Category: សុខភាព

រុស្ស៊ីជាសម្បុកមេរោគធំជាងគេលំដាប់ទី2ក្នុងពិភពលោក! រដ្ឋមន្ត្រីក្រសួងការបរទេសថាមិនបានលាក់បាំងតួលេខ ខណៈអភិបាលក្រុងម៉ូស្គូថាចំនួនអ្នកឆ្លងអាច…
ប្រទេសរុស្ស៊ីបានក្លាយជាសម្បុកមេរោគCOVID-19 ធំជាងគេលំដាប់ទី2ក្នុងពិភពលោកបន្ទាប់ពីសហរដ្ឋអាមេរិក ដោយមានអ្នកជំងឺសរុបជាង281,700នាក់។
ជាសម្បុកមេរោគកូរ៉ូណាធំជាងគេលំដាប់ទី2ក្នុងសកលលោក ប្រទេសរុស្ស៊ីមានអ្នកជំងឺCOVID-19 សរុប281,752នាក់ ក្នុងនោះមានអ្នកជំងឺថ្មី 9,709នាក់។ អ្នកដែលបានស្លាប់ដោយសារវីរុសកូរ៉ូណានៅប្រទេសនេះក៏បានកើនដល់2,631នាក់ បន្ទាប់ពីមានអ្នកស្លាប់ថ្មី94នាក់បន្ថែមទៀតក្នុងរយៈពេល24ម៉ោងចុងក្រោយនេះ។ អ្នកជំងឺដែលបានជាសះស្បើយមានចំនួន67,373នាក់។
រដ្ឋមន្ត្រីការបរទេសរុស្ស៊ី លោក Sergey Lavrov
សហព័ន្ធរុស្ស៊ី បានកាត់បន្ថយការរឹតត្បិតលើការដើរហើរ និងបានបញ្ចប់ការឈប់សម្រាកដែលមានប្រាក់ខែរបស់អ្នកធ្វើការភាគច្រើន ចាប់ពីថ្ងៃទី12ឧសភា។ រដ្ឋមន្ត្រីការបរទេសរុស្ស៊ី លោក Sergey Lavrov កាលពីថ្ងៃទី15ឧសភាបានអះអាងថា ប្រទេសនេះមិនបានលាក់បាំងតួលេខទាក់ទិននឹងវីរុសCOVID-19 នោះទេ ខណៈដែលអភិបាលក្រុងម៉ូស្គូ លោក Sergei Sobyanin បានព្រមានថា ទំហំនៃការឆ្លងរាលដាលរបស់មេរោគCOVID-19 នៅទីក្រុងម៉ូស្គូ អាចធំជាងតួលេខដែលបានរាយការណ៍ ព្រោះថា មានករណីជាច្រើនដែលអ្នកជំងឺមិនមានរោគសញ្ញា ដូច្នេះពួកគេមិនដឹងថាខ្លួនបានឆ្លងវីរុសនេះ ហើយក៏បន្តចម្លងទៅអ្នកដទៃដោយអចេតនា។
អភិបាលក្រុងម៉ូស្គូ លោក Sergei Sobyanin
ពិភពលោកទាំងមូល បានរកឃើញអ្នកជំងឺ COVID-19 សរុបជាង4,798,000នាក់ និងអ្នកស្លាប់សរុបជាង316,500នាក់ ខណៈអ្នកជំងឺដែលបានជាសះស្បើយមានចំនួន 1,855,089នាក់។ នេះបើតាមស្ថិតិរបស់ Worldometer៕
ប្រភព៖ សារព័ត៌មានបរទេស
May 18, 2020
ជិង317,000នាក់ស្លាប់ដោយសារ COVID-19 នៅទូទាំងពិភពលោក
ពិភពលោកត្រូវបានគេរាយការណ៍ថា មានអ្នកស្លាប់ដោយសារវីរុសCOVID-19 ចំនួនជិត317,000នាក់ ក្នុងចំណោមអ្នកជំងឺជិត4.8លាននាក់។
ប្រទេសនិងដែនដីចំនួន213ក្នុងសកលលោក បានរកឃើញអ្នកជំងឺ COVID-19 សរុបចំនួន4,798,145នាក់ និងអ្នកស្លាប់សរុប316,507នាក់ ខណៈអ្នកជំងឺដែលបានជាសះស្បើយមានចំនួន 1,855,089នាក់។ នេះបើតាមស្ថិតិរបស់ Worldometer។
ទ្វីបអាមេរិកមានអ្នកជំងឺ COVID-19 ច្រើនជាងគេបង្អស់ ក្នុងនោះតំបន់អាមេរិកខាងជើងមានអ្នកជំងឺកូរ៉ូណាសរុប1,683,947នាក់ អាមេរិកខាងត្បូងមាន440,182នាក់ ខណៈអឺរ៉ុបមាន1,780,753នាក់ អាស៊ីមាន798,308នាក់ និងទ្វីបអាហ្វ្រិកមាន86,376នាក់។
បណ្ដាប្រទេសដែលមានអ្នកជំងឺកូរ៉ូណាច្រើនជាង100,000នាក់ មានចំនួន10ប្រទេស រួមមាន៖ សហរដ្ឋអាមេរិក រុស្ស៊ី អេស្ប៉ាញ អង់គ្លេស ប្រេស៊ីល អ៊ីតាលី បារាំង អាល្លឺម៉ង់ ទួរគី និងអ៊ីរ៉ង់៕
ប្រភព៖ សារព័ត៌មានបរទេស
May 18, 2020
អាមេរិកាំងនឹងផ្ដល់ជំនួយដល់ WHO ឡើងវិញ ទៅតាមអ្វីដែលចិនបានធ្វើ
