមេរិកខាងត្បូងមាន319,297នាក់ និងទ្វីបអាហ្វ្រិកមាន
67,778នាក់។

ប្រទេសចំនួន10ដែលមានអ្នកជំងឺកូរ៉ូណាលើសពី100,000នាក់ រួមមានសហរដ្ឋអាមេរិក អេស្ប៉ាញ អង់គ្លេស អ៊ីតាលី រុស្ស៊ី បារាំង អាល្លឺម៉ង់ ប្រេស៊ីល ទួរគី និងអ៊ីរ៉ង់។

ចំណែកប្រទេសដែលមានអ្នកស្លាប់ដោយសារ COVID-19 លើសពី10,000នាក់ មានចំនួន6ប្រទេស រួមមានសហរដ្ឋអាមេរិក អង់គ្លេស អ៊ីតាលី អេស្ប៉ាញ បារាំង និងប្រេស៊ីល៕

ប្រភព៖ សារព័ត៌មានបរទេស

May 12, 2020

ជាង4.1លាននាក់ឆ្លងវីរុសCOVID-19 នៅទូទាំងពិភពលោក

គិតមកដល់បច្ចុប្បន្ន ពិភពលោកមានអ្នកស្លាប់ជាង283,000នាក់ នៅក្នុងចំណោមអ្នកជំងឺ COVID-19 ជាង4.1លាននាក់។

ប្រទេសនិងដែនដីចំនួន212 ក្នុងពិភពលោក ត្រូវបានរាយការណ៍ថា មានអ្នកឆ្លងវីរុសសរុបឡើងដល់4,174,751នាក់ និងអ្នកស្លាប់ដោយសារ COVID-19 ចំនួន283,611នាក់ ក្នុងនោះមានអ្នកជំងឺថ្មី77,759នាក់ និងអ្នកស្លាប់ថ្មីមាន3,472នាក់។ អ្នកជំងឺដែលបានជាសះស្បើយ មានចំនួន1,483,147នាក់។ នេះបើតាមស្ថិតិរបស់ Worldemeters។

ទ្វីបអឺរ៉ុបទាំងមូលមានអ្នកជំងឺកូរ៉ូណាសរុប1,628,576នាក់ ខណៈដែលអាមេរិកខាងជើងមាន1,496,765នាក់ អាមេរិកខាងត្បូងមាន310,070នាក់ ទ្វីបអាស៊ីមាន668,733នាក់ និងទ្វីបអាហ្វ្រិកមាន64,750នាក់។

ប្រទេសដែលមានអ្នកស្លាប់ដោយសារវីរុសCOVID-19 លើសពី10,000នាក់ មានចំនួន6ប្រទេស រួមមាន សហរដ្ឋអាមេរិក អង់គ្លេស អ៊ីតាលី អេស្ប៉ាញ បារាំង និងប្រទេសប្រេស៊ីល។

ចំណែកប្រទេសដែលមានអ្នកជំងឺ COVID-19 លើសពី100,000នាក់ មានចំនួន10ប្រទេស ក្នុងនោះ សហរដ្ឋអាមេរិកឈរលំដាប់លេខ1 ដោយមានអ្នកជំងឺសរុប 1,365,532នាក់ ខណៈប្រទេសអ៊ីរ៉ង់ឈរលំដាប់លេខ10 ដោយមានអ្នកជំងឺសរុប107,603នាក់៕

ប្រភព៖ សារព័ត៌មានបរទេស

May 11, 2020

អតីតប្រធានាធិបតីអាមេរិកាំង រិះគន់លោក Trump យ៉ាងចាស់ដៃ ខណៈជាង80,000នាក់បានស្លាប់ដោយសារCOVID-19 នៅសហរដ្ឋអាមេរិក