រដ្ឋាភិបាលអាមេរិកាំងត្រូវបានគេរាយករណ៍ថានឹងផ្ដល់ជំនួយដល់អង្កការសុខភាពពិភពលោក(WHO) ឡើងវិញ ប៉ុន្តែ មិនមែនក្នុងទំហំទឹកប្រាក់ដ៏ច្រើនសន្ធឹកដូចដើមនោះទេ។ នេះបើតាមសារព័ត៌មាន Fox News។
ទីភ្នាក់ងារសារព័ត៌មាន Fox News កាលពីថ្ងៃទី15ឧសភាកន្លងទៅ បានដកស្រង់ប្រភពព័ត៌មានពីលិខិតព្រាងដែលគ្រោងនឹងត្រូវបញ្ជូនទៅកាន់ប្រធានអង្គការសុខភពពិភពលោក (Tedros) បានឱ្យដឹងថា រដ្ឋបាលរបស់លោក Trump អាចនឹងផ្ដល់ជំនួយមួយផ្នែកដល់ WHO សាជាថ្មី។
ប្រភពខាងលើឱ្យដឹងថា សហរដ្ឋអាមេរិកត្រូវគេជឿថានឹង “យល់ព្រមផ្ដល់ជំនួយជាថវិកាប្រហាក់ប្រហែលនឹងអ្វីដែលប្រទេសចិនបានរួមចំណែកជួយដល់ WHO”។
Fox News សេសេរថា ប្រភពព័ត៌មានពីរដ្ឋាភិបាលសហរដ្ឋអាមេរិកបានបញ្ជាក់ថា លោក Trump ទំនងជាបាន “យល់ព្រមទៅតាមគម្រោងដែលបានគូសវាសនៅក្នុងលិខិតព្រាង” ប៉ុន្តែ មិនទាន់ចុះហត្ថលេខា។
ប្រធានាធិបតី Donald Trump បានផ្អាកផ្ដល់ជំនួយដល់ WHO កាលពីថ្ងៃទី14មេសា ដោយបានចោទអង្គការនេះថា កំពុងជួយដល់យុទ្ធនាការ “ផ្ដល់ព័ត៌មានមិនពិត” របស់ចិន អំពី COVID-19។ លោក Trump ប្រកាសថា អាមេរិកាំងនឹងបើកការស៊ើបអង្កេតទៅលើ WHO។ ក្រុមមន្ត្រីរបស់ WHO បានច្រានចោលការចោទប្រកាន់របស់អាមេរិកាំង ខណៈដែលចិនក៏បានអះអាងថា ខ្លួនមានតម្លាភាព។
សហរដ្ឋអាមេរិកគឺជាម្ចាស់ជំនួយធំបំផុតរបស់ WHO។ បើសិនជាសហរដ្ឋអាមេរិកផ្ដល់ជំនួយស្មើនឹងប្រទេសចិន នោះប្រភពថវិកានេះនឹងស្មើនឹង1/10នៃថវិកាសរុបដែលសហរដ្ឋអាមេរិកធ្លាប់បានផ្ដល់ឱ្យ WHO។ កន្លងមក អាមេរិកាំងធ្លាប់បានផ្ដល់ជំនួយជាមធ្យម 400លានដុល្លារ/ឆ្នាំ ទៅឱ្យអង្គការសុខភាពពិភពលោក។
យោងតាម Fox News លិខិតព្រាងនោះ មានឃ្លាសរសេរថា “ខ្ញុំជឿថា បើទោះជាមានកង្វះខាតខ្លះ ប៉ុន្តែ WHO នៅតែមានសក្ដានុពលធំធេង ហើយខ្ញុំចង់ឱ្យ WHO បង្ហាញអំពីសក្តានុពលនោះ ពិសេសគឺនៅក្នុងកាលៈទេសៈវិបត្តិទូទាំងពិភពលោកបែបនេះ។ នោះគឺជាមូលហេតុដែលខ្ញុំសម្រេចថា អាមេរិកាំងនឹងបន្តជាដៃគូសហការជាមួយ WHO។ ប្រទេសចិនកំពុងជំពាក់បំណុលពិភពលោកដ៏ធំសម្បើម ហើយពួកគេអាចចាប់ផ្ដើមបង់វិភាគទានឱ្យបានស្មើភាពគ្នាទៅឱ្យ WHO”។
លោក Trump ធ្លាប់បានចោទថា WHO គឺជាអាយ៉ងរបស់ចិន
លិខិតព្រាងបន្ថែមថា “បើសិនជាប្រទេសចិនបង្កើនជំនួយដល់ WHO យើងខ្ញុំក៏នឹងពិចារណាក្នុងការបង្កើនជំនួយ”។
កន្លងមក លោក Trump ធ្លាប់បានថ្លែងថា WHO ត្រូវតែទទួលខុសត្រូវចំពោះការដែល COVID-19 បានឆ្លងរាលដាលពេញពិភពលោក ព្រោះថា អង្គការនេះបានជឿជាក់លើការប្រកាសរបស់ចិនទាក់ទិននឹងកម្រិតនៃភាពធ្ងន់ធ្ងររបស់មេរោគរាតត្បាត នៅដំណាក់កាលដំបូង។
លោក Trump ធ្លាប់បានចោទថា “ពួកគេ (WHO) គឺជាអាយ៉ងរបស់ចិន។ យើងខ្ញុំបានផ្ដល់ជំនួយយ៉ាងច្រើនដល់ WHO គឺច្រើនជាងប្រទេសដទៃ។ ដូច្នេះ ខ្ញុំនឹងធ្វើការសម្រេចចិត្តក្នុងពេលឆាប់ៗខាងមុខ (ទាក់ទងនឹងខ្ទង់ជំនួយសម្រាប់ WHO)”។
មុននោះ ប្រធានាធិបតីអាមេរិកាំង លោក Donald Trump ក៏ធ្លាប់បានឱ្យដឹងថា សហរដ្ឋអាមេរិកបានចំណាយ450លានដុល្លារទៅឱ្យ WHO ខណៈដែលប្រទេសចិនបានចំណាយត្រឹមតែ38លានដុល្លារប៉ុណ្ណោះ។