អតីតប្រធានាធិបតីសហរដ្ឋអាមេរិក លោក Barack Obama បានបញ្ចេញមតិដ៏កម្រមួយ រិះគន់ទៅលើវិធីទប់ទល់នឹង COVID-19 របស់រដ្ឋាភិបាលលោក Trump ក្នុងពេលដែលវីរុសកូរ៉ូណានេះបានសម្លាប់ពលរដ្ឋអាមេរិកាំងជាង80,000នាក់។

ទិន្នន័យនៅលើគេហទំព័រ Worldometers បានបង្ហាញថា គិតមកដល់បច្ចុប្បន្ន តួលេខនៃអ្នកស្លាប់ដោយសារវីរុសCOVID-19 នៅសហរដ្ឋអាមេរិក បានឡើងដល់80,004នាក់ ក្នុងនោះមានអ្នកស្លាប់ថ្មីជិត1.389នាក់។ ប្រទេសនេះបានរកឃើញអ្នកជំងឺថ្មីជាង24,000នាក់ ធ្វើឱ្យតួលេខនៃអ្នកជំងឺសរុបឡើងដល់1,346,332នាក់។

ទស្សនាវដ្ដី Forbes ថ្ងៃនេះ បាននាំពាក្យអតីតមន្ត្រីជាន់ខ្ពស់3រូបដែលធ្លាប់ធ្វើការក្នុងរដ្ឋាភិបាលលោក Barack Obama បានឱ្យដឹងថា លោក Obama បានរិះគន់យ៉ាងខ្លាំងទៅលើវិធីប្រយុទ្ធប្រឆាំងនឹងវីរុសCOVID-19 របស់រដ្ឋាភិបាលលោក Donald Trump ដោយបានហៅវិធីដែលលោក Trump ប្រើប្រាស់នោះថាជា “គ្រោះមហន្តរាយសុទ្ធសាធ” (an absolute chaotic disaster)។

លោក Obama ថ្លែងថា ប្រការនេះគឺជាការក្រើនរំឭកមួយចំពោះមូលហេតុដែលគេត្រូវការការដឹកនាំប្រកបដោយភាពខ្លាំងក្លារបស់រដ្ឋាភិបាល ក្នុងការប្រឈមនឹងវិបត្តិសកល។

លោក Obama បានថ្លែងថា “ការបោះឆ្នោតដែលជិតមកដល់ គឺពិតជារឿងសំខាន់ ព្រោះថា អ្វីដែលយើងកំពុងប្រឈមមុខននេះ មិនមែនជាបុគ្គលមួយរូប ឬបក្សនយោបាយមួយក្រុមនោះទេ។ វាគឺជានិន្នាការយូរអង្វែង ក្នុងនោះមានភាពអត្មានិយម រើសអើង និងការចាត់ទុកអ្នកដទៃជាសត្រូវ។ នេះគឺជាផ្នែកមួយនៃមូលហេតុដែលនាំឱ្យមានប្រតិកម្មទៅនឹងវិបត្តិសកលនេះប្រកបដោយភាពទន់ខ្សោយ។ល។ នេះគឺជា “គ្រោះមហន្តរាយសុទ្ធសាធ”។

ក៏ប៉ុន្តែ ជំនួយការផ្នែកសារព័ត៌មានរបស់សេតវិមាន លោកស្រី Kayleigh McEnany បានច្រានចោលការរិះគន់របស់លោក Obama។ លោកស្រីថ្លែងថា “វិធានការទប់ទល់នឹងមេរោគរាតត្បាត COVID-19 របស់លោកប្រធានាធិបតី Trump គឺជារឿងដែលមិនធ្លាប់មានពីមុនមក និងបានជួយសង្គ្រោះពលរដ្ឋអាមេរិកាំងជាច្រើនទៀតផង”៕

ប្រភព៖ សារព័ត៌មានបរទេស

May 10, 2020

ជាង280,000នាក់ស្លាប់ដោយសារ COVID-19 នៅទូទាំងពិភពលោក

ពិភពលោកទាំងមូលមានមនុស្សជាង280,000នាក់បានបាត់បង់ជីវិត ក្នុងចំណោមអ្នកជំងឺCOVID-19សរុប ជិត4.1លាននាក់។

យោងតាមស្ថិតិពី WorldMeters ប្រទេសនិងដែនដីចំនួន212ក្នុងពិភពលោក បានរកឃើញមនុស្សចំនួន4,096,992នាក់បានឆ្លងវីរុសកូរ៉ូណា COVID-19 និង280,139នាក់បានស្លាប់ដោយសារវីរុសនេះ ក្នុងនោះមានអ្នកជំងឺថ្មី88,882នាក់ និងអ្នកស្លាប់ថ្មីមានចំនួន4,355នាក់។ អ្នកជំងឺដែលបានជាសះស្បើយមានចំនួន1,431,446នាក់។

ទ្វីបអាមេរិកនៅតែជាសម្បុកមេរោគកូរ៉ូណាធំជាងគេក្នុងពិភពលោក ក្នុងនោះអាមេរិកខាងជើងមានអ្នកជំងឺសរុប1,472,075នាក់ អាមេរិកខាងត្បូងមាន297,930នាក់ អឺរ៉ុបមាន1,605,838នាក់ អាស៊ីមាន650,884នាក់ និងទ្វីបអាហ្វ្រិកមាន61,983នាក់។

ប្រទេសដែលមានអ្នកស្លាប់ដោយសារវីរុសCOVID-19 ច្រើនជាង10,000នាក់ បានកើនដល់6ប្រទេស រួមមាន សហរដ្ឋអាមេរិក80,032នាក់ អង់គ្លេស31,587នាក់ អ៊ីតាលី30,395នាក់ អេស្ប៉ាញ26,478នាក់ បារាំង26,310នាក់ និងប្រេស៊ីលមាន10,656នាក់។

ប្រទេសដែលមានអ្នកឆ្លងវីរុសCOVID-19 ច្រើនជាង100,000នាក់ មានចំនួន10ប្រទេស រួមមាន សហរដ្ឋអាមេរិក អង់គ្លេស រុស្ស៊ី បារាំង អាល្លឺម៉ង់ ប្រេស៊ីល ទួរគី និងអ៊ីរ៉ង់៕

ប្រភព៖ សារព័ត៌មានបរទេស

May 10, 2020

Trump ថា “WHO” ជាអាយ៉ងរបស់ចិន”

លោក Donald Trump ថ្លែងថា សហរដ្ឋអាមេរិកនឹងប្រកាសអំពីគម្រោងផ្ដល់ជំនួយដល់អង្គការសុខភាពពិភពលោកក្នុងពេលឆាប់ៗខាងមុខ បន្ទាប់ពីបានចោទប្រកាន់អង្គការនេះថាជា “អាយ៉ងរបស់ប្រទេសចិន”។

“អង្គការសុខភាពពិភពលោក(WHO) គឺជាអាយ៉ងរបស់ចិន” ប្រធានាធិបតីសហរដ្ឋអាមេរិកថ្លែងបែបនេះនៅក្នុងកម្មវិធីទូរទស្សន៍ Fox & Friends កាលពីថ្ងៃទី8ឧសភា។ លោកបន្តថា “យើងបានឱ្យប្រាក់ទៅ WHO ច្រើនជាងគេបង្អស់។ ហើយខ្ញុំបានស្ដីបន្ទោសអ្នកនយោបាយរបស់ខ្ញុំ។ និយាយដោយស្មោះ ក្រុមអ្នកនយោបាយរបស់យើង បានប្រឹងប្រែងខ្លាំងណាស់”។

ប្រធានាធិបតីអាមេរិកាំងយល់ថា ដោយសារតែបញ្ហាខាងលើនេះហើយ ដែលទីក្រុងវ៉ាស៊ីងតោននឹងធ្វើការពិនិត្យក្នុងពេលឆាប់ៗខាងមុខ ដើម្បីសម្រេចចិត្តទៅលើផែនការផ្ដល់ជំនួយសម្រាប់ WHO។