ដោយបានចាប់ផ្ដើមផ្ទុះឆ្លងរាលដាលពីប្រទេសចិន បច្ចុប្បន្ន COVID-19 បានបណ្ដាលឱ្យមនុស្សជាង4.5លាននាក់ត្រូវឆ្លងរោគ និងជាង307,000នាក់បានបាត់បង់ជីវិត ក្នុងនោះសហរដ្ឋអាមេរិកគឺជាអ្នករងគ្រោះធ្ងន់ធ្ងរជាងគេ៕
ប្រភព៖ សារព័ត៌មានបរទស
May 16, 2020
ការរស់នៅក្នុងសភាពធម្មតាបែបគន្លងថ្មី ជាវិធីថ្មីដែលអាចធ្វើឱ្យពិភពលោកងាកមកប្រក្រតី
ការរស់នៅក្នុងសភាពធម្មតាបែបគន្លងថ្មី (New Normal life) អាចជាវិធីសាស្រ្តថ្មីក្នុងការកែប្រែពិពភលោកមកសភាពធម្មតាបើទោះបីជាមានវត្តមានជំងឺ Covid-19 នៅអូសបន្លាយយូរយ៉ាងណាក៏ដោយ។ បន្តិចទៀត ពិភពលោកអាចនឹងស្ថិតក្នុងស្ថានភាពប្រក្រតីឡើងវិញ មនុស្សម្នានៅតែអាចទាក់ទងគ្នាបាន រកស៊ីបាន និងធ្វើការងារបានជាធម្មតា គ្រាន់តែត្រូវអនុវត្តទម្លាប់នៃការរស់នៅថ្មី។
យើងសុទ្ធតែឃើញហើយថា ពិភពលោកមិនមែនទើបតែប្រែប្រួលលើកទី1 នោះទេ តែអ្វីដែលជាចំណុចសំខាន់គឺត្រង់ថាទោះស្ថិតក្នុងសភាពបែបណាក៏ដោយ មនុស្សនៅតែរកច្រកចេញឃើញដើម្បីបន្តរស់នៅក្នុងសភាពថ្មីម្យ៉ាងទៀត និងបន្តអភិវឌ្ឍជាប់ជានិច្ច។ សម្រាប់ករណី Covid-19 ក៏ដូចគ្នា ថ្វីត្បិតតែវាកាចសាហាវ និងឆ្លងលឿន តែមនុស្សនៅតែអាចរស់នៅក្នុងពិភពលោកដែលមានវត្តមានស្រមោលខ្មៅមួយនេះ។
មនុស្សប្រហែលជាត្រូវរស់នៅក្នុងសភាព “The Dance” (រាំ) ដែលអ្នកវិភាគធ្លាប់បានលើកឡើងដើម្បីកាត់បន្ថយហានិភ័យនៃការឆ្លង។ មានន័យថា ការរាំគឺត្រូវធ្វើតាមរបៀប តាមចង្វាក់ និងធ្វើដដែលៗទៅតាមវិន័យ និងរបៀបរាំដើម្បីកុំឱ្យប៉ះអ្នកដទៃ។ ហេតុនេះមនុស្សនៅតែអាចរស់នៅបាន និងធ្វើអ្វីគ្រប់យ៉ាងអាចប្រព្រឹត្តទៅដូចពីមុន គ្រាន់តែត្រូវបង្កើតទម្លាប់ថ្មីដោយការសម្អាតឱ្យបានច្រើនជាងមុន រក្សាគម្លាតសង្គមតែទាក់ទងគ្នាតាមវិធីថ្មី រកស៊ីជាមួយគ្នាតាមទម្លាប់ថ្មី និងធ្វើការតាមទម្លាប់ថ្មីជាដើម។ បន្តិចម្តងៗ ទម្លាប់ដដែលៗទាំងអស់នេះនឹងធ្វើឱ្យមនុស្សមានអារម្មណ៍ថាសាមញ្ញក្នុងការរស់នៅបែបទម្លាប់ថ្មី។
ជាទូទៅមនុស្សអាចរាំដោយរីករាយ និងគ្មានការនឿយហត់ទៅបានលុះត្រាតែ យើងមានវិន័យ អនុវត្តដូចគ្នា និងធ្វើទៅឱ្យស្រុះគ្នា បើមិនដូច្នោះទេ វានឹងធ្វើឱ្យឆាករាំទាំងមូលពោរពេញដោយភាពរញ៉េរញ៉ៃ របួស និងការឈឺចាប់។ ចំណុចនេះជាក្តីបារម្ភធំមួយសម្រាប់ស្ថានភាពជាក់ស្តែងនៅកម្ពុជា ដែលវង់រាំរបស់យើងហាក់មិនមានភាពស្រុះគ្នា។ មានអ្នកខ្លះអនវត្តទម្លាប់ថ្មីបានល្អ ខណៈអ្នកខ្លះទៀតឆាប់ភ្លេចខ្លួន ជុំគ្នាផឹកស៊ី គ្មានគម្លាតសង្គម ហើយក៏គ្មានគម្លាតបុគ្គលដែរ។ ចំណុចនេះអាចនឹងធ្វើឱ្យយើងលំបាកក្នុងការរស់នៅក្នុងជីវិតបែប The next normal ឬ New Normal life ហើយប្រឈមខ្ពស់ជាមួយនឹងរលកទី2នៃ Covid-19។ ហេតុនេះប្រសិនបើយើងចង់ឱ្យវង់រាំក្នុងប្រទេសយើងអាចអនុវត្តបានស្រុះគ្នា ហើយអ្វីៗឆាប់ប្រសើរឡើង សូមចួលរួមគ្នាផ្សព្វផ្សាយ និងអនុវត្តឱ្យត្រូវតាមវិន័យនៃការរាំ ដែលក្រសួសុខាភិបាលបានប្រកាសជារឿយៗ។ កុំភ្លេចខ្លួនឱ្យសោះបើចង់ឆាប់បានរស់ក្នុងជីវិតដែលស្រួលជាងនេះ!
May 16, 2020
ជាង308,000នាក់ស្លាប់ដោយសារCOVID-19 នៅទូទាំងពិភពលោក
ពិភពលោកទាំងមូលមានមនុស្សជាង308,000នាក់បានបាត់បង់ជីវិតដោយសារមេរោគកូវីដ-១៩ ក្នុងចំណោមអ្នកជំងឺសរុបជាង4.6លាននាក់។
ប្រទេសនិងដែនដីចំនួន213ក្នុងសកលលោក ត្រូវបានគេរាយការណ៍ថា មានអ្នកជំងឺសរុប4,619,489នាក់ និងអ្នកស្លាប់សរុប308,108នាក់ ក្នុងនោះមានអ្នកជំងឺថ្មី101,273នាក់ និងអ្នកស្លាប់ថ្មី5,142នាក់។ អ្នកជំងឺដែលបានជាសះស្បើយមានចំនួនជាង1.7លាននាក់។ នេះបើតាមស្ថិតិរបស់ Worldometer។
ប្រទេសដែលជាសម្បុកមេរោគធំជាងគេក្នុងពិភពលោក នៅតែជាសហរដ្ឋអាមេរិក ដោយមានអ្នកជំងឺកូរ៉ូណាសរុប1,482,524នាក់ និងអ្នកស្លាប់សរុប88,424នាក់ បន្ទាប់ពីបានរកឃើញអ្នកជំងឺថ្មី24,931នាក់ និងអ្នកស្លាប់ថ្មី1,512នាក់នៅក្នុងរយៈពេល24ម៉ោងចុងក្រោយនេះ។
ប្រទេសដែលមានអ្នកជំងឺCOVID-19 លើសពី200,000នាក់ មាន6ប្រទេស រួមមាន សហរដ្ឋអាមេរិក អេស្ប៉ាញ រុស្ស៊ី អង់គ្លេស អ៊ីតាលី និងប្រេស៊ីល៕
ប្រភព៖ សារព័ត៌មានបរទេស

May 16, 2020
មកដល់ថ្ងៃនេះកម្ពុជាអស់អ្នកជំងឺ Covid-19 ហើយ
ក្រសួងសុខាភិបាលនៅមុននេះបន្តិចបានចេញសេចក្តីប្រកាសថា អ្នកជំងឺ Covid-19 ទី 122 បានជាសះស្បើយហើយ និងមិនមានករណីវិជ្ជមានថ្មីនោះទេ។
ក្រសួងសុខាភិបាលបានបញ្ជាក់ថា អ្នកដែលបានជាសះស្បើយសរុបគឺ 122នាក់ ស្មើនឹង 100% ដោយក្នុងនោះក្រសួងនឹងផ្អាកមិនធ្វើសនិ្នសីទសារព័ត៌មាន រួមទាំងផ្អាកការចេញផ្សាយសេចក្តីជូនព័ត៌មានចាប់ពីថ្ងៃអាទិត្យទី 17 ខែឧសភា ស្អែកនេះតទៅ។ តែទោះជាយ៉ាងនេះក្តីក្រសួងបញ្ជាក់ថា ការផ្អាកធ្វើសន្និសីទសារព័ត៌មាននេះមិនមែនមានន័យថាការចម្លងវីរុស Covid-19 នៅកម្ពុជាត្រូវបានបញ្ចប់ជាស្ថាពរនោះទេ។ ថ្វីត្បិតតែករណីអ្នកជំងឺ Covid-19 ទី122 បានជាសះស្បើយ និងមិនមានករណីឆ្លងថ្មីក៏ពិតមែន តែហានិភ័យនៃការចម្លងវីរុស Covid-19 នៅតែមានចំពោះមុខយើងទាំងអស់គ្នានៅឡើយទេ ល្គឹកណាសកលលោក និងប្រទេសក្នុងតំបន់ នៅតែមានកំណើននៃករណីឆ្លងថ្មី ប្រទេសកម្ពុជានៅតែប្រឈមទៅនឹងហានិភ័យនៃការចម្លងជំងឺ Covid-19។
ជាសារអំពាវនាវ ក្រសួងសុខាភិបាលនៅតែក្រើនរំលឹក និងបន្តអំពាវនាវឱ្យប្រជាជនទាំងអស់ចូលរួមអនុវត្តវិធានការការពារខ្លួន។ សម្រាប់សត្ថកិច្ចគឺនៅតែត្រូវមានកិច្ចការអនុវត្តជាបន្តបន្ទាប់ ជាពិសេសការត្រួតពិនិត្យដោយហ្មត់ចត់នូវសុខភាពអ្នកដំណើរដែលចូលមកក្នុងប្រទេសកម្ពុជាដើម្បីចៀសវាងការនាំចូលវីរុស Covid-19 ហើយបុគ្គលគ្រប់រូបត្រូវតែប្រុងប្រយ័ត្ន និងអនុវត្តវិធានការការពារការចម្លង ដោយត្រូវកែប្រែទម្លាប់ និងឥរិយាបទនៃការរស់នៅឱ្យស្របទៅតាម សភាពធម្មតាបែបគន្លងថ្មី (new normal life) ក្នុងបរិបទប្រយុទ្ធនឹងជំងឺ Covid-19 ជាចាំបាច់ ដូចជាត្រូវសម្អាតដៃ ពាក់ម៉ាស់ ប្រើក្រម៉ា ឬក្រដាសជូតមាត់ខ្ទប់មាត់ពេលក្អកកណ្តាស បន្តអនុវត្តគម្លាតសុវត្ថិភាពសង្គម និងគម្លាតបុគ្គលជាដើម៕

May 16, 2020
8 វិធី ថែទាំខួរក្បាលឱ្យស្រស់ភ្លឺថ្លាជានិច្ច