កាលពីខែមេសា លោក Trump បានប្រកាសកាត់ជំនួយសម្រាប់ WHO ដោយមូលហេតុថា អង្គការនេះបានឃុបឃិតជាមួយទីក្រុងប៉េកាំងក្នុងការលាក់បាំងភាពធ្ងន់ធ្ងររបស់COVID-19 នៅប្រទេសចិន បណ្ដាលឱ្យប្រទេសជាច្រើនត្រូវខាតពេលវេលាដ៏មានតម្លៃសម្រាប់ត្រៀមទប់ទល់នឹងវីរុសកូរ៉ូណា ព្រមទាំងនាំឱ្យមានការពន្យារពេលក្នុងការដាក់បម្រាមគោចរ។ លោក Trump សង្កត់ធ្ងន់ថា សហរដ្ឋអាមេរិកបានចំណាយប្រាក់450លានដុល្លារទៅឱ្យ WHO ខណៈដែលប្រទេសចិនផ្ដល់ជំនួយត្រឹមតែ38លានដុល្លារប៉ុណ្ណោះ។

ក្រោយពីលោក Trump បានគំរាមកាត់ជំនួយ ប្រធានអង្គការ WHO លោក Tedros ក៏បានសម្ដែងការសោកស្ដាយ និងបានអះអាងថា “អាមេរិកាំងគឺជាមិត្តយូរអង្វែង និងចិត្តទូលាយសម្រាប់ WHO” ហើយសង្ឃឹមថា ទីក្រុងវ៉ាស៊ីងតោននឹងបន្តផ្ដល់ជំនួយតទៅទៀត។

សាស្ត្រាចារ្យ Nahid Bhadelia ដែលជាអ្នកជំនាញខាងជំងឺឆ្លង មកពីសាកលវិទ្យាល័យ Boston នៃសហរដ្ឋអាមេរិក បានថ្លែងថា ការកាត់ជំនួយដល់ WHO ប្រៀបបានដូចជាគ្រោះមហន្តរាយមួយយ៉ាងដូច្នោះដែរ។ ចំណែកបក្សប្រជាធិបតេយ្យក៏បានរិះគន់លើប្រធានាធិបតីអាមេរិកាំង និងព្រមានថា វាអាចធ្វើឱ្យមានភាពស្មុគស្មាញកាន់តែខ្លាំងចំពោះការខិតខំរបស់ពិភពលោកដើម្បីទប់ទល់នឹងវីរុសនេះ។

សហរដ្ឋអាមេរិក បានរួមចំណែកផ្ដល់ជំនួយប្រហែល22% ក្នុងចំណោមជំនួយដែល WHO ទទួលបាន។ ក្នុងប៉ុន្មានឆ្នាំចុងក្រោយនេះ WHO ទទួលបានប្រាក់ជំនួយពីក្រសួងការបរទេស ក្រសួងសុខាភិបាល ស្ថាប័នការពារបរិស្ថាន និងទីភ្នាក់ងារអភិវឌ្ឍអន្តរជាតិរបស់សហរដ្ឋអាមេរិក។ ថវិកាទាំងនេះ ភាគច្រើនត្រូវបានប្រើប្រាស់ដើម្បីអនុវត្តយុទ្ធនាការលុបបំបាត់ជំងឺគ្រុនស្វិតដៃជើង និងជំនួយផ្នែកសុខាភិបាលទៅឱ្យបណ្ដាប្រទេសនៅអាហ្វ្រិក៕

ប្រភព៖ សារព័ត៌មានបរទេស

May 9, 2020

សហរដ្ឋអាមេរិកនឹងមិនបិទទ្វារសេដ្ឋកិច្ចជាតិជាលើកទីពីរនោះឡើយ បើទោះ COVID-19 ផ្ទុះឆ្លងខ្លាំងឡើងវិញក៏ដោយ