នៅពេលមានអារម្មណ៍ថានឿយល្វើយ ខួរក្បាលមិនដំណើរការ សូមសាកល្បងមកមើលពីវិធីការថែទាំខួរក្បាលបែបងាយៗដើម្បីបង្កើនភាពស្រស់ស្រាយភ្លឺថ្លាឡើងវិញដូចខាងក្រោមនេះ។
1 – ទំនាក់ទំនងការងារខួរក្បាល ៈ ការសរសេរលេខ 8 ក្នុងអាកាសដោយដៃទាំងពីរខាង ម្ខាង 5 ដង ដោយចាប់ផ្តើមពីផ្នែកខាងឆ្វេងរបស់លេខជាមុន ហើយសរសេរវឹលឱ្យទៅជារាងលេខ 8 ។ វិធីនេះនឹងជួយបង្កើនប្រសិទ្ធភាពផ្នែកការអាន និងការបំពេញភាពយល់ដឹងកាន់តែល្អឡើង និងធ្វើឱ្យខួរក្បាលផ្នែកខាងឆ្វេង និងផ្នែកខាងស្តាំទំនាក់ទំនងការងារគ្នាបានល្អផង។
2 – ទឹកស្អាតចិញ្ចឹមខួរក្បាល ៈ ដាក់ដបទឹកនៅជិតតុធ្វើការរបស់អ្នកជាប្រចាំ និងលើកក្រេបម្តងបន្តិច វិធីនេះនឹងជួយឱ្យចិត្ត គំនិត និងរាងកាយរបស់លោកអ្នកស្វាហាប់គ្រប់ពេលវេលា ហើយខួរក្បាលក៏នឹងបើកស្រឡះ អាចទទួលព័ត៌មានបានល្អ ព្រោះទឹកនឹងជួយសម្រួលសារធាតុគីមីដែលសំខាន់នៅក្នុងខួរក្បាល និងប្រព័ន្ធប្រសាទ។ បើពេលណាដែលមានអារម្មណ៍ថាតានតឹងដោយសារខ្វះជាតិទឹកនោះ គួរតែក្រេបទឹកដើម្បីឱ្យរាងកាយបានទទួលជាតិទឹកដើម្បីទៅចិញ្ចឹមប្រព័ន្ធរបស់រាងកាយ។
3 – ធ្វើម៉ាស្សាលើចំណុចតភ្ជាប់ខួរក្បាល ៈ ដាក់ដៃម្ខាងលើរន្ធផ្ចឹត ដៃម្ខាងទៀតប្រើម្រាមមេដៃ និងម្រាមចង្អុលដៃដាក់នៅលើឆ្អឹងដើមទ្រូងម្តុំក្រោមឆ្អឹងស្លាបប្រចៀវ និងច្របាច់ថ្នមៗទាំងពីរទីតាំងប្រមាណជា 10 នាទី វិធីនេះនឹងជួយកាត់បន្ថយភាពភាន់ភាំង និងវឹលវល់ ជំរុញកម្លាំងថាមពល និងជួយឱ្យមានគំនិតស្រស់ថ្លា។
4 – ធ្វើចលនាសាច់ដុំស្មា ៈ យកដៃឆ្វេងចាប់ស្មាស្តាំ ច្របាច់សាច់ដុំឱ្យណែនព្រមទាំងដកដង្ហើមចូល បន្ទាប់មកដកដង្ហើមចេញ និងបែរទៅខាងឆ្វេងរហូតអាចមើលស្មាឆ្វេងរបស់ខ្លួនឯងឃើញ បន្ទាប់ពីនោះស្រូបដង្ហើមចូលវែងៗ ដាក់ដៃឆ្វេងលើស្មាស្តាំ ព្រមទាំងបង្រួមស្មា បែរក្បាលសន្សឹមៗត្រឡប់ទៅចំកណ្តាល និងបង្ហួសទៅខាងស្តាំ រហូតទាល់អាចមើលរំលងស្មាស្តាំរបស់អ្នកបាន។
ហែកស្មាទាំង 2 ខាងចេញ ឱនចង្កាមកទល់ដើមទ្រូង ព្រមទាំងស្រូបខ្យល់ដង្ហើមចូលឱ្យវែង ដើម្បីឱ្យសាច់ដុំរបស់អ្នកបានធូរស្រាល។
ប្តូរមកប្រើដៃស្តាំចាប់ស្មាឆ្វេងម្តង និងធ្វើដូចគ្នាម្ខាង 2 ដង វិធីនេះនឹងជួយចាត់ការសាច់ដុំត្រង់ផ្នែកបំពង់ក និងស្មា ការបានឮ ការស្តាប់ និងជួយកាត់បន្ថយភាពតានតឹងរបស់សាច់ដុំដែលបណ្តាលមកពីការអង្គុយនៅនឹងតុធ្វើការយូរពេកទៀតផង។
5 – ធ្វើម៉ាស្សាស្លឹកត្រចៀកជំរុញភាពយល់ដឹង ៈ វិធីនេះធ្វើបានដោយការអង្គុយសម្រាកសប្បាយៗ យកម្រាមដៃទាំងសងខាងប៉ះស្លឹកត្រចៀក រំកឹលម្រាមដៃទៅផ្នែកខាងលើរបស់ត្រចៀក បន្ទាប់ពីនោះច្របាច់ឈ្លីតាមស្នាមបត់របស់ស្លឹកត្រចៀកទាំង 2 ខាង រួចរំកឹលម្រាមដៃចុះមកម៉ាស្សានៅកន្លែងផ្សេងទៀតរបស់ស្លឹកត្រចៀក ទាញថ្នមៗ ពេលមកដល់ទងត្រចៀក ទាញចុះថ្នមៗ ចូរធ្វើដូចគ្នានេះដដែលៗ 2 ដង។ វិធីនេះនឹងជួយជំរុញការបានឮ និងធ្វើឱ្យការយល់ដឹងកាន់តែល្អឡើង ព្រោះជាការបន្ធូរសរសៃប្រសាទម្តុំស្លឹកត្រចៀកដែលភ្ជាប់ទៅខួរក្បាល។
6 – ធ្វើចលនាជើង ៈ ដោយការឈរត្រង់ឱ្យជើងជិតគ្នា ដកជើងឆ្វេងថយទៅក្រោយ ដោយលើកកែងជើងឡើង បញ្ជុចជង្គង់ស្តាំបន្តិច ហើយបង្អោនខ្លួនទៅមុខបន្តិច ត្រគៀករបស់លោកអ្នកនឹងស្ថិតនៅក្នុងជំហរដូចគ្នានឹងកែងជើងស្តាំ ស្រូបខ្យល់ដង្ហើមចូល និងបន្ធូរចេញ តែក្នុងខណៈព្រលែងខ្យល់ដង្ហើមចេញវិញនេះ ចូរសង្កត់កែងជើងឆ្វេងឱ្យប៉ះនឹងកម្រាលឥដ្ឋ ព្រមទាំងបញ្ជុចជង្គង់ស្តាំថែមឡើង ខ្នងយឹតត្រង់ ស្រូបខ្យល់ដង្ហើមចូល ហើតត្រឡប់ទៅចាប់ផ្តើមម្តងទៀត ដោយប្តូរពីជើងឆ្វេងមកជាជើងស្តាំម្តង និងហាត់ប្រាណក្នុងក្បាច់នេះទាំងអស់ 3 ដង។ ការធ្វើចលនាក្បាច់នេះស័ក្តិសមសម្រាប់ការកែសម្រួលសមាធិ រួមទាំងជួយបង្កើនល្បឿនក្នុងការអានសៀវភៅ និងនៅជួយឱ្យសាច់ដុំភ្លៅ និងសាច់ដុំកំភួនជើងបានធូរស្រាលទៀតផង។
7 – សង្កត់ចំណុចបន្ធូរភាពធុញថប់តានតឹង ៈ ប្រើម្រាមដៃ 2 សង្កត់លើថ្ងាសទាំង 2 ខាង ចំកណ្តាលចន្លោះរោមចិញ្ចើម និងជើងសក់ សង្កត់ឱ្យជាប់ទុកប្រមាណជា 3 – 10 នាទី វិធីនេះនឹងជួយបន្ធូរភាពធុញថប់តានតឹង និងបង្កើនការហូរវឹលរបស់លោហិតចូលក្នុងខួរក្បាលឱ្យបានល្អផងដែរ។
8 – ធ្វើចលនាខួរក្បាលដោយការសរសេរ ៈ គូសខ្សែចុះឡើងដោយដៃទាំង 2 ខាងដំណាលៗគ្នា រូបគំនូរខ្សែដែលគូរអាចនឹងមើលទៅរាងផ្លែកៗមែន តែបានផលល្អចំពោះប្រព័ន្ធខួរក្បាលខ្លាំងណាស់ វិធីនេះនឹងជួយឱ្យកើតការកែសម្រួលការសហការគ្នាធ្វើការរបស់ខួរក្បាល ដោយការធ្វើឱ្យខួរក្បាលទាំង 2 ខាងធ្វើការព្រមគ្នា និងបង្កើនភាពចំណានខាងការប្រកបពាក្យ និងគណនាលេខល្អ និងឆាប់រហ័សឡើងទៀតផង៕
May 15, 2020
ក្នុងពេលទប់ស្កាត់ Covid-19 អាណាព្យាបាលគួរស្វែងយល់ពីវិធីអប់រំឥរិយាបទរបស់កូនឱ្យបានល្អ
ក្នុងដំណាក់កាលដែលពិភពលោកកំពុងប្រយុទ្ធប្រឆាំងនឹងជំងឺ Covid-19 កុមារជាច្រើននាក់បានសម្រាកនៅក្នុងផ្ទះ ដោយសារតែសាលារៀនមិនបានបើកទ្វា។ បញ្ហានេះ បានធ្វើឱ្យអាណាព្យាបាលជាច្រើនមានពេលវេលាក្នុងការសង្កេត និងអប់រំកូនតូចៗនៅក្នុងផ្ទះឱ្យបានដិតដល់។ វាក៏ជាឱកាសដ៏សំខាន់ផងដែរក្នុងការទប់ស្កាត់ចរិតមិនល្អ ហើយកែប្រែពួកគេឱ្យក្លាយជាមនុស្សដែលមានឥរិយាបថល្អវិញ។
អង្គការ Save The Children បានលើកឡើងថា កុមារទាំងអស់សុទ្ធតែមានឥរិយាបថមិនល្អ។ វាជារឿងធម្មតាដែលកុមារហត់នឿយ ឃ្លាន ខ្លាច ឬមិនឯករាជ្យ ហើយពួកគេចូលចិត្តរំខាន និងធ្វើឱ្យយើងខឹងពេលពួកគេនៅផ្ទះ។
ដើម្បីដោះស្រាយបញ្ហាទាំងអស់នេះ អាណាព្យាបាលគួរចេះអប់រំកូនដោយការប្រើប្រាស់វិធីមួយចំនួនដើម្បីអប់រំ និងកែប្រែកុមារដូចជាវិធីសាស្រ្តបង្វែរឥរិយាបថមិនល្អ ចេះសម្រាកទប់អារម្មណ៍ កំណត់វិន័យ និងគន្លឹះមួយចំនួនផ្សេងទៀត។ អង្គការ Save The Children បានណែនាំថា អាណាព្យាបាលគួរចេះកត់សម្គាល់ឥរិយាបថមិនល្អរបស់ក្មេងឱ្យបានឆាប់ ហើយបង្វែរចំណាប់អារម្មណ៍របស់កូនអ្នកពីឥរិយាបថមិនល្អឱ្យទៅជាល្អឱ្យបានឆាប់រហ័ស។ ចំណុចមួយផ្សេងទៀតគឺនៅពេលពួកគេចាប់ផ្តើមលែងនៅស្ងៀម អាណាព្យាបាលអាចបង្វែរចំណាប់អារម្មណ៍របស់ពួកគេដោយសកម្មភាពគួរឱ្យចាប់អារម្មណ៍ ឬសប្បាយ ដូចជាការហៅពួកគេឱ្យទៅលេងខាងក្រៅ ឬធ្វើសកម្មភាពណាដែលមានប្រយោជន៍វិញម្តង។