រដ្ឋាភិបាលសហរដ្ឋអាមេរិក លើកទឹកចិត្តឱ្យបណ្ដារដ្ឋ ប្រញាប់បើកទ្វារសេដ្ឋកិច្ចឡើងវិញដើម្បីកុំឱ្យវិស័យនេះទទួលរងផលប៉ះពាល់ធ្ងន់ធ្ងរបន្ថែមទៀត។

យោងតាមស្ថិតិនៅលើគេហទំព័រ Worldometers ក្នុងអំឡុង24ម៉ោងចុងក្រោយនេះ ចំនួនអ្នកស្លាប់ដោយសារ COVID-19 នៅសហរដ្ឋអាមេរិកមានចំនួនជាង1,600នាក់ ធ្វើឱ្យតួលេខអ្នកស្លាប់សរុបរបស់ប្រទេសនេះឡើងដល់ជាង78,500នាក់។ តួលេខនៃអ្នកជំងឺកូរ៉ូណានេះក៏កើនជាង27,400នាក់ នាំឱ្យតួលេខនៃអ្នកជំងឺCOVID-19សរុបឡើងដល់ជាង1.32លាននាក់។

បើទោះជាស្ថិតិនៃអ្នកជំងឺថ្មី និងអ្នកស្លាប់ថ្មីចេះតែកើនឡើងខ្ពស់ពីមួយថ្ងៃទៅមួយថ្ងៃយ៉ាងណាក៏ដោយ បណ្ដារដ្ឋនៅអាមេរិក នៅតែបន្តបើកទ្វារសេដ្ឋកិច្ចឡើងវិញ ដើម្បីលើកស្ទួយខឿនសេដ្ឋកិច្ចប្រទេសជាតិក្នុងគ្រាដែលពលរដ្ឋរាប់ម៉ឺននាក់បានបាត់បង់ការងារ។ ប្រធានាធិបតី Donald Trump នៅដើមសប្ដាហ៍នេះបានថ្លែងថា សហរដ្ឋអាមេរិកត្រូវការបើកដំណើរការម៉ាស៊ីនសេដ្ឋកិច្ចឡើងវិញឱ្យបានឆាប់រហ័ស បើទោះជាលោកបានទទួលស្គាល់ថា ការបន្ធូរបន្ថយបម្រាមគោចរនឹងនាំឱ្យមានមនុស្សជាច្រើនត្រូវឆ្លងវីរុស និងស្លាប់បន្ថែមទៀតក៏ដោយ។

ឆ្លើយតបនឹងកិច្ចសម្ភាសជាមួយ Bloomberg កាលពីម្សិលមិញ ប្រធានឧត្តមក្រុមប្រឹក្សាសេដ្ឋកិច្ចជាតិនៃសហរដ្ឋអាមេរិក (United States National Economic Council) លោក Larry Kudlow ថ្លែងថា សហរដ្ឋអាមេរិកនឹងមិនបិទទ្វារសេដ្ឋកិច្ចជាលើកទីពីរនោះឡើយ សូម្បីតែក្នុងកាលៈទេសៈដែលវីរុសនេះផ្ទុះឆ្លងខ្លាំងសាជាថ្មី។

យោងតាមតួលេខរបស់ក្រសួងការងារសហរដ្ឋអាមេរិកដែលបានប្រកាសកាលពីម្សិលមិញ ពលរដ្ឋអាមេរិកាំងចំនួន20.5លាននាក់បានបាត់បង់ការងារនៅក្នុងខែមេសា បណ្ដាលឱ្យអត្រាបាត់បង់ការងារនៅប្រទេសនេះឡើងដល់14.7% ខណៈដែលក្នុងខែមីនាមានត្រឹមតែ4.4%។ នេះគឺជាអត្រាបាត់បង់ការងារខ្ពស់បំផុតនៅសហរដ្ឋអាមេរិក រាប់ចាប់ពីសម័យមហាវិបត្តិសេដ្ឋកិច្ចក្នុងទសវត្សរ៍ឆ្នាំ1930។ COVID-19 បានកម្ទេចលទ្ធផលនៃការងារនៅសហរដ្ឋអាមេរិកដែលទទួលបានក្នុងអំឡុង1ទសវត្សរ៍កន្លងមកនេះ៕

ប្រភព៖ សារព័ត៌មានបរទេស

May 9, 2020

ជំនួយការរបស់អនុប្រធានាធិបតីអាមេរិកាំង ឆ្លងវីរុសCOVID-19

លេខាផ្នែកសារព័ត៌មានរបស់អនុប្រធានាធិបតីសហរដ្ឋអាមេរិក បានឆ្លងវីរុសCOVID-19។ នេះគឺជាបុគ្គលិកទី2របស់សេតវិមាន ដែលវិជ្ជមានជាមួយវីរុសកូរ៉ូណានេះ បន្ទាប់ពីអ្នកបម្រើផ្ទាល់របស់ប្រធានាធិបតី Donald Trump។

ទីភ្នាក់ងារសារព័ត៌មាន Reuters បានចេញផ្សាយថា ជំនួយការផ្នែកសារព័ត៌មានរបស់អនុប្រធានាធិបតី Mike Pence គឺលោកស្រី Katie Miller ទទួលបានលទ្ធផលវិជ្ជមានបន្ទាប់ពីបានធ្វើតេស្តរកមេរោគកូរ៉ូណា។ ដំណឹងក្ដៅមួយនេះត្រូវបានប្រធានាធិបតី Trump ប្រកាសក្នុងកិច្ចប្រជុំមួយជាមួយតំណាងរាស្ត្រមកពីបក្សសាធារណរដ្ឋកាលពីថ្ងៃទី8ឧសភា។

“Katie Miller ទទួលបានលទ្ធផលអវិជ្ជមានក្នុងមួយរយៈពេលវែង ប៉ុន្តែថ្ងៃនេះ លោកស្រីទទួលបានលទ្ធផលវិជ្ជមាន” លោក Trump បានថ្លែងបែបនេះ និងបន្ថែមថា លោកមិនបាននៅក្បែរលេខារូបនេះនោះទេ ក្នុងអំឡុងពេលថ្មីៗនេះ។

លោកស្រី Katie Miller គឺជាភរិយារបស់លោក Stephen Miller ដែលជាទីប្រឹក្សាជិតស្និទ្ធរបស់លោកប្រធានាធិបតី Donald Trump។ លោកស្រី Katie Miller តែងតែមានទំនាក់ទំនងផ្ទាល់ជាមួយនឹងអ្នកសារព័ត៌មានរបស់សេតវិមាន។

Katie Miller គឺជាបុគ្គលិកទីពីររបស់សេតវិមាន ដែលបានឆ្លងវីរុសCOVID-19។ មុននោះ ទាហានពិសេសម្នាក់មកពីកងទ័ពជើងទឹក ដែលជាអ្នកបម្រើផ្ទាល់របស់លោក Trump នៅឯសេតវិមាន ក៏ត្រូវបានរកឃើញថាមានផ្ទុកវីរុសកូរ៉ូណានេះដែរ។ ព័ត៌មានចុងក្រោយពីសេតវិមាន បានឱ្យដឹងថា ទាំងប្រធានាធិបតី និងអនុប្រធានាធិបតី សុទ្ធតែបានធ្វើតេស្តរួចហើយ និងទទួលបានលទ្ធផលអវិជ្ជមានជាមួយ COVID-19៕

ប្រភព៖ សារព័ត៌មានបរទេស

May 9, 2020

Category: សុខភាព