ចំណុចសំខាន់ផ្សេងទៀតគឺ ការកំណត់វិន័យ ព្រោះវិធីនេះអាចជួយបង្រៀនក្មេងៗឱ្យចេះទទួលខុសត្រូវចំពោះអ្វីដែលខ្លួនបានធ្វើ។ វាជាការដាក់ពិន័យមួយដែលអាចគ្រប់គ្រងបាន និងមានប្រសិទ្ធភាពជាងការវាយ ឬស្រែក។ ក្នុងវិធីនេះអាណាព្យាបាលអាចផ្តល់ឱកាសដល់កូនៗដើម្បីធ្វើការណែនាំមុននឹងផ្តល់ការពិន័យដល់ពួកគេ។ ចំពោះឥរិយាបថនៃការដាក់ពិន័យ អាណាព្យាបាលគួរព្យាយាមកុំឆេវឆាវ និងធានាថាការដាក់ពិន័យនោះកុមារអាចធ្វើបានដោយមិនប៉ះពាល់ធ្ងន់ធ្ងរ។ នៅពេលការដាក់ពិន័យត្រូវបានបញ្ចប់ ប្រសិនបើកុមារបានធ្វើល្អគួរមានការលើកសរសើរ។
វិធីម្យ៉ាងទៀតដែលអាណាព្យាបាលគួរធ្វើគឺ ចេះសម្រាកទប់ចិត្តនៅពេលកូនៗរពឹសខ្លាំងពេក។ ប្រសិនបើយើងមានអារម្មណ៍ថាចង់ស្រែក គួរទប់ខ្លួនឯងសម្រាកដកដង្ហើមវែងៗឱ្យបាន10វិនាទីសិន បន្ទាប់មកព្យាយាមឆ្លើយតបដោយវិធីស្ងប់ស្ងាត់៕
May 15, 2020
ក្នុងស្ថានភាពនេះបើមានបញ្ហាព្រួយបារម្ភ គេងមិនលក់ ពិបាកផ្លូវចិត្តខ្លាំងអាចរកសេវាប្រឹក្សាផ្លូវចិត្តដោយឥតគិតថ្លៃពី TPO
នៅក្នុងដំណាក់កាលនៃការប្រយុទ្ធប្រឆាំងនឹងជំងឺ Covid-19 នេះ ប្រជាជនជាច្រើនហាក់មានភាពតក់ស្លុត នឿយហត់ ស្មុគស្មាញ ឬព្រួយបារម្ភពីបញ្ហានានាដូចជាបញ្ហាគ្រួសារ ការភ័យខ្លាចចំពោះជំងឺ និងបញ្ហាហិរញ្ញវត្ថុជាដើម។
ដើម្បីចូលរួមចំណែកដោះស្រាយបញ្ហាដ៏លំបាកទាំងអស់នេះកម្មវិធីសុខភាពផ្លូវចិត្ត (TPO) នៃអង្គការចិត្តសង្គម អន្តរវប្បធម៌ បានបង្កើតកម្មវិធីប្រឹក្សាផ្លូវចិត្តមួយតាមរយៈលេខទូស័ព្ទសម្រាប់ប្រជាជនគ្រប់គ្នាដោយឥតគិតថ្លៃ។
អង្គការខាងលើបានបញ្ជាក់ថា ក្នុងអំឡុងពេលមានបញ្ហាដែលមិនធ្លាប់មានពីមុនមក ការគាំទ្រផ្លូវចិត្តដល់ជនងាយរងគ្រោះ ក្រុមគ្រួសារ និងសហគមន៍គឺពិតជាចាំបាច់ក្នុងកាលៈទេសៈនេះ។ តាមរយៈការប្រើប្រាស់ប្រព័ន្ធទំនាក់ទំនងឆ្លាតវៃ អង្គការ TPO បានបំពេញសេវាដ៏មានសារៈសំខាន់សម្រាប់សហគមន៍ តាមរយៈការប្រឹក្សាយោបល់ផ្នែកផ្លូវចិត្តជូនដោយឥតគិតថ្លៃ។
អាការៈដែលប្រជាជនអាចនឹងកើតឡើងគឺំមានដូចជាភ័យខ្លាច ព្រួយបារម្ភ ពិបាកចិត្តឬស្ត្រេស គ្មានកម្លាំង ហត់នឿយ នឿយណាយ វិលវល់ ឆាប់ខឹង មួម៉ៅច្រើន អារម្មណ៍សន្ធប់ ក្រៀមក្រំ មិនរីករាយ និងមានអារម្មណ៍ថាមានវិប្បដិសារីជាដើម។ ប្រសិនបើអ្នកមានអារម្មណ៍ថាពិបាកទ្រាំ មិនថាអ្នកជាមនុស្សធំ ក្មេងជំទង់ ឬជាកុមារក៏ដោយ អាចទូរស័ព្ទមកកាន់លេខ 017 222 372/ 089 666 325/ 097 9111 918 ចាប់ពីម៉ោង8 ព្រឹក ដល់ម៉ោង 10យប់៕

May 15, 2020
Trump មិនពាក់ម៉ាស់ទៀតហើយ ពេលកំពុងធ្វើទស្សនកិច្ចមន្ទីរផ្គត់ផ្គង់សម្ភារវេជ្ជសាស្ត្រ ខណៈអ្នកស្លាប់ក្នុងប្រទេសនេះកើនដល់ជាង 86,900នាក់
លោក Donald Trump មិនបានពាក់ម៉ាស់ការពារវីរុស នៅពេលដែលលោកកំពុងធ្វើទស្សនកិច្ចមជ្ឈមណ្ឌលគ្រប់គ្រងសម្ភារវេជ្ជសាស្ត្រនៅក្នុងរដ្ឋ Pennsylvania ខណៈដែលមនុស្សនៅជុំវិញ សុទ្ធតែពាក់ម៉ាស់ការពារ។
ប្រធានាធិបតីសហរដ្ឋអាមេរិក Donald Trump កាលពីថ្ងៃទី14ឧសភាកន្លងទៅ បានធ្វើទស្សនកិច្ចនៅមជ្ឈមណ្ឌលគ្រប់គ្រងសម្ភារវេជ្ជសាស្ត្រ Owens & Minor Inc នៅក្នុងរដ្ឋ Pennsylvania ជាកន្លែងផ្គត់ផ្គង់ម៉ាស់ប្រភេទ N95 និងខោអាវការពារមេរោគ រួមនឹងស្រោមដៃសុខាភិបាលដល់បណ្ដាមន្ទីរពេទ្យនៅសហរដ្ឋអាមេរិក។
រូបថតស្ដីអំពីដំណើរទស្សនកិច្ចនេះបង្ហាញថា ម្ចាស់សេតវិមានរូបនេះមិនបានពាក់ម៉ាស់នោះទេ ក្នុងពេលដែលមន្ត្រីអមដំណើរ និងបុគ្គលិករបស់មជ្ឈមណ្ឌលនេះសុទ្ធតែពាក់ម៉ាស់គ្រប់គ្នា។ នេះគឺជាលើកទីពីរហើយដែលលោក Trump មិនបានពាក់ម៉ាស់ក្នុងខណៈពេលធ្វើទស្សនកិច្ចមជ្ឈមណ្ឌលក្នុងវិស័យសុខាភិបាលនៅក្នុងអំឡុង10ថ្ងៃចុងក្រោយនេះ។ កាលពីថ្ងៃទី6ឧសភា លោកក៏មិនបានពាក់ម៉ាស់ដែរ នោពេលធ្វើទស្សនកិច្ចរោងចក្រ Honeywell។
ក្នុងគ្រានោះដែរ លោក Trump បានប្រកាសអំពីគម្រោងបន្ថែមទំនិញទៅក្នុងឃ្លាំងរក្សាសម្ភារវេជ្ជសាស្ត្រយុទ្ធសាស្ត្ររបស់សហរដ្ឋអាមេរិក ដែលបច្ចុប្បន្នមានការខ្វះខាតច្រើនដោយសារវីរុសCOVID-19។ លោក Trump ថែមទាំងបានចោទអតីតរដ្ឋាភិបាលរបស់លោក Barack Obama ថា បានបន្សល់ទុកផលវិបាកនេះដល់រដ្ឋាភិបាលបច្ចុប្បន្ន។ លោក Trump អះអាងថា នឹងស្វែងរកវិធីដើម្បីរក្សាសម្ភារវេជ្ជសាស្ត្រឱ្យបានគ្រប់គ្រាន់សម្រាប់ប្រើប្រាស់ក្នុងរយៈពេល3ខែ ដែលបច្ចុប្បន្នឃ្លាំងនេះអាចផ្គត់ផ្គង់ការប្រើប្រាស់បានតែរយៈពេល3សប្ដាហ៍ប៉ុណ្ណោះ។
ម្ចាស់សេតវិមានថ្លែងថា “ខ្ញុំប្ដេជ្ញាជួយឱ្យសហរដ្ឋអាមេរិកមានលទ្ធភាពគ្រប់គ្រាន់សម្រាប់ទប់ទល់នឹងជំងឺរាតត្បាតនាពេលអនាគត ហើយខ្ញុំសង្ឃឹមថា បញ្ហា (ជំងឺរាតត្បាត) នោះនឹងមិនកើតឡើងនោះទេ”។
ប្រភពព័ត៌មានបានឱ្យដឹងថា ប្រព័ន្ធសុខាភិបាលសហរដ្ឋអាមេរិកមានម៉ាស់ប្រភេទ N95 ប្រហែលតែ13លានបន្ទះប៉ុណ្ណោះនៅមុន COVID-19 ផ្ទុះឡើង។ ក្រុមមន្ត្រីជាន់ខ្ពស់របស់រដ្ឋាភិបាលអាមេរិកាំង កាលពីម្សិលមិញនិយាយថា ពួកគេកំពុងតែមានគម្រោងរកម៉ាស់ឱ្យបាន300លានបន្ថែមទៀតនៅមុនដំណាច់រដូវស្លឹកឈើជ្រុះ។
ចាប់តាំងពីមជ្ឈមណ្ឌលគ្រប់គ្រងនិងទប់ស្កាត់ជំងឺរបស់សហរដ្ឋអាមេរិក(Centers for Disease Control and Prevention) បានណែនាំឱ្យអ្នកគ្រប់គ្នាពាក់ម៉ាស់នៅទីសាធារណៈ គេឃើញថា លោក Trump បានប្រតិកម្មជាច្រើនលើកថា នោះជាប្រការ “មិនមានន័យ និងមិនស័ក្ដិសមជាមួយឋានៈជាមេដឹកនាំមួយរូបក្នុងពិភពសេរីភាព”។
វេជ្ជបណ្ឌិត Viswanath សាស្ត្រាចារ្យសារព័ត៌មានវេជ្ជសាស្ត្រមកពីមជ្ឈមណ្ឌលសិក្សាស្រាវជ្រាវផ្នែកវេជ្ជសាស្ត្រសាធារណៈ Harvard T.H. Chan របស់ឥណ្ឌាបានថ្លែងថា អ្នករាល់គ្នានឹងសង្កេតមើលសកម្មភាពរបស់អ្នកដឹកនាំដែលបានធ្វើផ្ទុយទៅនឹងការណែនាំដែលពួកគេបានលើកឡើង។ លោកថា “ក្នុងស្ថានភាពអាក្រក់បំផុត បញ្ហានេះអាចធ្វើឱ្យសាធារណជនសង្ស័យថា តើវិធានការ ឬសារណែនាំសម្រាប់ពួកគេពិតជាមានសារសំខាន់ ឬអត់”។
COVID-19 បានបង្ហាញខ្លួននៅក្នុងប្រទេសនិងដែនដីចំនួន212ក្នុងពិភពលោក បណ្ដាលឱ្យមនុស្សជាង4.5លាននាក់ត្រូវឆ្លងវីរុស និងជាង300,000នាក់បានស្លាប់។ សហរដ្ឋអាមេរិកគឺជាសម្បុកមេរោគធំជាងគេបង្អស់ក្នុងពិភពលោក ដោយមានអ្នកជំងឺកូរ៉ូណាជាង1.5លាននាក់ និងអ្នកស្លាប់ជាង 86,900នាក់៕
ប្រភព៖ សារព័ត៌មានបរទេស
May 15, 2020